Author: វល័ក្ខ

ទង្វើ4យ៉ាង សម្រាប់អ្នកគ្រប់គ្នាដែលចង់បានសម្រស់ស្រស់ស្អាត
ខាងក្រោមនេះគឺជា រឿងជាក់ស្តែង4យ៉ាង ដែលអាចជួយឱ្យអ្នកទទួលបាននូវស្បែកដែលមានភាពភ្លឺរលោងស្រស់ស្អាត និងមានសុខភាពល្អ ដូច្នេះសម្រាប់ប្រិយមិត្តអ្នកអានណាដែលចង់បានសម្រស់ស្រស់ស្អាតបែបធម្មជាតិពិតៗនោះ សូមយកវាទៅអនុវត្តឱ្យបានជាប់លាប់ជាប្រចាំ។
ទឹក
ធ្វើវាឱ្យក្លាយជាទម្លាប់ក្នុងការទទួលទានទឹកឱ្យបានយ៉ាងតិច8កែវក្នុងមួយថ្ងៃ។ នៅពេលដែលចំនួននៃការបញ្ចេញ និងការបញ្ចូលជាតិទឹកទៅក្នុងរាងកាយមានភាពមិនស្មើគ្នានោះបញ្ហាផ្សេងៗងាយនឹងកើតឡើងជាទីបំផុត។ រាងកាយយើងត្រូវការទឹក ដើម្បីបំពេញនូវមុខងារផ្សេងៗជាច្រើន ដែលក្នុងនោះរួមមានដូចជាការំលាយអាហារ ការដកដង្ហើម ការស្រូបយកសារធាតុផ្សេងៗ ការធ្វើចលនានៃចរន្តឈាម ការបញ្ចូនសារធាតុចិញ្ចឹម និងការរក្សាសីតុណ្ហភាពក្នុងរាងកាយជាដើម។ នៅពេលដែលជាតិទឹកមានកម្រិតទាប ខូរក្បាល និងបញ្ចូនសញ្ញាប្រាប់ពីការស្រេកទឹក។ ទឹកជាអ្នកផ្តល់ថាមពល និងកាត់បន្ថយភាពហត់នឿយឱ្យអ្នក។ នៅពេលដែលរាងកាយខ្វះជាតិទឹក និងហត់នឿយ ផ្ទៃមុខរបស់អ្នកនឹងមានសភាពស្រអាប់ ហើយអ្នកត្រូវចាំថាផ្ទៃមុខរបស់អ្នកជាកញ្ចក់ឆ្លុះពីសុខភាពអ្នកដូចគ្នាដែរ ដូច្នេះអ្នកត្រូវព្យាបាលវាដោយការទទួលទានសារធាតុចិញ្ចឹម និងទឹកឱ្យបានគ្រប់គ្រាន់។ ដោយសារតែទឹកអាចជួយសម្រួលដល់ការរំលាយអាហារ វាក៏អាចជួយឱ្យផ្ទៃមុខរបស់អ្នកមើលទៅស្រស់ស្រាយ និងចៀសផុតពីការកើតមុនផងដែរ។
ដំណេក
គ្រាន់តែអ្នកមិនបានគេង ផ្ទៃមុខរបស់អ្នកក៏បង្ហាញចេញឱ្យអ្នកផ្សេងបានដឹងភ្លាមតែម្តង។ នៅពេលបញ្ហានេះកើតឡើង ដំណោះស្រាយគឺមិនមែនការលាបបន្ថែមគ្រឿងសម្អាងឱ្យឡើងក្រាស់ ដើម្បីបិទបាំងនោះទេ។ នៅពេលគេងគឺជាពេលដែលស្បែកដំណើរការជួសជុល ស្ថាបនាធ្វើឱ្យស្បែកមានតុល្យភាពឡើងវិញ បង្កើតស្រទាប់កោសិកាស្បែកថ្មី ហើយវាក៏ជាពេលដែលការផ្លាស់ប្តូរនៃអ័រម៉ូន និងមេតាប៉ូលិក ព្រមទាំងធ្វើសកម្មភាពផងដែរ។ ប្រសិនបើអ្នកគេងមិនគ្រប់គ្រាន់ទេនោះ ផលរំខាននឹងចូលមកបង្អាក់ដំណើរការអស់ទាំងនេះ។ 7 ឬ8ម៉ោង គឺជាពេលវេលាចាំបាច់សម្រាប់ការសម្រាក ដែលចាត់ទុកថាគ្រប់គ្រាន់ ឬអាចលើសពីនេះបន្តិចក៏បាន ប៉ុន្តែមិនត្រូវឱ្យច្រើនខ្លាំងពេកទេ។
ហាត់ប្រាណ
អ្នកចាំបាច់ត្រូវតែហាត់ប្រាណយ៉ាងតិចណាស់30នាទីក្នុងមួយថ្ងៃ។ ប្រសិនបើអ្នកមានបញ្ហាស្បែកមុខមានមុន រលាកស្បែក (ស្បែកមានពណ៌ក្រហម ហើយបែកស្រការ) ជាដើមនោះ អ្នកគួរតែបង្កើនការប្រុងប្រយ័ត្នឱ្យបានច្រើនមុនពេលធ្វើការហាត់ប្រាណ ប៉ុន្តែសូមចាំថាមិនត្រូវយកវាមកធ្វើជាលេសដើម្បីបង្អាក់ការបញ្ចេញចោលនូវសារធាតុពុលក្នុងខ្លួនរបស់អ្នកដាច់ខាត។ គ្រូពេទ្យឯកទេសខាងរោគសើស្បែកបានមានប្រសាសន៍ថា ការហាត់ប្រាណជួយបង្កើនចលនាឈាម ដែលអាចជួយឱ្យស្បែកមានសុខភាពល្អ។ នៅពេលដែលអ្នកធ្វើឱ្យរាង-កាយមានសកម្មភាព ឈាមនឹងនាំយកអុកស៊ីហ្ស៊ែន និងសារធាតុចិញ្ចឹមទៅគ្រប់កោសិកា រួមទាំងកោសិកាស្បែកផងដែរ។ ហាត់ប្រាណជួយសម្អាតរាងកាយតាំងពីផ្នែកខាងក្នុងមកដោយការជួយនាំយកកាកសំណល់ និងអនុមូលឥស្សរៈចេញមកក្រៅធ្វើឱ្យស្បែកមានសភាពស្រស់ថ្លា។
ខាត់ស្បែក
បើគ្រាន់តែការងូតទឹកសម្អាតខ្លួនបែបធម្មតាៗដែលអ្នកតែងតែធ្វើជារៀងរាល់ថ្ងៃ នោះវាមិនអាចទុកថាជាការកម្ចាត់កោសិកាស្បែកចាស់ៗចោលដែលប្រកបទៅដោយប្រសិទ្ធភាពនោះទេ ប៉ុន្តែការខាត់ស្បែកទៅវិញទេដែលអាចកម្ចាត់កោសិកាស្បែកចាស់ៗចោល និងបង្កើតស្រទាប់ស្បែកថ្មីមកវិញបានយ៉ាងប្រសើរ។ មិនចាំបាច់ទាល់តែទៅខាត់ស្បែកដោយផលិតផលថ្លៃៗ ឬទៅខាត់នៅក្នុងហាងនោះទេ ព្រោះទាំងនេះជារឿងងាយៗដែលអាចធ្វើបានដោយខ្លួនឯង៕
July 13, 2017
ក្លិបយក្សជប៉ុន FC Tokyo ខ្ចីជើងខ្សែបម្រើឆ្នើមពីក្លិប Bangkok United របស់ថៃ
ក្លិបយក្សរបស់ជប៉ុន FC Tokyo បានចុះហត្ថលេខាជាមួយនឹងខ្សែបម្រើដ៏ឆ្នើមអន្តរជាតិថៃ Jakkit Wachpirom ពីក្លិប Bangkok United ក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះ។ នេះបើយោងតាមការប្រកាសរបស់ក្លិបស្ថិតក្នុងក្របខ័ណ្ឌកំពូល J-League មួយនេះ កាលពីថ្ងៃពុធ។ Jakkit វ័យ20ឆ្នាំ បានលេងឲ្យក្រុមជម្រើសជាតិថៃអាយុក្រោម23ឆ្នាំ និងបានស្ថិតជាសមាជិករបស់ក្រុមជម្រើសជាតិថៃដែលបានបញ្ចប់ក្នុងចំណាត់ថ្នាក់លេខ2ក្នុងព្រឹត្តិការណ៍ Asian Under-19 Championship កាលពីឆ្នាំមុន។ Jakkit គឺជាកីឡាករថៃទី2ដែលបានចូលរួមជាមួយនឹងក្របខ័ណ្ឌកំពូលជប៉ុន J-League ក្រោយពីខ្សែបម្រើដ៏ឆ្នើម Chanathip Songkrasin បានផ្ទេរទៅកាន់ក្លិប Consadole Sapporo។ កីឡាករ Jakkit បានឲ្យដឹងថា៖ «ខ្ញុំពិតជារីករាយណាស់ក្នុងការមានឱកាសទៅលេងនៅក្រៅប្រទេសនៅឯក្លិបល្បីដូចជា FC Tokyo នេះ។ ខ្ញុំនឹងខិតខំព្យាយាមឲ្យអស់ពីសមត្ថភាពតាមដែលខ្ញុំអាចធ្វើបាន និងព្យាយាមដណ្តើមលទ្ធផលឲ្យបានល្អបំផុត»។ ស្របពេលជាមួយគ្នានេះ ក្លិប FC Tokyo ក៏បានបញ្ជាក់ផងដែរថា ពួកគេបានចុះហត្ថលេខាជាមួយនឹងខ្សែបម្រើ Lipe Veloso ដែលជាអតីតកីឡាកររបស់ក្លិបប្រេស៊ីល Palmeiras និងខ្សែការពារអន្តរជាតិកូរ៉េខាងត្បូង Jang Hyun-soo ពីក្លិប Guangzhou R&F។ Jang ធ្លាប់បានលេងឲ្យក្លិប FC Tokyo ពីររដូវកាលមុនពេលផ្ទេរទៅកាន់ក្លិប Guangzhou កាលពីឆ្នាំ2014៕
ប្រភពពី៖ Bangkok Post
July 13, 2017
ប្រព័ន្ធសេវា 2G ផ្ដើមត្រូវបានគេបំភ្លេចចោល…
ប្រព័ន្ធសេវា 2G ដែលមានកំណើតតាំងពីឆ្នាំ1991 របស់ប្រទេសហ្វាំងឡង់ ចាប់ផ្ដើមត្រូវបានក្រុមហ៊ុនបណ្ដាញទូរស័ព្ទចល័តជាច្រើនទូទាំងពិភពលោក ជាពិសេសតំបនអាស៊ីបោះបង់ចោលបណ្ដើរៗហើយ គិតត្រឹមឆ្នាំ 2017 ខណៈប្រព័ន្ធបណ្ដាញបំពាក់បច្ចេកវិទ្យាថ្មីដូចជា 4G LTE និង 5G ក្លាយជាតម្រូវការដ៏មិនអាចខ្វះបានរបស់អ្នកប្រើប្រាស់។
យោងតាមសារព័ត៌មានចិន ឆាយណាប៉ុស្តិ៍ បានរាយការណ៍ថា ប្រតិបត្តិករផ្តល់បណ្តាញ និងសេវាទូរស័ព្ទចំនួន 3 រួមមាន Chunghwa Telecom, Taiwan Mobile & Far EasTone បានបិទមិនឱ្យដំណើរការបណ្តាញ និងសេវា 2G របស់ខ្លួន បើទោះបីជាមានការបដិសេធមិនទទួលយកពីសំណាក់អតិថិជនរបស់ខ្លួនជិត 90,000 នាក់ ស្មើនឹង ០.3% ក្នុងចំណោម 31 លាននៃអតិថិជនសរុបរបស់ប្រទេសនេះក៏ដោយ។ នៅក្នុងខែធ្នូ ឆ្នាំ2016 ក្រុមហ៊ុនតែលស្រ្តា ដែលជាប្រតិបត្តិករទូរស័ព្ទដ៏ធំបំផុតរបស់ប្រទេសអូស្រ្តាលីក៏បានបិទដំណើរការបណ្តាញសេវានេះដែរ ក្រោយពីបានដាក់ឱ្យដំណើរការអស់រយៈពេលជាង 23 ឆ្នាំរួចមក។ ចំណែកក្រុមហ៊ុន Optus របស់ស៊ីងតែល ដែលជាគូប្រកួតរបស់ក្រុមហ៊ុនតែលស្រ្តាក៏បានបញ្ឈប់ការផ្តល់បណ្តាញសេវានេះផងដែរនៅក្នុងខែមេសា ឆ្នាំ 2017 ស្របពេលក្រុមហ៊ុន Vodafone របស់ប្រទេសអូស្រ្តាលីមានគម្រោងលុបចោល GSM ដ៏សំខាន់របស់ខ្លួនត្រឹមខែកញ្ញាខាងមុខនេះ។
ទន្ទឹមនឹងនេះដែរ ក្រុមហ៊ុនចំនួន 3 របស់ប្រទេសសិង្ហបុរីក៏បានបញ្ឈប់ការផ្តល់បណ្តាញសេវា 2G នេះផងដែរកាលពីខែមេសាកន្លងទៅ បន្ទាប់ពីការបិទដំណើរការនៃសេវានេះក្នុងរយៈពេល 3 សប្តាហ៍។
ក្នុងនោះ ក្រុមហ៊ុន NTT Codomo របស់ប្រទេសជប៉ុនបានក្លាយជាក្រុមហ៊ុនដែលបានបិទបណ្តាញសេវានេះមុនគេបង្អស់ក្នុងឆ្នាំ 2011។ ទង្វើរបស់ក្រុមហ៊ុននាំមុខគេក្នុងទីផ្សារទូរគមនាគមន៍ជប៉ុនបានធ្វើឱ្យក្រុមហ៊ុនដទៃទៀតរបស់ប្រទេសជប៉ុនបន្តបិទដំណើរការភ្លាមៗផងដែរ សល់តែក្រុមហ៊ុន Softbank ដែលនៅបន្តបម្រើប្រព័ន្ធទូរស័ព្ទដៃផ្ទាល់ខ្លួនហៅថា PHS- Personal Handy-Phone System (ស្តង់ដារជប៉ុន) 2G ដល់អតិថិជនជិត 3 លាននាក់របស់ខ្លួនចាប់តាំងពីការទិញក្រុមហ៊ុន Willcom នៅក្នុងឆ្នាំ 2010។ ស្របពេលដែលបណ្ដាញសេវា 4G LTE បានបើកដំណើរការ ក្រុមហ៊ុនកូរ៉េខាងត្បូង KT ក៏បានបិទសេវានេះដូចគ្នា កាលពីដើមឆ្នាំ 2012៕
July 13, 2017
ក្រុមហ៊ុនដ៏ល្បីមកពីអាល្លឺម៉ង់ ចាប់ដៃគូក្នុងស្រុកពង្រីកវិសាលភាពនៅកម្ពុជាលើការផ្គត់ផ្គង់វិស័យ ទ្វារ បង្អួច
ខណៈពេលដែលកម្ពុជាត្រូវបានគេសម្លឹងឃើញថា កំពុងតែមានការរីកចម្រើន និងអភិវឌ្ឍនខ្លាំងទៅលើវិស័យសាងសង់សំណង់អគារយ៉ាងផុលផុសនោះ បានធ្វើបណ្តាវិនិយោគិន ក៏ដូចជាក្រុមហ៊ុនក្រៅស្រុកមួយចំនួន ដែលពាក់ព័ន្ធទៅនឹងទៅវិស័យមួយនេះ សម្រេចចិត្តបណ្តាក់ទុន ក៏ដូចជាស្វែងរកក្រុមហ៊ុនក្នុងស្រុកនានា ដើម្បីធ្វើជាដៃគូយ៉ាងជិតស្និទ្ធក្នុងការពង្រីកវិសាលភាពរបស់ខ្លួននៅលើទីផ្សារសំណង់ក្នុងប្រទេសដែលកំពុងអភិវឌ្ឍមួយនេះ ។
ជាក់ស្ដែង កាលពីសប្ដាហ៍កន្លងទៅនេះ នៅសណ្ឋាគារភ្នំពេញ Profine ដែលជាក្រុមហ៊ុនដ៏ល្បីឈ្មោះមានប្រភពនៅប្រទេសអាល្លឺម៉ង់ និងមានជំនាញក្នុងការផលិតទ្វារ បង្អួច សុវត្ថិភាពចែកចាយយ៉ាងទូលាយជាង 70 ប្រទេសនៅទូទាំងពិភពលោកនោះ បានសម្រេចប្រកាសជាផ្លូវការចាប់ដៃគូសហការជាផ្លូវការជាមួយក្រុមហ៊ុន G Gear Pronit ដែលជាអង្គភាពអាជីវកម្មមួយរបស់ G Gear ហើយត្រូវបានបង្កើតឡើងនៅក្នុងឆ្នាំ 2015 ដែលផ្តោតសំខាន់លើការផ្គត់ផ្គង់ និងផ្តល់សេវាកម្មនៃផលិតផលបង្អួចនិងទ្វារប្រភេទ PVC ។
លោក ហ៊ ហាប់ ដែលជាអគ្គនាយករបស់ក្រុមហ៊ុន G Gear Pronith បានមានប្រសាស៏អោយដឹងថា « G Gear Pronith » គឺជាក្រុមហ៊ុនចែកចាយជាផ្លូវការ និងជាដៃគូរយុទ្ធសាស្រ្ដតែមួយគត់របសក្រុមហ៊ុន Profine នៅក្នុងប្រទេសកម្ពុជា នេះគឺដោយសារតែក្រុមហ៊ុន G Gear Pronith មានក្រុមការងារបេ្ដជ្ញាបងើ្តតនូវតម្លៃនៃការរស់នៅជាមួយនឹងអ្នកជំនាញ សម្រាប់ផលិតផល U-PVC ថ្មីនេះ ក្នុងការរចនា ទ្វារ បង្អួច ជាមួយសេវាកម្ម ដែលប្រកបដោយជំនាញ និង វិជ្ជាជីវៈ។ នៅក្នុងកិច្ចសហការរវាងក្រុមហ៊ុន G Gear និងក្រុមហ៊ុន Profine ដែលជាក្រុមហ៊ុនផលិតផល U-PVC ម៉ាក KÖMMERLING នេះយើងមានសង្ឃឹមថា វានឹងមាននាំមកនូវបច្ចេកវិទ្យាជឿនលឿនតាមរយៈផលិតផល ទ្វារ និង បង្អួច u-PVC ថ្នាក់ស្ដង់ដា និង គុណភាពខ្ពង់លំដាប់អន្តរជាតិ នៅក្នុងទីផ្សារកម្ពុជា។
លោកបានបញ្ជាក់ថា កាលពីឆ្នាំមុន ក្រុមហ៊ុន Profine ដែលមានផលិត Kommerling បានសហការជាមួយ G GEAR ក្នុងការផ្តល់សិទ្ធចែកចាយជាផ្លូវការ និងជាដៃគូពាណិជ្ជកម្មតែមួយគត់នៅក្នុងប្រទេសកម្ពុជា ពីព្រោះ G GEAR Pronit មានក្រុមការងារដែលពោពេញដោយសមត្តភាព និងមានការប្តេជ្ញាខ្ពស់ដើម្បីលើកកម្ពស់ស្តង់ដារនៃការរស់នៅរបស់ប្រជាជនកម្ពុជាជាមួយនឹងឯកទេសខាង ទ្វារ បង្អួច ប្រភេទ U-PVC និងការផ្តល់នៅសេវាកម្មល្អ ប្រកបដោយវិជ្ជាជីវៈត្រឹមត្រូវ។
លោក ហ៊ ហាប់ បានបន្ថែមយ៉ាងដូច្នេះថា ៖ « យើងកំពុងផ្តល់ជូននូវផលិតផលទ្វារបង្អួចដែលមានគុណភាពល្អដាច់គេ ជាមួយនឹងលក្ខណៈពិសេសជាច្រើនរួមមាន ៖ អ៊ីសូឡង់ការពារសម្លេងរំខាន អ៊ីសូឡង់ការពារកំដៅ ធន់នឹងអាកាសធាតុ មានស្ថេរភាពយូអង្វែង និងមានសុវត្ថិភាពខ្ពស់ ការរចនានិងពណ៌មានលក្ខណៈស្រស់ស្អាត ហើយមិនមានការប៊ះពាល់ដល់បរិយាកាស 100% ។ ផលិតផល ទ្វារ បង្អួច ម៉ាក U-PVC មានភាពសាកសមទៅនឹងគម្រោងផ្សេងៗ ដូចជា៖ Apartment & ខុនដូ វីឡា & ផ្ទះល្វែង អគារពាណិជ្ជកម្ម និងសណ្ឋាគារ & សាលារៀន ហើយនៅក្នុងកិច្ចសហការរវាងក្រុមហ៊ុន G Gear Pronit និង Profine យើងសង្ឃឹមថាវាអាចនាំមកនូវការផ្លាស់ប្តូរបច្ចេកវិទ្យាទំនើបដោយនាំមកនូវបង្អួច U-PVC ដែលមានគុណភាពកម្រិតស្តង់ដារឆ្ពោះមកកាន់ទីផ្សារកម្ពុជា»៕
July 13, 2017
ហ្អា៎ា!? ហាងបាយសាច់ជ្រូកអាំងរបស់ VJ អាណូ មានអ្នកចង់ទិញ Franchise?
ក្រោយពី VJ អាណូ បង្កើតអាជីវកម្មលក់បាយសាច់ជ្រូកអាំងអស់រយៈពេល 6ខែកន្លងមក បច្ចុប្បន្ននាងទទួលបានអតិថិជនច្រើនដែលជាមធ្យមនាងលក់បានប្រមាណ 350 ប្រអប់ក្នុងមួយថ្ងៃតាមរយៈការកុម្ម៉ង់ទិញតាមទូរស័ព្ទ។ ស្របពេលជាមួយគ្នានេះដែរ នាងបានប្រាប់ថា ហាងបាយដែលមានឈ្មោះថា «Christian បាយសាច់ជ្រូកអាំងពិសេស» នេះកំពុងតែមានអ្នកចង់ទិញ Franchise។
កញ្ញា សួន ភក្ដី ហៅ VJ អាណូ បានលើកឡើងថា បន្ទាប់ពីនាងទទួលបានយោបល់ពីមិត្ដភ័ក្ដិជាច្រើនបង្ខំឱ្យនាងរៀបចំបើកអាជីវកម្មហាងលក់បាយរួចមក នាងក៏បានដាក់ឈ្មោះហាងថា «Christian បាយសាច់ជ្រូកអាំងពិសេស» និងបានសុំចុះបញ្ជីនៅក្រសួងពាណិជ្ជកម្មរួចជាស្រេចទៀតផង។ នាងបន្ដថា ការធ្វើដូច្នេះព្រោះនាងចង់រៀបចំឱ្យអាជីកម្មរបស់ខ្លួនដំណើរការមានលក្ខណៈត្រឹមត្រូវតាមច្បាប់ ចៀសវាងការចម្លងឈ្មោះពាណិជ្ជកម្មមួយនេះ គ្រាដែលនាងរំពឹងថា មុខរបរមួយនេះនឹងមានភាពរីកចម្រើនទៅអនាគត។
VJ អាណូ បានប្រាប់ទៀតថា បន្ទាប់ពីដំណើរការបានកន្លះឆ្នាំ ឃើញថាមានលក្ខណៈល្អប្រសើរដូចនាងរំពឹងទុកមែន ទើបធ្វើឱ្យនាងឈានទៅពង្រីកសាខាមួយទៀតនៅខេត្ដសៀមរាប ជាពិសេសបាយសាច់ជ្រូកប្រឡាក់របស់នាងក៏មានអ្នកមានមុខមាត់ក្នុងសង្គម និងឧកញ៉ាមួយចំនួនធ្លាប់បានទទួលសេវាកម្មពីហាងរបស់នាងផងដែរ។ VJ អាណូ ប្រាប់ទៀតថា៖ «ដោយសារតែមានសាខានៅខេត្ដសៀមរាបនេះហើយ ទើបខ្ញុំត្រូវចំណាយពេលចុងសប្ដាហ៍រៀងរាល់ថ្ងៃសៅរ៍ អាទិត្យ ជិះយន្ដហោះទៅមើលការងារនៅទីនោះ»។
ពិធីការិនី និងតារាសម្ដែងរូបនេះបញ្ជាក់ថា បន្ទាប់ពីមានការសរសើរពីរសជាតិសាច់ប្រឡាក់ឆ្ងាញ់ តាមរយៈការប្រើរូបមន្ដប្រឡាក់សាច់ផ្ទាល់ខ្លួនរបស់នាងដែលទម្លាប់ធ្វើក្នុងគ្រួសារគួបផ្សំជាមួយ និងសេវាកម្មផ្ដល់ទៅឱ្យភ្ញៀវបានល្អផងនោះ ក៏មានអ្នកចង់ទិញ Franchise ឬរូបមន្ដនៃការប្រឡាក់សាច់នោះ។
តែទោះជាយ៉ាងណានាងមានអារម្មណ៍ស្ទាក់ស្ទើរមិនចង់លក់ទេ ខណៈនាងកំពុងតែមានបំណងចង់ពង្រីកសាខារបស់ខ្លួនមួយទៀតនៅក្នុងផ្សារសុវណ្ណា ទីក្រុងភ្នំពេញ៕
July 13, 2017
Horn ស្នើឲ្យមានការប្រកួតសងសឹកជាមួយ Pacquiao ដើម្បីបញ្ចប់ជម្លោះ
កីឡាករប្រដាល់ Jeff Horn របស់អូស្ត្រាលី ជឿជាក់ថា រូបគេពិតជាបានទទួលជ័យជម្នះលើកីឡាករជើងចាស់ Manny Pacquiao យ៉ាងស័ក្តិសមប្រាកដមែន ខណៈដែលរូបគេក៏បានស្វាគមន៍ទៅលើលទ្ធផលនៃការត្រួតពិនិត្យឡើងវិញនៃការផ្តល់ពិន្ទុពីការប្រកួតរបស់គេកាលពីដើមខែនេះពីសំណាក់ WBO ផងដែរ។
ប៉ុន្តែ ទោះបីជាយ៉ាងណា កីឡាករមិនស្គាល់ចាញ់រូបនេះនៅតែជឿជាក់ថា មានតែការប្រកួតសងសឹកជាមួយនឹងតារាប្រដាល់របស់ហ្វីលីពីនរូបនេះប៉ុណ្ណោះ ទើបអាចដោះស្រាយភាពចម្រូងចម្រាសផ្សេងៗបាន។ Horn បានកត់ត្រាជ័យជម្នះដោយពិន្ទុជាឯកច្ឆន្ទក្នុងការប្រកួត12ទឹកដ៏មិននឹកស្មានដល់លើកីឡាករ Pacquiao ក្នុងទីក្រុង Brisbane កាលពីថ្ងៃទី2 ខែកក្កដា ប៉ុន្តែលទ្ធផលនេះបានធ្វើឲ្យមានការតវ៉ា និងការរិះគន់យ៉ាងខ្លាំងក្លាក្នុងប្រទេសហ្វីលីពីន។
ស្ថាប័ន WBO បានបង្កើតក្រុមប្រឹក្សាឯករាជ្យមួយ និងចៅក្រមអនាមិកដើម្បីទស្សនាការប្រកួតនេះដោយគ្មានសំឡេង និងដើម្បីកាត់សេចក្តីថា តើកីឡាកររូបណាឈ្នះក្នុងទឹកនីមួយៗ?។ កាលពីថ្ងៃអង្គារ ស្ថាប័ននេះបានបញ្ជាក់ថា ចៅក្រមបានរកឃើញថា Horn បានទទួលជ័យជម្នះ7ទឹក ហើយ Pacquiao ឈ្នះត្រឹមតែ5ទឹកប៉ុណ្ណោះ។ Horn វ័យ29ឆ្នាំ បានប្រាប់អ្នកយកព័ត៌មានក្នុងទីក្រុង Los Angeles ថា រូបគេបានស្វាគមន៍ចំពោះការត្រួតពិនិត្យឡើងវិញរបស់ស្ថាប័ន WBO បើទោះបីរូបគេមានភាពច្បាស់លាស់ក្នុងចិត្តរបស់គេថា គេពិតជាបានទទួលជ័យជម្នះក៏ដោយ។
ទោះបីជាយ៉ាងណា អតីតគ្រូបង្រៀនរូបនេះជឿជាក់ថា មានតែការប្រកួតសងសឹកប៉ុណ្ណោះទើបអាចដោះស្រាយបញ្ហាចម្រូងចម្រាស់ផ្សេងៗបាន។ កីឡាកររូបនេះបានបន្ថែមទៀតថា៖ «ខ្ញុំជឿថា មធ្យោបាយដ៏ល្អក្នុងការដោះស្រាយបញ្ហានេះបាន គឺការប្រកួតសងសឹក។ ខ្ញុំគិតថា ខ្ញុំនឹងធ្វើបានកាន់តែល្អឡើងទៀតក្នុងការប្រកួតលើកទី2»។ ប៉ុន្តែ ក្រុមការងាររបស់ Pacquiao បានចោទប្រកាន់ថា អាជ្ញាកណ្តាល បានអនុញ្ញាតឲ្យ Horn ប្រើប្រាស់ស្នៀតប្រយុទ្ធដែលខុសពីច្បាប់កីឡា។
ក្រោយពីការត្រួតពិនិត្យឡើងវិញរបស់ WBO កីឡាករ Pacquiao បានឲ្យដឹងក្នុងសេចក្តីថ្លែងការណ៍មួយកាលពីល្ងាចថ្ងៃអង្គារថា៖ «យើងបានឃើញការកាត់សេចក្តីដ៏អន់បំផុត កាលពីមុនដោយចៅក្រមជាអ្នកគ្រប់គ្រងលើលទ្ធផលផ្សេងៗ។ គ្មានអ្វីដែលធ្វើឲ្យខ្ញុំភ្ញាក់ផ្អើលឡើយ។ សូមឲ្យអ្នកគាំទ្រកាត់សេចក្តីដោយខ្លួនឯងចុះ។ មនុស្សជាច្រើនបានឃើញអ្វីដែលបានកើតឡើង»៕
ប្រភពពី៖ ESPN
July 13, 2017
ការនាំចូលរថយន្តថ្មីកើនឡើង ខណៈរថយន្តជជុះថយចុះ
ភ្នំពេញៈ ដំណាច់ឆមាសទី1ឆ្នាំនេះ និន្នាការនៃការនាំចូលរថយន្តថ្មីបានកើនឡើង ខណៈការនាំចូលរថយន្តជជុះបានថយចុះ ដោយសារតែនិន្នាការប្រើប្រាស់រថយន្តថ្មីកើនឡើង។
លោក សេង វឹង អគ្គនាយកផ្នែកបច្ចេកទេសយានយន្តនៃក្រុមហ៊ុន RMA Asia បានថ្លែងឲ្យដឹងតាមទូរស័ព្ទនារសៀលថ្ងៃទី12 កក្កដាម្សិលមិញថា ទីផ្សាររថយន្តរបស់ក្រុមហ៊ុនខ្លះបានថយចុះ ប៉ុន្តែក្រុមហ៊ុនរបស់លោកនៅតែទទួលបានកំណើននៃការលក់ដដែល ដោយសារតែប្រព័ន្ធបញ្ជា និងប្រើប្រាស់ក្នុងរថយន្តទំនើបពិសេសទទួលបានទំនុកចិត្តពីអតិថិជន ។ លោកបន្តថា និន្នាការប្រើប្រាស់រថយន្តថ្មី បាននិងកំពុងកើនឡើង ដោយយោងតាមតួលេខនាំចូលរថយន្តបានបង្ហាញថា ការនាំរថយន្តថ្មីចូលបានកើនពី13ដល់19ភាគរយ និងនាំចូលរថយន្តជជុះបានថយពី89 មកនៅត្រឹម83ភាគរយ។
លោកបន្តថា “ការលក់រថយន្តរបស់ក្រុមហ៊ុនបានកើនឡើងចន្លោះពី20 ទៅ30ភាគរយ នៅដំណាច់ឆមាសទី1ឆ្នាំនេះធៀបរយៈពេលដូចគ្នាកាលពីឆ្នាំមុន ហើយរថយន្តលក់ដាច់ភាគច្រើនជាប្រភេទរថយន្ត Pick Up ដែលជារថយន្តមានបំពាក់សេវាកម្ម និងប្រព័ន្ធបញ្ជាទំនើប និងមានការពេញនិយមពីអ្នកប្រើប្រាស់។
កញ្ញា ស៊ឹង សុផារី អ្នកនាំពាក្យក្រសួងពាណិជ្ជកម្មបានថ្លែងថា និន្នាការប្រើប្រាស់រថយន្តថ្មីពិតជាកើនឡើងមែន ហើយជាគោលនយោបាយ រដ្ឋាភិបាលលើកទឹកចិត្តឲ្យប្រជាពលរដ្ឋប្រើប្រាស់រថយន្តថ្មីផងដែរ ប៉ុន្តែទីផ្សាររថយន្តមួយទឹកក៏នៅតែរក្សាបានកំណើនផងដែរ ដោយសារជីវភាពប្រជាពលរដ្ឋដែលមានកម្រិតមធ្យមច្រើន និងដោយសារអាចទិញរថយន្តបង់រំលស់បានផងនោះ ទើបប្រជាជនមួយចំនួនបានទិញរថយន្តថ្មីប្រើប្រាស់ផងដែរ។
កញ្ញាបន្តថា “កម្រិតកំណើននៃការលក់រថយន្តថ្មី វាអាស្រ័យលើកម្លាំងទិញរបស់ប្រជាពលរដ្ឋ ប៉ុន្តែប៉ុន្មានឆ្នាំមកនេះអ្នកមានជីវភាពធូរធារបានកើនឡើង ដែលធ្វើឲ្យទីផ្សាររថយន្តថ្មីមានកំណើនផងដែរ៕
July 13, 2017
មន្ទីរពេទ្យ ជប៉ុនសាន់រ៉ាយស៍ភ្នំពេញ មានគ្រូពេទ្យឯកទេស ផ្នែកក្រពះ-ពោះវៀន ពីប្រទេសជប៉ុន មកព្យាបាលពលរដ្ឋកម្ពុជា
បន្ទាប់ពីបានធ្វើកិច្ចសម្ពោធបើកដំណើរការទទួលព្យាបាលអ្នកជំងឺទូទៅនៅក្នុងព្រះរាជាណាចក្រកម្ពុជា រាប់ទាំងប្រជាពលរដ្ឋជាជនជាតិខ្មែរ ជប៉ុន ក៏ដូចជាអ្នកជំងឺចម្រុះជាតិសាសន៍ដទៃទៀតចាប់តាំងពីថ្ងៃទី20 ខែកញ្ញា ឆ្នាំ2016 ក្រោមវត្តមានដ៏ខ្ពង់ខ្ពស់របស់សម្ដេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជារហូតមកដល់ពេលនេះ មន្ទីរពេទ្យ ជប៉ុន សាន់រ៉ាយស៍ ភ្នំពេញ ដែលភាសាបរទេសហៅថា Sunrise Japan Hospital Phnom Penh បាននិងកំពុងទទួលបាន ការជឿទុកចិត្តពីសំណាក់អ្នកជំងឺទូទៅគួរឱ្យកត់សម្គាល់។ ជាមួយគ្នានេះដើម្បីបំពេញបន្ថែមលើតម្រូវការផ្នែកសុខាភិបាលនៅក្នុងស្រុក ជាពិសេសដើម្បីឆ្លើយតប ទៅនឹងតម្រូវការរបស់អ្នកជំងឺផងដែរនោះ មន្ទីរពេទ្យ ជប៉ុន សាន់រ៉ាយស៍ ភ្នំពេញ បានអញ្ជើញអ្នកជំនាញមានឯកទេសផ្នែកព្យាបាលជំងឺពាក់ព័ន្ធនឹងក្រពះ ពោះវៀន ដែលមានបទពិសោធព្យាបាលនៅប្រទេសជប៉ុនមិនក្រោម 20ឆ្នាំ មកប្រចាំការនៅក្នុងមន្ទីរពេទ្យដ៏ទំនើប និងទាន់សម័យកម្រិតស្ដង់ដារអន្តរជាតិមួយនេះ ដែល
កាន់តែបង្កើននូវទំនុកចិត្តខ្ពស់ដល់អ្នកស្វែងរកសេវាព្យាបាលទ្វេដង។
លោកវេជ្ជបណ្ឌិត ហុកាមឹរ៉ា ណុប៊ឹកាហ្ស៊ឹ (Hokamura Nobukazu) អ្នកជំនាញផ្នែកព្យាបាលជំងឺក្រពះ-ពោះវៀន ដែលត្រូវបានអញ្ជើញមកពីប្រទេសជប៉ុន ដើម្បីមកបម្រើការងារលើសេវាព្យាបាលនៅក្នុងមន្ទីរពេទ្យ ជប៉ុន សាន់រ៉ាយស៍ ភ្នំពេញ បានប្រាប់ឱ្យដឹងថា លោកបានបញ្ចប់ការសិក្សានៅសាកលវិទ្យាល័យតូក្យូ ហើយទៅបន្តសិក្សាចាប់យកជំនាញនៅមជ្ឈមណ្ឌលនៃជំងឺមហារីកប្រចាំប្រទេសជប៉ុន។ ជាមួយគ្នានេះផងដែរ លោកក៏មានបទពិសោធក្នុងនាមជាអ្នកឯកទេសជំនាញលើការព្យាបាលជំងឺពាក់ព័ន្ធទៅនឹងប្រព័ន្ធរំលាយអាហារ ជាពិសេស បញ្ហាជំងឺក្រពះ និងពោះវៀនជាង25ឆ្នាំ ដែលក្នុងនោះលោកធ្លាប់បម្រើការងារ
នៅក្នុងមន្ទីរពេទ្យរដ្ឋ21ឆ្នាំ និងនៅក្នុងមន្ទីរពេទ្យឯកជនមានចំនួនជាង4ឆ្នាំ មុនពេលមកកាន់ការងារនៅមន្ទីរពេទ្យ ជប៉ុន សាន់រ៉ាយស៍ ភ្នំពេញ ប្រចាំនៅកម្ពុជា។ លោកបានបញ្ជាក់ទៀតថា ផ្អែកតាមបទពិសោធក្នុងការព្យាបាលរបស់លោកអស់រយៈកាលជាង25ឆ្នាំកន្លងទៅនេះ សម្រាប់បញ្ហាប្រឈមរបស់មនុស្សទូទៅ គឺពាក់ព័ន្ធទៅនឹងជំងឺក្រពះមានអត្រាច្រើនជាងជំងឺផ្សេងៗទាំងអស់ ខណៈដែលជំងឺមួយប្រភេទនេះងាយនឹងកើតមាន ដោយសារតែកត្តានៃការរស់នៅ ដូចជា ការសម្រាកមិនបានគ្រប់គ្រាន់ ការទទួលជាតិអាល់កុល របបអាហារប្រចាំថ្ងៃ ដែលមានជាតិហឹរពេក និងប្រៃពេក ហើយកត្តាដែលបង្កឱ្យមានជំងឺក្រពះគឺបណ្ដាលមកពីមេរោគ H.Pylori នៅក្នុងក្រពះ។
រោគសញ្ញា ៖ លោកវេជ្ជបណ្ឌិត ហុកាមឹរ៉ា ណុប៊ឹកាហ្ស៊ឹ បានបន្តទៀតថា ចំពោះជំងឺមហារីកក្រពះនេះ នៅដំណាក់កាលដំបូង ជាទូទៅវាមិនបានបង្ហាញជារោគសញ្ញាអ្វីគួរឱ្យកត់សម្គាល់នោះឡើយ។ ប៉ុន្ដែលោកអ្នកអាចធ្វើការពិនិត្យសុខភាពឱ្យបានទៀងទាត់ ដើម្បីប្រាកដថា អ្នកមានសុខភាពល្អ និងមិនមានការព្រួយបារម្ភចំពោះជំងឺមហារីកក្រពេះនោះទេ។ ដោយឡែកនៅពេលជំងឺមហារីកចេះតែវិវត្តទៅមុខឈានដល់ដំណាក់កាលធ្ងន់ធ្ងរ ឬរ៉ាំរ៉ៃ វាអាចបង្កឱ្យមានរោគសញ្ញាមួយចំនួនដូចជា មានការឈឺចាប់នៅតំបន់ពោះ ពិបាកក្នុងការលេបអាហារ មានអាការអួលណែនដើម-ក មានចង្អោរ ឬក្អួតក្រោយពេលទទួលទានអាហារ ស្រកទម្ងន់ និងមានអារម្មណ៍ថាឆ្អែតជាដើម។ ប៉ុន្តែអ្វីដែលកាន់តែច្បាស់ក្នុងការធ្វើរោគវិនិច្ឆ័យគឺការពិនិត្យដោយម៉ាស៊ីនមីក្រូទស្សន៍ និងការច្រឹបយកសាច់ក្រពះទៅធ្វើការវិភាគ។
ការព្យាបាល ៖ ចំពោះវិធីសាស្ត្រនៃការព្យាបាល អ្នកជំនាញនឹងអនុវត្តអាស្រ័យទៅតាមដំណាក់កាលនៃជំងឺមហារីក និងភាពជាក់ស្ដែង ជាមួយនឹងវិធី2យ៉ាង គឺការវះកាត់ និងការព្យាបាលដោយប្រើថ្នាំ។ ដោយឡែកការវះកាត់មានជម្រើស2យ៉ាង គឺការវះកាត់បើកមុខធំ និងការវះកាត់ដោយការចោះ។ សម្រាប់វិធីសាស្ត្រវះកាត់ដោយការចោះ គឺត្រូវបានធ្វើឡើងត្រឹមដំណាក់កាលដំបូង ដែលត្រឹមតែជាការវះកាត់យកដុំមហារីកដែលតូចបំផុតចេញពីក្រពះ។ ប៉ុន្តែក្នុងករណីមហារីកដំណាក់កាលធ្ងន់ធ្ងរអ្នកជំនាញចាំបាច់ប្រើវិធីសាស្ត្រវះកាត់បើកមុខធំ ដើម្បីកាត់ចោលនូវផ្នែកណាមួយនៃក្រពះដែលមានមហារីក ឬអាចធ្ងន់ធ្ងរជាងនេះអ្នកជំនាញចាំបាច់ត្រូវកាត់ក្រពះចោលតែម្ដង។ បន្ទាប់ពីក្រោយការវះកាត់ដោយជោគជ័យ អ្នកជំងឺត្រូវអនុវត្តទៅតាមការណែនាំរបស់អ្នកជំនាញ ដូចជា កម្រិតនៃការទទួលទានអាហារ ការព្យាយាមទទួលទានថ្នាំឱ្យបានទៀងពេល ជាពិសេស ត្រូវទៅជួបពិនិត្យ និងពិភាក្សាជាមួយអ្នកជំនាញទៅតាមការណាត់របស់អ្នកជំនាញ។
វិធីការពារ ៖ ប្រសិនបើមិនចង់ឱ្យជំងឺមហារីកចូលមកបៀតបៀននោះទេ លោកអ្នកត្រូវតែអនុវត្តឱ្យបានទៅតាមការណែនាំរបស់លោកវេជ្ជបណ្ឌិត ហុកាមឹរ៉ា ណុប៊ឹកាហ្ស៊ឹ ដូចជា ព្យាយាមទទួលទានអាហារប្រចាំថ្ងៃឱ្យបានទៀងពេល 3ពេលក្នុងមួយថ្ងៃ, សម្រាក (គេង) ឱ្យបានគ្រប់គ្រាន់, ចៀសវាងអាហារមានជាតិខ្លាញ់ច្រើន អាហារហឹរខ្លាំង
អាហាររសជាតិប្រៃ ជាពិសេសបញ្ឈប់ការទទួលទានស្រា ឬជាតិអាល់កុល។
សូមព្យាយាមថែរក្សាសុខភាពរបស់លោកអ្នកឱ្យឃ្លាតឆ្ងាយពីជំងឺមហារីកក្រពះ៕

July 12, 2017
ដំណើរកម្សាន្តដ៏អស្ចារ្យសម្រាប់អ្នកសារព័ត៌មានក្នុងតំបន់អាស៊ាន និងតំបន់សំខាន់របស់ប្រទេសម៉ាឡេស៊ី
ជាមោទនភាពបំផុតសម្រាប់ប្រទេសម៉ាឡេស៊ី ដែលបានរៀបចំកម្មវិធីដំណើរទេសចរណ៍មកកាន់ម៉ាឡេស៊ីក្នុងរដូវកាលទី 2 នៃឆ្នាំ2017 ក្រោមការចូលរួមពីសំណាក់បណ្តាអ្នកសារព័ត៌មានសរុបចំនួន 50នាក់ មកពីប្រទេសទាំង10 នៃអាស៊ាន ដើម្បីបានស្វែងយល់កាន់តែច្បាស់ពីវិស័យទេសចរណ៍នានាប្រចាំប្រទេសរបស់ខ្លួនរយៈពេល 4 យប់ 5 ថ្ងៃ ដោយចាប់ផ្តើមតាំងពីថ្ងៃទី 11 រហូតដល់ថ្ងៃទី 14 ខែកក្កដា ឆ្នាំ2017 ។
នៅក្នុងកម្មវិធីដំណើរទេសចរណ៍របស់អ្នកសារព័ត៌មានប្រចាំឆ្នាំ 2017 ខាងលើនេះ មានគោលបំណងចង់ឱ្យអ្នកសារព័ត៌មានទាំងអស់បានដឹង និងស្គាល់ រួមជាមួយនឹងការជួយផ្សព្វផ្សាយបន្តពីវប្បធម៌ អរិយ្យធម៌ដែលមានវ័យចំណាស់របស់ប្រទេសម៉ាឡេស៊ី សិល្បៈនៃការធ្វើម្ហូប ក៏ដូចជាតំបន់ទេសចរណ៍ដ៏មានសក្តានុពលជាច្រើនទៀត ដើម្បីបង្ហាញជួយឱ្យវិស័យទេសចរណ៍នៃប្រទេសមួយនេះកាន់តែមានឈ្មោះប៉សំឡេងតាមរយៈការបង្ហាញរូបភាពបែបសប្បាយៗ និងស្រស់ស្អាតនៅលើបណ្តាញទំនាក់ទំនងសង្គម រួមជាមួយប្រព័ន្ធផ្សព្វផ្សាយឌីជីថលផ្សេងទៀត ដូចជា Instagram និង Facebook ជាដើម។
ចំពោះការធ្វើដំណើរកម្សាន្តខាងលើនេះ អ្នកចូលរួមទាំងអស់ចាំបាច់ត្រូវតែចេះបើកបររថយន្តនៅលើផ្លូវថ្នល់ទីសាធារណៈ ដើម្បីងាយស្រួលក្នុងការបញ្ជារថយន្តទៅកាន់តំបន់នានានៅជុំវិញប្រទេសម៉ាឡេស៊ី ដោយការចាប់ផ្តើមចេញដំណើរពីភាគខាងជើងទៅភាគខាងត្បូង (ចេញពីក្រុងកូឡាឡាំពួរ) តាមបណ្តាញផ្លូវសំខាន់ៗប្រចាំប្រទេស។ អ្នកចូលរួមទាំងអស់នឹងទទួលបានឱកាសផ្លាស់ប្តូរបទពិសោធន៍នៃការរស់នៅ រួមជាមួយនឹងការស្នាក់នៅក្នុងផ្ទះបុរាណ ហើយអ្នកចូលរួមទាំងនោះក៏អាចរៀននេសាទ ទទួលយកបទពិសោធន៍ល្អៗជាច្រើនទៀតពីប្រទេសម៉ាឡេស៊ី។
សូមបញ្ជាក់ផងដែរថា ចំពោះតំបន់កម្សាន្តសំខាន់ៗដែលបណ្តាអ្នកសារព័ត៌មានទាំង10ប្រទេសបានទៅទស្សនារួមមានដូចជា ៖ ទីក្រុង កូឡាឡាំពួរ , តំបន់ទេចរណ៍វប្បធម៌ Merdeka Square , តំបន់កម្សាន្ត Putrajaya , ទីរមណីយដ្ឋានប្រវត្តិសាស្រ្តភ្នំបាទូ , រួមជាមួយនឹងបណ្តាតំបន់ទេសចរណ៍សំខាន់ៗជាច្រើនទីតាំងទៀត។ បន្ថែមពីនេះ អ្នកទាំងអស់ក៏មានឱកាសបានលេងល្បែងកម្សាន្តជាច្រើនទៀតដែលសុទ្ធតែបង្កភាពសប្បាយរីករាយ រួមជាមួយការទស្សនាខ្សែភាពនៅក្នុងរោងភាពយន្តដ៏ទំនើបប្រចាំប្រទេសផងដែរ ៕

July 12, 2017
ក្រសួងលើកទឹកចិត្តឱ្យគ្រប់សហគ្រាសពង្រឹងគុណភាពដើម្បីជ្រៀតចូលទីផ្សារបរទេស
ភ្នំពេញ៖ ថ្លែងក្នុងពិធីសម្ពោធពិព័រណ៍ពាណិជ្ជកម្ម និងទេសចរណ៍ឥណ្ឌូនេស៊ីលើកទី11 ឆ្នាំ2017 ដែលប្រារព្ធធ្វើនៅមជ្ឈមណ្ឌល និងសន្និសីទកោះពេជ្រ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានជំរុញឱ្យសហគ្រាសធុនតូច និងមធ្យមកម្ពុជាទាំងអស់ត្រូវពង្រឹងសមត្ថភាពដើម្បីជ្រៀតចូលទីផ្សារបរទេសក្នុងយុគសម័យសមាហរណកម្មអាស៊ាននេះ។
ឯកឧត្តមបានផ្ដាំផ្ញើទៅសហគ្រាសធុនតូច និងមធ្យមកម្ពុជា និងលើកទឹកចិត្តឲ្យសហគ្រាសកម្ពុជាទាំងអស់ប្រឹងប្រែងអភិវឌ្ឍខ្លួនឯងដើម្បីមានសមត្ថភាពគ្រប់គ្រាន់ក្នុងការចូលរួមពិព័រណ៍ផលិតផលស្រដៀងគ្នានៅបរទេសដើម្បីជ្រៀតចូល និងធ្វើពិពិធកម្មទីផ្សារផលិតផលកម្ពុជា។ ឯកឧត្តមសង្កត់ធ្ងន់ថា ការអភិវឌ្ឍសហគ្រាសធុនតូច និងមធ្យមនឹងផ្ដល់អត្ថប្រយោជន៍រួមមកលើឧត្តមភាពរបស់ប្រជាជនកម្ពុជា ដោយសារសហគ្រាសធុនតូច និងមធ្យមជាចលករដ៏ខ្លាំងក្លាក្នុងការផ្តល់ការងារដល់ពលរដ្ឋខ្មែរ និងលើកកម្ពស់សេដ្ឋកិច្ចជាតិកម្ពុជា។
ក្នុងយុទ្ធសាស្រ្តជួយជំរុញ និងលើកកម្ពស់ផលិតផលក្នុងស្រុកឱ្យមានការទទួលស្គាល់ និងចូលរួមប្រើប្រាស់ឱ្យកាន់តែទូលំទូលាយនៅទូទាំងប្រទេស ក្រសួងពាណិជ្ជកម្មនឹងរៀបចំពិព័រណ៍ពាណិជ្ជកម្មផលិតផលខ្មែរដែលមានគុណភាពខ្ពស់ មានសុវត្ថិភាពសម្រាប់អ្នកប្រើប្រាស់ និងមានការវេចខ្ចប់បានល្អប្រសើរត្រឹមត្រូវ អនុលោមតាមស្តង់ដារផលិតកម្មនៅទូទាំងប្រទេសមកដាក់តាំងបង្ហាញដើម្បីស្វែងរកការគាំទ្របន្ត ដែលការតាំងពិព័រណ៍នេះនឹងធ្វើឡើងនៅថ្ងៃទី26-29 ខែតុលា ឆ្នាំ2017 ខាងមុខ នៅមជ្ឈមណ្ឌលវិមានសុភមង្គលក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ៕
July 12, 2017