Author: វល័ក្ខ

STEM និងមធ្យមបច្ចេកទេស ជាជំនាញដែលកំពុងមានទីផ្សារនៅកម្ពុជា
វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា (STEM) និងមធ្យមបច្ចេកទេសជាមុខជំនាញមួយដែលកំពុងមានទីផ្សារនៅកម្ពុជា នេះបើយោងតាមការលើកឡើងរបស់អ្នកជំនាញអប់រំ និងការងារនៅកម្ពុជា។
ឯកឧត្តម ហង់ ជួនណារ៉ុន បានលើកឡើងថា មុខវិជ្ជា STEM ជាមុខវិជ្ជាមួយដែលកំពុងមានទីផ្សារនៅកម្ពុជា ហើយមុខវិជ្ជានេះផងដែរក៏ជាមុខវិជ្ជាសំខាន់មួយសម្រាប់ការអភិវឌ្ឍប្រទេសនាថ្ងៃអនាគត។ អាជីពដែលកម្ពុជាកំពុងត្រូវការខ្លាំង និងមានទីផ្សារនោះគឺ ជំនាញបច្ចេកទេសកុំព្យូទ័រ និងវិស្វកម្ម ជាដើម។ ក្រៅពីនេះមានជំនាញមួយចំនួនទៀតដែលមិនមែនជាជំនាញបច្ចេកទេសទេ ប៉ុន្តែយុវជនត្រូវតែរៀនឱ្យចេះច្បាស់ ព្រោះប្រសិនបើរៀនមិនបានច្បាស់ទេនោះ ទោះក្នុងជំនាញណាក៏មិនអាចរកការងារល្អបានដែរ តែបើរៀនចេះច្បាស់ ទោះក្នុងជំនាញណាក៏អាចរកការងារល្អបានយ៉ាងពិតប្រាកដ។
ស្រដៀងគ្នានេះដែរ ឯកឧត្តម ពេជ សោភ័ន រដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា សិស្សនៅកម្ពុជាពេលបច្ចុប្បន្ននេះមានជម្រើសច្រើនណាស់សម្រាប់ការកំណត់អាជីពនាពេលអនាគត។ សិស្សដែលបានប្រឡងជាប់មធ្យមសិក្សាទុតិយភូមិក្តី មិនជាប់ក្តី អាចដាក់ពាក្យសុំចូលរៀនជំនាញបច្ចេកទេសលើមុខវិជ្ជាជាច្រើនដែលកម្ពុជាកំពុងត្រូវការ។ នាពេលបច្ចុប្បន្ននេះកម្ពុជាកំពុងត្រូវការពលកម្មជំនាញមធ្យមច្រើន ហើយការសិក្សាជំនាញបច្ចេកទេសកម្រិតមធ្យមនេះ មិនចាំបាច់ទាមទារឱ្យសិស្សមានបាក់ឌុបនោះទេ។
ឯកឧត្តមបានបន្តថា ពលកម្មជំនាញមធ្យម ឬកម្មករជំនាញនាពេលបច្ចុប្បន្ននេះ អាចទទួលបានប្រាក់ខែខ្ពស់ ហើយក៏ជាមុខជំនាញមួយដែលសង្គមកំពុងតែត្រូវការដែរ។ មានអ្នកខ្លះធ្វើការបានប្រាក់ខែខ្ពស់ហើយទើបបន្តយកវិស្វករក៏មានដែរ៕
July 6, 2017
ROG Swift PG248Q អេក្រង់កុំព្យូទ័រថ្មី ពិសេសបំផុតសម្រាប់អ្នកចូលចិត្តលេងហ្គេម
កាលពីខែមុនក្រុមហ៊ុន Asus នៅកោះតៃវ៉ាន់បានធ្វើការបើកសម្ពោធនូវកុំព្យូទ័រ និងឧបករណ៍បច្ចេកវិទ្យា រួមបញ្ចូលទាំងអេក្រង់កុំព្យូទ័រថ្មីមួយដែលផ្ដោតជាពិសេសសម្រាប់កំពូលអ្នកលេងហ្គេម ម៉ូដែល ROG Swift PG248Q ទំហំ 24.5 អ៊ីញ មាន Aspect Ratio 16 : 9 អាចបង្ហាញរូបភាពកម្រិត Full HD 1920×1080 ភិកសេល។
អេក្រង់មួយនេះត្រូវបានផលិតឡើងយ៉ាងប្រណីតបែប Gamer ជាមួយនឹងការបំពាក់បច្ចេកវិទ្យា NVIDIA® G-SYNC™ Technology ផ្តល់ជូននូវកម្រិតភាពច្បាស់ល្អឥតខ្ចោះ ជាពិសេសវាមានសមត្ថភាពទ្រទ្រង់ជាមួយនឹងបច្ចេកវិទ្យា NVIDIA® 3D LightBoostTM Technology ធ្វើឱ្យមានទំនុកចិត្តក្នុងការបញ្ជា និងលេងហ្គេមបែប 3D ដែលអាចដំណើរការបានយ៉ាងរលូន ខណៈមាន Overclock refresh rate ដល់ល្បឿន 180Hz ជាមួយនឹង Response time ត្រឹមតែ1ms។ ក្នុងនោះ វាក៏មានរន្ធតភ្ជាប់ជាច្រើន ដូចជាតាមរយៈរន្ធ HDMI ចំនួន 2 រន្ធUSB 3.0 ចំនួន 2 ដែលអាចប្រើសម្រាប់សាកថ្មទូរស័ព្ទ និងឧបករណ៍ដទៃទៀត៕
July 6, 2017
ឥណ្ឌូនេស៊ី នឹងរៀបចំពិព័រណ៍ពាណិជ្ជកម្មនៅកម្ពុជានៅចុងសប្តាហ៍នេះ
ភ្នំពេញៈ ស្ថានទូតឥណ្ឌូនេស៊ីប្រចាំកម្ពុជា នឹងរៀបចំពិព័រណ៍ពាណិជ្ជកម្ម និងទេសចរណ៍រយៈពេល 3ថ្ងៃ នៅទីក្រុងភ្នំពេញនាចុងសប្តាហ៍នេះ ជាមួយនឹងវត្តមានក្រុមហ៊ុនមកពីឥណ្ឌូនេស៊ីកាន់តែច្រើនជាងមុនចូលរួម។
យោងតាមសេចក្តីប្រកាសព័ត៌មានរបស់ស្ថានទូតឥណ្ឌូនេស៊ីប្រចាំកម្ពុជាដែលបានផ្ញើជូនបណ្តាញសារព័ត៌មាននាព្រឹកថ្ងៃទី5 កក្កដា បានឲ្យដឹងថា ពិព័រណ៍ពាណិជ្ជកម្មនេះ នឹងធ្វើឡើងរយៈពេល 3ថ្ងៃចាប់ពីថ្ងៃទី7 ដល់ទី9 កក្កដា នៅសាលពិព័រណ៍កោះពេជ្រ។ ពិព័រណ៍ពាណិជ្ជកម្ម និងផ្សព្វផ្សាយទេសចរណ៍នេះ នឹងមានក្រុមហ៊ុនឥណ្ឌូនេស៊ីជាង 50មកចូលរួមតាំងបង្ហាញផលិតផល និងស្វែងរកដៃគូពាណិជ្ជកម្មនៅកម្ពុជា។
តាមការគ្រោងទុក ពិព័រណ៍នេះនឹងមានការចូលរួមពីរដ្ឋមន្រ្តីក្រសួងពាណិជ្ជកម្មកម្ពុជា ឯកឧត្តមប៉ាន សូរស័ក្តិ និងឯកអគ្គរដ្ឋទូតសាធារណរដ្ឋឥណ្ឌូនេស៊ីប្រចាំកម្ពុជា ឯកឧត្តមពីតូណូ ពឺណូម៉ូផងដែរ។ ទំហំពាណិជ្ជកម្មរវាងប្រទេសទាំងពីរមានកំណើនយឺតៗ ដោយកាលពីឆ្នាំមុន ទំហំពាណិជ្ជកម្មកម្ពុជា និងឥណ្ឌូនេស៊ីមានទំហំទឹកប្រាក់ប្រមាណតែ 250លានដុល្លារអាមេរិកប៉ុណ្ណោះ។
សេចក្តីប្រកាសព័ត៌មានដដែលបានបន្តថា ពិព័រណ៍ពាណិជ្ជកម្មនេះ ជាឱកាសដ៏មានសក្តានុពលដែលអាចធ្វើឲ្យឥណ្ឌូនេស៊ីសម្លឹងរកទីផ្សារនាំចូលផលិតផលជាច្រើនពីឥណ្ឌូនេស៊ីមកកម្ពុជា ដូចជាគ្រឿងបន្លាស់រថយន្ត ប្រេងរំអិល ម្ហូបអាហារ សម្លៀកបំពាក់ និងសេវាកម្មទាក់ទងសុខភាពជាដើម។ ក្នុងពិព័រណ៍នេះ ក៏មានការចូលរួមផងដែរពីសាកលវិទ្យាល័យនាំមុខល្បីៗពីឥណ្ឌូនេស៊ីដើម្បីផ្តល់ព័ត៌មាន និងឱកាសដល់និស្សិតកម្ពុជា ដែលចង់បានអាហារូបករណ៍ និងទៅសិក្សានៅឥណ្ឌូនេស៊ី។
ក្នុងពិព័រណ៍ពាណិជ្ជកម្ម និងផ្សព្វផ្សាយទេសចរណ៍ឥណ្ឌូនេស៊ីនៅកម្ពុជារយៈពេល3ថ្ងៃនេះ ពិព័រណ៍នឹងប្រមូលបានថវិកាជាង15ម៉ឺនដុល្លារអាមេរិកផងដែរពីការលក់ផលិតផលនានានៅក្នុងឱកាសនោះ៕
July 6, 2017
បច្ចេកទេសថី្ម! ដាំត្រសក់លើដី20អាប្រមូលផលបានជិត100ដុល្លារក្នុងមួយថ្ងៃ
ការដាំត្រសក់លក់ជាមុខរបររបស់កសិករដែលមានជាយូរលង់មកហើយ តែដោយសារកង្វះបច្ចេកទេស ទើបកសិករភាគច្រើនមិនសូវទម្លាប់ដាំធ្វើជាអាជីវកម្មនោះទេ បានត្រឹមតែដាំទុកទទួលទានក្នុងក្រុមគ្រួសារប៉ុណ្ណោះ។ ប៉ុន្តែសម្រាប់បច្ចេកទេសថ្មីនេះ អាចជួយឱ្យកសិករដាំត្រសក់បានផលយ៉ាងមិននឹកស្មានដល់ ពោលគឺមានដីត្រឹមតែ 20អា តែគាត់អាចបេះផ្លែលក់បានមួយថ្ងៃដល់ទៅជិត 100ដុល្លារឯណោះ។
កសិករគំរូគឺ អុំស្រី ផ្លុង សុភាព ដែលដាំត្រសក់ចំណារនៅក្នុងភូមិពន្លឺ ឃុំជម្រះពេន ស្រុកសំរោង ខេត្តតាកែវមានប្រសាសន៍ថា ដើមឡើយគ្រួសារគាត់ និងគ្រួសារអ្នកភូមិដទៃទៀតមិនចាប់អារម្មណ៍ដាំត្រសក់តាមបែបបច្ចេកវិទ្យាថ្មីនេះទេ ទើបតែរយៈពេលប៉ុន្មានឆ្នាំកន្លងទៅនេះ មានអ្នកជំនាញអង្គការក្រៅរដ្ឋាភិបាលចុះមកបង្រៀនកសិករដោយផ្ទាល់ដល់ក្នុងភូមិ ហើយកសិករភាគច្រើនមិនបានចាប់អារម្មណ៍លើគម្រោងដាំត្រសក់នេះទេ តែក៏មានគ្រួសារអ្នកភូមិមួយចំនួនទទួលយកគម្រោងនេះដែរ។ ដូចជាគ្រួសារអុំស្រីជាដើម ដោយសារមានទឹកត្រពាំងនៅខាងក្រោយផ្ទះស្រាប់ ក៏ចាប់ផ្តើមដាំត្រសក់ចំណារនេះតាមការណែនាំរបស់អ្នកបច្ចេកទេសរបស់អង្គការខាងលើ ហើយអ្វីដែលពួកគាត់នឹកស្មានមិនដល់នោះគឺ វាឆាប់ឱ្យផ្លែមែនទែន ដាំតែ 25ថ្ងៃ វាក៏ចេញផ្កា និងផ្លែតែម្តង។ នៅលើផ្ទៃដី20អា វាឱ្យផលក្នុងមួយថ្ងៃពីជាង 200គីឡូក្រាមទៅជាង 300គីឡូក្រាម និងត្រូវបេះវាព្រឹកល្ងាច ហើយនៅពេលណាដែលត្រសក់បានថ្លៃខ្ពស់ អាចលក់បាន 1,200 ទៅ 1,300រៀលក្នុងមួយគីឡូក្រាម តែបើត្រសក់ធ្លាក់ថ្លៃវិញ លក់បានចន្លោះពី 800ទៅ 900រៀលតែប៉ុណ្ណោះ។ គាត់ថាត្រសក់អោយផល ចាប់ពីពេលបេះរហូតដល់អស់ផ្លែទៅវិញមានរយៈពេល 1ខែ ឬលើសពីនេះ។
លោក ង៉ែត សូទ្រី អនុប្រធានរដ្ឋបាលសាលាស្រុកសំរោង និងជាប្រធានគម្រោងអភិវឌ្ឍន៍កសិកម្ម និងជំរុញកំណើនសេដ្ឋកិច្ចរបស់អង្គការ IDE ដែលបានចុះទៅបង្រៀនកសិករមានប្រសាសន៍ឱ្យដឹងពីបច្ចេកទេសដាំដុះនេះថា បើសិនជាកសិករថែទាំវាបានល្អ ត្រឹមរយៈពេល 25ថ្ងៃ វានឹងឱ្យផលបណ្តើរៗហើយ និងអាចបេះបានរហូតដល់1ខែ ឬជាង1ខែទើបវាអស់ទៅវិញ រួចកសិករគ្រាន់តែកាត់ដើមចោលហើយ ក៏អាចដាំវាជាលើកទី 2បានទៀតតែម្តង។
ចំពោះបច្ចេកទេសដាំដុះ គាត់ត្រូវយកគ្រាប់ពូជឈ្មោះ ហាភីស៊ី (នាំចូលពីប្រទេសថៃ តាមយៈអង្គការហាភីស៊ី) ទៅហាលថ្ងៃ15នាទីដើម្បីដាស់ដំណេក និងយកទៅបណ្តុះនៅក្នុងត្រេ (ឧបករណ៍បណ្តុះគ្រាប់ដំណាំ) រយៈពេលប្រហែល 1សប្តាហ៍ ត្រសក់នឹងចាប់ផ្តើមដុះចេញស្លឹកមួយឬពីរ។
លោកបន្តថា មុននឹងយកកូនត្រសក់ទៅដាក់ដាំ កសិករត្រូវភ្ជួរដីហាលចោលរយៈពេលមួយសប្តាហ៍ទើបលើកជារង ហើយឆូតចំកណ្តាលរងដើម្បីបាចកំបោរ-សដើម្បីសម្លាប់មេរោគ និងការពារសត្វល្អិតនៅក្នុងដី ពេលបាចហើយយើងភ្ជួរដីលុបកំបោរ-សនោះទៅវិញ ទើបគេយកផ្ទាំងកៅស៊ូមកគ្របពីលើរងនីមួយៗកុំឱ្យស្មៅដុះ និងដើម្បីរក្សាសំណើមឱ្យបានយូរ រួចហើយគេចោះរន្ធកៅស៊ូយកឬស្សីមកដោតដើម្បីចងសំណាញ់ឱ្យត្រសក់វាវារឡើង (មាននៅក្នុងរូប) រួចទើបរាយទុយោដើម្បីងាយស្រួលបន្តក់ទឹកតាមគល់នីមួយៗ។ ពេលរៀបចំកសិដ្ឋានរួចហើយ គេយកកូនត្រសក់មកដាក់ដាំតាមចន្លោះកៅស៊ូនោះ ហើយបន្តក់ទឹកជាប្រចាំមួយថ្ងៃ 2ដង នោះត្រសក់នឹងដុះលូតលាស់ល្អ តែបើមិនសូវល្អគេអាចយកជីអ៊ុយរ៉េមួយស្លាបព្រាទៅដាក់ជិតកន្លែងបូមទឹកដើម្បីឱ្យម៉ាស៊ីនបូមទឹក បូមទឹកដែលមានជីទៅស្រោចស្រពនៅតាមគល់ដើមត្រសក់នីមួយៗ។
លោកបញ្ជាក់ថា សម្រាប់កសិករគឺ រៀបចំកសិដ្ឋានតែម្តង អាចដាំបានច្រើនដងអាស្រ័យលើការថែទាំរបស់គាត់ ប៉ុន្តែយកល្អគេត្រូវដាំដំណាំឆ្លាស់គ្នា ដើម្បីរក្សាដីឱ្យនៅមានជីជាតិបានយូរ។ សម្រាប់គម្រោងដាំត្រសក់នេះកសិករមិនបាច់បារម្ភពីកង្វះទីផ្សារទេ បើសិនមិនមានម៉ូយមកទិញ អង្គការនឹងមកទិញយកដោយឱ្យតម្លៃមិនទាបជាងទីផ្សារឡើយ៕
July 6, 2017
លាងសម្អាតបន្លែ ផ្លែឈើតាមរបៀបនេះ នឹងកាត់បន្ថយជាតិគីមីបានរហូតដល់ 92%
ក្រុមអ្នកជំនាញខាងអនាម័យចំណីអាហារអន្តរជាតិ បានធ្វើការណែនាំឱ្យធ្វើការលាងសម្អាតបន្លែ ផ្លែឈើមុននឹងនាំយកទៅធ្វើជាម្ហូបអាហារដោយវិធីបែបងាយៗ និងសន្សំសំចៃគឺ ត្រាំទឹកទុកចោល 10 – 15 នាទី រួចហើយលាងសម្អាតដោយទឹកហូរ (បើកទឹកពីក្បាលចំពួយដើម្បីលាង) រយៈពេល 2 នាទី នឹងជួយកាត់បន្ថយសារធាតុគីមី ដែលនៅជាប់សេសសល់លើបន្លែផ្លែឈើទាំងនោះបានច្រើនដល់ទៅ 92 % ឯណោះ។
ចំណុចណែនាំក្នុងការជ្រើសរើសទិញបន្លែស្រស់ដែលស្អាត និងសុវត្ថិភាព មានដូចតទៅ…
1 . ជ្រើសរើសទិញបន្លែស្រស់ដែលស្អាត គ្មានជាប់ស្នាមកំណកដី ឬស្នាម-សៗរបស់សារធាតុថ្នាំកម្ចាត់សត្វល្អិត ឬក្លិនឈួលខុសប្រក្រតី និងជ្រើសរើសយកបន្លែស្រស់ណាដែលមានស្នាមខាំស៊ីរបស់ដង្កូវ និងសត្វល្អិត។
2 . ជ្រើសរើសញ៉ាំបន្លែ ផ្លែឈើតាមរដូវកាល ដោយសារតែបន្លែផ្លែឈើដែលដាំបានតាមរដូវកាលមានឱកាសរីកលូតលាស់បានល្អជាងក្រៅរដូវកាល ដែលធ្វើឱ្យមិនសូវមានការប្រើសារធាតុគីមី និងជីប៉ុន្មានឡើយ។
3 . ជ្រើសរើសបរិភោគបន្លែដែលដាំក្នុងភូមិ ដូចជា ម្ជុលភ្នំ ស្លឹកព្រិច ស្លឹករងាង ត្រួយរាំង ត្រួយបន្លែផ្អែម ស្លឹកញ ត្រួយកន្ទុំទេស ត្រួយអង្គារដី ឬបន្លែដែលអាចដាំបានដោយខ្លួនឯងងាយ។
4 . មិនបរិភោគតែបន្លែប្រភេទណាមួយជាប្រចាំ តែគួរបរិភោគឱ្យបានច្រើនយ៉ាងផ្លាស់ប្តូរគ្នា ដើម្បីទទួលបានប្រយោជន៍គ្រប់ខាងផ្នែកភោជនាហារ និងចៀសវាងការទទួលសារធាតុពុល។
ទាំងអស់នេះ បើមិនប្រាកដក្នុងចិត្តថា បន្លែស្រស់ និងផ្លែឈើដែលទិញមកបរិភោគនោះមានសុវត្ថិភាពពីសារធាតុគីមីឬក៏អត់នោះ? វិធីលាងសម្អាតយ៉ាងត្រឹមត្រូវបែបងាយៗ និងមានប្រសិទ្ធភាពនោះ គឺការដាក់ត្រាំទឹកទុកចោល 10 – 15 នាទី រួចហើយលាងដោយទឹកហូររយៈពេល 2 នាទីទៀត។ វិធីនេះទទួលបានការអះអាងដោយលទ្ធផលនៃការស្រាវជ្រាវរបស់ក្រុមអ្នកជំនាញខាងសុវត្ថិភាពនៃផលិតផលកសិកម្មថា អាចលាងជម្រះសារធាតុគីមី និងជាតិថ្នាំសម្លាប់សត្វល្អិតដែលនៅសេសល់ជាប់នឹងបន្លែ ផ្លែឈើស្រស់ទាំងនោះបានច្រើនដល់ទៅ 92 % ឯណោះ៕
July 6, 2017
ក្រោយបញ្ចប់ការសិក្សាអ្នកនឹងមិនខកចិត្តទេ បើសិនអនុវត្តគោលការណ៍ខាងក្រោមនេះ
នាពេលបច្ចុប្បន្ន មាននិស្សិតជាច្រើនរអ៊ូថា ខ្វះការងារធ្វើ ឬមិនអាចស្វែងរកការងារឱ្យត្រូវជំនាញបាន ខណៈនិស្សិតមួយចំនួនទៀតកំពុងតែស្ថិតក្នុងស្ថានភាពប្រទាញប្រទង់ដែលមានស្ថាប័នជាច្រើនសុទ្ធតែទាក់ទងចង់ឱ្យគាត់ទៅជួយ។ ស្ថានភាពជាក់ស្តែងទាំងនេះ បង្ហាញឱ្យឃើញពីគម្លាតសមត្ថភាព និងការស្វែងរកឱកាសការងាររបស់ប្រជាជននៅកម្ពុជា។
ខាងក្រោមនេះ ជាវិធីមួយចំនួនដើម្បីកុំឱ្យខកចិត្តក្រោយពេលបញ្ចប់ការសិក្សាថ្នាក់មហាវិទ្យាល័យ៖
1.ធ្វើការងារហាត់ការ និងការងារស្ម័គ្រចិត្ត
មនុស្សមួយចំនួនគិតថា ការងារស្ម័គ្រចិត្តជារឿងដែលមិនមានប្រយោជន៍ ព្រោះវាមិនមែនជាការងារជាប់លាប់ ហើយបានប្រាក់កម្រៃដើម្បីឆ្លើយតបជាមួយនឹងកម្លាំងពលកម្មតិចតួច តែតាមពិត ការងារស្ម័គ្រចិត្តជាឈ្នាន់ដ៏សំខាន់មួយដើម្បីឆ្ពោះទៅរកភាពជាអ្នកស្ទាត់ជំនាញក្នុងការងារសំខាន់ៗជាច្រើន។ នៅគ្រប់ប្រកាសជ្រើសរើសបុគ្គលិកសុទ្ធតែមានដាក់ថា ត្រូវការមនុស្សដែលមានបទពិសោធយ៉ាងតិចបំផុត 1ឆ្នាំ។ ត្រង់ចំណុចនេះឯង ដែលនិស្សិតដែលធ្លាប់បានធ្វើការងារហាត់ការមានប្រៀប និងអាចដាក់ពាក្យប្រកបដោយទំនុកចិត្តជាមួយនឹងបទពិសោធដែលខ្លួនបានមកពីការងារហាត់ការ និងស្ម័គ្រចិត្តនៅតាមស្ថាប័ននានានោះ។
2.ពង្រឹងជំនាញទំនាក់ទំនង
មនុស្សដែលមានសមត្ថភាព ហើយមានការងារល្អ ឬអាជីវកម្មជោគជ័យបន្ទាប់ពីបញ្ចប់ការសិក្សានៅថ្នាក់មហាវិទ្យាល័យ មិនមែនសុទ្ធតែជាអ្នកដែលរៀនបានលេខ1គ្រប់គ្នានោះទេ តែពួកគេសុទ្ធតែមានលក្ខណសម្បត្តិមួយដូចគ្នា គឺមានទំនាក់ទំនងល្អ។ ដូចដែលបានបង្ហាញនៅក្នុងចំណុចខាងលើហើយថា និស្សិតគួរតែធ្វើការងារហាត់ការ ឬការងារស្ម័គ្រចិត្តដែលត្រូវនឹងជំនាញរបស់ខ្លួន ព្រោះគុណសម្បត្តិរបស់វាអាចធ្វើឱ្យពួកគេទទួលបានទាំងបទពិសោធ និងទំនាក់ទំនងល្អជាមួយនឹងស្ថាប័នការងារ។ នៅពេលដែលពួកគេមានទំនាក់ទំនងល្អជាមួយសិស្សច្បងដែលកំពុងប្រកបវិជ្ជាជីវៈដូចដែលគេកំពុងសិក្សា និងមានទំនាក់ទំនងល្អជាមួយនឹងអ្នកគ្រប់គ្រងស្ថាប័ននានានោះ ពួកគេនឹងមានឱកាសខ្ពស់បំផុតដើម្បីទទួលបានការងារដែលខ្លួនពេញចិត្ត។
3.ធ្វើការងារទីផ្សារខ្លួនឯង
ការសិក្សានៅកម្រិតមហាវិទ្យាល័យប្រៀបបានទៅនឹងការកសាងផលិតផលនៃគំនិតសម្រាប់ខ្លួនឯងដូច្នោះដែរ ហេតុនេះផលិតផលដែលខ្លួនបានបង្កើតឡើងនោះត្រូវតែយកទៅដាក់បង្ហាញនៅក្នុងទីផ្សារការងារ។ ប្រសិនបើពួកគេគ្មានប្រវត្តិល្អ និងគ្មានវិធីសាស្រ្តក្នុងការបង្ហាញខ្លួនបានល្អទៅកាន់សង្គមទេនោះ ពួកគេអាចនឹងពិបាកទទួលបានការងារល្អ។ វិធីល្អសម្រាប់ការបង្ហាញខ្លួនឯងគឺមានច្រើន ដូចជាការសរសេរហើយបង្ហាញគំនិតដែលមានប្រយោជន៍ទាំងអស់នោះក្នុងបណ្តាញសង្គម ការបង្កើតក្រុមការងារដើម្បីធ្វើកិច្ចការសង្គម រួមទាំងការបង្កើតក្រុមដើម្បីចែករំលែកចំណេះដឹងទៅកាន់យុវជនដូចគ្នាដើម្បីឱ្យគ្រប់ភាគី ជាពិសេសអ្នកគ្រប់គ្រងស្ថាប័ននានាបានឃើញ ហើយចាប់អារម្មណ៍សម្រាប់ឱកាសការងារ៕
July 6, 2017
ស្ងាត់ៗទូរស័ព្ទ Galaxy ស៊េរី JPro ចំនួន 2 ម៉ូដែលមកដល់កម្ពុជា
ក្រោយប្រកាសបង្ហាញមុខនៅលើទីផ្សារបរទេសកាលពីខែមុននោះ ទូរស័ព្ទ Samsung Galaxy J5 pro និង Galaxy J7 pro រូបរាងថ្មី និងមានបំពាក់បច្ចេកវិទ្យាទំនើបជាងមុនបានបង្ហាញខ្លួនក្នុងទីផ្សារកម្ពុជាយើងហើយជាមួយនឹងតម្លៃដ៏សមរម្យបំផុត។
ទូរស័ព្ទទាំង 2 ស៊េរីមានតួខ្លួនផលិតចេញពីលោហៈមានគុណភាពខ្ពស់ កាមេរ៉ាអាចថតរូបបានច្បាស់ល្អ និងមានភ្ជាប់នូវបច្ចេកវិទ្យាសុវត្ថិភាពដោយស្គែនម្រាមដៃបង្កប់ក្រោមប៊ូតុង Home ដែលស្ថិតនៅក្រោមអេក្រង់ ហើយដំណើរការដោយប្រព័ន្ធប្រតិបត្តិការAndroid 7.0 Nougat ជាមួយនឹងជម្រើស 3 ពណ៌គឺ ខ្មៅ ខៀវទឹកប្រាក់ និងពណ៌មាស។ ក្នុងនោះវាក៏មានមុខងារការពារជម្រាបទឹក IP54 Certified ដែលអាចការពារទឹកបានក្នុងកម្រិតល្មមៗ ដូចជាទឹកភ្លៀង និងការធ្លាក់ចូលទឹកបន្តិបន្ទួចជាដើម។
លោក Seungho Choi នាយកគ្រប់គ្រងសាខា Samsung ថៃ បានឱ្យដឹងថា វត្តមានរបស់ស្មាតហ្វូននេះ ក្រុមហ៊ុនចង់ផ្ដល់ជូនអ្នកប្រើប្រាស់កម្ពុជានូវបច្ចេកវិទ្យាថ្មីៗចុងក្រោយលើទូរស័ព្ទដែលមានតម្លៃសមរម្យ រូបរាងបែបទាន់សម័យ។ ទូរស័ព្ទ Galaxy J5 Pro មានរូបរាងស្អាតតូចច្រទ្បឹង ប្រើនូវអេក្រង់ HD Super AMOLEDទំហំ 5.2អ៊ីញ អាចបង្ហាញរូបភាព 720 x 1080 pixels និងមានកម្រិតPixel Density282ppi។
លោកថ្លែងថា ៖ «ខ្ញុំមានការជឿជាក់ថា ការរចនាដ៏ស្រស់ស្អាត រួមជាមួយបច្ចេកវិទ្យាកាមេរ៉ាដ៏ទំនើប និងលក្ខណៈពិសេសរបស់ Galaxy ស៊េរី J នឹងបន្តទាក់ទាញអតិថិជនចាស់ និងថ្មីឱ្យនៅតែប្រើប្រាស់ស្មាតហ្វូនទំនើបដែលបានរចនាទ្បើងដ៏ល្អឥតខ្ចោះ និងមានតម្លៃសមរម្យនេះទៀតជាមិនខាន»។
J5 Pro មានកាមេរ៉ាមុខ និងក្រោយទំហំ 13 MP ដូចគ្នា អាចថតរូបបានច្បាស់ទោះជាស្ថិតក្នុងទីតាំងស្ទើរពន្លឺក៏ដោយ ខណៈស្មាតហ្វូនមួយនេះមានកម្រិត Aperture f/1.7 ហើយកាមេរ៉ាមុខមានភ្ជាប់នូវភ្លើង LED Flash និងមានAperturef/1.9។ ចំពោះសមត្ថភាពម៉ាស៊ីនទូរស័ព្ទនេះវិញមាន Ram ទំហំ 2 GB ទំហំផ្ទុកទិន្នន័យ 16GB ប្រើ CPU ប្រភេទ Octa-core ល្បឿន 1.6 GHz Cortex-A53 និងមាន GPU Mali-T830MP2 រួមនឹងថាមពលថ្ម 3000mAh។
ដោយឡែកទូរស័ព្ទ Galaxy J7 Pro មានទំហំអេក្រង់ 5.5 អ៊ីញ ប្រភេទ HD Super AMOLED1080x1920 pixels និងមានកម្រិតPixel Density401ppi។ វាក៏មាន Ram ទំហំ 3GB ទំហំផ្ទុកទិន្នន័យ 64GB ប្រើ CPU ប្រភេទ Octa-core ល្បឿន 1.6 GHz Cortex-A53 និងមាន GPU Mali-T830MP2 រួមនឹងថាមពលថ្ម 3600mAh អាចសាកបានតាមរន្ធដោត USB Type-C ។
លោកនាយកគ្រប់គ្រងបានបន្ថែមទៀតថា ស្មាតហ្វូន Galaxy ស៊េរី J ថ្មីនេះ ក្រុមហ៊ុនរំពឹងថា នឹងរួមចំណែកដល់ការលក់ក្នុងត្រីមាសទី 3 ដែលផ្តោតសំខាន់លើអ្នកប្រើប្រាស់ស្មាតហ្វូនដែលមានបំណងចង់បង្កើនសមត្ថភាពស្មាតហ្វូនរបស់ខ្លួន ខណៈពេលពួកគាត់ធ្វើការសម្រចចិត្តដ៏ល្អបំផុតរវាងសេចក្តីត្រូវការ និងការចំណាយជាក់ស្តែង។ ទូរស័ព្ទ Galaxy J5 Pro មានតម្លៃ 279 ដុល្លារ និង Galaxy J7 Pro មានតម្លៃ 329 ដុល្លារ៕
July 6, 2017
ធ្វើយ៉ាងណាដើម្បីឱ្យជើងស្អាត និងសិចស៊ី?
ការដណ្តើមគ្នាបង្អួតភាពសិចស៊ី បង្ហាញសាច់ជើងសខ្ចី មានទាំងជើងស្រឡូនតូចៗ និងជើងទ្រលុកទ្រលន់តាមរយៈការស្លៀកសម្លៀកបំពាក់ខ្លីៗ គឺជាសកម្មភាពដែលកំពុងពេញនិយមបំផុតសម្រាប់នារីៗ ជាពិសេសគឺយុវតីសម័យថ្មីនេះតែម្ដង។ ប្រាកដណាស់ថា អ្នកណាៗក៏នឹងលួចកោតសរសើរអ្នកដែរ ប្រសិនបើគេបានឃើញជើងដ៏ស្រស់ស្អាត មើលទៅមានសភាពទន់រលោងរបស់អ្នក។ប៉ុន្តែប្រសិនបើអ្នកនៅមិនទាន់មានទំនុកចិត្តថា ជើងរបស់អ្នកមានសភាពស្រស់ស្អាតគ្រប់គ្រាន់ក្នុងការប្រណាំងប្រជែងជាមួយអ្នកដទៃទេនោះ សូមចាប់ផ្តើមថែរក្សាជើងរបស់អ្នកឱ្យបានស្អាតចាប់ពីពេលនេះតទៅ។
ដុសខាត់កែងជើង៖ បង្កើតទម្លាប់ក្នុងការដុសខាត់កែងជើង និងបាតជើងឱ្យបានស្អាតដោយច្រាស ឬថ្មខាត់ មុននឹងដុសអ្នកគួរត្រាំជើងរបស់អ្នកទៅក្នុងទឹក (ប្រសិនបើត្រាំជាមួយទឹកក្តៅឧណ្ហៗកាន់តែល្អ) ប្រមាណជា10-15នាទីជាមុនសិន ដើម្បីឱ្យស្បែកជើងរបស់អ្នកទន់ងាយស្រួលក្នុងការដុសសម្អាតសារធាតុកខ្វក់ និងស្បែកចាស់ៗចោល។ ប្រសិនបើជើងរបស់ស្ងួត និងមានសភាពប្រះបែកនោះ អ្នកត្រូវតែផ្តល់សំណើមឱ្យជើងរបស់អ្នក។ មានផលិតផលច្រើនណាស់ដែលអាចឱ្យអ្នកជ្រើសរើសប្រើប្រាស់ ដូច្នេះវាពិតជាមិនពិបាកទេបើគ្រាន់តែចង់ស្វែងរកផលិតផលមួយដែលត្រូវនឹងអ្នកនោះ។
ធ្វើចលនា និងម៉ាស្សាជើង៖ ម្រាមជើង និងប្រអប់ជើងក៏អាចបង្កើនភាពស្រស់ស្អាតឱ្យអ្នកបានដែរ ហេតុនេះការទាញម្រាមជើង ច្របាច់ ធ្វើចលនាចុះឡើង និងការម៉ាស្សាប្រអប់ជើងដោយប្រេងអូលីវ ឬប្រេងដូងជាដើមគឺជាវិធីល្អបំផុតក្នុងការបន្ថែមភាពតឹងណែនដល់ប្រអប់ និងម្រាមជើងរបស់អ្នក។
សម្អាតជើងឱ្យស្អាត៖ ការលាងសម្អាត និងជូតជើងរបស់អ្នកឱ្យបានស្អាត និងស្ងួតល្អ គ្រប់កន្លែង ពិសេសគឺនៅចន្លោះម្រាមជើងជាដើមនោះគឺជាចំណុចមួយដែលអ្នកមិនគួរភ្លេចជាដាច់ខាត។
កុំមើលរំលងស្បែកជើងដែលអ្នកពាក់៖ ស្បែកជើងស្អាតល្អពិតប្រាកដមិនត្រឹមតែជាម៉ូដដែលអាចលើកសម្រស់ជើងតែប៉ុណ្ណោះទេ តែវាត្រូវតែផ្តល់ភាពងាយស្រួលក្នុងការស្លៀកពាក់ផងដែរ។ សូមចាំថា ស្បែកជើងដែលមិនធ្វើឱ្យឈឺជើង និងងាយស្រួលដើរគឺជាជម្រើសទីមួយដែលអ្នកត្រូវគិតដល់៕
July 6, 2017
Lee Hyori រកឃើញអ្នកស្នងតំណែងតារាមិនសិចស៊ីដូចរូបនាងហើយ
តារាចម្រៀងស្រី Lee Hyori បានសម្លឹងឃើញតារាចម្រៀងស្រីដែលនាងគិតថាជា Lee Hyori IDol ទីពីរ ហើយ គឺជាតារាចម្រៀងដែលមិនបញ្ចេញស្ទីលសិចស៊ីដូចរូបនាងតែម្តង ដោយនាងបានថ្លែងយ៉ាងដូច្នេះនៅក្នុងកម្មវិធីសម្ពោធអាល់ប៊ុមចម្រៀងថ្មីរបស់នាងដែលមានចំណងជើងថា “BLACK”។
នាងមានលក្ខណៈឯកនៃភាពពិសេសជាងតារាចម្រៀង K Pop ដទៃទៀតដែលមានឈ្មោះល្បីល្បាញ ហើយនាងបានសម្លឹងឃើញថា តារាស្រី IU អាចមានភាពស្រដៀងនឹងរូបនាងដែរ ដោយតារាស្រីរូបនេះបានពោលថា “នាងខ្ញុំគិតថា តារាចម្រៀង IU នឹងក្លាយជា Lee Hyori មួយរូបទៀត”។ តារាវ័យ 38 ឆ្នាំរូបនេះបានបកស្រាយពីភាពមិនសូវសិចស៊ី ហើយលក្ខណៈនៃភាពជាតារាចម្រៀងស្រីដែលអាចស្នងតំណែងរបស់នាងបាន គឺ “ជំនួសដោយភាពសិចស៊ី នាងខ្ញុំគិតថា ជាអៃដល Lee Hyori បន្ទាប់ទៀតគួរតែជាតារាស្រីដែលតែងចម្រៀងបានដោយខ្លួននាងផ្ទាល់ និងមានភាពសិចស៊ីពណ៌សម្បុរដូចនាងខ្ញុំ”។
បើទោះបីជាតារាស្រីរូបនេះបានសម្លឹងឃើញតារាចម្រៀង IU ក៏ដោយ ក៏ប៉ុន្ដែនៅមានក្រុមចម្រៀង MAMAMOO មួយក្រុមទៀតដែលជាទីពេញចិត្តពេញថ្លើមរបស់នាង។ នាងបានថ្លែងប្រាប់អ្នកគាំទ្រនាង បន្ទាប់ពីបានទស្សនាការសម្ដែងផ្ទាល់ថា “ក្រុមចម្រៀងនេះ ពួកគេមានលទ្ធផលការងារយ៉ាងល្អអស្ចារ្យកន្លងមក ពួកគេច្រៀងចម្រៀងបានល្អ និងធ្វើការបានល្អ ក៏ប៉ុន្ដែកម្លាំងម៉្យាងដែលគេត្រូវតែបង្កើតឱ្យមានមកជាមួយវានោះគឺ ការធ្វើការងារជាក្រុមដែលពួកគេមានគ្នាច្រើន”៕
July 6, 2017
កម្ពុជាត្រៀមបង្កើតមជ្ឈមណ្ឌលពាណិជ្ជកម្មនៅក្រុងគុនមិងប្រទេសចិន
ភ្នំពេញ៖ ដើម្បីទំនាក់ទំនងពាណិជ្ជកម្មរវាងកម្ពុជា និងចិនឱ្យមានភាពរលូន និងយូរអង្វែង ក្រសួងពាណិជ្ជកម្មកម្ពុជាបានជួបពិភាក្សាជាមួយគណៈប្រតិភូមកពីទីក្រុងគុនមិងនៃខេត្តយូណាន់ ប្រទេសចិន ដែលដឹកនាំដោយលោក Li Shaoquan ប្រធានក្រុមហ៊ុន Construction and Investment Holding Group Co.,Ltd ក្នុងបំណងបង្កើតមជ្ឈមណ្ឌលពាណិជ្ជកម្មតំណាងកម្ពុជាប្រចាំនៅខេត្តគុនមិង ប្រទេសចិន។
ជំនួបពិភាក្សានេះបានប្រព្រឹត្តទៅក្នុងគោលបំណងពិភាក្សាអំពីការបង្កើតមជ្ឈមណ្ឌលពាណិជ្ជកម្ម នៅទីក្រុងគុនមិង ខេត្តយូណាន់ ប្រទេសចិន ដើម្បីពង្រឹង និងពង្រីកទំនាក់ទំនងពាណិជ្ជកម្មក្រៅប្រទេសរវាងកម្ពុជា-ចិន។ ក្នុងនោះខាងភាគីចិន លោក Li Shaoquan បានសុំខាងភាគីកម្ពុជាមានគោលនយោបាយគាំទ្រអ្វីខ្លះដល់ភាគីចិនក្នុងការបង្កើតមជ្ឈមណ្ឌលពាណិជ្ជកម្មនេះ។

ឆ្លើយតបទៅនឹងសំណើខាងលើ ឯកឧត្តម ស៊ាង ថៃ អគ្គនាយកនៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្មបានជម្រាបជូនគណៈប្រតិភូចិនអំពីនីតិវិធីនៃការបង្កើតមជ្ឈមណ្ឌល និងកិច្ចដំណើរការផ្សេងៗ ហើយឯកឧត្តមបានជម្រាបជូនភាគីចិនថា ក្រសួងគាំទ្រយ៉ាងពេញទំហឹងក្នុងការសហការដើម្បីបងើ្កតមជ្ឈមណ្ឌលពាណិជ្ជកម្មនោះ និងជួយសម្របសម្រួលត្រឹមការងារ និងឯកសារតែប៉ុណ្ណោះ។ ឯកឧត្តមបានបញ្ជាក់ប្រាប់ទៅខាងភាគីចិនថា ក្រសួងមិនមានមូលនិធិសម្រាប់ជួយទ្រទ្រង់ដើម្បីបង្កើតមជ្ឈមណ្ឌលពាណិជ្ជកម្មនេះទេ។
ចុងបញ្ចប់នៃជំនួបពិភាក្សានេះ ទាំងភាគីក្រសួង និងភាគីចិនបានជំរុញឱ្យមានការទំនាក់ទំនងគ្នាជាប្រចាំ និងសហការឱ្យបានរលូនដើម្បីឱ្យការបង្កើតមជ្ឈមណ្ឌលពាណិជ្ជកម្មនេះទទួលបានជោគជ័យ៕

July 5, 2017