វល័ក្ខ - La Reine Media

ផ្អែកលើមូលដ្ឋានសំខាន់ចំនួន4 ធ្វើឱ្យសេដ្ឋកិច្ចកម្ពុជាមានកំណើនខ្ពស់

មូលដ្ឋានសំខាន់ៗចំនួន4 បាននាំឱ្យស្ថានភាពសេដ្ឋកិច្ចនៃប្រទេសកម្ពុជាសម្រេចបាននូវស្ថិរភាពម៉ាក្រូសេដ្ឋកិច្ចយ៉ាងរឹងមាំក្នុងរយៈពេលជាងពីរទសវត្សរ៍ចុងក្រោយនេះ។ នេះបើតាមការលើកឡើងរបស់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងជំនួបជាមួយគណៈប្រតិភូធនាគារអភិវឌ្ឍន៍អាស៊ី (ADB) ដឹកនាំដោយលោក ម៉ាបុប អាមេដ (Mr. Mahbub Ahmed)។

ក្នុងជំនួបជាមួយនាយកប្រតិបត្តិជំនួសប្រចាំធនាគារអភិវឌ្ឍន៍អាស៊ី (ADB Alternate Executive Director) ដែលបានមកបំពេញទស្សនកិច្ចនៅកម្ពុជានាថ្ងៃទី13 ខែកញ្ញា ឆ្នាំ2018 ឯកឧត្ដមអគ្គបណ្ឌិតសភាចារ្យ បានលើកឡើងថា កម្ពុជាសម្រេចបានស្ថិរភាពម៉ាក្រូសេដ្ឋកិច្ច និងកំណើនសេដ្ឋកិច្ចខ្ពស់ជាមធ្យមក្នុងកម្រិត 7.7% ក្នុងមួយឆ្នាំ ហើយសេដ្ឋកិច្ចកម្ពុជាត្រូវបានរំពឹងថា នឹងបន្តកំណើនរឹងមាំក្នុងរង្វង់អត្រា7,2 ក្នុងឆ្នាំ2018នេះ ។

ឯកឧត្ដមអគ្គបណ្ឌិតបានបន្តថា កត្តានេះហើយដែលធ្វើឱ្យផលិតផលក្នុងស្រុកសរុបសម្រាប់ប្រជាជនម្នាក់ៗកើនឡើងជាង 7ដង ប្រមាណជាង 200ដុល្លារអាមេរិកក្នុងឆ្នាំ1992 មកប្រមាណជិត1,500ដុល្លារអាមេរិកនៅឆ្នាំ2018នេះ ចំណែកឯអត្រានៃភាពក្រីក្របានធ្លាក់ចុះពីប្រមាណ50% ក្នុងឆ្នាំ1992 មកនៅត្រឹមរង្វង់13.5% ក្នុងឆ្នាំ2014 ទោះបីត្រូវជួបប្រទះបញ្ហាប្រឈម និងហានិភ័យពីខាងក្រៅមួយចំនួនក៏ដោយ។

ឯកឧត្ដមអគ្គបណ្ឌិតសភាចារ្យក៏បានបញ្ជាក់ដែរថា មូលដ្ឋានសំខាន់មួយចំនួន4 ដែលនាំឱ្យស្ថានភាពសេដ្ឋកិច្ចនៃប្រទេសកម្ពុជាសម្រេចបាននូវស្ថិរភាពម៉ាក្រូសេដ្ឋកិច្ចយ៉ាងរឹងមាំនោះគឺ ៖

1- ការធានាបាននូវសុខសន្តិភាព ស្ថិរភាពនយោបាយ និងការបង្កើតបរិយាកាសអំណោចផល សម្រាប់ការអភិវឌ្ឍ។

2- គោលនយោបាយ និងកម្មវិធីអភិវឌ្ឍច្បាស់លាស់ ប្រកបដោយសង្គតិភាព និងការដាក់ចេញនូវវិធានការកែទម្រង់មុតស្រួច ព្រមទាំងការពង្រឹង និងលើកកម្ពស់សមត្ថភាពស្ថាប័នសាធារណៈ។

3- ការអភិវឌ្ឍប្រកបដោយចីរភាព ដែលផ្តោតលើការអភិវឌ្ឍធនធានមនុស្ស និងការគាំពារសង្គម។

4- ការធ្វើពិពិធកម្មសេដ្ឋកិច្ច តាមរយៈការពង្រឹងហេដ្ឋារចនាសម្ព័ន្ធ រូបវន្តទាំងទីក្រុង និងជនបទ។

លោក ម៉ាបុប អាមេដ បានបញ្ជាក់តបថា កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា បានបង្ហាញនូវជោគជ័យដ៏ធំធេងរបស់កម្ពុជាក្នុងការបន្តរក្សា និងជំរុញកំណើនសេដ្ឋកិច្ចប្រកបដោយចីរភាព រក្សាបាននូវសមធម៌សង្គមល្អប្រសើរ និងកាត់បន្ថយភាពក្រីក្រ និងជាពិសេស គឺរាជរដ្ឋាភិបាលកម្ពុជា មានគោលនយោបាយត្រឹមត្រូវ ច្បាស់លាស់ ក្នុងការអភិវឌ្ឍប្រទេសជាតិ៕

September 17, 2018

លេងសើចម៉េចបាន រំភើបរីកថ្លើម ទស្សនាកំពូល idol ច្រៀងនិងសម្តែងផ្ទាល់3ម៉ោង ណែនពេញស្ទូឌីយ៉ោ កក្រើកអីអន 2

កាលពីយប់ថ្ងៃសៅរ៍ 15 ខែកញ្ញា នៅស្ទូឌីយោហង្សមាសផ្សារទំនើបអីអនសែនសុខស៊ីធី ហ៊ួរវ័យ ដែលជាក្រុមហ៊ុនស្មាតហ្វូនឈានមុខលំដាប់អន្តរជាតិ ដែលកំពុងឡើងកូដដែលទទួលបានចំណាត់ថ្នាក់លេខ 2 ទាំងបរិមាណលក់ និងចំណែកទីផ្សារ លើពិភពលោក និងនៅកម្ពុជា វ៉ាដាច់ Apple ជាពិសេសសម្រេចបាននូវតួរលេខលក់ 100 លានគ្រឿង ក្នុងឆមាសទី1 ឆ្នាំ 2018 នេះ សហការណ៍ជាមួយស្ថានីយទូរទស្សន៍ហង្សមាស បានរៀបចំកំពូលព្រឹត្តិការណ៍ប្រគំតន្ត្រីដ៏កក្រើកគឺ Huawei Nova3i Star Concert ដែលចូលរួមសុទ្ធសឹងកំពូលតារាជួរមុខរបស់កម្ពុជា ជាពិសេសទាំងតារាកិត្តិយសនិងអ្នកគាំទ្រអតិថិជនដែលប្រើ ម្ចាស់ហាងលក់ទូរស័ព្ទមួយចំនួនធំ ជើងខ្លាំងខាងហេ្គម សេ្តចហ្គេមដែលល្បី អ្នកសារព័ត៌មាន តារាសំដែង តារាបង្ហាញម៉ូត គណៈគ្រប់គ្រងខាងហង្សមាស និងអីអន 2 យ៉ាងណែនក្កន់ពេញហៀរស្ទូឌីយោរហូតដល់បន្ថែមកៅអីប្រមាណជាង 3000នាក់។

ដោយក្ដីរំភើបកំពូលតារាចម្រៀង ខេមរៈ សិរីមន្ត បានលើកឡើងថា “អរគុណដល់ Huawei សម្រាប់ការរៀបចំព្រឹត្តិការណ៍ដ៏អស្ចារ្យនេះឡើង ដែលធ្វើឲ្យលោកនិងអ្នកគាំទ្របានសប្បាយរីករាយជាពិសេស ដោយបានសសើរថា ជាជម្រើសឆើតឆាយ ឡូយម្ម៉ងដឹងតែឡូយម្ម៉ងជាមួយ Huawei Nova3/Nova3i “។

ចំណែកលោក នីកូ បានលើកឡើងថា “លោកមានក្ដីរំភើបជាខ្លាំងសម្រាប់កម្មវិធីប្រគំតន្ត្រីនេះ ហើយអ្វីដែលសំខាន់គឺលោកចាប់អារម្មណ៍ជាមួយ Nova3i ព៌ណខៀវបែកស្វាយជាខ្លាំង ថតរូបម៉ាឡូយ សែលហ្វីម៉ាកប់ រូមទាំងថត 3D Qmoji ឆ្លើយឆ្លងភ្លាមៗ ធ្វើអោយអ្នកចូលរួមភ្ញាក់ផ្អើលនឹកស្មានមិនដល់ លេងហ្គេមម៉ាអេម អេក្រង់ធំកប់គែម ថតរូបម៉ាឡូយ សែលហ្វីម៉ាកប់! ចង់ស្ទាវ ស្ទាវបាន ចង់ឡូយ ឡូយបានចង់ទាន់សម័យ ចង់សីវិល័យទាល់តែសាកជាមួយ Huawei Nova 3 និង Nova 3i “។

លោកឆន សុវណ្ណរាជ “បង្ហើបអារម្មណ៌លើឆាកយ៉ាងសប្បាយៗ បពោ្ចញស្ទីលឆើតឆាយ ជាមួយរូបថតស្វីតៗជាមួយវីឌីណែតមើលទៅឡួយកប់ជាមួយស្ទីលថ្មីៗនិងថតជាមួយបច្ចេកវិទ្យាថ្មី 3D Qmoji ឆ្លើយឆ្លងជាមួយអ្នកចូលរួមផ្ទាល់យ៉ាងរំភើបប្លែក។ រីករាយ ខប់ៗ និងកំសាន្តគ្មានដែនកំណត់កប់ហួសនិស្ស័យ លឿនហួសស្មាន!!ស្ទាវខប់ៗ ឡូយម្ម៉ង”

លោក ហេនរី សាវ (Henry Xiao) អគ្គនាយកគ្រប់គ្រងថ្មីនៃសាជីវកម្មផ្នែកទូរសព្ទ័ នៅកម្ពុជាបានថ្លែងថា “ ខ្ញុំមានមោទភាពខ្លាំងណាស់ ក្នុងការចែករំលែកនូវផលិតផលដ៌មហស្ចារ្យថ្មីពីរស៊េរី និងសមិទ្ធិផលសំខាន់ៗនៅលើពិភពលោក និងនៅកម្ពុជាផ្ទាល់យប់នេះជាមួយនឹងកំពូលព្រឹត្តិការណ៍ប្រគំតន្ត្រីដ៏កក្រើកគឺ Huawei Nova3i Star Concertដែលជាការបំពេញនូវ តម្រូវការនិងការពេញចិត្តរបស់យុវវ័យនិងមនុស្សឆើតឆាយទាន់សម័យ រីករាយនឹងលក្ខណះពិសេស អត្ថប្រយោជន៌សំខាន់ថ្មីៗផលិតផលដ៌មហស្ចារ្យថ្មីពីរស៊េរី Huawei NOVA 3 / NOVA 3i ជាពិសេស AI ស្មាតកាមេរ៉ា 4 គ្រាប់ដំបូងបំផុតភ្លោះមុខ ភ្លោះក្រោយ ដែលថតបាន 24 មេហ្កាភិចសែល តួរកពា្ចក់រចនាល្អឥតខ្ចោះ រលើបរលោងចែងចាំងដូចគ្រាបើពេជ្រ ជាមួយនឹង ROM ទំហំ128G។

លោករំពឹងថានឹងនាំមកនូវអ្វីដែលថ្មីៗ លើសពីភាពច្នៃប្រឌិត លើសពីភាពធម្មតា លើសពីរចនាបទដដែលៗ លើសពីភាពវៃឆ្លាត ជាមួយបច្ចេកវិទ្យាច្នៃប្រឌិតថ្មី ក្រុមហ៊ុនបច្ចេកវិទ្យាឈានមុខនិងស្មាតហ្វូនដែលច្នៃប្រឌិតឈានមុខ ក៌ដូចជាការកំសាន្ត ការប្រគំតន្ត្រីជាខ្នាតជាតិ អន្តរជាតិ រឺនាំតារាល្បីៗពីប្រទេសជិតខាងមកសំដែងរឺកម្មវិធីសម្ពោធស៊េរីថ្មីៗដូចជា CPU Kirin 980, Huawei Mate 20 Series រឺការអបអរពិធីបុណ្យអុំទូក រឺគ្រីស្តមាសបន្ថែមទៀត ” ។

កាដូដ៏រំភើបដែល Huawei បានផ្ដល់ជូនដល់តារាកិត្តិយសនិងអ្នកគាំទ្រមានដូចជា៖ សម្រាប់កំពូលតារាចម្រៀងទាំង5រូបមានដូចជា លោក ខេមរៈ សិរីមន្ត កញ្ញា ទេព បូព្រឹក្ស លោក ឆន សុវណ្ណរាជ លោក នីកូ និង កញ្ញា វី ឌីណែត ទទួលបានកំពូលស្មាតហ្វូន Huawei Nova3i ចំនួនម្នាក់1 គ្រឿង ។ Nova3 Bluetooth Speaker ចំនូន10ត្រូវបានចែកជូនដល់យុវវ័យចូលចិត្តតន្ត្រីបន្ទាប់ពីការឈ្នះក្នុងការលេងហ្គេម ព្រមទាំងអាវយឺតយ៉ាងស្រស់ស្អាតចំនួន 50 អាវ ដែលមានហត្ថលេខាផ្ទាល់ពី idol ផ្ទាល់ក៏ត្រូវបានផ្ដល់ជូនអ្នកគាំទ្រដែរ។

សំឡេងហូរកញ្ច្រៀវយ៉ាងរំភើប រីករាយ រីកថ្លើម អង្គុយមិនហ្នឹង តាមរយះការសំដែងនិងច្រៀងផ្សាយផ្ទាល់រយៈពេល3 ម៉ោងជាមួយអ្នកគាំទ្រណែនណាន់តាន់តាប់ ពេញឈូរឆរចុះឡើងពេញអីអន 2 ជាមួយនឹងតន្ត្រីគ្រប់រសជាតិ គ្រប់ចង្វាក់នៅ Huawei Nova3i Star Concert។ Huawei Nova3i Star Concert នាំមកជូនលោកអ្នកដោយកំពូលស្មាតហ្វូន #Huawei Nova3i #HuaweiNOva3៕

September 17, 2018

កាសែតឡារ៉ែន ពាណិជ្ជ លេខ 143

[easy_media_download url=”https://www.lareine.com.kh/wp-content/uploads/2018/09/LRPN_143-Final-For-Web.pdf” force_dl=”1″]

September 16, 2018

ជប៉ុនបង្កើតសាលាបណ្តុះបណ្តាលជំនាញគ្រប់គ្រងភោជនីយដ្ឋានដំបូងគេនៅកម្ពុជា

ដើម្បីចែករំលែកបទពិសោធ និងចំណេះដឹងផ្នែកការគ្រប់គ្រងអាជីវកម្មម្ហូបអាហារ សាលារៀនពាណិជ្ជសាស្ត្រ MARUGAME នឹងបើកបង្រៀនជំនាញផ្នែកគ្រប់គ្រងភោជនីយដ្ឋានដំបូងគេបង្អស់នៅក្នុងប្រទេសកម្ពុជានៅពេលឆាប់ខាងមុខនេះដោយសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC)។

លោក YOSHITO HIGASHIYAMA អគ្គនាយកក្រុមហ៊ុន TORIDOLLជប៉ុនបានមានប្រសាសន៍នៅក្នុងសន្និសីទព័ត៌មានកាលពីព្រឹកថ្ងៃទី14 ខែកញ្ញានេះថា សាលារៀនពាណិជ្ជសាស្ត្រ MARUGAME ជាសាលាដំបូងគេបង្អស់ក្នុងប្រទេសកម្ពុជាដែលផ្តល់ការសិក្សាផ្ដោតទៅលើជំនាញអាជីវកម្មម្ហូបអាហារ និងមូលដ្ឋានគ្រឹះនៃការគ្រប់គ្រងអាជីវកម្មទៅដល់សាធារណជន ពិសេសសិស្ស និងស្សិតនៅកម្ពុជា។

លោកបានមានប្រសាសន៍ថា នេះជាឱកាសសម្រាប់សាធារណជន និងសិស្ស-និស្សិតនៅកម្ពុជាក្នុងការទទួលបានជំនាញដើម្បីចូលធ្វើការនៅក្រុមហ៊ុន TORIDOLL ប្រចាំនៅកម្ពុជា ឬនៅសាខាក្រៅប្រទេស និងអាចធ្វើការនៅភោជនីយដ្ឋានល្បីៗផ្សេងទៀត ឬគ្រប់គ្រងភោជនីយដ្ឋានខ្លួនឯងក៏បាន។

គួរបញ្ជាក់ថា ក្រុមហ៊ុនជប៉ុន TORIDOLL បានចាប់ផ្តើមអាជីវកម្មរបស់ខ្លួនតាំងពីឆ្នាំ1985មក ហើយមកទល់បច្ចុប្បន្ន ក្រុមហ៊ុនមានសាខារបស់ខ្លួនចំនួនជាង 1000ហាងនៅប្រទេសជប៉ុន និងជាង 500ហាងទៀតនៅជុំវិញពិភពលោក។ ភោជនីយដ្ឋាន MARUGAME ជាភោជនីយដ្ឋានជាប់លំដាប់ថ្នាក់លេខ 1ទូទាំងពិភពលោកផ្នែកមី អ៊ុដុង ដែលមានវត្តមាននៅក្នុងប្រទេសកម្ពុជាតាំងពីឆ្នាំ 2015មក៕

September 15, 2018

មូលនិធិចេនឡាកម្ពុជា សហការជាមួយ ម័រ៉ាកខហ្វើលហ្វាយសង្ហិបុរី ទិញកង់ សម្ភារៈសិក្សា និងសំលៀកបំពាក់ ជូនបងប្អូនខ្មែរតាមបណ្ដាខេត្តមួយចំនួន

កាលពីថ្ងៃ 02 ដល់ថ្ងៃទី06 ខែកញ្ញា ឆ្នាំ2018 មូលនិធិចេនឡាកម្ពុជា (Chenla Foundation Cambodia) និងម័រ៉ាកលហ្វើលហ្វាយ (Miracles Worldwide Singapore) បានប្រមូលថវិកាជាង 25000ដុល្លារអាមេរិក ដើម្បីទិញកង់ចំនួន 500គ្រឿង សម្ភារៈសិក្សា សម្លៀកបំពាក់ និងសម្ភារៈក្មេងលេង ចែកជូនដល់ប្អូនៗសិស្សានុសិស្ស និងប្រជាពលរដ្ឋកម្ពុជាយើង នៅចំនួន 5 កន្លែងរួមមាន អង្គការផ្ទះបាយកុមារ (LRDE) ភ្នំពេញ, វិទ្យាល័យជាស៊ីមប្រលាយ ស្រុកស្ទោង ខេត្តកំពង់ធំ, ក្រុងសែនមនោរម្យ ខេត្តមណ្ឌលគីរី, បឋមសិក្សាគីរីរម្យ ខេត្តកំពង់ស្ពឺ និង ស្រុកកំពង់ត្រាច ខេត្តកំពត។

លោក ង៉ោ ប៉េងទី ដែលជាស្ថាបនិក និងជាប្រធានមូលនិធិចេនឡាបានមានប្រសាសន៍ថា កង់បានចូលរូមចំណែកជួយសម្រួលដល់សិស្សានុសិស្សដែលជួបបញ្ហាគ្មានមធ្យោបាយធ្វើដំណើរទៅសាលារៀន។

លោកបានបន្តទៀតថាមូលនិធិចេនឡា បានបង្កើតឡើងនៅថ្ងៃទី 09 ខែកុម្ភៈ ឆ្នាំ 2016 ដោយផ្តោតទៅលើ3 ផ្នែកសំខាន់ៗគឺ អាហារ ការអប់រំ និង សុខភាព។ បច្ចុប្បន្ននេះ មូលនិធិចេនឡាមានសកម្មភាពចែកអាហារជាប្រចាំ សប្តាហ៍ នៅមុខសាលាអន្តរជាតិខេរីដ រៀងរាល់ថ្ងៃសៅរ៍ ប្រចាំខែចែក កង់3 ទៅ 5 គ្រឿង និងកញ្ចប់ថវិកាប្រមាណ 1000ដុល្លារអាមេរិក ជូនដល់អង្គការផ្ទះបាយកុមារជារៀងរាល់ខែផងដែរ។

ក្រៅពីនេះមូលនិធិចេនឡាបានផ្តល់អង្ករ សម្ភារៈសិក្សា ថ្នាំពេទ្យ វ៉ែនតា ទៅប្រជាពលរដ្ឋ អង្គការ និង សាលានានាផងដែរ។មូលនិធិចេនឡា តែងតែគៀងគង សប្បុរសជន និង អង្គការបរទេស ដើម្បី ចូលរួមចំណែកជួយសង្គមជាតិ៕

September 15, 2018

ក្រសួងអប់រំចេញសារសុំទោស និងបង្ហាញការសោកស្តាយចំពោះកំហុសក្នុងការបូកពិន្ទុបាក់ឌុប

ក្រោយពេលបានរកឃើញភាពមិនប្រក្រតីដែលនាំឱ្យមានការល្អៀងពិន្ទុរបស់សិស្សប្រឡងមធ្យមសិក្សាទុតិយភូមិ ជាពិសេសគឺលទ្ធផលគណិតវិទ្យាដែលរកឃើញថា ធ្លាក់ជាច្រើននាក់រួចមក ក្រសួងអប់រំបានចេញសេចក្តីប្រកាសព័ត៌មានថា បញ្ហាកើតឡើងនេះ គឺបណ្ដាលមកពីកំហុសខាងបច្ចេកទេសកុំព្យូទ័រ។

ភ្លាមៗ បន្ទាប់ពីបានដោះស្រាយរួច ក្រសួងបានប្រកាសលទ្ធផលជាថ្មីឡើងវិញ ដែលត្រូវបានគេមើលឃើញថា ចំនួនសិស្សជាប់មានការកើតឡើង ហើយចំនួនអ្នកជាប់និទ្ទេសA ក៏មានការកើនឡើងផងដែរ។ តែទោះជាយ៉ាងនេះក្តី មជ្ឈដ្ឋានមួយចំនួនបានបង្ហាញការមិនពេញចិត្តចំពោះបញ្ហាដែលបានកើតឡើងនេះ ស្របពេលដែលមជ្ឈដ្ឋានមួយចំនួនទៀតគ្រាន់តែកត់សម្គាល់ដោយលើកឡើងពីភាពវិជ្ជមាន និងសូមឱ្យពិចារណាពីចំណុចល្អៗជាច្រើនផ្សេងទៀតដែលក្រសួងធ្វើបានល្អ ទន្ទឹមនឹងការមានកំហុសនេះ។

តាមរយៈអ្នកនាំពាក្យនៃក្រសួងអប់រំ យុវជន និងកីឡា លោក ឌី ខាំបូលី ក៏បានបង្ហើបប្រាប់សារព័ត៌មានក្នុងស្រុកថា ឯកឧត្តមរដ្ឋមន្ត្រីសូមសម្ដែងការសូមទោសទៅកាន់សាធារណជន ចំពោះបញ្ហាដែលកើតមានឡើងនៅក្នុងការបូកលទ្ធផលបាក់ឌុបនេះ។ ហើយប្រមាណជាជាងមួយម៉ោងមុននេះ Facebook ផ្លូវការរបស់ក្រសួងអប់រំ យុវជន និងកីឡា ដែលមានអ្នក Like ជាងពីរលាននាក់ បានបង្ហាញថា «ក្រសួងសូមទោស និងសោកស្តាយចំពោះកំហុសដោយអចេតនា»៕

September 15, 2018

ដឹងហើយ! បញ្ហាដែលធ្វើឱ្យគណិតវិទ្យាធ្លាក់ច្រើន គឺដោយសារបច្ចេកទេសកុំព្យូទ័រ

ក្រោយពីមានផ្ទុះការតវ៉ាយ៉ាងច្រើនពីសំណាក់សិស្សានុសិស្សដែលកើតទុក្ខមិនសុខចិត្តជាមួយនឹងលទ្ធផលប្រឡងមធ្យមសិក្សាទុតិយភូមិសម័យប្រឡងថ្ងៃទី20 ខែសីហា ឆ្នាំ2018 នោះ ក្រសួងអប់រំ យុវជន និងកីឡា បានប្រកាសដោះស្រាយដោយបង្កើតគណៈកម្មការមួយឡើង ដើម្បីវិនិច្ឆ័យឱ្យបានច្បាស់លាស់។

សិស្សជាច្រើនបានលើកគ្នាមកតវ៉ា ដោយក្នុងនោះក៏មានសិស្សពូកែគណិតវិទ្យាទូទាំងប្រទេសផងដែរ ដោយពួកគេបានកើតទុក្ខមិនសុខចិត្តជាមួយនឹងលទ្ធផលគណិតវិទ្យារបស់ពួកគេដែលចេញមកបាននិទ្ទេស F ហើយបានដាក់ពាក្យស្នើសុំឱ្យក្រសួងដោះស្រាយ។

បន្ទាប់ពីបានស្វែងរក និងស្រាវជ្រាវរកបញ្ហាមិនប្រក្រតីរួចមក ក្រសួងអប់រំ យុវជន និងកីឡា បានចេញសេចក្តីប្រកាសព័ត៌មានជាថ្មីដោយបានបញ្ជាក់ថា បញ្ហាដែលកើតមានកន្លងមក គឺដោយសារ «ដំណើរការបូកស្រង់ពិន្ទុតាមប្រព័ន្ធកុំព្យូទ័រមានបញ្ហាបច្ចេកទេសដែលធ្វើឱ្យប៉ះពាល់ដល់ពិន្ទុវិញ្ញាសាគណិតវិទ្យារបស់ថ្នាក់វិទ្យាសាស្ត្រ ក្នុងមណ្ឌលមួយចំនួន ដោយកុំព្យូទ័រមិនបានបូកស្រង់មុខវិជ្ជាគនិតវិទ្យារបស់បេក្ខជនចំនួន 740បន្ទប់»។

បន្ទាប់ពីបានដោះស្រាយបញ្ហាបច្ចេកទេសរួច លទ្ធផលត្រូវបានប្រកាសសាជាថ្មីដោយក្នុងនោះឃើញថា ចំនួនអ្នកទទួលបាននិទ្ទេសA ដល់និទ្ទេសE មានការកើនឡើង៕

September 14, 2018

កម្មវិធីសិក្ខារសាលា ការចាប់ដៃគូពាណិជ្ជកម្ម និងពិធីសម្ពោធកម្មវិធីមហោស្រពភាពយន្តថៃលើកទី3 ឆ្នាំ2018

ក្រោយពីបានទទួលការគាំទ្រយ៉ាងច្រើនពីសំណាក់ទស្សនិកជននៅប្រទេសកម្ពុជាក្នុងការទស្សនាខ្សែភាពយន្ដថៃ ស្ថានតំណាងពាណិជ្ជកម្ម ប្រចាំស្ថានឯកអគ្គរាជទូតថៃនៅរាជធានីភ្នំពេញ បានរៀបចំកម្មវិធីសិក្ខារសាលា និងការចាប់ដៃគូពាណិជ្ជកម្ម ស្តីពីការផលិតខ្សែភាពយន្តនៅសាលប្រជុំ AEON Hall និងរោងកុន Major Cineplex ស្ថិតនៅផ្សារទំនើប AEON សែនសុខ កាលពីថ្ងៃទី13 ខែកញ្ញា ឆ្នាំ2018កន្លងទៅថ្មីៗនេះ។

លោក ជីរ៉ាវុឍ សុណ្ណាអាត អគ្គទីប្រឹក្សាពាណិជ្ជកម្ម ប្រចាំស្ថានឯកអគ្គរាជទូតថៃនៅរាជធានីភ្នំពេញបានមានប្រសាសន៍ថា “កម្មវិធីមហោស្រពភាពយន្តថៃលើកទី3 ឆ្នាំ2018នេះ ធ្វើឡើងក្នុងគោលបំណង ដើម្បីជំរុញកិច្ចសហប្រតិបត្តិការរវាងអ្នកផលិតខ្សែភាពយន្ត និងបណ្តាក្រុមហ៊ុងដែលពាក់ព័ន្ធជាមួយវិស័យឧស្សាហកម្មភាពយន្តរបស់ប្រទេសកម្ពុជា និងថៃ។ នៅថ្ងៃនេះផងដែរ ក៏មានកម្មវិធីសិក្ខាសាលា និងការចាប់ដៃគូពាណិជ្ជកម្ម ដែលជាវេទិការដ៏សំខានក្នុងការចែករំលែកបទពិសោធន៍ស្តីអំពីបច្ចេកទេសនៃការថត និងកាត់តភាពយន្តពីអ្នកជំនាញដូចជា អ្នកផលិតភាពយន្ត អ្នកដឹកនាំសម្តែង និងអ្នកដែលមានបទពិសោធក្នុងវិស័យភាពយន្តមកពីប្រទេសទាំង2”។

ក្នុងកម្មវិធីសិក្ខារសាលានេះ ក៏មានវត្តមានវាគ្មិន2រូបមកពីប្រទេសថៃ ដែលពួកគាត់មានបទពិសោធជាច្រើនក្នុងការផលិតខ្សែភាពយន្ត មកធ្វើបទបង្ហាញស្ដីអំពី Short Film និង Special Effects ទៅកាន់សិស្សនិសិត្សមកពីសកលវិទ្យាល័យមួយចំនួនដែលមានដូចជា និស្សិតមកពី PSE សកលវិទ្យាល័យភូមិន្ទភ្នំពេញ និងសមាគមផលិតខ្សែភាពយន្ត ដើម្បីបង្ហាញពីបច្ចេកទេសផលិតខ្សែភាពយន្តដោយឥតគិតថ្លៃផងដែរ។ លើសពីនេះទៅទៀតក៏មានកម្មវិធី ចាប់ដៃគូពាណិជ្ជកម្មផ្នែកវិស័យភាពយន្ត ដែលមានការចូលរួមពីផលិតករ អ្នកដឹកនាំសម្តែង ម្ចាស់អាជីវកម្ម ដើម្បីចែករំលែកបទពិសោធ បច្ចេកទេស និងសហការចាប់ដៃគូពាណិជ្ជកម្មក្នុងការផលិតខ្សែភាពយន្ត ឬស្ពតពាណិជ្ជកម្មផ្សេងៗឱ្យមានគុណភាព។

នៅក្នុងថ្ងៃបើកសម្ពោធកម្មវិធីមហោស្រពភាពយន្តថៃលើកទី3 នេះ ក៏មានវត្តមានគណៈធិបតី ឯកឧត្តម សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា ឯកឧត្តម ប៉ាន់យ៉ារ៉ាក់ ភូនសាប់ ឯកអគ្គរាជទូតថៃប្រចាំព្រះរាជាណាចក្រកម្ពុជា និងសិល្បករ សិល្បការិនីខ្មែរ និងថៃជាច្រើនរូបចូលរួមជាភ្ញៀវកិត្តិយសផងដែរ។

លោក ជីរ៉ាវុឍ សុណ្ណាអាត អគ្គទីប្រឹក្សាពាណិជ្ជកម្ម ប្រចាំស្ថានឯកអគ្គរាជទូតថៃនៅរាជធានីភ្នំពេញបានមានប្រសាសន៍ថា “ខ្សែភាពយន្តថៃចំនួន4រឿងដែលនឹងយកមកចាក់បញ្ចាំងជូនទស្សនាដោយឥតគិតថ្លៃនៅក្នុងរោងភាពយន្ត Major Platinum Cineplex Hall 3 ផ្សារទំនើប AEON សែនសុខ ដែលអាចផ្ទុកទស្សនិជនបានចំនួន266នាក់ក្នុងមួយលើក។

រឿងទី1 ដែលនឹងចាក់បញ្ចាំងនៅថ្ងៃទី13 ខែកញ្ញា ឆ្នាំ2018 នៅម៉ោង7ល្ងាច មានចំណងជើងថា “Memories of New Year” (អនុស្សាវរីយ៍ថ្ងៃចូលឆ្នាំ) ដែលរឿងនេះបានសម្តែងរួមគ្នាដោយតារាសម្តែងមកពីប្រទេសចំនួន4 ដូចជាប្រទេសកម្ពុជា ថៃ ឡាវ និងមីយ៉ាន់ម៉ា។ រឿងទី2 រឿង“Premika Parab” (ខារ៉ាអូខេមរណៈ) ចាក់បញ្ចាំងជូនទស្សនានៅថ្ងៃទី14 ខែកញ្ញា ឆ្នាំ2018 ម៉ោង7ល្ងាច។ រឿងទី3 រឿង“Siam Square” (ខ្មោចស្រីចាំអគារ) ចាក់បញ្ចាំងជូនទស្សនានៅថ្ងៃទី15 ខែកញ្ញា ឆ្នាំ2018 ម៉ោង12 ថ្ងៃត្រង់។ និងរឿងទី4 រឿង “Som Pak Sian (E-Sarn Love Story)” (រដឺនខកស្នេហ៍) ចាក់បញ្ចាំងជូនទស្សនា នៅថ្ងៃទី16 ខែកញ្ញា ឆ្នាំ2018 ម៉ោង12ថ្ងៃត្រង់៕

September 14, 2018

ឡើងកប់! Apple ប្រកាសបង្ហាញ iPhone ថ្មី 3ម៉ូដែល គឺ iPhones Xr, iPhoneXs និង iPhones XS Max

ទីបំផុតក្រុមហ៊ុនបច្ចេកវិទ្យាយក្សអាមេរិក Apple បានប្រកាសបង្ហាញ iPhone ជំនាន់ថ្មីរបស់ខ្លួន 3ម៉ូដែលដូចពាក្យចចាមអារ៉ាមពិតមែន ប៉ុន្តែលក្ខណៈពិសេសរបស់វានីមួយៗគឺខុសពីព័ត៌មានបែកធ្លាយ។

នៅយប់ថ្ងៃពុធ ទី12 ខែកញ្ញា (ម៉ោងនៅកម្ពុជា) ក្រុមហ៊ុន Apple រៀបចំមហាព្រឹត្តិការណ៍របស់ខ្លួន ដោយបានបង្ហាញ iPhone X រហូតដល់ទៅ 3ម៉ូដែល គឺ iPhones Xr, iPhoneXs និង iPhones XS Max។

iPhone XS Max ត្រូវបានក្រុមហ៊ុន Apple ប្រកាសថា វាមានតម្លៃថ្លៃជាងគេ ជាពិសេសគឺមានអេក្រង់ទំហំរបស់ដល់ 6.5អ៊ីញ ប៉ុន្តែ Apple នៅតែរក្សារាងក្បាលឆក ស្កែនក្រយ៉ៅដៃ និងផ្ទៃមុខឱ្យនៅដដែល តែអ្វីដែលពិសេសគឺសមត្ថភាពកាន់ថ្មបានយូរជាងមុន។ តាមការបញ្ជាក់ពី Apple គឺ iPhone XS Max មានតម្លៃ 1099ដុល្លារ អាមេរិក រីឯ iPhone XS មានទំហ 5.8អ៊ីញ មានតម្លៃ 999ដុល្លារអាមេរិ ខណៈ iPhones Xr ដែលមាន ទំហំអេក្រង់ 6.1អ៊ីញគឺ មានតម្លៃ 749ដុល្លារអាមេរិក ។

iPhone ថ្មីទាំង 3ម៉ូដែលនេះ មានពណ៌ដូចជា ពណ៌ខ្មៅ ពណ៌ក្រហម ពណ៌ផ្កាឈូក និងពណ៌ស ហើយវានឹងត្រូវដាក់ឱ្យបញ្ជាទិញនៅថ្ងៃទី14 ខែកញ្ញា ហើយនឹងចេញលក់ជាផ្លូវការនៅថ្ងៃទី21 ខែកញ្ញា៕

https://www.youtube.com/watch?v=9m_K2Yg7wGQ

September 13, 2018

វិនិយោគិនបរទេសគ្រោងបោះទុន 1,200លានដុល្លារ សង់ទីក្រុងវិស្សមកាលទេសចរណ៍

ក្រុមហ៊ុនបរទេសមួយគ្រោងនឹងវិនិយោគទឹកប្រាក់ 1,200លានដុល្លារដើម្បីសាងសង់ «ទីក្រុងវិស្សមកាលទេសចរណ៍» នៅដើមឆ្នាំ2019 ដើម្បីរួមចំណែកលើកកម្ពស់វិស័យទេសចរណ៍ សេដ្ឋកិច្ច និងពាណិជ្ជកម្ម នៅក្នុងប្រទេសកម្ពុជា។

គម្រោងនេះត្រូវបានឱ្យដឹងក្នុងជំនួបពិភាក្សារវាង ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក លី តាវ (Li Tao) ប្រធានក្រុមប្រឹក្សាភិបាលក្រុមហ៊ុន យូញៀន ឌីវេឡុបមេនគ្រុប ខូ អិលធីឌី ខេមបូឌា ដែលបាន និងកំពុងធ្វើការអភិវឌ្ឍគម្រោងតារាសាគរ (តំបន់ពិសោធន៍អភិវឌ្ឍន៍វិនិយោគចម្រុះកម្ពុជា-ចិន) នៅក្នុងស្រុកគិរីសាគរ និងស្រុកបទុមសាគរ នៃខេត្តកោះកុង។

លោក លី តាវ បានលើកឡើងថា គម្រោង «ទីក្រុងវិស្សមកាលទេសចរណ៍» នឹងសាងសង់លើផ្ទៃដីសរុបចំនួន 1,200ហិកតា ដែលប្រមូលផ្តុំដោយហេដ្ឋារចនាសម្ព័ន្ធចម្រុះដូចជា សណ្ឋាគារលំដាប់ផ្កាយ5 ខុនដូទំនើប បាងហ្កាឡូ ការិយាល័យធ្វើការ មជ្ឈមណ្ឌលពាណិជ្ជកម្ម និងសួនកម្សាន្តខ្នាតអន្តរជាតិ។

លោក លី តាវ សង្ឃឹមថា គម្រោងនេះនឹងទទួលបានការគាំទ្រពីរាជរដ្ឋាភិបាលកម្ពុជា ហើយក្រុមហ៊ុននឹងខិតខំស្វែងរកដៃគូវិនិយោគចូលរួមជាមួយគម្រោងនេះ តាមរយៈព្រឹត្តិការណ៍ពិព័រណ៍ចិន-អាស៊ាន (CAEXPO) លើកទី15 ដែលនឹងប្រព្រឹត្តទៅចាប់ពីថ្ងៃទី11 ដល់ទី15 ខែកញ្ញា ឆ្នាំ2018 នៅក្នុងទីក្រុងណាននីង ខេត្តក្វាងស៊ី ប្រទេសចិន។

ឯកឧត្តមរដ្ឋមន្ត្រី ប៉ាន សូរស័ក្តិ បានថ្លែងគាំទ្រ និងបង្ហាញជំនឿថា គម្រោង «ទីក្រុងវិស្សមកាលទេសចរណ៍» នឹងជួយពង្រឹងការធ្វើសមាហរណកម្មសេដ្ឋកិច្ចកម្ពុជាទៅក្នុងប្រព័ន្ធពាណិជ្ជកម្មសកល ព្រមទាំងលើកស្ទួយកិត្តិនាមរបស់កម្ពុជាក្នុងការទាក់ទាញភ្ញៀវទេសចរអន្តរជាតិនិងវិនិយោគិនឱ្យចូលមកបណ្តាក់ទុនកាន់តែច្រើនថែមទៀតនាពេលអនាគត ហើយក្រសួងពាណិជ្ជកម្មដែលជាសេនាធិការរបស់រាជរដ្ឋាភិបាលកម្ពុជានឹងរង់ចាំជួយសម្របសម្រួលគម្រោងវិនិយោគនេះជានិច្ច។

គួរបញ្ជាក់ថា ក្រុមហ៊ុនខាងលើបានចុះកិច្ចសន្យាជាមួយរាជរដ្ឋាភិបាលកម្ពុជាកាលពីថ្ងៃទី9 ខែឧសភា ឆ្នាំ2008 ដើម្បីធ្វើការអភិវឌ្ឍគម្រោងតារាសាគរលើផ្ទៃដីសរុបទំហំ 36,000ហិកតា។ គិតមកទល់បច្ចុប្បន្ន ក្រុមហ៊ុនបាន និងកំពុងសម្រុកអនុវត្តគម្រោងទៅតាមផែនការ ដោយបានបណ្តាក់ទុនវិនិយោគចំនួនជាង 1,500លានដុល្លារហើយលើការសាងសង់អគារ និងហេដ្ឋារចនាសម្ព័ន្ធចាំបាច់មួយចំនួន រួមមាន៖ ប្រព័ន្ធគមនាគមន៍ ក្លិបវាយកូនហ្គោល ព្រលានយន្តហោះ កំពង់ផែទឹកជ្រៅអន្តរជាតិ សួនលម្អ បណ្តាញទឹកស្អាត និងប្រព័ន្ធអគ្គិសនី ជាដើម៕

September 11, 2018

Author: វល័ក្ខ