Author: វល័ក្ខ

បើទោះជាមានការប្រឹងប្រែងអភិវឌ្ឍនូវហេដ្ឋារចនាសម្ព័ន្ធក្នុងរាជធានីភ្នំពេញជាបន្ដបន្ទាប់យ៉ាងណាក៏ដោយ ក៏ការកកស្ទះតាមដងផ្លូវគ្រាដែលសាធារណជនធ្វើដំណើរនៅតែជាប្រធានបទដ៏ក្ដៅគគុក ដែលគេកំពុងតែចាប់អារម្មណ៍ ក្នុងនោះក៏មានការលើកឡើងថា តើនៅពេលណាទើបរាជធានីភ្នំពេញអាចរំដោះខ្លួនចេញរួចពីការកកស្ទះទាំងនោះបាន?

ឯកឧត្ដមប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បានលើកឡើង ដោយទទួលស្គាល់ថាបើទោះជារាជធានីភ្នំពេញបច្ចុប្បន្នមានការអភិវឌ្ឍយ៉ាងខ្លាំងយ៉ាងណាក៏ដោយ ក៏បញ្ហាកកស្ទះនៅតែជាប្រធានបទក្ដៅដដែល។ ឯកឧត្ដមបន្ដថា ជាក់ស្ដែងបើទោះជាមានកិច្ចការជាច្រើនត្រូវបានធ្វើឱ្យកាន់តែល្អប្រសើរឡើងដូចអ្វីយើងបានឃើញក៏ពិតមែន តែរាជធានីភ្នំពេញក៏នៅតែត្រូវការការចូលរួមពីវិស័យឯកជន ស្ថាប័នពាក់ព័ន្ធ និងដៃគូអភិវឌ្ឍន៍បន្ថែមទៀតដែរ។

គួរបញ្ជាក់ថា កាលពីអតីតកាលទីក្រុងភ្នំពេញមានការរៀបចំប្លង់មេសម្រាប់ការរស់នៅរបស់ប្រជាជនក្នុងរង្វង់តែពី 30-50 ម៉ឺននាក់ រីឯហេដ្ឋារចនាសម្ព័ន្ធរៀបចំសម្រាប់បម្រើឱ្យយានយន្ដប្រមាណតែ 1ម៉ឺនគ្រឿងប៉ុណ្ណោះ។ បច្ចុប្បន្នភ្នំពេញមានមនុស្សរស់នៅក្នុងរង្វង់៣លាននាក់ មានយានយន្ដ 47 ម៉ឺនគ្រឿង និងម៉ូតូជិត2លានគ្រឿង។ ដោយឡែកផ្លូវនៅក្នុងរាជធានីភ្នំពេញមានប្រមាណតែជាង1ពាន់គីឡូម៉ែត្រ(1800គីឡូម៉ែត្រ)តែប៉ុណ្ណោះ ឥឡូវចំងាយផ្លូវមាន2ពាន់គីឡូម៉ែត្រ និងបានពង្រីកផ្លូវធំជាងមុន ប៉ុន្ដែទីក្រុងនេះនៅតែមានបញ្ហាប្រឈមចំពោះការកកស្ទះដដែល។

អភិបាលនៃគណៈអភិបាលរាជធានីភ្នំពេញ បានបញ្ជាក់ថា កន្លងមកសម្ដេចអគ្គមហាសេនាបតីតេជោហ៊ុន សែន ធ្លាប់បានលើកឡើងថា ៖ «ទីក្រុងយើងមានបញ្ហាស្ទះបី ស្ទះឡាន ស្ទះទឹក និងស្ទះសំរាម»។ ស្ទះបីនៅតែជាប្រធានបទក្ដៅសម្រាប់ទីក្រុងភ្នំពេញដែលសាលារាជធានីភ្នំពេញកំពុងតែយកចិត្ដទុកដាក់ខ្លាំងបំផុត «យើងបានដោះស្រាយពីមួយឆ្នាំទៅមួយឆ្នាំកាន់តែប្រសើរឡើង ប៉ុន្ដែនៅមិនទាន់អាចឆ្លើយតបបានទាំងស្រុងថា ទីក្រុងមួយនេះនឹងរំដោះខ្លួនចេញផុតពីបញ្ហាស្ទះបីនេះឬយ៉ាងណានោះទេ»។

ទោះជាយ៉ាងណាឯកឧត្ដមលើកឡើងថា៖ ”យើងនឹងខិតខំដើម្បីធ្វើឱ្យទីក្រុងរបស់យើងមួយនេះមានការប្រែប្រួលបន្ថែមទៀត យើងនឹងធ្វើឱ្យទីក្រុងយើងដោះស្រាយបាននូវបញ្ហាប្រឈមធំៗថែមទៀតដើម្បីធ្វើឱ្យការរស់នៅរបស់ប្រជាជនកាន់តែមានភាពល្អប្រសើរឡើង តាមរយៈការមានផែនការសកម្មភាពច្បាស់លាស់ រួមជាមួយការចូលរួមអំពីស្ថាប័នពាក់ព័ន្ធ និងដៃគូអភិវឌ្ឍន៍នានា យើងពិតជាអាចឆ្លងផុតបញ្ហានេះបាន”។

តាមការប៉ាន់ស្មានរបស់វិទ្យាស្ថានសុវត្ថិភាពចរាចរណ៍ បញ្ជាក់ថា ការកកស្ទះចរាចរណ៍បានធ្វើឱ្យពលរដ្ឋកម្ពុជាបាត់បង់ថវិកាផ្ទាល់ខ្លួនចំនួន 6 លានដុល្លារក្នុងមួយឆ្នាំ។ នាយកវិទ្យាស្ថានសុវត្ថិភាពចរាចរណ៍ លោក អ៊ា ចរិយា មានប្រសាសន៍ថា ការកកស្ទះចរាចរណ៍នេះ ក៏អាចបង្កឱ្យប៉ះពាល់ដល់បរិស្ថាន មានន័យថា ពេលយើងបញ្ឆេះម៉ាស៊ីនយានយន្តចោល វាធ្វើឱ្យឡើងកម្តៅ និងជាពិសេសប៉ះពាល់យ៉ាងខ្លាំងជាមួយនឹងសុខភាព និងបរិស្ថាន៕

ខ្សែភាពយន្ដថៃល្បីៗប្រចាំឆ្នាំ2017ចំនួន 5 រឿងនឹងត្រូវដាក់បញ្ចាំងជូនទស្សនាដោយឥតគិតថ្លៃ ចាប់ពីថ្ងៃទី 7 – 11 ខែមិថុនា ឆ្នាំ2017 នៅរោងភាពយន្ដទំនើប Cineplex by Cell Card ស្ថិតក្នុងផ្សារទំនើបអ៊ីអនម៉ល ។

ដើម្បីជាការអបអរសាទរក្នុងពិធីពិព័រណ៌ភាពយន្ដថៃ (Thai Film Festival) ដែលរៀបចំឡើងដោយស្ថានតំណាងពាណិជ្ជកម្មនៃស្ថានឯកអគ្គរាជទូតថៃ នឹងនាំមកនូវខ្សែភាពយន្ដថៃល្បីៗចំនួន 5 រឿងមកចាក់បញ្ចាំងជូនទស្សនា។

លោក ជីរ៉ាវុឍ សុវណ្ណអាត អគ្គទីប្រឹក្សាពាណិជ្ជកម្មប្រចាំស្ថានទូតថៃ បានលើកឡើងថា កម្មវិធីនេះបង្កើតឡើងក្នុងគោលបំណងបើកឱកាសដល់ក្រុមហ៊ុនពាក់ព័ន្ធក្នុងវិស័យឧស្សាហកម្មភាពយន្ដរបស់ប្រទេសថៃ និងកម្ពុជា ឱ្យមានការជួបជជែកពិភាក្សាគ្នាលើកិច្ចការនេះ ដើម្បីចែករំលែកបទពិសោធរវាងគ្នា និងបង្កើនកិច្ចសហការធ្វើយ៉ាងណាឱ្យវិស័យភាពយន្ដរបស់ប្រទេសទាំងពីរមានភាពរីកចម្រើនបន្ថែមទៀត។

ភាពយន្ដដែលនឹងត្រូវដាក់បញ្ចាំងមានចំណងជើងថា៖ ”លោកយាយអាយុ20ឆ្នាំ” “តាមប្រមាញ់ខ្មោច” ”ចំនៀន វិវៀន តួម៉ន” “ស្នេហាយើង” និងរឿង ”ព្រះតេជគុណជែស4G”។ សូមបញ្ជាក់ថា ទស្សនិកជនអាចទៅទទួលយកសំបុត្រFree ក្នុងការចូលទស្សនារឿងនីមួយៗនៅបញ្ជរមុខរោងភាពយន្ត Cineplex by Cell Card។

អគ្គទីប្រឹក្សាពាណិជ្ជកម្មប្រចាំស្ថានទូតថៃ បានបញ្ជាក់ថា កម្មវិធីពិព័រណ៌ភាពយន្តនេះធ្លាប់បានរៀបចំឡើងចំនួន 3 លើករួចមកហើយ។ នេះគឺជាលើកទី 4 ដែលស្ថានតំណាងពាណិជ្ជកម្មនៃស្ថានឯកអគ្គរាជទូតថៃ បានរៀបចំឡើង ដោយលោកសង្ឃឹមថានឹងមានការគាំទ្រខ្លាំងពីសំណាក់ទស្សនិកជនដែលនិយមទស្សនាភាពយន្ដ។ ពិសេសសង្ឃឹមថា តាមរយៈកម្មវិធីនេះនឹងបង្កើតឱ្យមានកិច្ចសហការកាន់តែមានភាពស្អិតល្មួតជាងមុនរវាងពាណិជ្ជករភាពយន្ដថៃ និងកម្ពុជា។

គួររំឭកដែរថា កាលពីឆ្នាំ2016ខ្សែភាពយន្ដថៃត្រូវបានយកមកចាក់បញ្ចាំងនៅតាមរោងភាពយន្ដនៅក្នុងប្រទេសកម្ពុជាមានចំនួន10 រឿង ហើយនាពាក់កណ្តាលដើមឆ្នាំ2017នេះ ខ្សែភាពយន្ដថៃដែលបានចាក់បញ្ចាំងនៅតាមរោងភាពយន្ដមានចំនួន 5 រឿងហើយ៕

រឿង តាមប្រមាញ់ខ្មោច

រឿង លោកយាយអាយុ ២០ឆ្នាំ

រឿង ចំនៀក វីវៀន តូម៉ន

រឿង ស្នេហាយើង

រឿង ព្រះតេជគុណជេស 4G

កសិករប្រកបរបរកសិកម្មដាំដំណាំកៅស៊ូ បានសម្តែងក្តីរីករាយដោយសារតម្លៃជ័រកៅស៊ូក្នុងឆ្នាំនេះបានងើបឡើងវិញ បន្ទាប់ធ្លាក់ចុះអស់រយៈពេលជិត10ឆ្នាំជាបន្តបន្ទាប់ រហូតធ្វើឱ្យកសិករ​ដាំដើមកៅស៊ូជាលក្ខណៈគ្រួសារមួយចំនួនកាប់ដើមកៅស៊ូចោល ហើយងាកទៅដាំដំណាំផ្សេងវិញ។

កសិករ វេន ពិសិដ្ឋ ដែលប្រកបរបរដាំដំណាំកៅស៊ូជាលក្ខណៈគ្រួសារនៅខេត្តរតនគីរី បានសម្តែងក្តីរីករាយ ដោយផ្តល់បទសម្ភាសក្នុងទឹកមុខញញឹមថា តម្លៃកៅស៊ូក្នុងឆ្នាំនេះមួយគីឡូ អាចលក់បានជាមធ្យម 3500រៀល ខណៈកាលពីឆ្នាំទៅក៏ដូចជាប៉ុន្មានឆ្នាំកន្លងមកនេះតម្លៃកៅស៊ូធ្លាក់ចុះយ៉ាងខ្លាំង មួយគីឡូតម្លៃចន្លោះតែពី 1800-2000 រៀលប៉ុណ្ណោះ។ លោកមានប្រសាសន៍ដូច្នេះថា «កសិករនៅក្នុងខេត្តរតនគីរីមួយចំនួន អស់សង្ឃឹមអំពីតម្លៃកៅស៊ូធ្លាក់ចុះនេះ ហើយអ្នកខ្លះគាត់បានកាប់ដើមកៅស៊ូចោលទៅដាំស្វាយចន្ទី ឬដាំម្រេចវិញក៏មានដែរ ហើយឆ្នាំនេះទៀតម្រេចក៏ធ្លាក់ថ្លៃដែរ កាលឆ្នាំមុនមួយគីឡូជាង40.000រៀល ឥឡូវសល់តែ14.000រៀលទេក្នុងមួយគីឡូក្រាម»។ លោកថា សម្រាប់គ្រួសារលោកមានដីមិនច្រើនទេ ប្រមាណតែ 10ហិកតាប៉ុណ្ណោះ ព្រោះដាំជាលក្ខណៈគ្រួសារ កាលមុនចៀរជ័រលក់ស្ទើរមិនរួចថ្លៃ ជួលកម្លាំងពលកម្មផង ប៉ុន្តែឥឡូវសេដ្ឋកិច្ចគ្រួសារលោកបានប្រសើរឡើងវិញ ដោយសារតម្លៃកៅស៊ូកើនឡើងនេះ។

លោកបន្តថា ការដាំដំណាំកៅស៊ូក៏គេត្រូវចំណាយទុនខ្ពស់គួសមដែរ ដោយក្នុងមួយហិកតាចំ​ណាយ​អស់ប្រមាណពី 6000ទៅ7000ដុល្លារ  គិតចាប់ពីពេលដាំរហូតដល់ទទួលបានផល ក្នុងអំឡុងពេល5ទៅ6ឆ្នាំ ហើយនៅពេលឱ្យផលវាផ្តល់ចំណូលក្នុងមួយឆ្នាំប្រហែលជាង 2000ដុល្លារក្នុងមួយឆ្នាំ ដែលគេអាចប្រមូលផលពីវាបានប្រមាណជាង 30ឆ្នាំឯណោះទើបដើមវាចាស់លែងផ្តល់ផល។

ដំណាំកៅស៊ូមិនសូវរើសដីទេ ដីក្រហម ដីខ្មៅ និងដីស អាចដាំបានដូចគ្នា គ្រាន់តែឱ្យផលខុសគ្នាពោលគឺដីក្រហមឲ្យផលបានល្អជាងគេ។ សព្វថ្ងៃនេះកសិករ និយមដាំកៅស៊ូច្រើនប្រភេទដូចជាពូជប្រភេទ PB 260 .IBCA 130 .IACA 230 .PA 107 .BBIM 600 .PB314 ជាពូជដែលឱ្យជ័រច្រើន ។ យោងតាមរបាយការណ៏ក្រសួងកសិកម្មរុក្ខាប្រមាញ់និងនេសាទ ឱ្យដឹងថា កម្ពុជាមានផ្ទៃដីដាំកៅស៊ូសរុបប្រមាណជា 328771 ហិកតា៕

គ្រឹះស្ថានអង្គរ ដែលគ្រប់គ្រងលើការលក់សំបុត្រចូលទស្សនាប្រាសាទអង្គរវត្ត បានចេញផ្សាយរបាយការណ៍ថ្មីមួយបង្ហាញថា ក្នុងរយៈពេល 5ខែ គិតចាប់ពីខែមករា ដល់ឧសភា ឆ្នាំ 2017 គ្រឹះស្ថាននេះ បានលក់ប័ណ្ណចូលទស្សនាប្រាសាទអង្គរវត្តជូនភ្ញៀវទេសចរបរទេសបានចំនួន 1092377សន្លឹក ដែលសរុបជាទឹកប្រាក់បានចំនួនជិត 46លានដុល្លារ ហើយបើធៀបនឹងរយៈពេលដូចគ្នានេះក្នុងឆ្នាំ 2016 គឺមានការកើនឡើងប្រមាណជាង 12.30%។

របាយការណ៍ខាងលើបង្ហាញថា តាមរយៈការលក់សំបុត្រចូលទស្សនាប្រាសាទអង្គរវត្ត បានជាង 1លានសន្លឹកនេះគ្រឹះស្ថានអង្គររកចំណូលបាន 45.913602 ដុល្លារសហរដ្ឋអាមរិក។

សម្រាប់ប័ណ្ណចូលទស្សនាតំបន់ប្រាសាទអង្គរត្រូវបានបែងចែកជា3ប្រភេទ ក្នុងនោះប្រភេទប័ណ្ណចូលទស្សនារយៈពេល1ថ្ងៃមានតម្លៃ 37ដុល្លារ ប្រភេទប័ណ្ណចូលទស្សនា 3ថ្ងៃមានតម្លៃ 62ដុល្លារមានសុពលភាព 10ថ្ងៃ និងប្រភេទបណ្ណចូលទស្សនា 7ថ្ងៃ មានតម្លៃ 72ដុល្លារ ដែលមានសុពលភាព 01ខែ ហើយក្នុងមួយបណ្ណនឹងត្រូវកាត់ 1ដុល្លារ ចូលទៅក្នុងមូលនិធិមន្ទីរពេទ្យគន្ធបុប្ផា។

សូមជម្រាបថា កាលពីពេលថ្មីៗនេះគេហទំព័រប្រឹក្សាយោបល់នៃការធ្វើដំណើរ (TripAdvisor) ដ៏ល្បីល្បាញ និងធំជាងគេរបស់ពិភពលោកបានផ្តល់ចំណាត់ថ្នាក់លេខ1 ដល់ប្រាសាទអង្គរវត្តរបស់ខ្មែរ ថាជាសំណង់ដ៏មានសារៈសំខាន់ ផ្នែកប្រវត្តិសាស្ត្រអស្ចារ្យបំផុតរបស់ពិភពលោកសម្រាប់ឆ្នាំ 2017នេះ (Best Landmark in the World) ក្រោយពីមានការចូលរួមបោះឆ្នោតគាំទ្រពីភ្ញៀវទេសចររាប់លាននាក់ជុំវិញពិភពលោក ដែលនេះជាឆ្នាំទី 4ហើយដែលប្រាសាទអង្គរវត្តត្រូវបានភ្ញៀវទេសចរលើពិភពលោកបោះឆ្នោតគាំទ្រ ហើយទទួលបានចំណាត់លេខ 1ជាប់ៗគ្នា តាមរយៈគេហទំព័រដ៏ល្បីល្បាញផ្សេងៗពីគ្នា៕

យោងតាមការសិក្សាស្រាវជ្រាវរបស់អង្គការ UNICEF បានឱ្យដឹងថា ​ការអប់រំកុមារតូច​ចាប់ពីអាយុ៣ឆ្នាំ ដល់៥ឆ្នាំនៅកម្ពុជា​មានឥទ្ធិពល​ដល់កុមារពេញមួយជីវិត។ កុមារដែលបានទទួលការអប់រំតាំងពីនៅតូច នឹងមានការចេះត្រៀមខ្លួន​ដើម្បីទទួលយកការអប់រំ​រយៈពេលវែង រួមទាំងមានឱកាស​ចូលរៀន និងបញ្ចប់​ការសិក្សាកម្រិតបឋមច្រើនទៀតផង។

យោងតាមទិន្នន័យរបស់​នាយកដ្ឋានអប់រំកុមារតូចនៃក្រសួងអប់រំ​ យុវជន និងកីឡា បានលើកឡើងថាក្នុងឆ្នាំ ២០១៦-២០១៧ នេះ​ មានកុមារ​ ២នាក់ក្នុងចំណោម ៥នាក់ក្នុងប្រទេសកម្ពុជា ចាប់ពីអាយុ​ ៣ឆ្នាំ ដល់៥ឆ្នាំ បានចុះឈ្មោះចូលរៀននៅសាលាមត្តេយ្យ។ ទិន្នន័យនេះបង្ហាញឱ្យឃើញពីការកើនឡើងយ៉ាងវិជ្ជមាន​បើប្រៀបធៀបជាមួយឆ្នាំសិក្សា ២០០៨-២០០៩ ដែលមានកុមារតូច​ចន្លោះពី​អាយុ ៣ឆ្នាំ ដល់​ ៥ឆ្នាំ ត្រឹមតែ​ ១នាក់ប៉ុណ្ណោះក្នុងចំណោម ៥នាក់ ដែលបានចុះឈ្មោះចូលរៀន​ថ្នាក់មត្តេយ្យ។

ភាពវិជ្ជមាន​នេះ នឹងជំរុញឱ្យការទទួលបានការអប់រំ​សម្រាប់កុមារតូចៗកាន់តែមានលក្ខណៈប្រសើរឡើង​នៅគ្រប់មជ្ឈដ្ឋាន ហើយវាក៏ជា​គុណសម្បត្តិ​ល្អមួយផងដែរសម្រាប់អនាគតនៃធនធានមនុស្សរបស់កម្ពុជា។ ផ្អែកលើ​ទិន្នន័យដដែលនេះក៏បានបង្ហាញផងដែរថា ខេត្តដែល​មាន​អត្រា​កុមារតូចចូលរៀនថ្នាក់មត្តេយ្យ​ខ្ពស់ជាងគេ​ក្នុងប្រទេសកម្ពុជា គឺមិនមែនរាជធានីភ្នំពេញនោះទេ តែជាខេត្ត​ដែលស្ថិតនៅជាយដែននៃប្រទេសទៅវិញ។

ក្នុងឯកសារ​របស់​នាយកដ្ឋាន​អប់រំកុមារតូច បានបង្ហាញថា ខេត្តស្ទឹងត្រែងមានចំនួនកុមារតូចចូលរៀន​ថ្នាក់​មត្តេយ្យ​ចាប់ពីអាយុ៣ឆ្នាំទៅ មានចំនួន ៧៨% ច្រើនជាង​រាជធានីភ្នំពេញ​ដែលមានចំនួនត្រឹមតែ ៣៥% តែប៉ុណ្ណោះសម្រាប់ឆ្នាំសិក្សា ២០១៦-២0១៧នេះ៕

បន្ទាប់ពីកញ្ញា ណូម័រ បានសំម្ងំខ្លួនមិនសូវលេចមុខក្នុងអាជីពសិល្បៈមួយរយៈកន្លងមក  ស្រាប់តែថ្មីៗនេះលេចឮថា បានទិញផ្ទះមួយកន្លែងក្នុងតម្លៃជាង10ម៉ឺនដុល្លារ ខណៈដែលតារាសិល្បៈផ្សេងទៀតកំពុងតែប្រឹងប្រែងធ្វើការងារ ប៉ុន្ដែមិនទាន់មានលទ្ធភាពទិញផ្ទះបានដូចនាងនៅឡើយ។

អ្វីដែលធ្វើឱ្យគេចាប់អារម្មណ៍លើកញ្ញា ណូម័រ គឺគ្រាដែលនាងពុំសូវមានការងារធ្វើ រកប្រាក់ចំណូលពុំសូវបាន តែនាងបែរជាមានលទ្ធភាពទិញផ្ទះដល់តម្លៃជាង10ម៉ឺនដុល្លារ។ បញ្ហានេះត្រូវបានអ្នកខ្លះលើកឡើងថា នាងអាចនឹងមានអ្នកឧបត្ថម្ភពីក្រោយជាមិនខាន។

ជួបកញ្ញា ណូម័រ កាលពីពេលថ្មីៗនេះ នាងប្រាប់ថា៖”អ្នកណានិយាយអីក៏និយាយទៅ ព្រោះខ្ញុំស៊ាំទៅហើយ ព្រោះវាមិនមែនជាលើកទី1ទេ ដែលគេនិយាយពីខ្ញុំ ថាមានអ្នកនេះអ្នកនោះចិញ្ចឹម ពោលគឺតាំងពីខ្ញុំចូលសិល្បៈដំបូងៗ និងបានទិញផ្ទះមួយល្វែងតម្លៃជាង6ម៉ឺន ក៏គេបានលើកឡើងដូច្នេះដែរ”។

នាងពិតជាបានទទួលស្គាល់ថា បានទិញផ្ទះក្នុងតម្លៃជាង១០ម៉ឺនពិតប្រាកដមែន តែប្រាក់ទាំងនោះជាកម្លាំងញើសឈាមរបស់នាងសុទ្ធសាធគ្មានបុរសណាមកទិញឱ្យនោះទេ។ ជាមួយនឹងចម្ងល់របស់មហាជននេះត្រូវបាននាង បញ្ជាក់ប្រាប់ថាទោះជានាងផ្អាកសម្ដែងមួយរយៈក៏ពិតមែន តែក៏នាងមិនបានពន្លែងចោលអាជីពសិល្បៈទាំងអស់ដែរ ពោលគឺនាងបានចាប់យកអាជីពជាពិធីការិនី ដែលការងារនេះអាចបង្កើតប្រាក់ចំណូលបានយ៉ាងច្រើន។

ពិធីការិនីរូបនេះបញ្ជាក់ថា កាលពីឆ្នាំមុននាងបានទិញផ្ទះមួយទៅហើយក្នុងតម្លៃជាង6ម៉ឺនដុល្លារ តែដោយសារគិតថា ផ្ទះនោះតូចលំបាករស់នៅ ទើបនាងសម្រេចចិត្ដទិញផ្ទះនេះតែម្ដងដោយបង់រំលស់ក្នុងមួយខែជាង1ពាន់ដុល្លារ ដោយសារតែការងារពិធីការិនីរបស់នាងបច្ចុប្បន្នកំពុងតែកាក់កបទើបនាងពុំមានការបារម្ភពីការបង់រំលស់នោះឡើយ។

គួរបញ្ជាក់ថា តម្លៃខ្លួនក្នុងការងារជាពិធីការិនីរបស់កញ្ញា ស្ថិតនៅក្នុងរង្វង់ចាប់ពី300-500 ដុលា្លរអាស្រ័យទៅលើកម្មវិធីធំ តូច ទៅជិត ឬឆ្ងាយ៕