Author: វល័ក្ខ

ដឹងទុកជាចំណេះ…សុជីវធម៌ក្នុងការឱ្យលុយធិបនៅក្រៅប្រទេស
អ្នកណាដែលនិយមចូលចិត្តការទៅដើរលេងកម្សាន្តនៅបរទេស ធ្លាប់នឹកសង្ស័យដែរឬទេថា តើត្រូវចាយលុយធិបតបស្នងថ្លៃសេវាកម្មប៉ុន្មានល្អ និងមិនត្រូវអ្នករត់តុសម្លឹងមុខចោទថាអត់សុជីវធម៌ ឬគិតថាភ្ញៀវចង់អួតខ្លួនថាមានជ្រុលពេក(ករណីឱ្យលុយធិបច្រើនជ្រុល) ដូច្នេះបើអ្នកណាដែលកំពុងនឹកឆ្ងល់នោះ ថ្ងៃនេះ ឡារ៉ែនមានចម្លើយសម្រាប់ចម្ងល់ក្នុងការឱ្យលុយធិបនៅតាមហាងក្នុងបណ្តាប្រទេសល្បីៗមកជម្រាបជូនដូចខាងក្រោម។
1 . ប្រទេសអាល្លឺម៉ង់
ភោជនីយដ្ឋាននៅក្នុងប្រទេសនេះ ទោះជារួមថ្លៃលុយធិបនៅក្នុងវិក្កយបត្រហើយក៏ពិតមែន តែទំនៀមទម្លាប់របស់អាល្លឺម៉ង់គឺ អតិថិជនត្រូវតែចាយបន្ថែមទៀត 5 – 10 % នៃថ្លៃអាហារ និងដែលសំខាន់នោះគឺ ត្រូវឱ្យដោយផ្ទាល់ដៃទៅបុគ្គលិកដោយត្រង់តែប៉ុណ្ណោះ មិនដូច្នោះទេអាចនឹងត្រូវគេសម្លឹងមុខ។
2 . ប្រទេស ប្រេស៊ីល
ភោជនីយដ្ឋានក្នុងប្រទេសប្រេស៊ីលបានគិតថ្លៃបម្រើសេវាកម្ម ឬសឺវីស ឆាច 10 %រួមជាមួយថ្លៃអាហារ និងភេសជ្ជៈស្រាប់ហើយ ដូច្នេះបើអ្នកណាចង់មិនចាយលុយធិបក៏មិនមែនជាការអត់សុជីវធម៌អ្វីដែរ តែបើសិនជាយើងមានអារម្មណ៍ពេញចិត្តនឹងការបម្រើសេវាកម្មរបស់ហាងនោះ អាចចាយថែម 5 – 10 % នៃតម្លៃទាំងអស់បាន ត្រឹមតែប៉ុណ្ណឹងបុគ្គលិកបម្រើតុក៏ញញឹមចង់ប្រេះថ្ពាល់បាត់ទៅហើយ។
3 . ប្រទេស អ៊ីស្រាអែល
ជាប្រទេសដែលគិតថ្លៃសឺវីស ឆាចសាហាវខ្លាំងណាស់ ព្រោះហាងខ្លះគិតច្រើនដល់ទៅ 18 % ឯណោះ តែជាទូទៅហាងនឹងគិតថ្លៃនេះប្រមាណ 10 – 13 % មុនស្រេចហើយ ដូច្នេះយើងមិនចាំបាច់ឱ្យលុយធិបថែមទៀតក៏មិនអីដែរ។
4 . ទីក្រុង ឌូបៃ ប្រទេសអារ៉ាប់រួម
បុគ្គលិកបម្រើសេវាកម្ម (អ្នករត់តុ)នៅឌូបៃបានប្រាក់ខែមិនជាច្រើនប៉ុន្មានទេ ដូច្នេះប្រហែលជាមិនគួរឱ្យអាក្រក់មើលឡើយបើសិនជាអ្នកណាចង់ឱ្យលុយធិបថែមទៅពួកគេ ទោះជាខាងហាងបានគិតថ្លៃសេវាកម្ម 10 %រួចហើយក៏ដោយ។
5 . សាធារណរដ្ឋ ឆេក
ភោជនីយដ្ឋាននៅទីនោះមិននិយមគិតថ្លៃសឺវីស ឆាច តែក៏មិនបានមានន័យថាយើងនឹងមិនចាំបាច់ឱ្យលុយធិបដែរ ព្រោះអ្នកទេសចរត្រូវបានសង្ឃឹមថានឹងឱ្យលុយធិបទៅអ្នកបម្រើតុបន្ថែមប្រមាណជា 5 – 10 % នៃថ្លៃអាហារទាំងអស់ តែបើភ្ញៀវមិនឱ្យលុយធិបអាចនឹងត្រូវអ្នកបម្រើតុសម្លឹងមុខ ធ្វើរាងប្លែកៗដាក់មិនខាន។
6 . ប្រទេស ឥណ្ឌា
អ្នកណាដែលត្រូវចិត្ត និងរីករាយនឹងការបម្រើរបស់បុគ្គលិកក្នុងហាង គួរតែឱ្យធិបផ្ទាល់ដៃទៅបុគ្គលិកម្នាក់នោះតែម្តង ដោយគណនាពីតម្លៃអាហារទាំងអស់ទាបបំផុត 5% តែបើថ្លៃសរុបទាំងអស់មិនលើស 500 រូពីនោះ ក៏ឱ្យធិបច្រើនៗតែម្តងទៅ 10 %។
7 . ប្រទេសដែលមិនខ្វល់ពីរឿងលុយធិប
មិនមែនថាទៅបរទេសហើយត្រូវតែអស់លុយធិបគ្រប់ប្រទេសនោះទេ នៅមានប្រទេសដែលមិនខ្វល់នឹងរឿងលុយធិបសោះក៏មានដែរ ដូចជា ប្រទេស អ៊ីតាលី ជប៉ុន វៀតណាម នីវហ្ស៊ីលែន អូស្ត្រាលី បែលយៀម បារាំង សិង្ហបុរីម៉ាឡេសៀ ចិន និងកោះហុងកុង ដែលទោះជាមិនឱ្យ ក៏មើលទៅជារឿងធម្មតានិងមិនមែនជាការអត់សុជីវធម៌បន្តិចណាឡើយ តែបើពេញចិត្តនឹងការបម្រើសេវាកម្មរបស់បុគ្គលិក អាចតបស្នងទៅវិញដោយលុយធិបបន្តិចបន្តួចក៏ជាការល្អសម្រាប់ពួកគេខ្លាំងណាស់ និងទោះជាមិនមែនជាទំនៀមទម្លាប់របស់ប្រទេសនោះក៏ដោយ តែវាអាចជាការលើកទឹកចិត្តដល់បុគ្គលិកបម្រើតុឱ្យខំប្រឹងធ្វើការយូរតទៅទៀតបាន៕
July 9, 2017
SEM រំពឹងទទួលបានឱកាសពី TMS
បច្ចុប្បន្នតារាចម្រៀង Sem បានផ្លាស់ប្ដូរពីផលិតកម្ម Big Man ទៅក្រុម TMS ដែលជាស្ថាប័នមួយស្ថិតនៅក្រោមការមើលឥទ្ធិពលរបស់ស្ថានីយទូរទស្សន៍ MYTV, CTN និង CNC បើគិតមកដល់ពេលនេះទើបតែមានរយៈពេលប្រមាណជិតពីរខែប៉ុណ្ណោះ ប៉ុន្ដែត្រូវបាន Sem អះអាងថា លោកមានអារម្មណ៍រីករាយ និងកក់ក្ដៅគ្រាដែលលោកមើលឃើញថា ទ្រនំថ្មីនេះអាចផ្ដល់ឱកាសការងារដល់លោកច្រើន។
មុនពេលលោក Sem បានសម្ដែងនូវក្ដីសង្ឃឹមបែបនេះ គេធ្លាប់បានឮអ្នកនាង យុគ ចិន្ដា ប្រាប់រូចមកហើយថា ទោះបីជាសមាជិកក្រុម TMS មានច្រើនក៏ពិតមែន តែនាងនឹងបែងចែកផលប្រយោជន៍ការងារដល់សមាជិកឱ្យបានស្មើៗគ្នា តែទាមទារឱ្យពួកគេមានសមត្ថភាពដើម្បីបង្កើនប្រជាប្រិយភាពក្នុងទីផ្សារ។ វាស្របគ្នាទៅនឹងសមត្ថភាពរបស់តារាសិល្បៈពហុជំនាញ Sem ដែលគេបានដឹងថា ក្រៅពីការប្រើសំនៀងដ៏មានភាពទាក់ទាញហើយនោះ លោកក៏មានទេពកោសល្យក្នុងការសម្ដែងមិនចាញ់តារាសម្ដែងអាជីពដែរ។
លោក Sem បានបញ្ជាក់ប្រាប់ថា លោកមានភាពកក់ក្ដៅជាខ្លាំង បើទោះជាលោកទើបតែបំពេញការងារបានមួយរយៈខ្លីក៏ដោយ។ លោកបន្ដថា ទោះបីជាសមាជិកក្នុងក្រុមមានច្រើនមែន តែលោកមិនដែលមានកង្វល់ទៅលើបញ្ហានេះទេ ផ្ទុយទៅវិញក្រុមមួយដែលមានធនធានមនុស្សច្រើន សុទ្ធតែជាអ្នកខ្លាំងនឹងកាន់តែបង្កើនភាពទាក់ទាញក្នុងទីផ្សារដែលជំរុញឱ្យមានឱកាសការងារកាន់តែច្រើន។
ជាមួយក្ដីរំពឹងនេះ លោកបញ្ជាក់ថា លោកមានសមត្ថភាព2 ដូច្នេះកាន់តែលែងបារម្ភ ព្រោះសមត្ថភាពទាំងនេះកំពុងតែមានតម្រូវការនៅក្នុងទីផ្សារសិល្បៈ ម្យ៉ាងស្ថានីយទូរទស្សន៍ទាំងបីបច្ចុប្បន្នសុទ្ធតែមានផលិតជាភាពយន្ដ ចម្រៀងរបស់ខ្លួនឯងដូច្នេះអ្វីដែលយើងបារម្ភនោះគឺមានតែធ្វើការងារមិនអស់ផង។
Sem បន្ដថា៖«តាំងពីថ្ងៃចូលមកកាន់ TMS ដំបូង ខ្ញុំត្រូវបានអ្នកគ្រប់គ្រងប្រគល់ការងារសម្ដែង Concert ឱ្យទៅហើយ ។ ក្រៅពីនេះការចូលមកហើយត្រូវបានកាន់ក្រុមថ្មីនេះ ក៏ជាឱកាសរបស់ខ្ញុំក្នុងការរៀនសូត្របន្ថែមដើម្បីបង្កើនសមត្ថភាពទៀតដែរ»។
ជាមួយគ្នានេះលោកប្រាប់ថា ទោះលោកមានសមត្ថភាពក្នុងសិល្បៈច្រើនជំនាញពិតមែន ប៉ុន្ដែវាគ្រាន់តែជាទេពកោសល្យពីកំណើត ប្រសិនមានឱកាសពង្រីកសមត្ថភាពបន្ថែមជារឿងល្អសម្រាប់លោកក្នុងការឈានទៅរកសមត្ថភាពស្ដង់ដារអាចបំពេញតម្រូវការទីផ្សារក្នុងស្រុក និងក្នុងតំបន់បាន៕
July 9, 2017
ដំណឹងល្អសម្រាប់ពលរដ្ឋខ្មែរ៖ ការដាក់ឱ្យជាប់ពន្ធអាករ (VAT)10% ត្រូវបានពន្យារពេលហើយ
ភ្នំពេញ៖ អគ្គនាយកដ្ឋានពន្ធដារបានចេញសេចក្តីជូនដំណឹងថ្មីមួយដល់គ្រឹះស្ថានមីក្រូហិរញ្ញវត្ថុទាំងអស់ ដែលកំពុងប្រកបអាជីវកម្មនៅក្នុងព្រះរាជាណាចក្រកម្ពុជាថា ការអនុវត្តបទប្បញ្ញត្តិនៃការផ្គត់ផ្គង់មិនជាប់ពន្ធអាករចំពោះសេវាមូលដ្ឋានខាងហិរញ្ញវត្ថុស្តីពីការណែនាំឱ្យអនុវត្តពន្ធលើតម្លៃបន្ថែមចំពោះការផ្គត់ផ្គង់មិនជាប់អាករត្រូវបានព្យួរការអនុវត្តបណ្តោះអាសន្ន រហូតដល់មានការជូនដំណឹងជាថ្មី។
សេចក្តីជូនដំណឹងចុះហត្ថលេខាដោយលោក គង់ វិបុល ប្រតិភូរាជរដ្ឋាភិបាលទទួលបន្ទុកជា អគ្គនាយកដ្ឋានពន្ធដារបានបញ្ជាក់ថា អគ្គនាយកដ្ឋានពន្ធដារ នឹងបន្តកិច្ចសហប្រតិបត្តិការជាមួយផ្នែកឯកជនដើម្បីពិនិត្យសិក្សាលម្អិតឡើងវិញនូវនិយមន័យនៃពាក្យ «សេវាជាមូលដ្ឋានខាងហិរញ្ញវត្ថុ» និងការអនុវត្តអាករលើតម្លៃបន្ថែមលើសេវាមិនមែនជាមូលដ្ឋានខាងហិរញ្ញវត្ថុក្នុងគោលបំណងធានាបាននូវសង្គតិភាពក្នុងការអនុវត្តច្បាប់ និងបទប្បញ្ញត្តិស្តីពីសារពើពន្ធ ព្រមទាំងគោលនយោបាយរបស់រាជរដ្ឋាភិបាល។
ប្រជាពលរដ្ឋអ្នកប្រើសេវាធនាគារ និងគ្រឹះស្ថានមីក្រូហិរញ្ញវត្ថុបានសាទរចំពោះការដាក់ឱ្យពន្យារពេលនេះ។ លោក ហាក់ សេងហ៊ុយ ប្រជាពលរដ្ឋនៅសង្កាត់ជើងឯក រាជធានីភ្នំពេញ មានប្រសាសន៍ថា ការពន្យារការបង់ពន្ធអាករ (VAT)10%នេះ គឺជាការដកបន្ទុកដ៍ធ្ងន់ធ្ងរសម្រាប់ប្រជាពលរដ្ឋទូទៅដែលជាប់ពន្ធ។
កន្លងមកសាធារណជនមានការព្រួយបារម្មណ៍ចំពោះការដាក់ឱ្យជាប់ពន្ធអាករលើតម្លៃបន្ថែមនេះដោយអះអាងថា ពួកគាត់កំពុងព្រួយបារម្ភដោយសារជាប់បំណុលធនាគារហើយនោះ រដ្ឋាភិបាលបែរជាដាក់ឱ្យជាប់ពន្ធអាករបន្ថែម (VAT)10% ដែលជាការបន្ថែមបន្ទុកមួយដ៍ធ្ងន់ក្នុងគ្រួសារ។ លោកអះអាងថា បើសិនជារដ្ឋាភិបាលលើកលែងពន្ធអាករនេះតែម្តងគឺជារឿងល្អសម្រាប់ប្រជាជនទូទៅ៕
July 9, 2017
ជប៉ុនគ្រោងសង់រោងចក្រផលិតក្តារកៀបចេញពីកម្ទេចឈើនៅកម្ពុជា
ភ្នំពេញ៖ ប្រជាជនខ្មែរភាគច្រើនតែងមើលរំលងពីអត្ថប្រយោជន៍ដ៍អស្ចារ្យរបស់កម្ទេចឈើ ដោយតែងយកវាទៅធ្វើជាជីបណ្តុះកូនឈើ ឬសម្រាប់ដុតបំពក់ភ្លើងចំអិនអាហារ ឬដេញមូសប៉ុណ្ណោះ ប៉ុន្តែដោយមើលឃើញពីអត្ថប្រយោជន៍ថ្មីរបស់វា ក្រុមពាណិជ្ជករជប៉ុនគ្រោងបង្កើតរោងចក្រផលិតក្តារកម្ទេចឈើដ៍ធំមួយនៅក្នុងខេត្តព្រះសីហនុ ប្រទេសកម្ពុជា សម្រាប់នាំចេញទៅលក់នៅក្រៅប្រទេស។
ក្នុងពេលដឹកនាំប្រតិភូវិនិយោគិនចិន និងជប៉ុន មកទស្សនកិច្ចស្តីពីសក្តានុពលវិនិយោគនៅកម្ពុជាអ្នកឧកញ៉ា ហ្ចាក់គី សែចិន បានជម្រាបជូនឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មថា វិនិយោគិនជប៉ុនមានបំណងមកបង្កើតរោងចក្រកែឆ្នៃឈើកៀប ចេញពីកម្ទេចឈើ សម្បកដូងប្រេង និងរុក្ខជាតិដទៃទៀតដើម្បីនាំចេញទៅលក់ជប៉ុនវិញ សម្រាប់ដុតនៅក្នុងរោងចក្រអគ្គិសនី Biomass។
វិនិយោគិនជប៉ុនបានបន្ថែមថា ក្រុមហ៊ុនរបស់លោកកំពុងតែសិក្សាពីទីតាំងនៅខេត្តព្រះសីហនុ ហើយនឹងរៀបចំចាប់ផ្ដើមសាងសង់រោងចក្រនៅពេលឆាប់ៗខាងមុខនេះ ដោយសារតែខេត្តព្រះសីហនុជាខេត្តនៅជាប់មាត់សមុទ្រងាយស្រួលក្នុងការដឹកជញ្ជូនទំនិញចេញចូលទៅក្រៅប្រទេស។
ឆ្លើយតបទៅនឹងការលើកឡើងរបស់ក្រុមវិនិយោគិនជប៉ុនខាងលើ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មមានចំណាប់អារម្មណ៍ជាខ្លាំង ខណៈដែលកម្ពុជាសម្បូរទៅដោយវត្ថុធាតុដើមនៃកម្ទេចឈើ និងសម្បកដូងប្រេង ក៍ដូចជារុក្ខជាតិដទៃទៀត។ ឯកឧត្តមយល់ថា វាជាគំនិតដ៏ល្អមួយដោយកម្ពុជាមានកម្ទេចឈើ និងកម្ទេចរុក្ខជាតិដទៃទៀតជាច្រើន ដែលមិនបានយកមកប្រើប្រាស់ឲ្យមានប្រយោជន៍។ តែយ៉ាងណាក៏ដោយឯកឧត្តមបានជំរុញឱ្យក្រុមហ៊ុនសិក្សាពីការធ្វើចម្ការដាំដើមឈើបន្ថែមដើម្បីគាំទ្រដល់ផលិតកម្មរបស់រោងចក្រប្រកបដោយចីរភាពរយៈពេលវែងផងដែរ៕
July 9, 2017
ភាពរីកចម្រើននៃវិស័យបច្ចេកវិទ្យា ជួយជំរុញសេដ្ឋកិច្ចកម្ពុជា
រដ្ឋលេខាធិការក្រសួងប្រៃសណីយ៍ និងទូរគមនាគមន៍បានឱ្យដឹងថា ចំនួននៃអ្នកប្រើប្រាស់ទូរស័ព្ទចល័តបានកើនឡើងខ្ពស់ ក្នុងនោះការប្រើប្រាស់អ៊ិនធើណិតក៏បានកើនឡើងគួរឱ្យកត់សម្គាល់ដែរ ដែលវាបានរួមចំណែកយ៉ាងសកម្មមួយក្នុងការជំរុញកំណើនសេដ្ឋកិច្ចកម្ពុជាឱ្យមានសម្ទុះទៅមុខជាលំដាប់។
ថ្លែងឱ្យដឹងក្នុងកម្មវិធីសិក្ខាសាលាស្តីពីការវិវឌ្ឍនៃបច្ចេកវិទ្យា 4G LTE រៀបចំដោយក្រសួងប្រៃសណីយ៍ និងទូរគមនាគមន៍សហការជាមួយក្រុមហ៊ុន IDG នៅសណ្ឋាគារសុខាភ្នំពេញលោកជំទាវ រស់ សូរក្ខា បានមានប្រសាសន៍ថា បច្ចុប្បន្នការធ្វើពាណិជ្ជកម្មតាមប្រព័ន្ធអនឡាញ និងការផ្ទេរសាច់ប្រាក់តាមប្រព័ន្ធទូរស័ព្ទចល័តមានការកើនឡើង ដែលទាំងអស់នេះគឺជាការចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ។
លោកជំទាវបន្តថា តាមរយៈការវិវឌ្ឍនៃបច្ចេកវិទ្យាគមនាគមន៍ និងព័ត៌មាននៅក្នុងប្រទេសត្រូវបានផ្សារភ្ជាប់ជាមួយនឹងតម្រូវការរបស់សាធារណជន និងស្របទៅតាមនិន្នាការថ្នាក់តំបន់ និងសកលលោក។ សិក្ខាសាលាស្តីពីការវិវឌ្ឍនៃបច្ចេកវិទ្យា 4G LTEនឹងផ្តោតសំខាន់លើប្រធានបទមួយចំនួនរួមមានការប្រែក្លាយបច្ចេកវិទ្យាឌីជីថលដើម្បីអភិវឌ្ឍហេដ្ឋារចនាសម្ព័ន្ធក្នុងឧស្សាហកម្មបច្ចេកវិទ្យា 4G និងគុណសម្បត្តិ និងគុណវិបត្តិនៃបច្ចេកវិទ្យា 4G ក្នុងទីផ្សារកម្ពុជា។ ទាក់ទិននឹងសិក្ខាសាលានេះដែរ ក៏នឹងក្លាយជាឱកាសជួបជុំគ្នារវាងបណ្តាក្រុមហ៊ុនបច្ចេកវិទ្យាគមនាគមន៍ និងព័ត៌មានក្នុងស្រុកដើម្បីពិភាក្សាគ្នាលើចំណុចសក្តានុពលនៃបច្ចេកវិទ្យាក្នុងការជំរុញការអភិវឌ្ឍវិស័យឧស្សាហកម្ម និងស្វែងរកដៃគូពង្រីកទីផ្សារ។
លោកជំទាវបញ្ជាក់ថា៖ «កម្ពុជា ជាប្រទេសមានសក្តានុពលមួយក្នុងចំណោមប្រទេសដែលមានការអភិវឌ្ឍវិស័យ ICT ជាមួយនឹងចំនួនអ្នកប្រើប្រាស់ទូរស័ព្ទចល័តកើនឡើងខ្ពស់ ហើយការប្រើប្រាស់អ៊ិនធើណិតមានរហូតដល់ទៅជាង 7 លាននាក់។ ទាំងនេះ វាជាកត្តាជំរុញកំណើនសេដ្ឋកិច្ចកម្ពុជាយើងឱ្យទៅមុខបានលឿន»។
ជាមួយគ្នានេះ លោក Anthony Keck នាយកក្រុមហ៊ុនបណ្តុំសម្ព័ន្ធ Havas Riverorchid នៅកម្ពុជា បានឱ្យដឹងដែរថា ចំនួនអ្នកប្រើប្រាស់បណ្តាញអ៊ិនធើណិតជាង 7 លាននាក់កើនឡើង 42% លើសឆ្នាំមុន ហើយចំនួនអ្នកប្រើបណ្តាញទំនាក់ទំនងសង្គមជាទៀងទាត់ស្មើនឹង 5 លានកន្លះ ភាគច្រើនមានគណនី Facebook ដែល90%ប្រើប្រាស់ដោយទូរស័ព្ទដៃ។ លោកបន្ដថា កំណើនដ៏ឆាប់រហ័សនេះហើយ ដែលបណ្ដាលឱ្យក្រុមហ៊ុនលោកសម្រេចបើកក្រុមហ៊ុនSocialyseថ្មីមួយទៀតដែលផ្ដោតសំខាន់លើការផ្សព្វផ្សាយផ្សារម៉ាកយីហោផលិតផលតាមរយៈប្រព័ន្ធឌីជីថលក្នុងប្រទេសកម្ពុជា។
លោកថា៖ «យើងធ្វើការលើវិស័យបច្ចេកវិទ្យាដើម្បីជួយផ្សព្វផ្សាយផ្សារម៉ាកយីហោផលិតផលរបស់ដៃគូយើង អ៊ីចឹងបើនៅទីនេះចំនួនអ្នកប្រើប្រាស់ទូរស័ព្ទដៃ ក៏ដូចជាអ្នកប្រើអ៊ិនធើណិតមិនមានចំនួនគ្រប់គ្រាន់ យើងក៏មិនអាចធ្វើបានដែរ។ ខ្ញុំឃើញថា នៅកម្ពុជា ប្រជាពលរដ្ឋចូលចិត្តភ្ជាប់អ្វីគ្រប់យ៉ាងជាមួយសង្គម និងប្រព័ន្ធឌីជីថល»។
លោកនាយកក្រុមហ៊ុនបន្ថែមទៀតថា ក្នុងឱកាសពិព័រណ៌ INSPIRE អាស៊ាននៅរាជធានីភ្នំពេញកាលពីឆ្នាំ 2016 លោកមានការស្ងើចសរសើរជាខ្លាំងចំពោះល្បឿនអភិវឌ្ឍន៍ឌីជីថល និងការផ្លាស់ប្តូរសង្គមរួមទាំងសង្កេតឃើញថា ទាំងអ្នករៀបចំយុទ្ធសាស្ត្រទីផ្សារ និងអ្នកសារព័ត៌មាន ពិតជាមានចិត្តចង់ចេះចង់ដឹងយ៉ាងជាក់ច្បាស់ក្នុងការបោះជំហានទៅមុខ និងជំរុញអង្គភាពរបស់គេឱ្យចាប់យកបច្ចេកវិទ្យានេះ។ ចាប់ពីពេលនោះមក លោកបានសម្រេចចិត្តដាក់វិនិយោគទុន និងបង្កើតក្រុមការងារដែលមានបទពិសោធ និងទទួលបានការបណ្តុះបណ្តាលត្រឹមត្រូវគ្រប់ផ្នែកទាំងអស់នៃបណ្តាញសង្គម។
រយៈពេលមួយឆ្នាំក្រោយមក លោកឃើញមានអ្នកប្រើប្រាស់បណ្តាញសង្គមយ៉ាងសកម្មបានកើនឡើង 50% ដែលស្មើនឹងមួយភាគបីនៃ ចំនួនប្រជាជនសរុប និង2ភាគ3នៃចំនួនអ្នកប្រើអ៊ិនធើណិតសកម្មដែលមាន 7លាននាក់។
យោងតាមស្ថានភាពបច្ចុប្បន្នមាន ពិតជាមានតម្រូវការនូវអ្នកជំនាញអាជីពពិតប្រាកដដែលអាចដឹកនាំអ្នកធ្វើទីផ្សារ ដើម្បីឱ្យភាពស្មុគស្មាញប្រែក្លាយទៅជាភាពសាមញ្ញ និងណែនាំពួកគេឱ្យប្រើប្រាស់បណ្តាញសង្គមជាប្រយោជន៍ ជាទ្រព្យ ធ្វើយុទ្ធនាការផ្សេងៗ ស្ទង់មតិសង្គម ទំនាក់ទំនងសាធារណៈជាមួយបណ្តាញសង្គម តាមរយៈទម្រង់ខ្លឹមសារដែលមានប្រសិទ្ធភាពអាចសម្រេចការងារបាន។
ជាមួយគ្នានេះដែរ សម្ដេចហ៊ុន សែន ធ្លាប់មានប្រសាសន៍កាលពីពិធីបើកសម្ពោធដាក់ឱ្យប្រើប្រាស់សាកលវិទ្យាល័យសម្តេច ហេង សំរិន ស្ថិតនៅក្នុងខេត្តត្បូងឃ្មុំ កាលពីខែកុម្ភៈ ឆ្នាំ2016ថា ប្រព័ន្ធអ៊ិនធើណិតបានដើរតួយ៉ាងសំខាន់ ក្នុងការផ្ដល់ព័ត៌មាន និងមានប្រសិទ្ធភាពខ្ពស់ដូចជាការប្រើបណ្ដាញសង្គម Facebook ជាដើម។ ការប្រើប្រព័ន្ធអ៊ិនធើណិត អាចឱ្យរដ្ឋាភិបាលដឹងពីកង្វល់ និងបញ្ហារបស់ប្រជាពលរដ្ឋ ហើយឆ្លើយតប និងដោះស្រាយបញ្ហាជូនប្រជាជនវិញបានលឿន។ ដូច្នេះ សម្ដេចក៏បានអំពាវនាវដល់ក្រុមហ៊ុនទូរស័ព្ទចល័ត ខិតខំពង្រីកសេវាអ៊ីនធើណែតបន្ថែមទៅតាមតំបន់ដាច់ស្រយាលដើម្បីឱ្យប្រជាជននៅតាមតំបន់ទាំងនោះ មានលទ្ធភាពអាចប្រើប្រាស់អ៊ិនធើណិត និងប្រើ Facebook បាន។
យោងតាមទិន្នន័យមូលដ្ឋានចេញផ្សាយដោយក្រសួងប្រៃសណីយ៍ និងទូរគមនាគមន៍ខែមិថុនា ឆ្នាំ2016 មានចំនួនអ្នកប្រើប្រព័ន្ធអ៊ិនធើណិត ចំនួនសរុប 7,157,409 នាក់ ដោយក្នុងនោះមានអ្នកប្រើតាមឧបករណ៍ចល័តចំនួន 7,074,483 នាក់ ស្មើនឹង 98.84 % និងអចល័តចំនួន 82,926 នាក់ ស្មើនឹង 1.16 %។ ចំនួនអ្នកប្រើទាំងនោះ សរុបរួមពីក្រុមហ៊ុនចំនួន 8 ដែលផ្ដល់សេវាអ៊ិនធើណិត រួមមាន Smart Axiata , Viettel, CamGSM, Sotelco, XinWei, South East Asia Telecom, Cadcomms និង Star Digital MUDS TV។ ក្នុងនោះ មានអ្នកប្រើប្រាស់ទូរស័ព្ទចល័ត 19,484,692 (98,79 % នៃចំនួនអ្នកប្រើប្រាស់សរុប) និងមានអ្នកប្រើប្រាស់ទូរស័ព្ទអចល័ត 238,118 (1,21% នៃចំនួនអ្នកប្រើប្រាស់សរុប) ហើយមានចំនួនអ្នកប្រើប្រាស់សរុបធៀបទៅនឹងចំនួនប្រជាជន 133%៕
July 9, 2017
វិធី5យ៉ាងជួយបន្ថយអាការឈឺធ្មេញ
ពេលខ្លះអាការឈឺធ្មេញធ្វើឱ្យយើងខឹងមួម៉ៅ ឬជួនកាលឈឺរហូតដល់ចង់វិលមុខ ឈឺក្បាលគិតអ្វីមិនចេញទៀតផង នៅក្នុងស្ថានការណ៍ដែលយើងមិនអាចទៅពេទ្យធ្មេញបានទាន់ពេលវេលានោះ អាចនឹងត្រូវទ្រាំឈឺមួយរយៈ តែ ឡារ៉ែន មានវិធីបន្ថយអាការឈឺធ្មេញនេះបានដោយវិធី5យ៉ាងដូចខាងក្រោម។
1.កុំទទួលទានអាហារដែលនាំឱ្យឈឺធ្មេញ
កាត់បន្ថយនូវអ្វីដែលមានផលធ្វើឱ្យធ្មេញឈឺកាន់តែខ្លាំងឡើង ដូចជា ទទួលទានរបស់ត្រជាក់ខ្លាំង (ទឹកកក ការ៉េម), របស់ក្តៅខ្លាំង (ទឹកក្តៅ កាហ្វេក្តៅ និងអាហារក្តៅៗជាដើម) និងអាហារដែលមានរសជាតិផ្អែមខ្លាំង ឬជូរខ្លាំង។
2.កុំធ្វើឱ្យប៉ះទង្គិចដល់ធ្មេញដែលកំពុងឈឺ
កាត់បន្ថយការធ្វើឱ្យប៉ះទង្គិចដល់ធ្មេញដែលកំពុងឈឺ ពីព្រោះអាការឈឺធ្មេញនឹងកាន់តែកម្រើកខ្លាំងឡើង បើធ្មេញដែលឈឺនោះត្រូវបានធ្វើឱ្យប៉ះទង្គិចញឹកញាប់ វិធីងាយៗគឺ ទទួលទានអាហារណាដែលមិនចាំបាច់ទំពាខ្លាំងៗ និងវិធីមួយទៀតគឺ ទំពានៅធ្មេញម្ខាងទៀត។
3.យកកម្ទេចអាហារចេញពីធ្មេញ
បើអាការឈឺនោះបណ្តាលមកពីមានកម្ទេចអាហារ វិធីល្អបំផុតគឺប្រញាប់យកកម្ទេចអាហារទាំងនោះចេញឱ្យបានលឿនបំផុត ដោយការប្រើខ្សែសម្អាតធ្មេញ (Dental Floss) កុំប្រើឈើចាក់ធ្មេញ។
4.ប្រើទឹកក្តៅឧណ្ហៗជាជំនួយ
បើធ្មេញពុកមានប្រហោង សរសៃប្រសាទធ្មេញហើម និងមានខ្ទុះនៅជើងធ្មេញ ហើយមើលឃើញអាការហើមស្ទុលនៅលើថ្គាមនោះ ការប្រើទឹកក្តៅឧណ្ហៗជួយស្អំពីខាងក្រៅ នឹងជួយជម្រុញឱ្យការហូរខ្ទុះចេញមកខាងក្រៅឆាប់អស់ ជួយឱ្យអាការឈឺធ្មេញឆាប់បាត់កាន់តែលឿនឡើងថែមទៀតផង។
5.ប្រេងធាងម្លូ
ប្រេងធាងម្លូ ជាឱសថដែលជួយកាត់បន្ថយអាការឈឺធ្មេញបាន ដោយយកសំលីជ្រលក់ប្រេងធាងម្លូ ហើយយកញ៉ុកចូលក្នុងប្រហោងធ្មេញដែលឈឺ នោះប្រេងធាងម្លូនឹងបញ្ចេញឫទ្ធិជាថ្នាំបំបាត់ការឈឺចាប់បានភ្លាមតែម្តង។
វិធីការដែលណែនាំខាងលើនេះ ជាវិធីជួយ
ឱ្យអ្នកបាត់ខឹងមួម៉ៅ ដោយសារការឈឺធ្មេញក្នុងករណីដែលមិនអាចទៅជួបជាមួយគ្រូពេទ្យបានតែប៉ុណ្ណោះ មិនមែនជាវិធីព្យាបាលឡើយ ដូច្នេះបើអ្នកមានឱកាសហើយ គួរតែប្រញាប់ទៅជួបនឹងគ្រូពេទ្យ ដើម្បីទទួលយកការព្យាបាលដែលត្រឹមត្រូវទើបជាការប្រសើរ៕
July 9, 2017
Hi-Herb បានបរិច្ចាគ ៤០លានរៀលដល់មន្ទីរពេទ្យគន្ធបុប្ផា
នាថ្ងៃទី 07 កក្កដាកន្លងទៅនេះ ក្រុមហ៊ុន Lion Corporation (Thailand) Limited និង TSNP Distribution Co., LTD ជាក្រុមហ៊ុននាំចូល និងចែកចាយផលិតផលម៉ាក Hi-Herb មានសេចក្ដីសោមនស្សរីករាយ ដោយបានអញ្ជើញអតិថិជនរបស់ខ្លួនចូលរួមកម្មវិធីមនុស្សធម៌ «3L LIFE. LOVE. LAUGH #2» ដោយមានការសហការរួមគ្នារវាង ហាយ-ហើប និងស៊ូគូប៊ូសុ ដោយបាននាំយកថវិកា ៤០លានរៀលជូនដល់មន្ទីរពេទ្យគន្ធបុប្ផា៕
July 8, 2017
ធនាគារពិភពលោក៖ មនុស្សជាង 1ពាន់លាននាក់គ្មានអគ្គិសនីប្រើ
នៅក្នុងឆ្នាំ 2014 ធនាគាពិភពលោកបានចេញរបាយការណ៍របស់ខ្លួនដោយបញ្ជាក់ថា មានមនុស្សប្រមាណ 15% លើពិភពលោកដែលប្រហែលជាស្មើនឹង 1.1ពាន់លាននាក់កំពុងរស់នៅក្នុងស្ថានភាពដែលគ្មានភ្លើងអគ្គិសនីប្រើប្រាស់។
ប្រជាជនដែលត្រូវបានគេរកឃើញថាគ្មានអគ្គិសនីប្រើប្រាស់ទាំងអស់នោះ មានជិតពាក់កណ្តាលនៃចំនួនសរុបមកពី Sub-Saharan Africa និងប្រមាណ 1/3 នៃចំនួនអ្នកគ្មានអគ្គិសនីប្រើប្រាស់មានលំនៅដ្ឋាននៅអាស៊ីខាងត្បូង។
ប្រទេសចំនួន 4 ត្រូវបានគេកត់សម្គាល់ឃើញថា មានចំនួនប្រជាជនខ្វះចរន្តអគ្គិសនីច្រើននោះគឺ ប្រទេស ឥណ្ឌា នីហ្សេរីយ៉ា អេត្យូពី និងបង់ក្លាដែស៕
July 8, 2017
ខ្សែប្រយុទ្ធ Walters ចេញពីក្លិប Stoke City មកចូលរួមជាមួយ Burnley
ក្លិប Burnley បានចុះហត្ថលេខាជាមួយនឹងខ្សែប្រយុទ្ធអន្តរជាតិសាធារណរដ្ឋអៀរឡង់ Jon Walters ពីក្លិប Stoke City ក្នុងតម្លៃខ្លួនមួយដែលអាចនឹងកើនដល់3លានផោន (ស្មើនឹង4លានដុល្លារអាមេរិក)។ Walters វ័យ33ឆ្នាំ បានចុះហត្ថលេខារយៈពេល2ឆ្នាំ ក្រោយពីបានចំណាយពេល7ឆ្នាំជាមួយនឹងក្លិប Stoke ដោយស៊ុតបាល់បញ្ចូលទីបាន 62គ្រាប់ ក្នុងការបង្ហាញខ្លួន 269លើក។ រូបគេនឹងក្លាយជាកីឡាករចំណូលថ្មីទី2 របស់ក្លិប Burnley បន្ទាប់ពីការនាំចូលខ្សែការពារ Charlie Taylor ពីក្លិប Leeds របស់ក្របខ័ណ្ឌ Championship។
ការផ្ទេររបស់ Walters មានន័យថា Burnley បច្ចប្បន្ន មានកីឡាករអន្តរជាតិសាធាណរដ្ឋអៀរឡង់ដល់ទៅ5នាក់ក្នុងក្រុមរបស់ពួកគេ។ រូបគេនឹងចូលរួមជាមួយនឹងខ្សែការពារ Stephen Ward , Kevin Long , ខ្សែបម្រើ Jeff Hendrick និង Robbie Brady នៅឯកីឡដ្ឋាន Turf Moor។
ខ្សែប្រយុទ្ធ Andre Gray របស់ក្លិប Chelsea ដែលបានបដិសេធមិនបន្តកុងត្រាថ្មីរបស់ខ្លួននោះ ក៏ត្រូវបានទាក់ទងជាមួយនឹងការផ្ទេរក្នុងតម្លៃខ្លួន15ផោនផងដែរ ទៅកាន់ក្លិប West Ham របស់ក្របខ័ណ្ឌ Premier League៕
ប្រភពពី៖ BBC
July 8, 2017
រដ្ឋាភិបាលបង្កើតក្រុមប្រឹក្សាលេខាធិការដ្ឋានភ័ស្តុភារកម្មដើម្បីដោះស្រាយបញ្ហា
ភ្នំពេញៈ ឆ្លើយតបនឹងកង្វល់ហេដ្ឋារចនាសម្ព័ន្ធ ការដឹកជញ្ជូនថ្លៃ និងនិតិវិធីធ្វើការនៅតែស្មុគស្មាញ រដ្ឋាភិបាលកម្ពុជាបាន និងកំពុងរៀបចំបង្កើតក្រុមប្រឹក្សាជាតិភ័ស្តុភារកម្ម ដើម្បីឆ្លើយតបនឹងបញ្ហាប្រឈមក្នុងវិស័យនេះ និងផ្តល់ចក្ខុវិស័យសម្រាប់អភិវឌ្ឍកម្ពុជារយៈពេលវែង។
លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានថ្លែងឲ្យដឹងតាមទូរស័ព្ទនាព្រឹកថ្ងៃទី8 កក្កដានេះថា បច្ចុប្បន្ននេះក្រសួងកំពុងធ្វើសេចក្តីព្រាងព្រះរាជក្រឹត្យដើម្បីបង្កើតក្រុមប្រឹក្សាជាតិនេះជិតបញ្ចប់ហើយ មុនដាក់ឆ្លងក្រុមប្រឹក្សាអ្នកច្បាប់ទីស្តីការគណៈរដ្ឋមន្រ្តី ដើម្បីបញ្ជូនទៅសុំការយល់ព្រមពីសម្តេចតេជោ និងដាក់ឆ្លងឡាយព្រះហស្តលេខាពីព្រះមហាក្សត្រ។លោកបន្តថា ក្រុមប្រឹក្សាជាតិភ័ស្តុភារកម្មនឹងមានការចូលរួមពីថ្នាក់ដឹកនាំពីក្រសួងពាក់ព័ន្ធមួយចំនួនដូចជា ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងផែនការ ក្រសួងកសិកម្ម និងក្រសួងសាធារណការ និងដឹកជញ្ជូន។
លោកបន្តថា ក្រុមប្រឹក្សានេះមានគោលដៅសំខាន់ចំនួន3 រួមមានរៀបចំសម្របសម្រួលផែនការហេដ្ឋារចនាសម្ព័ន្ធរបស់ជាតិ ការផ្គត់ផ្គង់ផែស្ងួត សម្របសម្រួលការដឹកជញ្ជូន ការស្តុកទុកទំនិញ ការចែកចាយ និងកាត់បន្ថយតម្លៃនៃការដឹកជញ្ជូន រៀបចំផែនការមេដើម្បីឆ្លងគណៈកម្មការប្រតិបត្តិ និងដោះស្រាយសម្របសម្រួលការដឹកជញ្ជូន ការកាត់បន្ថយថ្លៃដើម ហើយប្រសិនជាគណៈកម្មការនេះមិនអាចដោះស្រាយបាន នឹងបញ្ជូនទៅសម្តេចតេជោដើម្បីពិនិត្យ និងសម្រេច។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា នេះជារឿងវិជ្ជមានមួយ ប៉ុន្តែអ្វីសំខាន់គឺថា តើបន្ទាប់ពីបង្កើតក្រុមប្រឹក្សានេះរួច អាចធ្វើបានឬអត់ជារឿងមួយទៀត ព្រោះនៅកម្ពុជាមានបង្កើតស្ថាប័នច្រើន តែស្ថាប័នទាំងនោះមិនអាចដំណើរការបាន។
លោកបន្តថា ក្រុមប្រឹក្សានេះជាកន្លែងសម្រាប់ធ្វើការប្រទាក់ក្រឡារវាងរដ្ឋាភិបាល ផ្នែកឯកជន អ្នកស្រាវជ្រាវ សង្គមស៊ីវិល និងបង្កើតជាផែនការមេសម្រាប់ការវិនិយោគរយៈពេលវែង។ លោកបន្តថា យើងមានបញ្ហាទាក់ទងនឹងភ័ស្តុភារកម្ម និងlogistic កាន់តែច្រើនទៅៗ ប៉ុន្តែសំខាន់ថាតើកម្ពុជាមានធនធានមនុស្សគ្រប់គ្រាន់ដើម្បីធ្វើការងារនេះដែរឬទេ?។
លោកបណ្ឌិត ម៉ី កល្យាណ បានបន្តថា “ទោះជាយ៉ាងណាកម្ពុជាមានភាពរីកចម្រើន និងកំពុងដើរលើផ្លូវត្រឹមត្រូវហើយក្នុងការងារនេះ យើងមានសង្ឃឹម តែយើងត្រូវធ្វើច្រើនបន្ថែមទៀត”៕
July 8, 2017