Author: វល័ក្ខ

ភ្នំពេញៈ ការសិក្សាស្រាវជ្រាវថ្មីមួយបានរកឃើញថា ចំនួនប្រជាពលរដ្ឋរស់នៅក្នុងរាជធានីភ្នំពេញនឹងកើនដល់ 4លាននាក់ នៅឆ្នាំ2030 ខាងមុខដែលនឹងធ្វើឲ្យបែបបទនៃការរស់នៅរបស់ប្រជាជនមានការផ្លាស់ប្តូរ។

កំណើនប្រជាសាស្រ្តក្នុងទីក្រុង ការកើនឡើងនូវការកកស្ទះចរាចរណ៍ និងកំណើននៃការប្រើប្រាស់បច្ចេកវិទ្យានឹងធ្វើឲ្យយុវជនសម័យថ្មីចូលមករស់នៅតាមអគារខុនដូកណ្តាលទីក្រុងជំនូសឲ្យការចេញទៅរស់នៅជាយរាជធានីភ្នំពេញ។

យោងតាមការសិក្សារបស់ក្រុមហ៊ុន Urban Living Solution បានរកឃើញថា ប្រជាពលរដ្ឋរស់នៅរាជធានីភ្នំពេញនឹងកើនឡើងដល់ 4លាននាក់ឬច្រើនជាងនេះនៅឆ្នាំ2030 ហើយនិន្នាការរស់នៅតាមខុនដូនឹងកើនឡើងពីសំណាក់ក្រុមយុវជនដែលបច្ចុប្បន្ននៅមានវ័យក្មេង និងដល់វ័យសកម្មក្នុងការងារនៅឆ្នាំនោះពួកគេនឹងជ្រើសរើសរស់នៅតាមខុនដូ ដោយសារការកើនឡើងនូវក្រុមអ្នកមានជីវភាពមធ្យម និងការប្រើប្រាស់សេវាកម្មសម្រាប់រស់នៅប្រចាំថ្ងៃកាន់តែមានការរីកចម្រើន។

លោក វ៉ា វីរៈ អគ្គនាយកក្រុមហ៊ុន Century21 Fortuna Investment ដែលទើបទទួលបានវិញ្ញាបនបត្រទទួលស្គាល់ក្នុងនាមជាអ្នកជំនាញក្នុងវិស័យអចលនទ្រព្យលំដាប់អន្តរជាតិពី National Association Realtor បានថ្លែងថា លោកយល់ស្របនឹងការសិក្សាខាងលើនេះ ព្រោះនៅឆ្នាំ2030 ចំនួនប្រជាជនរស់នៅក្នុងទីក្រុងនឹងកើនដល់ 4លាននាក់ ពួកគេនឹងប្រឈមបញ្ហាជាច្រើនដូចជា ការកកស្ទះចរាចរណ៍ ការបំពុលបរិស្ថាន ហើយបច្ចេកវិទ្យា ហើយនឹងចូលរួមដោះស្រាយបញ្ហាទាំងនោះ”។

លោកបន្តថា និន្នាការប្រជាពលរដ្ឋនឹងចូលមករស់នៅជាយក្រុង និងក្នុងទីក្រុងកាន់តែច្រើន ហេតុនេះ100ភាគរយ ប្រជាពលរដ្ឋវ័យក្មេងនឹងជ្រើសរើសរស់នៅតាមខុនដូដូចនៅក្នុងប្រទេសថៃ វៀតណាម សាំងហ្កាពួ ហុងកុងជាដើម។ វាជាជម្រើសមួយដែលផ្តល់អត្ថប្រយោជន៍ច្រើន ចំណេញច្រើន ពិសេសលើពេលវេលា។

លោកបន្តថា “ក្រុមយុវជនវ័យក្មេងដែលធ្លាប់សិក្សានៅបរទេស ពួកគេនឹងជ្រើសរើសរស់នៅតាមខុនដូ ព្រោះវាមានទីតាំងនៅជិតហាងកាហ្វេ ផ្សារទំនើប កន្លែងហាត់ប្រាណ និងកន្លែងធ្វើការរបស់ពួកគេ”។ លោកបន្តថា “ការធ្វើដំណើរនឹងកាន់តែលំបាក ពេលវេលាជាមាសប្រាក់ ខុនដូនឹងជាជម្រើសរបស់ពួកគេដែលជាកន្លែងមានផាសុកភាព មានសន្តិសុខ24ម៉ោង មានសេវាកម្មសម្អាតអនាម័យជាដើម”។

តាមការសិក្សារបស់ក្រសួងរៀបចំដែនដី នគរូបនីយកម្ម និងសំណង់អំពីក្របខ័ណ្ឌយុទ្ធសាស្រ្តអភិវឌ្ឍន៍ទីក្រុងនៅកម្ពុជាបានរកឃើញថា ចំនួនប្រជាជនរស់នៅរាជធានី ក្រុង និងទីប្រជុំជននៅឆ្នាំ2014 មានចំនួន 4.5លាននាក់ ស្មើនឹង 27.1ភាគរយ និងបន្តកើនឡើងដល់ 7.92លាននាក់នៅឆ្នាំ2030 ស្មើនឹង 44 ភាគរយនៃចំនួនប្រជាជនកម្ពុជាសរុប។

លោក ងួន ឆាយលាង អគ្គនាយកក្រុមហ៊ុន Ratanaka Realty និងជាតំណាងផ្នែកលក់ផ្តាច់មុខនៃគម្រោងUrban Loft បានថ្លែងឲ្យដឹងថា ជាមួយនឹងកំណើនសេដ្ឋកិច្ចដែលនឹងបន្តរីកចម្រើនរយៈពេលវែង   ចរន្តរីកចម្រើននៃបច្ចេកវិទ្យា ដូចជាការផ្ញើលុយតាមទូរស័ព្ទដៃ ការហៅឬកុម្ម៉ង់ទំនិញ ទិញអាហារជាមួយម៉ូតូឌុប រ៉ឺម៉កកង់បី និងតាក់ស៊ី តាមរយៈទូរស័ព្ទដៃនឹងបន្តរីកចម្រើន មានការប្រើប្រាស់កាន់តែច្រើន និងការកកស្ទះចរាចរណ៍កាន់តែខ្លាំង រំខានដល់ការធ្វើដំណើរ សេវាសាធារណៈកាន់តែរីកចម្រើន និងកង្វះចំណតយានយន្ត លោកជឿថា នឹងមានការវិនិយោគលើចំណតយានយន្តសម្រាប់ជួលកាន់តែច្រើននាពេលអនាគត។

លោកបន្តទៀតថា “ដោយសារនិន្នាការខាងលើនេះ ខ្ញុំគិតថាយុវជនសម័យថ្មីនឹងជ្រើសរើសរស់នៅតាមខុនដូដែលមានទីតាំងនៅជិតកន្លែងធ្វើការងាររបស់ពួកគេ”។ លោកបន្ថែមថា “យុវជនវ័យក្មេងនឹងក្លាយជាអ្នកសកម្មក្នុងការងារនៅឆ្នាំ2030 ពួកគេជាក្រុមមនុស្សស៊ីវិល័យ និងជាអ្នកប្រើប្រាស់បច្ចេកវិទ្យា។ ពួកគេនឹងសម្រេចចិត្តរស់នៅក្នុងទីក្រុង ហើយអ្នកអភិវឌ្ឍន៍ខុនដូដែលផ្តោតលើក្រុមមនុស្សវ័យនេះនឹងទទួលបានផលប្រយោជន៍”។

នាពេលអនាគតរដ្ឋាភិបាលនឹងរៀបចំបែងចែកតំបន់ឧស្សាហកម្មនិងតំបន់លំនៅដ្ឋាននៅដាច់ពីគ្នា ជាក់ស្តែងបច្ចុប្បន្នការលក់គ្រឿងចក្រធុនធ្ងន់ ការលក់គ្រឿងម៉ាស៊ីនធំៗ និងរោងចក្រមួយចំនួនចាប់ផ្តើមផ្លាស់ប្តូរទៅកាន់តំបន់ជាយក្រុង។
លោក ងួន ឆាយលាង បានបន្តថា តាមបរិបទទីក្រុងរីកចម្រើននានាដូចជាទីក្រុងហុងកុង ទីក្រុងញូវយ៉ក ទីក្រុងបាងកក ប្រទេសសិង្ហបុរីជាដើម ពួកគេកំពុងរស់នៅតាមខុនដូនៅកណ្តាលក្រុងជាជាងទៅរស់នៅជាយក្រុង ហើយពេលអនាគតក្រុមយុវជនស៊ីវិល័យពួកគេនឹងសម្រេចចិត្តរស់នៅក្នុងទីក្រុងជាជាងចេញទៅរស់នៅតំបន់ជាយក្រុង។តាមការសិក្សាបានរកឃើញថា នៅកម្ពុជាក្រុមយុវជនអាយុចាប់ពី30ឆ្នាំចុះក្រោមនឹងមាន60ភាគរយនៃប្រជាពលរដ្ឋសរុប។

ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិលោកបណ្ឌិត ម៉ី កល្យាណ បានថ្លែងថា ប្រទេសកាលណាមានការអភិវឌ្ឍ ទីក្រុងកាន់តែរីកធំមានមនុស្សរស់នៅច្រើនជារឿងធម្មតា ហើយនៅពេលទីក្រុងកាន់តែធំ តម្រូវការហេដ្ឋារចនាសម្ព័ន្ធកាន់តែមានភាពចាំបាច់។ ហេតុនេះប្រសិនជារដ្ឋាភិបាលគិតទុកជាមុនជាការល្អប្រសើរដើម្បីបន្ធូរបន្ថយបញ្ហា ទោះជាដោះស្រាយមិនបានទាំងស្រុងក្តី។ លោកបន្តថា ការដោះស្រាយបញ្ហាច្បាប់ដើម្បីសម្រួលចរាចរណ៍ ការវិនិយោគលើហេដ្ឋារចនាសម្ព័ន្ធ និងសេវាសាធារណៈជាអ្វីដែលរដ្ឋាភិបាលត្រូវវិនិយោគច្រើនជាងមុន។លោកបន្តថា “ពេលទីក្រុងកាន់តែរីកចម្រើន គុណភាពជីវិតនឹងកាន់តែលំបាកទៅៗ ហេតុនេះការមានបច្ចេកវិទ្យាស្មាតហ្វូន និងបច្ចេកវិទ្យាផ្សេងៗអាចជួយបាន តែមិនជួយបានច្រើនទេ”។ លោកបន្តថា “ខ្ញុំមិនជឿថាប្រព័ន្ធបច្ចេកវិទ្យាអាចជួយបាន100ភាគរយនោះទេ ហើយវាជារឿងអនាគត ពិបាកប្រមើលមើលណាស់”៕

ភ្នំពេញ៖ ក្នុងគោលដៅបញ្ឈប់ការនាំចូល ក៏ដូចជាផ្តល់ការងារជូនពលរដ្ឋខ្មែរឱ្យបានកាន់តែច្រើនផងដែរនោះ ក្រុមហ៊ុនធំៗចំនួនពីររបស់ខ្មែរ និងថៃបានចាប់ដៃគ្នាបោះទុនវិនិយោគប្រមាណជា 262លានដុល្លារអាមេរិកដើម្បីបង្កើតរោងចក្រស៊ីម៉ងត៍ដ៏ធំមួយនៅស្រុកទូកមាស ក្នុងខេត្តកំពតដែលជាខេត្តមានសក្តានុពលសម្បូរទៅដោយវត្ថុធាតុដើម។

លោកឧកញ៉ា លាង ម៉េង ប្រធានក្រុមអគ្គនាយកក្រុមហ៊ុន ជីប ម៉ុង គ្រុប មានប្រសាសន៍ថា ដើម្បីកាត់បន្ថយការនាំចូលស៊ីម៉ងត៍ពីក្រៅប្រទេសឱ្យបានជាអតិបរមា ក្រុមហ៊ុនបានសម្រេចសហការជាមួយក្រុមហ៊ុន Siam City Cement Public Limited របស់ថៃដែលជាក្រុមហ៊ុនផលិតស៊ីម៉ងត៍ម៉ាកអូដ្ឋ ស៊ីម៉ងត៍ម៉ាកឥន្រ្ទីពេជ្រ ដោយបានបោះទុនវិនិយោគរួមគ្នាក្នុងទឹកប្រាក់ប្រមាណជា 262លានដុល្លារ សម្រាប់បង្កើតរោងចក្រនៅកម្ពុជាជាមួយនឹងការរចនាសម្បកវេចខ្ចប់បែបថ្មីបង្ហាញពីសក្តានុពលនៃគុណភាពរឹងមាំ និងអត្តសញ្ញាណរបស់ជាតិ។

ក្រោមទុនវិនិយោគ 262លានដុល្លារ ក្រុមហ៊ុន ជីប ម៉ុង អ៊ិនស៊ី បានច្របាច់បញ្ចូលគ្នានូវចំណេះ ជំនាញ និងបទពិសោធរបស់ក្រុមហ៊ុនទាំងពីរដែលមានជំនាញបច្ចេកទេសផ្នែកឧស្សាហកម្មផលិតស៊ីម៉ងត៍រយៈពេលជាង50ឆ្នាំមកហើយ។
ការសហការជាមួយគ្នានេះត្រូវបានផ្តួចផ្តើមដើម្បីឆ្លើយតបទៅនឹងការអភិវឌ្ឍយ៉ាងឆាប់រហ័សរបស់ប្រទេសកម្ពុជា ជាពិសេសការរីកចម្រើនយ៉ាងខ្លាំងនៃវិស័យសំណង់នៅក្នុងប្រទេសកម្ពុជាក្នុងរយៈពេលប៉ុន្មានឆ្នាំកន្លងទៅនេះ។

លោកឧកញ៉ាបានមានប្រសាសន៍ដូច្នេះថា «គោលបំណងយើងគឺគាំទ្រការអភិវឌ្ឍប្រទេសកម្ពុជាឱ្យមានស្ថិរភាព។
ក្រៅពីចង់ជួយកាត់បន្ថយការនាំចូលស៊ីម៉ងត៍ពីបរទេសមកកាន់កម្ពុជាហើយ យើងចង់បង្ហាញថា យើងអាចមានសមត្ថភាពផលិតផលិតផលខ្លួនឯងបាន និងបង្ហាញពិភពលោកថា យើងមានសមត្ថភាពផលិតស៊ីម៉ងត៍ដែលមានគុណភាពខ្ពស់ស្របតាមស្តង់ដារអន្តរជាតិផងដែរ ដែលនេះជាចំណុចសំខាន់មួយបង្ហាញពីការរីកចម្រើនកម្រិតថ្មីមួយទៀតរបស់ជាតិយើង ដោយសារកម្ពុជាមានធនធានធម្មជាតិដ៏ល្អសម្រាប់ធ្វើជាវត្ថុធាតុដើមក្នុងការផលិត»។

មិនមែនធ្វើការវិនិយោគដើម្បីស្វែងរកប្រាក់ចំណេញតែមួយមុខនោះទេ ប៉ុន្តែក្រុមហ៊ុនបានគិតគូរពីផលប៉ះពាល់បរិដ្ឋានឱ្យបានតិចបំផុតតាមដែលអាចធ្វើទៅបានស្របតាមបទដ្ឋានស្តង់ដារអង្គការអន្តរជាតិ ដោយមានការបញ្ចេញឧស្ម័នកាបូនទាបបំផុត។ ក្រៅពីនោះក្រុមហ៊ុនក៏នឹងផ្តល់ការងារដល់ពលរដ្ឋខ្មែរ ពិសេសក្រុមហ៊ុនមានអ្នកជំនាញមកពីក្រៅប្រទេសដើម្បីចែករំលែកចំណេះដឹងដល់ប្រជាពលរដ្ឋខ្មែរឱ្យកាន់តែមានចំណេះប្រសើរឡើងលើជំនាញបច្ចេកទេសផលិតស៊ីម៉ងត៍ក៏ដូចជាការផ្តល់ប្រាក់បៀវត្សរ៍ខ្ពស់ជាងរោងចក្រនានានៅក្នុងប្រទេសកម្ពុជាតាមរយៈការបណ្តុះបណ្តាលក្រុមការងារ ផ្នែកផលិត ផ្នែកទីផ្សារ ផ្នែកលក់ រួមទាំងក្រុមការងារផ្សេងៗដើម្បីបំពេញតាមតម្រូវការទូទៅរបស់ទីផ្សារកម្ពុជា ហើយលើសពីនេះក្រុមហ៊ុននឹងអភិវឌ្ឍតំបន់នោះឱ្យក្លាយជាតំបន់ទាក់ទាញបម្រើផលប្រយោជន៍រួមដល់ប្រជាពលរដ្ឋនៅក្នុងមូលដ្ឋានទៀតផង។

លោក Aidan Lynam នាយកប្រតិបត្តិនៃក្រុមហ៊ុនជីបម៉ុង អ៊ិនស៊ី ស៊ីមេន ខបភើរេសិន មានប្រសាសន៍ថា ក្រុមហ៊ុនមិនត្រឹមតែផ្គត់ផ្គង់ទីផ្សារក្នុងស្រុកនោះទេ ប៉ុន្តែនឹងពង្រីកការនាំចេញទៅកាន់ប្រទេសក្រៅក្នុងតំបន់ថែមទៀត ដោយផ្អែកលើគុណភាពនៃការផលិតចេញពីវត្ថុធាតុដើមដែលមានគុណភាពនៅក្នុងស្រុកទូកមាស ខេត្តកំពតដែលរោងចក្រនេះនឹងចាប់ផ្តើមដំណើរការនៅខែវិច្ឆិកា ចុងឆ្នាំ2017នេះ។ លោកអះអាងដូច្នេះថា «អ្នកទាំងអស់គ្នាសុទ្ឋតែចង់បាននូវផលិតផលដែលអតិថិជនប្រើប្រាស់ដោយសុវត្ថិភាព និងជឿទុកចិត្ត ពួកគេបានធ្វើការសម្រេចចិត្តដ៏ត្រឹមត្រូវក្នុងការជ្រើសរើសស៊ីម៉ងត៍របស់យើងខ្ញុំ»។ ក្រុមហ៊ុននេះកំពុងតែមានភាពជិតស្និទ្ឋជាងមុនជាមួយនឹងដៃគូពាណិជ្ជកម្ម និងអតិថិជនរបស់ខ្លួនជាមួយស្លាកយីហោស៊ីម៉ងត៍អូដ្នថ្មីនេះជាជំហានដំបូងដើម្បីសម្រេចគោលដៅរួមគ្នា។

គួរបញ្ជាក់ដែរថា វិស័យសំណង់ និងហេដ្ឋារចនាសម្ព័ន្ធគឺជាកត្តាសំខាន់មួយដែលត្រូវការចាំបាច់សម្រាប់ការអភិវឌ្ឍសេដ្ឋកិច្ច។ យោងតាមរបាយការណ៍របស់ក្រសួងដែនដី នគរូបនីយកម្ម និងសំណង់បង្ហាញថា ទុនវិនិយោគ និងវិស័យសំណង់លំនៅដ្ឋានក្នុងឆ្នាំ2016 កន្លងមកមានប្រមាណជា 5.580លានដុល្លារអាមេរិក។ និងក្នុងរយៈពេល 5ខែដើមឆ្នាំ2017នេះ ទុនវិនិយោគវិស័យសំណង់មានប្រមាណជា 4.362លានដុល្លារ បើធៀបនឹងរយៈពេលដូចគ្នានៅឆ្នាំ2016 គឺមានកំណើនប្រមាណជា 20% និងបង្កើតការងារជូនប្រជាពលរដ្ឋប្រមាណជា 20ម៉ឺននាក់ក្នុងមួយថ្ងៃ៕

បទ «ក្រហម» បច្ចុប្បន្នកំពុងទទួលបានការចាប់អារម្មណ៍ពីយុវវ័យជាច្រើន បទនេះគេឃើញមានតារាសម្ដែងស្រីពីរដួងបានបញ្ចេញកាយវិការសម្ដែងមានភាពទាក់ទាញយ៉ាងខ្លាំងក្នុងនោះ ក៏មានកញ្ញាណាងហ្វាម្នាក់ដែរដែលគេបានមើលឃើញពីទេពកោសល្យរបស់នាង។

បើទោះជាកញ្ញា ណាងហ្វា ទើបតែទទួលបានការគាំទ្រពីយុវវ័យក្នុងបទ «ក្រហម» ក៏ពិតមែន ប៉ុន្ដែនាងមិនមែនជាតារាដែលទើបចាប់អាជីពសិល្បៈថ្មីថ្មោងនោះទេ ពោលគឺនាងបានចូលប្រឡូកក្នុងវិថីសិល្បៈជាយូរមកហើយ។

កញ្ញាណាងហ្វា បានប្រាប់ថា នាងជាតារាសម្ដែងយូរមកហើយ បទពិសោធក្នុងការសម្ដែងក៏មានស្រាប់ដែរ ដូច្នេះការសម្ដែងក្នុងបទនេះពុំមានការលំបាកច្រើនសម្រាប់នាងទេ។ បើទោះជានាងជាតារាសម្ដែងបាត់មុខមួយរយៈធំក្ដី តែមុនពេលនាងទទួលយកការសម្ដែងក្នុងបទនេះ នាងមានក្ដីរំពឹងជាស្រេចថា នាងនឹងអាចទទួលបានការគាំទ្រពីមហាជន។

មានពាក្យសរសើរជាច្រើន ក៏ដូចជាមានការលើកឡើងពីមជ្ឈដ្ឋានខាងក្រៅដែរថា ក្នុងបទ «ក្រហម» កញ្ញាណាងហ្វាបានបញ្ចេញទេពកោសល្យសម្ដែងយ៉ាងខ្លាំង ពិសេសកាយវិការរាំដ៏សិចស៊ីរបស់នាងបង្អួតទៅអ្នកទស្សនា ដើម្បីទទួលបានចំណាប់អារម្មណ៍ ហើយជាជាក់ស្ដែងនាងធ្វើបានពិតមែន។ ទោះយ៉ាងណាណាងហ្វាបានបញ្ជាក់ថា៖ «ការពិតទៅបទនេះពុំមានអ្វីសិចស៊ីច្រើនទេ គ្រាន់តែទាមទារឱ្យយើងយល់ពីបទចម្រៀង និងដាក់អារម្មណ៍សម្ដែងបន្ដិចប៉ុណ្ណោះ។ កាលពីពេលមុនខ្ញុំក៏ជាតារាម្នាក់អ្នកនិយមស្លៀកសិចស៊ីដែរ ដូច្នេះខ្ញុំគិតថា សម្ដែងប៉ុណ្ណឹងមិនទាន់សិចស៊ីពេកទេ»។

កញ្ញាណាងហ្វាបានបន្ដថា ដោយសារតែរូបរាងអំណោយផលទៅលើការសម្ដែងផ្នែកសិចស៊ី ទើបធ្វើឱ្យនាងតែងតែទទួលបានតំណែងជាតួអង្គបែបសិចស៊ីច្រើន។ ដូចជារឿង«ជីវិតនាងរចនា»ក៏ត្រូវអ្នកដឹកនាំរឿងតម្រូវឱ្យសម្ដែងជាតួអង្គអ្នកមានវ័យក្មេងចូលចិត្ដលេងល្បែងស្នេហាដែរ។

ទោះយ៉ាងណា តារាសម្ដែងរូបនេះពុំបានព្រួយបារម្ភពីការវាយតម្លៃរបស់មហាជនទៅលើចរិតឫកពារបស់នាងនោះទេ ដោយនាងបញ្ជាក់ថា៖ «ខ្ញុំមិនដែលខ្វល់ពីការនិយាយអ្វីឡើយ ព្រោះវាជាសិល្បៈ។ ពិសេសរឿងផ្ទាល់ខ្លួន ខ្ញុំមិនដែលគិតខ្លាចពេលគេឃើញការសម្ដែងរបស់ខ្ញុំ គិតថាខ្ញុំមានចរិតខាងក្រៅដូចនឹងការសម្ដែង ឬគ្មានអ្នកស្រឡាញ់នោះទេ គឺខ្ញុំអត់ខ្វល់ទេ ព្រោះសព្វថ្ងៃក៏មានអ្នកស្រឡាញ់ច្រើនដែរ ផ្ទុយទៅវិញ គឺរូបខ្ញុំទេដែលជាអ្នកមិនចង់គិតពីរឿងនេះ ព្រោះខ្ញុំចង់ទុកពេលវេលារកស៊ី និងប្រឡូកការងារសិល្បៈឱ្យទទួលបានភាពល្បីល្បាញជាមុនសិនទើបប្រសើរជាង»៕