Author: វល័ក្ខ

គ្រាន់តែ MV មិនទាន់ចេញបានស្រួលបួលប៉ុន្មានផង ស្រាប់តែអ្នកលេងបណ្ដាញសង្គម ហ្វេសប៊ុក ម្នាក់មានឈ្មោះថា ភី ណាត់ បានចូលទៅបញ្ចេញមតិក្នុងទំព័រផ្លូវការរបស់ V Studio ចំពោះវីដេអូបទចម្រៀងដែលមានចំណងជើងថា «ប្រុសម្នាក់នេះសំខាន់នៅពេលណា» ហេតុអ្វីបានជាចម្លងប្លង់ពីបរទេស ព្រមទាំងបង្ហោះរូបភាពកាត់តបទបរទេសចំនួន 4 សន្លឹកជាមួយបទនេះថែមទៀតផង។

ជាមួយគ្នានេះដែរ គេសង្កេតឃើញថាបទចម្រៀង «ប្រុសម្នាក់នេះសំខាន់នៅពេលណា» ដែលបកស្រាយដោយក្រុមតន្រ្តី Mustache Band ដែលទើបតែចេញវីដេអូចម្រៀងជាផ្លូវការ ក៏ប៉ុន្ដែឃើញមានប្លង់ថតមួយចំនួនស្រដៀងនឹងបទ «Be Together» ច្រៀងដោយ Major Lazer feat. Wild Belle ដែលនេះហើយជាការរិះគន់មួយបានធ្វើឱ្យមានការពន្យល់ពីអ្នកដឹកនាំសម្ដែងវីដេអូចម្រៀងខាងលើ។

ទន្ទឹមគ្នានោះដែរ ខាង V Studio បានឆ្លើយតបនៅក្នុងគេហទំព័ររបស់ខ្លួនថា “សូមអរគុណច្រើនដែលចោទជាសំណួរក្នុងបញ្ហានេះ។ អ្វីដែលអ្នកបានឃើញនេះ គឺគ្រាន់តែជាវិឌីអូរយៈពេលខ្លីរបស់បទចម្រៀងដែលមានរយៈពេលត្រឹមតែ 55 វិនាទីនៃបទចម្រៀងទាំងមូលតែប៉ុណ្ណោះ។ អ្វីដែលក្រុមការងារយើងខិតខំប្រឹងប្រែងធ្វើនេះគឺដើម្បីធ្វើឱ្យទទួលបាននូវការផលិតដែលល្អឥតខ្ចោះមួយជាមួយនឹងគំនិត ទីតាំង ប្លង់ និង សាច់រឿងដែលមិនធ្លាប់មាននៅក្នុងប្រទេសយើង ដែលជាផ្នែកមួយក្នុងការលើកតម្កើងស្នាដៃក្នុងស្រុកផងដែរ។ ក្រុមការងារយើងសង្ឃឹមថា ភី ណាត់ នឹងយល់អំពីបញ្ហានេះជាជាងវាយតម្លៃ និង សន្និដ្ឋានតាមរយៈពាក្យចចាមអារ៉ាមដែលឃើញត្រឹមតែរូបភាពទាំង4នេះ។ សូមតាមដាននៅលើផេចរបស់យើងជាបន្តដើម្បីដឹងពីការចេញនូវវីឌីអូពេញនៃបទចម្រៀងនេះ”។

ដើម្បីឱ្យកាន់តែជាក់ច្បាស់ សូមទស្សនាវីដេអូចម្រៀងទាំងមូលខាងក្រោមនេះ ៖ MV  “ប្រុសម្នាក់នេះសំខាន់នៅពេលណា ” ចម្លងប្លង់បរទេស៖

ភ្នំពេញៈ សាជីវកម្មធំមួយដែលមានមូលដ្ឋាននៅប្រទេសចិន បានបង្ហាញពីបំណងធ្វើការវិនិយោគលើវិស័យថាមពលស្អាត និងសាងសង់មន្ទីរពេទ្យដ៏ធំមួយនៅកម្ពុជា ជាការវិនិយោគមួយដែលឆ្លើយតបទៅនឹងតម្រូវការជាក់ស្តែង និងការអភិវឌ្ឍនៅកម្ពុជា។

លោក វ៉ាង ជីនហ្វេង អនុប្រធានសាជីវកម្មវិស្វកម្ម ZhengYuan នៃក្រុមហ៊ុន CNNC របស់ចិនបានជម្រាបនូវព័ត៌មាននេះជូនដល់លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងបានថ្លែងអំណរគុណ ដល់ឯកឧត្តមរដ្ឋមន្ត្រី ដែលតែងតែទទួលជួបថ្នាក់ដឹកនាំរបស់ក្រុមហ៊ុនចិនក្នុងឱកាសរៀបចំវេទិកាជំរុញពាណិជ្ជកម្មកន្លងមក ដែលបានផ្ដល់នូវទំនុកចិត្តក្នុងការចូលមកវិនិយោគនៅកម្ពុជា។

លោក វ៉ាង គ្រោងនឹងចុះហត្ថលេខាលើអនុស្សរណៈនៃការយោគយល់គ្នាមួយជាមួយក្រសួងពាក់ព័ន្ធរបស់កម្ពុជា ដើម្បីអភិវឌ្ឍធនធានមនុស្សក្នុងវិស័យថាមពលស្អាត (Clean Energy) និងថាមពលនុយក្លេអ៊ែរ។ ក្រុមហ៊ុននឹងសហការជាមួយក្រុមហ៊ុននៅកម្ពុជាសាងសង់មន្ទីរពេទ្យដ៏ធំមួយនៅកម្ពុជា ដែលមានលទ្ធភាពព្យាបាលជំងឺមហារីក ដោយប្រើបច្ចេកវិទ្យានុយក្លេអ៊ែរទៀតផង។

ក្នុងជំនួបនោះលោករដ្ឋមន្ត្រីបានស្វាគមន៍គម្រោងវិនិយោគដ៏ធំនេះ និងបានជម្រាបសង្ខេបអំពីគោលនយោបាយជំរុញពាណិជ្ជកម្ម និងវិនិយោគនៅកម្ពុជា ជាពិសេសវិនិយោគមកពីប្រទេសមហាមិត្តចិន ដោយស្វាគមន៍រាល់ការមកចូលធ្វើពាណិជ្ជកម្ម និងវិនិយោគនៅកម្ពុជា។ ឯកឧត្តមរដ្ឋមន្ត្រី បានស្វាគមន៍ និងត្រៀមជួយដល់ការមកធ្វើពាណិជ្ជកម្ម និងវិនិយោគ ជាពិសេសផ្នែកសុខាភិបាល ដែលនឹងជួយដល់ប្រជាជនកម្ពុជាទាំងមូល៕

ជាសហគ្រិនកម្ពុជាប្រកបដោយភាពជោគជ័យម្នាក់ លោកបណ្ឌិត តាន់ មុនីវណ្ណ បានកសាងខ្លួនពីកូនអ្នកក្រម្នាក់នៅជនបទក្រោយបញ្ចប់សម័យប៉ុលពត ក្លាយមកជានិស្សិតច្បាប់ ជាអ្នកជំនាញពាណិជ្ជកម្ម និងអ្នកជំនួញ។

បណ្ឌិត តាន់ មុនីវណ្ណ បានថ្លែងនៅក្នុងវេទិកា “មាគ៌ាឆ្ពោះទៅរកភាពជាបុគ្គលឆ្នើម” ថា លោកតែងតែប្រកាន់ថា ការតាំងចិត្តខ្ពស់អាចធ្វើឱ្យមនុស្សទទួលបានជោគជ័យក្នុងជីវិត ហើយការខិតខំប្រឹងប្រែងអាចនឹងធ្វើឱ្យមនុស្សទទួលបានលទ្ធផលល្អហួសពីការស្មានទុក។ លោកបានបញ្ជាក់ផងដែរថា កាលពីពេលដែលលោកនៅក្មេង លោកស្រមៃថាលោកនឹងរៀនចប់ត្រឹមបាក់ឌុបតែប៉ុណ្ណោះ ព្រោះបាក់ឌុបសម័យនោះមានតម្លៃធំខ្លាំងណាស់ តែក្រោយពេលដែលលោកខិតខំប្រឹងប្រែងពីមួយដំណាក់កាលទៅមួយដំណាក់កាល លោកបានឈានជើងមកទទួលបានងារបណ្ឌិតមួយចំនួននាពេលបច្ចុប្បន្ននេះ។

ការតាំងចិត្ត និងការខិតខំប្រឹងប្រែងរបស់មនុស្ស ពិតជាមានសារៈសំខាន់ខ្លាំងណាស់ តែបើគ្រាន់តែមានការតាំងចិត្តនោះ មិនទាន់គ្រប់គ្រាន់ទេ វាត្រូវការវិធីសាស្រ្តដើម្បីទទួលយកវា។ បង្ហាញពីចំណុចនេះលោក មុនីវណ្ណ បានសង្កត់ធ្ងន់លើការប្រឹងប្រែង និងការជឿជាក់លើភាពវិជ្ជមាន រួមទាំងការខិតខំប្រឹងប្រែងពិចារណាឱ្យអស់លទ្ធភាពលើរឿងណាមួយដែលកើតឡើងនៅក្នុងជីវិត។

លោកបណ្ឌិត តាន់ មុនីវណ្ណ បាននិយាយថា៖ «ខ្ញុំតែងតែគិតឱ្យបានច្បាស់លាស់បំផុត មុនពេលវិនិច្ឆ័យលើរឿងអ្វីមួយក្នុងជីវិតការងារ និងការសិក្សាជាដើម»។

លោកបានបន្ថែមទៀតថា ការតាំងចិត្ត និងការវិនិច្ឆ័យច្បាស់លាស់ ជាវិធីសាស្រ្តមួយដែលធ្វើឱ្យមនុស្សរីកចម្រើន ហើយក៏ជាចំណុចមួយដែលលោកយកចិត្តទុកដាក់បំផុត ព្រោះការវិនិច្ឆ័យខុស វាអាចធ្វើឱ្យមនុស្សស្តាយក្រោយ។ គ្រប់ពេលដែលលោកមើលឃើញរឿងអ្វីមួយ ឬស្តាប់នូវយោបល់ណាមួយ លោកគ្រាន់តែស្តាប់តែប៉ុណ្ណោះ បន្ទាប់មកលោកធ្វើការវិនិច្ឆ័យដោយគិតឱ្យបានល្អិតល្អន់បំផុតមុននឹងឆ្លើយតប ឬធ្វើសកម្មភាពណាមួយ។ ការគិតច្បាស់លាស់នេះហើយ ទើបធ្វើឱ្យលោកហ៊ានសម្រេចចិត្ត ហើយធ្វើការតាំងចិត្តខ្ពស់ដើម្បីធ្វើអ្វីមួយប្រកបដោយភាពច្បាស់លាស់ និងល្អិតល្អន់។

ចំណុចសំខាន់មួយផ្សេងទៀតដែលជាចំណុចអប់រំសម្រាប់បុគ្គលិក និងយុវជនកម្ពុជា គឺការខិតខំឱ្យអស់ពីសមត្ថភាពប្រកបដោយភាពវៃឆ្លាត និងមានគំនិតច្នៃប្រឌិតខ្ពស់។

លោក មុនីវណ្ណ បានបញ្ជាក់ថា ការដែលបុគ្គលម្នាក់អាចឡើងតំណែងបាន ឬអាចក្លាយជាមនុស្សដែលអ្នកគ្រប់គ្រងពេញចិត្ត គឺពួកគាត់មានការតាំងចិត្តដែលពោរពេញទៅដោយថាមពល។ នៅពេលដែលមានគម្រោងមួយត្រូវធ្វើ ឬមានភារកិច្ចត្រូវអនុវត្តសូមខិតខំឱ្យអស់ពីលទ្ធភាពដើម្បីដោះស្រាយវា នៅពេលនោះបើយើងធ្វើមិនកើត អ្នកផ្សេងក៏ពិបាកធ្វើកើតដែរ។

លោកបានបញ្ជាក់ថា ការខិតខំរបស់យើងក្នុងការបញ្ចេញសកម្មភាពការងារនេះ ជាកត្តាជំរុញខ្លាំងមួយដែលធ្វើឱ្យអ្នកគ្រប់គ្រងចាប់អារម្មណ៍ ហើយការខិតខំនេះក៏ត្រូវមានភាពវៃឆ្លាតផងដែរ។ សូមកុំធ្វើការងារតែម្នាក់ឯង តែត្រូវចេះរកជំនួយពីអ្នកជុំវិញខ្លួន ឬអ្នកជំនាញលើផ្នែកដែលខ្លួនមិនទាន់យល់ច្បាស់ នៅពេលនោះយើងនឹងទទួលបានលទ្ធភាពការងារខ្ពស់ ហើយវាក៏បង្ហាញពីលទ្ធផលនៃការតាំងចិត្តប្រកបដោយភាពឆ្លាតវៃផងដែរ៕

តាមរបាយការណ៍ស្រាវជ្រាវរបស់ NEDSPICE បង្ហាញថា ផលិតផលម្រេចឆ្នាំ 2017 នៅទូទាំងពិភពលោកមានប្រហែល 523,000តោន កើនជាងឆ្នាំ 2016 ប្រហែល 20% ដោយសារមានកំណើននៅវៀតណាម ឥណ្ឌូនេស៊ី ប្រេស៊ីល និងកម្ពុជាយើងផងដែរ ដែលចំនួននេះបានកើនឡើងពី 11,200តោន ដល់ 20,000តោន ត្រូវជា 4% នៃផលិតផលសរុបលើពិភពលោក។

របាយការណ៏ខាងលើបានលើកឡើងថា សម្រាប់ប្រទេសវៀតណាមវិញផលិតម្រេចបានដល់ទៅ 40% នៃផលិតផលសរុបពិភពលោកដែលជាចំនួនមួយច្រើនជាងគេ។ ក្រៅពីនោះគឺឥណ្ឌូនេស៊ី ឥណ្ឌា និង ប្រេស៊ីល ផលិតបានប្រហាក់ប្រហែលគ្នា គឺប្រហែល 60,000 ទៅ 70,000តោនក្នុងមួយឆ្នាំ។

លោក ចាន់ សុផល អ្នកវិភាគសេដ្ឋកិច្ចឯករាជ្យបានឱ្យដឹងថា តម្លៃម្រេចបានធ្លាក់ពី 8,000ដុល្លារក្នុងមួយតោន មកនៅត្រឹម 4,000ដុល្លារក្នុងមួយតោន ដែលជាតម្លៃធ្លាក់ចុះជាមធ្យមក្នុងឆ្នាំនេះ។ លោកថា តម្លៃម្រេចរបស់កម្ពុជាត្រូវបានកំណត់ថ្លៃពីឈ្មួញវៀតណាមដោយម្រេចខ្មែរមិនតិចជាង 70% ទេ ត្រូវបានទិញដោយឈ្មួញកណ្ដាលយកទៅលក់នៅប្រទេសវៀតណាម។

លោកថា ប្រសិនបើមានអ្នកវិនិយោគទុនក្នុងប្រទេសនាំចេញផ្ទាល់ទៅប្រទេសផ្សេងៗ ដូចជាការវិនិយោគនៅក្នុងវិស័យស្រូវអង្ករដែរនោះ គឺជាការល្អប្រសើរណាស់ បើយកផលិតផល 30,000តោន ក្នុងឆ្នាំខាងមុខគុណនឹងតម្លៃប្រហែល 4,000ដុល្លារក្នុងមួយតោននោះ នឹងបានប្រាក់ប្រមាណជា 120,000,000ដុល្លារ ដែលជាចំនួនមួយច្រើនគួរសមដែរគឺប្រហែលជិតពាក់កណ្ដាលនៃការនាំចេញអង្ករពីកម្ពុជាទៅកាន់ក្រៅប្រទេស៕

ភ្នំពេញៈ ព្រលានយន្តហោះអន្តរជាតិកងកេង ខេត្តព្រះសីហនុ បាននិងកំពុងមានសកម្មភាពនៃការហោះឡើង និងចុះចតរបស់យន្តហោះផ្សេងៗកាន់តែច្រើនឡើង ដោយសារតែការមកដល់របស់ក្រុមហ៊ុនអាកាសចរណ៍ថ្មីៗ។

លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានថ្លែងឲ្យដឹងតាមទូរស័ព្ទនាព្រឹកថ្ងៃទី20 មិថុនានេះថា បច្ចុប្បន្នក្រុមហ៊ុនអាកាសចរណ៍កាន់តែច្រើនបានចុះចតនៅព្រលានយន្តហោះអន្តរជាតិខេត្តព្រះសីហនុ ដោយបច្ចុប្បន្នមានក្រុមហ៊ុនអាកាសចរណ៍ Air Asia បានភ្ជាប់ជើងហោះហើរចំនួន 4លើក ក្នុងមួយសប្តាហ៍ រវាងទីក្រុងកូឡាឡាំពួ និងខេត្តព្រះសីហនុ និងក្រុមហ៊ុន JC Airline ក៏បានភ្ជាប់ជើងហោះហើរត្រង់ ពីខេត្តព្រះសីហនុ ទៅកាន់ទីក្រុងកូឡាឡាំពួផងដែរ។

លោកបន្តថា “ក្រៅពីនេះក្រុមហ៊ុនអាកាសចរណ៍មកពីប្រទេសចិនផ្សេងៗទៀតក៏បានហោះហើរជាលក្ខណៈជួលមកកាន់ព្រលាននេះជាបន្តបន្ទាប់ផងដែរ”។ លោកបន្តថា “យើងរំពឹងថា អ្នកដំណើរឆ្លងកាត់ព្រលានយន្តហោះនេះនឹងកើនពី 60ម៉ឺននាក់កាលពីឆ្នាំមុនដល់ 90ម៉ឺននាក់នៅដំណាច់ឆ្នាំនេះ”។

លោក ហូ វណ្ឌី ទីប្រឹក្សាសភាពាណិជ្ជកម្មកម្ពុជាបានថ្លែងថា ខេត្តព្រះសីហនុកំពុងទទួលបានការចាប់អារម្មណ៍ច្រើនពីអ្នកវិនិយោគមកពីប្រទេសចិន ដែលធ្វើឲ្យតម្រូវការនៃជើងហោះហើរក្នុងស្រុក និងមកពីបរទេសកើនឡើងជាបន្តបន្ទាប់។ លោកបន្តថា ចំនួនអ្នកដំណើរ និងការភ្ជាប់ជើងហោះហើរទៅកាន់ខេត្តនេះ នឹងកើនឡើងកាន់តែច្រើននាពេលអនាគត ដោយសារសក្តានុពលរបស់ខេត្តដែលមានទាំងកំពង់ផែ ផ្លូវគោក និងផ្លូវអាកាសមួយនេះ។

រដ្ឋាភិបាលបានដាក់ខេត្តព្រះសីហនុជាតំបន់ឧស្សាហកម្ម នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ 2015 – 2025 ជាគោលនយោបាយមួយដែលនឹងរុញកម្ពុជាទៅកាន់កម្រិតថ្មីមួយទៀតសម្រាប់សេដ្ឋកិច្ចរបស់ខ្លួន៕