Author: វល័ក្ខ

Ronaldo ធ្វើឲ្យ Atletico ត្រូវការអព្ភូតហេតុ ដើម្បីសង្គ្រោះការធ្លាក់ចេញ
កំណត់ត្រានៃការរកគ្រាប់បាល់បញ្ចូលទីរបស់ខ្សែប្រយុទ្ធ Cristiano Ronaldo ត្រូវបានចាត់ទុកថា ជាកំណត់ត្រាពិសេសតែមួយ ដោយលោកគ្រូបង្វឹក Zinedine Zidane ខណៈដែលការរកគ្រាប់បាល់បញ្ចូលទី៣គ្រាប់របស់គេ បានជួយឲ្យក្រុម Real Madrid ស្ថិតយ៉ាងប្រកៀកក្នុងការឈានទៅវគ្គផ្តាច់ព្រ័ត្រមួយផ្សេងទៀតនៃក្របខ័ណ្ឌ Champions League តាមរយៈការផ្តួលក្រុម Atletico Madrid ៣-០ កាលពីថ្ងៃអង្គារ។
ការស៊ុតបាល់បញ្ចូលទី៣គ្រាប់របស់ Ronaldo គឺជាការរកបានជាលើកទី២នៅពេលប្រកួតជាមួយនឹងក្រុម Atletico នៅរដូវកាលនេះ និងជាលើកទី២ជាប់ៗគ្នាក្នុងក្របខ័ណ្ឌ Champions League ក្រោយពីក៏បានស៊ុតបាល់បញ្ចូលទី៣គ្រាប់ផងដែរដើម្បីផ្តួលក្រុម Bayern Munich ក្នុងការប្រកួតវគ្គ៨ក្រុមចុងក្រោយ។ លោក Zidane បានឲ្យដឹងថា៖ «ការរកគ្រាប់បាល់បញ្ចូលទីគឺជាសមត្ថភាពដែលរូបគេមានខ្លាំងជាងកីឡាករផ្សេងៗ ដែលធ្វើឲ្យរូបគេមានលក្ខណៈយ៉ាងពិសេសតែមួយ»។ ការទទួលជ័យជម្នះនេះបានធ្វើឲ្យក្រុម Real បន្តធ្វើការគ្រប់គ្រងលើក្រុម Atletico ក្នុងក្របខ័ណ្ឌ Champions League ក្នុងរយៈពេលបួនរដូវកាលចុងក្រោយនេះ។
Real បានទម្លាក់ក្រុមរបស់លោក Diego Simeone រាល់ការជួបគ្នាទាំង៣លើកក្នុងក្របខ័ណ្ឌកំពូលអឺរ៉ុបរយៈពេល៣រដូវកាលចុងក្រោយនេះ ក្នុងនោះរាប់បញ្ចូលទាំងក្នុងវគ្គផ្តាច់ព្រ័ត្រកាលពីឆ្នាំ២០១៤ និងឆ្នាំ២០១៥ ផងដែរ។ Ronaldo បានធ្វើឲ្យក្រុម Real Madrid ចាប់ផ្តើមយ៉ាងល្អតាមរយៈការរកគ្រាប់បាល់បើកឆាកនៅទីនាទី ទី១០ មុននឹងស៊ុតបាល់បញ្ចូលទី២គ្រាប់ទៀតនៅរយៈពេល២០នាទីចុងក្រោយ។ Ronaldo បានឲ្យដឹងថា៖ «ក្រុមនេះពិតជាអស្ចារ្យណាស់។ ខ្ញុំបានរកគ្រាប់បាល់បញ្ចូលទី ប៉ុន្តែ ក្រុមនេះ លេងបានយ៉ាងអស្ចារ្យតាំងពីចាប់ផ្តើមប្រកួត»។ ការទទួលជ័យជម្នះក៏បានជួយឲ្យ Real ស្ថិតនៅផ្លូវក្នុងការក្លាយជាក្រុមដំបូងគេក្នុងការការពារពាន Champions League យ៉ាងជោគជ័យក្នុងរយៈពេល២៧ឆ្នាំ៕
ប្រភពពី៖ worldsoccertalk
May 3, 2017
សារ៉ាយ សក្ខណា ក្តាប់ឱកាសកើបប្រាក់ក្រៅប្រទេស ក្រោយពីអាជីវកម្មនឹងថឹង
ភ្នំពេញៈ តារាសម្តែងស្រីសម្បុរស្រអែម ញញឹមស្រស់ អ្នកនាង សារ៉ាយ សក្ខណា ដែលស្វាមីជាអាណិកជនអាមេរិកមានដើមទុនរាប់សិបម៉ឺនដុល្លារ ដែលទើបតែបើកហាងកែសម្ផស្ស XENO ហើយមមាញឹកការងាររកស៊ីខ្លាំងសឹងតែផ្តាច់ខ្លួនចេញផុតពីការងារសិល្បៈទៅហើយនោះ ឥឡូវក៏ស្រាប់តែចាប់បានឱកាសកើបប្រាក់ពីវិស័យសិល្បៈសាជាថ្មីឡើងវិញ ដោយនាងនឹងត្រូវចេញទៅសម្តែងនៅប្រទេសអូស្រ្តាលីនាថ្ងៃទី៥ ខែ ៥ ខាងមុខនេះ។

ឱកាសចាកចេញទៅសម្តែងក្នុងកម្មវិធីសិល្បៈនោះ ក្រៅពីតារាសម្តែងស្រី ដែលមានស្វាមីជាមេធាវីអាណិកជនមកពីសហរដ្ឋអាមេរិក លោក កែវ មន្រ្តី និងបានពង្រីកការងាររកស៊ីជូនម្តាយគឺហាងស៊ុប យីហោ «Sakhana Family Soup» ស្ថិតនៅក្បែរភោជនីយដ្ឋានហេងហេង ម្ដុំទួលគោកនោះ ក៏ឃើញវត្តមានតារាចម្រៀងស្រីពីរដួងទៀតចូលរួមដែរមានតារាចម្រៀងស្រីអ្នកនាង ឈួន ស្រីម៉ៅ និងអ្នកនាង យ៉ាន លីនដា ដែលអតីតជាភរិយារបស់លោក យ៉ែម សំអូន។

យ៉ាងណាគេក៏មិនបានដឹងច្បាស់ការសម្តែងមានប៉ុន្មានថ្ងៃ ក្នុងគោលដៅអ្វី និងត្រូវវិលត្រឡប់មកវិញពេលណាដែរ ខណៈពេលនេះតារាសម្តែងស្រីបានថតឈុតកុនបញ្ចប់រឿង «ក្រមុំកូន១» ដែលនៅសល់ឲ្យផលិតកម្ម Red Picture និងកុនថ្មីពីររឿងឲ្យផលិតកម្មពីរផ្សេងគ្នា នាពេលអមដំណើរស្វាមីរកទីកន្លែងបើកហាងកែសម្ផស្ស កំពុងតែរួមរស់ជុំស្វាមីនៅឯសហរដ្ឋអាមេរិក មិនអាចទំនាក់ទំនងសាកសួរបានឡើយ។ តែបើតាមប្រសាសន៍របស់អ្នកស្រី ផាន់ សម្ផស្ស ជាម្តាយរបស់តារាសម្តែងស្រី សារ៉ាយ សក្ខិណា បង្ហើបប្រាប់ថា៖ «ការសម្តែងនោះដូចជាត្រូវបានសមាគមខ្មែរនៅអូស្រ្តាលីអញ្ជើញគាត់ [សក្ខណា] ទៅ ហើយខ្ញុំក៏មិនដឹងច្បាស់ដែរថា មានចំនួនប៉ុន្មានថ្ងៃ តែដូចជាឮថា មានរយៈពេលមិនយូរឡើយគឺប្រហែលរយៈពេលខ្លីតែប៉ុណ្ណោះ»។ អ្នកស្រី ផាន់ សម្ផស្ស ក៏បានប្រលយឲ្យដឹងបន្តថា៖ «គាត់មិនប្រាប់ថា នឹងត្រូវមកស្រុកខ្មែរវិញសិននោះទេ ប្រហែលជាគាត់ចេញដំណើរពីអាមេរិកឆ្ពោះទៅកាន់ប្រទេសអូស្រ្តាលី តែម្តងហើយមើលទៅ។ ឯរឿងមើលការខុសត្រូវលើហាងកែសម្ផស្ស ដែលពីមុនគ្មានអ្នកមើលនោះ ឥឡូវនេះនាងដូចជារកបានអ្នកមើលការខុសត្រូវជំនួសហើយដែរ ទើបបានជានាងហ៊ានព្រលែងដៃបែបនេះ»៕

May 3, 2017
គន្លឹះក្នុងការចាប់ផ្ដើមអាជីវកម្មដោយប្រើប្រាស់ដើមទុនតិច
សហគ្រិនជាញឹកញាប់មានគំនិតធ្វើអាជីវកម្មដ៏អស្ចារ្យ ប៉ុន្តែអ្វីដែលជាឧបសគ្គរបស់ពួកគាត់គឺការខ្វះដើមទុនដើម្បីចាប់ផ្ដើមអាជីវកម្ម។ ដើមទុនគឺជារឿងដ៏សំខាន់បំផុតមួយចំណោមបញ្ហាទាំងអស់ ដើម្បីបង្កើតអាជីវកម្មមួយឱ្យដំណើរការទៅមុខបាន។
ខាងក្រោមនេះគឺជាគន្លឹះមួយចំនួនក្នុងការចាប់ផ្ដើមអាជីវកម្មដោយប្រើប្រាស់ដើមទុនតិច៖
១) ចូរបង្កើតអាជីវកម្មណា ដែលប្រើចំណេះ និងជំនាញរបស់អ្នក
វាអាចជាការចាប់ផ្ដើមដោយប្រើដើមទុនតិច ឬក៏គ្មានដើមទុន នៅពេលដែលអ្នកបើកអាជីវកម្មណា ដែលដោយប្រើចំណេះ និងជំនាញច្បាស់លាស់របស់អ្នក។ នៅពេលអ្នកបង្កើតអាជីវកម្មមួយឡើង ដោយប្រើចំណេះ ជំនាញ និងបទពិសោធន៍ នោះការចំណាយក្នុងការបង្កើតអាជីវកម្មគឺអស់តិច ហើយភាពបរាជ័យក៏មានតិចផងដែរ។ លើសពីនេះទៅទៀត នៅពេលដែលអាជីវកម្មរបស់អ្នកត្រូវបានបង្កើតឡើងដោយជំនាញផ្ទាល់ខ្លួន នោះអ្នកអាចកាត់បន្ថយការចំណាយមួយចំនួនទៅលើទីប្រឹក្សា ជំនួយការ រួមទាំងបុគ្គលិក។
២) ជៀសវាងការចំណាយណាមួយដែលមិនចាំបាច់
នៅពេលដែលអ្នកចាប់ផ្ដើមអាជីវកម្មមួយ អ្នកនឹងមានការចំណាយយ៉ាងច្រើន ហើយការចំណាយខ្លះមិនអាចជៀសផុត ដូច្នេះហើយអ្នកត្រូវគិតឱ្យបានល្អិតល្អន់ទៅលើការចំណាយដែលចាំបាច់ និងចំណាយមិនចាំបាច់។ ចូរសន្សំសំចៃនៅពេលដែលអ្នកកំពុងតែចាប់ផ្ដើមជាលើដំបូង ពីព្រោះវានឹងធ្វើឱ្យក្រុមហ៊ុន ឬក៏អាជីវកម្មរបស់អ្នក អាចនឹងជួបការបរាជ័យ។ ចូរប្រុងប្រយ័ត្ន និងមានការកត់ត្រាឱ្យបានត្រឹមត្រូវរាល់ការចំណាយទាំងអស់របស់ក្រុមហ៊ុន៕
May 2, 2017
អ្នកកើតជំងឺឈឺឆ្អឹងរ៉ាំរ៉ៃ គួរពិសារទឹកនេះ
សម្រាប់អ្នកកើតជំងឺឈឺឆ្អឹង ឈឺសន្លាក់ដៃជើង ដែលមានសភាពយូរឆ្នាំរ៉ាំរ៉ៃ មានអារម្មណ៍ពិបាកតានតឹងនៅក្នុងខ្លួននោះ លែងមានកង្វល់ទៀតហើយ ដោយថ្ងៃនេះគេហទំព័រ La Reine បាននាំយកអត្ថបទមួយដែលនិយាយអំពីប្រសិទ្ធភាពនៃការទទួលទាន ទឹកខ្ជាយ ដែលជាជំនួយព្យាបាលជំងឺឈឺឆ្អឹង និងជួយការពារពីជំងឺពុកឆ្អឹង ជាពិសេសសម្រាប់មនុស្សមានវ័យចំណាស់ ។
គ្រឿងផ្សំ៖
-ខ្ជាយ ១ ចាន
-ទឹកឃ្មុំ
-ក្រូចឆ្មា
-ទឹកឆ្អិន ឬទឹកបរិសុទ្ធ ។
វិធីធ្វើ៖
– ក្រឡុកខ្ជាយជាមួយទឹកឆ្អិនឱ្យហ្មត់
– ដួសពពុះ និងច្រោះកាកខ្ជាយចេញ
– លាយទឹកខ្ជាយ កន្លះកែវ ជាមួយក្រូចឆ្មា ១ ចំណិត និងទឹកឃ្មុំ ១ ស្លាបព្រាបាយ ។
ការអនុវត្ត
លោកអ្នកអាចទទួលទានក្នុងមួយថ្ងៃ ២ដង ក៏ប៉ុន្ដែអ្នកដែលមានបញ្ហាក្រពះមិនគួរទទួលទានច្រើនឡើយ ហើយនៅក្នុងរយៈពេលពី ៣ ទៅ៤ថ្ងៃ នោះនឹងទទួលបានលិទ្ធផល ហើយមានអារម្មណ៍ថាធូរសះស្បើយជាងមុនមិនខាន។ កាន់តែជាក់ច្បាស់សូមទស្សនាវីដេអូ ធ្វើទឹកខ្ជាយខាងក្រោមនេះ៕
May 2, 2017
ថៃបំភ្លៃប្រវត្តិសាស្រ្ដខ្មែរទៀតហើយ ក្នុងរឿង «บ่วงนาคราช»
នាពេលឆាប់ៗខាងមុខនេះ រឿងភាគទូរទស្សន៍ថៃដែលមានចំណងជើងថា “บ่วงนาคราช ( បួងណាឃរាត)” ដែលមានន័យជាខេមរៈភាសាថា “អន្ទាក់នាគរាជ” របស់ស្ថានីយ៍ទូរទស្សន៍ថៃប៉ុស្ដិ៍លេខ 5 ក្រោមការដឹកនាំសម្ដែងដោយលោក Mink Penchan របស់វណ្ណកម្ម Nakara 999 ចំកាត់ ហើយនឹងដាក់បញ្ចាំងរៀងរាល់ថ្ងៃអង្គារ៍ វេលាម៉ោង 20៖20នាទីយប់ ដល់ម៉ោង 21៖20នាទីយប់ ខាងមុខនេះ។
រឿងអន្ទាក់នាគរាជ ជារឿងរ៉ាវរបស់ “អាពូ” ដែលជាអ្នកនិពន្ធស្រីមានស្នាដៃល្បីល្បាញ ដែលនាងបានជួបរឿងរ៉ាងនៅអតីតកាល មានទាំងសេចក្ដីស្នេហា គំនុំ ការយល់ច្រឡំ ដែលបានធ្វើឱ្យទីក្រុងទាំងមូលរលំរលាយ ហើយមានពាក់ព័ន្ធជាមួយ ព្រះបាទជ័យវរ្ម័ន (พระเจ้าธัญญะวรมัน ) ព្រះនាង សោមាសិវិកាទេវៈទេវី (พระนางโสมาสีวิกาเทวะนาคเทวี ) និងព្រះនាង ក័ងសាតាវាទី ស្រីសុរិយវរ្ម័ន្ទ្រា (กังสตาลวาตี ศรีสุริยวรมัตตรา ) ជានារីសាហាវបំផុតនៅសម័យខម (ខ្មែរ) បុរាណ និងជាពេលវេលាវដ្ដកម្មតាមស្នងទាន់ហន់ ហើយទើបអន្ទាក់កម្មចាប់ផ្ដើមដំណើរការ នោះបានជាអ្នកនិពន្ធ អាពូ ត្រូវបានដោះស្រាយប្រស្នាកម្ម ដើម្បីរំលត់ចិត្តដែលបានជាប់ក្នុងអន្ទាក់កម្ម។
គួរកត់សម្គាល់ផងដែរថា មូលន័យរឿងទាំងស្រុងដែលបានរៀបរ៉ាប់ខាងលើនេះ បានបង្ហាញថា មិនមែនជារឿងរបស់ថៃឡើយ តែជារឿងរ៉ាវរបស់ជនជាតិខ្មែរ ក្នុងប្រទេសកម្ពុជា នាសម័យមហានគរ ក៏ប៉ុន្ដតែត្រូវអ្នកនិពន្ធថៃស្រីមួយរូប បានស្រមើលស្រម៉ៃ ច្នៃនិពន្ធរឿងឡើង សរសេរជារឿងប្រឌិតថ្មី ហើយសម្ដែងជារឿងភាគដាក់បញ្ចាំងទូរទស្សន៍ទៀត។ តើអ្នកយល់បែបណាក្នុងនាមអ្នកជាកូនខ្មែរមួយរូប ចំពោះរឿងនេះ? ប្រសិនបើអ្នកមិនបានសិក្សាពីប្រវត្តិសាស្ត្រខ្មែរ នោះអ្នកនឹងយល់ច្រឡំ ប៉ុន្តែបើសិនជាអ្នកបានសិក្សាពីប្រវត្តិសាស្ត្រខ្មែរ នោះអ្នកនឹងដឹងច្បាស់ថា រឿងថៃមួយនេះ គឺពិតជាបានកាឡៃប្រវត្តិសាស្ត្រខ្មែរពិតៗ។
គួរបញ្ជាក់ផងដែរថា ចាប់ពីថ្ងៃអង្គារ៍ទី 09 ខែឧសភា ឆ្នាំ2017 នេះនឹងមានការធ្វើពិធីបួងសួងក្រុងពាលីរឿងនៅខេត្តស្រះកែវ ហើយចាប់ផ្ដើមដំណើរការថតរឿងតែម្ដង៕
May 2, 2017
Nicki Minaj បញ្ចេញវីដេអូចម្រៀងសិចស៊ីរោលរាល
នៅទីបំផុតតារាចម្រៀងរ៉េបល្បីឈ្មោះ Nicki Minaj បញ្ចេញដើមទ្រូងដ៏សិចស៊ីជាមួយការអង្អែលរបស់តួប្រុស នៅក្នុងវីដេអូចម្រៀងថ្មីរបស់នាង។
នៅថ្ងៃទី ១ ខែឧសភា ឆ្នាំ២០១៧ តារាចម្រៀងស្រីល្បីឈ្មោះ Nicki Minaj បានបញ្ចេញវីដេអូចម្រៀងថ្មីរបស់នាង ដែលមានចំណងជើងថា ” Regret In Your Tears ” តាមរយៈបញ្ចេញនូវស្ទីលសម្ដែងយ៉ាងសិចស៊ីរោលរាលជាមួយតារាចម្រៀងប្រុស ទាំងនៅក្នុងទឹក និងនៅលើគ្រែ។ វីដេអូចម្រៀងថ្មីរបស់តារាស្រីវ័យ ៣៤ឆ្នាំ ខាងលើនេះ ត្រូវបានដឹកនាំសម្ដែងដោយអ្នកដឹកនាំ Mert និង Marcus ហើយតម្រូវឱ្យតារាស្រី Nicki Minaj បង្ហាញនូវបទពិសោធសម្ដែងថ្មី បែបក្ដៅសាច់តាមលំនាំសាច់រឿងឈុតស្នេហានៅលើគ្រែ។
គួរបញ្ជាក់បន្ថែមថា វីដេអូចម្រៀងនេះត្រូវបានបង្ហោះនៅលើបណ្ដាញសង្គម YouTube ក្នុងគណនីដែលមានឈ្មោះថា Arnoldo González នៅថ្ងៃទី ១ ខែឧសភា នេះ ដែលរហូតមកដល់ម៉ោងនេះពេលនេះ គណនី YouTube ផ្ទាល់របស់ Nicki Minaj នៅមិនទាន់បានបង្ហោះវីដេអូចម្រៀងនេះឡើយ ៕
សូមទស្សនាវីដេអូចម្រៀងខាងក្រោមនេះ ៖
https://www.youtube.com/watch?v=3d_OJKZTMNE
May 2, 2017
ខ្លួនយើងនៅតែមានតម្លៃបំផុតជានិច្ច!
លោកគ្រូបានចាប់ផ្តើមការសន្ទនានៅក្នុងបន្ទប់រៀនដោយការយកក្រដាសប្រាក់ 100000 រៀល(មួយសែន) មួយសន្លឹកចេញមកឱ្យសិស្សទាំងអស់មើល ហើយសួរថា “មានអ្នកណាចង់ខ្លះបាន?“ និស្សិតទាំងអស់លើកដៃឡើងតំណាលគ្នា ។
លោកគ្រូច្របាច់ញីញក់ក្រដាស់ប្រាក់នោះរហូតឡើងរួញអស់…ហើយសួរឡើងម្តងទៀតថា “នៅមានអ្នកចង់បានលុយមួយសន្លឹកនេះទៀតទេ?“ …ទាំងអស់គ្នានៅតែលើកដៃឡើងដូចមុនដដែល ។
លោកគ្រូសួរបន្តទៀតថា “ឧទាហរណ៍ថា លុយមួយសន្លឹកនេះត្រូវបោះចោលនៅលើដី ហើយមានមនុស្សមកដើរជាន់ឡើងប្រឡាក់កខ្វក់ខ្ទេចខ្ទីអស់ តើនៅតែមានអ្នកចង់បានវាទៀតទេ?“ …និស្សិតទាំងអស់ឆ្លើយព្រមៗគ្នាឡើងថា នៅតែចង់បាន!
លោកគ្រូក៏សរុបសេចក្តីថា…
“វាជារបស់មានតម្លៃ! ដែលពួកអ្នកបានដឹងនៅថ្ងៃនេះ…ទោះជាអ្នកចង់ធ្វើអ្វីចំពោះក្រដាសប្រាក់មួយសន្លឹកនេះក៏ដោយ ក៏វានៅតែមានតម្លៃ 100000រៀលជានិច្ច…ជីវិតមនុស្សយើងក៏ដូចគ្នាដែរ ពេលខ្លះ យើងអាចត្រូវគេបោះបង់ចោល ត្រូវអ្នកឯទៀតស្តីបន្ទោស ជាន់បន្ថែម មើលងាយជាន់ឈ្លី ឡើងយ៉ាប់យ៉ឺន…ដោយសារតែការភ្លាត់ភ្លាំងក្នុងការឈានជើងដើរនៅក្នុងជីវិត រហូតធ្វើឱ្យកើតមានអារម្មណ៍ថា ខ្លួនឯង ”គ្មានតម្លៃ!!!“ …។
តែ…អ្នកដឹងទេ?…ទោះជាមានអ្វីកើតឡើងក៏ដោយ អ្នកក៏នៅតែមាន “តម្លៃនៃភាពជាមនុស្ស“ ជានិច្ច…
មិនថាអ្នកនៅស្អាតថ្មីច្រឺង ឬក៏ខ្ទេចខ្ទីយ៉ាប់យ៉ឺននោះឡើយ…តែ “ខ្លួនយើងក៏នៅតែមានតម្លៃបំផុតជានិច្ច“
ចូរចាំទុកឲ្យច្បាស់!
រៀបរៀងដោយ តាវ៉ែនតា
May 2, 2017
ដឹងអត់ ទទួលទានល្ងខ្មៅរាល់ថ្ងៃមានអត្ថប្រយោជន៍អ្វីខ្លះ?
ល្ងខ្មៅ ជាអាហារមួយប្រភេទដែលមានអត្ថប្រយោជន៍បំផុត ព្រោះវាមានសារធាតុចិញ្ចឹម និងថែរក្សារាងកាយរបស់មនុស្សយើងបានយ៉ាងល្អ ។ ល្ងខ្មៅ ជាគ្រាប់ធញ្ញជាតិតូចៗ ដែលសម្បូរជីវជាតិ និងគុណសម្បតិ្តជួយថែរក្សាសុខភាពបានល្អ ដូច្នោះហើយទើបល្ងខ្មៅជាអាហារដែលជាប់លំដាប់ថ្នាក់កំពូល នៃអាហារដែលមានសារៈប្រយោជន៍ចំពោះរាងកាយ ដែលលោកអ្នកមិនគួររំលង ។ តើអ្នកធ្លាប់បានដឹងខ្លះទេថា នៅក្នុងគ្រាប់ល្ងខ្មៅតូចៗ មានសារធាតុអ្វីខ្លះ ហើយមានគុណប្រយោជន៍អ្វីខ្លះ ?
យោងតាមវេជ្ជបណ្ឌិតជំនាញបានឲ្យដឹងថា អ្នកវិទ្យាសាស្រ្ដបានឡើងអំពីល្ងខ្មៅថា ជាគ្រាប់ធញ្ញជាតិដែលមានកំណើតចេញពីប្រទេស អេត្យូពី បាននាំចូលមកដល់ប្រទេស ឥណ្ឌា ចិន អាហ្វ្រិកខាងជើង និងអាស៊ី កាលពី ២០០០ឆ្នាំមុន ហើយល្ងខ្មៅជាប្រភេទល្ងតែមួយនឹងល្ងស។ អ្នកវិទ្យាសាស្រ្ដបានបន្ដទៀតថា បើទទួលទានល្ងខ្មៅ ១០០ក្រាមនោះ លោកអ្នកទទួលបានថាមពល ៥៧៣គីឡូកាឡូរី ។ មិនត្រឹមតែប៉ុណ្ណោះទេ ការទទួលទានល្ងខ្មៅ មានអត្ថប្រយោជន៍ដូចជា ៖
១.បំបាត់ការឈឺចាប់សន្លាក់រ៉ាំរ៉ៃ
២.ជំនួយស្បែក និង ឆ្អឹង
៣.កាត់បន្ថយកូឡេស្តេរ៉ុលក្នុងសរសៃឈាម
៤.ជំនួយបេះដូង និងសម្រួលចង្វាក់បេះដូង
៥.ការពារជំងឺមហារីក
៦.ជំនួយប្រព័ន្ធរំលាយអាហារ
៧.បន្ថយការឈឺចាប់ពេលមករដូវ
៩.ជួយឲ្យគេងលក់ស្រួល
១០.ជំនួយខួរក្បាល បង្កើនសមត្ថភាពចង់ចាំ
១១.ជំនួយភ្នែក ៕

May 2, 2017
ក្រុមនិស្សិតប្រមាណ ១០០នាក់ នឹងរៀបចំដំណើរទស្សនកិច្ចសិក្សាក្រោមអត្ថន័យមនុស្សធម៌ សង្គម និងបរិស្ថាន
ក្រុមនិស្សិតនៃដេប៉ាតឺម៉ង់វិទ្យាសាស្ត្រសេដ្ឋកិច្ច និងគ្រប់គ្រងជាភាសាបារាំងជំនាន់ទី២៣, ២៤ និង២៥ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ប្រមាណ ១០០នាក់ នឹងធ្វើការរៀបចំគម្រោងដំណើរទស្សនកិច្ចសិក្សា ក្រោមអត្ថន័យមនុស្សធម៌ សង្គម និងបរិស្ថាន ទៅកាន់រមណីយដ្ឋានវីគិរីរម្យ ខេត្តកំពង់ស្ពឺ និងខេត្តព្រះសីហនុចាប់ពីថ្ងៃទី០៤ ដល់ ០៦ ខែឧសភា ឆ្នាំ២០១៧។
ដំណើរទស្សនកិច្ចសិក្សានេះ ត្រូវបានរៀបចំឡើងក្រោមប្រធានបទ “Feel the Green, Feel the Warmth” ក្នុងអត្ថន័យបង្កើតក្ដីស្រឡាញ់ចំពោះធម្មជាតិ ថែរក្សាបរិស្ថាន និងផ្តល់ភាពកក់ក្ដៅតាមរយៈសាមគ្គីភាពរវាងគ្នា និងគ្នា។ ដោយទទួលបានការគាំទ្រយ៉ាងពេញទំហឹងពីក្រសួងទេសចរណ៍ និងក្រសួងអប់រំ យុវជន និងកីឡា ទស្សនកិច្ចសិក្សារយៈពេល ៣ថ្ងៃនេះ នឹងប្រព្រឹត្តឡើងដោយមានសកម្មភាពមួយចំនួនដូចជា៖ ការសំអាតតាមបណ្តោយឆ្នេរ និងការរាំជាក្រុមទ្រង់ទ្រាយធំ (Flash mob)។ គោលបំណងចម្បងគឺដើម្បីបង្ហាញពីតួនាទីយុវជនកម្ពុជាក្នុងការចូលរួមចំណែកដោះស្រាយបញ្ហាបរិស្ថាន និងផ្ដល់ជាសារក្រើនរំលឹកស្តីពីការថែទាំបរិស្ថានដល់បងប្អូនប្រជាពលរដ្ឋនៅតាមតំបន់ទេសចរណ៍នៃព្រះរាជាណាចក្រកម្ពុជា ជាពិសេសនៅតាមតំបន់ឆ្នេរ។
លើសពីនេះទៀត ក្រុមនិស្សិតនឹងរៀបចំផងដែរនូវការប្រគំតន្តី្រខ្នាតតូចនៅលើឆ្នេរអូរឈើទាល ដោយមានវត្តមាននៃការចូលរួមទស្សនាផ្ទាល់ពីភ្ញៀវទេសចរជាតិ និងអន្តរជាតិ ការតាំងពិព័រណ៍សម្ភារៈកែច្នៃឡើងវិញដោយស្នាដៃរបស់ក្រុមនិស្សិតផ្ទាល់ និងសកម្មភាពចម្បងមួយទៀតដែលជាសូចនករនៃការបង្កើតកម្មវិធីនេះ គឺការដាំដើមកោងកាងក្នុងគោលបំណងលើកស្ទួយ និងអភិរក្សតំបន់ឡូត៌នេសាទនៅតាមតំបន់ឆ្នេរនៃព្រះរាជាណាចក្រកម្ពុជា ដែលជាប្រភពចំណូលដ៏សំខាន់របស់ប្រជាពលរដ្ឋនៅក្នុងសហគមន៍។
ក្រៅពីសកម្មភាពបរិស្ថាន ដំណើរទស្សនកិច្ចនេះក៏ផ្តោតលើកិច្ចការមនុស្សធម៌ផងដែរ។ ក្រុមនិស្សិតនឹងនាំយកនូវថវិកា ស្បៀងអាហារ សម្ភារៈសិក្សា និងសម្លៀកបំពាក់ក្នុងគោលបំណងបរិច្ចាគជូនក្មេងកំព្រា និងសិស្សក្រីក្រនៅអង្គការ “រួមដៃគ្នាដើម្បីក្តីសង្ឃឹម” ឬ “Give a Hand for Hope Organization” ដែលស្ថិតនៅក្នុងខេត្តកំពង់ស្ពឺ។
មកទល់បច្ចុប្បន្ននេះ យើងទទួលបានការឧបត្ថម្ភធំពីក្រុមហ៊ុន MyPhsar.com រួមទាំងការសហការឧបត្ថម្ភដោយក្រុមហ៊ុនមួយចំនួនទៀត ដូចជា៖ Toyota (Cambodia), vKirirom Pine Resort, Huawei Mobile, PastaMania Cambodia, Coca Cola, Vodka Cruiser, BookingSentral និង La Reine Peanich៕

May 2, 2017
ការជួបគ្នា៤លើកកាលពីមុនរវាងក្រុម Real និង Atletico ក្នុងក្របខ័ណ្ឌអឺរ៉ុប
Real Madrid និង Atletico Madrid នឹងត្រូវជួបគ្នាជាលើកទី៥ក្នុងការប្រកួតក្របខ័ណ្ឌកំពូលអឺរ៉ុប នៅពេលដែលក្រុម Atletico ធ្វើដំណើរទៅកាន់កីឡដ្ឋាន Santiago Bernabeu ដើម្បីធ្វើការប្រកួតជើងទី១ នៃក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ នៅរាត្រីនេះ។ រាល់ការជួបគ្នា៤លើកកាលពីមុន បានបញ្ចប់ទាំងការខកចិត្តសម្រាប់ក្រុម Atletico ខណៈដែលក្រុម Real នឹងសម្លឹងរកការឈ្នះពានជាលើកទី៣ក្នុងរយៈពេល៤ឆ្នាំតាមរយៈការផ្តួលគូប្រជែងស្ថិតក្នុងទីក្រុងតែមួយរបស់ពួគគេ។ ខាងក្រោមនេះគឺការជួបគ្នា៤លើកកាលពីមុននៃក្របខ័ណ្ឌកំពូលអឺរ៉ុប។
ការប្រកួត European Cup វគ្គពាក់កណ្តាលផ្តាច់ព្រ័ត្រកាលពីឆ្នាំ១៩៥៩
ក្រុម Atletico បានជួបសំណាងអាក្រក់ បើទោះបីបានទទួលលទ្ធផលស្មើទាំងពីរជើងក៏ដោយ ក្នុងការប្រកួតកាលពីឆ្នាំ១៩៥៩។ ក្រុម Real បានទទួលជ័យជម្នះក្នុងការប្រកួតជើងទី១ក្នុងលទ្ធផល ២-០ នៅមុនពេលក្រុម Atletico បានតាមស្មើវិញក្នុងរយៈពេល២សប្តាហ៍ក្រោយមក បន្ទាប់ពីឈ្នះ ១-០។ ប៉ុន្តែ កាលនោះ ច្បាប់គ្រាប់បាល់ក្រៅដីមិនទាន់ត្រូវបានអនុវត្តឡើយ ហេតុនេះ ក្រុមទាំងពីរត្រូវធ្វើការប្រកួតវគ្គ Playoff។ Real បានទទួលជ័យជម្នះ ២-១ ក្នុងការប្រកួតវគ្គ Playoff នោះដែលត្រូវបានរៀបចំឡើងនៅទីក្រុង Zaragoza។
ការប្រកួត Champions League វគ្គផ្តាច់ព្រ័ត្រ កាលពីឆ្នាំ២០១៤
Atletico បានជួបការខកចិត្តដ៏ធំ ក្រោយពីពួកគេមានគ្រាប់បាល់នាំមុខរហូតដល់ទៅនាទី ទី៩៣ នៅមុនពេលក្រុម Real បានវាយបកតាមស្មើវិញ ហើយក្រុម Real បានបន្តលើកពាន Champions League ក្រោយពីបានផ្តួលក្រុម Atletico ក្នុងលទ្ធផល ៤-១ នៅនាទីបន្ថែម១៥នាទីពីរដង។
ការប្រកួត Champions League វគ្គ៨ក្រុមចុងក្រោយ កាលពីឆ្នាំ២០១៥
ក្រោយពីបានបញ្ចប់ក្នុងលទ្ធផលស្មើ ០-០ ក្នុងផ្ទះខ្លួនឯងពីការប្រកួតជើងទី១ Atletico បានជួបសំណាងអាក្រក់ក្នុងជើងទី២ ក្រោយពីខ្សែប្រយុទ្ធ Javier Hernandez បានរកគ្រាប់បាល់ឈ្នះនៅចុងម៉ោងដើម្បីជួយឲ្យ Real ដណ្តើមបានជ័យជម្នះទាំងពីរជើង ១-០។
ការប្រកួត Champions League វគ្គផ្តាច់ព្រ័ត្រ កាលពីឆ្នាំ២០១៦
ការប្រកួតនេះ បានស្ថិតក្នុងភាពស្វិតស្វាញយ៉ាងខ្លាំង ខណៈដែល Real បានរកគ្រាប់បាល់នាំមុខមុន មុននឹងក្រុម Atletico បានធ្វើការវាយបកតាមស្មើវិញនៅរយៈពេល១១នាទីចុងក្រោយ ដើម្បីបញ្ចប់ក្នុងលទ្ធផលស្មើ ១-១។ ក្រោយពីលទ្ធផលនៅតែរក្សា ១-១ បន្ទាប់ពីនាទីបន្ថែម១៥នាទីពីរដង ក្រុម Real នៅតែជួបសំណាងល្អ ដោយពួកគេបានយកឈ្នះក្នុងការស៊ុតបាល់ប៉េណាល់ទី ៥-៣ ដើម្បីលើកពានជាលើកទី១១របស់ពួកគេ៕

May 2, 2017