វល័ក្ខ - La Reine Media

ក្រុម Force India នឹងរួចផុតពីការជាប់ពិន័យរដ្ឋបាល ក្រោយការកាន់កាប់របស់ម្ចាស់ថ្មី

ក្រុម Force India ក្នុងការប្រណាំងរថយន្ត Formula One នឹងត្រូវរួចផុតពីការជាប់ពិន័យផ្នែករដ្ឋបាល ក្រោយពីបានប្រកាសកាលពីថ្ងៃអង្គារ ពីការកាន់កាប់មួយដោយក្រុមមនុស្សបណ្តាក់ទុនមួយក្រុមដែលត្រូវបានដឹកនាំដោយមហាសេដ្ឋីសញ្ជាតិកាណាដា លោក Lawrence Stroll។

ក្រុមប្រណាំងរថយន្តរបស់ឥណ្ឌាដែលមានមូលដ្ឋានក្នុងទីក្រុង Silverstone ប្រទេសអង់គ្លេសមួយនេះ ត្រូវបានដាក់ឱ្យស្ថិតក្នុងការជាប់ពិន័យរដ្ឋបាលកាលពីខែមុន ប៉ុន្តែបានបញ្ជាក់ថា អនាគតរបស់ក្រុមនេះ ត្រូវបានធ្វើឱ្យមានសុវត្ថិភាពដោយក្រុមហ៊ុនបណ្តាក់ទុនថ្មីនេះ។

លោក Stroll គឺជាឪពុករបស់កីឡាករ Lance ដែលបើករថយន្តឱ្យក្រុម Williams។ ក្រុមហ៊ុនបណ្តាក់ទុនមួយនេះ មិនបានបង្ហាញពីសេចក្តីលម្អិតផ្នែកហិរញ្ញវត្ថុនៃការព្រមព្រៀងគ្នានេះឡើយ ប៉ុន្តែបានបញ្ជាក់យ៉ាងច្បាស់ថា ខ្លួននឹងធ្វើឱ្យការងារចំនួន 405កន្លែងមានសុវត្ថិភាពក្នុងក្រុមនេះ។

ម្ចាស់ថ្មីមួយនេះបានឱ្យដឹងក្នុងសេចក្តីថ្លែងការណ៍មួយថា៖ «ការព្រមព្រៀងគ្នានេះនឹងធានាសុវត្ថិភាពចំពោះអនាគតរបស់ក្រុម Force India ក្នុងការប្រណាំងរថយន្ត Formula One ហើយនិងអនុញ្ញាតឱ្យអ្នកបើកបររបស់យើងចូលរួមប្រកួតប្រកបដោយភាពជឿជាក់»។

ខណៈដែលត្រូវបានស្ថាបនិក និងស្ថិតក្រោមសហកម្មសិទ្ធិរបស់អាជីវករសញ្ជាតិឥណ្ឌាលោក Vijay Mallya ក្រុមនេះ ត្រូវបានបញ្ចូលក្នុងការពិន័យផ្នែករដ្ឋបាលនៅអង់គ្លេស កាលពីថ្ងៃទី27 ខែកក្កដា កន្លងទៅ៕

ប្រភពពី៖ Channel News Asia

August 8, 2018

Chelsea យល់ព្រមលើតម្លៃខ្លួន 71.6លានផោន ដើម្បីទិញ Kepa ពីក្លិប Bilbao

ក្លិបតោខៀវ Chelsea បានយល់ព្រមចំណាយប្រាក់ក្នុងតម្លៃខ្លួនជាកំណត់ត្រាពិភពលោកចំនួន 71.6លានផោន (ស្មើនឹង 91.6លានដុល្លារអាមេរិក) ដើម្បីនាំយកអ្នកចាំទី KepaArrizabalaga ពីក្លិប Athletic Bilbao ដើម្បីមកជំនួសកន្លែងរបស់កីឡាករ Thibaut Courtois។

ស្របពេលដែល Courtois ព្យាយាមបង្ខំឱ្យមានការផ្ទេរមួយទៅកាន់ក្លិប Real Madrid ក្លិប Chelsea បានចាត់វិធានការតាមរយៈការចំណាយប្រាក់ទិញរំលាយកិច្ចសន្យារបស់ Kepaនៅឯក្លិប Athletic Bilbao នៅមុនពេលថ្ងៃបិទទីផ្សារដោះដូរកីឡាកររបស់ក្របខ័ណ្ឌ Premier League នៅថ្ងៃព្រហស្បតិ៍ ស្អែកនេះ។

ក្លិប Bilbao បានត្រៀមខ្លួនរួចរាល់ក្នុងការបាត់បង់អ្នកចាំទីវ័យ 23ឆ្នាំរូបនេះ ដែលបានធ្វើដំណើរទៅកាន់ទីក្រុងម៉ាឌ្រីដ ជាមួយនឹងភ្នាក់ងាររបស់គេ នៅមុនពេលធ្វើដំណើរទៅកាន់ទីក្រុងឡុងដ៍ នៅព្រឹកថ្ងៃពុធនេះ ក្រោយពី Bilbao ប៊ិះតែលក់ Kepa ទៅឱ្យក្លិប Real ក្នុងតម្លៃខ្លួន២០លានអឺរ៉ូទៅហើយ កាលពីខែមករា។

តាមរយៈការបំពេញការផ្ទេរនេះ ក្លិប Chelsea នឹងបំបែកកំណត់ត្រានៃតម្លៃខ្លួន 66.9លានផោន (ស្មើនឹង 86.6លានដុល្លារអាមេរិក) ដែលក្លិប Liverpool បានចំណាយទៅឱ្យក្លិប Roma ដើម្បីទិញយកអ្នកចាំទីអន្តរជាតិប្រេស៊ីល Alisson កាលពីខែមុន។

Kepa ត្រូវបានរំពឹងទុកថា នឹងត្រូវពិនិត្យសុខភាពនៅថ្ងៃពុធនេះ ហើយអាចនឹងបង្ហាញខ្លួនជាលើកទី1 របស់គេក្នុងការប្រកួតក្របខ័ណ្ឌ Premier League នៅថ្ងៃសៅរ៍នេះ នៅលើទឹកដីក្រុម Huddersfield។

Kepa បានចំណាយពេល 2រដូវកាលមុន ក្នុងក្រុមជម្រើសទី1 របស់ Bilbao ដោយបានបង្ហាញខ្លួនក្នុងក្របខ័ណ្ឌ La Liga ចំនួន 53លើក៕

ប្រភពពី៖ The Telegraph

August 8, 2018

ប្រជាជននៅតំបន់ដាច់ស្រយាលត្រឹម 16%ប៉ុណ្ណោះ ដែលមានទឹកសុវត្ថិភាពហូប

ទឹកជាវត្ថុសំខាន់បំផុតសម្រាប់ការរស់នៅរបស់មនុស្ស ហើយសម្រាប់កម្ពុជាយើង គេមើលឃើញថា ការផ្គត់ផ្គង់ទឹកស្អាតនៅតាមតំបន់ទីប្រជុំជន និងតំបន់ជិតទីប្រជុំជន មានលក្ខណៈល្អប្រសើរច្រើន តែទោះបីជាយ៉ាងនេះក៏ដោយ ក៏បញ្ហាទឹកស្អាតនៅតាមតំបន់ទីជនបទនៅតែជាបញ្ហាប្រឈមនៅឡើយ។

នៅទីជនបទឆ្ងាយៗមួយចំនួនដែលមិនមានអណ្តូងទឹកស្អាតប្រើប្រាស់ ប្រជាជននៅតែប្រើប្រាស់ប្រភពទឹកត្រពាំង បឹង ស្ទឹង នៅឡើយ ខណៈដែលស្ថានភាពនៃសុវត្ថិភាពទឹកនាពេលបច្ចុប្បន្ននេះមានការថយចុះ ព្រោះមានការបំពុលច្រើនពីថង់ប្លាស្ទិក រួមទាំងកាកសំណល់ពីឧស្សាហកម្មជាដើម។

យោងតាមរបាយការណ៍របស់អង្គការ UNICEF បានបង្ហាញថា នៅក្នុងប្រទេសកម្ពុជាមានប្រជាជននៅតាមតំបន់ដាច់ស្រយាលត្រឹមតែ 16% ប៉ុណ្ណោះដែលមានទឹកសុវត្ថិភាពប្រើប្រាស់។ ហេតុនេះសូមឱ្យមានការចូលរួមពីប្រជាជនទូទៅនៅទូទាំងប្រទេសក្នុងការកាត់បន្ថយការចោលសំរាមទៅក្នុងទឹក និងសន្សំសំចៃគ្រប់ដំណក់ទឹកស្អាត៕

August 7, 2018

ខេត្ត 3 មានសក្តានុពលសំខាន់ៗ ដែលរដ្ឋមន្ត្រីពាណិជ្ជកម្មស្នើភាគីចិនជួយវិនិយោគ

រដ្ឋមន្ត្រីក្រសួងពាណិជ្ជកម្មកម្ពុជា ឯកឧត្តម ប៉ាន សូរស័ក្តិ បានស្នើប្រតិភូធុរជនខេត្តហ៊ូណាននៃសាធារណរដ្ឋប្រជាមានិតចិនឱ្យពិចារណាវិនិយោគនៅក្នុងខេត្តចំនួន 3 ដែលមានសក្តានុពលសំខាន់ៗរួមមានខេត្តបាត់ដំបងដែលសម្បូរទៅដោយភោគផលដំណាំ ផលិតផលកសិកម្ម ខេត្តសៀមរាបដែលមានសក្តានុពលទេសចរណ៍ និងខេត្តព្រះសីហនុដែលមានសក្តានុពលវិស័យឧស្សហកម្មសម្រាប់បម្រើទីផ្សារក្នុងប្រទេស និងនាំចេញទៅកាន់ប្រទេសចិន។

ការលើកឡើងរបស់ឯកឧត្តមរដ្ឋមន្ត្រីក្រសួងពាណិជ្ជកម្មបានធ្វើឡើងក្នុងជំនួបការងារកាលពីថ្ងៃទី2 ខែសីហា ឆ្នាំ2018 កន្លងទៅនៅទីស្តីការក្រសួងជាមួយលោក យ៉ាង គ័រពីង(Yang Guoping) ប្រធានក្រុមប្រឹក្សាភិបាលនៃក្រុមហ៊ុន Global Ecological Co., Ltd. របស់ខេត្តហ៊ូណាន ដែលបានដឹកនាំសហការីមកសិក្សាអំពីលទ្ធភាពពង្រីករោងចក្រម៉ាស៊ីនកិនស្រូវ ការកែច្នៃផលិតផលកសិកម្មនៅក្នុងខេត្តបាត់ដំបង និងស្វែងយល់អំពីសក្តានុពលវិនិយោគនៅក្នុងខេត្តសៀមរាប និងខេត្តព្រះសីហនុដែលអាចអភិវឌ្ឍផ្នែកសេដ្ឋកិច្ច និងទេសចរណ៍ ក៏ដូចជាវិស័យផ្សេងទៀតដែរ។

ឯកឧត្តម ប៉ាន សូរស័ក្តិ បានលើកពីចំណុចមួយចំនួន ដែលត្រូវការឱ្យចិនជួយដោះស្រាយនៅក្នុងវិស័យកសិកម្មនេះ ដោយមានប្រសាសន៍ដូច្នេះថា៖ «ការប្រឈមនៃវិស័យស្រូវអង្ករ និងដំណាំសក្តានុពលផ្សេងៗ រួមមាន ស្វាយ មៀន ពោត និងដំឡូងមី ព្រមទាំងនិយាយអំពីអត្ថប្រយោជន៍នៃការសាងសង់ឡសម្ងួតដើម្បីរក្សាទុកកសិផលបានក្នុងរយៈពេលយូរ សំដៅដល់ការអភិវឌ្ឍខ្សែចង្វាក់តម្លៃ និងការផ្គត់ផ្គង់»។

បន្ថែមលើនេះឯកឧត្តមក៏សូមឱ្យភាគីចិនពិចារណាវិនិយោគលើការកែច្នៃផលិតផលកសិកម្មនៅក្នុងខេត្តបាត់ដំបង និងខេត្តសៀមរាបដែលមានសក្តានុពលវិស័យទេសចរណ៍ និងសម្បូរទៅដោយភោគផលដំណាំដែលមានសក្តានុពលសម្រាប់បម្រើទីផ្សារក្នុងប្រទេស និងនាំចេញទៅកាន់ខេត្តហ៊ូណាន ប្រទេសចិនជាដើម។

លើសពីនេះលោករដ្ឋមន្ត្រី ក៏បានលើកឡើងអំពីសក្តានុពលខេត្តព្រះសីហនុដែលជាច្រកសេដ្ឋកិច្ចដ៏សំខាន់របស់កម្ពុជា និងជាខេត្តដែលមានកំពង់ផែទឹកជ្រៅ និងកំពង់ផែពហុបំណង ព្រមទាំងតំបន់សេដ្ឋកិច្ចពិសេស ដែលប្រមូលផ្តុំទៅដោយរោងចក្រតូចធំជាង 100ក្រុមហ៊ុនសម្រាប់បម្រើវិស័យពាណិជ្ជកម្ម និងឧស្សាហកម្ម។

ជាការឆ្លើយតបទៅនឹងសំណើទាំងនេះ ភាគីចិនបានសន្យាថានឹងនាំយកព័ត៌មានដែលលោកទទួលបានទាំងនេះទៅជម្រាបជូនលោកអភិបាលខេត្តហ៊ូណាន ដែលនឹងអញ្ជើញមកបំពេញទស្សនកិច្ចផ្លូវការនៅកម្ពុជានាខែវិច្ឆិកាខាងមុខ ព្រមទាំងផ្សព្វផ្សាយបន្តជូនសមាគមធុរជន និងវិនិយោគិនក្នុងប្រទេសចិន និងក្នុងខេត្តហ៊ូណាន ដើម្បីចូលមកបណ្តាក់ទុនកាន់តែច្រើននៅកម្ពុជា សំដៅបង្កើតឱកាសការងារជូនប្រជាជន និងចូលរួមជំរុញកំណើនសេដ្ឋកិច្ចរបស់កម្ពុជាឱ្យរីកចម្រើនទៅមុខ៕

August 7, 2018

ផាកកាហ្វេ គឺជម្រើសដំបូងសម្រាប់លោកអ្នក ពេលនឹកឃើញចង់ញ៉ាំបបរខកង្កែប

ថ្មីៗនេះបន្ទាប់ពីបានដាក់លក់នូវផលិតផលបបរខកង្កែបបែបថ្មីនៅតាមសាខាមួយចំនួននៃផាកកាហ្វេហើយ ឃើញថាទទួលបានការគាំទ្រយ៉ាងខ្លាំងពីសំណាក់អតិថិជន ឥឡូវនេះគ្រប់សាខាទាំងអស់របស់ផាកកាហ្វេបានដាក់លក់បបរខកង្កែបហើយ គឺដើម្បីបំពេញតម្រូវការ និងដើម្បីបង្កើនភាពងាយស្រួលដល់អតិថិជននៅពេលនឹកឃើញចង់ញ៉ាំបបរខកង្កែប គឺអាចមកភោជនីយដ្ឋានផាកកាហ្វេបានភ្លាមតែម្ដង។

បើនិយាយពីបបរខកង្កែប គឺមានលក់នៅក្នុងហាងជាច្រើននៅក្នុងទីក្រុងភ្នំពេញ ដោយពីកន្លែងមួយទៅកន្លែងមួយតែងមានរសជាតិខុសៗពីគ្នា តែរសជាតិដែលទទួលបានការពេញនិយមខ្លាំងជាងគេ គឺបបរខកង្កែបបែបសិង្ហបុរី។

សម្រាប់ខកង្កែបនេះ ប្រិយមិត្តដែលចូលចិត្តញ៉ាំបបរដែលមានរសជាតិឈ្ងុយឆ្ងាញ់ ប្រាកដជាពេញចិត្តមិនខានជាមួយរសជាតិបបរខកង្កែបបែបថ្មីនៅភោជនីយដ្ឋានផាកកាហ្វេ ព្រោះថាសម្រាប់គ្រឿងផ្សំខកង្កែបនៅទីនេះ យើងច្នៃផ្សំបន្ថែមពីលើរសជាតិដើមបែបសិង្ហបុរីជាមួយនឹងសាច់កង្កែបថ្មីៗ ស្រស់ៗឱ្យត្រូវនឹងរសជាតិរបស់ខ្មែរយើងតែម្តង ហើយចម្អិនដោយចុងភៅដែលមានបទពិសោធខ្ពស់ មានអនាម័យ ជាមួយនឹងតម្លៃសមរម្យ ដែលអាចញ៉ាំបានដល់ទៅ 2នាក់។

លោកអ្នកអាចរកទទួលទានបាននៅគ្រប់សាខារបស់ផាកកាហ្វេ លើកលែងតែផាកកាហ្វេសាខាព្រលានយន្តហោះភ្នំពេញ ផ្សារកណ្តាល និងអគារវីត្រាស់ក្រោយទីស្តីការគណៈរដ្ឋមន្ត្រីប៉ុណ្ណោះ។

ផាកកាហ្វេ ជាភោជនីយដ្ឋានដែលមានឈ្មោះល្បី និងមានសាខាច្រើននៅភ្នំពេញដែលត្រូវបានអតិថិជនទទួលស្គាល់លើស្តង់ដារ និងគុណភាពអាហារ ដែលគ្មានប៊ីចេង ហើយនៅតែអាចរក្សាគុណភាព និងរសជាតិដូចដើម៕

August 6, 2018

អាស៊ាន កំពុងរកដំណោះស្រាយបញ្ហាប្រឈមធុរកិច្ចទន្លេមេគង្គ-ជប៉ុន

ក្នុងគោលដៅដោះស្រាយបញ្ហាប្រឈម ការធ្វើវិនិយោគក្នុងបណ្តាប្រទេសតាមបណ្តោយទន្លេทำษមេគង្គ-ជប៉ុន ក្រុមមេដឹកនាំពាណិជ្ជកម្មនៅក្នុងប្រទេសអាសាន បានជួបពិភាក្សាគ្នាដ៏កម្រមួយដើម្បីស្វែងរកច្រកអភិវឌ្ឍន៍វិស័យនេះឱ្យកាន់តែរីកចម្រើន។

កិច្ចប្រជុំធ្វើនៅទីក្រុងបាងកក ប្រទេសថៃ ដែលដឹកនាំដោយឯកឧត្តម Arkhom Termpittayapaisith រដ្ឋមន្ត្រីក្រសួងគមនាគមន៍ថៃ និងឯកឧត្តម Tatsuya Terazawa អនុរដ្ឋមន្ត្រីទទួលបន្ទុកកិច្ចការអន្តរជាតិនៃក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន និងមានការចូលរួមពីតំណាងរដ្ឋាភិបាល និងវិស័យឯកជននៃប្រទេសអនុតំបន់ទន្លេមេគង្គ រួមមាន កម្ពុជា ឡាវ មីយ៉ាន់ម៉ា វៀតណាម ថៃ និងប្រទេសជប៉ុន តំណាងលេខាធិការដ្ឋាន AMEICC ព្រមទាំងតំណាងអង្គការអន្តរជាតិ និងដៃគូអភិវឌ្ឍន៍នានា ដូចជា JICA, JETRO, NEDO និងធនាគារ ADB និង JBIC ជាដើមទៀតផង។

ឯកឧត្តម សុខ សុភ័ក្ត្រ អនុរដ្ឋលេខាធិការក្រសួងពាណិជ្ជកម្ម មានប្រសាសន៍ថា កិច្ចប្រជុំនេះ ផ្តោតសំខាន់លើការពិនិត្យលើវឌ្ឍនភាពនៃការអនុវត្តកម្មវិធីសហប្រតិបត្តិការកន្លងមក និងកម្មវិធីការងារសម្រាប់អនុវត្តចក្ខុវិស័យឧស្សាហកម្មមេគង្គ-ជប៉ុន ក៏ដូចជារិះរកដំណោះស្រាយលើបញ្ហាប្រឈមនានា ដែលវិស័យឯកជននៃប្រទេសជាប់ទន្លេមេគង្គ-ជប៉ុនកំពុងជួបប្រទះ។ អង្គប្រជុំក៏បានពិភាក្សា និងឯកភាពលើផែនការសកម្មភាពសម្រាប់អនុវត្តបន្ត និងរៀបចំធ្វើបច្ចុប្បន្នភាពចក្ខុវិស័យឧស្សាហកម្មមេគង្គ-ជប៉ុន លើកទី2 (MIDV 2.0) សម្រាប់រាយការណ៍ជូនកិច្ចប្រជុំរដ្ឋមន្ត្រីសេដ្ឋកិច្ចមេគង្គ-ជប៉ុន ដែលគ្រោងនឹងប្រព្រឹត្តទៅនៅចុងខែសីហា ឆ្នាំ2018 នៅប្រទេស សិង្ហបុរី និងដើម្បីដាក់ជូនថ្នាក់ដឹកនាំអនុម័តនៅឯកិច្ចប្រជុំកំពូលនៅអំឡុងខែវិច្ឆិកា ឆ្នាំ2018 ខាងមុខ។

ឯកឧត្តមបានជម្រាបជូនអង្គប្រជុំអំពីសមិទ្ធផល និងវិធានការនានាដែលកម្ពុជាបានអនុវត្តសម្រាប់កិច្ចសម្រួលពាណិជ្ជកម្ម និងវិនិយោគ ព្រមទាំងដំណោះស្រាយលើបញ្ហាប្រឈមនានាដែលរដ្ឋាភិបាល និងវិស័យឯកជនខិតខំដោះស្រាយរួមគ្នា និងដោយមានកិច្ចសហប្រតិបត្តិការបន្ថែមទៀតពីភាគីជប៉ុន និងប្រទេសទន្លេមេគង្គ ដែលសមិទ្ធផលទាំងនោះទទួលបានការគាំទ្រពីភាគីជប៉ុននិងដៃគូអភិវឌ្ឍន៍នានា។

គួរបញ្ជាក់ថា វិស័យសំខាន់ៗទាំងនោះ រួមមានការបណ្តុះបណ្តាល វិជ្ជាជីវៈផ្នែកឧស្សាហកម្ម និងគ្រប់គ្រងកម្រិតមធ្យម ការអភិវឌ្ឍសហគ្រាសធុនតូច និងមធ្យម ការផ្ទេរបច្ចេកវិទ្យា កែលម្អប្រព័ន្ធភស្តុភារ (Logistics) ធ្វើឱ្យប្រសើរឡើងនូវហេដ្ឋារចនាសម្ព័ន្ធទាក់ទងនឹងការសម្រួលពាណិជ្ជកម្ម និងកែលម្អបរិយាកាសពាណិជ្ជកម្មដើម្បីទទួលវិនិយោគផ្នែកឧស្សាហកម្មថ្មីៗ ពីជប៉ុនជាដើម៕

August 6, 2018

រយៈពេល 6ខែ កម្ពុជានាំចេញទំនិញទៅជប៉ុនកើន 19% ខណៈជប៉ុននាំចូលមកកម្ពុជាកើន 9.5%

យោងតាមទិន្នន័យថ្មីរបស់អង្គការពាណិជ្ជកម្មក្រៅប្រទេសជប៉ុន (JETRO) បានឱ្យដឹងថា ចាប់ពីខែមករា មកដល់ត្រឹមខែមិថុនា ឆ្នាំ2018 កម្ពុជាបានធ្វើការនាំចេញនូវទំនិញជាច្រើនប្រភេទទៅកាន់ប្រទេសជប៉ុនក្នុងរង្វង់ទឹកប្រាក់ប្រមាណ 705លានដុល្លារ ខណៈជប៉ុនក៏បាននាំចេញទំនិញចូលមកកាន់កម្ពុជាវិញ គិតជាទឹកប្រាក់ប្រមាណ 191លានដុល្លារ។

តាមទិន្នន័យថ្មីនេះបានបញ្ជាក់ថា ការនាំចេញរបស់កម្ពុជាទៅកាន់ទីផ្សារប្រទេសជប៉ុនក្នុងរង្វង់ទឹកប្រាក់ប្រមាណ 705លានដុល្លារ គឺមានកំណើន 19% បើធៀបនឹងរយៈពេលដូចគ្នាកាលពីឆ្នាំ2017 កន្លងទៅ។ ចំណែកការនាំចេញទំនិញរបស់ជប៉ុនចូលមកកម្ពុជា មានការកើនឡើង 9.5% បើធៀបនឹងរយៈពេលដូចគ្នាកាលពីឆ្នាំមុន។

គ្រាន់តែនៅក្នុងខែមិថុនា ការនាំចេញទៅកាន់ប្រទេសជប៉ុនបានកើនឡើងច្រើនជាង 20% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ខណៈការនាំចូលបានកើនឡើង30%។ នៅក្នុងអំឡុងខែនោះការនាំចេញមានតម្លៃ 81លានដុល្លារ ខណៈការនាំចូលមាន 39លានដុល្លារ។

យោងតាមក្រសួងពាណិជ្ជកម្មកម្ពុជាបានឱ្យដឹងថា ប្រទេសជប៉ុនភាគច្រើននាំចេញគ្រឿងម៉ាស៊ីនរថយន្ត និងគ្រឿងអេឡិចត្រូនិកចូលមកកម្ពុជា និងទំនិញផ្សេងទៀត ដូចជាចំណីអាហារ ដែក ថ្នាំពេទ្យ និងផលិតផល និងវត្ថុធាតុដើមសម្រាប់ដំណើរការក្នុងរោងចក្រ-ល- ឯទំនិញដែលកម្ពុជានាំចេញទៅកាន់ប្រទេសជប៉ុនភាគច្រើន គឺផលិតផលកាត់ដេរ កាបូប ស្បែកជើង និងគ្រឿងផ្គុំផលិតផលអេឡិចត្រូនិក ព្រមទាំងគ្រឿងអគ្គិសនី ជាដើម។

យោងតាមធនាគារជាតិនៃកម្ពុជា អ្នកទទួលទិញផលិតផលពីកម្ពុជាច្រើនជាងគេ គឺសហរដ្ឋអាមេរិក មាន 21% បន្ទាប់មកប្រទេសអង់គ្លេស និងអាល្លឺម៉ង់ដែលរួមគ្នាមានចំនួន 17.8% នៃការនាំចេញសរុប ឯជប៉ុនមាន 7.5 ភាគរយ។

កាលពីឆ្នាំមុន ប្រទេសកម្ពុជាបានទិញទំនិញភាគច្រើនពីប្រទេសចិនមានចំនួន 41.7% ពីថៃ16.5 % ពីវៀតណាម 11.7%លើការនាំចូលសរុបរបស់ប្រទេស។ ទន្ទឹមនឹងនេះដែរ ការនាំចូលពីប្រទេសជប៉ុនមានចំនួនសរុប 4.2% នៃការនាំចូលទាំងអស់។

គួររំឭកផងដែរថា ពេញមួយឆ្នាំ2017 កន្លងទៅ ការវិនិយោគរបស់ជប៉ុននៅកម្ពុជា បានកើនឡើងដល់ 1.6ពាន់លានដុល្លារលើការវិនិយោគចំនួន 130គម្រោង។ ទន្ទឹមគ្នានេះ បើតាមរបាយការណ៍ ពីក្រុមប្រឹក្សាអភិវឌ្ឍន៍កម្ពុជា ដែលចេញផ្សាយកាលពីថ្ងៃទី14 ខែកុម្ភៈ ឆ្នាំ2018 បានបង្ហាញថា ការបន្តកើនឡើងនៃទំហំទុនវិនិយោគរបស់ប្រទេសជប៉ុននៅកម្ពុជា គឺបានមកពីវិស័យសំខាន់ៗដូចជា ធនាគារ ឧស្សាហកម្ម កសិ-ឧស្សាហកម្ម សេវាកម្ម និងហេដ្ឋារចនាសម្ព័ន្ធជាដើម៕

August 6, 2018

សេវាសង្គមកិច្ចចាំបាច់ប៉ុនណាសម្រាប់សហគមន៍

នៅក្នុងសង្គមដែលមានការរីកចម្រើនលើកិច្ចគាំពារប្រជាជន កុមារ និងជនងាយរងគ្រោះល្អ សេវាសង្គមកិច្ចគឺជាវិស័យដ៏សំខាន់មួយដែលត្រូវបានគេយកចិត្តទុកដាក់ខ្ពស់។ នៅកម្ពុជា ក្រសួងសង្គមកិច្ច អតីតយុទ្ធជន និងយុវនីតិសម្បទា រួមជាមួយនឹងអង្គការក្រៅរដ្ឋាភិបាលជាច្រើនបាន និងកំពុងប្រតិបត្តិការទៅតាមតួនាទីរៀងៗខ្លួនដើម្បីបម្រើសេវាសង្គមកិច្ចនៅគ្រប់តំបន់។

នៅក្នុងនោះ អង្គការ Plan អន្តរជាតិនៅកម្ពុជាបានបង្ហាញពីមូលហេតុសំខាន់ៗជាច្រើនដែលចាំបាច់ត្រូវមានការអ្នកផ្តល់សេវាសង្គមកិច្ចសម្រាប់សហគមន៍នីមួយៗនៅកម្ពុជា។ អង្គការដែលធ្វើការលើផ្នែកអប់រំនេះបានលើកឡើងថា ទិន្នន័យចុងក្រោយបំផុត បានឱ្យដឹងថា កុមារនៅតែទទួលរងអំពើហិង្សាពីមនុស្សជុំវិញខ្លួន រួមមានមិត្តភ័ក្តិ ឪពុកម្តាយ សាច់ញាតិ និងសមាជិកសហគមន៍ផ្សេង។ អំពើហិង្សានេះប៉ះពាល់ដល់ការអភិវឌ្ឍ និងការចូលរួមរបស់កុមារយ៉ាងខ្លាំង។

ហេតុនេះសហគមន៍នីមួយៗត្រូវមានអ្នកផ្តល់សេវាសង្គមកិច្ច ដែលជាអ្នកស្ម័គ្រចិត្តធ្វើការផ្តល់ការប្រឹក្សាយោបល់ផ្នែកសង្គម និងចិត្តសាស្ត្រដើម្បីជួយដល់កុមាររងគ្រោះក្នុងសហគមន៍។ តាមបទពិសោធនៃអង្គការ Plan បានបង្ហាញថា ឃុំដែលមានអ្នកផ្តល់សេវាសង្គមកិច្ច ធ្វើឱ្យកុមារទទួលរងការរំលោភបំពានធ្ងន់ធ្ងរ មានការចូលរួមក្នុងសហគមន៍ឡើងវិញ៕

August 6, 2018

ក្រសួងអប់រំជ្រើសរើសសិស្សបឋមសិក្សាឱ្យចូលរួមកម្មវិធីគណិតវិទ្យានៅបរទេស

ក្រសួងអប់រំ យុវជន និងកីឡា បានប្រកាសជ្រើសរើសសិស្សថ្នាក់ទី5 និងថ្នាក់ទី6 ឱ្យទៅចូលរួមកម្មវិធី The 15^th Mathematics and Science Olympiad នៅខេត្ត Zhejing នៃសាធារណរដ្ឋប្រជាមានិតចិន។

សិស្សដែលនឹងត្រូវបញ្ជូនទៅពីកម្ពុជាមានចំនួន 24នាក់ដែលនឹងចេញទៅប្រទេសចិនចាប់ពីថ្ងៃទី18 ខែកញ្ញា ឆ្នាំ2018 ដល់ថ្ងៃទី4 ខែតុលា ឆ្នាំ2018។ បេក្ខជនអាចដាក់ពាក្យប្រឡងបានដោយគោរពលក្ខខណ្ឌដូចខាងក្រោម។

ទី1. បេក្ខជនត្រូវតែជាសិស្សកំពុងរៀនថ្នាក់ទី5 និងទី6 នៅតាមគ្រឹះស្ថានសិក្សាសាធារណ និងឯកជនក្នុងរាជធានីភ្នំពេញ។

ទី2 . បេក្ខជនត្រូវជាសិស្សដែលមានសមត្ថភាពខ្ពស់លើមុខវិជ្ជាគណិតវិទ្យា វិទ្យាសាស្ត្រ ភាសាអង់គ្លេស និងកុំព្យូទ័រ។

ទី3. បេក្ខជនត្រូវមានសីលធម៌រស់នៅល្អ មានសមត្ថភាពធ្វើការងារជាក្រុម និងមានពេលវេលាចូលរួមវគ្គបំប៉ន។

ចំពោះបេក្ខជនដែលចាប់អារម្មណ៍ក្នុងការដាក់ពាក្យអាចទាក់ទងទៅនាយកដ្ឋានបឋមសិក្សា មុនថ្ងៃទី10 ខែសីហា ឆ្នាំ2018៕

August 6, 2018

ហ្វីលីពីន នឹងបញ្ជូនក្រុមបាល់បោះទៅប្រកួត ទោះកីឡាករជាប់ពិន័យច្រើនក៏ដោយ

ហ្វីលីពីន បានបញ្ជាក់ជាថ្មីកាលពីថ្ងៃអាទិត្យថា ខ្លួននឹងនៅតែបញ្ជូនក្រុមកីឡាបាល់បោះផ្នែកបុរសឱ្យទៅប្រកួតក្នុងព្រឹត្តិការណ៍កីឡាអាស៊ី ឬ Asian Games ក្នុងប្រទេសឥណ្ឌូនេស៊ីដដែល ក្រោយពីបានប្រកាសដកខ្លួនបន្ទាប់ពីជម្លោះនៅលើទីលានប្រកួតជាមួយនឹងក្រុមកីឡាករអូស្ត្រាលី ក្នុងការប្រកួតជម្រុះ World Cup កាលពីដើមខែកក្កដាកន្លងទៅ។

ក្រុមកីឡាបាល់បោះរបស់ហ្វីលីពីន បានប្រកាសពីការដកខ្លួនចេញពីយុទ្ធនាការកីឡាបាល់បោះ កាលពីថ្ងៃទី27 ខែកក្កដា ដោយសារតែអង្គភាពគ្រប់គ្រងកីឡាបាល់បោះអន្តរជាតិហៅកាត់ថា FIBA បានដាក់ពិន័យព្យួរកីឡាករ 10នាក់ និងគ្រូបង្វឹក 2នាក់របស់ពួកគេ ជុំវិញការផ្ទុះជម្លោះវាយតប់គ្នាមួយកាលពីថ្ងៃទី២ ខែកក្កដា ដោយកីឡាករ និងអ្នកគាំទ្របានវាយទាត់ធាក់គ្នានៅលើទីលានប្រកួត។ ប៉ុន្តែ ទោះបីជាយ៉ាងណា ជំនួយការពិសេសម្នាក់របស់លោកប្រធានាធិបតី Rodrigo Duterte បានប្រកាសកាលពីថ្ងៃអាទិត្យថា សហព័ន្ធជាតិ និងក្របខ័ណ្ឌលីកកីឡាបាល់បោះអាជីពរបស់ប្រទេសនេះ បានយល់ព្រមបញ្ជូនក្រុមមួយ ខណៈដែលការសម្រេចចិត្តនេះ ត្រូវបានអះអាងដោយអ្នកចាត់ការទូទៅរបស់ក្រុមបាល់បោះហ្វីលីពីន។

លោក Christopher Go ដែលជាជំនួយការពិសេស បានឱ្យដឹងក្នុងសេចក្តីថ្លែងការណ៍មួយដែលប្រកាសពីការចូលរួមក្រុមរបស់ក្រុមហ្វីលីពីនថា៖ «យើងមិនមានកាតព្វកិច្ចអ្វីដែលត្រូវតែឈ្នះឡើយ តែយើងមានកាតព្វកិច្ចក្នុងការរក្សាការព្យាយាម និងធ្វើឱ្យបានល្អបំផុតតាមដែលយើងអាចធ្វើបានជារៀងរាល់ថ្ងៃ។ នេះគឺជាមោទនភាពរបស់ហ្វីលីពីន។ គ្មានអ្វីដែលបង្រួបបង្រួមសង្គមហ្វីលីពីន ល្អប្រសើរជាងនៅលើទីលានកីឡាបាល់បោះឡើយ»៕

ប្រភពពី៖ Channel News Asia

August 6, 2018

Author: វល័ក្ខ