Author: វល័ក្ខ

កាលពីល្ងាចម្សិលមិញនេះ ក្រុមអត្តពលិករួមជាមួយនឹងថ្នាក់ដឹកនាំកីឡាប្រដាល់ក្បាច់គុនខ្មែរ បាន អញ្ជើញទៅទទួលស្វាគមន៍ កីឡាករ សេន ប៊ុនថេន និង មឿន សុភា នៅព្រលានយន្តហោះអន្តរជាតិ ភ្នំពេញ ដោយពួកគេទាំងពីរបានប្រកួតឈ្នះម្ចាស់ផ្ទះបារាំង ដណ្ដើមបានខ្សែក្រវាត់ ២ និង ពាន១គ្រឿង មកជូនកម្ពុជា។ ខណៈដែលកីឡាករ ឡៅ ចន្ទា្រ បានបរាជ័យ មិនអាចយកខ្សែក្រវាត់មកជូនជាតិ និងអ្នកគាំទ្របាន។

កីឡាករបីរូបនេះ បានចាប់ផ្តើមប្រកួតតាំងពីថ្ងៃទី១៥ ខែមេសា ឆ្នាំ២០១៧ ក្នុងការប្រកួតដណ្តើមខ្សែក្រវាត់មិត្តភាពអន្តរជាតិ នៅលើទឹកដីនៃប្រទេសស្ថិតក្នុងទ្វីបអឺរ៉ុប ខណៈកីឡាករ មឿន សុភា និង សេន ប៊ុនថេន បានផ្តួលគូប្រកួត គឺកីឡាករម្ចាស់ផ្ទះបារាំង ដើម្បីឈ្នះខ្សែក្រវាត់បានម្នាក់១ដូចគ្នា។

លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានមានប្រសាសន៍ថា៖ លទ្ធផលដ៏ល្អប្រសើរខាងលើ គឺជាសញ្ញាណមួយដ៏ល្អ សម្រាប់វិស័យកីឡាគុនខ្មែរ ដែលត្រៀមបង្ហាញវត្តមានលើកដំបូងក្នុងការប្រកួតកីឡាស៊ីហ្គេម លើកទី២៩ នទីក្រុងគូឡាឡាំពួ ប្រទេសម៉ាឡេស៊ីនាខែសីហាខាងមុខនេះ ។

ដោយឡែកកីឡាករ ម៉ឺន សុភា និង ឡៅ ចន្ទ្រា ដែលជាបេក្ខភាពជម្រើសជាតិត្រៀមស៊ីហ្គេម ឆ្នាំ២០១៧នេះ បានលើកឡើងថា ការប្រកួតនៅបារាំង មានឧបសគ្គមួយចំនួនបានកើនឡើង ប៉ុន្ដែក្នុងនាមកីឡាករកម្ពុជា ពួកគេបានព្យាយាមយ៉ាងខ្លាំង ទម្រាំដណ្ដើមបានជ័យជម្នះជូនជាតិ លើកលែងតែ ឡៅ ចន្ទ្រា ដែលវាយខុសបច្ចេកទេស ត្រូវបានអាជ្ញាកណ្ដាលកាត់សេចក្ដីឲ្យចាញ់ ។ ប៉ុន្ដែយ៉ាងណាពួកគេ បានប្ដេជ្ញាបង្កើនការហ្វឹកហាត់ឲ្យបានកាន់តែល្អប្រសើរឡើងទៀត ដើម្បីត្រៀមស៊ីហ្គេម នាខែសីហាខាងមុខ ។

ចំណែកកីឡាករ សេន ប៊ុនថេន ដែលដណ្ដើមបានខ្សែក្រវាត់ ១គ្រឿងដែរនោះ បាននិយាយថា ខ្លួនមិននឹកស្មានថាអាចយកឈ្នះកីឡាករម្ចាស់ផ្ទះបារាំងដើម្បីក្លាយជាម្ចាស់ក្រវាត់បែបនេះទេ ។ ប៉ុន្ដែទោះជាបែបនេះក្ដី នេះគឺជាការប្រកួតលើកចុងក្រោយរបស់ខ្លួនហើយ ដោយលោកប្រាថ្នាចង់ធ្វើជាគ្រូបង្វឹកវិញម្ដង និងបញ្ឈប់ការឡើងសង្វៀនទៀតហើយ ។

គួរបញ្ជាក់ផងដែរថា បន្ទាប់ពីការប្រកួតរបស់ពួកគេបានបញ្ចប់រួចនោះ កីឡាករទាំងបីនាក់បានស្នាក់នៅប្រទេសបារាំងដើម្បីធ្វើការហ្វឹកហាត់បន្ថែមទៀត ហើយពួកគេបានចែករំលែកបទពិសោធរបស់ខ្លួនជាមួយកីឡាករក្នុងក្លឹបប្រដាល់មួយចំនួននៅក្នុងប្រទេសនោះ។ សូមជម្រាបផងដែរថា កីឡាករ២រូបក្នុងចំណោម ៣រូបនោះគឺ មឿន សុភា និង ឡៅ ចន្រ្ទា ត្រូវធ្វើការហ្វឹកហាត់ដើម្បីត្រៀមចេញទៅប្រកួតនៅ SEA GAME 2017 នៅទីក្រុងគូឡាឡាំពួ នៃប្រទេស ម៉ាឡេស៊ីខាងមុខនេះផងដែរ៕

ភ្នំពេញៈ ក្រោយពីបានវិលមកស្រុកខ្មែរបានប្រមាណជិតមួយឆ្នាំសោះ ក៏ស្រាប់តែអតីតពិធីការិនីទូរទស្សន៍ប៉ុស្តិ៍លេខ ៣ វីជេ អាណូ ដែលមានឈ្មោះពិតកញ្ញា សួន ភក្តី កាក់កបខ្លាំងទាំងការងារសិល្បៈ និងទាំងការងាររកស៊ីផ្ទាល់ខ្លួនបើកហាងលក់បាយ «Christian បាយសាច់ជ្រូកអាំង» និងឥឡូវនេះ ស្រាប់តែប្រកាសសេវាកម្មលក់ឡានប្រើវិធីបង់រំលោះទៀតផង។ កាលពីព្រឹកមិញនេះ វីជេ អាណូ បានបង្ហោះសារផ្សាយលក់ឡានម៉ាកហាយឡេនឌឺរស៊េរីឆ្នាំ២០០៣ ថា៖ «Highlander o3 មានសេវាកម្មបង់រំលោះចា!»។

សម្រាប់ការងារសិល្បៈវិញ បើតាមប្រភពខ្សឹបខ្សៀវថា ហេតុតែនាងជាស្រីស្អាតគ្រាន់តែថតស្ប៉តពាណិជ្ជកម្មឲ្យសម្អាងការត្រឹមតែប្រមាណ ១០ ឈុតសោះគឺកញ្ញាទទួលបានតម្លៃខ្លួនដល់ទៅ ៨០០ ដុល្លារ ខណៈថតកុនវិញនាងស៊ីថ្លៃដល់ទៅ ៣០០០ ដុល្លារ ឯណោះក្នុងមួយរឿង។

កញ្ញា សួន ភក្តី ហៅវីជេ អាណូ បានបកស្រាយយ៉ាងខ្លីថា៖ «ដំណឹងនោះដូចជាមិនអ៊ីចឹងទេបង! រាល់ការលើកឡើងគឺមិនពិតឡើយ។ សុំទោសផងបង! នាពេលនេះ នាងខ្ញុំជាប់រវល់ថត រហូតដល់ពេលល្ងាចឯណោះទើបអាចទំនេរបាន!»។ គួរបញ្ជាក់ថា កញ្ញា អាណូ បានវិលមកស្រុកខ្មែរវិញកាលដើមខែកក្កដា ឆ្នាំ ២០១៦ នេះ បន្ទាប់ពីបានឃ្លាតកាយឆ្ងាយពីសិល្បៈជិត ១០ ឆ្នាំ រស់នៅលើទឹកដីសហរដ្ឋអាមេរិក៕

កសិករខ្មែរតែងទម្លាប់ដាំដំណាំនៅលើដី ហើយពេលខ្លះត្រូវប្រើជីគីមី ទើបទទួលបានផលល្អសម្រាប់លក់នៅលើទីផ្សារ ប៉ុន្តែស្របពេលដែលបច្ចេកវិទ្យាមានការរីកចម្រើន កសិករសម័យថ្មី បានសាកល្បងដាំបន្លែនៅលើទឹកវិញម្តង ហើយទទួលបានផលល្អប្រសើរ និងមានការគាំទ្រខ្លាំងនៅលើទីផ្សារទៀតផង។

លោក ម៉ាន់ សុផល កសិករសម័យថ្មីដែលបានរៀបចំបច្ចេកវិទ្យាដាំបន្លែលើទឹក ស្ថិតនៅក្នុងភូមិថ្មី សង្កាត់តាខ្មៅ ក្រុងតាខ្មៅមានប្រសាសន៍ថា ការដាំបន្លែលើទឹកពិតជាទទួលបានការគាំទ្រច្រើននៅលើទីផ្សារមែន និងមិនហ៊ានទទួលការបញ្ជាទិញ ពីម៉ូយកុម្ម៉ង់ទិញមួយចំនួនទៀតផងព្រោះខ្លាចផ្គត់ផ្គង់មិនគ្រប់គ្រាន់។

លោកប្រាប់ពីមូលហេតុដែលនាំឱ្យមានការគាំទ្រដូច្នេះថា « បន្លែលើទឹកនេះ យើងមិនប្រើថ្នាំគីមីដើម្បីសម្លាប់សត្វល្អិត មិនចាំបាច់ដាក់ជីគីមីដូចបន្លែលើដីផ្ទាល់ ដែលនាំឱ្យប៉ះពាល់សុខភាពទាំងអ្នកដាំ និងអ្នកទទួលទានឡើយ មិនតែប៉ុណ្ណោះវាបានជួយសម្អាតបរិស្ថាន ជុំវិញកន្លែងរស់នៅរបស់យើងទៀតផង ដោយសារបន្លែលើទឹកមិនមានសត្វល្អិតឬដង្កូវមកយាយីដូចបន្លែលើដីនោះទេ»។

ឈរបង្ហាញបន្លែបណ្តើរនិយាយបណ្តើរ លោក សុផល បន្តថា សម្រាប់វិធីដាំបន្លែតាមរបៀបបច្ចេកវិទ្យាថ្មីនេះ ពិតជាចំណេញទាំងកម្លាំងទាំងពេលវេលា មិនចាំបាច់ត្រូវការដីធំទូលាយមិនចាំបាច់ត្រូវការធ្វើដី មិនបាច់ហត់នឿយបោចស្មៅ និងប្រើរយៈពេលខ្លីទៀតផង «ប្រសិនបើបន្លែសាលាដដែលជាពូជមកពីបរទេសវិញនោះ គឺប្រើរយៈពេលចាប់តាំងពីបណ្តុះ រហូតដល់ពេលប្រមូលផលតែពី 40ទៅ45ថ្ងៃ តែបើពូជបន្លែក្នុងស្រុក មានដូចជាស្ពៃគ្រប់ប្រភេទ និងខាត់ណាវិញនោះ ប្រើពេលវេលាចន្លោះពី 20ទៅ25ថ្ងៃប៉ុណ្ណោះអាចប្រមូលផលបានហើយ»។

ចំពោះការបណ្តុះកូន គេត្រូវយកគ្រាប់ពូជមកបណ្តុះជាមួយអេប៉ុងរយៈពេល 2យប់2ថ្ងៃ ឬក៏3យប់3ថ្ងៃ ទើបយកវាដាក់ឱ្យត្រូវពន្លឺថ្ងៃ តែបើថ្ងៃក្តៅខ្លាំងត្រូវយកចូលម្លប់វិញ រយៈពេលមួយសប្តាហ៍ទើបយកទៅដាក់ដាំ ក្នុងប្រព័ន្ធទុយោដែលយើងបានរៀបចំទុកជាស្រេច។ ដែលក្នុងប្រព័ន្ធទុយោនោះ យើងបានដាក់បញ្ជូលទឹកដែលមានដាក់លាយជីប្រភេទAB ហើយធ្វើឱ្យប្រពន្ធទឹកក្នុងទុយោរត់វិលចុះឡើងជានិច្ច ដើម្បីកុំឱ្យពេលថ្ងៃក្តៅខ្លាំង ទឹកនឹងឡើងកម្តៅដែលធ្វើឱ្យបន្លែលូតលាស់យឺត។

លោកបានបន្តថា ប្រសិនបើយើងដាំបន្លែតាមរបៀបបុរាណវិញនោះ ក្នុងផ្ទៃដីមួយហិកតាយ៉ាងហោចណាស់ ក៏ត្រូវការអ្នកស្រោចទឹកមើលថែពី 4ទៅ 5នាក់ដែរ តែបើដាំតាមបែបសម័យបច្ចេកវិទ្យាលើផ្ទៃទឹកនេះវិញ មិនចាំបាច់ប្រើកម្លាំងមនុស្សច្រើនដូច្នោះទេ តែម្នាក់ឯងគឺគ្រប់គ្រាន់ណាស់ទៅហើយ។ ហើយបន្លែដែលដាំនៅលើទឹកនេះ ធានាបាននូវគុណភាពល្អគ្មានការឆ្លងរោគពីដី គ្មានសត្វល្អិតបំផ្លាញ គ្មានដង្កូវស៊ី មិនបាច់ប្រើថ្នាំគីមី មានសុខភាពល្អទាំងអ្នកដាំទាំងអ្នកបរិភោគ កាត់បន្ថយសារធាតុគីមីពុល ដែលកើតចេញពីការប្រើថ្នាំសម្លាប់សត្វល្អិត ជួយឱ្យបរិស្ថានល្អប្រកបដោយភាពស្រស់ស្រាយ ហើយអ្វីដែលជាចំណុចល្អមួយទៀតនោះ មិនបាច់ចំណាយប្រាក់ទៅទិញជីដើម្បីកែប្រែដី មិនបាច់ទិញថ្នាំមកបាញ់លើបន្លែដើម្បីសម្លាប់សត្វល្អិតនោះទេ ហើយដាំបានរហូតមិនរើសរដូវកាល ដូចដាំតាមវិធីចាស់នៅលើដីនោះឡើយ។

លោក ម៉ាន់ សុផល បានធ្វើការប្រៀបធៀបផងដែរថា សព្វថ្ងៃនេះដោយសារលោកមានដីតូចចង្អៀត ដាំនៅតែក្នុងបរិវេណផ្ទះវីឡារបស់លោកបានតែ 4ថ្នាលប៉ុណ្ណោះ ដែលរោងថ្នាលមួយត្រូវសង់ជា2ជាន់ ហើយដាំតែបន្លែប្រភេទសាលាដដែលជាពូជដែលជនបរទេសចូលចិត្ត ដើម្បីផ្គត់ផ្គង់ដល់ភោជនីយដ្ឋានតែប៉ុណ្ណោះ ដែលក្នុងរយៈពេលមួយខែ អាចទទួលបានទិន្នផលគិតជាមធ្យម ជាង100គីឡូក្រាម និងមួយគីឡូក្រាមក្នុងតម្លៃ 3 ដុល្លារ។

ក្នុងការដាំបន្លែលើទឹកនេះ កសិករត្រូវចំណាយដើមទុនច្រើនបន្តិចសម្រាប់ទិញទុយោធ្វើថ្នាល និងទិញសំណាញ់ ឬដែកធ្វើរោង ប៉ុន្តែកសិករចំណាយតែម្តងប្រើបានច្រើនឆ្នាំ ហើយក្នុងរោងបន្លែមួយភ្ជាប់ទាំងឧបករណ៍រួចជាស្រេច ដែលមានទំហំទទឹង1,2ម៉ែត្រ និងបណ្តោយ4ម៉ែត្រមានតម្លៃជាង500ដុល្លារ ដែលដាំមួយសាអាចទទួលបានផលន្លោះពី 15ទៅ 20គីឡូក្រាម ហើយអាចប្រើប្រាស់បានរហូតដល់ទៅ 5 ឬ 10ឆ្នាំឯណោះ ហើយបើធ្វើការគណនាទៅនោះគឺមិនថ្លៃទេ។ ម្ចាស់កសិដ្ឋានដដែលបានប្រាប់ឱ្យដឹងទៀតដែរថា សព្វថ្ងៃនេះបណ្តាអង្គការនានាមានការចាប់អារម្មណ៍ខ្លាំងណាស់ ក្នុងនោះប្រជាពលរដ្ឋ ក៏បានមកកុម៉្មង់ទិញថ្នាលបន្លែនេះច្រើនដែរ ពិសេសទិញជាលក្ខណៈគ្រួសារ ព្រោះតែគេមិនចង់បានបន្លែដែលទិញពីផ្សារដែលពោរពេញទៅដោយសារធាតុគីមីប៉ះពាល់សុខភាពធ្ងន់ធ្ងរ។

យ៉ាងណាក៏ដោយអតិថិជនមួយចំនួន និយាយថាការទទួលទានបន្លែលើទឹក ពិតជាមិនមានសារធាតុគីមីប៉ះពាល់សុខភាពក៏ពិតមែន ប៉ុន្តែវាហាក់មិនសូវមានរសជាតិឆ្ងាញ់ដូចបន្លែសរីរាង្គ(គ្មានជាតិគីមី)ដែលគេដាំលើដីផ្ទាល់នោះទេ តែយ៉ាងណាក៏ដោយ ក៏វាប្រសើរជាងការទិញបន្លែតាមទីផ្សារដែលនាំចូលពីប្រទេសជិតខាងនោះដែរ៕

គ្រាដែលវិទ្យាស្ថានបច្ចេកទេស បណ្ដុះបណ្ដាលវិជ្ជាជីវៈក្រុងព្រះសីហនុ ត្រូវបានអភិវឌ្ឍជិតរួចរាល់ហើយនោះ ភាគីប្រទេសចិនតំណាងឱ្យខេត្តជាំងស៊ូ បានអះអាងថា នឹងខិតខំធ្វើកិច្ចសហប្រតិបត្ដិការជាមួយកម្ពុជាបន្ថែមទៀត ដើម្បីទាក់ទាញវិនិយោគិនឱ្យមកបណ្ដាក់ទុននៅក្នុងតំបន់មួយនេះឱ្យបានច្រើន។

បន្ទាប់ពីមានជំនួបរវាងឯកឧត្ដមអិត សំហេង រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈនិង ឯកឧត្ដម Huang Xiqiang ប្រធានមន្ទីរកិច្ចការបរទេសប្រចាំខេត្ដ ជាំង ស៊ូ ប្រទេសចិនរួមជាមួយថ្នាក់ដឹកនាំនៃក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ។ ភាគីតំណាងប្រទេសចិនបានសម្ដែងនូវសេចក្ដីរីករាយ ខណៈដែលថ្នាក់ដឹកនាំនៃប្រទេសទាំងពីរ បានធ្វើកិច្ចសហប្រតិបត្ដិការជាមួយគ្នាអស់រយៈពេល10ឆ្នាំមកហើយ។ លើសពីនេះភាគីទាំងពីរ (កម្ពុជា-ចិន) បានអះអាងថា នឹងខិតខំប្រឹងប្រែងក្នុងកិច្ចសហប្រតិបត្ដិការនេះដើម្បីកៀងគរអ្នកវិនិយោគឱ្យចូលមកបណ្ដាក់ទុននៅក្នុងតំបន់សេដ្ឋកិច្ចពិសេសបន្ថែមទៀត ធ្វើយ៉ាងណាឱ្យប្រែក្លាយទៅជាតំបន់ដ៏មានសក្ដានុពលដែលអាចផ្ដល់ឱកាសការងារដល់ប្រជាជនកម្ពុជាឱ្យបានច្រើន។

ឯកឧត្ដមអិត សំហេង រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ក្រោយពីមានការចុះកិច្ចព្រមព្រៀងក្នុងកិច្ចសហប្រតិបត្ដិការដ៏ជិតស្និទ្ធរវាងគ្នា និងគ្នាអស់រយៈពេល10ឆ្នាំកន្លងមកនោះ នាពេលថ្មីៗនេះក្រុមហ៊ុនចិន និងក្រសួងការងារ និងបណ្ដុះបណ្ដាលវិជ្ជាជីវៈបានបង្កើតគម្រោងថ្មីមួយទៀតគឺ វិទ្យាស្ថានបណ្ដុះបណ្ដាលបច្ចេកទេស វិជ្ជាជីវៈក្រុងព្រះសីហនុកម្ពុជា-ចិន គិតមកដល់ពេលនេះការអភិវឌ្ឍសម្រេចបានប្រមាណ90%ហើយ ដោយចំណាយទុនក្នុងរង្វង់10លានដុល្លារអាមេរិក។

រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ បានបន្ដថា កាបង្កើតគម្រោងថ្មីនេះជាសក្ខីភាពបញ្ជាក់ឱ្យឃើញពីកិច្ចសហប្រតិបត្ដិការយ៉ាងជិតស្និទ្ធរវាងកម្ពុជា និងខេត្ដជាំង ស៊ូ ប្រទេសចិន ពិសេសក្រុមហ៊ុនស្ថិតនៅក្នុងតំបន់សេដ្ឋកិច្ចពិសេស ក្នុងការបម្រើឱ្យវិស័យការងារនៅទូទាំងប្រទេស។

ជាមួយគ្នានេះដែរឯកឧត្ដមអិត សំហេង បញ្ជាក់ថា៖ ”តាមរយៈការបង្កើតគម្រោងថ្មីនេះនឹងអាចឱ្យកម្ពុជាមានសមត្ថភាពបង្កើតនូវធនធានមនុស្សឱ្យកាន់តែប្រសើរឡើងដើម្បីទាក់ទាញអ្នកវិនិយោគឱ្យមកបង្កើតរោងចក្រនៅក្នុងតំបន់នេះឱ្យកាន់តែច្រើន”។

រហូតមកដល់ពេលនេះតំបន់សេដ្ឋកិច្ចពិសេសក្រុងព្រះសីហនុមានរោងចក្រជាង100ដែលអាចផ្ដល់ការងារជូនប្រជាជនកម្ពុជាក្នុងរង្វង់15 000នាក់៕