Author: វល័ក្ខ

គ្រាន់តែបានល្បីឈ្មោះក្នុងនាមជាតារាចម្រៀងស្រីចំណូលថ្មីរបស់ផលិតកម្មថោនភ្លាម អតីតបេក្ខភាពប្រកួតចម្រៀងរបស់កម្មវិធីលំដាប់ពីភពលោក កញ្ញា ស៊ូ ស៊ីរីកា ត្រូវបានគេកត់សម្គាល់ឃើញថា កំពុងតែទទួលបានការគាំទ្រយ៉ាងខ្លាំងពីសំណាក់យុវវ័យ ខណៈដែលក្រៅពីមានសំឡេងពីរោះនោះ តារាចម្រៀងស្រីដែលមានចំណូលចិត្តបកស្រាយចម្រៀងជាភាសាអង់គ្លេសរូបនេះ ថែមទាំងអាចរាំបែបចង្វាក់ញ័រញាក់កន្ត្រាក់អារម្មណ៍បានយ៉ាងល្អថែមទៀតផង។

ដោយសារតែភាពល្បីល្បាញ និងប្រជាប្រិយភាពកំពុងបន្តកើនឡើងជាលំដាប់បែបនេះ កាលពីចុងខែឧសភា កន្លងទៅនេះ ស៊ូ ស៊ីរីកា ត្រូវបានអ្នកជំនួញក្នុងស្រុកម្នាក់ ដែលទទួលយក Franchise នៃហាងកាហ្វេដ៏ល្បីពីប្រទេសថៃ ផ្តល់កិត្តិយសដល់កញ្ញា ក្នុងនាមជាអ្នកតំណាងផលិតផលប្រចាំនៅកម្ពុជា ។

ជាមួយនឹងទឹកមុខរីករាយ សប្បាយចិត្តនឹងតំណែងជាអ្នកតំណាងហាងកាហ្វេដ៏ល្បីមកពីប្រទេសថៃ និងទើបតែបើកដំណើរការលក់ទីតាំងដំបូងស្ថិតនៅក្នុងមជ្ឈមណ្ឌលពាណិជ្ជកម្ម ហេង អាស៊ី ម្ដុំស្តុបបូកគោមួយនេះ ម្ចាស់បទចម្រៀង «ស្រឡាញ់បងលើសហើយ» កញ្ញា ស៊ូ ស៊ីរីកា បានបញ្ជាក់យ៉ាងដូច្នេះថា ៖ «មុនដំបូងខ្ញុំអត់បានដឹងថា ត្រូវបានបងស្រីម្ចាស់ហាងជ្រើសខ្ញុំធ្វើជាអ្នកតំណាងហាងរបស់គាត់នោះទេ ប៉ុន្តែស្រាប់តែមុនថ្ងៃបើកសម្ពោធហាង ស្រាប់តែគាត់បានទូរស័ព្ទទាក់ទងមកខ្ញុំ ហើយប្រាប់ពីដំណឹងនេះ ធ្វើឱ្យខ្ញុំភ្ញាក់ផ្អើលខ្លាំងមែនទែន ព្រោះវាគឺជាលើកដំបូងសម្រាប់ខ្ញុំដែលធ្វើជាអ្នកតំណាងផលិតផល និងហាងដ៏ល្បី Best Coffee។ នៅក្នុងឱកាសនេះផងដែរ ក្នុងនាមខ្ញុំជាអ្នកតំណាងប្រចាំនៅកម្ពុជានាពេលនេះ សូមបញ្ជាក់ថា កាហ្វេ ដែលមានគុណភាពលំដាប់អន្តរជាតិ ឈ្ងុយឆ្ងាញ់ បែបធម្មជាតិ មិនមានជាតិគីមី គឺកាហ្វេ Best Coffee ដែលប្រិយមិត្តទាំងអស់អាចមកទទួលទាននៅទីតាំងដូចបានជម្រាបជូនខាងលើនេះ ហើយក្រៅពីនេះរាល់អតិថិជនទាំងអស់ក៏អាចអង្គុយយ៉ាងត្រជាក់ចិត្តនៅក្នុងហាងមួយនេះផ្ទាល់» ៕

នៅក្នុងឆ្នាំ 2016កន្លងទៅនេះ ទំហំពាណិជ្ជកម្មទ្វេភាគីរវាងប្រទេសថៃ និងកម្ពុជាបានកើនដល់ 5.6ពាន់លានដុល្លារ មានទំហំប្រហាក់ប្រហែលនឹងឆ្នាំ 2015 ដែរ ហើយសម្រាប់ឆ្នាំ2017 គេរំពឹងទុកថានឹងកើនឡើងដល់ 5.8 ពាន់លានដុល្លារ ឬកើនឡើងប្រហែល 5% នេះជាកាលើកឡើងរបស់លោក ជិរ៉ាវុធ សុវ៉ាន់ណាអាត ភារធារីស្ថានទូតថៃទទួលបន្ទុកផ្នែកពាណិជ្ជកម្ម ការិយាល័យកិច្ចការពាណិជ្ជកម្ម ស្ថានឯកអគ្គរាជទូតថៃប្រចាំកម្ពុជា ថ្លែងនៅក្នុងសន្និសីទកាសែតកាលពីព្រឹកថ្ងៃទី 23 ខែឧសភា ឆ្នាំ2017នេះ។

ជាមួយនឹងទំហំពាណិជ្ជកម្មដ៏ច្រើននេះ នឹងជំរុញការអភិវឌ្ឍការដឹកជញ្ជូនរវាងប្រទេសទាំងពីរ និងជួយពង្រឹងការដោះដូរពាណិជ្ជកម្មគ្នាឱ្យបន្តរីកចម្រើនទៅមុខ។ ការធ្វើពាណិជ្ជកម្មសម័យទំនើបទាមទារឱ្យមានហេដ្ឋារចនាសម្ព័ន្ធការដឹកជញ្ជូនងាយស្រួលដែលភ្ជាប់ការដឹកជញ្ជូនទំនិញទៅកាន់ឃ្លាំងស្តុកទំនិញបានឆាប់រហ័ស។ ប្រទេសថៃមានប្រព័ន្ធគ្រប់គ្រងការដឹកជញ្ជូនដែលមានការអភិវឌ្ឍដ៏ប្រណីតដែលអាចភ្ជាប់ប្រទេសកម្ពុជាជាមួយប្រព័ន្ធការដឹកជញ្ជូនដ៏រលូនទៅកាន់បណ្តាប្រទេសអាស៊ាន និងបណ្តាប្រទេសផ្សេងៗទៀតក្នុងតំបន់។

រាជរដ្ឋាភិបាលថៃ សម្លឹងឃើញនូវសារៈសំខាន់នៃការជំរុញការដឹកជញ្ជូន ជាពិសេសពាណិជ្ជកម្មទ្វេភាគី និងមានគោលនយោបាយជំរុញហេដ្ឋារចនាសម្ព័ន្ធរូបវ័ន្ត ការដឹកជញ្ជូនទំនិញ និងសេវាកម្មឱ្យមានកម្រិតស្តង់ដារអន្តរជាតិដែលផ្តល់អត្ថប្រយោជន៍ដល់ការអភិវឌ្ឍធុរកិច្ចរវាងប្រទេសទាំងពីរ។ លោកក៏បានធ្វើការពន្យល់បន្ថែមទៀតថា៖ ជាមួយនឹងការអភិវឌ្ឍសេដ្ឋកិច្ចបែបនេះនឹងឈានទៅរកការពង្រីកអាជីវកម្មក្នុងតំបន់បានយ៉ាងឆាប់រហ័ស។ លោកស៊ិន ចន្ធី ប្រធានសហព័ន្ធអ្នកឈានមុខក្នុងវិស័យដឹកជញ្ជូនកម្ពុជា Cambodia Freight Forwarders Association (CAMFFA) បានលើកបង្ហាញអំពី “ការតភ្ជាប់ទំនាក់ទំនងការដឹកជញ្ជូនរវាងកម្ពុជា – ថៃ ដែលជាគន្លឹះឈានទៅរកភាពជោគជ័យក្នុងវិស័យដឹកជញ្ជូន”។

លោកបានចង្អុលបង្ហាញថា ការតភ្ជាប់ទំនាក់ទំនងការដឹកជញ្ជូនរវាងកម្ពុជា – ថៃ បានកើតឡើង និងត្រូវបានពង្រឹងពីមួយឆ្នាំទៅមួយឆ្នាំតាមរយៈការដោះដូរលិខិតអនុញ្ញាតអោយចេញចូលរថយន្ត និងតារាងតម្លៃពន្ធគយឆ្លងដែនរវាងប្រទេសទាំងពីរ ឈានឆ្ពោះទៅកាន់ការបង្កើតឱ្យមាននូវទំហំការដឹកជញ្ជូនកាន់តែច្រើនឡើង និងការបើកច្រកព្រំដែនថ្មីៗរវាងប្រទេសទាំងពីរ។ ការអនុវត្តបែបនេះនឹងជួយឱ្យការដឹកជញ្ជូនទំនិញទៅដល់ដៃអតិថិជនបានកាន់តែឆាប់រហ័ស កាត់បន្ថយថ្លៃដើមក្នុងការផ្ទេរឆ្លងកាត់តាមច្រកព្រំដែននៃប្រទេសវៀតណាម និងជួយផ្ទេរទំនិញទៅកាន់ប្រព័ន្ធដឹកជញ្ជូនក្នុងប្រទេសកម្ពុជាដើម្បីដឹកទៅកាន់គោលដៅនីមួយៗក្នុងប្រទេសកម្ពុជាបានឆាប់រហ័ស។

លោកស៊ិន ចន្ធី បានសម្លឹងឃើញឱកាសក្នុងការពង្រឹងពាណិជ្ជកម្ម និងការប្រកួតប្រជែងទ្វេភាគីរវាងប្រទេសទាំងពីរ និងការតភ្ជាប់គ្នាដើម្បីបម្រើដល់គោលដៅផ្សេងទៀតក្នុងអាស៊ានតាមរយៈដំណើរការដ៏ងាយស្រួល អត្រាចំណាយដែលមានភាពប្រកួតប្រជែង កាត់បន្ថយពេលវេលាក្នុងការដឹកជញ្ជូន និងការបើកច្រកថ្មីៗ។ ដើម្បីឱ្យអ្វីៗដែលបានលើកឡើងនេះអាចកើតឡើងបាន លោកស៊ិន ចន្ធី យល់ឃើញថា ពិព័រណ៌ TILOG-LOGISTIX 2017 គឺជាទម្រង់ពង្រឹងការតភ្ជាប់ពាណិជ្ជកម្មទ្វេភាគី តាមរយៈការរៀបចំឱ្យមានការជួបគ្នារវាងសហគ្រិននៃប្រទេសទាំងពីរ និងចែករំលែកការដឹកជញ្ជូន និងការតភ្ជាប់ទំនាក់ទំនងរវាងប្រទេសទាំងពីរ។

ជាមួយនឹងប្រធានបទដូចគ្នានេះដែរ លោកថងយូ ឃុងខាន់ អគ្គនាយកសហភាពការដឹកជញ្ជូនផ្លូវគោកថៃក៏បានបង្ហាញទស្សនៈគាំទ្រនូវសារៈសំខាន់នៃការតភ្ជាប់ការដឹកជញ្ជូនក្នុងតំបន់ ដោយធ្វើការចង្អុលបង្ហាញថា វាមានសារៈសំខាន់បំផុតសម្រាប់ការរីកលូតលាស់នៃសេដ្ឋកិច្ច និងការដោះដូរពាណិជ្ជកម្មតាមព្រំដែននៃបណ្តាប្រទេស CLMV ដែលជាទីផ្សារដ៏មានសក្តានុពលបំផុតក្នុងតំបន់ដែលនឹងរីកលូតលាស់បានខ្ពស់ផងដែរ។ កម្ពុជាផ្តោតសំខាន់ទៅលើការដឹកជញ្ជូនផ្លូវគោក ដែលមានការចំណាយពេលតិចក្នុងការដឹកជញ្ជូនទំនិញតាមផ្លូវថ្នល់រវាងប្រទេសទាំងពីរ។ កំណែទម្រង់ការតភ្ជាប់ការដឹកជញ្ជូនរវាងប្រទេសទាំងពីរមានសារៈសំខាន់បំផុត និងជួយជំរុញពាណិជ្ជកម្មរវាងប្រទេសទាំងពីរឱ្យបន្តរីកលូតលាស់បានជាដរាប ហើយនឹងឈានទៅរកកំណែទម្រង់ហេដ្ឋារចនាសម្ព័ន្ធដឹកជញ្ជូនរវាងសហគ្រិនក្នុងតំបន់ និងចុងបញ្ចប់នឹងបង្កើតឡើងនូវបណ្តាញការដឹកជញ្ជូនដ៏ទាន់សម័យសម្រាប់ការដឹកជញ្ជូនទំនិញទៅកាន់ឃ្លាំងទំនិញ៕

ក្នុងការលើកកម្ពស់ផលិតផលកសិកម្មក្នុងស្រុក ក្រសួងពាណិជ្ជកម្មបានសហការជាមួយក្រសួងសេដ្ឋកិច្ច និងហិរញ្ញវត្ថុ រួមជាមួយអង្គការក្រៅរដ្ឋាភិបាល និងវិស័យឯកជន រៀបចំសិក្ខាសាលាស្តីពី «ការចាប់ផ្តើមអនុវត្តគម្រោងជំរុញទីផ្សារសម្រាប់កសិកម្មខ្នាតតូច» ជាលើកដំបូងនៅក្នុងប្រទេសកម្ពុជា។

ឯកឧត្តម ប៉ាន់ សូរស័ក្តិ រដ្ឋមន្រ្តីក្រសួងពាណិជ្ជកម្មមានប្រសាសន៍ថា គម្រោងនេះនឹងដាក់ឱ្យកសិករនៅតាមតំបន់មួយចំនួនចាប់អនុវត្តជាប្រព័ន្ធ ដូចជាការធ្វើរបរកសិកម្ម ការចិញ្ចឹមសត្វ និងការផលិតសូត្រជាដើម។ ឯកឧត្តមមានប្រសាសន៍ដូច្នេះថា «បច្ចុប្បន្នយើងសង្កេតឃើញថាប្រជាពលរដ្ឋនៅតាមបណ្តាខេត្តមួយចំនួន ធ្វើរបរកសិកម្មជាលក្ខណៈគ្រួសារ ដោយគាត់គ្រាន់តែដាក់លក់តាមកញ្ច្រែងល្អី ដឹកតាមរ៉ឺម៉ក ឬម៉ូតូជាដើម ប៉ុន្តែគម្រោងខាងលើនេះយើងអនុវត្តជាប្រព័ន្ធ ដោយកសិករត្រូវចងក្រងគ្នាជាក្រុមក្នុងការប្រកបរបរអ្វីមួយ ដែលមានដូចជាសហគមន៍ដាំបន្លែ សហគមចិញ្ចឹមមាន់ និងតម្បាញសូត្រជាដើម ហើយយើងត្រូវរកទីផ្សារជូនពួកគាត់ក៏ដូចជាការផ្តល់ជំនួយបច្ចេកទេស និងផ្តល់កម្ចីថវិកាជាដើម»។

គួរបញ្ជាក់ថា គម្រោងជំរុញទីផ្សារសម្រាប់កសិកម្មខ្នាតតូច (AIMS)នេះ ចាប់ផ្តើមអនុវត្តផ្អែកតាមកិច្ចព្រមព្រៀង ហិរញ្ញប្បទានចុះហត្ថលខាដោយរាជរដ្ឋាភិបាលកម្ពុជា និងអង្គការមូលនិធិអន្តរជាតិ ដើម្បីអភិវឌ្ឍកសិកម្មកាលពីខែកុម្ភៈ ឆ្នាំ2017។ គម្រោងនេះមានរយៈពេល 6ឆ្នាំ ដែលមានទឹកប្រាក់សរុប 61លានដុល្លារសហរដ្ឋអាមេរិក រួមបញ្ចូលអ្នកទទួលផលក្នុងស្រុក និងការចែករំលែកពីវិស័យឯកជន 16 លានដុល្លារអាមេរិកទៀត។

តាមរយៈសិក្ខាសាលាខាងលើ សិក្ខាកាមដែលចូលរួមនឹងសិក្សាពីកាលានុវត្តភាព សម្រាប់ធ្វើកិច្ចសហការជាមួយគម្រោង AIMS។ លើសពីនេះ បុគ្គលិករបស់ភ្នាក់ងារអនុវត្តន៍គម្រោង AIMS នឹងពង្រឹងយន្តការ និងការយល់ដឹងរបស់ខ្លួនលើគោលការណ៍សំខាន់ៗជាមួយលទ្ធផលរំពឹងទុកក៏ដូចជាយល់ច្បាស់ពីផែនការសម្រាប់ដំណាក់កាល 18 ខែដំបូងនៃការអនុវត្តគម្រោង AIMS នេះ៕

បឹងកេងកងត្រូវបានអ្នករកស៊ីអចលនទ្រព្យជាច្រើនចាត់ទុកថា ជាតំបន់មាសជាតំបន់ដែលមានតម្លៃអចលនទ្រព្យខ្ពស់ជាងគេ បើប្រៀបធៀបទៅនឹងតំបន់ជាច្រើនទៀតនៅកណ្ដាលរាជធានីភ្នំពេញ។ តើធ្លាប់ដឹងទេថា ហេតុអ្វីបានជាតំបន់នេះមានតម្លៃអចលនទ្រព្យថ្លៃជាងគេដូច្នេះ?

កន្លងមកបឹងកេងកងត្រូវបានគេលើកឡើងថា ជាតំបន់ដែលមានសក្ដានុពលសេដ្ឋកិច្ចខ្លាំងជាងតំបន់នានា និងជាទីតាំងដ៏មានប្រជាប្រិយភាពសម្រាប់ការរស់នៅរបស់ជនបរទេសព្រមទាំងជាបណ្ដុំនៃការធ្វើពាណិជ្ជកម្មទំនើបផងដែរ ទើបធ្វើឱ្យតម្លៃអចលនទ្រព្យក្នុងតំបន់នេះកើនឡើងខ្ពស់។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងថា ប្រសិនបើមើលទៅលើតម្លៃអចលនវត្ថុនៅតំបន់បឹងកេងកងវិញ បច្ចុប្បន្នវាមានតម្លៃថ្លៃជាង 2ដងធៀបទៅនឹងតំបន់នានា ដែលនៅចំកណ្ដាលក្រុងដូចជាទួលគោកជាដើម ព្រោះបឹងកេងកេងជាតំបន់មានសក្ដានុពលសេដ្ឋកិច្ច និងជាតំបន់ពាណិជ្ជកម្ម។ លោកបន្ដថា៖«នៅតំបន់បឹងកេងកងយើងចង់រកអ្វីក៏មាន ដូចជា សាលារៀនអន្ដរជាតិ មន្ទីរពេទ្យ អគារខុនដូសម្រាប់ស្នាក់នៅ អគារការិយាល័យ ផ្សារទំនើបជាដើម ព្រមទាំងជាបណ្ដុំពាណិជ្ជកម្មទំនើបផងដែរ ទាំងអស់នេះបើធៀបទៅតំបន់ជាច្រើនផ្សេងទៀតនៅកណ្ដាលក្រុងភ្នំពេញ សេវាកម្មមួយចំនួនមិនអាចរកបានឡើយ»។

បច្ចុប្បន្នបើទោះជាគេសង្កេតឃើញថា មានតំបន់ជាច្រើននៅក្នុងទីក្រុង ឬជាយក្រុងកំពុងតែមានការអភិវឌ្ឍទៅយ៉ាងលឿនដែលជំរុញឱ្យមានលំហូរប្រជាជនទៅរស់នៅក្នុងតំបន់ទាំងនោះជាច្រើនក៏ដោយ ក៏តម្លៃអចលនទ្រព្យនៅក្នុងតំបន់នោះពុំទាន់អាចហក់ឡើងមកឈរនៅក្នុងជួរជាមួយតំបន់បឹងកេងកងបានដែរ។

លោក ច្រឹក សុខនីម ប្រធានក្រុមហ៊ុន Century 21 មេគង្គ បានលើកឡើងថា តំបន់បឹងកេងកងជាតំបន់ដែលមានប្រជាប្រិយភាពសម្រាប់ការរស់នៅរបស់ជនបរទេស ព្រោះវាមិនត្រឹមតែជាតំបន់មានសក្ដានុពលក្នុងការធ្វើពាណិជ្ជកម្មប៉ុណ្ណោះទេ វាជាទីតាំងកណ្ដាលមួយដ៏ល្អសម្រាប់ការរស់នៅប្រកបដោយសុវត្ថិភាព និងផាសុកភាព។ តំបន់បឹងកេងកងក៏ជាតំបន់ដែលបណ្ដុំទៅដោយស្ថានទូតនៃប្រទេសនានា ហើយវាក៏ស្ថិតនៅជិតដងទន្លេដែលមានខ្យល់អាកាសល្អ ត្រជាក់គួរឱ្យចង់រស់នៅ ដូច្នេះទើបអាចនិយាយបានថា ជាទីតាំងល្អ។

ប្រធានក្រុមហ៊ុន Century 21 មេគង្គបានបន្ដថា៖ “ខ្ញុំមិនបដិសេធនោះទេថា ពេលអនាគតនៅតំបន់ផ្សេងៗក្នុងទីក្រុងភ្នំពេញ អាចនឹងមានតម្លៃអចលនវត្ថុប្រហាក់ប្រហែលតំបន់បឹងកេងកងដែរ ប៉ុន្ដែវាជាការលំបាកខ្លាំងណាស់ ក្នុងការធ្វើឱ្យតំបន់ផ្សេងទៀតមានតម្លៃអចលនទ្រព្យអាចឡើងមកឈរទន្ទឹមនឹងតំបន់បឹងកេងកង ព្រោះវាត្រូវការរយៈពេលយូរតទៅទៀត”។

លោក សន សៀប អគ្គនាយកក្រុមហ៊ុន Key Real estate បានលើកឡើងថា បច្ចុប្បន្នតម្លៃអចលនទ្រព្យនៅតំបន់កោះពេជ្រកំពុងតែមានការប្រកួតប្រជែងជាមួយតំបន់បឹងកេងកង ដូច្នេះអាចសន្និដ្ឋានបានថាក្នុងចំណោមតំបន់ទាំងអស់នៅក្នុងក្រុងភ្នំពេញមានតែ កោះពេជ្រប៉ុណ្ណោះដែលមានសមត្ថភាពអាចដេញប្រកៀកប្រកិត ទៅនឹងបឹងកេងកេងបាន។

លោកបញ្ជាក់ថា៖” បច្ចុប្បន្នតម្លៃអចលនទ្រព្យនៅក្នុងតំបន់កោះពេជ្រមានតម្លៃក្នុងរង្វង់ 4000 – 4300ដុល្លារអាមេរិកក្នុងមួយម៉ែត្រការ៉េ រីឯតំបន់បឹងកេងកងវិញមានតម្លៃប្រមាណជា 4000 – 4500 ដុល្លារអាមេរិកក្នុងមួយម៉ែត្រការ៉េ ដូច្នេះយើងមើលឃើញថា តំបន់កោះពេជ្រនៅមានសម្ទុះអាចប្រកួតប្រជែងបានជាមួយតំបន់បឹងកេងកេង”៕