Author: វល័ក្ខ

កញ្ញាវីន វីន ជាតារាសិល្បៈដែលគេឧស្សាហ៍បានឃើញវត្ដមានក្នុងកម្មវិធីដើរម៉ូដជាច្រើន។ រាល់ការងារដែលនាងធ្វើកន្លងមកមានការខំប្រឹងប្រែងជាខ្លាំង រហូតធ្វើឱ្យអ្នករួមអាជីពជាមួយនាងលើកឡើងថា ធម្មតាទេ ជាតារាសម្ដែងថ្មោងថ្មី នាងត្រូវតែខំប្រឹងប្រែងអ៊ីចឹងហើយ ម្យ៉ាងទំនងជានាងពឹងផ្អែកលើប្រាក់ចំណូលពីសិល្បៈតែមួយមុខទេ ទើបនាងខំប្រឹងប្រែងខ្លាំងបែបហ្នឹង។ថ្មីៗនេះនាងបានបង្ហើបប្រាប់ថា  ក្រៅពីការងារសិល្បៈ នាងក៏ជាម្ចាស់ភោជនីយដ្ខានធំមួយក្នុងទីក្រុងភ្នំពេញឈ្មោះថា «រាជធានីថ្មី» ដែរ។ ពិតជាគួរឱ្យភ្ញាក់ផ្អើលមែន ដែលតារាវ័យក្មេងម្នាក់មានឱកាសក្លាយជាម្ចាស់ភោជនីយដ្ឋានធំមួយក្នុងក្រុងភ្នំពេញខណៈដែលនាងជាក្មេងកំព្រាឱពុកម្ដាយផងនោះ។

ជុំវិញបញ្ហានេះត្រូវបានកញ្ញា វីន វីន ប្រាប់ថា តាមពិតនាងបានចាប់យកអាជីពសិល្បៈជាច្រើនឆ្នាំមកហើយ តែដោយសាររវល់ជាមួយការរកស៊ី និងការបើកភោជនីយដ្ឋាន ទើបនាងពុំសូវផ្ដោតអារម្មណ៍លើអាជីពសិល្បៈធ្វើឱ្យប្រជាប្រិយភាពរបស់នាងនៅមានកម្រិត។ ជាមួយភាពអស្ចារ្យរបស់តារាសម្ដែងវ័យក្មេង វីន វីន ត្រូវបាននាងបញ្ជាក់ថា ទម្រាំមានដូចពេលបច្ចុប្បន្ន ជីវិតនាងបានឆ្លងកាត់ការលំបាក និងការងារជាច្រើន សូម្បីតែធ្វើការជាអ្នកអនាម័យក៏ធ្លាប់  និងការងារក្នុងក្រុមហ៊ុនក៏នាងធ្លាប់ឆ្លងកាត់មកអស់ហើយ។ តារាសម្ដែងវ័យ23 ឆ្នាំរូបនេះបន្ដថា៖ « អ្វីដែលលំបាក និងឈឺចាប់បំផុតនោះ គឺនៅពេលធ្វើការងារនៅកន្លែងមួយ ហើយត្រូវបានគេមើលងាយ រិះគន់ រករឿងក្នុងចេតនាចង់ឱ្យយើងសុំឈប់ពីការងារ»។ ដូច្នេះហើយទើបនាងមានគំនិតចង់បង្កើតមុខរបរផ្ទាល់ខ្លួនមួយដោយខ្លួនឯងដើម្បីបង្កើនប្រាក់ចំណូលឱ្យបានច្រើនបន្ទាប់ពីនាងបានឆ្លងកាត់ជីវិតក្រលំបាក និងក្រោយពីនាងត្រូវបាត់បង់ឪពុកម្ដាយរួចមក។ នាងបន្ថែមថា៖ «មុនពេលចូលធ្វើការងារឱ្យក្រុមហ៊ុនគេ មានថ្ងៃខ្លះ លុយតែមួយរយរៀលក៏គ្មានក្នុងខ្លួនដែរ»។

ពាក់ព័ន្ធអាជីវកម្មមួយនេះត្រូវបានគេលើកការសង្ស័យថា តើនាងបានលុយមកពីណាច្រើនម្ល៉េះក្នុងការបើកភោជនីយដ្ឋាន?  ទោះជាយ៉ាងណាកញ្ញា វីន វីន ទទួលស្គាល់ថា ខណៈដែលនាងជាតារាសម្ដែងពុំទាន់ទទួលបានប្រជាប្រិយភាពខ្លាំង តែបែរជាមានអាជីវកម្មផ្ទាល់ខ្លួនពិតជាធ្វើឱ្យមហាជនមានការសង្ស័យមែន ប៉ុន្ដែជាក់ស្ដែងអ្វីដែលនាងមានសព្វថ្ងៃ គឺបានមកពីកម្លាំងញើសឈាមនាងសុទ្ធសាធ។ នាងបញ្ជាក់ថា៖ «សម្រាប់ការគិតរបស់គេផ្សេង ឯការគិតរបស់ខ្ញុំផ្សេង អ្នកដែលស្គាល់ខ្ញុំគេប្រាកដជាដឹងថា ជីវិតរបស់ខ្ញុំតស៊ូតាំងពីក្មេង តាមរយៈការខំប្រឹងប្រែងធ្វើការងារដើម្បីសន្សំប្រាក់យកមកបើកមុខរបររកស៊ីនេះ»។

នាងប្រាប់បន្ដទៀតថា កន្លងមកនាងធ្វើការងារឱ្យគេយកប្រាក់ខែ រួចយកប្រាក់នេះមករកស៊ីចងការប្រាក់ និងដោយសារតែការរកស៊ីលើផ្នែកនេះកាក់កបខ្លាំង ទើបធ្វើឱ្យលុយរបស់នាងចាប់ផ្ដើមកើនរហូតធ្វើឱ្យនាងមានគំនិតចូលហ៊ុនគ្នាជាមួយបងប្រុសដើម្បីបង្កើតភោជនីយដ្ឋាននេះ។ទោះបីជាមុខរបរនេះជាទីបង្អែកក៏ដោយ ក៏នាងមិនបោះបង់ចោលអាជីពសិល្បៈរបស់នាងដែរ ព្រោះការងារសិល្បៈក៏ជាការរួមចំណែកជួយឱ្យកិច្ចការរកស៊ីរបស់នាងដំណើរការល្អដែរ។ ផ្ទុយទៅវិញនាងបញ្ជាក់ថា បច្ចុប្បន្ននាងបានពង្រីកអាជីពសិល្បៈពីធ្លាប់តែដើរម៉ូដមកជាការសម្ដែងផងដែរ ដោយ  បច្ចុប្បន្ននាងកំពុងតែទទួលបានការសម្ដែងខ្សែភាពយន្ត2រឿងហើយ គឺរឿង«ស្នេហាយុវវ័យ» និង «ទេពធីតាម៉ាណឺកាំង»។ ក្រៅពីទទួលបានការសម្ដែងពីររឿងហើយនោះ ថ្មីៗនេះនាងក៏ទទួលបានស្ប៉តផលិតផលហ្វូងដុសមុខា alite៕

មនុស្សគ្រប់គ្នាតែងតែមានគោលដៅប្រចាំជីវិត ខណៈមានអ្នកខ្លះមិនដឹងវិធីសាស្រ្តដើម្បីស្វែងរកខ្លួនឯងដែលទាមទារឱ្យមានវិធីសាស្ត្រក្នុងការកំណត់គោលដៅ។ ជំហានដំបូងក្នុងការកំណត់គោលដៅ គឺត្រូវពិចារណាលើអ្វីដែលអ្នកចង់បាននៅលើគម្រោងសម្រាប់ពេលវេលានៃជីវិតរបស់អ្នក (អ្នកអាចធ្វើការរំពឹងទុកថា តើអ្នកនឹងមានអ្វីខ្លះនៅអាយុប៉ុន្មាន?) ។

ការបង្កើតនូវគម្រោងពេលវេលា (Lifetime) សម្រាប់គោលដៅផ្តល់ឱ្យអ្នកនូវរូបភាពយ៉ាងច្បាស់លាស់នៃទស្សនៈវិស័យទាំងឡាយដែលអ្នកបានរំពឹងទុក សម្រាប់ធ្វើការសម្រេចចិត្ត ។

ដើម្បីទទួលបាននូវភាពជោគជ័យលើគោលដៅរបស់អ្នក ហើយមានតុល្យភាពលើគ្រប់ផ្នែកដែលសំខាន់បំផុតក្នុងជីវិត អ្នកគួរតែកំណត់គោលដៅផ្ទាល់ខ្លួនរបស់អ្នកតាមវិធីដូចខាងក្រោម៖

1. អាជីព (Career): តើអាជីពដែលមានកម្រិតធំប៉ុនណាដែលអ្នកចង់សម្រេចបានក្នុងជីវិតរបស់អ្នក? ឬអ្វីខ្លះដែលអ្នកចង់ធ្វើសម្រាប់ជីវិត?

2. ហិរញ្ញវត្ថុ (Financial): តើអ្នកចង់រកប្រាក់ឱ្យបានច្រើនប៉ុនណាសម្រាប់ជីវិត? (អ្នកគួរធ្វើការប៉ាន់ស្មានថាតាមដំណាក់កាលនៃជីវិត ថាត្រឹមអាយុ ២០ ឆ្នាំអ្នកនឹងមានប្រាក់ច្រើនប៉ុនណា? អាយុ ៣០ ឆ្នាំនឹងមានលុយច្រើនប៉ុនណា?) ហើយអ្នកក៏ចាំបាច់ត្រូវឆ្លើយនឹងសំណួរថា តើប្រាក់ដែលអ្នករកបាននោះជាប់ទាក់ទងនឹងអាជីពក្នុងគោលដៅរបស់អ្នកយ៉ាងដូចម្តេចខ្លះ?

3. ការអប់រំ (Education): តើអ្នកនឹងត្រូវសិក្សាត្រឹមកម្រិតណា (បរិញ្ញាបត្រ, បរិញ្ញាបត្រជាន់ខ្ពស់ ឬបណ្ឌិត) ជំនាញអ្វីដើម្បីសម្រេចគោលដៅរបស់អ្នក ? តើមានចំណេះដឹងអ្វីខ្លះដែលអ្នកចង់ទទួលបានជាពិសេស ក្រៅពីការអប់រំដែលអ្នកទទួលបានក្នុងសាកលវិទ្យាល័យ? តើពត៌មាន ឬជំនាញអ្វីខ្លះដែលអ្នកនឹងត្រូវការដើម្បីសម្រេចគោលដៅជាបន្តបន្ទាប់ទៀត?

4. គ្រួសារ (Family): តើអ្នកចង់ក្លាយជាបុគ្គលដែលមានសុភមង្គលបំផុតក្នុងជីវិតដែរឬទេ? តើអ្នកត្រូវសម្រេចវាដោយវិធីណា? តើអ្នកគួរស្វែងរកគូស្រករបែបណា? អ្នកត្រូវថ្លឹងថ្លែងឱ្យច្បាស់ពីសុភមង្គល និងការងារ ឬ សុភមង្គល និងទឹកប្រាក់។ អ្នកត្រូវចាំឱ្យច្បាស់ថា អ្នកធ្វើការងារដើម្បីសុភមង្គល ហើយអ្នកក៏រកប្រាក់ដើម្បីសុភមង្គលដែរ ហេតុនេះកុំឱ្យការងារ និងលុយដឹកមុខអ្នករហូតដល់ភ្លេចគិតពេលសុភមង្គលឱ្យសោះ បើមិនដូច្នេះទេ អ្នកនឹងរស់នៅដោយគ្មានភាពរីករាយពិតប្រាកដ ហើយប្រាក់ដែលអ្នករកបាននោះក៏លែងមានន័យដែរ (បើអ្នកគិតតែរកប្រាក់ ហើយភ្លេចគិតពីសុភមង្គល ហើយបណ្ដោយឱ្យវាខ្ទេចខ្ទាំដោយអំណាចទឹកប្រាក់ នោះអ្នកនឹងក្លាយជាមហាសេដ្ឋីក្នុងប្រទេសដែលគេមិនចាយលុយជាមិនខាន)៕

ចាប់ផ្តើមចេញសម្ដីជាមួយនឹងសំណើចលាយឡំជាមួយអត្ថន័យអប់រំ ក្នុងសិក្ខាសាលា «បេសកកម្មនិស្សិតសាកលវិទ្យាល័យ» លោក ឆាំ ប៊ុនថេត សាស្រ្តាចារ្យនៃសាកលវិទ្យាល័យបញ្ញាសាស្រ្តកម្ពុជា បានលើកឡើងនូវគោលការណ៍ជាច្រើនដែលយុវជនអាចពិចារណាសម្រាប់ប្រើប្រាស់ក្នុងជីវិតឱ្យកាន់តែមានលក្ខណៈប្រសើរឡើង។

សាស្រ្តាចារ្យប្រកបដោយប្រជាប្រិយភាពរូបនេះបានលើកឡើងថា កុំនិយាយថា «ខ្ញុំមិនអីទេ!» បើខ្លួនឯងកំពុងមានបញ្ហា តែត្រូវបើកចិត្តឱ្យទូលាយទទួលយកការពិតសម្រាប់ខ្លួនឯង។ ប្រសិនបើមានបញ្ហា ឬកំពុងស្ថិតក្នុងឧបសគ្គក្នុងជីវិត ត្រូវទទួលស្គាល់ថា ខ្លួនពិតជាមានបញ្ហា ហើយប្រមូលបញ្ហាទាំងអស់នោះដើម្បីត្រៀមខ្លួនដោះស្រាយប្រកបដោយថាមពល និងភាពវិជ្ជមាន។

លោក ឆាំ ប៊ុនថេត ក៏បានលើកឡើងផងដែរថា ប្រសិនបើយើងមានបញ្ហា ហើយយើងនៅតែមិនបើកចិត្តទទួលស្គាល់ថា យើងកំពុងមានបញ្ហា ហើយគេចវេះពីបញ្ហាដែលកំពុងប្រឈម រឿងអវិជ្ជមានដែលកើតឡើងពីបញ្ហាក្នុងជីវិតនឹងវាយប្រហារយើង ហើយធ្វើឱ្យជីវិតរបស់យើងបាត់បង់សេចក្តីសុខ។ ហេតុនេះការដែលយើងព្យាយាមប្រើជីវិតក្នុងផ្លូវវិជ្ជមានដើម្បីដើរទៅមុខសម្រាប់ការអភិវឌ្ឍខ្លួនឯង ស្របពេលដែលយើងព្យាយាមប្រឈមជាមួយបញ្ហាហើយដោះស្រាយឱ្យអស់នោះ យើងនឹងទទួលបានសេចក្តីសុខនៅក្នុងការរស់នៅ។

សូមមានភាពស្មោះត្រង់ជាមួយខ្លួនឯង កុំលាក់ខ្លួនឯង ហើយត្រូវច្បាស់ថា យើងដឹងពីខ្លួនឯងគ្រប់ពេលដើម្បីគ្រប់គ្រងស្ថានការណ៍ក្នុងជីវិត កុំឱ្យស្ថានការណ៍គ្រប់គ្រងជីវិតរបស់យើងវិញឱ្យសោះ៕

ភ្នំពេញៈ រាជរដ្ឋាភិបាលតាមរយៈធនាគារអភិវឌ្ឍន៍ជនបទបានត្រៀមថវិកាចំនួន50លានដុល្លារអាមេរិកដើម្បីដោះស្រាយបញ្ហាកសិផលដែលកំពុងធ្លាក់ថ្លៃរបស់ប្រជាពលរដ្ឋ ពិសេសគ្រាប់ពោត។

លោក កៅ ថាច អគ្គនាយកនៃធនាគារអភិវឌ្ឍន៍ជនបទបានមានប្រសាសន៍ឲ្យដឹងក្នុងកិច្ចប្រជុំស្តីពីបញ្ហាកសិផលពោតរវាងប្រធានមន្ទីរពាណិជ្ជកម្មខេត្តចំនួន3 រូមមានខេត្តបាត់ដំបង ប៉ៃលិន និងខេត្តបន្ទាយមានជ័យ ជាមួយនឹងអ្នកដាំដុះកសិផល និងអ្នកទិញពោតយកទៅផលិតជាចំណីសត្វនៅព្រឹកថ្ងៃទី18 កក្កដានេះថា បច្ចុប្បន្នថវិកានៅក្នុងដៃមានចំនួន 27លានដុល្លារអាមេរិកដែលអាចប្រើប្រាស់បានទៅលើការផ្តល់កម្ចីសម្រាប់កសិផលពោតដែលនឹងប្រើជាបណ្តោះអាសន្នសិន ហើយក៏នឹងមានបន្ថែមទៀតដែលអាចកើនដល់ប្រមាណជា 50លានដុល្លារអាមេរិក។

យោងតាមរបាយការណ៍របស់ក្រសួងពាណិជ្ជកម្មបានឲ្យដឹងថា កម្ពុជាបាននាំចេញគ្រាប់ពោតប្រមាណ10ម៉ឺនតោនដែលមានតម្លៃទឹកប្រាក់14លានដុល្លារអាមេរិក។ រដ្ឋមន្រ្តីក្រសួងពាណិជ្ជកម្មកម្ពុជាលោក ប៉ាន សូរស័ក្តិបានថ្លែងឲ្យដឹងបន្ទាប់ពីកិច្ចប្រជុំដដែលនេះថា ដើម្បីកុំឲ្យតម្លៃពោតមានការធ្លាក់ថ្លៃ ឬឡើងថ្លៃហួសប្រមាណ អ្នកលក់ និងអ្នកទិញត្រូវមានចុះលក្ខខណ្ឌត្រឹមត្រូវពោលគឺត្រូវមានចុះកុងត្រាគ្នាទៅវិញទៅមក ដោយបង្កើតទំនុកទុកចិត្តរវាងអ្នកលក់ និងអ្នកទិញ៕

កន្លងមកគេធ្លាប់បានដឹងថា អ្នកនាង ពេជ្រ ខេនឌី មានកូនប្រុសម្នាក់ និងកាលពីរាត្រីថ្ងៃទី17 ខែកក្កដាម្សិលមិញ ខណៈនាងបានរៀបចំពិធីខួបកំណើតគម្រប់វ័យ32ឆ្នាំ នាងបានធ្វើឱ្យមិត្ដភ័ក្ដិសិល្បៈមួយចំនួនមានការភ្ញាក់ផ្អើលគ្រាដែលនាងបង្ហាញវត្ដមានកូនប្រុសដែលពេលនេះមានអាយុ 10 ឆ្នាំទៅហើយ។

មហាជនជាច្រើនប្រាកដជានៅចាំឈ្មោះអ្នកនាង ពេជ្រ ខេនឌី ជាតារាសិល្បៈខ្មែរតែម្នាក់គត់ដែលបានបើកភោជនីយដ្ឋាន ល្បុក្កតោ នៅឯខេត្ដសៀមរាបដើម្បីលើកស្ទួយវិស័យក្បាច់គុនបុរាណខ្មែរ។ ដើមឡើយនាងពុំសូវបង្ហាញពីភាពលេចធ្លោលើជីវភាពរស់នៅប៉ុន្មានទេ ប៉ុន្ដែក្រោយពីបានដកខ្លួនចេញពីសិល្បៈមួយរយៈ និងត្រឡប់មកវិញ ស្រាប់តែនាងបានផ្លាស់ប្ដូរជីវភាពពីតារាចម្រៀងពេលរាត្រីមករស់នៅក្នុងជីវភាពបែបសេដ្ឋិនីវិញ។

អ្នកនាង ពេជ្រ ខេនឌី បានបញ្ជាក់ថា ចាប់តាំងពីនាងចូលប្រឡូកក្នុងអាជីពសិល្បៈជិត10 ឆ្នាំមក នេះជាលើកទីពីរហើយដែលនាងបានរៀបចំពិធីខួបកំណើត តែលើកនេះនាងធ្វើក្នុងលក្ខណៈបែបគ្រួសារច្រើនជាង ព្រោះភ្ញៀវដែលនាងអញ្ជើញឱ្យមកចូលរួមភាគច្រើនជាមិត្ដភ័ក្ដិរកស៊ី និងសាច់ញាតិ រីឯតារាសិល្បៈមានតិចតួចប៉ុណ្ណោះ។ កម្មវិធីនេះនាងពុំបានគ្រោងទុកជាមុនទេ ប៉ុន្ដែដោយមើលឃើញថា ថ្ងៃ17 ខែ7 ឆ្នាំ2017 ជាថ្ងៃជាវេលាល្អនាងក៏សម្រេចចិត្ដធ្វើតែម្ដង ហើយចាត់ទុកថា ជាឱកាសបង្ហាញនូវវត្ដមានកូនរបស់នាងដែលនាងពុំធ្លាប់បានបង្ហាញកន្លងមកផងដែរ។ នាងបន្ដថា មូលហេតុដែលនាងមិនបង្ហាញឱ្យទស្សនិកជនដឹងអំពីរឿងនាងមានកូន ព្រោះនាងគិតថា វាមិនពាក់ព័ន្ធទៅនឹងអាជីពសិល្បៈ ឬមានការចាំបាច់អ្វីត្រូវបង្ហាញនោះទេ ប៉ុន្ដែពេលនេះនាងស្ទើរតែដកខ្លួនចេញពីអាជីពសិល្បៈ90%ទៅហើយ ដូច្នេះទោះបីជាមានអ្នកដឹងពីដំណឹងនេះក៏គ្មានអ្វីចោទដែរ។

តារាសម្ដែងរូបនេះប្រាប់ទៀតថា៖ «តាមពិតថ្ងៃខួបហ្នឹងគឺល្អ ខ្ញុំចង់ទៅធ្វើនៅខេត្ដសៀមរាប ក្នុងភោជនីយដ្ឋានរបស់ខ្ញុំតែម្ដង តែដោយសារចំថ្ងៃច័ន្ទបងប្អូនមិត្ដភ័ក្ដិសុទ្ធតែរវល់ការងាររបស់ពួកគាត់ គ្មានពេលវេលាដើម្បីទៅចូលរួមនៅទីនោះ ខ្ញុំក៏សម្រេចធ្វើនៅភ្នំពេញតែម្ដង»។ ជាមួយនឹងការបង្ហាញវត្ដមានកូនច្បងអាយុ10 ឆ្នាំ ត្រូវបានអ្នកនាង ពេជ្រ ខេនឌី បញ្ជាក់ថា សព្វថ្ងៃនេះនាងមានកូនប្រុសពីរនាក់ហើយ មួយអាយុ10ឆ្នាំ ម្នាក់ទៀតអាយុ1ឆ្នាំ និងបច្ចុប្បន្ននាងកំពុងតែមានទម្ងន់ក្នុងពោះ6ខែទៀតផង ដោយនាងពុំទាន់បានទៅឆ្លុះអេកូមើលថា តើជាកូនស្រី ឬប្រុសនៅឡើយទេ។

ទោះជាយ៉ាងណា អ្នកនាងពេជ្រ ខេនឌី បញ្ជាក់ថា៖ «ប្រសិនបើកូនក្រោយនេះជាកូនស្រីខ្ញុំនឹងឈប់យកទៀតហើយ ត្រឹម3ហ្នឹងល្មមហើយ ប៉ុន្ដែបើកូននោះជាកូនប្រុស ខ្ញុំនឹងតាមបន្ដទៀត ធ្វើយ៉ាងណាឱ្យមានកូនស្រីម្នាក់នៅក្នុងគ្រួសារ»។ គួរបញ្ជាក់ថា បច្ចុប្បន្នតារាសម្ដែងរូបនេះមានជំនួញ3នៅក្នុងដៃគឺ ការទិញ-លក់រថយន្ដ ទទួលបញ្ចាំរថយន្ដ អចលនទ្រព្យ របរទី2 គឺនាំទំនិញមកពីប្រទេសចិនមកលក់នៅក្នុងស្រុក ទី3 បើកភោជនីយដ្ឋានល្បុក្កតោនៅឯខេត្ដសៀមរាប៕