Author: វល័ក្ខ

Dortmund ប្រាប់ថា Aubameyang នឹងមិនបានចាកចេញឡើយក្រោយផ្តួល AC Milan
ក្លិបយក្សអាល្លឺម៉ង់ Borussia Dortmund បានប្រាប់ខ្សែប្រយុទ្ធ Pierre-Emerick Aubameyang ថា រូបគេនឹងមិនត្រូវបានអនុញ្ញាតឲ្យចាកចេញពីក្លិបនៅរដូវក្តៅនេះឡើយ។ ខ្សែប្រយុទ្ធអន្តរជាតិហ្គាបុងរូបនេះត្រូវបានទាក់ទងឲ្យផ្ទេរចេញពីក្លិបស្ថិតក្នុងក្របខ័ណ្ឌ Bundesliga ប៉ុន្តែ Dortmund បានផ្តល់ឲ្យរូបគេនូវថ្ងៃកំណត់មួយ នៅមុនពេលរូបគេត្រូវតែចាកចេញពីក្លិបនេះ ហើយថ្ងៃកំណត់នោះ បានផុតអស់ទៅហើយ។
ក្រោយពីខ្សែប្រយុទ្ធ Aubameyang បានស៊ុតបាល់បញ្ចូលទី2គ្រាប់ ដើម្បីជួយឲ្យក្រុម Dortmund ផ្តួលក្រុម AC Milan ក្នុងលទ្ធផល3-1 ក្នុងការប្រកួតមិត្តភាពដណ្តើមពាន International Champions Cup នៅទឹកដីចិន លោក Michael Zorc ប្រធានផ្នែកកីឡារបស់ Dortmund បាននិយាយកាលពីថ្ងៃអង្គារថា៖ «យើងគិតថា ទីផ្សារដោះដូរគឺត្រូវបានបិទហើយ ពេលវេលានៃការសម្រេចចិត្តបានឈានដល់ទីបញ្ចប់ហើយ»។
Aubameyang ដែលបានស៊ុតបាល់បញ្ចូលទីក្នុងការប្រកួតលីកចំនួន31គ្រាប់សម្រាប់ការប្រកួត32លើកកាលពីរដូវកាលមុននោះ ត្រូវបានរំពឹងទុកថា នឹងផ្ទេរទៅកាន់ប្រទេសចិន ក្របខ័ណ្ឌ Premier League ឬក៏ទៅកាន់ក្លិប AC Milan ក្នុងក្របខ័ណ្ឌ Serie A ប៉ុន្តែរូបគេត្រូវបានបញ្ជាក់ប្រាប់ថា រូបគេនឹងត្រូវបន្តអាជីពរបស់គេក្នុងក្លិប Dortmund ដដែល។
ក្លិប Chelsea ត្រូវបានរំពឹងទុកថា នឹងដាក់សំណើដេញថ្លៃទិញដែរ ខណៈដែលពួកគេកំពុងសម្លឹងរកមើលខ្សែប្រយុទ្ធដើម្បីជំនួសកន្លែងរបស់ Diego Costa បើទោះបីការដាក់សំណើជាផ្លូវការមិនទាន់ត្រូវបានធ្វើឡើងទៅកាន់ក្លិប Dortmund ក៏ដោយ ហើយកីឡាករជាអាទិភាពរបស់គេនៅតែជាខ្សែប្រយុទ្ធ Alvaro Morata របស់ក្លិប Real Madrid ដដែល៕
ប្រភពពី៖ The Guardian
July 19, 2017
ឧកញ៉ា គួច ម៉េងលី៖ មុននឹងរកស៊ី យុវជនគួររៀនឱ្យច្រើនជាមុនសិន
ការសិក្សាគឺជាមូលដ្ឋានគ្រឹះសំខាន់បំផុតនៃភាពជោគជ័យគ្រប់យ៉ាងក្នុងដំណើរជីវិតរបស់បុគ្គលម្នាក់ៗទាំងលើវិស័យការងារមុខជំនួញ និងសង្គម។
អគ្គនាយកនៃក្រុមហ៊ុន Mengly J. Quach Group លោកឧកញ៉ា គួច ម៉េងលី បានមានប្រសាសន៍ថា មុននឹងចាប់ផ្តើមការងារសំខាន់ៗដើម្បីស្វែងរកឧត្តមភាពសម្រាប់ជីវិត យុវជនគ្រប់រូបត្រូវតែបុកគ្រឹះឱ្យបានរឹងមាំ សំលៀងឱ្យមុត ហើយចាក់ឱ្យធ្លុះលើផ្នែកចំណេះដឹង និងបទពិសោធការងារជាមុនសិន។ មិនថាការធ្វើការឱ្យគេ ឬបង្កើតអាជីវកម្មខ្លួនឯងនោះទេ ជម្រើសទាំងអស់សុទ្ធតែអាចធ្វើឱ្យមនុស្សមានភាពថ្កុំថ្កើងប្រសិនបើពួកគេមានមូលដ្ឋានគ្រឹះរឹងមាំ។ បុគ្គលដែលមានសមត្ថភាពគ្រប់គ្រាន់ បើទោះបីជាគាត់បម្រើការងារក្នុងស្ថាប័នរបស់អ្នកដទៃ ក៏ប្រាក់ចំណូលរបស់គាត់ពេលខ្លះខ្ពស់ជាងអ្នករកស៊ីទៅទៀត ខណៈអ្នករកស៊ីទាំងអស់មិនប្រាកដថា នឹងទទួលបានជោគជ័យឡើយ។
លោកឧកញ៉ា គួច ម៉េងលី បានមានប្រសាសន៍ថា៖ “យុវជនខ្មែរមួយចំនួននាពេលបច្ចុប្បន្ននេះមាននិន្នាការមួយគឺចង់រកស៊ីនៅវ័យក្មេង និងមិនសូវផ្តល់តម្លៃលើការសិក្សាអប់រំនោះទេ។ ពួកគាត់ធ្វើអ្វីមួយតាមគ្នាដោយគ្មានមូលដ្ឋានច្បាស់លាស់ដែលធ្វើឱ្យអាជីវកម្មរបស់សហគ្រិនក្មេងៗទាំងអស់នោះភាគច្រើនមានអាយុកាលខ្លី។
អគ្គនាយកនៃក្រុមហ៊ុន Mengly J. Quach Group បានបន្ថែមទៀតថា ការធ្វើជំនួញរបស់យុវជនមួយចំនួនដែលគ្មានចំណេះដឹង ជំនាញ និងបទពិសោធច្បាស់លាស់គឺប្រៀបបានទៅនឹងថ្ងៃរះដល់ចំណុចខ្ពស់មួយក៏លិចទៅវិញម្តងហើយម្តងទៀត។ ហេតុនេះដើម្បីទប់ស្កាត់ហានិភ័យរហូតទទួលបានជោគជ័យប្រកបដោយនិរន្តរភាពយុវជនត្រូវរៀនឱ្យបានច្រើនបំផុតតាមដែលអាចធ្វើទៅបាន។ ដោយចាប់ផ្តើមពីបុគ្គលិកដែលធ្វើការឱ្យគេយុវជននឹងអាចមានឱកាសរៀនបានច្រើនបំផុតព្រោះនៅពេលដែលប្រឡូកក្នុងពិភពការងារជាក់ស្តែងពួកគេនឹងមើលឃើញពីគន្លឹះសំខាន់ៗក្នុងការដោះស្រាយបញ្ហាការប្រឈមនៅក្នុងអាជីវកម្ម និងចំណុចដែលនឹកស្មានមិនដល់ជាច្រើនទៀតដែលគ្មានបង្រៀនក្នុងសាលា។
តាមការសិក្សាស្រាវជ្រាវបានរកឃើញថា អ្នកមានទ្រព្យសម្បត្តិដែលមាននិរន្តរភាពនៅក្នុងបណ្តាប្រទេសធំៗគឺមានអាយុច្រើនជាង50ឆ្នាំហេតុនេះយុវជនកម្ពុជាគួរកុំប្រញាប់ចង់បង្កើតអាជីវកម្មនៅវ័យក្មេងពេកនោះទេប្រសិនបើមិនមានជំនាញច្បាស់លាស់។
មុននឹងបង្កើតអាជីវកម្មយុវជនគួរស្វែងយល់ពីចំណេះដឹងស្តីពីធនធានមនុស្សការស្វែងរកទុនវិនិយោគវិធីអភិវឌ្ឍន៍គុណភាពផលិតផលឬសេវាកម្មការជ្រើសរើសទីកន្លែងឱ្យស្របទៅនឹងគោលដៅនៃអាជីវកម្មនិងវិធីសាស្ត្រគ្រប់គ្រងជាដើម។
ដើម្បីបំពេញចំណុចសំខាន់ៗទាំងអស់នេះសហគ្រិនត្រូវការអ្នកជំនាញជាច្រើនរូបជាចាំបាច់សម្រាប់ដឹកនាំផ្នែកនីមួយៗឱ្យទទួលបានជោគជ័យហេតុនេះមុននឹងក្លាយជាសហគ្រិនម្នាក់ការឈានជើងពីបុគ្គលិកធម្មតារហូតក្លាយជាអ្នកដឹកនាំលើផ្នែកណាមួយក្នុងស្ថាប័នជាវិធីល្អបំផុតដែលផ្តល់ឱកាសឱ្យយុវជនមានពេលគ្រប់គ្រាន់ក្នុងការរៀនសូត្រ និងបង្កើតភាពចាស់ទុំផ្នែកគំនិតអាជីវកម្ម៕
July 19, 2017
ក្រុមហ៊ុនជប៉ុនដែលប្រតិបត្តិការជាមួយអេស៊ីលីដាកើនជាង 1,000ក្រុមហ៊ុន
ភ្នំពេញៈ ក្រុមហ៊ុនជប៉ុនដែលបាន និងកំពុងធ្វើប្រតិបត្តិការទូទាត់សាច់ប្រាក់ជាមួយធនាគារអេស៊ីលីដាបានកើនដល់ជាង1,000ក្រុមហ៊ុនហើយនៅដំណាច់ឆមាសទី1ឆ្នាំនេះ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាប្រចាំកម្ពុជាបានថ្លែងឲ្យដឹងតាមទូរស័ព្ទកាលពីថ្ងៃម្សិលមិញថា រហូតមកទល់ពេលនេះ ក្រុមហ៊ុនជប៉ុនដែលចូលមកវិនិយោគនៅកម្ពុជាបាន និងកំពុងកើនឡើង ដោយបច្ចុប្បន្នក្រុមហ៊ុនសាជីវកម្មធំៗបានកើនពី289ក្រុមហ៊ុនដល់310ក្រុមហ៊ុន ធៀបក្នុងរយៈពេលដូចគ្នាកាលពីឆ្នាំមុន និងក្រុមហ៊ុនឯកគ្គតជនតូចៗបានកើនរហូតដល់716ក្រុមហ៊ុនហើយ។
លោកបន្តថា “នេះជាចំនួនក្រុមហ៊ុនជប៉ុនដែលបានធ្វើការទូទាត់សាច់ប្រាក់ជាមួយអេស៊ីលីដា និងមិនទាន់គិតបញ្ចួលពីក្រុមហ៊ុនដែលធ្វើការងារដោយផ្ទាល់ជាមួយធនាគារជប៉ុនដែលបានបើកនៅកម្ពុជានោះទេ”។ លោកបន្តថា “ការកើនឡើងនូវចំនួនក្រុមហ៊ុនជប៉ុននៅកម្ពុជាគឺជាការឆ្លុះបញ្ចាំងអំពីទំនុកចិត្តរបស់អ្នកវិនិយោគជប៉ុននៅកម្ពុជា ព្រោះមុនពេលពួកគេសម្រេចចិត្តទៅវិនិយោគនៅប្រទេសណាមួយ ពួកគេសិក្សាល្អិតល្អន់ណាស់”។
កត្តាសំខាន់ៗចំនួន3 ដែលទាក់ទាញអ្នកវិនិយោគជប៉ុនមកកម្ពុជា ដូចជា កំណើនសេដ្ឋកិច្ចរឹងមាំ ស្ថិរភាពសង្គមកិច្ច ស្ថិរភាពនយោបាយ និងកត្តាអំណោយផលលើវិស័យច្បាប់ពាក់ព័ន្ធជាច្រើនទៀត។ នេះបើតាមលោក អ៊ិន ចាន់នី បញ្ជាក់។
លោកជំទាវ លឹម ឈីវហូ អគ្គនាយិកាក្រុមហ៊ុនអ៊ែដវូត ដែលបានវិនិយោគតំបន់សេដ្ឋកិច្ចពិសេសភ្នំពេញ និងទាក់ទាញអ្នកវិនិយោគជប៉ុនបានច្រើនជាង50ភាគរយនៃក្រុមហ៊ុនទាំងអស់84ដែលបានវិនិយោគនៅតំបន់នោះបានថ្លែងថា ក្រុមហ៊ុនជប៉ុនកាន់តែច្រើនបាន និងកំពុងមកវិនិយោគនៅកម្ពុជា ហេតុនេះយើងត្រូវធ្វើការងារឲ្យបានល្អ ដើម្បីទាក់ទាញពួកគេមកវិនិយោគបន្ថែម។ លោកជំទាវបានបន្តថា ប្រសិនជាអ្នកវិនិយោគជប៉ុនតែ2ភាគរយនៅប្រទេសថៃមកវិនិយោគនៅកម្ពុជា ប្រជាជនកម្ពុជានឹងមានជីវភាពធូរធារទាំងអស់គ្នា។
លោកជំទាវបានបន្តថា “ពីមុនមកពេលយើងហៅគេមកវិនិយោគ ពួកគេប្រាប់យើងថា ពួកគេបារម្ភពីអំពើពុករលួយនៅកម្ពុជា ប៉ុន្តែខ្ញុំបានធានានឹងពួកគេថា នឹងមិនមានអំពើពុករលួយនៅទីនេះទេ ទីបំផុតពួកគេសម្រេចចិត្តមកវិនិយោគនៅកម្ពុជាកាន់តែច្រើន”៕
July 19, 2017
Neymar ទទួលយកសំណើពី PSG ខណៈក្លិបត្រៀមចំណាយប្រាក់195លានផោន
ខ្សែប្រយុទ្ធដ៏មានឥទ្ធិពល Neymar បានទទួលយកសំណើពីក្លិប Paris Saint-Germain ក្រោយពីក្លិបយក្សរបស់បារាំងមួយនេះបានយល់ព្រមចំណាយប្រាក់ទិញរំលាយកិច្ចសន្យាចំនួន 195លានផោន (ស្មើនឹង254លានដុល្លារអាមេរិក)។ នេះបើយោងទៅតាមប្រភពព័ត៌មាននានាក្នុងប្រទេសប្រេស៊ីល។
បណ្តាញសារព័ត៌មានប្រេស៊ីល Esporte Interativo បានចេញផ្សាយថា តារាឆ្នើមរបស់ក្លិប Barcelona រូបនេះបានយល់ព្រមលើលក្ខខណ្ឌផ្ទាល់ខ្លួនផ្សេងៗជាមួយនឹងក្លិប PSG នៅមុនពេលការផ្ទេរក្នុងតម្លៃខ្លួន195លានផោន។ PSG បានឆ្លើយតបទៅនឹងការចេញផ្សាយបែបនេះតាមរយៈការបញ្ជាក់ប្រាប់កាសែតកីឡា L’Equipe របស់បារាំងថា ពួកគេមិនមែនជាតួឯកក្នុងរឿងរ៉ាវទាក់ទងនឹង Neymar នេះទេ និងបានបញ្ជាក់ថា ការស្នើសុំតម្លៃខ្លួនដ៏ខ្ពស់នេះនៅតែមិនអាចទៅរួចឡើយ។
រឿងរ៉ាវនៃការផ្ទេរ Neymar បានផ្ទុះឡើងកាលពីថ្ងៃចន្ទ នៅពេលដែលកាសែត Sport ក្នុងទីក្រុង Barcelona បានចេញផ្សាយអត្ថបទមួយដែលបង្ហើបពីប្រភពក្នុងប្រទេសប្រេស៊ីលថា រូបគេមិនរីករាយក្នុងក្លិបនេះឡើយ ពីព្រោះរូបគេនៅតែដើរជាតួរងបន្ទាប់ពីតារាឆ្នើម Leonel Messi និង Luis Suarez។ កាសែត MailSport យល់ឃើញថា មន្ត្រីសំខាន់ៗមួយចំនួនក្នុងក្លិបនេះបានធុញទ្រាន់ទៅនឹងការលើកឡើងផ្សេងៗថា រូបគេចង់ចាកចេញពីកីឡដ្ឋាន Camp Nou ហើយ និងយល់ព្រមឲ្យចាកចេញ ប្រសិនបើក្លិបណាមួយហ៊ានឲ្យតម្លៃខ្លួន Neymar ក្នុងទឹកប្រាក់ចំនួន195លានផោន៕
ប្រភពពី៖ Daily Mail
July 19, 2017
ធនាគារពិភពលោក គ្រោងផ្តល់ហិរញ្ញប្បទាន 540លានដុល្លាររួមចំណែកដល់ការអភិវឌ្ឍនៅកម្ពុជា
ភ្នំពេញៈ ធនាគារពិភពលោក (World Bank) គ្រោងផ្តល់ហិរញ្ញប្បទានទឹកប្រាក់ចំនួន 540លានដុល្លារ ដើម្បីអភិវឌ្ឍកម្ពុជា ក្នុងគោលដៅប្រែក្លាយប្រទេសកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ2030។
មានប្រសាសន៍ក្នុងជំនួបជាមួយទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ធមុនីរ័ត្នកាលពីល្ងាចថ្ងៃម្សិលមិញ លោកជំទាវ អេឡែន ហ្គូលស្ទីន (Ellen Goldstein) នាយិកាធនាគារពិភពលោកប្រចាំតំបន់អាស៊ីអាគ្នេយ៍ អាស៊ីខាងកើត និងប៉ាស៊ីហ្វិកបានថ្លែងលើកឡើងនៅក្នុងជំនួបពិភាក្សាការងារជាមួយឯកឧត្តម អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី18 ខែកក្តដាម្សិលមិញនេះថា ដើម្បីបន្តពង្រឹង និងលើកកម្ពស់កិច្ចសហប្រតិបត្តិការជាមួយរាជរដ្ឋាភិបាលកម្ពុជា ធនាគារពិភពលោកនឹងផ្តល់ថវិកាចំនួន540លានដុល្លារអាមេរិកដែលជាចំណែកមួយសម្រាប់ការអភិវឌ្ឍនៅកម្ពុជាលើការចាប់ផ្តើមអនុវត្តតាមការងារក្របខ័ណ្ឌកិច្ចសហប្រតិបត្តិការ សម្រាប់គម្រោងដែលមានរយៈពេល2ឆ្នាំ គឺចាប់ពីឆ្នាំ2018 ដល់ឆ្នាំ2021។
លោកជំទាវបានបន្តដោយសន្យាជួយដល់រាជរដ្ឋាភិបាលកម្ពុជាក្នុងការស្រូបទាញយកថវិកានេះ មកប្រើប្រាស់ឱ្យអស់តាមផែនការក្នុងការរៀបចំគម្រោងអនុវត្តជាក់ស្តែង ដើម្បីឲ្យស្របតាមតម្រូវការអាទិភាពពិតប្រាកដរបស់រាជរដ្ឋាភិបាល ដូចដែលមានចែងក្នុងផែនការយុទ្ធសាស្រ្តអភិវឌ្ឍន៍កម្ពុជា និងគោលនយោបាយអភិវឌ្ឍន៍វិស័យឧស្សាហកម្មឆ្នាំ2015-2025ផងដែរ ដើម្បីសម្រេចតាមគោលដៅនៃការប្រែក្លាយកម្ពុជាឱ្យទៅជាប្រទេសចំណូលមធ្យមកម្រិតខ្ពស់នៅត្រឹមឆ្នាំ2030នាពេលខាងមុខ។
លោក អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថ្លែងនូវអំណរគុណចំពោះធនាគារពិភពលោកដែលមានសុឆន្ទៈខ្ពស់ និងពិតប្រាកដក្នុងការចូលរួមចំណែកដល់កិច្ចអភិវឌ្ឍនៅកម្ពុជា ជាពិសេសការបង្កើនទំហំហិរញ្ញប្បទានសហប្រតិបត្តិការបន្ថែមទៀត។ ជំនួយនេះបានឆ្លុះបញ្ចាំងអំពីជំនឿជឿជាក់ដ៏មុតមាំរបស់ធនាគារពិភពលោកចំពោះរាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាផងដែរ។
លោកទេសរដ្ឋមន្រ្តីបានលើកឡើងឲ្យដឹងថា រាជរដ្ឋាភិបាលកម្ពុជា គឺកំពុងមានមហិច្ឆតាថ្មីមួយទៀតលើការប្រែក្លាយកម្ពុជាទៅជាប្រទេសដែលអាចផ្តល់វិភាគទានដល់សហគមន៍អន្តរជាតិវិញតាមរយៈការអភិវឌ្ឍអន្តរជាតិរបស់ធនាគារពិភពលោក ដើម្បីចូលរួមចំណែកគាំទ្រកិច្ចអភិវឌ្ឍរបស់បណ្តាប្រទេសក្រីក្រផ្សេងៗទៀត ដូចដែលកម្ពុជាធ្លាប់បានឆ្លងកាត់នៅក្នុងអន្តរកាលកន្លងមកហើយ៕
July 19, 2017
លោក Conte បន្តកុងត្រារយៈពេល 2ឆ្នាំទៀតនៅ Chelsea ដើម្បីបញ្ចប់ការសង្ស័យ
លោក Antonio Conte បានសម្រេចចិត្តពីអនាគតរបស់លោកជាមួយក្លិប Chelsea តាមរយៈការចុះកុងត្រាថ្មីរយៈពេល2ឆ្នាំទៀតជាមួយនឹងក្លិបនេះ ដែលនឹងទទួលបានចំណូលដល់ទៅ20លានផោន (ស្មើនឹង26លានដុល្លារអាមេរិក)។
គ្រូបង្វឹករបស់ក្រុមតោខៀវរូបនេះត្រូវបានទាក់ទងជាមួយនឹងការផ្ទេរទៅកាន់ប្រទេសអ៊ីតាលីវិញនៅរដូវក្តៅនេះ ប៉ុន្តែ លោកបានបញ្ចប់ពាក្យចចាមអារ៉ាមផ្សេងៗដែលថា លោកអាចនឹងចាកចេញ។ លោក Conte បានដឹកនាំឲ្យក្លិប Chelsea លើកពានក្របខ័ណ្ឌ Premier League ក្នុងរដូវកាលទី1របស់លោកនៅឯកីឡដ្ឋាន Stamford Bridge។ គ្រូបង្វឹករូបនេះបានឲ្យដឹងថា៖ «ខ្ញុំពិតជារីករាយណាស់ក្នុងការចុះហត្ថលេខាលើកុងត្រាថ្មីជាមួយនឹងក្លិប Chelsea។ យើងបានធ្វើការងារជាមួយគ្នាយ៉ាងល្អ និងលំបាកក្នុងឆ្នាំទី1របស់យើងដើម្បីសម្រេចបានសមិទ្ធផលដ៏អស្ចារ្យ ដែលខ្ញុំពិតជាមានមោទនភាពណាស់។ ពេលនេះយើងត្រូវតែធ្វើការងារឲ្យកាន់តែខ្លាំងជាងមុនដើម្បីរក្សាការស្ថិតក្នុងកម្រិតកំពូល»។
លោក Conte បានបន្ថែមទៀតថា៖ «អ្នកគាំទ្ររបស់ Chelsea បានផ្តល់នូវការគាំទ្រដល់ខ្ញុំយ៉ាងខ្លាំងក្លា ចាប់តាំងពីខ្ញុំបានមកដល់ទីនេះកាលពី1ឆ្នាំមុន ហើយវាពិតជាសំខាន់ណាស់ដែលយើងបន្តទទួលជោគជ័យជាមួយគ្នា»។ ក្រុមតោខៀវរបស់លោក Conte នឹងត្រូវធ្វើដំណើរទៅកាន់ទឹកដីអាស៊ី សម្រាប់ដំណើរប្រកួតមុនបើករដូវកាលរបស់ពួកគេនៅសប្តាហ៍នេះ ដោយពួកគេនឹងត្រូវប្រកួតជាមួយនឹងក្រុម Arsenal, Bayern Munich និង Inter Milan។
លោក Marina Granovskaia ប្រធានផ្នែកកីឡារបស់ Chelsea បានឲ្យដឹងថា៖ «លោក Antonio បានទទួលបានជោគជ័យដ៏មិននឹកស្មានដល់កាលពីរដូវកាលមុន តាមរយៈការសម្របខ្លួនក្នុងកីឡាបាល់ទាត់អង់គ្លេសបានយ៉ាងឆាប់រហ័ស និងជួយឲ្យយើងឈ្នះពាន Premier League»៕
ប្រភពព័ត៌មាន៖ The Sun
July 19, 2017
ដឹងទុកចេះជាចំណេះ…វិធីសង្គ្រោះជីវិតពេលរថយន្តធ្លាក់ចូលក្នុងទឹក (មានវីដេអូ)
ឧប្បត្តិហេតុអាចកើតឡើងបានគ្រប់ពេលវេលា ជាពិសេសឧប្បត្តិហេតុខាងរថយន្តដែលយើងត្រូវតែទទួលស្គាល់ថា មានច្រើនដងណាស់ដែលរថយន្តរបស់ជនរងគ្រោះត្រូវធ្លាក់ចូលទៅក្នុងទឹកទន្លេ បឹង ឬត្រពាំងជ្រៅៗ និងបើសិនជាកើតហេតុការណ៍បែបនេះចំពោះខ្លួនអ្នកវិញ អ្នកនឹងមានពេលមិនដល់ 1 នាទីទេក្នុងការរំដោះខ្លួនឱ្យរួចផុតពីការលង់ទឹកស្លាប់។ ប្រាកដណាស់ ការតាំងស្មារតី ជាមួយនិងវិធីការរំដោះខ្លួនដែលត្រឹមត្រូវ នឹងជួយឱ្យអ្នករួចផុតពីស្ថានការណ៍ដ៏សែនអាក្រក់នេះបាន ដូច្នេះបើសិនជាកើតហេតុការណ៍បែបនេះឡើងមែន តែយើងគួរធ្វើយ៉ាងណា?
1 . កុំស្លន់ស្លោ តាំងស្មារតី ប្រញាប់ចុចដោះខ្សែក្រវាត់សុវត្ថិភាពចេញពីខ្លួនឱ្យបានលឿនបំផុតភ្លាម។
2 . ប្រញាប់ចុចកញ្ចក់បើកឱ្យបានលឿនបំផុត។
3 . ប្រញាប់ហក់ចេញមកក្រៅតាមបង្អួចឡានឱ្យបានលឿនបំផុត។
ចូរចាំទុកថា នៅពេលឡានធ្លាក់ចូលទៅប៉ះនឹងទឹកហើយ បើរុញទ្វារឡានបើកមិនបាន ចូរកុំរវល់តែខាតពេលក្នុងការរុញទ្វារបើក ព្រោះអ្នកគ្មានផ្លូវស៊ូនឹងកម្លាំងរុញផ្ទប់របស់ទឹកពីខាងក្រៅមកបានឡើយ។ សូមសាកល្បងទស្សនាឃ្លិបដែលអនុវត្តពីវិធីសង្គ្រោះខ្លួនឯងខាងក្រោមនេះដូចតទៅ។
ប្រាកដណាស់មកដល់ពេលនេះ មនុស្សជាច្រើនប្រហែលជាមានសំណួរជាច្រើន ព្រោះក្នុងស្ថានការណ៍ពិតៗអាចមិនងាយស្រួលបែបនោះទេ កញ្ចក់អគ្គិសនីអាចនឹងលែងធ្វើការ។ ពេលដែលកំពុងតែលិចចូលទៅក្នុងទឹក មិនថាដោយមូលហេតុអ្វីក៏ដោយ តែបើលោកអ្នកមានពេលវេលាគ្រប់គ្រាន់ ក៏សាកល្បងប្រើវិធីនេះ ក៏អាចរួចខ្លួនបានដែរ គឺរករបស់អ្វីស្រួចមាំៗមកគាស់កញ្ចក់បែបនេះក៏បាន។
តែបើចៃដន្យឡានរបស់អ្នកលិចទៅក្នុងទឹកយ៉ាងឆាប់រហ័សនោះ រឿងដែលសំខាន់នៅពេលនេះគឺ “ចូរតាំងស្មារតីឱ្យមុតមាំ” នៅពេលទឹកហូរចូលមកក្នុងឡានជារឿយៗហើយនោះ ចូរកុំភ្លេចដកសោគន្លឹះទ្វារឡាន ហើយអ្នកត្រូវព្យាយាមរង់ចាំរហូតដល់ទឹកហូរចូលមកពេញឡាន ដើម្បីឱ្យកម្លាំងរុញ(សម្ពាធ)របស់ទឹកនៅខាងក្នុងស្មើគ្នានឹងកម្លាំងរុញរបស់ទឹកខាងក្រៅឡានស្មើគ្នា បន្ទាប់ពីនោះចូររុញ ឬធាក់ទ្វារចេញឱ្យអស់ពីកម្លាំងដែលមាន។ ប្រាកដណាស់ អ្នកមានពេលតែមិនប៉ុន្មានវិនាទីប៉ុណ្ណោះ តែនេះគឺជាវិធីចុងក្រោយបំផុតដែលអ្នកអាចនឹងរួចជីវិត។
បន្ទាប់ពីអ្នកចេញផុតពីក្នុងរថយន្តមកហើយ និងមិនដឹងថា ទិសខាងណាគឺផ្ទៃទឹកខាងលើនោះ ចូរសង្កេតមើលពពុះទឹកដែលយើងបញ្ចេញពីមាត់ ហើយធាក់ទឹកឱ្យខ្លាំងឡើងទៅតាមពពុះទឹកនោះទៅ។ តែអ្វីដែលគ្រប់ៗគ្នាមិនគួរភ្លេចតាំងពីដំបូងនោះគឺ ការពាក់ខ្សែក្រវាត់សុវត្ថិភាព ព្រោះបើអ្នកមិនបានពាក់ខ្សែក្រវាត់សុវត្ថិភាព
តាំងពីដំបូងនោះ កម្លាំងបោកផ្ទប់ដែលបណ្តាលមកពីការបុក អាចធ្វើឱ្យអ្នកសន្លប់ ឬរងគ្រោះថ្នាក់រហូតមិនអាចកែខៃស្ថានការណ៍ជាបន្តបាន តែយ៉ាងណាក៏ដោយ សូមឱ្យលោកអ្នកសំណាងល្អ និងសង្ឃឹមថា វានឹងមិនកើតហេតុការណ៍បែបនេះជាមួយនរណាម្នាក់ឡើយ៕
https://www.youtube.com/watch?v=WLvL_AsjzmY
July 19, 2017
ឧកញ៉ា ចេង ខេងៈ វិនិយោគលើដីធ្លី ពេលណាក៏ជោគជ័យដែរ ឱ្យតែចេះរកអ្នកជំនាញជួយ
ភ្នំពេញ – សព្វថ្ងៃមានអ្នកមានធនធាន និងទ្រព្យសម្បតិ្ដជាច្រើនមានបំណងចង់ធ្វើការវិនិយោគទៅលើវិស័យអចលនទ្រព្យ ប៉ុន្ដែអ្នកទាំងនោះហាក់នៅមានអារម្មណ៍ស្ទាក់ស្ទើរជាមួយការសម្រេចចិត្ដរបស់ខ្លួន ដោយពួកគាត់បារម្ភខ្លាចខាតបង់ប្រាក់ទុន។ បញ្ហានេះត្រូវបានលោកឧកញ៉ា ចេង ខេង បញ្ជាក់ថា បើចង់វិនិយោគលើវិស័យនេះបានជោគជ័យគួរតែពិភាក្សាជាមួយអ្នកជំនាញដែលមានបទពិសោធ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ កម្ពុជា ស៊ីភីអិល (CPL)បានលើកឡើងថា មនុស្សគ្រប់រូបអាចយកលុយដែលខ្លួនមានមកវិនិយោគលើវិស័យអចលនទ្រព្យ ឬវិស័យដីធ្លី ហើយគាត់នឹងអាចក្លាយជាអ្នកមានទ្រព្យសម្បត្ដិកើនឡើងបាន ប៉ុន្ដែចំណុចនេះលោកសំដៅទៅលើការវិនិយោគដែលបានឆ្លងកាត់ការពិភាក្សាជាមួយអ្នកជំនាញដែលមានបទពិសោធ។ ជួនកាលគាត់មានលុយច្រើន អាចវិនិយោគលើវិស័យនេះបានមែន ប៉ុន្ដែគាត់មិនបានពិភាក្សាជាមួយអ្នកជំនាញ គាត់អត់ទទួលបានព័ត៌មានគ្រប់គ្រាន់ ពុំដឹងថា ទីផ្សារត្រូវពង្រីកទៅកន្លែងណា ដូច្នេះគាត់ក៏ពុំទទួលបានភាពជោគជ័យដែរ។
អគ្គនាយកក្រុមហ៊ុន CPL បញ្ជាក់ថា៖ «ដូចជារូបខ្ញុំជាដើម កន្លងមកខ្ញុំបាននាំអ្នកវិនិយោគលើវិស័យនេះឱ្យក្លាយជាសេដ្ឋីច្រើននាក់មកហើយក្នុងរយៈពេល20ឆ្នាំកន្លងមកនេះ ពោលគឺខ្ញុំបាននាំអ្នកដែលចូលចិត្ដវិនិយោគលើដីធ្លីឱ្យទទួលបានជោគជ័យច្រើន ទើបគេជឿជាក់លើខ្ញុំ។ ប្រសិនបើយើងឱ្យយោបល់ទៅគេនូវអ្វីដែលមិនមែនជាការពិត និយាយផ្សេង លទ្ធផលក៏នឹងចេញមកផ្សេង នោះគេនឹងមិនអាចជឿជាក់លើយើងបានទេ»។
លោកឧកញ៉ាបន្ដថា ប្រសិនបើយើងចង់វិនិយោគលើអចលនទ្រព្យពិតប្រាកដមែន មានថវិកាប៉ុន្មានក៏អាចវិនិយោគបានដែរ អ្វីដែលសំខាន់គឺគួរតែមកពិភាក្សាជាមួយអ្នកជំនាញ ព្រោះពួកគេអាចធ្វើការងារនេះបានពី Aដល់ Z។ គេអាចដឹងថាមានថវិកាប៉ុន្មាន គួរវិនិយោគកន្លែងណា? យើងមានលុយតិចរកស៊ីតាមតិច មានលុយច្រើនរកស៊ីតាមហ្នឹង ព្រោះអ្នកជំនាញគេអាចច្នៃគ្រប់រសជាតិបានទាំងអស់។ ពាក់ព័ន្ធនឹងការបោះឆ្នោតនាពេលខាងមុខដែលអ្នកវិនិយោគជាច្រើនតែងមានការព្រួយបារម្ភនោះ ត្រូវបានលោកឧកញ៉ា ចេង ខេង បញ្ជាក់ថា ជាទស្សនរបស់លោកគឺគ្មានអ្វីជាការព្រួយបារម្ភទេ ព្រោះយើងមើលឃើញថា គណបក្សនយោបាយទាំងអស់មានចរិតចាស់ទុំហើយតាមរយៈការបោះឆ្នោតឃុំ -សង្កាត់កន្លងមក តាមរយៈការបង្ហាញនូវសកម្មភាពល្អៗ។ ដូច្នេះអ្វីដែលគួរបារម្ភគឺថា តើយើងអាចរកបានអ្នកជំនាញមានបទពិសោធពិតប្រាកដ មានក្រមសីលធម៌វិជ្ជាជីវៈមកជួយយើងបានដែរឬទេ? ដូច្នេះ មុននឹងយើងជឿជាក់លើមនុស្សម្នាក់យើងត្រូវមើលពីប្រវត្ដិរបស់គេឱ្យបានច្បាស់។ លោកបញ្ជាក់បន្ថែមថា៖ «ភ្នាក់ងារអចលនវត្ថុមានច្រើន ប៉ុន្ដែភ្នាក់ងារខ្លះអត់មានសច្ចភាពក្នុងការងាររបស់គាត់ទេ គាត់ក៏មិនគិតដល់អនាគតដែរ គាត់ធ្វើយ៉ាងម៉េចឱ្យតែបានលុយពេលហ្នឹង បោកប្រាស់គេបានកាន់តែល្អ ព្រោះគាត់អត់មានជំនាញត្រឹមត្រូវ គ្មានកេរ្ដិ៍ឈ្មោះក្នុងសង្គម»។
លោកឧកញ៉ាសង្កត់ធ្ងន់ថា ការវិនិយោគក្នុងវិស័យដីធ្លី យើងវិនិយោគពេលណាក៏ជារឿងត្រឹមត្រូវដែរ សំខាន់រកអ្នកជំនាញឱ្យជួយ។ កន្លងមកយើងមើលឃើញថា អ្នករង់ចាំទិញដីធ្លាក់ថ្លៃ ឬមានតម្លៃទាបមិនដែលទិញបាននោះទេ ព្រោះការរកស៊ីលើវិស័យនេះគឺយើងត្រូវទិញហើយរង់ចាំបន្ដិច នោះយើងនឹងទទួលបានផលចំណេញ ព្រោះមកដល់ចំណុចនេះ ដីវាពិបាកនឹងធ្លាក់ថ្លៃចុះណាស់ ដោយសារតម្រូវការមនុស្សមានជាប់ជានិច្ច៕
July 18, 2017
ដំណាច់ឆមាសទី1 ឥណទានអេស៊ីលីដាស្ថិតក្នុងសភាពទ្រឹង
ភ្នំពេញៈ ដំណាច់ឆមាសទី1 ឆ្នាំនេះ ការផ្តល់ឥណទានពីសំណាក់ធនាគារធំជាងគេទី1នៅកម្ពុជាបានស្ថិតក្នុងសភាពទ្រឹង បើធៀបនឹងរយៈពេលដូចគ្នាកាលពីឆ្នាំមុន។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអឹលស៊ីបានថ្លែងឲ្យដឹងតាមទូរស័ព្ទកាលពីព្រឹកថ្ងៃទី18 កក្កដានេះថា ការផ្តល់ឥណទានរបស់អេស៊ីលីដាឆ្នាំនេះមានកំណើនទាបជាង1ភាគរយ ធៀបរយៈពេលដូចគ្នាកាលពីឆ្នាំមុន ដែលទំហំទឹកប្រាក់បានកើនពី2,771ដល់2,793លានដុល្លារអាមេរិកប៉ុណ្ណោះ គឺស្មើនឹងកំណើន0.79ភាគរយ ធៀបរយៈពេលដូចគ្នាកាលពីឆ្នាំមុន។លោកបន្តថា ទោះជាយ៉ាងណាការទទួលប្រាក់បញ្ញើមានកំណើនល្អប្រសើរ ដោយទំហំប្រាក់បញ្ញើបានកើនពី3,051លានដុល្លារ ដល់3,253លានដុល្លារអាមេរិក កើនឡើង202លានដុល្លារ ស្មើនឹងកំណើន6.6ភាគរយធៀបរយៈពេលដូចគ្នាកាលពីឆ្នាំមុន។
លោកបន្តថា “ការផ្តល់ឥណទានមិនសូវមានភាពលូតលាស់ ដោយសារបញ្ហាកសិផលរបស់ប្រជាកសិករមានបញ្ហានៅឆ្នាំនេះ ទើបពួកគេមិនសម្រេចចិត្តខ្ចីប្រាក់ ហើយអ្នកមានប្រាក់នៅសល់បានយកប្រាក់មកទុកនៅធនាគារ ដោយសារការវិនិយោគមិនមានផលចំណេញ”។ លោកបន្តថា “ទោះជាយ៉ាងណាវិស័យដទៃទៀតក្រៅពីកសិកម្ម មិនមានបញ្ហាអ្វីនោះទេ នៅតែដំណើរការល្អជាធម្មតា”។
លោក អ៊ិន ចាន់នី បានបន្តថា ចំណែកឥណទានចំណាយទូទៅ(ដូចជាឥណទានទិញរបស់របរប្រើប្រាស់) ក៏មានសភាពទ្រឹងផងដែរ ដោយរយៈពេល6ខែឆ្នាំនេះ ការផ្តល់ឥណទានលើផ្នែកនេះមានទំហំទឹកប្រាក់58លានដុល្លារ ខណៈដំណាច់ឆ្នាំមុនទំហំឥណទានផ្នែកនេះ មានទំហំទឹកប្រាក់63លានដុល្លារអាមេរិក។ លោកបន្តថា លោករំពឹងថា ឥណទានទូទៅឆ្នាំនេះនឹងមានប្រហាក់ប្រហែលឆ្នាំមុន បើគិតរហូតដល់ដំណាច់ឆ្នាំ។
លោកបន្តថា “ការផ្តល់ឥណទានបែបនេះ មានបញ្ហាល្អ និងមិនសូវល្អសម្រាប់អតិថិជន ប្រសិនជាពួកគេទិញអ្វីមួយដើម្បីបង្កើនចំណូលជាការល្អ ប៉ុន្តែប្រសិនជាខ្ចីយកទៅទិញរបស់ប្រើប្រាស់ធម្មតាវិញ នឹងមិនបង្កើនចំណូលនោះទេ”។
ទោះជាយ៉ាងណាលោក ឆារស៍ វ៉ាន់ ប្រធានស្តីទីសមាគមធនាគារកម្ពុជាបានថ្លែងថា ការផ្តល់ឥណទានពីធនាគារនានានៅតែមានភាពល្អប្រសើរ ដោយសារការរីកចម្រើននៃសេដ្ឋកិច្ចជាតិ កំណើនប្រាក់ចំណូលរបស់ប្រជាពលរដ្ឋ អ្នកវិនិយោគបរទេសដែលមកវិនិយោគនៅកម្ពុជា ទទួលបានជោគជ័យ ដែលធ្វើឲ្យទីផ្សារក្នុងវិស័យនេះបន្តមានភាពរីកចម្រើន៕
July 18, 2017
បោះបង់ការងារក្នុងបន្ទប់ម៉ាស៊ីនត្រជាក់ មកបើកកសិដ្ឋានចិញ្ចឹមចង្រិត
ភ្នំពេញ៖ ពាក្យចាស់លោកថា «អត់លុយបានតឺនុយយោង» ដែលពាក្យនេះហាក់ឌឺដងទៅដល់អ្នកធ្វើការនៅក្នុងការិយាល័យមួយចំនួន ដែលអ្នកខ្លះបានប្រាក់ខែតិចចាយមិនដល់ខែផងក៏មានដែរ ប៉ុន្តែគ្រាន់តែថា បានតឺនុយស្អាតរាល់ថ្ងៃ។ ដោយសារតែប្រាក់ខែជាអ្នករដ្ឋបាលមានកំណត់បែបនេះ ទើបធ្វើឱ្យយុវជនម្នាក់សម្រេចចិត្តបោះបង់ការងារអង្គុយក្នុងបន្ទប់ម៉ាស៊ីនត្រជាក់ ហើយងាកមកចិញ្ចឹមចង្រិតនៅផ្ទះវិញ ព្រោះអាចរកប្រាក់ចំណូលបានខ្ពស់ជាងឆ្ងាយណាស់។
កំពុងដាក់ចំណីឱ្យសត្វចង្រិតនៅក្នុងកសិដ្ឋានមួយកន្លែងដែលមានផ្ទៃដីទំហំទទឹង6ម៉ែត្រ បណ្តោយ 15ម៉ែត្រ ស្ថិតក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ យុវជន ពុំ ប៊ុនម៉ៅ បានផ្តល់បទសម្ភាសថា ខ្លួនបានរៀបចំកសិដ្ឋានចិញ្ចឹមចង្រិតនេះរយៈពេលមួយឆ្នាំមកហើយ ដោយកាលណោះធ្វើការជាជំនូយការនៅក្នុងរោងចក្រកែវបណ្តើរ ឆ្លៀតពេលចិញ្ចឹមចង្រិតលក់បណ្តើរ ព្រោះការងារចិញ្ចឹមចង្រិតនេះមិនលំបាក និងមិនចំណាយពេលថែទាំច្រើននោះទេ។ ដោយសារតែមានមហិច្ឆតាពង្រីកកសិដ្ឋានចិញ្ចឹមចង្រិតឱ្យបានកាន់តែធំឡើងៗ យុវជនរូបនេះក៏បានសម្រេចបោះបង់ការងារជាជំនួយការរដ្ឋបាលក្នុងរោងចក្រកែវនេះតែម្តង កាលពីខែមិថុនា ឆ្នាំ2017 កន្លងទៅថ្មីៗនេះ។
ប្អូនប្រុស ប៊ុនម៉ៅ បញ្ជាក់ថា សម្រាប់កសិដ្ឋានចិញ្ចឹមចង្រិតនៅលើផ្ទៃដីតូចខាងលើនេះគាត់អាចចាក់បេតុងធ្វើជាអាងចិញ្ចឹមចង្រិតបានដល់ទៅ7អាង ដោយអាងនីមួយៗពេលប្រមូលផលម្តងបានប្រហែល100គីឡូក្រាម តិចឬច្រើនជាងនេះទៅតាមការថែទាំ ដោយក្នុងមួយគីឡូក្រាមលក់បោះដុំឱ្យម៉ូយបានតម្លៃចន្លោះពី 10,000 ទៅ 12,000រៀល ហើយបើលក់រាយមួយគីឡូក្រាមតម្លៃ 15.000រៀល តែដល់រដូវសម្បូរចង្រិតធម្មជាតិ ចង្រិតចិញ្ចឹមនឹងចុះថ្លៃមកនៅត្រឹមតែ 8.000 ទៅ 9.000 រៀលប៉ុណ្ណោះក្នុងមួយគីឡូក្រាម។
ម្ចាស់កសិដ្ឋានវ័យក្មេងខាងលើបញ្ជាក់ថា ការចិញ្ចឹមចង្រិតមិនលំបាកដូចការចិញ្ចឹមជ្រូកឬសត្វមាន់ទាផ្សេងៗនោះទេ ដំបូងឡើយគេចិញ្ចឹមចង្រិតឱ្យវាភ្ញាស់ពងនៅលើផើងមួយដែលមានដាក់ផេះអង្កាមពីលើ ពេលចង្រិតពងហើយគេយកទាំងពង និងផើងច្រកថង់ចងមាត់ឱ្យជិតដើម្បីឱ្យក្តៅភ្ញាស់ពង ហើយត្រឹមតែរយៈពេល 7ថ្ងៃប៉ុណ្ណោះ កូនចង្រិតតូចៗចាប់ផ្តើមញាស់ បន្ទាប់មកយើងស្រាយថង់ចេញយកកូនចង្រិតមកដាក់ក្នុងអាង ដោយដាក់កន្ទក់ហ្មត់ឱ្យពួកវាស៊ី និងដាក់ស្រកីដូង និងបាញ់ទឹកដាក់ ដើម្បីឱ្យចង្រិតផឹកទឹកបឺតយកសំណើមពីស្រកីដូងនោះ «ពេលដែលគេដាក់ទឹក គឹមិនដាក់ក្នុងថូ ឬផើងដូចមាន់ទេ ព្រោះអាចធ្វើឱ្យចង្រិតលង់ស្លាប់ គ្រាន់តែដាក់ស្រកីដូងផ្សើមទឹកបានហើយ ព្រោះចង្រិតវាចេះផឹកទឹកដោយបឹតពីស្រកីដូងបាន និងមិនលំបាកដាក់ទឹកច្រើនដងទៀតផង»។
ក្រោយពីចង្រិតមានអាយុ10ថ្ងៃ គេអាចដាក់ចំណីឱ្យស៊ីធម្មតាបាន ដោយរួមមានកន្ទក់ ចំណីកូនមាន់ ត្រកួនឬបន្លែផ្សេងៗ ប៉ុន្តែចៀសវាងយកបន្លែមានសារធាតុគីមីដែលទិញពីផ្សារមកឱ្យចង្រឹតស៊ី ព្រោះថា វាងាយនឹងពុលស្លាប់។ ការចិញ្ចឹមចង្រិតមិនរវល់ដូចការចិញ្ចឹមសត្វផ្សេងៗនោះទេ មួយថ្ងៃគេដាក់ចំណីឱ្យស៊ី និងទឹកឱ្យផឹកតែម្តងប៉ុណ្ណោះ បើសិនថ្ងៃណារវល់ដើរឆ្ងាយ យើងអាចដាក់ចំណីសម្រាប់ 2ថ្ងៃម្តងក៏បាន ហើយចាប់តាំងពីពេលភ្ញាស់រហូតដល់ថ្ងៃចាប់លក់គេត្រូវចំណាយពេលប្រមាណពី 40 ទៅ45 ថ្ងៃប៉ុណ្ណោះ។
យុវជនជាម្ចាស់កសិដ្ឋានខាងលើឱ្យដឹងថា ចំពោះអាងចិញ្ចឹមចង្រិត គឺត្រូវចាក់បេតុងឱ្យជិតល្អ ការពារស្រមោចឡើងស៊ីពងចង្រិត ហើយត្រូវធ្វើរោងប្រក់ស័ង្កសី ដោយត្រូវរាយសំណាញ់ព័ទ្ធជុំវិញឱ្យជិតល្អ ការពារក្រែងមានសត្វចាបឬសត្វស្លាបដទៃចូលមកស៊ីចង្រិតយើងអស់។ សម្រាប់បងប្អូនដែលមានបំណងចិញ្ចឹមចង្រិត អាចទាក់ទងទិញពូជបាន ដោយកន្លងមកកសិដ្ឋានខាងលើ ធ្លាប់បានផ្តល់ពូជទៅឱ្យអ្នកចិញ្ចឹមនៅតាមខេត្តមួយចំនួន ដូចជាខេត្តកំពង់ស្ពឺ និងខេត្តពោធិ៍សាត់ និងថែមទាំងជួយផ្តល់វិធីសាស្រ្តឱ្យពួកគាត់ចិញ្ចឹមបានជោគជ័យទៀតផង៕
July 18, 2017