Author: វល័ក្ខ

 ភ្នំពេញៈ បើសិនជាមិនមានអ្វីប្រែប្រួលទេនោះ កម្ពុជានឹងទទួលបានភ្ញៀវទេសចរចិនចំនួន1លាននាក់នៅដំណាច់ឆ្នាំនេះ ដូចនឹងអ្វីដែលជាការព្យាកររបស់ក្រសួងទេសចរណ៍។ លោក ថោង ខុន រដ្ឋមន្រ្តីក្រសួងទេសចរណ៍បានថ្លែងឲ្យដឹងតាមទូរស័ព្ទកាលពីថ្ងៃម្សិលមិញថា តាមការព្យាករ កម្ពុជានឹងទទួលបានភ្ញៀវទេសចរ1លាននាក់នៅដំណាច់ឆ្នាំនេះ ព្រោះគិតត្រឹមរយៈពេល4ខែដើមឆ្នាំនេះ កម្ពុជាទទួលបានភ្ញៀវទេសចរចិនជាង36ម៉ឺននាក់រួចស្រេចទៅហើយ ដោយកើនឡើងជាង30ភាគរយបើធៀបរយៈពេលដូចគ្នាកាលពីឆ្នាំមុន។លោកបន្តថា កំណើនភ្ញៀវទេសចរចិន និងអឺរ៉ុបមិនបានធ្លាក់ចុះទេនៅឆ្នាំនេះទោះជារដូវភ្លៀងធ្លាក់ក៏ដោយ គឺយើងឃើញនៅតែមានកំណើនភ្ញៀវមកពីអឺរ៉ុប និងមកពីប្រទេសចិន និងភ្ញៀវទេសចរមកពីគោលដៅផ្សេងៗទៀតផងដែរ។ ក្រសួងទេសចរណ៍កាលពីឆ្នាំមុនបានដាក់ចេញនូវយុទ្ធសាស្រ្តទាក់ទាញភ្ញៀវទេសចរចិនតាមរយៈការដាក់ចេញនូវសៀវភៅ“ស” ឬChina Readyដើម្បីទាក់ទាញភ្ញៀវទេសចរចិនឲ្យបាន2លាននាក់នៅឆ្នាំ2020ខាងមុខនេះ។ លោក ថោង ខុនបានបន្តថា “ភ្ញៀវទេសចរចិនជាភ្ញៀវចំណាយប្រាក់ច្រើន និងជាភ្ញៀវទេសចរដែលពិភពលោកប្រាថ្នាចង់បាន”។

ភ្ញៀវចិនបាន និងកំពុងនាំមុខភ្ញៀវទេសចរវៀតណាមដែលបានកាន់កាប់ចំណាត់ថ្នាក់លេខ1ជាច្រើនឆ្នាំ។ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងថា ប្រសិនជាកម្ពុជាសម្រេចបាននូវកំណើនបែបនេះ កម្ពុជាពិតជាសម្រេចបាននូវចំនួនភ្ញៀវចិន1លាននាក់នៅដំណាច់ឆ្នាំនេះ ដោយសារមានការភ្ជាប់ជើងហោះហើរត្រង់រវាងប្រទេសទាំងពីរកើនឡើង និងការផ្សព្វផ្សាយពីសក្តានុពលទេសចរណ៍កម្ពុជានៅប្រទេសចិន និងបណ្តាប្រទេសនានាកាន់តែមានសកម្មភាពទូលំទូលាយជាងមុន។ លោកស្រីបន្តថា “ទោះជាយ៉ាងណាវិស័យឯកជនស្នើសុំឲ្យក្រសួងជួយលុបបំបាត់កញ្ចប់ទេសចរណ៍ហ្សេរ៉ូ ដែលធ្វើឲ្យប៉ះពាល់ដល់វិស័យនេះទាំងមូលប្រសិនជាមិនទប់ស្កាត់ទេនោះ”។ កញ្ចប់ទេសចរណ៍ហ្សេរ៉ូមានន័យថា ក្រុមហ៊ុនលក់សេវាកម្មនេះដល់ភ្ញៀវទេសចរមកទស្សនាកម្ពុជា ឬប្រទេសណាមួយដោយមិនយកប្រាក់ចំណេញ ផ្ទុយទៅវិញពេលភ្ញៀវទេសចរមកដល់ ពួកគេនាំភ្ញៀវទេសចរទៅទិញទំនិញ ឬទិញសេវាកម្មផ្សេងៗក្នុងតម្លៃខ្ពស់ក្នុងរូបភាពជាការបោកប្រាស់ភ្ញៀវទៅវិញ៕

 ភ្នំពេញៈ មន្រ្តីជាន់ខ្ពស់អគ្គនាយកដ្ឋានពន្ធដារបានបញ្ជាក់ថា ចាប់ពីថ្ងៃទី1 ខែសីហា ឆ្នាំ2017 ខាងមុខនេះតទៅ រាល់ផលិតផលបារីណាដែលបិទតែមចាស់ នឹងមិនអនុញ្ញាតឲ្យធ្វើចរាចរលក់នៅក្នុងទីផ្សារទៀតទេ។ ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានពន្ធដារលោក គង់ វិបុល បានថ្លែងក្នុងឱកាសចុះពិនិត្យមើលការផលិតបារីនៅក្នុងក្រុមហ៊ុន British American Tobacco Cambodia កាលពីដើមសប្តាហ៍នេះថា គឺជាការចុះពិនិត្យមើលនូវការអនុវត្តតែមបារី ឬតែមសារពើពន្ធដែលក្រសួងសេដ្ឋកិច្ច និងហិរញ្ញវត្ថុបានចេញសេចកី្តប្រកាសនៅខែធ្នូ ឆ្នាំ2016 ដើម្បីឲ្យអនុវត្តនូវការបិទតែមបារីថ្មី(សន្លឹកតែមថ្មី)។ អគ្គនាយកដ្ឋានពន្ធដារបានចេញនូវសារាចរណែនាំមួយស្តីពីការអនុវត្តតែមបារីនៅក្នុងខែមករា ឆ្នាំ2017 គឺមានន័យថា ចាប់ពីខែសីហាខាងមុខ គ្រប់សហគ្រាសដែលផលិតបារីក្នុងស្រុក និងទាំងបារីនាំចូល គឺត្រូវមកទិញសន្លឹកតែមថ្មីយកទៅបិទដែលហៅថា ការអនុវត្តនូវសន្លឹកតែមថ្មី ដោយសន្លឹកតែមចាស់គឺទី1 ពិនិត្យឃើញថាគុណភាពនៃសន្លឹកតែមចាស់អាចក្លែងបន្លំបាន និងងាយស្រួលក្នុងការថតចម្លង ហើយការដាក់ឲ្យអនុវត្តកន្លងទៅនេះ ឃើញថា មិនសូវមានប្រសិទ្ធភាពទេ។ ដូច្នេះទើបក្រសួងសេដ្ឋកិច្ច និងហិរញ្ញវត្ថុធ្វើការកែទម្រង់ក៏ដូចជា អគ្គនាយកដ្ឋានពន្ធដារកែទម្រង់នូវការបោះពុម្ពសន្លឹកតែមថ្មីនេះដើម្បីឲ្យសហគ្រាស និងរោងចក្រទាំងអស់ដែលផលិតបារីនៅក្នុងស្រុក ក៏ដូចជានាំចូលត្រូវតែអនុវត្តការទិញសន្លឹកតែមថ្មីនេះ។លោក គង់ វិបុលបានអំពាវនាវ និងជូនដំណឹងដល់ម្ចាស់សហគ្រាសផលិតបារីក្នុងស្រុកក៏ដូចជាម្ចាស់សហគ្រាសនាំបារីចូល ម្ចាស់ដេប៉ូបារីចែកចាយបន្ត ម្ចាស់ស្តង់លក់បារីក្នុងផ្សារ ម្ចាស់ផ្សារទំនើបទាំងឡាយ សូមមេត្តាចូលរួមក្នុងការបំពេញកាតព្វកិច្ចសារពើពន្ធឲ្យបានត្រឹមត្រូវ ចៀសវាងការលក់បារីទាំងឡាយណាដែលពុំមានបិទតែមប្រីអាករ។តំណាងក្រុមហ៊ុនប្រ៊ីធីស អឺមើរីខិន ថឺប៊ែកខូ ខេមបូឌា លីមីតធីត លោក រតនា បានបញ្ជាក់ថា “សន្លឹកតែមថ្មីនេះមានគុណភាពប្រសើរជាងមុនឆ្ងាយណាស់។ ដូច្នេះមិនមានក្រុមហ៊ុនណាអាចក្លែងបន្លំបាននោះទេ”។ ការចុះពិនិត្យរោងចក្រផលិតបារីខាងលើនេះធ្វើឡើងក្នុងគោលបំណងពង្រឹងការគ្រប់គ្រង និងប្រមូលចំណូលពន្ធ ក៏ដូចជាទប់ស្កាត់ការគេចវេស និងបន្លំពន្ធ។ ក្រសួងសេដ្ឋកិច្ច និងហិរញ្ញវត្ថុបានចេញសារាចរណែនាំសី្តពីការអនុវត្តការប្រើបា្រស់តែមអាករប្រភេទថ្មីសម្រាប់ការបង់អាករពិសេសលើកញ្ចប់បារី៕

ខ្សែប្រយុទ្ធ Alexandre Lacazette របស់ក្លិប Lyon បានបំពេញការពិនិត្យសុខភាពរួចរាល់ជាផ្លូវការ ហើយនៅឯក្លិប Arsenal មុនពេលបំពេញការផ្ទេរមួយទៅកាន់ក្លិបក្នុងទីក្រុងឡុងដ៍មួយនេះក្នុងតម្លៃខ្លួនដែលអាចកើនដល់52លានផោន (ស្មើនឹង67.3លានដុល្លារអាមេរិក)។
ក្លិបកាំភ្លើងធំមួយនេះបានរងនូវការច្រានចោលសម្រាប់ការដេញថ្លៃទិញ Lacazette ជាលើកទី1 ប៉ុន្តែការពិភាក្សាផ្សេងៗបានបន្តធ្វើឡើងទៀត។ តម្លៃខ្លួនរបស់គេដែលអាចកើនដល់52លានផោន បើបូកថែមទាំងប្រាក់ឧបត្ថម្ភផ្សេងៗទៀតផងនោះនឹងបំបែកកំណត់ត្រាលើតម្លៃខ្លួនក្នុងទឹកប្រាក់42.4លានផោនដែលក្លិប Arsenal ធ្លាប់បានចំណាយទិញខ្សែបម្រើ Mesut Ozil កាលពីឆ្នាំ2013 ពីក្លិប Real Madrid។ Lacazette គឺជាអ្នករកគ្រាប់បាល់បានច្រើនជាងគេលំដាប់ទី2ក្នុងក្របខ័ណ្ឌកំពូលបារាំង Ligue 1 កាលពីរដូវកាលមុន ក្រោយពីរកបាន28គ្រាប់។ រូបគេបានស៊ុតបាល់បញ្ចូលទីសរុប129គ្រាប់ ក្នុងការប្រកួត275លើក គឺរាល់យុទ្ធនាការទាំងអស់ចាប់តាំងពីចូលលេងក្នុងក្រុមឈុតធំក្នុងរដូវកាលឆ្នាំ2009-2010។ គ្រាប់បាល់សរុបក្នុងការប្រកួតលីករបស់គេកាលពីរដូវកាលមុន គឺដេញតាមពីក្រោយតែខ្សែប្រយុទ្ធ Edinson Cavani របស់ក្លិប Paris St-Germain មួយប៉ុណ្ណោះ ក្រោយពី Cavani រកបាន35គ្រាប់។

Lacazette ដែលបានបង្ហាញខ្លួនជាអន្តរជាតិចំនួន11លើកសម្រាប់ក្រុមជម្រើសជាតិបារាំង ត្រូវបានទាក់ទងឲ្យផ្ទេរទៅកាន់ក្លិបជាច្រើន និងស្ទើរតែបានចូលរួមជាមួយនឹងក្លិប Atletico Madrid ទៅហើយ មុនពេលក្លិបរបស់អេស្ប៉ាញមួយនេះត្រូវបានជាប់ពិន័យព្យួរមិនឲ្យដោះដូរកីឡាករដោយតុលាការអាជ្ញាកណ្តាលកីឡា។ ខ្សែការពារស្លាបឆ្វេង Sead Kolasinac ដែលបានផ្ទេរមកពីក្លិប Schalke គឺជាកីឡាករចំណូលថ្មីដំបូងគេរបស់ Arsenal ចាប់តាំងពីបញ្ចប់រដូវកាលមុនរួចមក៕
ប្រភពពី៖ BBC

ក្លិប Sevilla នឹងត្រូវបាត់បង់ប្រធានក្រុម Vicente Iborra ដោយសារតែក្លិប Leicester City ក្រោយពីក្លិបរបស់អេស្ប៉ាញមួយនេះ បានប្រកាសកាលពីថ្ងៃអង្គារថា ពួកគេបានយល់ព្រមលក់ខ្សែបម្រើរូបទៅនេះ ទៅឲ្យ Leicester ក្នុងតម្លៃខ្លួន១៤លានអឺរ៉ូ (ស្មើនឹង១៦លានដុល្លារអាមេរិក)។ Iborra វ័យ២៩ឆ្នាំ បានចំណាយពេល៤ឆ្នាំជាំមួយនឹងក្លិប Sevilla ចាប់តាំងពីផ្ទេរមកពីក្លិប Levante កាលពីឆ្នាំ២០១៣ ដោយបានស៊ុតបាល់បញ្ចូលទី៣០គ្រាប់ក្នុងការបង្ហាញខ្លួន១៧២លើក និងបានឈ្នះពាន Europa League ចំនួន៣លើកជាប់ៗគ្នា ហើយរូបគេក៏បានចូលរួមលេងក្នុងក្របខ័ណ្ឌ Champions League ជាមួយនឹង Sevilla ក្នុងយុទ្ធនាការ២លើកចុងក្រោយផងដែរ។

ក្លិបអេស្ប៉ាញមួយនេះ បានបញ្ជាក់ថា Iborra នឹងធ្វើដំណើរទៅកាន់ក្លិប Leicester ដើម្បីត្រួតពិនិត្យសុខភាព នៅមុនពេលចុះហត្ថលេខាលើកុងត្រារបស់គេ និងវិលទៅកាន់ Sevilla វិញ ដើម្បីនិយាយថា លាហើយទៅកាន់អ្នកគាំទ្ររបស់គេ។ Sevilla បានឲ្យដឹងក្នុងសេចក្តីថ្លែងការណ៍មួយថា៖ «Iborra បានបង្ហាញពីឥរិយាបថជាគំរូមក្នុងពេលរូបគេចំណាយពេលនៅក្លិបនេះ និងបានទទួលបានការគោរពជាឯកច្ឆន្ទ និងក្តីស្រឡាញ់ពីរាល់អ្នកគាំទ្ររបស់ក្លិប Sevilla ទាំងអស់»។ ក្លិប Sevilla បានបន្ថែមទៀតថា៖ «ការសម្រេចបានសមិទ្ធផលរបស់គេជាមួយនឹងក្លិបនេះ ពិតជាធំធេងណាស់ ប៉ុន្តែ រូបគេក៏នឹងត្រូវគេចងចាំទៅលើភាពជាអ្នកដឹកនាំរបស់គេទាំងនៅលើ និងក្រៅទីលានផងដែរ»៕
ប្រភពពី៖ Sport24

ដើម្បីអភិវឌ្ឍធនធានមនុស្សនៅកម្ពុជាឱ្យកាន់តែមានភាពល្អប្រសើរ រដ្ឋាភិបាលជប៉ុនបានសម្រេចផ្តល់ហិរញ្ញប្បទានឥតសំណងចំនួន 649លានយ៉េនជប៉ុន ស្មើនឹង 5.77លានដុល្លារអាមេរិកដើម្បីអភិវឌ្ឍធនធានមនុស្សនៅឆ្នាំនេះ និងឆ្នាំខាងមុខ។

ពិធីផ្តល់ជំនួយខាងលើបានធ្វើឡើងនៅទីស្តីការក្រសួងការបរទេស ដោយមានការចុះហត្ថលេខារួមគ្នារវាងឯកឧត្តម ប្រាក់ សុខុន រដ្ឋមន្រ្តីក្រសួងការបរទេស និងឯកឧត្តម horinouchiHidehisa ឯកអគ្គរដ្ឋទូតជប៉ុនប្រចាំនៅកម្ពុជា។ ជំនួយជប៉ុននាពេលនេះគឺក្នុងគោលបំណង 1.ហិរញ្ញប្បទានឥតសំណងក្នុងទឹកប្រាក់ 2.5លានដុល្លារសម្រាប់អនុវត្តគម្រោងអាហារូបករណ៍អភិវឌ្ឍន៍ធនធានមនុស្ស (3ឆ្នាំរំកិល) សម្រាប់ឆ្នាំសិក្សា 2017 និង 2. ហិរញ្ញប្បទានឥតសំណងក្នុងទឹកប្រាក់ចំនួន 3.27លានដុល្លារ សម្រាប់អនុវត្តគម្រោងអាហារូបករណ៍អភិវឌ្ឍន៍ធនធានមនុស្ស សម្រាប់ឆ្នាំសិក្សា 2018។

ឯកឧត្តម ប្រាក់ សុខុន មានប្រសាសន៍ថា នៅឆ្នាំ2000 និស្សិតកម្ពុជារាប់រយនាក់បានទទួល អត្ថប្រយោជន៍ពីគម្រោងនេះដើម្បីបន្តការសិក្សាថ្នាក់ឧត្តម និងក្រោយឧត្តមក្នុងជំនាញទំនាក់ ទំនងអន្តរជាតិ សេដ្ឋកិច្ច ការអភិវឌ្ឍ ការអភិវឌ្ឍច្បាប់ និងតុលាការ ក្នុងចំណោមជំនាញផ្សេងទៀតជាច្រើន។ រហូតមកទល់ឆ្នាំ2016 និស្សិតកម្ពុជាចំនួន 275នាក់បានបញ្ចប់ការសិក្សាពីកម្មវិធីអាហារូបករណ៍នេះ និងបានបម្រើការងារក្នុងវិស័យរដ្ឋ និងឯកជនក្នុងប្រទេសកម្ពុជា៕

ភ្នំពេញ៖ គម្រោងការយកទឹកធ្លាក់ពីវារីអគ្គិសនីភ្នំកំចាយ ខេត្តកំពតដើម្បីផ្គត់ផ្គង់ចែកចាយក្នុងវិសាលភាពគ្របដណ្តប់លើខេត្តចំនួនពីរ គឺខេត្តកំពត និងខេត្តកែប ត្រូវបានឈានដល់ដំណាក់កាលសិក្សាពីសមិទ្ធលទ្ធភាពដោយក្រុមហ៊ុនចិនឈ្មោះ China Energy Engineering Corporation Limited ហើយ។

តំណាងក្រុមហ៊ុនចិនបានធ្វើបទបង្ហាញជូនដល់ថ្នាក់ដឹកនាំក្រសួងឧស្សាហកម្ម និងសិប្បកម្មថា ការអនុវត្តគម្រោងនេះអនុលោមតាមគំនិតផ្តួចផ្តើមរបស់រដ្ឋចិន ស្តីពីគោលនយោបាយផ្លូវមួយខ្សែក្រវាត់មួយដើម្បីជួយដល់ខេត្តពីរដែលជាប់មាត់សមុទ្រឱ្យមានបណ្តាញទឹកស្អាតប្រើប្រាស់ក្នុងគោលដៅសម្រេចជាបណ្តើរៗរហូតដល់ឆ្នាំ2030។ ទាំងអស់នោះក្នុងដំណាក់កាលទី1 នឹងផលិតក្នុងកម្រិត6ម៉ឺនម៉ែត្រគុបក្នុងមួយថ្ងៃ ដំណាក់កាលទី2 ចំនួន 12ម៉ឺនម៉ែត្រគុប និងដំណាក់កាលទី៣ ចំនួន18ម៉ឺនម៉ែត្រគុបក្នុងមួយថ្ងៃ។

ឯកឧត្តមទេសរដ្ឋមន្ត្រី ចម ប្រសិទ្ធ បានសាទរចំពោះលទ្ធផលជាលើកដំបូងនៃការសិក្សាសមិទ្ធលទ្ធភាពនេះ។ តែយ៉ាងណា ឯកឧត្តមបានស្នើឲ្យមានការពិភាក្សាលម្អិតជាងនេះទៅទៀតក្នុងចំណោមអ្នកជំនាញទាំងពីរភាគី ដោយត្រូវចុះទៅពិនិត្យមើលជាក់ស្តែងដល់ទីតាំងអនុវត្តគម្រោង ក្នុងន័យបញ្ចៀសបាននូវផលប៉ះពាល់នានាផ្នែកបរិស្ថាន ក៏ដូចជាសង្គម។ ចំពោះទីតាំងបង្កើតរោងចក្រផលិតទឹកស្អាតនៅខេត្តកំពតមួយ និងនៅខេត្តកែបមួយនេះ ក្រសួង និងអាជ្ញាធរខេត្តនឹងខិតខំដោះស្រាយជូនដើម្បីឱ្យគ្រោងការនេះសម្រេចជោគជ័យបានតាមផែនការ ក្នុងគោលបំណងឱ្យខេត្តកំពត និងកែបទទួលបានការផ្គត់ផ្គង់ទឹកស្អាតដែលនឹងជួយលើកកម្ពស់ថែមទៀតផ្នែកវិស័យទេសចរណ៍ ជំរុញកំណើនសេដ្ឋកិច្ច ក៏ដូចជាទីផ្សារការងារជួយរួមចំណែកដល់ការកាត់បន្ថយភាពក្រីក្ររបស់ប្រជាពលរដ្ឋ៕

 ភ្នំពេញៈ វិស័យឯកជនស្នើរដ្ឋាភិបាលជួយសម្រួលថ្លៃដឹកជញ្ជូន ដែលជាផ្នែកមួយជួយសម្រូល និងដោះស្រាយបញ្ហាប្រឈមក្នុងវិស័យកសិកម្មដែលកំពុងជួបបញ្ហាលើការធ្លាក់ថ្លៃកសិផល។ លោកឧកញ៉ា ភួ ពុយ ប្រធានសម្ព័ន្ធសមាគមរោងម៉ាស៊ីនកិនស្រូវកម្ពុជាបានថ្លែងក្នុងកិច្ចប្រជុំអន្តរក្រសួងដើម្បីដោះស្រាយបញ្ហាប្រឈមក្នុងវិស័យកសិកម្មរយៈពេលវែងនាព្រឹកថ្ងៃទី4 កក្កដានេះថា រដ្ឋាភិបាលគួរជួយសម្រួលថ្លៃដឹកជញ្ជូន តម្លៃទីផ្សារឲ្យបានត្រឹមត្រូវ និងស្នើសុំកុំឲ្យមានការឃាត់ឃាំងពីសមត្ថកិច្ចតាមដងផ្លូវ(កុងត្រូលជជុះ) ព្រមទាំងស្នើសុំឲ្យរដ្ឋាភិបាល និងវិស័យឯកជនបង្កើតសហគមន៍ដើម្បីគ្រប់គ្រងតម្លៃទីផ្សារនៅនឹងកន្លែងដែលជាដំណោះស្រាយសម្រាប់ទីផ្សារអ្នកលក់ និងអ្នកទិញ។ អ្នកជំនាញក្នុងវិស័យនេះក៏បានលើកឡើងដែរថា ប្រព័ន្ធចែកចាយនៅកម្ពុជាមិនអាចឆ្លើយតបនឹងតម្រូវការ និងឆ្លើយតបបានទាន់ពេលវេលានោះទេ ទើបនាំឲ្យមានការនាំចូលពីប្រទេសជិតខាងមកទៀត ដូចជាប្រទេសថៃ និងវៀតណាមជាដើម។ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទលោក វេង សាខុនបានថ្លែងថា កម្ពុជាមានបញ្ហាប្រឈមជាច្រើនលើវិស័យហេដ្ឋារចនាសម្ព័ន្ធ ដូចជា ការដឹកជញ្ជូនមានតម្លៃថ្លៃ អគ្គិសនីនៅកម្ពុជាមានតម្លៃថ្លៃ ដែលធ្វើឲ្យតម្លៃដើមនៃការផលិតរបស់យើងឡើងថ្លៃខ្ពស់ ធ្វើឲ្យមានការលំបាកក្នុងការប្រកួតប្រជែងជាមួយប្រទេសជិតខាង។ លោកបន្តថា លោកបានជួបជជែកជាមួយអ្នកវិនិយោគជាច្រើន ដើម្បីជំរុញឲ្យពួកគេមកវិនិយោគកែច្នៃផលិតផលកសិកម្មកម្ពុជា ប៉ុន្តែដោយសារសេវាកម្មរបស់យើងនៅស្មុគស្មាញ តម្លៃអគ្គិសនីថ្លៃ ពិបាកក្នុងការដឹកជញ្ជូន បានធ្វើឲ្យពួកគេសម្រេចចិត្តវិនិយោគនៅប្រទេសជិតខាងវិញ ជាជាងជ្រើសរើសមកវិនិយោគនៅកម្ពុជា។ លោកបន្តថា “បើធៀបជាមួយប្រទេសជិតខាង ការដឹកជញ្ជូនតាមផ្លូវគោក តាមកំពង់ផែរបស់យើង គឺមានតម្លៃថ្លៃបើធៀបជាមួយប្រទេសជិតខាង ដែលធ្វើឲ្យតម្លៃដើមរបស់យើងថ្លៃ មិនអាចប្រកួតប្រជែងជាមួយគេបាន”៕

 ភ្នំពេញៈ មន្រ្តីជាន់ខ្ពស់ក្រសួងទេសចរណ៍បានថ្លែងថា កម្ពុជាត្រូវការធនធានមនុស្ស20ម៉ឺននាក់បន្ថែមទៀតត្រឹមដំណាច់ឆ្នាំ2020ខាងមុខដើម្បីឆ្លើយតបនឹងតម្រូវការក្នុងវិស័យនេះ។ រដ្ឋមន្រ្តីក្រសួងទេសចរណ៍លោក ថោង ខុន បានថ្លែងឲ្យដឹងតាមទូរស័ព្ទកាលពីថ្ងៃម្សិលមិញថា បច្ចុប្បន្នវិស័យទេសចរណ៍បានស្រូបយកកម្លាំងពលកម្មដោយផ្ទាល់ប្រមាណ62ម៉ឺននាក់ ប៉ុន្តែបើគិតទាំងវិស័យដឹកជញ្ជូនដែលពាក់ព័ន្ធនឹងវិស័យនេះផងនោះ គឺវិស័យនេះបានស្រូបយកកម្លាំងពលកម្មជាង1លាននាក់ឯណោះ ហើយនៅឆ្នាំ2020ខាងមុខនេះ កម្ពុជាត្រូវការធនធានមនុស្សក្នុងវិស័យនេះ20ម៉ឺននាក់បន្ថែមទៀត គឺមួយឆ្នាំត្រូវការបណ្តុះបណ្តាលធនធានមនុស្ស5ម៉ឺននាក់ ប៉ុន្តែយើងមិនមានសាលាគ្រប់គ្រាន់ដើម្បីបណ្តុះបណ្តាលធនធានមនុស្សទាំងនេះទេ ដែលវាទាមទារឲ្យវិស័យឯកជនចូលរួម។ លោកបន្តថា បច្ចុប្បន្នយើងមានសាលាធ្វើម្ហូបស្វ៊ីសកំពុងជួយបណ្តុះបណ្តាលធនធានមនុស្សផ្នែកចុងភៅ និងសាលាមួយចំនួនទៀត ខណៈសាលាដែលស្ថិតនៅក្រោមក្រសួងទេសចរណ៍មិនទាន់បានដាក់ឲ្យដំណើរការនៅឡើយ តែទន្ទឹមគ្នានេះក្រសួងកំពុងធ្វើតេស្តលើជំនាញរបស់អ្នកធ្វើការក្នុងវិស័យនេះ ដើម្បីប្រគល់វិញ្ញាបនបត្រទទួលស្គាល់ដល់ពួកគេ មុនពេលពួកគេដាក់ពាក្យដើម្បីទទួលបានការវាយតម្លៃពីគណៈកម្មការជំនាញ ដើម្បីបញ្ជាក់ពីគុណវុឌ្ឍិរបស់ពួកគេថា អាចមានសមត្ថភាពធ្វើការក្នុងតំបន់អាស៊ានបាន។ រដ្ឋមន្រ្តីក្រសួងទេសចរណ៍បានបន្តថា “ការធ្វើការងារក្នុងវិស័យទេសចរណ៍ទាល់តែមានជំនាញ អត់ជំនាញធ្វើការងារមិនបានទេ ហេតុនេះធនធានមនុស្សមានគុណវុឌ្ឍិពិតមានសារៈសំខាន់ណាស់ ដើម្បីផ្តល់សេវាកម្មពាក់ព័ន្ធនឹងវិស័យនេះឱ្យមានគុណភាព”។ សហប្រធានក្រុមការងារវិស័យឯកជនលោកលូ ម៉េងបានទទួលស្គាល់បញ្ហានេះ ដោយលោកបានមានប្រសាសន៍ថា ធនធានមនុស្សក្នុងវិស័យនេះពិតជានៅមានបញ្ហាប្រឈមច្រើន ពិសេសជំនាញផ្នែកចុងភៅ ដែលជាជំនាញត្រូវការកម្លាំងពលកម្មច្រើន ប៉ុន្តែយុវជនកម្ពុជាមិនសូវចូលចិត្តរៀនជំនាញទាំងនេះទេ ដោយសារពួកគេគិតថា ជាការងារមិនល្អ ប៉ុន្តែតាមពិតវាជាជំនាញមួយដែលទទួលបានប្រាក់ខែច្រើន និងមិនទាមទាររយៈពេលបណ្តុះបណ្តាលវែងទៀតផង៕

ក្រោយពីក្រុមហ៊ុនបច្ចេកវិទ្យាទូរស័ព្ទជាច្រើនចាប់ផ្ដើមមានស្មាតហ្វូនស្ទើរតែគ្មានគែមអេក្រង់ និង Home Button ចេញនៅលើផ្នែកខាងមុខរួចមកនោះ ថ្មីៗនេះមានព័ត៌មានបែកធ្លាយមកថា Sony ក៏កំពុងត្រៀមនឹងបង្ហាញសមិទ្ធផលថ្មីមួយនៅក្នុងព្រឹត្តិការណ៍តាំងពិព័រណ៍ IFA នៅចុងឆ្នាំនេះ ដែលវាប្លែកពីទូរស័ព្ទជំនាន់មុនៗ ហើយអាចឱ្យអ្នកគាំទ្រមានការភ្ញាក់ផ្អើលខ្លាំងទៀតផង។
យោងតាមបណ្តាញសង្គមដ៏ធំបំផុតរបស់ចិន Weibo បានចុះផ្សាយថា ក្រុមហ៊ុនបច្ចេកវិទ្យាជប៉ុននេះ កំពុងត្រៀមបង្ហាញស្មាតហ្វូនស៊េរីថ្មីមួយដែលស្ទើរតែគ្មាន Bezel-Less អេក្រង់ទំហំ 6 អ៊ីញប្រភេទ LCD ជាមួយនឹងកម្រិត Aspect Ratio 18:9 នៅក្នុងព្រឹត្តិការណ៍តាំងពិព័រណ៍ IFA ចុងឆ្នាំនេះ។

Sony ក៏ធ្លាប់មានស្មាតហ្វូនមានគែមឆ្វេង/ស្ដាំ ស្ដើងជាច្រើនម៉ូដែលមកហើយដែរ ដែលរួមមាន Xperia XZ Premium, Xzs, XA1 និង XA1 Ultra គ្រាន់តែស្មាតហ្វូនទាំងនេះ នៅមានសល់គែមនៅផ្នែកលើ និងផ្នែកក្រោមច្រើនប៉ុណ្ណោះ។ យ៉ាងណាមិញ ប្រសិនបើព័ត៌មានខាងលើក្លាយជាការពិតមែន Sony នឹងក្លាយជាក្រុមហ៊ុនថ្មីមួយទៀតបន្ទាប់ពី Xiaomi និង Sharp ដែលប្រកាសចេញស្មាតហ្វូន និងអេក្រង់គ្មានគែមដ៏ស្ដើងគួរឱ្យចាប់អារម្មណ៍សម្រាប់សម័យបច្ចេកវិទ្យាក្នុងឆ្នាំ 2017 នេះមិនខាន៕