Author: វល័ក្ខ

ភ្នំពេញៈ ក្រុមហ៊ុនលំនៅដ្ឋាន អឹលកម្ពុជាភ្នំពេញ គ្រោងបោះទុន10លានដុល្លារដើម្បីសាងសង់ខុនដូថ្មីមួយសម្រាប់ប្រជាជនមានជីវភាពមធ្យមស្ថិតក្នុងសង្កាត់បឹងទំពុន រាជធានីភ្នំពេញ។

លោក ទុយ ប៊ុន ម្ចាស់ភាគហ៊ុននៃក្រុមហ៊ុនលំនៅដ្ឋានអឹលកម្ពុជាភ្នំពេញបានថ្លែងឲ្យដឹងតាមទូរស័ព្ទនាព្រឹកថ្ងៃទី20 កក្កដានេះថា ខុនដូនេះនឹងសាងសង់នៅខែសីហាខាងមុខនេះ ដោយមានផ្ទះសរុបចំនួនជាង400យូនីត និងមានកម្ពស់22ជាន់ ស្ថិតនៅតាមបណ្តោយផ្លូវបេតុងចូលវត្តដំបូកខ្ពស់ចម្ងាយប្រមាណ300ម៉ែត្រ។ លោកបន្តថា ផ្ទះក្នុងគម្រោងនេះមានទំហំចាប់ពីជាង32ម៉ែត្រការ៉េ រហូតដល់ជាង60ម៉ែត្រការ៉េ និងលក់ក្នុងតម្លៃ800ដុល្លារក្នុងមួយម៉ែត្រការ៉េ។

លោកបន្តថា អគារខុនដូកម្ពស់22ជាន់នេះនឹងទុក5ជាន់សម្រាប់ចំណតយានយន្ត និងមានក្លឹបហាត់ប្រាណ ព្រមទាំងSky Barផងដែរ ដើម្បីបម្រើដល់ការកម្សាន្ត និងសុខមាលភាពរបស់អ្នករស់នៅលើអគារនេះ។ លោកបន្តថា អគារនេះសាងសង់នៅលើផ្ទៃដីជាង2,000ម៉ែត្រការ៉េ និងគ្រោងបញ្ចប់ការសាងសង់រយៈពេល2ឆ្នាំកន្លះខាងមុខនេះ។

យោងតាមការសិក្សារបស់ក្រុមហ៊ុន CBRE Cambodia បានរកឃើញថា គិតរហូតដល់ដំណាច់ឆ្នាំនេះ ខុនដូចំនួន7,000យូនីតទៀតនឹងដាក់ចូលទីផ្សារ ខណៈខុនដូចំនួន5,000យូនីតបាន និងកំពុងប្រើប្រាស់នៅលើទីផ្សាររួចហើយ។

អ្នកនាង អាន សុធីតា នាយិកាក្រុមហ៊ុនCBRE CAMBODIAបានថ្លែងថា ទីផ្សារខុនដូបច្ចុប្បន្ននៅតែដំណើរការលក់បានជាធម្មតា ប៉ុន្តែខុនដូដែលផ្តោតលើប្រជាជនមានជីវភាពមធ្យមមានទីផ្សារល្អជាងខុនដូដែលមានតម្លៃខ្ពស់៕

ភ្នំពេញ៖ ក្នុងជំនួបពិភាក្សាការងារជំនួញជាមួយឯកឧត្តម វេង សាខុន រដ្ឋមន្រ្តីក្រសួងកសិកម្មកម្ពុជាកាលពីថ្ងៃទី18 ខែកក្កដានេះ ឯកឧត្តម Beketzhan Zhumakhanov ឯកអគ្គរដ្ឋទូតនៃសាធារណរដ្ឋកាហ្សាក់ស្ថានប្រចាំនៅកម្ពុជា ឡាវ និងវៀតណាមបានបញ្ជាក់ថា ប្រទេសកាហ្សាក់ស្ថានមានបំណងទិញផ្លែស្វាយ និងដំណាំកសិកម្មដទៃមួយចំនួនទៀតដើម្បីយកទៅលក់បន្តនៅទីផ្សារសហគមន៍អឺរ៉ុប។

ឯកឧត្តមឯកអគ្គរដ្ឋទូតមានប្រសាសន៍ថា គោលបំណងនៃជំនួបរបស់លោក និងគណប្រតិភូនាពេលនេះ គឺដើម្បីពិភាក្សាលើការផ្លាស់ប្តូរជំនួញរវាងប្រទេសទាំងពីរលើវិស័យកសិកម្ម ព្រមទាំងស្នើសុំការណែនាំពីបែបបទ និងនីតិវិធីក្នុងការនាំចូល និងនាំចេញទំនិញរវាងប្រទេសទាំងពីរ។ ក្រៅពីនេះឯកឧត្តមឯកអគ្គរដ្ឋទូតក៏ចង់ស្វែងយល់ពីការស្នើសុំវិញ្ញាបនបត្រក្នុងការនាំចូលសាច់សត្វ និងមានបំណងនាំចេញផ្លែស្វាយ និងដំណាំផ្សេងទៀតពីកម្ពុជា ហើយទស្សនកិច្ចលើកនេះ លោកក៏មានបំណងពិនិត្យមើលនូវលទ្ធភាពនៃការសហការដៃគូជាមួយសហគ្រិនមួយចំនួនផងដែរ។

ឆ្លៀតក្នុងឱកាសនេះ ឯកឧត្តមឯកអគ្គរដ្ឋទូតក៏បានបង្ហាញពីមធ្យោបាយក្នុងការដឹកជញ្ជូនទំនិញរវាងប្រទេសទាំងពីរ ដោយប្រើប្រាស់រយៈពេលត្រឹមតែ14ថ្ងៃប៉ុណ្ណោះ ដោយត្រូវឆ្លងកាត់កំពង់ផែប្រទេសចិន ហើយក៏អាចប្រើប្រាស់កំពង់ផែនោះធ្វើការនាំផលិតផលនានាចេញទៅកាន់ទីផ្សារប្រទេសអឺរ៉ុបផងដែរ។

ជាការឆ្លើយតបឯកឧត្តមរដ្ឋមន្រ្តី វេង សាខុន បានថ្លែងស្វាគមន៏ចំពោះការចាប់ដៃគូសហការ និងផ្លាស់ប្តូរពាណិជ្ជកម្មរវាងប្រទេសទាំងពីរ។ ឯកឧត្តមរដ្ឋមន្រ្តីក៏បានបញ្ជាក់អំពីកសិផលដែលមានសក្តានុពលនាំចេញដែលរួមមានដូចជា ផ្លែស្វាយ និងម្រេច ដែលបច្ចុប្បន្នកំពុងប្រកាសរកទីផ្សារនាំចេញ។ ចំពោះបែបបទក្នុងការនាំចេញ-ចូល ឯកឧត្តមរដ្ឋមន្រ្តីបានស្នើឱ្យភាគីកាហ្សាក់ស្ថានបញ្ជូនមន្រ្តីជំនាញមកពិភាក្សាលម្អិតជាមួយមន្រ្តីជំនាញក្រសួងកសិកម្ម រុក្ខាប្រមាញ់ និងនេសាទអំពីបែបបទ និងនីតិវិធីក្នុងការនាំចេញ-ចូល និងពិនិត្យមើលនូវលក្ខខណ្ឌអនាម័យ និងភូតគាមអនាម័យ។

ជាមួយគ្នានេះដែរឯកឧត្តមរដ្ឋមន្រ្តីបានស្នើឱ្យឯកឧត្តមឯកអគ្គរដ្ឋទូតពិចារណាក្នុងការគាំទ្រដល់ការពង្រីកកំពង់ផែសមុទ្រ និងទឹកសាបនៅកម្ពុជាដើម្បីឈានទៅប្រកួតប្រជែងតម្លៃនៃការនាំចេញ និងបង្កើនល្បឿនទំហំពាណិជ្ជកម្មរវាងប្រទេសទាំងពីរ៕

ភ្នំពេញ៖ ទោះបីសេដ្ឋកិច្ចពិភពលោកកំពុងស្ថិតក្នុងភាពមិនប្រាកដប្រជាជាច្រើន ដែលរួមមានទាំងហានិភ័យ និងបញ្ហាប្រឈមទាំងក្នុងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ ក៏សេដ្ឋកិច្ចកម្ពុជានៅតែអាចបន្តកំណើនខ្ពស់ និងរឹងមាំក្នុងរយៈពេលខ្លី និងមធ្យមនាពេលខាងមុខនេះដែរ។

ជាមួយនឹងសមិទ្ធផលនេះ ធនាគារអភិវឌ្ឍន៍អាស៊ីបានចាត់ទុកប្រទេសកម្ពុជា ជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចលឿនបំផុតនៅតំបន់អាស៊ី ហើយបានប្រសិទ្ធនាមប្រទេសកម្ពុជាថាជា “ខ្លាសេដ្ឋកិច្ចថ្មីនៅអាស៊ី” ទៀតផង។ ដោយក្នុងឆ្នាំ 2016 កន្លងទៅ កម្ពុជារក្សាបាននូវកំណើនសេដ្ឋកិច្ចក្នុងអត្រា 7.0% ដោយសារការងើបឡើងវិញនៃកំណើនក្នុងវិស័យកសិកម្ម បន្ទាប់ពីស្ទើរតែគ្មានកំណើនសោះក្នុងរយៈពេលបីឆ្នាំចុងក្រោយនេះ ខណៈដែលកំណើនវិស័យឧស្សាហកម្ម និងសេវាកម្មមានភាពថមថយបន្តិច។ ការថមថយនៃកំណើនក្នុងវិស័យឧស្សាហកម្ម និងសេវាកម្មនេះ បានបង្ហាញពីភាពចាំបាច់ និងបន្ទាន់នៃការអនុវត្តវិធានការគោលនយោបាយកែទម្រង់រចនាសម្ព័ន្ធសេដ្ឋកិច្ច និងការធ្វើពិពិធកម្មក្នុងគោលដៅស្វែងរកចន្ទល់ថ្មីៗដែលមានតម្លៃបន្ថែមខ្ពស់ដល់សេដ្ឋកិច្ច ដើម្បីបន្តធានាចីរភាពនៃកំណើនក្នុងរយៈពេលមធ្យម និងវែង។

យោងតាមទិន្នន័យស្ថិតិផ្លូវការដើមឆ្នាំ 2017 របស់ក្រសួង-ស្ថាប័នពាក់ព័ន្ធ សេដ្ឋកិច្ចកម្ពុជាក្នុងឆ្នាំ2017 ត្រូវបានប៉ាន់ប្រមាណថា នឹងរក្សាបានកំណើនក្នុងរង្វង់ 7,0%។ ក្នុងនោះវិស័យឧស្សាហកម្មនឹងនៅតែមានកំណើនរឹងមាំក្នុងអត្រាពីរខ្ទង់ដដែល ពោលគឺប្រមាណ 10,7% ដែលនឹងបន្តដើរតួនាទីជាក្បាលម៉ាស៊ីនជំរុញកំណើនសេដ្ឋកិច្ចទីមួយដឹកមុខដោយវិស័យកាត់ដេរ និងការរីកធំធាត់នៃវិស័យមិនមែនកាត់ដេរ បើទោះបីជាវិស័យសំណង់មានការថមថយបន្តិចក្តី។ វិស័យកសិកម្មអាចនឹងមានកំណើនល្អ ពោលគឺក្នុងអត្រា 2,0% បើប្រៀបធៀបនឹងឆ្នាំ 2016 ក្នុងអត្រា 1,8% ដោយសារកត្តាអាកាសធាតុដែលមានស្ថានភាពល្អប្រសើរជាងឆ្នាំមុន និងការងើបឡើងវិញនៃតម្លៃទំនិញ ខណៈដែលវិស័យសេវាកម្មអាចនឹងមានកំណើនយឺតជាងឆ្នាំមុនជាមួយនឹងអត្រាកំណើន 6,5% ដោយសារការបន្តថមថយនៃវិស័យទេសចរណ៍ និងអចលនទ្រព្យ។

ជាមួយនឹងកំណើនរឹងមាំក្នុងឆ្នាំ 2017 នេះ ផ.ស.ស ថ្លៃបច្ចុប្បន្នត្រូវបានប៉ាន់ប្រមាណថា នឹងកើនឡើងដល់ 22. 2 ប៊ីលានដុល្លារអាមេរិក ដែលធ្វើឱ្យ ផ.ស.ស សម្រាប់មនុស្សម្នាក់អាចនឹងកើនឡើងដល់ 1,434 ដុល្លារអាមេរិក។ លើសពីនេះ កម្ពុជាអាចរក្សាបាននូវអតិផរណា ដែលស្ថិតក្នុងកម្រិតទាប និងអាចគ្រប់គ្រងបាន ដោយអតិផរណាជាមធ្យមប្រចាំឆ្នាំត្រូវបានប៉ាន់ស្មានថា នឹងមានអត្រា 3,8% ក្នុងឆ្នាំ 2017 កើនពី 3,0% ក្នុងឆ្នាំ 2016 ដោយសារនិន្នាការកើនឡើងនៃតម្លៃប្រេងក្នុងទីផ្សារអន្តរជាតិ និងតម្លៃម្ហូបអាហារក្នុងស្រុក។ ជាមួយគ្នានេះដែរ អត្រាប្តូរប្រាក់នៅបន្តមានស្ថិរភាពជាមួយនឹងការរំពឹងទុកថា ប្រាក់រៀលនឹងនៅបន្តរក្សាបាននូវតម្លៃប្រមាណ 4,037 រៀលក្នុង 1ដុល្លារអាមេរិកនៅក្នុងឆ្នាំ 2017 នេះ៕

ភ្នំពេញ៖ ក្រសួងពាណិជ្ជកម្មកាលពីម្សិលមិញបានចេញគោលការណ៍ថ្មីមួយដោយហាមមន្រ្តីកាំក្រុងត្រូល និងមន្រ្តីគយនៅតាមច្រកព្រំដែនយកកម្រៃសេវាពីការនាំចេញកសិផលពោត ដើម្បីជាការសម្រួលកុំឱ្យតម្លៃពោតធ្លាក់ចុះ។

ការដាក់ចេញគោលការណ៏ថ្មីនេះ គឺជាការឆ្លើយតបនឹងការតវ៉ារបស់ប្រជាពលរដ្ឋជុំវិញការធ្លាក់ចុះតម្លៃពោតក្រហមពី 440រៀលមកត្រឹម 360រៀលក្នុងឆ្នាំ2017 នៅក្នុងស្រុកកំរៀង និងស្រុកភ្នំព្រឹក នៃខេត្តបាត់ដំបងកាលពីពេលថ្មីៗនេះ។

ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មបានមានប្រសាសន៍ក្នុងកិច្ចប្រជុំកាលពីរសៀលម្សិលមិញនេះ ដោយបានដាក់ចេញនូវគោលការណ៍មួយចំនួនគឺ៖
1. ភ្នាក់ងារគយនិងកាំកុងត្រូលត្រូវបញ្ឈប់ការយកកម្រៃលើការនាំចេញកសិផលពោតចាប់ពីថ្ងៃនេះតទៅ។ 2.ក្រសួងពាណិជ្ជកម្មនឹងចងក្រងរបាយការណ៍ដើម្បីស្នើសុំទៅប្រមុខរាជរដ្ឋាភិបាលនិងស្ថាប័នពាក់ព័ន្ធ ធ្វើការកាត់បន្ថយការបង់ប្រាក់ចំណាយក្រៅផ្លូវការឱ្យបាន100%។
3.ធនាគារអភិវឌ្ឍន៍ជនបទនឹងបើកចំហ និងត្រៀមខ្លួនដើម្បីធ្វើការជាមួយម្ចាស់សៃឡូដែលត្រូវការខ្ចីប្រាក់ដើម្បីទិញកសិផលពោត ឬធ្វើឡសម្ងួត និងពង្រីកឃ្លាំងស្តុកកសិផលជាដើម។ បច្ចុប្បន្នធនាគារពិភពលោកមានគោលការណ៍ប្រើប្រាស់ឥណទានរបស់ខ្លួនដែលមានទឹកប្រាក់សរុប27លានដុល្លារអាមេរិកជាមួយអត្រាការប្រាក់ពីចន្លោះ5% ទៅ7%ក្នុងមួយឆ្នាំ សម្រាប់វិស័យឯកជនជាមួយលក្ខណ្ឌការងារ។
4. ក្រុមហ៊ុនផលិតចំណីសត្វ CP នឹងប្រមូលទិញកសិផលពោតទៅតាមស្តង់ដារឱ្យបានល្អប្រសើរជាងមុន។
5.ក្រសួងសេដ្ឋកិច្ច និងហិរញ្ញវត្ថុនឹងសិក្សាបន្ថែមលើលទ្ធភាពបន្ធូរបន្ថយពន្ធលើប្រាក់ចំណេញសម្រាប់ទំនិញប្រភេទកសិផល។
6. អគ្គនាយកពាណិជ្ជកម្មក្រៅប្រទេស វិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ នាយកដ្ឋានអភិវឌ្ឍន៍ជនបទនៃក្រសួងពាណិជ្ជកម្មនឹងធ្វើការសិក្សាបន្ថែមលើការអនុវត្តយន្តការកិច្ចសន្យាកសិកម្ម (Contract Farming) រវាងក្រុមហ៊ុនផលិតចំណីសត្វ និងកសិករដាំពោត ដើម្បីធានាបានស្ថេរភាពតម្លៃទីផ្សារក្នុងស្រុក និងការផ្គត់ផ្គង់។

ក្នុងឱកាសនោះដែរ ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ មានប្រសាសន៍ថា បច្ចុប្បន្នយើងមានថវិកាបម្រុងក្នុងដៃប្រមាណជា 27លានដុល្លារអាមេរិកដែលអាចប្រើប្រាស់បានលើការផ្តល់កម្ចីសម្រាប់កសិផលពោតជាបណ្តោះអាសន្នសិន ហើយនឹងមានបន្ថែមទៀតដែលអាចកើនដល់ប្រមាណជា 50លានដុល្លារ។

សូមបញ្ជាក់ថា តាមរបាយការណ៍ក្រសួងពាណិជ្ជកម្មបានឱ្យដឹងថា កាលពីឆ្នាំ2016កន្លងទៅ តម្រូវការនាំចេញពោតពីប្រទេសកម្ពុជាទៅកាន់ទីផ្សារពិភពលោកមានប្រមាណ10ម៉ឺនតោន ដែលមានតម្លៃស្មើនឹង 14លានដុល្លារអាមេរិក៕

ខណៈមានតារាសម្ដែងជាច្រើនទាំងថ្មីទាំងចាស់កំពុងតែសម្រុកទទួលយកការសម្ដែងភាពយន្ដជាបន្ដបន្ទាប់នោះ ផ្ទុយទៅវិញកញ្ញា អ៊ុន អាលីហ្សា ជាតារាសម្ដែងមានបទពិសោធ និងទេពកោសល្យខ្ពស់ហាក់ដូចជាឃ្វាងគ្នាជាមួយការងារទាំងនេះ ពោលគឺនាងពុំសូវជាស្វះស្វែងជាមួយការសម្ដែងដូចមុនឡើយ។

កញ្ញា អ៊ុន អាលីហ្សា បញ្ជាក់ថា ថ្មីៗនេះនាងក៏ទទួលបានការសម្ដែងខ្លះដែរ មិនមែនកាត់ផ្ដាច់ទាំងស្រុងទេ។ នាងបន្ដថា កន្លងមកមានផលិតកម្មជាច្រើនបានទាក់ទងនាងឱ្យសម្ដែងទាំងរឿងភាគ និងរឿងដុំ តែរូបនាងពុំសូវហ៊ានទទួលយកការងារច្រើនពេកទេព្រោះនាងខ្លាចធ្វើការងារឱ្យគេពុំបានល្អ ពុំទាន់ពេលវេលាបណ្ដាលឱ្យប៉ះពាល់ដល់កេរ្ដិ៍ឈ្មោះនាងដែលខំសាងមកយូរហើយ។ តើកញ្ញាអ៊ុន អាលីហ្សា ជាប់រវល់ការងារអ្វីទើបនាងសុខចិត្ដបដិសេធលុយនៅហ្នឹងមុខបែបនេះ?

តារាសម្ដែងរូបនេះបានបញ្ជាក់ថា បច្ចុប្បន្ននាងកំពុងតែរវល់ជាមួយការងារខាងក្រៅច្រើន ហើយវាក៏ជាលក្ខណៈសិល្បៈដែរ តាមរយៈការច្រៀងពេលយប់នៅកន្លែងកម្សាន្ដចំនួន3 មាន Town Club, M2 និង Stone Café ពិសេសច្រៀងតាមកម្មវិធីមង្គលការ ព្រមទាំងកម្មវិធីនានា។ នាងបញ្ជាក់ថា៖ «ក្រៅពីធ្វើការងារទាំងនេះហើយ បច្ចុប្បន្នខ្ញុំជានិស្សិតផ្នែកយោធាដែលខ្ញុំត្រូវចំណាយពេលហ្វឹកហ្វឺននៅក្នុងសាលារយៈពេល6ខែ អ៊ីចឹងក្នុងរយៈពេលនេះខ្ញុំពុំអាចសម្ដែងបានទេ»។

កញ្ញា អ៊ុន អាលីហ្សា បញ្ជាក់ថា មូលហេតុដែលធ្វើឱ្យនាងមានចំណូលចិត្ដចង់ធ្វើជាយោធាព្រោះនាងចង់ចូលរួមក្នុងការងារសង្គម។ ម្យ៉ាងនាងបានសម្លឹងទៅមើលប្រទេសជិតខាង ពិសេសលើពិភពលោកតែម្តងមានស្ដ្រីជាច្រើនបានចូលរួមបម្រើក្នុងការងារកងទ័ព ភាគច្រើនជាស្រ្ដីស្អាត។ នាងបញ្ជាក់ថា៖ «នៅស្រុកខ្មែរយើងអត់សូវមានស្រ្ដីចង់ចូលបម្រើការងារយោធាទេ ដូច្នេះក្នុងនាមខ្ញុំជាអ្នកសិល្បៈខ្ញុំក៏ចង់ចូលរួមការពារប្រទេសជាតិដែរ»។

កញ្ញា អ៊ុន អាលីហ្សា ក៏បានបង្ហាញពីគោលជំហរថា មុនពេលសម្រេចចិត្ដចូលហ្វឹកហ្វឺនផ្នែកយោធា នាងបានតាំងចិត្ដជាស្រេចហើយ ដូច្នេះរាល់ការលំបាក និងឧបសគ្គនានា នាងត្រូវតែជម្នះធ្វើឱ្យបាន។

នាងបន្ថែមថា៖ «ការងារនេះប្រសិនបើយើងចេះតែធ្វើទៅ ក៏វាល្អដែរ ព្រោះខ្ញុំជាស្រ្ដីពេលខ្លះចំណេះជំនាញទាំងនេះក៏អាចការពារខ្លួនបានទៀតផង។ ម្យ៉ាងខ្ញុំមានក្ដីស្រមៃមួយថា នៅពេលដែលមានគណៈប្រតិភូអន្ដរជាតិមកកាន់ស្រុកខ្មែរ គឺចង់ឱ្យពួកគាត់មើលឃើញថា កម្ពុជាក៏មានស្រី្ដស្អាតធ្វើជាយោធាច្រើនដែរ»។ ទោះយ៉ាងណានាងបញ្ជាក់ថា ការងារទាំងនេះកើតចេញពីឆន្ទៈរបស់នាង មិនមែនជាការផ្ដល់យោបល់ ឬជំរុញពីគ្រួសាររបស់នាងឡើយ៕

ភ្នំពេញ – រដ្ឋមន្រ្ដី 3 រូបមកពីក្រសួងទេសចរណ៍ ក្រសួងកសិកម្ម រុក្ខប្រមាញ់ និងនេសាទ និងក្រសួងបរិស្ថានគ្រោងនឹងដាក់សំណើរួមមួយជូនទៅសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា សុំបង្កើតគណៈកម្មការអន្តរក្រសួងមួយដើម្បីជំរុញការងារគ្រប់គ្រង និងអភិវឌ្ឍន៍សហគមន៍ទេសចរណ៍។

ឯកឧត្ដម ថោង ខុន រដ្ឋមន្រ្ដីក្រសួងទេសចរណ៍បញ្ជាក់ថា ក្រសួងទាំងបីបានឯកភាពគ្នាដាក់ចេញយុទ្ធសាស្រ្តមួយចំនួន ដើម្បីជំរុញការគ្រប់គ្រង និងអភិវឌ្ឍន៍សហគមន៍ទេសចរណ៍ ប៉ុន្តែកិច្ចការងារអាចធ្វើទៅបានលុះត្រាតែមានគណៈកម្មការអន្តរក្រសួងមួយដែលបង្កើតឡើងដោយរាជរដ្ឋាភិបាលជាមុនសិន។ ឯកឧត្ដមបន្ដថា គោលបំណងនៃការរៀបចំការងារនេះគឺធ្វើយ៉ាងណាដើម្បីជួយដល់សហគមន៍ដែលបច្ចុប្បន្នមានសហគមន៍មួយចំនួនមានការគ្រប់គ្រង និងអភិវឌ្ឍបានល្អហើយ ប៉ុន្ដែសហគមន៍មួយចំនួនទៀតនៅមិនទាន់មានការគ្រប់គ្រងបានល្អនៅឡើយទេ។

ដូច្នេះដើម្បីទទួលបានការអភិវឌ្ឍប្រកបដោយនិរន្ដរភាពត្រូវតែមានការគ្រប់គ្រងល្អ គឺការបែងចែកផលប្រយោជន៍ក្នុងសហគមន៍ប្រកបដោយសមធម៌។ ក្នុងនោះយើងត្រូវមានការពង្រឹងចាប់ពីគុណភាពសេវា ដូចជាបញ្ហាផ្ទះស្នាក់នៅ ផ្ទះសំណាក់ សេវាស្នាក់នៅ សេវាដឹកជញ្ជូន សេវាមគ្គុទេសក៍ និងសេវាម្ហូបអាហារ ជាដើម ដែលត្រូវតែឆ្លងកាត់ការបណ្ដុះបណ្ដាលដើម្បីយកទៅបម្រើដល់សហគមន៍។

គម្រោងនេះត្រូវបានលើកឡើងក្នុងឱកាសកិច្ចប្រជុំបូកសរុបស្ដីពីការងារគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍នៅទីស្នាក់ការគណៈកម្មាធិការជាតិអូឡាំពិកកម្ពុជា។ គម្រោងនេះត្រូវធ្វើឡើងដើម្បីសំដៅប្រែក្លាយតំបន់សហគមន៍ទាំងជាង2ពាន់កន្លែង នៅទូទាំងប្រទេសកម្ពុជាអាចទាក់ទាញភ្ញៀវទេសចរឲ្យមកទស្សនាដើម្បីបង្កើនចំណូលជូនប្រជាពលរដ្ឋមូលដ្ឋាន។

ឯកឧត្ដម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឯកភាពជំរុញឱ្យមានការរៀបចំបង្កើតក្រុមការងារថ្នាក់ជាតិអន្ដរក្រសួងមួយដើម្បីត្រូតពិនិត្យរួមគ្នាតាមរយៈការចុះពិនិត្យដល់ទីតាំងសហគមន៍ជាក់ស្ដែងថា តើសហគមន៍ណាមានសក្ដានុពលអ្វី ហើយក្រុមការងារត្រូវដាក់ឈ្មោះសហគមន៍នោះឈ្មោះអ្វី? ពោលគឺត្រូវធ្វើទៅតាមស្ថានភាពជាក់ស្ដែង ឬមួយក្រសួងកសិកមុ្មសង្កេតឃើញថា តំបន់នោះអាចដាក់បញ្ចូលអេកូទេសចរណ៍បាន យើងនឹងកោះប្រជុំដើម្បីដាក់បញ្ចូលតែម្ដង។

ជាមួយគ្នាដែរ ឯកឧត្ដមសាយ សំអាល់ រដ្ឋមន្រ្តីក្រសួងបរិស្ថាន បានលើកឡើងដោយចាត់ទុកថា ការបង្កើតគណៈកម្មការអន្តរក្រសួងដើម្បីជំរុញការងារគ្រប់គ្រង និងអភិវឌ្ឍន៍សហគមន៍ទេសចរណ៍ ជាឱកាសល្អមួយដែលអាចប្រែក្លាយអេកូទេសចរណ៍ទៅជាខឿនសេដ្ឋកិច្ចមួយក្នុងចំណោមខឿនសេដ្ឋកិច្ចជាតិដទៃទៀតផងដែរ។

គួរបញ្ជាក់ថា បច្ចុប្បន្នកម្ពុជាមានសហគមន៍ទូទៅប្រមាណជាង 2,000សហគមន៍ (ការពារព្រៃឈើ សត្វព្រៃ សត្វស្លាប នេសាទ ទេសចរណ៍ជាដើម) ក្នុងនោះមានសហគមន៍ទេសចរណ៍ចំនួន 56 នៅក្នុងខេត្តចំនួន16៕