Author: វល័ក្ខ

ភ្នំពេញៈ សំណើដោះស្រាយបញ្ហាកសិផលកម្ពុជាជាមួយប្រទេសថៃមិនទាន់មានការឆ្លើយតបជាវិជ្ជមាននៅឡើយទេ ខណៈពេលកសិផលកម្ពុជាកំពុងទទួលបានការបញ្ជាទិញក្នុងតម្លៃទាបបំផុត។

ក្នុងជំនួបជាមួយរដ្ឋមន្រ្តីពាណិជ្ជកម្មថៃកាលពីថ្ងៃម្សិលមិញ រដ្ឋមន្រ្តីពាណិជ្ជកម្មកម្ពុជាលោក ប៉ាន សូរស័ក្តិបានស្នើសុំភាគីថៃជួយទិញផលិតផលកសិកម្មកម្ពុជា និងសុំដឹកទំនិញពីកម្ពុជាឆ្លងកាត់ប្រទេសថៃទៅកាន់ប្រទេសទី3 ប៉ុន្តែរដ្ឋមន្រ្តីពាណិជ្ជកម្មថៃលោកស្រី អាភីរ៉ាឌី ថាតត្រាផន មិនបានឆ្លើយតបជាវិជ្ជមាននៅឡើយទេ ដោយលោកស្រីបានសន្យាថា នឹងនាំយកសំណើកម្ពុជាទៅពិភាក្សាជាមួយមន្រ្តីរដ្ឋាភិបាលរបស់លោកស្រី។

រដ្ឋមន្រ្តីពាណិជ្ជកម្មកម្ពុជាបានស្នើសុំភាគីថៃជួយសម្រួលពីរចំណុច ទី1 ពាក់ព័ន្ធការនាំចូលពោតពីកម្ពុជាទៅប្រទេសថៃ និងទី2 សុំប្រទេសថៃធ្វើជាទីឆ្លងកាត់ដឹកទំនិញពីកម្ពុជាទៅកាន់ប្រទេសទី3ផងដែរ។ បញ្ហាធ្លាក់ចុះតម្លៃកសិផលរបស់ប្រជាកសិករកម្ពុជាបានក្លាយជាបញ្ហាប្រឈមជាច្រើនឆ្នាំមកហើយ ដោយក្រសួងពាណិជ្ជកម្ម ក្រសួងកសិកម្ម និងក្រសួងសេដ្ឋកិច្ច និងហិរញ្ញវត្ថុបានជួបប្រជុំគ្នាជាច្រើនលើកដើម្បីដោះស្រាយបញ្ហានេះ ប៉ុន្តែមិនទាន់មានលទ្ធផលជាដុំកំភួននៅឡើយទេ។

រដ្ឋមន្រ្តីក្រសួងកសិកម្មលោកវេង សាខុន បានថ្លែងថា បញ្ហាហេដ្ឋារចនាសម្ព័ន្ធតភ្ជាប់ការដឹកជញ្ជូនមានតម្លៃថ្លៃទាំងផ្លូវគោក និងកំពង់ផែបាននិងកំពុងក្លាយជាបញ្ហាក្នុងការនាំចេញ និងពិបាកទាក់ទាញអ្នកវិនិយោគបរទេសមកវិនិយោគដើម្បីកែច្នៃផលិតផលកសិកម្មកម្ពុជាដើម្បីនាំចេញ។ លោកបន្តថា ការដឹកជញ្ជូនថ្លៃ តម្លៃដើមនៃការផលិតខ្ពស់ និងតម្លៃអគ្គិសនីខ្ពស់បានធ្វើឲ្យអ្នកវិនិយោគមិនមកវិនិយោគនៅកម្ពុជា ដោយពួកគេសម្រេចចិត្តទៅវិនិយោគនៅប្រទេសជិតខាងជំនួសវិញ ព្រោះប្រទេសជិតខាងមានតម្លៃអគ្គិសនីទាប ការដឹកជញ្ជូនមានតម្លៃទាប ធ្វើឱ្យតម្លៃដើមនៃការផលិតទាប៕

ភ្នំពេញ៖ កាលពីពេលថ្មីៗនេះអាជ្ញាធរខេត្តសានស៊ី ប្រទេសចិនបានចុះហត្ថលេខាលើអនុស្សរណៈយោគយល់គ្នាមួយជាមួយកម្ពុជា ដើម្បីទិញកៅស៊ូពីកម្ពុជាចំនួន 300,000តោន ដែលអាចនឹងចាប់ផ្ដើមនាំចូលលើកដំបូងនៅឆ្នាំ2018។
នេះបើតាមការឱ្យដឹងពីថ្នាក់ដឹកនាំក្រសួងពាណិជ្ជកម្មក្នុងជំនួបជាមួយឯកឧត្តមឧកញ៉ា ហ្ចាក់គី សែចិន ដែលដឹកនាំប្រតិភូចិន និងជប៉ុនដើម្បីជួបពិភាក្សាការងារវិនិយោគលើកិច្ចការពាណិជ្ជកម្មនៅកម្ពុជា។

ក្នុងជំនួបនេះឯកឧត្តមឧកញ៉ា ហ្ចាក់គី សែចិន បានជម្រាបជូនឯកឧត្តមរដ្ឋមន្ត្រីក្រសួងពាណិជ្ជកម្មថា គោលបំណងនៃការជួបប្រជុំនេះគឺមាន2ចំណុច ដែលទីមួយគឺ ការធ្វើរបាយការណ៍ស្តីពីការប្រព្រឹត្តទៅនៃមជ្ឍមណ្ឌលពាណិជ្ជកម្មកម្ពុជានៅទីក្រុងស៊ីអាន (Xi’an) ខេត្តសានស៊ី (Shaanxi) ប្រទេសចិន និងទីពីរគឺ ណែនាំវិនិយោគិនជប៉ុនដែលមានបំណងបង្កើតរោងចក្រមួយនៅកម្ពុជាឱ្យស្វែងយល់ពីការវិនិយោគនៅកម្ពុជា។

នៅលើចំណុចទីមួយ ឯកឧត្តមឧកញ៉ា ហ្ចាក់គី សែចិន បានជម្រាបឱ្យដឹងថា មជ្ឈមណ្ឌលពាណិជ្ជកម្មកម្ពុជានៅទីក្រុងស៊ីអានកំពុងតែដំណើរការយ៉ាងសកម្ម ជាពិសេសការដាក់តាំងលក់ផលិតផលកម្ពុជាជូនដល់អតិថិជនចិន។
មជ្ឈមណ្ឌលបានធ្វើការវេចខ្ចប់អង្ករចំនួន 5,000តោន ដែលបានទិញពីកម្ពុជាដោយមិនមានការបង់ពន្ធទៅជាកញ្ចប់តូចៗ ដើម្បីដាក់លក់រាយនៅតំបន់ពាណិជ្ជកម្មសេរីនៅខេត្តសានស៊ី។ បន្ថែមពីនេះទៀត ថ្មីៗនេះខេត្តសានស៊ីបានចុះហត្ថលេខាលើអនុស្សរណៈយោគយល់គ្នាមួយជាមួយកម្ពុជាដើម្បីទិញកៅស៊ូកម្ពុជាចំនួន 300,000តោន ដែលលោកឧកញ៉ាសង្ឃឹមថា នឹងអាចចាប់ផ្ដើមនាំចូលលើកដំបូងក្នុងឆ្នាំ2018។

ចំពោះចំណុចទីពីរវិញលោកឧកញ៉ាបានធ្វើការណែនាំវិនិយោគិនជប៉ុនមួយក្រុមដែលមានបំណងមកបង្កើតរោងចក្រកែច្នៃឈើគាបចេញពីកម្ទេចឈើ សំបកដូងប្រេង និងរុក្ខជាតិដទៃទៀតដើម្បីនាំចេញទៅជប៉ុនវិញសម្រាប់ដុតនៅក្នុងរោងចក្រអគ្គីសនី Biomass។ វិនិយោគិនជប៉ុនបានបន្ថែមឱ្យដឹងថា ក្រុមរបស់លោកកំពុងតែសិក្សាទីតាំងនៅខេត្តព្រះសីហនុ ហើយនឹងរៀបចំចាប់ផ្ដើមសាងសង់នៅពេលខាងមុខ។

ជាការឆ្លើយតប ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានថ្លែងអំណរគុណដល់អ្នកឧកញ៉ា និងក្រុមវិនិយោគិនជប៉ុនដែលមានបំណងបោះទុនវិនិយោគនៅកម្ពុជា ឯកឧត្តមរដ្ឋមន្ត្រីមានសេចក្ដីរីករាយយ៉ាងខ្លាំងចំពោះភាពជោគជ័យរបស់មជ្ឍមណ្ឌលពាណិជ្ជកម្មកម្ពុជា នៅទីក្រុងស៊ីអាន។

ឯកឧត្តមសំណូមពរឱ្យខេត្តស៊ីអានបន្តសហការពាណិជ្ជកម្មឱ្យកាន់តែខ្លាំងថែមទៀតជាមួយនឹងកម្ពុជា ជាពិសេសការទិញបន្ថែមនូវកសិផលិតផលកម្ពុជា និងការបណ្ដុះបណ្ដាលជំនាញកសិកម្ម ដោយសារខេត្តសានស៊ីមានសាលាបណ្ដុះបណ្ដាលកសិកម្មមួយដែលមានជំនាញខ្ពស់លើវិស័យកសិកម្ម។ ចំពោះគម្រោងរោងចក្រកែឆ្នៃឈើគាប ឯកឧត្តមយល់ថា ជាគំនិតដ៏ល្អមួយ ដោយកម្ពុជាមានកម្ទេចឈើ និងកម្ទេចរុក្ខជាតិដទៃទៀតជាច្រើនដែលមិនបានយកមកប្រើប្រាស់ឱ្យមានប្រយោជន៍អ្វីឡើយ។
ម្យ៉ាងវិញទៀតឯកឧត្តមរដ្ឋមន្ត្រីបានមានមតិឱ្យក្រុមហ៊ុនសិក្សាពីការធ្វើចម្ការដាំដើមឈើដើម្បីគាំទ្រដល់ផលិតកម្មរបស់រោងចក្រប្រកបដោយចីរភាពផង៕

បន្ទាប់ពីអ្នកនាងចន ច័ន្ទលក្ខិណា បានសរសរចេញនូវពាក្យប៉ុន្មានឃ្លាដាក់ក្នុងបណ្ដាញសង្គមរួចមក បានធ្វើឱ្យមហាជនមានការយល់ច្រឡំថា នាង និងលោកហេង ឡុង ដែលគេមើលឃើញថា ស្ទើរក្លាយជាប្ដីប្រពន្ធនឹងគ្នាទៅហើយនោះកំពុងតែមានជម្លោះទាស់ទែងគ្នារហូតនាងបណ្ដេញលោកហេង ឡុងចេញពីជីវិតនាង។ សារមួយនេះបានធ្វើឱ្យបុរសម្នាក់ហាក់មានអារម្មណ៍ឈឺឆ្អាលជាមួយលោកហេង ឡុង បានសរសេរពាក្យជាច្រើនដែលគេចាត់ទុកថា ជាការប៉ះពាល់កិត្ដិយសតារាស្រីរូបនេះ។

ក្នុងសាររបស់បុរសម្នាក់ដែលប្រើគណនីហ្វេសប៊ុក ឈ្មោះថា Sem Choeurn បានសរសេរដូច្នេះថា៖«ប្ដីមុនមិនស្រួលលែងចោល ប្ដីក្រោយបណ្ដេញចេញទៀត មិនដឹងប្រុសណាទេទើបធ្វើឱ្យគាត់ស្រួលរហូតនោះ!»។ ជាមួយនឹងពាក្យទាំងប៉ុន្មាននេះបានធ្វើឱ្យគេសន្និដ្ឋានថា អ្នកនាងចន ច័ន្ទលក្ខិណា ប្រាកដជាខឹងនឹងសំណេរបុរសម្នាក់នោះ ខណៈនាងបានតបទៅវិញដោយពាក្យបែបត្រជាក់ស៊ីជ្រៅថា៖«ត្រៀមខ្លួនណាអូន Sem Choeun»។

ដោយសារតែការប្រើពាក្យបែបត្រជាក់តែបង្កប់អត្ថន័យក្ដៅគគុកក្នុងចិត្ដបែបនេះហើយទើបមហាជនជាច្រើនសន្និដ្ឋានថា មិនយូរទេ យ៉ាងច្រើនក្រោយការបោះឆ្នោតជ្រើសរើសប្រធានថ្មីនៃសមាគមសិល្បករខ្មែររួច នាងនឹងចាត់ការតាមផ្លូវច្បាប់ចំពោះបុរសម្នាក់នោះមិនខាន ព្រោះនាងក៏កំពុងតែឈរឈ្មោះជាបេក្ខភាពម្នាក់ផងដែរ។

ផ្ទុយទៅវិញ អ្វីដែលជាការសន្និដ្ឋានរបស់សាធារណជនគឺខុសទាំងស្រុង ខណៈអ្នកនាងចន ច័ន្ទលក្ខិណា បានជាប់ឈ្មោះជាប្រធានសមាគមសិល្បករខ្មែរហើយ នាងបានជ្រើសរើសប្រើសម្ដីយ៉ាងទន់ភ្លន់ប្រាប់មកវិញថា ក្នុងនាមនាងជាប្រធានសមាគមទើបជាប់ឆ្នោតថ្មីនាងនឹងអភិវឌ្ឍស្ថាប័នមួយនេះឱ្យសិល្បៈផ្សារភ្ជាប់ទៅនឹងសង្គម។ ដូច្នេះនាងមិនចាប់ទោសអូសដំណើរយុវជនម្នាក់នោះទេ។

អ្នកនាងចន ច័ន្ទលក្ខិណា បញ្ជាក់ថា៖ «ខ្ញុំអត់ប្ដឹងគាត់ទេ ប្ដឹងធ្វើអី? ផ្ទុយពីការមិនប្ដឹងនេះ ខ្ញុំនឹងសរសេរសារទៅគាត់ក្នុងន័យល្អៗ និងព្យាយាមពន្យល់ឱ្យគាត់បានយល់នូវអ្វីដែលខ្ញុំកំពុងតែធ្វើ ដើម្បីកុំឱ្យគាត់មានការយល់ច្រឡំដូចពេលនេះទៀត»។ នាងបន្ដថា ការពិតនាងគ្រាន់តែសរសេរសារមួយក្នុងន័យចង់ធ្វើវីដេអូ ដើម្បីឱ្យគេយល់អំពីជីវិតលំបាករបស់ស្រ្ដី បន្ទាប់ពីនាងបានស្ដាប់នូវការឈឺចាប់របស់ស្រ្ដីជាច្រើននាក់រួចមក។

គួរបញ្ជាក់ដែរថា ពាក្យដែលអ្នកនាង ចន ច័ន្ទលក្ខិណា ធ្វើឱ្យមហាជនយល់ច្រឡំនោះគឺនាងបានសរសេរថា៖ «ឈប់ពាក់ព័ន្ធជីវិតខ្ញុំ និយាយស្ដាប់គ្នាបានឬអត់? Heng long Heng long បើនិយាយស្ដាប់គ្នាមិនបាន ខ្ញុំblockលោកឯង»។ «Heng long តែសុំលោកចេញឱ្យឆ្ងាយពីជីវិតខ្ញុំ មិនបាច់ជួយShare ទេ» ជាដើម៕

កញ្ញា សួង សាខារ៉ានីត តារាសម្ដែងកំពុងទទួលបានភាពជោគជ័យក្នុងអាជីពសិល្បៈកាលពីពេលថ្មីៗនេះនាងបាន Live ក្នុងគណនីហ្វេសប៊ុក ជុំវិញការឈឺចាប់រឿងស្នេហារបស់ខ្លួន ហើយគ្រានោះក៏មានអ្នកគាំទ្រចូល Like និង Comment ជាច្រើនផងដែរ។

ពាក់ព័ន្ធវិបត្ដិស្នេហានេះមានមនុស្សជាច្រើនពិសេសមិត្ដភ័ក្ដិក្នុងសិល្បៈរបស់នាងមានការស្ងើចសរសើរដល់តារាសម្ដែងរូបនេះជាខ្លាំង ព្រោះនាងជានារីម្នាក់មានចរិតសឿងបឿង ហ៊ានធ្វើ ហ៊ាននិយាយការពិត ព្រោះគ្រាដែលនាងធ្លាប់មានសង្សារ និងធ្លាប់ទទួលរងការឈឺចាប់ដោយសង្សារសុំចែកផ្លូវ នាងហ៊ានប្រាប់ការពិតដល់មហាជនពីជីវិតស្នេហារបស់នាង។

កញ្ញា សួង សាខារ៉ានីត នាងបញ្ជាក់ថា មូលហេតុនាង Live Video និយាយពីវិបត្ដិស្នេហារបស់ខ្លួនដែលបានកើតមានកន្លងមកទៅកាន់អ្នកគាំទ្រនោះ ព្រោះនាងមិនចង់Live នូវអ្វីដែលមិនបានប្រយោជន៍ដល់អ្នកគាំទ្រខ្លួន ដូចជាការផឹកស៊ី ឬចូលក្លឹបកម្សាន្ដនោះឡើយ។ នាងបន្ដថា ការធ្វើបែបនេះវានឹងហុចប្រយោជន៍ជាច្រើន ព្រោះនាងចង់ពន្យល់ដល់យុវវ័យបច្ចុប្បន្នឱ្យចេះពង្រឹងស្មារតី ចេះស្រឡាញ់ខ្លួនឯងក្នុងករណីពួកគេជួបវិបត្ដិស្នេហាដូចរូបនាង។

ដោយសារតែកញ្ញាសួង សាខារ៉ានីត ហ៊ានលាតត្រដាងពីជីវិតពិតនៃវិបត្ដិស្នេហាដ៏ឈឺចាប់របស់ខ្លួន ទើបបានលោកងួន សុបិន្ដ អ្នកនិពន្ធនៅផលិតកម្ម ថោន បានយកជីវិតស្នេហានាងទៅនិពន្ធជាបទចម្រៀងមានចំណងជើងថា «កូនកំលោះនេះជាសង្សារខ្ញុំ» ច្រៀងដោយអ្នកនាងចេន សាយចៃ បទនេះដែរក៏ទទួលបានការគាំទ្រមិនតិចឡើយ។

កញ្ញា សួង សាខារ៉ានីត បន្ដថា៖«ពេលមានវិបត្ដិស្នេហា មានអ្នកខ្លះគាត់យល់ថា ខ្លួនមិនស្អាតទើបគេទៅចោល រហូតឈានទៅដល់ការធ្វើបាបខ្លួនឯង។ នៅពេលខ្ញុំ Live អ៊ីចឹងទៅគាត់សួរថា បងស្អាតអ៊ីចឹងចេះឈឺចាប់រឿងស្នេហាដែរ?។ ការពិតមនុស្សយើងអ្នកស្អាត និងអ្នកមិនស្អាតក៏ចេះឈឺចាប់ដូចគ្នា សំខាន់យើងជួបបញ្ហាត្រូវចេះដោះស្រាយ ស្រឡាញ់ខ្លួនកុំបណ្ដោយខ្លួនឱ្យធ្លាក់ទៅក្នុងពិភពគ្រឿងញៀន ឬឈានទៅដល់ការធ្វើអត្ដឃាតព្រោះរឿងស្នេហាឱ្យសោះ»។
ទោះយ៉ាងណា សាខារ៉ានីតអះអាងថា រឿងដែលនាងបានលើកឡើងជាអតីតកាលទេ បច្ចុប្បន្ននាងពុំមានការឈឺចាប់ជាមួយរឿងនេះទៀតឡើយ ព្រោះនាងមានអ្នកស្រឡាញ់ទៀតហើយ ប៉ុន្ដែនាងនៅតែចាត់ទុកថា គ្មានអ្វីជាការស្ថិតស្ថេរ ឬពិតប្រាកដឡើយ ពោលគឺនាងបានត្រៀមចិត្ដគ្រប់ពេលវេលា។

នៅពេលសួរមួយសំណួរថា កញ្ញានិយាយពីរឿងអតីតនៃស្នេហាបែបនេះ តើអាចធ្វើឱ្យបុរសដែលកំពុងតែស្រឡាញ់កញ្ញាពេញបេះដូងនោះខួចចិត្ដដែរឬទេ? សាខារ៉ានីត តបមកវិញថា ប្រសិនបើគាត់មានចិត្ដបែបហ្នឹង ក៏ពិបាកនឹងស្រឡាញ់គ្នាដែរ ព្រោះវាជារឿងអតីតកាល ហើយនាងត្រូវការបុរសម្នាក់ដែលបើកបេះដូងឱ្យទូលាយ៕