វល័ក្ខ - La Reine Media

កម្ពុជាទទួលបានជាង 140លានដុល្លារពីការនាំចេញជ័រកៅស៊ូ

ត្រឹមរយៈពេល 7ខែដើមឆ្នាំ2018 កម្ពុជាបាននាំចេញជ័រកៅស៊ូទៅកាន់ទីផ្សារបរទេស មានចំនួន 100,535 តោន កើនឡើងប្រមាណជា20% ធៀបនឹងរយៈពេលដូចគ្នាកាលពីឆ្នាំមុន នេះបើតាមរបាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ។

របាយការណ៍បង្ហាញថា គិតចាប់ពីខែមករា ដល់ខែកក្កដា ឆ្នាំ2018 ចំណូលបានពីការនាំចេញជ័រកៅស៊ូរបស់កម្ពុជា មានចំនួនជាង 140លានដុល្លារអាមេរិក ដោយតម្លៃជ័រកៅស៊ូជាមធ្យម គឺ1,412ដុល្លារក្នុង1តោន តម្លៃនេះធ្លាក់ចុះ 18% បើធៀបនឹងរយៈពេលដូចគ្នាកាលពីឆ្នាំមុន។

បើគិតមកទល់ឆ្នាំ2018នេះ កម្ពុជាមានផ្ទៃដីដាំដុះកៅស៊ូសរុបចំនួន 436,299ហិកតា ក្នុងនោះផ្ទៃដីចៀរជ័រមានចំនួន 173,017ហិកតា ស្មើនឹង39% និងផ្ទៃដីថែទាំមានចំនួន 263,281ហិកតា ស្មើនឹង61%។

សូមបញ្ជាក់ថា នៅឆ្នាំ2017 កម្ពុជាបាននាំចេញជ័រកៅស៊ូជិត 20ម៉ឺនតោន មានចំណូលប្រមាណ 300លានដុល្លារអាមេរិកដែលបានពីការនាំចេញពីកម្ពុជា ទៅកាន់ទីផ្សារបរទេសមានដូចជាប្រទេសចិន វៀតណាម សិង្ហបុរី និងម៉ាឡេស៊ី ជាដើម៕

August 20, 2018

Brighton បានបន្ថែមភាពវេទនាលើ Man Utd ខណៈ Aguero រកបាន 3គ្រាប់

ការភ័យខ្លាចរបស់លោក Jose Mourinho ជុំវិញការមិនទិញខ្សែការពារកណ្តាលថ្មីម្នាក់ត្រូវបានបង្ហាញឱ្យឃើញយ៉ាងច្បាស់ ខណៈដែលភាពទន់ខ្សោយនៅតំបន់ការពារបានធ្វើឱ្យក្រុម Manchester United របស់លោករងបរាជ័យក្នុងលទ្ធផល 3-2 នៅលើទឹកដីក្រុម Brighton កាលពីថ្ងៃអាទិត្យ។

សម្រាប់ជាលើកទី1ក្នុងរយៈពេលជិត 2ឆ្នាំ ក្រុមរបស់លោក Mourinho បានរបូតគ្រាប់បាល់ច្រើនជាង 2គ្រាប់ ខណៈដែលគ្រាប់បាល់ទាំង3 របស់ក្រុម Brighton បានកើតឡើងនៅមុនពេលតង់ទី2 តាមរយៈកីឡាករ Glenn Murray, Shane Duffy និង Pascal Gross។

លោក Mourinho បានឱ្យដឹងថា៖ «យើងបានរងនូវការដាក់ទណ្ឌកម្មដោយសារតែកំហុសផ្សេងៗដែលយើងបានធ្វើ។ សម្រាប់ខ្ញុំ នោះគឺជាចំណុចសំខាន់នៃការប្រកួតនេះ។ យើងបានប្រព្រឹត្តកំហុសដ៏មិនគួរឱ្យជឿក្នុងដំណាក់កាលដ៏សំខាន់។ កំហុសទាំងនោះបានសម្លាប់យើង»។

ស្របពេលជាមួយគ្នានេះ លោក Pep Guardiola បានបញ្ជាក់ថា Sergio Aguero គួរតែមិនអាចធ្វើបានល្អប្រសើរជាងនេះឡើយ ក្រោយពីខ្សែប្រយុទ្ធរបស់ក្លិប Manchester City បានស៊ុតបាល់បញ្ចូលទី 3គ្រាប់ ដើម្បីជួយឱ្យក្រុមរបស់ខ្លួនលត់ក្រុម Huddersfield យ៉ាងចាស់ដៃក្នុងលទ្ធផល 6-1 កាលពីថ្ងៃអាទិត្យ។

ក្រុមម្ចាស់ជើងឯករបស់លោក Guardiola បានបើកយុទ្ធនាការនៅលើទឹកដីរបស់ពួកគេ ជាមួយនឹងការបង្ហាញពីទម្រង់លេងយ៉ាងល្អឥតខ្ចោះ ហើយ Aguero បានបន្តបង្ហាញពីទម្រង់លេងយ៉ាងមុតស្រួចរបស់គេនៅលើទីលាន។

លោក Guardiola អ្នកចាត់ការទូទៅរបស់ក្រុម Man City ពិតជារំភើបចំពោះការបង្ហាញពីទម្រង់លេងដ៏ល្អរបស់ Aguero និងបានទទួលស្គាល់ថា ខ្សែប្រយុទ្ធរបស់លោកកំពុងតែឈានទៅកាន់កម្រិតថ្មីមួយ៕

ប្រភពពី៖ Channel News Asia

August 20, 2018

កាសែតឡារ៉ែន ពាណិជ្ជ លេខ 139

[easy_media_download url=”https://www.lareine.com.kh/wp-content/uploads/2018/08/LRPN_139-Final-For-Web-1.pdf” force_dl=”1″]

August 18, 2018

កីឡាករហែលទឹក 5នាក់ដែលគួរឱ្យចាប់អារម្មណ៍បំផុតក្នុង Asian Games

កីឡាករ 5នាក់ដែលអាចនឹងបង្កើតឱ្យមានចំណាប់អារម្មណ៍ខ្លាំងក្នុងវិញ្ញាសាហែលទឹក ដែលនឹងចាប់ផ្តើមនៅថ្ងៃអាទិត្យនេះនាទីក្រុងហ្សាការតា ប្រទេសឥណ្ឌូនេស៊ី រួមមាន៖

កីឡាករ Sun Yang របស់ចិន
កីឡាករហែលទឹកដ៏ឆ្នើមរូបនេះបានឈ្នះមេដាយមាសអូឡាំពិក 3គ្រឿងលើវិញ្ញាសាហែលសេរី(Free style) និងក្រោយពីចាញ់ក្នុងការប្រកួតហែលចម្ងាយ 400ម៉ែត្រនៅទីក្រុង Rio កាលពី 2ឆ្នាំមុននោះ រូបគេដណ្តើមបានជ័យជម្នះក្នុងការប្រកួតហែលសេរីចម្ងាយ 200ម៉ែត្រ។

កីឡាករជប៉ុន Kosuke Hagino

កីឡាករដ៏ឆ្នើមរូបនេះ បានទទួលជ័យជម្នះក្នុងការប្រកួតហែលចម្រុះក្បាច់ឯកត្តជនចម្ងាយ 400ម៉ែត្រ និងបានឈ្នះមេដាយប្រាក់ ដោយបញ្ចប់ក្នុងចំណាត់ថ្នាក់លេខ2 បន្ទាប់ពីតារាឆ្នើមអាមេរិក Michael Phelps លើវិញ្ញាសាហែលចម្ងាយ 200ម៉ែត្រ។

កីឡាការិនីជប៉ុន Rikako Ikee

ជាមួយនឹងទឹកមុខប្រកបដោយស្នាមញញឹម Ikee គឺជាតារាឆ្នើមថ្មី 1រូបសម្រាប់ប្រទេសរបស់នាង។ កីឡាការិនីវ័យ 18ឆ្នាំរូបនេះបានឈ្នះមេដាយមាសក្នុងព្រឹត្តិការណ៍ Pan Pacific លើវិញ្ញាសាហែលបែបមេអំបៅចម្ងាយ 100ម៉ែត្រ ហើយនាងក៏បានឈ្នះមេដាយប្រាក់ក្នុងការប្រកួតហែលបែបសេរី ចម្ងាយ 200ម៉ែត្រផងដែរ។

កីឡាករសិង្ហបុរី Joseph Schooling

ក្រោយពីបានបង្កើតភាពអស្ចារ្យតាមរយៈការឈ្នះមេដាយមាសក្នុងវិញ្ញាសាហែលបែបមេអំបៅ ចម្ងាយ100ម៉ែត្រ ក្នុងព្រឹត្តិការណ៍ Asian Games កាលពីឆ្នាំ2014 រួចមក Schooling បានយកឈ្នះកីឡាករ Phelps ក្នុងព្រឹត្តិការណ៍អូឡាំពិកក្នុងទីក្រុង Rio លើវិញ្ញាសាដូចគ្នានេះ។

កីឡាករកាហ្សាក់ស្ថាន Dmitriy Balandin

ក្រោយពីទទួលបានជ័យជម្នះក្នុងការប្រកួតហែលទឹកបែបកង្កែបក្នុងព្រឹត្តិការណ៍ Asian Games ឆ្នាំ2014 កីឡាករ Balandin បានក្លាយម្ចាស់ជើងឯកអូឡាំពិកលើកីឡាហែលទឹកដំបូងគេរបស់កាហ្សាក់ស្ថាន នៅពេលរូបគេបានឈ្នះមេដាយមាសក្នុងវិញ្ញាសាហែលចម្ងាយ 200ម៉ែត្រ កាលពី 2ឆ្នាំមុន៕

ប្រភពពី៖ Channel News Asia

August 17, 2018

លោក Pochettino សន្យាតបស្នងអ្នកគាំទ្ររបស់ Tottenham ជាមួយជ័យជម្នះ

លោក Mauricio Pochettino ជឿជាក់ថា ការដណ្តើមបានជ័យជម្នះ គឺជាវិធីសាស្ត្រតែមួយគត់ក្នុងការរក្សា និងធ្វើឱ្យអ្នកគាំទ្ររបស់ក្រុម Spurs មានភាពរីករាយ ស្របពេលដែលពួកគេកំពុងតែរង់ចាំការប្តូរទៅកាន់កីឡដ្ឋានថ្មីរបស់ពួកគេ។

ក្រុម Tottenham បានប្រឈមមុខនឹងសុបិនអាក្រក់ផ្នែកប្រតិបត្តិការ ក្រោយពីការពន្យារពេលការផ្លាស់ប្តូររបស់ពួកគេទៅកាន់កីឡដ្ឋានទើបកែសម្រួលថ្មីដែលអាចផ្ទុកអ្នកទស្សនាបានដល់ទៅ 62,000នាក់ ដែលយ៉ាងហោចណាស់ក៏ដល់ខែតុលាដែរ «ដោយសារតែបញ្ហាប្រព័ន្ធសុវត្ថិភាព»។

ក្រុមរបស់លោក Pochettino ត្រូវបានគ្រោងឱ្យប៉ះជាមួយនឹងក្រុមFulham នាកីឡដ្ឋាន Wembley នៅថ្ងៃសៅរ៍នេះ ប៉ុន្តែបច្ចុប្បន្ន ពួកគេនឹងត្រូវធ្វើជាម្ចាស់ផ្ទះទទួលក្រុម Liverpool និង Cardiff នៅកីឡដ្ឋានរបស់ក្រុមជម្រើសជាតិ ដែលជាកន្លែងពួកគេបានលេងរាល់ការប្រកួតលើទឹកដីខ្លួនឯងកាលពីរដូវកាលមុនផងដែរ។

លោក Pochettino បានឱ្យដឹងថា៖ «យើងទាំងអស់គ្នា មានអារម្មណ៍ខកចិត្តជាមួយនឹងការប្រកាសពីសំណាក់ក្លិបនៅសប្តាហ៍នេះ»។ គ្រូបង្វឹករូបនេះបានបន្ថែមទៀតថា៖ «ខ្ញុំពិតជាមានអារម្មណ៍សោកស្តាយសម្រាប់ខ្លួនខ្ញុំផ្ទាល់ អ្នកគាំទ្ររបស់យើង កីឡាករគ្រប់គ្នា និងសម្រាប់ប្រធានក្លិប។ យើងនឹងព្យាយាមតបស្នងវិញតាមរយៈការដណ្តើមជ័យជម្នះក្នុងការប្រកួតនានាឱ្យបាន»។

លោក Daniel Levy ប្រធានក្លិប Spurs បានស្ថិតក្រោមការរិះគន់រួចជាស្រេចពីសំណាក់ក្រុមអ្នកគាំទ្រ ចំពោះការមិនអាចទិញចូលកីឡាករថ្មីសូម្បីតែម្នាក់ បើទោះបីជាបង្កើនតម្លៃសំបុត្រប្រចាំរដូវកាលក៏ដោយ។ ការប្រកួតនៅថ្ងៃសៅរ៍នេះ នឹងចាប់ផ្តើមនៅម៉ោង9យប់៕

ប្រភពពី៖ Sports.yahoo.com

August 17, 2018

ការអប់រំបុត្រធីតា ត្រូវធ្វើឡើងឱ្យដូចភ្លៀងរលឹម

ការអប់រំ គឺជាឆ្អឹងខ្នងនៃការអភិវឌ្ឍលើគ្រប់វិស័យ។ យើងជឿជាក់ថា ប្រសិនបើយើងចង់ឃើញការប្រែប្រួលជាវិជ្ជមានជាច្រើននៅក្នុងពិភពលោក និងនាពេលអនាគតនោះ យើងពិតជាត្រូវការផ្តល់ការអប់រំមួយប្រកបដោយគុណភាពដល់កុមារនៅថ្ងៃនេះ។

បរិបទនៃពិភពលោក និងសង្គមជាតិមានការវិវឌ្ឍយ៉ាងខ្លាំងនាពេលបច្ចុប្បន្ននេះ។ កត្តាទាំងនេះតម្រូវឱ្យប្រព័ន្ធអប់រំយើងត្រូវយកចិត្តទុកដាក់តាមដាន និងរៀបចំកែលម្អកម្មវិធីសិក្សា និងសេវាកម្មអប់រំរបស់យើងឱ្យកាន់តែល្អប្រសើរ ដើម្បីធានាឱ្យបានថា “សិស្សគ្រប់រូបមានគុណវុឌ្ឍិគ្រប់គ្រាន់សម្រាប់កសាងអនាគតដ៏ត្រចះត្រចង់។

ដើម្បីសម្រេចគោលដៅនេះបាន សាលារៀនវ៉េស្ទឡាញន៍ និងសាលារៀនណត្សឡាញន៍នឹងអនុវត្តកម្មវិធីសិក្សាគោល កម្មវិធីសិក្សាអម និងកម្មវិធីសិក្សាបន្ថែមឱ្យកាន់តែប្រសើរឡើងលើគ្រប់ចំណុច ជាពិសេសចំណេះដឹង និងជំនាញសម្រាប់សតវត្សរ៍ទី21 (21st Century Skills) ជំនាញទំនាក់ទំនង ជំនាញធ្វើការជាក្រុម គំនិតច្នៃប្រឌិត និងការគិតវិភាគបែបស៊ីជម្រៅ(4 Cs: Communication, Collaboration, Creativity and Critical Thinking) ភាសាចិន ចំណេះដឹងផ្នែកហិរញ្ញវត្ថុ ទម្លាប់ល្អទាំង7 សម្រាប់យុវជន និងសហគ្រិនភាព ដែលជាបំណិនជីវិតចាំបាច់សម្រាប់ភាពជោគជ័យក្នុងការងារ អាជីវកម្ម និងការរស់នៅនាពេលអនាគត។

ទន្ទឹមនឹងនេះដែរ ចំណេះដឹង និងជំនាញទាក់ទងនឹងវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា និងសិល្បៈ (STEM & Arts) ក៏ជាអាទិភាពមួយថ្មីទៀតរបស់សាលារៀនយើងខ្ញុំ ដែលពិចារណាក្នុងឆ្នាំសិក្សាថ្មីនេះផងដែរ។

ក្រៅពីការផ្តល់ចំណេះដឹង និងជំនាញនៃការអប់រំដល់សិស្សានុសិស្សហើយ សាលារៀនយើងខ្ញុំក៏បានបង្កើតនូវកម្មវិធីប្រឹក្សាយោបល់ផ្នែកអប់រំ និងចិត្តសាស្ត្រ និងអាជីពការងារដល់ប្អូនៗសិស្សានុសិស្ស និងមាតាបិតាដើម្បីជួយបំពេញបន្ថែមពីលើកម្មវិធីដែលយើងកំពុងដាក់ឱ្យអនុវត្តនៅតាមសាលារៀននីមួយ។

ការជំរុញឱ្យមានការផ្លាស់ប្តូរបទពិសោធដល់សិស្សានុសិស្ស តាមរយៈការបោះជំរំនៅតាមបណ្តាប្រទេសនានានៃសហគមន៍អាស៊ាន និងប្រទេសដទៃទៀត ព្រមទាំងការស្វែងរកសាលារៀនជាដៃគូក្នុងស្រុក និងនៅបរទេសដើម្បីផ្តល់អាហារូបករណ៍ដល់សិស្សានុសិស្សនៃសាលារៀនវ៉េស្ទឡាញន៍ និងសាលារៀនណត្សឡាញន៍គ្រប់សាខា។

បវេសនកាលថ្មី ឆ្នាំសិក្សា2018-2019 នឹងចូលមកដល់ក្នុងរយៈពេលដ៏ខ្លីខាងមុខនេះ។ ក្នុងនាមក្រុមប្រឹក្សាភិបាលគណៈគ្រប់គ្រង បុគ្គលិក និងគ្រូបង្រៀនទាំងអស់សូមថ្លែងអំណរគុណយ៉ាងជ្រាលជ្រៅចំពោះមាតាបិតា អ្នកអាណាព្យាបាលសិស្ស និងសិស្សានុសិស្សដែលបានគាំទ្រកន្លងមកលើសេវាកម្មអប់រំរបស់សាលារៀនយើងខ្ញុំ។

បវេសនកាលថ្មី ឆ្នាំសិក្សា2018-2019 នឹងចូលរៀនថ្ងៃទី3 ខែកញ្ញា ឆ្នាំ2018 “ចុះឈ្មោះបុត្រធីតានៅថ្ងៃនេះ ដើម្បីទទួលបានការសិក្សាទាំងគ្រួសារ” និងសម្រាប់ព័ត៌មានលម្អិតសូមទំនាក់ទំនងយើងខ្ញុំតាមរយៈទូរស័ព្ទលេខ 092 888 499 ៕

August 16, 2018

Atletico វាយបកដើម្បីផ្តួលក្រុម Real Madrid ក្នុង UEFA Super Cup

ខ្សែប្រយុទ្ធ Diego Costa បានស៊ុតបាល់បញ្ចូលទី 2គ្រាប់ ខណៈដែលក្រុម Atletico Madrid បានធ្វើការវាយបកពីការដេញតាមពីក្រោយ ដើម្បីផ្តួលក្រុមស្ថិតក្នុងទីក្រុងតែមួយ Real Madrid ក្នុងលទ្ធផល 4-2 កាលពីថ្ងៃពុធ និងឈ្នះពាន UEFA Super Cup។

អតីតខ្សែប្រយុទ្ធរបស់ក្លិប Chelsea រូបនេះ បានជួយឱ្យក្រុមរបស់លោក Diego Simeone មានគ្រាប់បាល់នាំមុខមុន ក្រោយពីលេងបានត្រឹមតែរយៈពេល 49វិនាទី ខណៈដែលរូបគេបានស៊ុតបាល់បំប៉ោងសំណាញ់ទីរបស់អ្នកចាំទី KeylorNavas យ៉ាងល្អ។ ខ្សែប្រយុទ្ធ Karim Benzema បានរកគ្រាប់បាល់តាមស្មើវិញសម្រាប់ក្រុម Real Madrid ខណៈដែលរូបគេបានលេងស៊ីចង្វាក់គ្នាយ៉ាងល្អជាមួយនឹង Gareth Bale ក្នុងពេលមិនមានវត្តមានរបស់ Cristiano Ronaldo ដើម្បីស៊ុតបាល់បញ្ចូលទី។

ខ្សែការពារ Sergio Ramos ហាក់ដូចជាបានជួយឱ្យក្រុមម្ចាស់ឯក Champions League របស់ខ្លួនដណ្តើមបានជ័យជម្នះទៅហើយ នៅពេលដែលរូបគេបានស៊ុតបាល់បញ្ចូលទីពីចំណុចពិន័យ 11ម៉ែត្រ ក្នុងតង់ទី2 ប៉ុន្តែ Costa បានលុបចោលក្តីសង្ឃឹមនោះ និងបានរកគ្រាប់បាល់តាមស្មើវិញក្នុងរយៈពេល 10នាទីចុងក្រោយ។ គ្រាប់បាល់តាមស្មើរបស់គេបានធ្វើឱ្យការប្រកួតឈានដល់នាទីបន្ថែម 15នាទី 2ដង ហើយខ្សែបម្រើ Saul Niquez និង Koke បានរកគ្រាប់បាល់ទី3 និងទី4 ដើម្បីជួយឱ្យក្រុម Atletico ដណ្តើមបានជ័យជម្នះតែម្តង។

នេះគឺជាការឈ្នះពាន UEFA Super Cup ជាលើកទី3 ហើយសម្រាប់ក្រុម Atletico និងជាលើកទី3 ក្នុងរយៈពេល 9រដូវកាល។ ខ្សែប្រយុទ្ធ Antoine Griezmann របស់ Atletico បានឱ្យដឹងថា៖ «ខ្ញុំបានបន្តនៅ Atletico ពីព្រោះគម្រោងនេះពិតជាគម្រោងដ៏ល្អ។ ខ្ញុំមានការជឿជាក់លើក្លិបនេះ និងលើគ្រូបង្វឹក ហើយខ្ញុំបានមើលឃើញនៅរាត្រីនេះថា ខ្ញុំពិតជាគិតមិនខុសឡើយ»៕

ប្រភពពី៖ The Mirror

August 16, 2018

គប់ភ្លើង Asian Games ឆ្នាំ2018 ទៅដល់ទីក្រុងហ្សាការតាហើយ

គប់ភ្លើង Asian Games លើកទី18 បានទៅដល់រដ្ឋធានីហ្សាការតា របស់ប្រទេសឥណ្ឌូនេស៊ីហើយ កាលពីថ្ងៃពុធ ដើម្បីបញ្ចប់ការធ្វើដំណើររយៈពេល 1ខែពេញ ទូទាំងប្រទេសប្រជុំកោះដ៏ច្រើននៅតំបន់អាស៊ីអាគ្នេយ៍មួយនេះ។

គប់ភ្លើងមួយនេះ ត្រូវបានស្វាគមន៍យ៉ាងកក់ក្តៅដោយក្រុមតន្ត្រី ក្រុមអ្នករាំក្បាច់ប្រពៃណី និងក្រុមប្រគំតន្ត្រីនានា ក្រោយពីការចាប់ផ្តើមដំណើរនាំយកគប់ភ្លើងមួយនៅតំបន់មជ្ឈមណ្ឌលវប្បធម៌ Yogyakarta ក្នុងប្រទេសម្ចាស់ផ្ទះមួយនេះ កាលពីថ្ងៃទី17 ខែកក្កដា។

គប់ភ្លើងមួយនេះត្រូវបានដុតនៅរដ្ឋធានី New Delhi របស់ប្រទេសឥណ្ឌា ដែលបានធ្វើជាម្ចាស់ផ្ទះនៃព្រឹត្តិការណ៍ Asian Games ដំបូងគេ កាលពីឆ្នាំ1951។ គណៈកម្មការរៀបចំការប្រកួតសង្ឃឹមថា ការរត់បណ្តាក់គ្នាយកគប់ភ្លើងមួយនេះនឹងទាក់ទាញអ្នកទស្សនាយ៉ាងហោចណាស់ 1លាននាក់ទូទាំងរដ្ឋធានីឥណ្ឌូនេស៊ីនេះ។

អ្នកនាំយកគប់ភ្លើង 10,000នាក់ ក្នុងនោះរាប់បញ្ចូលទាំងអតីតតារាវាយសីដ៏ឆ្នើមរបស់ឥណ្ឌូនេស៊ី Rudy Hartono, IcukSugiartoនិង Ricky Subagja ផងដែរនោះ នឹងចូលរួមក្នុងការរត់បណ្តាក់គ្នានេះ។ គប់ភ្លើងមួយនេះនឹងត្រូវទៅដល់កីឡដ្ឋាន Gelora Bung Karno នៅថ្ងៃសៅរ៍នេះ សម្រាប់កម្មវិធីបើកការប្រកួតនៃព្រឹត្តិការណ៍ Asian Games ដើម្បីបញ្ចប់ការធ្វើដំណើរចម្ងាយ 18,000គីឡូម៉ែត្រទូទាំងទីក្រុងចំនួន 54។

ឥណ្ឌូនេស៊ី នឹងទទួលអត្តពលិកប្រមាណជា 11,000នាក់ និងមន្ត្រីកីឡា 5,000នាក់មកពីប្រទេសក្នុងអាស៊ីទាំង45 សម្រាប់ព្រឹត្តិការណ៍ដែលនឹងចាប់ផ្តើមពីថ្ងៃទី18 ខែសីហា ដល់ទី2 ខែកញ្ញា៕

ប្រភពពី៖ Channel News Asia

August 16, 2018

កម្ពុជាសម្រេចបានជាង 6ប៊ីលានដុល្លារ ពីការនាំចេញក្រោមប្រព័ន្ធអនុគ្រោះពន្ធ

ការនាំចេញក្រោមប្រព័ន្ធអនុគ្រោះពន្ធរបស់កម្ពុជានៅឆមាសទី1 ដើមឆ្នាំ2018នេះ បានសម្រេចប្រមាណជា 6,229លានដុល្លារសហរដ្ឋអាមេរិកដែលបានកើនឡើងជាង15% បើធៀបនឹងរយៈពេលដូចគ្នានៅក្នុងឆ្នាំ2017 ដែលមានទឹកប្រាក់ត្រឹមតែ 5,386លានដុល្លារអាមេរិក។

ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្ម បានមានប្រសាសន៍ក្នុងពិធីប្រគល់វិញ្ញាបនបត្របញ្ជាក់ការសិក្សាស្តីពីអ្នកតំណាងស្របច្បាប់ក្នុងការស្នើសុំឯកសារនាំចេញ-នាំចូល(ជំនាន់ទី2 និងទី3) និងបើកវគ្គបណ្តុះបណ្តាលអ្នកតំណាងស្របច្បាប់ក្នុងការស្នើសុំឯកសារនាំចេញ-នាំចូល (ជំនាន់ទី4)ថា សហភាពអឺរ៉ុប អាមេរិក កាណាដា ជប៉ុន ចិន និងអាស៊ាន គឺជាទីផ្សារដែលស្រូបយកផលិតផលកម្ពុជាបានច្រើនជាងគេ ដោយផលិតផលទាំងនោះមានដូចជាសម្លៀកបំពាក់ ស្បែកជើង កាបូប ជ័រកៅស៊ូ អង្ករ ដំឡូងមី និងផលិតផលកសិកម្មផ្សេងៗទៀត។

គួររំឭកដែរថា ដើម្បីជួយពង្រឹង និងបង្កើនប្រសិទ្ធភាពនៃការអនុវត្តច្បាប់ និងនីតិវិធីពាក់ព័ន្ធនឹងការស្នើសុំវិញ្ញាបនបត្របញ្ជាក់ប្រភពដើមទំនិញ (CO) ក៏ដូចជាការផ្តល់ឯកសារនាំចេញ-នាំចូលឱ្យកាន់តែមានប្រសិទ្ធភាព ក្រសួងពាណិជ្ជកម្មតាមរយៈវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ (TTRI) បានសហការជាមួយនាយកដ្ឋាននាំចេញ-នាំចូលបានរៀបចំវគ្គបណ្តុះបណ្តាលស្តីពី «អ្នកតំណាងស្របច្បាប់ក្នុងការស្នើសុំឯកសារនាំចេញ-នាំចូល» ចំនួន 3វគ្គរួចមកហើយ ដោយមានសិក្ខាកាមចូលរួមសរុប 180នាក់។

តាមរយៈវគ្គបណ្តុះបណ្តាលទាំងនេះ បានធ្វើឱ្យទំហំពាណិជ្ជកម្មរបស់កម្ពុជាមានវឌ្ឍនភាពល្អប្រសើរ។ ជាក់ស្តែងទឹកប្រាក់នាំចេញរបស់កម្ពុជានៅក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេសក្នុងឆ្នាំ2017 មានតម្លៃសរុប 11,153លានដុល្លារអាមេរិក គឺបានកើនឡើងប្រមាណ18% បើប្រៀបធៀបនឹងឆ្នាំ2016 ដែលមានទឹកប្រាក់ត្រឹមតែ 9,421លានដុល្លារអាមេរិកនោះ៕

August 15, 2018

អាកាសយានដ្ឋានអន្តរជាតិភ្នំពេញ ដាក់ដំណើរការ System ថ្មីគ្រប់គ្រងការបង់ប្រាក់យានយន្ដ

អាកាសយានដ្ឋានអន្តរជាតិភ្នំពេញនឹងដាក់ឱ្យដំណើរការនូវប្រព័ន្ធប្រភេទថ្មីមួយដើម្បីសម្រួលដល់ការធ្វើចរាចរចេញ-ចូលនៅក្នុងព្រលានយន្តហោះ ជាពិសេសដើម្បីកាត់បន្ថយការកកស្ទះចរាចរណ៍ នៅមុខព្រលានយន្តហោះតែម្តង។ នេះបើតាមប្រសាសន៍លោកស្រី CHLOE LAPEYRE អគ្គនាយិកា ក្រុមហ៊ុន CAMBODIA Airports នៅក្នុងសន្និសីទសារព័ត៌មាននៅថ្ងៃទី14 ខែសីហា ឆ្នាំ2018។

លោកស្រីអគ្គនាយិកា បានឱ្យដឹងថា ការដាក់ឱ្យដំណើរការនូវប្រព័ន្ធប្រភេទថ្មីនេះនឹងផ្តល់ភាពងាយស្រួលក្នុងការធ្វើចរាចរចេញ និងចូលនៅក្នុងព្រលានយន្តហោះបានរហូតដល់ទៅ 3ដង នេះគឺចង់សំដៅទៅដល់រថយន្តដែលបានចរាចរនៅក្នុងព្រលានយន្តហោះអាចចេញ-ចូលបានឆាប់រហ័សជាងមុន និងដើម្បីកាត់បន្ថយការកកស្ទះចរាចរណ៍ ជាពិសេស System ថ្មីនេះ មានប្រព័ន្ធសុវត្ថិភាពខ្ពស់លើការគ្រប់គ្រងថវិកា ដោយតម្រូវឱ្យអ្នកចេញ-ចូលត្រូវបង់ថវិកាតាមរយៈម៉ាស៊ីនប្រភេទថ្មីនេះវិញ។

លោកស្រីថ្លែងថា Systemប្រភេទថ្មីមានភាពបត់បែនឆាប់រហ័សទៅតាមចំនួនមនុស្ស និងយានយន្តជាក់ស្តែងដែលកំពុងតែធ្វើចរាចរណ៍នៅក្នុងព្រលានយន្តហោះនេះផ្ទាល់។ ទាំងនេះជាកត្តាមួយដែលធ្វើឱ្យការគ្រប់គ្រងលើដំណើរការចរាចរណ៍មានភាពប្រសើរឡើង និងមានសុវត្ថិភាពខ្ពស់ផងដែរ។

នៅថ្ងៃទី16 ខែសីហា ឆ្នាំ2018 ស្អែកនេះ អាកាសយានដ្ឋានអន្តរជាតិភ្នំពេញ នឹងបើកឱ្យដំណើរការចំណតម៉ូតូសាធារណៈ និងចំណតតាក់ស៊ី។ ក្រុមហ៊ុននឹងចាប់ផ្តើមដាក់ឱ្យដំណើរការកាតពណ៌ស្វាយដែលមានសារៈសំខាន់ចំនួន 3សំខាន់ៗដែលនឹងធ្វើឱ្យរថយន្តអាចចេញ-ចូលបានលឿនដើម្បីដាក់ភ្ញៀវចុះ និងអត្ថប្រយោជន៍ជាច្រើនទៀត ដោយមិនតម្រូវឱ្យអ្នកដែលមានកាតប្រភេទនេះចុះទៅបង់ប្រាក់ឡើយ ប៉ុន្តែSystem ប្រភេទថ្មីនេះនឹងបើកច្រកទាំងចេញ-ទាំងចូលដោយស្វ័យប្រវត្តិតែម្តង។

លោកស្រីអគ្គនាយិកាក្រុមហ៊ុនបានបញ្ជាក់ថា ការចូលចតនៅអាកាសយានដ្ឋានអន្តរជាតិភ្នំពេញ តម្លៃម៉ូតូ និងម៉ូតូកង់បីគឺ 2,000រៀល បង់នៅបញ្ជរបង់ប្រាក់របៀបទំនើបគ្មានបុគ្គលិករង់ចាំទទួលទេ គឺបង់លុយក្នុងម៉ាស៊ីនស្វ័យប្រវត្តិ។ រីឯរថយន្តធុនតូចចតក្នុងព្រលានយន្តហោះក្នុងរយៈពេល15នាទី តម្លៃ 4,000រៀល ចតលើសពី 15នាទីឡើងទៅ ត្រូវគិតបន្ថែមទៀត ហើយ System ថ្មីនេះគឺមិនទាន់មានប្រើប្រាស់នៅព្រលានយន្តហោះខេត្តសៀមរាបទេ មានតែក្នុងព្រលានយន្តហោះអន្តរជាតិ ភ្នំពេញប៉ុណ្ណោះ។

លោកស្រីបានបញ្ជាក់ទៀតថា ក្នុង 1ថ្ងៃមានរថយន្តចំនួន 3,000គ្រឿង បានចូលមកក្នុងអាកាសយានដ្ឋាន ព្រមទាំងមានចំណតរថយន្តចំនួន 450ចំណត។ បច្ចុប្បន្នខាងក្រុមហ៊ុនបានដាក់ឱ្យដំណើរការ Systemប្រភេទថ្មីនេះតែនៅក្នុងព្រលានយន្តហោះអន្តរជាតិភ្នំពេញ តែមួយប៉ុណ្ណោះ ដោយសារតែនៅរាជធានីភ្នំពេញ ភាគច្រើននៃចំនួនអ្នកចេញ-ចូលក្នុងព្រលានយន្តហោះ ពួកគាត់ប្រើប្រាស់រថយន្តផ្ទាល់ខ្លួន។ រីឯនៅខេត្តសៀមរាប អ្នកចេញ-ចូលភាគច្រើនជាភ្ញៀវទេសចរអន្តរជាតិ ដូច្នេះគឺពួកគាត់ប្រើប្រាស់ការដឹកជញ្ជូនសាធារណៈដូចជា តាក់ស៊ី និងមធ្យោបាយផ្សេងៗទៀត៕

August 15, 2018

Author: វល័ក្ខ