បើសិនលោកអ្នកជាមនុស្សប៉ឹនសង្កេតនោះ លោកអ្នកច្បាស់ជាធ្លាប់ឃើញវត្ថុតូចៗមួយចំនួនដែលអាចនឹងធ្វើឲ្យទើសភ្នែកលោកអ្នកខ្លះមិនខាន ព្រោះវាជារឿងដែលយើងមើលឃើញរាល់ថ្ងៃ តែយើងមិនដែលធ្លាប់ដឹងសោះឡើយថា តើគេធ្វើវាឡើងដើម្បីអ្វី ដូច្នេះថ្ងៃនេះ ទំព័រចំណេះដឹងទូទៅរបស់ «គេហទំព័រឡារ៉ែន» សូមចូលខ្លួនមកជម្រាបជូនមិត្តអ្នកអានថា តើវត្ថុផ្សេងៗដែលយើងឃើញទាំងអស់នោះ គេធ្វើវាឡើងដើម្បីគោលបំណងអ្វី?
1 . រន្ធតូចមួយនៅលើចុងនៃគម្របប៊ិច
មនុស្សជាច្រើនៗតែគិតថា រន្ធតូចមួយដែលនៅលើចុងគម្របប៊ិចនោះ គេធ្វើឡើងដើម្បីធ្វើឱ្យចុងប៊ិចនោះស្ងួតរហូត ឬជាហេតុផលផ្សេងទៀតពាក់ព័ន្ធនឹងសម្ពាធធាតុអាកាស តែការពិតវិញ ហេតុផលពីដំបូងរបស់វាគឺ កាត់បន្ថយភាពប្រថុយប្រថានរបស់ការដកដង្ហើមមិនរួចពេលដែលក្មេងភ្លេចខ្លួនច្រឡំលេបគម្របប៊ិចចូលទៅ ដែលរន្ធនេះនឹងជួយធ្វើឱ្យក្មេងរងគ្រោះនោះអាចដកដង្ហើមរួចក្នុងអំឡុងពេលនាំខ្លួនទៅមន្ទីរពេទ្យហ្នឹងឯង។
2 . រន្ធតូចមួយនៅលើកញ្ចក់បង្អួចយន្តហោះ
ជារន្ធតូចមួយដែលធ្វើឡើងដោយហេតុផល 2ផ្នែក ហេតុផលដំបូងគឺ ដើម្បីបំពេញមកវិញនូវសម្ពាធធាតុអាកាសនៅពេលយន្តហោះហោះកាន់តែខ្ពស់ឡើង ដែលវានឹងមានភាពខុសប្លែកគ្នាច្រើនរវាងសម្ពាធខាងក្នុង និងខាងក្រៅយន្តហោះ និងហេតុផលមួយទៀតគឺ ជួយកុំឱ្យកើតមានចំហាយអ័ព្ធ ឬទឹកកកឡើងស្រអាប់នៅលើកញ្ចក់។
3 . បន្ទះក្រណាត់តូចមួយដែលថែមមកជាមួយខោអាវថ្មីៗ
លោកអ្នកអាចគិតថា វាគឺជាបំណែកបម្រុងទុកសម្រាប់ប៉ះ ឬជួសជុលមែនទេ? ខុសស្រឡះ! ព្រោះអ្នកផលិតតែងតែដាក់គំរូសាច់ក្រណាត់មកជាមួយ ដើម្បីឱ្យលោកអ្នកបានយកទៅសាកល្បងបោកគក់មើលថា តើការបោកគក់វានឹងមានប្រតិកម្មជាមួយខោអាវថ្មីនោះយ៉ាងណាខ្លះ។
4 . ហោប៉ៅខោតូចមួយលើខោខូវប៊យ
ថយត្រឡប់ទៅកាលពីអំឡុងសតវត្សទី 19វិញ ហោប៉ៅតូចមួយនេះត្រូវបានធ្វើឡើងទុកឱ្យបណ្តាជនខូវប៊យ ឬកម្មករអណ្តូងរ៉ែនៅសម័យនោះដែលនិយមចូលចិត្តស្លៀកខោខូវប៊យទុកដាក់នាឡិការបស់ខ្លួននៅក្នុងនោះ ដែលហ្វេស្សឹននេះនៅតែត្រូវបានផលិតឡើងយ៉ាងបន្តបន្ទាប់ រហូតក្លាយជាវប្បធម៌មួយរបស់ខោខូវប៊យទៅហើយ។
5 . ឡេវដែកតូចៗ 3គ្រាប់ នៅត្រង់ហោប៉ៅខោខូវប៊យ
នៅក្នុងសតវត្សទី 19ដដែល នៅពេលកម្មករអណ្តូងរ៉ែតែងតែរអ៊ូរទាំរឿងខោខូវប៊យដែលចេះតែរហែកញឹកញាប់នោះ លោក លីវ៉ាយស៍ ស្ត្រៅស៍ អ្នកបង្កើតម៉ាកខោខូវប៊យ លីវ៉ាយស៍ ក៏រិះរកឃើញឡេវកិបធ្វើពីទង់ដែងដែលហៅថា Rivets នេះឡើង ដើម្បីការពារការសឹករេច និងដាច់រហែករបស់គែមថ្នេរខោហ្នឹងឯង។
6 . រន្ធតូចៗ 2 នៅផ្នែកខាងនៃស្បែកជើង Converse All star
ហេតុផលចម្បងដែលច្បាស់លាស់បំផុតរបស់រន្ធតូចៗនោះគឺ ដើម្បីបញ្ចេញខ្យល់អាកាសកុំឱ្យហប់ក្នុងស្បែកជើង តែមានអ្នកខ្លះគិតថា ពីដំបូង Converse ផលិតស្បែកជើងសម្រាប់លេងបាស្កេត បល ដូច្នេះរន្ធតូចៗនេះអាចធ្វើឡើងជាពិសេសដើម្បីចងថ្ពក់ខ្សែឱ្យស្បែកជើងបាស្កេត បលកាន់តែណែនជាប់ជើងឡើង។
7 . ប្រហោងតូចមួយ និងស្នាមដូចធ្មេញរណានៅត្រង់ចុងខ្សែដន្លាប់ម៉ែត្រ
ប្រហោងតូចនោះមានសម្រាប់ឱ្យលោកអ្នកអាចថ្ពក់ពាក់នឹងក្បាលដែកគោលដើម្បីប្រើវាស់រយៈចម្ងាយបានយ៉ាងជាប់ណែន និងច្បាស់លាស់ ហើយបើសិនគ្មានក្បាលដែកគោលសម្រាប់ថ្ពក់ទេ ក៏លោកអ្នកអាចប្រើកន្លែងដែលមានស្នាមដូចធ្មេញរណានោះគូសនៅលើសម្ភារដែលចង់វាស់នោះ ធ្វើជាសញ្ញាចំណាំដើម្បីវាស់បានផងដែរ។
8 . រន្ធនៅត្រង់ចុងដៃកាន់របស់ឆ្នាំង
ហេតុផលដែលក្រៅអំពីមានសម្រាប់យកទៅព្យួរនៅតាមជញ្ជាំងហើយនោះ លោកអ្នកនៅអាចប្រើរន្ធត្រង់កន្លែងដៃឆ្នាំងនេះសម្រាប់ទុកវែក ឬស្លាបព្រាសម្រាប់កូរម្ហូបអាហារបានទៀតផង។
9 . សញ្ញាព្រួញនៅជាប់នឹងសញ្ញាបង្ហាញចំណុះប្រេងសាំងនៅលើតាប្លូរថយន្ត
លោកអ្នកអាចនឹងមិនធ្លាប់សង្កេតពីមុនមកថា មានរូបសញ្ញាព្រួញតូចមួយនៅម្តុំសញ្ញាបង្ហាញចំណុះប្រេងសាំងនៅលើតាប្លូរថយន្តរបស់លោកអ្នកទេមើលទៅ សញ្ញាព្រួញនេះគឺជាការប្រាប់ពីទីតាំងរបស់ធុងសាំងរបស់រថយន្តលោកអ្នកថា នៅខាងឆ្វេង ឬខាងស្តាំនៃតួរថយន្តហ្នឹងឯង ដែលជួនកាលវាមិនមែនជារូបសញ្ញាព្រួញទេ តែជារូបខ្សែទុយោសាំងជំនួសវិញ។
10 . ស្នាមរួញទឹករលកនៅលើដង្កៀបគាបសក់
ស្នាមទឹករលកនេះជួយប្រាប់ឱ្យអ្នកដឹងថា វាជាផ្នែកដែលត្រូវនៅផ្នែកខាងក្រោមដើម្បីផ្អឹបជាមួយស្បែកក្បាលរបស់អ្នកហ្នឹងឯង ដោយស្នាមរួញទឹករលកនេះនឹងជួយគាបសក់របស់អ្នកឱ្យនៅជាប់បានល្អ។
11 . រន្ធតូចមួយខាងក្រោមមេសោ
បើលោកអ្នកធ្លាប់ផ្ងារមេសោមើល លោកអ្នកនឹងដឹងថា វាមានរន្ធតូចមួយ ដែលរន្ធនេះត្រូវបានធ្វើឡើងដើម្បីជួយបញ្ចេញទឹកដែលចូលទៅកកស្ទះនៅក្នុងមេសោ ព្រោះបើគ្មានរន្ធបង្ហូរទឹកនេះទេ ពេលភ្លៀងធ្លាក់មក ទឹកដែលចូលទៅអាចនឹងធ្វើឱ្យមេសោច្រែះស៊ីនាំឱ្យគាំងប្រើការលែងបាន ក្រៅពីនេះរន្ធនេះនៅត្រូវបានប្រើប្រាស់ក្នុងការបន្តក់ប្រេងម៉ាស៊ីនចូលដើម្បីឱ្យវាធ្វើការបានស្រួលជាប់រហូតទៀតផង។
12 . ដុំរាងដូចថ្មពិលពណ៌ខ្មៅនៅនឹងខ្សែបញ្ចូលភ្លើងរបស់លែបថប់
នេះមិនមែនសម្រាប់ការពារខ្សែភ្លើងបាក់ខាងក្នុងនោះទេ តែវាគឺ ហ្វ៊ើរ៉ៃ ប៊ីត ឬដុំហ្វ៊ើរ៉ៃ ដែលមានសម្រាប់ការពារ ឬជួយត្រងរលកសញ្ញារំខានមិនឱ្យចូលមកក្នុងលែបថប់បាន ដូចជានឹងធ្វើឱ្យអេក្រង់ញាក់ៗ និងភ្លឺភ្លិបភ្លែត ជាដើម។
13 . ស្នាមត្រេតូចមួយនៅលើឃីបតត្រង់តួអក្សរ F និង J
មនុស្សជាច្រើនមិនធ្លាប់ទាំងដឹងផងថា លើឃិបតរបស់យើងមានស្នាមត្រេតូចមួយរាងពកឡើងបន្តិចនៅក្រោមតួអក្សរ F និង J តែអ្នកដែលរៀនវាយអក្សរនឹងដឹងច្បាស់ថា តួអក្សរទាំងពីរនេះជាទីតាំងដែលអ្នកត្រូវដាក់ម្រាមចង្អុលដៃទាំងពីរខាង ដោយស្នាមត្រេតូចៗនេះនឹងជួយឱ្យអ្នកលើកម្រាមចង្អុលដៃមកដាក់ចំកន្លែងដើមវិញ ដោយគ្រាន់តែការប៉ះបន្តិចប៉ុណ្ណោះ។
14 . រន្ធនៅលើបន្ទាត់
កុំទៅគិតអីវែងឆ្ងាយ ព្រោះរន្ធនៅលើចុងបន្ទាត់នេះ មានសម្រាប់ទុកថ្ពក់ព្យួរប៉ុណ្ណោះឯង។
15 . រន្ធតូចមួយនៅជិតកាមេរ៉ាក្រោយរបស់ទូរស័ព្ទដៃ
មនុស្សជាច្រើនអាចសង្កេតឃើញ តែមិនដែលដឹងថា រន្ធនោះមានដើម្បីធ្វើអ្វីឡើយ។ ការពិតទៅវាគឺជាម៉ៃក្រូហ្វូនសម្រាប់ពេលដែលលោកអ្នកថតវីឌីអូដោយបើកកាមេរ៉ាហ្នឹងឯង (ចាប់យកសំឡេងពីខាងក្រោយ)។
16 . បន្ទះផ្លាស្ទិកក្រោមគម្របដប
ដើម្បីការបិទភ្ជិតដែលល្អឥតខ្ចោះ ដូច្នេះក្នុងភេសជ្ជៈប្រភេទខ្លះ ដូចជា ទឹកភេសជ្ជៈដប យើងតែងឃើញមានបន្ទះផ្លាស្ទិកនៅក្រោមគម្របដបនោះ ដែលវាជួយការពារមិនឱ្យទឹកភេសជ្ជៈនោះ ឬហ្កាសរបស់ទឹកភេសជ្ជៈនោះលេច ឬជ្រាបចេញមក។
17 . ផ្នែកពណ៌ខៀវរបស់ជ័រលុប
ទោះជាអ្នកផលិតបានបញ្ជាក់ដោយដាក់រូបស្លាបប៉ាកកានៅលើផ្នែកពណ៌ខៀវរបស់ជ័រលុបក៏ដោយ តែប្រាកដណាស់ថា វាច្រើនតែមានបញ្ហាជាមួយការប្រើលុបទឹកប៊ិច ឬស្លាបប៉ាកកាជាប្រចាំ។ វិធីដែលស័ក្តិសមបំផុតសម្រាប់ការប្រើជ័រលុបខាងពណ៌ខៀវនេះគឺ ប្រើវាសម្រាប់លុបលើក្រដាស់ដែលក្រាស់ និងគ្រើម។
18 . គូទដបដែលខូងចូលក្នុង
មានមនុស្សតិចណាស់ដែលនឹកឆ្ងល់ថា ហេតុអីបានជាគូទដប ជាពិសេសពួកដបស្រាទំពាំងបាយជូរ និងស្រាសំប៉ាញត្រូវតែខូងចូលក្នុងបន្តិច? មនុស្សជាច្រើនជឿថា ដែលគេធ្វើឱ្យវាមានរាងខូងចូលក្នុងបន្តិចនេះគឺ ងាយស្រួលក្នុងការដាក់បញ្ឈរឱ្យនឹង កុំឱ្យឃ្លោងហ្នឹងឯង តែការពិតវិញ វាជាការជួយទប់កម្លាំងសម្ពាធក្នុងអំឡុងពេលរុញឆ្នុកស្នោបិទមាត់ដបចូល ព្រោះផ្នែកខាងៗរបស់ដប និងបាតដបគឺជាចំណុចដែលងាយនឹងប្រេះបែកបំផុត ទើបគេធ្វើឱ្យមានស្នាមខូងដែលទុលឡើងនៅក្នុងដបនោះដើម្បីជួយបំភាយកម្លាំងសម្ពាធនៅក្នុងដបកុំឱ្យបុកមកខាងក្រោមខ្លាំងពេកហ្នឹងឯង៕
