វល័ក្ខ - La Reine Media

ADB ផ្តល់ហិរញ្ញប្បទានសង់កំពង់ផែទេសចរណ៍អន្តរជាតិ នៅខេត្តកំពត

រាជរដ្ឋាភិបាលកម្ពុជាបានទទួលហិរញ្ញប្បទានសម្បទានពីធនាគារអភិវឌ្ឍន៍អាស៊ី ADB (The Asian Development Bank) ដើម្បីវិនិយោគលើហេដ្ឋារចនាសម្ព័ន្ធទេសចរណ៍ពាក់ព័ន្ធក្នុងតំបន់ឆ្នេរចំនួន3 គឺខេត្តកែប កំពត និងខេត្តកោះកុង ក្នុងគោលបំណងធ្វើឱ្យប្រសើរឡើងនូវការតភ្ជាប់ការធ្វើដំណើរ និងទេសចរណ៍តាមច្រករបៀងទេសចរណ៍ភាគខាងត្បូង ថៃ-កម្ពុជា-វៀតណាម។

ពិធីសម្ពោធបើកការដ្ឋានសាងសង់កំពង់ផែទេសចរណ៍អន្តរជាតិបានប្រារព្ធនៅខេត្តកំពត កាលពីព្រឹកថ្ងៃទី8 ខែសីហា ឆ្នាំ2018 នៅឯទីតាំងកំពង់ផែអន្តរជាតិ ដែលស្ថិតក្នុងភូមិកំពង់ទ្រាក ឃុំជុំគ្រៀល ស្រុកទឹកឈូ ខេត្តកំពត ។ កំពង់ផែដែលគ្រប់គ្នា ពិសេសប្រជាពលរដ្ឋខេត្តកំពតកំពុងទន្ទឹងរង់ចាំនោះ បានចាប់ផ្តើមសាងសង់ហើយ ដោយអ្នកចូលរួមបាននិយាយថា កំពង់ផែនេះនាពេលខាងមុខនឹងជំរុញការដឹកជញ្ជូនតាមផ្លូវសមុទ្រជាមួយវៀតណាម និងថៃ និងជំរុញឧស្សាហកម្មទេសចរណ៍ និងសេដ្ឋកិច្ចជាតិឱ្យកាន់តែសម្បូរបែបឡើង។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថា កំពង់ផែទេសចរណ៍នេះកំពុងត្រូវបានសាងសង់ដោយប្រាក់កម្ចីសម្បទានពីធនាគារអភិវឌ្ឍន៍អាស៊ីដែលត្រូវបានផ្តល់ជាថវិកាដើម្បីបង្កើនទំនាក់ទំនងជាមួយបណ្តាប្រទេសជិតខាង ព្រោះការដឹកជញ្ចូនតាមផ្លូវទឹកក៏ជាសេវាកម្មទេសចរណ៍មួយដែរ។ រដ្ឋាភិបាលបាន និងកំពុងផ្តោតលើការអភិវឌ្ឍផ្លូវទឹកទាំងនេះដើម្បីលើកកម្ពស់វិស័យទេសចរណ៍នៅក្នុងតំបន់ឆ្នេរ និងច្រករបៀងទេសចរណ៍ភាគខាងត្បូង ដោយនឹងមានលទ្ធភាពផ្តល់សេវាកម្មដល់កប៉ាល់កម្សាន្តមកពីប្រទេសវៀតណាម និងថៃ។

យោងតាមរបាយការណ៍ក្រសួងទេសចរណ៍បានឱ្យដឹងថា នៅឆ្នាំ2017 ប្រទេសកម្ពុជាទទួលបានទេសចរអន្ដរជាតិជាង 5.6 លាននាក់កើនឡើង 11.8%ដែលរកចំណូលបានច្រើនជាង 3.6 ពាន់លានដុល្លារ (ជិត12%នៃផលិតផលក្នុងស្រុកសរុប) និងផ្តល់ការងារដោយផ្ទាល់ដល់មនុស្សជាង 650,000 នាក់។ ចំពោះតំបន់ទេសចរណ៍ឆ្នេរសមុទ្របានស្វាគមន៍ភ្ញៀវទេសចរចំនួន 3.2 លាននាក់ដោយមានភ្ញៀវទេសចរអន្តរជាតិមានចំនួន 740,000 នាក់កើនឡើង 20%។

ធនាគារអភិវឌ្ឍន៍អាស៊ីបានឱ្យដឹងថាកំពង់ផែទេសចរណ៍អន្តរជាតិនេះ ត្រូវបានគេរំពឹងថានឹងបញ្ចប់នៅចុងឆ្នាំក្រោយ។ ដោយគ្របដណ្តប់ផ្ទៃដី 4ហិកតានៅស្រុកទឹកឈូ កំពង់ផែនេះនឹងអាចផ្ទុកឡានដឹកភ្ញៀវទេសចរដែលមានសមត្ថភាពផ្ទុកបានពី 200 ទៅ300នាក់។ កំពង់ផែនេះត្រូវបានគេរំពឹងថានឹងបម្រើភ្ញៀវទេសចរជាតិ និងអន្តរជាតិ 360.000នាក់ក្នុងមួយឆ្នាំនៅក្នុងឆ្នាំដំបូង និង442.000នាក់នៅឆ្នាំ2022។

តាមរបាយការណ៍របស់ លោក ជាវ តាយ អភិបាលខេត្តកំពត បានឱ្យដឹងថា ក្នុងរយៈពេល 6ខែ ឆ្នាំ2018 នេះ ខេត្តកំពតទទួលបានភ្ញៀវទេសចរសរុបចំនួន 857,529នាក់ ក្នុងនោះភ្ញៀវអន្តរជាតិចំនួន92,718នាក់ ហើយខេត្តកំពតមានរមណីយដ្ឋានទេសចរណ៍ចំនួន 17កន្លែង សហគមន៍ទេសចរណ៍ចំនួន4គោលដៅទាក់ទង នឹងសេវាស្នាក់នៅចំនួន 220កន្លែង ស្មើនឹង 3,112បន្ទប់ និងសេវាម្ហូបអាហារចំនួន 127កន្លែង។ ជាមួយគ្នានេះ ខេត្តកំពតគឺជាសមាជិកក្លិបឆ្នេរសមុទ្រល្អបំផុតលើពិភពលោក ហើយក្រុងកំពតក៏ជាក្រុងដែលទទួលបានផ្ការំដួល 3ទង ក្នុងចលនាប្រឡងប្រណាំងទីក្រុងស្អាតកាលពីដើមឆ្នាំ2018នេះដែរ៕

August 10, 2018

លោក Pochettino ប្រឈមនឹងការសាកល្បងដ៏សំខាន់ ក្រោយ Spurs មិនទិញកីឡាករថ្មី

លោក Mauricio Pochettino បានបញ្ជាក់ថា លោកមិនមានការរីករាយសោះឡើយចំពោះភាពអសកម្មរបស់ក្លិប Tottenham ក្នុងអំឡុងពេលនៃការបើកទីផ្សារដោះដូរកីឡាករ ប៉ុន្តែការសាកល្បងដ៏ពិតប្រាកដចំពោះការសម្រេចចិត្តមិនទិញកីឡាករថ្មីចូលសូម្បីតែម្នាក់របស់ក្លិបនេះនឹងកើតឡើងក្នុងពេលរដូវកាលនៃក្របខ័ណ្ឌ Premier League ចាប់ផ្តើម។

ក្លិបមានមូលដ្ឋាននៅទីក្រុងឡុងដ៍មួយនេះ ជារឿយៗមានរឿងជាច្រើនដែលផ្ទុយពីក្លិបផ្សេង នៅពេលដែលឈានដល់ដំណាក់កាលទិញ និងលក់កីឡាករ ស្របពេលដែលលោក Daniel Levy ដែលជាប្រធានក្លិប ទទួលបានកេរ្តិ៍ឈ្មោះក្នុងនាមជាអ្នកចរចាដ៏តានតឹង ដែលមិនខ្លាចបាត់បង់អ្វីឡើយ រហូតដល់នាទីចុងក្រោយ។ ប៉ុន្តែ ទោះបីជាយ៉ាងណា នៅពេលនេះ កាលបរិច្ឆេទចុងក្រោយនៃការដោះដូរកីឡាករកាលពីថ្ងៃព្រហស្បតិ៍បានកន្លងផុតទៅ ដោយមិនមានការបន្ថែមកីឡាករថ្មីសោះក្នុងក្លិប Tottenham។

នេះគឺជាលើកទី1 ហើយដែលក្លិបមួយរបស់ក្របខ័ណ្ឌ Premier League មិនបានទិញកីឡាករថ្មីចូលសោះសូម្បីតែម្នាក់ អំឡុងពេលបើកទីផ្សារដោះដូរកីឡាករនៅរដូវក្តៅ។ បច្ចុប្បន្នលោក Pochettino គ្រូបង្វឹកថ្មីរបស់ Tottenham នឹងត្រូវបានរំពឹងទុកថា នឹងបន្តទម្រង់លេងដ៏រឹងមាំរបស់ខ្លួនដូចកាលពីរដូវកាលមុនជាមួយនឹងសមាជិកនៃក្រុមកីឡាករដូចគ្នា ដែលបានធ្វើឱ្យក្លិបនេះបញ្ចប់ក្នុងចំណាត់ថ្នាក់លេខ3 នៅលើតារាង។

ការធ្វើដំណើរទៅប្រកួតនៅលើទឹកដីក្រុម Newcastle នៅថ្ងៃអាទិត្យនេះ ក្នុងការប្រកួតបើកឆាករបស់ពួកគេ នឹងផ្តល់នូវការភ្ញាក់ផ្អើលតិចតួចប៉ុណ្ណោះ បើទោះបីលោក Pochettino ត្រូវតែសម្រេចចិត្តថា កីឡាកររូបណាក្នុងចំណោមកីឡាករ9នាក់ដែលបានបង្ហាញខ្លួនក្នុងព្រឹត្តិការណ៍ World Cup វគ្គពាក់កណ្តាលផ្តាច់ព្រ័ត្រ ត្រៀមរួចរាល់ក្នុងការវិលទៅកាន់ការប្រកួតវិញ៕

កម្មវិធីប្រកួតចុងសប្តាហ៍

ថ្ងៃសុក្រ ទី10 ខែសីហា

ManUnited v Leicester- 2ទៀបភ្លឺ

ថ្ងៃសៅរ៍ ទី11 ខែសីហា

Newcastle v Tottenham – 9 យប់

Bournemouth v Cardiff – 9 យប់

Fulham v Crystal Palace – 9 យប់

Huddersfield v Chelsea – 9 យប់

Watford v Brighton – 9 យប់

Wolves v Everton – 11:30 យប់

ថ្ងៃអាទិត្យ ទី12 ខែសីហា

Liverpool v West Ham – 7:30 យប់

Southampton v Burnley – 7:30 យប់

Arsenal v Man City- 10 យប់

ប្រភពពី៖ Channel News Asia

August 10, 2018

Tsitsipasទម្លាក់ជើងខ្លាំង Djokovic ក្នុងព្រឹត្តិការណ៍ Toronto Masters

កីឡាករវាយកូនបាល់ StefanosTsitsipas បានបង្កើតការភ្ញាក់ផ្អើលក្នុងយុទ្ធនាការ Toronto Masters កាលពីថ្ងៃព្រហស្បតិ៍ តាមរយៈការយកឈ្នះលើកីឡាករ Novak Djokovic ដែលជាម្ចាស់ជើងឯក Wimbledon ក្នុងលទ្ធផល 6-3, 6-7 (5/7) និង6-3 ដើម្បីឈានទៅវគ្គ 8នាក់ចុងក្រោយ។

កីឡាករវ័យក្មេងសញ្ជាតិក្រិកដែលទើបតែឈានចូលវ័យ 20ឆ្នាំកាលពីថ្ងៃអាទិត្យរូបនេះ បានយកឈ្នះលើម្ចាស់ជើងឯក 4សម័យកាល Djokovic ដែលមានចំណាត់ថ្នាក់លេខ9 ប្រចាំព្រឹត្តិការណ៍ក្នុងការជួបគ្នាជាលើកទី1 រវាងកីឡាករទាំង2 ក្រោយពីបានផ្តួលកីឡាករចំណាត់ថ្នាក់លេខ7ប្រចាំព្រឹត្តិការណ៍គឺ Dominic Thiem។

Tsitsipas បានឱ្យដឹងថា៖ «នេះគឺជាការប្រកួតដ៏ល្អបំផុតក្នុងអាជីពរបសខ្ញុំ។ ខ្ញុំបានដឹងថា ខ្ញុំលេងបានយ៉ាងល្អនៅថ្ងៃនេះ។ ការរងបរាជ័យក្នុងការប្រកួតសិតទី2 វាពិតជាលំបាកក្នុងការដោះស្រាយខ្លាំងណាស់។ ខ្ញុំមានឱកាសរបស់ខ្ញុំជាច្រើន និងមិនបានប្រើប្រាស់ឱកាសទាំងនោះសោះ»។

កីឡាករវ័យក្មេងរូបនេះបានបន្ថែមទៀតថា៖ «ប៉ុន្តែ ខ្ញុំនៅតែស្ថិតក្នុងអារម្មណ៍ស្ងប់ ខ្ញុំបានព្យាយាមធ្វើរឿងដែលខ្ញុំមិនធ្លាប់បានសាកល្បងធ្វើកាលពីមុន។ ការប្រកួតនៅសិតទី3 គឺជាចំណុចកាត់សេចក្តី។ វាបានធ្វើឱ្យខ្ញុំទទួលជ័យជម្នះ»។ Tsitsipas ដែលមានចំណាត់ថ្នាក់លេខ27 ក្នុងពិភពលោក បានចំណាយពេលត្រឹមតែ 2ម៉ោងប៉ុណ្ណោះដើម្បីឈានទៅវគ្គ1/4ផ្តាច់ព្រ័ត្រជាលើកទី1 នៃអាជីពរបស់គេ ក្នុងព្រឹត្តិការណ៍ Masters លើកទី1000 នេះ៕

ប្រភពពី៖ Channel News Asia

August 10, 2018

ផលិតផលចម្បង 5 ដែលក្រសួងពាណិជ្ជកម្មអនុវត្តគម្រោងជំរុញទីផ្សារ

ក្រសួងពាណិជ្ជកម្មកំពុងអនុវត្តគម្រោងជំរុញទីផ្សារសម្រាប់កសិកម្មខ្នាតតូចដើម្បីផ្សារភ្ជាប់ផលិតផលរបស់ប្រជាកសិករជាមួយនឹងទីផ្សារ ដោយផ្ដោតសំខាន់លើផលិតផលចំនួន 5 រួមមាន ស្រូវ មាន់ស្រែ បន្លែ ដំឡូងមី និងសូត្រប្រណីត។ នេះបើតាមការឱ្យដឹងពីឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មដែលបានលើកឡើងក្នុងពិធីជួបសំណេះសំណាលជាមួយជ័យលាភីកម្មវិធីអាហារូបករណ៍អភិវឌ្ឍន៍ជប៉ុន ថ្នាក់បរិញ្ញាបត្រជាន់ខ្ពស់នៅប្រទេសជប៉ុន ឆ្នាំ2018-2020 កាលពីថ្ងៃទី7 ខែសីហា ឆ្នាំ2018 នៅទីស្ដីការក្រសួងពាណិជ្ជកម្ម។

ឯកឧត្តមបានឱ្យដឹងថា ក្រសួងបាននិងកំពុងខិតខំជំរុញលិខិតបទដ្ឋានគតិយុត្តនៅក្រោមវិស័យពាណិជ្ជកម្មដូចជា ច្បាប់ស្តីពីការធ្វើពាណិជ្ជកម្មតាមអេឡិចត្រូនិក(E-Commerce)ច្បាប់ស្តីពីកិច្ចសន្យាពាណិជ្ជកម្ម ច្បាប់ស្តីពីការប្រកួតប្រជែង និងច្បាប់ស្តីពីសុវត្ថិភាពម្ហូបអាហារជាដើម ដើម្បីការពារអត្ថប្រយោជន៍របស់វិស័យឯកជន និងអ្នកប្រើប្រាស់។ ច្បាប់ទាំងអស់នេះ និងលើកស្ទួយសមត្ថភាពប្រកួតប្រជែងរបស់កម្ពុជានៅក្នុងប្រព័ន្ធពាណិជ្ជកម្មសកលនាពេលអនាគត។

ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្មបានមានប្រសាសន៍ថា ក្នុងរយៈពេល 6ខែ ដើមឆ្នាំ2018 នេះ ទំហំពាណិជ្ជកម្មរបស់កម្ពុជាសម្រេចបាន 13,985លានដុល្លារ ក្នុងនោះការនាំចេញ មានចំនួនប្រមាណ 5,794លានដុល្លារ គឺកើនឡើង11% បើធៀបនឹងរយៈពេលដូចគ្នានៅឆ្នាំមុន។ ចំណែកការនាំចូលមានចំនួន 8,191លានដុល្លារ គឺបានកើន 10.6%។

សូមរំឭកថា កាលពីឆ្នាំ2017 កន្លងទៅ ការនាំចេញរបស់កម្ពុជាមានតម្លៃប្រមាណ 11.2ពាន់លានដុល្លារ គឺបានកើនឡើង 9.2% ធៀបនឹងឆ្នាំ2016 ដែលមានទឹកប្រាក់ 10.2ពាន់លានដុល្លារ។ រីឯការនាំចូលមានទំហំ15.5ពាន់លានដុល្លារ គឺបានកើន9.8% ធៀបនឹង14.1ពាន់លានដុល្លារ។

ផលិតផលនាំចេញសំខាន់ៗ របស់កម្ពុជា រួមមាន វាយនភណ្ឌ សម្លៀកបំពាក់ ស្បែកជើង កាបូប គ្រឿងផ្គុំអេឡិចត្រូនិក ទោចក្រយានយន្ត ផលិតផលនេសាទ ជ័រកៅស៊ូ ឈើកែច្នៃ អង្ករ ដំឡូងមី គ្រាប់ស្វាយចន្ទី ពោតក្រហម សណ្តែកសៀង ម្រេច ផ្លែស្វាយស្រស់ ដូងប្រេង និងទំនិញកសិកម្មដទៃទៀត។ ដោយឡែក សម្រាប់ទីផ្សារធំៗរបស់កម្ពុជារួមមាន សហគមន៍អឺរ៉ុប អាមេរិក កាណាដា ជប៉ុន ចិន និងអាស៊ាន ជាដើម៕

August 9, 2018

Chelsea បំពេញការផ្ទេរ Kepa ពីក្លិប Bilbao ក្នុងតម្លៃខ្លួនជាកំណត់ត្រាពិភពលោក

ក្លិបតោខៀវ Chelsea បានបំបែកកំណត់ត្រាពិភពលោកសម្រាប់តម្លៃខ្លួនអ្នកចាំទីម្នាក់ តាមរយៈការចុះហត្ថលេខាជាមួយនឹងកីឡាករ KepaArrizabalaga ពីក្លិប Athletic Bilbao ក្នុងតម្លៃខ្លួន 71.6លានផោន (ស្មើនឹង 92.9លានដុល្លារអាមេរិក) ក្នុងកិច្ចសន្យារយៈពេល 7ឆ្នាំ។

អ្នកចាំទីវ័យ 23ឆ្នាំរូបនេះ ធ្វើដំណើរទៅដល់ទីក្រុងឡុងដ៍ នៅល្ងាចនៃថ្ងៃដែលអ្នកចាំទី Thibaut Courtois ចាកចេញពីកីឡដ្ឋាន Stamford Bridge ដែរ ខណៈដែលអ្នកចាំទីអន្តរជាតិបែលហ្ស៊ិករូបនេះ នឹងត្រូវបង្ហាញខ្លួននៅឯក្លិប Real Madrid នៅល្ងាចថ្ងៃដដែល ក្រោយពីរូបគេទទួលការពិនិត្យសុខភាពរួចរាល់។

ក្រោយពីបានចំណាយប្រាក់ទិញរំលាយកិច្ចសន្យារបស់ Kepa ជាមួយនឹងក្លិប Bilbao កាលពីថ្ងៃពុធ ការផ្ទេរក្នុងតម្លៃខ្លួន 71.6លានផោនរបស់ Chelsea នឹងបំបែកកំណត់ត្រានៃការផ្ទេរក្នុងតម្លៃខ្លួនសម្រាប់អ្នកចាំទីម្នាក់ចំនួន 67លានផោន ដែលក្លិប Liverpool បានចំណាយដើម្បីទិញយក Alisson Becker ពីក្លិប Roma កាលពីខែមុន។ Kepa នឹងហ្វឹកហាត់ជាមួយនឹងមិត្តរួមក្រុមថ្មីរបស់គេជាលើកទី1 នៅថ្ងៃព្រហស្បតិ៍នេះ ហើយនិងចូលលេងសម្រាប់ការប្រកួតបើករដូវកាលនៃក្របខ័ណ្ឌ Premier League របស់ពួកគេនៅលើទឹកដីក្រុម Huddersfield នៅថ្ងៃសៅរ៍នេះ។

Kepaបានឱ្យដឹងថា៖ «វាជាការសម្រេចចិត្តដ៏សំខាន់មួយសម្រាប់ខ្ញុំ សម្រាប់អាជីពរបស់ខ្ញុំ និងសម្រាប់ជីវិតផ្ទាល់ខ្លួនរបស់ខ្ញុំ។ កត្តាជាច្រើនបានទាក់ទាញខ្ញុំមកកាន់ក្លិបនេះ ដូចជារាល់ពានដែលក្លិបនេះបានឈ្នះ កីឡាករផ្សេងទៀត ទីក្រុងនេះ និងក្របខ័ណ្ឌអង់គ្លេស Premier League»។

Kepa បានបង្ហាញខ្លួនចំនួន 30លើកសម្រាប់ក្លិប Athletic ក្នុងការប្រកួតក្របខ័ណ្ឌ La Ligaកាលពីរដូវកាលមុន ដោយការពារមិនឱ្យមានគ្រាប់បាល់ចូលទីរបស់ខ្លួន 7លើក ខណៈដែលទម្រង់លេងដ៏ល្អរបស់គេបានជួយឱ្យរូបគេទទួលបានការកោះហៅឱ្យចូលរួមក្នុងក្រុមជម្រើសជាតិអេស្ប៉ាញសម្រាប់ World Cup ក្រោយពីបានបង្ហាញខ្លួនជាអន្តរជាតិជាលើកទី1 របស់គេកាលពីខែវិច្ឆិកា៕

ប្រភពពី៖ Sky Sports

August 9, 2018

Chelsea យល់ព្រមលក់អ្នកចាំទី Courtois ទៅឱ្យក្លិប Real Madrid

ក្លិបតោខៀវ Chelsea បានប្រកាសថា ពួកគេបានឈានដល់ការព្រមព្រៀងគ្នាមួយជាមួយនឹងក្លិប Real Madrid សម្រាប់ការផ្ទេរអ្នកចាំទី Thibaut Courtois ក្នុងតម្លៃខ្លួន 35លានអឺរ៉ូ (ស្មើនឹង 40.7លានដុល្លារអាមេរិក)ហើយ។

Courtois នឹងចុះហត្ថលេខារយៈពេល 6ឆ្នាំនៅឯកីឡដ្ឋាន Bernabeu ដោយរង់ចាំតែការយល់ព្រមលើលក្ខខណ្ឌផ្ទាល់ខ្លួន និងឆ្លងកាត់ការពិនិត្យសុខភាពតែប៉ុណ្ណោះ។ ខ្សែបម្រើអន្តរជាតិក្រូអាស៊ី Mateo Kovacic ក៏នឹងចូលរួមជាមួយនឹង Chelsea ដែរក្នុងកិច្ចសន្យាខ្ចីជើងពីក្លិប Real Madrid រយៈពេល 1រដូវកាល ក្នុងនាមជាផ្នែកមួយនៃការផ្ទេរនេះ។

Chelsea បានឱ្យដឹងនៅលើបណ្តាញសង្គម Twitter ថា៖ «នៅរាត្រីនេះ យើងបានយល់ព្រមលើលក្ខខណ្ឌផ្សេងៗជាមួយនឹងក្លិប Real Madrid សម្រាប់ការផ្ទេររបស់ Thibaut Courtois ដែលរង់ចាំតែការយល់ព្រមលើលក្ខខណ្ឌផ្ទាល់ខ្លួន និងការពិនិត្យសុខភាពប៉ុណ្ណោះ។

ក្នុងផ្នែកមួយនៃការផ្ទេរនេះ ខ្សែបម្រើ Mateo Kovacic ក៏នឹងចូលរួមជាមួយនឹងក្លិប Chelsea ក្នុងលក្ខខណ្ឌខ្ចីជើងពេញ 1រដូវកាលដែរ»។ ក្លិប Real Madrid បានប្រកាសថា Courtois នឹងទទួលការពិនិត្យសុខភាពនៅថ្ងៃព្រហស្បតិ៍នេះ នៅមុនពេលបង្ហាញខ្លួនទៅកាន់អ្នកគាំទ្រនៅកីឡដ្ឋាន Bernabeu។

Courtois បានលេងការប្រកួតចំនួន 154លើកសម្រាប់ Chelsea ក្រោយពីផ្ទេរទៅកាន់កីឡដ្ឋាន Stamford Bridge កាលពីឆ្នាំ2011 ដោយបានការពារមិនឱ្យមានគ្រាប់បាល់ចូលទីរបស់ខ្លួនចំនួន 58លើក។ រូបគេបានចំណាយពេលអស់ 3ឆ្នាំក្នុងនាមជាកីឡាករកម្ចីនៅឯក្លិប Atletico Madrid ចាប់ពីរដូវកាលឆ្នាំ2011 ដល់2014៕

ប្រភពពី៖ Sky Sports

August 9, 2018

ជីវប្រវត្តិសំខាន់ៗរបស់ព្រឹទ្ធាចារ្យ «យូ បូ» គ្រូធំផ្នែកសារព័ត៌មាន និងអ្នកនិពន្ធកម្ពុជា

នៅក្នុងវិស័យតែងនិពន្ធកម្ពុជា មានមនុស្សតិចណាស់ដែលមិនស្គាល់ព្រឹទ្ធាចារ្យ យូ បូ ស្ថាបនិកដ៏សំខាន់មួយរូបនៅសមាគមអ្នកនិពន្ធខ្មែរ សាស្ត្រាចារ្យអក្សរសាស្ត្រ និងជាអតីតអ្នកសារព័ត៌មានជើងចាស់របស់កម្ពុជា។

លោកព្រឹទ្ធាចារ្យ យូ បូ បានកើតនៅថ្ងៃទី6 ខែមេសា ឆ្នាំ1942 រស់នៅក្នុងសង្កាត់ដង្កោ ស្រុកដង្កោ ខេត្តកណ្តាល ដែលបច្ចុប្បន្នជាខណ្ឌដង្កោនៃរាជធានីភ្នំពេញ។ លោកបានបញ្ចប់ការសិក្សាថ្នាក់មធ្យមសិក្សាទុតិយភូមិនៅឆ្នាំ1962 ហើយចាប់ផ្តើមអាជីពជាសាស្ត្រាចារ្យអក្សរសាស្ត្រខ្មែរនៅឆ្នាំ1962 ដល់ឆ្នាំ1963 និងបានចូលជាសមាជិកសមាគមអ្នកនិពន្ធខ្មែរនៅថ្ងៃទី13 ខែមិថុនា ឆ្នាំ1963។

ក្រោយចូលជាសមាជិកសមាគមអ្នកនិពន្ធខ្មែរបានមួយឆ្នាំ លោកសាស្ត្រាចារ្យ យូ បូ បានចូលបម្រើការងារជាអ្នកសារព័ត៌មាននៃកាសែតមាតុភូមិ និងបានអភិវឌ្ឍក្លាយជានិពន្ធនាយករបស់កាសែតសុភមិត្រនៅឆ្នាំ1967 ហើយស្ថិតនៅលើវិស័យសារព័ត៌មាននេះដែរ លោកបានផ្លាស់ទៅធ្វើជាចាងហ្វាងកាសែតរាស្ត្រនិយម។ ក្រោយមកចន្លោះពីឆ្នាំ1970 ដល់ឆ្នាំ1975 លោកនៅតែបន្តធ្វើការងារជាអ្នកសារព័ត៌មាន តែលោកបានបន្ថែមអាជីពមួយទៀត គឺជាអ្នកនិពន្ធសៀវភៅប្រលោមលោក។

ក្រោយរបបកម្ពុជាប្រជាធិបតេយ្យ នៅចន្លោះឆ្នាំ1979 ដល់ឆ្នាំ1990 លោកព្រឹទ្ធាចារ្យ យូ បូ បានធ្វើជាមន្ត្រីនៃក្រសួងវប្បធម៌ ហើយនៅចន្លោះឆ្នាំ1993 លោកបានងាកមកចាប់អាជីពជាអ្នកសារព័ត៌មានវិញ ដែលកាលណោះលោកជាចាងហ្វាងកាសែតយុត្តិធម៌ មុននឹងចាប់ផ្តើមរៀបចំបង្កើតសមាគមអ្នកនិពន្ធខ្មែរជាថ្មីឡើងវិញ នៅថ្ងៃទី12 ខែមេសា ឆ្នាំ1993ដដែលនោះ។

ទន្ទឹមនឹងនេះ លោកក៏បានចាប់អាជីពជាសាស្ត្រាចារ្យអក្សរសាស្ត្រខ្មែរឡើងវិញផងដែរ នៅចន្លោះឆ្នាំ1993 ដល់ឆ្នាំ1995។ ស្របពេលជាមួយគ្នានោះលោកក៏បានបំពេញតួនាទីជាអ្នកបកប្រែភាសាឱ្យអ៊ុនតាក់ផងដែរ នៅក្នុងខេត្តបន្ទាយមានជ័យ បន្ថែមពីលើអាជីពរបស់លោកជាសាស្ត្រាចារ្យ និងចាងហ្វាងសារព័ត៌មាន។

លោកព្រឹទ្ធាចារ្យ យូ បូ បានបន្សល់ទុកស្នាដៃជាច្រើនក្នុងវិស័យអក្សរសាស្ត្រ និងការតែងនិពន្ធ តាមរយៈកាបណ្តុះបណ្តាលយុវជនខ្មែរជាច្រើន និងបង្កើតស្នាដៃនិពន្ធប្រកបដោយគុណតម្លៃ។ ស្នាដៃនិពន្ធរបស់លោកដែលមានការគាំទ្រច្រើនមានដូចជា៖

– រឿង មាគ៌ាសុខ
– រឿង បុរសឈើចាក់ធ្មេញ
– រឿង គ្រូពេទ្យអាយុ 190ឆ្នាំ
– រឿង នារីបាត់ខ្លូន
– រឿង ទេពធីតាកោះចេនឡា
– រឿង ដាវដោះក្រមុំ
– រឿង ក្រុមកុមារឃ្លោកទិព្វ
– រឿង ភ្លើងស្នេហ៍ភក្តី
– រឿង ង្វៀង ម៉ាញ់ត្វិន (ប្រលោមលោកបកប្រែពីភាសាវៀតណាមមកជាភាសាខ្មែរ)៕

August 8, 2018

អាហារូបករណ៍ Chevening បានមកដល់ទៀតហើយសម្រាប់យុវជនកម្ពុជា

អាហារូបករណ៍ Chevening សម្រាប់ឆ្នាំសិក្សា 2019-2020 បានបើកឱ្យដាក់ពាក្យជាថ្មីម្តងទៀតហើយចាប់ពីថ្ងៃទី6 ខែសីហា ដល់ថ្ងៃទី6 ខែវិច្ឆិកា ឆ្នាំ2018នេះ។

Chevening គឺជាអាហារូបករណ៍អន្តរជាតិសម្រាប់រដ្ឋាភិបាលដែលផ្តល់ឱកាសឱ្យសិស្សមកពីប្រទេសនានាក្នុងពិភពលោកដែលមានភាពជាអ្នកដឹកនាំខ្ពស់ ឬដែលជាអ្នកបន្តវេនក្នុងការដឹកនាំសង្គម មានឱកាសដើម្បីបន្តការសិក្សានៅចក្រភពអង់គ្លេស។ អាហារូបករណ៍នេះផ្តល់ជូនសម្រាប់អ្នកជំនាញឆ្នើមៗមកពីប្រទេសកម្ពុជាសម្រាប់ការសិក្សាថ្នាក់អនុបណ្ឌិតរយៈពេលមួយឆ្នាំលើមុខវិជ្ជានានានៅក្នុងសាកលវិទ្យាល័យនៅអង់គ្លេស។

អាហារូបករណ៍ Chevening ផ្តល់ឱ្យនូវការឧបត្ថម្ភផ្នែកថវិកាទាំងស្រុងសម្រាប់ការសិក្សា និងការស្នាក់នៅក្នុងចក្រភពអង់គ្លេសសម្រាប់រយៈពេលសិក្សា ដែលផ្តល់ឱកាសឱ្យនិស្សិតទទួលបាននូវចំណេះដឹងសម្រាប់ការអភិវឌ្ឍសង្គម និងទទួលបានបទពិសោធសម្រាប់ការស្នាក់នៅក្នុងប្រទេសអង់គ្លេស តាមរយៈការស្វែងយល់ពីរបៀបរបបនៃការរស់នៅ វប្បធម៌ ការគិត និងទំនាក់ទំនងល្អជាមួយអ្នកជំនាញមកពីប្រទេសផ្សេងៗទៀតលើពិភពលោក។

ប្រសិនបើយុវជនទាំងអស់នៅក្នុងប្រទេសកម្ពុជាដែលមានសក្តានុពលក្នុងភាពជាអ្នកដឹកនាំចាប់អារម្មណ៍ និងមានប្រវត្តិសិក្សាល្អ អាចទាក់ទងដាក់ពាក្យបានតាមរយៈគេហទំព័រ https://www.chevening.org/cambodia/

August 8, 2018

ក្រសួងកសិកម្ម និង (IFAD) បន្ថែមប្រាក់ជាង 15លានដុល្លារសម្រាប់ជួយកសិកររងគ្រោះ

ក្រសួងកសិកម្ម រុក្ខាប្រមាញ់ និងនេសាទ និងអង្គការមូលនិធិអន្តរជាតិសម្រាប់អភិវឌ្ឍន៍កសិកម្មអាយហ្វេត(International Fund for Agricultural Development ហៅកាត់ថា IFAD)បានសហការគ្នាបង្កើនថវិកាប្រមាណជាង 15លានដុល្លារអាមេរិកបន្ថែមទៀតនៅក្នុងវិស័យកសិកម្ម ពិសេសគឺជួយដល់ប្រជាកសិករដែលរងគ្រោះ។

នៅក្នុងបណ្តាញសង្គមហ្វេសប៊ុកផេចក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ការបង្កើនប្រាក់បន្ថែមនេះគឺបន្ទាប់ពីបានសង្កេតឃើញថា កម្មវិធីនេះបាន និងកំពុងដំណើរការល្អ និងកំពុងទទួលបានលទ្ធផលជាផ្លែផ្កា ដោយថវិកានេះគឺសម្រាប់អនុវត្តនៅក្នុងខេត្តគោលដៅចំនួន 11ក្នុងគោលដៅកាត់បន្ថយភាពក្រីក្រ និងបង្កើនភាពធន់របស់ដំណាំកសិកម្មតាមរយៈកម្មវិធីច្នៃប្រឌិតថ្មី ភាពធន់ទៅនឹងការប្រែប្រួលអាកាសធាតុ និងពង្រីក (The Agriculture Services Program for Innovation, Resilience and Extension = ASPIRE) ។

IFAD ធ្លាប់បានចំណាយប្រាក់សរុប 52.4លានដុល្លារអាមេរិករួចមកហើយសម្រាប់អនុវត្តនៅក្នុងខេត្តគោលដៅចំនួន11 ក្នុងនោះរួមមាន ខេត្តព្រះវិហារ ក្រចេះ ស្ទឹងត្រែង ព្រៃវែង ស្វាយរៀង កណ្តាល តាកែវ កំពត កំពង់ឆ្នាំង ពោធិ៍សាត់ និងបាត់ដំបង រយៈពេល7ឆ្នាំ គិតចាប់ពីឆ្នាំ2015 ដល់ឆ្នាំ2022។ ទាក់ទិននឹងការងារខាងលើនេះ នៅព្រឹកថ្ងៃទី6 ខែសីហា ឆ្នាំ2018កន្លងទៅនេះ នៅទីស្តីការក្រសួងកសិកម្មបានរៀបចំពិធីចែកទោចក្រយានយន្ត និងកុំព្យូទ័របន្ទះ ជូនភ្នាក់ងារផ្សព្វផ្សាយកសិកម្មនៃកម្មវិធី ASPIRE ។

ការផ្តល់យានជំនិះ និងឧបករណ៍ទាំងនេះក្នុងគោលបំណងលើកកម្ពស់ និងធ្វើឱ្យកាន់តែប្រសើរឡើងនូវការផ្តល់សេវាកម្មកសិកម្មដែលឆ្លើយតបនឹងតម្រូវការកសិករខ្នាតតូចដែលមានទំហំផលិតកម្មតូចចំនួន 120ពាន់គ្រួសារក៏ដូចជាជួយកសិករដែលមានទំហំផលិតកម្មតូច ក្រីក្រ និងងាយរងគ្រោះដែលអាចធ្វើធុរកិច្ចកសិកម្ម និងទទួលបានប្រាក់ចំណូលខ្ពស់។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ណែនាំដល់ភាគីពាក់ព័ន្ធទាំងអស់ឱ្យបន្តយកចិត្តទុកដាក់ពង្រីកចំណះដឹង ភាពឆ្លាតវៃ ភាពឆ្នៃប្រឌិត និងភាពទទួលខុសត្រូវខ្ពស់សម្រាប់បន្តដើរតួនាទីជាគ្រូ និងដៃគូដ៏មានសមត្ថភាព និងប្រសិទ្ធភាពដល់ប្រជាកសិករ ធ្វើយ៉ាងណាឱ្យប្រជាកសិករមានភាពរឹងប៉ឹង និងមានភាពម្ចាស់ការដើម្បីបន្តអនុវត្តកម្មវិធីនេះនៅពេលដែលកម្មវិធីនេះត្រូវបានបញ្ចប់ដូចពាក្យថា ទូកទៅ កំពង់នៅ។

ឯកឧត្តម ក៏បានស្នើឱ្យភាគីពាក់ព័ន្ធទាំងអស់ត្រូវសហការជាមួយអគ្គនាយកដ្ឋានកសិកម្ម សាលាជាតិកសិកម្ម និងសាលាកសិកម្មដទៃទៀតដើម្បីផ្លាស់ប្តូរបទពិសោធ ក៏ដូចជាស្រាវជ្រាវបច្ចេកទេសនិងបច្ចេកវិទ្យាថ្មីទំនើបសម្រាប់ប្រជាកសិករ រួមចំណែកកាត់បន្ថយកម្លាំងពលកម្ម បង្កើនផលិតភាព គុណភាព និងប្រាក់ចំណូល។ ធ្វើយ៉ាងណាដើរឱ្យទាន់កំណើនសេដ្ឋកិច្ចជាតិ ស្របតាមចក្ខុវិស័យរបស់រាជរដ្ឋាភិបាលក្នុងការប្រែក្លាយប្រទេសទៅជាប្រទេសមានចំណូលមធ្យមកម្រិតខ្ពស់នាឆ្នាំ2030។

សូមបញ្ជាក់ថា ពិធីចែកទោចក្រយានយន្ត និងកុំព្យូទ័របន្ទះខាងលើនេះ គឺជាថវិកាជំនួយរបស់រាជរដ្ឋាភិបាលកម្ពុជាដែលចែកជូនទៅខេត្តគោលដៅចំនួន11 ដែលមានទោចក្រយានយន្តសរុបចំនួន178គ្រឿង និងកុំព្យូទ័របន្ទះសរុបចំនួន៥៦០គ្រឿង៕

August 8, 2018

ឥណ្ឌាមើលឃើញឱកាសវិនិយោគអចលនទ្រព្យនៅកម្ពុជា

ក្រៅពីវិនិយោគិនចិន និងជប៉ុនហើយនោះ ពេលនេះវិនិយោគិនឥណ្ឌាក៏បានបង្ហាញពីចំណាប់អារម្មណ៍ការវិនិយោគលើវិស័យអចលនទ្រព្យនៅកម្ពុជាដែរ នេះជាការលើកឡើងរបស់ឯកអគ្គរដ្ឋទូតឥណ្ឌា ប្រចាំនៅប្រទេសកម្ពុជា។

លោកជំទាវ Manika Jain ឯកអគ្គរដ្ឋទូតឥណ្ឌាប្រចាំប្រទេសកម្ពុជាបានបញ្ជាក់ថា បច្ចុប្បន្នវិនិយោគគិនឥណ្ឌាកំពុងមានការចាប់អារម្មណ៍យ៉ាងខ្លាំងក្នុងការបណ្ដាក់ទុននៅកម្ពុជា ដោយសារមើលឃើញពីឱកាសដែលកម្ពុជានឹងនៅតែបន្តរីកចម្រើនខ្លាំងក្នុងវិស័យនេះ។ លោកជំទាវបន្តថា បច្ចុប្បន្នភាពនៃការវិនិយោគនៅកម្ពុជាកំពុងមានសក្តានុពល ដែលធ្វើឱ្យវិនិយោគិនឥណ្ឌាមួយចំនួនមានការចាប់អាម្មណ៍មកបណ្ដាក់ទុននៅកម្ពុជាលើវិស័យដីធ្លី សំណង់ វាយនភណ្ឌ ស្រូវអង្ករ ដែក និងវិស័យផ្សេងៗទៀត។

គួររំលឹកដែរថា ឯកឧត្តមទេសរដ្ឋមន្ត្រី ជា សុផារ៉ា ធ្លាប់បានមានប្រសាសន៍អំពីការជ្រើសរើសវិនិយោគលើវិស័យអចលនទ្រព្យនេះថា បើសិនជាជ្រើសរើសដីនៅតំបន់ជាប់ក្រុងគឺថ្លៃបន្ដិច តែបើជ្រើសរើសនៅតំបន់ឆ្ងាយពីក្រុងបន្ដិចមានតម្លៃថោកជាង ដូចជានៅតាមបណ្ដោយផ្លូវជាតិលេខ3 លេខ4 លេខ5 និងលេខ6 ជាដើម ម្យ៉ាងនៅតំបន់ជាយក្រុងក៏អាចចៀសវាងការកកស្ទះចរាចរណ៍បាន និងមានបរិស្ថានល្អទៀតផង៕

August 8, 2018

Author: វល័ក្ខ