វល័ក្ខ - La Reine Media

LG សម្ពោធលក់ស្មាតហ្វូនស៊េរី K ឆ្នាំ 2017 ពីរម៉ូឌែលនៅកម្ពុជា

ក្រោយទទួលបានការគាំទ្រច្រើនសន្ធឹកលើស្មាតហ្វូនត្រកូល K កាលពីឆ្នាំទៅ ក្រុមហ៊ុន G Gear ដែលជាក្រុមហ៊ុនចែកចាយផ្តាច់មុខទូរសព្ទម៉ាក LG បានធ្វើការសម្ពោធលក់ជាផ្លូវការនូវស្មាតហ្វូន LG K10 និង LG K8 ស៊េរីឆ្នាំ 2017 ជាមួយនឹងរូបរាងប្លែក សមត្ថភាពដំណើរការរលូនល្អ តម្លៃសមរម្យ។

កម្មវិធីសម្ពោធនោះត្រូវបានធ្វើឡើងដោយមានការសហការជាមួយនឹងក្រុមហ៊ុន Cellcard ក្នុងការដាក់ចេញស្មាតហ្វូនតម្លៃធូរថ្លៃ សមត្ថភាពអាចដំណើរការកម្មវិធីបានល្អ ព្រមជាមួយនឹងការថែមជូនស្រោមទូរសព្ទ ផ្លាសិ្ទកការពារអេក្រង់ ស៊ីមលេខពិសេស អ៊ីនធើណិត 48 GB ដោយឥតគិតថ្លៃសម្រាប់រយៈពេល 6 ខែ។

អ្នកតំណាងក្រុមហ៊ុន G Gear លោក Meach Sambath បានឱ្យដឹងថា ការនាំយកស្មាតហ្វូនត្រកូល K ឆ្នាំ 2017 នេះ ដើម្បីឆ្លើយតបនឹងតម្រូវការរបស់អតិថិជន ដែលមានកើនឡើងជារៀងរាល់ថ្ងៃ ខណៈវាទាំង 2 ជាទូរសព្ទស្មាតហ្វូនជំនាន់ថ្មី 2017 ដែលត្រូវបានក្រុមហ៊ុន LG រចនាឡើងជាពិសសេ និងមានតម្លៃសមរម្យ។

លោកបន្តថា LG K10 2017 គឺជាស្មាតហ្វូនដែលមានរាងស្ដើង និងមានភាពទាក់ទាញត្រូវបានបំពាក់មកជាមួយអង្គគណនា 8 ប្រភេទ Octa-Core Processor ល្បឿន 1.5GHz ហើយមាន RAM 2 GB រួមនឹងទំហំផ្ទុក 16 GB ហើយអាចដាក់បន្ថែម MicroSD ដល់ 256 GB។ LG K10 មានអេក្រង់ប្រភេទ IPS ទំហំ 5.3 អ៊ីញ ផ្ទៃអេក្រង់មានលក្ខណៈកោង 2.5D អាចបង្ហាញចេញនូវកម្រិតរូបភាពបានកម្រិត HD និងមានកាមេរ៉ាទំហំ 13 MP មានបច្ចេកវិទ្យា Autofocus ហើយមានកាមេរ៉ា Selfie ទំហំ 5 MP ដែលអាចថតរូបភាពបានរហូតដល់120 ឌឺក្រេ ជាមួយបច្ចេកវិជ្ជា Wide Angle Selfie Camera ។ ក្នុងនោះវាមានទំហំថ្ម 2,800mAh និងអាចប្រើជាមួយស៊ីម 4G ដែលមានល្បឿនលឿនគួរជាទីពេញចិត្ត។

ដោយឡែកសម្រាប់ស្មាតហ្វូន LG K8 មានរូបរាងមិនចាញ់ K10 ប៉ុន្មានទេ ជាមួយនឹងទំហំ 5.0 អ៊ីញ ភ្ជាប់មកជាមួយអង្គគណនា 4 គ្រាប់ប្រភេទ Quad-Core Processor ល្បឿន 1.25 GHz, RAM 1.5 GB និងមានទំហំផ្ទុកទំហំ 16 GB ហើយអាចដាក់បន្ថែម MicroSD ដល់ 256 GB ដូចគ្នា។

ចំណុចពិសេសមួយទៀតនោះគឺ LG K8 មានកាមេរ៉ាទំហំ 13 MP ប្រើបច្ចេកវិទ្យា Autofocus, កាមេរ៉ាខាងមុខទំហំ 5 MP ដែលអាចថតរូបភាពបានយ៉ាងច្បាស់ ហើយមានថាមពលថ្ម 2500mAh។ ចំពោះតម្លៃទូរ័ព្ទ LG K10 មានតម្លៃប្រមាណ 249 ដុល្លារ ខណៈទូរសព្ទ LG K8 មានតម្លៃ 189 ដុល្លារ៕

May 8, 2017

ម្ទេសកំពុងត្រូវប៉ាន់ ខណៈមានតម្រូវការខ្ពស់ ប៉ុន្តែអ្នកដាំតិច

កសិករនៅភូមិស្វាយតានី ឃុំព្រែកគយ ស្រុកស្អាង ខេត្តកណ្តាល បានសម្តែងក្តីរីករាយទៅនឹងការប្រមូលផលម្ទេសយកទៅលក់ឱ្យម៉ូយបានតម្លៃខ្ពស់ ប៉ុន្តែពួកគាត់ក៏បានសំណូមពរសូមកុំឱ្យមានការនាំចូលច្រើនពីប្រទេសជិតខាង។

អ្នកស្រី ណាង ស្រី កសិករម្នាក់រស់នៅក្នុងភូមិស្វាយតានី បាននិយាយថា គាត់បានដាំម្ទេសរយៈពេលជាង10ឆ្នាំមកហើយ នៅលើផ្ទៃដីទំហំប្រមាណ6,600ម៉ែត្រការ៉េ។ បច្ចុប្បន្ននេះម្ទេសកំពុងមានតម្រូវការច្រើនគួរសមនៅលើទីផ្សារ ហើយបើនិយាយពីតម្លៃវិញក្នុង1គីឡូក្រាមអាចលក់បានចន្លោះពី 9,000ទៅ18,000រៀលទៅតាមរដូវ និងបរិមាណម្ទេសសម្បូរ ឬមិនសម្បូរ។ អ្នកស្រីបានប្រាប់ទៀតថា បន្ទាប់ពីប្រមូលផលហើយ ជាធម្មតាអ្នកស្រីតែងតែដឹកយកទៅបោះឱ្យម៉ូយដោយផ្ទាល់នៅផ្សារដើមគ រាជធានីភ្នំពេញ។ ចំពោះចំណូលពីការដាំម្ទេសគឺអាចនិយាយថា មានភាពសមរម្យ។

អ្នកស្រីបានប្រាប់ពីរបៀបដាំដើមម្ទេសថា មុនពេលដាំគេត្រូវភ្ជួររាស់ និងហាលដីប្រមាណពី7ទៅ10ថ្ងៃសិន ទើបលើកជារង ដោយយកកូនម្ទេសដែលបណ្តុះរួចមានអាយុចន្លោះពី7ទៅ10ថ្ងៃ ឬប្រវែងប្រហែល1ចង្អុលដៃមកដាំ(ស្ទូង)នៅលើរង និងត្រូវដាំឱ្យមានគម្លាតពីគ្នា1ម៉ែត្រ ដោយត្រូវស្រោចទឹក1ថ្ងៃ2ដង( ព្រឹក-ល្ងាច )ជាប្រចាំ។

ពេលដើមម្ទេសនៅតូច គឺទាមទារការថែទាំច្រើន ពិសេសត្រូវធ្វើស្មៅចេញពីរងដើម្បីឱ្យម្ទេសអាចលូតលាស់បានល្អ ហើយរយៈពេល3ខែទើបម្ទេសឱ្យផល។ ចាប់ពីម្ទេសឱ្យផលរហូតដល់ងាប់ទៅវិញគឺមានរយៈពេលពី 5ទៅ6ខែ ហើយរយៈពេល3ថ្ងៃគេអាចបេះបានម្តង និងបានទិន្នផលជាង 200គីឡូក្រាមសម្រាប់ផ្ទៃ 6,600ម៉ែត្រការ៉េ។

បើតាមកសិករខាងលើ នៅពេលម្ទេសមិនសូវសម្បូរគេអាចលក់បានក្នុងតម្លៃប្រមាណ20,000រៀលក្នុងមួយគីឡូក្រាម ប៉ុន្តែនៅពេលដែលមានការនាំចូលម្ទេសពីប្រទេសវៀតណាមច្រើន តម្លៃអាចស្ថិតនៅចន្លោះពី9,000ទៅ10,000រៀលប៉ុណ្ណោះ។
ទាក់ទងនឹងបញ្ហាតម្លៃ អ្នកស្រី ណាង ស្រី បានសំណូមពរថា សូមឱ្យមានការទប់ស្កាត់ខ្លះ ដោយកុំបណ្តោយឱ្យចូលស្រេចតែចិត្ត ព្រោះវាធ្វើឱ្យប៉ះពាល់ដល់ជីវភាពរបស់ពួកគាត់ដែលជាកសិករ។

លោក ទេព សូត្រ មេឃុំព្រែកគយ បានប្រាប់ថា នៅឃុំព្រែកគយ មានភូមិចំនួន10 និងមានប្រជាពលរដ្ឋ 3,152គ្រួសារ (17,458នាក់) ក្នុងនោះជាង 80%ជាកសិករ។ ដំណាំម្ទេសមានដាំភាគច្រើនតែនៅក្នុងភូមិស្វាយតានីប៉ុណ្ណោះ។ លោកមេឃុំបានបញ្ជាក់ថា ដំណាំម្ទេសពិតជាបានជួយសម្រួលដល់ជីវភាពប្រជាកសិករឱ្យមានជីវភាពធូរធារបានច្រើនប្រាកដមែន ដោយវាមិនត្រឹមតែផ្តល់ប្រាក់ចំណូលទៅដល់អ្នកដាំនោះទេ វាថែមទាំងផ្តល់ការងារ និងប្រាក់កម្រៃទៅដល់កម្មករស៊ីឈ្នួលបេះផងដែរ។

លោក កន ធី ជាកម្មករស៊ីឈ្នួលបេះម្ទេសបានប្រាប់ថា ម្ទេសគឺគេបេះតែផ្លែណាទុំៗប៉ុណ្ណោះ ហើយក្នុង1ព្រឹកលោកទទួលបានប្រាក់ឈ្នួលចំនួន 20,000រៀល គឺបេះពីម៉ោង7ដល់ម៉ោង11ថ្ងៃត្រង់ និងបេះជារៀងរាល់ថ្ងៃគ្រាន់តែផ្លាស់ប្តូរចម្ការតែប៉ុណ្ណោះ។ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកណ្តាល លោក ប៊ុនទួន ស៊ីមូណា បានមានប្រសាសន៍ថា បញ្ហាតម្លៃ និងការនាំចូលគឺជារឿងធម្មតាទេសម្រាប់ទីផ្សារសេរី ប៉ុន្តែអ្វីដែលយើងអាចដណ្តើមទីផ្សារពីប្រទេសជិតខាងបានមកវិញ និង
អាចប្រកួតប្រជែងជាមួយគេនោះ គឺកសិកររបស់យើងគួរតែនាំគ្នាងាកមកដាំដំណាំបែបសរីរាង្គ ព្រោះបានតម្លៃខ្ពស់ និងមានទីផ្សារធំផងដែរ ខណៈដែលការផ្គត់ផ្គង់បច្ចុប្បន្ននៅមានកម្រិតនៅឡើយ។ ទន្ទឹមនឹងនោះកសិករក៏គួរចេះសង្កេតមើលពីតម្រូវការទីផ្សារ និងគួរបង្កើតនូវផលិតផលប្រចាំភូមិស្រុក ប្រសើរជាជាងដាំនេះបន្តិចដាំនោះបន្តិច៕

May 8, 2017

កម្ពុជា ឈ្នះមេដាយ ១១គ្រឿង ពីឥណ្ដូនេស៊ី និងថៃ

កាលពីល្ងាចម្សិលមិញនេះ ក្រុមអត្តពលិកកម្ពុជា បាននាំយកមេដាយចំនួន១១គ្រឿងខាងផ្នែកកីឡាការ៉ាតេដូ ពីព្រឹត្តិការណ៍ ប្រកួតជើងឯកអាស៊ីអាគ្នេយ៍នៅប្រទេសឥណ្ឌូនេ ស៊ី និង ព្រឹត្តិការណ៍ Thai Open នៅប្រទេសថៃ មកជូនកម្ពុជា។ ខណៈដែលការត្រលប់មកវិញនោះ មានការទទួលស្វាគមន៍យ៉ាងកក់ក្ដៅពីទីស្នាក់ការ NOCC ពីសំណាក់កីឡាករការិនី គ្រូបង្វឹក និង ថ្នាក់ដឹកនាំ របស់សហព័ន្ធកីឡាការ៉ាតេដូ រួមទាំងលោកវ៉ាត់ ចំរើន អគ្គលេខាធិការនៃគណៈកម្មាធិការជាអូឡាំពិកកម្ពុជា (NOCC) ទៀតផង ។

មេដាយទាំង ១១គ្រឿងនោះគឺមេដាយមាសចំនួន ១គ្រឿង ដែលបានពីព្រឹត្តិការណ៍ Thai Open មេដាយប្រាក់ ៤គ្រឿងក្នុងនោះ២គ្រឿងបានពីព្រឹត្តិការណ៍ Thai Open និង ២ គ្រឿងបានពីព្រឹត្តិការណ៍ជើងឯកអាស៊ីអាគ្នេយ៍នៅ ឥណ្ឌូនេស៊ី និង ២គ្រឿងបានពីព្រឹត្តិការណ៍Thai Open ។មេដាយសំរិទ្ធ ៦ គ្រឿងដែល៤គ្រឿងបានមកពីជើងឯក អាស៊ីអាគ្នេយ៍ និង ២គ្រឿងបានពី Thai Open ។

លោកសាយ ណូរ៉ាអនុ ប្រធានខេមរសហព័ន្ធការាតេដែលជាប្រតិភូដឹកនាំនោះបានបញ្ជាក់ថានេះជាការប្រកួត ដ៏តឹងតែងមួយដែលកម្ពុជាដណ្ដើមបានជោគជ័យមុនព្រឹត្តិការណ៍ SEA Games ទី២៩មកដល់ ។នេះក៏ជាលើកដំបូងដែរ ដែលការាតេដណ្ដើមបានមេដាយល្អបែបនេះលោកសង្ឃឹមថាស៊ីហ្គេមកម្ពុជានឹងលេងបានល្អជាមិនខានឡើយ ។

លោកឡាច ច័ន្ទដារ៉ាអគ្គលេខាធិការខេមរសហព័ន្ធការាតេបានឲ្យដឹងដែរថាការប្រកួតជើងឯកអាស៊ីអាគ្នេយ៍ នៅឥណ្ឌូនេស៊ីមានប្រទេសចំនួន១០ចូលរួម ។ ចំពោះការប្រកួតក្នុងព្រឹត្តិការណ៍ Thai Open មានប្រទេសចំនួន១៧ ចូលរួម ។ សម្រាប់កម្ពុជាបញ្ជូនកីឡាករ-កីឡាការិនីចំនួន១២នាក់ទៅចូលរួមប្រកួត ។

កីឡាករដែលដណ្ដើមបានមេដាយមាសនោះគឺកុមារាឡាច រ៉ាយុទ្ធដែលបានមេដាយមាសលើវិញ្ញាសាមេគុន និង មេដាយសំរិទ្ធលើវិញ្ញាសាប្រយុទ្ធដែលមេដាយទាំង ២របស់គេបានក្នុងព្រឹត្តិការណ៍ Thai Open ។

ឯកឧត្តមវ៉ាត់ ចំរើនអគ្គលេខាធិការគនៈកម្មាធិការជាតិអូឡាំពិកកម្ពុជាដែលបានទទួលស្វាគមន៍ដល់ការវិលត្រ ឡប់របស់ក្រុមប្រតិភូការាតេនោះបានបញ្ជាក់ដោយឡែកថាស៊ីហ្គេមលើកទី២៩ការាតេមានឈ្មោះក្នុងបញ្ជីប្រកួត ។ លោកធ្វើការកត់សំគាល់ថាប្រសិនបើកីឡាករ-កីឡាការិនីនៃប្រទេសទាំង១០ដែលបញ្ជូនទៅចូលរួមប្រកួតក្នុងព្រឹត្ត ការណ៍ជើងឯកអាស៊ីអាគ្នេយ៍ជាកីឡាដែលត្រៀមស៊ីហ្កេមនោះការាតេកម្ពុជានឹងមានសង្ឃឹមច្រើនណាស់ក្នុងការរក មេដាយពីស៊ីហ្គេមលើកនេះ ៕

May 8, 2017

វិធីកម្ចាត់មុនខ្មៅនៅលើច្រមុះ និងស្បែកមុខ

ប្រសិនបើអ្នកមានបញ្ហាមុខខ្មៅតូចៗនៅតាមស្បែកច្រមុះ គេហទំព័រ ឡារ៉ែន សូមណែនាំវិធីកម្ចាត់មុនខ្មៅតាមបែបធម្មជាតិ ហើយមានប្រសិទ្ធភាពខ្ពស់បំផុត ដែលលោកអ្នកអាចធ្វើដោយខ្លួនឯងបាននៅផ្ទះ នឹងចំណាយថវិកាតិចបំផុត។ មិនមែនជារឿងពិបាកឡើយ នេះជាវិធីងាយៗក្នុងការកម្ចាត់មុខខ្មៅតូចៗ ដែលមាននៅតាមបរិវេណស្បែកច្រមុះ និងស្បែកមុខ ។

ធាតុផ្សំ៖
១.ម៉្សៅពោត
២.ស៊ុត យកតែផ្នែកព័ណ៌ស

វីធីធ្វើ ៖
លាយម៉្សៅពោត ជាមួយស៊ុត ទៅតាមបរិមាណដែលអ្នកចង់បាន ឲ្យក្លាយជាល្បាយខាប់ប៉ិៗ បន្ទាប់មកលាបលើបរិវេណសាច់ច្រមុះ នឹងពីលើស្បែកមុខដែលមានមុនខ្មៅ ហើយទុកចោលរយៈពេល ២០នាទី ទើបលាងទឹកចេញ។

ការអនុត្តន៍បែបនេះជារៀងរាល់ ៣ ថ្ងៃម្ដងក្នុងមួយសប្ដាហ៍ នេះលោកអ្នកនឹងឃើញនូវលទ្ធិផលជាទីគាប់ចិត្តក្នុងការកម្ចាត់មុនខ្មៅតូចៗនៅលើស្បែកមុខបានដូចប្រាថ្នា ៕

May 8, 2017

៩ប្រទេស ចូលរួមបិទព្រឹត្តិការណ៍ប្រណាំងកង់អន្តរជាតិកម្រិតអាជីពលើភ្នំបូកគោ

ព្រឹត្តិការណ៍ប្រកួតប្រណាំងកង់កម្រិតអាជីពអន្តរជាតិលើកទី១ នៅតំបន់ភ្នំបូកគោបានបញ្ចប់ហើយបន្ទាប់ពី ប្រកួតរយៈពេល២ថ្ងៃគឺថ្ងៃទី៦ ដល់ទី៧ ខែឧសភានេះ ដោយមានកីឡាករអាជីព និងមិនអាជីពចំនួន ១៤០នាក់ មកពីប្រទេសជិត ១០ក្នុងពិភពលោកចូលរួម។

ទាំងកីឡាអាជីព ទាំងមិនអាជីពអាចចូលរួមបានគ្រាន់តែការប្រកួតបែងចែកទៅតាមសមត្ថភាព និងតាមប្រភេទអាយុ គឺអាជីពប្រកយតជាមួយក្រុមអាជីព និងអ្នកមិនអាជីពប្រកួតជាលក្ខណៈកម្សាន្តជាមួយក្រុមមិនអាជីព ។

បន្ថែមលើនេះ លោកក៏បានបង្ហាញពីមោទនៈភាពផងដែរ ចំពោះការរៀបចំព្រឹត្តិការណ៍លក្ខណៈអន្ដរជាតិនេះ ដែលបានរួមចំណែកជួយដល់សង្គម ដោយទទួលបានថវិកាពីការចុះឈ្មោះ បូករួមទាំងការចូលរួមបរិច្ចាគពីក្រុមហ៊ុនស្រាបៀរកម្ពុជា និងធានាគារ RHB មួយចំនួនធំ សម្រាប់ជួយអង្គការកុមារក្រីក្រ ដែលជាគោលជួយរបស់សហព័ន្ធទៀតផង ។

ចំពោះលទ្ធផលវិញនោះគឺសម្រាប់ការប្រណាំងកម្រិតអាជីពបុរសចម្ងាយ៨៥គីឡូម៉ែត្រលេខ១បានទៅកីឡា ករ Muhammad Fauzan Bin Ahmad ជិះក្នុងថិរវេលា២ម៉ោង១៣នាទី៣៧វិនាទីលេខ ២កីឡាករ Muhammad Elmi Bin Jumari ជិះក្នុងថិរវេលា២ម៉ោង១៤នាទីដែលពួកគេទាំង២មកពីម៉ាឡេស៊ី និងលេខ ៣កីឡាករវៀតណាម Nguyen Van Duong ជិះក្នុងថិរវេលា២ម៉ោង១៥នាទី២៥វិនាទី ។

ប្រណាំងចម្ងាយ៥១គីឡូម៉ែត្រនារីបើកទូលាយចំណាត់ថ្នាក់លេខ ១កីឡាការិនីកម្ពុជាហេង ស៊ីវឡាងជិះក្នុង ថិរវេលា ១ម៉ោង ៣២នាទី៤៩វិនាទី លេខ ២កីឡាការិនីកម្ពុជាដែរឈ្មោះហេង ស៊ីហ្គិចដែរជិះក្នុងថិរវេលា ១៖៤១ នាទី៤៣វិនាទីពួកគេមកពីក្លិបកង់ហោះជាមួយគ្នា ។

ប្រណាំងចម្ងាយ៨៥គីឡូម៉ែត្របុរសបើកទូកាលលេខ ១កីឡាករRazif Salleh មកពីក្លិបEnduraceជិះក្នុង ថិរវេលា ២ម៉ោង ២៦នាទី ០៦វិនាទី លេខ២ កីឡាករខេង ទីទីមកពីក្លិបតាខ្មៅជិះក្នុងថិរវេលា២ម៉ោង២៦នាទី០៦ដែរនិង លេខ៣កីឡាករហួត ឡូយរស្មីមកពីក្លិបកង់ហោះជិះក្នុងថិរវេលា២ម៉ោង២៦នាទី០៧វិនាទី ។

ប្រណាំង៥១គីឡូម៉ែត្របុរសអាយុ៤០ឆ្នាំឡើងលេខ ១ កីឡាករ Jeremy Hunt មកពីក្លិបLotus Pond ជិះ ក្នុងថិរវេលា ១ម៉ោង ២៧នាទី ៣២វិនាទី។ លេខ២កីឡាករ RaviRafiមកពីក្លិបEnduraceជិះក្នុងថិរវេលា១ម៉ោង២៧ នាទី៣៤វិនាទីនិង ចំនាត់លេខ ៣បានទៅកីឡាករ Steven Wong មកពីសឹង្ហបូរីជិះក្នុងថិរវេលា ១ម៉ោង ៣១នាទី ៤៦វិនាទី ។

ចំពោះការជិះកង់ឡើងភ្នំដែលគេប្រសិទ្ធិនាមថា King Of Mountain(KOM)វិញនោះគឺជាការជិះកម្រិតអាជីព វិញនោះចំណាត់ថ្នាក់លេខ ១បានទៅកីឡាករមកពីប្រទេសវៀតណាមក្លិបដុងណាយឈ្មោះLoic Des Riac ជិះក្នុង ថិរវេលា១ម៉ោង៤៩ នាទី៥១ វិនាទី ។ លេខ២កីឡាករ Nik Mohd Azwan មកពីក្លិបPDM ៕

May 8, 2017

កំពូលមហាសេដ្ឋី Warren Buffet បង្ហើបប្រាប់គន្លឹះធ្វើឱ្យលោកជោគជ័យ

តើអ្នកចង់ដឹងទេថា រាល់ថ្ងៃមហាសេដ្ឋី Warren Buffet មានទម្លាប់ដូចម្ដេចខ្លះ ក្នុងការធ្វើឱ្យខ្លួនរបស់គាត់ទទួលបានជោគជ័យដូចសព្វថ្ងៃនេះ?

ខាងក្រោមនេះគឺជាទម្លាប់មួយចំនួនដែលមហាសេដ្ឋីរូបនេះ តែងតែធ្វើជាប្រចាំដើម្បីក្លាយជាអ្នកមានទ្រព្យសម្បតិ្ត និងសុខភាពល្អផងដែរ៖

១) មហាសេដ្ឋី Warren Buffet ចូលចិត្តញ៉ាំដូចជាកូនក្មេងអាយុ ៦ឆ្នាំ
អាថ៌កំបាំងរបស់ មហាសេដ្ធី Warren Buffet ដែលធ្វើឱ្យគាត់នៅតែក្មេងគឺ គាត់តែងតែញ៉ាំ Coca-Cola ហើយ និងការ៉េម។ នៅពេលដែលគេសួរគាត់ថា តើគាត់អាចធ្វើឱ្យខ្លួនរបស់គាត់នៅមានសុខភាពល្អបានដោយរបៀបណាជាមួយនឹងការញ៉ាំអាហាដែលមានជាតិអំបិល និងស្ករ? គាត់ក៏បានឆ្លើយថា ខ្ញុំបានឆែកមើលតារាងគណនាតម្លៃ ហើយនឹងអាត្រានៃការស្លាប់ដ៏ទាប់បំផុតគឺកូនក្មេងអាយុ៦ឆ្នាំ។ ហេតុដូច្នេះហើយខ្ញុំក៏សម្រេចចិត្តញ៉ាំដូចជាកូនក្មេងអាយុ ៦ឆ្នាំដើម្បីជួយធ្វើឱ្យខ្ញុំមានសុខភាពល្អ។

២) មហាសេដ្ឋី Warren Buffet បានចំណាយពេលវេលារបស់គាត់ 80ភាគរយ ក្នុងការអានជារៀងរាល់ថ្ងៃ
ចាប់តាំងពីពេលដែលគាត់ភ្ញាក់ពីដេក ដោយមហាសេដ្ឋីរូបនេះ បានចំណាយពេលក្នុងការអានកាសែតមុនគេបំផុត បន្ទាប់មកទើបអានសៀវភៅផ្សេងៗតាមក្រោយ។ តាមពិតទៅ គាត់ប៉ាន់ស្មានថា គាត់បានចំណាយពេលវេលារបស់គាត់ប្រហែលជា 80ភាគរយក្នុងមួយថ្ងៃក្នុងការអាន។ នៅពេលដែលគេសួរគាត់ថា អ្វីទៅជាគន្លឹះក្នុងការទទួលបានភាពជោគជ័យរបស់គាត់? Warren Buffet បានចង្អុលទៅកាន់គំនរសៀវភៅហើយនិយាយថា ចូរអានឱ្យបាន 500ទំព័រជារៀងរាល់ថ្ងៃ។ អ្នកអានបានកាន់តែច្រើន ចំណេះដឹងរបស់អ្នកនឹងកាន់តែកើន នៅពេលដែលចំណេះដឹងអ្នកកាន់តែកើន អ្នកនឹងកាន់តែឆ្លាត នៅពេលដែលអ្នកកាន់តែឆ្លាត អ្នកនឹងរកលុយបានកាន់តែច្រើនផងដែរ។ នេះគឺជាគន្លឹះឆ្ពោះទៅរកភាពជោគជ័យរបស់ខ្ញុំ។

គួរបញ្ជាក់ផងដែរថា លោក Warren Buffet ជាមហាសេដ្ឋីលំដាប់ទី2 វ័យ 86ឆ្នាំ ដែលមានលុយច្រើនជាងគេបំផុត បន្ទាប់ពីលោក Bill Gates ដោយគិតត្រឹមថ្ងៃនេះ លោក Warren Buffet មានលុយប្រមាណ 77ពាន់លានដុល្លារអាមេរិក៕

May 8, 2017

សាន សុម៉ាលី តួស្រីល្បីក្នុងរឿងកាកីត្អូញថា ទីផ្សារសិល្បៈស្ងាត់ដូចចោរលួចសេះ

ភ្នំពេញៈ ទើបតែវិលមកពីសម្តែង និងកើបលុយដុំនៅអូស្រ្តាលីចំនួន ៥ សប្តាហ៍ សោះក៏ស្រាប់តួសម្តែងស្រីចូលចិត្តព្រលែងដើមទ្រូងសិចស៊ី កញ្ញា សាន សុម៉ាលី និងជាតួស្រីល្បីក្នុងភាពយន្តរឿងកាកី បានរអ៊ូររទាំថា ខ្លួនចាស់ហើយមិនសូវមានទីផ្សារក្នុងសង្គមសិល្បៈទៅវិញ។

តារាសម្តែងស្រីចូលចិត្តតុបតែងខ្លួនបែបសិចស៊ី កប់ស៊េរី បញ្ចេញសាច់ក្បាលពោះ និងដើមទ្រូងយ៉ាងគ្រហើៗ សាន សុម៉ាលី ស្រាប់តែថ្មីៗនេះនាងបានរអ៊ូរថា៖ «ហេតុខ្លួនខ្ញុំចាស់ និងសម្រស់ក៏លែងសូវស្អាត ទើបមិនសូវមានផលិតកម្មណាគេ ហៅទៅថតកុនទៀតដូចជាតួស្រីក្មេងៗ និងស្អាតៗជំនាន់ក្រោយ។ ដោយសារតែខ្លួនកាន់តែមានវ័យជ្រេ សម្រស់ក៏លែងសូវស្អាតផូរផង់ដូចកាលមុន និងតម្លៃខ្លួនថតកុនក៏មិនសូវខ្ពស់ដូចតារាស្រីវ័យក្មេងសាច់សខ្ចីមិនអាចប្រជែងបាន» ។

កញ្ញា សាន សុម៉ាលី ក៏ត្អួញត្អែរពីមូលហេតុខ្លះនាំឲ្យមានភាពស្ងាត់ទីផ្សារថា៖ «វិស័យភាពយន្តកាន់តែរីកដុះដាលគ្រាន់ជាងមុនបន្តិច ហើយតារាសម្តែងស្រករក្រោយក៏សម្បូរ និងមានសម្រស់ស្រស់ស្អាតៗច្រើនទៀត ដូច្នេះខ្ញុំពិបាកប្រកួតប្រជែងនឹងពួកគាត់ណាស់។ បច្ចុប្បន្ននេះ ខាងផលិតកម្ម និងអ្នករៀបចំកម្មវិធីទៀតសោត គេក៏រើសយកសិល្បករ សិល្បការិនី ដែលអាចចេះទាំងច្រៀង និងចេះទាំងការសម្តែងផងដែរ»។

គួររំឮកថា តារាចម្រៀង និងសម្តែងស្រីប្រុស ៦ដួង រួមមានកញ្ញា សាន សុម៉ាលី កញ្ញា នៅ សូនីតា កញ្ញា មាស វ៉ារី លោក ម៉ាដូណា លោក អាឡិច ចាន់ត្រា និងពិធីការិនីផ្នែកសម្របសម្រួលកម្មវិធីកញ្ញា ដារ៉ា នីតា បានហោះហើរទៅចូលរួមនៅក្នុងកម្មវិធីសប្បុរធម៌មួយគឺការសម្តែងសិល្បៈនៅជាច្រើនរដ្ឋក្នុងប្រទេសអូស្ត្រាលីកាលពីខែកុម្ភៈ៕

May 8, 2017

អាហារ 5យ៉ាង ដែលមិនអាចខ្វះបាន សម្រាប់ស្ត្រី 30ឆ្នាំឡើង

អាហារចាំបាច់ចំពោះរាងកាយជានិច្ច អ្នកណាៗក៏ដឹងដែរ ទើបថ្ងៃនេះយើងមានអាហារសុខភាព 5យ៉ាងមកផ្ញើនារីៗ ជាអាហារដ៏ល្អដែលមិនអាចខ្វះបាន ដើម្បីមើលថែទាំសុខភាព និងការពាររោគដែលតែងកើតច្រើននៅក្នុងក្រុមនារីៗយើងពេលអាយុកាន់តែច្រើនឡើង ដូច្នេះយើងនាំគ្នាទៅមើលថា តើមានអ្វីខ្លះ?

1/ យ៉ាអួជាតិខ្លាញ់តិច រសជាតិធម្មជាតិ ជួយកាត់បន្ថយការកើតមហារីកសុដន់ និងការឆ្លងមេរោគក្នុងរន្ធស្បូន ក្រៅពីនេះនៅមានកាល់ស្យូមខ្ពស់ ការពារបញ្ហាពុកឆ្អឹងបានទៀតផង។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 3-5ដង។

2/ ត្រីដែលមានខ្លាញ់ ដូចជា ត្រីសាលម៉ុន ត្រីមែកឃើរេល និងត្រីសាឌីន មានជាតិអាស៊ីតអូមេហ្កា 3 ជួយការពារជំងឺរលាកសន្លាក់ឆ្អឹងរូម៉ាតយដ៍ ជំងឺអេសអឹលអីុ ដែលកើតច្រើននៅលើស្ត្រីច្រើនជាងបុរស។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 2-3ដង។

3/ សណ្តែក ទាំងសណ្តែកដែលទទួលទានបានទាំងកួ ដូចជា ពពាយ សណ្តែកកួ សណ្តែកហោឡាន់តៅ សណ្តែកអង្គុយ សណ្តែកក្រហម និងសណ្តែកខ្មៅ ដែលមានហ្វៃប៊ើរខ្ពស់ មានសារធាតុដែលមានឬទ្ធិទប់ស្កាត់អង់ហ្ស៊ីមប្រូទិអេស ដែលជួយការពារ និងកាត់បន្ថយការបំបែកខ្លួនរបស់កោសិកាមហារីក ជួយការពារមហារីកសុដន់ ហើយដែលសំខាន់គឺ ហុចផលល្អដល់អ័រម៉ូនភេទស្រី។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 2-3ដង។

4/ ផ្លែប៉េងប៉ោះ និងឪឡឹក មានសារធាតុឡៃខូពីន ជួយការពារមហារីកសុដន់ មានសារធាតុអ៊ែនទីអុកស៊ីដេនត៍ ធ្វើឱ្យមើលទៅឃើញនៅក្មេងវ័យ ព្រោះជួយការពារស្បែកមិនឱ្យត្រូវកាំរស្មីអ៊ុលត្រាវីយ៉ូឡេបំផ្លាញ។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 3-5ដង។

5/ ប៊ីរី ដូចជា ប្លូ៊ប៊ីរី ស្ត្រប៊ីរី រ៉ាសប៊ីរី មានអ៊ែនថូសៃអ៊ែនស៍ (Anthocyans) ដែលមានតួនាទីសំខាន់ក្នុងការជួសជុលកោសិកាក្នុងរាងកាយរបស់យើង ក្រៅពីនេះនៅមានការងារស្រាវជ្រាវមួយដែលអះអាងថា វាជួយកាត់បន្ថយភាពប្រថុយប្រថានក្នុងការកើតមហារីកបានច្រើនប្រភេទ ដូចជា មហារីកសុដន់ មហារីកប្រព័ន្ធរំលាយអាហារជាដើម។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 3-4ដង។

ចង់ក្លាយជានារីរូបស្អាតសុខភាពល្អ ចូរកុំខកខានអាហារទាំង 5ប្រភេទដូចបានរៀបរាប់ពីខាងលើនេះ ព្រមទាំងត្រូវនាំគ្នាមើលថែទាំខ្លួនតាំងពីថ្ងៃនេះតទៅ៕

May 8, 2017

លោក Conte ជឿជាក់ខ្ពស់ក្នុងការឈ្នះពាន Premier League មុនពេលប៉ះ Middlesbrough រាត្រីនេះ

លោក Antonio Conte បានបញ្ជាក់ថា លោកទើបតែចាប់ផ្តើមប៉ុណ្ណោះ ខណៈដែលក្រុម Chelsea កំពុងតែខិតយ៉ាងប្រកៀកក្នុងការឈ្នះពានក្របខ័ណ្ឌ Premier League។ គ្រូបង្វឹកសញ្ជាតិអ៊ីតាលីរូបនេះ នឹងនាំយកយកពានកំពូលរបស់អង់គ្លេសទៅកាន់កីឡដ្ឋាន Stamford Bridge ប្រសិនបើក្រុមរបស់លោកផ្តួលក្រុម Middlesbrough នៅរាត្រីនេះ និងយកឈ្នះលើក្រុម West Brom នៅថ្ងៃសុក្រ ខាងមុខ។ បន្ទាប់មក លោកនឹងត្រូវសម្រាកនៅរដូវក្តៅ ដើម្បីចាប់ផ្តើមធ្វើការជួសជុលក្រុម Chelsea ដើម្បីធ្វើឲ្យពួកគេកាន់តែមានភាពខ្លាំងក្លា។

លោក Conte បានឲ្យដឹងថា៖ «ពិតណាស់ យើងកំពុងតែស្ថិតក្នុងដំណាក់កាលនៃការផ្លាស់ប្តូរ។ យើងបាត់បង់កីឡាករជាច្រើនដែលបានបង្កើតប្រវត្តិសាស្ត្ររបស់ក្លិបនេះ»។ ខ្សែប្រយុទ្ធ Diego Costa នឹងត្រូវចាកចេញដើម្បីចូលរួមជាមួយនឹងក្លិបនៅចិននារដូវក្តៅនេះ ហើយលោក Conte បានបញ្ជាក់ថា៖ «នៅរដូវកាលនេះ យើងបានបាត់បង់ខ្សែការពារ Ivanovic យើងបានបាត់បង់ Mikel ហើយនៅរដូវកាលក្រោយ យើងនឹងបាត់បង់ John Terry ពោលគឺកីឡាករបីនាក់។ កុំភ្លេចថា Oscar បានចាកចេញកាលពីខែមករា ដែលនៅពេលនោះយើងបានលក់រូបគេចេញ»។

គ្រូបង្វឹករូបបានបន្ថែមទៀតថា៖ «បច្ចុប្បន្ន វាពិតជាលំបាកណាស់ក្នុងការប្រឈមមុខនឹងបញ្ហាទាក់ទងនឹង Costa ហើយខ្ញុំមិនចង់គិតពីបញ្ហានេះឡើយ។ ខ្ញុំចង់ផ្តោតទៅលើការប្រកួតបច្ចុប្ប និងត្រៀមលក្ខណៈឲ្យរួចរាល់ក្នុងការប្រឈមមុខនឹងរាល់ស្ថានភាពទាំងអស់ និងស្វែងរកដំណោះស្រាយដ៏ត្រឹមត្រូវ»។ Chelsea អាចនឹងទិញចូលកីឡាករថ្មី៦នាក់ក្នុងពេលបើកទីផ្សារដោះដូរកីឡាករ ដើម្បីពង្រឹងក្រុមរបស់ខ្លួន។ ក្រុម Chelsea នឹងឈានទៅកាន់ការប្រកួតនេះ ដោយការជឿជាក់ ក្រោយពីចាញ់តែមួយលើកគត់ពីការប្រកួតក្នុងផ្ទះខ្លួនឯង៥លើកចុងក្រោយរបស់ពួកគេ ប៉ុន្តែ ឈ្នះដល់ទៅ៤លើក។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕

ប្រភពពី៖ Mirror

May 8, 2017

កុលាបក្រហម ធ្លាក់ទៅក្របខ័ណ្ឌទី៣ ខណៈ Newcastle លើកពាន Championship

កុលាបក្រហម Blackburn Rovers បានក្លាយជាក្រុមម្ចាស់ជើងឯកក្របខ័ណ្ឌ Premier League ដំបូងគេក្នុងការធ្លាក់ទៅលេងក្នុងក្របខ័ណ្ឌលំដាប់ទី៣នៃកីឡាបាល់ទាត់របស់អង់គ្លេស កាលពីអាទិត្យ ស្របពេលដែលក្រុម Newcastle បានឈ្នះពាន Championship នៅថ្ងៃប្រកួតចុងក្រោយដ៏រំភើប។

ស្របពេលជាមួយគ្នានេះ ការដណ្តើមបានជ័យជម្នះផ្សេងទៀតសម្រាប់អតីតម្ចាស់ជើងឯកអឺរ៉ុប២សម័យកាល Nottingham Forest ដែលបានយកឈ្នះលើក្រុម Ipswich ៣-០ និង Birmingham City ដែលបានផ្តួលក្រុម Bristol City ១-០ បានធ្វើឲ្យក្រុម Blackburn ត្រូវធ្លាក់ចេញតែម្តង។ Blackburn បានក្លាយជាម្ចាស់ជើងឯកក្របខ័ណ្ឌ Premier League កាលពីឆ្នាំ៩៩៥ ប៉ុន្តែ ជោគវាសរបស់ពួកគេបានលិចលុងកាន់តែជ្រៅក្រោមការកាន់កាប់របស់ក្រុមហ៊ុនរបស់ឥណ្ឌា Venky’s។

លោក Rafael Benitez និងក្រុម Newcastle របស់លោក បានខិតខំព្យាយាមយ៉ាងខ្លាំងដើម្បីផ្តួលក្រុម Burnley ក្នុងលទ្ធផល ៣-០ ប៉ុន្តែ ការធ្វេសប្រហែសរបស់អ្នកចាំទី David Stockdale នៃក្រុមរបស់ Brighton បានជួយឲ្យក្រុមសារិកាព្រៃមួយនេះ វិលទៅកាន់ក្របខ័ណ្ឌ Premier League ក្នុងនាមជាម្ចាស់ជើងឯក។ ក្រុម Brighton បានបញ្ចប់ដោយស្ថិតក្នុងចំណាត់ថ្នាក់លេខ២ ក្រោយពីទទួលបានត្រឹមលទ្ធផលស្មើ ១-១ នៅលើទឹកដីក្រុម Aston Villa កាលពីថ្ងៃអាទិត្យ។ លោក Benitez ដែលឈ្មោះរបស់លោកត្រូវបានអ្នកគាំទ្រស្រែកច្រៀងបន្ទរតាមគ្នានោះ បានឲ្យដឹងថា៖ «អ្វីដែលត្រូវតែមានមោទនភាពនោះគឺថា ការខិតខំព្យាយាមដែលបានធ្វើអំឡុងពេលរដូវកាលនេះ បានទទួលលទ្ធផលនៅថ្ងៃនេះ»៕

ប្រភពពី៖ Reuters

May 8, 2017

Author: វល័ក្ខ