Author: វល័ក្ខ

ហេតុអ្វីចាំបាច់ត្រូវរៀនតាម E-learning?
នាពេលបច្ចុប្បន្ននេះ ដោយសារតែបណ្តាញបច្ចេកវិទ្យាមានការរីកចម្រើន ការសិក្សារបស់សិស្សនិស្សិតក៏បានផ្លាស់ប្តូរឆ្ពោះទៅរកភាពល្អប្រសើរឡើង និងកាន់តែទំនើប។ E-learning ជាបណ្តាញសិក្សាថ្មីដែលមានប្រយោជន៍ និងមានប្រសិទ្ធភាពបំផុតដែលបណ្តាសាកលវិទ្យាល័យល្បីៗលើពិភពលោកបានប្រើប្រាស់ក្នុងរយៈពេល 10ឆ្នាំចុងក្រោយនេះ។
បង្ហាញពីគុណតម្លៃនៃកម្មវិធី E-learning លោកគ្រូ ហៀន សំបឿន ប្រធានមជ្ឈមណ្ឌលការសិក្សាពីចម្ងាយ បានលើកឡើងថា ការសិក្សាតាមបែប E-learning ជាការសិក្សាដែលមានប្រសិទ្ធភាពមួយក្នុងចំណោមវិធីសាស្រ្តសិក្សាដែលមានសក្តានុពលលើពិភពលោក។ ការសិក្សាតាមរបៀបនេះ គឺអាចធ្វើឱ្យអ្នកសិក្សាចំណេញពេលវេលាច្រើន ព្រោះគាត់អាចសិក្សាបានគ្រប់ទីកន្លែងដែលមានអ៊ីនធើណេតតាមរយៈទូរស័ព្ទដៃ និងកុំព្យូទ័រ។ ម្យ៉ាងវិញទៀត មេរៀនទៀតសោតក៏សុទ្ធសឹងតែជាមេរៀនដែលផលិតដោយសាស្រ្តាចារ្យដែលមានជំនាញ និងមានភាពច្បាស់លាស់។
លើសពីនេះទៅទៀត ការសិក្សាតាមបែប E-learning មានភាពងាយស្រួលក្នុងការស្រាវជ្រាវជាងការសិក្សាតាមបែបធម្មតា ព្រោះនៅក្នុងកម្មវិធី E-learning គឺភាគច្រើនបានដាក់ឱ្យប្រើប្រាស់ជាអន្តរជាតិ។ សិស្សនិស្សិតកម្ពុជា អាចចូលទៅមើលមេរៀនរបស់ប្រទេសដទៃតាមរយៈគណនី (User) ផ្ទាល់ខ្លួនបានដោយឥតគិតថ្លៃ។ ចំណុចនេះអាចផ្តល់ឱកាសល្អដល់អ្នកសិក្សាឱ្យមានគំនិតច្នៃប្រឌិតខ្ពស់ជាងមុនតាមរយៈការប្រៀបធៀបមេរៀន និងចំណុចសំខាន់ៗជាច្រើនទៀតនៃឯកសារយ៉ាងសម្បូរបែបដែលពួកគេបានជួបប្រទះ។
ពិសេសជាងនេះទៅទៀតការសិក្សាតាមបែប E-learning អាចជំរុញឱ្យសិស្សនិស្សិតកម្ពុជាអាចមានសមត្ថភាពប្រកួតប្រជែងជាមួយនឹងបណ្តាប្រទេសដទៃលើកម្រិតនៃការយល់ដឹង និងការអនុវត្តការងារជាក់ស្តែង តាមរយៈបណ្តាញបច្ចេកវិទ្យា។ អ្នករៀនតាម E-learning ភាគច្រើនជាអ្នកដែលនៅស្និទ្ធជាមួយនឹងបច្ចេកវិទ្យា និងបណ្តាញព័ត៌មានយ៉ាងសម្បូរបែបដែលត្រូវបានផលិតឡើងជាវីដេអូដូចជាការបង្រៀនរបស់សាស្ត្រាចារ្យដែរ តែអ្វីដែលល្អបំផុតនោះគឺ សម្រាប់ E-learning ពួកគេអាចរៀនសាឡើងវិញបានគ្រប់ពេលវេលាបើទោះបីជាមិនស្ថិតក្នុងថ្នាក់រៀនក៏ដោយ។ ក្រៅពីនេះ នៅពេលដែលមានសំណួរ សិស្សអាចចោទសួរ ទៅកាន់សាស្រ្តាចារ្យបានតាមរយៈគេហទំព័រដែលពួកគេអាចនឹងទទួលចម្លើយបានភ្លាមៗ ឬរង់ចាំក្នុងរយៈពេលខ្លីដើម្បីទទួលបានចម្លើយគ្រប់យ៉ាងដែលទាក់ទងនឹងប្រធានបទសំខាន់នៃមេរៀន។
នាពេលបច្ចុប្បន្ននេះ គ្រឹះស្ថានអប់រំធំៗមួយចំនួនបានដាក់ឱ្យដំណើរការកម្មវិធី E-learning ដោយក្នុងនោះមានដូចជា វិទ្យាស្ថានបច្ចេកវិទ្យាកម្ពុជា សាកលវិទ្យាល័យជាតិគ្រប់គ្រង សាកលវិទ្យាល័យជាតិកសិកម្ម និងសាកលវិទ្យាល័យវិទ្យាសាស្រ្តសុខាភិបាលជាដើម៕
May 9, 2017
ដឹងពីតម្លៃ Nokia 3310 ពេលមកដល់ស្រុកខ្មែរ
បន្ទាប់ពីដាក់បង្ហាញកាលពីខែកុម្ភៈ ឆ្នាំ 2017 ទូរស័ព្ទ Nokia 3310 ថ្មីត្រូវបានក្រុមហ៊ុន HMD បញ្ចេញលក់ជាបណ្ដើរៗហើយនៅតាមប្រទេសមួយចំនួនក្នុងពិភពលោក នៅឡើយតែកម្ពុជា អាចនឹងមកដល់នៅចុងខែនេះ។ ក្នុងនោះតម្លៃរបស់ទូរស័ព្ទស៊េរីចាស់ តែផ្លាស់ប្ដូរមុខមាត់ថ្មីនេះ ត្រូវបានគេបង្ហើបឱ្យដឹងថានឹងអាចមានតម្លៃប្រមាណ 50 ដុល្លារពេលមកដល់ស្រុកខ្មែរ។
អ្នកគ្រប់គ្រងតំណាងក្រុមហ៊ុន Nokia ប្រចាំកម្ពុជា លោក សុផេង ធ្លាប់បានបង្ហើបឱ្យដឹងថា តម្លៃដែលដាក់ចេញ គឺប្រហាក់ប្រហែលគ្នានឹងតម្លៃនៅលើទីផ្សារសកលដែរ តែវាអាចប្រែប្រួលខ្លះ អាស្រ័យលើពន្ធនាំចូលតាមប្រទេសនីមួយៗ។ ដោយឡែកទូរស័ព្ទ Nokia 3310 អាចនឹងមានតម្លៃប្រហាក់ប្រហែល ឬដូចគ្នាពេលមកដល់ស្រុកយើង។
លោកបន្តថា ៖ «នៅប្រទេសក្រៅ តម្លៃវាពេលចេញលក់គឺប្រហែល 50 ដុល្លារ ហើយស្រុកខ្មែរយើងក៏ប្រហែលអ៊ីចឹងដែរ។ ខ្ញុំគិតថាមិនខុសគ្នាច្រើនទេ»។ ក្រៅពីទូរស័ព្ទ Nokia 3310 ហើយ នៅមានស្មាតហ្វូនប្រើ Android ចំនួន 3 ម៉ូដែលទៀតដែលត្រៀមដាក់បង្ហាញខ្លួននៅក្នុងទីផ្សារកម្ពុជាយើងដែរ ប៉ុន្តែព័ត៌មានជាក់ច្បាស់យ៉ាងណានោះ សូមរង់ចាំដល់ចុងខែឧសភា។ លោកសុផេង បន្ថែម។
សម្រាប់លក្ខណៈសម្បត្តិទូរស័ព្ទ Nokia3310ដែលត្រៀមដាក់ចេញមានអេក្រង់ 2.4 អ៊ីញ និងមានទំហំតួខ្លួន បណ្តោយ115.6 x ទទឹង51 x កម្រាស់ 12.8 មីល្លីម៉ែត្រ និងមានទម្ងន់ 79.6 ក្រាម។ ទូរស័ព្ទនេះ អាចដាក់ Memory បានទំហំ 16MP ប្រភេទ microSD ដំណើរការដោយប្រព័ន្ធប្រតិបត្តិការ Nokia Series 30+ អាចថតរូបបានលើទំហំកាមេរ៉ា 2MP មានភ្លើង LED Flash ហើយមានថ្ម 12000mAh អាចដោះដូរបាន៕
May 9, 2017
កម្ពុជានឹងបានអ្វីខ្លះក្នុងនាមជាម្ចាស់ផ្ទះវេទិកាសេដ្ឋកិច្ចពិភពលោក?
កម្ពុជានឹងធ្វើជាម្ចាស់ផ្ទះនៃវេទិកាសេដ្ឋកិច្ចពិភពលោកជាលើកដំបូងមិនធ្លាប់មានក្នុងប្រវត្តិសាស្ត្រនៅថ្ងៃទី10 ខែឧសភា សប្តាហ៍នេះ។ ក្នុងនាមជាម្ចាស់ផ្ទះនៃវេទិកាសេដ្ឋកិច្ចពិភពលោក តើកម្ពុជានឹងទទួលបានអ្វីខ្លះដើម្បីជាប្រយោជន៍ដល់ប្រទេស?
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដែលជាប្រធានគណៈកម្មការអន្តរក្រសួងរៀបចំវេទិកាសេដ្ឋកិច្ចពិភពលោក បានមានប្រសាសន៍ថា នេះមិនមែនជាភាពចៃដន្យ ឬជាកិច្ចប្រជុំវិលជុំដូចកិច្ចប្រជុំកំពូលអាស៊ាននោះទេ។ ការដែលគេផ្តល់សិទ្ធិឱ្យកម្ពុជាធ្វើជាម្ចាស់ផ្ទះនាពេលនេះគឺដោយសារប្រទេសកម្ពុជាមានសុខសន្តិភាព និងស្ថិរភាពនយោបាយល្អប្រសើរ ពិសេសមានកំណើនសេដ្ឋកិច្ចថេរជារៀងរាល់ឆ្នាំក្នុងរង្វង់ជាង7%នាអំឡុង2ទសវត្សរ៍កន្លងមកនេះ។ ឯកឧត្តមបានលើកឡើងថា វេទិកានេះនឹងមានថ្នាក់ដឹកនាំ ពាណិជ្ជករ អ្នកប្រាជ្ញា និងសាស្ត្រាចារ្យល្បីៗលើពិភពលោកមកចូលរួម ដោយពួកគេនឹងពិភាក្សាលើប្រធានបទមួយចំនួនដូចជា បញ្ហាយុវជន បច្ចេកវិទ្យា និងកំណើនសេដ្ឋកិច្ច។
ឯកឧត្តមមានប្រសាសន៍ថា៖“ដោយសារតែកម្ពុជាមានកំណើនសេដ្ឋកិច្ចជាង7%ជារៀងរាល់ឆ្នាំ ទើបគេទទួលស្គាល់ និងអនុញ្ញាតឱ្យយើងធ្វើជាម្ចាស់ផ្ទះដើម្បីគេបានរៀនសូត្រពីកម្ពុជា និងអាចដកស្រង់យកបទពិសោធន៍ល្អៗពីគ្នាទៅវិញទៅមកក្នុងន័យថា តើធ្វើដូចម្តេចដើម្បីជួយដល់យុវជនឱ្យពួកគេអាចក្លាយទៅជាអ្នកដឹកនាំដ៏មានសក្តានុពលនៅថ្ងៃអនាគត”។
ជាមួយគ្នានេះដែរ ឯកឧត្តមបណ្ឌិត កៅ គឹមហួនរដ្ឋមន្ត្រីប្រតិភូអមនាយករដ្ឋមន្ត្រី ក៏បានប្រាប់ឱ្យដឹងដែរថា វេទិកាសេដ្ឋកិច្ចពិភពលោកស្តីពីអាស៊ាននេះ គឺជាឱកាសរបស់កម្ពុជាក្នុងការបង្ហាញមុខមាត់ថ្មីមួយទៀតទៅកាន់ពិភពលោក ពិសេសកម្ពុជានឹងតភ្ជាប់បណ្តាញទំនាក់ទំនងនៅលើពិភពលោកបានកាន់តែច្រើនថែមទៀត។
ឯកឧត្តមបានថ្លែងថា៖“ប្រធានបទដែលនឹងលើកឡើងនេះគឺបានឆ្លុះបញ្ចាំងទៅបច្ចុប្បន្នភាពនៃតម្រូវការ និងអ្វីៗដែលគួរយកចិត្តទុកដាក់ជាអទិភាព ដោយក្នុងនោះរួមមានបញ្ហាយុវជន បច្ចេកវិទ្យា និងកំណើន ដែលកំណើននេះរួមមាន កំណើនសេដ្ឋកិច្ច កំណើនការងារក្នុងតំបន់ កំណើននៃការតភ្ជាប់ទំនាក់ទំនង និងកំណើនផ្សេងៗទៀត”។ វេទិកានេះមានសារសំខាន់ជាច្រើន ទាំងសារសំខាន់ផ្នែកនយោបាយ សេដ្ឋកិច្ច និងការទូត។ វេទិកានេះក៏នឹងមានការជជែកពិភាក្សាគ្នាទៅលើតម្រូវការផ្សេងៗ និងរួមគ្នារកដំណោះស្រាយសម្រាប់អាស៊ាន ក៏ដូចជាពិភពលោកទាំងមូលផងដែរ។
ក្នុងនាមជាម្ចាស់ផ្ទះនៃវេទិកានេះ កម្ពុជាត្រូវគេរំពឹងថានឹងអាចទាក់ទាញវិនិយោគិនពីក្រៅប្រទេសឱ្យចូលមកបណ្តាក់ទុននៅកម្ពុជាបានកាន់តែច្រើនថែមទៀត ដើម្បីចូលរួមជាមួយរាជរដ្ឋាភិបាលក្នុងការផ្តល់ការងារដល់យុវជនខ្មែរ និងជួយលើកកម្ពស់កំណើនសេដ្ឋកិច្ចជាតិឱ្យកាន់តែប្រសើរថែមទៀត។ កម្ពុជា គឺជាប្រទេសស្ថិតនៅចំណុចកណ្តាលនៃបណ្តាប្រទេសក្នុងតំបន់អាស៊ាន ដែលនេះគឺជាលក្ខណៈអំណោយផលយ៉ាងខ្លាំងក្នុងការដឹកជញ្ជូនទំនិញ ក៏ដូចជាវត្ថុធាតុដើមផ្សេងៗទៅកាន់ប្រទេសដទៃក្នុងតំបន់ និងពិភពលោក ប៉ុន្តែអ្វីដែលកំពុងរាំងខ្ទប់ក្នុងការទាក់ទាញអ្នកវិនិយោគបរទេសនោះ គឺបណ្តាញផ្លូវថ្នល់ដែលមិនទាន់មានភាពល្អប្រសើរ និងតម្លៃអគ្គិសនីនៅមានកម្រិតខ្ពស់បើធៀបជាមួយប្រទេសជិតខាង។
គួរកត់សម្គាល់ថា បច្ចុប្បន្ននេះប្រជាជននៅក្នុងតំបន់អាស៊ានមានប្រមាណជាង600លាននាក់ ដោយក្នុងនោះ50% ជាយុវជនក្រោមអាយុ30ឆ្នាំ ដែលនេះគឺជាកម្លាំងស្នូលដ៏សំខាន់សម្រាប់អនាគតតំបន់អាស៊ានទាំងមូល។ អាស៊ានបានក្លាយជាទីផ្សារធំលំដាប់ទី3 នៅអាស៊ី និងលំដាប់ទី7 នៅលើពិភពលោក ដែលមានទំហំពាណិជ្ជកម្មធំលំដាប់ទី 4 បន្ទាប់ពីប្រទេសចិន អាល្លឺម៉ង់ និងអាមេរិក៕
May 9, 2017
ល្ងាចនេះ ខេត្តកណ្ដាលនឹងបញ្ចប់ការប្រកួតកីឡាប្រណាំងទូកដណ្ដើមពានរង្វាន់សម្ដេច ក្រឡាហោម ស ខេង
បើតាមអ្នកស្រី ប្រាក់ សម្ផស្ស មន្ត្រីរបស់សហព័ន្ធកីឡាប្រណាំងទូកកម្ពុជាបានឱ្យដឹងថា៖ នាល្ងាចនេះព្រឹត្តិការណ៍ប្រកួតកីឡាប្រណាំងទូកប្រពៃណីខ្នាតអន្តរជាតិ និងទូកកានូកាយ៉ាក់ពានរង្វាន់ “សម្តេច ក្រឡាហោម ស ខេង” លើកទី៤ នៅក្រុងតាខ្មៅ ខេត្តកណ្ដាលនឹងប្រារព្ធពិធីបិទជាផ្លូវការហើយ នៅវេលាម៉ោង៤នេះ បន្ទាប់ពីបានចាប់ផ្ដើមតាំងពីថ្ងៃទី ៧ ខែ ឧសភា ចុងសប្ដាហ៍មុននេះ។
អ្នកស្រីបន្តថា៖ ព្រឹត្តិការណ៍ការប្រកួតជ្រើសរើសជើងឯកកីឡាប្រណាំងទូកប្រពៃណីខ្នាតអន្តរជាតិ និងទូកកានូកាយ៉ាក់ ពានរង្វាន់ “សម្តេចក្រឡាហោម ស ខេង” លើកទី៤ នេះ កន្លងមកយើងទទួលបាននូវជោគជ័យល្អប្រសើរណាស់ តែក៏មានចំណុចខ្វះខាត និងបញ្ហាប្រឈមខ្លះៗដែរ ដែលតម្រូវឲ្យមានការត្រួតពិនិត្យ និងកែសម្រួលលើបទបញ្ជារួម ព្រមទាំងបទបញ្ជា បច្ចេកទេសកីឡាទូក ទាំង២ប្រភេទមួយចំនួនដែរ។
ការប្រកួតឆ្នាំនេះមាន ៨ សមាគម រាជធានី ខេត្ត ក្រសួង ដែលរួមមានខេត្តកណ្តាល ខេត្តព្រៃវែង ខេត្តកំពង់ឆ្នាំង ខេត្តកំពង់ធំ ខេត្តស្វាយរៀង ខេត្តកំពង់ស្ពឺ ខេត្តបាត់ដំបង និងភ្នំពេញ។ ជាមួយគ្នានេះដែរលទ្ធផលកាលពីម្សិលមិញនេះ ប្រភេទទូកប្រពៃណីអន្តរជាតិរបស់ម្ចាស់ផ្ទះខេត្តកណ្តាលរកបានមេដាយ១០គ្រឿង ក្នុងនោះមេដាយមាស២គ្រឿង ប្រាក់៣គ្រឿង និងមេដាយសំរិទ្ធ៥គ្រឿង។
សម្រាប់វិញ្ញាសាប្រណាំងចម្ងាយ៨០០ម៉ែត្រនារី៖ទូក៧មករា ចិត្តតែមួយខេត្តកណ្តាលទទួលបានមេដាយមាសទូកពោធិ៍មានជ័យបារមីតេជោខេត្តកណ្តាល ទទួលបានមេដាយប្រាក់ និងទូកពញាព្ញតេជសែនជ័យ ទទួលបានមេដាយសំរិទ្ធ។
រីឯវិញ្ញាសាប្រណាំងចម្ងាយ៨០០ម៉ែត្របុរស ៖ ទូកធ្នូ-សរាជសីហ៍ ក្រសួងមហាផ្ទៃទទួលបានមេដាយមាស ទូកពេជ្រកុមារសែនជ័យខេត្តកណ្តាលទទួលបានមេដាយប្រាក់ ទូកពោធិ៍មង្គលសែនជ័យ ខេត្តកណ្តាល និងទូកព្រែករាំងច័ន្ទហេងតេជោសែនជ័យ ទទួលបានមេដាយសំរិទ្ធ។
ចំពោះវិញ្ញាសាប្រណាំងចម្ងាយ៨០០ម៉ែត្រនារីចម្រុះ ៖ ទូកមហាសេនាចក្រីខេត្តកំពង់ស្ពឺទទួលបានមេដាយមាស ទូក៧មករាចិត្តតែមួយខេត្តកណ្តាលទទួលបានមេដាយប្រាក់ ទូកពោធិ៍មានជ័យបារមីតេជោ ខេត្តកណ្តាលទទួលបានមេដាយប្រាក់ និងទូកពញាព្ញតេជសែនជ័យទទួលបានមេដាយសំរិទ្ធ។
ដោយឡែកវិញ្ញាសាប្រណាំងចម្ងាយ៥០០ម៉ែត្រ ប្រភេទទូកកាយ៉ាក់ ៖ កីឡាករ សែម មករា ខេត្តកណ្តាលទទួលបានមេដាយមាស កីឡាករ ទ ហៀត ក្រសួងមហាផ្ទៃ ទទួលបានមេដាយប្រាក់ កីឡាករ លាភ ហេង ខេត្តបាត់ដំបង និងកីឡាករ សែម បញ្ញា ខេត្តកណ្តាលទទួលបានមេដាយសំរិទ្ធ៕
May 9, 2017
ស្ត្រីកម្ពុជាក្លាយជា King of the mountain នៅភ្នំបូកគោ ក្នុងចំណោមកីឡាការិនី មកពី៨ប្រទេសផ្សេងទៀត
នេះជាលើកទី១ហើយដែលកីឡាការិនីប្រណាំងកង់មួយរូបដែលត្រូវបានគេស្គាល់ថាជាកីឡាការិនីប្រណាំងកង់ដ៏ឆ្នើមរបស់កម្ពុជាបានបន្តជ័យជម្នះរបស់ខ្លួនមួយទៀតនាឆ្នាំ ២០១៧នេះ ដោយបានក្លាយជាកំពូលអ្នកជិះកង់ (King of the mountain) ប្រចាំព្រឹត្តិការណ៍ប្រណាំងកង់អន្តរជាតិលើកទី១នៅកំពូលភ្នំបូកគោ។
ស្ត្រីដែលលេងកីឡាប្រណាំងកង់ល្អជាងគេនៅក្នុងប្រទេសកម្ពុជា អ្នកស្រី ហេង ស៊ីវឡាងបានជាប់ចំណាត់ថ្នាក់លេខ១ ក្នុងចំណោមកីឡាការិនីមកពី៨ប្រទេសផ្សេងទៀតជុំវិញពិភពលោកដែលបានចូលរួមការប្រកួតកីឡាប្រណាំងកង់អន្តរជាតិកម្រិតអាជីពលើកដំបូងលើភ្នំបូកគោដែលទើបតែបញ្ចប់កាលពីពេលថ្មីៗនេះ។
ក្រោយឆ្លងកាត់ការប្រកួតអស់រយៈពេល២ថ្ងៃចាប់ពីថ្ងៃទី៦ ដល់ថ្ងៃទី៧ ខែឧសភា នៅលើកំពូលភ្នំបូកគោ កីឡាការិនី ហេង ស៊ីវឡាង បានក្លាយជាម្ចាស់ជើងឯកលើវិញ្ញាសាជិះកង់ពីជើងភ្នំមកកំពូលភ្នំចម្ងាយ៣០គីឡូម៉ែត្រ និងជិះចម្ងាយ៥១គីឡូម៉ែត្រ។ ជ័យជម្នះនេះបានធ្វើឲ្យកីឡាការិនី ហេង ស៊ីវឡាង ក្លាយជាកំពូលអ្នកជិះកង់ (King of the mountain) ប្រចាំព្រឹត្តិការណ៍ប្រណាំងកង់អន្តរជាតិលើកទី១នៅកំពូលភ្នំបូកគោ។
កាលពីថ្ងៃទី០៦ ខែឧសភា ឆ្នាំ២០១៦ការប្រណាំងកង់រយៈចម្ងាយ៣២គីឡូម៉ែត្រ ដោយកំណត់ការប្រើពេលវេលាប្រណាំងជិះពីក្រោមឡើងមកលើភ្នំនោះ អ្នកស្រី ស៊ីវឡាងបានយកឈ្នះកីឡាការិនី៥រូបដែលបានចូលរួម ដែលមាន កម្ពុជា ម៉ាឡេស៊ី និងថៃហើយក្នុងនោះមានកីឡាការិនីម្នាក់ ជាជម្រើសជាតិរបស់ប្រទេសម៉ាឡេស៊ីបានចូលរួមប្រកួតជាមួយអ្នកស្រីផងដែរ ប៉ុន្តែមិនអាចយកឈ្នះអ្នកស្រីបានឡើយ និងជាមួយគ្នានោះមានកីឡាការិនីថៃម្នាក់បានបោះបង់សិទ្ធិប្រកួតនៅក្នុងថ្ងៃប្រកួត។
ថ្ងៃចុងក្រោយនៃការប្រកួតរយៈចម្ងាយ ៥១គីឡូម៉ែត្រផ្នែកនារីកាលពីថ្ងៃទី០៧ ខែឧសភា ឆ្នាំ២០១៧ ដោយត្រូវជិះពីលើភ្នំចុះក្រោមព័ទ្ធជុំវិញ រួចឡើងមកលើភ្នំវិញ ជ័យជម្នះលេខ១ក៏បានទៅលើកីឡាការិនី ហេង ស៊ីវឡាង មកពីក្រុម Flying Bikes ប្រើរយៈពេល១ម៉ោង ៣២នាទី ៤៩វិនាទី លេខ២ បានទៅលើកីឡាការិនី ហេង សៀវហ្គិច មកពីក្រុម Fly Bikes ប្រើពេល១ម៉ោង ៤១នាទី ៤៣វិនាទី និងលេខ៣ កីឡាការិនី Lim Pek Yen មកពីប្រទេសម៉ាឡេស៊ីដែលជាជម្រើសជាតិនោះ ប្រើពេល១ម៉ោង៤១នាទី១វិនាទី។
បូកសរុបលទ្ធផលទាំងពីរថ្ងៃ គណៈកម្មការខ្មែរ និងម៉ាឡេស៊ី ដែលរៀបចំការប្រកួតបានវាយតម្លៃឱ្យអ្នកនាង ហេង ស៊ីវឡាង ជាប់ជយលាភីលេខ១ នៃការប្រណាំងកង់អន្តរជាតិលើភ្នំបូកគោប្រចាំឆ្នាំ២០១៧។
ជានារីស្រឡាញ់ការប្រណាំងកង់ម្នាក់ និងលើកមុខមាត់ប្រទេសជាតិយើងបានបង្ហើបថា “សម្រាប់ការប្រណាំងកង់លើភ្នំនេះជួបការលំបាកច្រើន ដូចជាធ្វើឱ្យតឹងជើង ជាដើម។ ដូច្នេះមុនការប្រកួត ត្រូវធ្វើការហ្វឹកហាត់រយៈពេលប្រហែលមួយអាទិត្យ ឬពីរអាទិត្យសម្រាប់ទឹកដីលើភ្នំនេះយ៉ាងហោចឱ្យបានពីរបីដងដែរ ទើបធ្វើឱ្យសាច់ដុំជើងមិនឈឺ និងស៊ាំជើង។ តាមធម្មតាផ្លូវឡើងភ្នំខ្ញុំមិនសូវពូកែប៉ុន្មានទេ ប៉ុន្តែខ្ញុំបានហ្វឹកហាត់ប៉ុន្មានដងដែរ ទើបស៊ាំ មិនសូវពិបាកប៉ុន្មាន»។
សូមរំឭកថា អ្នកស្រី ហេង ស៊ីវឡាង ធ្លាប់ដណ្តើមបានជយលាភីលេខ១ក្នុងការប្រណាំងកង់លើភ្នំបូកគោក្នុងចម្ងាយ៣២គីឡូម៉ែត្រកាលពីឆ្នាំ២០១៣។ អ្នកស្រីក៏បានក្លាយជាម្ចាស់ជយលាភីលេខ១ ក្នុងការជិះចម្ងាយ១១៧គីឡូម៉ែត្រ ក្នុងការប្រកួតប្រណាំងកង់ដើម្បីកុមារលើកទី១១ ឆ្នាំ២០១៦ផងដែរ។
កម្មវិធីប្រកួតប្រណាំងកង់បើកទូលាយម៉ាឡេស៊ីឆ្នាំ២០១៦ចម្ងាយផ្លូវ១០៥គីឡូម៉ែត្រដែលមានកីឡាករ កីឡាករិនីចូលរួមសរុបប្រមាណ៣,០០០នាក់ អ្នកស្រីហេង ស៊ីវឡាង បានឈ្នះជយលាភីលេខ១ផ្នែកនារីដោយប្រើពេល២ម៉ោង ៤២នាទី។ ក្នុងកម្មវិធីប្រណាំងកង់របស់ម៉ាឡេស៊ីនេះដដែល អ្នកស្រីបែរជាទទួលបានត្រឹមចំណាត់ថ្នាក់លេខ៤ ប៉ុណ្ណោះកាលពីដើមឆ្នាំ២០១៧។
កាលឆ្នាំ២០១៥ ព្រឹត្តិការណ៍ស៊ីហ្គេមលើកទី២៨ នៅប្រទេសសិង្ហបុរី អ្នកស្រីបានឈរនៅចំណាត់ថ្នាក់លេខ២ និងលេខ៣ រួចទៅហើយ ប៉ុន្តែដោយសារគ្រោះអកុសល អ្នកស្រីមិនឈ្នះលេខ១បានដោយសារមកពីកីឡាការិនីជនជាតិវៀតណាមមានចេតនាជិះកៀរឲ្យអ្នកស្រីដួលទើបមិនអាចយកមេដាយមាសមកជូនជាតិបាននៅពេលនោះ។
កន្លងមកថ្មីៗនេះ អ្នកស្រីទើបតែត្រឡប់មកពីហ្វឹកហាត់នៅប្រទេសប្រទេសកូរ៉េក្រោមការជួយជ្រោមជ្រែងរបស់គណៈកម្មការជាតិអូឡាំពិកកម្ពុជា និង សហព័ន្ធកីឡាប្រណាំងកង់ដើម្បីចង់ឱ្យកីឡាការិនីហេង ស៊ីវឡាង អាចដណ្តើមបានមេដាយមាស ជូនជាតិក្នុងព្រឹត្តិការណ៍ SEA GAME ២០១៧ នៅប្រទេសម៉ាឡេស៊ី នាពេលខាងមុននេះ៕
May 9, 2017
ហេតុអ្វី ប៉ែន ចំរ៉ុង នៅតែជាតួសម្តែងក្នុងផលិតកម្មរបស់អតីតប្រពន្ធខ្លួនអ៊ីចឹង?
ភ្នំពេញៈ គ្រាន់តែបានឃើញរូប Poster ភាពយន្តរឿង «អាមោកលក់ម៉ាំ» ដែលនឹងចាក់បញ្ចាំងនៅតាមរោងភាពយន្តនានានៅក្នុងរាជធានីភ្នំពេញដែលសម្តែងដោយលោក ប៉ែន ចំរ៉ុង អតីតកូនប្រសាមិនបានរៀបការ ដែលមានបន្សល់ចំណងស្នេហ៍កូនមួយជាមួយនឹងអ្នកនាង ភិន សុដាលីស ជាកូនស្រីថៅកែផលិតកម្មមហាហង្សនោះ មហាជនក៏មានការភ្ញាក់ផ្អើលសាជាថ្មីថា ម៉េចក៏លោក អ៊ិន សុភិន ចាងហ្វាងផលិ តកម្មនៅតែទទួលយកលោក ប៉ែន ចំរ៉ុង ធ្វើតួសម្តែងទៀតអ៊ីចឹង?
ភាពយន្តរឿង «អាមោកលក់ម៉ាំ» នេះមានលោក ប៉ែន ចំរ៉ុង ជាតួឯកប្រុស ខណៈតួឯកស្រីគឺកញ្ញា អេនជី ហើយក៏មានតួសម្តែងប្រុសជើងចាស់ដទៃទៀត ដូចជា លោក ហម ឆរ៉ា និង លោក ជា សំណាង ផងដែរ ដោយខ្សែភាពយន្តនេះនឹងចាក់បញ្ចាំងនៅថ្ងៃទី១៨ ខែឧសភា ឆ្នាំ២០១៧ ខាងមុខនេះនៅតាមរោងភាពយន្តនានាទូទាំងកម្ពុជា។
មហាជនបានលាន់មាត់ថា ចុះក្រែងបុរសម្នាក់នេះបានលែងលះកូនស្រីលោកហើយ ហេតុអីក៏ជ្រើសយកមកសម្តែងកុនក្នុងផលិតកម្មខ្លួនទៀត? ឬមួយចាងហ្វាងផលិតកម្មកំពុងតែត្រូវរ៉ូវនឹងអតីតកូនប្រសាមិនបានរៀបការដោយគ្រាន់តែទៅចុះអេតាស៊ីវិលនោះទេដឹង?
លោក អ៊ិន សុភិន ជាចាងហ្វាងផលិតកម្មភាពយន្តមហាហង្ស បានបង្ហើបប្រាប់ត្រួសៗដែរនាពេលកន្លងមកថា៖ «តាមពិតទៅរឿង “អាមោកលក់ម៉ាំ” នេះបានថតចប់រួចរាល់តាំងពីពេលពួកគេទាំងពីរ[កូនស្រីខ្ញុំ និងចំរ៉ុង] នៅត្រូវគ្នាម៉្លេះ ហើយក៏គ្រោងចាក់បញ្ចាំងនៅមុនពេលដែលពួកគេបែកគ្នាផងដែរ។ ដោយសារយើងបានបង្ហោះ trailer តាមគេហទំព័ររួចហើយ និងក៏មានការរិះគន់យ៉ាងចាស់ដៃដែរចំពោះវត្តមានរបស់ ចំរ៉ុង ក្នុងរឿងនោះដែរ ដូច្នេះហើយបានជាយើងផ្អាក និងទុករហូតមកដល់ពេលនេះ»៕
https://www.youtube.com/watch?v=0K06ur6ZOW0
May 9, 2017
ការមើលថែទាំអញ្ចាញធ្មេញ និងធ្មេញយ៉ាងត្រឹមត្រូវតាមវិធី
មានមនុស្សជាច្រើនតែព្រងើយកន្តើយនឹងការដុសសម្អាតធ្មេញ ដោយមិនដឹងឡើយថា ភាពស្អាតនៅក្នុងប្រអប់មាត់ក៏មានចំណែកសំខាន់ខ្លាំងដែរ ព្រោះវាអាចហុចផលដល់អវយវៈផ្នែកដទៃទៀតបាន ដោយគួរដុសសម្អាតធ្មេញយ៉ាងតិចក្នុងមួយថ្ងៃឱ្យបាន2ដង ចូរប្រើច្រាសដុសធ្មេញសរសៃទន់ មិនមែនជាច្រាសដែលមានសរសៃរឹងខ្លាំងពេកនោះទេ ព្រោះវាអាចធ្វើឱ្យធ្មេញឆាប់សឹក។ ទំហំរបស់ក្បាលច្រាសដុសធ្មេញក៏គួរមានខ្នាតដែលសមល្មមក្នុងការចូលទៅដល់គ្រប់កន្លុកកន្លៀតរបស់ធ្មេញបានយ៉ាងងាយស្រួល និងត្រូវផ្តល់ភាពសំខាន់របស់ការដុសសម្អាតធ្មេញដែលត្រឹមត្រូវតាមវិធី និងគ្រប់ទីតាំងរបស់ធ្មេញនីមួយៗ ដូច្នេះហើយទើប ឡារ៉ែន មានវិធីដុសសម្អាតធ្មេញដែលត្រឹមត្រូវមកជម្រាបជូនដូចតទៅ៖
1/ គួរដុសសម្អាតធ្មេញឱ្យត្រូវវិធីក្រោយពេលបរិភោគអាហាររួចគ្រប់ពេល តែបើមិនមានភាពងាយស្រួលក្នុងការដុសសម្អាតធ្មេញទេនោះក៏គួរតែខ្ពុរមាត់ខ្លាំងៗ ដោយទឹកស្អាតគ្រប់ពេល និងត្រូវដុសសម្អាតធ្មេញយ៉ាងតិចក្នុងមួយថ្ងៃ2ដងគឺ ភ្ញាក់ពីដំណេក និងមុនចូលគេង។
2/ ក្រោយពេលដុសធ្មេញ អាចប្រើម្រាមដៃដុសធ្វើម៉ាស្សានៅលើសាច់អញ្ចាញធ្មេញស្រាលៗគ្រប់កន្លែង ដើម្បីជួយឱ្យអញ្ចាញធ្មេញរឹងមាំ។
3/ ទទួលទានបន្លែ និងផ្លែឈើដែលជួយថែបំប៉នអញ្ចាញធ្មេញ និងជួយសម្អាតធ្មេញបែបងាយៗ ដូចជា ផ្លែក្រូច ប៉ិគក់ ត្របែក និងជម្ពូជាដើម។
4/ ចៀសវាងពីការខាំហែកវត្ថុរឹងៗដោយធ្មេញ ដូចជា ហែកថង់ប្លាស្ទិក ខាំខ្សែចំណងឱ្យដាច់ ប្រើធ្មេញគាស់បើកគម្របដបជាដើម ព្រោះអាចធ្វើឱ្យធ្មេញជំពើស បែក ឬរង្គើបាន។
5/ សង្កេតមើលធ្មេញ និងអញ្ចាញបន្ទាប់ពីដុសសម្អាតធ្មេញរួច ដោយការឆ្លុះកញ្ចក់មើលក្នុងប្រអប់មាត់ម្តងម្កាល បើឃើញមានចំណុចខ្មៅៗស្នាមហើមក្រហមៗនៅលើសាច់អញ្ចាញ ឬមានកំណកកំបោររឹងៗនៅតាមជើងធ្មេញ គួរតែទៅជួបទន្តពេទ្យ ដើម្បីពិនិត្យព្យាបាលជាបន្ទាន់។
6/ មិនគួរកេះធ្មេញដោយមិនចាំបាច់នោះទេ ព្រោះនឹងធ្វើឱ្យជើងធ្មេញមានប្រហោង និងអាចឆ្លងមេរោគបានទៀតផង។
7/ ក្នុងករណីដែលធ្មេញទឹកដោះ (សម្រាប់ក្មេងតូច) រង្គើធ្វើឱ្យឈឺ ខណៈពេលទទួលទានអាហារ ឬពេលដុសសម្អាតធ្មេញ ឬក៏មានធ្មេញពុកផុយរបេះអស់នៅសល់តែគល់ លែងមានធ្មេញហើយនោះ គួរតែទៅប្រឹក្សាជាមួយទន្តពេទ្យដើម្បីដកចេញភ្លាម។
វិធីដុសសម្អាតធ្មេញការដុសសម្អាតធ្មេញ គួរដុសសម្អាតឱ្យសព្វគ្រប់លើធ្មេញ និងគ្រប់ផ្នែករបស់ធ្មេញដែលច្រាសដុសធ្មេញចូលដល់ ពេលដុសធ្មេញមិនចាំបាច់ប្រើកម្លាំងសង្កត់ខ្លាំងៗនោះទេ ការដុសសម្អាតធ្មេញម្តងៗគួរប្រើពេលវេលាពី 2-3នាទី ការចាប់កាន់ច្រាសដុសធ្មេញ គួរចាប់កាន់ដងច្រាសដោយម្រាម 4ចំណែក ដោយម្រាមមេដៃដាក់សង្កត់នៅលើដងច្រាស ដែលធ្វើឱ្យអាចកម្រើកម្រាមដៃឱ្យច្រាសដុសធ្មេញវាសចុះ ឬវាសឡើងបានពេញដៃល្អ៕
May 9, 2017
សម្ដី Donald Trump ចាប់ផ្ដើមមានឥទ្ធិពលលើ Apple
សម្ដីរបស់លោកប្រធានាធិបតី Donald Trump ចាប់ផ្ដើមមានឥទ្ធិពលទៅលើក្រុមហ៊ុន Apple ហើយ បន្ទាប់ពីបានស្នើឱ្យក្រុមហ៊ុនមួយនេះផ្លាស់ប្ដូររោងចក្រផលិតទូរស័ព្ទ iPhone មកទឹកដីអាមេរិកវិញ តាំងពីពេលមុនឡើងកាន់តំណែង។
ឆ្លើយតបនឹងសំណើមួយនេះ នាយកប្រតិបត្តិ Apple លោក Tim Cook បានឆ្លើយប្រាប់ទៅពិធីករលោក Jim Cramer នៅក្នុងបទសម្ភាស Mad Money របស់ប៉ុស្តិ៍ CNBC កាលពីថ្ងៃទី 03 ខែឧសភា ឆ្នាំ 2017 នេះថា ក្រុមហ៊ុនលោកបានត្រៀមខ្លួននឹងធ្វើការវិនិយោគដ៏ធំមួយសម្រាប់ពលរដ្ឋអាមេរិក ដើម្បីតបនឹងការស្នើសុំរបស់លោកប្រធានាធិបតី។ ទឹកប្រាក់ មួយពាន់លានដុល្លារ នឹងត្រូវបានត្រៀមសម្រាប់ការសាងសង់រោងចក្រ និងសម្ភារជាច្រើនទៀត ដើម្បីបម្រើដល់ចង្វាក់ផលិតកម្មទូរស័ព្ទ iPhone។
នាយកប្រតិបត្តិរូបនេះថ្លែងថា «ការផ្លាស់ប្ដូរនេះ វាប្រៀបដូចទឹករលកក្នុងបឹង ដែលមិនដែលបោកបក់ ប៉ុន្តែពេលវាចាប់ផ្ដើម គឺខ្លាំងតែម្ដង។ លោកបន្តថា ក្រោយការសាងសង់បានបញ្ចប់ នៅតំបន់នោះអាចនឹងបង្កើតការងារផ្សេងទៀត ពិសេសបណ្តុំសេវាឧស្សាហកម្ម ដែលបង្កើតឡើងជុំវិញកន្លែងការងារនេះតែម្តង និងវាជាវិធីដែល Apple ចង់សងគុណត្រឡប់ទៅសង្គមវិញ តាមរយៈការបង្កើតការងារ និងការប្រើប្រាស់ថាមពលកកើតឡើងវិញ»។
យ៉ាងណាមិញ ការឆ្លើយតបខាងលើ វាហាក់ផ្ទុយពីអ្វីដែល Apple ធ្លាប់បានបង្ហើបកាលពីពេលកន្លងទៅទាក់ទងនឹងរឿងផ្លាស់ប្ដូរទីតាំងរោងចក្រមួយនេះ។ លោក Luca Maestri ប្រធានផ្នែកហិរញ្ញវត្ថុរបស់ Apple ធ្លាប់បានឱ្យដឹងក្នុងសន្និសីទកាសែត Goldmans Sachs កាលពីដើមឆ្នាំ 2017 ថា ក្រុមហ៊ុនគ្មានបំណងនឹងធ្វើការផ្លាស់ប្ដូរអ្វីមកទឹកដីអាមេរិកទេ ព្រោះក្រុមហ៊ុនបានធ្វើការវិនិយោគធំ និងជួយសេដ្ឋកិច្ចរបស់អាមេរិកជាច្រើនឆ្នាំមកហើយ លើទឹកប្រាក់រាប់ពាន់លានដុល្លារនៅអាមេរិក ដែលបើគិតសរុបមកដល់ពេលនេះ និងរយៈពេល 10 ឆ្នាំនេះ៕
ប្រភព៖ YouTube
អត្តបទដោយ Chhaihor
May 9, 2017
តារាចម្រៀងល្បីៗនិយាយអ្វីខ្លះ ក្នុងឱកាសទិវាកាកបាទក្រហម និងអឌ្ឍចន្ទក្រហមពិភពលោកលើកទី១៥៤
ភ្នំពេញៈ នាថ្ងៃប្រារព្ធខួបលើកទី១៥៤ នៃទិវាកាកបាទក្រហម និងអឌ្ឍចន្ទក្រហមពិភពលោកនៅកម្ពុជាឆ្នាំនេះ គេសង្កេតឃើញមានតារាសម្តែង និងតារាចម្រៀងជាច្រើនចូលរួមកម្មវិធី ក្រោមអធិបតីដ៏ខ្ពង់ខ្ពស់របស់សម្តេចនាយករដ្ឋមន្រ្តី ហ៊ុន សែន និងលោកជំទាវ។
ប្រកបដោយទឹកមុខរីករាយយ៉ាងក្រៃលែងគេសង្កេតឃើញថា មានក្រុមតារាចម្រៀងល្បីកំពូលៗរបស់ផលិតកម្មធំៗចូលរួមផងដែរ ដែលមានដូចជា វត្តមានតារាចម្រៀងស្រីកញ្ញាពេជ្រ សោភា លោកព្រាប សុវត្ថិ កញ្ញាឱក សុគន្ធកញ្ញា កញ្ញា សុគន្ធ នីសា នៅក្នុងទ្រនំហង្សមាស និងលោកខេមរៈ សិរីមន្ត ដែលមកពីផលិតកម្មសាន់ដេ ដែលតារាចម្រៀងប្រុសរូបនេះទើបតែទទួលបានងារជាតំណាងទូតសុឆន្ទៈ ក្នុងការផ្សព្វផ្សាយ និងបញ្ជ្រាបការយល់ដឹងពីមេរោគអេដស៍ និងជំងឺអេដស៍ ប្រចាំអាជ្ញាធរជាតិប្រយុទ្ធនឹងជំងឺអេដស៍សម្រាប់ឆ្នាំ២០១៧-២០១៨ ជាមួយនឹងតារាចម្រៀងស្រីហង្សមាសកញ្ញា ទេព បូព្រឹក្ស កាលពីចុងសប្តាហ៍កន្លងមក។

កញ្ញា ពេជ្រ សោភា បានបង្ហើរអារម្មណ៍រីករាយនាឱកាសចូលរួមនោះថា៖ «ពិបាកនិយាយដែរ ព្រឹកមិញហ្នឹង ពិតជាសប្បាយណាស់ បានជួបគ្នាម្តងៗ មិនចេះខ្វះរឿងសើចទេ»។ កញ្ញានិយាយថា «យាយប៉ិកុំផូស្តរូបនោះអីពួកម៉ាក…Cute ពេកហើយខ្លាច……!!» និងសារបែបកំប្លែងលេងថា៖ «និយាយថា ស្លក់ទាំងអស់គ្នាតែម្តង»។ ចំណែកលោក ឆន សុវណ្ណរាជ វិញ គ្រាន់តែបង្ហោ សារ ថា៖ «អរុណសួស្តីបាទ ថ្ងៃនេះខ្ញុំបាទបានចូលរួមក្នុងកម្មវិធីមនុស្សធម៌ខួបទី១៥៤ របស់កាកបាទក្រហមកម្ពុជា» ខណៈលោក ណុប បាយ៉ារិទ្ធិ វិញនិយាយថា៖«ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០១៧នេះ ត្រូវប្រារព្ធឡើងក្រោមប្រធានបទ «កាកបាទក្រហមមានគ្រប់ទីកន្លែង សម្រាប់គ្រប់ៗគ្នា»៕
May 9, 2017
កុមារក្នុងសតវត្សទី21 ត្រូវការបំណិនជីវិតអ្វីខ្លះ?
ការអប់រំជាផ្នែកសំខាន់បំផុតនៃជីវិតមនុស្សគ្រប់សម័យកាល ហើយថ្មីៗនេះដោយសារតែការរីកចម្រើននៃប្រព័ន្ធអប់រំ និងការរស់នៅរបស់ប្រជាជន បានធ្វើឱ្យការអប់រំនៅក្នុងសតវត្សថ្មីនេះក៏ត្រូវការធាតុផ្សំបន្ថែមជាច្រើន។
លោក ប៉ិច ប៉ូឡែន អគ្គនាយកនៃក្រុមហ៊ុនវេសឡាញ អេឌ្យូខេសិនគ្រុប បានលើកឡើងនៅក្នុងសិក្ខាសាលាស្តីពីបំណិនជីវិតសតវត្សទី 21 ថាការអប់រំក្នុងសតវត្សនេះគឺត្រូវការចំណេះដឹងជាមូលដ្ឋានមួយចំនួនបន្ថែមពីលើអ្វីដែលមាននៅក្នុងប្រព័ន្ធអប់រំនៅក្នុងសាលា។ ភាពជាអ្នកដឹកនាំ ការធ្វើការងារជាក្រុម ការអប់រំឥរិយាបថ ការអប់រំផ្នែកហិរញ្ញវត្ថុ និងការអប់រំបែបចិត្តសាស្រ្តជាដើមសុទ្ធតែជាចំណុច ដែលត្រូវការក្នុងការបណ្តុះបណ្តាលមនុស្សឱ្យក្លាយជាបុគ្គលដែលប្រកបដោយគុណតម្លៃសម្រាប់សតវត្សទី21 នេះ។
លោក ប៉ិច ប៉ូឡែន បាននិយាយថា៖ “ភាពជាអ្នកដឹកនាំនិងការគ្រប់គ្រងហិរញ្ញវត្ថុពិតជាបានដើរតួនាទីយ៉ាងសំខាន់ ក្នុងការសិក្សារបស់សិស្សា-នុសិស្សដោយផ្សារភ្ជាប់ទៅនឹងការដឹកនាំជីវភាពរស់នៅនាពេលបច្ចុប្បន្ន និងជាមូលដ្ឋានគ្រឹះដ៏រឹងមាំក្នុងការប្រកបអាជីវកម្ម ឬការងារនាពេលអនាគត”។
អគ្គនាយកគ្រឹះស្ថានអប់រំឯកជនខាងលើក៏បានលើកឡើងផងដែរថា ការអប់រំសម្រាប់កុមារនៅក្នុងសតវត្សទី21 ចាំបាច់ក៏ត្រូវមានការចូលរួមឱ្យបានសកម្មផងដែរពីសំណាក់អាណាព្យាបាលគ្រប់រូបដែលជាអ្នកនៅជិតស្និតជាមួយនឹងកូនៗបំផុត។ នៅពេលដែលអាណាព្យាបាលបានយល់ដឹងពីតួនាទី និងសារៈសំខាន់ក្នុងការអប់រំកូនៗ ពួកគាត់នឹងអាចផ្តល់ឱកាសសម្រាប់កូនអនុវត្តនូវសកម្មភាពច្នៃប្រឌិតជាច្រើនដែលពួកគេបានរៀន ដើម្បីរុញច្រានឱ្យពួកគេកាន់តែមានឥរិយាបថល្អ បំណិនជីវិត ជំនាញក្នុងការគិតខ្ពស់ មានភាពច្នៃប្រឌិត និងមានភាពឈ្លាសវៃ។
ក្រៅពីកត្តាខាងលើ ការអប់រំនៅក្នុងសតវត្សថ្មីនេះ ក៏ត្រូវការចាំបាច់នូវសកម្មភាព និងការផ្លាស់ប្តូរផ្តត់គំនិតរបស់កុមារ ឬយុវជន ដើម្បីឱ្យពួកគេឆ្លើយតបជាមួយនឹងភាពបត់បែននៃសង្គម និងពិភពលោក។ ថ្លែងនៅក្នុងសិក្ខាសាលាស្តីពីការអប់រំ របស់យុវជននៅសតវត្សទី21 លោក ហឿន សំនៀង នាយករងខុទ្ធកាល័យឯកឧត្តមទេសរដ្ឋមន្ត្រី ស៊ុន ចាន់ថុល និងជានិស្សិតដែលបានបញ្ចប់ការសិក្សាពីសាកលវិទ្យាល័យ Harvard បានលើកឡើងថា ដើម្បីការសិក្សានៅក្នុងសម័យនេះគឺត្រូវតែស្រាវជ្រាវ និងបង្កើនភាពជាក់លាក់នេះហេតុផលឱ្យបានច្បាស់លាស់។ លោកថា ការសិក្សានៅសម័យមុន គឺភាគច្រើនជាបែបបទនៃការសិក្សាតាមបែបទន្ទេញចាំមាត់ ឬរៀនធ្វើយ៉ាងណាដើម្បីតែទទួលបានពិន្ទុល្អ និងដឹងតែពីព្រឹត្តិការណ៍ណាមួយដើម្បីប្រើប្រាស់ ក្នុងការរស់នៅតែប៉ុណ្ណោះ តែសម្រាប់ការសិក្សានៅសតវត្សទី21 គឺត្រូវមានលក្ខណៈខុសពីនេះ។
លោក ហឿន សំនៀង បាននិយាយថា៖ “ការសិក្សានៅក្នុងសតវត្សទី21 ចាំបាច់ត្រូវយល់ឱ្យច្បាស់ពីមូលហេតុ និងដំណើរនៃសាច់រឿងនៃមេរៀនដែលបានដាក់ឱ្យរៀននោះឱ្យបានច្បាស់លាស់។ ម្យ៉ាងវិញទៀត ការយល់ហេតុផលច្បាស់លាស់នេះអាចធ្វើឱ្យអ្នករៀនអាចចងចាំបានល្អ ហើយមានគំនិតបង្កើតថ្មីថែមទៀតផង”។ លោកហឿន សំនៀង បានបន្ថែមទៀតថា ការសិក្សាដោយយល់ច្បាស់ពីហេតុផល ក៏អាចរុញច្រានអ្នកសិក្សានោះឱ្យរកឃើញនូវដំណោះស្រាយសម្រាប់បញ្ហានៅក្នុងការរស់នៅផងដែរ។ នៅពេលដែលអ្នកណាម្នាក់គាត់យល់ហេតុផលនៃបញ្ហាច្បាស់លាស់ គាត់នឹងមានគំនិតបង្កើតថ្មីលើបញ្ហាស្រដៀងគ្នានេះ ឬយើងអាចបំបែកនូវចំណេះដឹងទាំងនេះទៅប្រើដើម្បីបង្កើតជាចំណេះដឹង និងបទពិសោធន៍សម្រាប់អនុវត្តថ្មីថែមទៀតផង។
ទន្ទឹមនឹងបំណិនជីវិតផ្នែកការគិត ជំនាញថ្មីៗក៏ជាចំណុចសំខាន់ផងដែរដែលគ្រឹះស្ថានអប់រំជាច្រើននៅកម្ពុជាកំពុងចាប់អារម្មណ៍ ដូចជាការបញ្ចូលនូវជំនាញក្នុងការគិតឱ្យបានលឿន ជំនាញបច្ចេកវិទ្យាព័ត៌មាន ភាពជាអ្នកដឹកនាំ ការធ្វើការងារជាក្រុម និងជំនាញភាសាដែលកំពុងត្រូវការប្រើប្រាស់ក្នុងសង្គមសម័យថ្មីជាដើម៕
May 9, 2017