Author: វល័ក្ខ

ក្រសួងពាណិជ្ជកម្ម រៀបចំសិក្ខាសាលាបញ្ជ្រាបការយល់ដឹងពីការទទួលទានអាហារមានសុវត្ថិភាព
ដើម្បីឱ្យប្រជាពលរដ្ឋយល់ដឹងពីការទទួលទានបន្លែមានសុវត្ថិភាព (គ្មានជាតិគីមី) ក្រសួងពាណិជ្ជកម្ម បានរៀបចំសិក្ខាសាលាមួយនៅក្នុងបរិវេណនៃសាកលវិទ្យាល័យខេត្តបាត់ដំបង ដើម្បីបញ្ជ្រាបការយល់ដឹងដល់និស្សិត ពលរដ្ឋ ក៏ដូចជាសាធារណជនទូទៅឱ្យមានការប្រុងប្រយ័ត្នចំពោះការទទួលទានអាហារ ដែលមានសារធាតុគីមីដែលនាំឱ្យប៉ះពាល់ដល់សុខភាព។
សិក្ខាសាលានេះ ធ្វើឡើងចំពេលដែលក្រសួងកំពុងរៀបចំពិព័រណ៌ពាណិជ្ជកម្មផលិតផលខ្មែរលើកទី2 នៅទីលានបាល់ទាត់ខេត្តបាត់ដំបងចាប់ពីថ្ងៃទី25 ដល់ថ្ងៃទី28 ខែឧសភា ដោយមានទំនិញជាផលិតផលកសិករខ្មែរគ្រប់ប្រភេទដាក់តាំងលក់នៅទីនោះ។
ឯកឧត្តម ប៉ាន សូស័ក្តិ រដ្ឋមន្រ្តីក្រសួងពាណិជ្ជកម្មមានប្រសាសន៍ថា សិក្ខាសាលានេះមានបំណងពន្យល់សិក្ខាកាមឲ្យយល់ច្បាស់អំពីសារៈសំខាន់នៃការប្រើប្រាស់ផលិតផលខ្មែរ ការអភិវឌ្ឍកំណើនសេដ្ឋកិច្ច និងផ្តល់ជាពុទ្ធិទាក់ទងនឹងសុវត្ថិភាពទំនិញម្ហូបអាហារ ដែលកំពុងចរាចរលក់នៅលើទីផ្សារ សំដៅទប់ស្កាត់ និងបង្ការមិនឲ្យមានហានិភ័យ ឬផលប៉ះពាល់ផ្សេងៗដល់សុខមាលភាព។
នៅក្នុងឱកាសនោះ ឯកឧត្តមរដ្ឋមន្ត្រីបានលើកយកកិច្ចខិតខំប្រឹងប្រែងរបស់ក្រសួងពាណិជ្ជកម្ម ក្នុងការជំរុញ និងលើកស្ទួយផលិតផលខ្មែរ តាមរយៈការដាក់ចេញនូវយុទ្ធនាការទិញផលិតផលខ្មែរក្នុងក្របខ័ណ្ឌទូទាំងប្រទេស ការចរចាក្រោមក្របខ័ណ្ឌទ្វេភាគី និងពហុភាគី ការចូលរួមពិព័រណ៍អន្តរជាតិ ព្រមទាំងការបង្កើតឲ្យមានមជ្ឈមណ្ឌលពាណិជ្ជកម្ម នៅតាមទីក្រុងធំៗនៃប្រទេសចិនដើម្បីជំរុញការធ្វើពិពិធកម្មវិស័យនាំចេញជាដើម។
ពាក់ព័ន្ធជាមួយសុវត្ថិភាពម្ហូបអាហារ ឯកឧត្តមរដ្ឋមន្ត្រីក៏បានជម្រាបជូនសិក្ខាកាមអំពីការរៀបចំសិក្ខាសាលាខ្លីៗរបស់ក្រសួងដើម្បីអប់រំសាធារណជន ជាពិសេសផលិតករ និងសហគ្រិន នូវរបៀបវេចខ្ចប់ទំនិញប្រកបដោយសោភ័ណភាព មានគុណភាព និងអនាម័យខ្ពស់ស្របតាមបទដ្ឋានស្តង់ដារជាតិ និងអន្តរជាតិដែលអាចទាក់ទាញទំនុកចិត្ត និងការគាំទ្រកាន់តែច្រើនពីអ្នកប្រើប្រាស់។
សូមជម្រាបថា បច្ចុប្បន្នបន្លែអសុវត្ថិភាពឬហៅថាបន្លែ ត្រី សាច់ ដែលមានសារធាតុគីមីត្រូវបានគេនាំចូលពីប្រទេសជិតខាង ពិសេសវៀតណាម និងថៃ ដើម្បីយកមកដាក់លក់នៅលើទីផ្សារក្នុងប្រទេសកម្ពុជាដែលប្រជាជនគួរយល់ដឹង និងចេះស្វែងរកអាហារណាដែលគ្មានសារធាតុគីមី សម្រាប់ធ្វើជាអាហារប្រចាំថ្ងៃ ចៀសវាងផលប៉ះពាល់សុខភាពដែលនាំឱ្យខាតបង់ថវិកាក្នុងគ្រួសារ៕
May 27, 2017
ដឹងទេថា រ៉ាប៊ី ស្លៀកសម្លៀកបំពាក់តម្លៃប៉ុន្មានឡើងឆាក?
បច្ចុប្បន្នមានតារាសិល្បៈជាច្រើនកំពុងតែពេញនិយមលើការប្រើប្រាស់សម្ភារទំនើប និងម៉ាកល្បីៗ ដែលពួកគេគិតថា វាអាចជួយលើកស្ទួយកិត្ដិយសពួកគេបាន។ ផ្ទុយទៅវិញសម្រាប់កញ្ញា រ៉ាបី តារាចម្រៀងប្រចាំនៅក្នុងផលិតកម្ម ថោន បានប្រាប់ថា ការតុបតែងខ្លួនមិនមែនសុទ្ធតែត្រូវពឹងផ្អែកលើសម្ភារថ្លៃៗនោះឡើយ។

មួយរយៈចុងក្រោយបន្ទាប់ពីកញ្ញា រ៉ាប៊ី បានដកខ្លួនចេញពីការសម្ដែង ហើយបោះជំហានចូលទៅក្នុងផលិតកម្មថោន ក្នុងឋានៈជាតារាចម្រៀងអាជីពនោះ គេសង្កេតឃើញថា ការតុបតែងខ្លួនរបស់នាងហាក់ដូចជាកាន់តែមានភាពស្រស់ស្អាត និងស៊ីវីល័យជាងមុន ធ្វើឱ្យមហាជនជាច្រើនគិតថា ការតុបតែងខ្លួនស្រស់ស្អាតបែបនេះទំនងជានាងចាយលុយច្រើនក្នុងការទិញសម្ភារតុបតែងខ្លួនមិនខាន។
កញ្ញា រ៉ាបី បញ្ជាក់ថា ជាការពិតណាស់ជាតារាសិល្បៈគួរតែមានសម្លៀកបំពាក់ និងសម្ភារម៉ាកល្បីៗប្រើប្រាស់ខ្លះដែរ ប៉ុន្ដែក៏មិនគួរចំណាយប្រាក់ច្រើនពេកក្នុងការទិញសម្ភារថ្លៃៗនោះទេ ព្រោះពេលខ្លះសម្លៀកបំពាក់ថ្លៃៗមិនប្រាកដថា សុទ្ធតែស្លៀកហើយទទួលបានភាពស្រស់ស្អាតនោះទេ។
នាងបន្ថែមថា៖”សម្រាប់ខ្ញុំ ខ្ញុំមិនប្រកាន់ថា ទាល់តែសម្លៀកបំពាក់នោះមានតម្លៃថ្លៃទើបយកមកស្លៀកទេ សំខាន់ឱ្យតែវាផ្ដល់នូវសោភ័ណភាពស្រស់ស្អាតដល់រូបខ្ញុំ គឺជាការស្រេច។ វាជារឿងមួយល្អណាស់ ប្រសិនបើយើងអាចទិញសម្លៀកបំពាក់ក្នុងតម្លៃទាប ហើយស្លៀកពាក់ទៅសមនឹងខ្លួនយើង ព្រោះវាក៏ជាចំណែកមួយនៃការសន្សំសំចៃប្រាក់ដែរ។ ជួនកាលពេលខ្ញុំឡើងឆាកតន្ត្រីច្រៀងម្ដង ខ្ញុំស្លៀកសម្លៀកបំពាក់ក្នុងតម្លៃត្រឹមតែ 25 – 30ដុល្លារប៉ុណ្ណោះ”។
ទោះជាយ៉ាងណានាងក៏បានបញ្ជាក់ដែរថា ការព្យាយាមមិនចំណាយច្រើនទៅលើការទិញសម្លៀកបំពាក់ ឬសម្ភារថ្លៃៗយកមកប្រើប្រាស់នោះ ព្រោះតែនាងត្រូវការសន្សំសំចៃប្រាក់ឱ្យបានច្រើន ក្រែងលោថ្លៃណាមួយនាងមានបំណងចង់បើកមុខរបររកស៊ី នាងនឹងមានប្រាក់រួចជាស្រេច៕
May 27, 2017
សកម្មភាពគួរធ្វើ ដើម្បីសុខភាពសក់
មានអារម្មណ៍ថារបៀបនៃការថែរក្សាសក់របស់អ្នកនៅមានភាពខ្វះចន្លោះដែរឬទេ? បើដូច្នេះមានន័យថា វាដល់ពេលហើយដែលអ្នកត្រូវកែខៃឱ្យអ្វីៗមានភាពល្អប្រសើរឡើងវិញនោះ។ សកម្មភាពមួយចំនួនដែលអ្នកធ្លាប់បានធ្វើ អាចបណ្តាលឱ្យមានផលមិនល្អចំពោះសុខភាពសក់ ហើយសកម្មភាពខ្លះក៏ជាផលល្អចំពោះសក់ដែរ ហេតុដូចនេះការដឹងពីអ្វីដែលគួរ និងមិនគួរធ្វើគឺជារឿងសំខាន់ដែលអ្នកមិនគួរមើលរំលងជាដាច់ខាត។
*លាបប្រេងលើសក់នាពេលយប់មុនពេលងូតទឹក ព្រោះការធ្វើបែបនេះនឹងធ្វើឱ្យសក់របស់អ្នកភ្លឺរលោង។
*ស្ព្រៃយ៍កាត់បន្ថយសក់ជំពាក់អាចជួយកុំឱ្យសក់របស់អ្នកជំពាក់ខ្លាំង។ ដូច្នេះអ្នកមិនចាំបាច់ពិបាកខំជជុះសក់ខណៈដែលកំពុងសិតសក់នោះទេ។
*បើសិនអ្នកមានការចាំបាច់ត្រូវតែប្រើកម្តៅលើសក់ អ្នកត្រូវតែប្រាកដក្នុងចិត្តថា អ្នកបានប្រើស្ព្រៃយ៍បាញ់ការពារសក់ជាមុនរួចហើយ។
*កុំអាលគេងបើសក់របស់អ្នកនៅមិនទាន់ស្ងួត ព្រោះវានឹងធ្វើឱ្យសក់របស់អ្នកខ្សោយ។ ដំណោះស្រាយគឺអ្នកត្រូវផ្លុំគល់សក់ឱ្យស្ងួតដោយប្រើកម្តៅទាបជាមុនសិន មុននឹងចូលគេង។
*មនុស្សភាគច្រើនប្រើសាប៊ូច្រើនជាងតម្រូវការ។ បរិមាណនៃសាប៊ូគួរតែប្រើទៅតាមប្រវែងនៃសក់របស់អ្នក(1/4នៃទូកដៃ)។
*កុំផ្លុំសក់ ឬធ្វើឱ្យសក់ត្រូវកម្តៅញឹកញាប់ពេក ព្រោះជាហេតុផលដែលធ្វើឱ្យសក់មានភាពធុញថប់ ងាយនឹងត្រូវបំផ្លាញខ្លាំងណាស់។
*ជម្រះសក់ជាមួយនឹងទឹកត្រជាក់ បន្ទាប់ពីកក់សក់ហើយក៏ត្រូវអប់សក់ផងដែរ ដើម្បីឱ្យសក់រលោងស្អាតជាងពីមុន។
*ភាពធុញថប់ជាផ្នែកមួយដែលធ្វើឱ្យសក់ត្រូវបំផ្លាញ ដូច្នេះសូមធ្វើយ៉ាងណាចៀសចេញឱ្យឆ្ងាយពីភាពធុញថប់ទាំងនេះ។
*ពេលសម្ងួតសក់ដោយប្រើកន្សែង កុំត្រដុសវាខ្លាំងៗពេក ព្រោះវាអាចបំផ្លាញដល់សក់របស់អ្នកបាន ដូច្នេះចាប់ពីពេលនេះទៅអ្នកគួរតែប្រើកន្សែងណាដែលមានសរសៃទន់អាចជក់ទឹកបានល្អ ទើបជាការប្រសើរ និងល្អចំពោះសុខភាពសក់របស់អ្នក៕
May 27, 2017
Silva ចេញពីក្លិប Monaco ទៅចូលរួមជាមួយ Man City ក្នុងតម្លៃខ្លួន៤៣,៦លានផោន
ក្លិប Manchester City បានចុះហត្ថលេខាជាមួយនឹងកីឡាករ Bernardo Silva ពីក្លិប Monaco របស់បារាំងក្នុងតម្លៃខ្លួន៤៣,៦លានផោន (ស្មើនឹង៥៥,៨លានដុល្លារអាមេរិក)។ ខ្សែបម្រើដ៏មានឥទ្ធិពលរូបនេះបានយល់ព្រមចុះកិច្ចសន្យារយៈពេល៥ឆ្នាំជាមួយនឹងក្លិប Man City របស់ក្របខ័ណ្ឌ Premier League ខណៈដែលក្រុមរបស់លោក Pep Guardiola ចាប់ផ្តើមជះទឹកប្រាក់ ក្រោយពីពួកគេមិនបានឈ្នះពានអ្វីសោះក្នុងរដូវកាលទើបតែបញ្ចប់នាពេលថ្មីៗនេះ។ គ្រូបង្វឹកសញ្ជាតិអេស្ប៉ាញរូបនេះ បានចាប់ផ្តើមឈានជើងចូលទៅក្នុងទីផ្សារទិញលក់កីឡាករភ្លាមៗនៅរដូវក្តៅនេះ ក្រោយពីក្រុមរបស់លោកបានបញ្ចប់ត្រឹមចំណាត់ថ្នាក់លេខ៣ នៅលើតារាង Premier League និងមិនអាចធ្វើការប្រជែងដណ្តើមពានក្នុងស្រុកពីរផ្សេងទៀត និងក្នុងក្របខ័ណ្ឌ Champions Leagueបាន។
លោក Guardiola បានចាត់ទុកខ្សែបម្រើរបស់ក្លិប Monaco វ័យ២២ឆ្នាំរូបនេះ ជាគោលដៅមួយក្នុងចំណោមគោលដៅអាទិភាពរបស់លោក ហើយក្លិបទាំងពីរបានឈានដល់ការព្រមព្រៀងគ្នាកាលពីថ្ងៃសុក្រ ខណៈដែល Silva បានធ្វើដំណើរទៅកាន់ទីក្រុង Manchester ដើម្បីពិនិត្យសុខភាព។ Silva ដែលនឹងបានពាក់អាវលេខ២០រូបនេះ បានប្រាប់គេហទំព័ររបស់ Man City ថា៖ «ខ្ញុំមានអារម្មណ៍ថាពិតជាអស្ចារ្យណាស់។ និយាយឲ្យត្រង់ទៅ ខ្ញុំបច្ចុប្បន្នកំពុងតែស្ថិតក្នុងក្រុមមួយក្នុងចំណោមក្រុមដ៏ខ្លាំងបំផុតក្នុងពិភពលោក។ ក្នុងការចូលរួមជាមួយនឹងក្រុមនេះ និងក្នុងការមានឱកាសនេះ វាពិតជាអស្ចារ្យណាស់»។ ខ្សែបម្រើរូបនេះបានបន្ថែមទៀតថា៖ «ខ្ញុំពិតជារីករាយណាស់ក្នុងការក្លាយជាសមាជិករបស់ក្រុម Man City ហើយខ្ញុំកំពុងតែស្រេកឃ្លានក្នុងការប្រឹងឲ្យអស់ពីសមត្ថភាពរបស់ខ្ញុំក្នុងការជួយឲ្យក្រុមនេះឈានដល់គោលដៅរបស់ពួកគេ។ ពិតណាស់ នៅពេលដែលអ្នកមានឱកាសក្នុងការហ្វឹកហាត់ក្រោមការដឹកនាំរបស់លោក Guardiola អ្នកមិនអាចនិយាយថា ទេបានឡើយ។ គាត់គឺជាគ្រូបង្វឹកម្នាក់ក្នុងចំណោមគ្រូបង្វឹកដ៏ឆ្នើមបំផុត»៕
ប្រភពពី៖ The Guardian

May 27, 2017
នាយកគ្រប់គ្រងថ្មី Jaguar Land Rover ៖« ការសម្រេចទិញរថយន្តរបស់ប្រជាជនកម្ពុជា មានលក្ខណៈប្លែក»
ទើបតែចូលខ្លួនមកបម្រើការងារបានមិនដល់ 4 ខែផង នាយកគ្រប់គ្រងថ្មីនៃក្រុមហ៊ុន Jaguar Land Rover លោក Ulf Sebecke បានមើលឃើញពីឥរិយាបថថ្មីប្លែកមួយរបស់ពលរដ្ឋខ្មែរ ដែលមុននឹងសម្រេចចិត្តទិញរថយន្តណាមួយយកទៅប្រើប្រាស់ ឃើញថាមានលក្ខណៈផ្សេងពីអតិថិជននៅតាមបណ្ដាប្រទេសដែលលោកធ្លាប់ធ្វើការ។ ក្នុងបទសម្ភាសជាមួយនឹងកាសែត ឡារ៉ែន ពាណិជ្ជ លោក Ulf បានបង្ហាញនូវចំណាប់អារម្មណ៍មួយចំនួន រួមនឹងចំណុចរីកចម្រើនក្នុងទីផ្សាររថយន្តប្រណីតរបស់កម្ពុជា។
បាទ! ជំរាបសួរ លោក Ulf Sebecke ខ្ញុំចង់ឱ្យលោកជួយជម្រាបបន្តិច ពីប្រវត្តិផ្ទាល់ខ្លួនរបស់លោក?
លោក Ulf Sebecke៖ ខ្ញុំជនជាតិអាល្លឺម៉ង់ តែរស់នៅប្រទេសអូស្ត្រាលី ហើយខ្ញុំបានបញ្ចប់ថ្នាក់បរិញ្ញាបត្រផ្នែកឧស្សាហកម្ម ចិត្តសាស្ត្រ និងការទំនាក់ទំនង ពីមហាវិទ្យាល័យនៃអាហ្រិ្វកខាងត្បូង និងបានបញ្ចប់សញ្ញាប័ត្របាក់ឌុប ផ្នែកគ្រប់គ្រងទីផ្សារ ពីវិទ្យាស្ថានគ្រប់គ្រងទីផ្សារនៅទីនោះផងដែរ។
មុននឹងចូលមកគ្រប់គ្រងក្រុមហ៊ុន Jaguar Land Rover កម្ពុជា តើលោកធ្លាប់ធ្វើការងារនៅទីណាដែរ?
លោក Ulf Sebecke៖ បាទ អគុណ! មុនការចូលខ្លួនមកធ្វើការនៅក្រុមហ៊ុន Jaguar Land Rover ប្រចាំប្រទេសកម្ពុជា ខ្ញុំធ្លាប់បម្រើការងារនៅប្រទេសកាតា ឥណ្ឌូនេស៊ី, ចិន,ស៊ីរី, អូស្ត្រាលី, ឌូបៃ, អាឡឺម៉ង់ និងអាហ្វ្រិកខាងត្បូង។ ជាមួយនឹងបទពិសោធជាង 30 ឆ្នាំ ក្នុងវិស័យទីផ្សាររថយន្ដទំនើប ខ្ញុំបានធ្វើជាអ្នកដឹកនាំប្រចាំក្រុមហ៊ុនរថយន្ដជាច្រើន ដូចជា Porsche and Rolls Royce Chine, BMW, Jaguar Land Rover, និង Volvo។
ការឈានជើងចូលមកក្នុងទីផ្សាររថយន្តប្រណីតកម្ពុជា តើលោកមើលឃើញអ្វីខ្លះដែលខុសប្លែកពីគ្នារបស់បណ្ដាប្រទេស ដែលលោកធ្លាប់គ្រប់គ្រង?
លោក Ulf Sebecke៖ រយៈកាលជាង 3 ខែមកនេះ ខ្ញុំបានរៀនសូត្រ និងស្វែងយល់ច្រើនពីពលរដ្ឋកម្ពុជាក្នុងទីផ្សារមួយនេះ។ នៅទីផ្សារចាស់ដែលខ្ញុំធ្លាប់គ្រប់គ្រង ប្រជាជននៅទីនោះមានការសម្រេចចិត្តលឿនក្នុងការទិញរថយន្តណាមួយយកទៅប្រើប្រាស់ ខណៈអតិថិជននៅកម្ពុជា មានការសម្រេចចិត្តយូរជាង។ មួយវិញទៀត ការប្រើប្រាស់រថយន្តក៏មានលក្ខណៈប្លែកដែរ។ នៅទីនេះ អតិថិជនភាគច្រើនមានទំនោរទៅរករថយន្តមួយទឹកនាំចូលពីក្រៅប្រទេស ដែលនាំចូលមកក្រៅផ្លូវការ ខុសលក្ខខណ្ឌបច្ចេកទេស ដែលត្រូវនឹងស្ថានភាពផ្លូវ អាកាសធាតុ និងកម្រិតប្រេងជាដើម។
លោកអាចជម្រាបបានទេថា ហេតុអ្វីទើបការសម្រេចទិញរថយន្តរបស់ប្រជាជនកម្ពុជា ប្រើពេលយូរដូច្នេះ?
លោក Ulf Sebecke៖ តាមការសង្កេតរបស់ខ្ញុំ វាអាចមកពីកត្តាជាតិសាសន៍ ទម្លាប់ វប្បធម៌ ការធ្វើពាណិជ្ជកម្ម និងរបៀបនៃការគិតមុននឹងទិញអ្វីមួយ។ ទីផ្សារផ្សេងគ្នា អតិថិជនក៏ផ្សេងគ្នាដែរ។ នៅកម្ពុជា មុនទិញរថយន្ត អតិថិជនមានគិតច្រើន លើស្លាកសញ្ញា ការប្រៀបធៀបតម្លៃ ភាពប្រណីត សមត្ថភាពនៃរថយន្ត និងការពេញនិយមក្នុងទីផ្សារ។ ជាទូទៅ អតិថិជនម្នាក់មុននឹងសម្រេចទិញរថយន្ត គាត់មានការគិតច្រើនខែ ឬខ្លះត្រូវចូលមកមើលរថយន្ត 2 ទៅ 3 ដង ទើបសម្រេចចិត្ត។ អាចនិយាយបានថា ទីផ្សារចាស់ដែលខ្ញុំធ្លាប់គ្រប់គ្រងភាគច្រើនជាប្រទេសដែលប្រជាជនមានចំណូលខ្ពស់ មានជីវភាពធូរធារ និងមានចំណេះដឹងផ្នែកយានយន្តច្រើន។ វាអាចមានន័យថា នៅទីនោះអតិថិជនបានសិក្សាលម្អិតច្រើនពីព័ត៌មាន លក្ខណៈសម្បត្តិ និងតម្លៃរបស់រថយន្តដែលពួកគាត់ចង់បាន មុនពេលពួកគាត់ចូលមកមើលផ្ទាល់នៅទីតាំងលក់។
ហេតុទាំងនេះហើយ ដែលខ្ញុំ និងក្រុមការងារត្រូវឈរនៅទីនេះ ដើម្បីធ្វើយ៉ាងណាជួយសម្រួល និងផ្ដល់ជាយោបល់ដល់អតិថិជន ដែលវាអាចជាវិធីមួយប្រសើរជាងមុន ដល់ការសម្រេចចិត្តរបស់ពួកគាត់។ ដូចអ្វីដែលយើងបានធ្វើនៅទីនេះ យើងមានភ្នាក់ងារចាំផ្ដល់ប្រឹក្សាដែលមានជំនាញខ្ពស់ ទីតាំងបង្ហាញរថយន្តសម្បូរបែប ព្រមជាមួយនឹងការចែករំលែកព័ត៌មានតាមបណ្ដាញអ៊ីនធើណេត Facebook, Instagram, Line, Twitter មានភាពទូលំទូលាយ ដែលជាចរន្តធ្វើឱ្យអតិថិជនងាយទទួលបានព័ត៌មានរហ័ស និងត្រឹមត្រូវ។
អ្វីជាលក្ខណៈពិសេសរបស់ Jaguar Land Rover ដែលអតិថិជន អាចជឿទុកចិត្ត ដែលជំរុញដល់ការសម្រេចឱ្យបានលឿន?
លោក Ulf Sebecke៖ ក្នុងនាមជាម៉ាកល្បីទូទាំងពិភពលោកជាមួយនឹងការឆ្នៃប្រឌិតខ្ពស់ និងទំនើប Jaguar Land Rover នឹងផ្ដល់នូវផលិតផល ដែលប៉ះពាល់តិចតួចបំផុតនៅលើភពផែនដី។ ក្នុងរថយន្តមួយគ្រឿង យើងបានកាត់បន្ថយការប្រើប្រាស់ទឹក និងការបំភាយឧស្ម័ន CO2 បាន 30% ដែលជាសមិទ្ធផលគួរឱ្យកត់សម្គាល់យ៉ាងពិតប្រាកដនៅក្នុងឧស្សាហកម្មមួយនេះ។ (យោងទៅតាម តួលេខរបាយការណ៍ស្តីពីនិរន្តរភាពរបស់ Jaguar Land Rover ឆ្នាំ 2015) ផលិតផលរបស់ក្រុមហ៊ុន Jaguar Land Rover ត្រូវបានរចនាឡើងដែលបានដក់ក្នុងចិត្តរបស់អ្នកប្រើប្រាស់ ជាមួយនឹងកម្លាំងខ្លាំង បើកបរប្រកបដោយភាពរីករាយ និងមានសុវត្ថិភាពបំផុត។
រថយន្តរបស់យើងត្រូវបានរចនាឡើងជាមួយនឹងបច្ចេកវិទ្យាទៅតាមឧស្សាហកម្មផលិតយន្ដហោះ ដែលភាគច្រើន (រហូតដល់ទៅ 80%) នៃការរចនាសម្ព័ន្ធតួរថយន្ត គឺធ្វើឡើងពីអាលុយមីញ៉ូមសុទ្ធដែលមានអានុភាពខ្លាំង, និងរឹង ដូច្នេះហើយវាមានសុវត្ថិភាពខ្ពស់ សម្រាប់អ្នកប្រើប្រាស់ទាំងអស់។
រថយន្តរបស់យើងត្រូវបានពិភពលោកទទួលស្គាល់ និងប្រមូលបានពានរង្វាន់ពិភពលោកក្នុងតំបន់ជាច្រើនដូចជាពានរង្វាន់លំដាប់ផ្កាយ 5 សម្រាប់រថយន្ដ Jaguar XE ខាងផ្នែកសុវត្ថិភាពខ្ពស់, ពានរង្វាន់ពិភពលោកនៃរថយន្តប្រចាំឆ្នាំ និងការរចនារថយន្តឆ្នាំ 2017 សម្រាប់រថយន្ដ Jaguar F-PACE របស់យើង, ពានរង្វាន់នៃដើមកំណើតនិមិត្ដសញ្ញារបស់រថយន្ត Land Rover និង Range Rover ជារថយន្ដគំរូរបស់ពិភពលោកនៃរថយន្តប្រភេទ SUV បែបប្រណីត។
ក្នុងនាមជាអ្នកគ្រប់គ្រង និងបុគ្គលិកទាំងអស់ យើងខ្ញុំសូមជូនដំណឹងដល់សាធារណជនរបស់យើងថា មានតែរថយន្ត Jaguar Land Rover របស់ក្រុមហ៊ុន RMA Cambodia ប៉ុណ្ណោះដែលជាផលិតផលពិតប្រាកដ 100% ដែលត្រូវបានរចនា និងផលិតឡើងបំពេញតាមលក្ខខណ្ឌនៃទីផ្សារប្រទេសកម្ពុជាដូចជាអាកាសធាតុ និងគុណភាពប្រេង ជាដើម។ រថយន្តរបស់យើង ត្រូវបាននាំចូលផ្ដាច់មុខ ក្នុងការធានា និងគម្រោងផ្ដល់សេវាកម្មពីឧស្សាហករ ដែលផ្តល់ឱ្យអតិថិជនរបស់យើងនូវទំនុកចិត្ដខ្ពស់បំផុត។
ផលិតផល និងសេវាកម្មទាំងអស់ត្រូវបានបញ្ជូនទៅបម្រើលោកអ្នកជាមួយនឹងជំនាញឯកទេសខ្ពស់បំផុត ដែលបានបណ្តុះបណ្តាល និងបានបញ្ជាក់ដោយអ្នកជំនាញមកពីរោងចក្រដើមនៃចក្រភពអង់គ្លេស។ យើងសូមសន្យាថានឹងបម្រើអតិថិជនរបស់យើង ឥតឈប់ឈរដោយគ្មានការកក់ទុកមុនឡើយ៕
May 27, 2017
ឡេង ណាវ៉ាត់ត្រា ផលិតចម្រៀងសំណព្វចិត្តមួយបទតម្លៃ 7ពាន់ដុល្លារ
បន្ទាប់ពីលោក ឡេង ណាវ៉ាត់ត្រា ជាចាងហ្វាងផលិតកម្ម Galaxy បានសម្រេចចាប់ដៃគូជាមួយលោក ម៉ារ៉ា ប៊ុណ្ណា ច្រៀងបទរួមគ្នាមួយដែលមានចំណងជើងថា “ឲ្យតែគិត ចេះតែចង់យំ” ដែលជាស្នាដៃដំបូងរបស់ពួកគេ ហើយឃើញថា បទនេះកំពុងតែមានភាពទាក់ទាញក្នុងទីផ្សារ និងទទួលបានការចាប់អារម្មណ៍ខ្លាំង។
នៅក្នុងនោះលោក ឡេង ណាវ៉ាត់ត្រា បានរំលេចចេញនូវសារអំពីបទចម្រៀងនោះថា ”បន្ទាប់ពីទទួលបានការចាប់អារម្មណ៍ ខ្ញុំចង់និយាយថា រឿងអតីតកាលជារឿងដែលដិតដាមក្នុងជីវិត ជារឿងដែលសោកស្រណោះ និងស្រងេះស្រងោចបំផុតនៅពេលយើងបរាជ័យក្នុងរឿងណាមួយ ពេលនឹកឃើញរឿងអតីតកាល តើបងប្អូនមានចិត្ត គិតចង់យំដែរឬទេ?”។
លោកណាវ៉ាត់ត្រា បានប្រាប់ថា បទ “អោយតែគិត ចេះតែចង់យំ” បង្ហាញឱ្យឃើញនូវរឿងរ៉ាវអតីតកាលរបស់ខ្លួនដែលធ្លាប់ទទួលរងការឈឺចាប់ដោយសាររឿងស្នេហា ទើបធ្វើឱ្យលោកគិតថា អត្ថន័យក្នុងបទចម្រៀងដែលលោកផលិតវាឡើងមកនេះនឹងអាចទាក់ទាញដល់អារម្មណ៍មហាជន ពិសេសយុវវ័យឱ្យលង់លក់ក្នុងខ្លឹមសារទាំងនោះ។
លោកបញ្ជាក់ថា៖”មូលហេតុដែលខ្ញុំផលិតបទនេះឡើង គឺដើម្បីទុកលួងលោមខ្លួនឯង ព្រោះមនុស្សយើងមិនមែនចេះតែមានថ្ងៃសប្បាយចិត្ដរហូតនោះទេ វាគង់តែមានថ្ងៃខ្លះដែលត្រូវពិបាកចិត្ដដែរ ហើយពេលដែលពិបាកចិត្ដខ្ញុំតែងតែមានអារម្មណ៍ស្រងះស្រងោចនឹកឃើញរឿងវែងឆ្ងាយក្នុងជីវិត”។
លោកបន្ដថា នេះជាស្នាដៃដំបូងដែលលោក និងតារាចម្រៀងម៉ារ៉ា ប៊ុណ្ណា បានបង្កើតវាឡើងក្រោមការនិពន្ធទំនុកច្រៀងដោយលោកផ្ទាល់ និងនិពន្ធទំនុកភ្លេងដោយលោក ណាំ ប៊ុណ្ណារ័ត្ន។ ពាក់ព័ន្ធនឹងបទចម្រៀងនេះលោកនឹងចេញជាខារ៉ាអូខេនៅចុងខែមិថុនាខាងមុខ។
ពាក់ព័ន្ធនឹងការចំណាយថវិកាលើការថតខារ៉ាអូខេក្នុងចម្រៀងមួយបទនេះ លោកបានចំណាយប្រាក់ 7ពាន់ដុល្លារក្នុងការផលិត។ លោកណាវ៉ាត់ត្រាបានបញ្ជាក់ថា៖”ការផលិតខារ៉ាអូខេបទនេះ ខ្ញុំអត់ទទួលបានផលចំណេញអ្វីទេ ប៉ុន្ដែខ្ញុំត្រូវតែចំណាយវាដើម្បីធ្វើការប្រកួតប្រជែងជាមួយប្រទេសជិតខាង។ ខ្ញុំអត់ចង់ផលិតយកតែបរិមាណទេ តែខ្ញុំចង់បានគុណភាព។ ម្យ៉ាងវាជាបទសំណព្វចិត្ដរបស់ខ្ញុំផង”។
គួរបញ្ជាក់ថា ចម្រៀងមួយបទនេះបានជ្រើសរើសយកតារាល្បីៗមកសម្ដែង ដែលមានដូចជា លោកប៉ែន ចំរ៉ុង កញ្ញា សាធ រស្មី លោកសេវិន ហ្វីលីព ជាដើម ព្រមទាំងថតដោយកាមេរ៉ា 4k ទៀតផង៕
May 26, 2017
Thailand Products Expo 2017 ប្រព្រឹត្តឡើងរយៈពេល 4 ថ្ងៃ
ពិព័រណ៌ Thailand Products Expo 2017 បានចាប់ផ្ដើមបើកជាផ្លូវការហើយកាលពីល្ងាចថ្ងៃម្សិលមិញ ដោយបានរៀបចំធ្វើឡើងនៅមជ្ឈមណ្ឌលកោះពេជ្ររយៈពេល 4 ថ្ងៃ ចាប់ពីថ្ងៃទី25 – 28 ខែឧសភា ឆ្នាំ 2017។ កម្មវិធីនេះមានការចូលរួមពីក្រុមហ៊ុនចំនួន200 និងមានស្ដង់លក់ទំនិញសរុបចំនួន250ស្ដង់ដែលមានដាក់តាំងបង្ហាញ និងលក់នូវទំនិញជាច្រើន ដូចជា ម្ហូបអាហារ ភេសជ្ជៈ សម្លៀកបំពាក់ គ្រឿងអគ្គិសនី គ្រឿងសម្អាង វត្ថុអនុស្សាវរីយ៍ សម្ភារប្រើប្រាស់ក្នុងផ្ទះ និងទំនិញOTOP ដែលសុទ្ធសឹងតែជាទំនិញមានគុណភាពល្អមកពីប្រទេសថៃទាំងអស់។
ឯកឧត្ដម ភិប៊ូន ហាត់ថៈកិច្ចកុស៊ុន អភិបាលខេត្ដផេតចៈប៊ូន បានលើកឡើងថា កម្មវិធីនេះបានបង្ហាញឱ្យឃើញពីអំពីភាពរីកចម្រើននៃការធ្វើពាណិជ្ជកម្មទ្វេភាគីរវាងកម្ពុជា និងថៃ។ ជាមួយគ្នានេះដែរ លោកជឿជាក់ថាប្រជាជនកម្ពុជានឹងអញ្ជើញមកចូលរួមទិញទំនិញដ៏មានគុណភាពល្អ ម៉ាកល្បីៗមកពីប្រទេសថៃយ៉ាងសប្បាយរីករាយមិនខាន៕

May 26, 2017
ក្រសួងដាក់ឱ្យដំណើរការជាផ្លូវការនូវប្រព័ន្ធស្នើសុំចុះបញ្ជីម៉ាកតាមប្រព័ន្ធអេឡិចត្រូនិក
នាយកដ្ឋានកម្មសិទ្ធិបញ្ញានៃក្រសួងពាណិជ្ជកម្មបានសម្ពោធដាក់ដំណើរការជាផ្លូវការនូវ “ប្រព័ន្ធស្នើសុំចុះបញ្ជីម៉ាកតាមអេឡិចត្រូនិក” ដើម្បីជួយសម្រួលដល់វិស័យឯកជន និងសាធារណជនក្នុងការស្នើសុំចុះបញ្ជី និងទទួលបានសេវាផ្សេងៗពាក់ព័ន្ធនឹងម៉ាកពាណិជ្ជកម្ម។
ពិធីសម្ពោធត្រូវបានរៀបចំឡើងកាលពីថ្ងៃទី25 ខែឧសភានេះ ក្រោមអធិបតីភាពឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងមានការចូលរួមពីតំណាងអង្គការកម្មសិទិ្ធបញ្ញាពិភពលោក (WIPO) តំណាងការិយាល័យប្រកាសនីយបត្រតក្កកម្មជប៉ុន មន្ត្រីអន្តរក្រសួងដែលជាសមាជិក-សមាជិកា នៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងតំណាងវិស័យឯកជន និងសាធារណជនប្រមាណ 200នាក់។
ឯកឧត្តម ប៉ាន សូរស័ក្តិ បានគូសបញ្ជាក់អំពីកិច្ចខំប្រឹងប្រែងរបស់ក្រសួងពាណិជ្ជកម្ម និងការគាំទ្របច្ចេកទេសផ្សេងៗរបស់អង្គការ WIPO ព្រមទាំងដៃគូអភិវឌ្ឍន៍នានាក្នុងការជំរុញ និងលើកកម្ពស់ការអនុវត្តកម្មសិទ្ធិបញ្ញានៅក្នុងប្រទេសកម្ពុជា ជាក់ស្តែងប្រព័ន្ធស្នើសុំចុះបញ្ជីម៉ាកតាមអេឡិចត្រូនិកដែលបានដាក់ឲ្យប្រើប្រាស់ថ្ងៃនេះ គឺជាសមិទ្ធផលថ្មីមួយទៀតនៃកិច្ចសហការរវាងក្រសួងពាណិជ្ជកម្ម និងអង្គការ WIPO។
ឯកឧត្តមបានគូសបញ្ជាក់ថា «ប្រព័ន្ធស្នើសុំចុះបញ្ជីម៉ាកតាមអេឡិចត្រូនិកនេះ គឺជាសក្ខីភាពមួយដែលបង្ហាញពីការប្តេជ្ញាចិត្តរបស់ក្រសួង ក្នុងការលើកកម្ពស់សេវាសាធារណៈ ពិសេសចូលរួមអនុវត្តអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណ ដំណាក់កាលទីបីរបស់រាជរដ្ឋាភិបាលកម្ពុជា»។
ប្រព័ន្ធថ្មីនេះនឹងផ្តល់ភាពងាយស្រួលជាងមុន ដោយអាចជួយកាត់បន្ថយពេលវេលា និងថវិកាចំណាយក្នុងការស្វែងរកលទ្ធភាពចុះបញ្ជីម៉ាក និងការស្នើសុំសេវាផ្សេងៗពាក់ព័ន្ធនឹងម៉ាកតាមប្រព័ន្ធអេឡិចត្រូនិក ព្រមទាំងការគ្រប់គ្រងប្រព័ន្ធចុះបញ្ជីម៉ាក ប្រកបដោយប្រសិទ្ធភាព។
គួរបញ្ជាក់ថា នៅលើពិភពលោក កម្មសិទ្ធិបញ្ញាត្រូវបានទទួលស្គាល់ថា គឺជាកម្លាំងចលករដ៏សំខាន់ក្នុងការអភិវឌ្ឍកំណើនសេដ្ឋកិច្ចនៅក្នុងយុគសម័យសកលភាវូបនីយកម្ម និងព័ត៌មានវិទ្យា។ ដើម្បីជំរុញការអភិវឌ្ឍវិស័យកម្មសិទ្ធិបញ្ញា និងសេដ្ឋកិច្ចជាតិប្រកបដោយនិរន្តរភាព រាជរដ្ឋាភិបាលកម្ពុជាដែលមានក្រសួងពាណិជ្ជកម្មជាសេនាធិការបានប្រឹងប្រែងចូលជាសមាជិកនៃអង្គការ WIPO និងបានចុះកិច្ចព្រមព្រៀង ក៏ដូចជាសន្ធិសញ្ញាអន្តរជាតិសំខាន់ៗមួយចំនួនទៀតដែរ។
លើសពីនេះ ក្រសួងបានខិតខំតាក់តែងលិខិតបទដ្ឋានគតិយុត្តិ និងជំរុញឲ្យមានការអនុម័តច្បាប់ស្តីពីកម្មសិទ្ធិបញ្ញា និងច្បាប់ពាក់ព័ន្ធ ព្រមទាំងធ្វើទំនើបកម្មប្រព័ន្ធចុះបញ្ជី និងគ្រប់គ្រងម៉ាកពាណិជ្ជកម្ម ក្រោមការជួយជ្រោមជ្រែងពីដៃគូអង្គការអន្តរជាតិនានា សំដៅការពារអត្ថប្រយោជន៍វិស័យឯកជន និងសាធារណជនជាតិ ជាពិសេសពង្រឹងការអនុវត្តច្បាប់ និងទប់ស្កាត់ការរំលោភបំពានកម្មសិទិ្ធបញ្ញានៅក្នុងប្រទេស។
តាមរយៈប្រព័ន្ធស្នើសុំចុះបញ្ជីម៉ាកតាមអេឡិចត្រូនិកដែលដាក់ឲ្យដំណើរការនេះ សាធារណជនអាចដាក់ពាក្យស្នើសុំចុះបញ្ជីម៉ាក និងសេវាពាក់ព័ន្ធនឹងម៉ាកពាណិជ្ជកម្មនេះ ដែលនឹងធ្វើឡើងនៅគ្រប់ទីកន្លែង ដោយគ្រាន់តែចូលទៅកាន់គេហទំព័រ www.efiling.cambodia.gov.kh របស់នាយកដ្ឋានកម្មសិទ្ធិបញ្ញានៃក្រសួងពាណិជ្ជកម្មប៉ុណ្ណោះ៕
May 26, 2017
ធនាគារអេស៊ីលីដា ប្រកាសប្តូរប័ណ្ណថ្មីដែលមានសុវត្ថិភាពជាងមុន
ធនាគារអេស៊ីលីដា ភីអិលស៊ី ដែលជាធនាគារពាណិជ្ជនាំមុខគេនៅកម្ពុជា បានប្រកាសនៅថ្ងៃទី26 ខែឧសភានេះ ដោយអំពាវនាវដល់អតិថិជនរបស់ខ្លួន ដែលមានប័ណ្ណអេធីអឹម (ATM) ចាស់ប្រភេទ Magnetic stripe card សូមមកផ្លាស់ប្តូរទៅជាកាតថ្មីហៅថា EMV Chip Card ដែលកាន់តែមានសុវត្ថិភាពខ្លាំងជាងមុន។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី មានប្រសាសន៍ថា នេះគឺជាការរីកចម្រើនយ៉ាងឆាប់រហ័សមួយនៃប្រព័ន្ធព័ត៌មានវិទ្យា និងធានាឱ្យមានសុវត្ថិភាពខ្ពស់ ការពារហានិភ័យក្នុងការក្លែងបន្លំ និងអាចប្រើប្រាស់មុខងារបន្ថែមទៀតនាពេលអនាគត និងអាចតភ្ជាប់ជាមួយពិភពលោកបាន។
លោកមានប្រសាសន៍បន្ថែមថា បច្ចុប្បន្នធនាគារ អេស៊ីលីដា មានប័ណ្ណអេធីអឹមចាស់ប្រភេទ Magnetic Stripe ប្រហែល 800.000ប័ណ្ណ ដែលនឹងត្រូវជំនួសថ្មីដោយប័ណ្ណអេធីអឹម EMV Chip។ អតិថិជនទាំងអស់អាចទំនាក់ទំនងមកការិយាល័យធនាគារអេស៊ីលីដា ដែលនៅជិតលោកអ្នកបំផុតដើម្បីប្តូរយកប័ណ្ណអេធីអឹម EMV Chip ចាប់ពីពេលនេះតទៅ។
គួរបញ្ជាក់ថា ប័ណ្ណអេធីអឹម EMV Chip ថ្មីនេះអាចប្រើប្រាស់បានជាមួយនឹងម៉ាស៊ីនឆូតកាតប្រហែល 4.000 នៅតាមទីតាំងដែលមានស្លាកសញ្ញា ACLEDA Bank Gold Dot ដូចជាក្នុងផ្សារទំនើប សាកលវិទ្យាល័យ សណ្ឋាគារ ស្ថាប័ន ក្រុមហ៊ុន សណ្ឋាគារផ្សេងៗជាច្រើនទៀត ដើម្បីធ្វើប្រតិបត្តិការទិញផលិតផល សេវាកម្ម ដាក់ប្រាក់ ដកប្រាក់ ទូទាត់វិក្កយបត្រ បញ្ចូលទឹកប្រាក់តាមទូរសព្ទដៃ ឬពិនិត្យមើលសមតុល្យគណនី ជាដើម។ល៕
May 26, 2017
ទីបំផុតលោក Mark Zuckerberg ទទួលបានសញ្ញាបត្រហើយ បន្ទាប់ពីបោះបង់ការសិក្សាជាង 12ឆ្នាំ
ទីបំផុតស្ថាបនិក Facebook លោក Mark Zuckerberg បានទទួលសញ្ញាបត្រពីសាកលវិទ្យាល័យ Harvard ដែលលោកបានបោះបង់ចោលការសិក្សាកាលពីជាង 12ឆ្នាំមុន រហូតក្លាយជាមហាសេដ្ឋីបន្ទាប់ពីបានបង្កើតក្រុមហ៊ុនបច្ចេកវិទ្យាមួយ នេះបើយោងតាមគេហទំព័រ Telegrapth។
លោក Mark Zuckerberg បានបង្កើត Facebook នៅក្នុងបន្ទប់អន្តេវាសិកដ្ឋាននៅឆ្នាំ 2004 ហើយភាពជោគជ័យរបស់លោកក៏ចាប់ផ្តើមចេញពី Harvard ផងដែរ។ ដំបូងឡើយ Facebook ត្រូវបានដាក់ឱ្យប្រើប្រាស់តែក្នុងសាកលវិទ្យាល័យ Harvard តែប៉ុណ្ណោះ បន្ទាប់មកក៏ពង្រីកទៅកាន់សាកលវិទ្យាល័យ Ivy League University មុននឹងក្លាយជាបណ្តាញសង្គមដ៏មានប្រជាប្រិយភាពបំផុតក្នុងពិភពលោក។
រយៈពេល ១២ឆ្នាំបន្ទាប់ពីបានចាកចេញពីសាកលវិទ្យាល័យ Harvard ដើម្បីធ្វើការងារពេញម៉ោងនៅក្រុមហ៊ុន Facebook លោក Mark Zuckerberg មិនដែលបោះបង់ចោលគោលបំណងរបស់លោកក្នុងការត្រឡប់មកទទួលយកសញ្ញាបត្ររបស់លោកនោះឡើយ។ នៅពេលដែលលោកបានសិក្សានៅសាកលវិទ្យាល័យ Harvard ក្រុមហ៊ុន Facebook បានផ្លាស់ប្តូរទីតាំងនៃការិយាល័យកណ្តាលរបស់ខ្លួនទៅកាន់រដ្ឋកាលីហ្វ័រនីញ៉ា តែ Zuckerberg នៅតែបន្តព្យាយាមចុះឈ្មោះចូលរៀន រហូតដល់ពេលដែលលោកត្រូវបង្ខំចិត្តចាកចេញពីសាលាតែម្តងនៅខែវិច្ឆិកា ឆ្នាំ2015។
ការទទួលសញ្ញាបត្ររបស់លោក Mark Zuckerberg នៅពេលនេះគឺហាក់មានរយៈពេលលឿនជាងលោក Bill Gates ដែលបានបោះបង់ចោលការសិក្សានៅឆ្នាំ 1975 ហើយរង់ចាំអស់រយៈពេលដល់ទៅ 32ឆ្នាំ ទម្រាំទទួលបានសញ្ញាបត្រពីសាកលវិទ្យាល័យមួយនេះ បើគិតចាប់ពីថ្ងៃដែលលោកចាកចេញពី Harvard នៅឆ្នាំ 1975 ហើយទទួលបានសញ្ញាបត្រនៅឆ្នាំ 2007។
នៅក្នុងកម្មវិធីទទួលសញ្ញាបត្រនេះ លោក Mark Zuckerberg ក៏ត្រូវបានអញ្ជើញឱ្យឡើងថ្លែងសុន្ទរកថាដូចដែលមានខ្លឹមសារនៅក្នុងខ្សែវីដេអូខាងក្រោមនេះ ៖
May 26, 2017