Author: វល័ក្ខ

  • តើ លី អ៉ីវ៉ាធីណា បកស្រាយយ៉ាងណា ចំពោះពិធីរៀបការមិនសំខាន់សម្រាប់នាង?

    តើ លី អ៉ីវ៉ាធីណា បកស្រាយយ៉ាងណា ចំពោះពិធីរៀបការមិនសំខាន់សម្រាប់នាង?

    ភ្នំពេញៈ នាពេលថ្មីៗនេះបានធ្វើឲ្យមហាជនមានការភ្ញាក់ផ្អើល និងនឹកស្រណោះសម្តីរបស់តារាចម្រៀងស្រីសាច់សខ្ចី រាងតូចល្អិត តែសំឡេងពីរោះរណ្តំចិត្តអ្នកស្តាប់ ជាកូនកាត់ចិនកញ្ញា លី អ៉ីវ៉ាធីណា ដែលសរសេរក្នុងសារមួយឃ្លាថា «រៀបការពិតជាមិនសំខាន់អ្វីបន្តិចសោះឡើយសម្រាប់រូបនាង!» ដែលបានបង្ហោះតាមគណនីហ្វេសប៊ុកនាង។

    សាររបស់តារាចម្រៀងស្រីកញ្ញា លី អ៉ីវ៉ាធីណា ដែលទើបតែចេញ Official Audio បទថ្មីបំផុតរបស់ខ្លួននៅលើទ្រនំផលិតកម្មថោនដែលមានចំណងជើងថា «អប្សរាសក់ខ្មៅ» ជាបទចម្រៀងតាមលំនាំដើមបកស្រាយដោយម្ចាស់សំនៀងដើមគឺអ្នកស្រី សុង សេងហ៊ន ដែលត្រូវបានផលិតកម្មថោនលើកយកមកធ្វើបទភ្លេងថ្មី និងច្រៀងសាជាថ្មីនោះ បានផ្ទុះជាពាក្យចោទសួរដេញដោលគ្នាបែកផ្សែងពេញបណ្តាញសង្គមតែម្តង ដោយពួកគេបានលើកឡើងថា បើរៀបការមិនសំខាន់សម្រាប់កញ្ញា លី អ៉ីវ៉ាធីណា មែននោះ អ៊ីចឹងមានន័យថា នាងធ្លាប់បានរៀបការរូចហើយ មែនទេ? អ្នកខ្លះលើកឡើងថា ឬមួយក៏នាងចូលចិត្តវិធីផ្លូវកាត់ៗ ដោយគ្រាន់តែស្រឡាញ់គ្នាហើយនាំគ្នាទៅចុះអេតាស៊ីវិលជាការស្រេចតែម្តង? ខណៈដែលអ្នកខ្លះទៀតនិយាយថា សារនោះប្រហែលជានាងគ្រាន់តែនិយាយលេងទេដឹង?។

    តែពេលបកស្រាយប្រាប់ឡារ៉ែន តារាចម្រៀងស្រីដែលបច្ចុប្បន្នមានវ័យ៣២ឆ្នាំ ដែលមហាជនក៏ធ្លាប់បានស្គាល់ និងល្បីផងដែរជាមួយទឹកដមសំនៀងដ៏ពីរោះពេលច្រៀងជាភាសាចិនដ្បិតតែនាងជាកូនកាត់ខ្មែរ-ចិននោះបានបកស្រាយលម្អិតមកវិញថា៖ «ចា៎ស ខ្ញុំពិតជានិយាយបែបនោះមែន! ខ្ញុំនិយាយថាដូច្នោះ គឺមើលឃើញថាស្រ្តីភាគច្រើនមានការខ្វល់ខ្វាយខ្លាំងទៅនឹងពិធីរៀបការ ខណៈនាងខ្ញុំវិញគិតថា រៀបការមិនសំខាន់នោះទេ ហើយអ្វីដែលសំខាន់គឺការរកបានគូស្នេហ៍ណាដែលចេះយល់ចិត្តគ្នា និងឲ្យតម្លៃគ្នាទៅវិញទេ»។

    ទោះជាយ៉ាងណា មើលទៅតារាចម្រៀងស្រីរូបនេះពិតជាមិនចង់មានន័យថា នាងពិតជាចង់រំលងពិធីអាពាហ៍ពិពាហ៍តាមប្រពៃណីជាតិបែបកូនកាត់ខ្មែរ-ចិននោះឡើយ ដោយកញ្ញា លី អ៉ីវ៉ាធីណា តារាស្រីជាថៅកែលើជំនួញផ្នែកសេវាកម្មរៀបចំតុបតែងផ្កាស្រស់ក្នុងពិធីមង្គលការ ឬជប់លៀងដែលមានយីហោថា «B florist» នោះបានបន្ថែមថា៖ «ប្រសិនបើរៀបការ នាងខ្ញុំក៏មិនចោលពិធីប្រពៃណីខ្មែរបែបល្បាយកាត់ប្រពៃណីចិនដែរ ព្រោះនាងខ្ញុំជាកូនចៅកាត់ចិន។ តែពេលនេះ រឿងគូគាប់ហ្នឹងសុំលាក់សិនហើយ មិនទាន់ចង់ជម្រាបប្រាប់នោះទេ»៕

  • Kuyt ជួបការរីករាយ ខណៈ Feyenoord លើកពានរបស់ហូឡង់

    Kuyt ជួបការរីករាយ ខណៈ Feyenoord លើកពានរបស់ហូឡង់

    Dirk Kuyt បានរងនូវការសើចចំអកឲ្យ នៅពេលដែលរូបគេបានវិលទៅកាន់ក្លិបដើមរបស់គេវិញគឺ Feyenoord កាលពី២ឆ្នាំមុន និងបាននិយាយនៅកាលនោះថា ពួកគេអាចនឹងឈ្នះពានក្របខ័ណ្ឌកំពូលរបស់ហូឡង់ ប៉ុន្តែទីបំផុត ខ្សែប្រយុទ្ធជើងចាស់រូបនេះ ដែលនឹងឈានចូលវ័យ៣៧ឆ្នាំនៅខែកក្កដាខាងមុខ បានជួបនូវការរីករាយកាលពីថ្ងៃអាទិត្យ នៅពេលដែលរូបគេបានស៊ុតបាល់បញ្ចូលទី៣គ្រាប់ ធ្វើឱ្យក្រុមរបស់គេទទួលជ័យជម្នះ ៣-១ លើក្រុម Heracles Almelo ដើម្បីឈ្នះពានរបស់ហូឡង់នៅថ្ងៃចុងក្រោយនៃរដូវកាលនេះ។

    ក្នុងអាជីពដ៏ជោគជ័យរបស់គេ Kuyt បាននិយាយថា ពាននេះគឺជាពានសំខាន់ជាងគេ។ ស្របពេលដែលក្រុម Feyenoord បានធ្វើការអបអរការឈ្នះពានជាលើកទី១របស់ពួកគេ បើគិតចាប់តាំងពីឆ្នាំ១៩៩៩មក។ Kuyt ដែលធ្លាប់ជាអតីតកីឡាកររបស់ Liverpool បានប្រាប់អ្នកយកព័ត៌មានថា៖ «ខ្ញុំបានដឹងនៅពេលដែលខ្ញុំបានវិលមកក្លិបចាស់វិញកាលពី២ឆ្នាំមុនថា យើងអាចឈ្នះពានជើងឯកនេះ។ គ្រប់គ្នាសើចចំអកឲ្យខ្ញុំ នៅពេលដែលខ្ញុំបាននិយាយបែបនេះ»។


    Kuyt ដែលបានចាប់ផ្តើមអាជីពជាលើកដំបូងរបស់គេជាមួយនឹងក្លិប Feyenoord មុននឹងផ្ទេរទៅកាន់ក្រុមហង្សក្រហម Liverpool កាលពីឆ្នាំ២០០៦ និងក៏បានលេងឲ្យក្លិប Fenerbahce ផងដែរនោះបានបន្ថែមទៀតថា៖ «ខ្ញុំបានលេងការប្រកួតក្របខ័ណ្ឌ Champions League វគ្គផ្តាច់ព្រ័ត្រមួយលើក និងព្រឹត្តិការណ៍ World Cup វគ្គផ្តាច់ព្រ័ត្រមួយលើក ក៏ដូចជាក្នុងក្លិបដ៏មានប្រជាប្រិយភាពជាច្រើន។ ប៉ុន្តែនេះគឺជាពេលវេលាដ៏ល្អបំផុតនៃអាជីពរបស់ខ្ញុំ»៕
    ប្រភពព័ត៌មាន៖ BBC

  • Fabregas ជួយឲ្យ Chelsea បន្តឈ្នះក្នុងដំណើរឆ្ពោះទៅកាន់ការអបអរការឈ្នះពាន

    Fabregas ជួយឲ្យ Chelsea បន្តឈ្នះក្នុងដំណើរឆ្ពោះទៅកាន់ការអបអរការឈ្នះពាន

    ខ្សែបម្រើ Cesc Fabregas បានរកគ្រាប់បាល់ឈ្នះឱ្យ Chelsea ក្នុងពេលដែលក្រុមតោខៀវនេះ ដណ្តើមបានជ័យជម្នះដ៏សែនរំភើបក្នុងលទ្ធផល ៤-៣ លើក្រុម Watford កាលពីថ្ងៃចន្ទ មុននឹងពួកគេបំពេញការអបអរសម្រាប់ការឈ្នះពានក្របខ័ណ្ឌ Premier League នៅថ្ងៃចុងក្រោយនៃយុទ្ធនាការនេះ ដោយត្រូវប៉ះជាមួយក្រុម Sunderland នៅថ្ងៃអាទិត្យខាងមុខនេះ។

    ខ្សែការពារ John Terry រកបានគ្រាប់បាល់បើកឆាកក្នុងការបង្ហាញខ្លួនជាលើកដំបូងនៃការប្រកួត២លើកចុងក្រោយរបស់គេសម្រាប់ក្រុមម្ចាស់ជើងឯក Chelsea នេះ។ ប្រធានក្រុមរបស់ក្រុមតោខៀវមួយនេះនឹងចាកចេញពីក្លិបនៅរដូវក្តៅនេះ ក្រោយពីបានចំណាយពេលអស់ ២២ឆ្នាំនៅជាមួយក្រុមនេះបានធ្វេសប្រហែសនៅរយៈពេលប៉ុន្មាននាទីក្រោយមក ខណៈដែល Watford បានធ្វើការវាយបកវិញដោយរកបានគ្រាប់បាល់តាមស្មើ តែរយៈពេល១០នាទីមុនពេលសម្រាកតង់ទី១ ខ្សែការពារ Cesar Azpilicueta បានស៊ុតបាល់ពីចម្ងាយបញ្ចូលទីយ៉ាងល្អដើម្បីជួយឲ្យក្រុម Chelsea មានគ្រាប់បាល់នាំមុខវិញ មុនពេលខ្សែប្រយុទ្ធ Michy Batshuayi បានបន្ថែមការនាំមុខរបស់ក្រុមខ្លាំងមួយនេះនៅនាទីទី៤២។

    កីឡាករ Daryl Janmaat និង Stefano Okaka បានធ្វើការវាយបកដើម្បីជួយឲ្យក្រុម Watford រកបានគ្រាប់បាល់តាមស្មើវិញ ប៉ុន្តែ Fabregas បានរក្សានិងការពារជាប់ធ្វើឲ្យក្រុមរបស់លោក Antonio Conte ស្ថិតនៅលើដំណើរផ្លូវឆ្ពោះទៅកាន់ការក្លាយជាក្រុមដំបូងគេក្នុងការឈ្នះ ៣០ប្រកួតក្នុងចំណោមការប្រកួតក្របខ័ណ្ឌកំពូលអង់គ្លេសចំនួន៣៨ប្រកួតនាពេលនេះតែម្តង។
    លោក Conte គ្រូបង្វឹករបស់ Chelsea បានប្រាប់ទូរទស្សន៍ BBC Sport ថា៖ «វាជារាត្រីដ៏សំខាន់មួយ ពីព្រោះយើងបានឈ្នះពាន។
    ខ្ញុំបានសម្រេចចិត្តផ្លាស់ប្តូរកីឡាករ៩នាក់ទៅលើជម្រើសទាំង១១នាក់ដំបូង និងបានផ្តល់ឱកាសដល់កីឡាករវ័យក្មេងជាច្រើន។ ខ្ញុំត្រូវតែរីករាយពីព្រោះការឆ្លើយតបពិតជាល្អណាស់»៕
    ប្រភពពី៖ The Sun

  • សាកលវិទ្យាល័យធំបំផុត 5 នៅអាស៊ី

    សាកលវិទ្យាល័យធំបំផុត 5 នៅអាស៊ី

    ស្ថាប័នកំណត់ចំណាត់ថ្នាក់សាកលវិទ្យាល័យល្បីបំផុតលើពិភពលោក The World Universities Ranking បានបង្ហាញលទ្ធផលរបស់ខ្លួនបន្ទាប់ពីបានធ្វើការស្រាវជ្រាវ និងប្រមូលព័ត៌មានពីសាកលវិទ្យាល័យធំៗចំនួន 100ក្នុងតំបន់។

    ព័ត៌មានទាំងអស់នេះមានសារសំខាន់ណាស់សម្រាប់អ្នកដែលមានបំណងសិក្សានៅក្រៅប្រទេស ឬស្វែងរកអាហារូបករណ៍ដើម្បីសិក្សាលើជំនាញដែលខ្លួនស្រឡាញ់នៅអាស៊ី។

    ខាងក្រោមនេះជាចំណាត់ថ្នាក់សាកលវិទ្យាល័យធំបំផុត 5 (Top 5 Universities Ranking) នៅអាស៊ី៖
    1. សាកលវិទ្យាល័យ National University of Singapore នៃប្រទេសសិង្ហបុរី


    2. សាកលវិទ្យាល័យ Peking University នៃសាធារណរដ្ឋប្រជាមានិតចិន


    3. សាកលវិទ្យាល័យ Tsighua Uniniversity នៃសាធារណរដ្ឋប្រជាមានិតចិន


    4. សាកលវិទ្យាល័យ Nanyang Technology University នៃប្រទេសសិង្ហបុរី


    5. សាកលវិទ្យាល័យ University of Hong Kong នៅទីក្រុងហុងកុង៕

  • កូនមិនព្រមគេងថ្ងៃ ធ្វើយ៉ាងណាស្រួលទៅ?

    កូនមិនព្រមគេងថ្ងៃ ធ្វើយ៉ាងណាស្រួលទៅ?

    បញ្ហាកូនមិនព្រមគេងថ្ងៃអាចប្រទះឃើញទាំងនៅលើក្មេងតូច និងក្មេងក្នុងវ័យរៀន ការគេងគឺជារឿងសំខាន់សម្រាប់កុមារ ព្រោះការគេងលក់ស្រួលពេញលេញជួយបង្កើនវិវឌ្ឍនាការផ្នែកផ្សេងៗរបស់រាងកាយ និងវិវឌ្ឍនាការផ្នែកខួរក្បាល។ ក្មេងក្នុងវ័យនីមួយៗមានរយៈពេលគេងនិងអំឡុងពេលគេងខុសប្លែកពីគ្នា ឥឡូវសូមអ្នកម្តាយនាំគ្នាមកមើលថា តើការគេងលក់ក្នុងវ័យនីមួយៗរបស់កូនយ៉ាងណាខ្លះ? ដូចតទៅ ៖

    អាថ៌កំបាំងនៃការគេងរបស់ក្មេងដែលមនុស្សធំគួរដឹង

    ជាទូទៅយើងនឹងឃើញថា ទារកទើបនឹងកើតនេះគេងលក់ស្ទើរតែគ្រប់ពេលវេលា តែជឿទេថា ដែលយើងឃើញថា ទារក កំពុងគេងលក់នោះ ការពិតទៅកូនតូចមិនបានគេងលក់ពេញលេញមែនទែននោះទេ ព្រោះមិនថាពេលគេងលក់ ឬពេលភ្ញាក់នោះទេ ខួរក្បាលតូចៗរបស់ទារកបែរជាស្វាហាប់ក្លៀវក្លាគ្រប់ពេលវេលា ដោយអ្នកស្រាវជ្រាវ និងអ្នកជំនាញការបានណែនាំលោកឪពុកអ្នកម្តាយថ្មោងថ្មីថា មិនចាំបាច់ធ្វើឱ្យបន្ទប់គេងស្ងប់ស្ងាត់ជ្រុលពេកទេ អាចបើកបទភ្លេងកំដរស្រាលៗ បើកភ្លើងភ្លឺព្រាលៗ ឬមានសំឡេងជជែកគ្នារវាងឪពុកម្តាយស្ងាត់ៗ វានឹងហុចផលល្អ ព្រោះកូនតូចអាចនឹងកំពុងផ្អៀងត្រចៀកចាំស្តាប់សំឡេងរបស់លោកអ្នកក៏អាចថាបានដែរ រឹតតែសំឡេងរបស់លោកឪពុកអ្នកម្តាយផងនោះ រឹតតែធ្វើឱ្យគេមានអារម្មណ៍កក់ក្តៅក្នុងចិត្តខ្លាំងឡើងទៀតផង។

    បន្ទាប់មកលោកឪពុកអ្នកម្តាយគួរយល់ដឹងអំពីរយៈពេលដែលក្មេងត្រូវការគេងសម្រាកក្នុងអំឡុងវ័យរបស់គេ អ្នកជំនាញការខាងពេទ្យកុមារ បានអធិប្បាយអំពីអំឡុងពេលនៃការគេងសម្រាករបស់កុមារដូចតទៅ៖

    – កុមារវ័យ1-2ឆ្នាំ៖ នឹងគេងក្នុងមួយថ្ងៃប្រមាណជា12ម៉ោង ដោយគេងនៅពេលថ្ងៃប្រមាណជា1ម៉ោង។
    – កុមារវ័យមត្តេយ្យ វ័យ3-5ឆ្នាំ៖ នឹងគេងប្រមាណជា8-12ម៉ោង ឯការគេងលក់នៅពេលថ្ងៃវិញ អាស្រ័យលើកុមារម្នាក់ៗ និងកិច្ចការងារដែលបានធ្វើក្នុងមួយថ្ងៃៗថា តើវាសាងនូវភាពនឿយហត់អស់កម្លាំងខ្លាំងប៉ុនណា?
    – កុមារវ័យ5-6ឆ្នាំ៖ កុមារក្នុងវ័យនេះមានចំនួនច្រើនណាស់ដែលមិនព្រមគេងថ្ងៃ ដូច្នេះមិនចាំបាច់កង្វល់ទេ បើនៅពេលយប់ក្មេងបានគេងលក់គ្រប់គ្រាន់ តែកិច្ចការងារនៅពេលរសៀលវាគួរតែជាកិច្ចការងារស្រាលៗ ដើម្បីឱ្យកុមារមានអារម្មណ៍ធូរស្រាល។

    ពាក្យណែនាំសម្រាប់លោកឪពុកអ្នកម្តាយ
    ដំបូងគេ គឺមិនគួរឱ្យកូនចូលគេងយប់ជ្រៅទេ គួរបង្ហាត់ឱ្យភ្ញាក់ពីព្រឹករហូតក្លាយជារឿងប្រក្រតី សម្រាប់ថ្ងៃឈប់សម្រាកដែលមិនបានទៅរៀន គួរនាំកូនតូចធ្វើកិច្ចការងារផ្សេងៗ ឬនាំកូនហាត់ប្រាណនៅពេលព្រឹក ឬពេលថ្ងៃៗបន្តិច ដើម្បីឱ្យក្មេងបានប្រើប្រាស់កម្លាំងថាមពល លុះដល់ពេលរសៀលកូននឹងបានងងុយ ហើយគេងលក់បានស្រួលតែម្តង៕

  • កីឡាទាញព្រ័ត្រគ្រោងប្រកួតជើងឯកជាតិលើកទី ១ នាថ្ងៃទី១៩ ឧសភា នេះ

    កីឡាទាញព្រ័ត្រគ្រោងប្រកួតជើងឯកជាតិលើកទី ១ នាថ្ងៃទី១៩ ឧសភា នេះ

    ដើម្បីបានទទួលសិទ្ធិពេញលេញក្នុងចូលរួមប្រកួតកីឡាស៊ីហ្គេម នាឆ្នាំ ២០២៣ នោះ សហព័ន្ធកីឡាទាញព្រ័ត្រកម្ពុជាបានខិតខំប្រឹងប្រែងរៀបចំព្រឹត្តិការណ៍ប្រកួតកីឡាទាញព្រ័ត្រជាច្រើននៅក្នុងឆ្នាំ ២០១៧នេះ ខណៈដែលនៅថ្ងៃទី ១៩ ខែឧសភាខាងមុខនេះ សហព័ន្ធជឿជាក់ថា ត្រូវតែជោគជ័យ សម្រាប់ការប្រកួតលើកទី១នេះ។

    ថ្លែងនៅក្នុងសន្និសីទកាសែតនាព្រឹកថ្ងៃទី១៥ ឧសភា ឯកឧត្តម មាស សារិន ប្រធានសហព័ន្ធកីឡាទាញព្រ័ត្រកម្ពុជាបានបញ្ជាក់ថា នេះជាការប្រកួតមួយដើម្បីបង្ហាញពីសក្ដានុពលនៃកីឡាទាញព្រ័ត្ររបស់កម្ពុជា ។

    បើតាមអ្នកស្រីប្រាក់ សម្ផស្សដែលជាអគ្គលេខាធិការសហព័ន្ធនេះបានឱ្យដឹងថា ការប្រកួតនេះមានក្រុមមកពី ៨រាជធានី-ខេត្តចូលរួមគឺ ខេត្តកំពត សៀមរាប កណ្ដាល ព្រៃវែង ស្ទឹងត្រែង ស្វាយរៀង កំពង់ឆ្នាំង និងក្នុងរាជធានីភ្នំពេញមាន១៣ក្រុម ។ សមាគម-ក្លិបដែលចូលរួមសរុបចំនួន២០ដែលមាន៤៧ក្រុម ក្នុងនោះកីឡាករ២៦០នាក់ និងកីឡាការិនីចំនួន២១០នាក់ ឯវិញ្ញាសាដាក់ឲ្យប្រកួតមានចំនួន ៥គឺ វិញ្ញាសាបុរសអាយុក្រោម២៣ឆ្នាំ នារីអាយុក្រោម២៣ឆ្នាំ បុរសអាយុលើ ២៣ឆ្នាំ នារីអាយុលើ២៣ឆ្នាំនិងវិញ្ញាសាចម្រុះបុរស-នារីអាយុលើ២៣ឆ្នាំ ។

    ការប្រកួតដែលនឹងចាប់ផ្ដើមពីថ្ងៃទី១៩ ឧសភាទៅនោះ គឺជាការប្រកួតប្រភេទក្នុងសាល (Indoor) ដែលជាការប្រកួតមានកម្រាលត្រឹមត្រូវ ។

    ជាមួយនឹងការប្រកួតនេះលោកមាស សារិនបានបង្ហាញពីមហិច្ឆតាថា បានសុំទៅក្រសួងអប់រំយុវជន និងកីឡាដើម្បីចូលរួមក្នុងព្រឹត្តិការណ៍កីឡាជាតិ (National Games) ឆ្នាំ២០១៨ សុំរៀបចំការប្រកួតជើងឯកអាស៊ីអាគ្នេយ៍ឆ្នាំ ២០១៨ និងសុំឲ្យមានការប្រមូលផ្ដុំក្នុងឆ្នាំ២០១៨ដែរ ក្រៅពីនេះលោកក៏បានបង្ហាញពីការចូលរួមប្រកួតជើងឯកទ្វីបអាស៊ីទៀតផង ជាមួយគ្នានេះលោកនៅបានសន្យាថា នឹងរៀបចំឲ្យមានការប្រកួតជើងឯកថ្នាក់ជាតិរៀងរាល់ឆ្នាំ ព្រោះលោកមានដៃគូឧបត្ថម្ភគ្រប់គ្រាន់ហើយ៕

  • សុខ សោម៉ាវត្តី រំអុកឲ្យ លី វ៉ាហេទ ជូននាងទៅមើលកុនរឿង «អ្នកខូចចិត្តអាជីព»

    សុខ សោម៉ាវត្តី រំអុកឲ្យ លី វ៉ាហេទ ជូននាងទៅមើលកុនរឿង «អ្នកខូចចិត្តអាជីព»

    ភ្នំពេញៈ ពិតជានឹកស្មានមិនដល់សោះថា តួឯកស្រីក្នុងខ្សែភាពយន្តរឿង«អ្នកខូចចិត្តអាជីព» អ្នកមេម៉ាយកូនមួយអ្នកនាង សុខ សោម៉ាវត្តី មានចិត្តជ្រួលច្របល់ខ្លាំង ខណៈភាពយន្តដែលខ្លួនសម្តែងជាមួយនឹងបុរសសង្ហាវ័យក្មេងជាកីឡាករបាល់ទាត់ឈ្មោះ លី វ៉ាហេទ បានសម្ពោធចាក់បញ្ចាំងហើយនៅតាមរោងកុននានាកាលពីចុងសប្តាហ៍នេះ។ សុខៗស្រាប់តែគេឃើញមានសារបែបអន្ទះសាអផ្សុកក្នុងចិត្តរបស់អ្នកនាង សុខ សុម៉ាវត្តី បង្ហោះថា៖ «Bro Ly Vahed ជូន sis ទៅមើលកុនបានទេ? អផ្សុកពេក ដុតក្មេងមួយលេង»។


    គេក៏បានឃើញតារាឯកប្រុសជាកីឡាករបាល់ទាត់រូបសង្ហាលោក លី វ៉ាវេដ បង្ហោះសារដែរថា៖ «Good morning ម្សិលមិញអ្នកណាខ្លះបានទៅមើលរឿង “អ្នកខូចចិត្តអាជីព” ជួយប្រាប់ផង ល្អមើលដែរឬទេ?»។

    រំពេចនោះក៏មានអ្នកលេងបណ្តាញសង្គមបានបង្ហោះសារកោតសរសើរពីទេពកោសល្យសម្តែងរបស់អ្នកនាង សុខ សោម៉ាវត្តី និងខ្លឹមសារសាច់រឿងរបស់នាងតាមTrailler ដែរថា៖ «ចង់ប្រាប់ថារឿងនេះល្អមើលខ្លាំងណាស់ អ្នកដែលអត់បានមើលប្រាកដជាស្ដាយក្រោយ មើលហើយចង់មើលទៀត ទោះបីមើលដប់ដងទៀតក៏មិនស្ដាយលុយដែរ។ ល្អមើលតាំងពីដើមដល់ចប់ កំប្លែង រំភើប ស៊ីអារម្មណ៍ រ៉ូមែនទិក អ្នកមើលច្រណែនតួប្រុស និងតួស្រី គឺថាស្វ៊ីតខ្លាំងឆ្ងាញ់ តែ Idolខ្ញុំ សុខ សោម៉ាវត្តី លេងម៉ាក្បាច់ចុងក្រោយធ្វើឲ្យតួប្រុសស្រក់ទឹកភ្នែក បាក់ទឹកចិត្តយ៉ាងខ្លាំង។ កុនខ្មែរដែលខ្ញុំធ្លាប់មើលកន្លងមកគឺរឿងនេះល្អមើលដាច់គេ អ្នកដែលមិនទាន់បានទៅមើល សុំទៅមើលឲ្យហើយទៅ កុំឲ្យស្ដាយក្រោយណា!» ។

    ភាពយន្តរឿង «អ្នកខូចចិត្តអាជីព» ដែលមានតួឯកស្រីជាអ្នកនាង សុខ សោម៉ាវត្តី ជាតួស្រីសម្តែងមានទេពកោសល្យបែបក្រមិចក្រមើម ម្ញិកម្ញ៉ក់គួរឲ្យក្នាញ់ និងជាតារាសម្តែងស្រីរលកក្រោយលេចធ្លោដាច់គេប្រចាំឆ្នាំ២០១៦ ប៉ះនឹងតួប្រុសជាកីឡាករបាល់ទាត់វ័យក្មេងរូបសង្ហារបស់ក្លិបបឹងកេតអង្គរលោក លី វ៉ាហេទ។ នេះជាវណ្ណកម្មរបស់ផលិតកម្មរ៉ុក(Rock Production) ដែលចាប់ផ្តើមថតកាលពីចុងឆ្នាំ២០១៦ និងមានតួសម្តែងល្បីៗជាច្រើនចូលរួមសម្តែងផងដែរដូចជា នាយចឺម អ្នកនាងប៉េងប៉ោង នាយតេឡេ និងបានសម្ពោធចាក់បញ្ចាំងហើយកាលពីថ្ងៃទី១២ ខែឧសភា ចុងសប្តាហ៍នេះ៕

  • AFF U15 Girls 2017៖ U-15នារីកម្ពុជា ប៉ះថៃ ក្នុងវគ្គ ១/២ផ្ដាច់ព្រ័ត្រ

    AFF U15 Girls 2017៖ U-15នារីកម្ពុជា ប៉ះថៃ ក្នុងវគ្គ ១/២ផ្ដាច់ព្រ័ត្រ

    ក្រោយពីរកបាន៤ពិន្ទុក្នុងពូលB ក្រុមបាល់ទាត់នារីក្រោមអាយុ ១៥ឆ្នាំ(U-15)របស់កម្ពុជា នឹងត្រូវជួបប្រកួតដណ្ដើមកៅអីទៅវគ្គពាក់កណ្ដាលផ្ដាច់ព្រ័ត្រ(១/២ផ្ដាច់ព្រ័ត្រ) ពានរង្វាន់បាល់ទាត់នារីជើងឯកអាស៊ីអាគ្នេយ៍ AFF U15 Girls’ Championship 2017។

    នេះជាជំនួបប្រកួតមួយដ៍អស្ចារ្យមួយ និងជាប្រវត្តិសាស្ដ្រថ្មីជូនប្រទេសជាតិសម្រាប់ក្រុមនារីអាយុក្រោម 15 ឆ្នាំរបស់កម្ពុជា នាថ្ងៃទី១៨ ខែឧសភាក្នុងសប្ដាហ៍នេះ នៅកីឡដ្ឋាន KM១៦ ក្នុងទីក្រុងវៀងច័ន្ទ ប្រទេសឡាវ ។

    ក្រុម U-15នារីកម្ពុជាបានបញ្ចប់ត្រឹមចំណាត់ថ្នាក់លេខ២ និងមាន ៤ពិន្ទុក្នុងពូលB ក្រោយឆ្លងកាត់ ៣ប្រកួតឈ្នះ១(ឈ្នះសិង្ហបុរី ២-១), ចាញ់១(ចាញ់ហ្វីលីពីន ៣-០) និងប្រកួតចុងក្រោយស្មើគ្នាជាមួយក្រុម U-15នារីឥណ្ឌូនេស៊ី ១-១ ។ ប៉ុន្ដែលទ្ធផលនេះ គឺគ្រប់គ្រាន់សម្រាប់ឲ្យក្រុមក្មេងខ្ចីនារីកម្ពុជាបន្ដដំណើរទៅជួបនឹងក្រុមខ្លាំងថៃ នៅវគ្គ ១/២ផ្ដាច់ព្រ័ត្រហើយ ខណៈដែលថៃ គឺជាក្រុមខ្លាំងប្រចាំពូលA ដោយឈ្នះទាំង ៤ប្រកួត និងឈរលើកំពូលតារាងមាន ១២ពិន្ទុ ។

    ដោយឡែកគូប្រកួតមួយគូទៀត ទើបតែរកឃើញមួយក្រុមប៉ុណ្ណោះ គឺក្រុម U-15នារីហ្វីលីពីន ដែលឈរកំពូលតារាងពូលB និងមាន ៩ពិន្ទុពេញ ក្រោយឈ្នះ ៣ប្រកួតជាប់ៗគ្នា រីឯក្រុមលេខ២ នៃពូលA មិនទាន់ច្បាស់ថាជាក្រុមណានោះទេ ដោយខណៈនេះក្រុមU-15នារីមីយ៉ាន់ម៉ា កំពុងឈរលេខរៀងទី២ បណ្ដោះអាសន្ន និងមាន ៦ពិន្ទុ ហើយតាមពីក្រោយដោយក្រុម U-15នារីវៀតណាម និងម្ចាស់ផ្ទះឡាវ ដែលមាន ៣ពិន្ទុ ។ ប៉ុន្ដែក្រុមនីមួយៗ សុទ្ធតែនៅសល់មួយប្រកួតក្នុងដៃដូចគ្នា ៕

  • មហាជនគាំទ្រខ្លាំងពេលកញ្ញា នាង ប្រាក់សុគន្ធា ចេញ Official Audio បទដំបូងនៅផលិតកម្មសាន់ដេ

    មហាជនគាំទ្រខ្លាំងពេលកញ្ញា នាង ប្រាក់សុគន្ធា ចេញ Official Audio បទដំបូងនៅផលិតកម្មសាន់ដេ

    ភ្នំពេញៈ កញ្ញា នាង ប្រាក់សុគន្ធា ដែលជាបេក្ខនារីប្រឡងកម្មវិធី Cambodian Idol រដូវកាលទី2 ដែលមហាជនបានស្គាល់នាងមួយជំហាន និងបានសរសើរអំពីទឹកដមសំឡេងដ៏ក្រអួនក្រអៅរួចហើយតាមរយៈបទ «ម៉ែ» នាពេលច្រៀងប្រឡង ឥឡូវនេះបានក្លាយជាតារាចម្រៀងស្រីថ្មោងថ្មី ប្រចាំផលិតកម្មសាន់ដេ នេះបើតាមអ្វីដែលផលិតកម្មបានបង្ហោះ Official Audio បទចម្រៀងដំបូងរបស់នាងដែលមានចំណងជើងថា «កូនស្រី» តាមទំព័រហ្វេសប៊ុករបស់ផលិតកម្ម។

    ជាមួយនឹងបទ «កូនស្រី» ដែលមានន័យបកស្រាយពីការតស៊ូ អត់ទ្រាំលំបាករបស់កូនស្រីក្នុងគ្រួសារលំបាកមួយ និងការចាកចេញពីគ្រួសារទាំងវ័យក្មេងដើម្បីជួយទ្រទ្រង់ជីវភាពគ្រួសារដែលជួបទុក្ខលំបាកទាំងក្នុងចិត្តភិតភ័យនោះ ពិតជាបានឆក់យកការចាប់អារម្មណ៍អំពីប្រិយមិត្តអ្នកស្តាប់យ៉ាងខ្លាំង បើទោះបីគ្រាន់តែចេញ Official Audio ក្តី និងបាននាំគ្នាចូលទៅចុច Likes និង comments ដូចព្យុះតែម្តង។

    មានអ្នកខ្លះបានសរសេរថា៖ «សាន់ដេបានជើងខ្លាំងមួយហើយ! ខ្ញុំចង់និយាយពីអារម្មណ៍ពិតថា ពិតជាពីរោះខ្លាំងមែនទែន ហើយក៏មានអត្ថន័យចាក់ដល់បេះដូងថែមទៀត សុំគាំទ្រជានិច្ច។ ប្អូនស្រីជា idolក្នុងដួងចិត្តបងតាំងពីថ្ងៃដំបូង បងសុំសរសើរអស់ពីចិត្ត!»។

    ចំណែកអ្នកខ្លះទៀតថា៖ «ខ្ញុំសូមថ្លែងអំណរគុណយ៉ាងខ្លាំងសម្រាប់លោក Eno [អ្នកនិពន្ធទំនុកច្រៀង និងMelody] ព្រមទាំងផលិតកម្មសាន់ដេដែលបានផ្តល់ឱកាសដល់ក្មេងស្រីដែលលំបាកម្នាក់ បានបញ្ចេញនូវសមត្ថភាពរបស់ខ្លួននៅលើឆាកសិល្បៈជាមួយបទចម្រៀងថ្មីដ៏ពីរោះ ខ្ញុំសូមគាំទ្រមួយទំហឹង»។

    ខណៈអ្នកខ្លះទៀតបានលើកសរសើរ និងសំណូមពរថា៖ «សូមជួយគាំទ្រស្នាដៃបទចម្រៀងថ្មី និងទឹកដមសំនៀងថ្មីនេះ ព្រមទាំងការតស៊ូរបស់គាត់ផងណា៎? សំឡេងមួយនេះហើយដែលធ្វើឲ្យខ្ញុំស្រក់ទឹកភ្នែកមិនដឹងខ្លួននៅពេលនាងច្រៀងបទ «ម៉ែ»ក្នុងកម្មវិធី Cambodia idol គាំទ្រណា៎ប្អូនស្រី m ur fan។ ពីរោះណាស់ ហើយចូលចិត្តទៀត គាំទ្រគ្រប់បទរបស់ប្អូន ស្រឡាញ់ណាស់ ស្រលាញ់បទហ្នឹងណាស់ ស្ដាប់ហើយមានអារម្មណ៍ថាក្ដុកក្ដួល ហើយអួលដើមក ពេញចិត្តសំឡេងគាត់ណាស់តាំងពីច្រៀងបទ “ម៉ែ” មកម្ល៉េះ»។

    គួរបញ្ជាក់ថា កញ្ញា នាង ប្រាក់សុគន្ធា គឺជាបេក្ខនារីប្រឡងកម្មវិធី Cambodian Idol season2 ឆ្នាំ២០១៦កន្លងមក ជាមួយនឹងបងប្រុសបង្កើតគឺលោក នាង ប្រាក់សុគន្ធ មានស្រុកកំណើតមកពីខេត្តបាត់ដំបង ខណៈនាងបានធ្លាក់នៅវគ្គទីមួយ បងប្រុសរបស់នាងបានបន្តទៅដល់វគ្គពាក់កណ្តាលផ្តាច់ព្រ័ត្រ៕

  • រឿងពិតក្នុងប្រវត្តិសាស្រ្តសង្រ្គាម «ទាហានជប៉ុនលាក់ខ្លួនក្នុងទឹកដីសត្រូវជាង28ឆ្នាំ»

    រឿងពិតក្នុងប្រវត្តិសាស្រ្តសង្រ្គាម «ទាហានជប៉ុនលាក់ខ្លួនក្នុងទឹកដីសត្រូវជាង28ឆ្នាំ»

    រឿងពិតក្នុងប្រវត្តិសាស្រ្តសង្រ្គាម «ទាហានជប៉ុនលាក់ខ្លួនក្នុងទឹកដីសត្រូវជាង28ឆ្នាំ»ព្រោះមិនដឹងថាសង្រ្គាមលោកលើកទី 2 ចប់ហើយ

    ទាហានជប៉ុនម្នាក់លាក់ខ្លួនក្នុងរណ្តៅ 28 ឆ្នាំ!
    ជារឿងរ៉ាវដ៏សែនកំសត់ជាទីបំផុតរបស់ “Yokoi Shoichi” ទាហានជប៉ុនដែលរួចជីវិតនៅលើកោះ ហ្គួម អស់រយៈពេលយូរដល់ទៅ 28 ឆ្នាំ ក្នុងអំឡុងពេលសង្រ្គាមលោកលើកទី 2 ដោយមិនបានដឹងថា សង្រ្គាមបានបញ្ចប់ទៅហើយនោះឡើយ។

    នៅក្នុងប្រត្តិបត្តិការសឹករបស់ទាហានជប៉ុនក្នុងសម័យសង្រ្គាមលោកលើកទី 2 យ៉ូកូអ៊ិ សូអ៊ិឈិ ជាជាងកាត់ដេរ ដែលត្រូវបានកេណ្ឌទៅប្រយុទ្ធក្នុងកងទ័ពជប៉ុននៅឆ្នាំ 1941 ដោយបានទទួលឋានន្តរស័ក្តិជា ព្រឹន្ទបាលទោ។ គេបានទទួលភារកិច្ចឱ្យចូលទៅវាយលុកកោះ ហ្គួម របស់ទាហានអាមេរិកាំងក្នុងអំឡុងឆ្នាំ 1944 តែកងទ័ពរបស់សហរដ្ឋអាមេរិកបានព័ទ្ធចាប់ទាហានជប៉ុនបានយ៉ាងឆាប់រហ័ស និងជាច្រើននាក់ត្រូវបានសម្លាប់ ដែលធ្វើឱ្យក្រុមរបស់ យ៉ូកូអ៊ិ សូអ៊ិឈិ និងមិត្តទាហាន 10 នាក់ទៀតដកថយចូលទៅក្នុងព្រៃជ្រៅ ដើម្បីពួនគេចខ្លួន តែមិនយូរប៉ុន្មាន ទាហានអាមេរិកាំងក៏រកឃើញយ៉ាងឆាប់រហ័ស ធ្វើឱ្យទាហានជប៉ុនទាំងនោះត្រូវបំបែកគ្នារត់ទៅទីកន្លែងផ្សេងៗទៀតដើម្បីលាក់ខ្លួនជាបន្ត។

    យ៉ូកូអ៊ិ សូអ៊ិឈិ និងមិត្តទាហាន 3 នាក់ទៀត បានទៅពួនលាក់ខ្លួនក្នុងបរិវេណមួយជាមួយគ្នា និងរស់នៅក្នុងព្រៃអស់ជាច្រើនឆ្នាំ រហូតដល់ឆ្នាំ 1952 ពួកគេក៏បានឮព័ត៌មានថា សង្រ្គាមបានចប់ហើយ តែក៏នៅតែខ្លាចថា ព័ត៌មាននោះជាកលល្បិចរបស់ពួកអាមេរិកាំង ទើបនៅតែគេចខ្លួន និងសម្ងំរស់នៅក្នុងព្រៃតទៅទៀតដដែល។

    និងមិនប៉ុន្មានឆ្នាំតមក មិត្តទាហានទាំង 3 នាក់ក៏ស្លាប់បាត់បង់ជីវិតទៅ ធ្វើឱ្យ យ៉ូកូអ៊ិ សូអ៊ិឈិ ត្រូវរស់នៅក្នុងព្រៃជ្រៅតែម្នាក់ឯង ដែលជាហេតុធ្វើឱ្យមនុស្សជាច្រើននឹកឆ្ងល់ថា តើដោយសារហេតុអ្វី ទើបធ្ចើឱ្យទាហានជប៉ុនមួយរូបនេះនៅមានជីវិត?។

    យ៉ូកូអ៊ិ សូអ៊ិឈិ ប្រើពេលវេលាជាង 3ខែក្នុងការជីករណ្តៅសម្រាប់សម្ងំលាក់ខ្លួន ដែលមានជម្រៅចុះទៅក្រោមប្រមាណជា 7 ហ្វុត មានមាត់ផ្លូវចុះទៅទំហំតូច និងអាស្រ័យគម្របមាត់រណ្តៅធ្វើអំពីឫស្សីបិទបាំង ព្រមទាំងបានជីករន្ធបង្ហុយតូចមួយដើម្បីឱ្យខ្យល់អាកាសចេញចូលទៀតផង។ យ៉ូកូអ៊ិ ពួនសម្ងំខ្លួននៅក្នុងទីនោះ និងចិញ្ចឹមជីវិតដោយការចាប់ត្រី កង្កែប ពស់ និងផ្លែឈើព្រៃមកធ្វើជាអាហារ។

    រហូតមកដល់ឆ្នាំ 1972 មានអ្នកនេសាទក្នុងតំបន់ 2 នាក់បានប្រទះឃើញទាហានជប៉ុនរូបនេះនៅលើមាត់ច្រាំងនៃដងទន្លេ Talofofo ពេលនោះ ទាហានជប៉ុនម្នាក់នោះមានការភ័យខ្លាចយ៉ាងខ្លាំង ព្រោះខ្លាចត្រូវគេចាប់ខ្លួនយកទៅឱ្យទាហានអាមេរិកាំង គេក៏អង្វរករដោយសុំឱ្យអ្នកនេសាទទាំង 2 នាក់នោះសម្លាប់រូបគេចោលចុះ តែផ្ទុយទៅវិញអ្នកនេសាទទាំង 2 បានជួយសង្រ្គោះយ៉ូកូអ៊ិ និងនាំរូបគេត្រឡប់មកផ្ទះវិញ។

    2 សប្តាហ៍ក្រោយមក Yokoi Shoichiត្រូវបានជួយសង្រ្គោះឱ្យបានត្រឡប់ទៅប្រទេសជប៉ុនវិញក្នុងឋានៈជាវិរៈបុរសសង្រ្គាម និងមានជីវិតរស់នៅរហូតដល់អាយុ 82 ឆ្នាំ គេក៏ទទួលមរណភាពទៅ។

    ចំណែករណ្តៅសុវត្ថិភាពរបស់ Yokoi Shoichi ពីដំបូងបានទទួលនូវការឃុំគ្រងថែរក្សាទុកជាអនុស្សាវរីយ៍ប្រវត្តិសាស្រ្ត ទោះជាវាបាក់រលំខូចខាតទៅតាមពេលវេលាហើយក៏ដោយ។ បច្ចុប្បន្នរណ្តៅសុវត្ថិភាពសិប្បនិម្មិតមួយត្រូវបានសាងឡើងទុកជាអនុស្សាវរីយ៍ចំពោះ Yokoi Shoichi និងមិត្តទាហានរបស់គេ 3 នាក់ទៀតនៅក្នុងសារមន្ទីរ Talofofo Falls Resort Park ដែលអនុញ្ញាតឱ្យអ្នកទេសចរចូលទស្សនា និងមានឈ្មោះថា Yokoi Cave៕

    ស្រាវជ្រាវដោយ តាវ៉ែនតា