Author: វល័ក្ខ

រឿង «រាជបុរី Comeback» កំពុងទទួលបានការចាប់អារម្មណ៍យ៉ាងខ្លាំងពីទស្សនិកជន គ្រាដែលរឿងនេះគ្រោងនឹងចាក់បញ្ចាំងនៅខែកក្កដា ខាងមុខ។ ជាមួយគ្នានេះតារាសម្ដែង ជា សុគន្ធា ក៏កំពុងតែរំពឹងថា ក្រោយពីរឿងនេះចាក់បញ្ចាំងនាងនឹងអាចទទួលបានប្រជាប្រិយភាពបន្ថែមទៀតផងដែរ។

បើទោះជារឿង «រាជបុរីComeback» គេពុំទាន់បានដឹងថា គុណភាពនៃការផលិតរបស់អ្នកដឹកនាំរឿងអាចប្រកួតប្រជែងនៅក្នុងទីផ្សារភាពយន្ដបានឬយ៉ាងណាក៏ដោយ តែរឿងនេះត្រូវបានមហាជនជាច្រើនចាប់អារម្មណ៍តាមរយៈការលើកយកជីវិតពិតមួយចំនួនរបស់តារាចម្រៀងរាជបុរី ដែលបានស្លាប់ដោយគ្រោះថ្នាក់ចរាចរណ៍។

កញ្ញា ជា សុគន្ធា សម្ដែងជាតួអង្គមេជួញដូរគ្រឿងញៀននៅក្នុងរឿងនេះក៏បានសម្ដែងនូវក្ដីរីករាយជាខ្លាំងគ្រាដែលរឿងនេះជិតដាក់បញ្ចាំង។ នាងបន្ដថា៖ «រឿងនេះកំពុងតែមានចំណាប់អារម្មណ៍ខ្លាំងពីទស្សនិកជន ដូច្នេះខ្ញុំជឿថា ក្រោយពីរឿងនេះចាក់បញ្ចាំងមហាជនជាច្រើន នឹងអាចស្គាល់ខ្ញុំកាន់តែច្បាស់តាមរយៈតួអង្គមេជួញដូរគ្រឿងញៀន ព្រោះតាមរយៈតួអង្គនេះនឹងធ្វើឱ្យអ្នកទស្សនាឃ្នាន់ខ្នាញ់ និងស្អប់តួអង្គដែលខ្ញុំសម្ដែងនោះជាមិនខាន»។

ជា សុគន្ធា ហៅស្រី ពេជ្រ ជាតារាសម្ដែងទើបតែចូលប្រឡូកក្នុងអាជីពសិល្បៈប្រមាណជា 2ឆ្នាំប៉ុណ្ណោះ  តែនាងអាចចាប់យកការគាំទ្រពីមហាជនបានយ៉ាងលឿនតាមរយៈការសម្ដែងរឿងអប់រំ និងការថតស្ប៉តមួយចំនួនផងដែរ។

កញ្ញា ជា សុគន្ធា  បន្ដថា នាងបានប្រឹងប្រែងសម្ដែងនៅក្នុងរឿងនេះខ្លាំងណាស់ ព្រោះនាងពេញចិត្ដយ៉ាងខ្លាំងនូវតំណែងតួអង្គជាមេជួញដូរគ្រឿងញៀន។ នាងអះអាងថា ទោះជានាងមានបទពិសោធតិចតួចពិតមែន តែតាមរយៈការមើលតិចនិកសម្ដែងពីរៀមច្បង គឺកញ្ញាឌុច លីដា  នាងមានទំនុកចិត្ដយ៉ាងខ្លាំងថា នាងធ្វើបានល្អនៅក្នុងរឿងនេះ។

ពាក់ព័ន្ធនឹងប្រជាប្រិយភាពរបស់កញ្ញាជា សុគន្ធា វិញត្រូវបាននាងបញ្ជាក់ថា មានអារម្មណ៍សប្បាយចិត្ដជាមួយការងារសិល្បៈរបស់ខ្លួន ខុសពីគ្រាដែលចូលសិល្បៈដំបូងៗនាងហាក់ដូចជាអស់សង្ឃឹមជាខ្លាំង។ នាងបន្ដថា៖ «ពេលខ្ញុំចូលសិល្បៈដំបូងៗមិនដែលនឹកស្មានថាមានថ្ងៃនេះទេ ព្រោះមិនស្គាល់នរណាម្នាក់សោះ ប៉ុន្ដែក្រោយពីបានចូលរួមចំណែកក្នុងកិច្ចការសង្គម និងព្យាយាមបង្ហាញវត្ដមានជាច្រើនក្នុងសង្គមសិល្បៈរួចមក ក៏ទទួលបានការលើកទឹកចិត្ដពីរៀមច្បងជាច្រើន»៕

ភ្នំពេញៈ រដ្ឋាករទឹកក្រុងភ្នំពេញនឹងចាប់ផ្តើមចេញវិក្កយបត្រថ្លៃទឹក រៀងរាល់មួយខែម្តងដែលការអនុវត្តនេះនឹងគ្របដណ្តប់នៅក្រុងភ្នំពេញ និងក្រុងតាខ្មៅ ដែលធ្លាប់តែទទួលវិក្កយបត្របង់ថ្លៃទីកចំនួន2ខែម្តង។

លោក ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញ បានថ្លែងឲ្យដឹងនាព្រឹកថ្ងៃទី29 ខែមិថុនានេះថា បន្ទាប់ពីប្រមុខរាជរដ្ឋាភិបាលបានប្រកាសលើគោលការណ៍អនុវត្តន៍ ការបញ្ចុះតម្លៃទឹកស្អាត និងបន្ទាប់ពីរដ្ឋាករទឹកស្វយ័តក្រុងភ្នំពេញបានរៀបចំការបញ្ចុះតម្លៃទឹកស្អាតរួចមក រដ្ឋាករទឹកស្វយ័តក្រុងភ្នំពេញក៏បានប្តូរវិក្កយបត្រថ្មីដែរ គឺការចេញវិក្កយបត្របង់ថ្លៃទឹកនៅរៀងរាល់មួយខែម្តងវិញ សម្រាប់អតិថិជននៅក្រុងភ្នំពេញ និងក្រុងតាខ្មៅ ខណៈដែលពីមុនធ្លាប់តែទទួលបានវិក្កយបត្របង់ថ្លៃទឹកចំនួន2ខែម្តងនោះ។ ការអនុវត្តថ្មីនេះបានចាប់ផ្តើមប្រកាសអនុវត្ត ចាប់តាំងពីថ្ងៃទី15 ខែឧសភា ឆ្នាំ2017មកម្ល៉េះ។

លោកបន្តថា ពាក់ព័ន្ធនឹងការប្តូវិក្កយបត្រចេញមួយខែម្តងនេះ គឺជាការធ្វើឲ្យកាន់តែប្រសើរជាងការចេញវិក្កយបត្រចំនួ2ខែម្តង ព្រោះបច្ចុប្បន្នការប្រើប្រាស់ទឹករបស់ប្រជាពលរដ្ឋក៏មានការកើនឡើងជាបន្តបន្ទាប់ដែរ និងជាពិសេសការចេញវិក្កយបត្រមួយខែម្តង គឺចៀសវាងនូវការភ្លាំងភ្លេចដល់អតិថិជន។

គិតមកដល់ពេលនេះ រដ្ឋាករទឹកស្វយ័តក្រុងភ្នំពេញ មានសមត្ថភាពផលិតទឹកស្អាតបានចំនួន 56ម៉ឺនម៉ែត្រគុបក្នុងមួយថ្ងៃ និងបានតបណ្តាញចូលផ្ទះប្រជាពលរដ្ឋបានចំនួនជាង 31ម៉ឺនខ្នងផ្ទះដែលជាទឹកមានគុណភាពខ្ពស់ និងមានតម្លៃថោកសមរម្យ ក្នុងនោះសម្រាប់គម្រោងផែនការនៃការផ្គត់ផ្គង់ទឹកស្អាត ចាប់ពីពេលនេះរហូតដល់ឆ្នាំ2030 រដ្ឋាករទឹកស្វយ័តក្រុងភ្នំពេញ គឺធ្វើយ៉ាងណាជំរុញការអភិឌ្ឍវិស័យទឹកស្អាតនៅរាជធានីភ្នំពេញឲ្យបាន 100ភាគរយ៕

ភ្នំពេញៈ ផ្តើមចេញពីមាសមួយជី និងជ្រូកមួយក្បាល លោកឧកញ៉ាលី ហួរបានទទួលជោគជ័យយ៉ាងខ្លាំងក្នុងមុខជំនួញរបស់ខ្លួនលើច្រើនវិស័យ ប៉ុន្តែជំនួញរបស់លោកឧកញ៉ាបានលេចធ្លោក្នុងវិស័យអចលនទ្រព្យ។

ប្រធានសមាគមអ្នកអភិវឌ្ឍន៍លំនៅដ្ឋានរូបនេះបានចែករំលែកពីវិធីធ្វើជាអ្នកមានរបស់ខ្លួនកាលពីសប្តាហ៍មុនថា ចង់ធ្វើជាអ្នកមានត្រូវមានមហិច្ឆតាធំ និងត្រូវមានគោលដៅច្បាស់លាស់ថាខ្លួនចង់បានអ្វី និងធ្វើអ្វី ប៉ុន្តែមិនត្រូវធ្វើអ្វីដែលប្រាសចាកពីច្បាប់នោះទេ។ លោកឧកញ៉ាបានបន្តថា យើងមិនត្រូវអស់សង្ឃឹមក្នុងជីវិតទេ យើងត្រូវតែតស៊ូ និងត្រូវមានមហិច្ឆតា ព្រោះបើគ្មានមហិច្ឆតា យើងធ្វើអ្វីក៏អត់បានសម្រេចដែរ។

លោកឧកញ៉ាបានបន្តថា “កុំគិតទុទិដ្ឋិថា ខ្លួនឯងធ្វើមិនបានឱ្យសោះ ព្រោះគេធ្វើបាន យើងក៏ធ្វើបានដែរ។ ត្រូវយល់ពីចំណុចនេះ”។ លោកបន្តថា “ទំរាំបានដូចសព្វថ្ងៃ អាយុខ្ញុំជាង 60ឆ្នាំទៅហើយ ហើយអ្នកណាថា អ្នកមានស្រួល?”។ លោកឧកញ៉ា លី ហួរ ជាអ្នកវិនិយោគគម្រោងអចលនទ្រព្យធំមួយនៅភាគខាងជើងរាជធានីភ្នំពេញ គឺគម្រោងបុរីវិមានភ្នំពេញ ដែលបច្ចុប្បន្នគម្រោងនេះបានបញ្ចប់ដំណាក់កាលទី4ហើយ។

តើអ្នកមានគេកត់សម្គាល់លើកត្តាអ្វីខ្លះ? សម្រាប់លោកឧកញ៉ាលី ហួរបានថ្លែងថា តើអ្នកមានគេសម្គាល់លើអ្នកមានប្រាក់ប៉ុន្មានឬ? មិនទាន់មាននិយមន័យទេ តែសម្រាប់ទស្សនៈរបស់លោកគឺ អ្នកមានផ្ទះនៅ មានរថយន្ត និងមានប្រាក់ចាយ គឺជាអ្នកមានហើយ។ បើមានសុភមង្គលទៀត គឺពិសេសតែម្តង។ លោកបន្តថា ត្រូវគិតពីអនាគតវែងឆ្ងាយ ត្រូវធ្វើឲ្យបានល្អ ហើយការសាងអំពើល្អមិនមែនជារឿងងាយឡើយ បើយើងថាយើងជាអ្នកមានប្រាក់ ហើយថាខ្លួនឯងជាមនុស្សល្អដែរនោះ គឺមិនពិតទេ ទាល់តែសាធារណមតិឲ្យតម្លៃ។ លោកបន្តថា “ដូច្នេះការខិតខំយូរអង្វែង តស៊ូយូរអង្វែង ទើបយើងទទួលបានជោគជ័យ”៕

ជារៀងរាល់ថ្ងៃ នៅតាមបណ្តាសារព័ត៌មានបានបង្ហាញពីបទល្មើសនានានៅក្នុងសង្គម ដូចជាហិង្សា ការលួច ឆក់ ប្លន់ជាដើម គឺជាដើមហេតុធ្វើឱ្យមនុស្សគ្រប់គ្នាមានការភ័យខ្លាច និងរំខានដល់អាជ្ញាធររបស់សង្គមថែមទៀតផង។ អ្នកអប់រំនៅក្នុងប្រទេសមួយចំនួន ជាពិសេសនៅក្នុងបណ្តាប្រទេសកំពុងអភិវឌ្ឍន៍ បានរកឃើញថា ការសប្បាយជ្រុល និងសម្ភារនិយមរបស់យុវជនជាមូលហេតុសំខាន់មួយក្នុងចំណោមមូលហេតុនានាដែលនាំឱ្យមានបទល្មើសផ្សេងៗកើតឡើង។

ជាធម្មតា នៅគ្រប់ប្រទេសទាំងអស់តែងតែមានកន្លែងកម្សាន្ត ហើយក៏តែងតែមានឧបករណ៍ទំនើបៗហូរចូលមកដើម្បីសម្រួលដល់ការរស់នៅ។ ឧបករណ៍ទាំងអស់នោះអាចហុចនូវលទ្ធផលវិជ្ជមាន ប្រសិនបើមនុស្សចេះប្រើប្រាស់វាឱ្យបានត្រូវគោលដៅ និងស្របតាមសមត្ថភាពរបស់ខ្លួន តែវានឹងជះផលអវិជ្ជមានផងដែរប្រសិនបើយុវជនប្រើវាមិនត្រូវគោលដៅ។

នៅពេលដែលអាណាព្យាបាលបណ្តោយឱ្យកូនៗសប្បាយជ្រុលជាមួយនឹងសម្ភារនិយមតាំងពីនៅវ័យក្មេងខ្លាំងពេក គាត់នឹងអាចក្លាយជាមនុស្សដែលចង់បានខ្លាំង និងញៀនជាមួយនឹងឧបករណ៍ទាំងអស់នោះ ហើយព្យាយាមប្រើគ្រប់មធ្យោបាយដើម្បីឱ្យបានឧបករណ៍ដែលមានតម្លៃហួសពីសមត្ថភាពរបស់ខ្លួនមកប្រើ។ ម្យ៉ាងវិញទៀត ជនល្មើសមួយចំនួនត្រូវបានគេរកឃើញថា បានប្រព្រឹត្តបទល្មើសដោយសារតែគ្មានថវិកាគ្រប់គ្រាន់សម្រាប់ការសប្បាយ រួមទាំងការផ្គត់ផ្គង់ផ្ទាល់ខ្លួន បើទោះបីជាពួកគេមានអាជីពមួយដែលមានចំណូលច្បាស់លាស់ហើយក៏ដោយ។

ការសប្បាយខ្លាំងជ្រុលអាចធ្វើឱ្យមនុស្សបាត់បង់ការគ្រប់គ្រងផ្នែកហិរញ្ញវត្ថុ ហេតុនេះហើយទើបមនុស្សមួយចំនួនបានចំណាយអស់ប្រាក់ចំណូលរបស់ខ្លួនត្រឹមតែរយៈពេល1ថ្ងៃ ឬ2ថ្ងៃប៉ុណ្ណោះ។ បញ្ហានេះបានជំរុញឱ្យអ្នកញៀនជាមួយនឹងភាពសប្បាយ ត្រូវតែដាច់ចិត្តប្រព្រឹត្តបទល្មើសដើម្បីបានផ្គត់ផ្គង់ដល់ចំណង់នៃភាពរីករាយរបស់ខ្លួន៕

បុរសម្នាក់ដែលកញ្ញា វ៉ាន់ វល័ក្ខ ធ្លាប់ស្រឡាញ់ស្មើនឹងជីវិតរយៈពេល6ឆ្នាំ ពេលនេះចំណងស្នេហ៍របស់ពួកគេទាំងពីរមកបានដល់ទីបញ្ចប់ហើយ។ វ៉ាន់ វល័ក្ខ ជាតារាសម្ដែងម្នាក់ដែលទស្សនិកជនបានស្គាល់នាងយ៉ាងច្បាស់តាមរយៈការបង្ហាញរូបភាពសិចស៊ីមួយចំនួន។ ពិសេសការសម្ដែងនៅក្នុងរឿងភាគតាមស្ថានីយទូរទស្សន៍ និងបច្ចុប្បន្ននេះត្រូវបានគេដឹងថា ចំណងស្នេហ៍ដ៏ផ្អែមល្ហែមរបស់នាងជាមួយនឹងសង្សារបណ្ដូលចិត្ដជាអ្នកជំនួញនោះបានសម្រេចចិត្ដចែកផ្លូវគ្នាដើរហើយ និងថែមទាំងមិនអាចងាកមករកផ្លូវផ្សះផ្សាគ្នាបានទឿតផង។

កញ្ញា វ៉ាន់ វល័ក្ខ ប្រាប់ថា នាងពិតជាបានបែកពីសង្សាររបស់នាងដែលធ្លាប់បានស្រឡាញ់គ្នាជាយូរឆ្នាំមកហើយនោះប្រាកដមែន។ នាងបន្ដថា ពួកយើងពុំមានជម្លោះអ្វីនឹងគ្នាទេ មូលហេតុដែលឈានទៅដល់ការបែកគ្នានេះគឺដោយសារតែយើងទាំងពីរអស់ចិត្ដនឹងគ្នារៀងៗខ្លួនដោយគិតថា ស្រឡាញ់គ្នាបន្ដទៀតក៏មិនមានការវិវឌ្ឍទៅរកផ្លូវល្អដែរ។

បើទោះជាមានការលើកឡើងថា នាងជាស្រីស្អាតស្ថិតក្នុងរង្វង់សិល្បៈតែងតែជួបបុរសប្លែកមុខជាច្រើន ដូច្នេះការបែកគ្នាជាមួយសង្សារលើកនេះអាចប្រហែលជាមកពីភ្លើងប្រចណ្ឌផងក៏មិនដឹង?  ប៉ុន្ដែចំពោះរឿងនេះត្រូវបានកញ្ញាវល័ក្ខអះអាងថា៖ «វាពុំមានរឿងដូច្នេះទេ ចាប់តាំងពីខ្ញុំស្គាល់គាត់មកខ្ញុំមិនដែលមានបំណងក្បត់ចិត្ដគាត់ទេ រយៈពេល6ឆ្នាំដែលយើងបានស្គាល់គ្នា យើងមានអនុស្សាវរីយ៏ជាមួយគ្នាច្រើនណាស់ ដូច្នេះវាមិនបានកើតឡើងព្រោះតែមានអ្នកទី 3 នោះទេ»។

វ៉ាន់ វល័ក្ខ បានបញ្ជាក់បន្ថែមថា នាងជាអ្នកសុំសង្សារបែកមុន ព្រោះនាងយល់ថា ទោះជារស់នៅមើលចិត្ដមើលថ្លើមគ្នាបន្ដទៀត ក៏នៅតែគ្មានអ្វីលើសពីហ្នឹងដែរ វាមិនអាចក្លាយទៅជាប្ដីប្រពន្ធនឹងគ្នាទេ ព្រោះយើងទាំងពីរមិនដែលចង់កសាងជីវិតបែបនោះឡើយ ដូច្នេះទើបសម្រេចចិត្ដផ្ដល់សេរីភាពឱ្យគ្នារៀងៗខ្លួនតែម្ដងទៅប្រសើរជាង។

ទោះបី វ៉ាន់ វល័ក្ខ ជាអ្នកសុំសង្សារបែកមុនក៏ដោយ ប៉ុន្ដែក្រោយពេលនៅម្នាក់ឯង នាងមានអារម្មណ៍ថា នៅនឹកស្រណោះរាល់អនុស្សាវរីយ៍ដែលធ្លាប់មានជាមួយគ្នា ព្រោះបុរសម្នាក់នោះជាមនុស្សល្អ ពុំដែលធ្លាប់ធ្វើឱ្យនាងពិបាកចិត្ដឡើយ៕

ភ្នំពេញ៖ បច្ចុប្បន្នគេសង្កេតឃើញថា ផលិតផលគ្រឿងសម្អាងថែរក្សាសក់ ថែរក្សាស្បែក និងស្ប៉ាជាដើមត្រូវបានគេដាក់លក់យ៉ាងព្រោងព្រាតតាមទីផ្សារអនឡាញ ដោយមិនមានច្បាប់អនុញ្ញាតពីក្រសួងមានសមត្ថកិច្ចណាមួយឡើយ ដែលវាជាការបង្កឱ្យកើតមានហានិភ័យយ៉ាងខ្លាំងចំពោះសុខភាពរបស់អ្នកប្រើប្រាស់។

អ្នកស្រី ស្រ៊ាត មុំសោភា អគ្គលេខាធិការសមាគមសហគ្រិនស្ត្រីកម្ពុជាបានមានប្រសាសន៍ក្នុងសន្និសីទស្តីពីគម្រោងរៀបចំការតាំងពិព័រណ៍ និងសន្និសីទអន្តរជាតិលើកទី2 ស្តីពីសម្រស់ គ្រឿងសម្អាង ផលិតផលថែរក្សាសក់ ផលិតផលថែរក្សាស្បែក និងស្ប៉ាឆ្នាំ2017 ដែលគ្រោងធ្វើចាប់ពីថ្ងៃទី15 ដល់ថ្ងៃទី17 កញ្ញាខាងមុខនេះថា ផលិតផលគ្រឿងសម្អាងដែលផ្សព្វផ្សាយលក់តាមប្រព័ន្ធអនឡាញសព្វថ្ងៃកំពុងតែបង្កនូវហានិភ័យយ៉ាងធ្ងន់ធ្ងរដល់សុខភាពរបស់អ្នកប្រើប្រាស់ដ៏គួរឱ្យព្រួយបារម្ភជាពិសេសមនុស្សស្រី ដោយសារតែផលិតផលទាំងនោះមិនមានប្រភពច្បាស់លាស់ និងមិនមានការត្រួតពិនិត្យគុណភាពឱ្យបានត្រឹមត្រូវពីក្រសួង ឬស្ថាប័នពាក់ព័ន្ធ។

អ្នកស្រីបានបញ្ជាក់បន្ថែមថា ការថែរក្សាសម្ផស្សនៅប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះមានការរីកចម្រើនខ្លាំង ដោយសារប្រជាជនវ័យក្មេងជាច្រើនចូលចិត្តថែរក្សារូបសម្ផស្សខុសពីសម្រស់របស់ខ្លួនដែលធម្មជាតិផ្តល់ឱ្យ ដោយការប្រើប្រាស់ផលិតផលថែរក្សាសម្ផស្សមិនមានគុណភាព ឬក្លែងក្លាយគ្មានម៉ាកសញ្ញាច្បាស់លាស់ដែលទទួលស្គាល់ដោយក្រសួងនេះ មិនត្រឹមតែបានបំផ្លាញសម្រស់របស់ខ្លួនប៉ុណ្ណោះទេ តែវាថែមទាំងប៉ះពាល់ដល់សុខភាពស្បែក ហើយបង្កទៅជាជំងឺមហារីកស្បែក និងឈានទៅមានគ្រោះថ្នាក់ដល់អាយុជីវិតទៀតផងក៏មានដែរ។

ករណីនេះអ្នកប្រើប្រាស់ជាពិសេសស្រ្តីគួរជ្រើសរើសប្រើផលិតផលណាដែលមានស្លាកសញ្ញាឡូហ្គោក្រុមហ៊ុន កាលបរិច្ឆេទច្បាស់លាស់ត្រឹមត្រូវ និងមានការទទួលស្គាល់ដោយក្រសួងជំនាញដើម្បីចៀសវាងការប៉ះពាល់ដល់សុខភាពរបស់ខ្លួន។ ជាមួយគ្នានេះដែរ អ្នកស្រីក៏បានអំពាវនាវដល់ក្រសួង និងស្ថាប័នមានសមត្ថកិច្ចដែលពាក់ព័ន្ធនឹងរឿងនេះ គួរចាត់វិធានការលើផលិតផលក្លែងក្លាយណាដែលកំពុងចរាចរយ៉ាងសេរីនៅលើទីផ្សារ ជាពិសេសទីផ្សារអនឡាញនេះផង៕