Author: វល័ក្ខ

ប្រាសាទសំបូរព្រៃគុកនឹងទាក់ទាញទេសចរណ៍កាន់តែច្រើន
ភ្នំពេញៈ វិស័យឯកជនផ្នែកទេសចរណ៍បានលើកឡើងថា ការចូលក្នុងបញ្ជីបេតិកភណ្ឌពិភពលោករបស់ប្រាសាទសំបូរព្រៃគុកនឹងធ្វើឲ្យប្រាសាទនេះរឹតតែទាក់ទាញភ្ញៀវទេសចរជាតិ និងអន្តរជាតិទៅទស្សនាប្រាសាទនេះកាន់តែច្រើន។
លោកស្រីឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានថ្លែងឲ្យដឹងតាមទូរស័ព្ទកាលពីព្រឹកថ្ងៃទី10 កក្កដានេះថា ការចូលក្នុងបញ្ជីសម្បត្តិបេតិកភណ្ឌវប្បធម៌ពិភពលោករបស់អង្គការយូណេស្កូ នឹងធ្វើឲ្យភ្ញៀវទេសចរជាតិ-អន្តរជាតិ ពិសេសភ្ញៀវទេសចរអឺរ៉ុបនឹងទៅទស្សនាប្រាសាទសំបូរព្រៃគុកកាន់តែច្រើន ហើយនឹងជាការបង្ហាញជូនភ្ញៀវទេសចរថា កម្ពុជាមិនត្រឹមតែមានប្រាសាទអង្គរវត្តប៉ុណ្ណោះទេ តែកម្ពុជានៅមានប្រាសាទជាច្រើនទៀតដែលទាក់ទាញ។
លោកស្រីបន្តថា ពីមុនមកប្រាសាទសំបូរព្រៃគុកមិនត្រូវបានដាក់បញ្ចូលក្នុងកញ្ចប់ទេសចរណ៍រយៈពេលខ្លីទេ គឺទាល់តែភ្ញៀវមកស្នាក់នៅកម្ពុជាចាប់ពី4យប់ឡើងទៅ ទើបការីទេសចរណ៍ដាក់ប្រាសាទនេះចូលក្នុងខ្សែទស្សនកិច្ចរបស់ខ្លួន ដោយសារតែភ្ញៀវខ្លះមិនយល់ មិនដឹងពីរតនសម្បត្តិរបស់កម្ពុជា ប៉ុន្តែនៅពេលប្រាសាទសំបូរព្រៃគុកបានចូលក្នុងបញ្ជីបេតិកភណ្ឌពិភពលោកហើយនោះ នឹងរឹតតែធ្វើឲ្យភ្ញៀវទេសចរអន្តរជាតិចាប់អារម្មណ៍ ចង់ដឹង ចង់ឃើញ ចង់ជ្រួតជ្រាបសិក្សាស្វែងយល់កាន់តែច្រើនឡើងមិនខាន។
ទីប្រឹក្សាសភាពាណិជ្ជកម្មកម្ពុជា និងជានាយកក្រុមហ៊ុនទេសចរណ៍ World Express Tours& Travel លោក ហូ វណ្ឌី បានថ្លែងថា បន្ទាប់ពីរយៈពេល9ឆ្នាំនៃការដាក់បញ្ចូលប្រាសាទព្រះវិហារចូលក្នុងបញ្ជីបេតិកភណ្ឌពិភពលោករួចមក កម្ពុជាបានដាក់ប្រាសាទសំបូរព្រៃគុកជាសម្បតិ្តបេតិកភណ្ឌពិភពលោកមួយទៀត ដែលធ្វើឲ្យកម្ពុជាកាន់តែមានភាពល្បីល្បាញលើផ្នែកទេសចរណ៍ប្រាង្គប្រាសាទ ដែលប្រាសាទនេះបានបន្សល់ទុកតាំងពីសតវត្សរ៍ទី7 មកម្ល៉េះ។ ពិតជាវិសេសវិសាលណាស់!។
លោកបន្តថា “ចំនួនភ្ញៀវទេសចរអន្តរជាតិនឹងមកទស្សនាប្រាសាទនេះកាន់តែច្រើនបន្ទាប់ពីដាក់បញ្ចូលជាសម្បត្តិបេតិកភណ្ឌពិភពលោក ប៉ុន្តែការទទួលបានភ្ញៀវច្រើន ឬតិច វាអាស្រ័យលើការីទេសចរណ៍ជាតិ និងអន្តរជាតិមានឆន្ទៈជួយជ្រោមជ្រែងផងដែរ”។ លោកបន្តថា “ពីមុនមកមានភ្ញៀវអឺរ៉ុបចាប់អារម្មណ៍ប្រាសាទនេះច្រើនដែរ ហើយយើងក៏បានដាក់ប្រាសាទនេះចូលក្នុងកញ្ចប់ទស្សនកិច្ចភ្ជាប់ជាមួយប្រាសាទកោះកេរ្តិ៍ មុនបន្តទៅកាន់ក្រុងសៀមរាប”។
លោកហូ វណ្ឌី បានបន្តថា ពីមុនមកការឈប់សំចតនៅក្រុងស្ទឹងសែនមិនសូវមាននោះទេ ព្រោះខេត្តនេះគ្រាន់តែជាតំបន់ឆ្លងកាត់ប៉ុណ្ណោះ ប៉ុន្តែប្រសិនជាអាជ្ញាធរខេត្ត មន្ទីរទេសចរណ៍រៀបចំខេត្តឲ្យមានភាពទាក់ទាញ មានភាពស្រស់ស្អាត មានអនាម័យ ពិសេសរៀបចំភោជនីយដ្ឋាន និងទូកជិះកម្សាន្តនៅតាមដងស្ទឹងសែននោះ លោកជឿថា ភ្ញៀវទេសចរអាចនឹងសម្រាកលម្ហែនៅក្នុងខេត្តនេះ ហើយវានឹងផ្តល់ផលចំណូលដោយផ្ទាល់ដល់ប្រជាពលរដ្ឋ និងអាជ្ញាធរខេត្តដោយផ្ទាល់ និងប្រយោលផងដែរ៕
July 10, 2017
ស្លាកស្នាមក្រោយកើតមុនអាចបំបាត់បានទេ?
វាជារឿងមួយសំណាងណាស់ ប្រសិនបើស្បែករបស់អ្នកមិនដែលបន្សល់ទុកនូវស្លាកស្នាមបន្ទាប់ពីកើតមុនរួច ប៉ុន្តែសំណាងនេះមិនកើតមានចំពោះមនុស្សស្រីភាគច្រើននោះទេ ហេតុដូច្នេះហើយបានជាពួកគាត់តែងតែខិតខំធ្វើគ្រប់មធ្យោបាយ ដើម្បីការពារកុំឱ្យកើតមុន ក៏ដូចជាខិតខំប្រើប្រាស់ផលិតផលជាច្រើនប្រភេទទាំងផលិតផលបែបធម្មជាតិ និងលាយជាតិគីមី ដើម្បីបំបាត់ចោលនូវរាល់ស្លាកស្នាមដែលនឹងកើតមានឡើងបន្ទាប់ពីកើតមុនរួច។
ស្លាកស្នាមអាចកើតមាននៅលើស្បែក ដោយសារតែវាជារឿងធម្មតាដែលតែងតែកើតឡើង ឬអាចបណ្តាលមកពីការព្យាបាលដែលមិនត្រឹមត្រូវ រហូតបណ្តាលឱ្យក្លាយជាស្លាកស្នាម។ស្នាមដែលកើតមានបន្ទាប់ពីកើតមុនរួចនេះបណ្តាលមកពីការបំផ្លាញនៃស្រទាប់ស្បែក។
ស្នាមដែលបន្សល់ទុកក្រោយកើតមុនជាទូទៅតែងតែកើតមាននៅលើមុខ ខ្នង ស្មា និងផ្នែកផ្សេងទៀតនៃរាងកាយ។ ស្នាមទាំងនេះត្រូវបានចែកចេញជាពីរប្រភេទគឺ ស្នាមសើៗលើស្បែកនិងស្នាមដែលចូលជ្រៅទៅក្នុងសាច់។ ស្នាមសើៗនៅលើស្បែកជាស្នាមតូចៗដែលអាចមើលឃើញតាមរយៈការឆ្លុះកញ្ចក់ពិនិត្យមើល ហើយការព្យាបាលក៏មានប្រសិទ្ធភាពខ្ពស់ដែរ ប៉ុន្តែប្រសិនបើវាជាស្នាមជ្រៅវិញនោះ (ស្នាមធំខូងជ្រៅទៅក្នុងស្បែក) វាមានការពិបាកក្នុងការព្យាបាល ឬអាចនឹងព្យាបាលមិនបាត់តែម្តង ប្រសិនបើអ្នកមិនរួសរាន់ក្នុងការព្យាបាលវាទេនោះ។
ការព្យាបាលតាមបែបគីមី ៖ ការព្យាបាលបែបនេះភាគច្រើនត្រូវបានយកមកអនុវត្តសម្រាប់អ្នកដែលមានស្នាមជ្រៅ (ទទួលបានលទ្ធផលល្អច្រើន) ហើយរយៈពេលនៃការព្យាបាលគឺអាស្រ័យលើទំហំ និងជម្រៅនៃស្លាកស្នាម។ ប្រសិនបើអ្នកចង់ទទួលការព្យាបាលតាមបែបគីមីដែរនោះ អ្នកគួរតែស្វែងរកអ្នកដែលមានជំនាញច្បាស់លាស់ក្នុងការព្យាបាលទើបជាការប្រសើរ។
ការព្យាបាលដោយឡាស៊ែរ ៖ នេះក៏ជាវិធីព្យាបាលមួយទៀតដែលតែងតែផ្តល់នូវប្រសិទ្ធភាពសម្រាប់អ្នកដែលមានបញ្ហាស្នាមគ្រប់ប្រភេទ ជាពិសេសស្នាមធំៗ ឬខូងចូលជ្រៅទៅក្នុងសាច់ជាដើម។
ការព្យាបាលដោយផលិតផលកម្ចាត់ស្នាម ៖ វាអាចមិនមានប្រសិទ្ធភាពលឿនដូចការព្យាបាលដោយគីមី ឬដោយឡាស៊ែរនោះទេ ប៉ុន្តែវាមានភាពងាយស្រួល ហើយសូមកុំបារម្ភខ្លាំងពេកអីព្រោះបច្ចុប្បន្ននេះមានផលិតផលខ្លះមានសមត្ថភាពខ្ពស់ណាស់ ក្នុងការជួយព្យាបាលបញ្ហាស្នាមហើយក៏មិនប្រើពេលវេលាយូរពេកនោះដែរ។
ព្យាបាលតាមបែបធម្មជាតិ ៖ ភាគច្រើនការព្យាបាលស្នាមដែលកើតមានបន្ទាប់ពីកើតមុនរួចតាមវិធីធម្មជាតិត្រូវបានគេអនុវត្តនៅពេលវាទើបតែកើតថ្មីៗ ហើយជាស្នាមដែលមានទ្រង់ទ្រាយតូច។ មិនពិបាកណាស់ណាទេ បើអ្នកចង់ព្យាបាលដោយវិធីធម្មជាតិ ដោយធ្វើតាមដំណាក់កាលមួយចំនួនដូចជា លាងសម្អាតមុខឱ្យស្អាត ជូតមុខឱ្យស្ងួត រួចយកសំឡីមួយដុំតូចជ្រលក់ក្នុងទឹកក្រូចឆ្មារដែលមានលាយជាមួយទឹកបន្តិច មកជូតពីលើស្បែកត្រង់កន្លែងដែលមានស្នាម រួចទុកចោល15នាទី ឬពេញមួយយប់ក៏បាន បន្ទាប់មកសឹមលាងសម្អាតចេញជាការស្រេច។ វិធីនេះអាចប្រើពេលវេលាយូរបន្តិចហើយ តែទទួលបានលទ្ធផលជាទីពេញចិត្តបន្ទាប់ពីព្យាបាលរួច៕
July 10, 2017
ទូរស័ព្ទ Nokia 3 និង Nokia 5 ប្រើប្រព័ន្ធ Android ចេញលក់ព្រឹកនេះហើយ
បន្ទាប់ចេញលក់ទូរស័ព្ទ Nokia 3310 កាលពីចុងខែមុន ជាមួយនឹងការគាំទ្រយ៉ាងច្រើនសន្ទឹករួចមក ទូរស័ព្ទ Nokia ប្រើប្រាស់ប្រព័ន្ធ Android ចំនួន 2 ស៊េរីទៀតត្រូវបានក្រុមហ៊ុនដាក់លក់ហើយក្នុងទីផ្សារកម្ពុជា នៅព្រឹកថ្ងៃទី10 ខែកក្កដា ឆ្នាំ2017 នេះ។
តាមការឱ្យដឹងពីអ្នកតំណាងក្រុមហ៊ុន Nokia ប្រចាំកម្ពុជាបានឱ្យដឹងថា ទូរស័ព្ទ Nokia 3 និង Nokia 5 បានចេញលក់ហើយនៅព្រឹកថ្ងៃនេះ។ ទូរស័ព្ទ Nokia 5 មានទំហំអេក្រង់ 5.2 អ៊ីញ មានសមត្ថភាពបង្ហាញរូបភាពបានក្នុងកម្រិត HD ឬ 720p។ បំពាក់មកជាមួយនូវឈីប CPU របស់ Qualcomm លេខ Snapdragon 430 SoC អមមកជាមួយ RAM ទំហំ 2GB និងមានកាមេរ៉ាខាងក្រោយទំហំ 13 MP ដំណើរការដោយ Android ជំនាន់ចុងក្រោយគេ Nougat និងមានតម្លៃ 193 ដុល្លារ។
ដោយឡែកទូរស័ព្ទ Nokia 3 អេក្រង់ IPS ទំហំ 5.0 អ៊ីញ ប្រភេទ HD ស្រោបដោយផ្ទៃកញ្ចក់ Corning® Gorilla® និងមានកាមេរ៉ាមុខ-ក្រោយ ទំហំ 8MP ដាក់លក់ក្នុងតម្លៃ 143 ដុល្លារ។ អតិថិជនទាំងអស់គ្នាអាចរកជាវបាននៅគ្រប់ហាងលក់ទូរស័ព្ទទូទាំងប្រទេសចាប់ពីថ្ងៃនេះតទៅ៕
July 10, 2017
ផ្លូវរថភ្លើងភ្ជាប់ប្រទេសថៃ និងកម្ពុជាអាចនឹងចាប់ផ្តើមឆ្នាំ2018
ភ្នំពេញៈ បណ្តាញខ្សែរថភ្លើងអាស៊ានដែលភ្ជាប់រវាងទីក្រុងបាងកក និងរាជធានីភ្នំពេញនឹងដំណើរការនៅឆ្នាំ2018 ខាងមុខនេះ ប្រសិនជាគ្មានអ្វីប្រែប្រួលទេនោះ។
លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានថ្លែងឲ្យដឹងតាមទូរស័ព្ទកាលពីចុងសប្តាហ៍មុនថា ការជួសជុល និងស្ថាបនាផ្លូវរថភ្លើងពីក្រុងប៉ោយប៉ែតនឹងមកដល់ខេត្តពោធិសាត់នៅឆ្នាំនេះ ហើយបើសិនជាមានថវិកាគ្រប់គ្រាន់ ការតភ្ជាប់ផ្លូវរថភ្លើងពីក្រុងប៉ោយប៉ែតនឹងមកដល់រាជធានីភ្នំពេញនៅឆ្នាំ2018 ខាងមុខនេះ។ លោកបន្តថា ការស្ថាបនា និងជួសជុលផ្លូវរថភ្លើងនេះគ្រោងចំណាយថវិកាចំនួន32លានដុល្លារអាមេរិក ដែលជាការចំណាយដោយរដ្ឋាភិបាល។
អ្នកនាំពាក្យរូបនេះបានបន្តថា ប្រសិនជាការភ្ជាប់ផ្លូវនេះបញ្ចប់ យើងរំពឹងថាខ្សែរថភ្លើងពីប្រទេសថៃនឹងមកដល់រាជធានីភ្នំពេញនៅឆ្នាំ2018 ខាងមុខ ដោយរថភ្លើងអាចរត់បានក្នុងល្បឿន30គីឡូម៉ែត្រក្នុងមួយម៉ោង។ លោកបន្តថា បច្ចុប្បន្នយើងនៅជួបឧបសគ្គមួយចំនួនដោយសារប្រជាពលរដ្ឋ បានរំលោភយកដីចំណីផ្លួវរថភ្លើងនៅក្រុងប៉ោយប៉ែតប្រវែង1,300ម៉ែត្រ ដែលមិនទាន់ដោះស្រាយបញ្ចប់នៅឡើយ។
លោកហូ វណ្ឌី ទីប្រឹក្សាសភាពាណិជ្ជកម្មកម្ពុជាបានថ្លែងថា ប្រសិនជាការភ្ជាប់ខ្សែរថភ្លើងរវាងប្រទេសទាំងពីរបញ្ចប់ និងដាក់ឲ្យដំណើរការនោះ វានឹងក្លាយជាការភ្ជាប់ដ៏ថ្មីសន្លាងមួយ ជាប្រវត្តិសាស្រ្តថ្មីមួយដែលជួយបានច្រើនបំផុតដល់វិស័យទេសចរណ៍ និងពាណិជ្ជកម្មរវាងប្រទេសទាំងពីរ ពិសេសនឹងជាការភ្ជាប់ទេសចរណ៍ទី3 មកកាន់កម្ពុជាកាន់តែច្រើនបន្ថែមទៀត។ លោកបន្តថា គម្រោងភ្ជាប់ព្រះរាជាណាចក្រពីរក្នុងគោលដៅតែមួយនឹងលេចចេញជារូបរាងពិតប្រាកដ ហើយភ្ញៀវទេសចរនឹងចូលមកទស្សនាកម្ពុជាកាន់តែមានរយៈពេលវែង។
លោកហូ វណ្ឌីបានបន្តថា ក្រៅពីវិស័យទេសចរណ៍ហើយ ការភ្ជាប់ខ្សែរថភ្លើងនេះនឹងជួយសម្រួលដល់វិស័យពាណិជ្ជកម្ម ពិសេសការដឹកជញ្ជូនទំនិញរវាងប្រទេសទាំងពីរ និងប្រទេសក្នុងតំបន់អាស៊ានដទៃទៀតកាន់តែងាយស្រូល ដែលនឹងជួយកាត់បន្ថយតម្លៃនៃការដឹកជញ្ជូន កាត់បន្ថយគ្រោះថ្នាក់ចរាចរណ៍ និងកាត់បន្ថយការសឹករេចរឹលផ្លូវគោកផងដែរ៕
July 10, 2017
Chelsea បំពេញការចុះហត្ថលេខាជាមួយ Rudiger ដែលមកពី Roma
ក្លិបតោខៀវ Chelsea បានបំពេញការចុះហត្ថលេខាជាមួយនឹងខ្សែការពារ Antonio Rudiger ដែលមកពីក្លិប Roma ស្របពេលដែលកីឡាករអន្តរជាតិអាល្លឺម៉ង់រូបនេះមានតម្លៃខ្លួន34លានផោន (ស្មើនឹង44លានដុល្លារអាមេរិក)។ Rudiger ដែលអាចលេងក្នុងតំបន់ការពារកណ្តាល ឬតំបន់ការពារស្លាបស្តាំនោះបានចុះហត្ថលេខារយៈពេល5ឆ្នាំ ហើយនិងក្លាយជាកីឡាករចំណូលថ្មីទី2របស់ក្លិប Chelsea នៅរដូវក្តៅដ៏មមាញឹកនេះ។
វត្តមានរបស់គេ នឹងធ្វើការពង្រឹងនៅតំបន់ការពារសម្រាប់ក្រុមរបស់លោក Antonio Conte ក្រោយពីខ្សែការពារ Nathan Ake បានទៅចូលរួមជាមួយនឹងក្លិប Bournemouth ក្នុងតម្លៃខ្លួន20លានផោន និង John Terry ត្រូវបានអនុញ្ញាតឲ្យចាកចេញនៅពេលបញ្ចប់កិច្ចសន្យារបស់គេ។ Rudiger វ័យ 24ឆ្នាំ ត្រូវបានទាក់ទងជាមួយនឹងការផ្ទេរទៅកាន់ក្លិប Chelsea កាលពីរដូវកាលមុន មុននឹងរងរបួសលើជង្គង់ស្តាំរបស់គេក្នុងពេលហ្វឹកហាត់។ Rudiger បានឲ្យដឹងថា៖ «វាជាអារម្មណ៍ដ៏អស្ចារ្យមួយពីព្រោះមិនមែនរាល់កីឡាករទាំងអស់សុទ្ធតែមានឱកាសក្នុងការចូលរួមជាមួយនឹងក្លិបដ៏ធំមួយបែបនេះឡើយ។
ខ្ញុំកំពុងតែសម្លឹងឆ្ពោះទៅមុខដើម្បីជួបជាមួយនឹងមិត្តរួមក្រុមថ្មីរបស់ខ្ញុំ ហើយខ្ញុំពិតជាមានមោទនភាពណាស់ក្នុងការក្លាយជាកីឡាករ Chelsea ជាផ្លូវការ»។
លោក Michael Emenalo ប្រធានផ្នែកបច្ចេកទេសរបស់ Chelsea បានឲ្យដឹងថា៖ « Rudiger ជាកីឡាករវ័យក្មេង ប៉ុន្តែ ពោរពេញដោយបទពិសោធក្នុងកម្រិតក្លិប និងអន្តរជាតិ។ រូបគេមានរាល់ឥរិយាបថទាំងអស់ដែលយើងត្រូវការជាចាំបាច់ក្នុងការលេងក្នុងក្របខ័ណ្ឌ Premier League»៕
ប្រភពពី៖ ESPN
July 10, 2017
រៀបការពេលអាយុចន្លោះ 28-31ឆ្នាំ ជីវិតគូនឹងស្ថិតស្ថេរយូរអង្វែង
អ្នកសង្គមវិទ្យានៃមហាវិទ្យាល័យ យូថាហ៍ សហរដ្ឋអាមេរិក បានបង្ហាញពីលទ្ធផលនៃការសិក្សាស្រាវជ្រាវមួយដែលបានរកឃើញថាក្នុងអំឡុងអាយុចន្លោះពី 28-32ឆ្នាំ គឺជាវ័យដែលស័ក្តិសមសម្រាប់ការរៀបអាពាហ៍ពិពាហ៍ខ្លាំងបំផុត ព្រោះជាអំឡុងវ័យដែលស្គាល់ពីអារម្មណ៍របស់ខ្លួនឯង រកឃើញដំណើរជីវិត និងមានភាពទទួលខុសត្រូវក្នុងកម្រឹតមួយហើយ។ ការស្រាវជ្រាវបានរកឃើញផងដែរថាអ្នកដែលរៀបការក្រោយអាយុ ៣២ឆ្នាំ មានអត្រាការលែងលះកើនឡើង ខណៈដែលគូស្នេហ៍វ័យជំទង់អាយុ ១៥-១៩ឆ្នាំ លែងលះគ្នាច្រើនបំផុត។
ទស្សនាវដ្តី ថាម បានរាយការណ៍ពីលទ្ធផលនៃការសិក្សាស្រាវជ្រាវរបស់ និគ វូហ្វ៊ីងហ្គើរ៍ អ្នសង្គមវិទ្យាដែលបានរកឃើញថា អំឡុងអាយុដែលស័ក្តិសមសម្រាប់ការចាប់ផ្តើមជីវិតគូនោះគឺ 28-32ឆ្នាំ ដោយអ្នកស្រាវជ្រាវបាននាំយកព័ត៌មានការពិនិត្យពីសភាវគ្រួសារជនជាតិអាមេរិកក្នុងចន្លោះឆ្នាំ 2006-2010 និង 2011-2015 មកវិភាគ និងរកឃើញថាគូអាពាហ៍ពិពាហ៍ដែលស្ថិតក្នុងវ័យនេះមានអត្រាការលែងលះទាបជាងអ្នកដែលរៀបការក្នុងវ័យផ្សេងទៀត ជាពិសេសក្នុងអំឡុងពេល 5ឆ្នាំក្រោយពេលរៀបការមានអត្រាការចែកផ្លូវគ្នាតិចបំផុត។
វូហ្វ៊ីងហ្គើរ៍បានអធិប្បាយថា ហេតុផលដែលមនុស្សវ័យ 28-32 ឆ្នាំស័ក្តិសមល្អក្នុងការរៀបការនោះមានច្រើនចំណុច ដូចជា៖
-មនុស្សវ័យនេះធំគ្រប់គ្រាន់ក្នុងការដឹងទាន់ពីអារម្មណ៍របស់ខ្លួនឯងថា តើខ្លួនចូលចុះជាមួយដៃគូបានមែនឬគ្រាន់តែជាអារម្មណ៍រំជើបរំជួលរបស់អ័រម៉ូន?
-រូបគេ ឬនាងបានជ្រើសរើសដំណើរផ្លូវជីវិតដែលខ្លួនឯងត្រូវការហើយ និងចាប់ផ្តើមមានភាពទទួលខុសត្រូវចំពោះរឿងផ្សេងៗហើយ។
-មានស្ថិរភាពខាងហិរញ្ញវត្ថុបានមួយកម្រិតហើយ។
-នៅមិនទាន់ចាស់ជ្រុលក្នុងការសម្របសម្រួលខ្លួន កែសម្រួលនិស្ស័យ ឡៃហ្វ៍ស្តាយល៍ ជីវិតរស់នៅប្រចាំថ្ងៃ -ល- ឱ្យចូលគ្នាជាមួយដៃគូឡើយ ដែលនេះគឺជារឿងសំខាន់ណាស់ក្នុងការមានជីវិតគូ។
អ្នកខ្លះអាចហៅការសិក្សាស្រាវជ្រាវនេះថាជា ទ្រឹស្តីមាសរបស់ការរៀបការ ដែលគូរអាពាហ៍ពិពាហ៍ត្រូវតែមិនក្មេង ឬចាស់ជ្រុលពេក ក្រៅពីនេះនៅមានហេតុផលជាច្រើនទៀតដែលគាំទ្រថា ក្នុងអំឡុងអាយុ 20ឆ្នាំក្រាស់ និង 30ឆ្នាំ ស្តើងគឺជាអំឡុងពេលដ៏ល្អក្នុងការចាប់ផ្តើមជីវិតអាពាហ៍ពិពាហ៍ជាមួយនរណាម្នាក់នោះ អ្នកសង្គមវិទ្យាពីមហាវិទ្យាល័យ យូថា អះអាង។
វូហ្វីងហ្គើរ៍ បានបន្ថែមទៀតថា គូអាពាហ៍ពិពាហ៍ដែលទទួលជោគជ័យក្នុងជីវិតគូ ភាគច្រើនៗតែជាគូដែលស្គាល់ពីនិស្ស័យចិត្តថ្លើមគ្នា។
ការរៀបអាពាហ៍ពិពាហ៍ក្នុងអំឡុងវ័យ 15-19ឆ្នាំ នឹងធ្វើឱ្យកើតមានការលែងលះច្រើនបំផុត បន្ទាប់មកគឺក្នុងអំឡុងវ័យ 20-24ឆ្នាំ 28-32ឆ្នាំ តាមលំដាប់ ក្រៅពីនេះ មានបច្ច័យជាច្រើនទៀតដែលអ្នកសង្គមវិទ្យាជឿថា នឹងជួយឱ្យជីវិតគូស្ថិតស្ថេរយូអង្វែងនោះ មានដូចជា ស្ថិរភាពខាងផ្នែកហិរញ្ញវត្ថុការសិក្សាដែលល្អ ការរៀបការមុនមានបុត្រ-ល- សុទ្ធតែមានចំណែកធ្វើឱ្យគូអាពាហ៍ពិពាហ៍មានជីវិតប្រកបដោយសុភមង្គលនិងគង់វង្សស្ថិតស្ថេរយូរអង្វែងបានទាំងអស់៕
July 10, 2017
ទីបំផុត! សុបិនរបស់ Lukaku បានក្លាយជាការពិត ក្រោយពីបានបំពេញការផ្ទេរទៅ Man United
ខ្សែប្រយុទ្ធ Romelu Lukaku បានទទួលស្គាល់ថា រូបគេមិនអាចច្រានចោលឱកាសក្នុងការចូលរួមជាមួយនឹងក្លិបបិសាចក្រហម Manchester United បានឡើយ។ ខ្សែប្រយុទ្ធអន្តរជាតិបែលហ្ស៊ិករូបនេះ បានបំពេញការត្រួតពិនិត្យសុខភាពរបស់គេកាលពីព្រឹកថ្ងៃសៅរ៍រួចហើយ មុននឹងបំពេញការផ្ទេររបស់គេកាលពីថ្ងៃអាទិត្យនេះក្នុងតម្លៃខ្លួន 75លានផោន (ស្មើនឹង 97លានដុល្លារអាមេរិក) ខណៈដែលតម្លៃខ្លួននេះអាចនឹងកើនដល់ 90លានផោន បើបូកទាំងប្រាក់ឧបត្ថម្ភផ្សេងៗទៀតផងនោះ។
Lukaku បានច្រានចោលឱកាសក្នុងការវិលទៅកាន់ក្លិប Chelsea ដើម្បីបានទៅចូលរួមលេងក្រោមការដឹកនាំរបស់លោក Jose Mourinho ម្តងទៀតនៅឯកីឡដ្ឋាន Old Trafford ក្រោយពីរូបគេបានផ្ទេរទៅកាន់ក្លិប Everton ក្នុងតម្លៃខ្លួន 28លានផោន។ Lukaku បានប្រាប់ទូរទស្សន៍ ESPN ថា៖ «នេះគឺជាឱកាសមួយដែលខ្ញុំតែងតែចង់បានតាំងពីខ្ញុំនៅវ័យក្មេងម្ល៉េះ»។ ខ្សែប្រយុទ្ធរូបនេះបានប្រាប់បន្តថា៖ «នៅពេលដែល Manchester United បានចូលមកដាក់សំណើ ខ្ញុំមិនចាំបាច់គិតពីរដងឡើយ។ ខ្ញុំពិតជារីករាយណាស់ក្នុងការស្ថិតជាផ្នែកមួយនៃប្រវត្តិសាស្ត្ររបស់ពួកគេ។ តើនរណាអាចនិយាយថា ទេ ចំពោះក្លិបដ៏ធំបំផុតក្នុងពិភពលោកមួយនេះ? នេះគឺជាឱកាសយ៉ាងល្អឥតខ្ចោះមួយ។ ពួកគេមានកីឡដ្ឋានដ៏ល្អបំផុតនៅអង់គ្លេស និងអ្នកគាំទ្រដ៏ច្រើនបំផុត។ ខ្ញុំបានកំណត់គោលដៅរួចជាស្រេចហើយ ខ្ញុំមិនមើលថយក្រោយឡើយ»។
Lukaku បានបន្ថែមទៀតថា៖ «ខ្ញុំតែងតែនិយាយថា ខ្ញុំចង់លេងឲ្យក្រុមមួយដែលប្រជែងដណ្តើមរាល់ពានទាំងអស់ដែលមាន។ ខ្ញុំគិតថា Manchester United ចង់ក្លាយជាក្រុមខ្លាំងដាច់គេ។ នៅពេលនេះ វាដល់ពេលក្នុងការធ្វើការងារយ៉ាងលំបាកហើយ ពោលគឺធ្វើការងារលំបាកជាងកាលពីមុន ហើយខ្ញុំពិតជាចង់ធ្វើបែបនេះខ្លាំងណាស់»៕
ប្រភពពី៖ The Mirror
July 10, 2017
Rooney ចេញពី Man United វិលទៅកាន់ក្លិប Everton វិញ
ខ្សែប្រយុទ្ធ Wayne Rooney ដែលជាអ្នករកគ្រាប់បាល់បានច្រើនជាងគេរបស់ក្លិបបិសាចក្រហម Manchester United បានបំពេញការផ្ទេររបស់គេទៅកាន់ក្លិបកាលពីកុមារភាពរបស់គេគឺ Everton វិញ កាលពីថ្ងៃអាទិត្យ ដើម្បីបញ្ចប់ការលើកឡើងផ្សេងៗអំពីអនាគតរបស់គេ។
Rooney បានចុះហត្ថលេខារយៈពេល២ឆ្នាំជាមួយនឹងក្លិបទូកក្តោង Everton សម្រាប់តម្លៃខ្លួនបិទជិតមួយ ដើម្បីបញ្ចប់រយៈពេល13របស់គេនៅកីឡដ្ឋាន Old Trafford និងដើម្បីវិលទៅកាន់ក្លិប Everton វិញ ក្រោយពីរូបគេបានចាកចេញកាលពីឆ្នាំ2004។ Rooney បានសរសេរនៅលើបណ្តាញសង្គម Facebook កាលពីថ្ងៃអាទិត្យថា៖ «ខ្ញុំពិតជារំភើបណាស់ក្នុងការវិលទៅកាន់ក្លិបកីឡាបាល់ទាត់ Everton វិញ។ ខ្ញុំពិតជាស្រេកឃ្លានក្នុងការជួបជាមួយនឹងលោក Ronald Koeman និងកីឡាករផ្សេងៗទៀត»។ លោក Koeman ដែលជាអ្នកចាត់ការទូទៅរបស់ Everton បានឲ្យដឹងថា៖ «Wayne បានបង្ហាញឲ្យខ្ញុំឃើញពីមហិច្ឆតាដែលយើងត្រូវការ និងស្មារតីនៃការទទួលជ័យជម្នះ។ រូបគេដឹងពីរបៀបនៃការឈ្នះពាន ហើយខ្ញុំពិតជារីករាយណាស់ដែលរូបគេបានសម្រេចចិត្តក្នុងការវិលត្រឡប់មកផ្ទះវិញ។
រូបគេស្រឡាញ់ក្លិប Everton ហើយរូបគេពិតជាសង្ឃឹមក្នុងការវិលត្រឡប់មកវិញ។ រូបគេកំពុងតែស្ថិតក្នុងវ័យ31ឆ្នាំប៉ុណ្ណោះ ហើយខ្ញុំពិតជាមិនមានការសង្ស័យទៅលើគុណភាពរបស់គេឡើយ។ វាពិតជាអស្ចារ្យណាស់ដែលរូបគេមកទីនេះ»។
Rooney បានចាកចេញ ក្រោយពីបានស៊ុតបាល់បញ្ចូលទី253គ្រាប់ ក្នុងការបង្ហាញខ្លួន559លើកសម្រាប់ក្រុមបិសាចក្រហម ហើយរូបគេបានឈ្នះពានក្របខ័ណ្ឌ Premier League 5លើក និងបានលើកពានក្នុងក្របខ័ណ្ឌ Europa League, Champions League និង FA Cup ទៀតផង៕
ប្រភពព័ត៌មាន៖ Sport24
July 10, 2017
ចំណាយតិចជាង 5នាទីក្នុងមួយថ្ងៃ ដើម្បីសម្រកខ្លាញ់ក្បាលពោះ
រាងស្អាត ស្លៀកពាក់អ្វីក៏សមគឺជាបំណងប្រាថ្នារបស់នារីគ្រប់រូប ហេតុនេះការថែរក្សារូបរាងឱ្យស្វែលស្រឡូនស្អាតគឺជាអ្វីដែលនារីភាគច្រើនតែងយកចិត្តទុកដាក់។ វិធីនៃការកាត់បន្ថយសារជាតិខ្លាញ់នៅក្នុងរាងកាយជាច្រើនត្រូវបានយកមកអនុវត្ត ប៉ុន្តែមានពេលខ្លះអ្នកអាចនឹងត្រូវចំណាយពេលវេលាយូរក្នុងការអនុវត្ត តែបែរជាមិនទទួលបានផ្លែផ្កាទៅវិញ។ តាមរយៈវិធីដែល ឡារ៉ែន ផ្តល់ជូនខាងក្រោមនេះ អ្នកចំណាយពេលតិចជាង5នាទីប៉ុណ្ណោះក្នុងមួយថ្ងៃ ដើម្បីសម្រកខ្លាញ់ក្បាលពោះយ៉ាងមានប្រសិទ្ធភាព។
ដោយគ្រាន់តែយកទឹកឃ្មុំសុទ្ធ1ស្លាបព្រាកាហ្វេលាយជាមួយនឹងទឹកក្រូចឆ្មារ2ស្លាបព្រាកាហ្វេ (បើអាចយកវាទៅដាក់កម្តៅឱ្យក្តៅបន្តិចកាន់តែប្រសើរ) មកទទួលទានរៀងរាល់ពេលភ្ញាក់ពីដំណេកនាពេលព្រឹកព្រលឹម មុនទទួលទានអាហារពេលព្រឹក និងក្រោយពេលទទួលទានអាហារណាដែលមានជាតិខ្លាញ់ច្រើនរួចតែប៉ុណ្ណោះ អ្នកនឹងទទួលបាននូវរូបរាងដ៏ស្រឡូនស្អាត មិនមានខ្លាញ់នៅក្បាលពោះដ៏គួរឱ្យស្អប់នោះទេ។
បើងាកមកគិតទៅដល់ពេលវេលានៃការលាយទឹកឃ្មុំ និងទឹកក្រូចឆ្មារវិញ យើងសង្កេតឃើញថា វាមានរយៈពេលខ្លីបំផុត គឺអាចនឹងមិនដល់5នាទីផង តែប្រសិទ្ធភាពរបស់វាគឺលើសពីការគិតរបស់អ្នកទៅទៀតចំពោះការសម្រកខ្លាញ់ក្បាលពោះ។ វិធីសាស្ត្រផ្សេងទៀតដែលអ្នកអាចសាកល្បង ដើម្បីឱ្យខ្លាញ់នៅបរិវេណក្បាលពោះរាបស្មើនោះគឺ ការទទួលទានផ្លែឈើមួយចំនួនដូចជា ផ្លែប្លូបឺរី ផ្លែប៊័រ ផ្លែប៉ោម ផ្លែក្រូច ផ្លែចេក ផ្លែម្នាស់ ផ្លែល្ហុងទុំ និងផ្លែទទឹមជាដើម។
បន្ថែមពីលើការទទួលទានទឹកឃ្មុំ ឬផ្លែឈើមួយចំនួនខាងលើនេះ អ្នកគួរតែចំណាយពេល5នាទីបន្ថែមពីលើទម្លាប់ហាត់ប្រាណដែលអ្នកធ្លាប់ធ្វើពីមុនមក ដោយចាប់ផ្តើមអនុវត្តនូវរបៀបហាត់ប្រាណដែលអាចជួយសម្រកខ្លាញ់ក្បាលពោះបានដូចជា ការជិះកង់ ការហែលទឹក និងការហាត់ប្រាណជាមួយបាល់ជាដើម។ បន្ទាប់ពីបានអានពីវិធីសាស្ត្រ ខ្លីៗខាងលើហើយនោះ ឡារ៉ែន សង្ឃឹមថា មិត្តនារីៗដែលមានបញ្ហាខ្លាញ់ក្បាលពោះ ឬនារីៗដែលចង់សម្រកទម្ងន់ទាំងអស់ អាចចាប់ផ្តើមអនុវត្តតាមវិធីនេះបាន ដើម្បីប្តូរពីក្បាលពោះធំមានខ្លាញ់ច្រើន មកជាក្បាលពោះដែលរាបស្មើស្រស់ស្អាតដូចតារាម៉ូឌែលវិញ៕
July 10, 2017
អារម្មណ៍ប្រែប្រួលក្នុងអំឡុងតាំងគភ៌ដំបូងៗ និងវិធីទប់ទល់
បញ្ហាស្ត្រីមានគភ៌ នៅពេលដែលអនាគតអ្នកម្តាយថ្មោងថ្មីចាប់ផ្តើមតាំងគភ៌ដំបូងៗ ច្រើនតែមានអាការឆាប់ខឹងមួម៉ៅ និងមានអារម្មណ៍ប្រែប្រួល តែស្ត្រីមានគភ៌ទាំងឡាយកុំអាលកង្វល់ចិត្តអី ព្រោះអាការទាំងនេះនឹងកើតឡើងក្នុងអំឡុង3ខែដំបូងប៉ុណ្ណោះឯង តែត្រូវអាស្រ័យលើកម្លាំងចិត្តអ្នកដែលនៅក្បែរខ្លួន ជាពិសេសអនាគតលោកឪពុក គឺជាកម្លាំងចិត្តសំខាន់បំផុត។ ថ្ងៃនេះ ឡារ៉ែន មានគន្លឹះល្អៗក្នុងការត្រៀមទប់ទល់ក្នុងអំឡុងពេលមានគភ៌ដំបូងៗមកជម្រាបអនាគតអ្នកម្តាយ និងលោកឪពុកដូចតទៅ។
នៅពេលដែលដឹងពិតប្រាកដហើយថា មានគភ៌… ក្តីត្រេកអរតែងតែចេញមកលាយឡំជាមួយក្តីកង្វល់ រឹតតែនៅក្នុងសង្គមព័ត៌មានផងនោះ រឹតតែអាន រឹតមានអារម្មណ៍ថាភ័យព្រួយឡើង ដូចជា “តើខ្ញុំនឹងធ្វើបានទេ?” “តើខ្ញុំនឹងធ្វើយ៉ាងណាតទៅទៀត?” ជាដើម។ គួបផ្សំជាមួយការប្រែប្រួលរបស់រាងកាយ និងផ្លូវចិត្តរបស់ស្ត្រីមានគភ៌ខ្លួនឯងដែលត្រូវប្រឈមទៀតផង តែមិនចាំបាច់កង្វល់ទេអនាគតអ្នកម្តាយថ្មោងថ្មីទាំងឡាយ គ្រាន់តែតាំងស្មារតី ហើយដកដង្ហើមវែងៗ យល់ដឹងអំពីកម្មវិធីការប្រែប្រួលរបស់រាងកាយ និងផ្លូវចិត្ត ដឹងពីបញ្ហាច្បាស់ ក៏អាចកែខៃបានដែរ។
តាំងគភ៌ដំបូងៗ ជាមួយអារម្មណ៍ប្រែប្រួល
នៅពេលចាប់ផ្តើមមានផ្ទៃពោះក្នុង3ខែដំបូងភាពប្រែប្រួលផ្សេងៗ មិនថាតែអាការនឿយល្វើយ ក្អួតចង្អោរ រមាស់ក្បាលដោះ និងអារម្មណ៍ដែលផ្លាស់ប្តូរខុសពីមុនយ៉ាងស្រឡះ ជួនកាលមានអារម្មណ៍ថា មានសេចក្តីសុខតែមួយភ្លែត ក៏សោកសៅវិញភ្លាមតែម្តង ដោយសារតែមានការកង្វល់ពីការតាំងគភ៌របស់អ្នកម្តាយថ្មោងថ្មី និងបញ្ហាជាច្រើនដែលខ្លួនបារម្ភ ដូចជា មិនដឹងជាប្រសូតបុត្រយ៉ាងណា ឬមើលថែទាំកូនយ៉ាងណា-ល- ក្នុងអំឡុងពេលនេះត្រូវអាស្រ័យកម្លាំងចិត្តពីអ្នកដែលនៅក្បែរខ្លួន ជាពិសេសស្វាមីគឺជាមនុស្សដែលសំខាន់បំផុត។
ប្រើពេលវេលាមិនយូរទេនឹងសម្របសម្រួលខ្លួនបានមិនខាន
បន្ទាប់ពីការសម្របសម្រួលខ្លួនពេញមួយរយៈពេល3ខែមកហើយនិងឈានចូលខែទី3-6 ស្ត្រីមានគភ៌នឹងចាប់ផ្តើមស៊ាំធ្លាប់ជាមួយតួនាទី “ខ្ញុំគឺជាស្ត្រីមានគភ៌” ហើយ។ ស្ត្រីមានគភ៌ភាគច្រើនចាប់ផ្តើមមានអារម្មណ៍ធូរស្រាលឡើង ចាប់ផ្តើមរៀនយល់ដឹងពីភាពផ្លាស់ប្តូរដែលកើតឡើងបានងាយជាងមុន មានអារម្មណ៍ដឹងពីជីវិតតូចមួយដែលនៅក្នុងគភ៌របស់ខ្លួន ពេលកូនរើបំរះគឺជាវិនាទីដែលអស្ចារ្យបំផុតដែលពិបាកនឹងបរិយាយអំពីអត្ថន័យរបស់ភាពជាម្តាយ និងកូនខ្លាំងណាស់។
ជិតប្រសូត សុំឱបម្តងទៀត
នៅពេលភាពអីុកអ៊ាកមកដល់ រាងកាយរបស់ស្ត្រីមានគភ៌ចាប់ផ្តើមមានសាច់មានឈាម និងមានទម្ងន់ខ្លួនច្រើនឡើង ដើរហើរ ចាប់កាន់អ្វីលែងងាយស្រួល ជួយខ្លួនឯងលែងសូវបានដូចមុន រឹតតែជិតប្រសូត ក៏រឹតតែមានកង្វល់រឿងការប្រសូត ខ្លាចកូនមិនរឹងប៉ឹង និងកង្វល់ជាច្រើនរឿងទៀត។
ការយកចិត្តទុកដាក់ និងកម្លាំងចិត្តគឺជារឿងសំខាន់ មនុស្សនៅជុំវិញខ្លួនគឺជាថ្នាំលើកកម្លាំងដែលធ្វើឱ្យស្ត្រីមានគភ៌អាចសម្របសម្រួលអារម្មណ៍ក្នុងមួយថ្ងៃៗបានយ៉ាងមានសេចក្តីសុខ ជាពិសេសស្វាមីគួរយកចិត្តទុកដាក់ថែទាំភរិយាមានគភ៌ជាពិសេស កុំឱ្យមានការតូចចិត្តជាដាច់ខាត គួរប្រើពាក្យសំដីដែលផ្តល់នូវភាពជឿជាក់ថា នឹងនៅក្បែរគ្នាជាកម្លាំងថាមពលវិជ្ជមានដល់អ្នកម្តាយឱ្យឆ្លងផុតអ្វីៗគ្រប់យ៉ាងទៅបានយ៉ាងសុវត្ថិភាព។
បើសិននៅពេលណាដែលស្ត្រីមានគភ៌មានអារម្មណ៍មិនសប្បាយ ចិត្ត ឬមានកង្វល់នោះ សាកល្បងប្រើវិធីបែបងាយៗដែលអាចធ្វើបានដោយខ្លួនឯងគ្រប់ពេលវេលា ដូចជា ការអង្គុយសម្រាកបន្ធូរអារម្មណ៍ឱ្យសប្បាយៗនៅក្នុងទីកន្លែងដែលខ្លួនចូលចិត្ត ក្នុងបន្ទប់ដែលមានខ្យល់អាកាសចេញចូលល្អ សម្រាកបន្ធូរសាច់ដុំគ្រប់ផ្នែក បិទភ្នែកយឺតៗ ដកដង្ហើមចេញចូលវែងយឺតៗ នឹកដល់តែរឿងរ៉ាវល្អៗ ទិដ្ឋភាពដែលស្អាតៗ ម្តងៗប្រមាណជា5-10នាទី ព្រមជាមួយសំឡេងបទភ្លេងស្រាលៗ នោះស្ត្រីមានគភ៌នឹងបានជួបនឹងសេចក្តីសុខដែល មាននៅក្បែរៗខ្លួនមិនខាន៕
July 9, 2017