វល័ក្ខ - La Reine Media

សាលាជំនាន់ថ្មី មិនអាក្រក់ទេ តែគួរសាងសង់អគារផ្ទាល់ខ្លួនដាច់ដោយឡែកពីសាលារដ្ឋ

សាលាជំនាន់ថ្មីជាគម្រោងដែលក្រសួងអប់រំ យុវជន និងកីឡាបានប្រកាសដាក់ឱ្យអនុវត្តជាយូរមកហើយ ម្យ៉ាងវិញទៀតគម្រោងនេះក៏ជាផ្នែកមួយដើម្បីជំរុញឱ្យមានការសិក្សាលើមុខវិជ្ជាផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ឬហៅកាត់ថា STEM កាន់តែច្រើនដែរ។

ជារៀងរាល់លើក ពេលដែលក្រសួងធ្វើកម្មវិធីពាក់ព័ន្ធនឹង STEM មន្ត្រីសំខាន់ៗ រួមទាំងលោករដ្ឋមន្ត្រី ហង់ ជួនណារ៉ុន ផងក៏បានបញ្ជាក់ដែរថា ក្រៅពីការធ្វើពិព័រណ៏ STEM ប្រចាំឆ្នាំហើយ ក្រសួងបានបញ្ច្រាបការយល់ដឹងទៅកាន់សាលានានានៅទូទាំងប្រទេស ហើយចំណុចសំខាន់មួយទៀតគឺក្រសួងបានដាក់ចេញនូវកម្មវិធីសាលាជំនាន់ថ្មីនេះ នៅក្នុងសាលាគំរូមួយចំនួនដើម្បីធ្វើការសាកល្បង។ លើសពីនេះទៅទៀត ក្រសួងអប់រំ យុវជន និងកីឡា ក៏មានគម្រោងពង្រីកសាលាជំនាន់ថ្មីនៅទូទាំងប្រទេសផងដែរ ដើម្បីឱ្យសិស្សមានបរិក្ខារសម្បូរបែបក្នុងការសិក្សា និងពិសោធន៍។

លោក សន ជ័យ ជាប្រធានអង្គការសម្ព័ន្ធគណនេយ្យភាពសង្គមកម្ពុជា បានលើកឡើងនៅក្នុងបណ្តាញសង្គមថា លោកយល់ថា សាលារៀនជំនាន់ថ្មីនេះមិនមានអ្វីអាក្រក់នោះទេ ហើយក្នុងនាមជាអ្នកជ្រោមជ្រែងវិស័យអប់រំ លោកយល់ថា វាជាគម្រោងមួយដែលមានគំរូ ម៉ូឌែលល្អ ឬជាបច្ចេកទេសក្នុងការជំរុញនវានុវត្តន៍ តែលោកចង់ឱ្យក្រសួងបង្កើតសាលាជំនាន់ថ្មីនេះឡើងដោយយកទៅដាក់នៅសាលាចាស់ណាមួយ ដោយជួសជុលកែលម្អអគារទាំងនោះឱ្យថ្មីឡើងវិញ ហើយដាក់ឈ្មោះថា សាលាជំនាន់ថ្មី តែម្តង អាចនឹងមានកិត្យានុភាពជាង៕

September 19, 2018

វិនិយោគិនកូរ៉េខាងត្បូង គ្រោងបង្កើតវិទ្យាស្ថានបច្ចេកវិទ្យាសំណង់នៅកម្ពុជា

ស្របពេលដែលវិស័យសំណង់នៅកម្ពុជាមានការរីកចម្រើនឡើងជាលំដាប់នោះ វិនិយោគិនកួរ៉េខាងត្បូងមួយក្រុមត្រៀមបង្កើតសាលាជំនាញបច្ចេកវិទ្យាសំណង់ ដែលផ្តោតលើប្រព័ន្ធលើកកម្ពស់សុវត្ថិភាពសំណង់ចរាចរណ៍ និងប្រព័ន្ធគ្រប់គ្រងសម្ភារការដ្ឋាននៅពេលខាងមុខឆាប់ៗនេះ។

គម្រោងបង្កើតសាលានេះ ត្រូវបានចុះអនុស្សរណៈយោគយល់គ្នារវាងលោក Sung Heon Han ប្រធានវិទ្យាស្ថាន KICT ដែលជាវិទ្យាស្ថានបច្ចេកវិទ្យាសំណង់ធំរបស់កូរ៉េ ជាមួយឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូនកម្ពុជា ដើម្បីដើរតួនាទីជាមូលដ្ឋានគ្រឹះសម្រាប់ក្រសួងសាធារណការ និងដឹកជញ្ជូនកម្ពុជាក្នុងការធានាឱ្យបាននូវស្ដង់ដារគុណភាពនៃសំណង់នៅកម្ពុជា។

KICT គឺជាវិទ្យាស្ថានរបស់រដ្ឋាភិបាលកូរ៉េដែលមានជំនាញឯកទេសខាងការស្រាវជ្រាវ និងវិស្វកម្មសំណង់។ លោក Sung Heon Han ប្រធានវិទ្យាស្ថាន KICT បានមានប្រសាសន៍ថា វិទ្យាស្ថាន KICT មានបុគ្គលិកជំនាញថ្នាក់បណ្ឌិតជាង 900នាក់ដែលមានជំនាញផ្សេងៗគ្នា ទាក់ទងនឹងការសាងសង់ដែលបានបង្កើតស្តង់ដារសំណង់កូរ៉េសម័យទំនើប។ ហើយការបង្កើតសាលានេះ KICTនឹងចែករំលែកសេចក្ដីព្រាងផែនការគាំទ្រ ការបង្កើត “វិទ្យាស្ថានបច្ចេកវិទ្យាសំណង់កម្ពុជា-កូរ៉េ (C-KICT)” នៅពេលឆាប់ៗនេះ។

ឯកឧត្តមទេសរដ្ឋមន្ត្រី ស៊ុន ចាន់ថុល បានជម្រាបជូនអំពីបញ្ហាប្រឈមនាពេលបច្ចុប្បន្នពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធផ្លូវថ្នល់របស់កម្ពុជាផងដែរ។ គ្រោះថ្នាក់ចរាចរណ៍នាពេលបច្ចុប្បន្នដែលបង្កឡើងដោយកត្តាមនុស្ស និងចំណុចខ្មៅ បានសម្លាប់មនុស្សប្រមាណ 5 នាក់ និងបង្ករបួសស្នាមពី20 ទៅ50នាក់ក្នុងមួយថ្ងៃ ដែលកម្ពុជាចាំបាច់ត្រូវធ្វើឱ្យប្រសើរឡើងនូវស្តង់ដារនៃការស្ថាបនាផ្លូវថ្នល់ដើម្បីកាត់បន្ថយគ្រោះថ្នាក់ចរាចរណ៍ និងរក្សាគុណភាពហេដ្ឋារចនាសម្ព័ន្ធផ្លូវថ្នល់ឱ្យមានភាពរឹងមាំ និងប្រើប្រាស់ជាប់បានយូរ។

ឯកឧត្តមទេសរដ្ឋមន្ត្រីបានបន្ថែមថា បច្ចេកវិទ្យាជួសជុលផ្លូវថ្នល់មានសារៈសំខាន់ណាស់ ដោយសារតំបន់ភាគខាងត្បូងនៃប្រទេស ដូចជាខេត្តកំពត ខេត្តកែប ក្រុងព្រះសីហនុ និងខេត្តកោះកុង មានភ្លៀងធ្លាក់ជោកជាំនៅរដូវវស្សា។ ឯកឧត្តមទេសរដ្ឋមន្ត្រីបានសំណូមពរឱ្យ KICT ពន្លឿនការបង្កើតវិទ្យាស្ថាន C-KICT ឱ្យរួចក្នុងរយៈពេល 2ឆ្នាំ ឬឆាប់ជាងនេះតាមដែលអាចធ្វើទៅបាន៕

September 19, 2018

សមាគមកម្ពុជា-ចិន ចង់ក្តោបទីផ្សារព្យាបាលជំងឺនៅកម្ពុជា ក្នុងគម្រោងវិនិយោគទេសចរណ៍សុខាភិបាល

សមាគម អាយ វី អេហ្ស កម្ពុជា-ចិន បានប្រកាសនៅក្នុងជំនួបពិភាក្សាការងារជាមួយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថា សមាគមគ្រោងនឹងវិនិយោគវិស័យសុខាភិបាលដើម្បីក្តោបទីផ្សារព្យាបាលជំងឺនៅកម្ពុជា ស្របពេលដែលសេដ្ឋកិច្ចកម្ពុជាកំពុងមានការរីកចម្រើនគួរឱ្យកត់សម្គាល់។

លោក ស្រេង វង្ស ហៀង ប្រធានសមាគម អាយ វី អេហ្ស កម្ពុជា-ចិន បានបញ្ជាក់ថា ដោយសារតែមើលឃើញការរីកចម្រើននៃកំណើនផលិតផលក្នុងស្រុកសរុបរបស់កម្ពុជា និងភាពល្អប្រសើរឡើងនៃកំណើនទេសចរ វាជាជាឱកាសដ៏សមស្របមួយក្នុងការវិនិយោគលើវិស័យទេសចរណ៍សុខាភិបាល។

លោក ហៀង បានបន្ដថា ទេសចរណ៍សុខាភិបាលនេះ កំពុងពេញនិយមនៅក្នុងប្រទេសមួយចំនួនដូចជា ប្រទេសម៉ាឡេស៊ី និងថៃ ជាដើម ហើយកម្ពុជាក៏ស្ថិតនៅក្នុងទីតាំងភូមិសាស្ដ្រមួយដ៏ល្អ ដែលអាចផ្ដល់នូវកញ្ចប់សេវាកម្មល្អមួយដែលគេហៅថា ទេសចរណ៍សុខាភិបាល ដែលអ្នកទេសចរក៏អាចមកទទួលសេវាសុខាភិបាលនៅកម្ពុជាបានដែរនោះ ទើបសមាគមគ្រោងវិនិយោគលើវិស័យនេះ។

លោកបានបញ្ជាក់ថា៖ ប្រសិនបើដំណើរការនេះទទួលបានជោគជ័យ វានឹងទាក់ទាញអ្នកទេសចរ ព្រមទាំងអ្នកមកពិនិត្យជំងឺកាន់តែច្រើនឡើង ជាពិសេសប្រជាជនមកពីបណ្ដាប្រទេសក្នុងតំបន់អាស៊ាន និងទូទាំងអាស៊ីផងដែរ។ លោកក៏បានបញ្ជាក់បន្ថែមថា សមាគមបង្កើតគម្រោងនេះឡើងក្នុងគោលបំណងផ្ដល់សេវាពិសេសក្នុងការគាំពារសុខភាពស្ដ្រី។

សម្ដេចក្រឡាហោម ស ខេង បានគាំទ្រចំពោះគំនិតផ្តួចផ្ដើមរបស់ សមាគម អាយ វី អេហ្ស កម្ពុជា-ចិន ពិសេសការបង្កើតការផ្ដល់សេវាកម្មសុខភាពដល់ស្ត្រីនៅកម្ពុជាតាមរយៈគម្រោងរបស់សមាគម។ សម្ដេចក្រឡាហោមបន្ដថា បច្ចុប្បន្នពលរដ្ឋកម្ពុជាពីមួយឆ្នាំទៅមួយឆ្នាំ បានសម្រុកចេញទៅក្រៅប្រទេសដូចជា ប្រទេសថៃ វៀតណាម សិង្ហបុរី និងប្រទេសមួយចំនួនទៀត ដើម្បីពិនិត្យសុខភាព និងព្យាបាលជំងឺ។

សម្ដេចក្រឡាហោមបានថ្លែងថា៖ ប្រសិនជាគម្រោងរបស់សមាគមចិនក្នុងការសាងសង់មន្ទីរពេទ្យនៅកម្ពុជាទទួលបានជោគជ័យ វានឹងអាចជួយផ្ដល់សេវាកម្មកាន់តែកៀកជិតនឹងប្រជាពលរដ្ឋ និងជួយដល់កំណើនសេដ្ឋកិច្ចរបស់កម្ពុជាផងដែរ៕

September 19, 2018

អ្នកឈ្នះរង្វាន់ទី4 ក្នុងកម្មវិធីបើកគម្របឈ្នះរង្វាន់ ពីក្រុមហ៊ុនតែបៃតង អូអិឈិ

“សូម្បីតែម៉ូតូថ្មីមួយគ្រឿង ក៏ខ្ញុំមិនហ៊ានស្រមៃផង តែនៅពេលនេះខ្ញុំទទួលបានរថយន្តថ្មីសន្លាងមួយគ្រឿង…វាហាក់ដូចជាខ្ញុំទទួលបានមាសមួយហិបធ្លាក់ពីលើមេឃមកអ៊ីចឹង” នេះគឺជាសម្ដីដែលហូរចេញពីអារម្មណ៍រំភើបពិតៗ ទាំងទឹកភ្នែករលីងរលោងរបស់អ្នកឈ្នះរង្វាន់ទី៤ ក្នុងកម្មវិធីបើកគម្របឈ្នះរង្វាន់ (OISHI Instant Win) ពីក្រុមហ៊ុនតែបៃតង អូអិឈិ (OISHI)។

លោក ហ៊ុន ធារ៉ា វ័យ 25ឆ្នាំ ជាប្រជាពលរដ្ឋរស់នៅក្នុងភូមិពង្រកើត ឃុំពង្រ ស្រុកកោះសូទិន ខេត្តកំពង់ចាម ជាអ្នកឈ្នះរង្វាន់ធំ គឺរថយន្ត FORD Ranger XLT មួយគ្រឿង ដែលមានតម្លៃប្រមាណ 175លានរៀល ពីកម្មវិធីបើកគម្របឈ្នះរង្វាន់ (OISHI Instant Win) ពីក្រុមហ៊ុនតែបៃតង អូអិឈិ (OISHI) កាលពីខែសីហាកន្លងទៅនេះ។

លោក ធារ៉ា និយាយថា រង្វាន់ដែលលោកទទួលបាននៅពេលនេះ វាអាចជួយឱ្យក្តីសុបិនរបស់លោកក្លាយជាការពិត និងធ្វើឱ្យជីវិតគ្រួសាររបស់លោកកាន់តែប្រសើរឡើង ជាពិសេសគឺកូនប្រុសរបស់លោកដែលទើបតែមានអាយុ ៦ខែ នឹងអាចទទួលបានការអប់រំល្អ និងធំធាត់ឡើងក្នុងជីវភាពល្អប្រសើរនៅពេលអនាគត។

គួររំឭកដែរថា កម្មវិធីបើកគម្របឈ្នះរង្វាន់ របស់តែបៃតងអូអិឈិ គឺជាកម្មវិធីមួយផ្ដល់ឱកាសដល់អតិថិជនដើម្បីផ្សងសំណាងយករង្វាន់នៅក្រោមគម្របដបដែលមានដូចជា៖ រថយន្ត FORD Ranger XLT ទឹកប្រាក់ 10លានរៀល និងរង្វាន់ផលិតផលតែបៃតងអូអិឈិជាច្រើនលានដប។

លោកអ្នកនឹងអាចក្លាយជាម្ចាស់រង្វាន់ធំ រថយន្ត FORD Ranger XLT ពីកម្មវិធីបើកគម្របឈ្នះរង្វាន់របស់តែបៃតងអូអិឈិ។ សម្រាប់ព័ត៌មានបន្ថែម សូមចូលទៅកាន់ទំព័រហ្វេសបុករបស់តែបៃតងអូអិឈិ https://www.facebook.com/OishiCambodia/

September 19, 2018

ក្រសួងបញ្ជាក់ថា គ្មានការប្តូរឈ្មោះវិទ្យាល័យព្រះស៊ីសុវត្ថិ ទៅជាសាលាជំនាន់ថ្មីទេ

ក្រោយពីមានការតវ៉ាពីសាស្ត្រាចារ្យ និងភាគីពាក់ព័ន្ធមួយចំនួន មតិជាច្រើនក្នុងបណ្តាញសង្គម មានការព្រួយបារម្ភថា អាចនឹងបាត់បង់សាលាព្រះស៊ីសុវត្ថិដែលបានបង្កើតឡើងតាំងពីឆ្នាំ1873 ព្រោះតែវត្តមាននៃសាលាជំនាន់ថ្មី។

អ្នកនាំពាក្យក្រសួង អប់រំ យុវជន និងកីឡា បានធ្វើការឆ្លើយតបទៅកាន់អ្នកសារព័ត៌មានថា គ្មានការផ្លាស់ប្តូរឈ្មោះសាលាព្រះស៊ីសុវត្ថិ ទៅជាសាលាជំនាន់ថ្មី ដូចមតិដែលបានលើកឡើងក្នុងបណ្តាញសង្គមនោះទេ។ សាលាជំនាន់ថ្មីគ្រាន់តែជាកម្មវិធីសិក្សាមួយដែលដាក់ចូលទៅក្នុងសាលាព្រះស៊ីសុវត្ថិតែប៉ុណ្ណោះ ហើយចំពោះការផ្លាស់ប្តូរនាយកសាលានោះ គឺធ្វើឡើងតាមបទពិសោធ និងភាពចាស់ទុំនៃការងាររបស់គាត់ ដែលនេះជាការលើកទឹកចិត្តឱ្យទៅកាន់ការងារថ្មីនៅនាយកដ្ឋានមធ្យមសិក្សាចំណេះទូទៅ ក្រោមឱវាទក្រសួងអប់រំ យុវជន និងកីឡា មិនមែនជាការដកតំណែងនោះទេ។

សាលាជំនាន់ថ្មីជាកម្មវិធីអប់រំថ្មីដែលក្រសួងបានសហការជាមួយអង្គការសកម្មភាពសម្រាប់បឋមសិក្សានៅកម្ពុជា (KAPE) ដើម្បីផ្តោតការអប់រំលើមុខវិជ្ជា វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដោយក្រសួងធ្លាប់បានដាក់បញ្ចូលទៅក្នុងសាលាគំរូចំនួន 3 គឺសាលាព្រះស៊ីសុវត្ថិ សាលាបឋមសិក្សាអង្គរបាន និងសាលាបឋមសិក្សាសម្តេចព្រះរាជអគ្គមហេសី នរោត្តមមុនីនាថ សីហនុ៕

September 19, 2018

លោក Mourinho មិនអាងលេសទីលានសិប្បនិម្មិតពេលជួបក្រុម Young Boys រាត្រីនេះទេ

លោក Jose Mourinho បានបញ្ជាក់ថា ក្រុម Manchester United មិនត្រូវអាងលើលេសផ្សេងៗឡើយ នៅពេលដែលពួកគេចាប់ផ្តើមយុទ្ធនាការនៃក្របខ័ណ្ឌ Champions League នារាត្រីនេះ នៅលើទីលានសិប្បនិម្មិតក្នុងពេលប្រកួតជាមួយនឹងក្រុម Young Boys ក្នុងទីក្រុង Bern។

ក្រុមមានមូលដ្ឋាននៅ Old Trafford មួយនេះ ត្រូវបានចាប់ឆ្នោតឱ្យស្ថិតក្នុងពូលមួយដែលប្រជុំដោយក្រុមខ្លាំងៗ រួមជាមួយនឹងក្រុម Juventus របស់ខ្សែប្រយុទ្ធ Cristiano Ronaldo និងក្រុម Valencia ដែលតម្រូវឱ្យពួកគេត្រូវតែដណ្តើមឱ្យបានលទ្ធផលជាវិជ្ជមាននៅកីឡដ្ឋាន Stade de Suisse។

ប៉ុន្តែទីលានសិប្បនិមិ្មតរបស់ក្រុមម្ចាស់ជើងឯករបស់ស្វ៊ីស Young Boys នឹងតម្រូវឱ្យកីឡាករមួយចំនួនត្រូវស៊ាំនឹងការលេង និងនេះហើយជាហេតុផលដែល Man United មិនយកខ្សែការពារ Antonio Valencia មកជាមួយ។ លោក Mourinho បានប្រាប់អ្នកយកព័ត៌មាននៅរដ្ឋធានីរបស់ស្វ៊ីស កាលពីថ្ងៃអង្គារថា៖ «យើងបានសម្រេចចិត្តមិនយក Valencia មក ពីព្រោះជង្គង់របស់គេមិនមែនជាជង្គង់ដែលតម្រូវទៅលើទីលានសិប្បនិមិ្មតឡើយ»។

(From L) Young Boys’ players Ivorian midfielder Sekou Sanogo, French forward Guillaume Hoarau, Swiss Defender Kevin Mbabu and Swiss defender Loris Benito take part in a training session on the eve of the UEFA Champions League group stage H football match between Young Boys and Manchester United at the Stade de Suisse stadium on September 18, 2018 in Bern. (Photo by Fabrice COFFRINI / AFP) (Photo credit should read FABRICE COFFRINI/AFP/Getty Images)

ទាក់ទងនឹងផ្ទៃនៃទីលាន ស្របពេលដែលបញ្ជាក់ថា លោកបានបង្ហាញពីចំណាប់អារម្មណ៍របស់លោកទៅកាន់ UEFA គ្រូបង្វឹករូបនេះបានប្រាប់បន្តថា៖ «ខ្ញុំមិនចង់ប្រើប្រាស់ទីលាននេះមុនពេលការប្រកួតធ្វើជាលេសសម្រាប់ការបង្ហាញពីទម្រង់លេងមិនបានល្អនោះឡើយ»។

លោក Mourinho បានលើកយកសមត្ថភាពរបស់កីឡាករវាយកូនបាល់ដ៏ឆ្នើម Roger Federer របស់ស្វ៊ីស ដែលបានសម្របខ្លួនក្នុងការលេងនៅលើទីលានផ្សេងៗគ្នាធ្វើជាឧទាហរណ៍មួយទៅលើរបៀបដែលក្រុមរបស់លោកគួរតែសម្របខ្លួនក្នុងលក្ខខណ្ឌផ្សេង។

Federer ដែលជាម្ចាស់ជើងឯកពាន Grand Slam 20 សម័យកាល បានឈ្នះពានជាច្រើននៅលើគ្រប់ផ្ទៃនៃទីលានទាំងអស់ក្នុងកីឡារបស់គេ ហើយលោក Mourinho បាននិយាយសរសើរពីសមត្ថភាពនៃការសម្របខ្លួនលេងបានគ្រប់ទីលានរបស់កីឡាករសញ្ជាតិស្វ៊ីសរូបនេះ។ ការប្រកួតនេះនឹងចាប់ផ្តើមនៅម៉ោង 2ទៀបភ្លឺ៕

ប្រភពពី៖ Sport24

September 19, 2018

លោក Klopp កោតសរសើរក្រុមខ្លួនក្រោយផ្តួល PSG ខណៈ Messi រកបាន 3គ្រាប់

លោក Jurgen Klopp បានកោតសរសើរការរកគ្រាប់បាល់បញ្ចូលទីយ៉ាងល្អពីសំណាក់ខ្សែប្រយុទ្ធ Roberto Firmino និង Daniel Sturridge ខណៈដែលក្រុមហង្សក្រហម Liverpool បានចាប់ផ្តើមយុទ្ធនាការនៃក្របខ័ណ្ឌ Champions League របស់ពួកគេ ជាមួយនឹងជ័យជម្នះដ៏រំភើបក្នុងលទ្ធផល 3-2 លើក្រុម Paris Saint-Germain កាលពីថ្ងៃអង្គារ។

ក្រុមរបស់លោក Klopp បានរកគ្រាប់បាល់នាំមុខ 2គ្រាប់មុន នៅពេលប្រកួតជាមួយនឹងក្រុមម្ចាស់ជើងឯកបារាំង ដែលប្រជុំដោយតារាឆ្នើមៗ តាមរយៈការតែតបាល់បញ្ចូលទីយ៉ាងល្អរបស់ Sturridge និងគ្រាប់បាល់ប៉េណាល់ទីរបស់ខ្សែបម្រើ James Milner។

ខ្សែការពារ Thomas Meunier បានរកគ្រាប់បាល់ 1គ្រាប់វិញសម្រាប់ក្រុម PSG នៅមុនពេលសម្រាកតង់ទី1 ហើយខ្សែប្រយុទ្ធ KylianMbappe បានជួយឱ្យក្រុមខ្លួនដណ្តើមបានលទ្ធផលស្មើ 2-2 ជាមួយនឹងគ្រាប់បាល់បញ្ចូលទីរបស់គេនៅនាទីទី83។ ប៉ុន្តែខ្សែប្រយុទ្ធអន្តរជាតិប្រេស៊ីល Firmino បានចូលលេងក្នុងនាមជាកីឡាករបម្រុងរបស់ Liverpool និងដណ្តើមបាន៣ពិន្ទុពេញនៅនាទីបន្ថែម តាមរយៈការស៊ុតបាល់បញ្ចូលទីយ៉ាងល្អ 1គ្រាប់ថែមទៀត។

លោក Klopp បាននិយាយទាំងអារម្មណ៍ធូរស្រាលថា៖ «វាពិតជាសំខាន់ណាស់ ដែលយើងចាប់ផ្តើមបានល្អដូចដែលយើងបានរំពឹងទុក។ យើងមានភាពខ្លាំងក្នុងការគ្រប់គ្រងបាល់ យើងបានផ្លាស់ប្តូរប្រព័ន្ធលេង ដោយសារតែយើងរំពឹងទុកពីការផ្លាស់ប្តូររបស់ពួកគេ។ យើងត្រូវការឱ្យកីឡាករទាំងអស់ផ្តោតអារម្មណ៍ ហើយយើងបានធ្វើការងាររបស់យើងយ៉ាងល្អ។ យើងបានស៊ុតបាល់បញ្ចូលទីយ៉ាងល្អ ហើយវាជាគ្រាប់បាល់រន្ទះ»។

ស្របពេលជាមួយគ្នានេះដែរ Lionel Messi បានស៊ុតបាល់បញ្ចូលទី 3គ្រាប់ ដើម្បីជួយឱ្យក្រុម Barcelona ចាប់ផ្តើមយ៉ាងល្អនៅថ្ងៃបើកឆាកនៃ Champions League តាមរយៈការផ្តួលក្រុម PSV Eindhoven របស់ហូឡង់ ក្នុងលទ្ធផល 4-០ នាកីឡដ្ឋាន Camp Nou៕

September 19, 2018

Global Art ជំរុញឱ្យកុមារកម្ពុជាស្រឡាញ់គំនូរ និងចេះច្នៃប្រឌិតបង្ហាញសមត្ថភាពលើឆាកអន្តរជាតិ

មជ្ឈមណ្ឌល Global Art ដែលជាស្ថាប័នបណ្តុះបណ្តាលកុមារលើសិល្បៈគំនូរ និងការច្នៃប្រឌិត បានបើកការប្រកួតគំនូរថ្នាក់ជាតិ “2018 National Art Competition” ដើម្បីផ្តល់ឱកាសឱ្យកុមារកម្ពុជាទទួលបានឱកាសក្នុងការប្រកួតប្រជែង និងសម្រេចក្តីស្រមៃរបស់ខ្លួនតាមរយៈការបញ្ចេញស្នាដៃជាសាធារណៈ។

កម្មវិធីប្រកួតគំនូរដ៏ធំនេះធ្វើឡើងនៅផ្សារទំនើប AEON Mall សែនសុខ នៅថ្ងៃទី16 ខែកញ្ញា ឆ្នាំ 2018 ដោយក្នុងនោះមានបេក្ខជនចូលរួមចំនួន 255នាក់មកពីមជ្ឈមណ្ឌល Global Art និងសាលាឯកជនល្បីៗនៅកម្ពុជា។ អ្នកចូលរួមប្រមាណ 90% ជាសិស្សមកពីមជ្ឈមណ្ឌល Global Art និង10% ផ្សេងទៀតមកពីសាលា SCIA, FIS និង UCMAS។

ក្រោយការប្រកួតយ៉ាងស្វាហាប់អស់រយៈពេលជាច្រើនម៉ោង និងកាត់សេចក្តីយ៉ាងហ្មត់ចត់ពីគណៈកម្មការដាក់ពិន្ទុប្រកបដោយវិជ្ជាជីវៈ និងជំនាញខ្ពស់ បានរកឃើញថា អ្នកដែលទទួលបានជយលាភីលេខ1 ប្រចាំឆ្នាំនៅក្រុម A បានទៅលើកុមារី Sang Sokunnika មកពីមជ្ឈមណ្ឌល Global Art Pasture ចំណែកឯជយលាភីលេខ1 នៃក្រុម B បានទៅលើកុមារី Lay PichMoniRachana មកពីមជ្ឈមណ្ឌល Global Art TK2 និងបេក្ខជនដែលជាប់ជយលាភីលេខ1 ក្នុងក្រុម C បានទៅលើកុមារា Buonhing Sojestta មកពី Global Art Bokor។

បេក្ខជនដែលទទួលបានជយលាភីទាំង 3រូបនឹងទទួលបានពានរង្វាន់ចំនួនមួយ ការឧបត្ថម្ភក្នុងដំណើរទៅប្រឡងគំនូរអន្តរជាតិនៅប្រទេសមីយ៉ាន់ម៉ា ក្រោមការឧបត្ថម្ភទាំងស្រុងពីធនាគារ ABA អាហារូបករណ៍រយៈពេល 6ខែ រួមទាំងរង្វាន់ជាច្រើនទៀតពី Global Art។ ជយលាភីទាំង 3រូប នឹងត្រូវបន្តការប្រកួតជាអន្តរជាតិជាមួយនឹងកុមារជាច្រើនផ្សេងទៀតលើពិភពលោក។

គួរបញ្ជាក់ផងដែរថា Global Art មិនត្រឹមតែជាស្ថាប័នបណ្តុះបណ្តាលលើផ្នែកគំនូរប៉ុណ្ណោះទេ តែជាស្ថាប័នបណ្តុះបណ្តាលកុមារឱ្យមានភាពច្នៃប្រឌិត តាមរយៈការអភិវឌ្ឍសមត្ថភាពដោយគ្រូជំនាញល្បីៗ ហើយផ្តល់ឱកាសឱ្យកុមារអាចបកស្រាយក្តីស្រមៃ និងភាពច្នៃប្រឌិតរបស់ខ្លួនលើផ្ទាំងគំនូរ។ ជំនាញនៃការច្នៃប្រឌិតនេះ ជាជំនាញដែលកំពុងមានតម្រូវការខ្ពស់បំផុតសម្រាប់ពិភពលោកក្នុងសតវត្សរ៍នេះ ហើយការបណ្តុះបណ្តាលកុមារកម្ពុជាឱ្យក្លាយជាអ្នកមានគំនិតច្នៃប្រឌិតខ្ពស់ មានន័យថា កំពុងជំរុញអនាគតនៃការអភិវឌ្ឍសម្រាប់សង្គម៕

September 18, 2018

លោក Klopp សរសើរភាពឆ្លាតវៃរបស់ Neymar ខណៈ Salah ត្រៀមបង្ហាញថ្វីជើង

លោក Jurgen Klopp អ្នកចាត់ការទូទៅរបស់ក្រុម Liverpool បានការពារការសម្តែងនៅលើទីលានរបស់ Neymar ក្នុងព្រឹត្តិការណ៍ World Cup និងជឿជាក់ថា វានឹងមិនអាចទៅរួចឡើយក្នុងការមើលស្រាលតារាឆ្នើមអន្តរជាតិប្រេស៊ីលរូបនេះ នៅពេលដែលក្រុម Paris Saint-Germain នឹងធ្វើដំណើរទៅកាន់កីឡដ្ឋាន Anfield ក្នុងក្របខ័ណ្ឌ Champions League នៅរាត្រីនេះ។

លោក Klopp បានបញ្ជាក់ថា Neymar មិនមានភាពរឹងប៉ឹងទាំងស្រុងឡើយកាលនៅប្រទេសរុស្ស៊ី ក្រោយពីបានបាក់ឆ្អឹងត្រង់ប្រអប់ជើងរបស់គេកាលពីខែកុម្ភៈ ដែលបានបង្ខំឱ្យរូបគេត្រូវសម្រាកអស់រយៈពេលដ៏យូរមុនយុទ្ធនាការ World Cup។

ប៉ុន្តែ ទោះបីជាយ៉ាងណា កីឡាករមានតម្លៃខ្លួនខ្ពស់ជាងគេបំផុតរបស់ពិភពលោករូបនេះ បានទទួលនូវការកោតសរសើរសម្រាប់ទម្រង់លេងរបស់គេ និងបានក្លាយជាតួកំប្លែងសម្រាប់ការសម្តែងការរងរបួសជ្រុលហួសហេតុរបស់គេ ខណៈដែលប្រេស៊ីល បានធ្លាក់ចេញត្រឹមវគ្គ 8ក្រុមចុងក្រោយក្រោមស្នាដៃក្រុមជម្រើសជាតិបែលហ្ស៊ិក។

Mohamed Salah បានបង្ហាញពីទម្រង់លេងល្អប្រសើរជាងតារាឆ្នើម Neymar និងKylianMbappe ក្នុងការប្រកួតក្របខ័ណ្ឌ Champions League កាលពីរដូវកាលមុន ប៉ុន្តែខ្សែប្រយុទ្ធឆ្នើមទាំង2 របស់ក្រុម Paris Saint-Germain នេះនឹងធ្វើដំណើរទៅកាន់កីឡដ្ឋាន Anfield នៅរាត្រីនេះ ដោយសម្លឹងរកការស្តារមុខមាត់នានា ស្របពេលដែលខ្សែប្រយុទ្ធអន្តរជាតិអេហ្ស៊ីប Salah កំពុងតែព្យាយាមរកទម្រង់លេងដ៏ល្អឥតខ្ចោះរបស់គេក្នុងយុទ្ធនាការទី1 ជាមួយ Liverpool។ កាលពីខែឧសភា Salah បានបង្កើតឱ្យមានការចាប់អារម្មណ៍ផ្សេងៗ ខណៈដែលគ្រាប់បាល់សរុបចំនួន 44គ្រាប់របស់គេបានជួយឱ្យក្រុម Liverpool ឈានទៅដល់វគ្គផ្តាច់ព្រ័ត្រនៃក្របខ័ណ្ឌ Champions League និងបានជួយឱ្យពួកគេឈ្នះសិទ្ធិទៅលេងក្នុងយុទ្ធនាការនៃរដូវកាលនេះ។

ហេតុនេះ Salah នឹងសម្លឹងរកការបង្ហាញថ្វីជើងរបស់គេម្តងទៀត ក្នុងការប្រកួត1 ក្នុងចំណោមការប្រកួតដ៏រំភើបបំផុតនៃក្របខ័ណ្ឌ Champions League។ ការប្រកួតនេះនឹងចាប់ផ្តើមនៅម៉ោង2 ទៀបភ្លឺ៕

ប្រភពពី៖ Sport24

September 18, 2018

កម្ពុជាចាប់ផ្តើមជំរុញការអភិវឌ្ឍទីក្រុងរបស់ខ្លួនឱ្យក្លាយជាទីក្រុងឆ្លាតវៃ

រាជរដ្ឋាភិបាលកម្ពុជាចាប់ផ្តើមជំរុញការអភិវឌ្ឍទីក្រុងនានាឱ្យទៅជាទីក្រុងឆ្លាតវៃ ដើម្បីធ្វើឱ្យទីក្រុងរបស់កម្ពុជាកាន់តែមានភាពរស់រវើក ទាន់សម័យ ហើយរស់នៅប្រកបដោយផាសុកភាព។ គំនិតផ្តួចផ្តើមរបស់ទីក្រុងវៃឆ្លាតនឹងធ្វើឱ្យទីក្រុងកាន់តែមានសុវត្ថិភាព ប្រសិទ្ធភាព និងនិរន្តរភាពអមជាមួយបរិស្ថានល្អសម្រាប់អ្នកដែលរស់នៅក្នុងទីក្រុង។ នេះបើតាមការលើកឡើងរបស់មន្ដ្រីរដ្ឋាភិបាល។

ឯកឧត្ដម ភឿង សោភ័ណ អគ្គលេខាធិការក្រុមប្រឹក្សាភិបាលស្ថាបត្យករកម្ពុជាបានមានប្រសាសន៍ថាចាប់ពីពេលនេះទៅ ក្រុមស្ថាបត្យករ វិស្វករ និងរាល់ក្រុមហ៊ុនសំណង់ទាំងអស់មុននឹងធ្វើការសាងសង់ត្រូវគិតពីគោលការណ៍ទីក្រុងឆ្លាតវៃជាមុនសិនដើម្បីឱ្យស្របតាមទស្សនៈវិស័យរបស់រាជរដ្ឋាភិបាល។ ការជំរុញឱ្យអ្នកសាងសង់នានាគិតគូរពីគោលការណ៍ទីក្រុងឆ្លាតវៃនេះ គឺស្របពេលដែលវិស័យសំណង់កំពុងមានសម្ទុះរីកដុះដាលយ៉ាងច្រើន ដូចជា អគារពាណិជ្ជកម្មខ្ពស់ៗ សំណង់លំនៅឋានប្រណីត អគារខុនដូ និងបណ្តាផ្សារទំនើបដែលបម្រើដល់ការរស់នៅរបស់ប្រជាពលរដ្ឋបែបស៊ីវិល័យ។

ឯកឧត្ដមបានបន្ដថា៖ « រាជរដ្ឋាភិបាលកម្ពុជាបានខិតខំប្រឹងប្រែងក្នុងការអនុវត្តគោលគំនិតច្នៃប្រឌិត ការរចនា និងការរៀបចំបែបទីក្រុងបៃតងដើម្បីជាប្រយោជន៍ដល់ការរស់នៅរបស់ប្រជាពលរដ្ឋប្រកបដោយភាពសុខដុម»។

សូមបញ្ជាក់ថា ដើម្បីឈានទៅសម្រេចបាននូវគោលដៅអភិវឌ្ឍន៍ទីក្រុងឆ្លាតវៃនេះ ចាំបាច់ត្រូវមានការពាក់ព័ន្ធច្រើនណាស់ក្នុងវិស័យសំណង់ ដូចជារាល់សម្ភារសំណង់នានាត្រូវតែផលិតធានាថាមានគុណភាពល្អប្រើប្រាស់បច្ចេកវិទ្យាទំនើបស្របតាមស្តង់ដារហើយគិតគូរពីបញ្ហាបរិស្ថានជាចម្បងដើម្បីធានាឱ្យសំណង់អគារមានគុណភាពប្រើប្រាស់បានយូរអង្វែង រួមទាំងឆ្លើយតបទៅនឹងគោលការណ៍ទីក្រុងវៃឆ្លាតរបស់រាជរដ្ឋាភិបាលផងដែរ។

ទីក្រុងចំនួន3 របស់ប្រទេសកម្ពុជា រួមមានរាជធានីភ្នំពេញ សៀមរាប និងខេត្តបាត់ដំបងត្រូវបានជ្រើសរើសជាបណ្តាញទីក្រុងឆ្លាតអាស៊ាន (Smart City)បន្ទាប់ពីមេដឹកនាំទាំងអស់នៃប្រទេសជាសមាជិកបានឯកភាពលើគំនិតផ្តួចផ្តើមឱ្យមានទីក្រុងឆ្លាតវៃដែលស្នើដោយនាយករដ្ឋមន្ត្រីសិង្ហបុរីលោកLee Hsien Loong នៅក្នុងអំឡុងពេលកិច្ចប្រជុំកំពូលអាស៊ានលើកទី32៕

September 17, 2018

Author: វល័ក្ខ