Author: វល័ក្ខ

កសិកររអ៊ូរទាំរឿងអំពៅធ្លាក់ថ្លៃខ្លាំងដោយសារមានអ្នកដាំច្រើន
ភ្នំពេញ៖ កសិករខ្មែរត្រូវបានគេមើលឃើញថា ចូលចិត្តធ្វើរបរកសិកម្មតាមៗគ្នា បើសិនជាកសិករណាម្នាក់ដាំដំណាំកសិកម្មអ្វីមួយលក់បានថ្លៃនោះគេនឹងឃើញកសិករដទៃទៀតដាំតាមគ្នាព្រោងព្រាតធ្វើឱ្យការផ្គត់ផ្គង់កើនលើសតម្រូវការហើយមានការធ្លាក់ថ្លៃយ៉ាងគំហុកតែម្តង។ ងាកទៅមើលកសិករដាំអំពៅនៅភូមិព្រែកស្នាយ ឃុំព្រែកគយ ស្រុកស្អាង ខេត្តកណ្តាល ឆ្នាំនេះតម្លៃអំពៅបានធ្លាក់ចុះយ៉ាងគំហុកលើសឆ្នាំកន្លងៗមកធ្វើឱ្យកសិករខាត់បង់ច្រើនដោយសារទម្លាប់ដាំតាមគ្នានេះឯង។
លោក យឿន សំអាង មានទីលំនៅភូមិឃុំខាងលើបានប្រាប់ថា លោកបានប្រកបរបរដាំអំពៅនេះយូរឆ្នាំមកហើយ ពោលគឺដាំតពីឪពុកម្តាយមក ប៉ុន្តែមិនដែលមានឆ្នាំណាអំពៅចុះថោកដូចឆ្នាំនេះទេ។ លោកបន្តថា កាលពីឆ្នាំមុនអំពៅធុនអន់ណាស់ 1បាច់ក៏បានតម្លៃ 8000រៀលដែរ ចំណែកឯលេខ 2តម្លៃ 10000 ទៅ 12000រៀល ហើយបើលេខ 1វិញនៅ1បាច់ 18000 ទៅ 20000រៀលឯណោះ ប៉ុន្តែឆ្នាំនេះអំពៅលេខ1បានតម្លៃតែ5000 ទៅ 5500 រៀលប៉ុណ្ណោះ ធ្វើឱ្យអ្នកដាំខាតបះដៃបះជើងគ្រប់ៗគ្នា។
កសិករដដែលក៏បាននិយាយដែរថា អំពៅចាប់តាំងពីដាំរហូតបានកាប់ត្រូវប្រើរយៈពេល10 ទៅ12ខែ និងត្រូវមើលថែទាំខ្លាំងណាស់ តែដល់ពេលបានផលលក់បែជាថោកដូច្នេះ ស្ទើរតែអស់កម្លាំងចិត្តនឹងធ្វើហើយ។ អំពៅមុនពេលដាំគេត្រូវភ្ជួរដីហាលចោល 2លើក ដោយ 1លើកៗហាលចោលរយៈពេលកន្លះខែទើបយកពូជមកដាំ ហើយបើនៅខែប្រាំងត្រូវកប់ក្នុងដីជម្រៅ 1តឹក ប៉ុន្តែបើរដូវភ្លៀវវិញនោះគឺកប់ត្រឹមតែ 2ហ៊ុនប៉ុណ្ណោះ។ អំពៅនៅទីនេះគេដាំក្នុងចន្លោះខែមិថុនា ហើយដាំបាន 2ខែត្រូវភ្ជួរដីលប់គល់ និងបាន 3ខែត្រូវសកស្លឹកចោលដើម្បីឱ្យអំពីលូតលាស់ល្អមានថ្នាំងវែងៗ លុះអំពៅបាន6ខែ ត្រូវកាប់ដើមចេញខ្លះ ដោយក្នុង 1គុម្ពៗទុកត្រឹមតែ 5ទៅ 7ដើមប៉ុណ្ណោះ ដើម្បីឱ្យអំពៅមានដើមធំល្អ។
លោកក៏បានប្រាប់ដែរថា បានជាអំពៅចុះថ្លៃដូច្នេះមកពីមានអ្នកដាំច្រើនពេក ព្រោះកាលពីឆ្នាំទៅបានថ្លៃ ទើបនាំគ្នាប្តូរពីការដាំដំណាំផ្សេងៗមកដាំអំពៅ ហើយមួយវិញទៀតខេត្តផ្សេងៗក៏មានគេដាំច្រើនដែរ ដូចជា កំពង់ស្ពឺ តាកែវ ព្រៃវែង ស្វាយរៀង បាត់ដំបង…ជាដើម។
ចំណែកឯ លោក ចេក រស់នៅភូមិព្រែកស្នង ឃុំព្រែកគយ ដែលជាកសិករដាំអំពៅ និងជាឈ្មួញកណ្តាលម្នាក់ដែរនោះបានប្រាប់ដែរថា ឆ្នាំនេះអំពៅពិតជាចុះថោកខ្លាំងមែនដោយសារតែឆ្នាំនេះមានអ្នកដាំច្រើន ទើបបានជាធ្វើឱ្យជន់ធ្លាក់តម្លៃយ៉ាងដូច្នេះ ហើយក្នុង1បាច់តម្លៃចន្លោះពី1000ទៅ5000រៀលប៉ុណ្ណោះ។ លោកបានបន្ថែមដែរថា អំពៅគឺត្រូវការការថែទាំខ្លាំង សូម្បីតែជីក៏ត្រូវការប្រើច្រើនជាងដំណាំផ្សេងៗដែរ ដោយរយៈពេលកន្លះខែត្រូវដាក់ជីម្តង ហើយតម្លៃជីនោះទៀតសោតឡើងថ្លៃស្រេចតែនៅលើមាត់ឈ្មួញ ពេលដែលកសិករត្រូវការប្រើ ឡើងថ្លៃភ្លាម ពីក្នុង1បាវ 80000រៀលរហូតដល់ទៅជាង12ម៉ឺនរៀលឯណោះ។ និយាយរួមទៅគឺធ្វើឱ្យប៉ះពាល់ដល់ជីវភាពកសិករខ្លាំងណាស់ ប៉ុន្តែលោកក៏បានបញ្ជាក់ដែរថា បើទោះបីជាតម្លៃអំពៅធ្លាក់ចុះយ៉ាងនេះក្តី ក៏លោកមិនតូចចិត្តដែរព្រោះទីផ្សារវាតែងមានការឡើងចុះមិនលែងទេ បើមិនសូវសម្បូរវាបានថ្លៃ តែបើសម្បូរវារមែងថោកអ៊ីចឹងហើយ ប៉ុន្តែក៏សូមសំណូមពរឱ្យរាជរដ្ឋាភិបាលជួយគិតគូរអំពីតម្លៃជីនេះផង កុំអោយស្រេចតែមាត់អ្នកលក់នោះ៕
July 24, 2017
Manchester City ចុះហត្ថលេខាជាមួយ Danilo មកពីក្លិប Real
ក្លិបយក្សអង់គ្លេស Manchester City បានបំពេញការចុះហត្ថលេខាជាមួយនឹងខ្សែការពារ Danilo របស់ក្លិបអេស្ប៉ាញ Real Madarid ក្នុងតម្លៃខ្លួនមួយដែលត្រូវបានគេជឿជាក់ថា មានចំនួន26.5លានផោន (ស្មើនឹង34.4លានដុល្លារអាមេរិក)។
ខ្សែការពារអន្តរជាតិប្រេស៊ីលវ័យ26ឆ្នាំរូបនេះ បានចុះហត្ថលេខារយៈពេល5ឆ្នាំ ហើយនឹងត្រូវចូលរួមជាមួយនឹងក្លិប Man City ក្នុងដំណើរប្រកួតមុនបើករដូវកាលរបស់ពួកគេនៅលើទឹកដីសហរដ្ឋអាមេរិក។ Danilo អាចលេងបានក្នុងតំបន់ការពារស្លាបទាំងសងខាង ក៏ដូចជាតំបន់បម្រើការពារ និងជាកីឡាករចំណូលថ្មីទី4របស់ក្លិប Man City នៅរដូវក្តៅនេះ។ Danilo បាននិយាយថា៖ «ខ្ញុំពិតជារីករាយណាស់ក្នុងការបានចូលរួមជាមួយនឹងក្លិប Manchester City។ មាននូវការចាប់អារម្មណ៍យ៉ាងខ្លាំងពីសំណាក់ក្លិបផ្សេងទៀតដែរ ប៉ុន្តែវាតែងតែជាមហិច្ឆតារបស់ខ្ញុំក្នុងការលេងឲ្យលោក Pep Guardiola។ ការផ្ទេររបស់ Danilo នឹងត្រូវរង់ចាំរហូតទាល់តែរូបគេទទួលបានសៀវភៅការងារឲ្យធ្វើការជាមុនសិន ដែលមានន័យថា រូបគេប្រហែលជាមិនអាចបង្ហាញខ្លួនជាលើកទី1របស់គេបានឡើយ នៅពេលដែល Man City ត្រូវប្រកួតជាមួយនឹងអតីតក្លិបរបស់គេគឺ Real Madrid នៅថ្ងៃពុធ ខាងមុខនេះ ក្នុងទីក្រុង Los Angeles។ អតីតកីឡាកររបស់ក្លិប Santos រូបនេះបានចូលរួមជាមួយនឹង Real Madridដោយចេញពីក្លិប Porto កាលពីឆ្នាំ2015 ប៉ុន្តែ បានចូលលេងក្នុងក្របខ័ណ្ឌ La Liga ត្រឹមតែ17ប្រកួតប៉ុណ្ណោះ កាលពីរដូវកាលមុន។
ក្នុងរយៈពេល2ឆ្នាំរបស់គេនៅឯកីឡដ្ឋាន Bernabeu រូបគេបានឈ្នះពាន La Liga ពានChampions Leagues 2លើក ពាន Uefa Super Cup និងពាន Fifa Club World Cup។ លោក Guardiola តែងតែមានគោលបំណងចង់បានខ្សែការពារ ក្រោយពីបានអនុញ្ញាតឲ្យកីឡាករ Gael Clichy, Pablo Zabaleta និង Bacary Sagna ចាកចេញកាលពីចុងរដូវកាលមុន៕
ប្រភពពី៖ BBC
July 24, 2017
ឆមាសទី1 ឆ្នាំ2017 ទ្រព្យសកម្មក្នុងវិស័យធនាគារមានកំណើន150%
ភ្នំពេញ៖ គិតត្រឹមឆមាសទី1ឆ្នាំ2017 ចំនួនទ្រព្យសកម្មក្នុងវិស័យធនាគារមានកំណើនដល់150% នៃផលិតផលក្នុងស្រុកសរុប(ផ.ស.ស) ប្រាក់បញ្ញើមានកំណើនដល់85%នៃផ.ស.ស ហើយឥណទានទៅកាន់វិស័យឯកជនបានកើនឡើងដល់92% នៃផ.ស.ស។
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាបានមានប្រសាសន៍នៅក្នុងឱកាសបូកសរុបលទ្ធផលការងារប្រចាំឆមាសទី1 និងទិសដៅការងារសម្រាប់ឆមាសទី2 ឆ្នាំ2017 នៅព្រឹកថ្ងៃទី22 ខែកក្កដានេះថា បើយោងតាមការវាយតម្លៃរបស់មូលនិធិរូបិយវត្ថុអន្តរជាតិ ការអភិវឌ្ឍវិស័យធនាគាររបស់កម្ពុជាក្នុងតំណាក់កាលបច្ចុប្បន្ននៅតែបន្តជំរុញកំណើនសេដ្ឋកិច្ចប្រកបដោយចីរភាព។
ទន្ទឹមនឹងការរីកចម្រើនយ៉ាងឆាប់រហ័សនៃវិស័យធនាគារ ធនាគារជាតិនៃកម្ពុជាបានដាក់ចេញនូវវិធានម៉ាក្រូ និងមីក្រូប្រុងប្រយ័ត្នតាមតំណាក់កាលជាបន្តបន្ទាប់ ស្របតាមស្ថានភាពជាក់ស្តែង ព្រមទាំងពង្រឹងការត្រួតពិនិត្យវិស័យធនាគារ ជាពិសេសផ្អែកលើហានិភ័យ និងទស្សនៈអនាគតសំដៅរក្សាស្ថិរភាពហិរញ្ញវត្ថុ។ ម្យ៉ាងទៀតប្រព័ន្ធចែករំលែកព័ត៌មានឥណទានត្រូវបានពង្រឹង និងធ្វើឱ្យប្រសើរឡើងដើម្បីរួមចំណែកក្នុងការកាត់បន្ថយហានិភ័យឥណទាន និងបង្កើនតម្លាភាព។ លើសពីនេះគម្រោងការពារអ្នកដាក់ប្រាក់បញ្ញើក៏កំពុងត្រូវបានអភិវឌ្ឍសម្រាប់ពង្រឹងជំនឿទុកចិត្តរបស់អ្នកដាក់ប្រាក់បញ្ញើក្នុងវិស័យធនាគារបន្ថែមទៀតដែរ។
ដើម្បីជួយសម្រួលបន្ទុករបស់ប្រជាពលរដ្ឋឱ្យទទួលបានឥណទានក្នុងតម្លៃសមរម្យសម្រាប់បង្កបង្កើនផល និងពង្រីកអាជីវកម្មផ្សេងៗទប់ស្កាត់បំណុលវណ្ឌក និងចៀសវាងព្រឹទ្ធិកម្មរបស់គ្រឹះស្ថានហិរញ្ញវត្ថុមួយចំនួនតូច ធនាគារជាតិនៃកម្ពុជាបានសម្រេចដាក់ពិដានអត្រាការប្រាក់ 18% ចំពោះឥណទានដែលផ្តល់ដោយគ្រឹះស្ថានមីក្រូហិរញ្ញវត្ថុ និងប្រតិបត្តិករឥណទានជនបទនៅកម្ពុជាក្រោយពីបានសិក្សាយ៉ាងល្អិតល្អន់ និងគ្រប់ជ្រុងជ្រោយពីផលប៉ះពាល់។ ការដាក់ពិដាននេះក៏មានចេតនាជំរុញឱ្យគ្រឹះស្ថានមីក្រូហិរញ្ញវត្ថុ និងប្រតិបត្តិករឥណទានទាំងនោះបង្កើនប្រសិទ្ធភាពប្រតិបត្តិការអាជីវកម្មតាមរយៈការកាត់បន្ថយចំណាយ ឬការច្របាច់បញ្ចូលគ្នាផងដែរ។
គួរបញ្ជាក់ផងដែរថា គិតត្រឹមឆមាសទី1នេះប្រជាជនពេញវ័យប្រមាណជា54% នៃប្រជាជនពេញវ័យសរុបកំពុងប្រើប្រាស់សេវាហិរញ្ញវត្ថុផ្លូវការដែលមានដូចជា សេវាដាក់ប្រាក់បញ្ញើឥណទាន ទូទាត់ និងភតិសន្យាហិរញ្ញវត្ថុ៕
July 22, 2017
បក្សីមេគង្គរមណីយដ្ឋានអេកូទេសចរណ៍ដែលមិនគួរមើលរំលង
ភ្នំពេញៈ ស្ថិតនៅប្របតាមដងទន្លេមេគង្គ រមណីយដ្ឋាន បក្សីមេគង្គ បានលាក់បាំងខ្លួនជាមួយធម្មជាតិអស់រយៈពេលជាច្រើនឆ្នាំមកហើយ ប៉ុន្តែផ្លូវក្រួសក្រហមចូលរមណីយដ្ឋានដែលមានមនុស្សប្លែកមុខចូលមកកាន់តែច្រើនពីមួយថ្ងៃទៅមួយថ្ងៃនោះ គឺការមកដល់របស់ភ្ញៀវទេសចរ។
លោក ថោង ប្រសើរ ជាអ្នកខេត្តក្រចេះ និងភរិយាបានជាប់ចិត្តនឹងសម្រស់នៃដងទន្លេមេគង្គ ទើបលោកសម្រេចចិត្តចាប់ផ្តើមវិនិយោគទីរមណីយដ្ឋាននេះឡើងដោយដាក់ឈ្មោះថា បក្សីមេគង្គ ព្រោះលោកគិតថា ចង់ឲ្យឈ្មោះនេះមានភាពទាក់ទាញដែលសមស្របនឹងទីតាំងដែលស្ថិតនៅប៉ែកខាងកើតក្រុងស្ទឹងត្រែង។
សម្រាកមួយយប់ ឬច្រើនជាងនេះ អ្នកអាចស្រូបយកខ្យល់អាកាសត្រជាក់ស្រេង គយគន់ទឹកទន្លេហូរខ្មួលខ្មាញ់ និងអាចដកដង្ហើមបានយ៉ាងធូរស្រួល ព្រោះសួតរបស់លោកអ្នកលែងបានស្រូបផ្សែងយានយន្តនៅទីក្រុង ហើយទទួលយកសម្រស់ធម្មជាតិ និងអាកាសធាតុដ៏មនោរម្យមួយដែលលោកអ្នកទំនងជាមិនធ្លាប់ជួប។
រមណីយដ្ឋាននេះស្ថិតនៅក្នុងភូមិថ្មី សង្កាត់សាមគ្គី ក្រុងស្ទឹងត្រែង ជាខេត្តមួយក្នុងចំណោមខេត្តទាំងបួននៃតំបន់ភូមិភាគឦសានដែលមនុស្សជាច្រើនតែងតែមើលរំលង និងគិតថា ជាខេត្តមួយដែលមិនមានអ្វីគួរឲ្យចាប់អារម្មណ៍។
ប៉ុន្តែគ្រប់គ្នាទំនងជាបានគិតខុស និងយល់ច្រឡំពីសក្តានុពលទេសចរណ៍របស់ខេត្តដ៏ស្រស់ស្អាតនេះហើយ ព្រោះខេត្តនេះមានលក្ខណៈពិសេសជាច្រើន ដូចជា មានការជូបគ្នារវាងទន្លេទាំងបី គឺទន្លេមេគង្គ ទន្លេសេសាន និងទន្លេសេកុង មានឆ្នេរខ្សាច់ដែលត្រូវបានប្រសិទ្ធនាមថា “ខ្សាច់ប្តូររាង និងប្តូរទិស ឫសឈើក្រង ទស្សនាថ្ងៃលិចនៅកោះភ្លុក ជិះទូកកាយ៉ាក់ចេញពីរមណីយដ្ឋានបក្សីមេគង្គ ទស្សនាអន្លង់ផ្សោត” ដែលមានរឿងនិទានដ៏គួរឲ្យចាប់អារម្មណ៍។ នេះបើតាមលោកថោង ប្រសើរម្ចាស់រមណីយដ្ឋាន បក្សីមេគង្គប្រាប់ឲ្យដឹង។
ជាមួយនឹងការផ្តល់សេវាកម្មផ្តល់ការជិះទូកកម្សាន្ត ជិះទូកកាយ៉ាក់កម្សាន្ត តាមឆ្នេរខ្សាច់ គយគន់ដងព្រៃលិចទឹកដែលត្រូវបានចាត់ទុកជាតំបន់រាំសា គយគន់ទេសភាពថ្ងៃលិច ហ្វូងក្អែកទឹក ហ្វូងស្មោញ ដែលហិចហើរងងឹតមេឃតាមដងទន្លេ លោកថោង ប្រសើរក៏បានផ្តល់សេវាផ្ទះស្នាក់នៅដែលមានតម្លៃសមរម្យ និងមានការរចនាបង្កប់លាក់ខ្លួនជាមួយធម្មជាតិដ៏គួរឲ្យចាប់អារម្មណ៍ផងដែរ។
ជាមូយស្នាមញញឹមយ៉ាងស្រស់ លោកថោង ប្រសើរ បានជាប់ចិត្តនឹងធម្មជាតិ នៃខេត្តស្ទឹងត្រែងយ៉ាងងប់ងុល ទើបលោកសម្រេចចិត្តវិនិយោគទឹកប្រាក់ចន្លោះពី30 ទៅ 40ម៉ឺនដុល្លារ ដើម្បីបង្កើតរមណីយដ្ឋានបែបអេកូទេសចរណ៍នេះឡើង។
ជាមួយការងារជាមន្រ្តីរាជការនៅក្រសួងមួយនៃទឹកដីក្រុងភ្នំពេញ លោកប្រសើរ តែងតែធ្វើដំណើរឡើងចុះក្រុងស្ទឹងត្រែងរៀងរាល់សប្តាហ៍ ដើម្បីមកមើលការខុសត្រូវរមណីយដ្ឋានរបស់លោកដែលបង្កប់ខ្លួនកណ្តាលព្រៃនេះដែលជា ពិសេសមានមុខម្ហួបដ៏ឈ្ងុយឆ្ងាញ់ ដូចជា មាន់ដុត ប្រហិតត្រី បាយក្តាំងពិសេស ម្ជូរក្បាលត្រីសណ្តាយស្រស់ៗ។ លើសពីនេះគ្រឿងផ្សំ និងបន្លែបន្លុកទទួលទានសុទ្ឋតែជារបស់ធម្មជាតិគ្មានជាតិគីមី ដែលធ្វើឲ្យប៉ះពាល់ដល់សុខភាពអ្នកបរិភោគឡើយ។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី បានថ្លែងថាខេត្តស្ទឹងត្រែងមានរមណីយដ្ឋានធម្មជាតិដ៏ច្រើនដែលមានភាពទាក់ទាញ ប៉ុន្តែដោយសារការផ្សព្វផ្សាយនៅមានកម្រិត ទើបប្រជាពលរដ្ឋកម្ពុជាមើលរំលងខេត្តនេះ និងតែងគិតថា ខេត្តមិនមានរមណីយដ្ឋានកម្សាន្ត ប៉ុន្តែការពិតខេត្តស្ទឹងត្រែងពិតជាមានអ្វីពិសេសជាច្រើនលើសពីអ្វីដែលយើងបានគិតទៅទៀត ប៉ុន្តែប្រសិនជាពួកគេបានមកទស្សនាខេត្តនេះ និងស្គាល់ពីកន្លែងកម្សាន្ត ភាពជក់ចិត្តនឹងកើតមានក្នុងអារម្មណ៍ភ្ញៀវទេសចរជាតិ អន្តរជាតិមិនខាន។
លោកបន្តថា នៅកម្ពុជាមានសហគមន៍ទេសចរណ៍ធម្មជាតិចំនូន34 និងរមណីយដ្ឋានបែបធម្មជាតិដែលវិនិយោគដោយវិស័យឯកជនជាច្រើនទៀតនៅតំបន់ភូមិភាគឦសាន ដែលរមណីយដ្ឋានបែបនេះបានផ្តល់ផលចំណូលដោយផ្ទាល់ និងប្រយោលដល់សហគមន៍មូលដ្ឋាន ស្របតាមគោលនយោបាយរបស់ក្រសួងទេសចរណ៍ គឺការកាត់បន្ថយភាពក្រីក្រតាមរយៈវិស័យទេសចរណ៍។
លោកបន្តថា “នៅកម្ពុជាមានរមណីយដ្ឋាន និងសក្តានុពលទេសចរណ៍ច្រើនណាស់ដែលយើងមិនទាន់យកទាញយកអស់នូវសក្តានុពលមកប្រើប្រាស់ និងផ្តល់ផលចំណូលដល់មូលដ្ឋាន និងសេដ្ឋកិច្ចជាតិនៅឡើយ”។ លោកបន្តថា “ការវិនិយោគរមណីយដ្ឋានបែបនេះមិនត្រឹមតែជួយលើកកម្ពស់គោលនយោបាយរបស់ក្រសួងទេសចរណ៍ប៉ុណ្ណោះទេ តែជាការជួយបង្កើតការងារ និងជួយដល់សហគមន៍នៅក្នុងតំបន់ឲ្យទទួលបានចំណូលផងដែរ”៕
July 22, 2017
រកឃើញអ្នកឈ្នះពានរង្វាន់បច្ចេកវិទ្យាគមនាគមន៍ និងព័ត៌មានកម្ពុជាប្រចាំឆ្នាំ 2017
ពិធីប្រគល់ពានរង្វាន់បច្ចេកវិទ្យាគមនាគមន៍ និងព័ត៌មានកម្ពុជាឆ្នាំ 2017 ត្រូវបានធ្វើឡើងបន្ទាប់ពីការប្រកួតប្រជែងមួយ ដែលផ្តល់នូវពានរង្វាន់ចំពោះសមិទ្ធិផលបច្ចេកវិទ្យាគមនាគមន៍ និងព័ត៌មានដែលមានភាពច្នៃប្រឌិតខ្ពស់បំផុតក្នុងប្រទេស ដែលរៀបចំឡើងដោយវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) ដើម្បីបង្ហាញនូវអ្នកឈ្នះពានរង្វាន់ប្រចាំឆ្នាំនេះ។
បេក្ខភាពដែលទទួលបានជ័យលាភីចំនួន 3រូប ត្រូវបានជ្រើសរើសក្នុងចំណោមបេក្ខភាពចំនួន 37 មកពីបណ្តាក្រសួង ក្រុមហ៊ុនឯកជន ក្រុមហ៊ុនធុរកិច្ចដែលទើបនឹងបង្កើត រួមជាមួយនឹងអង្គការក្រៅរដ្ឋាភិបាល ។ រាល់បេក្ខភាពចូលរួមតម្រូវឱ្យការពារគម្រោងរបស់ពួកគេនៅចំពោះមុខចៅក្រមដែលមកពីវិស័យស្ថាប័នរដ្ឋ ក្រុមហ៊ុនឯកជន និងសង្គមស៊ីវិល ក្រោមការចូលរួមគាំទ្រពីក្រុមហ៊ុន Smart Axiata ក្រុមហ៊ុន Ezecom ក្រុមហ៊ុនទូរគមនាគមន៍កម្ពុជា ក្រុមហ៊ុន E.co ក្រុមហ៊ុន T.O. Group ក្រុមហ៊ុន ប្រៃសណីយ៍កម្ពុជា និងនិយ័តករទូរគមនាគមន៍កម្ពុជា។
សម្រាប់អ្នកឈ្នះមេដាយមាស (JAILBREAK The Game ) បានបង្កើតឡើងដោយ Direct Play ដោយពានរង្វាន់មានទឹកប្រាក់ចំនួន 10,000ដុល្លារ។ JAILBREAK The Game គឺជាហ្គេមទូរស័ព្ទផ្លូវការមួយដែលបានរចនាឡើងបន្ទាប់ពីខ្សែភាពយន្តខ្មែរមានចំណងជើងថា Jailbreak ។ វាគឺជាហ្គេមសកម្មមួយ ដែលមាននៅលើប្រព័ន្ធប្រតិបត្តិការ iOS និង Android ហើយត្រូវបានអភិវឌ្ឍន៍នៅប្រទេសកម្ពុជាដោយអ្នកអភិវឌ្ឍន៏ជនជាតិខ្មែរក្នុងភាពជាដៃគូជាមួយផលិតករខ្សែភាពយន្ត។ ត្រឹមតែរយៈពេល 48ម៉ោង បន្ទាប់ពីការដាក់បង្ហាញ ហ្គេមនេះបានទទួលការដោនឡូតរហូតដល់ 20K ហើយបច្ចុប្បន្នមានអ្នកលេងហ្គេមជាង 104 K ។
អ្នកឈ្នះមេដាយប្រាក់ (Bong Pheak) បង្កើតឡើងដោយ Open Institute ។ Open Institute ទទួលបានពានរង្វាន់ទី 2 ដែលមានទឹកប្រាក់ចំនួន 3,000 ដុល្លារ សម្រាប់កម្មវិធី Bong Pheak ។ Bong Pheak គឺជាសេវាកម្មការងារដែលបានបើកដំណើរការនៅខែតុលាឆ្នាំ 2016 ដែលដាក់បង្ហាញនូវការងារគ្មានជំនាញ និងការងារប្រើជំនាញតិចតួច។
ផ្អែកតាមការស្ទាបស្ទង់ភាគច្រើនប្រពន្ធ័អ៊ីនធើណេតតែម្យ៉ាងមិនមានភាពគ្រប់គ្រាន់ក្នុងការទៅដល់អ្នកដែលមិនអាចធ្វើការចូលទៅកាន់ទិន្នន័យនោះបានឡើយ ដូច្នេះ Bong Pheak នឹងធ្វើការផ្សព្វផ្សាយការងារតាមអ៊ីនធើណេត និងតាមរយៈសម្លេងដោយស្វ័យប្រវត្តិដែលបញ្ជូនទៅឱ្យកម្មករសក្តានុពលតាមរយៈការហៅទូរស័ព្ទ។ សេវាកម្មនេះមានអ្នកតាមដានតាមរយៈហ្វេសប៊ុកចំនួន 100,000 នាក់រួចហើយ ហើយមានការបង្ហាញផងដែរនូវការងារចំនួន 6,000 ដំណែង ក្នុងរយៈពេល7ខែ ដែលនាំឱ្យមានបេក្ខជនដាក់ពាក្យចំនួន 4,000នាក់ ។
អ្នកឈ្នះមេដាយសំរឹទ្ធិ (ប្រព័ន្ធចុះបញ្ជីរថយន្តស្វ័យប្រវត្តិ) បង្កើតដោយក្រសួងសាធារណការនិងដឹកជញ្ជូន ។ ចុងបញ្ចប់អ្នកឈ្នះរង្វាន់ទី 3 នៃការប្រកួតគឺបានទៅក្រសួងសាធារណការ និងដឹកជញ្ជូន ដែលមានចំនួនទឹកប្រាក់1,000ដុល្លារ ដើម្បីយកអភិវឌ្ឍគម្រោងរបស់ខ្លួនបន្តទៀតលើផ្នែកយានយន្តស្វ័យប្រវត្តិ និងត្រូវបានប្រគល់ជូនរង្វាន់ល្អបំផុតផងដែរក្នុងវិស័យសាធារណៈ។ ប្រព័ន្ធថ្មីនេះអនុញ្ញាតឱ្យពលរដ្ឋចុះឈ្មោះរថយន្តរបស់ពួកគេតាមរយៈកម្មវិធីអនឡាញ ដែលអាចសន្សំសំចៃពេលវេលានិងថវិកា និងលុបបំបាត់ជាលំដាប់នូវការបង់ប្រាក់ក្រៅផ្លូវការ។ ការចុះឈ្មោះនិងការទូទាត់ប្រាក់ត្រូវបានធ្វើឡើងតាមប្រពន្ធ័អ៊ីនធើណេត។ មួយឬពីរថ្ងៃក្រោយមក ប្រជាពលរដ្ឋអាចទទួលបានបណ្ណ័សំគាល់យានយន្ត និងស្លាកលេខ។ វិធានការនេះគឺជាផ្នែកមួយនៃយុទ្ធសាស្ដ្រចតុកោណដំណាក់កាលទី3 នៃរាជរដ្ឋាភិបាលកម្ពុជាដែលមានបំណងសម្រួលដំណើរការនិងកាត់បន្ថយការធ្វើក្រដាសស្នាម ៕
July 22, 2017
ក្រសួងមហាផ្ទៃចាប់ផ្តើមបង្កើតមណ្ឌលប្រចាំបញ្ជាដើម្បីដោះស្រាយបញ្ហាជូនប្រជាពលរដ្ឋ
ភ្នំពេញៈ ក្នុងគោលដៅឆ្លើយតបនឹងកង្វល់ប្រជាពលរដ្ឋ និងដោះស្រាយបញ្ហាសណ្តាប់ធ្នាប់នានានៅទីក្រុងភ្នំពេញ ក្រសួងមហាផ្ទៃបាននិងកំពុងរៀបចំបង្កើតមណ្ឌលប្រចាំបញ្ជា ដើម្បីដោះស្រាយលើបញ្ហានេះ។
លោក មាស ម៉េតភក្តី អ្នកនាំពាក្យសាលារាជធានីភ្នំពេញបានថ្លែងឲ្យដឹងនាព្រឹកថ្ងៃទី21 កក្កដាម្សិលមិញនេះថា ក្រសួងមហាផ្ទៃកាលពីថ្ងៃទី18 កក្កដានេះបានប្រកាសបង្កើតមណ្ឌលប្រចាំបញ្ជានេះឡើងដើម្បីសម្រួលសណ្តាប់ធ្នាប់ សន្តិសុខ និងករណីផ្សេងៗទៀតនៅទីក្រុងភ្នំពេញតាមរយៈការបំពាក់កាមេរ៉ាតាមផ្លូវសំខាន់ៗជាង 1,000កន្លែងដើម្បីពិនិត្យមើលបញ្ហាខាងលើនេះ។ លោកបន្តថា មណ្ឌលប្រចាំបញ្ជានេះនឹងមានមន្រ្តីប្រចាំការចំនួន4ក្រុម និងមួយក្រុមមានគ្នាចំនួន16នាក់ ដែលពួកគេជាអ្នករង់ចាំទទួលព័ត៌មាន24ម៉ោង។
លោកបន្តថា ពេលមន្រ្តីទាំងនេះទទួលព័ត៌មានតាមរយៈទូរស័ព្ទសាធារណៈសម្រាប់ប្រជាពលរដ្ឋអាចតេចូលបាន គឺមន្រ្តីទាំងនោះនឹងផ្តល់ព័ត៌មានដល់មន្រ្តីមានសមត្ថកិច្ចតាមផ្នែកនីមួយៗ ដើម្បីឲ្យពួកគេអាចចុះអន្តរាគមន៍បានទាន់ពេលវេលា។
លោក ម៉េត មាសភក្តី បានបន្តថា ការិយាល័យមណ្ឌលប្រចាំបញ្ជា គឺស្ថិតនៅក្នុងនៅសាលាក្រុងភ្នំពេញ ហើយការងារនេះកំពុងតែរៀបចំដំណើរការ និងរំពឹងអាចធ្វើការពេញលេញបម្រើប្រជាពលរដ្ឋនៅពេលឆាប់ៗនេះ ព្រោះការបំពាក់កាមេរ៉ាសម្រេចបានប្រមាណ80ភាគរយរួចហើយ៕
July 22, 2017
តោខៀវ Chelsea ប្រកាសពីការបំពេញការផ្ទេរ Morata ក្នុងកិច្ចសន្យា 5ឆ្នាំ
ក្លិបតោខៀវ Chelsea បានប្រកាសពីការចុះហត្ថលេខាជាមួយនឹងខ្សែប្រយុទ្ធ Alvaro Morata ពីក្លិប Real Madrid ក្នុងកិច្ចសន្យារយៈពេល5ឆ្នាំ។ ខ្សែប្រយុទ្ធអន្តរជាតិអេស្ប៉ាញរូបនេះ គឺជាកីឡាករចំណូលថ្មីទី3របស់ Chelsea នៅរដូវក្តៅនេះ ក្រោយពីការផ្ទេររបស់ខ្សែការពារ Antonio Rudiger មកពីក្លិប Roma និងខ្សែបម្រើ Tiemoue Bakayoko មកពីក្លិប Monaco ហើយ Morata ត្រូវបានគេជឿជាក់ថា មានតម្លៃខ្លួន58លានផោន (ស្មើនឹង 75លានដុល្លារអាមេរិក)។ Morata វ័យ24ឆ្នាំ បានឲ្យដឹងថា៖ «ខ្ញុំពិតជារីករាយណាស់ក្នុងការមកទីនេះ។ វាជាការរំជួលចិត្តដ៏មិនគួរឲ្យជឿ ក្នុងការក្លាយជាសមាជិករបស់ក្លិបដ៏ធំមួយនេះ។
ខ្ញុំកំពុងតែសម្លឹងឆ្ពោះទៅកាន់ការធ្វើការងារដ៏លំបាក និងស៊ុតបាល់បញ្ចូលទីឲ្យបានច្រើនតាមដែលខ្ញុំអាច និងឈ្នះពានឲ្យបានច្រើនតាមដែលអាចធ្វើបាន។ Morata ត្រូវបានរំពឹងទុកថា នឹងត្រូវចូលជំនួសកន្លែងមិត្តរួមជាតិរបស់គេគឺ Diego Costa ដែលត្រូវបានប្រាប់ដោយលោកគ្រូបង្វឹក Antonio Conte ថា អនាគត រូបគេមិនមានវត្តមាននៅក្លិប Chelsea ឡើយ។ Costa ត្រូវបានរំពឹងទុកថា នឹងទៅចូលរួមជាមួយនឹងក្លិប Atletico Madrid វិញ ក្រោយពីបានផ្ទេរទៅកាន់ក្លិប Chelsea កាលពីខែកក្កដា ឆ្នាំ2014 ក្នុងតម្លៃខ្លួន32លានផោន។
លោក Michael Emenalo ប្រធានក្លិប Chelsea បាននិយាយថា Morata អាចបង្កើតឲ្យមានឥទ្ធិពលដ៏ធំទាំងក្នុងការប្រកួតលីកក្នុងស្រុក និងក្របខ័ណ្ឌ Champions League។ លោក Emenalo បានឲ្យដឹងថា៖ «យើងពិតជារីករាយណាស់ក្នុងការបំពេញការចុះហត្ថលេខា Alvaro និងសូមស្វាគមន៍រូបគេមកកាន់ក្លិបនេះ។ យើងជឿជាក់ថា រូបគេនឹងបង្កើតភាពអស្ចារ្យសម្រាប់ Chelsea»៕
ប្រភពពី៖ The Guardian
July 22, 2017
ម្ដងនេះច្បាស់ហើយ! Galaxy Note 8 ត្រៀមបង្ហាញខ្លួននៅខែក្រោយ
ម្ដងនេះច្បាស់ហើយ និងគ្មានអ្វីត្រូវសង្ស័យទៀតទេ ក្រោយពីក្រុមហ៊ុនបច្ចេកវិទ្យាយក្សកូរ៉េខាងត្បូង Samsung បានធ្វើការចែកជូនលិខិតអញ្ជើញភ្ញៀវកិត្តិយស និងអ្នកសារព័ត៌មានចូលរួមក្នុងព្រឹត្តិការណ៍ Unpacked នៅទីក្រុង New York ថ្ងៃទី23 ខែសីហា ឆ្នាំ2017 ព្រមជាមួយនឹងការផ្សាយបន្តផ្ទាល់នៅលើគេហទំព័ររបស់ Samsung ទៀតផង។
តាមរយៈគេហទំព័រ រួមជាមួយ Page Facebook របស់ក្រុមហ៊ុន Samsung កម្ពុជា យើងបានឃើញមានការផ្លាស់ប្ដូរ Cover ទៅជារូបទូរស័ព្ទអមដោយប៊ិកពណ៌មួយដើម ដោយមានសរសេរដាក់ថា «រង់ចាំមើលមើល៍ថា តើនៅថ្ងៃទី23 ខែសីហា ឆ្នាំ2017 នឹងមានព្រឹត្តិការណ៍ធំអ្វីកើតឡើង?»។
ទោះនៅក្នុងរូបមិនបានបញ្ជាក់ថាជាទូរស័ព្ទអ្វីមែន ប៉ុន្ដែតាមរយៈរូបប៊ិកមួយនោះ យើងអាចសម្គាល់បានយ៉ាងច្បាស់ថា វាជាទូរស័ព្ទ Galaxy Note ជំនាន់ថ្មី គឺ Note 8 តែម្ដង។ ចំពោះស្មាតហ្វូនថ្មីនេះ ជាទម្លាប់ គឺSamsungនឹងបំពាក់អេក្រង់ខ្នាតធំជាងត្រកូល S ដទៃទៀតជានិច្ច ព្រមជាមួយនឹងប៊ិក S-Pen មួយដែលមានមុខងារថ្មីៗពីមួយជំនាន់ទៅមួយជំនាន់។
យ៉ាងណាមិញ ក្រុមហ៊ុនមិនបានបញ្ជាក់ពីសមត្ថភាព ក៏ដូចជាលក្ខណសម្បត្តិអ្វីទាំងអស់លើស្មាតហ្វូនមួយនេះ ប៉ុន្តែតាមដំណឹងបែកធ្លាយគឺ Galaxy Note 8 អាចនឹងមានអេក្រង់ទំហំ 6.3 អ៊ីញ អេក្រង់ Super AMOLED ជំនាន់ថ្មី 18.5:9 aspect ratio ដូចនឹងត្រកូល S ដទៃទៀតដែរ។ មិនតែប៉ុណ្ណោះ វាអាចនឹងមានប្រើនូវ បន្ទះឈីបជំនាន់ចុងក្រោយរបស់ Exynos និង Snapdragon ហើយមាន Ram ទំហំ 6GB។ ក្នុងនោះ វាក៏អាចជាស្មាតហ្វូនដំបូងគេផងដែរដែលបំពាក់ប្រព័ន្ធកាមេរ៉ាភ្លោះរបស់ Samsung និងមានថាមពលថ្ម 3300mAh៕
July 22, 2017
ទីផ្សារអាផាតមិន ប្រឈមមុខនឹងការប្រកួតប្រជែងកាន់តែខ្លាំង
ភ្នំពេញៈ ទីផ្សារអាផាតមិន បាននិងកំពុងប្រឈមមុខនឹងការប្រកួតប្រជែងកាន់តែខ្លាំង ដោយសារតែការកើនឡើងនូវការផ្គត់ផ្គង់ បើទោះបីជាតម្រូវការមានការកើនឡើងក៏ដោយ។
លោកឧកញ៉ា នួន រិទ្ធី អគ្គនាយកក្រុមហ៊ុន KFA ដែលបានវិនិយោគលើអគារអាផាតមិនចំនួន1កន្លែងនៅតំបន់បឹងត្របែកបានថ្លែងឲ្យដឹងតាមទូរស័ព្ទកាលពីថ្ងៃទី21 កក្កដានេះថា ទីផ្សារអាផាតមិនបានស្ថិតក្នុងសភាពទ្រឹង ដោយសារតែមានការប្រកួតប្រជែងកើនឡើង ព្រោះមានការផ្គត់ផ្គង់កាន់តែច្រើននៅក្នុងទីផ្សារបើទោះជាតម្រូវការជួលក៏មានកំណើនដែរក៏ដោយ ប៉ុន្តែនិន្នាការទីផ្សារបានផ្លាស់ប្តូរ ដោយសារខុនដូសម្រាប់ប្រជាជនមានជីវភាពមធ្យមបានផ្តល់ការបង់រំលស់ត្រឹមមួយខែពី 400ទៅ 500ដុល្លារ ដែលបានធ្វើឲ្យអ្នកជួលអាផាតមិនក្នុងតម្លៃប្រហាក់ប្រហែលគ្នានេះងាកមកសម្រេចចិត្តទិញខុនដូបង់រំលស់ជំនួសវិញ។
លោកបន្តថា “ទោះជាមានការប្រកួតប្រជែងខ្លាំងក្តី ក៏ប៉ុន្តែតម្លៃជួលអាផាតមិនមិនទាន់ធ្លាក់ចុះនៅឡើយទេ ដោយសារអ្នកជួលអាផាតមិនមានជម្រើសកាន់តែច្រើនដើម្បីជ្រើសរើសទីតាំងនៅជិតកន្លែងធ្វើការរបស់ពួកគេ”។
អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងស្រដៀងគ្នាថា ទីផ្សារអាផាតមិនពិតជាមានការប្រកួតប្រជែងខ្ពស់ ដោយសារចំនួនយូនីតថ្មីៗដែលដាក់ចូលទីផ្សារបានកើនឡើងខ្ពស់ ស្របពេលចំនួនខុនដូបញ្ចប់ការសាងសង់ក៏បានកើនឡើងព្រមគ្នាផងដែរ។លោកបន្តថា តាមការព្យាកររហូតដល់ដំណាច់ឆ្នាំនេះនឹងមានអាផាតមិនចន្លោះពី7,000ទៅ8,000យូនីតត្រូវបានដាក់ចូលទីផ្សារ ដែលចំនួននេះមានភាពប្រហាក់ប្រហែលគ្នានឹងចំនួនខុនដូផងដែរ។
លោកបន្តថា “បច្ចុប្បន្នខ្ញុំសង្កេតឃើញទីផ្សារអាផាតមិនមិនទាន់ប្រឈមបញ្ហាធ្ងន់ធ្ងរទេ ប៉ុន្តែរយៈពេល2ទៅ3ឆ្នាំខាងមុខ តម្លៃអាផាតមិននឹងធ្លាក់ចុះ ព្រោះចរន្តនៃការប្រកួតប្រជែងកាន់តែលំបាក”៕
July 22, 2017
ថ្ងៃបង្ហាញ Nokia 8 ជាថ្ងៃដែលអ្នកផលិតស្មាតហ្វូនមួយនេះ លាលែងចេញពីការងារ
លោក Arto Nummela បានលាលែងចេញពីតំណែងជានាយកប្រតិបត្តិ (CEO ) របស់ក្រុមហ៊ុន HMD Global នាថ្ងៃតែមួយនឹងថ្ងៃបើកសម្ពោធទូរស័ព្ទ Nokia 8 និងត្រូវបានដាក់ជំនួសមកវិញដោយលោក Florian Seiche ជានាយកប្រតិបត្តិស្តីទីរបស់ក្រុមហ៊ុនដែលទើបនឹងរីកលូតលាស់មួយនេះ។
ការលាលែងពីតំណែងមួយនេះអាចធ្វើមុនមួយថ្ងៃ ឬចំថ្ងៃសម្ពោធ Nokia 8 តែម្ដង ហើយព័ត៌មានមួយនេះមិនត្រូវបានក្រុមហ៊ុន HMD Global បញ្ជាក់ប្រាប់ពីមូលហេតុលម្អិតថាយ៉ាងណានោះទេ ខណៈដែលអ្នកតាមដានរឿងនេះជាច្រើននាក់យល់ឃើញថា លោក Arto Nummela ជាមនុស្សមានស្នាដៃល្អក្នុងការដឹកនាំក្រុមហ៊ុន ដោយលោកបានធ្វើឱ្យម៉ាកសញ្ញា Nokia រស់ឡើងវិញម្ដងទៀតក្រោមយុទ្ធសាស្រ្តទីផ្សារដ៏ល្អរបស់គាត់។
ក្រោមការដឹកនាំរបស់លោក Arto ក្រុមហ៊ុនHMD Global បានដាក់ចេញនូវស្មាតហ្វូន Android ចំនួន 3 ធំៗគឺ Nokia 3, Nokia 5, Nokia 6 និងទូរស័ព្ទ Nokia 3310 (2017) ហើយចុងក្រោយនេះ គឺ Nokia 8 ដែលវាបានក្លាយជាសមិទ្ធផលចុងក្រោយបន្ទាប់ពីលោកចាកចេញ។
លោក Sam Chin អគ្គនាយករបស់ក្រុមហ៊ុន HMD Global បានឱ្យដឹងថា លោក Arto Nummela បានដើរតួយ៉ាងសំខាន់ក្នុងការបង្កើតប្រតិបត្តិការរបស់ក្រុមហ៊ុន HMD Global ការកសាងក្រុមការងារ និងការបង្ហាញនូវផលិតផលដំបូងៗជាច្រើន ហើយការចាកចេញនេះវាជាកិច្ចព្រមព្រៀងរវាងគាត់នឹងក្រុមប្រឹក្សាភិបាលរបស់ក្រុមហ៊ុន៕
July 22, 2017