Author: វល័ក្ខ

ភ្នំពេញៈ ស្របពេលដែលប្រាសាទសំបូរព្រៃគុកត្រូវបានដាក់បញ្ចូលក្នុងសម្បត្តិបេតិកភណ្ឌពិភពលោក ក្រសួងទេសចរណ៍បានបង្កើនការផ្សព្វផ្សាយពី​រមណីយដ្ឋាននេះ ទៅកាន់ពិភពលោកកាន់តែច្រើនជាងមុន និងជំរុញឲ្យក្រុមហ៊ុនភ្នាក់ងារទេសចរណ៍ដាក់ប្រាសាទនេះចូលក្នុងកញ្ចប់ទេសចរណ៍របស់ខ្លួនផង។

ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានថ្លែងឲ្យដឹងនៅការិយា​ល័យរបស់លោកនាព្រឹកថ្ងៃទី11 កក្កដានេះថា ក្រសួងបាន និងកំពុងរៀបចំ និងបានផ្សព្វផ្សាយរួចមកហើយនូវរមណីយដ្ឋានប្រាសាទសំបូរព្រៃគុក ប៉ុន្តែពេលប្រាសាទនេះត្រូវបានដាក់បញ្ចួលក្នុងសម្បត្តិបេតិកភណ្ឌពិភពលោក ក្រសួងនឹងបង្កើនការ​ផ្សព្វផ្សាយបន្ថែមទៀតពីរមណីយដ្ឋាននេះ។ ឯកឧត្តមបន្តថា ការដាក់បញ្ចូលរមណីយដ្ឋាននេះជាសម្បត្តិបេតិកភណ្ឌពិភពលោកនឹងបង្កើតឲ្យមានខ្សែទស្សន​កិច្ចបេតិកភណ្ឌថ្មីមួយទៀតរវាងប្រាសាទសំបូរព្រៃគុកទៅកាន់ប្រាសាទអង្គរវត្ត ខេត្តសៀមរាប និងឆ្ពោះទៅកាន់ប្រាសាទព្រះវិហារ ព្រមទាំងភ្ជាប់ខ្សែទស្សនកិច្ច​ទៅកាន់ប្រាសាទវត្តភូ ក្នុងប្រទេសឡាវផងដែរ។

ឯកឧត្តមបន្តថា “ចំនួនភ្ញៀវទេសចរជាតិ និងអន្តរជាតិនឹងចាប់អារម្មណ៍ នឹងមកទស្សនាប្រាសាទនេះច្រើនមិនខាន ព្រោះកន្លងមកក្រសួងក៏បានសហការជាមួយ​សហគមន៍នៅជុំវិញប្រាសាទរៀបចំបង្កើតជាផលិតផលទេសចរណ៍ផងដែរ តាមរយៈការសហការជាមួយអង្គការ ADB ដែលបានជួយជាមូលនិធិ អភិវឌ្ឍន៍សហគមន៍នៅតំបន់នោះ។ ឯកឧត្តមបន្ថែមថា លើសពីនេះក្រសួងនឹងសហការជាមួយអាជ្ញាធរខេត្ត និងគណៈកម្មការគ្រប់គ្រងប្រាសាទសំបូរព្រៃគុក ដើម្បីរៀបចំធ្វើជាផ្ទះស្នាក់នៅ (Home Stay) ភោជនីយដ្ឋាន ដើម្បីទទួលភ្ញៀវទេសចរជាតិ-អន្តរជាតិ​ផងដែរ ដោយធ្វើយ៉ាងណាផ្តោតលើទិសស្លោក “ទីក្រុងស្អាត រមណីយដ្ឋានស្អាត សេវាល្អ”។

ឯកឧត្តមរដ្ឋមន្រ្តីបានបន្តថា ជាមួយនឹងផែនការអភិវឌ្ឍន៍តំបន់នេះ ខេត្តកំពង់ធំក៏មានសណ្ឋាគារលំដាប់ផ្កាយ4 សណ្ឋាគារកម្រិតមធ្យម និងផ្ទះសំណាក់ជាច្រើនទៀត ព្រមទាំងមានភោជនីយដ្ឋានដែលអាចទទួលភ្ញៀវទេសចរបាន ព្រោះ​ក្រុងស្ទឹងសែន ខេត្តកំពង់ធំមានចម្ងាយត្រឹមតែ 25គីឡូម៉ែត្រពីប្រាសាទនេះប៉ុណ្ណោះ។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបាន​ថ្លែងថា ពិតណាស់ការដាក់បញ្ចូលប្រាសាទសំបូរព្រៃគុកជាសម្បត្តិបេតិកភណ្ឌពិភពលោកនឹងទាក់ទាញភ្ញៀវទេសចរឱ្យទៅទស្សនាប្រាសាទនេះកាន់តែច្រើន ពិសេសភ្ញៀវអឺរ៉ុបដែលចូលចិត្តតំបន់រមណីយដ្ឋានបែបនេះ។លោកស្រីបន្តថា កន្លងមកប្រាសាទសំបូរព្រៃគុកមិនសូវទាក់ទាញភ្ញៀវទេសចរអន្តរជាតិប៉ុន្មានទេ តែពេលប្រាសាទនេះដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោកហើយ ភ្ញៀវទេ​សចរជាតិ-អន្តរជាតិនឹងមានការចាប់អារម្មណ៍ច្រើនពីប្រាសាទនេះមិនខាន៕

ក្រោយពីតស៊ូក្នុងអាជីពសិល្បៈអស់រយៈពេល 4ឆ្នាំមក គេមើលឃើញថា តារាសម្ដែងង៉ែត សុវណ្ណនេត ហាក់មានកេរ្ដិ៍ឈ្មោះជាងមុន ខណៈលោកទទួលបានការងារថតភាពយន្ដ ស្ប៉ត និងថតបទចម្រៀងខារ៉ាអូខេច្រើនគួរសម។ លោកប្រាប់ថាបើទោះបច្ចុប្បន្នអាជីពសិល្បៈមានការរីកចម្រើនពិតមែន ប៉ុន្ដែលោកនៅមិនទាន់ធូរស្រាលក្នុងចិត្ដនៅឡើយទេ។

កន្លងមកគេបានដឹងថាតារាសម្ដែងង៉ែត សុវណ្ណនេត មានការតាំងចិត្ដចូលប្រឡូកក្នុងសិល្បៈដើម្បីរកប្រាក់ចំណូលចិញ្ចឹមម្ដាយ គ្រាដែលម្ដាយរបស់គេកំពុងតែមានជំងឺប្រចាំកាយ។ ង៉ែត សុវណ្ណនេត បញ្ជាក់ថា បច្ចុប្បន្នអាជីពសិល្បៈរបស់លោកចាប់ផ្ដើមទទួលបានការគាំទ្រខ្លាំង ពិសេសតម្លៃខ្លួនក្នុងការងារកាន់តែមានកំណើនដែលអាចឱ្យលោករកប្រាក់ចំណូលបានច្រើនជាងមុន។ ទោះយ៉ាងណាលោកពុំសូវហ៊ានចាយវាយឱ្យបានពេញដៃនៅឡើយទេ ព្រោះនៅមានកាតព្វកិច្ចមើលថែម្ដាយរូមជាមួយបងប្រុសរបស់ខ្លួន។

តារាសម្ដែងរូបនេះប្រាប់បន្ដថា៖ «ទោះអាចរកប្រាក់បានច្រើនជាងមុនក៏ដោយ ក៏ខ្ញុំពុំសូវហ៊ានចាយវាយច្រើនលើសកម្រិតដែរ ព្រោះថវិកាដែលរកបានខ្ញុំត្រូវសន្សំទុកមួយចំនួនធំសម្រាប់ផ្ញើរទៅផ្ទះ ដើម្បីយកទៅព្យាបាលជំងឺម្ដាយនៅពេលមានអាការធ្វើទុក្ខម្ដងម្កាល»។

សុវណ្ណនេតបន្ថែមថា លោកទទួលបន្ទុកនេះជាមួយបងប្រុសតាំងពីមិនទាន់ចូលសិល្បៈម្ល៉េះ ព្រោះចាប់តាំងពីលោកដឹងក្ដីពេលណាបានឃើញតែម្ដាយរងទុក្ខជាមួយនឹងការទទួលបន្ទុកមើលថែគ្រួសារ ចិញ្ចឹមបីបាច់កូនទាំងពីរយ៉ាងលំបាក។ ង៉ែត សុវណ្ណនេត បន្ដថា កាលលោកនៅក្មេង ម្ដាយលោកសុខចិត្តស៊ីឈ្នួលគេលើកថ្ម ជិះកង់ដើរលក់ធូប និងធ្វើការងារជាច្រើនទៀត ដើម្បីចិញ្ចឹមកូនប្រុសទាំងពីររហូតបានធំពេញវ័យ ដូច្នេះទោះលំបាកយ៉ាងណាលោកត្រូវតែមើលថែទាំគាត់វិញក្នុងនាមជាកូន។

ទោះបីជាមានកាតព្វកិច្ចដែលយើងមើលឃើញថា ជាបន្ទុកធ្ងន់ធ្ងរសម្រាប់តារាសម្ដែងរូបនេះក្ដី ប៉ុន្ដែលោកង៉ែត សុវណ្ណនេតបញ្ជាក់ថា៖ «បើទោះជាខ្ញុំកើតមកក្នុងគ្រួសារមានជីវភាពក្រលំបាកក៏ដោយ ក៏ខ្ញុំមានមោទនភាពជាមួយគ្រួសារខ្ញុំខ្លាំងណាស់ ពិសេសអ្នកម្ដាយរបស់ខ្ញុំគ្រាដែលគាត់សុខចិត្ដរស់នៅក្នុងភាពមេម៉ាយតាំងពីខ្ញុំនៅក្មេងរហូតមកដល់បច្ចុប្បន្ន។ ខ្ញុំពិតជាស្ញប់ស្ញែងចំពោះវីរភាពរបស់ម្ដាយខ្ញុំខ្លាំងណាស់ ព្រោះគាត់សុខចិត្ដរស់នៅម្នាក់ឯងមិនយកប្ដីថ្មីទៀត ខ្លាចគេធ្វើបាបកូន»។

គួរបញ្ជាក់ថា បច្ចុប្បន្នលោកទើបតែបញ្ចប់ការថតរឿង «ពេទ្យភូមិខ្ញុំ» និងរឿង «កំហឹងអ្នកស្រុក» ដែលគ្រោងនឹងចាក់បញ្ចាំងនៅលើកញ្ចក់ទូរទស្សន៍ PNN និងMY TV៕

ភ្នំពេញ៖ មុននឹងចាប់ផ្តើមអាជីវកម្មមួយ មិនថាអាជីវកម្មខ្នាតតូច អាជីវកម្មខ្នាតមធ្យម ឬខ្នាតធំនោះទេ គេតែងបារម្ភអំពីផលលំបាកក្នុងការបង់ពន្ធជូនរដ្ឋ ប៉ុន្តែយ៉ាងណានោះការប្រកបអាជីវកម្មលក្ខណៈគ្រួសារដែលមានទំហំទឹកប្រាក់ក្រោម 250លានរៀល(ប្រមាណជា 6,000 ដុល្លារ) មិនត្រូវបានតម្រូវឱ្យបង់ពន្ធនោះទេ ដែលនេះជាការលើកឡើងរបស់ឯកឧត្តម គង់ វិបុល ទីប្រឹក្សារដ្ឋាភិបាលទទួលបន្ទុកអគ្គនាយកដ្ឋានពន្ធដារ។

ឯកឧត្តម គង់ វិបុល មានប្រសាសន៍បញ្ជាក់ជាថ្មីទៀតនៅក្នុងកិច្ចប្រជុំស្តីពីការពង្រឹងការគ្រប់គ្រងចំណូលពន្ធសម្រាប់ថ្នាក់ក្រោមជាតិ ព្រមទាំងការចុះអង្កេតផ្ទៀងផ្ទាត់សហគ្រាស និងការធ្វើបច្ចុប្បន្នភាពទិន្នន័យអចលនទ្រព្យក្នុងខេត្តសៀមរាបនៅក្នុងសាលាខេត្តសៀមរាបកាលពីម្សិលមិញនេះថា អគ្គនាយកដ្ឋានពន្ធដារតែងយកចិត្តទុកដាក់ខ្ពស់ក្នុងការអនុវត្តយុទ្ធសាស្រ្តកៀងគរចំណូលរយៈពេលមធ្យម ឆ្នាំ2014 – 2018 ស្របតាមគោលនយោបាយរបស់រដ្ឋាភិបាលដែលបានដាក់ចេញគឺមិនមានការបង្កើតប្រភេទពន្ធថ្មី ឬដំឡើងអត្រាពន្ធនោះទេ គឺមានតែពង្រឹងការគ្រប់គ្រងប្រមូលពន្ធប៉ុណ្ណោះ។

ឯកឧត្តមបញ្ជាក់បន្ថែមថា លើសពីនេះរាជរដ្ឋាភិបាលតែងគិតគូរដល់ប្រជាពលរដ្ឋអ្នករកស៊ីតូចតាចតាមរយៈការលុបចោល របបម៉ៅការស្របតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2016 ដែលក្នុងនោះប្រជាពលរដ្ឋជាអាជីវករតូចតាចបែបលក្ខណៈគ្រួសារដូចរៀបរាប់ខាងលើ និងមានកម្រិតផលរបរក្រោម 250លានរៀល គឺជាកម្មវត្ថុនៃការលើកលែងពន្ធ និងមិនមានកាតព្វកិច្ចសារពើពន្ធនោះទេ៕

ភ្នំពេញ៖ ផ្លូវជាតិលេខ2 គឺជាផ្លូវសេដ្ឋកិច្ចដ៍សំខាន់មួយដែលតភ្ជាប់ពីរាជធានីភ្នំពេញទៅប្រទេសវៀតណាម ឆ្លងកាត់តាមខេត្តកណ្តាលឆ្ពោះទៅច្រកអន្តរជាតិកម្ពុជា-វៀតណាម «ភ្នំឌិន» ក្នុងខេត្តតាកែវ។ ដោយសារមើលឃើញពីសក្តានុពលនៃការដឹកជញ្ជូនទំនិញចេញ-ចូលរបស់ប្រទេសទាំងពីរ រដ្ឋាភិបាលគ្រោងចំណាយទឹកប្រាក់ប្រមាណជា 64លានដុល្លារ​ សាងសង់ផ្លូវនេះឱ្យមានភាពល្អប្រសើរឡើងវិញនៅដើមឆ្នាំក្រោយ បន្ទាប់ពីរងការខូចខាតធ្ងន់ធ្ងរ។

ឯកឧត្តមស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានដឹកនាំគណៈប្រតិភូអញ្ជើញ​ចុះពិនិត្យមើលស្ថានភាពផ្លូវជាតិលេខ2 កាលពីម្សិលមិញនេះ និងបានឱ្យដឹងថា គម្រោងសាងសង់ផ្លូវនេះគ្រោងចំណាយថវិកាប្រមាណ 56លានដុល្លារអាមរិក ក្រោមកម្ចីឥណទានពីរដ្ឋាភិបាលនៃសាធារណរដ្ឋកូរ៉េ និងថវិកាបដិភាគរបស់រាជរដ្ឋាភិបាលកម្ពុជាប្រមាណ 8.5លានលើចម្ងាយផ្លូវប្រវែងសរុប66គីឡូម៉ែត្រ ចាប់ពីរង្វង់មូលក្រុងតាខ្មៅរហូតដល់រង្វង់មូលអូរចំបក់មានប្រវែង 57គីឡូម៉ែត្រ និង9គីឡូមែត្រនៅលើផ្លូវជាតិលេខ22 ក្រាលកៅស៊ូAC សង់ស្ពានថ្មី និងពង្រីកទទឹងផ្លូវឱ្យបាន13ម៉ែត្រ តាមទំហំចរាចរណ៍ និងតាមដំណាក់កាលចាប់ពីរង្វង់មូលកួរស្រូវទៅទិសខាងត្បូងប្រវែង8គីឡូម៉ែត្រគម្រោងសាងសង់ជាបួនគន្លង។ បច្ចុប្បន្នដៃគូអភិវឌ្ឍន៍ភាគីកូរ៉េកំពុងជ្រើសរើសទីប្រឹក្សាបច្ចេកទេសដើម្បីអាចចាប់ផ្តើមរៀបចំ design និងជ្រើសរើសក្រុមហ៊ុនសាងសង់ដែលនឹងចំណាយពេលប្រហែល1ឆ្នាំ មុននឹងចាប់ផ្តើមសាងសង់។

ដោយមើលឃើញពីការលំបាករបស់បងប្អូនប្រជាពលរដ្ឋដែលធ្វើដំណើរលើផ្លូវនេះ ឯកឧត្តមទេសរដ្ឋមន្ត្រីបានណែនាំឱ្យមន្ត្រីក្រោមឱវាទធ្វើរបាយការណ៍ដាក់ជូនសម្តេចនាយករដ្ឋមន្ត្រីដើម្បីស្នើសុំគោលការណ៍ស្វែងរកកញ្ចប់ថវិកាពិសេសមួយដើម្បីដោះស្រាយជួសជុលបណ្តោះអាសន្នអោយបានទាន់ពេលវេលា៕