Author: វល័ក្ខ

  • សាស្ត្រាចារ្យ សំអាង សម៖ យុវជនបានដើរតួនាទីសំខាន់ក្នុងកិច្ចអភិវឌ្ឍសហគមន៍វប្បធម៌

    សាស្ត្រាចារ្យ សំអាង សម៖ យុវជនបានដើរតួនាទីសំខាន់ក្នុងកិច្ចអភិវឌ្ឍសហគមន៍វប្បធម៌

    យុវជនជាអ្នកបន្តវេនលើគ្រប់វិស័យក្នុងសង្គមហើយស្ថានភាពយុជននាពេលបច្ចុប្បន្នបានឆ្លុះបញ្ចាំងពីអនាគតរបស់សង្គមទាំងមូល។

    លោកសាស្ត្រាចារ្យសំអាង សមព្រឹទ្ធបុរសនៃមហាវិទ្យាល័យសិល្បៈអក្សរសាស្ត្រ និងមនុស្សសាស្ត្រនៃសាកលវិទ្យាល័យបញ្ញាសាស្ត្រកម្ពុជាបានថ្លែងនៅក្នុងសិក្ខាសាលាស្តីពីកីឡាស្នេហា និងការអប់រំនៅសតវត្សរ៍ទី21ថា យុវជននាពេលបច្ចុប្បន្នបានដើរតួនាទីយ៉ាងសំខាន់ក្នុងកិច្ចអភិវឌ្ឍសហគមន៍វប្បធម៌ជាពិសេសតួនាទី និងកាតព្វកិច្ចរបស់យុវជនខ្មែរក្នុងការជំរុញលើវិស័យកីឡាការងារស្ម័គ្រចិត្តការស្វែងយល់ពីសុភមង្គលគ្រួសារ និងការអភិវឌ្ឍខ្លួនការកសាងឧត្តមភាពសេចក្តីថ្លៃថ្នូរនៅក្នុងសង្គម និងការផ្សព្វផ្សាយបន្តឱ្យបានទូលំទូលាយទៅកាន់យុវវ័យដទៃទៀតដើម្បីបង្កើនគុណភាពធនធានមនុស្សនៅកម្ពុជា។

    លោកសាស្ត្រាចារ្យ សំអាង សម បានមានប្រសាសន៍ថា៖ «ជាមោទនភាពរបស់យើងដែលយើងឃើញថាយុវជនខ្មែរមានភាពទទួលខុសត្រូវខ្ពស់ដោយយុវវ័យដឹកនាំយុវវ័យខ្លួនឯងយុវវ័យដោះស្រាយបញ្ហាយុវវ័យដោយខ្លួនឯងយុវវ័យបង្រៀនយុវវ័យគ្នាឯង និងយុវវ័យចូលរួមយ៉ាងសកម្មជាចំណែកមួយក្នុងការអភិវឌ្ឍសង្គម»។

    លោកសាស្ត្រាចារ្យបានបន្ថែមទៀតថា ការងារសំខាន់ និងមានន័យដែលយុវវ័យបានធ្វើនាពេលបច្ចុប្បន្ននេះជាសក្ខីភាពគួរឱ្យកត់សម្គាល់ និងសរសើរដែលយុវជនយុវនារីមានគំរូល្អធ្វើជាមគ្គុទេសក៍ក្នុងការចូលរួមអភិវឌ្ឍសង្គមវប្បធម៌ជាតិឱ្យរីកច្រើនទៅអនាគតប្រកបដោយឆន្ទៈនិងសមត្ថភាពខ្ពស់។

    ចំណុចនេះបង្ហាញថា យុវវ័យជំរុញកម្លាំងចិត្តពង្រឹងសមត្ថភាព និងបទពិសោធបង្កើតបណ្តាញស្ម័គ្រចិត្តជួយឈឺឆ្អាលដល់អ្នកដទៃស្គាល់តួនាទីរបស់ខ្លួន និងកាតព្វកិច្ចរបស់ខ្លួនលើសពីការគិតពីប្រយោជន៍ផ្ទាល់ខ្លួនដោយគិតពីប្រយោជន៍នៃការកសាងធនធានមនុស្សប្រកបដោយការបំផុសគំនិតដល់អ្នកឯទៀតជំរុញទឹកចិត្តដាស់តឿនដាស់ស្មារតីជាពិសេសយុវជនយុវនារីខ្មែរឱ្យចាប់អារម្មណ៍និងយកចិត្តទុកដាក់ចំពោះការសិក្សារៀនសូត្រ និងកិច្ចការរបស់សហគមន៍យើងផងដែរ។

    ជាបណ្តាំផ្ញើលោកសាស្ត្រាចារ្យសំអាង សមបានមានប្រសាសន៍ថា យុវជនយុវនារីខ្មែរត្រូវមានសតិសម្បជញ្ញៈស្មារតីថែរក្សាបន្តវេនជាទំពាំងស្នងឫស្សីខិតខំសិក្សារៀនសូត្រពីវប្បធម៌អរិយធម៌ជាតិរបស់ខ្លួនដើម្បីឱ្យយល់កាន់់តែច្បាស់អំពីតម្លៃសារៈសំខាន់ភាពសម្បូរបែបនៃសម្បត្តិបេតិកភណ្ឌរបស់ជាតិដែលមានបង្កប់នូវអត្តសញ្ញាណជាតិដ៏រឹងមាំក្នុងការចូលរួមអភិវឌ្ឍសង្គម។ យុវវ័យជាកតាលិករយ៉ាងសំខាន់បំផុតដើម្បីការផ្លាស់ប្តូរ និងប្រកាន់ខ្ជាប់នៅក្នុងខ្លួនឱ្យមានវិន័យក្នុងគំនិតការតស៊ូស្វិតស្វាញហើយ និងសេចក្តីព្យាយាមដើម្បីឆ្ពោះទៅរកឧត្តមភាពនៃជីវិត៕

  • រដ្ឋមន្ត្រីក្រសួងកិច្ចការនារីថា អ្នកប្រព្រឹត្តអំពើហិង្សាសាហាវ ភាគច្រើនជាអ្នកទទួលការអប់រំទាប

    រដ្ឋមន្ត្រីក្រសួងកិច្ចការនារីថា អ្នកប្រព្រឹត្តអំពើហិង្សាសាហាវ ភាគច្រើនជាអ្នកទទួលការអប់រំទាប

    អំពើហិង្សាជារឿងរសើបមួយក្នុងសង្គមកម្ពុជា ហើយតាមការស្រាវជ្រាវបានរកឃើញថា អំពើហិង្សាក្នុងគ្រួសារភាគច្រើនតែងតែកើតមានលើស្ត្រី។

    នៅក្នុងពិធីចុះហត្ថលេខាលើប្រកាសរួមស្តីពីក្របប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានពីអំពើហិង្សាស្ត្រី លោកជំទាវ អ៊ឹង គន្ថាផាវី បានលើកឡើងថា ដើម្បីទប់ស្កាត់អំពើហិង្សា គឺត្រូវការឱ្យមានការចូលរួមពីគ្រប់សមាសភាព រួមទាំងប្រព័ន្ធផ្សព្វផ្សាយព័ត៌មានទៀតផងដើម្បីអប់រំដល់សង្គម។  លោកជំទាវរដ្ឋមន្ត្រី បានមានប្រសាសន៍ថា៖ «អ្នកដែលប្រព្រឹត្តអំពើហិង្សាសាហាវ ច្រើនតែជាអ្នកដែលមិនទទួលបានការអប់រំខ្ពស់»។

    បន្ថែមពីលើនេះផងដែរ លោកជំទាវបានបញ្ជាក់ថា ការរាយការណ៍ព័ត៌មានកន្លងរបស់អ្នករាយការណ៍ព័ត៌មានមួយចំនួនពាក់ព័ន្ធនឹងការប្រើអំពើហិង្សាចំពោះស្ត្រីនៅមានភាពអវិជ្ជមានទាក់ទងទៅនឹងអំពើហិង្សាលើស្ត្រី ជាពិសេសកង្វះការចូលរួមអប់រំសីលធម៌ក្នុងសង្គម។ លោកជំទាវបានស្នើសុំឱ្យមានការរួមគ្នាលុបបំបាត់វប្បធម៌ហិង្សា និងបង្កើតសីលធម៌ល្អទុកឱ្យអ្នកជំនាន់ក្រោយរក្សាបន្តពីយើងទាំងអស់គ្នា៕

  • រាជរដ្ឋាភិបាលកម្ពុជា ស្នើភាគីថៃជួយគាំពារ និងសង្រ្គោះពលករដែលត្រូវគេជួញដូរ

    រាជរដ្ឋាភិបាលកម្ពុជា ស្នើភាគីថៃជួយគាំពារ និងសង្រ្គោះពលករដែលត្រូវគេជួញដូរ

    ភ្នំពេញៈ មន្រ្តីជាន់ខ្ពស់ក្រសួងការងារបានស្នើសុំភាគីថៃជួយផ្តល់សេវាគាំពារ និងសង្រ្គោះពលករកម្ពុជាដែលត្រូវបានគេជួញដូរទៅកាន់ប្រទេសថៃ។

    ក្នុងជំនួបជាមួយលោក អាឌុល សែងស៊ីកែវ រដ្ឋមន្ត្រីក្រសួងអភិវឌ្ឍន៍សង្គមថៃកាលពីថ្ងៃម្សិលមិញ លោកអ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានស្នើទៅកាន់ភាគីថៃលើចំណុចមិនប្រក្រតីមួយចំនួនផងដែរ ក្នុងនោះគឺរឿងពលករដែលត្រូវបាននាំចូលទៅធ្វើការនៅប្រទេសថៃខុសច្បាប់ គឺជាជនរងគ្រោះដែលត្រូវបានគេជួញដូរដែលគួរតែមានការគាំពារ ជួយសង្រ្គោះ និងផ្តល់សេវា។ នេះជាចំណុចដែលភាគីទាំងពីរគួរនាំគ្នាដោះស្រាយ។ មួយវិញទៀត រដ្ឋមន្រ្តីក្រសួងការងារកម្ពុជាក៏បានលើកឡើងពីប្រពន្ធ និងកូនដែលទៅជាមួយពលករខ្មែរយើងនោះផងដែរ ដែលគួរតែមានការគាំពារ ផ្តល់សេវាកម្មផ្សេងៗ អប់រំ និងសេវាសុខាភិបាលដល់ពួកគេ។

    លោករដ្ឋមន្រ្តីក្រសួងការងារក៏បានលើកពីគម្រោងដែលចង់ឲ្យភាគីថៃបង្កើតឱ្យមានជាមជ្ឈមណ្ឌលគាំពារពលករមួយសម្រាប់ទទួលយកពលករដែលជាជនរងគ្រោះដោយការជួញដូរដើម្បីធ្វើការប្រឹក្សាណែនាំដល់ពួកគេកុំឱ្យចាញ់បោកមេខ្យល់ទៀត ហើយភាគីថៃអាចបញ្ជូនពួកគេមកវិញតាមរយៈមជ្ឈមណ្ឌលនេះ។

    ជាការឆ្លើយតបលោក អាឌុល សែងស៊ីកែវ រដ្ឋមន្ត្រីក្រសួងអភិវឌ្ឍសង្គមថៃបានទទួលយក និងឯកភាពនឹងការលើកឡើងរបស់ភាគីកម្ពុជា ហើយលោកនឹងបន្តឆន្ទៈអនុវត្តខ្លឹមសារក្នុងអនុស្សរណៈដែលបានចុះកិច្ចព្រមព្រៀងគ្នាកន្លងមក។ ជាក់ស្តែងថ្មីៗនេះភាគីថៃបានដោះស្រាយបញ្ហាជួញដូរមនុស្សបានជាង100ករណី ហើយរឹបអូសទ្រព្យសម្បត្តិបានជាង790លានបាត និងកាត់ទោសឱ្យជាប់គុកលើមន្ត្រី និងអ្នកនយោបាយរបស់ខ្លួនដែលបានប្រព្រឹត្តបទល្មើសនេះប្រមាណជា130នាក់ផងដែរ។

    ពលករកម្ពុជាដែលបម្រើការងារនៅក្នុងប្រទេសថៃបច្ចុប្បន្នមានប្រមាណជា 1,050,000 នាក់ ក្នុងនោះជាង70ម៉ឺននាក់មានភាពស្របច្បាប់ហើយ និងប្រមាណ30ម៉ឺននាក់ទៀតមិនទាន់មានភាពស្របច្បាប់នៅឡើយ។ ហើយថ្មីៗនេះ រដ្ឋាភិបាលថៃបានធ្វើការកែទម្រង់ច្បាប់ថ្មីដើម្បីគ្រប់គ្រងពលករបរទេសដែលមានភាពតឹងរ៉ឹងជាមុន ហើយធ្វើការផាកពិន័យធ្ងន់ធ្ងរជាងមុនចំពោះនិយោជក។ ភាគីថៃក៏បានចេញសេចក្តីប្រកាសឱ្យមានការពន្យាពេលក្នុងការអនុវត្តច្បាប់នេះ៦ខែដែលឯកឧត្តមមើលឃើញថា
    នេះជាឱកាសមួយសម្រាប់ប្រទេសទាំងពីររួមគ្នាដោះស្រាយបញ្ហាពលករទេសន្តរប្រវេសន៍ សំដៅបង្កើតភាពស្របច្បាប់ និងការការពារសិទ្ធិ ព្រមទាំងការរំលោភបំពានផ្សេងៗ៕

  • ក្រសួងសាងសង់ផ្លូវរថភ្លើងថ្មី សម្រាប់ដឹកជញ្ជូនអ្នកដំណើរឡើងយន្តហោះ

    ក្រសួងសាងសង់ផ្លូវរថភ្លើងថ្មី សម្រាប់ដឹកជញ្ជូនអ្នកដំណើរឡើងយន្តហោះ

    ភ្នំពេញ៖ ដើម្បីកាត់បន្ថយការកកស្ទះ និងខកពេលធ្វើដំណើរឡើងយន្តហោះ ក្រសួងសាធារណការ និងដឹកជញ្ជូនបានសហការជាមួយក្រុមហ៊ុន Royal Railway Co,. LTD កំពុងសាងសង់ផ្លូវរថភ្លើងថ្មីខ្នាតតូចមួយតភ្ជាប់ពីស្ថានីយរថភ្លើងក្នុងរាជធានីភ្នំពេញទៅព្រលានយន្តហោះអន្តរជាតិភ្នំពេញ។

    ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានថ្លែងឱ្យដឹងថា ផ្លូវរថភ្លើងកំពុងត្រូវបានសាង់សង់ជាបណ្តើរៗហើយ តែធ្វើតែពេលយប់ ហើយអាចនឹងចប់រួចរាល់ និងដាក់ឱ្យដំណើរការនៅក្នុងខែមេសា ឆ្នាំ2018ខាងមុខ។ ផ្លូវរថភ្លើងមួយខ្សែថ្មីនេះនឹងត្រូវសាងសង់ឡើងចំកណ្តាលទ្រូងផ្លូវនៃមហាវិថីសហព័ន្ធរុស្ស៊ី ដែលអាចអនុញ្ញាតឱ្យរថយន្ត និងម៉ូតូធ្វើចរាចរណ៍នៅលើផ្លូវនោះបានដូចធម្មតា និងមិនប៉ះពាល់លំនៅដ្ឋានប្រជាពលរដ្ឋឡើយ។

    ឯកឧត្តមបានគូសបញ្ជាក់ថា ក្រៅពីភ្ញៀវដែលត្រូវឡើងយន្តហោះហើយ ប្រជាពលរដ្ឋដែលចង់ធ្វើដំណើរទៅមកពីព្រលានយន្តហោះអន្តរជាតិភ្នំពេញមកកាន់រាជធានីភ្នំពេញក៏អាចជិះរថភ្លើងនេះបានដែរ ដោយចំណាយពេលពី20 ទៅ25នាទីដែលមានបំពាក់ម៉ាស៊ីនត្រជាក់ផ្តល់ផាសុកភាពជូនអ្នកដំណើរទៀតផង។

    គួរបញ្ជាក់ថាបច្ចុប្បន្នក្រុមហ៊ុន Royal Railway Co,. LTD ដែលជាសម្ព័ន្ធក្រុមហ៊ុន Royal Group របស់អ្នកឧកញ៉ា គិត ម៉េង បានបញ្ជាទិញរថភ្លើងខ្នាតតូចចំនួន4គ្រឿងពីប្រទេសម៉ិចស៊ីក ដែលអាចដឹកអ្នកដំណើរមួយជើងបានប្រមាណជា 100នាក់។ ឯកឧត្តម ស៊ុន ចាន់ថុល បញ្ជាក់ថា ក្រុមហ៊ុននេះនឹងដឹកអ្នកដំណើររយៈពេល1ខែដំបូង ដោយមិនយកប្រាក់ដើម្បីជាចំណងដៃនៅថ្ងៃសម្ពោធដាក់ដំណើរការ៕

  • កញ្ញាឃឹម ចរិយា ប្រឹងមួយប្រាវទទួលបានជោគជ័យខ្លាំងក្នុងអាជីព

    កញ្ញាឃឹម ចរិយា ប្រឹងមួយប្រាវទទួលបានជោគជ័យខ្លាំងក្នុងអាជីព

    ពិធីការិនី ឃឹម ចរិយា កំពុងតែមានឈ្មោះបោះសំឡេងក្នុងវិថីសិល្បៈ  ជាពិសេសថ្មីៗនេះនាងបានចូលរួមសម្ដែងជាមួយតារាសម្ដែងជើងចាស់លោក ខៃ ប្រសិទ្ធ ទៀតផង  តែនាងបានបញ្ជាក់ថា ទម្រាំតែបានដូចបច្ចុប្បន្ន នាងខំប្រឹងប្រែងជិត១០ឆ្នាំឯណោះ។

    កញ្ញា ឃឹម ចរិយា ត្រូវបានគេទទួលស្គាល់ថា មានឈ្មោះបោះសំឡេងខ្លាំងនៅចុងឆ្នាំ2016 ពិសេសក្រោយពីនាងបានចូលប្រឡូកក្នុងការងារជាពិធីការិនីក្នុងស្ថានីយទូរទស្សន៍ PNN ដែលធ្វើឱ្យនាងទទួលបានប្រជាប្រិយភាពជាខ្លាំង។

    អតីតកញ្ញាឯករងសាប៊ូលុច្សឆ្នាំ2007 កញ្ញា ឃឹម ចរិយា បានប្រាប់ថា មូលហេតុនាងចូលសិល្បៈយូរឆ្នាំហើយមិនសូវល្បីនោះ មិនមែនមកពីនាងគ្មានសមត្ថភាពនោះទេ ពោលគឺក្រុមគ្រួសាររបស់នាងពុំសូវពេញចិត្ដនឹងការងារសិល្បៈ និងពុំបានផ្ដល់កម្លាំងចិត្ដដល់នាងឡើយ។ នាងបន្ដថា ឪពុកម្ដាយនាងតែងតែបារម្ភពេលនាងត្រូវចេញទៅថតនៅទីឆ្ងាយៗម្ដងៗ ជាពិសេសពេលត្រឡប់មកផ្ទះវិញនៅពេលយប់ព្រលប់ ដូច្នេះទើបនាងបណ្ដោយខ្លួនទៅតាមដំណើរ ល្បីមិនល្បីមិនមែនជាបញ្ហា។

    ពិធីការិនីរូបស្រស់ម្នាក់នេះបញ្ជាក់ថា៖ «ខ្ញុំបានចូលសិល្បៈជិត10ឆ្នាំហើយ នៅតែមិនទាន់មានឈ្មោះនឹងគេ ទើបខ្ញុំសម្រេចចិត្ដចូលឱ្យពេញទំហឹងតែម្ដង។ តែទោះយ៉ាងណាក៏ខ្ញុំបានជម្រាបហេតុផលទៅឪពុកម្ដាយវិញថា កូនធំហើយ កូនអាចមើលថែទាំខ្លួនឯងបានហើយ  សូមម៉ាក់ និងប៉ាកុំបារម្ភអី ទើបគាត់លែងសូវគិតបារម្ភលើបញ្ហានេះដូចមុន»។

    ​ជាការពិតណាស់  ក្រោយពីនាងសម្រេចចិត្ដហើយ គឺពិតជាត្រឹមត្រូវ ពោលគឺរយៈពេល2ឆ្នាំចុងក្រោយនេះ កេរ្ដិ៍ឈ្មោះ និងការងារដែលនាងទទួលបានពិតជាធ្វើឱ្យនាងបានសមដូចបំណងប្រាថ្នាមែន  ព្រោះបច្ចុប្បន្ននាងកំពុងតែមមាញឹកជាមួយការងារពិធីការិនីទាំងនៅ PNN និងថតខ្សែភាពយន្តភាគរឿង ”ពេលណាកូនមានម្ដាយ” ដែលត្រៀមដាក់បញ្ចាំងនៅស្ថានីយ៍ទូរទស្សន៍ CTV8HD ទៀតផង។

    ជុំវិញបញ្ហាផ្ទាល់ខ្លួនវិញ ត្រូវបាននាងថ្លែងក្នុងលក្ខណៈលេងសើចថា កុំឃើញអាយុប៉ុណ្ណឹង តែក៏មានអ្នកស្រឡាញ់ច្រើនដែរណា៎។ សព្វថ្ងៃនាងកំពុងតែសម្លឹងមើលចិត្តបុរសម្នាក់ ម្យ៉ាងនាងក៏មិនទាន់ប្រាកដថា នឹងជ្រើសយកបុរសណាធ្វើជាគូជីវិតដែរ ដូច្នេះនាងត្រូវការពេលវេលាគិតគូរចំពោះរឿងនេះឱ្យល្អិតល្អន់បន្តិចសិន៕

  • ញាក់សាច់! Ronaldo សម្ញែងយន្តហោះឯកជន ក្រោយពីប្រកាសថា មិត្តស្រីរបស់ខ្លួនមានផ្ទៃពោះ

    ញាក់សាច់! Ronaldo សម្ញែងយន្តហោះឯកជន ក្រោយពីប្រកាសថា មិត្តស្រីរបស់ខ្លួនមានផ្ទៃពោះ

    ខ្សែប្រយុទ្ធ Cristiano Ronaldo បន្តរស់នៅក្នុងជីវិតបែបទំនើបរបស់គេ ខណៈដែលវាគ្មានអ្វីត្រូវភ្ញាក់ផ្អើលឡើយនៅពេលឃើញរូបគេឈរក្បែរយន្តហោះឯកជនរបស់ក្រុមហ៊ុន Nike នោះ។ ខ្សែប្រយុទ្ធដ៏ឆ្នើមវ័យ32ឆ្នាំរូបនេះកំពុងតែសម្រាកលំហែពីដំណើរប្រកួតរបស់ក្លិប Real Madrid ទៅកាន់ទីក្រុង Los Angeles ក្រោយពីបានជួយឲ្យក្រុមបាល់ទាត់ជម្រើសជាតិព័រទុយហ្គាល់របស់គេឈានទៅដល់វគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ Confederations Cup នៅប្រទេសរុស្ស៊ី។

    ក្រុមហ៊ុន Nike មានយន្តហោះឯកជនផ្ទាល់ខ្លួនរបស់ពួកគេដែលមានមូលដ្ឋានទៅរដ្ឋ Oregon និងត្រូវបានប្រើប្រាស់ដើម្បីដឹកជញ្ជូនមនុស្សសំខាន់ៗទូទាំងពិភពលោក។ ហេតុនេះ Ronaldo ក៏ជាសមាជិកម្នាក់របស់ពួកគេផងដែរ។ រូបគេនៅសល់រយៈពេលជាច្រើនសប្តាហ៍ទៀតដើម្បីសម្រាកលំហែ ខណៈដែល Ronaldo មិនតម្រូវឲ្យធ្វើការបង្ហាញខ្លួននៅឯក្លិប Real Madrid ឡើយរហូតដល់ចុងខែនេះ។ ក្រោយពីបានក្លាយជាឪពុករបស់កូនប្រុសវ័យ7ឆ្នាំឈ្មោះថា Cristiano Ronaldo Jr កីឡាករ Ronaldo កាលពីពេលថ្មីៗនេះ បានស្វាគមន៍កូនភ្លោះដែលមានឈ្មោះថា Eva និង Mateo ក្រោយពីម្តាយពពោះជំនួសបានផ្តល់កំណើតដល់ពួកគេនៅក្នុងប្រទេសសហរដ្ឋអាមេរិក។ Ronaldo បានទទួលស្គាល់ថា កូនៗដែលទើបតែកើតរបស់គេ ពិតជាមានតម្លៃណាស់ ហើយថា រូបគេមានរឿងជាច្រើនដែលត្រូវរៀនសូត្រ ដូចជាពេលផ្លាស់ប្តូរខោទឹកនោមឱ្យកូនៗជាដើម៕
    ប្រភពព័ត៌មាន៖ The Sun

  • រុស្ស៊ី សហការជាមួយកម្ពុជា ក្នុងការធ្វើពាណិជ្ជកម្មឧស្សាហកម្មគ្រឿងយន្ត

    រុស្ស៊ី សហការជាមួយកម្ពុជា ក្នុងការធ្វើពាណិជ្ជកម្មឧស្សាហកម្មគ្រឿងយន្ត

    ភ្នំពេញ៖ គណៈប្រតិភូរបស់ក្រុមហ៊ុន RSTradehouse នៃសហព័ន្ធរុស្ស៊ីដឹកនាំដោយលោកបណ្ឌិត សឺហ្គេ ប៉ូ្រនីន (Sergey Pronin) នាយកប្រតិបត្តិក្រុមហ៊ុនបានជួបពិភាក្សាការងារជំនួញជាមួយថ្នាក់ដឹកនាំក្រសួងពាណិជ្ជកម្មកម្ពុជា ដើម្បីរៀបចំវេទិកាធុរកិច្ចរួមគ្នាមួយនៅដើមខែធ្នូ ឆ្នាំ2017 ក្នុងគោលដៅបង្ហាញពីសក្តានុពលវិនិយោគរបស់ក្រុមហ៊ុន RSTradehouse នៅលើផ្សារកម្ពុជា។

    ក្នុងជំនួបនោះលោកបណ្ឌិត Sergey Pronin បានបង្ហាញពីប្រភេទជំនួញ និងការផ្គត់ផ្គង់របស់ក្រុមហ៊ុន RSTradehouse ដែលរួមមាន ឧបករណ៍អេឡិចត្រូនិក សេវាកម្មផ្នែកព័ត៌មាន និងទំនាក់ទំនង រថយន្ត និងគ្រឿងយន្តធុនធ្ងន់។ បន្ថែមពីលើនេះទៀត ភាគីក្រុមហ៊ុនរុស្ស៊ីមានបំណងចង់ពង្រីកកិច្ចសហប្រតិបត្តិការពាណិជ្ជកម្មវិនិយោគជាមួយកម្ពុជាដែលជាទីផ្សារកំពុងរីកចម្រើននៅអាស៊ាន ហើយបានចាត់ទុកវេទិកាធុរកិច្ចនាពេលខាងមុខនេះ ជាដំណើរចាប់ផ្តើមដ៏ល្អនៃទំនាក់ទំនងធុរកិច្ចរវាងភាគីទាំងពីរ។

    ក្នុងជំនួបនោះលោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្មបានថ្លែងស្វាគមន៍ដ៏កក់ក្តៅចំពោះវិនិយោគិនរុស្ស៊ីក្នុងការចូលមកវិនិយោគនៅលើទីផ្សារកម្ពុជាចំពោះឧបករណ៍អេឡិចត្រូនិក និងឧស្សាហកម្មគ្រឿងយន្តនេះ។ លោកជំទាវក៏បានជម្រាបជូនលោកបណ្ឌិត Sergey Pronin អំពីសេ្ថរភាពម៉ាក្រូសេដ្ឋកិច្ច បរិយាកាសធុរកិច្ច និងវិស័យដែលមានសក្តានុពលខ្លាំងដែលបានចូលរួមចំណែកក្នុងកំណើនសេដ្ឋកិច្ចជាតិ និងអាចរក្សាកំណើនក្នុងរង្វង់ 7.7% ដែលក្នុងនោះរួមមានវិស័យឧស្សាហកម្មកាត់ដេរ និងវាយនភណ្ឌ សំណង់ ទេសចរណ៍ និងកសិកម្មរបស់កម្ពុជា ហើយក៏កំពុងមានតម្រូវការលើឧបករណ៍អេឡិចត្រនិក និងគ្រឿងយន្តធុនធ្ងន់ផងដែរ។

    លោកជំទាវក៏បានជម្រាបជូនតំណាងគណៈប្រតិភូដើម្បីពិនិត្យលទ្ធភាពមកបណ្តាក់ទុន និងទិញផលិតផលកសិកម្មរបស់កម្ពុជា រួមមាន អង្ករ កៅស៊ូ ម្រេច និងពោតជាដើម។ ក្រៅពីនេះសមាជិកនៃសភាពាណិជ្ជកម្មកម្ពុជា បានជម្រាបជូនដោយសង្ខេបអំពីសកម្មភាពជំនួញរបស់ខ្លួន និងបានលើកឡើងអំពីប្រភេទអាជីវកម្មដែលមានសក្តានុពលនៅកម្ពុជា រួមមានសេវាសុខភាព អប់រំ សំណង់ និងធនាគារ និងហិរញ្ញវត្ថុជាដើម។ ក្រោយជំនួបពិភាក្សានេះក្រសួងពាណិជ្ជកម្ម និង ប្រតិភូក្រុមហ៊ុន RSTradehouse បានព្រមព្រៀងនឹងជំរុញការចូលរួមពីក្រុមហ៊ុនឯកជនតាមវិស័យសំខាន់ៗ និងរៀបចំវេទិកាធុរកិច្ចរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ីនាពេលខាងមុខឱ្យប្រកបដោយភាពរលូន និងជោគជ័យ៕

  • AC Milan បំពេញការចុះហត្ថលេខាជាមួយ Bonucci ពីក្លិប Juventus

    AC Milan បំពេញការចុះហត្ថលេខាជាមួយ Bonucci ពីក្លិប Juventus

    ក្លិប AC Milan បានចុះហត្ថលេខាជាមួយនឹងខ្សែការពារអន្តរជាតិអ៊ីតាលី Leonardo Bonucci ពីក្លិប Juventus ក្នុងតម្លៃខ្លួន40លានអឺរ៉ូ (ស្មើនឹង46.5លានដុល្លារអាមេរិក)។

    Bonucci វ័យ 30ឆ្នាំបានចុះហត្ថលេខាលើកុងត្រារយៈពេល 5ឆ្នាំជាមួយនឹងក្រុមម្ចាស់ជើងឯក18សម័យកាលមួយនេះ ដែលបានចំណាយប្រាក់អស់ប្រមាណជា178លានអឺរ៉ូហើយក្នុងរដូវកាលនេះទៅលើការទិញចូលកីឡាករថ្មីៗ។ លោក Vincenzo Montella គ្រូបង្វឹករបស់ក្លិប AC Milan បានឲ្យដឹងថា៖ «ជាបច្ចេកទេស ខ្ញុំគិតថា រូបគេ និង Sergio Ramos ជាខ្សែការពារដ៏រឹងមាំបំផុតក្នុងពិភពលោក»។ ស្របពេលជាមួយគ្នានេះដែរ Juventus បានបំពេញមកវិញនូវការចុះហត្ថលេខាជាមួយខ្សែការពារ Mattia de Sciglio វ័យ24ឆ្នាំមកពីក្លិប AC Milan វិញក្នុងតម្លៃខ្លួន12លានអឺរ៉ូ។

    Juventus បានឲ្យដឹងក្នុងសេចក្តីថ្លែងការណ៍របស់ខ្លួនថា៖ «ក្លិប Juventus កំពុងតែបន្ថែមកីឡាករម្នាក់ដែលមានទេពកោសល្យដ៏អស្ចារ្យ និងពោរពេញដោយបទពិសោធអន្តរជាតិ»។ ការផ្ទេររបស់ Bonucci មានន័យថា រូបគេនឹងក្លាយជាកីឡាករមានតម្លៃខ្លួនខ្ពស់ជាងគេបំផុតក្នុងវ័យ30ឆ្នាំ ឬច្រើនជាងនេះ ដោយច្រើនជាងតម្លៃខ្លួន25លានអឺរ៉ូ ដែលក្លិប Roma ធ្លាប់បានចំណាយទិញខ្សែប្រយុទ្ធ Gabriel Batistuta ពីក្លិប Fiorentina កាលពីឆ្នាំ2000ទៅទៀត។

    Bonucci វ័យ30ឆ្នាំបានចំណាយពេល7ឆ្នាំនៅឯក្លិប Juventus ដោយបានធ្វើការបង្ហាញខ្លួន319លើក និងឈ្នះពានរបស់ក្របខ័ណ្ឌ Serie A ចំនួន6លើក។ ក្លិប AC Milan បានឲ្យដឹងថា៖ «ក្រោយពីការផ្ទេរចេញគូប្រជែងដ៏គួរឲ្យគោរព ទៅកាន់ក្លិប AC Milan យើងសូមស្វាគមន៍ចំពោះ Leonardo»៕
    ប្រភពព័ត៌មាន៖ BBC

  • ក្លិប West Ham យល់ព្រមលើលក្ខខណ្ឌផ្សេងៗ ដើម្បីបំពេញការផ្ទេរ Hernandez

    ក្លិប West Ham យល់ព្រមលើលក្ខខណ្ឌផ្សេងៗ ដើម្បីបំពេញការផ្ទេរ Hernandez

    ក្លិប West Ham United បានយល់ព្រមលើលក្ខខណ្ឌផ្សេងៗជាមួយនឹងក្លិប Bayer Leverkusen ដើម្បីចុះហត្ថលេខាជាមួយនឹង Javier Hernandez ដែលជាអតីតខ្សែប្រយុទ្ធរបស់ក្លិបបិសាចក្រហម Manchester United ក្នុងការផ្ទេរមួយដែលត្រូវបានគេជឿជាក់ថា មានតម្លៃខ្លួន16លានផោន (ស្មើនឹង20.75លានដុល្លារអាមេរិក)។

    ក្លិបញញួរធំ West Ham បានប្រកាសថា ខ្សែប្រយុទ្ធអន្តរជាតិម៉ិកស៊ិកវ័យ29ឆ្នាំរូបនេះ នឹងធ្វើដំណើរទៅដល់ទីក្រុងឡុងដ៍ក្នុងរយៈពេលប៉ុន្មានថ្ងៃខាងមុខទៀតនេះ ដើម្បីបំពេញលក្ខខណ្ឌផ្ទាល់ខ្លួន និងទទួលការត្រួតពិនិត្យសុខភាព។ Hernandez ដែលជាអ្នករកគ្រាប់បាល់បានច្រើនជាងគេសម្រាប់ក្រុមជម្រើសជាតិម៉ិកស៊ិកនោះនឹងក្លាយជាកីឡាករចំណូលថ្មីទី3សម្រាប់ក្រុមរបស់លោក Slaven Bilic និងការនាំយកខ្សែការពារ Pablo Zabaleta និងអ្នកចាំទី Joe Hart។

    លោក Bilic ពិតជាចង់ចុះហត្ថលេខាជាមួយនឹងខ្សែប្រយុទ្ធថ្មីម្នាក់ ក្រោយពីការរងរបួសរបស់កីឡាករ Andy Carroll និង Diafra Sakho ដែលធ្វើឲ្យក្លិប West Ham បញ្ចប់រដូវកាលមុនដោយមានតែខ្សែប្រយុទ្ធកម្ចី Jonathan Calleriម្នាក់ប៉ុណ្ណោះដែលលេងក្នុងតំបន់ប្រយុទ្ធ និងបានស៊ុតបាល់បញ្ចូលទីបាន1គ្រាប់ក្នុងការបង្ហាញខ្លួន19លើក ។

    Hernandez គឺជាខ្សែប្រយុទ្ធដ៏មុតស្រួចម្នាក់ក្នុងក្របខ័ណ្ឌ Premier League ក្រោយពីបានស៊ុតបាល់បញ្ចូលទីសរុប59គ្រាប់ ក្នុងអំឡុងការចំណាយពេល4ឆ្នាំនៅឯកីឡដ្ឋាន Old Trafford។ កីឡាកររូបនេះដែលត្រូវបានគេស្គាល់ថាជា Chicharito នោះបានផ្ទេរទៅកាន់ក្លិប Real Madrid ក្នុងនាមជាកីឡាករកម្ចីកាលពីឆ្នាំ2014 ហើយរយៈពេល1ឆ្នាំក្រោយមក រូបគេបានចុះហត្ថលេខាទៅកាន់ក្លិប Leverkusen ជាដែលកន្លែងរូបគេបានស៊ុតបាល់បញ្ចូលទី28គ្រាប់ក្នុងការប្រកួតក្របខ័ណ្ឌ Bundesliga 54លើក៕
    ប្រភពពី៖ The Guardian

  • ប្រជាជនកម្ពុជា នឹងមានចំណូលមធ្យមកម្រិតខ្ពស់នៅត្រឹមឆ្នាំ2030

    ប្រជាជនកម្ពុជា នឹងមានចំណូលមធ្យមកម្រិតខ្ពស់នៅត្រឹមឆ្នាំ2030

    ភ្នំពេញ៖ ដោយឈរលើកំណើនសេដ្ឋកិច្ចរឹងមាំថេរ 7% ជារៀងរាល់ឆ្នាំក្នុងរយៈពេលជិត2ទសវត្សរ៍ចុងក្រោយនេះ បានធ្វើឱ្យកម្ពុជាចេញផុតពីប្រទេសដែលមានចំណូលទាបទៅជាប្រទេសដែលមានចំណូលមធ្យមកម្រិតទាបកាលពីឆ្នាំ2016 កន្លងទៅ។

    តាមរបាយការណ៍របស់វិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវរបស់ក្រសួងពាណិជ្ជកម្មបានឱ្យដឹងថា ប្រសិនបើគ្មានឧបសគ្គ ឬមិនមានវិបត្តិសេដ្ឋកិច្ចទេនោះ កម្ពុជានឹងក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅត្រឹមឆ្នាំ2030 ហើយចាប់តាំងពីការផ្លាស់ប្ដូរប្រព័ន្ធទីផ្សារមកកាន់សេដ្ឋកិច្ចទីផ្សារសេរីក្នុងឆ្នាំ1998មក កម្ពុជាបានធ្វើការកែទម្រង់ស៊ីជម្រៅ និងបានអនុវត្តផែនការអភិវឌ្ឍន៍យុទ្ធសាស្រ្តជាតិប្រកបដោយប្រសិទ្ធភាពរហូតសម្រេចបានកំណើនសេដ្ឋកិច្ចដ៏ខ្លាំងក្លាគិតជាមធ្យម 7% រៀងរាល់ឆ្នាំចាប់ពីឆ្នាំ2000ដល់ឆ្នាំ2017នេះ។

    ជាមួយនឹងកំណើនរឹងមាំក្នុងឆ្នាំ2017នេះ ផលិតផលសរុបក្នុងស្រុក(ផ.ស.ស) បច្ចុប្បន្នត្រូវបានប៉ាន់ប្រមាណថា នឹងកើនឡើងដល់ 22.2 ប៊ីលានដុល្លារអាមេរិកដែលធ្វើឱ្យផ.ស.ស សម្រាប់មនុស្សម្នាក់អាចនឹងកើនចំណូលឡើងដល់ 1,434 ដុល្លារអាមេរិកក្នុង1ឆ្នាំ។

    លើសពីនេះកម្ពុជាអាចរក្សាបាននូវអតិផរណាដែលស្ថិតក្នុងកម្រិតទាប និងអាចគ្រប់គ្រងបាន ដោយអតិផរណាជាមធ្យមប្រចាំឆ្នាំត្រូវបានប៉ាន់ប្រមាណថា នឹងមានអត្រា 3.8% ក្នុងឆ្នាំ 2017 កើនពី 3.0% ក្នុងឆ្នាំ2016 ដោយសារនិន្នាការកើនឡើងនៃថ្លៃប្រេងក្នុងទីផ្សារអន្តរជាតិ និងតម្លៃម្ហូបអាហារក្នុងស្រុក។

    យោងតាមរបាយការណ៍របស់ធនាគារអភិវឌ្ឍន៍អាស៊ី(ADB)ឱ្យដឹងថា នៅក្នុងប្រទេសកម្ពុជាសមាមាត្រនៃប្រជាជនដែលមានការងារធ្វើ រកចំណូលបានក្រោម 1.90 ដុល្លារក្នុងមួយថ្ងៃស្មើនឹង33.6% ហើយប្រជាជនដែលរស់នៅក្រោមបន្ទាត់ក្រីក្រមានចំនួន 14%៕