Author: វល័ក្ខ

  • Chelsea ចុះហត្ថលេខាជាមួយខ្សែបម្រើ Bakayoko ហើយ

    Chelsea ចុះហត្ថលេខាជាមួយខ្សែបម្រើ Bakayoko ហើយ

    ក្លិប Chelsea បានចុះហត្ថលេខាជាមួយនឹងខ្សែបម្រើដ៏មានឥទ្ធិពល Tiemoue Bakayoko មកពីក្រុមម្ចាស់ជើងឯកបារាំង Monaco ហើយក្នុងតម្លៃខ្លួន 40លានផោន (ស្មើនឹង 52.4លានដុល្លារអាមេរិក)។ ខ្សែបម្រើអន្តរជាតិបារាំងវ័យ22ឆ្នាំរូបនេះ បានចុះហត្ថលេខាលើកិច្ចសន្យារយៈពេល5ឆ្នាំជាមួយនឹងក្រុម Chelsea ដែលជាម្ចាស់ជើងឯកក្របខ័ណ្ឌ Premier League។

    រូបគេក្លាយជាកីឡាករចំណូលថ្មីទី2របស់ Chelsea ក្រោយពីពួកគេបានទិញខ្សែការពារ Antonio Rudiger ពីក្លិប Roma របស់អ៊ីតាលី។ Bakayoko បានចូលរួមជាមួយនឹងក្លិប Monaco ដោយចេញពីក្លិប Rennes ដែលស្ថិតក្នុងក្របខ័ណ្ឌ Ligue 1 ដូចគ្នាកាលពីឆ្នាំ2014 និងបានបង្ហាញខ្លួនជាលើកដំបូងឲ្យក្រុមជម្រើសជាតិបារាំងក្នុងការប្រកួតមិត្តភាពជាមួយនឹងក្រុមជម្រើសជាតិអេស្ប៉ាញ កាលពីខែមីនា ដើមឆ្នាំនេះ។

    រូបគេបានក្លាយជាសមាជិកដ៏សំខាន់របស់ក្រុម Monaco ដែលបានឈានទៅប្រកួតវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League កាលពីរដូវកាលមុន មុននឹងធ្លាក់ចេញក្រោមស្នាដៃក្រុម Juventus។ Bakayoko បានឲ្យដឹងក្នុងសេចក្តីថ្លែងការណ៍មួយនៅលើគេហទំព័ររបស់ Chelsea ថា៖ «ខ្ញុំពិតជារីករាយណាស់ក្នុងការមកទីនេះ និងចូលរួមជាមួយនឹងក្លិបដ៏អស្ចារ្យបែបនេះ។ ខ្ញុំបានចាប់អារម្មណ៍ទៅលើការប្រកួតរបស់ Chelsea យ៉ាងខ្លាំង។

    ការចុះហត្ថលេខាគឺជារឿងធម្មជាតិសម្រាប់ខ្ញុំ ពីព្រោះវាជាក្លិបមួយដែលខ្ញុំស្រឡាញ់យ៉ាងខ្លាំងក្នុងពេលស្ថិតជាកុមារភាព»។ ខ្សែបម្រើរូបនេះបានបន្ថែមទៀតថា៖ «បច្ចុប្បន្ន ខ្ញុំកំពុងតែសម្លឹងឆ្ពោះទៅមុខក្នុងការធ្វើការក្រោមការដឹកនាំរបស់គ្រូបង្វឹកដ៏អស្ចារ្យ និងធ្វើការរួមជាមួយនឹងមិត្តភាពក្រុមដ៏ឆ្នើមរបស់ខ្ញុំ»៕
    ប្រភពពី៖ BBC

  • វិស័យឯកជនចូលរួមលើកកម្ពស់ចលនាទេសចរម្នាក់ដើមឈើ 1ដើម

    វិស័យឯកជនចូលរួមលើកកម្ពស់ចលនាទេសចរម្នាក់ដើមឈើ 1ដើម

    ភ្នំពេញៈ វិស័យឯកជន បាននិងកំពុងចូលរួមកាន់តែសកម្មឡើងក្នុងគោលនយោបាយទេសចរម្នាក់ដើមឈើមួយដើម ជាផ្នែកមួយនៃការលើកកម្ពស់បរិស្ថាន និងទេសចរណ៍។

    លោកហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងក្នុងពិធីចូលរួមដាំកូនឈើនៅក្នុងសាលាបឋមសិក្សាភូមិថ្មី សង្កាត់សាមគ្គី ក្រុងស្ទឹងត្រែងកាលពីព្រឹកថ្ងៃម្សិលមិញថា ក្រុមហ៊ុនរបស់លោក ក៏ដូចជាសមាគមដែរ គឺតែងតែផ្សារភ្ជាប់នឹងការងារសង្គម តាមរយៈកម្មវិធីលើកកម្ពស់បរិស្ថាន និងដាំដើមឈើ។ ជាក់ស្តែងថ្ងៃនេះ លោក និងក្រុមការងារបានចុះមកដាំដើមឈើគ្រញូងនៅសាលាបឋមសិក្សាភូមិថ្មីចំនួនជាង 100ដើមដើម្បីធ្វើយ៉ាងណាឲ្យប្រជាពលរដ្ឋ សិស្សានុសិស្សបានស្គាល់ឈើគ្រញូងដ៏មានតម្លៃ និងចូលរួមថែរក្សាបរិស្ថានទាំងអស់គ្នា។

    លោកបន្តថា “បរិស្ថានជាជីវិតរបស់យើងទាំងអស់គ្នា ហេតុនេះការចូលរួមដាំកូនឈើ និងសម្អាតបរិស្ថានជាការងាររបស់យើងទាំងអស់គ្នា ហើយការងារនេះផ្តើមចេញពីយើងម្នាក់ៗ”។ លោកបន្តថា “នេះជាសកម្មភាពមួយចូលរួមក្នុងគោលនយោបាយរបស់ក្រសួងទេសចរណ៍ គឺទេសចរម្នាក់ដើមឈើមួយដើម”។

    លោក អែល អូន នាយកសាលាបឋមសិក្សាភូមិថ្មីបានមានប្រសាសន៍ឲ្យដឹងថា បរិស្ថានជាអាយុជីវិតរបស់កុមារ និងមនុស្សទូទៅ ព្រោះបើបរិស្ថានមិនស្អាត នាំឲ្យមានបញ្ហាសុខភាព និងបង្កជាជំងឺមួយចំនួនដល់ប្រជាពលរដ្ឋរស់នៅក្នុងសហគមន៍នោះ ដូចជាមេរោគគ្រុនចាញ់ មេរោគគ្រុនឈាមជាដើម។ លោកបន្តថា ការដាំដើមឈើនេះ ជាការឆ្លើយតបតាមអ្វីដែលសាលាត្រូវការជាយូរមកហើយ ប៉ុន្តែសាលាមិនទាន់មានលទ្ធភាពដាំ ហេតុនេះការនាំយកកូនឈើគ្រញូងមកដាំនាពេលនេះ ជាការប្រពៃណាស់សម្រាប់សាលា និងសហគមន៍ទាំងមូល។

    ក្រសួងទេសចរណ៍ជាច្រើនឆ្នាំមកនេះបានដាក់ចេញគោលនយោបាយមួយចំនួន ដើម្បីលើកកម្ពស់បរិស្ថានដូចជា ចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ គោលនយោបាយទេសចរម្នាក់ដើមឈើមួយដើមជាដើម៕

  • Sevilla ចុះហត្ថលេខាជាមួយ Nolito ពីក្លិប Man City ក្នុងតម្លៃខ្លួន 9លានអឺរ៉ូ

    Sevilla ចុះហត្ថលេខាជាមួយ Nolito ពីក្លិប Man City ក្នុងតម្លៃខ្លួន 9លានអឺរ៉ូ

    ក្លិប Sevilla បានចុះហត្ថលេខាជាមួយនឹងខ្សែបម្រើស្លាបអន្តរជាតិអេស្ប៉ាញ Nolito ពីក្លិប Manchester City។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ La Liga មួយនេះ កាលពីថ្ងៃអាទិត្យ។

    កីឡាករវ័យ 30ឆ្នាំដែលទើបតែចេញពីក្លិប Celta Vigo ទៅចូលរួមជាមួយនឹងក្លិប Man City កាលពី1ឆ្នាំមុនរូបនេះ ឥឡូវនេះបានផ្ទេរក្នុងតម្លៃខ្លួន 9លានអឺរ៉ូ (ស្មើនឹង 10.3លានដុល្លារអាមេរិក) ទៅកាន់ Sevilla និងបានចុះហត្ថលេខារយៈពេល 3ឆ្នាំ។ Sevilla បានឲ្យដឹងក្នុងសេចក្តីថ្លែងការណ៍មួយលើគេហទំព័ររបស់ពួកគេថា៖ «Nolito នឹងត្រូវស្ថិតនៅជាមួយនឹងក្លិប Sevilla សម្រាប់រយៈពេល 3រដូវកាលទៀត រហូតដល់ឆ្នាំ2020»។

    Nolito បានស៊ុតបាល់បញ្ចូលទីជាអន្តរជាតិចំនួន 6គ្រាប់ ក្នុងការបង្ហាញខ្លួន 16លើក ប៉ុន្តែបានជួបភាពត្រដាបត្រដួសក្នុងការបង្ហាញខ្លួនក្នុងជម្រើសដំបូងមិនបានទៀងទាត់ក្រោមការដឹកនាំរបស់លោក Pep Guardiola នៅឯក្លិប Man City កាលពីរដូវកាលមុន។

    កីឡាកររូបនេះនឹងត្រូវជំនួសកន្លែងរបស់ Vitolo នៅឯកីឡដ្ឋាន Ramon Sanchez-Pizjuan ក្រោយពីមិត្តរួមក្រុមអេស្ប៉ាញរបស់គេបានផ្ទេរទៅកាន់ក្លិប Atletico Madrid កាលពីដើមសប្តាហ៍មុន ហើយ Nolito នឹងត្រូវចូលរួមជាមួយនឹងលោក Eduardo Berizzo ក្រោយពីគ្រូបង្វឹករបស់ក្លិប Sevilla រូបនេះ និងរូបគេធ្លាប់បានធ្វើការជាមួយគ្នានៅឯក្លិប Celta Vigo រយៈពេល2ឆ្នាំម្តងរួចមកហើយ។

    លោក Berizzo សង្ឃឹមថា Nolito នឹងរកឃើញទម្រង់លេងដ៏ល្អឥតខ្ចោះរបស់គេត្រឡប់មកវិញ ក្រោយពីរូបគេបានស៊ុតបាល់បញ្ចូលទី 39គ្រាប់ក្នុងការប្រកួតក្របខ័ណ្ឌ La Liga ចំនួន 100លើក ក្នុងរដូវកាលឆ្នាំ 2013-2016 ពោលគឺក្នុងពេលរូបគេលេងឲ្យក្លិប Celta Vigo។

    ការផ្ទេរនេះនឹងបំពេញសប្តាហ៍ដ៏រីករាយសម្រាប់ Sevilla ក្រោយពីពួកគេបានចុះហត្ថលេខាជាមួយនឹងខ្សែប្រយុទ្ធអន្តរជាតិកូឡុំប៊ី Luis Muriel មកពីក្លិប Sampdoria កាលពីថ្ងៃអង្គារ៕
    ប្រភពពី៖ Sky Sports

  • Njie បំពេញការផ្ទេរពី Spurs ទៅកាន់ Marseille ជាអចិន្ត្រៃយ៍

    Njie បំពេញការផ្ទេរពី Spurs ទៅកាន់ Marseille ជាអចិន្ត្រៃយ៍

    ខ្សែប្រយុទ្ធអន្តរជាតិកាមេរូន Clinton Njie បានចូលរួមជាមួយនឹងក្លិប Marseille ក្នុងកិច្ចសន្យាជាអចិន្ត្រៃយ៍ ពីក្លិប Tottenham Hotspur ក្រោយពីបានចំណាយពេលកាលពីរដូវមុនក្នុងនាមជាកីឡាករកម្ចីក្នុងលីករបស់បារាំង។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ Premier League មួយនេះ កាលពីថ្ងៃអាទិត្យ។

    ខ្សែបម្រើវ័យ23ឆ្នាំរូបនេះ បានចូលរួមជាមួយនឹងក្លិប Spurs ពីក្លិប Lyon កាលពីឆ្នាំ2015 ប៉ុន្តែ បានបង្ហាញខ្លួនត្រឹមតែប៉ុន្មានលើកប៉ុណ្ណោះនៅឯកីឡដ្ឋាន White Hart Lane នៅមុនពេលរូបគេត្រូវបានខ្ចីជើងទៅកាន់ក្លិប Marseille ដែលជាកន្លែងរូបគេបានស៊ុតបាល់បញ្ចូលទី4គ្រាប់ក្នុងការបង្ហាញខ្លួន23លើក។ Tottenham បានឲ្យដឹងក្នុងសេចក្តីថ្លែងការណ៍មួយនៅលើគេហទំព័ររបស់ខ្លួនថា៖ «យើងបានឈានដល់ការព្រមព្រៀងជាមួយនឹងក្លិប Marseille សម្រាប់ការផ្ទេរជាអចិន្រ្តៃយ៍របស់កីឡាករ Clinton Njie។ យើងសូមជូនពរឲ្យ Clinton ជួបតែសំណាងល្អទៅថ្ងៃអនាគត»។

    Njie បានក្លាយជាសមាជិកនៃក្រុមបាល់ទាត់ជម្រើសជាតិកាមេរូន ដែលបានឈ្នះពាន Africa Cup of Nations ឆ្នាំ2017 ក្នុងប្រទេសហ្គាបុង។ រូបគេបានចូលរួមមួយនឹងក្លិប Tottenham កាលពីខែសីហា ឆ្នាំ2015 ពីក្លិប Olympique Lyonnais ក្នុងតម្លៃខ្លួន 10លានផោន (ស្មើនឹង 13,10លានដុល្លារអាមេរិក។ នេះបើយោងទៅតាមបណ្តាញសារព័ត៌មានរបស់ចក្រភពអង់គ្លេស ហើយរូបគេបានបង្ហាញខ្លួន14លើកសម្រាប់ក្លិប Tottenham៕
    ប្រភពពី៖ Reuters

  • គុណប្រយោជន៍​នៃ​ការផឹក​ទឹក​ក្ដៅឧណ្ហៗ ដែល​អ្នក​មិន​បានដឹង​

    គុណប្រយោជន៍​នៃ​ការផឹក​ទឹក​ក្ដៅឧណ្ហៗ ដែល​អ្នក​មិន​បានដឹង​

    ការទទួល​ទាន​ទឹក​ឲ្យ​បាន 8កែវ​ក្នុង​មួយថ្ងៃ នឹង​ជួយ​ធ្វើ​ឲ្យ​រាងកាយ​របស់​មនុស្ស​យើង មាន​សុខ​ភាពល្អ ប៉ុន្តែ​អ្នក​ប្រហែលជា ពុំទាន់​បានដឹង​បន្ថែមទៀត​ទេ​ថា ការទទួល​ទាន​ទឹក​ក្ដៅ ឬ​ទឹក​ក្ដៅឧណ្ហៗ បានផ្ដល់​អត្ថប្រយោជន៍​អ្វីខ្លះ ដល់​រាង​ការ​របស់​អ្នក?

    01) សម្រក​ទម្ងន់
    ការទទួល​ទាន​ទឹក​ក្ដៅ លាយ​ជាមួយនឹង​ក្រូចឆ្មារ ជា​រៀងរាល់​ពេលព្រឹក អាចជួយ​កាត់បន្ថយ ជាលិកា​ខ្លាញ់ នៅក្នុង​រាងកាយ ដែល​ធ្វើ​ឲ្យ​អ្នក​ស្រក​ទម្ងន់​បាន ។

    02) ជួយ​បំបាត់ អាកា​រៈ​តឹង​ច្រមុះ និង​ឈឺបំពង់ក
    ការទទួល​ទាន​ទឹក​ក្ដៅ គឺជា​ឱសថ​កែរោគ​ធម្មជាតិ ដ៏​ពិសេស សម្រាប់​សុខភាព​របស់​យើង ដូចជា ជួយ​បំបាត់ បញ្ហា​តឹង​ច្រមុះ ឈឺបំពង់ក ក្អក ផ្ដាសាយ និង​ថែមទាំង​អាចជួយ ធ្វើ​ឲ្យ​អ្នក​ជៀសផុត ពី​ការ​រលាក​ផ្លូវដង្ហើម​បាន​ទៀតផង។

    03) ជួយ​កាត់បន្ថយ ជាតិពុល​នៅក្នុង​ខ្លួន
    ទឹក​ក្ដៅ​ពិតជា​ពិសេស​ណាស់ សម្រាប់​ការ​បន្សាប​ជាតិពុល នៅក្នុង​ខ្លួន​របស់​មនុស្ស​យើង ព្រោះ​នៅពេលដែល​អ្នក​ផឹក​វា​ទៅ នឹងធ្វើ​ឲ្យ​កំដៅ​ក្នុង​ខ្លួន​កើន​ទ្បើង ដែលជា​ហេតុ​ធ្វើ​ឲ្យ​អ្នក បែកញើស ហើយ​ជាតិពុល ក៏​ត្រូវបាន​ចេញមកក្រៅ តាមរយៈ​ញើស​ផងដែរ។

    04) ការពារ​ភាព​ចាស់​មុន​អាយុ
    ពិតណាស់ថា មនុស្ស​យើង​ម្នាក់ សុទ្ធសឹងតែ​មិន​ចង់​ចាស់ មុន​វ័យ​នោះទេ ប៉ុន្តែ​គួរ​ធ្វើ​យ៉ាងដូចម្ដេច ទើប​អាច​ឲ្យ​អ្នក​នៅ​ក្មេង​ជាង​វ័យ​បាន? បើតាម​ការសិក្សា​ស្រាវជ្រាវ បាន​ឲ្យ​ដឹងថា ការទទួល​ទាន​ទឹក​ក្ដៅ អាចជួយ​ជួស ជុល​កោសិកា ស្បែកចាស់ៗ និង​ខូច ឲ្យ​ប្រែ​មកជា​សភាព​ស្បែក​ធម្មតា បាន​យ៉ាង​មាន​ប្រសិទ្ធភាព ដែលជា​ហេតុ​ធ្វើ​ឲ្យ​អ្នក នៅតែ​ក្មេង​ជាង​វ័យ​បាន។

    05) ការពារ និង​ព្យាបាល​ការកើត​មុន
    ការទទួល​ទាន​ទឹក​ក្ដៅ អាចជួយ​ការពារ និង​លុបបំបាត់​ឫសគល់ នៃ​ការកើត​ជំងឺ​មុន បាន​យ៉ាង​មាន​ប្រសិទ្ធភាព ព្រមទាំង​ធ្វើ​ឲ្យ​ស្បែ​កមុខ របស់​អ្នកមាន​ភាពស្រស់ស្អាត​ទៀតផង។

    06) ជួយ​ធ្វើ​ឲ្យ​សក់​មាន​សុខភាព​ល្អ និង​មិនកើត​អង្គែ
    អត្ថប្រយោជន៍ ដែល​ទទួលបាន​ពី​ការផឹក​ទឹក​ក្ដៅ អាចជួយ​ធ្វើ​ឲ្យ​សក់ មាន​សភាព​ទន់ និង​ភ្លឺរលោង។ លើសពីនេះទៅទៀត វា​ថែមទាំង​អាចជួយ ធ្វើ​ឲ្យ​ការ​ចាក់ឫស នៃ​សក់​របស់​អ្នក មាន​សភាព​រឹងមាំ និង​មាន​សុខភាព​ល្អ។ ទឹក​ក្ដៅ​អាចជួយ រក្សា​ស្បែកក្បាល​របស់​អ្នក ឲ្យ​មាន​សុខភាព​ល្អ ដែល​អាច​ធានា បាន​ពី​ការកើត​អង្គែ។

    07) ជួយ​បង្កើន​ចរន្តរ​ត់នៃ​ឈាម និង​ជំរុញ​ប្រព័ន្ធ​ប្រសាទ ឲ្យ​មាន​សុខភាព​ល្អ
    ការទទួល​ទាន​ទឹក​ក្ដៅ ពិត​ជាមាន​សារៈសំខាន់​ណាស់ ក្នុងការ​បង្កើន​ចរន្ត នៃ​ការរត់​របស់​ឈាម ឲ្យ​មាន​ភាពប្រសើរ​ទ្បើង និង​ជំរុញ​ប្រព័ន្ធ​ប្រសាទ ឲ្យ​មាន​សុខភាព​ល្អ។

    08) ជួយ​ធ្វើ​ឲ្យ​ការរំលាយ​អាហារ មាន​ភាពប្រសើរ​ទ្បើង
    តាម​ការសិក្សា​ថ្មី​មួយ បាន​បង្ហា​ញា​ថា ការទទួល​ទាន​ទឹក​ក្ដៅ កំ​ទ្បុ​ង​ពេល ឬ​បន្ទាប់ពី​អ្នក​បរិភោគ អាហារ​រួច ពិតជា​អាចជួយ​ធ្វើ​ឲ្យ​ការរំលាយ អាហារ នៅក្នុង​ក្រពះ​របស់​អ្នក មាន​លក្ខណៈ ប្រសើរ​ទ្បើង។

    09) ធ្វើ​ឲ្យ​ពោះវៀន​មាន​ចលនា
    ចំណែកឯ​អត្ថប្រយោជន៍ ចុងក្រោយ​របស់​ទឹក​ក្តៅ​នោះ គឺអាច​ជួយ​ធ្វើ​ឲ្យ​ពោះវៀន មាន​ចលនា​ប្រក្រតី និង​មាន​សុខភាព​ល្អ ព្រមទាំង ពុំមាន​ការឈឺចាប់​នៅក្នុង​ពោះវៀន​នោះទេ៕

  • ក្រុមហ៊ុន Minebea គ្រោងផ្ទេររោងចក្រពីចិន និងហ្វីលីពីនមកកម្ពុជា

    ក្រុមហ៊ុន Minebea គ្រោងផ្ទេររោងចក្រពីចិន និងហ្វីលីពីនមកកម្ពុជា

    ភ្នំពេញ៖ លោក Yoshihisa Kainuma នាយកប្រតិបត្តិក្រុមហ៊ុន Minebea (Cambodia) Co, Ltd មានប្រសាសន៍ថា ក្រុមហ៊ុនរបស់លោក នឹងផ្ទេរចង្វាក់ផលិតកម្មរបស់ខ្លួនចូលមកពង្រីកការផលិតបន្ថែមនៅក្នុងតំបន់សេដ្ឋកិច្ចពិសេសរាជធានីភ្នំពេញក្នុងពេលឆាប់ៗខាងមុខ។

    ក្នុងជំនួបជាមួយឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម លោក Yoshihisa Kainuma មានប្រសាសន៍បញ្ជាក់ថា ដោយមើលឃើញលក្ខណៈអំណោយផលផ្នែកសេដ្ឋកិច្ច ទីតាំងភូមិសាស្ត្រ និងកម្លាំងពលកម្មប្រកបដោយសក្តានុពលនោះ ក្រុមហ៊ុនរបស់លោកនឹងចាប់ផ្តើមពង្រីកផលិតកម្មនៅពេលខាងមុខទៀត ដោយនឹងផ្ទេរផលិតកម្មពីប្រទេសហ្វីលីពីន និងប្រទេសចិន ដោយផ្តោតសំខាន់ ទៅលើការផលិតឧបករណ៍អេឡិចត្រូនិកសម្រាប់គ្រោងការទីក្រុងឆ្លាតនៅកម្ពុជា (Smart City Project in Cambodia) ជាពិសេសប្រព័ន្ធភ្លើង LED តាមផ្លូវ និងប្រព័ន្ធបច្ចេកវិទ្យា Wireless ដែលបានជួយច្រើនក្នុងការកាត់បន្ថយការប្រើប្រាស់ថាមពលអគ្គិសនី និងកាត់បន្ថយឧស្ម័នផ្ទះកញ្ចក់។

    ក្នុងជំនួបនេះដែរ ឯកឧត្តមទេសរដ្ឋមន្ត្រី ចម ប្រសិទ្ធ បានវាយតម្លៃខ្ពស់ និងកោតសរសើរចំពោះភាពរីកចម្រើនរបស់ក្រុមហ៊ុនជាបន្តបន្ទាប់ និងគាំទ្រពេញទំហឹង ចំពោះគ្រោងការពង្រីកផលិតកម្មរបស់ខ្លួនដែលជាការរួមចំណែកយ៉ាងសំខាន់ក្នុងការផ្តល់ការងារដល់ពលរដ្ឋខ្មែរបន្ថែមទៀត។ ឯកឧត្តមបានចាត់ទុកក្រុមហ៊ុន Minebea ថាជាក្រុមហ៊ុនគំរូរបស់ជប៉ុនដែលគោរពលក្ខខណ្ឌការងារល្អប្រសើរ ដូចជាការបណ្តុះបណ្តាលកម្មករជំនាញនៅក្រៅប្រទេស ផ្គត់ផ្គង់អាហារ និងការស្នាក់នៅ សេវាសុខភាព និងសាលាបង្រៀនអាន និងសរសេរភាសាខ្មែរផងដែរ។

    គួរបញ្ជាក់ថា ក្រុមហ៊ុន Minebea មានវត្តមានលើទឹកដីកម្ពុជានៅក្នុងតំបន់សេដ្ឋកិច្ចពិសេសភ្នំពេញ និងបានចាប់ផ្តើមដំណើរការចាប់តាំងពីឆ្នាំ 2011 រហូតដល់បច្ចុប្បន្ន ក្នុងការផលិតម៉ូទ័រខ្នាតតូចសម្រាប់ប្រើប្រាស់ក្នុងឧបករណ៍អេឡិចត្រូនិក និងប្រព័ន្ធភ្លើង LED ជាដើម ហើយបានស្រូបកម្លាំងពលកម្មប្រមាណជាង2ពាន់នាក់នៅពេលបច្ចុប្បន្ន៕

  • កម្ពុជានឹងមានកសិករជំនាញ 4ពាន់នាក់នៅឆ្នាំ2018

    កម្ពុជានឹងមានកសិករជំនាញ 4ពាន់នាក់នៅឆ្នាំ2018

    ភ្នំពេញ – ស្របពេលកម្ពុជាមានកង្វះខាតធនធានមនុស្ស និងបច្ចេកទេសក្នុងការដាំដុះ និងការកែច្នៃកសិផល ក្រុមហ៊ុនចិនមានមូលដ្ឋាននៅខេត្ដ Guangxi ដែលមានជំនាញលើផ្នែកកសិកម្ម បានចំណាយថវិកាក្រោមជំនួយរបស់រដ្ឋាភិបាលចិន ដើម្បីធ្វើការបណ្ដុះបណ្ដាលបច្ចេកទេសទាំងនោះដល់កសិករកម្ពុជា និងមន្រី្ដជំនាញចំនួន8ខេត្ដ។

    ជាមួយលោកLU ZHUOMING Liaison officer of CAPROC នៃក្រុមហ៊ុន Guangxi Forword Agricultural Technology International Cooperation Co.,Ltd បានប្រាប់ថា គម្រោង CAPROC បានដំណើរការនៅកម្ពុជា តាំងពីឆ្នាំ2015 មកម្ល៉េះក្រោមជំនួយរបស់រដ្ឋាភិបាលចិន កម្មវិធីនេះមានរយៈ3ឆ្នាំ។ ក្នុងឆ្នាំទី1 យើងបានបណ្ដុះបណ្ដាលអ្នកបច្ចេកទេស និងមន្រ្ដីជំនាញសរុប1,265នាក់ តាមផែនការរយៈពេលបីឆ្នាំនេះ យើងនឹងបណ្ដុះបណ្ដាលឱ្យបាន 4,000នាក់ជាកសិករជំនាញដែលអាចមានសមត្ថភាព និងជំនាញក្នុងដាំដុះ ព្រមទាំងបច្ចេកទេសវេចខ្ចប់កសិផលក្រោយពេលប្រមូលផលរួច។

    ក្រុមហ៊ុន Forword បានចុះបញ្ជីនៅខេត្ដ Guangxi ប្រទេសចិនតាំងពីឆ្នាំ2008 និងបានចុះបញ្ជីនៅក្នុងប្រទេសកម្ពុជានៅក្នុងឆ្នាំ 2009។ CAPROC (China- Cambodia Agriculture Promotion Center) «មជ្ឈមណ្ឌលផ្សព្វផ្សាយ និងលើកកម្ពស់វិស័យកសិកម្មកម្ពុជា-ចិន» ដែលត្រូវចាយថវិកាក្រោមជំនួយរបស់រដ្ឋាភិបាលចិនក្នុងរង្វង់ទឹកប្រាក់ 6 លានដុល្លារអាមេរិក ដើម្បីធ្វើកិច្ចសហប្រតិបត្ដិការរវាងចិន និងកម្ពុជាទៅលើគម្រោងកសិកម្ម។

    Liaison officer of CAPROC នៃក្រុមហ៊ុន Forword បញ្ជាក់ថា មូលហេតុដែលរដ្ឋាភិបាលចិន ក៏ដូចជាក្រុមហ៊ុនរបស់លោករៀបចំឱ្យមានគម្រោងCAPROC ព្រោះសម្លឹងឃើញថា កម្ពុជាជាប្រទេសមានស្ថិរភាពនយោបាយល្អ ដែលជាឱកាសទាក់ទាញអ្នកវិនិយោគឱ្យមកបណ្ដាក់ទុននៅទីនេះ។

    ពិសេសដោយយើងជាក្រុមហ៊ុនវិនិយោគលើវិស័យកសិកម្មស្រាប់ដូច្នេះទើបសម្រេចបង្កើតការិយាល័យនៅក្នុងប្រទេសកម្ពុជាតែម្ដង។ លើសពីនេះកម្ពុជាមានគុណសម្បត្ដិល្អច្រើនដូចជា សណ្ឋានដីល្អ ដីមានជីវជាតិ និងគុណភាពខ្ពស់ ពុំទាន់ត្រូវបានបំពុលពីកាកសំណល់ឧស្សាហកម្ម តម្លៃពលកម្មក៏មិនសូវថ្លៃផង។ មួយវិញទៀតយើងមើលឃើញថា ទំហំដីសម្រាប់ធ្វើកសិកម្មក្នុងកម្ពុជានៅមានភាពទូលាយ កត្តាទាំងនេះហើយដែលនាំឱ្យយើងគិតថា កម្ពុជានៅមានឱកាសក្នុងការពង្រីកសក្ដានុពលកសិកម្មរបស់ខ្លួនបន្ដទៀតបាន។

    លោកបញ្ជាក់ថា បន្ទាប់ពីបញ្ចប់គម្រោង CAPROC ក្រមហ៊ុនមានគម្រោងបង្កើតវិទ្យាស្ថានបណ្ដុះបណ្ដាលវិជ្ជាជីវៈបច្ចេកទេសកសិកម្ម និងគ្រឿងចក្រផ្សេងផងដែរ ធ្វើយ៉ាងណាដើម្បីពង្រីកសកម្មភាពការងារទាំងនេះឱ្យកាន់តែមានភាពទូលំទូលាយ ដើម្បីផ្ដល់ចំណេះជំនាញដល់ប្រជាជនខ្មែរដែលមានចិត្ដស្រឡាញ់វិស័យកសិកម្ម៕

  • ការប្រើ Facebook របស់ប្រជាជនខ្មែរ មានគុណសម្បត្តិ និងគុណវិបត្តិអ្វីខ្លះ?

    ការប្រើ Facebook របស់ប្រជាជនខ្មែរ មានគុណសម្បត្តិ និងគុណវិបត្តិអ្វីខ្លះ?

    នៅក្នុងយុគសម័យបច្ចេកវិទ្យានេះ ប្រជាជនដែលប្រើប្រាស់បណ្តាញសង្គម Facebook ត្រូវបានគេប្រើប្រាស់យ៉ាងទូលំទូលាយ នៅលើពិភពលោក ដោយក្នុងនោះប្រជាជនកម្ពុជារាប់លាននាក់ក៏កំពុងប្រើប្រាស់បណ្តាញសង្គមធំជាងគេមួយនេះផងដែរ។

    ថ្វីត្បិតតែការប្រើប្រាស់ Facebook របស់ប្រជាជនខ្មែរបានជួយឱ្យពួកគាត់ទទួលបានព័ត៌មាន និងអភិវឌ្ឍអាជីវកម្មបាន តែវាក៏បានផ្តល់គុណវិបត្តិផងដែរប្រសិនបើការប្រើប្រាស់នោះមិនត្រឹមត្រូវ។

    អ្នកជំនាញសារព័ត៌មាន និងជាប្រធានក្លិបអ្នកកាសែតកម្ពុជា លោក ប៉ែន បូណា ធ្លាប់បានលើកឡើងថា ក្រមសីលធម៌នៃការប្រើប្រាស់បណ្តាញសង្គមហ្វេសប៊ុក គឺមានសារៈសំខាន់ណាស់ ដោយសារតែប្រព័ន្ធសង្គមហ្វេសប៊ុកនេះមានមហាជនទូទៅ កំពុងតែប្រើប្រាស់ និងបញ្ចេញមតិ ទំនាក់ទំនងរវាងគ្នា និងគ្នា ឬទំនាក់ទំនងរវាងប្រជាជន និងរដ្ឋាភិបាល។ តែការប្រើប្រាស់ហ្វេសប៊ុកអាចបញ្ជូនសារ និងទិន្នន័យបានលឿនប្រាកដមែន ប៉ុន្តែភាគច្រើន អាចជាព័ត៌មានមិនពិត មិនច្បាស់លាស់ និងមិនអាចយកធ្វើជាផ្លូវការបាន រហូតធ្វើឱ្យក្លាយជាព័ត៌មានបំពុលបរិយាកាសដល់ប្រព័ន្ធផ្សព្វផ្សាយអាជីពនៅក្នុងប្រទេសកម្ពុជា និងប៉ះពាល់ទៅដល់ព័ត៌មានអាជីពទៀតផងដែលអ្នកប្រើប្រាស់គួរតែគិតគូរ និងប្រើវាដើម្បីជាអត្ថប្រយោជន៍របស់ខ្លួន និងសង្គមទាំងមូល។

    ស្របពេលជាមួយគ្នានេះដែរឯកឧត្តម ខៀវ កាញារិទ្ធ រដ្ឋមន្ត្រីក្រសួងព័ត៌មានមានប្រសាសន៍ដែរថា ព័ត៌មាននៅតាមបណ្តាញសង្គមហ្វេសប៊ុកជាព័ត៌មានពាក់កណ្តាលសម្រេច ដែលមិនអាចយកជាផ្លូវការបាន100ភាគរយទេ ដោយសារវាបានផ្តល់ព័ត៌មានលឿនពេក មិនអាចវិភាគស្ថានការណ៍បានគ្រប់ជ្រុងជ្រោយ។ បើប្រៀបធៀបរវាងព័ត៌មានអេឡិចត្រូនិក និងព័ត៌មានបោះពុម្ពផ្សាយមានភាពប្រសើរល្អម្យ៉ាងម្នាក់ មួយលឿន ប៉ុន្តែមួយទៀតបោះពុម្ពផ្សាយផ្តល់ព័ត៌មានពិត អាចយកជាផ្លូវការបាន។

    ឯកឧត្តមបន្តថា ការប្រើប្រាស់បណ្តាញសង្គមហ្វេសប៊ុកបានផ្តល់ព័ត៌មានលឿន ប៉ុន្តែវាបានធ្វើឱ្យប៉ះពាល់ដល់ក្រមសីលធម៌ និងវិជ្ជាជីវៈ និងពេលខ្លះអាចជាការដាក់ទោសមនុស្សទៀតផង។ ឯកឧត្តមលើកជាឧទាហរណ៍ថា ក្មេងស្រីជនបរទេសអាយុ 12ឆ្នាំម្នាក់ ដោយសារទុកចិត្តមិត្តភក្តិនាងបានដោះអាវឱ្យសង្សារមើលតាមហ្វេសប៊ុក ហើយសង្សាបានយករូបនោះទៅបង្ហោះ ធ្វើឱ្យក្មេងស្រីនោះខ្មាសគេ ដូរពីសាលាពីមួយទៅសាលាអស់3ទៅ4សាលាហើយ គេនៅតែបន្តបង្ហោះរូបនោះធ្វើឱ្យនាងឈឺចិត្ត ចុងក្រោយសម្លាប់ខ្លួននៅអាយុ15ឆ្នាំ ដែលនេះជាការដាក់ទោស ធ្វើឱ្យមនុស្សស្លាប់ដោយសារការប្រើហ្វេសប៊ុកមិនបានត្រឹមត្រូវ។

    យោងតាមទិន្នន័យរបស់ក្រុមហ៊ុន Facebook តាមរយៈ លោក Mark Zuckerberg សហស្ថាបនិក និងជានាយកប្រតិបត្តិនៃបណ្តាញយក្សមួយនេះ បានបញ្ចាក់ថា ត្រឹមខែមិថុនា ឆ្នាំ 2017 មានអ្នកប្រើប្រាស់បណ្តាញ Facebook បានកើនឡើងដល់ 2ពាន់លាននាក់ហើយលើពិភពលោក។ ជាមួយចំនួនដ៏ច្រើននេះ មនុស្សបានទាញយកផលប្រយោជនយ៉ាងច្រើន តែក៏ទទួលរងនូវផលប៉ះពាល់ច្រើនផងដែរ៕

  • ឧកញ៉ា នួន រិទ្ធី៖ ចង់ជោគជ័យខ្លួនឯង ត្រូវធ្វើការឱ្យគេជោគជ័យជាមុនសិន

    ឧកញ៉ា នួន រិទ្ធី៖ ចង់ជោគជ័យខ្លួនឯង ត្រូវធ្វើការឱ្យគេជោគជ័យជាមុនសិន

    ភ្នំពេញ៖ មនុស្សម្នាក់ៗតែងប្រាថ្នាចង់បានភាពជោគជ័យចំពោះខ្លួនឯង ដើម្បីក្លាយជាសហគ្រិនមានក្រុមហ៊ុនផ្ទាល់ខ្លួនទុកជាទ្រព្យនៅក្នុងជីវិត ប៉ុន្តែដើម្បីឱ្យខ្លួនឯងជោគជ័យ ត្រូវធ្វើការឱ្យអ្នកដទៃជោគជ័យជាមុនសិន នេះជាការលើកឡើងរបស់លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យវ័យក្មេង ខ្មែរ ហ្វោនដេសិន អឺព្រេសល (KFA Real Estate) ។

    លោកឧកញ៉ា បានលើកពីបទពិសោធផ្ទាល់ខ្លួនថា មុននឹងមានក្រុមហ៊ុនអចនលទ្រព្យ KFA Real Estate ដែលកំពុងមានឈ្មោះបោះសំឡេងនេះ លោកក៏ធ្លាប់ធ្វើការជាបុគ្គលិកសាមញ្ញម្នាក់នៅក្រុមហ៊ុនអចលនទ្រព្យផ្សេងមួយដែរ ប៉ុន្តែដោយមានការតាំងចិត្ត និងមានមហិច្ឆតាចង់មានក្រុមហ៊ុនផ្ទាល់ខ្លួននោះ លោកបានខិតខំធ្វើការឱ្យគេរហូតបានជោគជ័យ។ លោកមានប្រសាសន៍ដូច្នេះថា «នៅពេលដែលខ្ញុំធ្វើការឱ្យគេជោគជ័យហើយ ខ្ញុំក៏បានលាឈប់ការងារពីក្រុមហ៊ុនរបស់គេ ដោយសន្សំប្រាក់បានមួយចំនួនក៏បង្កើតក្រុមហ៊ុនខ្លួនឯងមួយដោយសារមានបទពិសោធ មានចំណេះដឹងផ្នែកអចលនទ្រព្យស្រាប់ ខ្ញុំក៏បានអភិវឌ្ឍក្រុមហ៊ុនខ្លួនឯងបានរីកចម្រើនឆាប់រហ័សមកទល់បច្ចុប្បន្ន»។

    ក្រុមហ៊ុនអចលនទ្រព្យ KFA គឺជាក្រុមហ៊ុនដ៏មានសក្តានុពលមួយក្នុងចំណោមក្រុមហ៊ុនក្នុងស្រុកជាច្រើនទៀតក្នុងការផ្តល់ប្រឹក្សាយោបល់ វាយតម្លៃ ទិញ លក់ ជួល អគារ ដីធ្លី ឃ្លាំង និងសំណង់លំនៅដ្ឋានផ្សេងៗ។

    គួរបញ្ជាក់ថា ការធ្វើឱ្យអ្នកដទៃត្រូវបានគេចាត់ទុកថា បានផ្តល់បទពិសោធ និងចំណេះដឹងជាច្រើនទុកជាបទពិសោធក្នុងជីវិត និងទុកជាទុនសម្រាប់អភិវឌ្ឍក្រុមហ៊ុនខ្លួនឯងឱ្យជោគជ័យនៅថ្ងៃអនាគត តែបើធ្វើការឱ្យគេមិនបានជោគជ័យហើយ ធ្វើការខ្លួនឯងក៏មិនបានជោគជ័យដែរ៕

  • Kyle Walker បំពេញការផ្ទេរទៅ Man City ជាផ្លូវការក្នុងតម្លៃខ្លួន53លានផោន

    Kyle Walker បំពេញការផ្ទេរទៅ Man City ជាផ្លូវការក្នុងតម្លៃខ្លួន53លានផោន

    Kyle Walker បច្ចុប្បន្ន ក្លាយជាខ្សែការពារដែលមានតម្លៃខ្លួនខ្ពស់ជាងគេបំផុតរបស់ពិភពលោក ក្រោយពីក្លិប Manchester City បានបំពេញការផ្ទេររបស់គេពីក្លិប Tottenham ក្នុងតម្លៃខ្លួនគោលចំនួន 50លានផោន (ស្មើនឹង65.4លានដុល្លារអាមេរិក) ដែលនឹងកើនដល់53លានផោន សម្រាប់ខ្សែការពារស្លាបស្តាំអន្តរជាតិអង់គ្លេសរូបនេះ។

    បើបូកទាំងប្រាក់ឧបត្ថម្ភផ្សេងៗ ការផ្ទេរនេះនឹងបំបែកកំណត់ត្រាលើតម្លៃខ្លួន50លានផោនដែលក្លិប Paris St-Germain បានចំណាយទិញខ្សែការពារ David Luiz ពីក្លិប Chelsea កាលពីឆ្នាំ2014 ហើយក៏នឹងធ្វើឲ្យ Walker ក្លាយជាកីឡាករអង់គ្លេសដែលមានតម្លៃខ្ពស់ជាងគេបំផុតផងដែរ។ អតីតខ្សែការពាររបស់ក្លិប Sheffield United រូបនេះបានទទួលស្គាល់ថា៖ «វាហាក់ដូចជាមានអារម្មណ៍ចម្លែកបន្តិច។ ខ្ញុំបានស្ថិតនៅជាមួយនឹងក្លិប Tottenham អស់រយៈពេលជាច្រើនឆ្នាំមកហើយ ប៉ុន្តែ ខ្ញុំពិតជារំភើបណាស់ចំពោះការចាប់ផ្តើមទំព័រថ្មីមួយក្នុងអាជីពរបស់ខ្ញុំ។ ខ្ញុំពិតជាចង់ចាប់ផ្តើមលេងណាស់។ ខ្ញុំពិតជារំភើបក្នុងការចុះហត្ថលេខាជាមួយនឹងក្លិប Man City»។

    Walker បានបន្ថែមទៀតថា៖ «ជាមួយនឹងទំហំរបស់ក្លិបនេះ យើងត្រូវតែបន្ត និងប្រជែងយកពានសំខាន់ៗទាំងអស់ពីគ្រប់ទិសទី ហើយជាការរំពឹងទុក ពានទាំងនោះអាចបន្ថែមទៅលើប្រវត្តិរូបរបស់ខ្ញុំ ពីព្រោះមិនធ្លាប់បានឈ្នះពានច្រើនឡើយមកទល់ពេលនេះ ក្នុងអាជីពរបស់ខ្ញុំ។ Tottenham គឺជាក្លិបដ៏អស្ចារ្យមួយ ព្រោះពួកគេបានជួយខ្ញុំឲ្យស្ថិតក្នុងទីតាំងដែលខ្ញុំកំពុងឈរនៅទីនេះ។ ខ្ញុំបានរៀនសូត្រជាច្រើន ជាពិសេសក្រោមការដឹកនាំរបស់លោក Mauricio Pochettino ហើយគាត់ពិតជាអស្ចារ្យណាស់ចំពោះខ្ញុំ»៕
    ប្រភពពី៖ The Guardian