Author: វល័ក្ខ

  • Ggear រៀបចំកម្មវិធីបរិច្ចាគឈាម នៅសៀមរាបលើប្រធានបទរួមមួយ

    Ggear រៀបចំកម្មវិធីបរិច្ចាគឈាម នៅសៀមរាបលើប្រធានបទរួមមួយ

    កន្លងទៅថ្មីៗនេះក្រុមហ៊ុន Ggear និងសមាគមសហគ្រិនសាខាខេត្តសៀមរាប បានរៀបចំកម្មវិធីការបរិច្ចាគឈាមឈរលើប្រធានបទរួមមួយ «ចែករំលែកតំណក់ឈាមរបស់អ្នកដើម្បីជួយសង្រ្គោះជីវិតស្រ្តី និងអ្នកម្ដាយ» ខណៈតម្រូវការឈាមកំពុងកើនឡើងជាលំដាប់។

    គិតជាមធ្យមក្នុងមួយថ្ងៃ កម្ពុជាត្រូវការឈាមចំនួន 200ប្លោកទូទាំងប្រទេសដើម្បីជួយសង្គ្រោះជីវិតមនុស្ស ដោយអ្នកជំងឺម្នាក់ត្រូវការឈាមជាមធ្យម 3 ប្លោក។ កម្មវិធីនេះរៀបចំឡើងក្នុងគោលបំណងដើម្បីចូលរួមអបអរសាទរក្នុងទិវាបរិច្ចាគឈាមពិភពលោក ថ្ងៃទី 14 ខែ មិថុនា ដោយមានវត្ថមានចូលរួមពីលោកវេជ្ជបណិ្ឌតហុក គឹមចេង ប្រធានមជ្ឈមណ្ឌលជាតិផ្ដល់ឈាមរាជធានីភ្នំពេញ លោកវេជ្ជបណ្ឌិតប៉ែន ផល្គុណ ប្រធានមន្ទីពេទ្យខេត្តសៀមរាប វេជ្ជបណ្ឌិតក្រុស សារ៉ាត ប្រធានមន្ទីសុខាភិបាលខេត្តសៀមរាប បណ្ឌិតទូច ណារិន ប្រធានស្ដីទីសមាគមសហគ្រិនវ័យក្មេងសាខាខេត្តសៀម រាប និងលោកឧកញ៉ា សុខ ពិសិដ្ឋ អគ្គនាយកប្រចាំក្រុមហ៊ុន ជីហ្គៀ ( GGear ) ។

    លោកឧកញ៉ា សុខ ពិសិដ្ឋ បានមានប្រសាសន៍ថា៖ កន្លងមកក្រុមហ៊ុន GGearបានចូលរួមចំណែកជាច្រើនក្នុងការងារសង្គម និងសហគមន៍ ដូចជាការចូលរួមជាមួយសមាគមគ្រូពេទ្យស្ម័គ្រចិត្តការចែករំលែកបទពិសោធបច្ចេកវិទ្យាថ្មីៗដល់សិស្សានុសិស្សឱ្យបានយល់ដឹងបន្ថែម ជាដើម។

    លោកបន្ដទៀតថា ឈាមគឺជាវត្ថុដែលមានតម្លៃបំផុត ដោយសារតែបច្ចុប្បន្ននេះក្នុងមួយថ្ងៃយើងត្រូវការឈាមចំនួន 200 ប្លោកទូទាំងប្រទេសដើម្បីជួយសង្គ្រោះជីវិតមនុស្ស។ ដូចនេះការបរិច្ចាគឈាម គឺមានន័យថាជាការចែករំលែក និងជួយដល់ជីវិតមនុស្សផ្សេងទៀត។ សរុបលទ្ធផល និងវត្តមានអ្នកចូលរួមប្រមាណជាង 300 នាក់ក្នុងថ្ងៃនេះ ចំនួនឈាមដែលទទួលបានពីការបរិច្ចាគមានចំនួន 208 ប្លោក។

    លោកវេជ្ជបណិ្ឌតហុក គឹមចេង ប្រធានមជ្ឈមណ្ឌលជាតិផ្ដល់ឈាមរាជធានីភ្នំពេញ បានឱ្យដឹងថា ការផ្តល់ឈាម គឺជាកាយវិការដ៏សាមញ្ញដែលមនុស្សពេញវ័យមានសុខភាពល្អអាចធ្វើបានដោយត្រូវគោរពទៅតាមលក្ខខណ្ឌវេជ្ជសាស្រ្តដូចខាងក្រោម៖

    – អាយុចាប់ពី 18 ដល់ 60 ឆ្នាំ
    – ទម្ងន់ចាប់ពី 45 គីឡូក្រាមឡើង
    – មានសុខភាពល្អ
    – មនុស្សប្រុសអាចផ្តល់ឈាមបាន 4ដង ក្នុងមួយឆ្នាំ (ចន្លោះពេល 3ខែម្តង)
    – មនុស្សស្រីអាចផ្តល់ឈាមបាន 3ដង ក្នុងមួយឆ្នាំ (ចន្លោះពេល 4ខែម្តង)

    តម្រូវការឈាមមានគ្រប់ពេលវេលា ហើយសម្រាប់ការផ្គត់ផ្គង់ក៏ត្រូវមានភាពទៀងទាត់ផងដែរ។ ប៉ុន្តែដោយសារការថែរក្សាទុកដាក់ឈាម មានពេលកំណត់នៅមុនពេលប្រើប្រាស់ ទើបជាការចាំបាច់ណាស់ ដែលត្រូវតែមានការធ្វើអំណោយឈាមទៀងទាត់នៅគ្រប់ពេលវេលា នៅគ្រប់ទីកន្លែងដែលគេត្រូវការប្រើប្រាស់ឈាម។ ឈាមគឺជាអំណោយមានតម្លៃដ៏ប្រពៃបំផុត ដែលមនុស្សម្នាក់អាចផ្តល់ទៅឱ្យមនុស្សម្នាក់ទៀតនូវអំណោយនៃជីវិតនេះបាន។

    ការសម្រេចចិត្តផ្តល់អំណោយឈាមរបស់លោកអ្នក អាចឱ្យគេជួយសង្រ្គោះជីវិតមនុស្សម្នាក់ ឬ ច្រើននាក់បាន និងដោយសារឈាមរបស់លោកអ្នកអាចយកទៅបំបែកជាសមាសភាពឈាមផ្សេងៗទៀតបានដូចជា៖ គុលិកាក្រហម ប្លាកែត ប្លាស្មា ដែលគេអាចយកទៅប្រើប្រាស់សម្រាប់អ្នកជំងឺក្នុងលក្ខខណ្ឌជាក់លាក់ណាមួយបាន៕

  • កម្មវិធី Property Awards រដូវកាលទី3 បានចាប់ផ្ដើមហើយ ដោយនៅតែរក្សាតម្លាភាពជូនអ្នកចូលរួម

    កម្មវិធី Property Awards រដូវកាលទី3 បានចាប់ផ្ដើមហើយ ដោយនៅតែរក្សាតម្លាភាពជូនអ្នកចូលរួម

    បន្ទាប់ពីកម្មវិធី Property Awards នារដូវកាលទី2 ត្រូវបានបញ្ចប់ដោយទទួលបានជោគជ័យ និងទទួលបានការគាំទ្រពីម្ចាស់គម្រោងអភិវឌ្ឍន៍យ៉ាង ច្រើន កម្មវិធីនេះក៏ត្រូវបានប្រកាសឡើងសារជាថ្មី ដើម្បីឱ្យម្ចាស់គម្រោងនានាបានដាក់ពាក្យចូលរូមប្រកួតនារដូវកាលទី3។

    នៅព្រឹកថ្ងៃនេះ គណៈកម្មការរៀបចំកម្មវិធី Property Awards បានប្រកាសឱ្យមានការចូលរួមដាក់ពាក្យចាប់ពីថ្ងៃទី21 ខែមិថុនា នេះតទៅ ដែលការប្រកាសនេះ ត្រូវបានធ្វើឡើងនៅក្នុងសណ្ឋាគារសូហ្វីតែលភូគីត្រា។

    លោក Terry Blackburn នាយកគ្រប់គ្រង Asia Property Awards  and Property Report បានលើកឡើងថា ដ្បិតតែកម្មវិធីនេះទើបតែធ្វើឡើងនៅកម្ពុជារយៈពេលពីរឆ្នាំប៉ុណ្ណោះ ប៉ុន្ដែទទួលបានការគាំទ្រជាច្រើនពីសំណាក់អ្នកអភិវឌ្ឍន៍ និងក្រុមហ៊ុនអចលនទ្រព្យក្នុងស្រុកជាច្រើន ដោយសារតែពួកគេបានយល់យ៉ាងច្បាស់អំពីអត្ថប្រយោជន៍ការចូលរួមក្នុងកម្មវិធីមួយនេះ។

    លោកបន្ដថា៖” អ្វីដែលធ្វើឱ្យអ្នកចូលរួមប្រកូតមានភាពជឿជាក់លើកម្មវិធីគឺការផ្ដល់តម្លាភាព និងគណនេយ្យភាពជូនដល់ពួកគេ តាមរយៈការវាយតម្លៃយ៉ាងសុក្រិតពីក្រុមហ៊ុនសាវនកម្ម BDO ដែលជាក្រុមហ៊ុនលំដាប់ទី 5នៅលើពិភពលោក”។ កម្មវិធី Property Awards បានបង្កើតឡើងរយៈពេល 12ឆ្នាំមកហើយ ដែលធ្លាប់រៀបចំ និងទទួលបានជោគជ័យនៅប្រទេស ថៃ ម៉ាឡេស៊ី សង្ហបុរី វៀតណាម ជាដើម។ ដោយឡែកកម្ពុជាទើបតែមានការរៀបចំជាលើកដំបូងកាលពីឆ្នាំ2016កន្លងទៅនេះ និងទើបតែបញ្ចប់កម្មវិធីរដូវកាលទី2 កាលពី 3ខែកន្លងទៅ។

    លោក សន សៀប ជាអ្នកដឹកនាំគណវិនិច្ឆ័យនៅក្នុងកម្មវិធី Property Awards បានលើកឡើងថា តាមរយៈបទពិសោធណ៍របស់លោកកន្លងមកឃើញថា កម្មវិធីនេះបានផ្ដល់អត្ថប្រយោជន៍ជាច្រើនដល់ក្រុមហ៊ុន ឬម្ចាស់គម្រោងអភិវឌ្ឍន៍ដែលបានចូលរួមប្រកួត ព្រោះក្រៅពីអាចជួយជម្រុញការលក់ហើយនោះ។ កម្មវិធីនេះក៏ជាសារមួយបញ្ជូនទៅដល់សាធារណជនឱ្យបានដឹងថា គម្រោងតែពួកគាត់បានទិញគឺជាប់បានពានរង្វាន់ និងបានឆ្លងកាត់ការវាយតម្លៃយ៉ាងត្រឹមត្រូវប្រកបដោយតម្លាភាព៕

  • ទម្លាប់ល្អរបស់បុគ្គលដែលមានឥទ្ធិពលលើពិភពលោក

    ទម្លាប់ល្អរបស់បុគ្គលដែលមានឥទ្ធិពលលើពិភពលោក

    មនុស្សដែលមានឥទ្ធិពលជាច្រើន តែងតែមានគំនិតប្លែកពីបុគ្គលទូទៅមួយចំនួន តែគំនិតទាំងនោះមិនមែនសុទ្ធតែអស្ចារ្យទាំងស្រុងនោះទេ។ មានចំណុចខ្លះ គឺងាយៗបំផុត គ្រាន់តែមនុស្សទូទៅមិនបានដឹង ហើយយកមកអនុវត្តប៉ុណ្ណោះ។

    ខាងក្រោមនេះជាទម្លាប់មួយចំនួនរបស់បុគ្គលមានឥទ្ធិពលដែលត្រូវបានដកស្រង់ដោយគេហទំព័រ វេទិកាសេដ្ឋកិច្ចពិភពលោក៖

    1. មានគំនិតរបស់ខ្លួនឯង
    បុគ្គលដែលមានឥទ្ធិពល ភាគច្រើនជាមនុស្សដែលមានគំនិតផ្ទាល់ខ្លួន ហើយមិនសូវទន់ទោទៅតាមគំនិតសាធារណៈប៉ុន្មាននោះទេ។ គេជាមនុស្សដែលមានការសម្រេចចិត្តច្បាស់លាស់ និងប្រើវិចារណញ្ញាណច្រើនដើម្បីសម្រេចលើកិច្ចការងារទាំងឡាយ។ គ្រប់ព័ត៌មានដែលគេបានជួប គឺត្រូវតែឆ្លងកាត់ការសម្រេចពីវិចារណញ្ញាណជាមុនសិន ដើម្បីធានាថា ទង្វើនោះពិត ឬមិនពិត ហើយវាមានគុណសម្បត្តិ និងគុណវិបត្តិកម្រិតណា។

    2. ទទួលយកមតិដែលមិនស្របនឹងខ្លួនឯង
    ក្នុងការរស់នៅ គ្មានមនុស្សណាម្នាក់ដែលល្អឥតខ្ចោះនោះទេ ហេតុនេះហើយទើបមនុស្សត្រូវការស្តាប់មតិយោបល់ពីគ្រប់សមាសភាព ដើម្បីថ្លឹងថ្លែងពីភាពសុក្រឹតរបស់ខ្លួនឯង។ នៅពេលដែលមនុស្សណាម្នាក់ផ្តល់យោបល់មកលើយើង យើងចាំបាច់ត្រូវទទួលស្តាប់ដោយបើកចំហចិត្តឱ្យទូលាយដើម្បីទទួលបានព័ត៌មានគ្រប់ជ្រុងជ្រោយសម្រាប់ជាមូលដ្ឋានដើម្បីសម្រេចចិត្ត។ បុគ្គលដែលមានឥទ្ធិពលភាគច្រើន ជាមនុស្សដែលអាចទាញចំណាប់អារម្មណ៍បានច្រើនបំផុតពីមនុស្សទូទៅ ព្រោះគាត់បានធ្វើនូវរឿងមួយចំនួនដែលអាចធ្វើឱ្យមនុស្សដែលជំទាស់ជាមួយគាត់ទទួលយកបាន។

    3. ចេះប្រតិកម្មប្រកបដោយភាពឆ្លាតវៃ
    មនុស្សមានឥទ្ធិពលភាគច្រើនជាមនុស្សដែលស្ថិតក្នុងចំណាប់អារម្មណ៍របស់មនុស្សគ្រប់គ្នា ហើយសកម្មភាពទាំងអស់នោះ ពេលខ្លះក៏បង្ហាញឱ្យឃើញពីចន្លោះប្រហោង និងចំណុចដែលគេអាចរិះគន់បាន។ ជាទូទៅស្ថិតក្នុងស្ថានភាពនេះ បុគ្គលមានឥទ្ធិពលភាគច្រើន មិនសូវតបតច្រើននោះទេ តែគេចេះរង់ចាំឱកាសដើម្បីស្វែងរកចន្លោះឆ្លាតវៃមួយដើម្បីធ្វើការឆ្លើយតបប្រកបដោយប្រសិទ្ធភាព និងការទទួលយកបាន៕

  • 15ឆ្នាំខាមុខ កម្ពុជាត្រូវការលំនៅដ្ឋាន 80ម៉ឺនខ្នងបន្ថែមទៀត

    15ឆ្នាំខាមុខ កម្ពុជាត្រូវការលំនៅដ្ឋាន 80ម៉ឺនខ្នងបន្ថែមទៀត

    ភ្នំពេញៈ មន្រ្តីជាន់ខ្ពស់នៃក្រសួងដែនដី នគរូបនីយកម្ម និងសំណង់បានថ្លែងថា គិតចាប់ពីឆ្នាំ 2015 ដល់ឆ្នាំ 2030 ខាងមុខ កម្ពុជា ត្រូវការលំនៅដ្ឋានប្រមាណ 80ម៉ឺនខ្នងបន្ថែមទៀត ដើម្បីឆ្លើយតបនឹងកំណើនប្រជាសាស្រ្ត និងការរីកចម្រើននៃសេដ្ឋកិច្ចសង្គម។

    លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានថ្លែងឲ្យដឹងកាលពីពេលថ្មីៗនេះថា ជាមួយនឹងកំណើនសេដ្ឋកិច្ច នគរូបនីយកម្មក៏បានកើនឡើងយ៉ាងឆាប់រហ័សដែរ ព្រោះតាមការសិក្សារបស់ក្រសួងអំពីក្របខ័ណ្ឌយុទ្ធសាស្រ្តអភិវឌ្ឍន៍ទីក្រុងនៅកម្ពុជាបានរកឃើញថា ចំនួនប្រជាជនរស់នៅក្នុងរាជធានី និងទីប្រជុំជននៅឆ្នាំ 2014 មានចំនួន 4.5លាននាក់ ស្មើនឹង 27.1ភាគរយ នឹងបន្តកើនឡើងដល់ 7.92លាននាក់នៅឆ្នាំ 2030 ស្មើនឹង 44ភាគរយនៃចំនួនប្រជាជនកម្ពុជាសរុប។

    តាមទិន្នន័យនេះបានបង្ហាញឲ្យឃើញថា សម្រាប់រយៈពេល 15ឆ្នាំទៀត គិតចាប់ពីឆ្នាំ 2015 ដល់ 2030 តម្រូវការលំនៅដ្ឋានសម្រាប់រាជធានី និងទីប្រជុំជនមានប្រមាណ 80ម៉ឺនលំនៅដ្ឋានទៀត ដែលគិតជាមធ្យមមានតម្រូវការប្រមាណជា 5ម៉ឺនលំនៅដ្ឋានក្នុងមួយឆ្នាំ។

    លោក ប៉ែន សុផលបានបន្តថា ឆ្លើយតបនឹងបញ្ហានេះក្រសួងបាន និងកំពុងសកម្មអនុវត្តគោលនយោបាយជាតិស្តីពីការរៀបចំដែនដីក្នុងការកសាងផែនការរៀបចំដែនដីប្លង់គោល និងផែនការប្រើប្រាស់ដីគ្រប់កម្រិត និងគោលនយោបាយជាតិស្តីពីលំនៅដ្ឋាន ពិសេសលំនៅដ្ឋានដែលមានតម្លៃសមរម្យជូនមន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋដែលមានប្រាក់ចំណូលមធ្យម ប្រាក់ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកបដោយចីរភាព និងសមធម៌៕

  • LG ចេញទូរស័ព្ទ G6 Plus មានទំហំផ្ទុកធំ និងប្រព័ន្ធសំឡេងថ្មី

    LG ចេញទូរស័ព្ទ G6 Plus មានទំហំផ្ទុកធំ និងប្រព័ន្ធសំឡេងថ្មី

    ព័ត៌មានស្ដីពីការបង្ហាញទូរស័ព្ទត្រកូល G ថ្មី របស់ក្រុមហ៊ុន LG បានក្លាយជាការពិតហើយ បន្ទាប់ពីបណ្តាញសារព័ត៌មានកូរ៉េមួយ បានចុះផ្សាយថា LG នឹងដាក់បង្ហាញម៉ូដែលស្មាតហ្វូនចំនួន 2 ប្រភេទ LG G6 Plus និង LG G6 Pro ដែលមានលក្ខណៈសម្បត្តិខ្លាំងជាងមុន និងទំនើបជាងមុននោះកាលពីដើមខែមិថុនា។

    ក្នុងចំណោមផលិតផលទាំង 2 ទូរស័ព្ទ LG G6 Plus បានបង្ហាញខ្លួនរួចហើយ នៅសល់តែ G6 Pro ប៉ុណ្ណោះដែលក្រុមហ៊ុននឹងបញ្ចេញនៅពេលខ្លីខាងមុខ។ សម្រាប់ G6 Plus ត្រូវបានក្រុមហ៊ុនបង្កើតឡើងដោយនៅរក្សារូបរាងដដែល ប៉ុន្តែបន្ថែមលក្ខណៈសម្បត្តិខ្ពស់ជាងមុន ដោយពង្រីកនូវទំហំផ្ទុកដល់ 128GB និងមានបំពាក់នូវប្រព័ន្ធសំឡេងថ្មីដែលអាចបញ្ចេញសំឡេងយ៉ាងពីរោះរណំ្តមកពីក្រុមហ៊ុនបច្ចេកវិទ្យា B&O PLAY ហើយក៏មានបច្ចេកវិទ្យាសាកបញ្ចូលថ្មឥតខ្សែ Wireless Charging (តាមតំបន់មួយចំនួន) ហើយវាក៏មានមុខងារ Face Print, Low Power Consumption និង Covered Lens warning ជាដើមទៀតផង។

    សម្រាប់មុខងារ Face Print ទូរស័ព្ទ G6 Plus បានប្រើប្រាស់នូវប្រព័ន្ធស្គែនផ្ទៃមុខ (Facial Recognition) ដើម្បីអនុញ្ញាតឱ្យអ្នកប្រើប្រាស់អាចធ្វើការដោះសោទូរស័ព្ទដោយប្រើពេលមិនដល់1 វិនាទីផង។ ចំពោះកម្លាំងម៉ាស៊ីនរបស់វា គឺមិនខុសគ្នាពី LG G6 ធម្មតានោះទេ។

    ស្មាតហ្វូននេះមានជម្រើសពណ៌ចំនួន 3 ដូចជា ពណ៌ខ្មៅ (Optical Astro Black) ពណ៌ទឹកសមុទ្រ (Optical Marine Blue) និងពណ៌ទឹកមាស (Optical Terra Gold) ។

    សរុបមកសម្រាប់ LG G6 Plus នេះ លើសតែត្រង់មានពណ៌ថ្មី, អង្គផ្ទុកទិន្នន័យ 128GB និងប្រព័ន្ធសំឡេងថ្មីប៉ុណ្ណោះ ហើយចំពោះតម្លៃក្រុមហ៊ុននៅមិនទាន់បានបញ្ជាក់នៅឡើយទេ ហើយវានឹងចាប់ផ្តើមមានដាក់លក់នៅដើមខែកក្កដាខាងមុខនេះ៕

  • ធនាគារជាតិ ប្រកាសឱ្យស្ថាប័នហិរញ្ញវត្ថុទាំងអស់ការពារផលប្រយោជន៍អតិថិជន

    ធនាគារជាតិ ប្រកាសឱ្យស្ថាប័នហិរញ្ញវត្ថុទាំងអស់ការពារផលប្រយោជន៍អតិថិជន

    ធនាគារជាតិនៃកម្ពុជា (NBC) បានចេញសេចក្តីប្រកាសថ្មីមួយស្តីពីការគ្រប់គ្រងគ្រឹះស្ថានផ្តល់សេវាទូទាត់សងប្រាក់ ក្នុងគោលបំណងដើម្បីពង្រឹងការគ្រប់គ្រង និងត្រួតពិនិត្យ ការផ្តល់សេវាទូទាត់សងប្រាក់របស់គ្រឹះស្ថានធនាគារ និងហិរញ្ញវត្ថុឱ្យប្រព្រឹត្តទៅប្រកបដោយសុវត្ថិភាព ប្រសិទ្ធភាពក្នុងការការពារផលប្រយោជន៍អតិថិជន។

    សេចក្តីប្រកាសនេះ មានគោលបំណងផងដែរដើម្បីធានាភាពរឹងមាំនៃសេវាទូទាត់សងប្រាក់ លើកកម្ពស់បរិយាប័ន្នហិរញ្ញវត្ថុ ជំរុញការប្រកួតប្រជែងលើកកម្ពស់គំនិតច្នៃប្រឌិត និងផ្តល់ជំនឿទុកចិត្តដល់សាធារណជនដែលប្រើប្រាស់សេវាទូទាត់សងប្រាក់នៅក្នុងព្រះរាជាណាចក្រកម្ពុជា ។

    ទោះជាយ៉ាងនេះក្តីសេចក្តីប្រកាសថ្មីនេះ មិនមានវិសាលភាពគ្រប់ដណ្តប់ទៅលើចំណុចមួយចំនួននោះទេដែលក្នុងនោះរួមមាន ៖
    1. ការផ្តល់ប្រព័ន្ធបច្ចេកវិទ្យាសម្រាប់ទ្រទ្រង់សេវាកម្ម ទូទាត់សងប្រាក់ ដោយមិនពាក់ព័ន្ធក្នុងការរក្សាទុកមូលនិធិ ការរក្សាទុក និងដំណើរការទិន្នន័យ បរធនបាលកិច្ច និងការរក្សាការសម្ងាត់ ការបញ្ជាក់អត្តសញ្ញាណ និងទិន្នន័យ ប្រព័ន្ធព័ត៌មានវិទ្យា និងទូរគមនាគមន៍ ការថែរក្សាទីតាំង និងឧបករណ៍សម្រាប់សេវាទូទាត់សងប្រាក់។
    ចំពោះប្រតិបត្តិការទូទាត់សងប្រាក់ដែលប្រើទីតាំងគ្រឹះស្ថានធនាគារស្រាប់ តែប្រតិបត្តិការផ្ទេរប្រាក់ និងទទួលបញ្ជាផ្ទេរប្រាក់ត្រូវស្ថិតក្រោមវិសាលភាពប្រកាសស្តីពី «អ្នកដំណើរការតតិយភាគី»។

    2. សេវាផ្អែកលើឧបករណ៍ទូទាត់ជាក់លាក់ ដែលអាចប្រើប្រាស់បាននៅក្នុងកម្រិតកំណត់ណាមួយ និងឧបករណ៍ដែលអាចទូទាត់ទំនិញ ឬសេវាកម្មតែនៅក្នុងទីតាំងរបស់គ្រឹះស្ថាន ចេញផ្សាយ ឬនៅក្នុងតែបណ្តាញទីតាំងរបស់គ្រឹះស្ថានដែលចេញ។

    សូមបញ្ជាក់ថា អ្នកប្រើប្រាស់សេវាទូទាត់សងប្រាក់ សំដៅទៅលើរួបវន្តបុគ្គល ឬនីតិបុគ្គល ដែលប្រើប្រាស់សេវាទូទាត់សងប្រាក់ ដូចជាអ្នកសងប្រាក់ និងអ្នកទទួលប្រាក់ ឬអ្នកទាំងពីរ៕

  • ព្រលានយន្តហោះខ្នាតអន្តរជាតិ នៅខេត្តកោះកុងចាប់ផ្តើមសាងសង់

    ព្រលានយន្តហោះខ្នាតអន្តរជាតិ នៅខេត្តកោះកុងចាប់ផ្តើមសាងសង់

    ភ្នំពេញៈ ព្រលានយន្តហោះខ្នាតអន្តរជាតិមួយ ដែលវិនិយោគដោយក្រុមហ៊ុន Union Development Group ស្ថិតនៅក្នុងខេត្តកោះកុង ដែលគ្រោងបោះទុនវិនិយោគតម្លៃ 350លានដុល្លារអាមេរិក បានចាប់ផ្តើមបើកការដ្ឋានសាងសង់ហើយ។

    លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងឲ្យដឹងតាមទូរស័ព្ទកាលពីម្សិលមិញថា ការសាងសង់ព្រលានយន្តហោះខ្នាតអន្តរជាតិនេះ បាននិងកំពុងចាប់ផ្តើមឈូសឆាយដី ដើម្បីរៀបចំជាការដ្ឋានហើយ។ ព្រលានយន្តហោះនេះស្ថិតនៅក្នុងស្រុកបទុមសាគរ ខេត្តកោះកុង និងវិនិយោគដោយក្រុមហ៊ុន Union Development Group ដែលមានមូលដ្ឋាននៅប្រទេសចិន។

    លោកបន្តថា ព្រលានយន្តហោះនេះមានទំហំដី 750ហិកតា ជាព្រលានយន្តហោះខ្នាតអន្តរជាតិដែលអាចទទួលការចុះចតយន្តហោះបានពីគ្រប់ទិសទី។ លោកបន្ថែមថា “ព្រលានយន្តហោះនេះអាចចុះចតយន្តហោះប្រភេទ 4C ជាយន្តហោះខ្នាតមធ្យមបាន ប៉ុន្តែតើការសាងសង់ត្រូវបញ្ចប់នៅពេលណា លោកមិនទាន់អាចបញ្ជាក់បាននៅឡើយទេនៅពេលនេះ”។

    លោក ស៊ិន ចាន់សិរីវុត្ថា បានបន្តទៀតថា រហូតមកទល់ពេលនេះ ក្រុមហ៊ុនកំពុងឌីហ្សាញគម្រោងប្លង់របស់អាកាសយានដ្ឋាននេះ ប៉ុន្តែការសិក្សាពីបរិស្ថានស្ថិតក្រោមសមត្ថកិច្ចរបស់ក្រសួងបរិស្ថាន និងការសាងសង់ស្ថិតក្រោមក្រសួងរៀបចំដែនដី នគរូបនីយកម្ម និងសំណង់។

    ប្រធាននាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថានលោក ដាញ់ សេរី បានថ្លែងថា ក្រុមហ៊ុននេះបានជួលក្រុមហ៊ុនសិក្សាពីផលប៉ះពាល់បរិស្ថានលំដាប់អន្តរជាតិ ដើម្បីវាយតម្លៃពីផលប៉ះពាល់បរិស្ថាននៃគម្រោងនេះ និងត្រូវដាក់ឯកសារមកកាន់ក្រសួង ប៉ុន្តែរហូតមកទល់ពេលនេះ ក្រសួងមិនទាន់ទទួលបានរបាយការណ៍សិក្សាស្តីពីផលប៉ះពាល់បរិស្ថានរបស់ក្រុមហ៊ុននេះនៅឡើយទេ៕

  • លោក Hudson ជំរុញឲ្យកីឡាករបង្ហាញភាពក្លាហានក្នុងរាត្រីនេះ

    លោក Hudson ជំរុញឲ្យកីឡាករបង្ហាញភាពក្លាហានក្នុងរាត្រីនេះ

    លោក Anthony Hudson គ្រូបង្វឹកនៃក្រុមបាល់ទាត់ជម្រើសជាតិនូវែលសេឡង់ បាននិយាយថា ក្រុមដែលមានរហស្សនាមថា All Whites របស់លោកត្រូវតែមានសេចក្តីក្លាហាន ពេលប៉ះជាមួយនឹងក្រុមខ្លាំងម៉ិកស៊ិក ព្រោះដឹងថា បើពួកគេបរាជ័យនៅរាត្រីនេះ ក្តីសង្ឃឹមរបស់ពួកគេក្នុងយុទ្ធនាការ Confederations Cup នឹងត្រូវបញ្ចប់។

    ការរងបរាជ័យក្នុងលទ្ធផល 2-0 ក្រោមស្នាដៃក្រុមម្ចាស់ផ្ទះរុស្ស៊ី ក្នុងការប្រកួតបើកឆាកនៃពូល A កាលពីថ្ងៃសៅរ៍មានន័យថា ក្រុមម្ចាស់ជើងឯកប្រចាំតំបន់អូសេអានី នូវែលសេឡង់ បច្ចុប្បន្ន មិនដែលស្គាល់ឈ្នះសោះពីការប្រកួត10លើកក្នុងយុទ្ធនាការ Confederations Cup ក្រោយពីបានចាកចេញពីព្រឹត្តិការណ៍នេះកាលពីឆ្នាំ1999-2003 និងឆ្នាំ2009 ដោយមិនទទួលបានលទ្ធផលអ្វីទាំងអស់។

    ចំណែកក្រុមជម្រើសជាតិម៉ិកស៊ិកវិញ ក្រោយពីបានបញ្ចប់ក្នុងលទ្ធផលស្មើ2-2 ជាមួយនឹងក្រុមជម្រើសជាតិព័រទុយហ្គាល់រួចមក ក្រុមនេះកំពុងតែពោរពេញដោយក្តីជឿជាក់ និងត្រូវបានចាត់ទុកថា ជាក្រុមមានប្រៀបក្នុងការឈ្នះលើការប្រកួតនៅទីក្រុង Sochi នៅរាត្រីនេះ។


    ក្រោយពីបានបញ្ចប់ក្នុងលទ្ធផលស្មើក្នុងទីក្រុង Kazan កាលពីថ្ងៃសៅរ៍ លោក Juan Carlos Osorio គ្រូបង្វឹករបស់ក្រុមជម្រើសជាតិម៉ិកស៊ិក បាននិយាយទាំងញញឹមថា៖ «យើងបានជួបការប្រកួតដ៏ស្វិតស្វាញមួយជាមួយនឹងក្រុមម្ចាស់ជើងឯកប្រចាំទ្វីបអឺរ៉ុប ហើយយើងបានធ្វើការការពារ Cristiano Ronaldo ជាប់ទាំងស្រុង»។ ផ្ទុយទៅវិញ ក្រុមជម្រើសជាតិនូវែលសេឡង់ត្រូវតែបញ្ចប់ការមិនអាចរកគ្រាប់បាល់បញ្ចូលទីរបស់ពួកគេឱ្យបាន ដើម្បីទទួលបានឱកាសមួយក្នុងពេលប្រកួតជាមួយនឹងក្រុមម៉ិកស៊ិក។ ក្រោយពីបានចាញ់ក្នុងលទ្ធផល 1-0 ក្នុងការប្រកួតមិត្តភាពក្រោមស្នាដៃក្រុមអៀរឡង់ខាងជើង និងបេឡារុស មុនពេលធ្វើដំណើរទៅរុស្ស៊ីនោះ ក្រុមមានរហស្សនាមថា All Whites បច្ចុប្បន្នមិនទាន់រកបានគ្រាប់បាល់បញ្ចូលទីសោះពីការប្រកួត3លើកចុងក្រោយរបស់ខ្លួន។

    គួរបញ្ជាក់ដែរថា ក្រុមជម្រើសជាតិនូវែលសេឡង់ ធ្លាប់បានចាញ់ក្រុមជម្រើសជាតិម៉ិកស៊ិករួចមកហើយក្នុងលទ្ធផល 2-1 ក្នុងការប្រកួតមិត្តភាព កាលពីខែតុលា ឆ្នាំទៅ។ ការប្រកួតនឹងចាប់ផ្តើមនៅម៉ោង1រំលងអធាត្រ៕
    ប្រភពពី៖ Daily Star

     

  • មិនធម្មតាទេ ឆៃប៉ូវអ្នកស្រុកស្អាងល្បីដល់បរទេស

    មិនធម្មតាទេ ឆៃប៉ូវអ្នកស្រុកស្អាងល្បីដល់បរទេស

    ឆៃប៉ូវ គឺជាអាហារគួបផ្សំមួយប្រភេទ ដែលត្រូវបានច្នៃចេញពីមើមឆៃថាវ និងអាចរក្សាទុកបានយូរ ដែលភាគច្រើនបងប្អូនខ្មែរយើង ដែលកាត់សែស្រឡាយចិនចូលចិត្តធ្វើទុកដើម្បីទទួលទានបានយូរ វាដូចគ្នានឹងប្រហុកផ្អករបស់ខ្មែរយើងដែរ ជាពិសេសគឺទទួលទានជាមួយបបរសនៅពេលព្រឹកតែម្តង។

    អ្នកស្រី ឡាយ គឹមឈន ជាអ្នកលក់ឆៃប៉ូវម្នាក់ក្នុងចំណោមអ្នកលក់ឆៃប៉ូវជាច្រើននៅក្នុងភូមិព្រែកស្នង ឃុំព្រែកគយ ស្រុកស្អាង ខេត្តកណ្តាល បានប្រាប់ថា អ្នកស្រីបានប្រកបមុខរបរនេះជាង 10ឆ្នាំមកហើយ ឆៃប៉ូវដែលលក់នេះ គឺមិនបានទទួលយកពីគេមកលក់បន្តនោះទេ គឺធ្វើដោយខ្លួនឯង ព្រោះចេះធ្វើតៗគ្នាពីឪពុកម្តាយមក ហើយអ្នកនៅទីនេះក៏ដូចគ្នាដែរ គឺក្រៅពីដាក់លក់រាយនៅមុខផ្ទះហើយ នៅបានលក់បោះដុំទៅឱ្យម៉ូយទូទាំង 25រាជធានី-ខេត្តទូទាំងប្រទេស និងបោះឱ្យម៉ូយនៅក្រៅប្រទេសទៀតផង។

    អ្នកស្រីបានបន្ថែមថា វត្ថុធាតុដើមដែលយើងយកមកធ្វើជាឆៃប៉ូវ ជាចម្បងគឺមើមឆៃថាវ អំបិល និងស្ករ ហើយឆៃថាវខែនេះគឺទិញមកពីស្រុកសំឡូត ខេត្តបាត់ដំបង  បើខែកញ្ញាដល់ខែតុលាយើងនាំយកមកពីខេត្តកំពង់ចាម ខេត្តតាកែវ ហើយក៏ទិញនៅក្នុងស្រុកស្អាងកោះធំ ក្នុងខេត្តកណ្តាលនេះមួយចំនួនដែរ។

    ចំណែកឯអ្នកលក់ម្នាក់ទៀតនៅភូមិព្រែកស្នាយ ជាប់ភូមិព្រែកស្នងដែរនោះ គឺលោកហេង ចំរើន បានប្រាប់ឱ្យដឹងស្រដៀងគ្នាដែរថា លោកក៏ធ្វើឆៃប៉ូវនេះលក់ជិត 10ឆ្នាំមកហើយដែរបន្តពីឪពុកម្តាយ។ អ្នកលក់ម្នាក់នេះបាននិយាយថា នៅម្តុំនេះគឺមានអ្នកប្រកបរបរធ្វើឆៃប៉ូវលក់នេះប្រមាណ70% ហើយឆៃប៉ូវគឺ មាន3ប្រភេទ គឺឆៃប៉ូវប្រៃ ឆៃប៉ូវផ្អែម និងឆៃប៉ូវជូរ ហើយបើលក់រាយនៅផ្ទះក្នុង 1ថ្ងៃៗបានប្រមាណជាជាង 200គីឡូក្រាមដែរ ក្រៅពីនោះនៅលក់បោះដុំទៅតាមបណ្តាខេត្តផ្សេងៗ និងរាជធានីភ្នំពេញទៀតផង។

    អ្នកលក់រូបនេះបានប្រាប់ដែរថា សម្រាប់ឆៃប៉ូវផ្អែមបើលក់រាយ 1គីឡូក្រាម 4,000រៀល តែបើបោះដុំ 1គីឡូក្រាមត្រឹមតែ 3,800រៀលប៉ុណ្ណោះ ចំណែកឯឆៃប៉ូវជូរបោះដុំឱ្យម៉ូយ 1គីឡូក្រាម 7,000រៀល និងលក់រាយ 1,0000រៀលក្នុង1គីឡូក្រាម ហើយបើឆៃប៉ូវប្រៃស្ងួតវិញ 1គីឡូក្រាម 3,000រៀល និងសើម 2,000រៀលក្នុង1គីឡូក្រាម។ ក្រៅអំពីម៉ូយក្នុងស្រុក និងអ្នកដំណើរដែលឆ្លងកាត់តាមផ្លូវជាតិលេខ 21 នេះហើយ ក៏នៅមានបងប្អូនមួយចំនួននៅតាមបណ្តាខេត្តផ្សេងៗ និងរាជធានីភ្នំពេញដែរ គឺតែងមកកុម៉្មង់ទិញដើម្បីយកទៅផ្ញើបងប្អូននៅបរទេសជារឿយៗ ផងដែរ ដែលទិញម្តងៗមិនតិចជាង 50ទៅ 100គីឡូក្រាមនោះទេ ព្រោះតែឆៃប៉ូវនៅទីនេះយើងធ្វើតាមគោលការណ៍ធម្មជាតិ មិនប្រើសារធាតុគីមីនោះទេ ហើយជាធម្មតាឆៃប៉ូវផ្អែមគឺអាចរក្សាទុកបានពី 2ទៅ3ខែ ចំណែកឯអាប្រៃវិញទុកបានរហូតដល់1ឆ្នាំឯណោះ។

    អ្នកដំណើរ សេង រ៉ូហ្សា រស់នៅរាជធានីភ្នំពេញដែលបានឈប់រថយន្តទិញឆៃប៉ូវ បានប្រាប់ថា រៀងរាល់ពេលដែលអ្នកស្រីបានមកលេងនៅស្រុកស្អាងនេះ អ្នកស្រីតែងឈប់ទិញឆៃប៉ូវនៅព្រែកស្នាយ និងព្រែកស្នងនេះយកទៅទុកហូបមិនដែលខានឡើយ។ មិនតែប៉ុណ្ណោះនៅឆ្លៀតទិញយកទៅចែកបងប្អូន និងផ្ញើទៅសាច់ញាតិនៅឯបរទេសទៀតផង ព្រោះឆៃប៉ូវនៅទីនេះឆ្ងាញ់ និងមិនប្រើថ្នាំគីមីនាំឱ្យប៉ះពាល់សុខភាពនោះទេ៕

  • Salah ពិនិត្យសុខភាពមុននឹងបំពេញការផ្ទេរពីក្លិប Roma ទៅ Liverpool

    Salah ពិនិត្យសុខភាពមុននឹងបំពេញការផ្ទេរពីក្លិប Roma ទៅ Liverpool

    ខ្សែបម្រើស្លាបអន្តរជាតិអេហ្ស៊ីប Mohamed Salah នឹងក្លាយជាកីឡាករចំណូលថ្មីដំបូងគេរបស់លោក Jurgen Klopp ក្នុងរដូវក្តៅនេះ ខណៈដែលខ្សែបម្រើដ៏មានឥទ្ធិពលរូបនេះ បានធ្វើដំណើរទៅដល់ប្រទេសអង់គ្លេស ដើម្បីត្រួតពិនិត្យសុខភាពកាលពីថ្ងៃអង្គារ។

    Salah របស់ក្លិបអ៊ីតាលី Roma អាចនឹងក្លាយជាកីឡាករទីមួយក្នុងចំណោមកីឡាករចំណូលថ្មីទាំង 7នាក់ ដែលនឹងត្រូវទៅចូលរួមនៅកីឡដ្ឋាន Anfield ក្នុងការព្រមព្រៀងគ្នាមួយដែលមានតម្លៃខ្លួនជាបឋមចំនួន 35លានផោន (ស្មើនឹង 44.2លានដុល្លារអាមេរិក) បើទោះបីតម្លៃខ្លួននោះអាចនឹងកើនឡើង បើបូកទាំងប្រាក់ឧបត្ថម្ភផ្សេងៗក៏ដោយ។ ខ្សែបម្រើអន្តរជាតិអេហ្ស៊ីបវ័យ 24ឆ្នាំរូបនេះបានស៊ុតបាល់បញ្ចូលទី15គ្រាប់ និងបានជួយឲ្យមិត្តរួមក្រុមរកបាន 11គ្រាប់ផ្សេងទៀត ខណៈដែលក្រុម Roma បានបញ្ចប់ក្នុងចំណាត់ថ្នាក់លេខ 2ក្នុងក្របខ័ណ្ឌ Serie A នៅរដូវកាលនេះ ហើយការផ្ទេរនេះ នឹងធ្វើឲ្យរូបគេវិលទៅកាន់អង់គ្លេសវិញ ក្រោយពីបានចំណាយពេលមួយរយៈខ្លីក្នុងក្លិប Chelsea នៅចន្លោះឆ្នាំ2014 និងឆ្នាំ2016 ដោយកាលនោះរូបគេបានបង្ហាញខ្លួនត្រឹមតែ 19ប្រកួតប៉ុណ្ណោះ។

    Salah បានយល់ព្រមទៅលើការព្រមព្រៀងគ្នាមួយ ដែលនឹងធ្វើឲ្យរូបគេទទួលបានប្រាក់ចំណូលគុណនឹង 2ដងពោលគឺប្រមាណជា9ម៉ឺនផោន (ស្មើនឹង11.4ម៉ឺនដុល្លារអាមេរិក) ក្នុងមួយសប្តាហ៍។

    ខ្សែការពារ Virgil van Dijk របស់ក្លិប Southampton គឺជាគោលដៅទីមួយរបស់លោក Klopp ប៉ុន្តែ ក្រុមហង្សក្រហមបានបង្ខំចិត្តបោះបង់ការចាប់អារម្មណ៍របស់ពួកគេចោល ក្រោយពីក្លិប Southampton បានប្តឹងតវ៉ាប្រឆាំងនឹង Liverpool ទាក់ទងនឹងការដាក់សំណើមិនស្របច្បាប់៕
    ប្រភពពី៖ Independent