Author: វល័ក្ខ

  • បងប្អូនរស់នៅលើអគារប៊ុលឌិង-ស កំពុងហូបនំបញ្ចុកលាគ្នា

    បងប្អូនរស់នៅលើអគារប៊ុលឌិង-ស កំពុងហូបនំបញ្ចុកលាគ្នា

    ក្រោយពីមានការសម្របសម្រួលពីរដ្ឋមន្រ្ដីក្រសួងដែនដី នគរូបនីយកម្ម និងសំណង់ ជូនប្រជាពលរដ្ឋដែលរស់នៅលើអគារប៊ុលឌិងសរួចមក មានប្រជាពលរដ្ឋជាច្រើនគ្រួសារបានរើឥវ៉ាន់របស់ខ្លួនចេញជាបណ្ដើរៗ ហើយនៅថ្ងៃទី10 ខែមិថុនានេះផងដែរ ក្រសួងដែនដី នគរូបនីយកម្ម និងសំណង់ បានរៀបចំកម្មវិធី​ជប់លៀងលាគ្នា (ហូបនំបញ្ចុករួមគ្នា) ដោយមានការចូលរួមពីសំណាក់ប្រជាពលរដ្ឋដែលរស់នៅលើអគារប៊ុលឌិញ និងឯកឧត្ដមរដ្ឋមន្រ្ដីទេសរដ្ឋមន្រី្ដជា សុផារ៉ា។

    បើទោះបីជានៅក្នុងកម្មវិធីនេះ មានបងប្អូនប្រជាពលរដ្ឋរស់នៅក្នុងអគារប៊ុលឌិញ មកចូលរួមជាច្រើនក្ដី ក៏ប៉ុន្តែទឹកមុខរបស់ពួកគាត់ មិនសូវសប្បាយចិត្តឡើយ ព្រោះពួកគាត់នៅនឹកស្រណោះ អាល័យអាឡោះ ទីកន្លែងដែលធ្លាប់រស់នៅ ជាពិសេសគឺអនុស្សាវរីយ។ ជាក់ស្ដែងអ៊ុំស្រី ឌិត មុំ បានបង្ហាញអារម្មណ៍ពិតថា គាត់សប្បាយរីករាយ​នៅពេលដែលរដ្ឋាភិបាល ជាពិសេសគឺឯកឧត្ដមរដ្ឋមន្រ្ដីទេសរដ្ឋមន្រី្ដជា សុផារ៉ា បានផ្ដល់នូវដំណោះស្រាយល្អ ប៉ុន្តែ​អ៊ុំស្រី ក៏បង្ហាញអារម្មណ៍​សោកស្ដាយផងដែរ ព្រោះវាជាទីតាំងដែលគាត់ធ្លាប់រស់នៅអស់រយៈជាច្រើនឆ្នាំ ខណៈដែលអគារនេះនឹងត្រូវវាយកម្ទេចនៅក្នុងពេលឆាប់ខាងមុខនេះ ជាពិសេសគឺគាត់នឹកអាល័យអ្នកជិតខាងដែលធ្លាប់រស់នៅក្បែរគ្នា៕

  • ការទិញខុនដូមានឱកាសទទួលបានចំណូលខ្ពស់ជាងផ្ទះល្វែង?

    ការទិញខុនដូមានឱកាសទទួលបានចំណូលខ្ពស់ជាងផ្ទះល្វែង?

    ភ្នំពេញៈ អ្នកជំនាញអចលនទ្រព្យនានាបានលើកឡើងថា ការទិញខុនដូមានឱកាសចំណេញខ្ពស់ពីការវិនិយោគច្រើនជាងការទិញផ្ទះល្វែង ខណៈការផ្គត់ផ្គង់លំនៅដ្ឋានកើនឡើងកាន់តែច្រើន។

    លោក លី សែនលាភ អគ្គនាយកក្រុមហ៊ុន NAKI FURI បានថ្លែងឲ្យដឹងកាលពីពេលថ្មីៗនេះថា ការទិញខុនដូសម្រាប់ជួលមានឱកាសទទួលបានផលចំណេញខ្ពស់ ដោយអ្នកទិញអាចជួលឲ្យម្ចាស់ដើមវិញ ដើម្បីយកមកធ្វើជាសណ្ឋាគារសម្រាប់ជួល។ ជាក់ស្តែងអគារ Silver Town ទទួលបានឱកាសចំណេញខ្ពស់ ព្រោះអ្នកទិញ អាចជួលត្រឡប់ទៅឲ្យក្រុមហ៊ុនវិញ ដើម្បីទទួលបានចំណូលប្រចាំខែ។

    លោកបន្តថា «ខ្ញុំនៅតែមើលឃើញទីផ្សារជួលថានៅតែល្អសម្រាប់អ្នកទិញខុនដូសម្រាប់ជួលនាពេលបច្ចុប្បន្ននេះ»។ យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុបបានរកឃើញថា ចំនួនខុនដូផ្គត់ផ្គង់ចូលទីផ្សារ នឹងកើនឡើងដល់ជាង 36,000យូនីតនៅឆ្នាំ2020 ខាងមុខនេះ។

    លោកឧកញ៉ា នួន រិទ្ធី អគ្គនាយកក្រុមហ៊ុន Khmer Foundation Appraisal បានលើកឡើងស្រដៀងគ្នាថា រវាងការទិញផ្ទះល្វែង និងទិញខុនដូសម្រាប់ជួល ការទិញខុនដូទទួលបានប្រាក់ចំណេញពីការវិនិយោគ (return of investment ) ខ្ពស់ជាងការទិញផ្ទះល្វែង ឬវីឡាសម្រាប់ជួល ព្រោះផ្ទះជួលមានតម្លៃជួលទាប។ លោកបន្តថា ផ្ទះតម្លៃ 20ទៅ 30ម៉ឺនដុល្លារ អាចជួលបានតម្លៃ 7០០ទៅ 8០០ដុល្លារ តែទិញខុនដូតម្លៃ1០ ទៅ 15ម៉ឺនដុល្លារអាចជួលបានតម្លៃ1,5០០ ទៅ 2,០០០ដុល្លារក្នុងមួយខែ។

    លោកបន្តថា ការទិញផ្ទះទុកសម្រាប់ជួលប្រសិនជាបានប្រាក់ចំណេញពីការវិនិយោគ 1០ភាគរយឡើងប្រចាំឆ្នាំជាការវិនិយោគល្អ ផ្ទុយទៅវិញបើសិនជាទទួលបានប្រាក់ចំណេញពីការវិនិយោគទាបជាងនេះ មិនមែនជាការវិនិយោគល្អនោះទេ៕

  • ស្រាបៀរថៃហ្គ័រ នឹងចាប់ឆ្នោតលើកទី1 រដូវកាលថ្មីឆ្នាំ 2017 នៅចុងសប្តាហ៍នេះ

    ស្រាបៀរថៃហ្គ័រ នឹងចាប់ឆ្នោតលើកទី1 រដូវកាលថ្មីឆ្នាំ 2017 នៅចុងសប្តាហ៍នេះ

    ភ្នំពេញ៖ នៅថ្ងៃទី 11ខែមិថុនា ឆ្នាំ2017 ខាងមុខនេះ ស្រាបៀរថៃហ្គ័រ (Tiger Beer) នឹងរៀបចំកម្មវិធីចាប់ឆ្នោតលើកទី1 រដូវកាលថ្មី ឆ្នាំ2017 នៅស្ថានីយទូរទស្សន៍ PNN ដែលផ្សាយផ្ទាល់ នៅវេលាម៉ោង 8:00-10:00យប់ ដើម្បីផ្តល់រង្វាន់ជូនដល់គូស្វាមីភរិយាថ្មីទាំងអស់ ដែលបានជាវស្រាបៀរថៃហ្គ័រ ក្នុងកម្មពិធីអាពាហ៍ពិពាហ៍របស់ស្រាបៀរថៃហ្គ័ររបស់ខ្លួន។

    កម្មវិធីអាពាហ៍ពិពាហ៍របស់ស្រាបៀរ Tiger ឆ្នាំ 2017 រដូវកាលថ្មីនេះ ដែលរៀបចំការចាប់ឆ្នោត មានការចូលរួមសម្ដែងកម្សាន្ត សប្បាយរីករាយ ពីតារាចម្រៀងល្បីឈ្មោះប្រចាំព្រះរាជាណាចក្រកម្ពុជាជាច្រើនរូបដូចជា៖ កញ្ញា ពេជ្រ សោភា ,លោក Step ,កញ្ញា វី ឌីណែត និង ក្រុម 4 NIX Girl band (K-POP)។

    កម្មវិធីនេះធ្វើឡើងសម្រាប់តែអតិថិជនដែលបានជាវស្រាបៀរថៃហ្គ័រសម្រាប់កម្មវិធីអាពាហ៍ពិពាហ៍របស់ខ្លួន។ សម្រាប់ការចាប់ឆ្នោតលើកទី1 រដូវកាលថ្មីនេះ ស្រាបៀរថៃហ្គ័រនឹងមានរង្វាន់ជាច្រើនដូចជា៖ iPhone 7 ចំនួន 3រង្វាន់, ទូរទស្សន៍ Smart TV ចំនួន 3រង្វាន់ និងទូរទឹកកក ចំនួន 5រង្វាន់។

    តើគូស្វាមីភរិយារូបណាខ្លះដែលជាម្ចាស់រង្វាន់ទាំងនោះ? កុំភ្លេចចូលរួមទស្សនា និងតាមដានទាំងអស់គ្នា!!!

    ឆ្លុះបញ្ចាំងប្រណិតភាពនៃអាពាហ៍ពិពាហ៍ ជាមួយស្រាបៀរថៃហ្គ័រ ដើម្បីឈ្នះរថយន្តសេរីទំនើប AUDI Q5 2016 ដ៏ថ្មីសន្លាង!!!

    ពិសាដោយការទទួលខុសត្រូវ…

  • Ronaldo ជួយឲ្យព័រទុយហ្គាល់ឈ្នះ ខណៈបារាំង ចាញ់ស៊ុយអែតយ៉ាងនឹកស្មានមិនដល់

    Ronaldo ជួយឲ្យព័រទុយហ្គាល់ឈ្នះ ខណៈបារាំង ចាញ់ស៊ុយអែតយ៉ាងនឹកស្មានមិនដល់

    ក្រុមបាល់ទាត់ជម្រើសជាតិបារាំង បានធ្វើឲ្យយុទ្ធនាការនៃការប្រជែងយកសិទ្ធិជាស្វ័យប្រវត្តិទៅប្រកួតក្នុងព្រឹត្តិការណ៍ World Cup នាឆ្នាំក្រោយក្នុងប្រទេសរុស្ស៊ី របស់ពួកគេមានភាពស្មុគស្មាញ ក្រោយពីបានរងបរាជ័យដ៏មិននឹកស្មានដល់ក្នុងលទ្ធផល 2-1 នៅលើទឹកដីក្រុមជម្រើសជាតិស៊ុយអែត កាលពីថ្ងៃសុក្រ។

    ក្រុមជម្រើសជាតិស៊ុយអែត ដណ្តើមបានជ័យជម្នះដ៏មិននឹកស្មានដល់នេះ តាមរយៈគ្រាប់បាល់ស៊ុតបញ្ចូលទីរបស់កីឡាករ Ola Toivonen នៅនាទីបន្ថែម ក្រោយពីការទាត់បាល់ចេញមិនបានល្អរបស់អ្នកចាំទីអន្តរជាតិបារាំង Hugo Lloris។ គ្រាប់បាល់ឈ្នះនេះ បានធ្វើឲ្យអ្នកគាំទ្រនៃក្រុមម្ចាស់ផ្ទះក្នុងទីក្រុង Stockholm ធ្វើការអបអរសាទរយ៉ាងខ្លាំងក្លា ហើយកាន់តែសំខាន់ទៅទៀតនោះគឺថា គ្រាប់បាល់នេះបានជួយឲ្យក្រុមជម្រើសជាតិស៊ុយអែត មាន 13ពិន្ទុស្មើជាមួយនឹងក្រុមជម្រើសជាតិបារាំង ខណៈដែលនៅសល់ការប្រកួតតែ4លើកទៀតប៉ុណ្ណោះ។

    មានតែក្រុមឈរលេខ1នៅលើតារាងពូលប៉ុណ្ណោះ ដែលមានសិទ្ធិឈ្នះកៅអីទៅប្រកួតក្នុងព្រឹត្តិការណ៍ World Cup នៅឆ្នាំក្រោយ ក្នុងប្រទេសរុស្ស៊ី ខណៈក្រុមលេខ2 ដែលមានពិន្ទុល្អជាងគេបំផុតចំនួន8 ក្រុម នឹងត្រូវធ្វើការប្រកួតវគ្គ Playoff។ ក្រុមបាល់ទាត់ជម្រើសជាតិបារាំង បច្ចុប្បន្ននឹងត្រូវលេងការប្រកួតដ៏សំខាន់នាថ្ងៃទី31 ខែសីហា ជាមួយនឹងក្រុមជម្រើសជាតិហូឡង់ ដែលកំពុងតែដេញតាមពីក្រោយ ក្រោយពីពួកគេបានយកឈ្នះលើក្រុមជម្រើសជាតិលុចសំបួ ក្នុងលទ្ធផល 5-0។

    ស្របពេលជាមួយគ្នានេះ ខ្សែប្រយុទ្ធ Cristiano Ronaldo បានជួយឲ្យក្រុមជម្រើសជាតិព័រទុយហ្គាល់ ដណ្តើមបានជ័យជម្នះក្នុងលទ្ធផល 3-0 លើក្រុមជម្រើសជាតិឡេតូនី កាលពីថ្ងៃសុក្រ៕
    ប្រភពព័ត៌មាន៖ Sports.yahoo

  • ពេលទំនេរ គួរ​នាំគ្នា​ទៅយក​ប្រយោជន៍​ពី​ការហាត់​ប្រាណ​ក្នុង​ទឹក

    ពេលទំនេរ គួរ​នាំគ្នា​ទៅយក​ប្រយោជន៍​ពី​ការហាត់​ប្រាណ​ក្នុង​ទឹក

    នៅពេលដែល​និយាយ​ដល់​ការហាត់​ប្រាណ អ្នក​ប្រាកដជា​នឹក​គិតដល់​កាយវិការ​ជាច្រើន​ប្រភេទ ​ដែល​អាច​ឱ្យ​អ្នក​បញ្ចេញ​ញើស​បាន​យ៉ាងច្រើនរហូតដល់​ធ្វើឱ្យ​មនុស្ស​មួយចំនួន​ភ្លេច​គិត​ទៅដល់​លំ​ហាត់ប្រាណ​មួយ​ប្រភេទ​ទៀត​ដែល​អាចធ្វើឱ្យ​លោកអ្នក​មាន​រាងកាយ​សមសួន មាន​សុខ​ភាពល្អដូចគ្នា​ដោយ​មិនចាំបាច់​ចេញ​ញើស​មក​ខាងក្រៅ​នោះទេ។ ការធ្វើ​លំ​ហាត់ប្រាណ​ក្នុង​ទឹក​ត្រូវបាន​គេ​ទុក​ថា​ជាការ​បញ្ចេញ​​សកម្មភាព​រាងកាយ​ដែល​គួរឱ្យ​ចាប់អារម្មណ៍​មួយ ព្រោះ​ក្រៅពី​មិនចាំបាច់​ចេញញើស​មក​ក្រៅ​ហើយ​នោះ​វា​នៅមាន​ភាព​ត្រជាក់ស្រួលខ្លួន និង​មាន​ភាព​រីករាយ​ទៀតផង។ ការហាត់​ប្រាណ​ក្នុង​ទឹក​អាចធ្វើ​ឡើងជា​ក្រុម​ក៏បាន ម្នាក់ឯង​ក៏បាន។

    នៅពេលដែល​និយាយ​ដល់​ការហាត់​ប្រាណ​ក្នុង​ទឹក​អ្នក​ពិតជា​គិតថា វា​ពិតជា​មិនមាន​អ្វី​ក្រៅពី​ការ​ហែល​ទឹក​នោះទេ ប៉ុន្តែ​ការពិតទៅ​ការហាត់​ប្រាណក្នុង​ទឹក​អាចធ្វើ​ទៅបាន​តាមរយៈ​រូបភាព​ច្រើនយ៉ាង​ដូចជាការដើរ ឬ​រត់ត្រឹកៗនៅក្នុង​ទឹកឈរ​ ជើង​មួយធាក់​កង់ (ដៃ​កាន់​ជញ្ជាំង​អាង​ហែល​ទឹក ដើម្បី​ទប់​រាងកាយ) និង​លើក​ដុំ​ដែក​ជាដើម។ ដូច្នេះ​មក​មើល​បន្តិច​ទៅ​មើលថា តើ​គុណសម្បត្តិ​នៃ​ការហាត់​ប្រាណ​ក្នុង​ទឹក​មាន​អ្វីខ្លះ?

    សម្រក​ទម្ងន់៖ តើ​អ្នក​ចង់​សម្រក​ទម្ងន់​ដែរ​ទេ? បើ​ដូច្នេះ​មែន​អ្នក​គួរតែ​កត់សម្គាល់​ទុក​នូវ​ការហាត់​ប្រាណ​ក្នុង​ទឹក។ ការស្រាវជ្រាវ​បានបង្ហាញ​ថាបើទោះជា​អ្នក​ហាត់ប្រាណ​ក្នុង​ទឹក​មិនបាន​បញ្ច​ញ​ញើស​ក៏ដោយ ក៏​ជាតិ​ខ្លាញ់​ក្នុង​រាងកាយ​នៅតែ​ត្រូវបាន​ដុតបំផ្លាញ​ដូចគ្នា​ទៅនឹង​ការហាត់​ប្រាណនៅលើ​គោក​ដែរ។

    ពង្រឹង​សាច់ដុំ៖ ទឹកបាន​ធ្វើដំណើរ​ជ្រាប​ទៅគ្រប់​ទីកន្លែង​នៅក្នុង​រាងកាយ គឺ​វា​អាច​ជ្រាប ចូល​បាន​ច្រើនជាង​ខ្យល់​ទៅទៀត។ ការសិក្សា​មួយរបស់ Journal of Strength and Conditioning Research បានចេញ​ផ្សាយ​ថា​ការហាត់​ប្រាណក្នុង​ទឹក​គឺជា​ការហាត់​ប្រាណ​ដ៏​ល្អ​មួយបែប ដែលអាចជួយ​ពង្រឹង​សាច់ដុំ​អ្នក​ហាត់​ទាំង​ក្មេង និងចាស់។

    ជំនួយ​បេះដូង និង​សរសៃឈាម៖ ប្រសិនបើលោកអ្នក​មាន​បញ្ហា​សុខភាព​ដែល​ទាក់ទង​ទៅនឹង​បេះដូង និង​សរសៃឈាម ដូច្នេះ​អ្វី​ដែលជា​ជំនួយការ​ដ៏​ល្អ​បំផុត​ដែល​អ្នក​គួរតែ​ស្វែងរក​នោះ​គឺ ការហាត់​ប្រាណ។ អ្នកជំនាញ​ផ្នែក​សុខភាពណែនាំ​ឱ្យ​អ្នក​ជ្រើស​រើសយក​ការហាត់​ប្រាណ​ក្នុង​ទឹក​ធ្វើជា​ផ្នែក​មួយ​នៃ​ការថែទាំ​សុខភាព​សម្រាប់​អ្នក​ដែលមាន​ជំងឺ​ប្រភេទ​នេះ។

    កម្ចាត់​ភាព​ធុញថប់៖ ក្រៅពី​គុណប្រយោជន៍​ទាំង​ប៉ុន្មាន​ដែល​បាន​រៀបរាប់​ខាងលើ​ហើយ​នោះការហាត់​ប្រាណ​ក្នុង​ទឹក​នៅ​អាចជួយ​ឱ្យ​អ្នកមាន​អារម្មណ៍​ស្រស់ថ្លា កាត់បន្ថយ​ភាព​តានតឹង​ផងដែរ។ British Journal of Sports Medicine បានធ្វើការ​សន្និដ្ឋានថា ការហាត់​ប្រាណ​ក្នុង​ទឹក​គឺជា​វិធីសាស្ត្រ​ដ៏​ ល្អ​មួយ​ក្នុងការ​កម្ចាតរោគ​ស្ត្រេ​ស មិន​ថា​វា​ជា​ភាព​ធុញថប់​ផ្នែក​ខាងក្រៅ ក្នុង​ចិត្ត បញ្ហា​សង្គម ឬ​បញ្ហា​មួយចំនួនទៀត​ដូចជា បញ្ហា​គេង​មិន​លក់​ជាដើម។

    រក្សា​សម្ពាធ​ឈាម​ឱ្យមាន​លំនឹង៖ កម្លាំង​នៃ​ទឹក​អាចជួយ​ជម្រុញ​ចលនា​ឈាម​ឱ្យ​រត់​បាន​ស្រួល​យ៉ាង​មាន​ប្រសិទ្ធភាព ហើយ​ការ​ជំរុញ​ដល់​ចលនា​ឈាម​រត់​នេះ​គឺជា​សារប្រយោជន៍​ដ៏​ជាក់លាក់​មួយ​ដែល​អ្នកមាន​ជំងឺ​សម្ពាធ​ឈាម​ឡើង​ខ្ពស់ និង​អ្នក​ដែល​តែងតែ​ប្រឈម​គ្រប់គ្នា​គួរតែដឹង។ នៅក្នុង​សៀវភៅ​កំណត់​ហេតុ​មួយ​ដែលមាន​ឈ្មោះថា Asian Journal of Sports Medicine បានធ្វើការ​បង្ហាញថា ការចូលរួម​សកម្មភាព​កីឡា​ក្នុង​ទឹក​ចំនួន 10សប្តាហ៍​អាចជួយ​កាត់បន្ថយ​អាការ​ឡើង​ឈាម​បាន​យ៉ាង​ប្រសើរ​គួរឱ្យកត់សម្គាល់។

    កាត់បន្ថយ​អាការ​ស្ពឹក​ស្រពន់៖ តាមរយៈ​ការបញ្ចេញ​កាយវិការ​នៅក្នុង​ទឹក បានធ្វើឱ្យ​ផ្នែកផ្សេងៗ នៅក្នុង​រាងកាយ​របស់​មនុស្ស​យើង​មាន​ភាពរហ័សរហួន​ឡើង ហើយ​ការដែល​បាន​បញ្ចេញ​កាយវិការ​នេះ ហើយ​ដែល​អាចជួយ​ឱ្យ​យើង​គេចផុត ឬ​កាត់បន្ថយ​បាន​នូវ​អាការ​ស្ពឹក​ស្រពន់។

    ថែទាំ​ឆ្អឹង​ស្ត្រី​ក្រោយពេល​អស់​រដូវ៖ ការហាត់ប្រាណ​ក្នុង​ទឹក​ត្រូវបាន​គេ​​ចាត់ទុកថា ជា​កីឡា​ដ៏ល្អ​មួយ​ប្រភេទ ដែល​អាច​ផ្តល់នូវ​គុណប្រយោជន៍​ចំពោះឆ្អឹង​របស់​ស្ត្រី ជាពិសេស​គឺ​នៅក្រោយពេល​អស់​រដូវ។ ការសិក្សា​ស្រាវជ្រាវ​របស់ Journal of Sports Medicine និង Physical Fitness បាន​រកឃើញថា ស្ត្រី​ដែល​តែងតែ​អនុវត្ត​ការធ្វើ​លំ​ហាត់ប្រាណ​​ក្នុង​ទឹកជា​ប្រចាំ​រយៈពេល 7ខែ បាន​ជួយឱ្យ​ជាតិ​រ៉ែ​ក្នុង​ឆ្អឹង​ មានការ​ផ្លាស់ប្តូរ​យ៉ាង​ល្អ​គួរឱ្យកត់សម្គាល់។

    បើទោះជា​ អ្នក​មិនបាន​រកឃើញថា​ការហាត់​ប្រាណ​ក្នុង​ទឹក​មានគុណ​ប្រយោជន៍​ណាមួយ​ដែលត្រូវ​ជាមួយ​អ្នក​ក៏ដោយ តែ​សូមកុំ​គិតថា​វា​គ្មាន​ប្រយោជន៍​ចំពោះ​អ្នក​ឱ្យសោះ ព្រោះ​វា​មិនមែន​បញ្ចប់​ត្រឹមតែ​ប៉ុន្មាន​ចំណុច​ដែល​បាន​រៀបរាប់​នេះ​ទេ ការពិតទៅ​ការធ្វើ​លំ​ហាត់ប្រាណ​ក្នុង​ទឹកបាន​ផ្តល់នូវ​គុណប្រយោជន៍​ជាច្រើន​ទៀត​សម្រាប់​មនុស្ស​គ្រប់គ្នា​និង​គ្រប់​វ័យ​ដូចជា៖

    *ដុតបំផ្លាញ​​ ជាតិ​ខ្លាញ់​ក្នុង​រាងកាយ​បាន​ច្រើនទាំង​ក្នុងអំឡុងពេល​ហាត់ និង​ក្រោយពេល​ហាត់។
    ​​*បង្កើន​ថាមពល និង​ភាពរឹងមាំ​ដល់​រាងកាយតាមរយៈ​ការ​កម្ចាត់​ចោល​នូវ​ភាព​តានតឹង និងអាការ​ឈឺក្បាល​ជាដើម។
    *ការហាត់​ប្រាណ​ក្នុង​ទឹក​តម្រូវឱ្យ​លោកអ្នក​ប្រើ​ថាមពល​ទ្រទ្រង់​ទម្ងន់​រាងកាយ​ត្រឹមតែ 50%ប៉ុណ្ណោះ ដូច្នេះ​វា​នឹង​ធ្វើឱ្យ​ការហាត់​ប្រាណ​កាន់​តែមាន​ភាពងាយស្រួល​ឡើង។
    *មិនចាំបាច់​ត្រូវការ​សម្ភារ​ហាត់ប្រាណ​ច្រើន​ប្រភេទ ឬពិសេសៗអី​នោះទេ ។
    *ជាការ​ម៉ាស្សា​សាច់ដុំ​ដ៏​អស្ចារ្យ​ដែល​ធ្វើឡើង​ដោយ​ស្វ័យប្រវត្តិ​ពី​ថាមពលទឹក។

    ការហាត់​ប្រាណ​ក្នុង​ទឹក​គឺជា​កីឡា​ដ៏​គួរឱ្យ​ចាប់អារម្មណ៍​មួយ ហើយ​បើទោះជា​អាកាសធាតុ​ក្តៅ​បែបណាក៏ដោយ ក៏​លោកអ្នក​មិនមាន​អ្វី​ត្រូវខ្វាយខ្វល់​នោះដែរ ដូច្នេះ​កុំ​ភ្លេច​នាំ​សមាជិកគ្រួសារ​របស់លោក​អ្នក​ទៅធ្វើ​លំ​ហាត់ប្រាណ​ក្នុង​ទឹក​ទាំងអស់គ្នា​ណា៎៕

  • អគ្គនាយកដ្ឋានពន្ធដារ ៖ ការប្រមូលពន្ធនៅឆមាសទីមួយឆ្នាំនេះល្អជាងឆ្នាំមុន

    អគ្គនាយកដ្ឋានពន្ធដារ ៖ ការប្រមូលពន្ធនៅឆមាសទីមួយឆ្នាំនេះល្អជាងឆ្នាំមុន

    ក្នុងរយៈពេល 5ខែ ដើមឆ្នាំ 2017 ចំណូលពន្ធ-អាករសរុប ដែលអគ្គនាយកដ្ឋានពន្ធដារប្រមូលបានមានចំនួន 4.052ពាន់លានរៀលស្មើនឹង 1,020.50លានដុល្លារអាមេរិកស្មើនឹង 59.48% នៃផែនការច្បាប់។

    លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានឱ្យដឹងនៅក្នុងកិច្ចប្រជុំសរុបលទ្ធផលកាលពីថ្ងៃទី09 ខែមិថុនា ឆ្នាំ 2017 ម្សិលមិញនេះថា ប្រៀបធៀបនឹងរយៈពេលដូចគ្នាកាលពីឆ្នាំ2016 ឃើញថាការប្រមូលចំណូលពន្ធ-អាករគ្រប់ប្រភេទសម្រាប់រយៈពេល 5ខែដើមឆ្នាំ 2017 នេះកើនឡើង 1.249ពាន់លានរៀល ឬប្រមាណជា 312.24លានដុល្លារ ស្មើនឹង 44.09%។

    លោកបានមានប្រសាសន៍ថា ក្នុងរយៈពេល 5ខែ ដើមឆ្នាំ2017 នេះផងដែរការប្រមូលពន្ធកើនឡើងស្ទើរតែគ្រប់ប្រភេទពន្ធ ជាពិសេសប្រភេទពន្ធ-អាករសំខាន់ៗ មានជាអាទិ៍៖ ពន្ធលើប្រាក់ចំណូលកើនឡើង 35.2% ពន្ធលើប្រាក់បៀវត្សរ៍កើនឡើង 7.1% និងអាករលើតម្លៃបន្ថែមកើនឡើង 59.20% ខណៈដែលអាករពិសេសកើនឡើង 11.3%៕

  • ថ្នាំប៉ារ៉ាសេតាម៉ុល លេបប៉ុន្មានគ្រាប់ ទើបមិនមានគ្រោះថ្នាក់ដល់រាងកាយ?

    ថ្នាំប៉ារ៉ាសេតាម៉ុល លេបប៉ុន្មានគ្រាប់ ទើបមិនមានគ្រោះថ្នាក់ដល់រាងកាយ?

    គឺជារឿងសំខាន់ក្បែរខ្លួនមួយដែលយើងគួរតែដឹង ព្រោះពេលឈឺក្បាល ឬមានគ្រុនក្តៅ មិនស្រួលខ្លួនម្តងៗ រឿងដំបូងគេដែលមនុស្សយើងនឹកដល់គឺ ថ្នាំប៉ារ៉ាសេតាម៉ុល ថ្នាំសាមញ្ញធម្មតាៗដែលត្រូវតែមាននៅក្នុងផ្ទះគ្រប់ៗគ្នា តែការទទួលទានថ្នាំគ្រប់ប្រភេទតែងតែមានកម្រិតកំណត់ បើសិនទទួលទានច្រើនជ្រុលពេកក៏នឹងហុចផលមិនល្អដល់រាងកាយដែរ។ ថ្នាំប៉ារ៉ាសេតាម៉ុល ជាថ្នាំបំបាត់ការឈឺចាប់ និងបញ្ចុះកម្តៅដែលល្អបំផុតក្នុងពេលបច្ចុប្បន្ននេះ តែគ្រោះថ្នាក់របស់ការប្រើថ្នាំប៉ារ៉ាសេតាម៉ុល គឺមានផលប៉ះពាល់ចំពោះថ្លើម ( Hepatotoxicity) ប៉ះពាល់តាំងពីការធ្វើការងាររបស់ថ្លើម រហូតទៅដល់សភាវថ្លើមគាំងយ៉ាងទាន់ហន់ ( Acute liver failure ) ដែលនាំឆ្ពោះទៅរកការស្លាប់បាត់បង់ជីវិតបាន។

    ប្រើថ្នាំប៉ារ៉ាសេតាម៉ុល ឱ្យមានសុវត្ថិភាពត្រូវមើលលើកម្រិតខ្នាត វេជ្ជបណ្ឌិតជំនាញបានណែនាំថា គួរទទួលទានតាមទម្ងន់ខ្លួន គុណជាមួយ 10 ឬ 15ដង នឹងទទួលបានកម្រិតថ្នាំជាមីល្លីក្រាមដែលត្រូវលេបសម្រាប់ខ្លួនអ្នក (តែមិនត្រូវលើស1,000 មីល្លីក្រាមក្នុងមួយដងឡើយ) ឧទាហរណ៍ ទម្ងន់ខ្លួន 50គីឡូក្រាម កម្រិតថ្នាំដែលស័ក្តិសមត្រូវលេបគឺ 500 ឬ 750មីល្លីក្រាម ដែលស្មើ 1គ្រាប់ ឬ 1គ្រាប់កន្លះ (បើមានមាឌធំ គុណនឹងទម្ងន់ខ្លួនហើយលើស1,000មីល្លីក្រាម ក៏ត្រូវតែលេបបានមិនលើស2គ្រាប់ដែរ)។

    កម្រិតថ្នាំខ្ពស់បំផុតសម្រាប់មនុស្សធំក្នុងមួយថ្ងៃ
    – កម្រិតស្តង់ដារទូទៅ មិនលើសពី 4,000មីល្លីក្រាម រួមទាំងជាតិថ្នាំដែលមានផ្សំក្នុងប៉ារ៉ាសេតាម៉ុលផង ដូចជា ថ្នាំបន្ធូរសាច់ដុំ និងថ្នាំសម្រាលអាការផ្តាសាយជាដើម។
    – សម្រាប់អ្នកដែលត្រូវលេបបន្តបន្ទាប់ពីក្រៅប្រទេសរយៈពេលវែង ត្រូវស្ថិតនៅក្រោមការមើលថែទាំរបស់គ្រូពេទ្យ និងទទួលទានមិនលើសពី 2,500 – 2,600 មីល្លីក្រាមឡើយ។
    – អ្នកជំងឺថ្លើម ឬទទួលទានស្រាជាប្រចាំ ត្រូវលេបមិនឱ្យលើសពី2,000មីល្លីក្រាមឡើយ។

    កម្រិតថ្នាំខ្ពស់បំផុតក្នុងមួយថ្ងៃសម្រាប់ក្មេងអាយុពី 0-12ឆ្នាំ
    – មិនលើស75មីល្លីក្រាម/មួយគីឡូក្រាម មានន័យថាជាកម្រិតថ្នាំដែលគុណទម្ងន់ខ្លួនរបស់ក្មេងរួចហើយ និងបញ្ចុកថ្នាំមួយថ្ងៃមិនលើស 5ដង និងអានស្លាកណែនាំឱ្យយល់ជាមុនផង។
    – ការលេបថ្នាំប៉ារា៉សេតាម៉ុល លើសកម្រិត នឹងមិនបង្ហាញអាការឱ្យឃើញឆាប់ៗនោះទេ នឹងបង្ហាញចេញមកក៏នៅពេលដែលដល់រយៈគ្រោះថ្នាក់ ជាអាការរលាកថ្លើម រឹងថ្លើម និងបង្កឱ្យកើតជាមហារីកថ្លើមបាត់ទៅហើយ ដូច្នេះគួរប្រើថ្នាំនេះនៅពេលណាដែលចាំបាច់ប៉ុណ្ណោះ និងបន្ថែមការប្រុងប្រយ័ត្នដោយការអានស្លាកព័ត៌មានឱ្យបានលម្អិតផង៕

  • ម្ចាស់បទ «Shape of You» ប្រកាសរៀបចំការប្រគំតន្ត្រីធំមួយនៅប្រទេសថៃ

    ម្ចាស់បទ «Shape of You» ប្រកាសរៀបចំការប្រគំតន្ត្រីធំមួយនៅប្រទេសថៃ

    ខាងគណៈកម្មការរៀបចំព្រឹត្តិការណ៍ AEG Presents និង BEC-Tero Entertainmentបាន ប្រកាសតារាង World Tour Concert របស់តារាចម្រៀង និងជាអ្នកនិពន្ធទំនុកច្រៀងល្បីល្បាញទូទាំងពិភពលោកតាមរយៈបទ «Shape of You» គឺកំពូលតារាចម្រៀង Ed Sheeran ដែលនឹងធ្វើដំណើរមកកាន់ប្រទេសថៃ ដើម្បីរៀបចំការប្រគំតន្ត្រីខ្នាតធំ ដែលនេះជាលើកដំបូងបង្អស់មិនធ្លាប់មានពីមុនមកនៅក្នុងប្រទេសថៃ។ នៅក្នុងនោះ មានទីក្រុងមួយចំនួននៅតំបន់អាស៊ី ដែលកំពូលតារាចម្រៀងរូបនេះបានបញ្ជប់បេសកកម្មប្រគំតន្រ្តីទេសចរណ៍រួចហើយ ដូចជា តៃប៉ិ អូសាកា សេអ៊ូល តូក្យូ ហុងកុង ម៉ានីល ហ្សាការតា សិង្ហបុរី កួឡាឡាំពួ ប៊ុមបៃ និង ឌុយបៃ។

    មហាព្រិត្តិការណ៍លំដាប់អន្តរជាតិប្រចាំឆ្នាំបែបនេះ និងប្រព្រឹត្តទៅនៅថ្ងៃទី16 ខែវិច្ឆកា ឆ្នាំ2017 នៅក្នុងតំបន់មឿងថងថានី ប្រទេសថៃ លោក Ed Sheeran គឺជាសិល្បករដែលមកពីទីក្រុង Suffolk ហើយជាសិល្បករដែលបានបំបែកស្ថិតិការប្រគំតន្រ្តីកាលពីឆ្នាំ 2015 ក្នុងការសម្ដែងនៅ Wembley Stadium ដែលមានអ្នកចូលរួមទស្សនាច្រើនបំផុតរហូតដល់ 240,000នាក់ ក្នុងរយៈពេល 3យប់ជាប់ៗគ្នា និងកាន់តែអស្ចារ្យទៅទៀតនោះ លក្ខណៈការសម្ដែងរបស់លោក គឺមានការប្រើប្រាស់ឧបករណ៍តន្ត្រីតែ Loop Pedal និងហ្គីតារ មួយដើមប៉ុណ្ណោះ ដែលវាជាឯកលក្ខណៈពិសេសមួយជំរុញឱ្យការលក់សំបុត្រចូលទស្សនាទាំង 3 រាត្រីគ្មានសល់មួយកន្លែងណាឡើយ។

    ការសម្ដែងផ្ទាល់ដែលមានអ្នកគាំទ្រពាសពេញពិភពលោករង់ចាំទស្សនាព្រឹត្តិការណ៍ប្រគំតន្រ្តី Ed Sheeran Tour 2017 នេះ កំពុងតែពុះកញ្ជ្រោលយ៉ាងខ្លាំង ព្រោះនេះគឺជាការបង្ហាញខ្លួនយ៉ាងពិសេសក្នុងការលេងឧបករណ៍តន្រ្តីដោយផ្ទាល់ជាពិសេសចំពោះបទ ” Shape of You ” តែម្ដង។  សម្រាប់តម្លៃសំបុត្រដែលលក់នៅក្នុងប្រទេសថៃ មានចាប់ពីតម្លៃ 1,800 បាត ដែលចាប់ផ្ដើមលក់នៅថ្ងៃទី1 ខែកក្កដា ឆ្នាំ2017 តទៅនៅគ្រប់សាខាលក់សំបុត្ររបស់ thaiticketmajorឬចូលទៅទិញនៅក្នុងគេហទំព័រផ្ទាល់តាមរយៈ www.thaiticketmajor.co ក៏បាន ។

    គួរបញ្ជាក់បន្ថែមថា បទចម្រៀង ” Shape of You ” គឺជាបទចម្រៀងដំបូងបង្អស់ដែលបំបែកកំណត់ត្រាប្រវត្តិសាស្ត្រ ហើយអាចឡើងទៅឈរលើលេខរៀងទី 1 ក្នុងតារាង BillBoard Hot 100 និងនៅលើការផ្សាយរបស់ Spotifyក្នុងរយៈពេលមួយថ្ងៃ និងក្នុងមួយសប្ដាហ៍ ។ គួររំឭកបន្ដិចដែរថា កាលពីថ្ងៃទី6 ខែមិថុនា ឆ្នាំ2017 បទសម្ភាសរបស់ Ed Sheeranជាមួយសារព័ត៌មាន BBC អំពីការតាក់តែងនិពន្ធបទនេះ គឺ «ជាការពិតណាស់ខ្ញុំចង់សរសេរបទនេះឡើង សម្រាប់បុរសពីរនាក់ផ្សេងគ្នា ដែលមានឈ្មោះថា Steve Mac និង Johnny McDaid ហើយពួកយើងសរសេរបទនេះឡើង គឺសំដៅលើនារីម្នាក់ដែលមានរាងសិចស៊ី គឺ Rihanna»៕

  • គ្រប់ទឹកតែម្តង! ព្រាប សុវត្ថិ ទទួលការងារមួយបានតម្លៃខ្លួនក្បែរលានដុល្លារ

    គ្រប់ទឹកតែម្តង! ព្រាប សុវត្ថិ ទទួលការងារមួយបានតម្លៃខ្លួនក្បែរលានដុល្លារ

    បើទោះជាបច្ចុប្បន្នបទចម្រៀងរបស់លោក ព្រាប សុវត្ថិ នៅតែមានសម្ទុះខ្លាំងនៅក្នុងទីផ្សារក៏ដោយ តែមួយរយៈចុងក្រោយនេះគេហាក់ដូចជាពុំសូវឃើញមានសារព័ត៌មានក្នុងស្រុកចុះផ្សាយអំពីលោកឡើយ។ ថ្មីៗនេះស្រាប់តែលេចឮព័ត៌មានថា មូលហេតុដែលកំពូលតារាចម្រៀងម្នាក់នេះព្យាយាមមិនបង្ហាញមុខក្នុងទំព័រសារព័ត៌មាន ព្រោះតែលោកមិនចង់ឆ្លើយតបទៅនឹងសំណួរជុំវិញតម្លៃខ្លួនក្នុងការងារ គ្រាដែលលោកទទួលបានការងារថតស្ប៉តពាណិជ្ជកម្មជាច្រើននោះ។

    ប្រហែលជាជាងពីរឆ្នាំចុងក្រោយនេះគេសង្កេតឃើញថា លោក ព្រាប សុវត្ថិ ហាក់ទទួលបានការងារជាច្រើនពាក់ព័ន្ធនឹងការថតស្ប៉តពាណិជ្ជកម្ម ដូចជាការធ្វើជាតំណាងឱ្យផលិតផលស្រាបៀរអង្គរ និងផលិតផលខោក្នុងម៉ាក ខ្លាស ជាដើម។ គ្រាន់តែឃើញការងារបែបនេះមានមហាជនជាច្រើនបានលើកឡើងថា លោក ព្រាប សុវត្ថិ ច្បាស់ជាគ្រប់ទឹកមិនខាន ព្រោះគេបាននិយាយថា កាលពីប៉ុន្មានឆ្នាំមុនគ្រាដែលលោកទទួលបានការងារថតស្ប៉តឱ្យសេវាទូរស័ព្ទចល័តក្នុងស្រុកមួយ គឺទទួលបានតម្លៃខ្លួនរាប់សិបម៉ឺនដុល្លារ។

    យោងតាមប្រភពមួយចំនួនបានបង្ហើបថា ក្នុងឆ្នាំថ្មីនេះលោក ព្រាប សុវត្ថិ កំពុងតែត្រូវប៉ាន់យ៉ាងខ្លាំង ព្រោះគ្រាន់តែលោកធ្វើការងារជាអ្នកតំណាងឱ្យក្រុមហ៊ុនស្រាបៀរអង្គរមួយ លោកទទួលបានតម្លៃខ្លួនក្បែរលានដុល្លារទៅហើយ បន្ថែមពីលើនេះទៀតតម្លៃខ្លួនសម្រាប់ការងារថតស្ប៉តឱ្យផលិតផលខោក្នុងក៏ទទួលបានរាប់ម៉ឺនដុល្លារផងដែរ។

    ទោះបីជាព័ត៌មានខាងលើមិនទាន់អាចចាត់ទុកជាព័ត៌មានផ្លូវការក៏ដោយ ប៉ុន្ដែអ្នកគាំទ្ររបស់លោកជាច្រើនបានសាទរជាមួយលោកគ្រាដែល Idol របស់ពួកគេទទួលបានតម្លៃខ្លួនខ្ពស់មិនចាញ់តារាបរទេសនៃប្រទេសជិតខាង។ តែទោះជាយ៉ាងណាក៏ដោយ ក៏ឡា រ៉ែន សូមជួយចូលរួមសម្តែងក្តីត្រេកអរចំពោះអ្វីដែលល្អៗកើតឡើងសម្រាប់វិស័យសិល្បៈ និងជាមួយគ្រប់សិល្បករទាំងអស់របស់កម្ពុជាយើងដែលទទួលបានភាពជោគជ័យក្នុងអាជីពរបស់ពួកគេដោយក្តីមោទនៈ និងចង់បានការអះអាងពីសាមីខ្លួនតារាទាំងអស់ដើម្បីទុកជាការត្រេកអរទាំងអស់គ្នា៕

  • នីតា វរវង្ស ដើម្បីបំពេញចិត្ដម៉ែ…ដាច់ខាតមិនលេងល្បែងស្នេហា

    នីតា វរវង្ស ដើម្បីបំពេញចិត្ដម៉ែ…ដាច់ខាតមិនលេងល្បែងស្នេហា

    តារាសម្ដែង នីតា វរវង្ស ត្រូវបានមហាជនមានការកោតសសើរជាខ្លាំងទៅលើទេពកោសល្យក្នុងការសម្ដែងជាតួអង្គកាចឆ្នាស រហូតធ្វើឱ្យប្រជាប្រិយភាពមានសម្ទុះកើនឡើងជាបន្ដបន្ទាប់។ ស្របពេលជាមួយគ្នាក៏លេចឮថា តារាសម្ដែងស្រីស្អាតវ័យ 21ឆ្នាំរូបនេះ កំពុងសម្ងំស្វែងយល់ចិត្ដគ្នាជាមួយបុរសម្នាក់នៅក្រៅប្រទេស។

    គ្រាន់តែលេចឮថា តារាសម្ដែងស្រស់ស្អាតរូបនេះកំពុងមានស្នេហាជាមួយបុរសម្នាក់រស់នៅក្រៅប្រទេស គេហាក់មានការចម្លែកចិត្ដភ្លាមតែម្តង ព្រោះកន្លងមកម្ដាយរបស់នាងតែងតែដើរតាមនាងគ្រប់ច្រកល្ហក និងម្យ៉ាងទៀតគាត់ជាមនុស្សម្នាក់ដែលមានការរឹតត្បិតរឿងជីវិតស្នេហារបស់កូនស្រីខ្លួនណាស់ ព្រោះតែចង់ឱ្យកូនស្រីប្រឹងសាងកេរ្ដិ៍ឈ្មោះក្នុងសិល្បៈសិន។

    ជួបកញ្ញានីតា វរវង្ស នាងបានប្រាប់ថា រហូតមកដល់ពេលនេះនាងមិនធ្លាប់បានសាងសេ្នហាជាមួយបុរសណាម្នាក់ឡើយ។ កន្លងមកអ្វីដែលមហាជន ក៏ដូចជាមិត្ដភ័ក្ដិក្នុងសិល្បៈបានឃើញសកម្មភាពនៅខាងក្រៅរវាងនាង និងបុរសម្នាក់ដែលមិនមែនជាអ្នកស្ថិតនៅក្នុងរង្វង់សិល្បៈនោះ វាគ្រាន់តែជាការរាប់អានបែបមិត្ដភ័កិ្ដប៉ុណ្ណោះ។

    វរវង្ស បានឆ្លើយតបដោយមិនលាក់លៀមថា នាងមិនអាចយកក្រដាសទៅខ្ចប់ភ្លើងបានទេ ការពិតបុរសរស់នៅក្រៅប្រទេសនោះគឺនៅអាមេរិក ជាអ្នកគាំទ្រការសម្ដែងរបស់នាងព្រមទាំងធ្លាប់បានឆាតសួរសុខទុក្ខគ្នាតាមរយៈហ្វេសប៊ុកផងដែរ ព្រោះគាត់ជាអ្នកចូលចិត្ដសិល្បៈ។ នាងបន្ដថា បុរសម្នាក់នោះធ្លាប់បានប្រាប់ថា បើមានឱកាសមកលេងស្រុកខ្មែរ គាត់នឹងមកជួបនាងខ្ញុំផ្ទាល់ ព្រោះគាត់ចង់រាប់អានដូចជាញាតិម្នាក់។ ទើបនៅពេលបុរសនោះមកលេងស្រុកខ្មែរនាងត្រូវរ៉ាប់រងការជូនដើរកម្សាន្ដ ជាពិសេសក៏ធ្លាប់នាំទៅមើលនាងថតកុនផងដែរ។

    ទោះជាយ៉ាងណា នីតា វវវង្ស អះអាងដាច់ខាតថានាងអត់ទាន់ចង់មានស្នេហាទេ ព្រោះឱកាសនៃការសាងកេរ្ដិ៍ឈ្មោះក្នុងរង្វង់សិល្បៈនៅមានច្រើន ម្យ៉ាងម្ដាយនាងក៏មិនទាន់ចង់ឱ្យនាងពាក់ព័ន្ធនឹងរឿងស្នេហាទាំងវ័យក្មេងដែរ។ នាងបន្ដថា៖” កន្លងមានអ្នកស្រឡាញ់ច្រើន ប៉ុន្ដែខ្ញុំអត់ចង់គិតទេ ម្យ៉ាងម៉ាក់ជាអ្នកមានគុណ គាត់ប្រឹងមើលថែខ្ញុំ ស្រឡាញ់យកចិត្ដទុកដាក់លើខ្ញុំ គាត់ចង់ឱ្យខ្ញុំសាងកេរ្ដិ៍ឈ្មោះក្នុងសិល្បឱ្យបានយូរ ដូច្នេះខ្ញុំត្រូវតែបំពេញបំណងម៉ាក់”៕