អារម្មណ៍ពីរស្របពេលតែមួយ គឺពិតជាឈឺចាប់ សេចក្ដីស្នេហាបុរសពីរនាក់ បែងចែកនារីម្នាក់ ព្រមទាំងមនោសញ្ចេតនាដ៏ជ្រាលជ្រៅរវាងតារាចម្រៀង ខេម ច្រៀងរួមគ្នាជាមួយលោក កែវ វាសនា នៅក្នុងបទ «តើ.. គេ?» ពេលនេះ ម៉ោងនេះ បានចេញ Full MV ហើយ។
បទនេះ ជាស្នាដៃនិពន្ធទំនុកច្រៀងដោយកវី លោក យឹម តាស្រង់ និងប្អូនរបស់លោក យឹម សុជាតា ហើយក្រោមការសម្រួលបទភ្លេងដោយ លោក ផល វឌ្ឍនៈ។ ចង់ដឹងថាផ្ទៃរឿងទាំងមូល មានភាពប្រទាក់ប្រឡា ស្នេហាឈឺចាប់យ៉ាងណានោះ សូមទស្សនាវីដេអូចម្រៀងខាងក្រោមនេះ៖
កាលពីពាក់កណ្តាលខែឧសភា កន្លងទៅនេះ CBS របស់សហរដ្ឋអាមេរិកបានរាយការណ៍ថា លោក អាលី ស៊ូហ្វាន អតីតមន្រ្តី FBI អាមេរិក ជាអ្នកដែលចូលរួមស៊ើបអង្កេតរឿងក្តីភេរវកម្ម 911 (យន្តហោះភេរវករបើកបំបុកអគារពាណិជ្ជកម្មពិភពលោក World Trade Center កាលពីឆ្នាំ 1997) បានផ្តល់បទសម្ភាសក្នុងកម្មវិធី 60 minutes របស់ CBS អំពីឯកសារសម្ងាត់ដែលរឹបអូសបានកាលពី 7 ឆ្នាំមុន ដែលខណៈនេះអាចបើកចំហជាសាធារណៈបានហើយនោះថា លោក ហាំហ្សា ប៊ិនឡាដេន កូនប្រុសរបស់អតីតមេខ្លោងភេរវករ អូសាម៉ា ប៊ិនឡាដេន ស្ថាបនិកខ្សែបណ្តាញ អាល់កៃដា បានសរសេរអត្ថបទមួយថា ត្រូវការសងសឹកឱ្យឪពុករបស់ខ្លួនដែលត្រូវសហរដ្ឋអាមេរិកសម្លាប់កាលពីឆ្នាំ 2010។
ឯកសារសម្ងាត់នោះជាសំបុត្រផ្ទាល់ខ្លួនរបស់ ប៊ិនឡាដេន ដែលក្រុមយោធាស៊ីលរបស់សហរដ្ឋអាមេរិករឹបអូសមកបានពីប្រតិបត្តិការវាយសម្រុកចូលសម្លាប់ ប៊ិនឡាដេន ដល់កន្លែងលាក់ខ្លួននៅក្នុងប្រទេសប៉ាគីស្ថាន។ សំបុត្រមួយផ្នែកសរសេរដោយលោកហាំហ្សា កាលពីនៅអាយុ 22 ឆ្នាំ ដែលនៅជាប់ជិតដិតនឹងឪពុក និងត្រូវការស្នងផ្នត់គំនិតរបស់ឪពុក។
បច្ចុប្បន្នលោកហាំហ្សា មានអាយុ 28 ឆ្នាំហើយ និងថែមទាំងបានផ្សព្វផ្សាយឃ្លីបសំឡេងបំផុសបំផុលសមាជិកក្នុងអំឡុងពេល 2 ឆ្នាំកន្លងមកនេះទៀតផង ដោយបានបង្ហាញអំពីចេតនាក្នុងការកសាងអាល់កៃដាឱ្យរឹងមាំ និងពង្រីកឱ្យធំឡើង ត្រៀមជាស្រេចក្នុងការសងសឹក។
លោកស៊ូហ្វានបាននិយាយថា នៅក្នុងសំបុត្រនោះ ហាំហ្សាបានសរសេរថា ខ្លួននៅចាំមុខឪពុកគ្រប់ពេលវេលា គ្រប់ស្នាមញញឹមដែលឪពុកបានញញឹមដាក់ និងគ្រប់ពាក្យសម្តីដែលឪពុកនិយាយជាមួយ។ គេគិតថា គេត្រូវតែចូលរួមក្នុងដំណើរផ្លូវរបស់ ជីហាដ។
រដ្ឋការសហរដ្ឋអាមេរិកបានកត់ត្រាឈ្មោះរបស់ ហាំហ្សាទុកក្នុងឋានៈជាភេរវករលំដាប់ពិភពលោកដែលបានទទួលការតែងតាំងជាពិសេសក្នុងកម្រិតដែលឪពុករបស់គេធ្លាប់បានទទួលពីមុនដែរ។ សូម្បីតែសំឡេងនិយាយរបស់ហាំហ្សាក៏ដូចឪពុករបស់គេដែរ កាលពីពេលថ្មីៗនេះ នៅក្នុងអត្ថបទ និងពាក្យសម្តីដែលត្រូវបានផ្សព្វផ្សាយចេញមក ហាំហ្សាបានប្រើប្រាស់ប្រយោគ និងពាក្យផ្សេងៗដែលប៊ិន ឡាដេនជាឪពុកធ្លាប់បានប្រើទាំងអស់។
“គេនិយាយថា…ជនជាតិអាមេរិក យើងកំពុងតែទៅរកពួកអ្នកហើយ និងពួកអ្នកនឹងមានអារម្មណ៍ដឹងអំពីការទៅរកពួកអ្នកក្នុងគ្រានេះ យើងនឹងមកយកវិញនូវអ្វីដែលពួកអ្នកបានធ្វើចំពោះឪពុករបស់យើង ចំពោះអ៊ីរ៉ាក់ ចំពោះអាហ្វហ្គានីស្ថាន ទាំងអស់វាជារឿងរ៉ាវនៃការសងសឹក” អតីតមន្រ្តី FBI រៀបរាប់។
បច្ចុប្បន្នខ្សែបណ្តាញអាល់កៃដាមានមូលដ្ឋាននៅក្នុងរាប់សិបប្រទេស ចាប់តាំងពីហេតុការណ៍អារ៉ាប់ស្រ្ពីងក្នុងឆ្នាំ 2010 ដែលកើតមានសុញ្ញាកាសខាងអំណាចមក គ្រាន់តែនៅក្នុងប្រទេស ស៊ីរី មានសាវ័កអាល់កៃដាប្រមាណជា 20.000 នាក់ទៅហើយនៅតាមទីក្រុង និងទីប្រជុំជនផ្សេងៗ។
“អាល់កៃដាឥឡូវរឹងមាំជាងកាលពីពេលមុន ខ្ញុំជឿថា ប៊ិនឡាដេនខ្លួនឯងក៏មានក្តីស្រមៃដ៏ក្តៅគគុកមួយដែលគិតថា គេនឹងត្រូវតែមានសាវ័កដែលអាចបញ្ជាបានដូចកងទ័ព កងកម្លាំង និងផែនដី”លោក ស៊ូហ្វានបន្ថែម។
អក្សរក្រោមរូបភាព ៖ ហាំហ្សា កាលពីនៅក្មេង
ស្រាវជ្រាវដោយ តាវ៉ែនតា
ជារៀងរាល់ឆ្នាំចាប់ពីខែឧសភារហូតដល់ខែកក្កដា កសិករដែលដាំធុរេនមានការរីករាយសប្បាយចិត្តណាស់ ក្នុងការប្រមូលផលធុរេនយកមកលក់នៅលើទីផ្សារ ប៉ុន្តែអតិថិជននៅតាមទីប្រជុំជនវិញ មានការលំបាកខ្លាំងក្នុងការរកទិញធុរេនធម្មជាតិរបស់ខ្មែរយកមកពិសា ដូច្នេះដើម្បីឱ្យបានដឹងច្បាស់យើងនាំគ្នាមកមើលពីវិធីសាស្រ្តងាយៗ ក្នុងការពិនិត្យមើលថា តើណាមួយជាធុរេនធម្មជាតិក្នុងស្រុក ឬធុរេននាំចូលពីក្រៅស្រុកដូចជាប្រទេសថៃ ឬវៀតណាមជាដើម?
លោក ស្រ៊ន គឹមស្រេង អាជីវករលក់ធុរេនធម្មជាតិ តាមបណ្តាញសង្គមហ្វេសប៊ុក មានប្រសាសន៍ថា ធុរេនធម្មជាតិរបស់ខ្មែរមានលក្ខណៈខុសពីធុរេននាំចូលពីប្រទេសថៃ និងប្រទេសវៀតណាម ធុរេនរបស់ខ្មែរមានសម្បករាងក្រាស់បន្តិច ពេលពុះរួចចូរ ពិនិត្យទៅលើគែមសម្បកខាងក្រៅ នឹងឃើញមានពណ៌ខៀវស្រស់ ចំណែកទងរបស់វាមានថ្នាំងពីរកង់ ហើយពេលដែលវាទុំខ្លាំង ថ្នាំងទី1 នឹងជ្រុះបាត់នៅសល់តែថ្នាំងទី2 ប៉ុណ្ណោះ នោះគឺអាចសម្គាល់ថា ជាធុរេនខ្មែរដែលទុំអាចពិសាបានហើយ។
លោកបន្តថា សម្រាប់ធុរេននាំចូលពីប្រទេសថៃវិញនៅលើទងមានថ្នាំងខ្លះដែរ តែភាគច្រើនមានថ្នាំងតែ 1 ប៉ុណ្ណោះ ចំណែកសម្បកវារាងស្តើង ពេលដែលពុះរួចពិនិត្យទៅលើគែមសម្បកខាងក្រៅនោះមានពណ៌លឿងថ្លា មិនខៀវស្រស់ដូចធុរេនខ្មែរនោះទេ។ ចំណែកធុរេនវៀតណាម ក៏មានលក្ខណៈស្រដៀងគ្នានឹងធុរេននាំចូលពីប្រទេសថៃដែរ តែភាគច្រើននៅលើទងមិនមានថ្នាំងនោះទេ។
គួរបញ្ជាក់ថា លោក គឹម ស្រេង នាំចូលធុរេនពីភូមិបែកអន្លង់ និងស្រែវាល ស្រុកចំការលើ ខេត្តកំពង់ចាម ចែកចាយនៅលើទីផ្សារតាមបណ្តាញសង្គមហ្វេសប៊ុកក្នុងក្រុងភ្នំពេញ។ លោកថា ឆ្នាំនេះធុរេនរាងយឺតខែបន្តិចមិនទាន់សម្បូរខ្លាំងនៅឡើយ ហើយជួនកាលទុំមិនទាន់ម៉ូយកុម្ម៉ង់ទៀតផង ដោយលក់ក្នុងមួយគីឡូក្រាមតម្លៃ 23000រៀល។ យ៉ាងណាក៍ដោយ នៅពេលធុរេនផ្តល់ផលច្រើនប្រហែលជាកន្លះខែទៀតនេះ លោកនឹងដាក់លក់នៅស្តង់កែងស្តុបបូកគោត្រង់ហ្ការ៉ាស់ឡានហាក់ស្រ៊ុន ក្នុងក្រុងភ្នំពេញ៕
លោកគ្រូពេទ្យបានប្រាប់ទៅអ្នកគ្រប់គ្រងទូទៅរបស់បវរកញ្ញា Miss Grand Thailand ថា នាងបានដឹងខ្លួនឡើងវិញហើយ តែមិនអាចចងចាំហេតុការណ៍គ្រោះថ្នាក់ចរាចរណ៍នោះបានទេ និងនាងថែមទាំងបាក់ជើងទាំងសងខាងទៀតផង ដូច្នេះត្រូវរង់ចាំដល់រាងកាយរបស់នាងអាចកម្រើកបានឡើងវិញសិន ទើបអាចដឹងបានថា តើជើងរបស់នាងទាំងពីរអាចវះកាត់បានឬក៏អត់?
បវរកញ្ញាខាងលើមានឈ្មោះថា ណង ហ្វឺស រតនា រ៉ាមចាទុ អាយុ ១៩ ឆ្នាំ ជាបវរកញ្ញា Miss Grand Thailand មកពីខេត្ត ឧថៃថានី ប្រចាំឆ្នាំ ២០១៧ បានជួបគ្រោះថ្នាក់ចរាចរណ៍កាលពីថ្ងៃទី ១ ខែមិថុនា ឆ្នាំ២០១៧ ខណៈដែលនាងបានបើករថយន្តទៅកាន់ទីក្រុងបាងកក ដើម្បីទៅបំពេញភារៈកិច្ចចំនួន ៤ ថ្ងៃ និងបានបាត់ដំណឹងរហូតដល់មានព័ត៌មានលេចឮឡើងថា នាងបានស្លាប៉បាត់បង់ជីវិតនៅថ្ងៃកើតហេតុនោះហើយ។
ព័ត៌មានចុងក្រោយនៅថ្ងៃទី ២ ខែមិថុនា ឆ្នាំ២០១៧ ម្សិលមិញអ្នកគ្រប់គ្រងទូទៅរបស់តារាស្រីរូបនេះ បានចេញមកអះអាងថា នាងនៅរស់ទេ និងបានដឹងខ្លួនឡើងវិញហើយ ព្រមទាំងអាចនិយាយជាមួយគ្រូពេទ្យបានដូចធម្មតា គ្រាន់តែនាងមិនអាចចងចាំហេតុការណ៍ដែលបានកើតឡើងដែលបណ្ដាលឱ្យកើតគ្រោះថ្នាក់នោះបានទេ។ អ្នកគ្រប់គ្រងរូបនោះបានបន្ដទៀតថា នាងមានរបួសធ្ងន់ តែមិនបានបាត់បង់ជីវិតទេ គ្រូពេទ្យបានប្រាប់ថា នាងគ្មានឈាមកកក្នុងខួរក្បាលទេ តែមានរបួសធ្ងន់ធ្ងរនៅបរិវេណផ្ទៃមុខ និងបាក់ជើងទាំងសងខាង ។
គួរបញ្ជាក់ផងដែរថា ខណៈនេះសម្ពាធឈាមរបស់នាងស្ថិតនៅក្នុងកម្រិតធម្មតា ប៉ុន្ដែត្រូវរង់ចាំរហូតដល់សភាពរាងកាយមានភាពល្អប្រសើរឡើងវិញបន្ដិច និងអាចកម្រើកបាន ទើបត្រូវអាចសម្រេចចិត្តជាថ្មីថា តើត្រូវធ្វើការវះកាត់ជើងទាំងសងខាងរបស់នាងដែលរងគ្រោះធ្ងន់ធ្ងនោះឬយ៉ាងណា?៕
ក្លិប Roma បានប្រាប់ក្លិបហង្សក្រហម Liverpool ថា ២៨លានផោន (ស្មើនឹង៣៦លានដុល្លារអាមេរិក) នឹងមិនគ្រប់គ្រាន់ក្នុងការទិញយកខ្សែបម្រើស្លាបអន្តរជាតិអេហ្ស៊ីប Mohamed Salah ទេ។
ក្លិបទាំងពីរបានរៀបចំកិច្ចពិភាក្សាជាច្រើនលើកជុំវិញកិច្ចព្រមព្រៀងដែលអាចទៅរួចមួយ ខណៈដែល Liverpool បានបញ្ជាក់ប្រាប់ថា ពួកគេត្រៀមលក្ខណៈរួចរាល់ក្នុងការដាក់សំណើជាទឹកប្រាក់២៨លានផោន ដើម្បីទិញយកកីឡាកររូបនេះ ប៉ុន្តែទោះបីជាយ៉ាងណា ក្លិបស្ថិតក្នុងក្របខ័ណ្ឌ Serie A មួយនេះ នឹងមិនលក់កីឡាករ Salah វ័យ២៤ឆ្នាំម្នាក់នេះក្នុងតម្លៃខ្លួនប៉ុននោះឡើយ ហើយបច្ចុប្បន្ន វាអាស្រ័យទៅលើ Liverpool ក្នុងការសម្រេចថា តើពួកគេចង់បង្កើនសំណើនៃការដេញថ្លៃរបស់ខ្លួន ឬយ៉ាងណា?។
លោក Jurgen Klopp នៃក្លិប Liverpool បានចាត់ទុកខ្សែបម្រើស្លាបរូបនេះ គឺជាកីឡាករអាទិភាពរបស់លោកក្នុងការទិញចូល ខណៈដែលក្លិបនេះត្រៀមសម្រាប់រដូវកាលថ្មីក្នុងក្របខ័ណ្ឌ Premier League និងការប្រកួតក្នុងក្របខ័ណ្ឌ Champions League វគ្គ Playoff។ Liverpool បានជួបនឹងភាពត្រដាបត្រដួសខ្លាំងកាលពីរដូវកាលមុន នៅពេលដែលពួកគេលេងដោយគ្មានខ្សែបម្រើដ៏ឆ្នើម Sadio Mane ជាពិសេសនៅកីឡដ្ឋាន Anfield ជាកន្លែងដែលពួកគេបានជួបការលំបាកក្នុងការផ្តួលក្រុមជាច្រើន ហើយលោក Klopp ជឿជាក់ថា Salah នឹងជួយបន្ថែមល្បឿនក្នុងក្រុមរបស់លោក។ Salah ទើបតែបានបំពេញរដូវកាលទី២របស់គេនៅឯក្លិប Roma ក្រោយពីរូបគេបានលេងក្នុងនាមជាកីឡាករកម្ចីពីក្លិប Fiorentina ក្នុងរដូវកាលឆ្នាំ២០១៥-២០១៦ និងបានក្លាយជាកីឡាករដ៏មានគ្រោះថ្នាក់បំផុតរបស់ក្របខ័ណ្ឌ Serie A។
ក្នុងអំឡុងការចំណាយពេល២រដូវកាលរបស់គេក្នុងក្រុម Roma រូបគេបានស៊ុតបាល់បញ្ចូលទី២៩គ្រាប់ ក្នុងការប្រកួតលីក៦៥លើក៕
ប្រភពពី៖ The Guardian
អង្គការ UNESCO បានប្រកាសឱ្យមានការប្រកួតខ្សែវីដេអូសម្រាប់អាណាព្យាបាល សិស្ស គ្រូ និងអ្នកគ្រប់គ្រងសាលានៅតំបន់អាស៊ីប៉ាស៊ីហ្វិក ដែលក្នុងនោះក៏មានប្រទេសកម្ពុជាផងដែរ។ អ្នកឈ្នះការប្រកួតនេះនឹងអាចឈ្នះដំណើរទៅទីក្រុងបាងកក និងរង្វាន់ជាច្រើនទៀត។ ខ្សែវីដេអូដែលបេក្ខភាពផលិតបាន នឹងត្រូវយកទៅធ្វើបទបង្ហាញនៅទីក្រុងបាងកក ដោយដកស្រង់យកសាលារៀនណាដែលអ្នកគិតថាជា សាលារៀនរីករាយ។
គោលបំណងសំខាន់នៃការប្រកួតខ្សែវីដេអូនេះគឺ ដើម្បីលើកទឹកចិត្តឱ្យមានការយកចិត្តទុកដាក់ផ្នែកអប់រំ និងបំផុសឱ្យមានសកម្មភាពដើម្បីជំរុញឱ្យសាលារៀនកាន់តែមានភាពច្នៃប្រឌិត ប្រកបដោយភាពរីករាយដល់សិស្សានុសិស្ស។ ម្យ៉ាងវិញទៀត សុភមង្គលក្នុងការសិក្សាក៏ជាប្រធានបទមួយដែលកម្មវិធីចង់ទទួលបានពីអ្នកផលិតខ្សែវីដេអូទាំងអស់នោះផងដែរ ព្រោះវាជាធាតុសំខាន់មួយក្នុងការលើកតម្កើងផ្នែកអប់រំនៅក្នុងប្រទេសនីមួយៗ។ ការបង្កើតភាពសប្បាយរីករាយក្នុងការសិក្សា អាចធ្វើឱ្យក្មេងកាន់តែច្រើនឡើងចង់ទទួលយកការរៀនសូត្រ ហើយមិនបោះបង់ការសិក្សា ព្រោះពួកគេគិតថាការសិក្សាគឺ អាចធ្វើឱ្យពួកគេសប្បាយចិត្ត និងមានភាពកក់ក្តៅ។
ប្រជាជននៅក្នុងប្រទេសកម្ពុជាអាចស្វែងរកមើលខ្សែវីដេអូ និងព័ត៌មានលម្អិតនៅក្នុងគេហទំព័ររបស់អង្គការ UNESCO ដែលកម្មវិធីនេះក៏ត្រូវបានគេផលិតឡើងផងដែរនៅក្នុងឆ្នាំ ២០១៦៕
ជារឿងដ៏ភ្ញាក់ផ្អើល នៅពេលដែលសារព័ត៌មានកូរ៉េ បានចេញផ្សាយថា មន្ត្រីប៉ូលិសបានពិនិត្យរកឃើញសារធាតុថ្នាំញៀនប្រភេទកញ្ឆា នៅក្នុងសរសៃសក់របស់តារាចម្រៀងប្រុសល្បី T.O.P សមាជិកក្រុមចម្រៀងប្រុស Big Bang ដែលតម្រូវឱ្យមានការស៊ើបអង្កេត។
សារព័ត៌មានល្បីរបស់កូរ៉េ បានចេញផ្សាយថា T.O.P ធ្លាប់ប្រើប្រាស់ថ្នាំញៀនប្រភេទកញ្ឆាកាលពី ខែតុលា ឆ្នាំ ២០១៦ តែគ្មានសារព័ត៌មានណាមួយចេញផ្សាយពីការប្រើថ្នាំញៀនរបស់តារាចម្រៀងរូបនេះឡើយ។ យ៉ាងណាក៏ដោយ នេះគឺជាលើកទី២ហើយ ដែលក្រុមចម្រៀងប្រុស Big Bang លេចចេញសារព័ត៌មានប្រើប្រាស់ថ្នាំញៀន ដែលកាលពីឆ្នាំ ២០១១ សមាជិករួមក្រុម G-Dragon ត្រូវបានស៊ើបអង្កេតជារៀងរាល់ថ្ងៃតែម្ដង ប៉ុន្តែតុលាការក៏បានសម្រេចក្ដីមិនដំណើរការបណ្ដឹងវិញ ព្រោះសារធាតុកញ្ឆាដែលមាននៅក្នុងខ្លួន G-Dragon ក៏មានតិចតួចបំផុត។
ជាចុងក្រោយខាងផលិតកម្ម YG Entertainment បានចេញមកថ្លែងការណ៍សុំទោសជាសាធារណៈចំពោះព័ត៌មានដ៏ល្បីល្បាញមួយនេះ ព្រោះខណៈនេះ T.O.P កំពុងបំពេញកាតព្វកិច្ចយោធា តាំងពីខែកុម្ភៈមកម្ល៉េះ៕
ភ្នំពេញៈ ទោះជាការលក់លំនៅដ្ឋានជាទូទៅមានការថមថយល្បឿនក្តី ប៉ុន្តែការផ្តល់ឥណទានរបស់ អេស៊ីលីដា ដែលមានទឹកប្រាក់ ៤០លានដុល្លារ កើនឡើង ២២ភាគរយ បើធៀបនឹងរយៈពេលដូចគ្នាកាលពីឆ្នាំមុន។
លោក អ៉ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអឹលស៊ី បានថ្លែងឲ្យដឹងតាមទូរស័ព្ទនាព្រឹកថ្ងៃទី២ មិថុនា ថា កាលពីដំណាច់ឆ្នាំមុនអេស៊ីលីដាបានផ្តល់ឥណទានទំហំទឹកប្រាក់ ២១០លានដុល្លារក្នុងវិស័យលំនៅដ្ឋាន ហើយគ្រាន់តែរយៈពេល ៥ខែដើមឆ្នាំនេះ ឥណទានអេស៊ីលីដាបានបញ្ចេញទឹកប្រាក់ ៤០លានដុល្លារអាមេរិក និងមានអតិថិជនក្នុងដៃសរុប ៤៣៣,០០០នាក់ ដែលបាន និងកំពុងប្រើប្រាស់ឥណទានរបស់ធនាគារនេះ។
លោកបន្តថា “ការផ្តល់ឥណទានរបស់យើងមិនមានការរឹតបន្តឹងនោះទេ ប៉ុន្តែយើងមិនផ្តល់ឥណទានសម្រាប់អ្នកទិញផ្ទះទុកលក់ ឬជួលទេ ព្រោះប្រសិនជាពួកគេលក់ ឬជួលមិនបាននោះ ពួកគេនឹងត្រូវប្រឈមនឹងបញ្ហាក្នុងការសងត្រឡប់”។ លោកបន្តថា “ឥណទានរបស់អេស៊ីលីដាផ្តោតតែលើអ្នកទិញលំនៅដ្ឋានយកមករស់នៅប៉ុណ្ណោះ”។
អ្នកនាងឆាយ ស៊ីណា ប្រធានផ្នែកទីផ្សារនៃបុរីវិមានភ្នំពេញបានថ្លែងថា អ្នកទិញលំនៅដ្ឋានក្នុងបុរីនេះភាគច្រើនបានប្រើប្រាស់ឥណទានរបស់ធនាគារ ដោយសារលក្ខខណ្ឌនៃឥណទានកាន់តែមានភាពងាយស្រួលសម្រាប់អតិថិជន ពិសេសគ្រួសារថ្មីថ្មោងដែលទើបរៀបការហើយមានបំណងចាកចេញពីឪពុកម្តាយ មកបង្កើតគ្រួសារថ្មីដោយខ្លួនឯង។
អ្នកនាងបន្តថា “អ្នកទិញលំនៅដ្ឋានប្រមាណ៧០ទៅ៨០ភាគរយហើយ ដែលបានប្រើប្រាស់ឥណទានពីធនាគារ”៕
លោក Zinedine Zidane ជឿជាក់ថា ភាពជាអ្នកដឹកនាំរបស់ខ្សែប្រយុទ្ធដ៏មានឥទ្ធិពល Cristiano Ronaldo នឹងក្លាយជាកត្តាកាត់សេចក្តីដ៏សំខាន់ នៅពេលដែលក្រុម Real Madrid ចូលឆ្ពោះទៅរកការប្រកួតប្រវត្តិសាស្ត្រក្នុងវគ្គផ្តាច់ព្រ័ត្រនៃក្របខ័ណ្ឌ Champions League ជាមួយនឹងក្រុម Juventus នៅរាត្រីនេះ។
Ronaldo នឹងស្ថិតក្នុងការចាប់អារម្មណ៍ ខណៈដែលក្រុមរបស់លោក Zidane នឹងខិតខំព្យាយាមធ្វើឲ្យក្លិបរបស់លោកក្លាយជាក្លិបដំបូងគេក្នុងការឈ្នះពានក្របខ័ណ្ឌកំពូលអឺរ៉ុប២លើកជាប់ៗគ្នា ចាប់តាំងពីក្លិប AC Milan ធ្លាប់ធ្វើបានសម្រេចកាលពី២៧ឆ្នាំមុនម្តងរួចមកហើយ។ បើទោះបីមនុស្សជាច្រើនបានរិះគន់ទៅលើ Ronaldo សម្រាប់ការបង្ហាញពីទម្រង់លេងដែលគ្មានភាពរស់រវើក ក្នុងពេលដែល Real ឈ្នះលើការប្រកួតក្របខ័ណ្ឌ Champions League វគ្គផ្តាច់ព្រ័ត្រលើក្រុម Atletico Madrid ក៏ដោយ ប៉ុន្តែ រូបគេនៅតែបានស៊ុតបាល់ប៉េណាល់ទីចូលទីយ៉ាងល្អក្នុងការប្រកួតកាលពីឆ្នាំមុន ហើយក៏បានស៊ុតបាល់បញ្ចូលទីក្នុងការប្រកួតវគ្គផ្តាច់ព្រ័ត្រកាលពីឆ្នាំ២០១៤ផងដែរ។ Ronaldo បានស្ថិតក្នុងទម្រង់លេងយ៉ាងមុតស្រួចម្តងទៀតក្នុងរដូវកាលនេះ ដោយរូបគេបានបំពេញការរកបាន៤០០គ្រាប់សម្រាប់ក្រុម Real ខណៈដែលក្រុមរបស់គេបានឈ្នះពានក្របខ័ណ្ឌកំពូលរបស់អេស្ប៉ាញជាលើកទី១ក្នុងរយៈពេល៥ឆ្នាំ។ លោក Zidane ជឿជាក់ថា សុច្ឆន្ទៈនៃការស្រេកឃ្លានជ័យជម្នះរបស់ខ្សែប្រយុទ្ធអន្តរជាតិព័រទុយហ្គាល់វ័យ៣២ឆ្នាំរូបនេះ នឹងក្លាយជាកូនសោសំខាន់ក្នុងការជួយឲ្យក្រុម Real ទទួលជោគជ័យ ពីព្រោះរូបគេមានកម្រិតស្តង់ដារលេងដែលមិត្តរួមក្រុមរបស់គេជឿជាក់ថា នឹងក្លាយជាជំនួយដ៏ធំសម្រាប់ក្រុម។
លោក Zidane បានប្រាប់សន្និសីទសារព័ត៌មាននៅឯកីឡដ្ឋាន Principality ក្នុងទីក្រុង Cardiff កាលពីថ្ងៃសុក្រ ថា៖ « Ronaldo ជាមនុស្សល្អ រូបគេព្រួយបារម្ភពីអ្នកដទៃ ហើយអ្វីដែលសំខាន់នោះគឺថា រូបគេមានភាពជាកីឡាករអាជីព។ រូបគេកើតមកគឺដើម្បីធ្វើជាមេដឹកនាំ ជាពិសេសនៅលើទីលានតែម្តង។ អ្វីដែលសំខាន់បំផុតនោះគឺថា រូបគេចង់បានជ័យជម្នះ»។
ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺយប់នេះ៕
បន្ទាប់ពីរស់នៅយ៉ាងមានសុភមង្គលក្នុងទ្រនំចាស់ដែលគេដឹងថា ផ្ទះនោះមានតម្លៃជិតកន្លះលានដុល្លាររួចមក ស្រាប់តែថ្មីៗនេះម្ចាស់បទ “អស់ឱកាស” លោក ករុណា ពេជ្រ តារាចម្រៀងលេចធ្លោប្រចាំផលិតកម្មថោន បានស្រវាទៅទិញផ្ទះស្សបហោស៍ 2 ល្វែងជាប់គ្នាក្នុងគម្រោងបុរីមួយ។
គម្រោងបុរីដែលលោក ករុណា ពេជ្រ បានទិញនោះមានឈ្មោះថា ឌី អូលេន ស៊ីធី របស់បុរី ថៃ ឈុនគ្រី ស្ថិតនៅភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ ក្នុងតម្លៃជាង30ម៉ឺនដុល្លារ ដើម្បីជូនឪពុកម្តាយរបស់លោករស់នៅ។
ប្រធានគ្រប់គ្រងទូទៅក្រុមហ៊ុនថៃ ឈុនគ្រី លោក ឈន់ សកល បានទទួលស្គាល់ថា លោកករុណា ពេជ្រ បានទិញផ្ទះស្សបហោស៍ ចំនួន 2 ល្វែងជាប់គ្នា គឺផ្ទះលេខ S12 និង S13 មែន។ លោកបានបន្ថែមទៀតថា “ផ្ទះដែលករុណា ពេជ្រទិញ គឺសុទ្ធតែជ្រើសរើសទិញក្នុងគម្រោងបង់ផ្តាច់ទៀតផង។ ការពិតក្រុមហ៊ុនក៏មានកម្មវិធីបង់រំលស់ និងបង់តាមដំណាក់កាលដែរ តែលោកករុណា ពេជ្រ មិនចង់ចង់សាំញ៉ាំច្រើន ម្យ៉ាងដោយសារក្រុមហ៊ុនមានការផ្តល់ជូនពិសេសផងនោះ ទើបលោកសម្រេចទិញបង់ផ្តាច់តែម្ដង” ។
ដោយឡែកលោក ករុណា ពេជ្រ បានឲ្យដឹងថា៖ “ដោយសារផ្ទះរបស់ខ្ញុំនៅម្តុំហ្នឹងស្រាប់ ហើយគម្រោង ឌី អូលេន ស៊ីធី នេះ ក៏មានលក្ខណៈល្អ ម៉ូតស្អាត នៅជាប់នឹងផ្សារបឹងបៃតង និងជិតផ្សារអ៊ីអនម៉ល 2 ទើបខ្ញុំសម្រេចចិត្តទិញផ្ទះនោះទុកតែម្តងទៅ និងខ្ញុំចង់លក់ទៅវិញក៏មិនខាតដែរ ព្រោះទីតាំងដែលខ្ញុំទិញនេះជាតំបន់ល្អ ប៉ុន្ដែខ្ញុំនឹងអាចទុកជូនម៉ាក់រស់នៅមានក្ដីសុខច្រើនជាង”។
ទោះបីលោក ករុណា ពេជ្រ ទទួលស្គាល់ថា លោកពិតជាបានទិញផ្ទះនៅក្នុងគម្រោងនោះក៏ពិតមែន ប៉ុន្ដែលោកពុំបានបង្ហើបប្រាប់ថា ទឹកប្រាក់ដែលលោកយកទៅទិញផ្ទះ 2 ល្វែងនោះមានប្រភពមកពីណាទេ។ គួរបញ្ជាក់ថា កន្លងមកលោកករុណា ពេជ្រ បានបញ្ជាក់ថា ប្រាក់ចំណូលដែលលោកទទួលបានពីអាជីពចម្រៀងនៅមានកម្រិតតិចតួចជាងជំនួញរបស់លោកដែលទទួលបានពីការងាររៀបចំពិធីការក្នុងពិធីជប់លៀងទេ ពោលគឺមួយខែៗលោកអាចទទួលបានប្រាក់ចំណូលរាប់ម៉ឺនដុល្លារឯណោះ៕