Author: វល័ក្ខ

Theo សប្បាយចិត្ត ក្រោយផ្ទេរពី Atletico ទៅ Real រួចរាល់
Theo Hernandez បាននិយាយថា រូបគេពិតជារីករាយណាស់ក្នុងការស្ថិតនៅជាមួយក្លិបដ៏អស្ចារ្យបំផុតក្នុងពិភពលោក ក្រោយពីត្រូវបានប្រកាសថាជាកីឡាករចំណូលថ្មីដំបូងគេរបស់ក្លិប Real Madrid នារដូវក្តៅនេះ។
ខ្សែការពារវ័យ19ឆ្នាំរូបនេះបានផ្ទេរមកពីក្លិបស្ថិតក្នុងទីក្រុង Atletico ក្នុងតម្លៃខ្លួន30លានអឺរ៉ូ(ស្មើនឹង34.14លានដុល្លារអាមេរិក) ក្រោយពីក្លិប Real បានចំណាយប្រាក់ទិញរំលាយកិច្ចសន្យារបស់គេ។ ខ្សែការពារសញ្ជាតិបារាំងរូបនេះមិនបានលេងឲ្យក្រុម Atletico របស់លោក Diego Simeone ទេ ប៉ុន្តែរូបគេបានបង្ហាញពីទម្រង់លេងយ៉ាងល្អអំឡុងពេលស្ថិតជាកីឡាករកម្ចីនៅឯក្លិប Alaves កាលពីរដូវកាលមុន។ Hernandez ត្រូវបានប្រកាសថា ជាកីឡាកររបស់ក្លិប Real ក្នុងកម្មវិធីមួយដែលបានចាប់ផ្តើមតាមរយៈការចាក់បញ្ចាំងពីរូបភាពវីដេអូមួយដើម្បីបង្ហាញពីអាជីពរបស់គេ។
លោក Perez ប្រធានក្លិប Real បានឲ្យដឹងថា៖ «សូមអបអរសាទរ ពីព្រោះពេលនេះអ្នកជាកីឡាកររបស់ក្លិប Real Madrid ហើយ ហើយការផ្ទេរនេះកើតឡើងដោយសារតែទេពកោសល្យ និងបុគ្គលិកលក្ខណៈរបស់អ្នក និងទាំងអស់នោះសុទ្ធសឹងជាអ្វីដែលអ្នកបានបង្ហាញ បើទោះបីស្ថិតក្នុងវ័យក្មេងក៏ដោយ»។ Hernandez បានប្រាប់សន្និសីទសារព័ត៌មានមួយថា៖ «ខ្ញុំពិតជារំភើប និងរីករាយណាស់ក្នុងការស្ថិតក្នុងក្លិបដ៏ធំបំផុតក្នុងពិភពលោក។ ខ្ញុំសូមថ្លែងអំណរគុណដល់អ្នកគាំទ្រចំពោះរាល់ការគាំទ្រដែលពួកគេផ្តល់ឲ្យខ្ញុំ។ ក្រុមជាច្រើនចង់បានខ្ញុំ ប៉ុន្តែជម្រើសដ៏ល្អបំផុតគឺការចូលរួមជាមួយនឹងក្លិប Real Madrid»៕
ប្រភពពី៖ Daily Mail
July 11, 2017
អ៊ីវ៉ា៖ ប៉ាដាក់បម្រាមរឿងការសម្ដែង តែរឿងផ្ទាល់ខ្លួនគាត់អត់ហាមទេ…
គ្រាដែលកញ្ញា អ៊ីវ៉ា មានបទចម្រៀងរបស់ខ្លួនបែបញាក់កន្ដ្រាក់អារម្មណ៍ច្រើននោះ មានមហាជនជាច្រើនសន្និដ្ឋានថា តារាចម្រៀងម្នាក់នេះប្រហែលជាលែងអៀនខ្មាស ឬកំណាញ់ខ្លួនដូចពេលនាងចូលសិល្បៈដំបូងៗទៀតហើយមើលទៅ។
កញ្ញា អ៊ីវ៉ា បានចាប់អាជីពសិល្បៈតាំងពីនាងមានអាយុប្រមាណជិត 20ឆ្នាំម្ល៉េះ ពេលនោះនាងបានប្រាប់ថា នាងមិនយកភាពសិចស៊ី ឬការសម្ដែងក្នុងឈុតឆាកខារ៉ាអូខេបែបស្និទ្ធស្នាលឱបថើបធ្វើជាទុនដើម្បីទាញយកប្រជាប្រិយភាពឡើយ បើទោះជានាងជាតារាថ្មោងថ្មីក៏ដោយ។
ជួបជាមួយកញ្ញា អ៊ី វ៉ា នាងបានបញ្ជាក់ថា ចិត្ដនាងនាពេលបច្ចុប្បន្នក៏នៅតែមិនខុសពីពេលមុនៗដដែល ពោលគឺនាងនៅតែប្រកាន់ខ្ជាប់នូវការតាំងចិត្ដរបស់នាង ប៉ុន្តែកន្លងមកដោយសារតែផលិតកម្មតម្រូវឱ្យសម្ដែងជាមួយតារាចម្រៀងប្រុសនៅក្នុងផលិតកម្មតែមួយ ទើបនាងសម្ដែងក្នុងលក្ខណៈស្និទ្ធស្នាល។ នាងបន្ដថា កន្លងមកនាងសម្ដែងតែជាមួយតារាចមៀងប្រុសមួយចំនួន ដូចជាលោក កែវ វាសនា លោកអាន គុណកូឡា ព្រមទាំងលោក ឆាយ វីរៈយុទ្ធប៉ុណ្ណោះ។
តារាចម្រៀងរូបនេះ បញ្ជាក់ថា៖ «ទោះបីខ្ញុំចូលប្រឡូកសិល្បៈយូរហើយក្ដី ក៏ខ្ញុំនៅតែខ្មាសអៀនចំពោះការសម្ដែងជាមួយតារាប្រុសដូចតែពេលមុនៗអ៊ីចឹង។ ខ្ញុំអាចសម្ដែងបានក្នុងលក្ខណៈស្និទ្ធស្នាលល្មមៗ តែបើកាន់ដៃជើងកៀកកិតគ្នាជ្រុលហួសហេតុខ្លាំងពេក ខ្ញុំមិនសម្ដែងទេ»។
បញ្ហានេះត្រូវនាងប្រាប់បន្ថែមថា មូលហេតុនាងមិនទទួលយកការសម្ដែងបែបសិចស៊ី ឬស្និទ្ធស្នាលនោះ គឺដោយសារតែចិត្ដនាងមិនចង់សម្ដែងផង និងមានបម្រាមពីឪពុករបស់នាងផង។ សូម្បីតែពេលថតបទចម្រៀងបែបញាក់កន្រ្ដាក់អារម្មណ៍ម្ដងៗ ក៏នាងមានការប្រយ័ត្នប្រយែងចំពោះការសម្ដែងដែរ។
ទោះយ៉ាងណាកញ្ញា អ៊ី វ៉ា បញ្ជាក់ថា ឪពុកនាងរឹតត្បិតតែលើការសម្ដែងបែបស្និទ្ធស្នាលកាន់ដៃកាន់ជើងតែប៉ុណ្ណោះ តែចំពោះរឿងផ្ទាល់ខ្លួន និងជុំវិញរឿងស្នេហាវិញ ឱពុកនាងពុំបិទសិទ្ធិឡើយ ព្រោះឪពុកនាងស្គាល់ច្បាស់ពីចរិតកូន។ នាងបន្ថែមថា៖”គាត់ជូនខ្ញុំទៅណាមកណាមិនមែនគាត់បារម្ភរឿងហ្នឹងទេគឺ គាត់បារម្ភពីសុវត្ថិភាពពេលចេញច្រៀងឆ្ងាយពិសេសចេញទៅតាមបណ្ដាខេត្ដម្ដងៗ ម្យ៉ាងវាជាការសំណូមពររបស់ខ្ញុំផង ខ្ញុំយល់ថា ពេលទៅណាមកណាមានប៉ា គឺខ្ញុំកក់ក្ដៅ”៕
July 11, 2017
ចងចាំ 5 ចំណុចនេះ អ្នកនឹងមានសុភមង្គលក្រោយពេលរៀបការ
ក្រោយពេលរៀបការរួចជីវិតរបស់អ្នកនឹងត្រូវផ្លាស់ប្តូរទាំងស្រុង មិនមែនដូចជាពេល នៅលីវទៀតឡើយ។ ចំណែកឯភាពល្អូកល្អិន និងកើតមានឡើងបន្ទាប់ពីរៀបការថ្មោងថ្មី ប៉ុន្តែយូរៗទៅអ្នកនឹងចាប់ផ្តើមានអារម្មណ៍នឿយណាយ គួបផ្សំជាមួយនឹងរឿងរ៉ាវរាប់រយជំពូក អ្នកនឹងមានភាពស្មុគស្មាញកាន់តែខ្លាំងឡើង។ ប្រសិនបើរឿងនេះនៅតែបន្តរហូត ហើយអ្នកទាំងពីរពុំមានវិធីអ្វីដោះស្រាយ អ្នកទាំងពីរច្បាស់ជារកសុភមង្គលមិនឃើញឡើយ។ ដូច្នេះហើយអ្នកទាំងពីរគួរតែរៀនពីចំណុចសំខាន់ៗមួយចំនួនដើម្បីឲ្យជីវិតប្រកបទៅដោយសុភមង្គល។
ចេះយល់ចិត្តគ្នា៖ រឿងដ៏សំខាន់មួយដែលគូរស្នេហ៍ថ្មោងថ្មីគួរតែដឹង គឺការស្វែងយល់ចិត្តគ្នាទៅវិញទៅមក។ ជីវិតអាពាហ៍ពិពាហ៍នឹងកាន់តែមានសុភមង្គល ប្រសិនបើប្តីប្រពន្ធចេះយល់ចិត្តគ្នា ហើយមិនថាគ្រប់ឧបសគ្គអ្វីៗទាំងអស់នឹងត្រូវបានដោះស្រាយបានយ៉ាងងាយស្រួល។
មានចិត្តអំណត់៖ ភាពអំណត់មិនមែនមានតែប្រពន្ធ ឬស្វាមីនោះទេ តែត្រូវឲ្យអ្នកទាំងពីរពូកែមានចិត្តអំណត់ដូចគ្នា។ ជាធម្មតាការរួមរស់នៅជាមួយគ្នាជាប្តីប្រពន្ធគេចមិនផុតពីការតំឡើងពាក្យសំដីធំតូចដាច់គ្នាឡើយ ប៉ុន្តែប្រសិនបើភាគីទាំងសងមានចិត្តអំណត់ក្នុងដំណាក់កាលនេះអ្វីៗនឹងល្អប្រសើរឡើងវិញ។
ចេះជួយយកអាសារគ្នា៖ ការចេះជួយយកអាសារគ្នាក្នុងពេលគ្រាលំបាក គឺជារឿងដែលគូស្នេហ៍គួរតែអនុវត្ត។ ព្រោះជីវិតរស់នៅរបស់មនុស្សម្នាក់ៗគេចមិនផុតពីជួបនូវបញ្ហានោះទេ គ្រាន់តែបញ្ហានោះតិចឬក៏ច្រើនតែប៉ុណ្ណោះ។ ដូច្នេះប្រសិនបើភាគីណាមួយជួបនឹងបញ្ហាអ្នកត្រូវចេះ សួរនាំ ឬជួយរកវិធីដោះស្រាយជំនួស ទើបសមមានឈ្មោះថាស្វាមីភរិយាល្អ។
ចេះផ្តល់កម្លាំងចិត្ត៖ អ្វីដែលគូស្នេហ៍គួរបានពីគ្នាទៅវិញទៅមក គឺផ្តល់កំលាំងចិត្តនៅពេលដែលជួបនឹងទុក្ខលំបាកដោះស្រាយមិនចេញ។ ប្រសិនបើអ្នកចេះផ្តល់កំលាំងចិត្តដល់គ្នាទៅវិញទៅមក ជឿថាបញ្ហាអ្វីនឹងបានដោះស្រាយ ហើយភាពរីករាយនឹងវិលត្រឡប់មករកអ្នកវិញជាមិនខាងឡើយ។
ភាពស្មោះត្រង់៖ អ្នកមិនអាចមើលរំលងចំណុចមួយនេះបានទេ ព្រោះជីវិតអាពាហ៍ពិពាហ៍របស់អ្នកអាចបន្តទៅមុខទៀតបាន ឬមិនបានគឺអាស្រ័យទៅលើភាពស្មោះត្រង់នេះឯង។ ប្រសិនបើអ្នកទទួលបានភាពស្មោះត្រង់ហើយ ក្តីសុខ នឹងសុភមង្គលនឹងតាមមកជាមួយជាមិនខាន៕
July 11, 2017
រដ្ឋមន្ត្រីអប់រំថាលទ្ធផលប្រឡងបាក់ឌុបឆ្នាំនេះនឹងប្រសើរជាងឆ្នាំមុន
សម័យប្រឡងមធ្យមសិក្សាទុតិយភូមិ ឬគ្រប់គ្នាហៅថាប្រឡងបាក់ឌុប នឹងធ្វើឡើងនៅថ្ងៃទី 21 ខែសីហា ឆ្នាំ2017 ខាងមុខ នេះបើយោងតាមសេចក្តីប្រកាសរបស់ក្រសួងអប់រំ យុវជន និងកីឡានាពេលថ្មីៗនេះ។ ចំណែកឯថ្ងៃចេញលទ្ធផលនៅតាមមណ្ឌលប្រឡងនីមួយៗ នឹងប្រកាសនៅថ្ងៃទី12 ខែកញ្ញា ឆ្នាំ2017 សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល ហើយថ្ងៃទី13 ខែកញ្ញា ឆ្នាំ2017 សម្រាប់មណ្ឌលប្រឡងនៅខេត្តផ្សេងៗទៀត។
ពាក់ព័ន្ធនឹងការប្រឡងនៅឆ្នាំនេះ ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាបានលើកឡើងថា សម្រាប់ការប្រឡងមធ្យមសិក្សាទុតិយភូមិឆ្នាំនេះនឹងទទួលបានលទ្ធផលរឹតតែប្រសើរជាងឆ្នាំកន្លងទៅ ដោយសារការខិតខំប្រឹងប្រែងរបស់សិស្សានុសិស្ស ការចូលរួមលើកទឹកចិត្តពីមាតាបិតា អ្នកអាណាព្យាបាលសិស្ស ជាពិសេសការយកចិត្តទុកដាក់បង្រៀនពីសំណាក់លោកគ្រូ អ្នកគ្រូ ភាគីពាក់ព័ន្ធ ថ្នាក់ដឹកនាំ និងមន្ត្រីជំនាញគ្រប់កម្រិតថ្នាក់ ដែលជាកត្តាសំខាន់ធ្វើឱ្យសមត្ថភាពសិស្សានុសិស្សមានការរីកចម្រើនកើនឡើងជាបន្តបន្ទាប់។
សម្រាប់ការប្រឡងនៅក្នុងឆ្នាំ 2017 នេះ មានបេក្ខជនប្រឡងសរុបទាំងវិទ្យាសាស្រ្តពិត និងវិទ្យាសាស្រ្តសង្គម ចំនួន 130,112នាក់ និងមានមណ្ឌលប្រឡងចំនួន 178 មណ្ឌល ចែកចេញជា 4,155 បន្ទប់នៅទូទាំងរាជធានីខេត្ត៕
July 11, 2017
ហេតុអីបានក្រោយពេលចាក់វ៉ាក់សាំងហើយ កូនតូចក្តៅខ្លួន?
បើអ្នកម្តាយធ្លាប់នឹកឆ្ងល់នៅក្នុងចិត្តថា តើហេតុអីបានកូនតូចជាទីស្រឡាញ់ក្តៅខ្លួនក្រោយពេលចាក់វ៉ាក់សាំងហើយនោះ ខាងក្រោមនេះគឺជាចម្លើយដូចឆ្នេះសូមតាមដានអានទាំងអស់គ្នា។
វ៉ាក់សាំងគឺអ្វី?
វ៉ាក់សាំង គឺជាជីវវត្ថុដែលផលិតចេញមកពីមេរោគ ឬពិសរបស់មេរោគដែលត្រូវបានធ្វើឱ្យមិនអាចបង្កជាជំងឺបាន ដោយចាក់ចូលទៅក្នុងរាងកាយមនុស្សដើម្បីជំរុញប្រព័ន្ធការពារជំងឺចំពោះមេរោគ ដែលវាមានផលការពារការកើតជំងឺ ឬធ្វើឱ្យកម្រិតភាពធ្ងន់ធ្ងររបស់ជំងឺនោះថយចុះ។
ចុះហេតុអីបានក្រោយពេលចាក់វ៉ាក់សាំងហើយ កូនតូចក្តៅខ្លួន?
នៅពេលវ៉ាក់សាំងចូលក្នុងរាងកាយ ប្រព័ន្ធការពារជំងឺរបស់យើងនឹងបញ្ជូន “Antibody” ដែលមានតួនាទីចាត់ការពួកមេរោគ(វ៉ាក់សាំង)ដែលចូលមកខាងក្នុងរាងកាយ ហើយក្នុងអំឡុងពេលដែលប្រព័ន្ធរាងកាយកំពុងចាត់ការជាមួយអ្វីដែលប្លែកនេះឯងដែលវាជាមូលហេតុធ្វើឱ្យកើតអាការក្តៅខ្លួន។ នៅពេល Antibody ចាត់ការជាមួយវ៉ាក់សាំងរួចរាល់ហើយ រាងកាយក៏នឹងវិលត្រឡប់ទៅរកភាពប្រក្រតីវិញ ហើយបន្ទាប់ពីនោះទៅបើមានមេរោគដូចគ្នានោះចូលមកទៀតរាងកាយនឹងចាត់ការភ្លាមតែម្តង ព្រោះរាងកាយរបស់យើងស្គាល់មេរោគនោះមុនរួចមកហើយតាមរយៈការចាក់វ៉ាក់សាំងហ្នឹងឯង តែ… ប្រតិកម្មដែលរាងកាយរបស់កូនតូចម្នាក់ៗមានចំពោះវ៉ាក់សាំងនោះ មានច្រើនតិចមិនដូចគ្នាទេ ៖
– វ៉ាក់សាំងដែលគ្រូពេទ្យប្រាប់ថា “ចាក់ហើយ កូនអាចនឹងក្តៅខ្លួនណា៎” ក៏មិនចាំបាច់ត្រូវតែក្តៅខ្លួនគ្រប់គ្នានោះទេ ព្រោះវ៉ាក់សាំងតែមួយដូចគ្នានោះ ក្មេងខ្លះក្រោយពីចាក់ហើយក្តៅខ្លួន តែក្មេងខ្លះនៅប្រក្រតីធម្មតា។
– “មិនមែនទេ!” ដែលថា វ៉ាក់សាំងគ្រប់ប្រភេទពេលចាក់ហើយត្រូវតែក្តៅខ្លួននោះ។
– ក្មេងដែលមានអាការក្តៅខ្លួន មិនបានមានន័យថាកើតប្រតិកម្មចាញ់វ៉ាក់សាំងនោះទេ។
ចុងក្រោយបំផុតដែល ឡារ៉ែន ចង់ផ្តាំផ្ញើនោះគឺ ប្រហែលជាមិនមានឪពុកម្តាយម្នាក់ណាចង់ឃើញកូនឈឺថ្កាត់ ឬមិនស្រួលខ្លួនសូម្បីតែបន្តិចណាឡើយ ដូច្នេះហើយទើបការសាងប្រព័ន្ធការពារជំងឺដល់រាងកាយតូចមួយរបស់កូនដោយវិធីចាក់វ៉ាក់សាំងនេះ គឺជាវិធីមួយដែលល្អបំផុតក្នុងការការពារជំងឺ ជាពិសេសបំផុតនៅលើក្មេងតូចដែលមានប្រព័ន្ធការពារជំងឺនៅមិនទាន់ល្អឥតខ្ចោះ។
បានដឹងបែបនេះហើយកុំភ្លេចនាំកូនតូចទៅទទួលយកវ៉ាក់សាំងតាមដែលក្រសួងសុខាភិបាលបានកំណត់ទុកតាមពេលវេលាដែលត្រឹមត្រូវស័ក្តិសមផង៕

July 11, 2017
របៀបដាំសាលាដដើម្បីទទួលបានផលច្រើន ដោយមិនប្រើជីគីមី
ភ្នំពេញ៖ កសិករដាំសាលាដនៅស្រុកស្អាង ខេត្តកណ្តាល បានឱ្យដឹងថា ការប្រកបរបរដាំបន្លែសាលាដឆាប់ទទួលបានផលណាស់ ដោយគិតចាប់ពីពេលដាំដុះត្រឹមតែ1ខែ 7ថ្ងៃ ទៅ1ខែ 10ថ្ងៃប៉ុណ្ណោះ គេអាចកាត់លក់បានហើយ។ សម្រាប់ការដាំនៅលើផ្ទៃដីតែ30អា អាចកាត់លក់ម្តងបានទម្ងន់ជាមធ្យមប្រមាណជា 3តោន ដែលមានតម្លៃចន្លោះពី 3,500រៀលទៅ 5,000រៀលក្នុងមួយគីឡូក្រាម សរុបបានកម្រៃជាង10លានរៀលក្នុង1លើកៗ។
លោក តុង ឈាងកាំង បានរៀបរាប់ឱ្យដឹងថា គាត់បានចាប់របរដាំបន្លែសាលាដនេះជិត 20ឆ្នាំមកហើយ គឺដាំវិលជុំនៅលើផ្ទៃដីទំហំ 30អា ហើយឆ្នាំនេះសាលាដឃើញថា បានថ្លៃគ្រាន់បើ ដោយកាលពីមុនបោះឆ្នោតជ្រើសរើសក្រុមប្រឹក្សាឃុំសង្កាត់ 1គីឡូក្រាមថ្លៃ 4,500 ទៅ 5,000រៀល ប៉ុន្តែពេលនេះគឺធ្លាក់មកត្រឹម 3,500រៀល ក្នុង1គីឡូក្រាម។ កសិករខាងលើដដែលនេះក៏បានប្រាប់អំពីរបៀបដាំដុះ និងថែទាំផងដែរថា សាលាដមិនខុសអំពីបន្លែផ្សេងៗទៀតប៉ុន្មានទេ ទាំងការដាំ ក៏ដូចជាថែទាំដែរ ប៉ុន្តែវាជាប្រភេទបន្លែដែលមិនសូវប្រើថ្នាំគីមីច្រើនដូចជាបន្លែមួយចំនួនទៀតនោះទេ និងប្រើពេលចាប់ពី1ខែ 7ថ្ងៃ ទៅ1ខែ 10ថ្ងៃ គឺអាចដកលក់បានហើយ។
លោកបានប្រាប់អំពីវិធីដាំដុះ និងថែទាំផងដែរថា មុនពេលដាំ យើងត្រូវភ្ជូរដីហាលទុកសិន ហើយមិនកំណត់ពេលនោះទេ បើមេឃក្តៅដីឆាប់ឆ្អិន ហើយបើមានភ្លៀងយើងហាលទុកយូរបន្តិចទៅ ទាល់តែដីឆ្អិនល្អទើបឆូតជាងរង ព្រោះបើដាំលើដីដែលឆ្អិនមិនល្អ គឺមិនសូវបានផលល្អនោះទេ។ បន្ទាប់មកយើងបាចជីលាមកគោ ហើយគ្រប និងស្រោចទឹកឱ្យដុះស្មៅទើបបាញ់ថ្នាំសម្លាប់ស្មៅវិញ រួចយកគ្រាប់មកបាចដាំដើម្បីកុំឱ្យនឿយធ្វើស្មៅ។ ក្រោយបាចគ្រាប់ដាំហើយត្រូវស្រោចទឹកក្នុង1ថ្ងៃ2 ទៅ3ដង ហើយ1អាទិត្យក្រោយមកនៅពេលសាលាដដុះ យើងត្រូវឧស្សាហ៍ពិនិត្យមើលក្រែងមានសត្វល្អិត ឬដង្កូវបំផ្លាញ និងបន្តស្រោចទឹកព្រឹកល្ងាចរហូតដល់ពេលដកយកទៅលក់តែម្តង។
លោក តុង ឈាងកាំង ក៏បានបន្ថែមដែរថា បើបន្លែបានថ្លៃនឹងមានតម្លៃស្ថេរដូចឆ្នាំនេះនោះ កសិករសប្បាយចិត្តណាស់ ហើយតាំងតែពីដើមរៀងមកគ្រួសារលោក គឺពឹងតែលើរបរធ្វើចម្ការបន្លែនេះតែ1មុខប៉ុណ្ណោះ នៅលើផ្ទៃដី 30អា និងទទួលបានទិន្នផលជាមធ្យមប្រមាណ3តោនក្នុង1លើកៗ ដែលអាចជួយឱ្យជីវភាពបានធូរធារសមរម្យមានផ្ទះធំទ្រនំខ្ពស់រស់នៅ ព្រមទាំងមានលទ្ធភាពបញ្ជូនកូនៗឱ្យរៀនដល់ថ្នាក់មហាវិទ្យាល័យថែមទៀតផង។
ចំណែកឯឈ្មួញទិញបន្លែម្នាក់ គឺលោក ហ៊ុយ ឡូញ មានទីលំនៅភូមិព្រែកតាប៉ុក ឃុំកោះខែល ស្រុកស្អាង ខេត្តកណ្តាល បានទទួលស្គាល់ថា ឆ្នាំនេះសាលាដពិតជាបានថ្លៃគួរសមជាងឆ្នាំមុនៗមែន ហើយលោកតែងចុះមកទិញពីបងប្អូនកសិករយើង ដល់ចម្ការតែម្តងនិងដឹកយកទៅលក់នៅឯផ្សារដើមគឯណោះ។ លោកបានបន្តថា កាលពីមុនបោះឆ្នោតនេះ សាលាដ 1គីឡូក្រាមបានថ្លៃដល់ទៅ 5,000រៀលឯណោះ ប៉ុន្តែឥឡូវនៅសល់1គីឡូក្រាម 3,500រៀល ហើយបើតម្លៃនៅស្ថេរដូច្នេះនោះ អ្នកដាំនឹងបានចំណេញច្រើនមិនខាន៕
July 10, 2017
លោកតាបណ្ឌិត កុល ផេង៖ កុំបង្អាប់ខ្លួនឯង និងកុំសន្និដ្ឋានថា ខ្លួនឯងអន់
ការរៀបចំដំណើរជីវិត ទាមទារនូវចំណេះដឹងច្រើនប្រភេទ ទាំងចំណេះដឹងផ្នែកសង្គម ចំណេះដឹងពីសាលា ចំណេះដឹងក្នុងការគិត និងជាពិសេស គឺមានមូលដ្ឋាននៃការពិចារណាច្បាស់លាស់ពីដំណើរជីវិត ព្រោះការគិតជាចំណុចចាប់ផ្តើមនៃសកម្មភាព មុននឹងកំណត់វាសនាមនុស្សថា នឹងក្លាយជាបុគ្គលខ្លាំង ឬខ្សោយ។
ពាក់ព័ន្ធនឹងបញ្ហាទាំងអស់នេះ លោកតាបណ្ឌិត កុល ផេង បិតាស្ថាបនិកនៃសាកលវិទ្យាល័យបញ្ញាសាស្រ្តកម្ពុជាបានលើកឡើងថា មនុស្សទាំងអស់គ្នាកើតមក គឺនាំមកជាមួយនូវសមត្ថភាពប្រហាក់ប្រហែលគ្នា ហេតុនេះការខិតខំប្រឹងប្រែងឱ្យអស់ពីលទ្ធភាពដើម្បីអភិវឌ្ឍសមត្ថភាពខ្លួនឯង ជារឿងចាំបាច់បំផុតសម្រាប់ជីវិត។ សំណាង កើតមកពីការសាង ការសាងសមត្ថភាពនៅពេលបច្ចុប្បន្ន នឹងអាចឆ្លុះបញ្ចាំងឱ្យឃើញពីភាពល្អប្រសើរនៅថ្ងៃអនាគត។ ការសាងល្អ ខិតខំព្យាយាមដោយផ្លូវត្រូវ នឹងនាំមកនូវសំណាងល្អ និងលទ្ធផលល្អនៅថ្ងៃអនាគត តែប្រសិនបើការគិតរបស់សិស្ស និស្សិតមិនត្រឹមត្រូវហើយ ពួកគេនឹងមិនអាចបង្កើតសមិទ្ធផលសម្រាប់ខ្លួនឯងប្រកបដោយភាពវិជ្ជមានបាននោះទេ។
លោកតាបណ្ឌិត បានបន្ថែមផងដែរថា ក្នុងនាមជាសិស្ស និស្សិត សូមកុំគិត និងវាយតម្លៃសមត្ថភាពខ្លួនឯងដោយគិតថាខ្លួនឯងជាមនុស្សអន់ និងកុំសន្និដ្ឋានដោយគ្មានអ្វីមកវាស់វែងតែឯកឯងថា ខ្លួនជាមនុស្សមិនអាចអភិវឌ្ឍសមត្ថភាពបានល្អឱ្យសោះ ព្រោះថានៅពេលដែលយើងបង្អាប់ខ្លួនឯង យើងនឹងជឿ ហើយបណ្តោយខ្លួនឱ្យទន់ទោរទៅតាមភាពខ្ជិល ឬភាពអសកម្មជាក់ជាមិនខាន។ យុវជនជំនាន់ក្រោយរបស់កម្ពុជា គួរតែគិត ហើយបង្កើតសកម្មភាពប្រកបដោយភាពវិជ្ជមានដើម្បីក្លាយជាធនធានមនុស្សដែលប្រកបដោយគុណតម្លៃសម្រាប់សង្គមខ្មែរវិញទើបជាការប្រសើរ៕
July 10, 2017
ព្រះកាយ ច័ន្ទ ក្រុមចម្រៀងខ្ញុំអាចនឹងបរាជ័យ បើពុំទទួលបានទីផ្សារ Concert
ទោះបីជាក្រុមតារាចម្រៀង Girl Girl មានឱកាសឡើងបង្ហាញទេពកោសល្យនៅតាមការប្រគំតន្រ្ដីនៃស្ថានីយទូរទស្សន៍នានា និងទទួលបានការគាំទ្រពីយុវវ័យក៏ពិតមែន ប៉ុន្ដែកញ្ញាព្រះកាយ ច័ន្ធ ដែលជាប្រធានក្រុមបានសម្ដែងការបារម្ភថា ប្រសិនបើក្រុមនាងមិនប្រឹងប្រែងពង្រីកសមត្ថភាពទេអាចនឹងជួបបរាជ័យ។
កញ្ញាព្រះកាយ ច័ន្ទ បានបញ្ជាក់ថា មូលហេតុដែលនាងជាតារាសម្ដែងហើយងាកមកបង្កើតក្រុមចម្រៀងស្រី Girl Girl ផងនោះ ព្រោះនាងសម្លឹងឃើញសមាជិករបស់ខ្លួនមានសម្ទុះជាមួយការងារនេះ គ្រាន់តែពុំមានអ្នកត្រួសត្រាយផ្លូវឱ្យប៉ុណ្ណោះ ដូច្នេះហើយទើបនាងសម្រេចចិត្ដបង្កើតក្រុមនេះតែម្ដង។ នាងអះអាងថា បើទោះជាជំហានដំបូងនាងទទួលបានការគាំទ្រ និងការចាប់អារម្មណ៍ពីអ្នករៀបចំការប្រគំតន្រ្ដីមែន តែនាងនឹងខំប្រឹងពង្រឹងសមត្ថភាពខ្លួនឡើងទៀត ដើម្បីឱ្យមានទីផ្សារក្នុងវិថីសិល្បៈ។
ប្រធានក្រុមរូបនេះបញ្ជាក់ថា៖ «បច្ចុប្បន្នយើងមើលឃើញថា ទីផ្សារសិល្បៈនៃការប្រគំតន្រ្ដីនេះ លុះត្រាតែតារាចម្រៀងមានកេរ្ដិ៍ឈ្មោះល្បីទើបគាត់មានទីផ្សារនៃការប្រគំតន្រ្ដីនៅតាមបណ្ដាខេត្ដ។ ប្រសិនបើយើងមិនអាចទទួលបានការប្រគំតន្ដ្រីទាំងនោះទេ យើងនឹងអាចបរាជ័យ ដូច្នេះខ្ញុំត្រូវតែខំប្រឹងពង្រឹងសមត្ថភាពសមាជិក ក៏ដូចជាសមត្ថភាពខ្លួនឯង ដើម្បីក្ដោបក្ដាប់ទីផ្សារក្នុងប្រទេសកម្ពុជាឱ្យបាន ធ្វើយ៉ាងណាឱ្យទស្សនិកជនងាកមកចាប់អារម្មណ៍តារាចម្រៀងជាក្រុមវិញម្តង»។
ក្រុម Girl Girl បានបង្កើតឡើងរយៈពេលកន្លះឆ្នាំទៅហើយ មានតារាចម្រៀងដូចជាកញ្ញា ព្រះកាយ ច័ន្ទ កញ្ញានៅ ដាណេ កញ្ញាជេស៊ី កញ្ញាយ៉ានុត។ ក្រុមនេះទទួលបានការហ្វឹកហាត់ក្បាច់រាំដោយផ្ទាល់ពីកញ្ញាព្រះកាយ ច័ន្ទ។
កញ្ញាព្រះកាយ ច័ន្ទ បញ្ជាក់ថា ទោះមានអ្នករៀបចំកម្មវិធីនៃការប្រគំតន្ដ្រីតាមខេត្ដចាប់អារម្មណ៍ជាមួយក្រុមនាងក៏ដោយ ក៏នាងពុំទាន់ហ៊ានទទួលយកការងារទាំងនេះភ្លាមដែរ ព្រោះនាងគិតថា សមត្ថភាពរបស់សមាជិកក្នុងក្រុមនៅមានកម្រិតនៅឡើយ ដែលត្រូវទាមទារពេលវេលាបន្ដិចទៀតទើបអាចធ្វើឱ្យនាងមានទំនុកចិត្ដបាន៕
July 10, 2017
កែវ ឡង់ឌី៖ ខ្ញុំមិនដែលគិតថា បានរៀនដល់មហាវិទ្យាល័យទេ តែខ្ញុំនៅតែតស៊ូ
ចេញពីអ្នកអប់រំ ឆ្ពោះទៅក្លាយជាសហគ្រិនដែលមានឈ្មោះល្បីល្បាញម្នាក់នៅកម្ពុជា លោក កែវ ឡង់ឌី បានឆ្លងកាត់ការតស៊ូជាច្រើនក្នុងសមរភូមិនៃការអប់រំដើម្បីទទួលជោគជ័យក្នុងការសិក្សា ការងារ និងអាជីវកម្ម។
លោក កែវ ឡង់ឌី បានមានប្រសាសន៍ថា៖ «ខ្ញុំមិនដែលធ្លាប់នឹកស្រមៃទាល់តែសោះថា ខ្ញុំបានរៀនមហាវិទ្យាល័យ ព្រោះកាលនៅពីក្មេង គ្រួសារខ្ញុំមិនមែនជាអ្នកធូរធានោះទេ តែខ្ញុំនៅតែខំប្រឹងរៀន ហើយសង្ឃឹមថា ថ្ងៃណាមួយការអប់រំអាចផ្លាស់ប្តូរវាសនាខ្ញុំឱ្យកាន់តែប្រសើរឡើងបាន»។
ជាលទ្ធផលនៃការខិតខំប្រឹងប្រែងក្នុងវ័យជំទង់ សហគ្រិនរូបនេះដែលកាលនោះជាយុវជន កែវ ឡង់ឌី ជាសិស្សដែលស្រឡាញ់ការសិក្សា និងមានក្តីសង្ឃឹមច្រើនរាប់មិនអស់បានយកឈ្នះការប្រកួតប្រជែងដ៏ពិបាកមួយគឺ បានជាប់ជាសិស្សនៃវិទ្យាស្ថានភាសាបរទេស (IFL) ជាគ្រឹះស្ថានអប់រំល្បីល្បាញមួយដែលនិស្សិតគ្រប់រូបស្រមៃចង់សិក្សានៅទីនោះ។
ជាទូទៅ ស្ថានភាពរបស់មនុស្សគឺមិនខុសគ្នាប៉ុន្មាននោះទេ សុខ និងទុក្ខ តែងតែដើរទន្ទឹមគ្នា ទោះក្នុងកាលៈទេសៈល្អយ៉ាងណាក៏ដោយ។ ស្រដៀងគ្នានេះដែរ យុវជន កែវ ឡង់ឌី ក៏ជួបនឹងបញ្ហាពិបាកដោះស្រាយមួយដែរ បន្ទាប់ពីលោកបានប្រឡងជាប់ ព្រោះថវិកាក្រុមគ្រួសាររបស់លោកនៅខ្សត់ខ្សោយ ហើយមិនសូវមានអ្នកគាំទ្រឱ្យរៀនមហាវិទ្យាល័យនោះឡើយ តែទោះជាយ៉ាងណាក៏ដោយ ការស្រឡាញ់ផ្នែកអប់រំបានជំរុញឱ្យយុវជនឡង់ឌីខិតខំពន្យល់ឪពុកពីឱកាសដ៏កម្រមួយនេះ។ ក្រោយពីឃើញឱកាសល្អមួយនេះ បងប្រុសរបស់ឡង់ឌី ក៏បានលះបង់ការសិក្សារបស់ខ្លួនឯង ហើយសន្យាចេញថ្លៃបង់សាលាពាក់កណ្តាលដើម្បីធ្វើយ៉ាងណាឱ្យឡង់ឌីបានរៀន។
ទឹកចិត្តដែលកំពុងចង់រៀនខ្លាំង ហើយបានឮសម្តីប្រកបដោយទំនុកចិត្តរបស់បងប្រុស យុវជន កែវ ឡង់ឌី ពិតជាមានសង្ឃឹមខ្លាំងណាស់ ខណៈពេលដែលឪពុករបស់គាត់ក៏បានយល់ព្រមជាមួយនឹងលក្ខខណ្ឌនេះដែរ។ ក្រោយមកក្តីស្រមៃបានក្លាយជាការពិត យុវជនដែលពោរពេញដោយការតស៊ូខាងលើបានចុះឈ្មោះចូលរៀននៅវិទ្យាស្ថានភាសាបរទេស (IFL) តែសំណាងមិនល្អក៏បានចូលមកដល់ម្តងទៀតភ្លាមដែរ គឺមិនទាន់ទាំងបានជួយបង់ប្រាក់ផង បងប្រុសបង្កើតដែលធានាលើការសិក្សារបស់ឡង់ឌីពាក់កណ្តាលនោះ បានទទួលមរណភាព ដែលធ្វើឱ្យរូបគេត្រូវតែរិះរកដំណោះស្រាយដោយខ្លួនឯងផ្ទាល់ដើម្បីបានបន្តការសិក្សា។
លោក កែវ ឡង់ឌី បាននិយាយថា៖ «ខ្ញុំពិតជាពិបាក តែខ្ញុំមានគំនិតមួយគិតថា មកដល់ដំណាក់កាលបានរៀនមហាវិទ្យាល័យ វាជារឿងពិបាកណាស់ទៅហើយ ខ្ញុំមិនបោះបង់វាចោលនោះទេ។ ខ្ញុំបានសម្រេចចិត្តដោះស្រាយបញ្ហាដោយខ្លួនឯងឱ្យអស់ពីលទ្ធភាពដែលខ្លួនឯងមាន»។
ក្រោយពីជួបស្ថានភាពដែលមិននឹកស្មានដល់រួចមក ក្នុងនាមជានិស្សិតមហាវិទ្យាល័យដែលមានទុននៃចំណេះដឹងច្រើនគួរសមហើយនោះ លោកក៏បានដាក់ពាក្យបង្រៀនភាសាអង់គ្លេសនៅគ្រប់កន្លែងដើម្បីយកថវិកាមកផ្គត់ផ្គង់ដល់ការសិក្សា។ លោកត្រូវខិតខំប្រឹងប្រែងឱ្យច្រើនជាងនិស្សិតដទៃ ព្រោះត្រូវរៀនផង និងធ្វើការងារផង តែការតស៊ូពិតជាមិនធ្វើឱ្យមនុស្សយើងអស់សង្ឃឹមនោះទេ។ ការងារបង្រៀនរបស់លោកបានបង្រៀនរូបលោកឱ្យមានបទពិសោធល្អៗជាច្រើនលើវិស័យអប់រំ ដែលធ្វើឱ្យលោកបានបញ្ចប់ការសិក្សាដោយជោគជ័យ និងមានការងារល្អធ្វើ។
ចេញពីសាលាភ្លាម ហាក់ដូចជាមិនពិបាកពេកនោះទេ សម្រាប់និស្សិតដែលបានហាត់ពត់លត់ដំរួចមកហើយ និងមានបទពិសោធការងារពិតដូចរូបលោក កែវ ឡង់ឌី។ លោកបានអភិវឌ្ឍខ្លួនពីបុគ្គលិកអប់រំធម្មតា មកគ្រប់គ្រងកម្មវិធីសិក្សារបស់សាលាអន្តរជាតិធំមួយអស់រយៈពេល 12ឆ្នាំពេញ បន្ទាប់មកក៏បានផ្លាស់ប្តូរពីបុគ្គលិករបស់ក្រុមហ៊ុនឯកជននោះ មកប្រកបអាជីវកម្មដោយខ្លួនឯង រហូតក្លាយជាសហគ្រិនដែលលេចធ្លោម្នាក់នៅកម្ពុជា៕
July 10, 2017
យុវជនខ្មែរចាប់ផ្ដើមអភិវឌ្ឍខ្លួនជាមួយបច្ចេកវិទ្យា
សំឡេងយុវជន ជាសហគមន៍អ្នកសរសេរប្លុក (Blog) ដែលផ្តួចផ្តើមឡើងដោយទីស្នាក់ការកណ្តាលរបស់អង្គការ UNICEF នៅទីក្រុង New York។ វាត្រូវបានគេរចនាជាសហគមន៍អ្នកសរសេរ Blog ដែលគ្រប់អត្ថបទ គឺសរសេរដោយយុវជនដែលផ្តោតលើមាតិកាពាក់ព័ន្ធនឹងការយល់ដឹងថ្មីៗនៅជុំវិញពិភពលោក។
តាមការបញ្ជាក់របស់អង្គការ UNICEF បានឱ្យដឹងថា យុវជនកម្ពុជាប្រមាណ 60% មានអាយុក្រោម 25ឆ្នាំ កំពុងដើរតួនាទីយ៉ាងសំខាន់ក្នុងការចូលរួមអភិវឌ្ឍប្រទេសកម្ពុជាក្នុងពេលបច្ចុប្បន្ន និងអនាគត ស្របពេលដែលបច្ចេកវិទ្យា និងបណ្តាញសង្គមកំពុងរីកចម្រើន។
ក្នុងលក្ខខណ្ឌនេះ Blog បានដើរតួនាទីយ៉ាងសំខាន់ក្នុងការទំនាក់ទំនង និងបង្ហាញពីគំនិតរបស់យុវជនទៅកាន់សង្គមក៏ដូចជាការរួមចំណែកអភិវឌ្ឍយុវជនដូចគ្នាដែរ។
ដោយមើលឃើញពីសារៈសំខាន់របស់យុវជន និងការសរសេរ Blog នៅឆ្នាំ 2016 អង្គការ UNICEF បានធ្វើកម្មវិធីសរសេរ Blog សាកល្បងលើកដំបូងរបស់ខ្លួនដោយការបង្កើតកម្មវិធីសំឡេងយុវជនជាសកល។ ជាលទ្ធផលដែលទទួលបាន គឺយុវជនជាច្រើនទទួលបានមតិវិជ្ជមានជាច្រើនត្រឡប់មកវិញ បន្ទាប់ពីពួកគេបានបង្ហាញអត្ថបទរបស់ខ្លួនជាសាធារណៈ ដោយមានការបណ្តុះបណ្តាលត្រឹមត្រូវ។ ចាប់ផ្តើមពីសកម្មភាពនេះ UNICEF បានបង្កើតកម្មវីធីរបស់ខ្លួនបន្តទៀតនៅឆ្នាំ 2017 នេះ ដែលផ្តល់ឱកាសឱ្យយុវជនបានដាក់ពាក្យដើម្បីធ្វើការហាត់ការរយៈពេលខ្លីក្នុងគម្រោងរបស់ខ្លួន៕
July 10, 2017