Author: វល័ក្ខ

  • iOS 11 របស់ Apple មានអ្វីប្លែកខ្លះ?

    iOS 11 របស់ Apple មានអ្វីប្លែកខ្លះ?

    ប្រិយមិត្តមួយចំនួនប្រហែលជាបានជ្រាបខ្លះហើយពីដំណឹងនៃការបើកសម្ពោធប្រព័ន្ធប្រតិបត្តិការ iOS ជំនាន់ទី 11 របស់ក្រុមហ៊ុន Apple កាលយប់រំលងអាធ្រាត្រចូលថ្ងៃទី 06 ខែមិថុនា ម៉ោងនៅកម្ពុជា ក្នុងព្រឹត្តិការណ៍ WWDC 2017។ សំណួរសួរថា តើការបង្ហាញមុខមាត់ថ្មីនេះ វាមានចំណុចអ្វីប្លែកខ្លះ?

    ជាការពិតណាស់ Apple មិនចេះតែឡើងជំនាន់ដោយមិនបន្ថែមមុខងារថ្មីនោះទេ។ iOS 11 គឺបានកែប្រែ និងបន្ថែមចំណុចពិសេសជាច្រើនដូចជា៖

    – Siri ៖ ត្រូវបានបន្ថែមប្រសិទ្ធភាពឱ្យខ្ពស់ជាងមុន ដោយបំពាក់សំឡេងថ្មី ហើយប្រើប្រាស់បានទាំងសំឡេងបុរស និងស្រ្ដី ព្រមទាំងអាចបកប្រែភាសាបាន (Beta) ដោយប្រើប្រាស់ជាមួយប្រព័ន្ធ Machine Learning ។ វាអាចសិក្សាដឹង និងស្នើឡើងនូវអ្វីដែល អ្នកប្រើប្រាស់ចូលចិត្ត ព្រមទាំងមានសមត្ថភាពយល់ពីសំឡេងធម្មជាតិរបស់មនុស្សបានកាន់តែសុក្រិតជាងមុនទៀតផង។
    – កាមេរ៉ា ៖ បន្ថែមប្រសិទ្ធភាពក្នុងការថតរូប និងវីដេអូ ហើយស៊ីមេម៉ូរីតិចជាងមុន និងមានមុខងារ Live Photo អនុញ្ញាតឱ្យយើងកាត់តម្រឹម និងកែរូបថតបានយ៉ាងងាយ។
    – Apple Pay ៖ អាចវេរលុយទៅឱ្យមិត្តភក្តិតាមរយៈ iMessage និងផ្ទៀងផ្ទាត់គណនីធនាគារតាម Touch ID។
    – Apple Maps ៖ ត្រូវបានUpdate បន្ថែម ដោយអាចបង្ហាញ និងណែនាំទីកន្លែងផ្សេងៗរហូតដល់ខាងក្នុងអគារ ដូចជាក្នុងព្រលានយន្តហោះ និងផ្សារទំនើបជាដើម។
    – Car Play ៖ បន្ថែមមុខងារ Do Not Disturb ខណ:កំពុងបើកបរ។
    – Message ៖ ត្រូវបានរចនាឡើងសាជាថ្មី ដោយអាចធ្វើការ Sync ទៅកាន់ iCloud បាន។
    – Photos ៖ ប្រើប្រាស់ Machine Learning ដើម្បីស្វែងរករូបភាពក្នុងអាល់ប៊ុម Memory និងមានប្រសិទ្ធភាពជាងមុន។
    – Control Center ៖ ត្រូវបានរចនាឡើងសាជាថ្មី និងច្របាច់បញ្ចូលលើផ្ទាំងតែមួយ។
    – App Store ៖ ត្រូវបានរចនាឡើងថ្មីទាំងស្រុង ដោយមានការបែកចែងកម្មវិធី និងហ្គេម ដាច់ដោយឡែកពីគ្នា ហើយមានកម្មវិធីសម្រាំង និងពេញនិយមបំផុតប្រចាំថ្ងៃផងដែរ។
    – ផ្ទាំង Notification និង Lock Screen ៖ ក្លាយជាផ្ទាំងតែមួយរួមគ្នា ហើយអាចអូសទៅឆ្វេងស្តាំ ដើម្បីចូលទៅកាន់ Widget និងកាមេរ៉ាបានយ៉ាងងាយ។
    – Apple Music ៖ បានដាក់បន្ថែមនូវមុខងារ Multiroom ដែលអនុញ្ញាតឱ្យលោកអ្នកចាក់ចម្រៀងដូចគ្នាស្តាប់ចេញពីឧបករណ៍បំពងសំឡេងផ្សេង។

    ទាំងអស់នេះហើយជាលក្ខណៈប្លែកថ្មីរបស់ប្រព័ន្ធប្រតិបតិ្តការ iOS ជំនាន់ទី 11 ដែលប្រិយមិត្តគួរដឹង ដែលវាអាចជាប្រយោជន៍ ក្រោយពេលដែល ក្រុមហ៊ុន Apple ដាក់ឱ្យ Update នៅខែកញ្ញា ឆ្នាំ 2017 ខាងមុខនេះ៕

  • តើសេដ្ឋកិច្ចកម្ពុជានៅឆ្នាំ 2018 និង 2019 មានការប្រែប្រួលឬយ៉ាងណា?

    តើសេដ្ឋកិច្ចកម្ពុជានៅឆ្នាំ 2018 និង 2019 មានការប្រែប្រួលឬយ៉ាងណា?

    ឯកឧត្តម វង្សី វិសុត្ស រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ មានប្រសាសន៍នៅក្នុងវេទិកាសាធារណៈស្តីពីក្របខ័ណ្ឌម៉ាក្រូសេដ្ឋកិច្ច និងគោលនយោបាយថវិកា សម្រាប់ឆ្នាំ 2018 ឱ្យដឹងថា សេដ្ឋកិច្ចកម្ពុជាសម្រាប់ឆ្នាំខាងមុខ គឺឆ្នាំ 2018 និងឆ្នាំ 2019 មិនមានអ្វីប្រែប្រួលនោះទេ។

    ឯកឧត្តមបញ្ជាក់ថា ចំពោះស្ថានភាពម៉ាក្រូសេដ្ឋកិច្ចកម្ពុជា បើទោះបីជាត្រូវទទួលរងនូវសម្ពាធទាំងខាងក្នុង និងខាងក្រៅក៏ដោយ ក៏កម្ពុជានៅតែសម្រេចបាននូវកំណើនក្នុងរង្វង់ 7% នៅក្នុងឆ្នាំ 2017, 2018 និង 2019 ខាងមុខនេះដែរ ដោយសារកម្ពុជាកាន់តែមានមូលដ្ឋានសេដ្ឋកិច្ចដែលរឹងមាំ។ កំណើននេះបានមកដោយសារ ៖1.ការងើបឡើងវិញនៃវិស័យកសិកម្ម 2% ដែលទ្រទ្រង់ដោយកំណើនដំណាំ ជលផល និងការងើបឡើងវិញនៃការចិញ្ចឹមសត្វ។ 2.កំណើនរឹងមាំនៃវិស័យឧស្សាហកម្ម ប្រមាណជា 10.7% ដោយការលូតលាស់ខ្លាំងនៃវិស័យឧស្សាហកម្មមិនមែនកាត់ដេរដែលរួមមានម្ហូបអាហារ និងភេសជ្ជៈ គ្រឿងផ្គុំអេឡិចត្រូនិក គ្រឿងបន្លាស់ គ្រឿងសង្ហារិមជាដើម ទោះបីជាវិស័យកាត់ដេរ និងវិស័យសំណង់មានកំណើនថយចុះបន្តិចក្តី។ 3.កំណើនវិស័យសេវាកម្មប្រមាណជា 6.5% ដោយសារកំណើនលើវិស័យទូរគមនាគមន៍ លក់ដុំនិងលក់រាយ ទោះបីជាមានការបន្តថយចុះកំណើននៃវិស័យអចលនទ្រព្យ និងវិស័យទេសចរណ៍ក្តី។

    ឯកឧត្តមបញ្ជាក់ថា ក្របខ័ណ្ឌម៉ាក្រូសេដ្ឋកិច្ចកម្ពុជានៅតែបន្តមានស្ថិរភាព និងកាន់តែមានភាពរឹងមាំ។ ជាក់ស្តែងកម្ពុជាបានគ្រប់គ្រងអត្រាអតិផរណាឱ្យស្ថិតក្នុងកម្រិតអាចគ្រប់គ្រងបាន ពោលគឺប្រមាណ3.5% ក្នុងឆ្នាំ2017នេះ និងប្រមាណជា3.8% ក្នុងឆ្នាំ 2018 ទោះបីជាតម្លៃប្រេង និងម្ហូបអាហារមានការកើនឡើងបន្តិចក្តី៕

  • យុវជនកម្ពុជា នឹងមានឱកាសរៀនជំនាញប្រឆាំងអំពើពុករលួយ

    យុវជនកម្ពុជា នឹងមានឱកាសរៀនជំនាញប្រឆាំងអំពើពុករលួយ

    អង្គការតម្លាភាពកម្ពុជា ក្រោមការឧបត្ថម្ភរបស់សហភាពអឺរ៉ុប និងរដ្ឋាភិបាលស៊ុយអែដ បានប្រកាសផ្តល់អាហារូបករណ៍លើជំនាញប្រឆាំងអំពើពុករលួយ (anti-corruption academy)ដែលមិនធ្លាប់មានពីមុនមកនៅកម្ពុជាដល់យុវជនខ្មែរ ដើម្បីទៅសិក្សានៅទីក្រុងកូឡាឡាំពួរ ប្រទេសម៉ាឡេស៊ី។

    គោលបំណងសំខាន់របស់កម្មវិធីនេះ គឺផ្តល់ជូននូវឱកាសឱ្យយុវជនកម្ពុជាដែលមានភាពជាអ្នកដឹកនាំ និងមានសក្តានុពល ដើម្បីបានសិក្សាអំពីការប្រឆាំងអំពើពុករលួយ និងអភិបាលកិច្ចល្អ។ យុវជនដែលបានបញ្ចប់ការសិក្សាលើវគ្គទាំងអស់នោះ នឹងអាចក្លាយជាអ្នកជំនាញប្រឆាំងអំពើពុករលួយនៅថ្ងៃអនាគត។

    បេក្ខជនដែលអាចដាក់ពាក្យបានគឺត្រូវតែជាអ្នកដែលមិនទាន់បញ្ចប់ការសិក្សា និងមានអាយុចាប់ពី ១៨ដល់ ២៣ឆ្នាំ។
    ពួកគេអាចជាយុវជននៃគម្រោងរបស់អង្គការតម្លាភាពកម្ពុជាដែលមានចំណេះដឹងផ្នែកភាសាអង់គ្លេសបានល្អ ហើយមានសក្តានុភាពក្នុងការប្រយុទ្ធប្រឆាំងអំពើពុករលួយ។ លក្ខខណ្ឌមួយទៀតគឺ ពួកគេត្រូវតែធ្វើការងារហាត់ការនៅអង្គការតម្លាភាពកម្ពុជារយៈពេល ៣ ខែបន្ទាប់ពីត្រឡប់មកពីសិក្សានៅប្រទេសម៉ាឡេស៊ីវិញ។

    យុវជនទាំងអស់ត្រូវដាក់ពាក្យឱ្យបានមុនថ្ងៃទី 01 ខែកក្កដា ឆ្នាំ2017 ហើយវគ្គបណ្តុះបណ្តាលនឹងត្រូវចាប់ផ្តើមចាប់ពីខែកក្កដា រហូតដល់ចុងខែសីហា ឆ្នាំ២០១៧៕

  • Lukaku យល់ព្រមលើលក្ខខណ្ឌផ្សេងៗរួចស្រេចហើយដើម្បីចូលរួមជាមួយក្លិបថ្មី

    Lukaku យល់ព្រមលើលក្ខខណ្ឌផ្សេងៗរួចស្រេចហើយដើម្បីចូលរួមជាមួយក្លិបថ្មី

    ខ្សែប្រយុទ្ធ Romelu Lukaku របស់ក្រុមទូកក្តោង Everton បានយល់ព្រមលើលក្ខខណ្ឌផ្ទាល់ខ្លួនផ្សេងៗ ដើម្បីចូលរួមជាមួយនឹងក្លិបថ្មីមួយរួចជាស្រេចហើយ ដែលត្រូវបានគេជឿជាក់ថា ជាក្លិបតោខៀវ Chelsea ដែលជាម្ចាស់ជើងឯកក្របខ័ណ្ឌ Premier League។

    ខ្សែប្រយុទ្ធអន្តរជាតិបែលហ្ស៊ិកវ័យ២៤ឆ្នាំរូបនេះ បានចាកចេញពីក្លិបតោខៀវ កាលពីឆ្នាំ២០១៤ ក្រោយពីបានចំណាយពេលអស់៣រដូវកាលនៅឯកីឡដ្ឋាន Stamford Bridge។ កាលព្រឹកថ្ងៃអង្គារ Lukaku បានប្រាប់ទូរទស្សន៍ Sky Sports ថា៖ «ភ្នាក់ងារតំណាងរបស់ខ្ញុំដឹងពីអ្វីដែលនឹងកើតឡើង ហើយខ្ញុំក៏ដឹងយ៉ាងច្បាស់ផងដែរ។ ខ្ញុំកំពុងតែស្ថិតក្នុងអារម្មណ៍ស្ងប់ចំពោះរាល់អ្វីៗទាំងអស់ ហើយយើងបានឈានដល់ការព្រមព្រៀងគ្នាមួយជាមួយនឹងក្លិបថ្មីមួយរួចជាស្រេច។ យើងបានរក្សានូវអារម្មណ៍ស្ងប់ ហើយយ៉ាងហោចណាស់ យើងមានគោលដៅមួយដែលយើងចង់ទៅ»។

    ខ្សែប្រយុទ្ធរូបនេះបានបន្ថែមទៀតថា៖ «ខ្ញុំនឹងសម្រាករយៈពេលប៉ុន្មានថ្ងៃ ហើយបន្ទាប់មក ត្រៀមសម្រាប់ការប្រកួតនៅរដូវកាលក្រោយ។ ខ្ញុំចង់ចំណាយពេលវេលាក្នុងថ្ងៃវិស្សមកាលរបស់ខ្ញុំដើម្បីធ្វើឲ្យអ្វីៗឈានទៅកាន់កម្រិតមួយផ្សេងទៀត និងធ្វើឲ្យបានល្អប្រសើរជាងអ្វីដែលខ្ញុំបានធ្វើកាលពីឆ្នាំមុន»។ Lukaku ត្រូវបានខ្ចីជើងទៅកាន់ក្លិប West Brom បន្ទាប់មកត្រូវខ្ចីជើងទៅកាន់ក្លិប Everton ទៀត មុនពេលត្រឡប់មកចូលរួមជាមួយនឹងក្រុមទូកក្តោងមួយនេះវិញ ក្នុងកិច្ចសន្យាជាអចិន្ត្រៃយ៍ក្នុងតម្លៃខ្លួន២៨លានផោន កាលពីឆ្នាំ២០១៤។

    Everton ត្រូវបានរំពឹងទុកថា នឹងទាមទារតម្លៃខ្លួនដល់ទៅ១០០លានផោន (ស្មើនឹង១២៩លានដុល្លារអាមេរិក) សម្រាប់ Lukaku ដែលបានរកគ្រាប់បាល់ស៊ុតបញ្ចូលទីសរុប២៦គ្រាប់ ក្នុងការបង្ហាញខ្លួន៣៩លើកក្នុងរដូវកាលឆ្នាំ២០១៦-២០១៧៕
    ប្រភពពី៖ The Sun

  • លោកឧកញ៉ា ចេង ខេង តស៊ូពីក្រុមហ៊ុនខាត សល់លុយត្រឹមតែ 10ដុល្លារ ក្លាយជាក្រុមហ៊ុនភ្នាក់ងារអចលនទ្រព្យធំជាងគេនៅកម្ពុជា

    លោកឧកញ៉ា ចេង ខេង តស៊ូពីក្រុមហ៊ុនខាត សល់លុយត្រឹមតែ 10ដុល្លារ ក្លាយជាក្រុមហ៊ុនភ្នាក់ងារអចលនទ្រព្យធំជាងគេនៅកម្ពុជា

    សុភាសិត​របស់​ព្រះ​ភិរម្យ​ភាសា​អ៊ូ (ក្រម​ង៉ុយ) បាន​លើក​ឡើង​ថា​ «ចេះ​ស្ទាក់​ស្ទើរ​ល្ងីល្ងើ​ឥត​បទ ចេះ​ប្រាកដ​ប្រាក់​រត់​តាម​ហៅ» តួយ៉ា​ង​ដូច លោក​ឧកញ៉ា ចេង ខេង អគ្គ​នាយក​ក្រុមហ៊ុន​អចលន​ទ្រព្យ ស៊ីភីអិ​ល ខេមបូឌា ប្រភើធី លីមីតធីត ដើមឡើយ​ក្រុម​ហ៊ុន​របស់​លោក​បាន​ក្ស័យ​ធន​អស់​ដើម​អស់​ចុង​គ្មាន​សល់ ហើយ​ដៃគូ​ក៏​រត់​ចោល​​ទៀត ដោយ​នៅ​ពេល​នោះ​​ក្រុម​ហ៊ុន​នៅ​សល់តែ​ 10ដុល្លារ​ប៉ុណ្ណោះ ប៉ុន្តែ​ដោយសារការ​ខិត​ខំ​ប្រឹង​ប្រែង​លោក​ឧកញ៉ា ​​ក៏​ទទួលបាន​ការទុកចិត្តពី​​ដៃគូ​ថ្មី ដើម្បី​អភិវឌ្ឍន៍​ក្រុមហ៊ុន​ឱ្យ​រីកចម្រើន​ឡើង​វិញ​​។

    លោក​ឧកញ៉ា ​មានប្រសាសន៍​ថា នៅក្នុង​ឆ្នាំ​1997 លោក​ឧកញ៉ា​បាន​ជួប​វិនិយោគិន​អាមេរិក​កាំង​ម្នាក់​ឈ្មោះ ចូ លូ​ខី​ន ដែលជា​អ្នកជំនួញ​ដ៏​មានសក្តានុពល​ខាង​វិស័យ​អចលនទ្រព្យ និង​មាន​ក្រុមហ៊ុន​ដែលជា​​សាខា​នៅ​​ប្រទេស​​ថៃ ហុងកុង និង​ហ្វីលីពីន។ លោក ចូ លូ​ខី​ន គឺ​ជា​អ្នក​ចាប់​អារ​ម្ម​ណ៍ដំបូងគេ​បង្អស់​មកលើ​រូបលោក​ក្នុង​ការ​​ចូល​រួម​សហការ​វិនិយោគ​លើ​វិស័យអចលន​ទ្រព្យ​នៅ​កម្ពុជា។ បន្ទាប់​មក​ក៏មាន​ការព្រមព្រៀង​បណ្តាក់​ទុន​វិនិ​យោគ​​រួមគ្នា​លើ​វិស័យ​អចលនទ្រ​ព្យ​នេះដោយ​លោក​ឧកញ៉ា ​ត្រូវបានតែងតាំង​ជា​អគ្គនាយក​ក្រុមហ៊ុន​អ​ចលន​ទ្រព្យ ស៊ី​ភី​អិ​ល ខេមបូឌាប្រភើធី លីមីតធីត ជា​មួយ​នឹង​​ទុនវិនិយោគ​រួមគ្នា​ដំបូង​ក្នុង​ទឹកប្រាក់​ប្រមាណ​​3ម៉ឺន​ដុល្លារ​ ។

    បន្ទាប់​ពី​​បាន​បោះទុន​រួចមក​ នៅ​អំឡុង​ឆ្នាំ1997 វិស័យ​អចលនទ្រព្យ​ពុំមាន​សន្ទុះ​ងើបឡើង​នោះ​ទេ​នៅ​កម្ពុជា ដែល​ជា​ហេតុ​ធ្វើ​ឱ្យ​​ក្រុមហ៊ុន​របស់​លោក​ដែល​ទើប​បង្កើត​ថ្មី​ជាមួយ​ជនជាតិ​អាមេរិកកាំង​​​ត្រូវ​​ខាតបង់​ជា​រឿយ​​ដល់​ទៅ​រាប់ម៉ឺន​ដុល្លារ ពោល​គឺ​មិនតិចជាង​7​ម៉ឺន​ដុល្លារ​នោះឡើយ​​។ នៅ​ពេល​នោះ​​លោក​ត្រូវ​​បាត់បង់​ទំនុក​ចិត្ត​​ពី​ដៃគូ​វិនិយោគ​ជាច្រើន ហើយក៏​មានការ​ថ្នាំងថ្នាក់ខ្លះៗជាមួយ​ក្រុមគ្រួសារ​ផងដែរ រហូតដល់​ជនជាតិ​អាមេរិក​កាំង​​នោះ​សម្រេច​​ចាក​ចេញពី​ក្រុមហ៊ុន​ដោយ​មិនបាន​ប្រាប់​អ្វី​ដល់​លោក​មួយ​ម៉ាត់​ឡើយ គឺ​​​បាន​ត្រឹម​តែ​ផ្ញើ​​​អុីមែល​ប្រាប់​ឱ្យ​លោក​​ប្រឹងប្រែង​តស៊ូ​បន្តទៀត ​ហើយ​ប្រសិន​បើបាន​ជោគជ័យ​នោះ លោក​នឹង​ក្លាយជា​មនុស្ស​ពូកែ​ស្ទើរ​រក​ដៃគូ​ប្រកួតប្រជែង​មិនបានឡើយ​។ ខ្លឹមសារ​នៃ​សារ​អេ​ឡិ​ច​ត្រូ​និក​នោះ​បាន​​សរសេរថា «ពេលនេះ​ទូក​កំពុង​លិច​លង់​​នៅ​កណ្តាល​មហា​សាគរ​គ្មាន​កោះ​ត្រើយ ប្រសិន​បើ​អ្នក​​អាច​ស្រង់​ទូក​នោះ​វិញ​បាន អ្នកនឹង​ក្លាយទៅជា​មនុស្ស​​ដ៏​ពូកែ​អស្ចារ្យបំផុត​»។

    ក្រោយពេល​ទទួលបាន​សា​រអេឡិច​ត្រនិក​នេះ ​ភាព​អស់សង្ឃឹម​កាន់តែខ្លាំង​បាន​ធ្លាក់​មកលើ​​រូប​លោក ដែល​ធ្វើឱ្យ​លោក​រស់​នៅ​​ឯកោ​ ស្ទើរ​គ្មាន​អ្នក​រាប់រក​ប្រៀបដូចជា​ទូក​កំពុងលិច​នៅ​កណ្តាល​សមុទ្រ​។ តែ​ទោះ​បី​ជា​​​មានរឿង​កើត​ឡើង​​ចំពោះ​ខ្លួន​ដូច្នេះ​ក្តី ​លោក​នៅតែ​តាំងចិត្ត​ថា​ ត្រូវតែ​​ដើរទៅ​មុខ​ឱ្យដល់​គោលដៅ និង​ធ្វើ​យ៉ាង​ណា​​​ស្រោច​ស្រង់​ក្រុមហ៊ុន​ឱ្យ​ងើបឈរ​ឡើងវិញ​។ យ៉ាងណា​ក៏​ដោយ​​នៅ​ថ្ងៃមួយ​ខណៈពេលដែល​លោកកំពុង​​ពិបាកចិត្តខ្លាំង ​ស្រាប់​តែមាន​គ្រូទាយ​ជនជាតិ​ឥណ្ឌា​ម្នាក់​បានមក​ដល់​ការិយាល័យ​ធ្វើការ​របស់លោក ហើយ​និយាយ​ថា៖ «​លោក​គឺជា​មនុស្ស​ដែលមាន​សំណាង មាន​លុយ​កាន់​ក្នុង​ដៃ​ច្រើន​សឹង​ចាយ​មិន​អស់ និង​មាន​ឡាន​ទំនើប​ជិះ​នៅត្រឹម​រយៈ​3ទៅ​4ខែ​ខាងមុខ​ទៀត​​»។

    ពាក្យសម្តីរបស់​​គ្រូទាយ​នេះ​បានធ្វើឱ្យ​លោក​រឹតតែ​ខកចិត្ត​ខ្លាំង ដោយហេតុថា​ក្រុមហ៊ុន​កំពុង​ក្ស័យធន មិន​​មាន​ទុនបម្រុង​សោះ​សូម្បី​តែមួយ​កាក់​មួយ​សេន ចំណែក​លុយ​សល់​ក្នុង​ក្រុមហ៊ុន​មានតែ 10ដុល្លា​រប៉ុណ្ណោះ រីឯ​​ឡាន​កញ្ចាស់​ដែល​លោក​កំពុង​ប្រើប្រាស់​ពេលនោះ​ស្ទើ​តែ​ប្រើ​លែងកើត​ទៀត តើ​ឱ្យ​លោក​សង្ឃឹម​អ្វី​ទៀត​ទៅលើ​ពាក្យ​គ្រូទាយ​ដែលថា​មាន​លុយ​ចាយ​មិន​អស់នោះ?

    យ៉ាង​ណា​ក៏ដោយ​ពាក្យ​ថា ​អាគម​ផ្សំ​អាយុ គឺ​ពិតជា​ដូច​គ្រូទាយ​ឥណ្ឌា​ទស្ស​ទាយ​ជើង​លេខ​មើលឃើញ​ជោគវាសនា​របស់លោក​មែ​ន គឺ​ស្រាប់តែ 3ខែ​កន្លងផុតទៅ​លោក​បាន​ជួបជា​មួយ​វិនិយោគិន​បរទេស​មួយទៀត ដែល​​មាន​​ទំនុកចិត្ត​លើ​រូបលោក ហើយ​បាន​បោះទុន​វិនិយោគ​មក​លើ​ក្រុមហ៊ុន ស៊ី​ភី​អិ​ល ខេមបូឌា ​ប្រភើធី លីមីតធីត ចំនួន ​5ម៉ឺន​ដុល្លារ សម្រាប់​ជា​ទឹកមន្ត​ប្រោស​ឱ្យ​លោក​មាន​ក្តីសង្ឃឹម​ឡើងវិញ​ជាថ្មី និង​អាច​បន្ត​អាជីព​លើ​ការដឹកនាំ​ការងារ​ខាង​ផ្នែក​អចលន​​ទ្រព្យ​នៅ​កម្ពុជា​បន្តទៀត ហើយ​ទទួលបាន​ជោគជ័យ​ជា​បន្តបន្ទាប់ រហូត​បាន​ក្លាយជា​ក្រុមហ៊ុន​ផ្តល់​សេវាកម្ម​​អចលន​​ទ្រព្យ​ដ៏​មាន​សក្តានុពល​មួយ​ក្នុងចំណោម​ក្រុមហ៊ុន​ចំនួន​ជាង​ 90​ដែល​កំពុង​វិនិយោគលើ​​វិស័យនេះនៅ​កម្ពុជា​។

    និយាយ​ពី​ការងារ​នាពេល​បច្ចុប្បន្ន​វិញ លោកឧកញ៉ា ​គឺ​ជា​អគ្គនាយក​ក្រុមហ៊ុន​អចលនទ្រព្យ ស៊ីភីអិ​ល ខេ​ម​បូ​ឌា ប្រ​ភើ​ធី លីមីត​ធី​ត ដែលជា​ភ្នាក់ងារ​ផ្តល់​សេវាកម្ម​ទិញ​លក់ និង​វាយតម្លៃ​​ផ្នែក​អចលន​ទ្រព្យ​ដូចជា ​ទិញ​លក់​អគារ ដីធ្លី ផ្ទះល្វែង ខុន​ដូ លំដាប់ ​VIP ឈានមុខ​គេ​មួយ​នៅ​កម្ពុជា ដោយមកទល់ពេលនេះ​មាន​ក្រុមហ៊ុន និង​​​ភ្នាក់ងារ​ឯកជន​មិនតិចជាង ​5,000​ឡើយ​ ដែល​ទទួលយក​សេវា​កម្ម​ពី​ក្រុមហ៊ុន​ខាងលើ ប្រកបដោយ​ទំនុក​ចិត្ត ​និង​មាន​ភាពកក់ក្តៅ​បំផុត។ ​សេវា​កម្មនេះ​បានផ្តល់​ការងារ​ដល់​ប្រជាជន​ខ្មែរ​ប្រមាណ​ជិត​ 100នាក់ ហើយ​គ្រោង​នឹង​បង្កើត​ការងារ​សម្រាប់​ពលរដ្ឋ​ខ្មែរ​ឱ្យបាន​រហូតដល់ 5,000នាក់​នៅត្រឹម​ដំណាច់ឆ្នាំ​2020 ខាងមុខ។ បុគ្គលិក​​​ធ្វើ​ការ​ផ្នែក​នេះ​មិនចាំបាច់​មាន​សញ្ញា​ប​ត្រ​ផ្នែក​អចលនទ្រព្យ​នោះទេ សំខាន់​ឱ្យតែ​មា​នស​ញ្ញា-ប​ត្រ​ប្រហាក់​ប្រហែល មានការ​អត់ធ្មត់​ខ្ពស់ ស្មោះត្រង់ ​និង​ចង់បាន​ការរីកចម្រើន​ទាំង​ខ្លួនឯង និងក្រុមហ៊ុន​ប្រកបដោយ​ភាព​ស្មោះ​​ស្មគ្រ​នោះ គឺ​គ្រប់គ្រាន់​តាម​តម្រូវការ​ខាង​ផ្នែក​សេវាកម្ម​អចលន​ទ្រព្យ​​នេះហើយ៕

  • ក្រុមហ៊ុន Nokia ប្រចាំកម្ពុជា ចែកលិខិតអញ្ជើញសម្ពោធស្មាតហ្វូនស៊េរីថ្មីបំផុតនៅសប្ដាហ៍ក្រោយ

    ក្រុមហ៊ុន Nokia ប្រចាំកម្ពុជា ចែកលិខិតអញ្ជើញសម្ពោធស្មាតហ្វូនស៊េរីថ្មីបំផុតនៅសប្ដាហ៍ក្រោយ

    ដូចអ្វីដែលក្រុមការងារគេហទំព័រ ឡារ៉ែន បានចុះផ្សាយកាលពីពេលកន្លងទៅស្ដីពីវត្តមានរបស់ស្មាតហ្វូនប្រើប្រព័ន្ធ Android របស់ក្រុមហ៊ុន Nokia នោះ ឥឡូវបានក្លាយជាការពិតហើយ ក្រោយពីបានពន្យាពេលតាំងពីចុងខែឧសភា ឆ្នាំ2017 ដោយពេលនេះ ក្រុមហ៊ុន Nokia ប្រចាំកម្ពុជា បានធ្វើការចែកលិខិតអញ្ជើញភ្ញៀវ និងអ្នកសារព័ត៌មានឱ្យចូលរួមកម្មវិធីសម្ពោធបង្ហាញស្មាតហ្វូនស៊េរីថ្មីរបស់ខ្លួនហើយ…។

    លិខិតអញ្ជើញដែលក្រុមការងារឡារ៉ែនទទួលបាន បានសរសេររៀបរាប់ថា ក្រុមហ៊ុន HMD Global មានកិតិ្ដយស សូមគោរពអញ្ជើញអ្នកសារព័ត៌មាន ចូលរួមជាភ្ញៀវកិត្តិយសក្នុងពិធីសម្ពោធដាក់លក់ Nokia ស្មាតហ្វូន និង Nokia 3310 ជំនាន់ថ្មី ដែលកម្មវិធីសម្ពោធនេះ នឹងធ្វើឡើងនៅថ្ងៃទី14 ខែមិថុនា ឆ្នាំ2017 ខាងមុខ នៅភោជនីយដ្ឋាន Topaz ដែលមានអសយដ្ឋានផ្ទះលេខ 162 មហាវិថីព្រះនរោត្ដម រាជធានីភ្នំពេញ។

    បើទោះបីជាក្នុងលិខិតអញ្ជើញមិនបានបញ្ជាក់ថា ក្រុមហ៊ុននឹងដាក់សម្ពោធស្មាតហ្វូនស៊េរីណាខ្លះក៏ដោយ ប៉ុន្តែយើងអាចទាយទុកមុនបានថា Nokia នឹងធ្វើការសម្ពោធនូវស្មាតហ្វូនប្រើ Android ចំនួន 3 ម៉ូដែល គឺទូរស័ព្ទ Nokia 3, Nokia 5 និង Nokia 6។

    សម្រាប់ព័ត៌មានបន្ថែម គេហទំព័រ ឡារ៉ែន នឹងជម្រាប់ជូននៅពេលក្រោយទៀត សូមកុំភ្លេចតាមដាន៕

  • ច្នៃរថយន្តធ្វើជាហាងកាហ្វេមិនទាន់បានកន្លះឆ្នាំផងមានគេសុំទិញ (Franchise) ទៅហើយ!!!

    ច្នៃរថយន្តធ្វើជាហាងកាហ្វេមិនទាន់បានកន្លះឆ្នាំផងមានគេសុំទិញ (Franchise) ទៅហើយ!!!

    យុវជនម្នាក់ បានចំណាយប្រាក់ប្រមាណជា 15,000ដុល្លារ ដើម្បីច្នៃរថយន្តធ្វើជាហាងកាហ្វេទំនើប ហើយដោយសារតែគុណភាព និងរសជាតិកាហ្វេឈ្ងុយឆ្ងាញ់ បានធ្វើឱ្យអតិថិជនមួយចំនួនជក់មាត់មកទិញពិសារាល់ថ្ងៃ និងស្នើសុំទិញ (Franchise) ទៅលក់បន្តទៀតផង។

    ហាងកាហ្វេដែលច្នៃពីរថយន្តខាងលើមានឈ្មោះថា Mini Brew Coffee មានទីតាំងនៅតាមបណ្តោយផ្លូវបេតុងជាប់របងសាលាកសិកម្មចំការដូង ស្ថិតក្នុងភូមិខ្វាខាងកើត សង្កាត់ដង្កោ ខណ្ឌដង្កោ រាជធានីភ្នំពេញ ដែលម្ចាស់ជាយុវជនវ័យក្មេងម្នាក់ឈ្មោះ ហា សោមធនាំង ជាអ្នកមានបទពិសោធឆុងកាហ្វេមកពីប្រទេសកូរ៉េខាងត្បូង។

    ម្ចាស់ហាងកាហ្វេវ័យក្មេងយុវជន សោមធនាំង បានផ្តល់បទសម្ភាសថា ការច្នៃរថយន្តធ្វើហាងកាហ្វេនេះមិនមែនជារឿងចៃដន្យ ឬធ្វើទៅតាមចិត្តនឹកឃើញនោះទេ តែការច្នៃរថយន្តធ្វើជាហាងនេះ គឺអាចចល័តទៅលក់បានគ្រប់ទីកន្លែង ប៉ុន្តែដោយសារការសាកល្បងលើទីតាំងដំបូងនេះមានការគាំទ្រពីអតិថិជនច្រើនទើបមិនមានការផ្លាស់ទៅកាន់កន្លែងផ្សេងៗ។ សហគ្រិនវ័យក្មេងខាងលើបញ្ជាក់ថា «ហាងនេះទើបតែបើកបានជាង 2ខែប៉ុណ្ណោះ តែដោយសារការច្នៃប្រឌិត ធ្វើហាងអំពីរថយន្ត គួបផ្សំគុណភាព និងរសជាតិឈ្ងុយឆ្ងាញ់ មិនចាញ់កាហ្វេតាមហាងទំនើបផ្សេងៗនោះ ធ្វើឱ្យអតិថិជនមានការគាំទ្រច្រើនឡើងៗ ទាំងប្រជាជនខ្មែរ និងបរទេស ដោយសារផ្លូវនេះមានជនបរទេសធ្វើដំណើរទៅមកឥតដាច់ឆ្ពោះទៅទស្សនាសារមន្ទីរជើងឯក ហើយពេលមកដល់ភ្ញៀវទេសចរតែងសម្រាកពិសាកាហ្វេ ជាបន្តបន្ទាប់ជារៀងរាល់ថ្ងៃ មិនតែប៉ុណ្ណោះមានអតិថិជន4នាក់ទៅហើយដែលបានស្នើសុំទិញឈ្មោះ និងរូបមន្ត(Franchise)យកទៅបើកលក់បន្តទៀត»។

    យុវជនខាងលើដដែលបានបន្តទៀតថា មុននឹងសម្រេចចិត្តបើកហាងនេះឡើង គឺខ្លួនបានសិក្សាពីវិធីសាស្រ្តឆុងកាហ្វេនៅសាលាអ៊ីតាលី ហើយធ្លាប់ធ្វើការក្រៅម៉ោងជាអ្នកឆុងកាហ្វេនៅប្រទេសកូរ៉េអស់រយៈពេល3ឆ្នាំមកហើយ។ ក្រោយពីត្រឡប់ពីប្រទេសក្រៅមកវិញ ខ្លួនបានដើរធ្វើតេស្តរកកាហ្វេណាដែលមានរសជាតិឆ្ងាញ់ដើម្បីយកមកលក់ជូនអតិថិជននៅក្នុងភូមិក៏ដូចជាអ្នកដំណើរទូទៅ និងបានភ្លក្សរសជាតិកាហ្វេឆ្ងាញ់គ្មានជាតិគីមីដូចកាហ្វេតាមដងផ្លូវមួយចំនួន «ខ្ញុំបានដើរធ្វើតេស្តគ្រាប់កាហ្វេជាច្រើន ចុងក្រោយខ្ញុំបានសម្រេចចិត្តរើសយកកាហ្វេនាំចូលពីប្រទេសបារាំង និងអូស្រ្តាលី យកមកឆុងជាមួយម៉ាស៊ីនទំនើបទើបមានរសជាតិឆ្ងាញ់ និងមានការគាំទ្រពីអតិថិជនច្រើនមួយថ្ងៃចន្លោះពី 30ទៅដល់50 នាក់ឯណោះ»។

    ដោយសារតែគុណភាព និងរសជាតិដ៏ឈ្ងុយឆ្ងាញ់នៃកាហ្វេ Mini Brew Coffee នេះអតិថិជនមួយចំនួនបានមកសុំទិញឈ្មោះ(Franchise) និងសុំរៀនពីរបៀបឆុងកាហ្វេនេះ ប៉ុន្តែដោយសារហាងខាងលើនៅមិនទាន់បានចុះបញ្ជីនៅក្រសួងពាណិជ្ជកម្ម ទើបមិនទាន់អាចលក់(Franchise) បន្តបាន។ យ៉ាងណាក៏ដោយយុវជនខាងលើបន្តថា ខ្លួននឹងសុំចុះបញ្ជីនៅឯក្រសួងក្នុងពេលឆាប់ៗ ហើយនឹងពង្រីកសាខាឱ្យបានកាន់តែច្រើន ដើម្បីឱ្យឃើញពីស្នាដៃកូនខ្មែរ ហើយអនាគតខ្លួនមានបំណងយកឈ្មោះនេះទៅបើកនៅសហរដ្ឋអាមេរិកទៀតផង។

    សូមបញ្ជាក់ថា ហាងកាហ្វេ Mini Brew Coffee មានកាហ្វេរសជាតិច្រើនប្រភេទ រួមមានរសជាតិ អេស្រ្ពេសសូ អាមេរិកខិនណូ កាពូឈីណូ កាហ្វេឡាតេ ជាដើម ហើយមិនតែប៉ុណ្ណោះមានទាំងតែបៃតង តែបៃតងក្រឡុក ក្រឡុកផ្លែឈើដែលមានរសជាតិដើមពីប្រទេសបារាំង និងប្រទេស អូស្រ្តាលីពិតៗទៀតផង៕

  • អាគារខុនដូ អ័រគីដេ ឌឹរ៉ូយ៉ាល់ខុនដូមីនីមផ្ដល់សិទ្ធិសាងសង់ឱ្យក្រុមហ៊ុន CHINA CONSTRUCTION (S.E.A)

    អាគារខុនដូ អ័រគីដេ ឌឹរ៉ូយ៉ាល់ខុនដូមីនីមផ្ដល់សិទ្ធិសាងសង់ឱ្យក្រុមហ៊ុន CHINA CONSTRUCTION (S.E.A)

    ដើម្បីបង្ហាញទៅកាន់សាធារណជនឱ្យបានឃើញពីការយកចិត្តទុកដាក់ខ្ពស់របស់ក្រុមហ៊ុនអ័រគីដេវីឡាក្នុងការជ្រើសរើសយកក្រុមហ៊ុនសាងសង់សំណង់អគារខុនដូរបស់ខ្លួន ប្រកបដោយស្តង់ដារអន្តរជាតិ និងមានភាពទទួលខុសត្រូវគួរឱ្យជឿទុកចិត្តខ្ពស់ មកធ្វើជាដៃគូសហការក្នុងការសាងសង់ ក្រុមហ៊ុនបានរៀបចំពិធីចុះហត្ថលេខាលើកិច្ចសន្យាសាងសង់ជាមួយក្រុមហ៊ុនចិនមួយ។

    កាលព្រឹកថ្ងៃទី5 ខែមិថុនា ឆ្នាំ2017ម្សិលមិញ លោកស្រី ខៀវ សរស៊ីលៀប អគ្គនាយិកាប្រតិបត្តិទូទៅ តំណាងឱ្យក្រុមហ៊ុន អ័រគីដេវីឡា បានរៀបចំពិធីចុះហត្ថលេខាលើកិច្ចសន្យាការសាងសង់អគារខុនដូរបស់ខ្លួន គឺគម្រោង អ័រគីដេ ឌឹរ៉ូយ៉ាល់ខុនដូមីនីម (Orkide The Royal Condominium ) រវាងក្រុមហ៊ុន អ័រគីដេវីឡា ជាមួយលោក Zhang Zongshuo ជានាយកគ្រប់គ្រង(chairman) នៃក្រុមហ៊ុនសាងសង់ CHINA CONSTRUCTION (S.E.A) ដោយទីតាំងគម្រោងស្ថិតនៅតាមបណ្តោយផ្លូវ 2004 ក្បែរសាលាអន្តរជាតិណតប្រ៊ីដ។

    លោកស្រី ខៀវ សរស៊ីលៀប អគ្គនាយិកាប្រតិបត្តិទូទៅ តំណាងឱ្យក្រុមហ៊ុន អ័រគីដេវីឡា បានលើកឡើងថា ពិធីនេះជាសក្ខីភាពបង្ហាញឱ្យឃើញការយកចិត្ដទុកដាក់ទៅលើគុណភាពនៃសំណង់ និងការសម្រេចចិត្ដដ៏ត្រឹមត្រូវរបស់យើងក្នុងជ្រើសរើសក្រុមហ៊ុនសំណង់យកមកសាងសង់ក្នុងគម្រោង អ័រគីដេ ឌឹរ៉ូយ៉ាល់ខុនដូមីនីម។

    ជាមួយគ្នានេះលោកស្រីបញ្ជាក់ថា៖” CHINA CONSTRUCTION (S.E.A) ជាក្រុមហ៊ុនដែលពួកយើងបានស្គាល់យ៉ាងច្បាស់ថា ជាក្រុមហ៊ុនដែលសាងសង់សំណង់កម្រិតស្ដង់ដារអន្ដរជាតិ។ ដូច្នេះខ្ញុំក៏សូមសំណូមពរដល់សហការីរបស់យើងធ្វើការសហការជាមួយក្រុមហ៊ុននេះធ្វើយ៉ាងណាឱ្យទទួលបានការងារដំណើរការទៅមុខរលូន និងទទួលបានជោគជ័យទាំងអស់គ្នាតាំងពីថ្ងៃចាប់ផ្ដើមរហូតដល់ថ្ងៃបញ្ចប់”។

    សូមបញ្ជាក់ថា អគារខុនដូ ORKIDE THE ROYAL CONDOMINIUM បានសម្ភោធបើកលក់ជាផ្លូវការកាលពីថ្ងៃទី05 ខែតុលា ឆ្នាំ2016 មកម្ល៉េះ ដោយបច្ចុប្បន្នបានកំពុងបើកលក់អគារទី3 របស់ខ្លួន ខណៈអគារទី1 និងទី2 បានលក់អស់ហើយក្នុងចំណោមអគារចំនួន 6 ដែលមានអាងហែលទឹកទំហំធំ សួនលម្ហែកាយ ផ្សារទំនើបខ្នាតអន្តរជាតិ ចំនួន 2ជាន់ ព្រមទាំងទីកន្លែងកម្សាន្តជាង100កន្លែង ជាច្រើនទៀត៕

     
  • តារាឯកស្រី ផេត ណាប៉ាផា បីកូនសម្រក់ទឹកភ្នែកព្រោះខ្លាចគ្មានការងារធ្វើ

    តារាឯកស្រី ផេត ណាប៉ាផា បីកូនសម្រក់ទឹកភ្នែកព្រោះខ្លាចគ្មានការងារធ្វើ

    ចាប់តាំងពីជាប់ពាក់ព័ន្ធក្នុងករណីរឿងក្ដីជួញដូរគ្រឿងញៀនជាមួយស្វាមីមក តារាឯកស្រីថៃ នាង ផេត ណាប៉ាផា បានធ្លាក់ប្រជាប្រិយភាពជាខ្លាំង និងបានបាត់បង់ការងារជាច្រើន ដែលធ្វើឱ្យនាងខាតបង់ចំណួលពីសិល្បៈយ៉ាងមហាសាល ព្រោះថា កាលពីនាងនៅមានប្រជាប្រិយភាព នាងគឺជាដៃគូល្បីមួយរូបជាមួយតារាចម្រៀង និងសម្ដែង តូ ណូ ដែលអ្នកទាំងពីរត្រូវបានមហាជនទទួលស្គាល់ និងគាំទ្ររហូតមក។

    នៅគ្រានេះ តារាស្រី ផេត ណាប៉ាផា បានបីកូនប្រុសមានឈ្មោះ ណង រ៉េតស៊ីង សម្រក់ទឹកភ្នែកមកស្រស់ៗតែម្ដងដែលមិនមែនជាការសម្ដែង ជាមួយនឹងការផ្ដល់បទសម្ភាសនៅក្នុងកម្មវិធី WOODYTALK ថា “ ដឹងទេថា នៅក្នុងមួយជីវិតនេះ នាងខ្ញុំខ្លាចអ្វីជាងគេ? គឺនាងខ្ញុំខ្លាចរឿងគេដកអភ័យឯកសិទ្ធិ ព្រោះនៅពេលមានរឿង នាងខ្ញុំគឺជាអ្នកតំណាងផលិតផល ព្រមទាំងមានឈ្មោះជាអ្នកលក់ផលិតផលនោះដោយខ្លួនឯងទៀតផង តែស្រាប់តែមកត្រូវគេបញ្ឍប់ភ្លាមៗ តើគួរធ្វើយ៉ាងដូចម្ដេច ? “ ។

    ខណៈដែលតារាស្រីល្បីឈ្មោះរូបនេះ និយាយរៀបរាប់បណ្ដើរ ពកូនបណ្ដើរនោះ នាងបានអួលដើមកជាខ្លាំង លុះទប់អារម្មណ៍មិនបានក៏សម្រក់ទឹកភ្នែកនៅចំពោះមុខពិធីករព្រមទាំងពោលថា “ នាងខ្ញុំខ្លាចអត់មានការងារធ្វើ គឺថា នាងខ្ញុំនៅមានម្ដាយ មានបង មែនទេ? ហើយនាងខ្ញុំថែមទាំងមានកូនទៀត ពិតជាគួរឱ្យភ័យខ្លាចណាស់ “ ។ នាងបានបន្ដថា នៅពេលនេះកូនប្រុសមិនបានជួបមុខឪពុក 7 ថ្ងៃហើយ តែសំណាងល្អដែលកូនងាយស្រួលចិញ្ចឹម ហើយក៏អរគុណសម្រាប់កម្លាំងចិត្តទាំងអស់ផងដែរ ។

    គួរបញ្ជាក់ផងដែរថា នៅខណៈនេះជីវិតរបស់តារាស្រីរូបនេះបានផ្លាស់ប្ដូរទាំងស្រុង រហូតដល់មានសារព័ត៌មានថៃខ្លះបានចុះផ្សាយថា តើនាងនឹងត្រូវរឹងមាំដល់កម្រិតណា ឪពុកស្លាប់? ម្ដាយឈឺ? បងពិការ? ប្ដីជាប់គុក? ដើម្បីជាការទាក់ទាញអ្នកអាន តែនាងបានពោលប្រាប់អ្នកសារព័ត៌មានថា សូមមេត្តាយោគយល់នាងផង នាងសូមអង្វរ ៕

  • iPad Pro ថ្មី 2 ម៉ូដែលរបស់ Apple មានរាងឡូយ និងសមត្ថភាពខ្លាំងកប់!

    iPad Pro ថ្មី 2 ម៉ូដែលរបស់ Apple មានរាងឡូយ និងសមត្ថភាពខ្លាំងកប់!

    ក្នុងព្រឹត្តិការណ៍ WWDC ឆ្នាំ 2017 កាលយប់ថ្ងៃចន្ទរំលងអធ្រាត្រចូលថ្ងៃទី 06 ខែមិថុនា ឆ្នាំ 2017 ក្រុមហ៊ុន Apple បានដាក់ចេញនូវសមិទ្ធផលជាច្រើនដែលក្រុមហ៊ុនសម្រេចបានរយៈពេលមួយឆ្នាំនេះ។ iPad Pro ជំនាន់ថ្មីមានទំហំ 10.5 អ៊ីញ និង 12.9 អ៊ីញ ត្រូវបានដាក់ចេញជាមួយនឹងសមត្ថភាពខ្លាំង ត្រូវចិត្តបំផុតសម្រាប់អ្នករចនា។

    អេក្រង់របស់ iPad Pro ទាំង 2 ម៉ូដែលត្រូវបាន Apple បញ្ជាក់ថា បានប្រើនូវបច្ចេកវិទ្យាចុងក្រោយគេ ដែលគ្មានក្រុមហ៊ុនណាមាន ទោះវាប្រើត្រឹមអេក្រង់ប្រភេទ IPS LCD ដដែលក៏ដោយ តែវាអាចបង្ហាញពណ៌បានដិតខ្លាំងជាមួយកម្រិត Brightness 600 nit ហើយក៏មានមុខងារ HDR ផងដែរ។ ក្នុងនោះ វាក៏អាចបង្ហាញរូបភាពដល់កម្រិត 120Hz ដែលល្អប្រសើរសម្រាប់ Gaming ធំៗ អាចដំណើរការបានដោយគ្មានបញ្ហា។

    ថេប្លេតថ្មីនេះ ប្រើនូវបន្ទះឈីប A10x មាន CPU ចំនួន 6 គ្រាប់ អាចដំណើរការបានលឿនជាងមុន 30% ហើយមាន GPU 12-core ដំណើរការល្អជាងមុន 40% ផងដែរ ហើយវាក៏មានមុខងារសាកថ្មលឿន Fast charging ដូចស៊េរីទូរស័ព្ទមួយចំនួន និងប្រើបានយូររហូតដល់ 10 ម៉ោងក្រោយពេលសាកពេញ។ អ្វីដែលពិសេសទៀតនោះ គឺវាមានសមត្ថភាពកាមេរ៉ាខ្លាំងដូចនឹងទូរស័ព្ទ iPhone 7ដែរ ដែលម្ដងនេះ វាមានទំហំរហូតដល់ 12 MP អាចថតរូបភាពបានលឿន ជាមួយ Aperture F/1.8 និងអាចថតវីដេអូបានដល់ទំហំ 4K។ ចំពោះលក្ខណៈសម្បត្តិផ្សេងៗរបស់ iPad Pro គឺមានដូចគ្នា ខុសតែអេក្រង់ប៉ុណ្ណោះ ដោយម៉ូដែល 10.5 អ៊ីញ មានតម្លៃប្រមាណ 649 ដុល្លារ ខណៈទំហំ 12.9 អ៊ីញមានតម្លៃ 799 ដុល្លារ ហើយម៉ូដែលប្រើស៊ឹមបានត្រូវបានតម្រូវឱ្យថែមប្រមាណ 130 ដុល្លារទៀត សម្រាប់ទីផ្សារនៅអាមេរិក៕

    https://youtu.be/UR5ODc5Wbbo