វល័ក្ខ - La Reine Media

វិនិយោគិនខេត្តសៀងហៃ នឹងមកវិនិយោគវិស័យថាមពលនៅកម្ពុជា

ក្នុងទិសដៅលើកកម្ពស់វិស័យថាមពលនៅកម្ពុជា ក្រុមអ្នកវិនិយោគខេត្តសៀងហៃ ប្រទេសចិនគ្រោងចូលមកបោះទុនដំឡើងរោងចក្រផលិតថាមពលអគ្គិសនីដើរដោយធ្យូងថ្ម និងប្រព័ន្ធផ្កាយរណបនៅក្នុងប្រទេសកម្ពុជា ដើម្បីផ្គត់ផ្គង់តម្រូវការ និងចូលរួមអភិវឌ្ឍវិស័យនេះឱ្យកាន់តែប្រសើរឡើង។

លោក លាំង សាន (Liang Shan) អនុប្រធានក្រុមហ៊ុន Shanghai Electronic Communication Technology Co., Ltd បានលើកឡើងថា ក្រុមហ៊ុនរបស់លោកមានឯកទេសខាងដំឡើងរោងចក្រថាមពលអគ្គិសនីធ្យូងថ្មជាមួយបច្ចេកវិទ្យាទំនើបមិនប៉ះពាល់ដល់បរិស្ថានដោយលក្ខណៈពិសេសនៃប្រព័ន្ធបច្ចេកវិទ្យាផ្កាយរណបដែលអាចចាប់រូបភាព និងបញ្ជូនទិន្នន័យឆ្លងកាត់ទ្វីបនិងប្រទេសជាច្រើនក្នុងពិភពលោក។ តំណាងក្រុមហ៊ុនទាំង2 បានស្នើសុំក្រសួងពាណិជ្ជកម្ម ជួយគាំទ្រគម្រោងវិនិយោគនេះ ដើម្បីបង្កើនទំហំវិនិយោគរវាងខេត្តសៀងហៃ និងប្រទេសកម្ពុជា។

ឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មបានសម្តែងការគាំទ្រខ្លាំងចំពោះគម្រោងការវិនិយោគខាងលើ និងបានសន្យាជួយសម្របសម្រួលគម្រោងទាំងនេះឱ្យលេចរូបរាងឡើងនាពេលអនាគត។ ឯកឧត្តមរដ្ឋមន្ត្រីក៏បានស្នើទៅកាន់តំណាងក្រុមហ៊ុនខាងលើ ធ្វើការសិក្សាអំពីលក្ខណៈភូមិសាស្ត្រនៃប្រទេសកម្ពុជា និងសក្តានុពលអតិថិជនឱ្យបានច្បាស់ ដើម្បីរៀបចំសំណើវិនិយោគផ្លូវការ ដាក់ជូនរាជរដ្ឋាភិបាលកម្ពុជា៕

July 18, 2018

សាលារាជធានីភ្នំពេញ ផលិតវីដេអូជំរុញឱ្យប្រជាជនជិះរថយន្តក្រុង ដើម្បីកាត់បន្ថយការកកស្ទះចរាចរណ៍

ភ្នំពេញ៖ សេវាដឹកជញ្ជូនសាធារណៈ បានក្លាយជាផ្នែកមួយនៃជីវិតរបស់ប្រជាជន ក្នុងប្រទេសអភិវឌ្ឍន៍នានា ហើយវាក៏ជាផ្នែកមួយដែលអាចរុញច្រានឱ្យសង្គមមានការអភិវឌ្ឍបានលឿនថែមទៀតផង។

នៅពេលដែលមនុស្សម្នាក់ៗកាត់បន្ថយការប្រើប្រាស់មធ្យោបាយផ្ទាល់ខ្លួន ហើយងាកមកធ្វើដំណើរតាមបណ្តាញដឹកជញ្ជូនសាធារណៈ នោះពួកគេនឹងអាចចំណេញថវិកាក្នុងការធ្វើដំណើរ ចំណេញពេលវេលាដើម្បីធ្វើការងារ ឬអានសៀវភៅ មិនទើសចិត្ត ឬខាតថវិកាចំណាយលើសាំងនៅពេលស្ទះចរាចរណ៍ និងអាចសម្រាកបានយ៉ាងល្អដែលអាចធ្វើឱ្យពួកគេសន្សំថាមពលបានយ៉ាងមានប្រសិទ្ធភាពដើម្បីធ្វើការងារប្រចាំថ្ងៃ។ នៅប្រទេសអភិវឌ្ឍន៍ធំៗ សេវាសាធារណៈ ដូចជារថយន្តក្រុង និងរថភ្លើងជាដើមបានជួយសម្រួលយ៉ាងច្រើនដល់ការរស់នៅរបស់ប្រជាជនគ្រប់ស្រទាប់វណ្ណៈ មិនថាអ្នកដែលមានចំណូលតិច ចំណូលមធ្យម ឬបុគ្គលសំខាន់ៗក្នុងសង្គមនោះទេ។

នៅពេលថ្មីៗនេះ សាលារាជធានីភ្នំពេញ បានចេញវីដេអូអប់រំមួយដែលលើកទឹកចិត្តឱ្យប្រជាជនជិះរថយន្តក្រុងសាធារណៈ ដើម្បីធ្វើជាមធ្យោបាយធ្វើដំណើរ។ ក្នុងវីដេអូនោះក៏បង្ហាញពីគុណសម្បត្តិជាច្រើនសម្រាប់ការជិះរថយន្តក្រុង វិធីសាស្ត្រទូទាត់សាច់ប្រាក់ និងវិធីសាស្ត្រចុងប៊ូតុងដើម្បីស្នើសុំឈប់យ៉ាងងាយស្រួលដើម្បីជាជំនួយដល់ប្រជាជនដែលមិនធ្លាប់ប្រើប្រាស់សេវារថយន្តក្រុងងាយធ្វើដំណើរដោយមិនបារម្ភ។

ខាងក្រោមនេះជាវីដេអូដែលសាលារាជធានីភ្នំពេញបានចេញកាលពីព្រឹកមិញនេះ៖

July 18, 2018

6ខែដើមឆ្នាំ2018 ការនាំចេញអង្ករកម្ពុជា ថយចុះ 5.9ភាគរយ ធៀបឆ្នាំ2017

របាយការណ៍ស្ដីអំពីស្ថានភាពនៃការនាំចេញអង្កររបស់កម្ពុជារបស់លេខាធិការដ្ឋានច្រកចេញចូលតែមួយបានបង្ហាញថា រយៈពេល 6ខែ គិតចាប់ពីខែមករា ដល់ខែមិថុនា ក្នុងឆ្នាំ2018 ការនាំចេញអង្កររបស់កម្ពុជាទៅកាន់ទីផ្សារអន្តរជាតិ មានចំនួន 271.537 តោន។ ចំនួននេះបានថយចុះ 5.9ភាគរយ បើធៀបនឹងការនាំចេញអង្ករក្នុងរយៈពេលដូចគ្នានេះនៅឆ្នាំ2017 ដែលមានចំនួន 288.562តោន។បញ្ហានេះគឺដោយសារតែតម្រូវការក្រៅស្រុកបានថយចុះ។

របាយការណ៍ដដែលនោះបានឱ្យដឹងដែរថា ក្នុងចំណោមប្រទេសទាំង56 ដែលទទួលទិញអង្ករពីកម្ពុជា ក្នុងនោះគេសង្កេតឃើញថា ប្រទេសចិនបានកាត់បន្ថយការទិញអង្ករពីកម្ពុជាយ៉ាងច្រើន គឺកាត់បន្ថយពីជាង 1ម៉ឺនតោនក្នុងខែឧសភា មកនៅត្រឹមជាង 500តោន នៅក្នុងខែមិថុនា។ ដោយឡែកបណ្តាប្រទេសផ្សេងទៀត រួមមានសហភាពអឺរ៉ុប និងប្រទេសជាសមាជិកអាស៊ាននៅបន្តទិញអង្ករពីកម្ពុជាក្នុងបរិមាណប្រហាក់ប្រហែលគ្នា ដែលកន្លងមកទីផ្សារនាំចូលអង្ករពីកម្ពុជាច្រើនជាងគេគឺ ប្រទេសចិនបាននាំចូល 6ម៉ឺនតោន ប្រទេសបារាំងជិត 4ម៉ឺនតោន ប្រទេសម៉ាឡេស៊ីជាង 2ម៉ឺនតោន។

ចំពោះក្រុមហ៊ុនដែលនាំចេញអង្ករពីកម្ពុជាច្រើនជាងគេ គឺក្រុមហ៊ុនបៃតងរបស់ឧកញ៉ា ភូ ពុយបាននាំចេញចំនួនជាង 2.3ម៉ឺនតោន លេខ2 គឺក្រុមហ៊ុន City Rice នាំចេញបាន 2.1ម៉ឺនតោន និងលេខ3ក្រុមហ៊ុនខ្មែរហ្វូដរបស់ឧកញ៉ា គឹមសាវុធ។ គិតជាសរុបក្រុមហ៊ុនដែលនាំអង្ករកម្ពុជាចេញទៅក្រៅប្រទេសមានចំនួន 68ក្រុមហ៊ុន។

របាយការណ៍ដដែលក៏បានបង្ហាញពីប្រភេទអង្ករដែលកម្ពុជាបាននាំចេញក្នុងរយៈពេល 6ខែក្នុងឆ្នាំ2018 នេះដែរ គឺប្រភេទអង្ករក្រអូបច្រើនជាងគេ ដែលមានចំនួនដល់ទៅ 199.658តោន និងអង្ករសគ្រាប់វែងចំនួន 54.637តោន។ ក្នុងនោះអង្ករកម្ពុជាត្រូវបាននាំចេញទៅកាន់ទីផ្សារគោលដៅច្រើនជាងគេនៅសហភាពអឺរ៉ុប(26ប្រទេស)ចំនួន 137.353តោន និងទៅប្រទេសជាសមាជិកអាស៊ាន(ម៉ាឡេស៊ីប្រ៊ុយណេ សិង្ហបុរី និងវៀតណាម)មានចំនួន 29.375តោន ព្រមទាំងគោលដៅនៅផ្សេងៗទៀតចំនួន 26ប្រទេស មានចំនួន 104.809តោន។

ចំពោះរបាយការណ៍អង្ករដែលកម្ពុជាបាននាំចេញប្រចាំខែក្នុងឆ្នាំ2018 របស់លេខាធិការដ្ឋានច្រកចេញចូលតែមួយដែលបានបំពេញបែបបទនាំចេញអង្ករបានបង្ហាញថា នៅខែមករា ការនាំចេញអង្ករកម្ពុជាមានចំនួន 62.623តោន។ ខែកុម្ភៈមានចំនួន 47.809តោន។ ខែមីនា មានចំនួន 50.683តោន។ ខែមេសា មានចំនួន36.239តោន។ ខែឧសភា មានចំនួន 42.865តោន និងខែមិថុនា មានចំនួន31.318តោន។

ស្ថានភាពនៃការនាំចេញអង្កររបស់កម្ពុជាក៏ត្រូវបានក្រសួងកសិកម្ម រុក្ខា ប្រមាញ់ និងនេសាទប្រកាសឱ្យដឹងដែរថា នៅឆ្នាំ2013 កម្ពុជានាំចេញអង្ករទៅក្រៅប្រទេសបានចំនួន 378.856តោន។ ឆ្នាំ2014 ចំនួន 387.061តោន។ ឆ្នាំ2015 ចំនួន 538.396តោន។ ឆ្នាំ2016 ចំនួន 542.144តោន។ ឆ្នាំ2017 មានចំនួន 635.679តោន៕

July 18, 2018

ពាណិជ្ជកម្មតាមផ្លូវអាកាសមានកំណើនប្រមាណជាង10% ជារៀងរាល់ឆ្នាំ

យោងតាមតួលេខរបស់លេខាធិការដ្ឋានអាកាសចរស៊ីវិលបានបង្ហាញថា ចំនួនភ្ញៀវជាតិ និងអន្តរជាតិ ដែលធ្វើដំណើរតាមយន្តហោះជាតិ និងអន្តរជាតិមកកាន់ប្រទេសកម្ពុជាក្នុងឆមាសទី1 ឆ្នាំ2018នេះ មានចំនួនជាង 5លាន 1សែននាក់ កើនឡើង24% បើប្រៀបធៀបនឹងរយៈពេលដូចគ្នាកាលពីឆ្នាំ2017។ នេះបើតាមការឱ្យដឹងពីលោកស៊ិន ចាន់សេរីវុត្ថា រដ្ឋលេខាធិការដ្ឋានអាកាសចរស៊ីវិលកម្ពុជា។

លោកបញ្ជាក់ថា៖ «តួលេខខាងលើនេះ គឺរាប់បញ្ចូលចំនួនភ្ញៀវដែលធ្វើដំណើរតាមព្រលានយន្តហោះទាំង3 របស់កម្ពុជា គឺព្រលានយន្តហោះអន្តរជាតិភ្នំពេញ មានចំនួន 2លាន 6សែននាក់ ព្រលានយន្តហោះខេត្តសៀមរាប ចំនួន 2លាន 3សែននាក់ និងក្រៅពីនោះគឺឆ្លងកាត់ព្រលានយន្តហោះខេត្តព្រះសីហនុប្រមាណ 2សែននាក់»។

លោកបានឱ្យដឹងថា ចំនួនភ្ញៀវដែលធ្វើដំណើរតាមព្រលានយន្តហោះទាំង3 របស់កម្ពុជាប្រសិនបើមិនមានព្រឹត្តិការណ៍ធំៗដូចជាជំងឺ សារ(SAR) និងបាតុកម្មផ្សេងៗទេនោះ ជើងហោះហើរនឹងនៅតែមានជាប្រចាំដដែល ជាពិសេសជើងហោះហើរក្នុងស្រុក ដូចជាក្រុមហ៊ុនអាកាសចរណ៍កម្ពុជាអ៊ែរវេយ៍(Cambodia Airways) ដែលទើបចាប់ផ្តើមប្រតិបត្តិការដឹកអ្នកដំណើររបស់ខ្លួននោះ មិនទាន់អាចចាត់ទុកថា ជាការបង្កើនចំនួនភ្ញៀវអ្នកធ្វើដំណើរនៅឡើយទេ ព្រោះគ្រាន់តែមានផ្លូវហោះហើរថ្មីនៅក្នុងស្រុកនៅឡើយ ទាល់តែក្រុមហ៊ុនគាត់បើកការហោះហើរជាអន្តរជាតិទើបអាចហៅថា ជាការទទួលបានភ្ញៀវថ្មីៗមក នោះទើបអាចចាត់ទុកថាមានកំណើនភ្ញៀវទេសចរ។

លោកបញ្ជាក់បន្ថែមថា តែរដូវនេះជារដូវខ្សត់ភ្ញៀវ ដែលគេហៅថា Low season គឺចំនួនភ្ញៀវមានការថយចុះជាធម្មតា ប៉ុន្តែកំណើនពាណិជ្ជកម្មតាមផ្លូវអាកាសនៅតែមានដដែល គឺប្រមាណជាជាង10% ជារៀងរាល់ឆ្នាំ។

លោកបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានគយនិងរដ្ឋាករកម្ពុជាបានអះអាងថា កំណើនពាណិជ្ជកម្មតាមផ្លូវអាកាសបានឆ្លុះបញ្ចាំងពីកំណើនសេដ្ឋកិច្ចការអភិវឌ្ឍ និងសន្តិភាពរបស់កម្ពុជាដែលបានផ្តល់នូវទំនុកចិត្តដល់វិនិយោគិនទាំងក្នុង និងក្រៅស្រុកក្នុងការបន្តបោះទុនវិនិយោគជាបន្តបន្ទាប់ និងមិនចាំបាច់តែមានជើងហោះហើរត្រង់ផ្ទាល់(Direct flight)ឬមិនផ្ទាល់នោះទេ សំខាន់ឱ្យតែមានកិច្ចព្រមព្រៀងនៃការតភ្ជាប់ផ្លូវអាកាសរបស់ក្រុមហ៊ុនណាមួយហើយនោះ យើងនឹងទទួលបានលំហូរចូលនៃអ្នកដំណើរដែលនឹងនាំមកនូវកំណើនសេដ្ឋកិច្ចនៃប្រទេសជាតិ។

អគ្គនាយកក្រុមហ៊ុនអាកាសយានដ្ឋានកម្ពុជា លោក Eric DELOBEL បានថ្លែងថា កិច្ចសហការរបស់រដ្ឋបាលគយដែលបាន និងកំពុងផ្តល់សេវាកម្មនៅក្នុងអាកាសយានដ្ឋានទាំង3 (ភ្នំពេញ សៀមរាបនិងព្រះសីហនុ) បានផ្តល់នូវកិច្ចសម្រួលពាណិជ្ជកម្មដែលអាចឆ្លើយតបបានទាន់ពេលវេលានឹងកំណើនទំហំពាណិជ្ជកម្មដែលគ្របដណ្តប់ប្រមាណ40% នៃសកម្មភាពរបស់អាកាសយានដ្ឋានទាំងមូលក្នុង2017កន្លងមក៕

July 18, 2018

Woods៖ British Open គឺជាឱកាសដ៏ល្អក្នុងការឈ្នះពានធំមួយទៀត

កីឡាករវាយកូនគោល Tiger Woods បានបញ្ជាក់ថា ព្រឹត្តិការណ៍ British Open នឹងក្លាយជាឱកាសដ៏ល្អបំផុតរបស់គេក្នុងការឈ្នះពានរង្វាន់ធំមួយទៀត ហើយយុទ្ធនាការនេះ អាចនឹងក្លាយជាសប្តាហ៍ថ្មីមួយដើម្បីបញ្ចប់ការមិនស្គាល់ឈ្នះពានធំៗសោះរបស់គេរយៈពេលច្រើនជាង 1ទសវត្សរ៍ កន្លងមកនេះ។

ក្នុងពេលនិយាយនៅឯទីលាន Carnoustie កាលពីថ្ងៃអង្គារ ពោលគឺរយៈពេល 2ថ្ងៃមុនពេលការប្រកួតជុំទី1 របស់ព្រឹត្តិការណ៍នេះ Woods បានបញ្ជាក់ថា British Open នឹងបង្កើតឱ្យមានការប្រើប្រាស់ថាមពលតិចតួច ដែលជារឿងដ៏ល្អសម្រាប់កីឡាករវាយកូនគោលម្នាក់ដែលស្ថិតក្នុងវ័យកណ្តាលម្នាក់នេះ។

Tiger Woods walks up the hill towards the 16th green during the first round of the Quicken Loans National golf tournament, Thursday, June 28, 2018, in Potomac, Md. (AP Photo/Nick Wass)

កីឡាករវ័យ 42ឆ្នាំរូបនេះ ដែលល្បឿននៃការវាយកូនគោលរបស់គេនៅតែស្ថិតក្នុងចំណោមល្បឿនដ៏លឿនបំផុតបើទោះបីឈានដល់វ័យកណ្តាល និងវះកាត់សាច់ដុំខ្នងជាច្រើនលើកមកហើយនោះ បានឱ្យដឹងថា៖ «អ្នកមិនចាំបាច់វាយកូនគោលឱ្យបានឆ្ងាយនៅលើទីលានមួយឡើយ ពិតណាស់ ខ្ញុំនឹងនិយាយថា វានឹងផ្តល់ឱកាសដ៏ល្អបំផុតក្នុងការឈ្នះពានធំ 1ទៀត»។ ប៉ុន្តែ រូបគេដឹងថា ពេលវេលាចេះតែដើរទៅមុខ និងដឹងថា រូបគេនឹងមិនតែងតែអាចប្រជែងជាមួយនឹងកីឡាករវ័យក្មេងជាច្រើនទៀតឡើយ។ កីឡាកររូបនេះបានបន្ថែមទៀតថា៖ «កីឡាករជាច្រើនដែលធ្វើបានល្អ កំពុងស្ថិតក្នុងអារម្មណ៍ដ៏ល្អមួយ ហើយក៏វាយកូនគោលបានយ៉ាងល្អផងដែរ»៕

ប្រភពពី៖ Channel News Asia

July 18, 2018

Mbappe នឹងផ្តល់ប្រាក់ 50ម៉ឺនដុល្លារដែលខ្លួនបានពី World Cup ទៅឱ្យអង្គការសប្បុរសធម៌

ខ្សែប្រយុទ្ធអន្តរជាតិបារាំង Kylian Mbappe វ័យ 19ឆ្នាំ ទទួលបានប្រាក់ 22,300ដុល្លារក្នុងមួយប្រកួតនៃយុទ្ធនាការ World Cup បូករួមទាំងប្រាក់លើកទឹកចិត្ត 350,000ដុល្លារទៀតសម្រាប់ការជួយឱ្យក្រុមជម្រើសជាតិរបស់ខ្លួនទទួលបានជ័យជម្នះក្នុងវគ្គផ្តាច់ព្រ័ត្រ កាលពីថ្ងៃអាទិត្យ ដែលធ្វើឱ្យរូបគេទទួលបានប្រាក់សរុបទាំងអស់ 50ម៉ឺនដុល្លារ។ ប៉ុន្តែ ទោះជាដូច្នេះក្ដី តារាឆ្នើមវ័យក្មេងរូបនេះបានប្រកាសថា ខ្លួននឹងផ្តល់ប្រាក់ទាំងអស់នោះទៅឱ្យអង្គការសប្បុរសធម៌ Premiers de Cordees។

ប្រាក់ចំនួននេះ គ្រាន់តែជាចំណែក 1ភាគនៃប្រាក់ខែសរុបរបស់គេប៉ុណ្ណោះ ខណៈដែលរូបគេទទួលបាន 1.7លានដុល្លារក្នុងមួយខែពីក្លិបបច្ចុប្បន្នរបស់គេគឺ Paris-Saint Germain ប៉ុន្តែទឹកប្រាក់កន្លះលានដុល្លារនេះ នឹងមានន័យយ៉ាងធំធេងសម្រាប់អង្គការ Premiers de Cordees ដែលជាអង្គការរៀបចំព្រឹត្តិការណ៍កីឡានានាសម្រាប់កុមារពិការ។

លោក Sebastien Ruffin អ្នកចាត់ការទូទៅរបស់អង្គការ Premiers de Cordee បានឱ្យដឹងថា៖ «Kylian គឺជាមនុស្សដ៏អស្ចារ្យម្នាក់។ នៅពេលដែលកាលវិភាគរបស់គេអនុញ្ញាត គេបានចូលមកធ្វើអន្តរាគមន៍សម្រាប់យើងទាំងភាពរីករាយ។ រូបគេមានទំនាក់ទំនងយ៉ាងល្អជាមួយនឹងក្មេងៗ ដោយគេតែងតែស្វែងរកការប្រើប្រាស់ពាក្យពេចន៍យ៉ាងត្រឹមត្រូវក្នុងការលើកទឹកចិត្តដល់ពួកយើង»។

ខ្សែប្រយុទ្ធរូបនេះ បានស៊ុតបាល់បញ្ចូលទី 4គ្រាប់ ក្នុងចំណោមការប្រកួត 7លើកសម្រាប់ក្រុមជម្រើសជាតិបារាំង ក្នុង World Cup ក្នុងនោះរាប់បញ្ចូលទាំងគ្រាប់បាល់ 1គ្រាប់ក្នុងវគ្គផ្តាច់ព្រ័ត្រ កាលពីថ្ងៃអាទិត្យ នៅពេលដែលក្រុមរបស់គេ បានយកឈ្នះលើក្រុមជម្រើសជាតិក្រូអាស៊ី ក្នុងលទ្ធផល 4-2។ Mbappe ក៏បានឈ្នះរង្វាន់កីឡាករវ័យក្មេងឆ្នើមបំផុតប្រចាំយុទ្ធនាការនេះផងដែរ៕

ប្រភពពី៖ The Straits Times

July 18, 2018

ធនាគារពិភពលោក ផ្តល់ឥណទានសម្បទាន 200លានដុល្លារ ដើម្បីជួយវិស័យ2 នៅកម្ពុជា

ភ្នំពេញ៖ ធនាគារពិភពលោកបានសម្រេចផ្តល់សម្បទានលើកទី2 ដល់កម្ពុជាក្នុងទំហំទឹកប្រាក់ប្រមាណ 200លានដុល្លារអាមេរិក ដម្រាប់កែលម្អប្រព័ន្ធអប់រំកម្រិតឧត្តមសិក្សា និងគម្រោងគ្រប់គ្រងសម្បត្តិផ្លូវថ្នល់ជំហានទី2។

ជំនួយនេះនឹងជួយលើគម្រោងពង្រឹងសមត្ថភាពគ្រូបង្រៀន និងស្រាវជ្រាវសម្រាប់គ្រឹះស្ថានឧត្តមសិក្សាចំនួន5នៅកម្ពុជារួមមានវិទ្យាស្ថានបច្ចេកវិទ្យាកម្ពុជា សាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទកសិកម្ម សាកលវិទ្យាល័យស្វាយរៀង និងសាកលវិទ្យាល័យបាត់ដំបង។ ជំនួយនេះក៏នឹងជួយដល់គ្រឹះស្ថានឧត្តមសិក្សាឯកជនមួយចំនួនដែលជារួមនឹងអាចជួយដល់សិស្សសរុបប្រមាណ 16,356នាក់នៅទទូទាំងប្រទេស។

ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថាគម្រោងកែលម្អវិស័យអប់រំផ្នែកឧត្តមសិក្សានេះគ្រោងចំណាយថវិកាប្រមាណ 92.50លានដុល្លារអាមេរិក ដែលក្នុងនោះមានថវិកាប្រមាណ 90លានដុល្លារជាថវិកាឥណទានពីសហរដ្ឋអាមេរិក និងចំនួន 2.5លានដុល្លារជាថវិកាបដិភាគ។ គម្រោងនេះនឹងផ្តោតសំខាន់ដើម្បីជំរុញការអប់រំលើផ្នែកវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា និងកសិកមម ដែលជាផ្នែកយ៉ាងសំខាន់សម្រាប់អភិវឌ្ឍប្រទេស។

ចំណែកឯជំហានទី2 គឺហិរញ្ញប្បទានបន្ថែមប្រមាណ 113លានដុល្លារអាមេរិក ដែលក្នុងនោះថវិការសម្បទានពីធនាគាពិភពលោកចំនួន 110លានដុល្លារអាមេរិក និងថវិកាបដិភាគរបស់រាជរដ្ឋាភិបាលចំនួន 3លានដុល្លារអាមេរិក គឺសម្រាប់ធ្វើការវិនិយោគលើការស្តារ និងពង្រីកផ្លូវជាតិលេខ4 ពីរាជធានីភ្នំពេញទៅខេត្តព្រះសីហនុ៕

July 18, 2018

សណ្ឋាគារ Palace Gate Hotel & Resort ទទួលបានពានរង្វាន់2 ក្នុងពេលតែ1

ភ្នំពេញ៖ Palace Gate Hotel & Resort គឺជាសណ្ឋាគារដ៏ប្រណីតថ្មីមួយ មានទីតាំងស្ថិតនៅចំកណ្ដាលនៃបេះដូងនៃទីក្រុងដ៏រស់រវើករបស់ព្រះរាជាណាចក្រកម្ពុជា ដែលទើបតែបើកដំណើរទទួលស្វាគមន៍ភ្ញៀវទេសចរណ៍ជាតិ និងអន្តរជាតិបានរយៈមួយឆ្នាំសោះ ក៏ទទួលបានពានរង្វាន់ចំនួន2 ក្នុងពេលតែ1 ទៅហើយ។

ថ្មីៗនេះក្រុមហ៊ុន Prix Villegiature ដែលជាគណៈកម្មការវាយតម្លៃទៅលើសណ្ឋាគារដែលល្អដាច់គេបំផុតប្រចាំតំបន់អឺរ៉ុប អាស៊ី អាហ្វ្រិក និងមជ្ឈឹមបូព៌ា បានផ្ដល់ពានរង្វាន់ដល់សណ្ឋាគារ Palace Gate Hotel & Resort ជា «សណ្ឋាគារតែមួយគត់ដ៏ល្អបំផុតនៅអាស៊ី (Best unique hotel in Asia)» និងពានរង្វាន់មួយទៀតគឺជា «សណ្ឋាគារដែលមានរចនាបទ និងស្ថាបត្យកម្មខាងក្នុងល្អបំផុតនៅអាស៊ី (Best interior design and Architecture design in Asia)» ។

លោក ធី សុធា នាយកគ្រប់គ្រង់ទូទៅនៅសណ្ឋាគារ Palace Gate Hotel & Resort បានថ្លែងឱ្យដឹងថា៖ ហេតុផងដែលខាងក្រុមហ៊ុន Prix Villegiature បានជ្រើសរើស និងកំណត់ឱ្យសណ្ឋាគារ Palace Gate Hotel & Resort ជាប់ចំណាត់ថ្នាក់លេខ1 ក៏ព្រោះតែមានកត្តា2ធំៗដែលយើងគឺទី1 កត្តាស្ថាបត្យកម្ម ព្រោះសណ្ឋាគារ Palace Gate Hotel & Resort មានរចនាបទ និងស្ថាបត្យកម្មបែបវប្បធម៌ខ្មែរ ស្ទើរតែគ្រប់កន្លែងមិនថា បន្ទប់គេង បន្ទប់ទឹក សួរកម្សាន្ត អាងហែលទឹក ភោជនីដ្ឋានជាដើម ដែលធ្វើឱ្យភ្ញៀវដែលបានមកស្នាក់នៅទីនេះគាត់ទទួលបានអារម្មណ៍ពិត ពាក់ព័ន្ធនឹងវប្បធម៌របស់ខ្មែរ និងអារម្មណ៍ពីសណ្ឋាគារផ្សេង។ កត្តាទី2 ដែលធ្វើឱ្យ Palace Gate Hotel & Resort ជាប់ជា «សណ្ឋាគារតែមួយគត់ដ៏ល្អបំផុតនៅអាស៊ី» ក៏ព្រោះតែភ្ញៀវដែលបានមកស្នាក់នៅ បានផ្ដល់មតិត្រឡប់ (feedback) ថា Palace Gate Hotel & Resort ជាសណ្ឋាគារដែលល្អ ទាំងសេវាកម្ម តម្លៃ រួមទាំងអ្វីផ្សេងៗទៀត បើប្រៀបធៀនទៅនឹងសណ្ឋាគារដទៃគឺ Palace Gate Hotel & Resort ល្អជាងគេ។

នាយកគ្រប់គ្រង់ទូទៅរូបនេះ បានបញ្ជាក់បន្ថែមទៀតថា ការទទួលបានពានរង្វាន់នេះ ក៏បានជួយដល់ប្រទេសកម្ពុជាផងដែរ ជាពិសេសគឺវិស័យទេសចរណ៍ ព្រោះខាងក្រុមហ៊ុន Prix Villegiature នឹងជួយធ្វើការផ្សព្វផ្សាយពីសេវាកម្មល្អៗទាក់ទងនឹងវិស័យទេសចរណ៍នៅកម្ពុជា៕

July 17, 2018

ផាកកាហ្វេ សាខាភ្នំពេញសិនធើរ ចាប់ផ្តើមបើកសម្ពោធហើយ

កម្មវិធីសម្ពោធជាផ្លូវការភោជនីយដ្ឋាន ផាកកាហ្វេ សាខាភ្នំពេញសិនធើរ ដែលជាសាខាទី14 របស់ក្រុមហ៊ុន ផាកកាហ្វេ ហ្វ៊ូត អេន បេវើរីច ត្រូវបានធ្វើឡើងកាលពីព្រឹកថ្ងៃចន្ទ ទី16 ខែកក្កដា ឆ្នាំ2018នេះ ដោយមានការចូលរួមពីសំណាក់ភ្ញៀវកិត្តិយសជាច្រើនរូប។

ភោជនីយដ្ឋាន ផាកកាហ្វេ ជាទូទៅត្រូវបានគេស្គាល់ថា ជាហាងដែលបានផ្តោតសំខាន់ទៅលើគុណភាព និងអនាម័យម្ហូបអាហារ ជាពិសេសគ្មានជាតិប៊ីចេង ព្រមទាំងមានការខិតខំប្រឹងប្រែងក្នុងការអភិវឌ្ឍនូវគុណភាពសេវាកម្មរបស់ខ្លួន និងកត្តាធនធានមនុស្ស បានធ្វើឱ្យ ផាកកាហ្វេ ប្រែក្លាយខ្លួនជាអាជីវកម្មបែបគ្រួសារ មកជាអាជីវកម្មបែបស្តង់ដារ។ មកទល់ពេលនេះ ហាង ផាកកាហ្វេ បានពង្រីកសាខារបស់ខ្លូនរហូតដល់15សាខា គិតត្រឹមខែកក្កដា ឆ្នាំ2018 ដោយក្នុងមួយឆ្នាំ ផាកកាហ្វេ បានទទួលអតិថិជនប្រមាណជាង1.5លាននាក់។

ថ្លែងនៅក្នុងពិធីសម្ពោធនេះផងដែរ លោក ហេង សេងលី អគ្គនាយកគ្រប់គ្រងក្រុមហ៊ុន ផាកកាហ្វេ បានឱ្យដឹងថា ក្រុមហ៊ុនបានចាប់ផ្តើមលក់សិទ្ធិអាជីវកម្មលើកដំបូងគឺនៅក្នុងប្រលានយន្តហោះអន្តរជាតិភ្នំពេញ ដោយបច្ចុប្បន្នក្រុមហ៊ុនបានផ្តល់សិទ្ធិអាជីវកម្មចំនួន8ហើយ ដោយខ្លះបានដំណើរការ ហើយខ្លះទៀតកំពុងធ្វើការសាងសង់ និងគូរប្លង់ ហើយក្រុមហ៊ុនក៏កំពុងសិក្សាមើលទីតាំងមួយចំនួនទៀត រួមទាំងទីតាំងនៅក្នុងទីក្រុងភ្នំពេញ ក៏ដូចជានៅតាមបណ្តាខេត្តធំៗមួយចំនួនទៀតផងដែរ។

បន្ថែមពីលើការលក់សិទ្ធិអាជីវកម្ម ក្នុងនោះក្រុមហ៊ុន ផាកកាហ្វេ ក៏បានបើកឱ្យដំណើរការ2សាខាទៀតផងដែរ កាលពីខែមិថុនាកន្លងទៅ គឺនៅផ្សារទំនើប អ៊ីអន ម៉ល សែនសុខ សីុធី និងមួយទៀតនៅខេត្តកំពង់ចាម។

គួរបញ្ជាក់ផងដែរថា ភោជនីយដ្ឋាន ផាកកាហ្វេ ចាប់ផ្តើមបើកដំណើរការចាប់តាំងពីឆ្នាំ2004មកម្ល៉េះ ហើយក្រុមហ៊ុននេះមានចក្ខុវិស័យពង្រីកខ្លួនឱ្យក្លាយជាភោជនីយដ្ឋានលំដាប់លេខ1នៅក្នុងប្រទេសកម្ពុជា តាមរយៈការអភិវឌ្ឍគុណភាពម្ហូបអាហារ សេវាកម្ម និងការរចនាភោជនីយដ្ឋានឱ្យកាន់តែទំនើប។

ក្នុងនោះដែរ ក្រុមហ៊ុន ផាកកាហ្វេ ក៏មានគម្រោងក្នុងការពង្រីកឱ្យបាន60សាខានៅទូទាំងរាជធានីភ្នំពេញ និងនៅតាមបណ្តាខេត្តធំៗនៅក្នុងឆ្នាំ2022 ដោយរំពឹងថា នឹងអាចក្លាយជាចំណែកមួយចូលរួមក្នុងការកាត់បន្ថយភាពក្រីក្រដល់ប្រទេសកម្ពុជា តាមរយៈការជួយគាំទ្រផលិតផលខ្មែរ និងការបង្កើតការងារបន្ថែមសម្រាប់ប្រជាជនកម្ពុជាប្រមាណ1,350នាក់បន្ថែមពីលើអ្នកដែលកំពុងបម្រើការងារនាពេលបច្ចុប្បន្ន ដែលមានប្រមាណជា450នាក់៕

July 17, 2018

ហេតុអ្វីបានជាសាលារៀនវ៉េស្ទឡាញន៍ បង្កើតកញ្ចប់សិក្សាសម្រាប់គ្រួសារ ហើយវាផ្តល់គុណប្រយោជន៍អ្វីខ្លះ?

ភ្នំពេញ៖ វ៉េស្ទឡាញន៍ គឺជាស្ថាប័នអប់រំមួយ ដែលបង្កើតឡើងដោយផ្អែកលើគោលការណ៍ គុណភាព គុណធម៌ មនុស្សធម៌ និងភាពជាអ្នកដឹកនាំ ជាពិសេសគឺ ដើរស្របជាមួយកម្មវិធីសិក្សាបែបអឺរ៉ុប ដែលអាចផ្តល់ឱ្យសិស្សនូវចំណេះដឹង ទាំងផ្នែកបញ្ញា ស្មារតី សីលធម៌រស់នៅ និងកាយសម្បទា ហើយសម្រាប់ឆ្នាំសិក្សាថ្មីនេះ សាលារៀនវ៉េស្ទឡាញន៍បានបញ្ចូលនូវកម្មវិធីសិក្សាថ្មី ដែលមានឈ្មោះថា «កញ្ចប់សិក្សាសម្រាប់គ្រួសារ»។

តើកញ្ចប់សិក្សាសម្រាប់គ្រួសារមានអ្វីខ្លះ? ហើយផ្តល់គុណប្រយោជន៍យ៉ាងដូចម្តេចខ្លះ?

លោក ប៉ិច បូឡែន ប្រធាននាយកប្រតិបត្តិក្រុមហ៊ុនវ៉េស្ទឡាញន៍ អេឌ្យូខេសិន គ្រុប បានបញ្ជាក់នៅក្នុងសិក្ខាសាលា ទម្លាប់ទាំង 7 សម្រាប់គ្រួសារ «គន្លឹះឆ្ពោះទៅកាន់ភាពជោគជ័យ» នារសៀលថ្ងៃទី 14 ខែកក្កដាថា ឆ្នាំសិក្សាថ្មីនេះ គ្រប់សាខាសាលារៀនវ៉េស្ទឡាញន៍ទាំងអស់ត្រូវបានដាក់បញ្ចូលនូវកម្មវិធីសិក្សាថ្មី ដែលមានឈ្មោះថា «កញ្ចប់សិក្សាសម្រាប់គ្រួសារ» ដោយអាណាព្យាបាលចុះឈ្មោះបុត្រធីតា នឹងបានសិក្សាមួយគ្រួសារ។

ប្រធាននាយកប្រតិបត្តិក្រុមហ៊ុនរូបនេះ បានបញ្ជាក់ថា មូលហេតុដែលសាលារៀនវ៉េស្ទឡាញន៍បង្កើត «កញ្ចប់សិក្សាសម្រាប់គ្រួសារ» ដោយសារលោកបានគិតឃើញថា មាតាបិតាគាត់ត្រូវការចំណូល ហើយចំណូលគាត់កើតចេញពីរកស៊ី ឬធ្វើការ អីចឹងហើយបានជាយើង (សាលារៀនវ៉េស្ទឡាញន៍) បង្កើតកម្មវិធីសក្សានេះឡើង ដើម្បីជួយអាណាព្យាបាលឱ្យមានចំណូលនិរន្តរ៍កាន់តែល្អ និងរីកចម្រើនការងារ ឬមុខបរបរ ហើយក៏ចង់ឱ្យសុភមង្គលគ្រួសារកាន់តែល្អ ក៏ដូចជាយើងអាចធ្វើការជាមួយកូនគាត់បានច្រើន អីចឹងក្នុងហ្នឹងមានកម្មវិធីសិក្សាដោយឥតគិតថ្លៃនោះមានដូចជា៖

1/ កម្មវិធីបណ្តះបណ្តាលទម្លាប់ល្អទាំង 7

2/ កម្មវិធីបណ្តុះបណ្តាល និងប្រឹក្សាយោបល់ចិត្តសាស្ត្រ

3/ កម្មវិធីបណ្តុះបណ្តាលជំនាញអភិវឌ្ឍអាជីវកម្ម

4/ កម្មវិធីបណ្តុះបណ្តាលជំនាញអភិវឌ្ឍអាជីពការងារ។

លោក ប៉ិច បូឡែន បានបន្ថែមចុងក្រោយថា ដូច្នេះដើម្បីធានាឱ្យបុត្រធីតារបស់ពួកយើងគ្រប់រូប អាចទទួលបានចំណេះដឹង និងជំនាញដើម្បីឆ្លើយតបទៅនឹងគុ

ណភាពទីផ្សារការងារទាំងក្នុងបច្ចុប្បន្ន និងក្នុងពេលអនាគត គឺតម្រូវឱ្យមាតាបិតា និងអាណាព្យាបាលទាំងអស់សហការគ្នា ដើម្បីលើកកម្ពស់ និងជ្រោមជ្រែងបុត្រធីតាក្នុងការអភិវឌ្ឍន៍ផ្នែកចំណេះដឹង។ ហើយដើម្បីបានសម្រេចនូវការអភិវឌ្ឍន៍មួយនេះ យើងឃើញថាការអប់រំ គឺជាការងារដ៏សំខាន់មួយដែលទាមទារពេលវេលា និងធនធានរបស់មាតាបិតា និងអាណាព្យាបាល។ ការអប់រំនេះនឹងទទួលបានលទ្ធផលផ្លែផ្កា សងត្រលប់មកវិញដ៏ល្អប្រសើរបំផុត សម្រាប់បុត្រាបុត្រីរបស់យើងក្នុងថ្ងៃអនាគត៕

July 16, 2018

Author: វល័ក្ខ