វល័ក្ខ - La Reine Media

ADB ផ្តល់ហិរញ្ញប្បទានចំនួនជិត 250លានដុល្លារ

ធនាគារអភិវឌ្ឍន៍អាស៊ី (ADB) បានផ្តល់ហិរញ្ញប្បទានសម្រាប់គម្រោង និងកម្មវិធីលើកិច្ចព្រមព្រៀងឥណទាន4 ដែលមានទឹកប្រាក់សរុបជិត 250លានដុល្លារ។ កិច្ចព្រមព្រៀងនេះត្រូវបានចុះហត្ថលេខាដោយឯកឧត្ដម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី Durrani-Jamal នាយិកាធនាគារអភិវឌ្ឍន៍អាស៊ី (ADB) ប្រចាំកម្ពុជាកាលពីព្រឹកថ្ងៃទី24 ខែតុលា ឆ្នាំ2018 នៅទីស្តីការក្រសួងសេដ្ឋកិច្ច។

យោងតាមសេចក្តីថ្លែងការណ៍របស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា៖ សម្រាប់គម្រោងទាំងនេះគឺ

1-អភិវឌ្ឍទីក្រុងរបៀងនៃមហាអនុតំបន់ទន្លេមេគង្គជំហានទី4។ គម្រោងនេះនឹងជួយលើកកម្ពស់សមាហរណកម្មសេដ្ឋកិច្ចក្នុងតំបន់តាមរយៈការអភិវឌ្ឍក្រុងរបៀងអាទិភាពចំនួន3 គឺក្រុងកំពង់ចាម ក្រចេះ និងស្ទឹងត្រែង ដែលជាក្រុងរបៀងនៃមហាអនុតំបន់ទន្លេមេគង្គ។ ក្នុងនោះទឹកប្រាក់ 88,50លានដុល្លារ នឹងត្រូវប្រើប្រាស់ក្នុងការអភិវឌ្ឍនេះរួមមាន ការសាងសង់ស្ថានីយប្រព្រឹត្តកម្មទឹកកខ្វក់ ការតភ្ជាប់ប្រព័ន្ធលូរំដោះទឹកដល់ប្រជាជន ការសាងសង់ទីលានចាក់សំរាម និងការសាងសង់ស្ថានីយបូមទឹកកខ្វក់។

2-កម្មវិធីអភិវឌ្ឍន៍វិស័យអប់រំកម្រិតមធ្យមសិក្សាទុតិយភូមិជំហានទី2៖ ដែលមានគោលបំណងលើកកម្ពស់គុណភាពនៃការបង្រៀន និងសមត្ថភាពស្ថាប័ននៅក្នុងការអប់រំកម្រិតវិទ្យាល័យ ដោយគ្រោងចំណាយថវិកាសរុបប្រមាណ 53,50លានដុល្លារ។

3-គម្រោងកែលម្អការគ្រប់គ្រងបរិស្ថានក្រុងជុំវិញបឹងទន្លេសាបជំហានទី2៖ គ្រោងចំណាយថវិកាសរុបប្រមាណ 97,70លានដុល្លារសម្រាប់ការអភិវឌ្ឍ និងការកែលម្អហេដ្ឋារចនាសម្ព័ន្ធក្នុងគម្រោងអាងទឹកទន្លេសាបដែលផ្តោតលើការគ្រប់គ្រងទឹកសំណល់នៅក្នុងទីក្រុងបាត់ដំបង សិរីសោភ័ណ និងស្ទឹងសែន។

4-គម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាប័ន្នក្នុងមហាអនុតំបន់ទន្លេមេគង្គជំហានទី2៖ គ្រោងចំណាយថវិកាវិនិយោគសរុបប្រមាណ 30,89លានដុល្លារ ក្នុងខេត្តគោលដៅចំនួន2(កែប និងព្រះសីហនុ)។

គម្រោងនេះមានគោលបំណងបង្កើនការទាក់ទាញទេសចរណ៍ក្នុងខេត្តកែប និងក្រុងព្រះសីហនុដោយលើកកម្ពស់ហេដ្ឋារចនាសម្ព័ន្ធដឹកជញ្ជូន សេវាកម្ម បរិស្ថាននៅទីក្រុង និងសមត្ថភាពរបស់ពួកគេក្នុងការគ្រប់គ្រងនិរន្តរភាពទេសចរណ៍៕

October 25, 2018

សម្រេចក្តីប្រាថ្នាលោកអ្នកដើម្បីទទួលយកបុត្រធីតាជាទីស្រលាញ់នៅថ្ងៃនេះ!

ជីវិតអាពាហ៍ពិពាហ៍របស់មនុស្សគ្រប់រូបអាចមានសុភមង្គលបានដោយការមានបុត្រដ៏គួរឲ្យស្រលាញ់ ។ ប៉ុន្តែបច្ចុប្បន្ន មានស្វាមីភរិយាមួយចំនួនកំពុងតែជួបប្រទះបញ្ហាមិនអាចមានបុត្រ។

តើអ្វីទៅជាមូលហេតុបណ្តាលអោយស្វាមីភរិយាមិនអាចមានបុត្រ?
ភាពមិនអាចមានបុត្រគឺជាជំងឺ ហើយអាចកើតមានឡើងដោយសារកត្តាជាច្រើនដែលអាចបណ្តាលមកពីភរិយា ឬស្វាមី។ ដើម្បីដោះស្រាយបញ្ហានេះ គ្រួសារមួយចំនួនបានសម្រេចចិត្តចាកចេញទៅក្រៅប្រទេសដើម្បីស្វែងរកសេវាព្យាបាល ដែលធ្វើអោយពួកគេត្រូវចំណាយថវិកា និងពេលវេលាជាច្រើន។ ហើយពេលខ្លះ លទ្ធផលក៏មិនអាចបានដូចបំណងទៀតផង។

ដោយមើលឃើញនូវបញ្ហានេះ មន្ទីរពហុព្យាបាល និងសម្ភព អរៀនដា ដែលជាគ្លីនិកឈានមុខគេមួយនៅព្រះរាជាណាចក្រកម្ពុជាបានបង្កើតសេវាកម្មព្យាបាលជំងឺគ្មានបុត្រ ។ សេវាកម្មព្យាបាលជំងឺគ្មានបុត្រ ត្រូវបានបង្កើតឡើងដើម្បីបំពេញតម្រូវការរបស់ក្រុមគ្រួសារដែលកំពុងស្វែងរកសេវាកម្មនេះនៅក្នុងព្រះរាជាណាចក្រកម្ពុជា ហើយត្រូវបានរៀបចំឡើងអោយមានលក្ខណៈស្តង់ដារអន្តរជាតិ ជាមួយនឹងគ្រូពេទ្យឯកទេសដែលមានវិជ្ជាជីវៈច្បាស់លាស់ និងបទពិសោធន៍យូរឆ្នាំក្នុងការជួយអ្នកជំងឺអោយទទួលបានបុត្រតាមបំណងប្រាថ្នា។ រីឯឧបករណ៍វេជ្ជសាស្ត្រ មន្ទីរពិសោធន៍ បន្ទប់វះកាត់ និងបន្ទប់ស្នាក់នៅត្រូវបានរៀបចំដោយវិស្វករវេជ្ជសាស្ត្របរទេសដើម្បីធានានូវប្រសិទ្ធភាព និងគុណភាពនៃការព្យាបាល។ នៅរង់ចាំអីទៀត! សូមមកទទួលការព្យាបាលនៅមន្ទីរពហុព្យាបាល និងសម្ភព អរៀនដា ឥឡូវនេះ។

អំពីមន្ទីរពហុព្យាបាល៖ អរៀនដា គឺជាស្ថាបនសុខាភិបាលឯកជនមួយដែលផ្តល់នូវសេវាកម្មផ្នែកវេជ្ជសាស្ត្រ ឈានមុខគេនៅក្នុងព្រះរាជាណាចក្រកម្ពុជា។ មន្ទីរពហុព្យាបាល អរៀនដា មានផ្តល់សេវាពិគ្រោះ និងព្យាបាលលើផ្នែកជាច្រើនដូចជា ជំងឺអត់កូន ជំងឺបេះដូង សម្ភព រោគស្ត្រី ជំងឺកុមារ ជំងឺទូទៅ និងសេវាសង្គ្រោះបន្ទាន់ ដែលរាល់សេវាកម្មទាំងអស់ត្រូវបានបង្កើតឡើងដើម្បីឆ្លើយតបទៅនឹងតម្រូវការរបស់អ្នកជំងឺនាពេលបច្ចុប្បន្ន។

មន្ទីរពហុព្យាបាល អរៀនដា មានវេជ្ជបណ្ឌិតល្បីៗដែលកំពុងបម្រើការក្នុងស្ថាបនជាតិ និងអន្តរជាតិដែលមានជំនាញឯកទេស និងបទពិសោធន៍ជាច្រើនឆ្នាំរួមផ្សំជាមួយបរិក្ខារវេជ្ជសាស្ត្រទំនើបៗ បន្ទប់ពិសោធន៍ សាលវះកាត់ បន្ទប់សំរាល និងបន្ទប់សំរាកត្រូវបានរៀបចំដោយវិស្វករវេជ្ជសាស្ត្របរទេសដើម្បីផ្ដល់ជូនផាសុកភាព និងគុណភាពនៃការព្យាបាលកម្រិតស្តង់ដារអន្តរជាតិ។ មន្ទីរពហុព្យាបាល និង សម្ភព អរៀនដា មានទីតាំងស្ថិតនៅអគារ 9A ផ្លូវលេខ 466 សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ ទំនាក់ទំនងតាមលេខទូរស័ព្ទ ០២៣ ២២៣ ៧៨៩ ដើម្បីទទួលបានបុត្រធីតាតាមបំណងប្រាថ្នារបស់លោកអ្នក៕

October 25, 2018

អេ អឹម ខេ ផ្តល់ជូនឱកាសការងារចំនួនជាង ៥០០កន្លែង

ភ្នំពេញ៖ គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ប្រកាសផ្តល់ជូនឱកាសការងារចំនួនប្រមាណជាង ៥០០កន្លែង នៅក្នុងការតាំងពិព័រណ៍ការងារ និងផលិតភាពជាតិ ២០១៨ រៀបចំដោយទីភ្នាក់ងារជាតិមុខរបរ និងការងារ (NEA) ដែលប្រព្រឹត្តទៅនៅថ្ងៃទី ២៧-២៨ ខែតុលា ឆ្នាំ២០១៨ ចាប់ពីម៉ោង ៨:០០ព្រឹក ដល់ម៉ោង ៦:០០ល្ងាច នៅមជ្ឈមណ្ឌលពិព័រណ៍ការងារ និងសន្និបាតកោះពេជ្រ។

អេ អឹម ខេ គឺជាគ្រឹះស្ថានមីក្រូវហិរញ្ញវត្ថុ ដែលផ្តោតទៅលើការជួយដល់ប្រជាពលរដ្ឋក្រីក្រភាគច្រើនក្នុងគោលបំណងជួយធ្វើឱ្យប្រសើរឡើងនូវជីវភាពរស់នៅរបស់ពួកគេ តាមរយៈការផ្តល់សេវាមីក្រូហិរញ្ញវត្ថុសមស្រប និងឋិតថេរ។ ក្នុងរយៈពេលប៉ុន្មានឆ្នាំចុងក្រោយនេះ អេ អឹម ខេ មានការរីកចម្រើនទាំងតំបន់ប្រតិបត្តិការ ផលបត្រឥណទាន ចំនួនអតិថិជន ជាពិសេសចំនួនបុគ្គលិកមានការកើនឡើងគួរឱ្យកត់សម្គាល់ គឺពីចំនួនប្រមាណជា ២.៣០០នាក់ ក្នុងឆ្នាំ២០១៦ និងប្រមាណជា ២.៥០០នាក់ ក្នុងឆ្នាំ២០១។ គិតត្រឹមខែតុលា ២០១៨ នេះ អេ អឹម ខេ មានបុគ្គលិកកំពុងតែបម្រើការងារចំនួនជាង ២.៧០០នាក់។ ដើម្បីឆ្លើយតបទៅនឹងការរីកចម្រើន អេ អឹម ខេ បាន និងកំពុងតែផ្តល់ឱកាសការងារជាច្រើនកន្លែងដល់បេក្ខជន ដែលមានបំណងចង់អភិវឌ្ឍ អាជីពការងារជាមួយ អេ អឹម ខេ។

លោកស្រី ពាំង ពិសាខ នាយិកាប្រតិបត្តិធនធានមនុស្សបានឲ្យដឹងថា ចំនួនបុគ្គលិក អេ អឹម ខេ បានកើនឡើងជាលំដាប់ពីមួយឆ្នាំទៅមួយឆ្នាំ។ យើងដឹងហើយថា អេ អឹម ខេ គឺជាជម្រើសអាជីពការងារដ៏សាកសមបំផុតសម្រាប់បុគ្គលិកទូទៅ ដោយសារតែ អេ អឹម ខេ បានផ្តោតសំខាន់ទៅលើបីចំនុចរួមមាន៖ ១. ការអភិវឌ្ឍសមត្ថភាព ២. បរិយាកាសការងារល្អ ៣. អត្ថប្រយោជន៍បុគ្គលិក។ លោកស្រីបានបន្តទៀតថា “អ្វីដែលពិសេសនោះគឺ នៅពេលថ្មីៗនេះ អេ អឹម ខេ បានក្លាយជាសមាជិករបស់ធនាគារស៊ាងហៃពាណិជ្ជ និងសន្សំ ដែលជាធនាគារមួយ មានបទពិសោធន៍ជាង១០០ឆ្នាំលើវិស័យធនាគារ។ ដូចនេះធនាគារស៊ាងហៃមួយនេះនឹងធ្វើឱ្យ អេ អឹម ខេ ប្រែមុខមាត់ថ្មីដើម្បីក្លាយជាគ្រឹះស្ថានមីក្រូ ហិរញ្ញវត្ថុមួយ ឈានមុខគេនៅកម្ពុជា។

ទាក់ទងនឹងអត្ថប្រយោជន៍បុគ្គលិកវិញ លោកស្រីបានឱ្យដឹងដែរថា បុគ្គលិក អេ អឹម ខេ ទាំងអស់ទទួលបានអត្ថប្រយោជន៍ច្រើនដូចជា៖ ប្រាក់ឧបត្ថម្ភក្នុងឱកាសចូលឆ្នាំខ្មែរ ប្រាក់ឧបត្ថម្ភក្នុងឱកាសបុណ្យភ្ជុំបិណ្ឌ ប្រាក់ឧបត្ថម្ភសម្រាប់បុគ្គលិកដែលបម្រើការងារយូរ ប្រាក់រង្វាន់លើកទឹកចិត្ត ការធានារ៉ាប់រងសុខភាព ១០០% សម្រាប់បុគ្គលិក និងអ្នកក្នុងបន្ទុក ការធានារ៉ាប់រងគ្រោះថ្នាក់២៤ម៉ោង ប្រាក់ឧបត្ថម្ភលើការសម្រាលបុត្រ ជាពិសេសបុគ្គលិកអាចព្យាបាលជំងឺនៅក្រៅប្រទេស ព្រមទាំងអត្ថប្រយោជន៍ផ្សេងៗជាច្រើនទៀត។

លោកស្រីបានផ្តាំផ្ញើដល់ សិស្ស-និស្សិត ដែលកំពុង ឬ បញ្ចប់ការសិក្សា ឬ អ្នកដែលកំពុងតែស្វែងរកការងារធ្វើ ត្រូវចាប់យកឱកាសដ៏ល្អនេះ ដើម្បីទទួលយកការងារនៅ អេ អឹម ខេ។ លោកស្រីបន្តទៀតថា “ប្រសិនបើសាធារណជន ជាពិសេសអ្នកដែលកំពុងតែស្វែងរកការងារធ្វើទាំងអស់ មានចំណាប់អារម្មណ៍ចង់ចូលរួមជាមួយក្រុមគ្រួសារ អេ អឹម ខេ សូមអញ្ជើមកទស្សនាស្តង់ អេ អឹម ខេ គឺលេខ G39 & G40 ដើម្បីទទួលបានព័ត៌មានលម្អិតពីឱកាសការងារនៅគ្រឹះស្ថាន យើងខ្ញុំឱ្យបានពេញលេញ និងគ្រប់ជ្រុងជ្រោយដើម្បីធ្វើការសម្រេចចិត្ត។ អ្នកដែលមានចំណាប់អារម្មណ៍លើមុខតំណែងណាមួយដែលត្រូវជំនាញ និងបទពិសោធន៍ការងារអាចយក CV មកដាក់ដោយផ្ទាល់នៅស្តង់ អេ អឹម ខេ បាន។ ក្រុមការងារយើងខ្ញុំនឹងទាក់ទងទៅវិញប្រសិនបើ CV របស់អ្នកត្រូវនឹងមុខតំណែងណាមួយ” គួរបញ្ជាក់ផងដែរថា នេះជាឆ្នាំទី៨ហើយ ដែល អេ អឹម ខេ បានចូលរួមក្នុងការតាំងពិព័រណ៍ការងារថ្នាក់ជាតិមួយនេះ។

អេ អឹម ខេ គឺជាគ្រឹះស្ថានដែលឈានមុខគេលើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹមខែកញ្ញា ឆ្នាំ២០១៨ នេះ អេ អឹម ខេ មានអតិថិជនចំនួនជាង ៨៣ ម៉ឺននាក់ ជាមួយនឹងផលប័ត្រប្រាក់កម្ចីជាង ២៤៤ លានដុល្លារអាមេរិក និងប្រាក់បញ្ញើជាង ១៤៣ លានដុល្លារអាមេរិក មានការិយាល័យប្រតិបត្តិការចំនួន ១៤៩ កន្លែង និងមានភ្នាក់ងារជាង ៣.៥០០ កន្លែងនៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើនកំពុងផ្តល់ជូនអតិថិជនដូចជា៖ សេវាប្រាក់កម្ចី ប្រាក់សន្សំ ផ្ទេរប្រាក់ក្នុង និងក្រៅប្រទេស សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs)៕

October 25, 2018

Epson ចាប់ផ្តើមចេញលក់ម៉ាស៊ីនព្រីនម៉ូឌែល EcoTank និង ម៉ាស៊ីន Laser Projector ផ្លូវការ

ក្រុមហ៊ុន Epson ទើបតែបានចេញលក់ជាផ្លូវការនូវម៉ាស៊ីនព្រីន EcoTank ប្រភេទថ្មី និង ទំនើបំផុត របស់ខ្លួននាពេលថ្មីៗនេះ ដើម្បីបង្ហាញពីគោលជំហរ ក្នុងនាមជាម៉ាកយីហោដ៏ល្បីលេខ១ នៅលើទីផ្សារ ខាងផលិតផលម៉ាស៊ីនព្រីន ដែលផ្តល់នូវការចំណាយប្រកបដោយប្រសិទ្ធភាព ការប្រើប្រាស់បានយូរអង្វែង សន្សំសំចៃខ្ពស់ និងមានតម្លៃសមរម្យ ។ ក្រុមហ៊ុន បានបញ្ចេញលក់ម៉ាស៊ីនព្រីន ម៉ូឌែល L និង M ស៊េរី ក៏ដូចជាម៉ាស៊ីន Projector ខា្នតមធ្យម ប្រភេទ ឡាស៊ែរ ផងដែរ ដើម្បីឆ្លើយតបទៅនឹងតម្រូវការដ៏ចាំបាច់របស់ស្ថាប័ន និងសហគ្រាសទាំងអស់នៅក្នុងប្រទេសកម្ពុជា។

លោក Yunyong Muneemongkoltorn នាយកផ្នែកលក់ និងទីផ្សាររបស់ក្រុមហ៊ុន Epson ប្រចាំប្រទេសថៃ បានមានប្រសាសន៍ថា «ក្រុមហ៊ុន Epson គឺជាក្រុមហ៊ុនដែលមានរោងចក្រផលិតម៉ាស៊ីនព្រីនដំបូងគេ ដែលបានដាក់បង្ហាញម៉ាស៊ីនព្រីន ប្រភេទ Genuine Ink Tank ដំបូងគេបង្អស់ នៅលើទីផ្សារតាំងពីឆ្នាំ២០១០ មកម្ល៉េះ ។ ចាប់តាំងពីពេលនោះមក ម៉ាស៊ីនព្រីនស៊េរី L និងស៊េរី M ទទួលបាននូវការគាំទ្រកាន់តែខ្លាំងឡើងៗ ពីសំណាក់អតិថិជនទាំងអស់ ដោយសារតែភាពធន់ និងការដំណើរការបានយ៉ាងល្អរបស់ម៉ាស៊ីនព្រីនប្រភេទនេះ រួមជាមួយនឹងការខិតខំអភិវឌ្ឍបច្ចេកទេស របស់យើងជាបន្តបន្ទាប់ ដើម្បីបំពេញនូវតម្រូវការរបស់អតិថិជនគ្រប់ទិសទី។

ជាលទ្ធផល ក្រុមហ៊ុន Epson បានក្លាយទៅជាក្រុមហ៊ុនផលិតម៉ាស៊ីនព្រីន ប្រភេទ Ink Tank ជាប់ចំណាត់ថ្នាក់លេខ១ នៅលើពិភពលោក។ ជាមួយនឹងចំណែកទីផ្សារដ៏ធំបំផុត ក្រុមហ៊ុន Epson បានលក់ម៉ាស៊ីនព្រីន Ink Tank អស់ជាង ៣០ លានគ្រឿង រួចទៅហើយនៅក្នុងបណ្តាប្រទេសចំនួន ១៥០ ប្រទេស នៅទូទាំងពិភពលោក។ ចំណែកឯនៅក្នុងប្រទេសកម្ពុជាវិញ ក្រុមហ៊ុន Epson បានដាក់លក់ម៉ាស៊ីនព្រីនយ៉ាងច្រើនប្រភេទដែលមានរហូតដល់ទៅ ១៩ ប្រភេទឯណោះ។ ក្នុងចំណោមម៉ូឌែលទាំងអស់នោះ មាន ១៥ ម៉ូឌែល ជាស៊េរី L និង ៤ ម៉ូឌែលផ្សេងទៀត ជាប្រភេទស៊េរី M។ ការផ្តល់នូវជម្រើសជាច្រើននេះមានន័យថា អតិថិជនទាំងអស់អាចរកជាវបានយ៉ាងងាយស្រួលបំផុតនូវម៉ូឌែលណាមួយដែលពួកគេពេញចិត្តទៅតាមតម្រូវការជាក់ស្តែង ដោយអាស្រ័យទៅនឹងទំហំថវិកា និងទំហំនៃការបោះពុម្ពរបស់ពួកគេ។ អតិថិជនរបស់យើង មានគ្រប់ប្រភេទទាំងអស់ រាប់ចាប់ពីសហគ្រាសធុនតូច និងមធ្យម រហូតដល់បណ្តាក្រុមហ៊ុនសាជីវកម្មធំៗនានា»

លោកបានបន្តថា «ថ្ងៃនេះ យើងបានកំណត់យកម៉ាស៊ីនព្រីន EcoTank ឬអាចហៅម្យ៉ាងទៀតថា ម៉ាស៊ីនព្រីន Economical Tank ដែលមានលក្ខណៈសន្សំសំចៃខ្ពស់ មកបង្ហាញជូនដល់អតិថិជន ដើម្បីបញ្ជាក់ពីប្រសិទ្ធភាពនៃការចំណាយតិច តែទទួលបានផលចំណេញច្រើន។ នៅក្នុងឱកាសនេះ យើងក៏បានសម្រេចចិត្តដាក់លក់ម៉ាស៊ីនព្រីន ចំនួន ពីរស៊េរី គឺ L និង M ដែលមានចំនួន ៥ ម៉ូឌែល ហើយម៉ូឌែលទាំងអស់នោះមានដួចជា EcoTank L3110, L3150, M1100, M1120 និង M2140 ។ ម៉ាស៊ីនទាំងអស់នេះ គឺជាប្រភេទម៉ាស៊ីន មិនប្រើប្រាស់ cartridge ដោយរួមបញ្ចូលប្រអប់ទឹកថ្នាំនៅខាងក្នុង អមជាមួយរូបរាងតូចល្មមសាកសមជាមូយកន្លែងតូចចង្អៀត។ ជាមួយនឹងការរចនាម៉ូដយ៉ាងពិសេស ម៉ាស៊ីនព្រីនម៉ូឌែលនេះត្រូវបានបំពាក់ដោយប្រព័ន្ធបញ្ចូលទឹកថ្នាំប្រភេទ Spill-free ការពារមិនឲ្យកំពប់ ។ សម្រាប់ការរចនាបច្ចេកវិទ្យាក្បាលដបនៃពណ៌ទឹកថ្នាំវិញ គឺមានភាពល្អឥតខ្ចោះដែលធានាថា ទឹកថ្នាំពណ៌ណាអាចដាក់ចូលទៅក្នុងប្រអប់ទឹកថ្នាំពណ៌ហ្នឹងបានដោយមិនច្រឡំពណ៌គ្នានោះឡើយ។ ដើម្បីជៀសវាងពីការកំពប់ទឹកថ្នាំ ម៉ាស៊ីនព្រីនទាំងនេះធានាបានថា ទឹកថ្នាំហូរចេញពីដប តែនៅពេលដែលទឹកថ្នាំត្រូវបានដាក់បញ្ចូលទៅក្នុងប្រអប់ទឹកថ្នាំរបស់ម៉ាស៊ីនតែប៉ុណ្ណោះ។

លោកបានបន្ថែមថា «ម៉ាស៊ីនព្រីនថ្មីទាំង ៥ ម៉ូឌែលនេះ គឺមានភាពស័ក្តិសមល្អឥតខ្ចោះបំផុតសម្រាប់ SOHO (ការិយាល័យតូច និង ការិយាល័យនៅផ្ទះ) និង សហគ្រាសធុនតូច និងមធ្យម ដែលមានតម្រូវការ បោះពុម្ពឯកសារច្រើន និងចង់គ្រប់គ្រងការចំនាយទៅលើការបោះពុម្ពដោយខ្លួនឯងផ្ទាល់ ។ EcoTank ស៊េរី L មានភ្ជាប់មកជាមួយទឹកថ្នាំចំនួន ៤ ពណ៌។ ពណ៌ទឹកថ្នាំនីមួយៗ អាចបោះពុម្ពបានរហូតដល់ទៅ ៤,៥០០ ទំព័រ ចំពោះឯកសារ ស-ខ្មៅ និងឯកសារពណ៌រហូតដល់ទៅ ៧,៥០០ ទំព័រ ។ ហើយផ្តល់ជូននូវការធានារយៈពេល ២ ឆ្នាំ ឬការព្រីនរហូតដល់ ៣០,០០០ ទំព័រ។ ចំពោះ EcoTank ស៊េរី M វិញ វាអាចបោះពុម្ពបានរហូតដល់ទៅ ៦,០០០ ទំព័រ ចំពោះឯកសារ ស-ខ្មៅ និងផ្តល់ជូននូវការធានារយៈពេល ៤ ឆ្នាំ ឬការព្រីនរហូតដល់ ៥០,០០០ ទំព័រ»

លោក Yunyong បានពន្យល់ឲ្យដឹងទៀតថា «បច្ចុប្បន្ននេះ ក្រុមហ៊ុន Epson មានគម្រោងផ្សព្វផ្សាយម៉ាស៊ីនព្រីនរបស់ខ្លួនឲ្យកាន់តែខ្លាំងក្លាបន្ថែមទៀត ទៅដល់ការិយាល័យ និងស្ថាប័នរដ្ឋាភិបាលជាច្រើន ដោយហេតុថា ស្ថាប័នទាំអស់នោះនៅតែប្រើម៉ាស៊ីនព្រីន ប្រើបច្ចេកវិទ្យា ទ្បែស៊ែរ នៅឡើយ។ យើងបានដាក់បង្ហាញនូវម៉ាស៊ីនព្រីនជាច្រើនប្រភេទរួចមកហើយនៅទីផ្សារក្នុងប្រទេសកម្ពុជា ដូច្នេះ អ្នកប្រើប្រាស់ទាំងអស់បានមើលឃើញយ៉ាងច្បាស់អំពីដំណើរការយ៉ាងមានប្រសិទ្ធភាពបំផុតនៃម៉ាស៊ីនព្រីនទាំងអស់នោះ។ រហូតមកដល់ពេលនេះ អ្នកប្រើបានដឹងរួចមកហើយថា ម៉ាស៊ីនព្រីន inkjet ដំណើរការបានយ៉ាងល្អ ហើយរាល់ការចំណាយក៏កាន់តែមានប្រសិទ្ធភាពជាង ប្រភេទម៉ាស៊ីនព្រីន ទ្បាស៊ែរ ផងដែរ។ ម៉ាស៊ីនព្រីនរបស់ក្រុមហ៊ុន Epson ផ្តល់ជូននូវតម្លៃសមរម្យក្នុងការព្រីនមួយទំព័រៗ ងាយស្រូលក្នុងការធ្វើតំហែរទំ ហើយការប្រើប្រាស់ថាមពលអគ្គិសនីទៀតសោតក៏អស់តិចផងដែរ។ ការចាប់ផ្តើមដាក់លក់ EcoTank គឺជាយុទ្ធសាស្ត្រថ្មីមួយទៀតរបស់យើង ដែលស្របតាមយុទ្ធសាស្ត្រជំនួញរបស់ក្រុមហ៊ុន ដែលម៉ាស៊ីនព្រីន EcoTank ស៊េរី M នឹងប្រកួតប្រជែងជាមួយម៉ាស៊ីនព្រីន ទ្បែស៊ែរ ពណ៌ស-ខ្មៅដទៃទៀត។

EcoTank ស៊េរី M ប្រើប្រភេទទឹកថ្នាំម្យ៉ាង ដែលផ្តល់នូវពណ៌ច្បាស់ល្អ និងត្រជាក់ភ្នែក។ នៅពេលប្រៀបធៀបជាមួយនឹង ម៉ាស៊ីនព្រីន EPSON EcoTank ស៊េរី M ទៅនឹងម៉ាស៊ីនព្រីន ទ្បាស៊ែរ ប្រភេទម៉ាស៊ីនទាំងពីរនេះ ផ្តល់នូវគុណភាពបោះពុម្ពដូចគ្នា ប៉ុន្តែ EPSON EcoTank ស៊េរី M វាមានភាពសន្សំសំចៃជាងបានរហូតដល់ទៅ ១៦ ដង ឯណោះក្នុងមួយទំព័រ ហើយ កាត់បន្ថយ ការប្រើប្រាស់ថាមពលអគ្គិសនីបានរហូតដល់ទៅ ២៧ ដង។ សរុបមក រាល់ការព្រីនមួយទំព័រៗ តាមរយៈការប្រើប្រាស់ EcoTank ស៊េរី M របស់ Epson ចំណាយត្រឹមតែ ១០ រៀល ក្នុង ១ទំព័រ ឬ ១០ទំព័រ ក្នុង ១០០ រៀលតែប៉ុណ្ណោះ ។ EcoTank ស៊េរី M នេះ មានពីរជម្រើសនៃទំហំទឹកថ្នាំសម្រាប់អតិថិជនដើម្បីជ្រើសរើសប្រើប្រាស់។ មួយគឺសម្រាប់ចំនួន ២,០០០ ទំព័រ និងមួយទៀតសម្រាប់ ចំនួន ៦,០០០ទំព័រ ។ ជម្រើសទាំងពីរនេះ គឺល្អប្រសើរជាងម្សៅថ្នាំរបស់ម៉ាស៊ីន Laser ដែលអាចបោះពុម្ពបានតែ ១,០០០ ទំព័រ និង ១,៦០០ ទំព័រប៉ុណ្ណោះ»

ក្នុងចំណោមម៉ូឌែលទាំងអស់ ដែលយើងបញ្ចេញលក់ក្នុងថ្ងៃនេះ គឺ M2140 ជាម៉ូឌែលដែលមានលក្ខណៈពិសេសជាងគេ។ អ្នកប្រើប្រាស់អាចធ្វើការ ព្រីន ស្គែន និង ថតចំលង បានក្នុងម៉ាស៊ីនតែមួយ។ វាត្រូវបានបំពាក់ដោយ បច្ចេកវិទ្យា Print Head ជាមួយប្រព័ន្ធ Precision Core ដែលអាចព្រីនក្រដាសខ្នាតធំក្នុងល្បឿនលឿន និងចំណាយតិច។ ម៉ាស៊ីនព្រីន M2140 អាចបោះពុម្ពបាន ២០ ឯកសារក្នុងមួយនាទី (20 ipm) ដែលមានគុណភាពកម្រិតច្បាស់ 1,200 x 2,400 dpi ។ លើសពីនេះទៅទៀតម៉ាស៊ីនព្រីនម៉ាកនេះ មានមុខងារព្រីន ឯកសារទាំងសងខាងបានដោយស្វ័យប្រវត្តិ ដែលជាការចូលរួមចំណែកយ៉ាងសំខាន់ ក្នុងការសន្សំសំចៃ ក្រដាស។ មុខងារនេះបានឆ្លើយតបយ៉ាងជាក់ច្បាស់ទៅនឹងនិន្នាការប្រើប្រាស់ នាពេលបច្ចុប្បន្ននេះ ដែលត្រូវបានមើលឃើញថា ការិយាល័យភាគច្រើនតែងតែខិតខំកាត់បន្ថយការប្រើប្រាស់ក្រដាស ។ បន្ថែមពីនេះទៀត M2140 មានបំពាក់នូវមុខងារ BarcodePrinting Function ដែលផ្តល់ការព្រីនឯកសារប្រភេទបញ្ឈរ ដែលមានគុណភាពល្អដូចម៉ាស៊ីនព្រីន ទ្បាស៊ែរ ដែរ ។ សម្រាប់ម៉ូឌែលថ្មីពីរផ្សេងទៀតរបស់ EcoTank ស៊េរី M គឺ M1100 និង M1120 ដែលអាចបោះពុម្ពបាន ១៥ ឯកសារក្នុងមួយនាទី (15 ipm) ។ ម៉ូឌែលទាំងនេះ ក៏អាចព្រីនដោយប្រើ Wi-Fi បានផងដែរ។

នៅពេលនេះ EcoTank ស៊េរី L ក៏បានបង្ហាញពីម៉ូឌែលថ្មីចំនួន ពីរផងដែរ។ ទាំង L3110 ទាំង L3150 សុទ្ធតែជាឧបករណ៍ពហុមុខងារ (ព្រីន ស្កែន និងថតចំលង) ជាមួយនឹងការប្រើរប្រាស់ទឹកថ្នាំចំនួន ៤ ពណ៍ និង ព្រីនរហូតដល់ទំហំ 4R សម្រាប់រូបថត និងរូបភាព ។ L3150 ក៏មានភាពឆ្លាតវៃផងដែរ ដែលអាចព្រីនតាមរយៈ Wi-Fi ពីឧបករណ៍ផ្សេងៗរហូតដល់ ៨ គ្រឿង ដោយប្រើប្រាស់ប្រព័ន្ធ Wi-Fi Direct ។

«ក្រុមហ៊ុន Epson រំពឹងថា EcoTank នឹងអាចផ្លាស់ប្តូរទំលាប់ និងឥរិយាបថរបស់អ្នកប្រើប្រាស់ ជាពិសេសអ្នកប្រើប្រាស់ម៉ាស៊ីនព្រីនប្រភេទ Laser Printer ។ នេះគឺដោយសារតែម៉ាស៊ីន EcoTank ស៊េរី L និង M ដំណើរការបានយ៉ាងល្អទាំងល្បឿននៃការព្រីន និង ទាំងគុណភាព។ EcoTank ផ្តល់នូវការចំណាយប្រកបដោយប្រសិទ្ធភាព ពោលគឺការចំណាយតិចជាងមុនបើប្រៀបធៀបទៅនឹងម៉ាស៊ីន Laser Printers ក៏ដូចជាម៉ាស៊ីនព្រីន Inkjet Printers ដែលផលិតដោយដៃគូប្រកួតប្រជែងរបស់ Epson ។ លើសពីនេះទៅទៀតម៉ាស៊ីនព្រីនរបស់ Epson អាចប្រើប្រាស់បានយូរអង្វែងជាងម៉ាស៊ីនព្រីនរបស់ក្រុមហ៊ុនដទៃទៀត។ នេះគឺជាចំណុចខ្លាំងដែលគ្មានដៃគូប្រកួតប្រជែងណាមួយអាចប្រកួតប្រជែងជាមួយ Epson បានឡើយ។ ជាមួយនឹងភាពខ្លាំងនេះហើយ Epson ក៏ផ្តល់ជូននូវការធានារយៈពេលយូរជាងគេផងដែរ។ ជាឧទាហរណ៍ EcoTank ស៊េរី M គឺយើងផ្តល់ជូននូវការធានារយៈពេលរហូតដល់ទៅ ៤ ឆ្នាំ ឬការព្រីនរហូតដល់ទៅ ៥០,០០០ ទំព័រឯណោះ ខណៈដែល ម៉ាស៊ីនព្រីន ទ្បាស៊ែរ ផ្តល់ជូនការធានាត្រឹមតែ ៣ ឆ្នាំប៉ុណ្ណោះ»

លើសពីនេះទៅទៀត Epson កំពុងតែបង្កើនការផលិត និងដាក់លក់នូវម៉ាស៊ីន 3LCD Projector ប្រភេទ ឡាស៊ែររបស់ខ្លួនជាមួយនឹងការបង្ហាញនូវ ម៉ូឌែលថ្មីចំនួន ៣ ដែលមានពន្លឺភ្លឺច្បាស់ចាប់ពី ៥,០០០ lumen រហូតដល់ ៦,០០០ lumen។ សម្រាប់ម៉ូឌែលដែលត្រូវបានបញ្ចេញលក់នៅថ្ងៃនេះគឺ EB-L510U, 5000 lumen WUXGA projector; EB-L610W, 6000 lumen WXGA projector, និង EB-L610U, 6000 lumen WUXGA projector។ ម៉ូឌែលទាំង បីនេះ មានទំហំតូច និងមានទម្ងន់ស្រាលជាងឧបករណ៍ដូចគ្នា បើប្រៀបធៀបនឹង គូប្រកួតប្រជែងរបស់ខ្លួន ។ កាន់តែអស្ចារ្យទៅទៀតនោះ ម៉ូដែលថ្មីរបស់ Epson ទាំងបីនេះ មានមុខងារល្អរលើសគេ ដោយវាអាចបញ្ចេញពន្លឺបានខ្ពស់ ហើយអាចសំរបខ្លួនគ្រប់ស្ថានការណ៏ និង កាលៈទេសៈនៃទីតាំងនៃការតំឡើង។ ពោលគឺ វាអាចបង្វិលបាន 360 ដឺក្រេ និងមានសមត្ថភាពពេញលេញសម្រាប់ចាប់នៅទីតាំងណាមួយក៏បាន។ មន្ថែមពីនេះ លក្ខណៈពិសេសនៃ Projector ទាំងអស់នេះ គឺអាចបញ្ចាំងបានលើគ្រប់ស្ថានភាពនៃផ្ទៃរាបស្មើទាំងអស់ រួមបញ្ចូលទាំងមុខងារពិសេស ដួចជា មុខងារ Edge Blending, Curve Projection និង Corner Wall។ ម៉ូឌែលទាំងបីនេះ មានកម្រិតពណ៌នៃការបញ្ចេញរូបភាព Contrast Ratio 2,500,000:1 ដែលបង្ហាញនូវរូបភាពច្បាស់ល្អ និងបង្ហាញភាពលម្អិតនៃរូបភាពនីមួយៗ ។ Projector ទាំងអស់នេះ ផលិត មកភ្ជាប់ទៅនឹងប្រព័ន្ធ HDBaseT ដោយប្រើប្រាស់ ប្រព័ន្ធខ្សែរ Network តាមរយះផត LAN ដែលអាចតំឡើងនៅទីតាំងឆ្ងាយពីឧបករណ៍បញ្ចួនរូបភាព បានចម្ងាយឆ្ងាយរហូតដល់ ១០០ ម៉ែត្រ ឬ ៣២៨ ហ្វីត។

«ម៉ាស៊ីន Projector ថ្មីទាំងបីម៉ូឌែលនេះផ្តោតលើ ការិយាល័យ ស្ថាប័នអប់រំ និង អាជីវកម្មកម្សាន្ត ដូចជា ក្លឹបកម្សាន្ត ខារ៉ាអូខេជាដើម ដែលបច្ចុប្បន្ននេះ កំពុងតែមានការរីកលូតលាស់គួអោយកត់សម្គល់ ដែលកំពុង ត្រូវការប្រភេទ Projector ទាំងឡាយណា ដែលមានពន្លឺកម្រិតមធ្យមនៅក្នុងការប្រកបអាជីវកម្មររបស់ពួកគេ។ ផលិតផលរបស់ Epson នឹងផ្តល់ឱ្យពួកគេមិនត្រឹមតែមានគុណភាពខ្ពស់ប៉ុណ្ណោះទេ ថែមទាំងប្រើប្រាស់បានយូរអង្វែងទៀតផង។ យើងនឹងផ្តល់ជូននូវការធានារប្រើប្រាស់ ដោយរាប់បញ្ចូល ទាំងចំនួនម៉ោងរបស់ បច្ចេកវិទ្យា ឡេស៊ែរ ហូតដល់ ២០,០០០ ម៉ោង ឬរយៈពេល ៣ ឆ្នាំ ។ ដូច្នេះ អតិថិជនទាំងអស់នឹងទទួលបានប្រសិទ្ធភាពខ្ពស់បំផុតក្នុងការចំណាយ នៅពេលដែលពួកគេទិញម៉ាស៊ីន Projector ពីក្រុមហ៊ុន Epson» ទាំងអស់នេះ ជាការអះអាងរបស់លោក Yunyong៕

October 25, 2018

ទីផ្សារផលិតផលកាត់ដេរកម្ពុជា នឹងនៅតែបន្តកំណើនរឹងមាំ

ទោះបីជាកំពុងរងការគំរាមកំហែងថា នឹងត្រូវបាត់បង់ប្រព័ន្ធអនុគ្រោះពន្ធពីទីផ្សារសហភាពអឺរ៉ុប ដែលជាទីផ្សារសំខាន់របស់ខ្លួនក៏ដោយ ក៏ការបញ្ជាទិញសម្រាប់ការនាំចេញនៅត្រីមាសចុងក្រោយឆ្នាំនេះត្រូវបានព្រមព្រៀងរួចរាល់ ធ្វើឱ្យទីផ្សារការនាំចេញផលិតផលកាត់ដេរកម្ពុជានឹងនៅបន្តកំណើនរឹងមាំរហូតដល់ដាច់ឆ្នាំនេះ។ នេះបើតាមការបញ្ជាក់ពីតំណាងឧស្សាហកម្មកាត់ដេរ។

លោក កាំង ម៉ូនីកា អគ្គលេខាធិការរង សមាគមរោងចក្រកាត់ដេរនៅកម្ពុជា (GMAC) បានឱ្យដឹងថា សមាគមរោងចក្រកាត់ដេរកម្ពុជានៅតែមើលឃើញកំណើនការនាំចេញដ៏រឹងមាំក្នុងអំឡុងខែតុលា ដល់ខែធ្នូ ឆ្នាំ2018 ដោយសារតែការបញ្ជាទិញនៅអំឡុងពេលនេះត្រូវបានដាក់រួចរាល់ ដែលនឹងធ្វើឱ្យទំហំការនាំចេញនៅឆមាសទី2 នេះនៅតែរឹងមាំដូចឆមាសទី1 ដែរ។

ប៉ុន្តែ លោក ម៉ូនីកា បានឱ្យដឹងថា ការព្រមានពីការបាត់បង់ប្រព័ន្ធអនុគ្រោះ «អ្វីៗគ្រប់យ៉ាងលើកលែងតែអាវុធ (EBA)» ទៅទីផ្សារអឺរ៉ុបអាចធ្វើឱ្យមានផលប៉ះពាល់ដល់ផ្លូវចិត្ត ព្រោះព័ត៌មានទាក់ទងនឹងការព្រមាន ឬលទ្ធភាពនៃការព្យួរប្រព័ន្ធអនុគ្រោះពន្ធអាចធ្វើឱ្យប៉ះពាល់ដល់អារម្មណ៍អ្នកបញ្ជាទិញ ដែលអាចធ្វើឱ្យមានការស្ទាក់ស្ទើរ ឬកាត់បន្ថយបរិមាណបញ្ជាទិញ ឬអ្នកទិញអន្តរជាតិ ហើយឥទ្ធិពលរបស់វា នឹងមើលឃើញកាន់តែច្បាស់ឡើងៗ នៅឆ្នាំក្រោយ។

លោកបានថ្លែងថា៖ «សម្រាប់ការនាំចេញត្រីមាសចុងក្រោយ ការបញ្ជាទិញត្រូវបានធ្វើឡើងប្រហែល 2ខែមុនអំឡុងខែសីហា និងខែកញ្ញា ពេលមិនទាន់មានព័ត៌មានរសើបអំពី EBA នៅឡើយ»។ លោកព្យាករថា អត្រាកំណើនការនាំចេញសម្លៀកបំពាក់នៅឆមាសទី2 ឆ្នាំនេះនឹងមើលឃើញកំណើនស្រដៀងគ្នានឹងឆមាសទី1ដែរ»។

យោងតាមរបាយការណ៍ពាក់កណ្ដាលឆ្នាំរបស់ធនាគារជាតិនៃកម្ពុជា (NBC) ដែលចេញផ្សាយកាលពីខែកក្កដា បានឱ្យដឹងថា ការនាំចេញសម្លៀកបំពាក់ និងស្បែកជើងរបស់កម្ពុជាមានតម្លៃ 4ពាន់លានដុល្លារនៅឆមាសទី1 ឆ្នាំនេះបានកើនឡើង11% ធៀបនឹងរយៈពេលដូចគ្នាកាលពីឆ្នាំមុន។

រោងចក្រកាត់ដេររបស់កម្ពុជាបានផ្គត់ផ្គង់ដល់យីហោពិភពលោកដូចជា ក្រុមហ៊ុន Gap Inc (GPS.N) យីហោសម្លៀកបំពាក់ទាន់សម័យរបស់ប្រទេស ស៊ុយអែត H & M Hennes&Mauritz AB (HMb.ST) យីហោសម្លៀកបំពាក់កីឡា Nike (NKE.N) យីហោ Puma និងយីហោ Adidas (ADSGn.DE) និងយីហោជាច្រើនផ្សេងទៀត។

ទីផ្សារសំខាន់របស់កម្ពុជាសម្រាប់ផលិតផលសម្លៀកបំពាក់ និងស្បែកជើង គឺអាមេរិក និងអឺរ៉ុប។ ការនាំចេញរបស់កម្ពុជាទៅ EU មានប្រហែល 40%ដែលមានតម្លៃ 4,3ពាន់លានដុល្លារកាលពីឆ្នាំ2017 ឬ20%នៃ GDP ហើយប្រហែល 90%ស្ថិតក្រោមប្រព័ន្ធអនុគ្រោះ EBA។

ភ្នាក់ងារវាយតម្លៃចំណាត់ថ្នាក់ឥណទានពិភពលោក Moody’s Investors Services ព្រមានថា ការបាត់បង់សក្ដានុពលអនុគ្រោះពន្ធពាណិជ្ជកម្មរបស់កម្ពុជាចូលទៅសហភាពអឺរ៉ុប នឹងធ្វើឱ្យចុះខ្សោយដល់កំណើនសេដ្ឋកិច្ចរបស់ខ្លួន ហើយនឹងធ្វើឱ្យចំណាត់ថ្នាក់របស់ប្រទេសកម្ពុជាស្ថិតក្នុងភាពអវិជ្ជមាន៕

October 24, 2018

កាសែតឡារ៉ែន ពាណិជ្ជ លេខ 147

[easy_media_download url=”https://www.lareine.com.kh/wp-content/uploads/2018/10/LRPN_147-Final-For-Web.pdf” force_dl=”1″]

October 21, 2018

លោកឧកញ៉ា វេជ្ជបណ្ឌិត គួច ម៉េងលី ប្រារព្ធពិធីសម្ពោធសៀវភៅ “108 ចក្ខុវិស័យ គួច ម៉េងលី”

កាលពីព្រឹកថ្ងៃទី19 ខែតុលា លោកឧកញ៉ាវេជ្ជបណ្ឌិត គួច ម៉េងលី និង ក្រុមការងារនិពន្ធរបស់លោកបានប្រារព្ធពិធីបើកសម្ពោធជាផ្លូវការនូវសៀវភៅដែលមានចំណងជើងថា “108 ចក្ខុវិស័យ គួច ម៉េងលី” នៅឯម៉ូនូមែនប៊ុក (Monument Books) ហើយគួរបញ្ជាក់ថា សៀវភៅនេះគឺជាស្នាដៃទី5របស់លោកឧកញ៉ា វេជ្ជបណ្ឌិត គួច ម៉េងលី។ សៀវភៅមានកម្រាស់ 487ទំព័រ និង បោះពុម្ពផ្សាយលើកទី1 ចំនួន3000ក្បាល និងអ្វីដែលសំខាន់នោះ គឺរាល់ថវិកាដែលបានមកពីការលក់សៀវភៅនេះ នឹងបរិច្ចាគជូនមូលនិធិម៉េងលីជេ. គួច។

ខ្លឹមសារក្នុងសៀវភៅ៖ និយាយអំពីបទពិសោធជីវិតក្នុងអាជីពជាធុរជន (ជាចក្ខុវិស័យ ជាទស្សនទានស្ដីពីគំនិតយោបល់ ការយល់ឃើញ និងបទពិសោធផ្ទាល់ របស់លោកឧកញ៉ាវេជ្ជបណ្ឌិត គួចម៉េងលីក្នុងនាមជាធុរជនវិស័យអប់រំឈានមុខគេនៅកម្ពុជា)។ បង្ហាញពីចក្ខុវិស័យចម្រុះខ្លះៗនៃយុទ្ធសាស្ត្រធ្វើជំនួញប្រកបដោយនិរន្ដរភាព និង ចែករំលែកវិធីសាស្ត្រលើកទឹកចិត្តខ្លះៗដើម្បីគោលដៅជីវិតច្បាស់លាស់ មិនថាក្នុងអាជីពការងារ គ្រួសារ ស្នេហា ការសិក្សា និងសហគមន៍រស់នៅនោះទេ។

បណ្ដុះឱ្យមានភាពក្លាហាន មិនកំសាកញីមិនបាក់ស្បាត ផ្ទុយទៅវិញអត្ថន័យក្នុងសៀវភៅនៅបានណែនាំឱ្យមានការតស៊ូព្យាយាម ម្ចាស់ការ និងមិនប្រញាប់ចុះចាញ់ចំពោះបញ្ហាផងដែរ។ បណ្ដុះឱ្យមានវប្បធម៌ចែករំលែកក្នុងការចាប់យកឱកាសនៃអាជីពការងារចំពោះមុខ និងទៅអនាគតតាមចំណេះចំណង់ជំនាញ និងបទពិសោធដែលជាទេពកោសល្យរបស់មនុស្សម្នាក់។

គុណតម្លៃរបស់សៀវភៅ “108 ចក្ខុវិស័យ គួច ម៉េងលី” ជាចក្ខុវិស័យ ផ្ទាល់របស់លោកឧកញ៉ាវេជ្ជបណ្ឌិត គួច ម៉េងលី ដោយមិនឆ្លុះបញ្ចាំង ឬពាក់ព័ន្ធនឹងគោលការណ៍ឬចក្ខុវិស័យរបស់ទ្រឹស្ដីណាមួយឡើយ។ ពោលជាគោលគំនិតបណ្ដុះ និងពង្រីកចក្ខុវិស័យវែងឆ្ងាយប្រកបដោយញាណទស្សនៈស្ដីពីជីវិត ការសិក្សា ការងារ គ្រួសារ សង្គម ទំនាក់ទំនងសង្គម និងមធ្យោបាយបង្កើតគំនិត រក្សាគំនិត និងដោះស្រាយ ប្រកបដោយចីរភាព ដែលស្ដែងចេញពីគុណតម្លៃនៃបទពិសោធរបស់អ្នកនិពន្ធផ្ទាល់៕

October 20, 2018

លោក Mourinho សន្យាថា នឹងមានឥរិយាបថដ៏ល្អបំផុតនៅទឹកដី Chelsea ល្ងាចនេះ

លោក Jose Mourinho អ្នកចាត់ការទូទៅរបស់ក្រុម Manchester United បានសន្យាថា នឹងបង្ហាញពីភាពអត់ធ្មត់ និងការគោរព ប្រសិនបើលោករងបរាជ័យក្នុងការប្រកួតក្របខ័ណ្ឌ Premier League ជាលើកទី១នៅរដូវកាលនេះ នៅលើទឹកដីអតីតក្រុម Chelsea របស់លោកនៅថ្ងៃសៅរ៍នេះ។

លោក Mourinho ដែលបានដឹកនាំក្លិបមានមូលដ្ឋាននៅទីក្រុងឡុងដ៍មួយនេះ២លើក និងបានជួយឲ្យពួកគេឈ្នះពានលីក៣លើកនោះ មិនបានរីករាយចំពោះការជួបគ្នាកាលពីមុនជាមួយនឹងក្រុម Chelsea ក្នុងនាមជាគ្រូបង្វឹករបស់ Man United ដោយចាញ់៤លើកក្នុងចំណោមការប្រកួត៦លើក ក្នុងនោះរាប់បញ្ចូលទាំងពាន FA Cup វគ្គផ្តាច់ព្រ័ត្រ កាលពីដើមឆ្នាំនេះផងដែរ។

លោក Mourinho បានប្រាប់សន្និសីទសារព័ត៌មានមួយកាលពីថ្ងៃសុក្រថា៖ «សម្រាប់ខ្ញុំ វាជាការប្រកួត១ផ្សេងទៀត។ តើខ្ញុំនឹងអបអរដូចមនុស្សឆ្កួតសម្រាប់ការរកគ្រាប់បាល់បញ្ចូលទីរបស់ក្រុមខ្ញុំ ឬដណ្តើមបានជ័យជម្នះនៅកីឡដ្ឋាន Stamford Bridge ឬ? ខ្ញុំមិនគិតអ៊ីចឹងឡើយ»។

លោក Mourinho បានធ្លាក់ចូលក្នុងជម្លោះពាក្យសម្តី ជាមួយនឹងអតីតគ្រូបង្វឹករបស់ក្រុម Chelsea លោក Antonio Conte ដែលលោកបានរិះគន់សម្រាប់ការអបអរជ្រុលហួសហេតុ ក្រោយពីក្រុម Chelsea ដណ្តើមបានជ័យជម្នះ ៤-០ លើក្រុម Man United ក្នុងរដូវកាលឆ្នាំ២០១៦-២០១។

បើគិតគ្មានហេតុការណ៍នោះ ឬលោក Conte លោក Mourinho បានបញ្ជាក់ថា លោកតែងតែមានការពិចារណាខ្ពស់ចំពោះសកម្មភាពរបស់លោក នៅពេលដែលធ្វើដំណើរទៅជួបអតីតក្លិបរបស់លោក ដែលកំពុងតែស្ថិតក្នុងចំណាត់ថ្នាក់លេខ២លើតារាង ពោលគឺ៦ចំណាត់ថ្នាក់ខ្ពស់ជាងក្រុម Man United។

លោក Mourinho បានបន្ថែមទៀតថា៖ «ខ្ញុំនឹងព្យាយាមគ្រប់គ្រងខ្លួនខ្ញុំ និងគោរពដល់កីឡដ្ឋាន និងអ្នកគាំទ្រ ដែលធ្លាប់ជាអ្នកគាំទ្ររសប់ខ្ញុំ និងជាកីឡដ្ឋានរបស់ខ្ញុំអស់រយៈពេលជាច្រើនឆ្នាំ»។ ការប្រកួតនេះនឹងចាប់ផ្តើមនៅម៉ោង៦:៣០ល្ងាច៕

ប្រភពពី៖ Channel News Asia

October 20, 2018

ឧបករណ៍បំពងសំឡេង XBOOM របស់ក្រុមហ៊ុន LG ជាឧបករណ៍ មានអានុភាពដ៏អស្ចារ្យជាងឧបករណ៍ដ៏ទៃ

នៅក្នុងព្រឹត្តិការណ៍ IFA 2018 នៅទីក្រុងប៊ែកឡាំង ក្រុមហ៊ុន LG Electronics បានបង្ហាញផលិតផលដែលមានលក្ខណៈពិសេស បន្ថែមទៀតរបស់ខ្លួនដូចជា ផលិតផលបំពងសម្លេងចល័តប្ល៊ូធូ XBOOM និងឧបករណ៍បំពងសម្លេង XBOOM AI ThinQ ឆ្លាតវ័យជាដើម។ XBOOM តែងតែឈានមុខនិងមានសំឡេងពិរោះដ៏អស្ចារ្យ ដែលបានរួមចំណែកដល់ចំណែកទីផ្សារលើពិភពលោក 35% ក្នុងចំណោមផលិតផលខ្នាតតូចនិងឧបករណ៍បំពងសម្លេង។

នៅខួបលើកទី 60 របស់ខ្លួនក្រុមហ៊ុន LG កំពុងជំរុញយុទ្ធសាស្ត្រផ្នែកឧបករណ៍ សម្លេងរបស់ខ្លួនដោយផ្តោតជាចម្បងទៅលើគុណភាពសម្លេង។ ដោយផ្ដោតលើការផ្តួចផ្តើមផ្នែកស្រាវ ជ្រាវនិងអភិវឌ្ឍដ៏ធំ។ កិច្ចខិតខំប្រឹងប្រែងមួយក្នុងចំណោម កិច្ចខិតខំប្រឹងប្រែងទាំងនេះ គឺភាពជាដៃគូជាមួយក្រុមហ៊ុន Meridian Audio ដែលបច្ចេកវិទ្យារបស់វាត្រូវបាន អនុវត្តនៅក្នុងផលិតផល LG XBOOM ។ ក្នុងនាមជាក្រុមហ៊ុនដែលឈរនៅពីក្រោយ ឧបករណ៍បំពងសម្លេងឌីជីថលដំបូងគេបង្អស់របស់ពិភពលោក និងម៉ាស៊ីនឌីសតូចឌីជីថលដំបូងគេ។ បច្ចេកវិទ្យា របស់ក្រុមហ៊ន Meridian បានដើរតួនាទីយ៉ាងសំខាន់ក្នុងការអភិវឌ្ឍន៍និងការអនុវត្តការវិវត្តន៍ បច្ចេកវិទ្យាសម្លេង ដូចជា MQA ហើយក៏ប្រើប្រាស់សម្រាប់រថយន្តទំនើបៗដូចជា Land Rover, McLaren និង Jaguar ជាដើម។

ឧបករណ៍បំពងសម្លេង XBOOM ស៊េរីតូច(ម៉ូដែល CK99) និង (ម៉ូដែល OK99) គឺពិតជាលាន់ សម្លេងខ្លាំងអស្ចារ្យ បញ្ចេញថាមពលពី 1800 វ៉ាត់រហូតដល់ 5,000 វ៉ាត់សម្រាប់ក្នុងបរិយាកាសពិធីជប់លៀងដ៏រីករាយ។

ការបន្ថែមនៃឧបករណ៍បំពងសម្លេង XBOOM Go (ម៉ូដែល PK3 / PK5 / PK7) អនុញ្ញាតឱ្យអ្នកស្រលាញ់តន្ត្រីកាន់តែច្រើនថែមទៀត ដើម្បីរីករាយជាមួយអត្ថប្រយោជន៍នៃជំនាញសម្លេងរបស់ក្រុមហ៊ុន LG ។ ឧបករណ៍បំពងសម្លេង XBOOM Go ជាម៉ាកសញ្ញាកេរ្ត៍ដំណែលនៃឧបករណ៍បំពងសម្លេងនិងពិធីជប់លៀងដ៏អស្ចារ្យរបស់យើង។ វាត្រូវបានរចនាឡើងដើម្បីទាក់ទាញអ្នកស្តាប់ដែលមានគុណភាពខ្ពស់ និងភាពងាយស្រួលដល់អ្នកប្រើប្រាស់ផងដែរ។ ជាមួយនឹងបច្ចេកវិទ្យាសម្លេងកម្រិតខ្ពស់របស់ក្រុមហ៊ុន Meridian ឧបករណ៍បំពងសម្លេង XBOOM Go ផ្តល់ជូននូវគុណភាពខ្ពស់រហូតដល់បីដងយ៉ាងច្បាស់ល្អព្រមទាំងមានសំលេងដ៏ពរោះទោះ បីជាមានទំហំតូចក៏ដោយ។

XBOOM Go គឺជាឧបករណ៍បំពងសំឡេងឥតខ្សែលើកដំបូងដែល Support ជាមួយបច្ចេកវិទ្យា aptX ™ HD ពីក្រុមហ៊ុន Qualcomm សម្រាប់ការចាក់សម្លេងឌីជីថលកម្រិតខ្ពស់ 24bit / 576kbps ដែលបំពេញតាមតម្រូវការខ្ពស់នៃសម្លេងដែលងាយនឹងបាត់បង់តាមប្ល៊ូធូស។

ក្រុមហ៊ុន LG គឺជាក្រុមហ៊ុនដំបូងគេដែលរួមបញ្ចូលនូវបច្ចេកវិទ្យា aptX HD នៅក្នុងស្មាតហ្វូន G5 ហើយបច្ចេកវិទ្យាសម្លេងកម្រិតខ្ពស់ត្រូវបានរកឃើញនៅថ្ងៃនេះក្នុង LG G7 ThinQ ។

ឧបករណ៍បំពងសម្លេងម៉ូឌែល XBOOM Go ក៏មានភ្លើងបំភ្លឺច្រើនពណ៌ផងដែរព្រមទាំងចំណុចទាញ Grab-N-Go និង X-grip សម្រាប់បំលាស់ទីនិងការរក្សាលំនឹង។ ថ្មកាន់បានយូរនិងភាពធន់ទៅនឹងទឹកធ្វើឱ្យឧបករណ៍បំពងសម្លេង XBOOM Go ល្អឥតខ្ចោះសម្រាប់សកម្មភាពនៅខាងក្រៅ។

ឧបករណ៍បំពងសម្លេង LG XBOOM AI ThinQ មានម៉ូដែល WK7 និងម៉ូដែល WK9 មានកម្មវិធី Google Assistant ដើម្បីជួយឱ្យអ្វីៗដំណើរការបាន ដោយគ្រាន់តែបញ្ចាដោយសំឡេង ប៉ុណ្ណោះ ។ ភាពជាដៃគូរបស់ក្រុមហ៊ុន LG ជាមួយក្រុមហ៊ុន Meridian នាំមកនូវសក្តានុពលពេញលេញនៃជំនាញសម្លេងរបស់ក្រុមហ៊ុនទាំងពីរ, ផ្តល់នូវសំឡេងគុណភាពខ្ពស់, សំលេង ពិរោះ។ គុណភាពសម្លេងខ្ពស់មិនបែកនៅក្នុង LG XBOOM AI ThinQ អាចផលិតនូវសម្លេងដែលថតនៅក្នុងស្ទូឌីយោបាន។ ក្រុមហ៊ុន LG បានសហការជាមួយ Google ដើម្បីបញ្ចូលកម្មវិធី Google Assistant ដោយផ្ទាល់ទៅក្នុងផលិតផលជាមជ្ឈមណ្ឌលផ្ទះ ដែលអនុញ្ញាតឱ្យឧបករណ៍បំពងសម្លេងម៉ូឌែល WK7 និង WK9 គ្រប់គ្រងឧបករណ៍ផ្ទះឆ្លាតវៃដែលអាចប្រើបានជាមួយ Google ដែលអាចប្រើបានជាមួយ LG ThinQ ។ ឧបករណ៍បំពងសម្លេង XBOOM AI ThinQ WK7 ដែលបច្ចុប្បន្នកំពុងដាក់លក់នៅទីផ្សារសំខាន់ៗ នឹងមកដល់នៅចុងឆ្នាំនេះ ដោយ ឧបករណ៍បំពងសម្លេងម៉ូឌែល WK9 ជាមួយនឹងអេក្រង់ Smart Display ទំហំ 8 អ៊ីញរបស់ខ្លួនសម្រាប់បទពិសោធន៏ដ៏ទាក់ទាញ។

លោក Seo Young-jae ប្រធានផ្នែកសម្លេងនិងវីដេអូនៅក្រុមហ៊ុន LG បាននិយាយថា ” តាមរយៈការពង្រីកម៉ាកយីហោ XBOOM របស់យើងដើម្បីបញ្ចូលឧបករណ៍បំពងសម្លេងឥតខ្សែនិង

ឆ្លាតវៃ ក្រុមហ៊ុន LG កំពុងបើកលទ្ធភាពថ្មីៗជាមួយ XBOOM ដែលឈានមុខក្នុង ការងារផ្នែក សម្លេងនៅក្នុងផ្ទះយើងទាំងមូល ” ។ ជាមួយនឹងក្រុមហ៊ុន Meridian ដែលជាដៃគូបច្ចេកវិទ្យាសម្លេងយើងជឿជាក់យ៉ាងមុតមាំថា XBOOM នឹងទទួលបានភាពជោគជ័យដ៏ត្រចេះត្រចង់នៅក្នុងទ្វីបអឺរ៉ុបក៏ដូចជានៅតំបន់ផ្សេងទៀតនៅជុំវិញពិភពលោក»។

October 19, 2018

លោក Pochettino ពេញចិត្តក្រុម Spurs បច្ចុប្បន្ន បើទោះបីមិនទិញកីឡាករថ្មីចូល

លោក Mauricio Pochettino អ្នកចាត់ការទូទៅរបស់ក្រុម Tottenham បានសម្ដែងការមិនសោកស្តាយជុំវិញការមិនបានទិញចូលកីឡាករថ្មីក្នុងក្រុមរបស់លោកក្នុងពេលបិទរដូវកាល តាមរយៈការបញ្ជាក់ថា ការចាប់ផ្តើមយ៉ាងល្អរបស់ក្រុមរបស់លោកក្នុងក្របខ័ណ្ឌ Premier League បង្ហាញថា ការសម្រេចចិត្តនេះពិតជាត្រឹមត្រូវ។

Spurs ដែលបានក្លាយជាក្រុមដំបូងគេក្នុងការមិនទិញចូលកីឡាករថ្មីសូម្បីតែម្នាក់ បើគិតចាប់តាំងពីទីផ្សារដោះដូរកីឡាករត្រូវបានបង្កើតឡើងនោះ បានតាមស្មើទៅនឹងកំណត់ត្រាដ៏ល្អបំផុតរបស់ពួកគេក្នុងក្របខ័ណ្ឌ Premier League តាមរយៈការរកបាន 18ពិន្ទុពីការប្រកួត 8លើក។

លោក Daniel Levy ប្រធានប្រតិបត្តិក្លិបបានបង្ហើបឱ្យដឹងនៅសប្តាហ៍នេះក្នុងកិច្ចប្រជុំមួយជាមួយនឹងអ្នកគាំទ្ររបស់ក្លិប Tottenham ថា លោកមានការរីករាយចំពោះសកម្មភាពនារដូវក្តៅរបស់ក្លិប ហើយលោក Pochettino ក៏បានយល់ស្របបែបនោះដែរ។

លោក Pochettino បានឱ្យដឹងថា៖ «វាពិតជាលំបាកណាស់ក្នុងការទទួលបានកីឡាករថ្មីដែលយើងត្រូវការ វាមិនអាចទៅរួចឡើយ តែខ្ញុំពិតជារីករាយ និងពេញចិត្តជាមួយនឹងក្រុមដដែលរបស់ខ្ញុំ ពោលគឺកីឡាករទាំង 25នាក់»។

គ្រូបង្វឹករូបនេះបានប្រាប់បន្តថា៖ «យើងមិនមានការសោកស្តាយឡើយ ប៉ុន្តែ យើងពិតជារីករាយណាស់ នៅពេលដែលយើងបានចាប់ផ្តើមរដូវកាលនេះ ជាមួយនឹងការប្រកួត 3លើកដែលយើងឈ្នះ ហើយយើងបានស្ថិតនៅលើកំពូលតារាង ដែលនាំឱ្យមនុស្សជាច្រើននិយាយផ្សេងៗគ្នាថា ក្រុម Tottenham ពិតជាឆ្លាតវៃណាស់ ពីព្រោះពួកគេរក្សាទុករាល់កីឡាករពីរដូវកាលមុនទាំងអស់»។

លោក Pochettino បានបន្ថែមទៀតថា៖ «ក្រោយពីយើងបានចាប់ផ្តើមចាញ់ការប្រកួតប៉ុន្មានលើកមក ការបារម្ភផ្សេងៗបានចាប់ផ្តើមបង្កើតឱ្យមានឥទ្ធិពលដ៏ធំមួយក្នុងទស្សនៈនោះ។ ប៉ុន្តែ ខ្ញុំត្រូវតែរំឭកអ្នកគ្រប់គ្នាថា នេះគឺជាការចាប់ផ្តើមយ៉ាងល្អបំផុតរបស់យើង ក្រោយពីការប្រកួត 8លើក»៕

ប្រភពពី៖ Sport24

October 19, 2018

Author: វល័ក្ខ