ក្រសួងសេដ្ឋកិច្ច និងហិរញ្ញវត្ថុ បានកំណត់កាលបរិច្ឆេទចាប់ផ្តើមប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ 2017 ចាប់ពីថ្ងៃទី15 ខែមិថុនា ដល់ថ្ងៃទី30 ខែវិច្ឆិកាឆ្នាំ2017 ដែលនេះគឺជាឆ្នាំទី2 ហើយនៃការអនុវត្តច្បាប់ហិរញ្ញវត្ថុទាក់ទងនឹងការលើកលែងការយកពន្ធពីទោចក្រយានយាន្ត ដែលមានកម្លាំងចាប់ពី 125CC ចុះក្រោម។
ប្រកាសរបស់ក្រសួងសេដ្ឋកិច្ច និងហិរញ្ញវត្ថុ ដែលចុះហត្ថលេខាកាលពីថ្ងៃទី24 ខែឧសភា បានបញ្ជាក់ថា ម្ចាស់មធ្យោបាយដឹកជញ្ជូន និងយានជំនិះគ្រប់ប្រភេទត្រូវទៅបង់ប្រាក់ពន្ធនេះនៅតាមសាខាពន្ធដារខេត្ត ខណ្ឌ ឬនៅធនាគារកាណាឌីយ៉ា ក.អ ឬធនាគារអេស៊ីលីដា ភីអិលស៊ី ឬធនាគារកម្ពុជាសាធារណៈ ភីអិលស៊ី ឬនៅធនាគារវឌ្ឍនៈ ឬនៅធនាគារ អេអុិនហ្សេត រ៉ូយ៉ាល់។
យោងតាមសេចក្តីជូនដំណឹងរបស់ក្រសួង ដើម្បីបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ2017 ម្ចាស់យានយន្តត្រូវភ្ជាប់មកជាមួយនូវ៖
ក- ចំពោះម្ចាស់យានយន្តមានប័ណ្ណសម្គាល់ការបង់ពន្ធប័ណ្ណសម្គាល់ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ដោយមិនចាំបាច់ដាក់លិខិតប្រកាសបង់ពន្ធ។ ករណីបាត់ប័ណ្ណនេះ ម្ចាស់យានយន្តត្រូវដាក់ពាក្យស្នើបោះពុម្ភប័ណ្ណបង់ពន្ធសាជាថ្មីនៅសាខាពន្ធដារខេត្ត-ខណ្ឌ ឬនៅសាខាណាមួយនៃធនាគារទាំង5ខាងលើ ដោយត្រូវបង់កម្រៃសេវាក្នុងការធ្វើប័ណ្ណនេះចំនួន5,000រៀល។
ខ- ចំពោះម្ចាស់យានយន្តដែលមិនមានប័ណ្ណសម្គាល់ការបង់ពន្ធត្រូវបំពេញ និងដាក់លិខិតប្រកាសបង់ពន្ធចំនួន2សន្លឹក តាមទម្រង់ដែលចេញដោយអគ្គនាយកដ្ឋានពន្ធដារ ដោយភ្ជាប់មកជាមួយឯកសារបង់ពន្ធឆ្នាំ2016 ករណីបាត់ឯកសារបង់ពន្ធនេះ ម្ចាស់យានយន្តត្រូវដាក់ពាក្យស្នើសុំលិខិតបញ្ជាក់ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ2016 នៅសាខាពន្ធដារខេត្ត-ខណ្ឌ ដើម្បីប្រើប្រាស់ក្នុងការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ2017។
គ- ចំពោះមធ្យោបាយដឹកជញ្ជូន និងយានជំនិះគ្រប់ប្រភេទទើបមកប្រកាសបង់ពន្ធលើកដំបូងត្រូវបំពេញ និងដាក់លិខិតប្រកាសបង់ពន្ធចំនួន2សន្លឹក តាមទម្រង់ដែលចេញដោយអគ្គនាយក-ដ្ឋានពន្ធដារ និងភ្ជាប់មកជាមួយនូវឯកសារដូចជាប័ណ្ណសម្គាល់យានយន្ត ឬវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ដែលចេញដោយក្រសួងសាធារណការ និងដឹកជញ្ជូន ឬបង្កាន់ដៃបង់ពន្ធនាំចូល ឬលិខិតបញ្ជាក់ការប្រើប្រាស់យានយន្តចេញដោយឃុំ ឬសង្កាត់ ចំពោះយានយន្តកែច្នៃក្នុងស្រុក និងអត្តសញ្ញាណប័ណ្ណសម្គាល់ខ្លួនរបស់ម្ចាស់មធ្យោបាយដឹកជញ្ជូន និងយានជំនិះ ឬលិខិតឆ្លងដែន ឬលិខិតបញ្ជាក់សំបុត្រកំណើតចេញដោយមន្ត្រីអត្រានុកូលដ្ឋាន។
ឃ- ចំពោះមធ្យោបាយដឹកជញ្ជូន និងយានជំនិះគ្រប់ប្រភេទដែលបានបង់ពន្ធឆ្នាំកន្លងមក ហើយត្រូវបានប្តូរប័ណ្ណសម្គាល់យានយន្តថ្មីម្ចាស់យានយន្តត្រូវធ្វើបច្ចុប្បន្នភាពព័ត៌មានយានយន្ត ដើម្បីប្រកាសបង់ពន្ធបន្ត និងប្តូរប័ណ្ណសម្គាល់ការបង់ពន្ធក្នុងករណីរថយន្តនោះត្រូវបានប្តូរស្លាកលេខ។ ដើម្បីមានភាពងាយស្រួលក្នុងការប្រកាសបង់ពន្ធប្រភេទនេះនៅឆ្នាំបន្តបន្ទាប់ខាងមុខ ម្ចាស់យានជំនិះអាចស្នើសុំការធ្វើប័ណ្ណសម្គាល់ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ដោយគ្រាន់តែគូសក្នុងប្រអប់ដូចមានបង្ហាញក្នុងលិខិតប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ2017។ ការស្នើសុំបោះពុម្ពប័ណ្ណនេះត្រូវបង់ថ្លៃសេវាចំនួន 5,000រៀល។
ចាប់ពីថ្ងៃទី01 ខែមករា ឆ្នាំ2018 តទៅអង្គភាពពន្ធដារនឹងរៀបចំយន្តការត្រួតពិនិត្យការបង់ពន្ធ និងផាកពិន័យចំពោះមធ្យោបាយដឹកជញ្ជូន និងយានជំនិះទាំងឡាយណាដែលមិនទាន់បានប្រកាសបង់ពន្ធតាមការកំណត់ខាងលើ៕
