វល័ក្ខ - La Reine Media

កម្ពុជាត្រូវការមនុស្សដែលមានគំនិតច្នៃប្រឌិត និងបង្កើតអ្វីដែលថ្មី

គំនិតច្នៃប្រឌិត ជាផ្នែកដ៏សំខាន់មួយក្នុងការដោះស្រាយបញ្ហាមនុស្ស និងរុញច្រានពិភពលោកឱ្យស្ថិតក្នុងស្ថានភាពកាន់តែប្រសើរឡើង តាមរយៈសមិទ្ធផលប្រកបដោយគុណតម្លៃនានាដែលត្រូវបានគេផលិតឡើងតាមរយៈគំនិតប្លែកៗទាំងអស់នោះ។

នៅកម្ពុជា ក្រៅពីជំរុញយុវជនជំនាន់ថ្មីឱ្យស្រឡាញ់មុខវិជ្ជាវិទ្យាសាស្ត្រពិត STEM និងជំនាញបច្ចេកទេសដើម្បីបំពេញទីផ្សារការងារ និងទាក់ទាញការវិនិយោគហើយនោះ ជំនាញច្នៃប្រឌិត ឬនវានុវត្តន៍ក៏ជាចំណុចសំខាន់មួយដែលកម្ពុជាកំពុងត្រូវការ ព្រោះជំនាញនេះអាចជំរុញប្រទេសយើងឱ្យមានសម្ទុះលឿន ស្របពេលដែលរដ្ឋាភិបាលកំពុងជំរុញគោលនយោបាយអភិវឌ្ឍន៍វិស័យឧស្សាហកម្ម។

ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានលើកឡើងថា ការធ្វើកំណែទម្រង់ប្រព័ន្ធអប់រំ ជាចំណុចចាប់ផ្តើមយ៉ាងសំខាន់មួយដែលជំរុញឱ្យសិស្សានុសិស្សកម្ពុជា ព្យាយាមប្រើប្រាស់ចំណេះដឹងពិតប្រាកដដើម្បីអភិវឌ្ឍខ្លួនឯង និងបោះជំហានទៅជាប្រជាជនសកម្ម ឬជាធនធានមនុស្សដ៏សំខាន់សម្រាប់កម្ពុជា។ ចាប់ផ្តើមពីមូលដ្ឋានគ្រឹះនៃការអប់រំ ពីថ្នាក់មធ្យមសិក្សា និងឧត្តមសិក្សា សិស្ស-និស្សិតកម្ពុជាគួរចាប់ផ្តើមបង្កើតជាក្លិបសិក្សា ឬផ្លាស់ប្តូររបៀបសិក្សាពីការរៀនបែបធម្មតា មកធ្វើការស្រាវជ្រាវដើម្បីបំបែកចេញជាគំហើញថ្មីៗទាក់ទងនឹងវិស័យវិទ្យាសាស្ត្រដើម្បីជួយដោះស្រាយបញ្ហាសំខាន់ៗនៅក្នុងសង្គម។

ឯកឧត្តម ហង់ ជួនណារ៉ុន បានមានប្រសាសន៍ថា ៖ “សិស្ស-និស្សិតគួរចាប់ផ្តើមសិក្សាឱ្យដល់ឬសគល់នៃចំណេះដឹង ហើយព្យាយាមស្រាវជ្រាវឱ្យបានច្រើនដើម្បីយកទ្រឹស្តី ទាំងនោះ ទៅបង្កើតជាសមិទ្ធផល ឬគំហើញថ្មី។ វិស័យកសិកម្ម ក៏ជាវិស័យសំខាន់មួយដែរ និស្សិតគួរស្រាវជ្រាវថា ធ្វើយ៉ាងម៉េចដើម្បីឱ្យទទួលបានទិន្នផលច្រើន ហើយមានវិធីឆ្លាតវៃអ្វីខ្លះដើម្បីឱ្យមានភាពងាយស្រួលកាន់តែខ្លាំងក្នុងការរស់នៅជាដើម។

លោករដ្ឋមន្ត្រីក្រសួងអប់រំ ក៏បានបញ្ជាក់ផងដែរថា នៅពេលដែលយើងមានធនធានមនុស្សដែលអាចមានសមត្ថភាពក្នុងការបង្កើតអ្វីដែលថ្មីបាន ពួកគេក៏អាចសហការជាមួយនឹងអ្នកជំនាញ ឬបង្កើតវាទៅជាអាជីវកម្មខ្នាតតូច និងមធ្យម (SME)ឡើងដើម្បីទាក់ទាញធនធានមនុស្សបានច្រើនថែមទៀតផង។ ម្យ៉ាងវិញទៀត ការបង្កើតអ្វីដែលថ្មី និងមានគំនិតច្នៃប្រឌិត រួមទាំងភាពជាអ្នកដឹកនាំផង ក៏ជាគុណសម្បត្តិពិសេសក្នុងការទាក់ទាញអ្នកវិនិយោគឱ្យចាប់អារម្មណ៍កាន់តែខ្លាំងនៅកម្ពុជាព្រោះអ្នកវិនិយោគបានសម្លឹងឃើញពីលក្ខណៈពិសេសរបស់កម្ពុជាជាច្រើន តែពួកគេក៏ត្រូវការធនធានមនុស្សដែលអាចធ្វើការងារបាន និងយល់ពីគេបានច្រើនផងដែរ។

យុវជនមួយក្រុមកំពុងសង្កេតមើលស្នាដៃផ្នែកបច្ចេកវិទ្យាបង្កើតថ្មី

សហគ្រិនកម្ពុជា ដែលបានបង្កើតសមិទ្ធផលឥដ្ឋបរិស្ថាន និងគម្រោងផ្ទះតាមក្តីប្រាថ្នា លោកហាវ គង់ងី បានលើកឡើងថា នវានុវត្តន៍សំខាន់ខ្លាំងណាស់សម្រាប់ប្រជាជនកម្ពុជា ព្រោះនៅក្នុងប្រទេសកំពុងអភិវឌ្ឍន៍ ប្រជាជនជាច្រើនមិនអាចប្រើប្រាស់ផលិតផលដែលប្រទេសអភិវឌ្ឍន៍បានបង្កើត ដូចជាទូរស័ព្ទទំនើប ឬសម្ភារប្រើប្រាស់ផ្សេងៗដែលមានតម្លៃថ្លៃៗនោះទេ តែត្រូវការជំនួយពីនវានុវត្តន៍សំខាន់ៗមួយចំនួនដែលត្រូវនឹងកម្រិតជីវភាពរបស់ពួកគាត់។ អ្វីដែលយើងគួរធ្វើ គឺស្វែងរកគំហើញថ្មី ឬផលិតផលណាដែលចំណេញដល់ការរស់នៅរបស់មនុស្សនៅក្នុងសង្គមទូទៅ ឬតម្រូវការពិតប្រាកដរបស់ប្រជាជននៅគ្រប់ទីកន្លែង ទាំងអ្នកមានជីវភាពធូរធារ និងអ្នកមានជីវភាពកម្រិតមធ្យម ឬក្រោមមធ្យម។

លោក ហាវ គង់ងី បាននិយាយថា ៖ “សម្រាប់ខ្ញុំ គឺខ្ញុំបានរកឃើញថា ប្រជាជននៅក្នុងប្រទេសកំពុងអភិវឌ្ឍន៍ជាច្រើនត្រូវការលំនៅឋាន តែលទ្ធភាពនៃប្រាក់ចំណូលរបស់គាត់មិនអាចធ្វើឱ្យគាត់ទទួលបានលំនៅឋានដោយងាយស្រួលនោះទេ ហេតុនេះការបង្កើតឥដ្ឋបរិស្ថានឡើង គឺដើម្បីកាត់បន្ថយចំណាយសម្រាប់អ្នកសាងសង់ និងព្យាយាមធ្វើយ៉ាងណាដើម្បីសង់ផ្ទះឡើងបានក្នុងតម្លៃធូរថ្លៃសម្រាប់ប្រជាជនដែលមានកម្រិតជីវភាពមធ្យម។

ស្ថាបនិកនៃនវានុវត្តន៍ដ៏មានសារៈសំខាន់ខាងលើក៏បានលើកឡើងផងដែរថា យើងគួរជំរុញឱ្យយុវជនជំនាន់ថ្មីស្រាវជ្រាវឱ្យបានច្រើនពីការស្វែងរករបកគំហើញថ្មីៗដើម្បីចូលរួមជាផ្នែកមួយក្នុងការដោះស្រាយបញ្ហារស់នៅរបស់មនុស្ស ព្រោះចាប់ផ្តើមពីការចូលរួមចំណែកពីនវានុវត្តន៍ល្អៗ ប្រជាជននៅទីជនបទ ឬប្រជាជនដែលមានលទ្ធភាពតិចតួចក៏អាចទទួលបាននូវឧបករណ៍នានាសម្រាប់សម្រួលដល់ការរស់នៅ ដែលអាចធ្វើឱ្យគាត់ចំណាយតិច និងបង្កើតចំណូលបានច្រើន។

យុវជនដែលបានស្រាវជ្រាវរកឃើញកង្ហារឆ្លាតវៃ ដែលមានសមត្ថភាពក្នុងការជួយដល់ប្រជាជនក្នុងប្រទេសកំពុងអភិវឌ្ឍន៍ លោក សៀន ផាលីនហួរ បានលើកឡើងថា នៅក្នុងសង្គមមានបញ្ហាច្រើនណាស់ដែលទាមទារឱ្យមានដំណោះស្រាយ។ ហើយដើម្បីដោះស្រាយនូវបញ្ហាទាំងអស់នោះប្រកបដោយភាពឆ្លាតវៃ អ្នកបង្កើតនវានុវត្តន៍ គួរតែបញ្ចេញសមត្ថភាពរបស់ខ្លួនដើម្បីជួយដល់ប្រជាជន និងធ្វើយ៉ាងណាឱ្យសមិទ្ធផលរបស់ខ្លួនក្លាយជារបស់ដែលអាចជួយកាត់បន្ថយផលប៉ះពាល់បរិស្ថាន និងមានតម្លៃសមរម្យ តែបានផលប្រយោជន៍ច្រើនជាងមុន។

លោក សៀន ផាលីនហួរ បាននិយាយថា ៖ “ជាឧទាហរណ៍ជាក់ស្តែងយើងឃើញហើយថា មនុស្សនៅក្នុងប្រទេសអភិវឌ្ឍន៍ ឬអ្នកនៅតំបន់ជនបទគាត់មិនមានលទ្ធភាពក្នុងការប្រើប្រាស់ម៉ាស៊ីនត្រជាក់នោះទេព្រោះវាមានតម្លៃថ្លៃ តែទោះជាយ៉ាងនេះក្តី ក៏គាត់ចង់បានឧបករណ៍អេឡិចត្រូនិកដែលអាចជួយឱ្យគាត់មានភាពងាយស្រួលដែរ។ ហេតុនេះការបង្កើតកង្ហារឆ្លាតវៃដែលមានមុខងារច្រើន និងតម្លៃសមរម្យសម្រាប់ពួកគាត់ គឺអាចជួយគាត់ឱ្យមានការរស់នៅកាន់តែប្រសើរ នៅក្នុងសង្គមដែលមានការអភិវឌ្ឍលឿនផ្នែកបច្ចេកវិទ្យា។

បើតាមលោក សៀន ផាលីនហួរ នវានុវត្តន៍ដែលបានគិតគូរល្អិតល្អន់ ពីផលចំណេញសម្រាប់អ្នកប្រើប្រាស់ នឹងអាចជំរុញឱ្យប្រទេសយើងកាន់តែមានលក្ខណៈឆ្លាតវៃ ហើយការរស់នៅរបស់ប្រជាជនក៏កាន់តែមានលក្ខណៈប្រសើរឡើងផងដែរ៕

June 16, 2018

GPE ផ្តល់ជំនួយជាង 20លានដុល្លារ អភិវឌ្ឍគុណភាពអប់រំថ្នាក់បឋមសិក្សា

មូលដ្ឋានគ្រឹះសំខាន់បំផុតសម្រាប់ការកសាងអនាគតធនធានមនុស្ស គឺពង្រឹងសមត្ថភាពក្នុងការបណ្តុះបណ្ដាលថ្នាក់បឋមសិក្សា ព្រោះនិស្សិត ឬធនធានមនុស្សដែលបម្រើការងារនៅក្នុងវិស័យទាំងអស់នៅក្នុងប្រទេសសុទ្ធតែកើតចេញពីកុមារ។ នៅពេលដែលកុមារតូចត្រូវបានបណ្តុះបណ្តាលប្រកបដោយគុណភាព នោះអ្នកអប់រំនៅថ្នាក់ខ្ពស់ៗនឹងលែងមានបញ្ហាប្រឈមខ្លាំងក្នុងការអភិវឌ្ឍសមត្ថភាពសិស្សឱ្យឆ្លើយតបជាមួយនឹងទីផ្សារការងារតទៅទៀត ហើយ។

ផ្តោតលើមូលដ្ឋាននេះ ក្រសួងអប់រំ យុវជន និងកីឡា បានអភិវឌ្ឍសមត្ថភាពរបស់ខ្លួនឱ្យកាន់តែខ្លាំងដើម្បីបណ្តុះបណ្តាលកុមារតូច នៅកម្រិតបឋមសិក្សា ដោយបង្កើនកិច្ចសហការល្អជាមួយនឹងស្ថាប័នពាក់ព័ន្ធទាំងរដ្ឋ និងឯកជន។ ដោយមើលឃើញពិកិច្ចខិតខំប្រឹងប្រែងរបស់ក្រសួងអប់រំក្រុមប្រឹក្សាភិបាលនៃភាពជាដៃគូសកលសម្រាប់ការអប់រំ (GPE) បានអនុម័តហិរញ្ញប្បទានឥណទានឥតសំណងក្នុងទឹកប្រាក់ចំនួនប្រមាណ 20.6លានដុល្លារអាមេរិក ដើម្បីលើកកម្ពស់គុណភាពអប់រំនៅថ្នាក់បឋមសិក្សា។

គោលបំណងសំខាន់នៃការផ្តល់ជំនួយនេះ គឺជួយទ្រទ្រង់កុមារមកពីគ្រួសារលំបាកឱ្យទទួលបានការបណ្តុះបណ្តាលស្មើគ្នា ជាពិសេសកុមារនៅទីជនបទ។ លើសពីនេះទៀត គម្រោងនេះក៏នឹងជួយវិស័យអប់រំឱ្យបង្កើនប្រសិទ្ធភាពនៃការបង្រៀនរបស់លោកគ្រូ-អ្នកគ្រូ ពង្រឹងភាពជាអ្នកដឹកនាំ និងការគ្រប់គ្រងមន្ត្រីអប់រំនៅតាមសាលារៀន និងការផ្តល់សេវាអប់រំតាមមូលដ្ឋាន និងថ្នាក់ជាតិជាដើម។

ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានថ្លែងថា ភាពជាដៃគូសកលសម្រាប់ការអប់រំ បានចូលរួមចំណែកយ៉ាងសំខាន់ក្នុងវិស័យអប់រំតាំងពីឆ្នាំ2006 មកម្លេ៉ះ ហើយការគាំទ្រនេះបានផ្តល់លទ្ធភាពឱ្យក្រសួងអប់រំអាចពង្រីក និងពង្រឹងគុណភាពគ្រូបង្រៀនឱ្យមានសមត្ថភាពកាន់តែខ្លាំង និងជួបដល់កុមារដែលជួបទុក្ខលំបាកឱ្យមានលទ្ធភាពទទួលបានការរៀនសូត្រ និងរីកចម្រើន។

គួរបញ្ជាក់ថា នេះជាលើកទី3 ហើយដែលស្ថាប័នភាពជាដៃគូសកលសម្រាប់ការអប់រំ (GPE) បានផ្តល់ហិរញ្ញប្បទានឥតសំណងមកកម្ពុជា ដោយក្នុងនោះស្ថាប័នយ៉ាងសំខាន់នេះក៏បានបង្កើនកិច្ចសហការល្អផងដែរជាមួយនឹងអង្គការពាក់ព័ន្ធនានាដែលធ្វើការងារលើវិស័យអប់រំនៅកម្ពុជា៕

June 16, 2018

របរភ្ញាស់កូនមាន់លក់ ប្រើរយៈពេលខ្លី និងមានទីផ្សាធំ

ស្របពេលដែលប្រជាពលរដ្ឋខ្មែរចាប់ផ្ដើមយល់ដឹងពីការទទួលទានអាហារធម្មជាតិគ្មានជាតិគីមី បានធ្វើឱ្យការចិញ្ចឹមមាន់ស្រែលក់ទទួលបានការគាំទ្រខ្លាំងឡើង ដែលធ្វើឱ្យរបរភ្ញាស់កូនមាន់លក់ក៏កាន់តែកាក់កប ឆាប់ទទួលបានផល និងមានការគាំទ្រខ្លាំងនៅលើទីផ្សារផងដែរ។

លោក សៅ ឌី ម្ចាស់កសិដ្ឋានភ្ញាស់កូនមាន់ស្រែដែលមានទីតាំងនៅក្នុងភូមិឈើទាល ឃុំឈូក ស្រុកឈូក ខេត្តកំពត បានឱ្យដឹងថា កន្លងមកលោកធ្លាប់តែចិញ្ចឹមមាន់ជាលក្ខណៈគ្រួសារតែប៉ុណ្ណោះ ប៉ុន្តែដោយសារមើលឃើញតម្រូវការមាន់ស្រែនៅលើទីផ្សារកើនឡើង លោកក៏បានបង្កើតកសិដ្ឋានខ្នាតតូចមួយឡើង ដោយបានច្នៃបង្កើតម៉ាស៊ីនភ្ញាស់កូនមាន់ដោយខ្លួនឯងបានដោយជោគជ័យ កាលពីអំឡុងឆ្នាំ2016។

ក្រោយពីបង្កើតម៉ាស៊ីនភ្ញាស់កូនមាន់បានជោគជ័យរួចមក លោកបានចិញ្ចឹមមេមាន់ចំនួនជាង 30ក្បាល និងមាន់ឈ្មោលប្រមាណជា 5-6ក្បាល ដែលមេមាន់ទាំងនោះមានសមត្ថភាពអាចផ្ដល់ស៊ុតឱ្យម្តងៗបានចំនួនជាង300 ទៅ400គ្រាប់សម្រាប់ដាក់ភ្ញាស់មួយលើក។ តាមពិតទៅ លោកមិនសូវបានចិញ្ចឹមមាន់ច្រើនប៉ុន្មានទេ ដោយសារតែជាប់រវល់ផលិតម៉ាស៊ីនភ្ញាស់កូនមាន់លក់ ហើយសរុបទៅមកទល់ពេលនេះលោកទើបតែភ្ញាស់បានចំនួន 4-5លើក និងលក់កូនមាន់សរុបបានចំនួនប្រហែលជាជាង 2,000កូនតែប៉ុណ្ណោះ។

លោកបានបញ្ជាក់បន្ថែមថា នៅពេលដែលគេចិញ្ចឹមមាន់បានពងមកហើយ គេត្រូវយកមកដាក់នៅក្នុងធុងភ្ញាស់ដោយមានដោតភ្លើងអគ្គិសនីកម្តៅ ហើយត្រូវមើលថែជាប់ជាប្រចាំ ចៀសវាងភ្លើងក្តៅខ្លាំងជ្រុល និងត្រជាក់ជ្រុល។ ក្រោយពីនោះមួយសប្តាហ៍ គេត្រូវបើកទូភ្ញាស់នោះពិនិត្យមើលម្ដង ដើម្បីឱ្យដឹងថា តើពងមាន់មួយណាដែលមិនមានកូន និងត្រូវយកចេញក្រៅដើម្បីកុំឱ្យចង្អៀតកន្លែង និងកុំឱ្យខាតភ្លើងកម្ដៅចោល។ រហូតដល់ 21ថ្ងៃ ទើបកូនមាន់អាចញាស់ឡើងបានល្អតែម្តង។ ពេលនោះត្រូវដកចរន្តអគ្គិសនីចេញពីទូ ដើម្បីប្រមូលកូនមាន់ទៅចិញ្ចឹមនៅក្នុងទ្រុងដែលបានរៀបចំទុករួចជាស្រេច។

សម្រាប់ទ្រុងចិញ្ចឹមកូនមាន់ គេត្រូវរៀបចំក្នុងទីកន្លែងដែលស្អាត គ្មានមេរោគ និងការពារកុំឱ្យត្រូវទឹកភ្លៀង ឬត្រូវពន្លឺចាំងចូលមកនាំឱ្យកើនកម្ដៅឡើងខ្លាំងពេក ព្រោះថា ក្នុងរោងចញ្ចឹមកូនមាន់នោះគេមានដាក់បំពង់ ឬក្អមដើម្បីដុតធ្យូងសម្រាប់កម្ដៅរួចស្រេចហើយ។ សម្រាប់កូនមាន់តូចៗទើបនឹងញាស់ឡើងនេះវាមិនចេះស៊ីចំណីរឹងខ្លាំងទេពោលកសិករត្រូវយកចំណី ស្រូវ ពោតឬអង្ករទៅបុក ឬកិនឱ្យបែកជាគ្រាប់តូចប៉ុនៗចុងអង្ករ ទើបវាអាចស៊ីបាន ឬបើយើងមិនចង់ធ្វើដូច្នេះទេ យើងអាចទៅទិញចំណីពីផ្សារមកបំប៉នកូនមាន់មួយរយៈជាមុនសិន ទម្រាំនឹងវារឹងដៃរឹងជើងអាចដើរបាន និងចេះរកចំណីស៊ីដោយខ្លួនឯងបានខ្លះ។

បន្ទាប់ពីកូនមាន់អាយុបាន1សប្តាហ៍ គឺវាមានកម្លាំងខ្លះហើយ និងអាចលែងចេញពីទ្រុងឱ្យដើររកចំណីខាងក្រៅបានខ្លះៗហើយ និងគេអាចវាចាប់លក់បានជាបណ្តើរៗហើយ ដោយកូនមាន់មួយក្បាលតម្លៃពី 3-4ពាន់រៀលទៅតាមការកុម្ម៉ង់តិច ឬច្រើន និងកូនមាន់ដែលមានអាយុ 2សប្តាហ៍មានតម្លៃ 4-5ពាន់រៀល និងអាយុ 3សប្តាហ៍មានតម្លៃចន្លោះពី 5-6ពាន់រៀលក្នុងមួយក្បាល។ លោកថា ការភ្ញាស់កូនមាន់លក់ គឺមិនដែលគ្រប់តាមការកុម្ម៉ង់របស់អតិថិជននៅក្នុងភូមិស្រុកឬមកពីបណ្តាខេត្តផ្សេងៗនោះទេ ដោយសារលោករវល់តែចំណាយពេលផលិតម៉ាស៊ីនភ្ញាស់កូនមាន់លក់ ទើបមិនសូវមានពេលទៅចិញ្ចឹមមាន់យកពងសម្រាប់ភ្ញាស់កូនមាន់លក់។

គួរបញ្ជាក់ថា នៅក្នុងស្រុកឈូកនេះមិនមែនមានតែកសិដ្ឋានរបស់លោក សៅ ឌីតែមួយនោះទេដែលចិញ្ចឹមមាន់សម្រាប់យកស៊ុតភ្ញាស់យកកូនលក់នោះប៉ុន្តែនៅមានកសិដ្ឋានធំៗចំនួន 3-4ទីតាំងផ្សេងទៀតក៏ចិញ្ចឹមមាន់យកស៊ុតភ្ញាស់យកកូនលក់ដែរ ប៉ុន្តែនៅតែមិនអាចផ្គត់ផ្គង់គ្រប់គ្រាន់តាមតម្រូវការរបស់អតិថិជននៅលើទីផ្សារដដែល។

កសិករម្នាក់ឈ្មោះ តាន់ លី អ្នកទិញកូនមាន់យកទៅចិញ្ចឹមនៅក្នុងស្រុកឈូកនោះដែរមានប្រសាសន៍ឱ្យដឹងដែរថា លោកយកកូនមាន់នោះទៅបំប៉នចំណីធម្មជាតិសុទ្ធសាធ ដូចជាយកកន្ទក់មកដាំជាបបរលាយជាមួយត្រកួនឱ្យស៊ី និងមានចំណីផ្សេងទៀត ដូចជាគ្រាប់ពោត គ្រាប់ស្រូវ និងចុងអង្ករទុកសម្រាប់បាចឱ្យកូនមាន់ស៊ីបន្ថែមពេលរកចំណីខាងក្រៅស៊ីមិនគ្រប់គ្រាន់ដើម្បីបំប៉នឱ្យវាឆាប់ធំធាត់។

ត្រឹមតែរយៈពេល 3ខែប៉ុណ្ណោះ កូនមាន់នឹងធំមានទម្ងន់បាន1គីឡូ ឬជាង 1គីឡូក៏មាន។ ឯតម្លៃលក់វិញ ជាធម្មតាគេលក់បោះដុំឱ្យម៉ូយដែលមកទិញដល់ផ្ទះ បានមួយគីឡូក្រាមថ្លៃ 18,000រៀល ហើយមានប៉ុន្មានក៏គេទិញយកទាំងអស់ដែរ ព្រោះថា សាច់មាន់ស្រែកំពុងមានតម្រូវការខ្លាំងណាស់នៅលើទីផ្សារ ទាំងនៅជនបទស្រុកស្រែ និងនៅក្នុងទីប្រជុំជននានាទូទាំងប្រទេស៕

June 16, 2018

2ឆ្នាំទៀត គម្រោងសិក្សាស្ថាបនាប្រព័ន្ធដឹកជញ្ជូនតាមផ្លូវឆ្លងកាត់ស្វ័យប្រវត្តិនឹងបញ្ចប់

គម្រោងសិក្សាពីការស្ថាបនាប្រព័ន្ធដឹកជញ្ជូនតាមផ្លូវឆ្លងកាត់ស្វ័យប្រវត្តិ (Automated gatewaytransit (AGT) system ដែលហៅថា(AGT) ឬដែលគេច្រើនហៅថា ខ្សែផ្លូវរថភ្លើងលើអាកាស ក្រោមជំនួយរបស់រដ្ឋាភិបាលជប៉ុននៅតែបន្តអនុវត្ត ប៉ុន្តែត្រូវការពេលវេលាយ៉ាងហោចណាស់ 2ឆ្នាំបន្ថែមទៀតដើម្បីសិក្សាលម្អិតមុននឹងឈានទៅអភិវឌ្ឍ។ នេះបើតាមការអះអាងរបស់ឯកឧត្តមស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន។

លោករដ្ឋមន្ដ្រីបានឱ្យដឹងថា៖ “គម្រោងស្ថាបនាខ្សែផ្លូវរថភ្លើងលើអាកាសក្រោមជំនួយរបស់រដ្ឋាភិបាលជប៉ុននៅតែបន្តអនុវត្ត ដោយត្រូវការពេលវេលាយ៉ាងហោចណាស់ 2ឆ្នាំបន្ថែមទៀតដើម្បីសិក្សាលម្អិតមុននឹងឈានទៅអភិវឌ្ឍ។ ព្រោះថាការចំណាយពេលវេលាសិក្សាយូរនេះ គឺដើម្បីសិក្សាឱ្យបានប្រាកដថា នៅពេលអនុវត្តគម្រោងសាងសង់ខ្សែរថភ្លើងលើអាកាសក្នុងរាជធានីភ្នំពេញនេះទៅនឹងមានផលប៉ះពាល់តិចតួចបំផុតដល់ទ្រព្យសម្បត្តិប្រជាពលរដ្ឋ និងទ្រព្យសម្បត្តិសាធារណៈ។ តែគម្រោងកំពុងដំណើរការទៅតាមការគ្រោងទុក និងកំពុងត្រូវបានធ្វើឡើងដោយសហការជាមួយទីភ្នាក់ងារសហប្រតិបត្តិការអន្តរជាតិជប៉ុន Japan International Cooperation Agency(JICA)នឹងចប់រួចរាល់ក្នុងរយៈពេល 2ឆ្នាំខាងមុខ។

ដើម្បីធានាដល់សាធារណជនថា ប្រព័ន្ធដឹកជញ្ជូនតាមផ្លូវឆ្លងកាត់ស្វ័យប្រវត្តិ(AGT) ឬខ្សែផ្លូវរថភ្លើងលើអាកាសដែលនឹងភ្ជាប់មជ្ឈមណ្ឌលទីក្រុងភ្នំពេញជាមួយអាកាសយានដ្ឋានពិតជាត្រូវបានសាងសង់តាមការគ្រោងទុកមែន បន្ទាប់ពីមានពាក្យចចាមអារ៉ាមថ្មីៗនេះថា គម្រោងនេះប្រហែលជាត្រូវបានបោះបង់ចោលនោះ លោក ស៊ុន ចាន់ថុលបានមានប្រសាសន៍ថា AGTដែលត្រូវបានគេពិពណ៌នាថា ជាប្រព័ន្ធឆ្លងកាត់ដ៏ធំមួយដែលអាចការពារបរិស្ថានបាន អាចធ្វើដំណើរក្នុងល្បឿន 60គីឡូម៉ែត្រក្នុងមួយម៉ោងដោយមិនមានផ្សែងបារី។ លោករដ្ឋមន្ត្រីបានពន្យល់ទៀតថា វាតម្រូវឱ្យមានកន្លែងទំនេរតិចតួច ហើយងាយស្រួលក្នុងការចតនៅតាមផ្លូវតូចៗក្នុងទីក្រុង។ វានឹងធ្វើទំនើបកម្មការដឹកជញ្ជូនសាធារណៈនៅក្នុងទីក្រុង និងជួយកាត់បន្ថយការកកស្ទះចរាចរណ៍។

លោកបាននិយាយថា ពាក្យចចាមអារ៉ាមដែលថា រដ្ឋាភិបាលជប៉ុនបានដកហូតការគាំទ្ររបស់ខ្លួនចំពោះគម្រោងនេះ គឺជាពាក្យដែលត្រូវបានគេប្រឌិតឡើង ពីព្រោះជប៉ុននៅតែប្តេជ្ញាផ្តល់ហិរញ្ញប្បទានដល់គម្រោងនេះចំនួន 800លានដុល្លារដដែល។ តែមិនទាន់បានបញ្ជាក់ថា តើលុយនេះនឹងត្រូវបានផ្តល់ជាប្រាក់កម្ចី ឬជំនួយនោះទេ។ “យើងនៅតែត្រូវការការពិភាក្សាអំពីបញ្ហាហិរញ្ញប្បទានជាមួយរដ្ឋាភិបាលជប៉ុនដោយយើងមិនដឹងថា តើពួកគេគិតចង់ផ្តល់ជាប្រាក់កម្ចី ឬជំនួយនោះទេ ប៉ុន្តែយើងប្រាកដច្បាស់ថា ជប៉ុននឹងជួយយើង។

លោកបន្តថា៖ “ការសាងសង់ផ្លូវរថភ្លើងអាកាសនេះនឹងត្រូវធ្វើឡើងជា 2ដំណាក់កាលដោយបែងចែកជាផ្លូវលើអាកាសប្រវែង 14គីឡូម៉ែត្រ និងនៅក្រោមដីមានប្រវែង 4គីឡូម៉ែត្រពីស្ថានីយចំណតដែលស្ថិតនៅក្នុងព្រលានយន្តហោះតែម្ដង។ លោកបន្តទៀតថា៖ “ហេតុផលដែលជ្រើសរើសទីតាំងខាងលើនេះ ក៏ព្រោះតែជារៀងរាល់ថ្ងៃមហាវិថីសហព័ន្ធរុស្ស៊ីមានភាពកកស្ទះច្រើនជាងគេ ជាពិសេសវាជាមហាវិថីសំខាន់បំផុតក្នុងការធ្វើដំណើររបស់ប្រជាពលរដ្ឋចេញទៅតាមបណ្តាខេត្តនានា ក៏ដូចជាមានភាពមមាញឹកសម្រាប់អ្នកធ្វើដំណើរទៅក្រៅប្រទេសតាមរយៈការហោះហើរដែរ។

សូមបញ្ជាក់ដែរថា គម្រោងការសាងសង់ផ្លូវរថភ្លើងអាកាសនេះត្រូវបានធ្វើការសិក្សាតាំងពីអំឡុងឆ្នាំ2014 ទៅលើផ្លូវចំនួន 3ខ្សែ ដោយខ្សែទី1ចាប់ផ្តើមពីមហាវិថីកម្ពុជាក្រោម មហាវិថីព្រះមុនីវង្ស មហាវិថីសហព័ន្ធរុស្ស៊ី និងរង្វង់មូលចោមចៅ។ ខ្សែទី2 ចាប់ផ្តើមពីមហាវិថីព្រះមុនីវង្សរត់ស្របផ្លូវរថភ្លើង(ចាស់)ចូលអាកាសយានដ្ឋានអន្តរជាតិភ្នំពេញ និងខ្សែទី3 ចាប់ផ្តើមពីផ្សារធំថ្មីមហាវិថីហ្សាលដឺហ្គោល មហាវិថីព្រះមុនីរ៉េត ផ្លូវវ៉េងស្រេងឆ្ពោះមករង្វង់មូលចោមចៅ និងបត់មកអាកាសយានដ្ឋានអន្តរជាតិភ្នំពេញវិញ។

យោងតាមរូបភាពនៃគម្រោងដែលអង្គការ JICAបាន និងកំពុងធ្វើការសិក្សា បានបង្ហាញឱ្យឃើញថា គម្រោងនេះនឹងបែកជា4ទិស ដោយទិសជើងមានប្រវែង 9.6គ.ម ឆ្លងកាត់តំបន់ទួលគោក។

ទិសខាងត្បូងប្រវែង 10.5គ.ម ឆ្លងកាត់មហាវិថីព្រះមុនីវង្ស និងផ្លូវជាតិលេខ2។ ទិសខាងលិចមាន2ខ្សែ មួយប្រវែង 11.8គ.ម ឆ្លងកាត់តាមមហាវិថីសហព័ន្ធរុស្ស៊ី និងមួយទៀតប្រវែង 11.5គ.ម ឆ្លងកាត់តាមផ្លូវវ៉េងស្រេងឆ្ពោះទៅកាន់ព្រលានយន្តហោះអន្តរជាតិភ្នំពេញ។

គម្រោងក្រោយគេទាំង2នេះ គឺមាន ប្រវែងសរុប14គីឡូម៉ែត្រជាផ្លូវអាកាស និង 4គីឡូម៉ែត្រជាផ្លូវក្រោមដីដោយសារកៀកនឹងព្រលានយន្តហោះអន្តរជាតិភ្នំពេញ រថភ្លើងមិនអាចរត់លើអាកាសបានឡើយ។ តាមគោលដៅគ្រោងទុក កម្ពុជានឹងមានប្រព័ន្ធរថភ្លើងអាកាសស្វ័យប្រវត្តិនេះមុនឆ្នាំ2023 ដែលកម្ពុជានឹងត្រូវធ្វើជាម្ចាស់ផ្ទះកីឡាស៊ីហ្គេម៕

June 16, 2018

វិស័យអចលនទ្រព្យមុនពេលបោះឆ្នោតមានស្ថានភាពបែបណា?

“ទោះបីស្ថិតក្នុងពេលមុនបោះឆ្នោត កំពុងបោះឆ្នោត ឬក្រោយបោះឆ្នោតក្ដីក្នុងបណ្ដាឆ្នាំកន្លងមកនេះបញ្ហាអចលនទ្រព្យមិនមានការប្រែប្រួលខ្លាំងទេ ខណៈបច្ចុប្បន្ននេះទីផ្សារដីធ្លីនៅកន្លែងណាក៏មានការកើនឡើងខ្ពស់ដែរ ពិសេសក្នុងខេត្តព្រះសីហនុ និងទីក្រុងភ្នំពេញតែម្ដង។

ទាំងអស់នេះបង្ហាញពីជំនឿជឿជាក់ថា ប្រទេសកម្ពុជាពិតជាមានស្ថិរភាព និងការវិនិយោគលើអចលនទ្រព្យអាចទទួលប្រាក់ចំណេញបាន។ នេះបើតាមប្រសាសន៍របស់់ឯកឧត្តម ជា សុផារ៉ា ទេសរដ្ឋមន្ដ្រី រដ្ឋមន្ត្រីក្រសួងដែនដី នគរូបនីយកម្ម និងសំណង់បានបញ្ជាក់កាលពីខែឧសភាកន្លងទៅនេះ។

ការថ្លែងរបស់ឯកឧត្តម គឺស្របពេលមានការលេចឡើងនូវវត្តមានផ្សារទំនើបអន្តរជាតិ អុីអនដែលបានបើកដំណើរការសាកល្បងកាលពីចុងខែឧសភា និងគម្រោងវិនិយោគថ្មីៗទៀតនៅក្នុងខណ្ឌសែនសុខ ធ្វើឱ្យតម្លៃអចលនទ្រព្យ និងដីធ្លីក្នុងខណ្ឌនេះហក់ឡើងខ្ពស់ និងក្លាយទៅជាគោលដៅវិនិយោគ បើទោះបីជាកៀកនឹងពេលបោះឆ្នោតក៏ដោយ។ តែទោះជាយ៉ាងនេះក្តី ក៏នៅមានវិនិយោគិនខាងអចលនទ្រព្យខ្លះបានបង្អង់ល្បឿននៃការទិញ-លក់ដោយនៅរង់ចាំអ៊ុតមើលលទ្ធផលបោះឆ្នោតសិនថា តើអាចនឹងមានបញ្ហាអ្វីកើតឡើងឬទេ?

ការហក់ឡើងខ្ពស់នៃតម្លៃអចលនទ្រព្យនេះត្រូវបានបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាពន្យល់ឱ្យដឹងថា ការកើនឡើងនៃតម្លៃអចលនទ្រព្យក្នុងទីតាំងខាងលើនោះ(ខណ្ឌសែនសុខ) គឺដោយសារតែតំបន់នោះមាននូវអ្វីដែលជាតម្រូវការសម្រាប់ការរស់នៅស្ទើរគ្រប់ទៅហើយ ដូចជាមានសាលារៀន ផ្សារទំនើបលំនៅឋានស្នាក់នៅមានលក្ខណៈស្ដង់ដារ កន្លែងរៀបចំពិធីអាពាហ៍ពិពាហ៍ និងហេដ្ឋារចនាសម្ព័ន្ធនៅតំបន់នេះកំពុងមានការអភិវឌ្ឍខ្លាំងដែលសុទ្ធតែជាប្រភេទហេដ្ឋារចនាសម្ព័ន្ធធំ។

លោកបញ្ជាក់ថា កាលពី 3ឆ្នាំមុន ផ្ទះលក់ក្នុងបុរីពិភពថ្មីមានតម្លៃតែជាង 20ម៉ឺនទេ ប៉ុន្តែឥឡូវតម្លៃបានហក់ឡើងរហូតដល់ជាង 40ម៉ឺនដុល្លារ។ គួរបញ្ជាក់ដែរថា គម្រោងខ្នាតធំដែលបាននិងកំពុងសាងសង់ និងគម្រោងដែលបានបើកដំណើរការហើយនៅក្នុងខណ្ឌសែនសុខរួមមានផ្សារម៉ាក្រូរបស់ថៃ គម្រោងវិនិយោគមជ្ឈមណ្ឌលពាណិជ្ជកម្ម កន្លែងរៀបចំអាពាហ៍ពិពាហ៍អន្តរជាតិ ឌឹ ព្រីមៀមលែន និងផ្សារទំនើបធំទី2 របស់ជប៉ុន អុីអនម៉ល ដែលបានបើកដំណើរការសាកល្បងរួចហើយកាលពីចុងខែកន្លងទៅ។

លោក ច្រឹក សុខនីម អគ្គនាយកក្រុមហ៊ុន cencury21mekong បានមានប្រសាសន៍អំពីបញ្ហានេះថា ពាក់ព័ន្ធនឹងការកើនឡើងនៃតម្លៃអចលនទ្រព្យ វាអាចកើតមានឡើងជាករណីពិសេសគឺកើនឡើងតែម្តុំអុីអនម៉លហ្នឹងឯង។

លោកបានបន្តថា ជាទូទៅយើងត្រូវមើលឃើញថា តម្លៃផ្ទះបុរីវាអាចកើនឡើងតែមិនអាចឡើងខ្លាំងរហូតដល់100%បានទេ។ យើងទទួលស្គាល់ថា វាកើនឡើង តែវាមិនអាចស្ទុះឡើងខ្លាំងពេកទេ គឺត្រឹមតែខ្ពស់ជាងតម្លៃពីមុនតិចតួច។ ចំណែកផ្ទះនៅក្នុងបុរីពិភពថ្មីជិតផ្សារទំនើបអុីអនម៉លទី2វិញ ទិញថ្លៃ17-18ម៉ឺនដុល្លារអាមេរិក ឥឡូវកើនដល់30-40ម៉ឺនដុល្លារអាមេរិកដែលយើងអាចនិយាយបានថា ជាលក្ខណៈពិសេសដោយកន្លែង មិនអាចសន្និដ្ឋានថាជាតម្លៃទីផ្សាររួមក្នុងខណ្ឌសែនសុខបានទេ។

លោក សុខនីម គិតថា គឺគ្រាន់តែជាតម្រូវការជុំវិញផ្សារអុីអន និងផ្សារម៉ាក្រូប៉ុណ្ណោះ ដោយសារវាជាផ្ទះបែប shophouse(ផ្ទះដែលអាចធ្វើអាជីវកម្មបាន)។ តែជាទូទៅទីផ្សារអចលនទ្រព្យនៅមានតម្លៃធម្មតាទោះបីជាកៀកពេលបោះឆ្នោតជាតិដែលគេបានសង្កេតឃើញថា វាតែងតែមានការជាប់គាំងតម្លៃក្នុងរយៈពេលកន្លងមកក៏ដោយ វាក៏មិនមានអ្វីជាក្តីបារម្ភខ្លាំងពេកដែរ គឺទីផ្សារនៅមានដំណើរការ មិនមានភាពស្ងប់ស្ងាត់នោះទេ។

លោកស្រី សេង ហ្គិចអ៊ាង ជាអ្នកទីផ្សារនៅក្រុមហ៊ុន សាន់នី ប្រភើធី (Sunny Property) មានប្រសាសន៍ថា ការកើនឡើងខុសប្លែកពីឆ្នាំបោះឆ្នោតមុនៗ មកពីមានវិនិយោគិនចិនចូលមកច្រើន ហើយពួកគេពុំខ្វល់ពីនយោបាយទេ ដោយគេគិតថាកម្ពុជាមានស្ថិរភាពជាបន្ត ទោះបីបោះឆ្នោតរួចក៏ដោយទើបគេនៅតែបន្តបោះទុនវិនិយោគខាងអចលនទ្រព្យនេះ។ ដូច្នេះទើបធ្វើឱ្យស្ថានភាពអចលនទ្រព្យនៅតែមានទីផ្សារធម្មតា។

ដោយឡែកអ្នកវិភាគអចលនទ្រព្យ និងសេដ្ឋកិច្ច លោក ង៉ែត ជូ ត្រូវបានគេស្រង់សម្តីថា នៅក្នុង វិស័យនេះមានការបំពុលព័ត៌មានច្រើនទាក់ទងនឹងការបង្ហាញ ឬលើកឡើងពីគម្រោងអភិវឌ្ឍន៍នានាតាមរយៈអ្នកវិនិយោគមួយចំនួននៅក្នុងវិស័យនេះដើម្បីទាក់ទាញអតិថិជន ប្រយោជន៍ដើម្បីធ្វើឱ្យពួកគេលក់គម្រោងរបស់ពួកគេឆាប់ដាច់។ លោកបន្តថា ប៉ុន្តែជាក់ស្តែងយើងឃើញគម្រោងព្រលានយន្តហោះថ្មីក្នុងខេត្តកណ្តាលជាឧទាហរណ៍ស្រាប់ អ្នកវិនិយោគមួយចំនួនបានប្រឈមមុខនឹងហានិភ័យ ព្រោះនៅពេលដែលរដ្ឋាភិបាលបានប្រកាសសាងសង់ព្រលានថ្មីនោះ អ្នកខ្លះបានខ្ចីលុយធនាគារទៅទិញប៉ុន្តែបច្ចុប្បន្នគម្រោងនោះបានស្ងប់ស្ងាត់ទៅវិញ ហើយចលនានៃការទិញ-លក់ដីធ្លីនៅតំបន់នោះក៏ស្ងប់ស្ងាត់ទៅវិញដែរ។

លោកបានបន្តថា “ហេតុនេះមុននឹងសម្រេចចិត្តវិនិយោគ ខ្ញុំសុំឱ្យប្រជាពលរដ្ឋប្រមូលព័ត៌មានឱ្យបានច្បាស់លាស់ និងគ្រប់ជ្រុងជ្រោយជាមុនសិន មុននឹងធ្វើការសម្រេចចិត្តវិនិយោគដើម្បីកាត់បន្ថយហានិភ័យ។ លោកបានបន្តទៀតថា “នៅពេលយើងមិនសូវស្វែងយល់សិក្សា និងតាមដានព័ត៌មានឱ្យបានជាក់លាក់ទេនឹងធ្វើឱ្យការវិនិយោគរបស់យើងមានហានិភ័យខ្ពស់។

លោក ង៉ែត ជូ បានបន្តថា ការសិក្សានិងប្រមូលព័ត៌មានបានត្រឹមត្រូវជាមូលដ្ឋានដ៏សំខាន់សម្រាប់ធ្វើការសម្រេចចិត្ត និងអាចកាត់បន្ថយ ឬបញ្ចៀសបាននូវហានិភ័យជាជាងយើងវិនិយោគបែបប្រថុយប្រថាន ព្រោះបើការវិនិយោគពឹងលើព្រេងសំណាង មិនមែនជាជម្រើសរបស់អ្នកវិនិយោគឆ្លាតវៃនោះឡើយ៕

June 16, 2018

លោក Deschamps ៖ បារាំង ត្រូវដណ្តើមយកឱកាសពេលប៉ះ អូស្ត្រាលី

លោក Didier Deschamps គ្រូបង្វឹកនៃក្រុមបាល់ទាត់ជម្រើសជាតិបារាំង បានអំពាវនាវឱ្យក្រុមប្រជុំដោយតារាឆ្នើមៗរបស់ខ្លួន «ដណ្តើមយកថ្ងៃរបស់ខ្លួនឱ្យបាន» នៅពេលដែលពួកគេត្រូវប៉ះជាមួយនឹងក្រុមបាល់ទាត់ជម្រើសជាតិអូស្ត្រាលី ដែលកំពុងសម្លឹងរកជ័យជម្នះក្នុងការប្រកួតបើកឆាករបស់ខ្លួនក្នុងយុទ្ធនាការ World Cup ក្នុងទីក្រុង Kazan នៅល្ងាចថ្ងៃសៅរ៍នេះ។

Soccer Football – FIFA World Cup – France Press Conference – Domaine de Montjoye, Clairefontaine, France – May 23, 2018 France coach Didier Deschamps during the press conference REUTERS/Gonzalo Fuentes

លោក Deschamps ដែលជាសមាជិកឈ្នះពាន World Cup ឆ្នាំ1998 ជាមួយនឹងក្រុមជម្រើសជាតិបារាំង នឹងត្រូវដឹកនាំក្រុមប្រជុំដោយកីឡាករវ័យក្មេងបំផុតនៃយុទ្ធនាការនេះ និងកំពុងតែសង្ឃឹមថា អាចធ្វើការស្តារមុខមាត់ពីការរងបរាជ័យក្នុងការប្រកួត Euro ឆ្នាំ2016 វគ្គផ្តាច់ព្រ័ត្រ ក្រោមស្នាដៃក្រុមជម្រើសជាតិព័រទុយហ្គាល់ ក្នុងប្រទេសបារាំង កាលពី 2ឆ្នាំមុន។

ក្នុងចំណោមកីឡាករទាំង 23នាក់ក្នុងក្រុមរបស់លោក Deschamps មានកីឡាករ 14នាក់មិនធ្លាប់បានលេងក្នុងយុទ្ធនាការធំៗណាមួយនៅឡើយ ប៉ុន្តែ លោកមិនបានចាត់ទុកការខ្វះនូវបទពិសោធនេះថា ជាបញ្ហាធំឡើយ។ លោក Deschamps វ័យ 49ឆ្នាំ បានបញ្ជាក់កាលពីថ្ងៃសុក្រថា៖ «សម្រាប់ខ្ញុំ វាគ្មាននូវការប្រថុយប្រថានណាមួយឡើយ និងប្រសិនបើមាន គឺដោយសារតែពួកគេខ្លួនឯងហ្នឹងឯង»។

គ្រូបង្វឹករូបនេះបានបន្ថែមទៀតថា៖ «យើងមិនអាចធ្វើឱ្យមានអារម្មណ៍ភ័យខ្លាចបានឡើយ។ ខ្ញុំចង់ឱ្យកីឡាករទាំងអស់មានអារម្មណ៍ស្ងប់ និងមានការផ្តោតអារម្មណ៍។ គោលដៅរបស់ពួកគេ គឺការធ្វើឱ្យបានល្អបំផុត។ ពួកគេត្រូវតែដណ្តើមយកឱកាសរបស់ពួកគេឱ្យបានច្រើនបំផុត»។ ការប្រកួតនេះនឹងចាប់ផ្តើមនៅម៉ោង 5ល្ងាច៕

ប្រភពពី៖ Channel News Asia

June 16, 2018