Author: វល័ក្ខ

Calvert-Lewin រកគ្រាប់បាល់ឈ្នះឱ្យ Young Lions លើកពាន U20 World Cup
Dominic Calvert-Lewin បានក្លាយជាវីរបុរសរបស់ក្រុមបាល់ទាត់ជម្រើសជាតិអង់គ្លេស អាយុក្រោម2០ឆ្នាំ ខណៈដែលក្រុមមានរហស្សនាមថា Young Lions មួយនេះ បានឈ្នះពាន Under-20 World Cup ក្រោយពីបានយកឈ្នះលើក្រុមជម្រើសជាតិវ៉េណេស៊ុយអេឡា ក្នុងលទ្ធផល 1-០ ក្នុងទីក្រុង Suwon ប្រទេសកូរ៉េខាងត្បូង កាលពីថ្ងៃអាទិត្យ។
គ្រាប់បាល់ស៊ុតបញ្ចូលទីនៅនាទីទី35របស់ខ្សែប្រយុទ្ធនៃក្លិប Everton រូបនេះ បានជួយឲ្យអង់គ្លេសឈ្នះពានពិភពលោកជាលើកទី1 បើគិតចាប់តាំងពីឆ្នាំ1966 មក ប៉ុន្តែក្រុមរបស់លោក Paul Simpson ក៏ត្រូវតែដឹងគុណអ្នកចាំទី Freddie Woodman ផងដែរ ក្រោយពីរូបគេបានសង្គ្រោះបាល់ប៉េណាល់ទី1គ្រាប់ក្នុងតង់ទី2។ ប្រធានក្រុមជម្រើសជាតិអង់គ្លេស Lewis Cook ដែលលេងឲ្យក្លិប Bournemouth របស់ក្របខ័ណ្ឌ Premier League នោះ បានទទួលពាន World Cup ពីលោក Gianni Infantino ដែលជាប្រធានរបស់ FIFA នៅមុនពេលលើកពាននោះទៅលើក្បាលរបស់គេ ដើម្បីបង្កើតឲ្យមានការអបអរយ៉ាងខ្លាំងក្លាពីសំណាក់ក្រុមជម្រើសជាតិអង់គ្លេសអាយុក្រោម2០ឆ្នាំនេះ។ ក្រោយពីបានជួយឲ្យអង់គ្លេសលើកពាន World Cup ជាលើកទី1ក្នុងរយៈពេល51ឆ្នាំ Calvert-Lewin វ័យ2០ឆ្នាំ បានឲ្យដឹងថា៖ «ខ្ញុំមិនអាចរៀបរាប់ពីអារម្មណ៍ដែលខ្ញុំមាននៅពេលនេះបានឡើយ។ ខ្ញុំពិតជារំភើបណាស់ ប៉ុន្តែ និយាយឲ្យត្រង់ទៅ ពាក្យពេចន៍មិនអាចរៀបរាប់បានឡើយ»។ លោក Simpson គ្រូបង្វឹកនៃក្រុមជម្រើសជាតិអង់គ្លេស បានឲ្យដឹងថា៖ «យើងពិតជាត្រូវតែខិតខំព្យាយាមក្នុងតង់ទី2 ក្រុមជម្រើសជាតិវ៉េណេស៊ុយអេឡា បានដាក់សម្ពាធមកលើយើងយ៉ាងខ្លាំង ប៉ុន្តែកីឡាករយើងបានការពារយ៉ាងល្អ។ នៅពេលបញ្ចប់ការប្រកួត ក្រោយពីអាជ្ញាកណ្តាលបានផ្តុំកញ្ចែ យើងបានដឹងថា យើងជាម្ចាស់ជើងឯកពិភពលោក។
ក្នុងការប្រកួតមួយគូមុននៅថ្ងៃដដែលនោះ ក្រុមបាល់ទាត់ជម្រើសជាតិអ៊ីតាលី បានផ្តួលក្រុមជម្រើសជាតិអ៊ុយរូហ្គាយ ដោយការស៊ុតបាល់ប៉េណាល់ទីកាត់សេចក្តី ដើម្បីទទួលបានចំណាត់ថ្នាក់លេខ3ប្រចាំព្រឹត្តិការណ៍ U20 World Cup នេះផងដែរ៕
ប្រភពពី៖ The Sun
June 12, 2017
ដំបូន្មានក្នុងការសរសេរសារណាបញ្ចប់ការសិក្សា
ការសរសេរសារណា ជាកត្តាសំខាន់មួយដែលត្រូវគិតគូរមុននឹងបញ្ចប់ការសិក្សា ព្រោះវាជាអ្នកកំណត់វាសនារបស់និស្សិត ដែលបានខិតខំប្រឹងប្រែងអស់រយៈពេលជាច្រើនឆ្នាំរួចមក។ នៅក្នុងការសិក្សាមហាវិទ្យាល័៍យ និស្សិតអាចមានជម្រើសដើម្បីសរសេរសារណា សរសេររបាយការណ៍ ឬប្រឡងបញ្ចប់ការសិក្សា ដូច្នេះខាងក្រោមនេះគឺជាដំបូន្មានមួយចំនួនសម្រាប់និស្សិតទាំងឡាយនៅកម្ពុជាក្នុងការសម្រេចិត្តសរសេរសារណា។
1/ ពេលវេលា
អ្នកសិក្សាភាគច្រើន មានបញ្ហាមមាញឹកច្រើននៅក្នុងការសិក្សា ជាពិសេសនៅកម្ពុជា។ មាននិស្សិតខ្លះរៀន 2 មហាវិទ្យាល័យ ឬខ្លះទៀតធ្វើការផងរៀនផង និងខ្លះទៀតរៀនតែមួយមុខគត់ តែពិបាកលៃពេលដើម្បីសរសេរសារណា។ ទោះជាក្នុងលក្ខខណ្ឌណាក៏ដោយ ការរៀបចំពេលវេលា ឬតារាងផែនការក្នុងការធ្វើសកម្មភាពចងក្រង និងសរសេរតាមដំណាក់កាលជារឿងដែលមិនគួរមើលរំលងឡើយ។ និស្សិតជាច្រើន មានពេលវេលាច្រើន តែនៅពេលដែលពួកគាត់សរសេរសារណាបែរជាធ្វើយឺតជាងគេបំផុត ឬអាចយឺតពេលក៏មាន។ បញ្ហានេះ មកពីពួកគេមើលងាយស្ថានការណ៍ ហើយមិនចាប់អារម្មណ៍ពីការបែងចែកពេលវេលាឱ្យបានត្រឹមត្រូវ។
2/ មានឯកសារ
ការសរសេរ ជាពិសេសសារណា ត្រូវការឯកសារជាចាំបាច់ ប្រសិនបើអ្នកសិក្សាមិនមានលទ្ធភាពស្វែងរកឯកសារគ្រប់គ្រាន់ដើម្បីសរសេរទេនោះ អត្ថបទដែលគេសរសេរនោះនឹងមិនមានតម្លៃ។ សារណា ត្រូវការភាពលម្អិត និងអត្ថន័យគ្រប់គ្រាន់ ព្រោះវាជាការចងក្រងឯកសារផ្លូវការដើម្បីទុកឱ្យនិស្សិតជំនាន់ក្រោយសិក្សាស្រាវជ្រាវ ហេតុនេះអ្នកសរសេរសារណាមិនគួរធ្វេសប្រហែសនោះទេចំពោះការដកស្រង់ឯកសារយោងនានា។
3/ ត្រៀមខ្លួនសម្រាប់ការបកស្រាយ
ពេញរយៈពេល 4 ឆ្នាំ ឬច្រើនជាងនេះនៃការសិក្សានៅមហាវិទ្យាល័យ និស្សិតត្រូវចាំបាច់ធ្វើបទបង្ហាញរាប់មិនអស់ លើមុខវិជ្ជានីមួយៗដែលខ្លួនបានរៀន។ មាននិស្សិតខ្លះ ចង់សរសេរសារណា តែគាត់មិនអាចទទួលជោគជ័យក្នុងបទបង្ហាញ ហេតុនេះឯកសារតែមួយមុខក៏មិនគ្រប់គ្រាន់នោះដែរ។ អ្នកសិក្សាគួរត្រៀមខ្លួនដើម្បីនិយាយតាមរយៈការហ្វឹកហាត់ដោយខ្លួនឯងនៅផ្ទះ មើលវីដេអូ និងការចូលមើលសិស្សច្បងដែលបានធ្វើបទបង្ហាញមួយឆ្នាំមុនរហូតដល់ឆ្នាំដែលយើងត្រូវសរសេរ៕
June 12, 2017
ដាំបន្លែតាមបច្ចេកវិទ្យាថ្មីប្រើពេលតិច តែបានថ្លៃខ្ពស់នៅលើទីផ្សារ
ការផ្លាស់ប្តូរទម្លាប់នៃការដាំដំណាំ ពិតជាមានសារៈសំខាន់ណាស់សម្រាប់កសិករ ដោយមិនចាំបាច់ប្រើសារធាតុគីមី មិនចំណាយកម្លាំងពលកម្មច្រើន ហើយវាថែមទាំងមានតម្លៃខ្ពស់នៅលើទីផ្សារ និងមិនបារម្ភពីការលក់មិនអស់នោះឡើយ។
លោក ហុយ ថេង រស់នៅក្នុងភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្តាល បានប្រាប់ថា លោកបានចាប់យករបរដាំបន្លែនេះជាង 10ឆ្នាំមកហើយ ប៉ុន្តែទើបតែងាកមកដាំបន្លែក្នុងផ្ទះសំណាញ់តាមគោលការណ៍ធម្មជាតិនេះជាង 1ឆ្នាំប៉ុណ្ណោះ។ បើធ្វើការប្រៀបធៀបកាលពីនៅដាំបន្លែធម្មតាតាមទម្លាប់ និងការដាំបន្លែក្នុងផ្ទះសំណាញ់នេះ គឺមានការខុសគ្នាឆ្ងាយណាស់ ទាំងសុខភាពក៏ដូចជាជីវភាព ព្រោះការដាំបន្លែតាមទម្លាប់គឺយើងត្រូវប្រើកម្លាំងពលកម្មច្រើនក្នុងការថែទាំ ហើយត្រូវប្រើលុយ ក្នុងការជួលមនុស្សមើលថែ និងធ្វើស្មៅជាប្រចាំ ព្រមទាំងត្រូវចំណាយលុយទិញជីច្រើន និងទិញថ្នាំគីមីដើម្បីបាញ់សម្លាប់សត្វល្អិតចង្រៃថែមទៀត ដែល«ការបាញ់ថ្នាំម្តងៗ បានធ្វើឱ្យប៉ះពាល់ខ្លាំងណាស់ដល់សុខភាពមនុស្ស ហើយមិនមែនតែខ្លួនឯងនោះទេ សូម្បីតែប្រពន្ធកូនក៏រងនូវផលប៉ះពាល់ផងដែរ ក្រោយពីបន្លែបានផលលក់រួចយកលុយមកទូទាត់ថ្លៃឈ្នួល ថ្លៃជី ថ្លៃថ្នាំ ក៏ដូចជាការថែទាំសុខភាពនោះគឺស្ទើរតែមិនសល់នោះទេ»។
លោកថា ក្រោយពីងាកមកដាំបន្លែក្នុងមុងសំណាញ់នេះមក គឺឃើញថាអាចកាត់បន្ថយការចំណាយច្រើន ហើយប្រើពេលខ្លីជាង និងទទួលបានទិន្នផលច្រើនជាង ពេលលក់ចេញក៏បានតម្លៃខ្ពស់ជាង ធ្វើឱ្យជីវភាពប្រសើរឡើងជាងមុន។ លោកក៏បានបន្ថែមដែរថា ការដាំនេះគឺមិនខុសពីបន្លែតាមទម្លាប់ប៉ុន្មាននោះទេ គ្រាន់តែយើងធ្វើរោងគ្របពីលើប៉ុណ្ណោះ ហើយធ្វើម្តងគឺប្រើបានច្រើនឆ្នាំទៀតផង។
លោក ទ្រី ណារ៉េត កសិករដាំបន្លែតាមបច្ចេកវិទ្យាថ្មីម្នាក់ទៀតក៏បានឱ្យដឹងផងដែរថា លោកក៏ដាំបន្លែក្នុងផ្ទះសំណាញ់នេះជាង1ឆ្នាំមកហើយដែរ នៅលើផ្ទៃដីទំហំ 8ម៉ែត្រគុណ 140ម៉ែត្រ ហើយជាមធ្យមប្រមូលផល 1លើកៗលក់បានប្រមាណ 3លានរៀលដែរ «បន្លែសរីរាង្គក្នុងផ្ទះសំណាញ់នេះ គឺមិនចាំបាច់ប្រើថ្នាំគីមីសម្លាប់សត្វល្អិតនោះទេ ហើយបើប្រើជី គឺប្រើជីកំប៉ុសដែលធ្វើដោយខ្លួនឯង មិនបាច់ទិញថ្នាំគីមីសម្លាប់សត្វល្អិត នាំតែអស់លុយនោះទេ លើសពីនេះវាចំណាយពេលតិចត្រឹមតែ 29ថ្ងៃប៉ុណ្ណោះអាចទទួលបានផលហើយ ខុសពីបន្លែធម្មតាដែលត្រូវប្រើពេល1ខែកន្លះ ទៅ 1ខែ 20ថ្ងៃ ឯណោះ»។
សម្រាប់តម្លៃលក់ចេញគឺ ស្ពៃចង្កឹះ ស្ពៃខ្មៅ 1គីឡូក្រាម 2500រៀល ស្ពៃក្រញ៉ាញ់ ស្ពៃឡៃស៊ីម និងស្ពៃតឿ 1គីឡូក្រាម 3,500រៀល ចំណែកឯខាត់ណាឈើ 1គីឡូក្រាម 5,500រៀល ផ្កាខាត់ណាពណ៌ស 1គីឡូក្រាម 600០រៀល ហើយបើខាត់ណាផ្កាពណ៌ខៀវវិញបានដល់ទៅ 8,000រៀលក្នុង 1គីឡូក្រាម ព្រោះមិនប៉ះពាល់ដល់សុខភាពទាំងអ្នកដាំ ក៏ដូចជាអ្នកទទួលទានដែរ។
ទន្ទឹមនឹងនោះដែរលោក សេង គឹមសុខ មន្ត្រីការិយាល័យកសិកម្មស្រុកស្អាង បានលើកឡើងថា ស្អាងគឺជាស្រុកមួយដែលជាប់ចំណាត់ថ្នាក់លេខមួយទូទាំងប្រទេស ក្នុងការផ្គត់ផ្គង់បន្លែគ្រប់ប្រភេទច្រើនជាងគេ ដែលក្នុងថ្ងៃមួយៗគិតជាមធ្យមមិនក្រោម 20តោននោះទេ។ បើទោះជាការផលិតបន្លែសរីរាង្គហាក់នៅមានកម្រិតក្តី ប៉ុន្តែបច្ចុប្បន្នកសិករមួយចំនួនក៏កំពុងងាកមកដាំបន្លែសរីរាង្គវិញដែរ មានដូចជានៅក្នុងឃុំក្រាំងយ៉ូវ ឃុំស្វាយប្រទាល និងឃុំកោះខ្សាច់ទន្លា ជាដើម។ លោកបន្តថា កសិករនៅទីនេះចាប់ផ្តើមចេះដាំបន្លៃសរីរាង្គជាង3ឆ្នាំមកហើយ គឺដោយមានការជួយឧបត្ថមពីគម្រោងអភិវឌ្ឍន៍កសិកម្ម និងជំរុញកំណើនសេដ្ឋកិច្ចហៅកាត់ថា ប៉ារ៉ាឌី ពីអង្គការអាគ្រីស៊ុត អង្គការអាយធីអឹម និងអង្គការអេសអិនវី ទាំងបច្ចេកទេស ក៏ដូចជាទុនកម្ចីផងដែរ៕
June 12, 2017
Man United ចុះហត្ថលេខាជាមួយ Lindelof មកពី Benfica
ក្លិបបិសាចក្រហម Manchester United បានឈានដល់ការព្រមព្រៀងគ្នាមួយដើម្បីចុះហត្ថលេខាជាមួយនឹងខ្សែការពារអន្តរជាតិស៊ុយអែត Victor Lindelof ពីក្លិប Benfica ក្នុងតម្លៃខ្លួន 30.7លានផោន (ស្មើនឹង 39លានដុល្លារអាមេរិក)។
ក្រោយពីបានឈ្នះកៅអីទៅលេងក្នុងក្របខ័ណ្ឌ Champions League តាមរយៈការឈ្នះពាន Europa League ដើម្បីបន្ថែមទៅលើពាន EFL Cup និង Community Shield របស់ពួកគេ ទើបការផ្តោតអារម្មណ៍ផ្សេងៗរបស់ក្រុម Man United បានធ្លាក់ទៅលើការពង្រឹងក្រុមរបស់ខ្លួនភ្លាមៗ។ ខ្សែការពារកណ្តាលរូបនេះបច្ចុប្បន្ននឹងក្លាយជាកីឡាករចំណូលថ្មីដំបូងគេរបស់លោក Jose Mourinho នៅរដូវក្តៅនេះ ក្រោយពី Man United បានឈានដល់ការព្រមព្រៀងគ្នាមួយជាមួយនឹងក្រុមម្ចាស់ជើងឯកព័រទុយហ្គាល់ Benfica។
ក្លិប Man United របស់ក្របខ័ណ្ឌ Premier League បានចេញសេចក្តីថ្លែងការណ៍មួយលើគេហទំព័រផ្លូវការរបស់ខ្លួនថា៖ «ក្លិប Manchester United ពិតជារីករាយណាស់ក្នុងការប្រកាសថា យើងបានឈានដល់ការព្រមព្រៀងគ្នាមួយជាមួយនឹងក្លិប Benfica ដើម្បីនាំយក Victor Lindelof ខណៈដែលការផ្ទេរនេះនឹងត្រូវបំពេញក្រោយពីការត្រួតពិនិត្យសុខភាព ការជម្រះបញ្ហាអន្តរជាតិ និងការព្រមព្រៀងលើលក្ខខណ្ឌផ្ទាល់ខ្លួនផ្សេងៗរួច»។ ក្លិបបិសាចក្រហមមួយនេះ បានបន្ថែមទៀតថា៖ «សេចក្តីប្រកាសបន្ថែមទៀតនឹងត្រូវធ្វើឡើងនៅពេលដែលការផ្ទេរនេះបំពេញជាផ្លូវការ»។ Lindelof បានអភិវឌ្ឍខ្លួនចេញពីក្រុមយុវជនរបស់ Benfica មុននឹងចូលលេងក្នុងក្រុមឈុតធំចាប់ពីឆ្នាំ 2013 ដោយបានបង្ហាញខ្លួនសរុប 48លើក និងបានស៊ុតបាល់បញ្ចូលទី 2គ្រាប់៕
ប្រភពពី៖ The Guardian
June 12, 2017
Microsoft មិនអស់អាល័យនឹងប្រព័ន្ធ Windows Phone របស់ខ្លួន
ក្រោយពីក្លាយជាម្ចាស់កម្មសិទ្ធិលើមុខជំនួញទូរស័ព្ទបន្តពី Nokia រហូតដល់លក់ផ្នែកខ្លះទៅឱ្យក្រុមហ៊ុន HMD គ្រប់គ្រងបន្ត មុខជំនួញស្មាតហ្វូនត្រកូល Lumia របស់ Microsoft ហាក់នៅតែមិនប្រសើរឡើងសោះ ដោយរបាយការណ៍ហិរញ្ញវត្ថុជំនួញទូរស័ព្ទប្រចាំត្រីមាសទី 3 របស់ខ្លួនគិតត្រឹមថ្ងៃទី 31 ខែមីនា ឆ្នាំ 2017 តួលេខបង្ហាញថាមានចំណូលត្រឹម 5លានដុល្លារប៉ុណ្ណោះ។
ទោះបីជាបែបនេះក្ដី Microsoft នៅតែមិនអស់អាល័យនឹងប្រព័ន្ធប្រតិបត្តិការ Windows Phone ដែលខំប្រើពេលជាយូរកសាងឡើងនោះឡើយ ដោយថ្មីៗនេះមានព័ត៌មានបង្ហាញថា ក្រុមហ៊ុនកំពុងត្រៀមខ្លួនបង្កើតស្មាតហ្វូនត្រកូល Surface Mobile ដែលមានសមត្ថភាពខ្លាំង និងមានមុខងារប្លែកខុសពីទូរស័ព្ទដទៃ។ មួយវិញទៀត វាក៏អាចប្រើជំនួសឱ្យកុំព្យូទ័រ ដោយត្រឹមតែបន្ថែមនូវដុំ Microsoft Display Adapter ស្រដៀងនឹងកាលពីស៊េរីទូរស័ព្ទ Lumia 950 XL ដែរ។
ប្រភពនោះបានបន្ដទៀតថា Surface Mobile អាចនឹងបំពាក់នូវប៊ិច Surface Pen ដែលប្រើប្រាស់សម្រាប់ធ្វើការកត់ត្រាចំណាំអ្វីមួយទៀតផង។ ចំណុចពិសេសមួយទៀត វាប្រហែលជាអាចដំឡើងកម្មវិធីដូចកុំព្យូទ័រ (.exe)ដែរ។
ទូរស័ព្ទស៊េរីក្រោយនេះ នឹងផ្តោតសំខាន់ទៅលើសមត្ថភាពជាចម្បង ពោលគឺ Microsoft ចង់អោយវា អាចប្រើប្រាស់់បានខុសពីទូរស័ព្ទធម្មតា។ ទីមួយនោះគឺវានឹងអាចប្រើ ជំនួសជាម៉ាស៊ីនកុំព្យូទ័របាន ដោយគ្រាន់តែដោតតភ្ជាប់វាជាមួយនឹងដុំបំបែកមួយប៉ុណ្ណោះ។ មួយវិញទៀតនោះ វាក៏អាចនឹងមានភ្ជាប់មក ជាមួយនឹងប៊ិច Surface Pen សម្រាប់ធ្វើការកត់ត្រាចំណាំអ្វីមួយជាដើម។ ថ្វីត្បិតតែវាគឺជាទូរស័ព្ទ ដែលមានទំហំតូចក្តី តែ Microsoft អាចនឹងកែច្នៃ Software វាអោយអាចដំឡើង កម្មវិធីប្រភេទ .exe រឺ win32 បាន ដែលនេះនឹងធ្វើឱ្យអ្នកប្រើប្រាស់មានអារម្មណ៍ថា ខ្លួនកំពុងកាន់កូនកុំព្យូទ័រតូចមួយតាមខ្លួន។
និយាយរួមមក ទីផ្សារ Windows phone គឺពិតជាពិបាកជ្រៀតចូលណាស់ ព្រោះអីស្មាតហ្វូនគឺជា ឧបករណ៍សម្រាប់ទំនាក់ទំនង និងកំសាន្ត។ ចំណែកឯ Windows Phone វិញគឺបង្កើតឡើងក្នុងគោលបំណង សម្រាប់បំពេញកិច្ចការងារផ្សេងៗ ដូចកុំព្យូទ័រដែរ ជាហេតុធ្វើឱ្យវាមានភាពលំបាកក្នុងការទាក់ទាញចំណាប់អារម្មណ៍អ្នកប្រើប្រាស់។ យ៉ាងណាមិញ យើងមិនទាន់អាចកាត់សេចក្តីបាននោះទេ ពោលគឺយើងនឹងរង់ចាំមើលថាតើ Microsoft Surface Mobile វាមានលក្ខណៈពិសេសអ្វីខ្លះ ហើយតើពេលណាទៅ ទើបវាបង្ហាញខ្លួនជាផ្លូវការ?
June 12, 2017
កំណើនសេដ្ឋកិច្ចកើនជាង 8% ដោយសារការចាយលុយដុល្លារ
ក្នុងរយៈពេល 15ឆ្នាំចុងក្រោយនេះ ដុល្លាររូបនីយកម្ម បានរួមចំណែកជាវិជ្ជមាន ដល់ការរីកចម្រើនសកម្មភាពសេដ្ឋកិច្ចកម្ពុជា ដែលមានកំណើនសេដ្ឋកិច្ចជាមធ្យមប្រមាណជា 8.5% ខណៈប្រាក់ដុល្លារត្រូវបានចរាចរយ៉ាងទូលំទូលាយនៅកម្ពុជា ប្រមាណជាង 80% ធៀបនឹងប្រាក់រៀល។
តាមរបាយការណ៏ធនាគារជាតិ បានលើកឡើងថា ល្បឿនកំណើនដ៍គួរឱ្យកត់សម្គាល់នេះ ត្រូវបានជំរុញដោយការវិនិយោគផ្ទាល់ពីបរទេស ការនាំចេញ និងសមាហរណកម្មយ៉ាងឆាប់រហ័សទៅក្នុងតំបន់ និងពិភពលោក។ ទោះយ៉ាងនេះក្តី ខណៈដែលកម្ពុជា កំពុងក្លាយទៅជាប្រទេសមានចំណូលមធ្យម កម្រិតដុល្លាររូបនីយកម្មខ្ពស់ បានធ្វើឱ្យកម្ពុជាងាយរងឥទ្ឋិពលពីខាងក្រៅ និងប្រឈមនឹងហានិភ័យជាចម្បង ដែលអាចប៉ះពាល់ដល់កំណើនសេដ្ឋកិច្ចដែរ។
រូបិយវត្ថុជាតិតំណាងឱ្យអធិបតេយ្យភាពផ្នែករូបិយវត្ថុ និងភាពរឹងមាំរបស់ជាតិ កម្ពុជាចាំបាច់ត្រូវបង្កើនភាពឯករាជ្យពីការប្រើប្រាស់រូបិយវត្ថុជាតិ ក្នុងការជំរុញកំណើនសេដ្ឋកិច្ច រាជរដ្ឋាភិបាលបានអនុវត្តយុទ្ធសាស្រ្តជំរុញការប្រើប្រាក់រៀល តាមរយៈការបង់ពន្ធ ការបង់ថ្លៃទឹកភ្លើង ត្រូវធ្វើឡើងជាប្រាក់រៀល រួមនឹងការរក្សាតម្លៃប្រាក់រៀល តាមរយៈការធ្វើអត្រាប្តូរប្រាក់ឱ្យមានស្ថេរភាពជាដើម។
កន្លងមករាជរដ្ឋាភិបាល និងធនាគារជាតិ មិនបានប្រើប្រាស់វិធានការរដ្ឋបាល ដើម្បីបង្ខំឱ្យសាធារណៈជនប្រើប្រាស់ប្រាក់រៀលនោះទេ ដោយហេតុថាការជំរុញនេះ អាចបណ្តាលឱ្យមានទីផ្សារងងឹតប្រើប្រាស់ប្រាក់ដុល្លារអាមេរិក និងលំហូរមូលធនចេញពីប្រទេស។ រដ្ឋាភិបាល និងធនាគារជាតិនៃកម្ពុជា នឹងបន្តប្រើប្រាស់យុទ្ធសាស្រ្ត លើកទឹកចិត្តក្នុងការប្រើប្រាស់ប្រាក់រៀល ជំនួសឱ្យវិធានការរដ្ឋបាល។
ធនាគារជាតិនៃកម្ពុជាបញ្ជាក់ថា កត្តាសំខាន់ដែលនឹងជួយជំរុញឱ្យមានការផ្លាស់ប្តូរ ទៅរកការប្រើប្រាស់រូបិយវត្ថុជាតិ អាស្រ័យជាចាំបាច់លើការរួមចំណែក ពីសំណាក់ភាគីពាក់ព័ន្ធទាំងអស់។ ការរួមចំណែកទាំងនេះ អាចត្រូវបានធ្វើឡើងតាមរយៈ ការប្រើប្រាស់ប្រាក់រៀលកាន់តែច្រើនឡើងក្នុងជីវភាពប្រចាំថ្ងៃ ចាប់តាំងពីការខ្ចីប្រាក់រៀលរហូតដល់ទិញទំនិញនៅតាមទីផ្សារ ការវិនិយោគសោធននិវត្តន៍ជាដើម។ ចរាចរណ៍ប្រាក់រៀលកាន់តែច្រើននៅលើទីផ្សារ នឹងពង្រឹងសេដ្ឋកិច្ចឱ្យកាន់តែរឹងមាំ ប្រកបដោយចីរភាពនៅពេលអនាគត ជាចាំបាច់គឺត្រូវយល់ដឹងពីសារៈសំខាន់នៃការប្រើប្រាស់ប្រាក់រៀល៕

June 12, 2017
ទស្សនិកជនស្រែកទ្រហោយំ ពេលបានឮសំឡេងស្ត្រីម្នាក់ រួចជីវិតពីធ្លាក់យន្តហោះ
ស្ត្រីម្នាក់ដែលមានឈ្មោះថា Kechi Catches ជាបេក្ខនារីមកពីទីក្រុង Houston រដ្ឋ Texas សហរដ្ឋអាមេរិក ដែលកាលពីមុន នាងរស់នៅប្រទេស Negeria ហើយជាប្រទេសស្ថិតនៅក្នុងតំបន់អាហ្រិកខាងជើង។ គោលបំណងនាងមកចូលរួមប្រលងនៅក្នុងកម្មវិធីប្រលងសមត្ថភាពលំដាប់ពិភពលោក America’s Got Talent 2017 ក៏ព្រោះតែនាងចង់បង្ហើរសំឡេងដល់ទស្សនិកជនអាមេរិកបានឮ បើទោះបីជានាងមានរូបឆោមឆេះខ្លោចអាក្រក់មើលក៏ដោយ ។
ខណៈដែលណែនាំខ្លួនរួចហើយ គណៈកម្មការ លោក Simon បានចោទសួរនាងថា «តើអ្នកនឹងលើកបទអ្វីមកច្រៀង?» នាងមិនបានតបតាមសំណួរភ្លាមនេះទេ នាងបានបង្វែរអារម្មណ៍ទស្សនិកជនរួមទាំងគណៈកម្មការទាំងអស់មកស្ដាប់ប្រវិត្តជីវិតនាងបន្ដិចដែលលាក់កប់ទុកក្នុងចិត្តជាយូរណាស់មកហើយថា «ល្អ! ពិតណាស់ខ្ញុំបានរួចផុតមានជីវិតពីការធ្លាក់យន្ដហោះ នៅពេលដែលខ្ញុំមានអាយុ 16ឆ្នាំ បានហោះហើរត្រឡប់មកប្រទេស Negeria ហើយគ្រានេះមនុស្សបានស្លាប់ 107 នាក់ ក្នុងចំណោមមនុស្ស 109នាក់ ដែលខ្ញុំជាម្នាក់ នៃអ្នកដំណើរ 2នាក់បានរស់រានមានជីវិត»។
ដោយការងឿងឆ្ងល់របស់ លោក Simon បានបន្ដសួរទៀតថា «តើអ្នកពិតជាបានដោះស្រាយស្ថានការណ៍នេះដោយរបៀបណា?»។ នាងក៏តបវិញថា «ពិតណាស់ ពេលដឹងខ្លួនគឺ ខ្ញុំបានដេកសម្រាកនៅលើគ្រែក្នុងមន្ទីរពេទ្យដោយមានរុំរបួស ក្បាល ហើយនិងជើង ដែលមិនអាចកម្រើកបាន ហើយបទចម្រៀងនេះគឺបាន សម្ដែងពីការរួចជីវិតរបស់ខ្ញុំ និងជាអ្វីដែលមានអត្ថន័យសម្រាប់ខ្ញុំ»។
ចុងក្រោយនៅពេលដែល នាងបានបន្លឺសំនៀងដ៏ពីរោះក្រអួនក្រអៅចេញមកក្រៅ គណៈកម្មការ និងទស្សនិកជន ចំហរមាត់ភ្ញាក់ផ្អើលចំពោះស្ត្រីមានរូបសម្រស់ដ៏គួរឱ្យភ័យខ្លាច មិនចង់ឱ្យចង់ក្បែរនោះ បែរជាអាណិតស្រណោះនាង និងលន្លង់លន្លោចទៅតាមមនោសញ្ចេតនារបស់បទចម្រៀង រហូតដល់ស្រក់ទឹកភ្នែកតាម៕
ដើម្បីឱ្យកាន់តែជាក់ច្បាស់ សូមទស្សនាវីដេអូចខាងក្រោមនេះ ៖
https://www.youtube.com/watch?v=iUP9lehOji0
June 10, 2017
អត់ម្ដេចបាន!!! ចាំអង្កាល់ទៀតបានទៅលេងព្រឹត្តិការណ៍ «កាលយើងនៅក្មេង»
ព្រឹត្តិការណ៍ «កាលយើងនៅក្មេង» គឺជាគម្រោងទី2 របស់ក្រុមទាយាទអង្គរ បន្ទាប់ពីបានធ្វើដោយជោគជ័យនូវគម្រោងទី1 ម្ដងរួចមកហើយនៅឯរាជធានីភ្នំពេញ គឺ៖ « លក្ខណៈពិសិដ្ឋនៃអក្សរសាស្ត្រ និង សាស្រ្តាស្លឹករឹតខ្មែរ» ៖ 2016 – CKCC។
«កាលយើងនៅក្មេង» នឹងប្រព្រឹត្តទៅចំនួន 2ថ្ងៃកន្លះ គឺថ្ងៃសៅរ៍ អាទិត្យ និងព្រឹកថ្ងៃច័ន្ទ ទី8-9-10 រោច ខែជេស្ឋ ឆ្នាំរកា នព្វស័ក ព. ស. 2561 ត្រូវនឹងថ្ងៃទី 17-18 និង 19 ខែមិថុនា ឆ្នាំ 2017 នៅឯវត្តបុរាណ ចំប៉ា ជិតកៀនស្វាយ តាមបណ្ដោយផ្លូវជាតិលេខ1 រាជធានីភ្នំពេញ។
នៅក្នុងព្រឹត្តិការណ៍ «កាលយើងនៅក្មេង» មានកម្មវិធីដូចជា៖
1. គោរពទង់ជាតិ និង ភ្លេងជាតិខ្មែរ បទនគររាជ។
2. លេង ល្បែងកាលនៅក្មេង និង ល្បែងប្រជាប្រិយ ក្នុងមួយថ្ងៃ 18មុខ។
3. សរសេររឿងរ៉ាវ អនុស្សាវរីយ៍ និង បទពិសោធន៍កាលនៅក្មេង នៅលើ ខ្លោងទ្វាររឿង ។
4. កូនទំពាំងពិសិដ្ឋ៖ ជាកូនបណ្ណាល័យតូចមួយ ដែលឱកាសឲ្យអ្នកចូលរួមក្លាយជាគ្រូរបស់ក្មេងៗមួយថ្ងៃដូចជា៖ ការអានសៀវភៅឲ្យក្មេងៗស្ដាប់ បង្រៀនក្មេងៗ ។ល។ ទីនេះក៏បំផុសគំនិត៖ កុមារម្នាក់ អ្នកចូលរួមម្នាក់ សំរាមមួយថង់ ផងដែរ។
5. ហត្ថកម្ម៖ បត់រូបផ្សេងៗអំពីក្រដាស-ស្លឹកត្នោត-ស្លឹកដូង រៀនចាក់ចេក រៀនបត់ឈូកថ្វាយព្រះ និង រៀនដោតភួងម្លិះថ្វាយចំពោះព្រះឆាយាល័ក្ខណ៍ព្រះមហាក្សត្រិយានី (អបអរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រិយានី សម្ដេចយាយ)។
6. ពិព័រណ៍វត្តបុរាណ៖ បង្ហាញលក្ខណៈវត្ត និងព្រះវិហារបុរាណខ្មែរ-សាស្ត្រាស្លឹករឹត-គំនូរសាស្ត្រាល្បែង
7. ជិះរទេះគោទៅទស្សនាព្រះវិហារបុរាណ 3ទៀតនៅក្នុងភូមិ ដូចជា វត្តមជ្ឈិមវ័ន វត្តមុនីសាគរ និង វត្តវិចិត្តារាម-ផ្ទះបុរាណខ្មែរ-សិប្បកម្មតម្បាញក្រមា។
8. ដើរភ្លក្សអាហារ និង ទិញរបស់របរកាលនៅក្មេង។
9. រៀនធ្វើ ចង្កៀង និង គោមផ្កាយនិស្ស័យ។
10. វេទិកាកុមារ៖ ការបង្ហាញម៉ូដកុមារ នារីសប្បុរស និង ទស្សនីយភាពដោយកុមារៗដែលមានទេពកោសល្យ។
11. រាត្រីចាប៉ីដងវែង-ភ្លេងបុរាណខ្មែរ
12. ក្បួនថ្វាយភួងម្លិះចំពោះព្រះឆាយាល័ក្ខណ៍ ដើម្បីអបអរព្រះរាជពិធីបុណ្យចម្រើនព្រះជន្ម នៅថ្ងៃចម្រើនព្រះជន្ម។
13. នារីសប្បុរស-រំដួលលិចទឹក៖ កញ្ញារំដួលលិចទឹកលក់បាយឡុកបាយឡ និង ការស្វែងរកសប្បុរិសធម៌ជួយកុមារ និង ចាស់ជរាទុរគតក្នុងភូមិ។ យើងក៏បំផុសផងដែរនូវកុសលដែលអ្នកចូលរួមបានសម្អាតវត្តអារាម ព្រះវិហារបុរាណរួមគ្នាផងដែរ។
14. ល្បែងបេសកកម្ម៖ បេសកកម្មដែលអ្នកចូលរួមត្រូវធ្វើទាក់ទងនឹងព្រឹត្តិការណ៍។
15. អ្នកចូលរួមនឹងទទួលបាននូវ ផែនទីទេសចរណ៍ ម្នាក់មួយផ្ទាំង ដែលតម្រូវឲ្យចូលរួមគ្រប់សកម្មភាពរបស់ព្រឹត្តិការណ៍ ដើម្បីទទួលបានត្រា ដែលមានឱកាសទទួលបាន តុក្កតាអាថ៌កំបាំង – និមិត្តរូបរបស់ព្រឹត្តិការណ៍។
គួរបញ្ជាក់ផងដែរថា កម្មវិធី «កាលយើងនៅក្មេង» មានទស្សនវិស័យដ៏សំខាន់មួយគឺ «ដើម្បីលើកស្ទួយព្រះវិហារបុរាណរបស់ខ្មែរ ដែលជាបេតិកភណ្ឌជាតិដែលកំពុងតែសាបសូន្យ» ដោយផ្សារភ្ជាប់ការកម្សាន្ត សប្បុរិសធម៌ ការលើកស្ទួយវប្បធម៌ជាតិ-វិស័យអប់រំ និង ការបំផុសគំនិតទេសចរណ៍សហគមន៍។ ជាអត្ថន័យដ៏ស៊ីជម្រៅ ព្រឹត្តិការណ៍ «កាលយើងនៅក្មេង» ចង់ឲ្យអ្នកគ្រប់គ្នានឹកឃើញដល់កាលដែលគេនៅជាកុមារ ដែលវេលានោះ នៅក្នុងព្រះនគរយើង នៅសេសសល់ព្រះវិហារបុរាណ មានចំនួនច្រើនជាងសព្វថ្ងៃ។ ឆ្លងកាត់ដំណើរនៃពេលវេលា ព្រះវិហារបុរាណទាំងឡាយ ជាភស្ដុតាងប្រវត្តិសាស្រ្តដ៏មានសារៈសំខាន់ កំពុងតែរងគ្រោះដោយការវាយកម្ទេចចោល ហើយជំនួសមកវិញនូវព្រះវិហារថ្មី គួរជាទីព្រួយបារម្ភជាពន់ពេកណាស់។
ប្រសិនបើលោកអ្នកមានចំណាប់អារម្មណ៍ចង់ជួលតូបលក់ផលិតផលដែរ សូមទាក់ទងតាមរយៈលេខទូរសព្ទខាងក្រោមនេះ៖
081 809 536 / 086 566 778 / 077 220 083 / 010 281 069 / 010 600 848 / 012 679 995
ព័ត៌មានលម្អិត សូមចូលទៅកាន់ទំព័រ Facebook ទាយាទអង្គរ – Angkor Inheritor

June 10, 2017
កំណើនអ្នកចូលទស្សនាពិព័រណ៍អន្តរជាតិមានការកើនឡើង
នេះជាថ្ងៃទីពីរហើយដែលពិព័រណ៍អន្តរជាតិស្ដីពី «ស្ថាបត្យកម្ម និងការតុបតែងនៅកម្ពុជា» បានប្រព្រឹត្តទៅ ក្នុងនោះគេសង្កេតឃើញថា មានកំណើននៃអ្នកចូលរួមមានការកើនឡើង។
ពិធីតាំងពិព័រណ៍អន្តរជាតិដែលប្រព្រឹត្ដទៅរយៈពេល 3ថ្ងៃចាប់ពីថ្ងៃ 08-11 ខែមិថុនា ឆ្នាំ 2017 ដែលរៀបចំឡើងនៅឯមជ្ឈមណ្ឌលសន្និបាត និងពិព័រណ៍កោះពេជ្រ ។ នៅថ្ងៃទី1 មានពាណិជ្ជករចូលទស្សនា រង្វង់ 1,164នាក់ និងនិស្សិតចំនួន 357នាក់ មានកំណើន 30-40% ធៀបទៅនឹងឆ្នាំ 2016។ នៅថ្ងៃនេះមានពាណិជ្ជករ 1,172នាក់ និងនិស្សិត 512នាក់មានកំណើនរង្វង់ 30% ធៀបទៅឆ្នាំ2017។
ពិធីនេះរៀបចំឡើងដើម្បីផ្ដល់ឱកាសដល់ស្ថាបត្យករ និងអ្នកតុបតែងទាំងអស់ឱ្យបានឃើញនូវសម្ភារទំនើបៗ សម្រាប់ធ្វើការអភិវឌ្ឍលើវិស័យសំណង់ និងស្ថាបត្យកម្មនៅកម្ពុជាឱ្យកាន់តែល្អប្រសើរ និងមានភាពរីកចម្រើន។ក្នុងនោះក៏មានការជួបជុំរវាងស្ថាបត្យករ អ្នករចនាផ្នែកខាងក្នុង អ្នកអភិវឌ្ឍន៍វិស័យអចលទ្រព្យ និងអ្នកជំនាញខាងសំណង់ ដើម្បីផ្លាស់ប្តូរបទពិសោធ អំពីគំនិតច្នៃប្រឌិត និងនិន្នាការចុងក្រោយបង្អស់នៅក្នុងវិស័យនេះដែលមានការចូលរួមពីក្រុមហ៊ុនល្បីៗក្នុង និងក្រៅស្រុកចំនូន150 ដែលមានកំណើន 25% ធៀបទៅនឹងឆ្នាំ2016 ក្នុងនោះមានការចូលរួមពីប្រទេសសិង្ហបុរី ម៉ាឡេស៊ី វៀតណាម មីយ៉ាន់ម៉ា និងប្រទេសចិនជាដើម៕
June 10, 2017
ផ្សារទំនើបខ្នាតអន្តរជាតិថ្មីមួយនឹងបើកដំណើរការនៅសប្តាហ៍ក្រោយ
ភ្នំពេញៈ ផ្សារទំនើបស្តង់ដារអន្តរជាតិថ្មីមួយ គឺផ្សារទំនើបក្នុងអគារ Exchange Square នឹងបើកដំណើរការនៅសប្តាហ៍ក្រោយនេះហើយ។
អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងឲ្យដឹងតាមទូរស័ព្ទនារសៀលថ្ងៃទី10 មិថុនានេះថា ផ្សារទំនើបស្ថិតក្នុងអគារ Exchange Square ទំហំ 8,000ម៉ែត្រការ៉េ ដែលមានទីតាំងស្ថិតនៅក្រោយស្ថានទូតអាមេរិក នឹងបើកដំណើរការនៅថ្ងៃទី15 មិថុនាខាងមុខនេះហើយ។ ផ្សារទំនើបនេះមានកម្ពស់ 4ជាន់ ចាប់ផ្តើមពីជាន់ផ្ទាល់ដី ដល់ជាន់ទី3 និងជាន់ទី4 នឹងប្រើប្រាស់ជាក្លឹបហាត់ប្រាណ ហើយចាប់ពីជាន់ទី5ដល់ជាន់ទី20 នឹងប្រើប្រាស់ជាអគារការិយាល័យ។
អ្នកនាងបន្តថា «រហូតមកទល់ពេលនេះផ្សារទំនើបនេះ ទទួលបានការជួលជាង 60ភាគរយហើយនៃផ្ទៃក្រឡាសរុប។ ផ្សារទំនើបនេះនឹងមានលក់សម្លៀកបំពាក់ម៉ាកល្បីៗដែលនាំចូលពីបរទេស អាហារ ភេសជ្ជៈ និងមណ្ឌលកម្សាន្តដែលរួមមានរោងភាពយន្តផងដែរ»។ អ្នកនាងបន្តថា «ផ្សារទំនើបនេះផ្តោតលើអតិថិជនចម្រុះ ដែលមានជីវភាពចាប់ពីកម្រិតមធ្យមឡើងទៅ ស្របពេលកម្លាំងទិញពីសំណាក់ប្រជាពលរដ្ឋកំពុងកើនឡើងផ្នែកកម្សាន្ត និងអាហារ ភេសជ្ជៈ»។ គម្រោង Exchange Square ត្រូវបានវិនិយោគដោយក្រុមហ៊ុន Hongkong Land ជាក្រុមហ៊ុនដែលមានភាពជោគជ័យក្នុងការវិនិយោគ លើវិស័យអចលនទ្រព្យលំដាប់ពិភពលោក។
អ្នកនាង អាន សុធីតា បានបន្តថា ផ្សារទំនើបនេះនឹងទទួលបានជោគជ័យ ដោយសារបច្ចុប្បន្ននេះ និន្នាការដើរផ្សាររបស់ប្រជាពលរដ្ឋខ្មែរបានផ្លាស់ប្តូរពីការដើរផ្សារតាមបែបប្រពៃណី មកកាន់ផ្សារទំនើប និងផ្សារដែលមានស្តង់ដារអន្តរជាតិ។
យោងតាមលទ្ធផលបឋមនៃការសិក្សារបស់ក្រុមហ៊ុនប៊ុណ្ណារៀលធីគ្រុប ដែលបានបញ្ចប់កាលពីពេលថ្មីៗនេះបានរកឃើញថា តម្រូវការប្រើប្រាស់ផ្សារទំនើប បានកើនឡើងពី 79ភាគរយកាលពីត្រីមាសទី1ឆ្នាំមុន ដល់ 82ភាគរយនៅដំណាច់ត្រីមាសទី 1ឆ្នាំនេះ ផ្ទុយទៅវិញទំហំផ្សារទំនើប ដែលនៅសល់បានកើនឡើងពី 21ដល់ 26ភាគរយ ក្នុងរយៈពេលដូចគ្នានេះ ដោយសារការផ្គត់ផ្គង់កើនឡើង។
ការសិក្សាដដែលបានរកឃើញថា ចំនួនផ្សារទំនើបនៅរាជធានីភ្នំពេញមានចំនួន 34គម្រោង ក្នុងនោះគម្រោងកម្រិត A មានចំនួន 12គម្រោង គម្រោងកម្រិត B មានចំនួន 10គម្រោង និងគម្រោងកម្រិត C មានចំនួន 12គម្រោង។
នាយកផ្នែកវាយតម្លៃនៃក្រុមហ៊ុនប៊ុណ្ណារៀលធីគ្រុបលោក ប៉ែន សុខគា បានថ្លែងឲ្យដឹងថា «កំណើននៃតម្រូវការប្រើប្រាស់ផ្សារទំនើប ដោយសារកត្តាមួយចំនួន ដូចជា កំណើនប្រជាសាស្រ្ត កំណើនប្រាក់ចំណូលរបស់ប្រជាពលរដ្ឋ លក្ខខណ្ឌនៃការទិញទំនិញ និងការបញ្ចុះអត្រាការប្រាក់របស់មីក្រូហិរញ្ញវត្ថុ កំពុងជះឥទ្ធិពលដល់ដំណើរការនេះ»។
លោកបន្តថា «ការបន្ថយអត្រាការប្រាក់របស់រដ្ឋាភិបាល អាចជួយឲ្យប្រជាពលរដ្ឋអាចលៃលកប្រាក់សម្រាប់ចំណាយបាន ហើយការទិញបង់រំលស់កាន់តែងាយស្រួលក៏កំពុងជំរុញកំណើននៃការលក់ផងដែរ»៕
June 10, 2017