Author: វល័ក្ខ

ភ្នំពេញ ៖ «វឌ្ឍនភាពនៃការចុះបញ្ជីដីធ្លី-បរិយាកាសគ្មានវិវាទ» ជាប្រធានបទដ៏សំខាន់មួយដែលត្រូវបានរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លើកយកមកបង្ហាញ និងចែករំលែកនៅក្នុងអង្គសិក្ខាសាលាជូនដល់សមាជិក សមាជិកាព្រឹទ្ធសភា រដ្ឋសភា និងមន្ត្រីរាជរដ្ឋាភិបាលជំនាញដែលពាក់ព័ន្ធកាលពីថ្ងៃដើមសប្ដាហ៍កន្លងទៅនេះនៅសណ្ឋាគារ សូហ្វីតែល រាជធានីភ្នំពេញ។

ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានថ្លែងថា ៖ ទាក់ទងនឹងការចុះបញ្ជីដីបង្ហើយ គិតត្រឹមខែមករាឆ្នាំ២០២៥ នៅទូទាំងប្រទេស ចាប់ពីដំណើរការវាស់វែងបាន ១២ ២១១ ២៥៩ ក្បាលដី ចេញបណ្ណបាន ៨ ០៣១ ២១៧ បណ្ណ ។ នៅក្នុងអាណត្តិទី៧នេះផងដែរ ការវាស់វែងបាន ៣ ៦៧៥ ៦៥៦ ក្បាលដី ចេញបណ្ណបាន ១ ១២៩, ២៨៤ បណ្ណ និងចែកបណ្ណបាន ៨៤០ ៨៣៣ បណ្ណ។ ដោយឡែក ពាក់ព័ន្ធនឹងការបញ្ចប់វិវាទដីធ្លី គិតត្រឹមថ្ងៃទី៣១ ខែធ្នូ ឆ្នាំ២០២៤ ទទួលបានពាក្យបណ្តឹងសរុបចំនួន ១៦ ៤២៨ករណី ដោះស្រាយបញ្ចប់បាន ១៥ ២៧៣ករណីនិងកំពុងដោះស្រាយ ១ ១៥៥ករណី។ ចំណែកវិវាទដីធ្លីកំពុងដោះស្រាយ មានដីឯកជនចំនួន ៨២៤ករណី ដីរដ្ឋ និងដីសហគមន៍ចំនួន ១៧៤ករណី។ ចំណែកឯបញ្ហាពាក់ព័ន្ធការសម្រេចរបស់តុលាការ ឬក្រសួងស្ថាប័នមានចំនួន ៥៥ករណី បញ្ហាពាក់ព័ន្ធនយោបាយចំនួន ២ករណី និងសំណើចុះបញ្ជីចំនួន ១០០ករណី។

ឯកឧត្តមបានបញ្ជាក់ថា ចំពោះការផ្តល់សេវាគាប់ចិត្ត ក្រសួងមានសេវាសាធារណៈ ៤៩៦ប្រភេទ ស្មើនឹង ៩៩៤មុខសេវា។ ក្នុងឆ្នាំ២០២៣ រកចំណូលបានជាង១៤០លានដុល្លារ ដែលមាន ៧១% ជាចំណូលពន្ធលើការផ្ទេរអចលនទ្រព្យ ហើយបច្ចុប្បន្ននេះកំពុងបង្កើនគុណភាពសេវាសាធារណៈក្នុងយុគសម័យឌីជីថល ផ្អែកលើមូលដ្ឋានទិន្នន័យ និងការធ្វើបរិវត្តកម្មឌីជីថល។

ដោយឡែក សម្រាប់ផ្នែកការគ្រប់គ្រងតំបន់បឹងទន្លេសាប ឯកឧត្តមឧបនាយករដ្ឋមន្ត្រី បានលើកឡើងថា៖ តំបន់ទន្លេសាប មានផ្ទៃដីសរុបប្រមាណ ១៤១ម៉ឺនហិកតា។ក្នុងនោះតំបន់១ជាតំបន់ភូមិដ្ឋានរបស់ប្រជាពលរដ្ឋ តំបន់២ជាតំបន់ទ្រនាប់និងតំបន់៣ ជាតំបន់ព្រៃលិចទឹកដែលត្រូវការពារ។ក្រោយការកែសម្រួល គិតត្រឹមឆ្នាំ២០២៤ ៖តំបន់១ មានផ្ទៃដីសរុបប្រមាណ ៤៦៣,៤៦៥ ហិកតា តំបន់២ មានផ្ទៃដីសរុបប្រមាណ ៣៨២,៨៦៤ ហិកតានិងតំបន់៣ មានផ្ទៃដីសរុបប្រមាណ ៥៦៥,២៩១ ហិកតា។

ចំណែកការរៀបចំ និងគ្រប់គ្រងរមណីយដ្ឋានអង្គរ កម្ពុជាមានរមណីយដ្ឋានបេតិកភណ្ឌពិភពលោកអង្គរ មានទំហំ ៤០១គីឡូម៉ែតការ៉េ ក្នុងនោះតំបន់ឧទ្យានកណ្តាល៣៥១គីឡូម៉ែត្រការ៉េ តំបន់រលួស៣០ គីឡូម៉ែត្រការ៉េ និងតំបន់បន្ទាយស្រី២០ គីឡូម៉ែត្រការ៉េ។សូមបញ្ជាក់ថា៖តំបន់១ ជាតំបន់រមណីយដ្ឋានមានប្រាសាទ តំបន់២ជាឧទ្យានបុរាណវត្ថុត្រូវការពារ តំបន់៣ ជាទេសភាពវប្បធម៌ត្រូវការពារ តំបន់៤ ជាចំណុចមានសារសំខាន់ផ្នែកបុរាណវិទ្យា នរវិទ្យា ឬប្រវត្តិសាស្ត្រ និងតំបន់៥ ជាបរិវេណអភិវឌ្ឍន៍សង្គម សេដ្ឋកិច្ច និងវប្បធម៌នៃតំបន់សៀមរាប-អង្គរ។

ទាក់ទងនឹងការដោះស្រាយវិវាទបុរី ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានមានប្រសាសន៍ថា៖ គម្រោងអភិវឌ្ឍន៍អចលនទ្រព្យមានបញ្ហា ចំនួន១១០គម្រោង ក្នុងនោះបុរី ៨៤គម្រោង ផ្សារ និងខុនដូ ៥គម្រោង ដីឡូតិ៍ ២១គម្រោង ។ បញ្ហានេះដោះស្រាយបាន ៥៦គម្រោង និងកំពុងសម្របសម្រួល៥៤គម្រោង៕

កំពង់ចាម ៖ គិតត្រឹមដើមខែមករា ឆ្នាំ២០២៥នេះ គម្រោងលើកកម្ពស់គុណភាព និងពង្រីកផ្លូវជាតិលេខ៧ ចាប់ពីចំណុចរង្វង់មូលផ្សារស្គន់ ស្រុកជើងព្រៃ រហូតដល់រង្វង់មូលស្ពានគីហ្សូណា ក្រុងកំពង់ចាម ជា៤គន្លង ដែលមានប្រវែង ៤៥. ៤៨ គីឡូម៉ែត្រ សម្រេចបានវឌ្ឍនភាពប្រមាណ ២៨,៧៦ភាគរយហើយ។

ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រងគម្រោងស្ថាបនាផ្លូវជាតិលេខ ៧ (រង្វង់មូលស្គន់ ដល់រង្វង់មូលស្ពានគីហ្សូណា ក្រុងកំពង់ចាម) កាលពីសប្ដាហ៍កន្លងទៅនេះ បានអញ្ជើញដឹកនាំក្រុមការងារបច្ចេកទេស និងក្រុមហ៊ុនម៉ៅការសាងសង់ (CRBC) ចុះត្រួតពិនិត្យវឌ្ឍនភាពការងារគម្រោងពង្រីក និងលើកកម្រិតគុណភាពផ្លូវជាតិលេខ៧ ជា៤គន្លង (ស្គន់-កំពង់ចាម) នៅកំណាត់ទី១ ដែលមានប្រវែង ១៩ គីឡូម៉ែត្រ ដើម្បីពិនិត្យពីភាពជាក់ស្ដែងនៃកិច្ចការងារសាងសង់ វឌ្ឍនភាព និងដោះស្រាយបញ្ហាប្រឈមមួយចំនួន។

សូមបញ្ជាក់ដែរថា គម្រោងពង្រីក និងលើកកម្រិតគុណភាពកំណាត់ផ្លូវជាតិលេខ៧នេះមានប្រវែងសរុប ៤៥,៤៨ គីឡូម៉ែត្រ ដែលនឹងត្រូវពង្រីកទទឹងផ្លូវពី ២ គន្លងទៅ ៤ គន្លង ដោយគន្លងនីមួយៗមានប្រវែង ៣,៧៥ ម៉ែត្រ និងសួនពុះទ្រូងផ្លូវ ១,៥ ម៉ែត្រ។ កំណាត់ផ្លូវនេះ នឹងត្រូវប្រែពីផ្លូវកៅស៊ូស្ដើង DBST ទៅជាផ្លូវបេតុងកៅស៊ូ AC ដែលមានកម្រាស់ ៩ សង់ទីម៉ែត្រ ហើយមានការសាងសង់ស្ពានថ្មីចំនួន ១ កន្លែងប្រវែង ៤០ ម៉ែត្រ ទទឹង ២៤ ម៉ែត្រ និងស្ពានថ្មីចំនួន ៦ កន្លែងផ្សេងទៀតប្រវែងសរុប ១០៦ គីឡូម៉ែត្រ ទទឹង ១២ ម៉ែត្រ ព្រមទាំងពង្រីកស្ពានចាស់ចំនួន ១ កន្លែង ទទឹង ១០,៥ ម៉ែត្រ ដាក់លូ ៣៣០ កន្លែង បំពាក់កាមេរ៉ាត្រួតពិនិត្យល្បឿន ២ កន្លែង ស្ថានីយជញ្ជីងថ្លឹងរថយន្ត ២ កន្លែង និងបំពាក់ស្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ បង្គោលសុវត្ថិភាពទៅតាមបទដ្ឋាន និងបច្ចេកទេសផ្លូវថ្នល់។

ក្រសួងសាធារណការ និងដឹកជញ្ជូន បានបញ្ជាក់ថា កំណាត់ផ្លូវជាតិលេខ៧ នេះធ្លាប់បានស្ថាបនាឡើងវិញកាលពីឆ្នាំ១៩៩៩ ជាផ្លូវកៅស៊ូស្ដើង DBST រួមជាមួយស្ពានមិត្តភាពកម្ពុជា-ជប៉ុន (ស្ពានគីហ្សូណា) ដែលជាជំនួយឥតសំណងរបស់រាជរដ្ឋាភិបាលជប៉ុន។ យ៉ាងណាមិញ ក្រោយការរីកលូតលាស់នៃវិស័យដឹកជញ្ជូន កំណើនឡើងសេដ្ឋកិច្ច និងតម្រូវការធ្វើដំណើរ លំហូរចរាចរណ៍នៅលើកំណាត់ផ្លូវនេះកើនឡើងយ៉ាងគំហុក ដែលធ្វើអោយផ្លូវនេះទៅជា «ផ្លូវកដប» មានសភាពចង្អៀត កកស្ទះ និងមានគ្រោះថ្នាក់ចរាចរណ៍ញឹកញាប់ផងដែរ។ ដូចនេះ រាជរដ្ឋាភិបាល បានសម្រេចសាងសង់ពង្រីក និងលើកកម្រិតគុណភាពកំណាត់ផ្លូវជាតិលេខ៧ នេះអោយបានទូលាយ ងាយស្រួលធ្វើដំណើរជាងមុន ដោយគ្រោងចំណាយថវិកា ១១៧ លានដុល្លារ ដែលជាឥណទានសម្បទានពីរដ្ឋាភិបាលចិន រួមជាមួយបដិភាគរាជរដ្ឋាភិបាលកម្ពុជា ចំណាយពេលសាងសង់រយៈពេល ៤០ ខែអាចនឹងបញ្ចប់នៅឆ្នាំ២០២៦។ គម្រោងនេះ ទទួលម៉ៅការសាងសង់ ដោយក្រុមហ៊ុនសាជីវកម្ម ស្ពានថ្នល់ចិន (CRBC) និងត្រួតពិនិត្យបច្ចេកទេស ដោយក្រុមហ៊ុនទីប្រឹក្សា បច្ចេកទេសក្វាងចូវវ៉ានអាន។

សូមរំលឹកដែរថា ពិធីសម្ពោធបើកការដ្ឋានសាងសង់គម្រោងផ្លូវមួយខ្សែរនេះត្រូវបានធ្វើឡើងកាលពីថ្ងៃទី០៩ ខែមករា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន និងឯកឧត្តម វ៉ាង វិនធៀន អតីតឯកអគ្គរដ្ឋទូតចិនប្រចាំនៅកម្ពុជា៕