វល័ក្ខ - La Reine Media

នាយ ចឺម និងថៅកែផលិតកម្មភាពយន្ត BKS រួមគ្នាបង្កើតជំនួញក្រៅសិល្បៈ

ភ្នំពេញៈ ក្រោយពីទទួលបានផលផ្លែផ្កាខ្លាំងនៅក្នុងវិស័យសិល្បៈ តារាកំប្លែងវ័យក្មេង និងចម្រៀងប្រចាំផលិតកម្មសាន់ដេ មានឈ្មោះពិត សុខ មេសា ហៅនាយ ចឺម សមាជិកនៃក្រុមកំប្លែង ប្រចាំទូរទស្សន៍ស៊ីធីអិន ថ្មីៗនេះក៏កើតគំនិតធ្វើអាជីវកម្មថ្មីក្រៅពីសិល្បៈ ដោយលេចឮដំណឹងថាដាក់ទុនរួមគ្នាជាមួយនឹងចាងហ្វាងកុនវ័យក្មេងគឺលោក ឈុន សុវណ្ណភក្តី ជាថៅកែផលិតកម្ម BKS Production។

តារាកំប្លែងមានដុងតាំងពីវ័យក្មេង ដែលបច្ចុប្បន្នវ័យ ២២ ឆ្នាំ មានស្រុកកំណើតមកពីខេត្តកំពង់ស្ពឺគឺជាក្មួយប្រុសបង្កើតជាតារាកំប្លែងដ៏ល្បីនាយ ក្រូច នោះ បានបង្ហើបប្រាប់ភ្នំពេញប៉ុស្តិ៍ថា៖ «មែនតាបង!ខ្ញុំ និងនាយក្តី [លោក ឈុន សុវណ្ណភក្តី ] ដែលបានរាប់អានគ្នាដូចជាបងប្អូនបង្កើតអ៊ីចឹង មានគំនិតរួមគ្នាសហការបង្កើតការងាររកស៊ីមួយតាមអ្វីដែលរៀងខ្លួនមានតែប៉ុណ្ណោះ អាចបម្រើអតិថិជនបាន តែមិនមានការដាក់ទុកជាលុយកាក់ដូចជាជំនួញក្រុមហ៊ុនអ្វីនោះទេ។ គឺថា ខ្ញុំមានសេវាកម្មក្រុមតន្រ្តីផ្ទាល់ខ្លួនឈ្មោះក្រុមតន្រ្តីនាយចឺម ដែលអាចបម្រើសេវាកម្មជួលកម្សាន្តតាមកម្មពិធីមង្គលការ ជប់លៀង ឬកម្មវិធីអាហ្វែរនានាទាំងក្រុង និងខេត្តនានា។ ចំណែកលោក ភក្តី គាត់មានលក់គ្រឿងអេឡិចត្រូនិចទំនើបៗ និងសេវាកម្មម្ហូបអាហារ។ ពិសេសនោះ នាយក្តី គាត់មានផលិត Power Bank ដែលអាចសាកថ្មបានចំនួន ១០ ដងបាន មានតម្លៃគួរសមសម្រាប់អ្នកនិយមដើរកម្សាន្តទីឆ្ងាយ ហើយត្រូវការវាសម្រាប់សាកថ្មទូរសព្ទដៃ បានច្រើនលើកនោះផងដែរ។ ពួកយើងក៏បានចាប់ផ្តើមផ្សព្វផ្សាយសេវាកម្មនេះ នៅតាមទំព័រហ្វេសប៊ុក BKS Production បណ្តើរៗមកហើយដែរ»។

នាយ ចឺម ដែលគេឧស្សាហ៍ឃើញដូរស៊េរីរថយន្តទំនើបណាស់ដូចជាដូរចេញពីម៉ាក Lexus 300 មកជិះម៉ាក Hammer តម្លៃរាប់ម៉ឺនដុល្លារ បានធ្វើឲ្យមហាជន និងមិត្តអ្នកសិល្បៈបើកភ្នែកធំៗ និងធ្លាប់មានក្តីស្រមៃទិញផ្ទះវីឡាតម្លៃ២០ ម៉ឺន ដុល្លារ ទៀតផង។ តារាកំប្លែង នាយ ចឺម ក៏ធ្លាប់បង្ហើបប្រាប់ដែរថា៖ «បើតាមចិត្តចង់ទិញនោះ គឺជាផ្ទះវីឡា ដែលមានតម្លៃ ២០ ម៉ឺន ដុល្លារ។ តែពេលនេះ មិនទាន់មានប្រាក់គ្រប់គ្រាន់នៅឡើយ ហើយគ្រាន់តែជាក្តីស្រមៃចង់បានរបស់ខ្ញុំប៉ុណ្ណោះ»៕

April 30, 2017

ខៀវ សានសាណា បង្ហោះសាររំឮកអនុស្សាវរីយ៍កាល ៧ ឆ្នាំមុន ពពោះកូនប្រុសដំបូង

ភ្នំពេញៈ ការបង្ហោះរូបថតថ្នាក់ថ្នម និងថែបថែកូនប្រុសច្បងខ្លួន ដែលសល់ពីចំណងស្នេហ៍ស្វាមីទី ១ របស់ពិធីការិនីទូរទស្សន៍ ដែលចេះភាសាអង់គ្លេសជ្រៅជ្រះ ស្ទាត់ជំនាញ និងសម្បូរវោហារមិនចាញ់តារាកំប្លែង អ្នកនាង ខៀវ សានសាណា ក៏បង្កការងឿងឆ្ងល់ពេញបណ្តាញសង្គមយ៉ាងខ្លាំង ក៏បានព្រលយចេញជាពាក្យចចាមអារាមសង្ស័យថា ទំនងជាអ្នកនាងមានក្តីប្រាថ្នាចង់បានបុត្រជាមួយនឹងស្វាមីទី ២ ទៀតទេដឹង?

ពិធីការិនីកូន ២ សម្រស់នៅតែស្រស់ស្អាត អ្នកនាង ខៀវ សានសាណា ក៏ច្រានចោលភ្លាមតែម្តងទៅនឹងចម្ងល់របស់មហាជនដែលថា នាងកំពុងតែត្រៀមចិត្តកាយពពោះជូនស្វាមីទី ២ ជនជាតិអូស្ត្រាលីលោក Seraj Sutton ដែរថា៖ «នៅមិនទាន់មានគម្រោងដូច្នោះ នៅឡើយនោះទេ! សព្វថ្ងៃនេះពួកយើងរវល់ខ្លាំងណាស់នឹងការងាររៀងខ្លួន ដូច្នេះត្រូវរង់ចាំមើលមួយរយៈសិន»។ ពិធីការិនីល្បីប្រចាំទូរទស្សន៍ My TV និង CTN អ្នកនាង ខៀវ សានសាណា នាពេលមួយរយៈក្រោយនេះ គេសង្កេតឃើញនាងច្រើនតែកាន់កម្មវិធីកម្សាន្តរបស់ក្មេងៗរួមមានដូចជាកម្មវិធី Bet Your Baby ជាដើមនៅ CTN ដូច្នេះហើយបានជានាងងាកមកនឹកឃើញរើសរើរូបថតកូនប្រុសច្បងមកបង្ហោះរំឮកអនុស្សាវរីយ៍ពេញបណ្តាញសង្គមនោះ។

អ្នកនាង ខៀវ សានសាណា ក៏បានបកស្រាយនូវសារ ដែលនាងបានបង្ហោះជាភាសាអង់គ្លេសមួយឃ្លានោះថា៖ « អស់ពេល ៧ ឬ ៨ ឆ្នាំ កន្លងផុតមកហើយ ដែលខ្ញុំបានសម្រាលកូនប្រុសដំបូង។ ហើយខ្ញុំបានសម្រេចចិត្តជ្រើសយកគាត់ សុខចិត្តចោលទ្រព្យធននានា ដែលបានពីការងារកំពុងតែមានរាសីឡើង និងចោលអ្នកស្គាល់ទាំងឡាយពីកាលមុន។ ពេលនោះពិតជាពិបាកសម្រេចចិត្តបំផុតសម្រាប់ខ្ញុំ។ តែពេលនេះ នាងខ្ញុំគិតថា ជាការសម្រេចដ៏ត្រឹមត្រូវសម្រាប់ជីវិតខ្លួនឯង។ ជាពិសេស នាពេលយើងបានរៀបការ ហើយមានកូនដំបូង ក៏សម្រេចចិត្តតាមស្វាមី និងជ្រើសរើសផ្លូវរក្សាទុកកូន ដោយសុខចិត្តលះបង់ចោលការងារដែលខ្លួនស្រឡាញ់»។

ពិធីការិនីដែលសម្បូរវោហារ ចេះបត់បែនតាមស្ថានភាព នៃកម្មវិធីរូបនេះបានបន្តថា៖ «ជាមួយគ្នានេះដែរ នាងខ្ញុំគ្រាន់តែចង់ចែករំលែក នូវសារដាស់ស្មារតីមួយចំណែកតូចនេះ ទៅដល់ស្រ្តីទាំងឡាយដែលមានវ័យស្របាលៗនឹងខ្ញុំកាលពី ៨ ឆ្នាំមុន ជាស្ថានភាពពិបាកប្រហាក់ប្រហែលគ្នា នៅក្នុងការសម្រេចចិត្តព្រោះតែមានវ័យខ្ចីគំនិត។ ជាពិសេសនោះ នៅពេលស្រ្តីយើងមានកូនដំបូង សុំកុំសម្រេចចិត្តខុសដោយមិនព្រមរក្សាទុក្ខនូវសាច់ឈាមរបស់ខ្លួនអី។ ដូចជារូបខ្ញុំអ៊ីចឹង បានសម្រេចចិត្តរក្សាកូនប្រុសច្បង Samuel Elson Bowser ឥឡូវនេះ ខ្ញុំបានចង់ចាំថ្ងៃកំណើតរបស់គេ ហើយក៏សប្បាយចិត្តក្នុងនាមជាម្តាយមួយដែលរូបស្រឡាញ់កូន»។ យ៉ាងណាមិញ ពិធីការិនីដែលល្បីទាំងការងារលើឆាក និងបានធ្វើឲ្យមហាជនចាប់អារម្មណ៍ទាំងលើខ្សែជីវិតគូរបស់នាងដែរនោះ អ្នកនាង ខៀវ សានសាណា ក៏បានសំណូមពរដល់ស្រ្តីគ្រប់រូបដែលបានសម្រេចចិត្តរៀបការរួចហើយ ក៏ត្រូវត្រៀមចិត្តទទួលយកនូវការគិតដ៏ត្រឹមត្រូវ និងមានស្មារតីរឹងមាំរបស់ខ្លួនផងដែរ៕

April 29, 2017

ថៃ នរៈពិទូ ប្រហែលរំជួលចិត្តខ្លាំងពេលឃើញសារម្តាយ

ភ្នំពេញ: តារាសម្តែងរាងសង្ហា អតីតប្រុសស្អាតលេខ ១ កាលពីឆ្នាំ ២០០៦ ថៃ នរៈពិទូ ដែលមានឪពុកជាមន្រ្តីជាន់ខ្ពស់បម្រើការនៅក្នុងក្រសួងវប្បធម៌ និងវិចិត្រសិល្បៈ និងម្តាយជាអ្នកនិពន្ធនិងជានាយិកាក្រុមហ៊ុនកែសម្ផស្ស ត្រូវបានសមត្ថកិច្ចចាប់ឃុំខ្លួន ពាក់ព័ន្ធករណីជួញដូរគ្រឿងញៀន ជិតកន្លះឆ្នាំហើយ ប៉ុន្តែអ្វីធ្វើឲ្យមហាជនភ្ញាក់ផ្អើលជាថ្មីនោះ ខណៈម្តាយតារាសម្តែងរូបសង្ហាជាប់ប្តូរឈ្មោះជាប្រុសស្អាត មកជាពិរុទ្ទជន បង្ហោះទួញរៀបរាប់រញ្ជួយអស់មហាជន ពីទឹកចិត្តម្តាយ។

រំឭកថា អតីតប្រុសស្អាតឆ្នាំ ២០០៦ ដែលមានកំណើតក្នុងត្រកូលគ្រួសារមន្រ្តីរាជការ ត្រូវបានសមត្ថកិច្ចខេត្ត បាត់ដំបងចាប់ឃាត់ខ្លួន រួមនឹងភរិយាផង កាលពីថ្ងៃទី ៩ ខែមករាឆ្នាំ ២០១៧ ពីបទចែកចាយគ្រឿងញៀន នៅចំណុចខារ៉ាអូខេ ដឺសោនហ្វាមីលី។ អ្វីដែលធ្វើឲ្យមិត្តភក្តិនៅក្នុងសង្គមសិល្បៈមានការភ្ញាក់ផ្អើលយ៉ាងខ្លាំង មិនតែប៉ុណ្ណោះទស្សនិកជនជាច្រើន បានបង្ហាញអារម្មណ៍ស្ទើរតែមិនគួរឲ្យជឿក្រោយបានដឹងរឿងនេះ។

ដាស់ភាពភ្ញាក់ផ្អើលជាថ្មី ក្រោយកំហុសអាសោចកេរ្តិ៍ដល់អ្នកមានគុណ អ្នកស្រី ម៉ានីយ៉ា ជាម្តាយប្រុសស្អាតឆ្នាំ ២០០៦ ថៃ នរៈពិទូ បានបញ្ចេញសារទួញរៀបរាប់ពីភាពកម្សត់នៅលើគណនីហ្វេសប៊ុករបស់អ្នកស្រី ដែលធ្វើឲ្យមនុស្សជាច្រើនរំភើបចិត្តយ៉ាងខ្លាំង ចំពោះទឹកចិត្តម្តាយរូបនេះ ទាំងបង្ហាញទាំងថ្ងៃខួបកំណើត ថៃ នរៈពិទូ ជាមួយនឹងនំខួបកំណើត ខណៈជិះលើរថយន្ត។ អ្នកស្រី ម៉ានីយ៉ា បានរៀបរាប់ថា៖ «យប់មិញម៉ាក់មិនបានគេងទេ ហើយបើកឡានរាប់រយគីឡូមករកកូន ព្រោះថ្ងៃនេះ ជាថ្ងៃដែលម៉ាក់បានបង្កើតកូនប្រុសឲ្យមកស្គាល់ពិភពលោកនេះ….ពិទូរពួកយើងស្រឡាញ់កូនណាស់… កូនប្រុស! ទោះបីជាឆ្នាំនេះ ពួកយើងកំសត់ជាងរាល់ឆ្នាំ តែម៉ាក់សប្បាយចិត្ត ព្រោះថា ចាប់ពីពេលវេលានេះទៅ កូននិងយល់ដឹង នឹងស្គាល់ពីន័យពិតរបស់ជីវិត»។ ពីសារនោះម្តាយតារាសម្តែងនិងជាអតីតប្រុសស្អាតឆ្នាំ ២០០៦ កំពុងជាប់ឃុំខ្លួននៅពន្ធធនាគារខេត្ត បាត់ដំបងនោះ អ្នកស្រីរៀបរាប់បានលើកទឹកចិត្តថា៖ «កូនតស៊ូឡើង ដើម្បីអនាគត កើតជាមនុស្សគ្មាននរណាមិនចេះខុសទេ សំខាន់ ខុសហើយកូនត្រូវកែខ្លួនបែរមករកផ្លូវត្រូវវិញ…អត់ធ្មត់ណាកូន ក្រុមគ្រួសារយើង ព្រមទាំងមនុស្សជាច្រើននៅស្រឡាញ់កូន នឹងរង់ចាំផ្លូវកូនត្រឡប់មកវិញ ពេញដោយ លក្ខណសម្បត្តិជាកូនប្រុស ដ៏ថ្លៃថ្នូរ ជាសរសរទ្រូងគ្រួសារ ជាកូនល្អ ជាបងល្អ ជាប្ដីល្អ នឹងជា ឪពុកល្អ ណា៎កូនណា៎!!! Happy birthday son. I love you»៕

April 29, 2017

ទូរទស្សន៍ LG’S HDR UHD TV ជំរុញទៅដោយបច្ចេកវិជ្ជា NETFLIX សម្រាប់បង្កើនបទពិសោធន៍ទិដ្ឋភាពល្អគ្មានគូរប្រៀប

ទូរទស្សន៍សេរ៊ីថ្មីបំផុតរបស់ LG ត្រូវបានរចនានិងឆ្នៃប្រឌិតឡើងជាមួយបច្ចេកវិជ្ជា Netflix។ ការវាយតម្លៃបានទទួលស្គាល់ទូរទស្សន៍របស់ LG ដែលជំរុញទៅដោយបច្ចេកវិជ្ជា Netflix បានផ្តល់នូវការប្រើប្រាស់ដ៏ល្អឥតខ្ចោះនិងបទពិសោធន៏នៃការទស្សនាល្អវិសេសអស្ចារ្យ។

ទូរទស្សន៍របស់ LG បានទទួលជោគជ័យលើដំណើរការវាយតម្លៃយ៉ាងតឹងរឹងលើកត្តាដែលសំខាន់បំផុតសម្រាប់អ្នកប្រើប្រាស់ ដូចជាភាពងាយស្រួលនៃការដំណើរការ និងល្បឿននៃការប្រើប្រាស់ អ្វីដែលពិសេសគឺប្រតិបត្តិការ webOS 3.5 ដែលបំពាក់នៅលើទូរទស្សន៍។ សម្រាប់ពេលដំបូង LG’s 2017 UHDLG UHD បានបំពាក់ ប៊ូតុង Netflix នៅលើតេឡេរបស់វា ដែលអាចធ្វើឱ្យអ្នកប្រើប្រាស់អាចបញ្ជាបើកនៅលើទូរទស្សន៍ និងបើកដំណើរការ Netflix ផងដែរ ជាមួយនឹងការចុចប៊ូតុងតែមួយ។

ទូរទស្សន៍របស់ LG ស៊េរីឆ្នាំ 2017 ត្រូវបានបំពាក់ទៅដោយបច្ចេកវិទ្យា 4K HDR (High Definition Range) អនុញ្ញាតឱ្យ Netflix នៅក្នុង 4K HDR ទៅបង្កើតគុណភាពរូបភាពឱ្យកាន់តែច្បាស់ល្អ និងបន្ថែមនូវពណ៌រូបភាពឱ្យកាន់តែខ្លាំង។ LG បានប្រាកដថាសម្រាប់ឆ្នាំ 2017 ។ ទូរទស្សន៏របស់ LG និងជំរុញយ៉ាងពេញទំហឹងជាមួយនឹង HDR ដើម្បីទៅបង្កើតទស្សនីយភាពអោយកាន់តែមានពន្លឺល្អ និងស្រមោលដ៏អស្ចារ្យានៅពេលដំណើរការ HDR រួមទាំង Dolby Vision, HDR10 និង HLG។

លោក Brian Kwon ប្រធានក្រុមហ៊ុន LG Electronics Home Entertainment បានមានប្រសាសន៍ថា: វាមិនមែនជារឿងចម្លែកទេដែលទូរទស្សន៍ស៊េរីឆ្នាំ 2017 របស់យើងត្រូវបានទទួលស្គាល់ថាជាទូរទស្សន៍ Netflix Recommended TVs។ ដោយសារតែការទទួលស្គាល់បែបនេះហើយ ទើបយើងនៅតែបន្តស្វែងរកមធ្យោបាយដើម្បីធ្វើឱ្យទូរទស្សន៍ Smart TV កាន់តែដំណើរការបានលឿនជាងមុន, ងាយស្រួលដំណើរការ 4K HDR និងធ្វើឱ្យអ្នកប្រើប្រាស់កាន់តែទទួលបាននៅបទពិសោធន៍យ៉ាងសប្បាយរីករាយជាមួយការទស្សនា។

បើយោងតាមប្រសាសន៍របស់លោក លោក Scott Mirer អនុប្រធានក្រុមហ៊ុន Device Partner Ecosystem at Netflix បានឱ្យដឹងថា៖ LG បានក្លាយជាក្រុមហ៊ុននាំមុខគេក្នុងការផ្តល់ឱ្យនូវការដំណើរការ Netflix ដ៏ល្អឥតខ្ចោះ។ ទូរទស្សន៍ Netflix Recommended LG’s 2017 និងនៅតែបន្តភាពជាអ្នកដឹកនាំ និងផ្តល់ជូនអតិថិជនជាមួយនឹងបទពិសោធន៍ Netflix កាន់តែល្អប្រសើរជាងមុន។

ផលិតផលថ្មីៗទាំងអស់នេះនឹងមានវត្តមាននៅក្នុង LG BrandShop គ្រប់សាខាទាំងអស់នៅពេលឆាប់ៗនេះ។
LG BrandShop ទំនិញមានគុណភាព តំលៃសមរម្យ សេវាកម្មល្អ
ពត៌មានបន្ថែម 023 222 699/ 023 888 299

April 28, 2017

រឿង 6 យ៉ាងដែលអ្នកគួរស្វែងយល់មុនទិញរថយន្តប្រភេទ SUVs

ជាទូទៅ មុននឹងសម្រេចចិត្តទិញរថយន្តមួយគ្រឿងវាពិតជាមិនងាយស្រួលនោះទេ។ ជាក់ស្ដែងទីផ្សាររថយន្តបច្ចុប្បន្នមានការរីកចម្រើននិងមានរថយន្តច្រើនម៉ាកច្រើនប្រភេទ ធ្វើឱ្យអតិថិជនមានជម្រើសកាន់តែច្រើន ប៉ុន្តែវាក៏អាចធ្វើឱ្យអ្នកពិបាកសម្រេចចិត្តគួរជ្រើសយករថយន្តណាមួយដែលស័ក្ដិសមនឹងតម្រូវការរបស់អ្នកដែរ។ ប្រសិនបើអ្នកកំពុងស្វែងរករថយន្តដែលអាចជួយសម្រួលដល់ជីវភាពប្រចាំថ្ងៃរបស់អ្នក អ្នកគួរតែជ្រើសយករថយន្តប្រភេទ SUVs។

បច្ចុប្បន្ន មនុស្សភាគច្រើនយល់ឃើញថារថយន្តប្រភេទ SUVs ផ្ដល់អត្ថប្រយោជន៍ច្រើនជាងរថយន្តប្រភេទ Sedan។ ជាការពិតណាស់ រថយន្តប្រភេទ SUVs បានវ៉ាដាច់រថយន្តខ្នាតមធ្យមក្នុងទីផ្សាររថយន្តពិភពលោក ដោយការលក់បានរំពឹងថានឹងកើនឡើងដល់ 42 លានគ្រឿងនៅឆ្នាំ 2031។

ខាងក្រោមនេះ ជាគន្លឹះ 6 យ៉ាងដែលអ្នកគួរស្វែងយល់មុនទិញរថយន្តប្រភេទ SUVs ដែលផ្ដល់ដោយអ្នកជំនាញមកពីក្រុមហ៊ុន Ford។

1/-ហេតុផលនៃការជ្រើសយករថយន្តប្រភេទ SUV យកទៅប្រើប្រាស់

អតិថិជនភាគច្រើនយល់ឃើញថាក្រៅពីរថយន្តធន់តូច រថយន្តប្រភេទ SUVs អាចផ្ដល់នូវតម្លៃសមរម្យ សមត្ថភាពខ្ពស់ និងអាចនូវផ្ដល់បទពិសោធន៍ក្នុងការបើកបរប្រកបដោយភាពសប្បាយរីករាយ មិនខុសពីរថយន្តប្រភេទ Sedan នោះទេ។ រថយន្ត SUVs បានផ្ដល់នូវអត្ថប្រយោជន៍ជាច្រើនទៀត រួមមានទីតាំងបើកបរខ្ពស់ជាងមុន ផ្តល់ការងាយស្រួលក្នុងការមើលចរាចរណ៍ខាងមុខ និងកន្លែងផ្ទុកឥវ៉ាន់ធំទូលាយ។

ជាការពិតណាស់ រថយន្ត SUVs មានច្រើនប្រភេទផលិតទៅតាមតម្រូវការរបស់អតិថិជន។ ជាអាទិ៍ក្រុមហ៊ុន Ford បានចាប់ផ្តើមផលិតរថយន្ត SUVs ជាង 50 ឆ្នាំហើយ ដែលរថយន្តនីមួយៗត្រូវបានផលិតស្របទៅនឹងតម្រូវការរបស់អតិថិជនហើយរថយន្ត SUVs មិនមែនគ្រាន់តែជារថយន្តធម្មតានោះ គឺវាបានភា្ជប់មកជាមួយនូវបច្ចេកវិទ្យាឆ្លាតលើសគេ ផ្ដល់នូវបទពិសោធន៍បើកបរដ៏សប្បាយរីករាយ។

2/-ទំហំ និងចំនួនកៅអីដែលរថយន្តនោះមាន

រថយន្តប្រភេទ SUVs មិនមែនមានទំហំទូលាយ និងចំនួនកៅអីដូចគ្នាទាំងអស់នោះទេ។ រថយន្តខ្លះអាចមានចំនួនកៅអីច្រើន តែមានទំហំសម្រាប់ផ្ទុកឥវ៉ាន់តូច ដែលបង្កជាភាពឈឺក្បាលពេលមានដំណើរកម្សាន្តទៅណាម្ដងៗ ដែលតម្រូវឱ្យបត់កៅអីខ្លះ ដើម្បីអាចដាក់ឥវ៉ាន់បានច្រើន។ ដូច្នេះហើយការគិតអំពីរឿងនេះ ក៏ជាកត្ដាសំខាន់ផងដែរ។

លោកអ្នកអាចធ្វើការប្រៀបធៀបតម្រូវការចំនួនកៅអីនៃរថយន្ត ទៅនឹងការផ្ទុកសម្ភារដែលវាអាចផ្ទុកបាន។ ចំណុចនេះ អ្នកជំនាញបានណែនាំថា ប្រសិនបើអ្នកធ្វើដំណើរភាគច្រើនតែក្នុងទីក្រុង និងគ្មានកូនតូច អ្នកអាចជ្រើសយករថយន្ត SUVs ធន់កណ្ដាលដូចជារថយន្ត Ford Ecosport ព្រោះវាមានរាងតូចល្មមល្អបំផុតសម្រាប់ការធ្វើដំណើរក្នុងទីក្រុងដែលមានការកកស្ទះចរាចរណ៍ និងចង្អៀត។ មិនតែប៉ុណ្ណោះរថយន្ត Ford Ecosport ក៏មានកន្លែងផ្ទុកឥវ៉ាន់ធំទូលាយសម្រាប់ដំណើរកម្សាន្តចុងសប្ដាហ៍ផងដែរ។

3/-ភាពធន់នឹងស្ថានភាពផ្លូវលំបាក

ថ្វីត្បិតតែប្រភេទរថយន្ត SUVs ភាគច្រើនត្រូវបានបើកបរនៅក្នុងទីក្រុង រួមនឹងស្ថានភាពផ្លូវល្អប្រសើរប៉ុន្តែមនុស្សម្នាក់ៗតែងតែមានបំណងសាកល្បងធ្វើដំណើរបែបលក្ខណៈផ្សងព្រេងដូចជាការបើកបរនៅលើវាលខ្សាច់ ឬធ្វើដំណើរទៅទីឆ្ងាយដាច់ស្រយាល។ ហេតុនេះហើយ រថយន្តដែលអ្នកជ្រើសរើសក៏ត្រូវមានលក្ខណៈសម្បត្តិសមនឹងលក្ខខណ្ឌទាំងនោះផងដែរ។

ចំណុចដែលធ្វើឱ្យរថយន្ត SUVs កាន់តែលេចធ្លោនោះគឺអ្នកអាចបើកបរនៅលើផ្លូវដែលមានឧបសគ្គច្រើនដោយគា្មនការព្រួយបារម្ភ។ រថយន្តប្រភេទ SUVs ផ្សេងគ្នា មានសមត្ថភាពខុសគ្នា ហើយអ្នកត្រូវធ្វើការជ្រើសរើសរថយន្តណាមួយដែលសមស្របនឹងតម្រូវការរបស់អ្នក។ បើសិនជាអ្នករស់នៅក្នុងទីក្រុងដូចជាទីក្រុងភ្នំពេញ នៅរដូវភ្លៀងអ្នកបើកបរតែងតែជួបផលវិបាកព្រោះទឹកលិចផ្លូវ ក៏ប៉ុន្តែទាំងនេះពុំមែនជាបញ្ហានោះទេសម្រាប់ពពួករថយន្ត SUVs ដោយសារវាមានបាតខ្ពស់ពីដី អាចបើកកាត់ទឹកបានយ៉ាងងាយស្រួល។ តែយ៉ាងណាអ្នកគួរស្វែងយល់ពីវាដែរ ថាអាចបើកកាត់ទឹកមានជម្រៅប៉ុន្មានបាន។

ឧទាហរណ៍រថយន្ត Ford Ecosoport និង Ford Everest ជាដើម ដែលវាអាចបើកកាត់ទឹកជម្រៅរហូតដល់ 800 មីល្លីម៉ែត្រ។

4/- បច្ចេកវិទ្យាកម្សាន្ត ដែលមានភ្ជាប់ក្នុងរថយន្ត

ឧបករណ៍អេឡិចត្រូនិកប្រើប្រាស់ប្រចាំថ្ងៃ របស់យើងបច្ចុប្បន្នសុទ្ធសឹងបំពាក់នូវបច្ចេកវិទ្យាទំនើបរួមទាំង ទូរទស្សន៍ ម៉ាញ៉េ និងទូរស័ព្ទជាដើម។ ចំណុចនេះ ពេលទិញរថយន្តអ្នកគួរតែពិនិត្យមើលលើមុខងារដែលផ្សារភ្ជាប់ឧបករណ៍ប្រើប្រាស់ទៅនឹងរថយន្តផងដែរ ដូចអេក្រង់ Touchscreen ងាយស្រួលបញ្ជា ប្រព័ន្ធ Bluetooth ដែលអាចភ្ជាប់នឹងទូរស័ព្ទដែលធ្វើការ Call ចេញ/ចូល និងអាចចាក់ចម្រៀងស្ដាប់កម្សាន្ត រួមនឹងប្រព័ន្ធ GPS ដើម្បីកំណត់ទីតាំង ឬបង្ហាញផែនទីសម្រាប់ការធ្វើដំណើរជាដើម។

5/-ការសន្សំសំចៃ

ប្រេងជារឿងដ៏សំខាន់ផងដែរ សម្រាប់ប្រជាជនកម្ពុជាផ្នែកលើកម្រិតជីវភាព ថានរណាៗក៏ចង់បានរថយន្តដែលស៊ីប្រេងតិចដែរ។ ជាទូទៅអ្នកតែងសួរទៅអ្នកលក់អំពីកម្រិតស៊ីប្រេងរបស់រថយន្ត។ រថយន្តខ្លះមានកម្លាំងម៉ាស៊ីនប៉ុនគ្នា ប៉ុន្ដែការប្រើប្រាស់ប្រេងអាចខុសគ្នាដោយសារតែមានភាពរីកចម្រើនផ្នែកបច្ចេកវិទ្យានៃក្រុមហ៊ុននីមួយៗ។ ដូចនេះ មុនសម្រេចចិត្តទិញរថយន្ត អ្នកត្រូវតែប្រាកដថា រថយន្តដែលអ្នកពេញចិត្ត និងកំពុងជ្រើសរើសនេះមានម៉ាស៊ីនដែលស៊ីប្រេងតិច និងការរចនាម៉ូដបែប Aerodynamic ។

6/-តម្លៃនៃរថយន្ត

ជារឿងចុងក្រោយគេ តម្លៃក៏ជាផ្នែកមួយដែលអ្នកគួរផ្ដោតសំខាន់ផងដែរ។ ប៉ុន្តែវាអាចជាការសម្រេចចិត្តរបស់អ្នក ព្រោះថារថយន្ត SUV ខ្លះមានលក្ខណៈសម្បត្តិដូចគ្នាស្ទើរគ្រប់ចំណុច តែមានតម្លៃខ្ពស់ជាង ឬទាបជាងគ្នា អាស្រ័យលើស្លាកសញ្ញាក្រុមហ៊ុន។ តំណាងក្រុមហ៊ុនខាងលើបានបន្ថែមថា នៅ Ford ក្រុមហ៊ុនបានឆ្លើយតបទៅគ្រប់តម្រូវការរបស់អតិថិជនជាមួយនឹងរថយន្ត SUVs គ្រប់ធន់ គ្រប់ប្រភេទ ដែលអតិថិជនចង់បានទៅតាមកម្រិត និងផ្ដល់ជម្រើសនៃការបង់ប្រាក់ច្រើនរបៀប ដែលផ្តល់ភាពស្រួលសម្រាប់អតិថិជនដែលមានថវិកាមិនគ្រប់ ក៏អាចបង់រំលស់ហើយទិញយករថយន្តថ្មីយកទៅប្រើប្រាស់បានផងដែរ៕

April 28, 2017

រិន សាវ៉េត និងកូនប្រុស ទទួលបានការសណ្តោសប្រណីពីថ្នាក់ដឹកនាំជាន់ខ្ពស់

ភ្នំពេញៈ តារាចម្រៀងលោក រិន សាវ៉េត ដែលមហាជនអាសូរថា ជាតារាចម្រៀងល្បីទ្រនំចម្រៀងក៏ល្អ (ហង្សមាស) តែខ្សត់ទ្រព្យ ថែមជូបទុក្ខផ្ទួនជាន់លើផ្ទួន ពេលនេះប្រពន្ធក៏ស្លាប់ចោលឲ្យរស់តែលតោងជាមួយកូនប្រុសវ័យ ៦ ឆ្នាំ ដែលកំព្រាម្តាយ ។ រំពេច ដែលទុក្ខក៏មិនទាន់រសាយ ក៏ទទួលបានការសណ្តោស ពីលោក ឃ្លាំង ហួត ជាអភិបាលខណ្ឌជ្រោយចង្វារ ផ្តល់អំណោយផ្ទះមួយល្ហែងនិងធានាជួយចិញ្ចឹម កូនប្រុសកំព្រា តារាចម្រៀង ម្តាយឲ្យមានអនាគតទៀតផង។

ព្រមទាំងសប្បុរសធម៌ជាច្រើន ក៏នៅមានបរិច្ចាគនូវថវិកា ជួយជ្រោមជ្រែង សម្រាប់ពិធីបុណ្យខួបគម្រប់ ៧ថ្ងៃប្រពន្ធតារាចម្រៀង រិន សាវ៉េត នោះ ។ លោក ឃ្លាំង ហួត ដែលជាអភិបាលខណ្ឌ ជ្រោយចង្វារ ដែលកន្លងមកក៏ធ្លាប់បានផ្តល់អំណាយម៉ូតូមួយគ្រឿងឲ្យទៅតារាចម្រៀងខ្សត់ទ្រព្យ លោក រិន សាវ៉េត និងថវិកាព្យាបាលសពនោះ លោកអភិបាលក៏បានផ្តល់ជួបនូវថវិកាមនុស្សធម៌ដល់តារាចម្រៀងខ្សត់ទ្រព្យលោក រិន សាវ៉េត ចំនួនជិត៧ពានដុល្លារ សម្រាប់ចាត់ចែងធ្វើបុណ្យខួបសពប្រពន្ធគម្រប់ ៧ ថ្ងៃ ។ ប៉ុន្តែបន្ថែមថវិកា ដែលលោកអភិបាល បានពីការកៀងគរពីសប្បុរធម៌ លោក ក៏ប្រគល់ជួបដល់តារាចម្រៀងខ្សត់ទ្រព្យ និងទើបក្លាយជាបុរសពោះម៉ាយកូនមួយរូបនេះ នូវផ្ទះមួយល្ហែងឲ្យរួមរស់ជុំកូនប្រុសកំព្រាម្តាយ វ័យ ៦ ឆ្នាំ ឈ្មោះ សាវ៉េត អវតា។ នាជំនួបទទួលអំណោយផ្ទះ ពីលោក អភិបាលខណ្ឌជ្រោយចង្វារនោះ ក៏មានតារាសម្តែងនិងកំប្លែង មានលោក ហម ឈរ៉ា និងនាយ ក្រឹម ចូលរួមផងដែរ ។ ខណៈដែលលោក រិន សាវ៉េត ក៏ហាក់មានភាពស្រស់ស្រាយ រសាយនូវទុក្ខពីខ្លួន ប្រពន្ធស្លាប់ចោលនោះខ្លះ។

លោក ឃ្លាំង ហួត បង្ហាញឲ្យដឹងថា៖ « ខ្ញុំបានកៀងគរពីម្ចាស់ជំនួយផ្សេងៗសរុបប្រមូលប្រាក់បានប្រហែល ៧០០០ ដុល្លារ ជូនទៅតារាចម្រៀង រិន សាវ៉េត ដើម្បីយកទៅធ្វើបុណ្យ៧ថ្ងៃ ជូនប្រពន្ធ»។ លោកអភិបាល ក៏បញ្ជាក់ថា «ថែមលើថវិកានេះ ខ្ញុំផ្ដល់ផ្ទះ ឲ្យតារាចម្រៀងរូបនេះស្នាក់នៅផ្ទះចំនួន២ឆ្នាំ ដោយមិនឲ្យបង់ថ្លៃទឹកភ្លើង ដែលសុំការអធ្យាស្រ័យពីឧកញ៉ា ពង់ ឃាវសែ ដើម្បីជួយសម្រួលការងាររស់នៅស្នាក់អាស្រ័យសមរម្យនោះ»។ បន្ថែមនោះអភិបាល ខណ្ឌជ្រោយចង្វារ ដែលធ្លាប់ផ្តល់អំណោយជូនតារាចម្រៀងល្បីនៅផលិតកម្មហង្សមាស ខ្សត់ទ្រព្យ លោក រិន សាវ៉េត នោះ លោក ឃ្លាំង ហួត អះអាងទៀតថា៖ «ខ្ញុំសន្យាថា នឹងជួយកូនប្រុសលោក រិន សាវ៉េត ឲ្យរៀនលុះមានអនាគតផង»។

សាទរពីទឹកចិត្តទួលាយដែលទទួលបាន ពីលោក អភិបាលខណ្ឌជ្រោយចង្វារនេះ តារាចម្រៀងរិន សាវ៉េត ឲ្យដឹងថា៖ «ខ្ញុំគ្មានអ្វីលើសពីភាពសប្បាយចិត្ត ទាំងការបានផ្ទះស្នាក់នៅជុំកូន និងបានប្រាក់យកទៅធ្វើបុណ្យសពប្រពន្ធឲ្យសមតាម ទឹកចិត្តបុណ្យពីសប្បុរសធម៌ទាំងអស់នោះទេ »។ ក្រោយពីវិនាទីបង្ហាញពីទឹកចិត្ត ខ្ចីផ្ទះពី ឧកញ៉ា ពង់ ឃាវសែ ឲ្យរិន សាវ៉េត ស្ទាក់នៅជាមួយកូនកំព្រានោះ នៅវេលាម៉ោង៣និង៥១នាទី ថ្ងៃទី២៧នេះ លោក អភិបាលខណ្ឌជ្រោយចង្វារ បានបង្ហោះសារបង្ហាញថា៖ «ដំណឹងទាន់ហេតុការណ៍!សម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន បានទិញផ្ទះដែលខ្ញុំបានខ្ចីឲ្យ រិន សាវេត រស់នៅជូនជាកម្មសិទ្ធផ្ទាល់ខ្លួនរបស់ រិនសាវ៉េត តែម្ដង៕

April 28, 2017

គុណសម្បត្តិ 4ចំណុច ដែលមេដឹកនាំត្រូវតែមាន

វាពិតណាស់ដែលថាការងារមួយអាចរីកចម្រើនទៅមុខបាន វាអាស្រ័យទៅលើការមានក្រុមការងារដ៏ល្អ និងស៊ីចង្វាក់គ្នា ស្របពេលនោះដែលក៏ត្រូវតែមានមេដឹកនាំមួយរូបដ៏អស្ចារ្យ និងពោរពេញដោយបទពិសោធន៍ ចំណេះដឹង និងភាពជាអ្នកដឹកនាំផងដែរ ដើម្បីដឹកនាំក្រុមការងារទាំងនេះឱ្យទទួលបានជោគជ័យ។ បើគ្មានមេដឹកនាំទេ ការងារទាំងឡាយមិនបានជោគជ័យនោះទេ អ៊ីចឹងហើយបានជាមេដឹកនាំគឺជាមនុស្សដែលសំខាន់បំផុតនៅក្នុងក្រុមការពីព្រោះគេដឹងថាក្រុមនេះនឹងធ្វើដំណើរទៅទីណា។

ខាងក្រោមនេះគឺជាអ្វីដែលមេដឹកនាំត្រូវដឹង និងត្រូវធ្វើ៖

០១) មេដឹកនាំមិនគួរប្រៀបធៀបជំនាញបច្ចេកទេសរបស់ខ្លួន ជាមួយនឹងជំនាញបច្ចេកទេសរបស់បុគ្គលិកនោះទេ។ ព្រោះការធ្វើបែបនេះ គឺអាចធ្វើឱ្យបុគ្គលិកបាក់ទឹកចិត្ត ឬមានអារម្មណ៍មិនល្អក្នុងការធ្វើការជាមួយ ប៉ុន្តែអ្នកត្រូវចងចាំថា ត្រូវជ្រើសរើសបុគ្គលិកណាដែលមានជំនាញច្បាស់លាស់ និងខ្លាំងជាងអ្នក។

២) មេដឹកនាំគួរតែមានទស្សនៈវិស័យវែងឆ្ងាយ និងមានការយល់ឃើញច្បាស់លាស់ជាងបុគ្គលិករបស់ខ្លួន។

៣) មេដឹកនាំគួរតែមានចិត្តរឹងមាំ និងភាពអំណត់តស៊ូច្រើនជាងបុគ្គលិក ហើយនិងអាចស៊ូទ្រាំនូវអ្វីដែលបុគ្គលិកធ្វើមិនបាន។

៤) មេដឹកនាំគួរតែមានការតស៊ូអត់ធ្មត់ ហើយនិងសមត្ថភាពខ្ពស់ជាងក្នុងការទទួលយកប្រឈមជាមួយនឹងការបរាជ័យ។

គុណសម្បតិ្តរបស់មេដឹកនាំដែលល្អគឺជាការមានចក្ខុវិស័យច្បាស់លាស់ ចិត្តរឹងមាំ និងភាពអំណត់តស៊ូ ហើយនិងសមត្ថភាព៕

April 28, 2017

ឈិន សុធារី បង្ហូរទឹកភ្នែកទាំងមិនអស់ចិត្តពេល ស្វាមី សុវណ្ណ មករា ប្រកាសលែងស្ងាត់ៗ

ភ្នំពេញ : ក្រោយពីត្រូវលោក សុវណ្ណ មករា ដែលជាស្វាមីប្រកាសក្ដែងៗរើសយកដំណោះស្រាយបញ្ចប់ចំណងអាពាហ៍ពិពាហ៍ ត្រឹមបង្កើតបានដំណក់ឈាមកូនភ្លោះវ័យជាង ១ ខួបរួមគ្នានោះពិធីការិនីរូបស្រស់អ្នកនាង ឈិន សុធារី បានត្រឹមតែសម្ដែងអារម្មណ៍ឈឺចាប់ ទាំងមិនអស់ចិត្តនឹងមូលហេតុដែលនាំឲ្យលោក សុវណ្ណ មករា ក៏ប្រើពាក្យថា «អតីតឧត្តមភរិយា» ចំពោះរូបអ្នកនាង។ ក្រោយពីរួមរឹតរឿងអាស្រូវផលិតក្បត់ ល្បីទាំងស្នេហាក្រៅឆាក ជាមួយតារាស្រីរលកថ្មីផ្អើលអស់ពិភពសិល្បៈ រហូតធ្វើឲ្យភរិយាស្ទើរតែហត់នឹងជូតទឹកភ្នែកនោះ ផលិតករ និងតារាសម្ដែងលោក សុវណ្ណ មករា កាលពីរាត្រីថ្ងៃទី២៧ ខែមេសា យប់មិញនេះ លោកបានទម្លាយសារយ៉ាងវែងអន្លាយ ទទួលស្គាល់កំហុសឆ្គងរបស់ខ្លួនយ៉ាងច្រើនអនេក។

សារដែលបង្ហោះកាលពីយប់មិញ លោក សុវណ្ណ មករា បានពោលឡើងថា៖ «ជូន ធារី អតីតឧត្តមភរិយាបង។ បងទទួលស្គាល់ថា បងមិនមែនជាប្ដីល្អ មិនមែនជាឪពុកល្អទេ។ បងក្រីក្រ ហើយថែមទាំងផឹកស៊ី មានស្រីញីក្រៅផ្ទះទៀត តែអូនមិនដែលខឹងយកទោសអូសដំណើរនឹងបងឡើយ។ អូនថែមទាំងនៅតែស្រឡាញ់បងដដែល។ កំហុសបងគរដូចភ្នំខ្សាច់»។ ទន្ទឹមនឹងការសារភាពនូវទង្វើផិតក្បត់ភរិយា និងការបំពញតួនាទីជាឪពុកមិនបានល្អនោះ លោក សុវណ្ណ មករា ក៏បានរំលេចពាក្យចំៗហៅអ្នកនាង ឈិន សុធារី ជាប្រពន្ធថា «អតីតឧត្តមភរិយា» ដែលហាក់សម្ដែងចេតនាផាត់ចំណងស្នេហាប្ដីប្រពន្ធក្នុងវេលាអតីតកាល ដើម្បីបញ្ចប់រឿងរ៉ាវជីវិតដ៏ស្មុគស្មាញ។ លោក សុវណ្ណ មករា ក៏បានរាយរាប់ពីអារម្មណ៍របស់លោកបន្តទៀតថា៖ «បងពិតជាខ្មាស់អៀនអូនណាស់ គឺខ្មាស់រហូតដល់ថ្នាក់បងត្រូវតែចាកចេញឲ្យឆ្ងាញ់ពីជីវិតអូនជាដាច់ខាត ដើម្បីឲ្យអូនមានអនាគតត្រចះត្រចង់លើវិថីជីវិតថ្មីនៃអូនចុះ។ ចំណែកបងវិញ សូមបន្តជីវិតពាលាដូចសព្វថ្ងៃរបស់បងបន្តទៀត»។ អ្វីដែលរឹតតែធ្វើឲ្យភ្ញាក់ផ្អើលគឺស្វាមីរបស់អ្នកនាង ឈិន សុធារី ក៏បានប្រកាសពីការសម្រេចចិត្តរបស់លោកថា៖ «ចំណែកកូនប្រុសស្រី យើងទាំងពីរ បងសូនចូលរួមអាហារកិច្ចចិញ្ចឹមបីបាច់រហូតដល់កូនយើងធំ អាចចិញ្ចឹមជីវិតពួកគេឲ្យខ្លួនឯងបាន។ និស្ស័យស្នេហ៍យើងដល់វេលាដែលត្រូវតែចប់ហើយអូន គឺចប់ដោយស្នាមញញឹម ចប់ដោយសន្តិភាព យើងអាចរាប់អានគ្នាជាបងប្អូនបានណាអូន…»។

ក្រោយពីលោក សុវណ្ណ មករា បង្ហោះសារសម្ដែងឆន្ទៈចង់ចែកផ្លូវ ជាមួយនឹងភាសាហៅប្រពន្ធថា «អតីតឧត្តមភរិយា» នោះ អ្នកនាង ឈិន សុធារី បានតបវិញជាមួយ រូបភាពបង្ហូរទឹកភ្នែក ភ្ជាប់សំណួរចោទសួរវិញទាំងមិនអស់ចិត្តថា៖ «ហេតុអ្វីប្រើពាក្យអតីត…? ខ្ញុំខុសអ្វី?»។ គួររំឭកថា អតីតពិធីការិនី និងតារាចម្រៀង ឈិន សុធារី បានភពប្រសព្វជីវិតអាពាហ៍ពិពាហ៍ជាមួយតារាសម្តែងពោះម៉ាយ លោក សុវណ្ណ មករា និងបានចូលរោងការកាលពីថ្ងៃទី ២១ ខែតុលា ឆ្នាំ២០១៥ ជាមួយវត្តមានភ្ញៀវចូលរួមចំនួនប្រមាណជាង ២០ តុនៅសណ្ឋាគារ កាំបូឌីយ៉ាណា។ ក្រោយពីចូលរោងការបានប្រមាណជាង ៤ ខែ នៅថ្ងៃទី ២៧ ខែកុម្ភៈគូស្នេហ៍មួយគូនេះ បង្កើតបានបានកូនភ្លោះប្រុសស្រីជាចំណងស្នេហ៍៕

April 28, 2017

អេនជី រន្ធត់ចិត្តចង់ជួយទារិកាម្តាយដាក់ក្នុងធុងអាំងពងមាន់

ភ្នំពេញៈ ក៏ព្រោះតែទឹកចិត្តអាណិតអាសូរកូន ក្នុងនាមភាពជាម្តាយមួយរូប ខណៈដែលខ្លួនទើបសម្រាលកូនប្រុសវ័យ ៥ ខែ ធ្វើឲ្យពិធីការិនីសម្តីផ្អែមស្រាលប្រចាំទូរទស្សន៍អាស៊ីអាគ្នេយ៍ និងភីអិនអិន អ្នកនាង លី ច័ន្ទដាលីស ហៅកញ្ញា អេនជី រំជួលចិត្តយ៉ាងខ្លាំងក៏ប្រកាសជជីកសួររកលេខទូរសព្ទដៃស្ត្រីជាម្តាយ របស់ទារិកា ដែលដាក់កូនក្នុងរទេះធុងក្បែរចង្អើរអាំងពងមាន់គួរឲ្យ សង្វេកនោះភ្លែតហ្មង!

កើតចេញពីរូបភាពកូនង៉ែតមួយសន្លឹក ដែលបានបង្ហោះក្នុងបណ្តាញហ្វេសប៊ុកជាមួយនឹងសារមួយឃ្លាថា៖ «ទោះទុក្ខម៉ែធ្ងន់ដូចភ្នំសង្កត់ក៏ម៉ែមិនចោលកូនដែរ» ធ្វើឲ្យអ្នកនាង អេនជី ក្តុកក្តួលក្នុងចិត្តកើតនូវក្តីអាណិតអាសូរដល់ទារិកាក៏សួរថា៖ «មាននរណាស្គាល់លេខទូរសព្ទគាត់ទេ?»។ អ្នកនាង លី ច័ន្ទដាលីស បង្ហើបថា៖ «គ្រាន់តែបានឃើញរូបគេបង្ហោះ ក៏មានចិត្តអាណិតអាសូរដល់ក្មេងនោះភ្លាម ព្រោះខ្ញុំយល់ពីអារម្មណ៍ដែលកំពុងតែមានកូនតូចដែរ។ ហើយខ្ញុំក៏គិតថា ហេតុអ្វីក្មេងៗមានជីវិតរស់លើផែនដីតែមួយ ចុះម៉េចក៏មានវាសនាខុសគ្នាអ៊ីចឹងវិញហ្ន?»។

ពិធីការិនីរូបស្រស់សោភាដែលទើបវិលចូលបម្រើការងារសិល្បៈវិញ ក្រោយពីសម្រាលកូនប្រុសជូនស្វាមីជាអាណិកជនខ្មែរអាមេរិកឈ្មោះលោក ភីធើរ សុធារ៉ាហេង តាំងពីពេលកូនប្រុសមានវ័យត្រឹមមួយខែនោះបន្តថា៖ «មើលទៅក៏ដឹងដែរថា មានសភាពក្តៅខ្លាំងណាស់ ដែលម្តាយដាក់កូននៅក្នុងធុងដែកក្បែរចង្អើរអាំងពងមាន់នោះ។ នេះក៏ដោយសារទឹកចិត្តម្តាយមិនចង់ឲ្យកូនឃ្លាតឆ្ងាយពីខ្លួន។ ការដែលនាងខ្ញុំសួររកលេខទូរស័ព្ទគាត់ជាម្តាយ មិនមែននាងខ្ញុំជាអ្នកមានធនធានស្តុកស្តម្ភអ្វីនោះឡើយ គឺគ្រាន់តែចង់ជួយចែករំលែកការលំបាករបស់គាត់ខ្លះតាមរយៈរូបនាង ខ្ញុំ និងក្រុមមិត្តភក្តិ ឬប្រសិនបើមានបងប្អូនផ្សេងទៀតចង់ចូលរួមជួយសម្រួលនូវទុក្ខលំបាកនេះ ក៏បានគឺយើងជួយខ្មែរដូចគ្នាទៅតាមលទ្ធភាពអាចជួយបានរៀងៗខ្លួន។ តែពេលនេះនាងខ្ញុំ ក៏មិនទាន់បានស្គាល់លេខគាត់ [ម្តាយទារិកាកម្សត់ដាក់ក្នុងធុងពងមាន់អាំង] នៅឡើយទេ។ ហើយប្រសិនបើមានបងប្អូនណាបានស្គាល់ សូមមេត្តាជួយផ្តល់ដំណឹងដល់ខ្ញុំតាមបណ្តាញសង្គមផង ដើម្បីយើងរៀបចំគម្រោងសប្បុរសធម៌ជួយគាត់»។

គួរបញ្ជាក់ថាកញ្ញា អេនជី អតីតជា Freshie-Girl លេខ ៤ ប្រចាំឆ្នាំ ២០០៥ ឈ្មោះដើម លី ច័ន្ទដាលីស ខណៈដែលមហាជនបានស្គាល់នាងខ្លាំងកាលពេលធ្វើជាពិធីការិនីក្នុងកម្មវិធី «តន្ត្រីខារ៉ាបាវ» និង «The Star Variety Show» របស់ទូរទស្សន៍អាស៊ីអាគ្នេយ៍។ ក្រោយពីរៀបអាពាហ៍ពិពាហ៍បាន ៣ ឆ្នាំនឹងបុរសអាណិកជនអាមេរិក អ្នកនាង អេនជី សម្រាលកូនប្រុសដោយការវះកាត់ ជាមួយនឹងវត្តមានស្វាមីនៅជាប់ប្រាណផ្ដល់កម្លាំងចិត្តយ៉ាងកក់ក្ដៅ និងបង្ហោះរូបច្រើនសន្លឹក តាំងពីការត្រៀមខ្លួនវះកាត់សម្រាលកូន ជាសមាជិកថ្មីកាលពីថ្ងៃទី ១១ ខែ ១១ កាលពីឆ្នាំ ២០១៦៕

April 28, 2017

ពេជ្រ សោភា ឆេះដុំព័ត៌មានក្តៅផ្ទួនៗ ប្រកាសជូនរង្វាន់ធំ ១ម៉ឺនដុល្លារ បើដឹងឆ្មបបង្កើតកូននាង

ភ្នំពេញ: កំពូលតារាចម្រៀងស្រីជ្រកកោនលើផលិតកម្មហង្សមាសឡើងដុះស្លែ អ្នកនាង ពេជ្រ សោភា ដែលកំពុងតែបង្កាត់ភ្លើងស្នេហ៍យ៉ាងផ្អែមល្ហែម ជាមួយ លោក ឆឹម សក្កដា តារាសម្ដែងជាសាធារណៈហើយនោះ ក៏លេចចេញព័ត៌មានរិះគន់ផ្ទួនៗគ្នាថា អ្នកទាំងពីរស្រឡាញ់គ្រាន់តែជាការសម្តែង និងថាអ្នកនាង ពេជ្រ សោភា ធ្លាប់មានកូនទៀតផង។

ដោយទ្រាំធ្វើជាគ និងធ្វើថ្លង់ទៅនឹងព័ត៌មានបែកធ្លាយជាមតិរិះគន់បោកបក់នោះមិនបាន ពេជ្រ សោភា ក៏ផ្ទុះប្រតិកម្មតបវិញថា៖ «ខ្ញុំហ៊ានប្រកាសផ្ដល់រង្វាន់ធំ បើសិនជាមានអ្នកអាចរកពេទ្យបង្កើតកូនឲ្យខ្ញុំបាន» និងបន្ទរថា៖ «ម៉េចមានពាក្យរបស់មនុស្សដែលនិយាយថា ខ្ញុំធ្លាប់មានកូន ៣នាក់រួចទៅហើយចឹងហ្ន?»។ សម្ដីបែបតឹងសរសៃក ប្រតិកម្មព័ត៌មានគេថាមានកូនបីនាក់នោះ ពេជ្រ សោភា ប្រកាសថា ប្រសិនបើមានអ្នកណារកឃើញពេទ្យ ឬឆ្មបដែលអះអាងថាធ្លាប់បង្កើតកូនឲ្យនាង គឺអ្នកនាងស្ម័គ្រចិត្តផ្ដល់រង្វាន់ជាទឹកប្រាក់ ១ ម៉ឺនដុល្លារ ហើយក៏មិនមានការខឹងសម្បានឹងឆ្មបនោះដែរ។

តារាចម្រៀងក្នុងទ្រនំហង្សមាស នាង ពេជ្រ សោភា ដែលមិនភ្លេចពាក្យសម្ដីថា ខ្លួនមិនមែនជាមនុស្សគេចវេសការពិត និងធ្លាប់ចូលរោងការដោយបើកចំហជាមួយនឹងអតីតស្វាមីអាណិកជនអាមេរិកឈ្មោះលោក ឡៅ ឆាលី បានពោលថា៖ «ខ្ញុំមិនមែនជាតារាដែលមានទម្លាប់រស់នៅជាមួយគ្នា មិនបានរៀបការនោះឡើយ»។ អ្នកនាង ពេជ្រ សោភា តារាចម្រៀងស្រីមានប្រវត្តិចេញពីអ្នកលក់អំពៅសាង អ្នកនាង ពេជ្រ សោភា និងជាគ្រូបង្វឹកល្បីរបស់ The Voice Cambodia បានឆ្លើយទៅនឹងពាក្យចចាមអារ៉ាមដោយការអះអាងថា៖ «ខ្ញុំ និងលោក ឆឹម សក្កដា ស្រឡាញ់គ្នាដោយបើកចំហ មិនមែនជាស្នេហាលួចលាក់កំបាំងភ្នែកនោះទេ។ រវាងស្នេហាខ្ញុំ និងលោក ឆឹម សក្កដា មិនមែនជាស្នេហាដើម្បីតោងការលីបគ្នា ហើយខ្ញុំថែមទាំងហ៊ានស្បថឲ្យស្លាប់ទៀតផង បើនាងខ្ញុំ និងឆឹម សក្កដា ធ្លាប់បានរួមរស់ជាមួយគ្នា និងមិនបានឈានដល់ការរួមរស់ក្រោមដំបូលជាមួយគ្នាដូចពាក្យរិះគន់នោះដែរ»៕

April 28, 2017

Author: វល័ក្ខ