វល័ក្ខ - La Reine Media

បច្ចេកវិទ្យា Inverter របស់ LG មានតួនាទីដ៏សំខាន់ក្នុងការផលិតឧបករណ៍ប្រើប្រាស់ក្នុងផ្ទះដ៏ល្អបំផុតរបស់ពិភពលោក

ទូរទឹកកកដ៏ទំនើបដែលមានគ្រឿងបន្លាស់ជាង 1400 ផ្នែក។ ផ្នែកដ៏សំខាន់បំផុតគឺម៉ូទ័រ និងកុំប្រេសស័រ ដែលជាហេតុធ្វើអោយក្រុមហ៊ុន LG ផលិតឧបករណ៍ប្រើប្រាស់ក្នុងផ្ទះដ៏មានប្រជាប្រិយភាព និងឈានមុខគេ ហើយដែលផ្តល់នូវសមត្ថភាពពិសេសខុសគេ ប្រសិទ្ធភាពថាមពលខ្ពស់ និងមានមុខងារស្រួលប្រើជាច្រើន ដើម្បីបំពេញចិត្តរបស់អតិថិជន។ ប្រភេទ Inverter ម៉ូទ័រ និងកុំប្រេសស័រ គឺជាស្តង់ដារ ដែលមាននៅក្នុងផលិតផលប្រើប្រាស់ក្នុងផ្ទះជាច្រើនប្រភេទរបស់ក្រុមហ៊ុនLG និងផ្តល់ឱ្យផលិតផលរបស់ក្រុមហ៊ុន មានគុណសម្បត្តិ និងគុណភាពខ្ពស់ល្អផ្តាច់គេ។

អាវុធសម្ងាត់របស់ LG Inverter គឺការគ្រប់គ្រងល្បឿន

គុណសម្បត្តិដ៏សម្ងាត់នៃ Inverter ម៉ូទ័រ និងកុំប្រេសស័ររបស់LG ទៅលើម៉ូដែលធម្មតា គឺមានការគ្រប់គ្រងល្បឿនបានយ៉ាងច្បាស់លាស់ មិនថាវាជាម៉ាស៊ីនបោកគក់ ទូរទឹកកក ម៉ាស៊ីនត្រជាក់ ឬ Microwave នោះទេ។ LG Inverter ធ្វើការកំណត់ល្បឿន និងធ្វើការបង្វិលម៉ូទ័រកុំប្រេសស័រ ដែលអាស្រ័យលើស្ថានភាពល្បឿនយ៉ាងស្វ័យប្រវត្តិ ដើម្បីបង្កើននូវប្រសិទ្ធភាពដោយប្រើប្រាស់ថាមពលតិច និងសម្លេងស្ងាត់ល្អ។

រក្សាចំណីអាហារអោយនៅស្រស់បានកាន់តែយូរ

ទូរទឹកកករបស់ក្រុមហ៊ុន LG រក្សាអាហារអោយនៅស្រស់បានរយៈពេលយូរ ដោយសារតែបច្ចេកវិទ្យា Inverter ធ្វើការរក្សាសីតុណ្ហភាពអោយប្រែប្រួលបានយ៉ាងល្អប្រសើរ។ ទូរទឹកកក LG កំណត់សីតុណ្ហភាពខាងក្នុងទូរទឹកកកក្នុងគម្លាត ±0.5˚C អង្សារសេ ពាក់កណ្តាលនៃសីតុណ្ហភាពចុះឡើងនៃ ទូរទឹកកកម៉ូដែលគ្មាន Inverter ដែលឡើងចុះក្នុងសីតុណ្ហភាព (±1.0˚C). អង្សារសេ។

បោកគក់សំលៀកបំពាក់ស៊ីភ្លើងតិច

បច្ចេកវិទ្យា Inverter ធ្វើអោយការបោកគក់ម្តងសុីភ្លើងត្រឹមតែ 67 វ៉ាត់តែប៉ុណ្ណោះ ។ វាសុីភ្លើងតិចជាងប្រភេទម៉ាសុីនបោកគក់ធម្មតា 36 % វាសុីភ្លើងស្មើនឹងម៉ាសុីនសម្ងួតសក់រយៈពេល ៤ នាទី។ នេះមិនមែនមានន័យការប្រើថាមពលតិចហើយបោកមិនស្អាតនោះទេ សំលៀកបំពាក់បោកគក់រួចចេញមកក្រៅនៅតែស្រស់ស្អាតជានិច្ច។

ស៊ីភ្លើងកាន់តែតិចត្រជាក់កាន់តែលឿន

សម្រាប់ម៉ាស៊ីនត្រជាក់ក្នុងផ្ទះ LG Inverter ធានាអានុភាពត្រជាក់ដ៏អស្ចារ្យ និងការសន្សំសំចៃអគ្គីសនីបានយ៉ាងល្អ។ ម៉ាស៊ីនត្រជាក់របស់ក្រុមហ៊ុន LG ប្រើប្រាស់អគ្គិសនីតិចជាងមុន 70 % និងផ្តល់ភាពត្រជាក់ជាងមុន 40 % លឿនជាងម៉ាស៊ីនត្រជាក់ធម្មតា ដែលមិនប្រើបច្ចេកវិទ្យា Inverter

ជាឧបករណ៍ក្នុងផ្ទះបាយដ៏ចំណាន

បច្ចេកវិទ្យា Inverter ផ្តល់ថាមពលដល់ Microwave លើសពីមុន ដោយផ្តល់ កំដៅដល់អាហារខ្លាំង និងលឿនជាងមុន។ តាមរយៈការកំណត់សីតុណ្ហភាពនៃ Microwave ដែលកាត់បន្ថយគម្លាតសីតុណ្ហភាពត្រឹមតែ 3 អង្សាសេ ហើយវាជាផ្នែកគួរឱ្យកត់សម្គាល់ បើប្រៀបធៀបទៅនឹងម៉ូដែលមិនមាន Inverter ដែលធានាបាននូវអាហារឆ្អិនល្អក្នុងរយៈពេលយ៉ាងលឿន។

Inverter កាន់តែប្រសើរឧបករណ៍ប្រើប្រាស់កាន់តែល្អ

LG Inverter ជាក្បាលម៉ាស៊ីននៃឧបករណ៍ប្រើប្រាស់ក្នុងផ្ទះ ដែលរក្សាថាមពលបានរហូតដល់ទ្វេដង និងដំណើរការបានយ៉ាងល្អប្រសើរ និងបានធ្វើឱ្យឧបករណ៍ប្រើប្រាស់របស់ក្រុមហ៊ុន LG ក្លាយជាស្តង់ដាឧស្សាហកម្មសកលលោក។ សម្រាប់ក្រុមហ៊ុន LG Inverters កាន់តែប្រសើរមានន័យស្មើនឹង ឧបករណ៍ប្រើប្រាស់កាន់តែល្អប្រសើរ។

July 5, 2018

រដ្ឋមន្ត្រីអប់រំថា សិស្សមានពេលត្រៀម 5ឆ្នាំ ដូច្នេះគ្មានហេតុផលត្រូវបន្ធូរ ឬប្រឡងលើកទី2ទេ

ការប្រឡងបាក់ឌុប ជាការប្រឡងដ៏សំខាន់មួយដែលកំពុងសិ្ថតក្នុងចំណាប់អារម្មណ៍របស់សាធារណជន ជាពិសេសគឺបេក្ខជនដែលត្រូវប្រឡងផ្ទាល់នៅប៉ុន្មានថ្ងៃខាងមុខនេះ។

ជារៀងរាល់ឆ្នាំ សិស្សមួយចំនួនធំតែងតែអ៊ុតមើលថា តើឆ្នាំនេះក្រសួងនឹងមានការបន្ធូរបន្ថយ ចេញវិញ្ញាសាធូរជាងឆ្នាំមុន ឬក៏បង្កើនការរឹតបន្តឹងបន្ថែម ខណៈសិស្សមួយចំនួនទៀតមិនខ្វល់ពីរឿងនេះប៉ុន្មានឡើយ ព្រោះទោះក្នុងលក្ខខណ្ឌណាក៏ដោយ ក៏មិនអាចបើកមើលសំណៅឯកសារបានដែរ។

ឆ្លើយតបនឹងបញ្ហានេះឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ក្រសួងនៅតែបន្តរក្សាវិន័យយ៉ាងតឹងរ៉ឹងដដែល ហើយវិញ្ញាសាទៀតសោត គឺសិ្ថតក្នុងស្តង់ដារមួយដែលអាចប្រៀបធៀបគ្នាបាន គ្មានការបន្ធូរបន្ថយ ឬចេញវិញ្ញាសាដែលខុសគ្នាដាច់ឆ្ងាយពីបណ្តាឆ្នាំមុនៗនោះទេ បើទោះបីជាមានការរឹតបន្តឹងច្បាប់ក្នុងពេលប្រឡងយ៉ាងហ្មត់ចត់ក៏ដោយ។

ឯកឧត្តម ហង់ ជួនណារ៉ុន បានមានប្រសាសន៍ថា៖ «បើរាប់ពីពេលដែលយើងរឹតបន្តឹងការប្រឡងមក យើងឃើញថា ឆ្នាំនេះជាឆ្នាំទី5ហើយ ដែលសិស្សអាចត្រៀមខ្លួនបាន។ នៅឆ្នាំនេះសិស្សអាចមានពេលវេលាច្រើនក្នុងការត្រៀម និងខិតខំប្រឹងប្រែង ហេតុនេះគ្មានការប្រឡងលើកទី2 ទេ»។

រដ្ឋមន្ត្រីក្រសួងអប់រំ បានបញ្ជាក់ផងដែរថា ការរៀបចំប្រឡងម្តងៗគឺត្រូវចំណាយថវិការហូតដល់ទៅប្រមាណ 5លានដុល្លារឯណោះ ព្រោះត្រូវចំណាយលើការដំណើរការមណ្ឌលប្រឡងផង ទិញសម្ភារដូចជាក្រដាស ប៊ិកហ្វឺត និងសម្ភារផ្សេងៗផង ឧបត្ថម្ភដល់មន្ត្រីអប់រំ ទាំងអនុរក្ស និងពេលធ្វើកំណែផង និងសន្តិសុខខ្លះទៀត ដោយនេះមិនទាន់រាប់ពីការចំណាយលើកម្លាំងសន្តិសុខដែលអាជ្ញាធរដែនដីដែលគាត់ដាក់កម្លាំងជួយការពារផង។

លុយ 5លានដុល្លារនេះ បើយកទៅទិញសម្ភារ កុំព្យូទ័រដាក់សាលា ឬបរិក្ខារអប់រំដទៃទៀតបានច្រើនណាស់ ហេតុនេះយើងមិនអាចមានការរៀបចំប្រឡងជាលើកទី2 នោះទេ ម្យ៉ាងក្រសួងអប់រំ ក៏បានគិតគូរ និងជួយសិស្សច្រើនដែរតាមរយៈការជួយសង្ខេបមេរៀន បង្កើនក្លិបសិក្សា រួមទាំងបង្កើតប្រព័ន្ធសិក្សាតាមបច្ចេកវិទ្យាដែលសិស្សអាចធ្វើតេស្តសមត្ថភាពខ្លួនឯងជាដើម៕

July 5, 2018

ក្រុមខ្លាំងៗ ត្រៀមរួចរាល់សម្រាប់ការប្រកួតវគ្គ 1/4 ផ្តាច់ព្រ័ត្រនៃ World Cup

ព្រឹត្តិការណ៍ World Cup បានផ្អាកការប្រកួតកាលពីថ្ងៃពុធ ខណៈដែលក្រុមដែលនៅតែមានវត្តមានចំនួន 8ក្រុម ត្រៀមសម្រាប់ការប្រកួតវគ្គ1/4ផ្តាច់ព្រ័ត្រ ក្រោយពីអង់គ្លេស បានក្លាយជាក្រុមចុងក្រោយគេ ក្នុងការឈ្នះសិទ្ធិទៅវគ្គបន្ត ក្រោយពីការយកឈ្នះដោយការស៊ុតបាល់ប៉េណាល់ទី លើក្រុមជម្រើសជាតិកូឡុំប៊ី។

ក្រុមជម្រើសជាតិប្រេស៊ីល របស់តារាឆ្នើម Neymar គឺជាក្រុមមានក្តីសង្ឃឹមច្រើនជាងគេក្នុងការលើកពាន World Cup ជាលើកទី6 របស់ពួកគេនាកីឡដ្ឋាន Luzhniki ក្នុងទីក្រុងម៉ូស្គូ នាថ្ងៃទី15 ខែកក្កដា ប៉ុន្តែ ក្រុមបាល់ទាត់ជម្រើសជាតិបារាំង បែលហ្ស៊ិក និងអ៊ុយរូហ្គាយ នឹងក្លាយជាឧបសគ្គរបស់ពួកគេ ក្នុងការប្រជែងយកកៅអីទៅវគ្គផ្តាច់ព្រ័ត្រ។

ក្រុមជម្រើសជាតិអង់គ្លេសរបស់លោក Gareth Southgate គឺជាអតីតម្ចាស់ជើងឯកតែមួយដែលស្ថិតក្នុងបណ្តុំនៃការចាប់ឆ្នោតមួយទៀត រួមជាមួយនឹងក្រុមម្ចាស់ផ្ទះរុស្ស៊ី ក្រូអាស៊ី និងស៊ុយអែត។ ការដណ្តើមបានជ័យជម្នះរបស់អង់គ្លេស លើក្រុមជម្រើសជាតិកូឡុំប៊ី កាលពីថ្ងៃអង្គារ បានធ្វើឱ្យក្រុមរបស់លោក Southgate ត្រូវប៉ះជាមួយនឹងក្រុមជម្រើសជាតិស៊ុយអែត ដែលបានទម្លាក់ក្រុមជម្រើសជាតិស្វ៊ីស ក្នុងលទ្ធផល 1-០ ក្នុងវគ្គ 16ក្រុមចុងក្រោយ។

លោក Southgate បានបញ្ជាក់ថា លោកបានផ្តោតអារម្មណ៍រួចជាស្រេចចំពោះការប្រកួតវគ្គ 8ក្រុមចុងក្រោយនៅថ្ងៃសៅរ៍នេះ ជាមួយនឹងក្រុមជម្រើសជាតិស្វ៊ីស ក្នុងទីក្រុង Samara ដើម្បីប្រជែងយកកៅអីទៅកាន់វគ្គពាក់កណ្តាលផ្តាច់ព្រ័ត្រ ពោលគឺដើម្បីជួបជាមួយនឹងក្រុមជម្រើសជាតិក្រូអាស៊ី ឬរុស្ស៊ី។

លោក Southgate ដែលការស៊ុតបាល់ប៉េណាល់មិនចូលទីផ្ទាល់របស់លោក បានធ្វើឱ្យអង់គ្លេស ចាញ់ក្រុមអាល្លឺម៉ង់ ក្នុងវគ្គ1/2ផ្តាច់ព្រ័ត្រ ក្នុង Euro ឆ្នាំ1996 នាកីឡដ្ឋាន Wembley នោះ បានឱ្យដឹងថា៖ «នេះពិតជាពិសេសណាស់ ប៉ុន្តែ ខ្ញុំចង់ឱ្យយើងបន្តដំណើរទៅមុខ»៕

ប្រភពពី៖ Channel News Asia

July 5, 2018

ការប្រមូលពន្ធនៅក្នុងខែឧសភា មានចំនួនច្រើនគួរឱ្យកត់សម្គាល់

ការប្រមូលពន្ធក្នុងខែឧសភា ឆ្នាំ2018 កន្លងទៅនេះបានកើនឡើងចំនួន 65.92ប៊ីលានរៀល (ស្មើនឹង 16.48លានដុល្លារអាមេរិក) កើនឡើងប្រមាណជា13.99% ធៀបនឹងរយៈពេលដូចគ្នាកាលពីឆ្នាំ2017កន្លងទៅ។

ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានឱ្យដឹងក្នុងកិច្ចប្រជុំបូកសរុបលទ្ធផលប្រមូលពន្ធក្នុងខែឧសភា ឆ្នាំ2018 ថាក្នុងរយៈពេល5ខែ ដើមឆ្នាំ2018 នេះអគ្គនាយកដ្ឋានពន្ធដារប្រមូលចំណូលពន្ធ-អាករបានចំនួន 4,171.82 ប៊ីលានរៀល (ប្រមាណជា 1,042.96លានដុល្លារអាមេរិក) ឬស្មើនឹង 59.23%។ ប្រសិនបើប្រៀបធៀបរយៈពេល5ខែ ដើមឆ្នាំ2017 ឃើញថាការប្រមូលពន្ធ-អាករគ្រប់ប្រភេទតាមប្រព័ន្ធអនឡាញមានការកើនឡើង 452.05ប៊ីលានរៀល (ប្រមាណជា 113 លានដុល្លារអាមេរិក)ស្មើនឹង 12.15%។

ទន្ទឹមនឹងការកើនឡើងនៃការប្រមូលពន្ធនេះ អគ្គនាយកដ្ឋានពន្ធដាររំពឹងថា ចំណូលពន្ធ-អាករគ្រប់ប្រភេទសម្រាប់ឆ្នាំ2018 អាចប្រមូលបានគ្រប់ផែនការដែលកំណត់ដោយច្បាប់។ ជាមួយគ្នានេះឯកឧត្តមបានណែនាំដល់គ្រប់អង្គភាពឱ្យបន្តខិតខំពង្រឹងការអនុវត្តច្បាប់វិន័យការងារ និងត្រូវមានភាពទន់ភ្លន់តែម៉ឺងម៉ាត់ ដោយផ្អែកលើទិដ្ឋភាពច្បាប់ក្នុងការឆ្លើយតបទៅកាន់អ្នកជាប់ពន្ធ សំដៅឱ្យពួកគាត់រីករាយទទួលយក និងស្ម័គ្រចិត្តបង់ពន្ធគ្រប់ៗគ្នា ធ្វើយ៉ាងណាកាត់បន្ថយជាអតិបរមានូវការរអ៊ូរទាំ របស់អ្នកជាប់ពន្ធ និងផ្តល់កិច្ចសហការល្អ៕

July 3, 2018

ឆ្នាំនេះ មានបេក្ខជនប្រឡងបាក់ឌុបជិត 12ម៉ឺននាក់ ខណៈការអនុវត្តគោលការណ៍នៅតែតឹងតែង

ឆ្នាំនេះ មានបេក្ខជនប្រឡងបាក់ឌុបជិត 12ម៉ឺននាក់ ខណៈការអនុវត្តគោលការណ៍នៅតែតឹងតែង

ក្រោយកំណែរទម្រង់ប្រព័ន្ធអប់រំ បេក្ខជនប្រឡងមធ្យមសិក្សាបានបង្កើតការខិតខំប្រឹងប្រែងកាន់តែខ្លាំងក្នុងការសិក្សាបន្ថែម ដើម្បីឆ្លងកាត់ដំណាក់កាលយ៉ាងសំខាន់សម្រាប់ជីវិតនេះ។

ជាទូទៅ គេសង្កេតឃើញថានៅឆ្នាំដំបូងសិស្សធ្លាក់មានចំនួនច្រើន ដោយសារតែក្រសួងមានការរឹតបន្តឹងដើម្បីធ្វើយ៉ាងណាពង្រឹងគុណភាពអប់រំឱ្យសិស្សខិតខំប្រឹងប្រែងប្រឡងដោយប្រើសមត្ថភាពពិតប្រាកដ។ ស្ថិតក្នុងកាលៈទេសៈនោះ សិស្សជំនាន់ក្រោយៗមានការព្រួយបារម្ភជាខ្លាំង តែក្រសួងនៅរក្សាលំនឹងនៃភាពហ្មត់ចត់ និងរឹតបន្តឹងដដែល រហូតទទួលបានលទ្ធផលវិជ្ជមាននៅឆ្នាំជាបន្តបន្ទាប់ដែលស្តែងចេញតាមរយៈចំនួនសិស្សជាប់និទ្ទេសល្អៗ និងចំនួនសិស្សជាប់បាក់ឌុបមានការកើនឡើង។

នៅឆ្នាំសិក្សា 2017-2018 នេះ ក្រសួងអប់រំយុវជន និងកីឡា បានចេញសេចក្តីប្រកាសថា សម័យប្រឡងមធ្យមសិក្សាទុតិយភូមិចំណេះទូទៅ និងបំពេញវិជ្ជានឹងធ្វើទៅនៅថ្ងៃទី 20 ខែសីហា ឆ្នាំ2018 ខាងមុខនោះដែលក្នុងនោះមានបេក្ខជនសរុបប្រមាណ 117,061នាក់ និងមានមណ្ឌលប្រឡងចំនួន 195មណ្ឌល ដែលចែកចេញជា 4,716បន្ទប់នៅទូទាំង 25រាជធានីខេត្តនៅកម្ពុជា។

ចំពោះថ្ងៃប្រកាសលទ្ធផល ក្រសួងនឹងចេញតាមមណ្ឌលនៅរាជធានីភ្នំពេញ និងខេត្តកណ្តាលនៅថ្ងៃទី 11 ខែកញ្ញា ឆ្នាំ2018 និងចេញលទ្ធផលសម្រាប់គ្រប់មណ្ឌលនៅទូទាំងប្រទេសនៅថ្ងៃទី 12 ខែកញ្ញា ឆ្នាំ2018។ នៅឆ្នាំ 2018 នេះក្រសួងនៅតែត្រៀមលក្ខណៈល្អប្រសើរដើម្បីទប់ស្កាត់ភាពអសកម្ម និងចន្លោះប្រហោងនានា ដើម្បីធានារឹតបន្តឹងគោលការណ៍វិន័យឱ្យបានល្អ តាមរយៈការឃាត់មិនឱ្យលាក់ទុកនូវឧបករណ៍អេឡិចត្រូនិកគ្រប់ប្រភេទក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីដែលរកឃើ្ ត្រូវចាត់ទុកដាក់បេក្ខជនបានប្រព្រឹត្តសកម្មភាពផ្ទុយនឹងបទបញ្ញត្តិ និងកម្រិតវិន័យ ដែលត្រូវកំណត់ឱ្យធ្លាក់ដោយស្វ័យប្រវត្តិ៕

July 3, 2018

គ្រូបង្វឹកម៉ិកស៊ិក ថា អាជ្ញាកណ្តាលចាញ់បោក Neymar ក្រោយប្រេស៊ីល ទៅជួបបែលហ្ស៊ិក

លោក Juan Carlos Osorio គ្រូបង្វឹកនៃក្រុមបាល់ទាត់ជម្រើសជាតិម៉ិកស៊ិក បានលើកឡើងថា លោកអាជ្ញាកណ្តាលសញ្ជាតិអ៊ីតាលី GianlucaRocchi បានចាញ់បោកការសម្តែងដ៏ហួសហេតុ របស់ខ្សែប្រយុទ្ធ Neymar ក្រោយពីក្រុមរបស់លោកបានរងបរាជ័យក្នុងលទ្ធផល 2-០ ក្រោមស្នាដៃក្រុមជម្រើសជាតិប្រេស៊ីល ក្នុងវគ្គ 16ក្រុមចុងក្រោយនៃយុទ្ធនាការ World Cup កាលពីថ្ងៃចន្ទ។

Neymar បានរកគ្រាប់បាល់បើកឆាកនៅនាទី ទី51 នៅកីឡដ្ឋាន Samara Arena និងជួយឱ្យ Roberto Firmino រកបានគ្រាប់បាល់ទី2 នៅជិតបញ្ចប់ការប្រកួត។ ប៉ុន្តែភាពតានតឹងផ្សេងៗបានកើតឡើង ក្រោយពីការប៉ះទង្គិចមួយជាមួយនឹងខ្សែបម្រើ Miguel Layun ខណៈដែលក្រុមបាល់ទាត់ជម្រើសជាតិម៉ិកស៊ិក បានព្យាយាមវាយបកដើម្បីរកគ្រាប់បាល់តាមស្មើវិញ។ គ្រូបង្វឹករបស់ក្រុមប្រេស៊ីល លោក Tite បានបញ្ជាក់ថា Layun បានជាន់កជើងរបស់ Neymar។

ប៉ុន្តែ លោក Osorio វ័យ 55ឆ្នាំ បានបដិសេធក្នុងការនិយាយឈ្មោះ Neymar ចំៗ ក្រោយពីការបរាជ័យនេះ ប៉ុន្តែបានបញ្ជាក់ថា ការសម្តែងក្នុងការប្រកួត ត្រូវបានកាត់សេចក្តីដោយមិនសមរម្យដោយលោក Rocchi។ គ្រូបង្វឹករូបនេះបានរិះគន់ថា៖ ខ្ញុំគិតថា វាជារឿងដ៏អាម៉ាស់មួយក្នុងកីឡាបាល់ទាត់។ យើងបានខ្ជះខ្ជាយពេលវេលាជាច្រើនដោយសារតែកីឡាករតែម្នាក់។ យើងបានបាត់បង់ទម្រង់លេងរបស់យើងនៅតង់ទី2 ដោយសារតែអាជ្ញាកណ្តាល។

ការបង្ហាញពីទម្រង់លេងដ៏ល្អរបស់ Neymar ត្រូវបានមើលរំលងដោយសារតែការប្រើប្រាស់កលល្បិចរបស់គេក្នុងការបញ្ចេញប្រតិកម្មជ្រុលចំពោះការប្រជែងដណ្តើមបាល់មិនសូវជាធ្ងន់ធ្ងរ។

ទំព័រថ្មីចុងក្រោយបំផុតនៃការបញ្ចេញឥរិយាបថដ៏គួរឱ្យអស់សំណើចរបស់គេ បានកើតឡើងក្នុងតង់ទី2 នៅពេលដែលខ្សែបម្រើអន្តរជាតិម៉ិកស៊ិក Layun ហាក់ដូចជាបានជាន់ទៅលើជង្គង់របស់គេ ក្នុងពេលរូបគេកំពុងដួលលើទីលាន។ Neymar បានសម្តែងនូវការឈឺចាប់យ៉ាងខ្លាំង និងលោតចុះឡើង ដែលហាក់ដូចជារូបគេកំពុងតែឆក់ខ្សែភ្លើងអ៊ីចឹង៕

ប្រភពពី៖ Channel News Asia

July 3, 2018

លោក Martinez កោតសរសើរស្មារតីប្រយុទ្ធរបស់បែលហ្ស៊ិក ក្រោយពីផ្តួលជប៉ុន

លោក Roberto Martinez គ្រូបង្វឹកនៃក្រុមបាល់ទាត់ជម្រើសជាតិបែលហ្ស៊ិក បានបញ្ជាក់ថា លោកពិតជាមានមោទនភាពណាស់ ក្រោយពីក្រុមរបស់លោកបានធ្វើការវាយបកពីការដេញតាមក្រោយក្នុងលទ្ធផល 2-០ដើម្បីផ្តួលក្រុមជម្រើសជាតិជប៉ុន ក្នុងការកក់កៅអីមួយក្នុងវគ្គ 8ក្រុមចុងក្រោយនាយុទ្ធនាការ World cup។

ខ្សែបម្រើ NacerChadli ដែលបានចូលលេងក្នុងនាមជាកីឡាករបម្រុង បានរកគ្រាប់បាល់ឈ្នះនៅជិតបញ្ចប់ការប្រកួត ខណៈដែលក្រុមជម្រើសជាតិបែលហ្ស៊ិក បានបំពេញការដេញតាមពីក្រោយ 2-០ ដើម្បីផ្តួលក្រុមជម្រើសជាតិជប៉ុន ក្នុងលទ្ធផល 3-2 កាលពីថ្ងៃចន្ទ និងឈានទៅវគ្គ 8ក្រុមចុងក្រោយនៃព្រឹត្តិការណ៍ World Cup ជាមួយនឹងប្រេស៊ីល។

ការរកបានគ្រាប់បាល់បញ្ចូលទីយ៉ាងល្អរបស់ Chadli នៅនាទីទី4នៃនាទីបន្ថែម គឺជាសកម្មភាពចុងក្រោយនៃការប្រកួតដ៏រំភើបក្នុងវគ្គ 16ក្រុមចុងក្រោយ ដែលធ្វើឱ្យបែលហ្ស៊ិក បានក្លាយជាក្រុមដំបូងគេក្នុងរយៈពេល 48ឆ្នាំក្នុងការវាយបកពីការដេញតាមពីក្រោយ 2-០ យ៉ាងជោគជ័យក្នុងការប្រកួតវគ្គចាញ់ធ្លាក់នៃយុទ្ធនាការ WorldCup។

ក្រុមបិសាចក្រហមមួយនេះ នឹងត្រូវប៉ះជាមួយនឹងក្រុមម្ចាស់ជើងឯក 5សម័យកាល ប្រេស៊ីល ក្នុងទីក្រុង Kazan នៅថ្ងៃសុក្រនេះ ក្រោយពីរកបាន 3គ្រាប់ក្នុងតង់ទី២ ដោយគ្មានការវាយបកវិញ ដើម្បីបំបែកតំបន់ការពារដ៏រឹងមាំរបស់ជប៉ុន។ លោក Roberto Martinez គ្រូបង្វឹកនៃក្រុមបាល់ទាត់ជម្រើសជាតិប្រេស៊ីល បានកោតសរសើរទៅនឹងដំណោះស្រាយនៃក្រុមរបស់លោក។

លោក Martinez បានឱ្យដឹងថា៖ «មិនមានភាពវិជ្ជមានឡើយនៅថ្ងៃនេះ។ វាពិតជាសំខាន់ណាស់ក្នុងការឈានទៅវគ្គបន្ត។ វាជាថ្ងៃមួយក្នុងការមានមោទនភាពលើកីឡាករទាំងនេះ»៕

ប្រភពពី៖ Channel News Asia

July 3, 2018

ក្រុមហ៊ុនអ័រគីដេវីឡា រៀបចំកម្មវិធីអបអរការលក់គម្រោងអ័រគីដេវីឡាដឹរ៉ូយ៉ាល់ផ្លូវ2004 អស់100%

អ័រគីដេវីឡា ដឹរ៉ូយ៉ាល់ផ្លូវ2004 បានរៀបចំកម្មវិធីអបអរសារទរការលក់អស់ 100ភាគរយ ក៏ដូចជាការថ្លែងអំណរគុណដល់អតិថិជនដែលគាំទ្រ និងបានទិញផ្ទះនៃគម្រោងអ័រគីដេវីឡា ដឹរ៉ូយ៉ាល់ នាល្ងាចថ្ងៃទី 30 ខែមិថុនា ឆ្នាំ2018 នៅទីតាំងការិយាល័យលក់ផ្លូវ2004 សង្កាត់អូរបែកក្អម ខណ្ឌសែនសុខ រាជធានីភ្នំពេញ។

ក្រុមហ៊ុនអ័រគីដេវីឡា បានផ្តល់ជូនអតិថិជននូវគេហដ្ឋានដ៏ល្អប្រណិត និងស្របទៅតាមទីផ្សារសម្រាប់ប្រជាជនកម្ពុជា។ ជាក់ស្តែងគម្រោងអ័រគីដេវីឡា ដឹរ៉ូយ៉ាល់គឺជាគម្រោងទី2 ដែលបានចាប់ផ្តើមឡើងក្នុងឆ្នាំ2015កន្លងមក បន្ទាប់ពីភាពជោគជ័យពីគម្រោងដំបូងទី1 មានឈ្មោះថា អ័រគីដេវីឡា ដឹហ្គ្រេន ដែលត្រូវបានលក់អស់ក្នុងរយៈពេលត្រឹមតែ 3ខែតែប៉ុណ្ណោះ។

គម្រោងទាំងមូលរបស់អ័រគីដេវីឡា ដឹរ៉ូយ៉ាល់ បច្ចុប្បន្នបានលក់អស់ 100ភាគរយ ដែលក្នុងនោះផ្ទះប្រកបអាជីវកម្មហ្សប ហោសត្រូវបានសាងសង់រួចរាល់ ព្រមទាំងមានអតិថិជនជាច្រើនបានចូលស្នាក់នៅ ក៏ដូចជាប្រកបអាជីវកម្មផងដែរ។ ក្នុងនោះដែរ គម្រោងខុនដូរអ័រគីដេដឹរ៉ូយ៉ាល់ខុនដូមីនីម ដែលមានទីតាំងនៅជាមួយគ្នាផងដែរនោះ ក៏ទទួលបានការចាប់អារម្មណ៍ពីសំណាក់អតិថិជនជាតិ និងអន្តរជាតិ ដោយគម្រោងទាំងមូលលក់អស់ជាង 60ភាគរយ។

គួរបញ្ចាក់ផងដែរថា ក្រុមហ៊ុនអ័រគីដេវីឡា ក៏មានគម្រោងដ៏ធំមួយទៀតមានឈ្មោះថា អ័រគីដេវីឡា ដឹប៊ូតានិចស៊ីធី ដែលមានទីតាំងនៅខណ្ឌជ្រោយចង្វារ គ្របដណ្តប់លើផ្ទៃដីជិត 200ហិចតា ហើយត្រូវបានលក់អស់ជាង 50ភាគរយនៃ៣ផ្នែកដំបូងនៃគម្រោងទាំងមូល៕

July 2, 2018

Verstappen ឈ្នះការប្រណាំងនៅអូទ្រីស ខណៈ Vettel ដណ្តើមការនាំមុខលើតារាងពិន្ទុរួម

កីឡាករ Max Verstappen បានដណ្តើមយកប្រៀបលើការបោះបង់ការប្រណាំងដ៏កម្ររបស់ក្រុម Mercedes កាលពីថ្ងៃអាទិត្យ តាមរយៈការឈ្នះការប្រកួតជាលើកទី1 របស់គេនៅឆ្នាំនេះ ក៏ដូចជាជួយឱ្យក្រុម Red Bull ដណ្តើមបានជ័យជម្នះនៅលើទឹកដីខ្លួនឯងជាលើកទី1 ក្នុងព្រឹត្តិការណ៍ប្រណាំងរថយន្តដែលពោរពេញដោយគ្រោះថ្នាក់ “Austrian Grand Prix”។

កីឡាករសញ្ជាតិហូឡង់រូបនេះ បានកត់ត្រាជ័យជម្នះ ក្រោយពីទាំងកីឡាករ Lewis Hamilton និងValtteriBottas បានបោះបង់ចោលការប្រកួតដោយសារតែមានបញ្ហាផ្នែកថាមពល និងប្រអប់លេខរៀងៗខ្លួន ខណៈដែលការប្រជែងរបស់ក្រុមពួកគេសម្រាប់ការឈ្នះការប្រណាំងនៅលើទឹកដីអូទ្រីសជាលើកទី4 ជាប់ៗគ្នា បានបញ្ចប់ទាំងខកចិត្ត នៅលើទីលានផ្លូវ Red Bull Ring ដែលជាកន្លែងមានសីតុណ្ហភាពដល់ទៅ 48អង្សាសេ។

during the Formula One Grand Prix of Austria at Red Bull Ring on July 1, 2018 in Spielberg, Austria.

Verstappen ដែលត្រូវបានគាំទ្រដោយអ្នកគាំទ្រច្រើនជាង 20,000នាក់នោះ បានឱ្យដឹងថា៖ «វាពិតជារឿងដ៏អស្ចារ្យណាស់ក្នុងការឈ្នះក្នុងនាមរថយន្ត Red Bull នៅលើទីលាន Red Bull Ring»។ កីឡាកររូបនេះបានបន្ថែមទៀតថា៖ «ពិតជាមានការលំបាកក្នុងការគ្រប់គ្រងលើបញ្ហាកង់ ដោយសារតែមានកម្តៅយ៉ាងខ្លាំង ប៉ុន្តែយើងបន្តធ្វើបានយ៉ាងល្អ។ វាពិតជាអស្ចារ្យណាស់ក្នុងការឈ្នះនៅទីនេះ ជាមួយនឹងអ្នកគាំទ្រហូឡង់ជាច្រើន»។

ការបោះបង់ចោលការប្រកួតរបស់កីឡាករទាំង2នាក់ក្នុងក្រុមតែ1 បានកើតឡើងជាលើកទី1 សម្រាប់ក្រុម McLaren ចាប់តាំងពីការប្រណាំង Spanish Grand Prix ឆ្នាំ2016 ដោយកាលនោះ Verstappen បានឈ្នះការប្រណាំងនៅថ្ងៃនៃការបង្ហាញខ្លួនឱ្យក្រុម Red Bull ជាលើកទី1 របស់គេ ក្រោយពី Hamilton បានប៉ះទង្គិចជាមួយនឹងមិត្តរួមក្រុមខ្លួន Nico Rosberg នៅត្រឹមជុំទី1។

Sebastian Vettel របស់ក្រុម Ferrari បានស្ថិតក្នុងចំណាត់ថ្នាក់លេខ3 ដើម្បីនាំមុខលើតារាងប្រជែងពាន ដោយមាន 146ពិន្ទុ ខណៈដែល Hamilton មាន145៕

ប្រភពពី៖ Channel News Asia

July 2, 2018

T-Shop សាខា Aeon Mall សែនសុខបើកសម្ពោធជាមួយការផ្តល់ជូនប្រូម៉ូសិនយ៉ាងសន្ធឹកសន្ធាប់

T-Shop ជាក្រុមហ៊ុននាំចូលផ្តាច់មុខនូវសម្ភារៈ Accessary ទូរសព្ទ័ និងគ្រឿងអេឡិចត្រូនិចយ៉ាងសម្បូរបែបនៅកម្ពុជា ដែលត្រូវបានគាំទ្រយ៉ាងច្រើនពីសំណាក់អ្នកប្រើប្រាស់ជាពិសេសយុវវ័យ ឥលូវនេះបានពង្រីកបណ្តាញសាខារបស់ខ្លួនបន្ថែម គឺសាខាទី13នៅផ្សារទំនើប ដោយការប្រារព្ធធ្វើពិធីសម្ភោធបើកលក់ជាផ្លូវការ កាលពីថ្ងៃទី 29ខែមិថុនា ឆ្នាំ2018។

នៅក្នុងកម្មវិធីសម្ភោធនេះ T-Shop បានបង្កើតនូវកម្មវិធីល្បែងសប្បាយៗ ការផ្តល់ជូននូវរង្វាន់ Lucky Draw រហូតដល់ 200រង្វាន់ ព្រមទាំងការលក់បញ្ចុះតម្លៃពិសេសរហូតទៅដល់ 50% លើផលិតផលគ្រឿង Accessary ទូរសព្ទ័ និងគ្រឿងអេឡិចត្រូនិចមួយចំនួនទៅដល់អតិថិជនផងដែរ។

កញ្ញា អ៊ុយ អ៊ែលណា អគ្គនាយិការងនៃក្រុមហ៊ុន T-Shop បានឲ្យដឹងថា កញ្ញាមានភាពសប្បាយរីករាយជាខ្លាំងចំពោះការគាំទ្រពីសំណាក់អតិថិជន ដែលបានធ្វើឲ្យ T-shop មានការរីកចម្រើនយ៉ាងខ្លាំងក្នុងរយៈពេល 2ឆ្នាំកន្លងមកនេះ។ កញ្ញា អ៊ែលណា បានសង្កេតឃើញថាបច្ចុប្បន្នសន្ទុះនៃការប្រើប្រាស់ស្មាតហ្វូន ពីសំណាក់ប្រជាជនខ្មែរមានការកើនឡើង ដូចច្នេះហើយកញ្ញាចង់ផ្តល់ភាពងាយស្រួល ក៏ដូចជាបទពិសោធល្អៗក្នុងការប្រាស់ប្រាស់សម្ភារៈដែលទាក់ទិននឹងបច្ចេកវិទ្យា ជាពិសេសការផ្តល់ជូននូវផលិតផលដែលមានគុណភាព និងតម្លៃសមរម្យទៅដល់ប្រជាជនខ្មែរ។

គួរបញ្ចាក់ដែរថា សព្វថ្ងៃនេះក្រុមហ៊ុនT-Shop បានពង្រីកសាខាររបស់ខ្លួនចំនួន 15សាខានៅក្នុងរាជធានី និងតាមបណ្តាខេត្តមួយចំនួន។ ក្នុងនោះ T-shop នឹងគ្រោងបើកជាផ្លូវការនូវសាខាទី14 និងទី 15របស់ខ្លួននៅ T-Shop Eden Garden និង T-Shop Heritage Walk នៅខេត្តសៀមរាបនាពេលខាងមុខឆាប់ៗនេះផងដែរ៕

July 2, 2018

Author: វល័ក្ខ