Author: វល័ក្ខ

ភ្នំពេញ៖ ទីតាំងដែលធ្លាប់តែស្ងាត់ជ្រងំដែលប្រជាពលរដ្ឋខ្មែរខ្លះសឹងតែមិនស្គាល់ និងមិនធ្លាប់ឮឈ្មោះផងនោះ ឥឡូវបែរជាមានមនុស្សទៅលេងច្រើនកុះករភ្លូកទឹកភ្លូកដី ធ្វើឱ្យអ្នករស់នៅក្បែរៗនោះញញឹមរីកមុខរីកមាត់តាមរយៈការលក់វត្ថុអនុស្សាវរីយ៍ អាហារហូបចុកផ្សេងៗទៅដល់អ្នកទេសចរ ដែលធ្វើឱ្យជីវភាពរស់នៅរបស់ពួកគាត់ ដែលជាអ្នកស្រុកស្រែជនបទដាច់ស្រយាលនោះមានភាពល្អប្រសើរឡើងពីមួយថ្ងៃទៅមួយថ្ងៃ។

លោក សេង អាន ប្រធានមន្ទីរទេសចរណ៍ខេត្តកំពង់ធំ បានជម្រាបជូនឯកឧត្តមបណ្ឌិត ថោង ខុន ក្នុងឱកាសដែលឯកឧត្តមអញ្ជើញចុះជួបប្រជាសហគមន៍ និងសិស្សានុសិស្ស ក្នុងកិច្ចប្រជុំបូកសរុបការងារសហគមន៍ទេសចរណ៍នៅតំបន់ប្រាសាទសំបូរព្រៃគុក និងគម្រោងផែនការអភិវឌ្ឍន៍ទេសចរណ៍នៅតំបន់នេះទៅអនាគត កាលពីថ្ងៃទី27 ខែកក្កដា ឆ្នាំ2017នេះបានឱ្យដឹងថា ក្នុងរយៈពេល6ខែដើមឆ្នាំ2017 ខេត្តកំពង់ធំទទួលបានទេសចរជាតិ និងអន្តរជាតិចំនួន12ម៉ឺននាក់តែប៉ុណ្ណោះ ប៉ុន្តែអ្វីដែលលោកនឹកស្មានមិនដល់នោះគឺ ក្នុងថ្ងៃសង្ក្រាន្ត នៅតំបន់ទេសចរណ៍ប្រាសាទសំបូរព្រៃគុកត្រឹមតែរយៈពេល3ថ្ងៃប៉ុណ្ណោះមានទេសចរមកទស្សនា20ម៉ឺននាក់បន្ថែមទៀត។

ដោយឡែកចាប់តាំងពីក្រោយពេលដែលតំបន់ប្រាសាទសំបូរព្រៃគុកត្រូវបានដាក់បញ្ចូលជាសម្បត្តិបេតិកភណ្ឌពិភពលោករួចមក ភ្ញៀវទេសចរជាតិ និងអន្តរជាតិដែលបានមកទស្សនាតំបន់នេះមានការកើនឡើងជារៀងរាល់ថ្ងៃដោយបានបង្កើតការងារជូនប្រជាពលរដ្ឋ និងរកចំណូលបានច្រើនជាងមុនទៀតផង។

ក្នុងឱកាសនោះឯកឧត្តមបណ្ឌិត ថោង ខុន បានផ្ដាំផ្ញើប្រជាពលរដ្ឋសហគមន៍ថា ក្នុងនាមជាអ្នកម្ចាស់ស្រុកត្រូវចូលរួមអភិរក្សថែរក្សា និងខិតខំអភិវឌ្ឍតំបន់ប្រាសាទសំបូរព្រៃគុកនេះជាមួយកម្លាំងសមត្ថកិច្ច និងអាជ្ញាធរពាក់ព័ន្ធដើម្បីទាក់ទាញភ្ញៀវទេសចរ ឱ្យមកទស្សនាកាន់តែច្រើន និងត្រូវរៀបចំផ្ទះស្នាក់នៅ (Home Stay) សេវាមគ្គុទេសក៍ និងសេវាពាក់ព័ន្ធផ្សេងៗទៀតដើម្បីត្រៀមខ្លួនទទួលទេសចរដែលកំពុងកើនឡើងជារៀងរាល់ថ្ងៃ។

ឯកឧត្តមរដ្ឋមន្ត្រីបានលើកឡើងបន្ថែមទៀតពីគម្រោងអភិវឌ្ឍន៍ទេសចរណ៍ជាច្រើន ពិសេសការកាត់បន្ថយភាពក្រីក្រតាមរយៈការបង្កើតការងារ និងឱកាសបង្កើនប្រាក់ចំណូលសម្រាប់សហគ្រាសខ្នាតតូច សិប្បកម្មខែ្មរ និងផលិតផលក្នុងស្រុកផ្សេងទៀត ដែលជួយធ្វើឱ្យមានភាពរីកចម្រើនផ្នែកសេដ្ឋកិច្ចរបស់ប្រជាពលរដ្ឋក្រីក្រ ជាពិសេសស្ដ្រី។

វិស័យទេសចរណ៍ជាវិស័យមួយយ៉ាងសំខាន់ក្នុងការកសាងសេដ្ឋកិច្ចសង្គមបង្កើតឱកាសការងារ ឱកាសមុខរបរ ប្រាក់ចំណូល លើកកម្ពស់ជីវភាពរស់នៅ និងការកាត់បន្ថយភាពក្រីក្រជូនប្រជាពលរដ្ឋ និងទំនាក់ទំនងកិច្ចសហប្រតិបត្តិការ និងភាពជាដៃគូល្អរវាងវិស័យទេសចរណ៍ និងវិស័យពាក់ព័ន្ធ ពិសេសវិស័យវប្បធម៌ បរិស្ថាន កសិកម្មជាដើមដែលអាចនឹងរៀបចំជាប្រភេទកសិ-ទេសចរណ៍ ទេសចរណ៍ជនបទ សហគមន៍ទេសចរណ៍ដែលរាជរដ្ឋាភិបាល បាននិងកំពុងយកចិត្តទុកដាក់លើកទឹកចិត្ត និងជំរុញយ៉ាងខ្លាំង។

បច្ចុប្បន្នសហគមន៍នេះកំពុងដំណើការល្អ និងកំពុងរីករាយត្រៀមទទួលបម្រើទេសចរជាតិ និងអន្តរជាតិដែលកំពុងកើនឡើងក្នុងការមកទស្សនាតំបន់ប្រាសាទសំបូរព្រៃគុក ដែលជាបេតិកភណ្ឌពិភពលោកនេះ។

សូមបញ្ជាក់ថា នៅឆ្នាំ2016កម្ពុជាទទួលបានទេសចរអន្ដរជាតិជាង5លាននាក់ កើនឡើង5% និងទេសចរក្នុងស្រុកជាង10លាននាក់ កើនឡើង10% ដោយនាំមកនូវចំណូលប្រមាណ 3,400លានដុល្លារ រួមចំណែកប្រមាណ13%នៃផលិតផលក្នុងស្រុកសរុប (GDP) និងបង្កើតការងារដោយផ្ទាល់ប្រមាណ 60ម៉ឺននាក់ និងការងារដោយប្រយោលរាប់សិបម៉ឺននាក់ទៀត។ ក្នុងរយៈពេល5ខែដើមឆ្នាំ2017នេះ កម្ពុជាទទួលបានទេសចរអន្តរជាតិចំនួនជិត2,3លាននាក់កើនឡើងជិត 12,5%ធៀបរយៈពេលដូចគ្នាឆ្នាំ2016។ នៅឆ្នាំ2020 គេរំពឹងថា កម្ពុជានឹងទទួលបានភ្ញៀវទេសចរអន្តរជាតិ 7លាននាក់ ដោយនឹងនាំមកនូវចំណូលជាតិប្រមាណ5.000លានដុល្លារអាមេរិក ហើយបង្កើតការងារដោយផ្ទាល់ប្រមាណ1លាននាក់ទៀតផង៕

https://www.youtube.com/watch?v=_OD_QPPP6FA

កុមារតូចៗជាផ្នែកយ៉ាងសំខាន់មួយដែលមិនអាចមើលរំលងបាន ព្រោះពួកគេនឹងក្លាយជាធនធានមនុស្សយ៉ាងសំខាន់នៅថ្ងៃអនាគត។ អ្វីគ្រប់យ៉ាងគឺចាប់ផ្តើមពីក្មេង ប្រសិនបើក្មេងមានគុណភាពនៃគំនិតខ្ពស់ នៅពេលដែលពួកគេធំឡើង គេនឹងក្លាយជាធនធានដែលមានភាពខ្លាំងក្លាសម្រាប់សង្គម។

នាពេលបច្ចុប្បន្ននេះ ត្រូវបានគេមើលឃើញថា នៅតាមដងផ្លូវក្តី នៅក្នុងទីផ្សារមួយចំនួនក្តី និងនៅតាមទីសាធារណៈសំខាន់ៗមួយចំនួនក្នុងទីប្រជុំជនក្តី ទិដ្ឋភាពនៃភាពអនាធិបតេយ្យបានស្តែងចេញតាមរយៈសកម្មភាពរបស់មនុស្សមួយចំនួនធំ ដែលមិនសូវខ្វល់ពីផលប៉ះពាល់នៃទង្វើរបស់ខ្លួន។

នៅលើដងផ្លូវយើងគ្រប់គ្នាសុទ្ធតែបានឃើញពីការបើកបរដែលរញ៉េរញ៉ៃ និងដណ្តើមគ្នាទៅមុន ឬគោរពច្បាប់ចរាចរណ៍មិនល្អ ដែលបណ្តាលឱ្យមានការកកស្ទះ ចំណែកឯនៅទីសាធារណៈ និងនៅតាមទីផ្សារមួយចំនួនយើងក៏បានឃើញផងដែរពីការចោលសំរាមក្រៅធុងសំរាម រួមទាំងការដាក់តាំងលក់យ៉ាងអនាធិបតេយ្យ។ សកម្មភាពទាំងនេះ បានធ្វើឱ្យប៉ះពាល់ដល់មនុស្សជាច្រើនផ្សេងទៀតដែលព្យាយាមគោរពនូវសណ្តាប់ធ្នាប់ល្អ ក៏ដូចជាគោរពច្បាប់។

ពាក់ព័ន្ធទៅនឹងបញ្ហានេះ លោកបណ្ឌិត ចាន់ សុផល បានធ្លាប់បានលើកឡើងនៅក្នុងបណ្តាញសង្គមរបស់លោកថា ការបណ្តុះបណ្តាលទម្លាប់ល្អ ជាពិសេសការបណ្តុះមនុស្សមិនឱ្យចោលសំរាមផ្តេសផ្តាស គឺគួរចាប់ផ្តើមពីកូនក្មេង ព្រោះប្រសិនបើយើងបានបណ្តុះបណ្តាលក្មេងឱ្យមានទម្លាប់ល្អ នៅពេលដែលគេធំឡើង គេនឹងរៀបចំខ្លួនឯងឱ្យមានសណ្តាប់ធ្នាប់។

ឆ្លើយតបជាមួយនឹងបញ្ហានេះផងដែរ ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងផងដែរថា ការអប់រំក្មេងជារឿងមួយ ពេលខ្លះក្មេងនៅសាលាតែប៉ុន្មានម៉ោងតែប៉ុណ្ណោះ ខណៈក្មេងនៅជាមួយអាណាព្យាបាលស្ទើរពេញមួយថ្ងៃ។ ការអប់រំ មនុស្សចាស់ឱ្យបង្កើតគំរូល្អដល់ក្មេងៗក៏ជារឿងសំខាន់មួយដើម្បីលុបបំបាត់ភាពអនាធិបតេយ្យក្នុងសង្គម៕

ភ្នំពេញ – តាមការព្យាកររបស់អ្នកជំនាញលើផ្នែកអចលនវត្ថុជាច្រើនបានបញ្ជាក់ថា នាពេលអនាគតឆាប់ៗខាងមុខនេះ ការអភិវឌ្ឍបែបធម្មជាតិដែលកាន់តែខិតទៅជិតតំបន់មាត់បឹង និងទន្លេនឹងមានការផុលផុសធ្វើឱ្យតម្លៃអចលនទ្រព្យនៅទីនោះនឹងឡើងថ្លៃខ្ពស់។

លោក ច្រឹក សុខនីម អគ្គនាយកក្រុមហ៊ុន Century 21Mekong បានលើកឡើងថា កម្ពុជាមានការអភិវឌ្ឍលើវិស័យអចលនទ្រព្យលឿនគួរឱ្យកត់សម្គាល់ ប៉ុន្ដែកម្ពុជាហាក់ដូចជាដើរបញ្ច្រស់ទៅនឹងប្រទេសអភិវឌ្ឍន៍មួយចំនួន ព្រោះគេមើលឃើញថា វិស័យនេះចាប់ផ្ដើមអភិវឌ្ឍចេញពីតំបន់ឧស្សាហកម្ម ពោលគឺតម្លៃដីនៅតាមតំបន់ឧស្សាហកម្មមួយចំនួន និងនៅតំបន់សេដ្ឋកិច្ចពិសេសមានការកើនឡើងខ្ពស់ដោយសារតែសម្បូរទៅដោយរោងចក្រ សហគ្រាសធំៗ។

អគ្គនាយកក្រុមហ៊ុន Century 21Mekong បានបញ្ជាក់ថា៖ «មូលហេតុតម្លៃដីនៅតំបន់ឧស្សាហកម្ម ឬតំបន់សេដ្ឋកិច្ចពិសេសមានតម្លៃខ្ពស់ ព្រោះនៅទីនោះមានមនុស្សទៅរស់នៅភាគច្រើនជាកម្មករដែលអ្នកអភិវឌ្ឍន៍ទៅទីនោះច្រើនតែសង់ផ្ទះជួលសម្រាប់កម្មករស្នាក់នៅជាដើម និងអ្នកខ្លះទៅរស់នៅដើម្បីធ្វើការលក់ដូរ ដែលធ្វើឱ្យមានលំហូរសេដ្ឋកិច្ចល្អ។ ទោះជាយ៉ាងណាគេមើលឃើញថា វាជាការវិនិយោគរយៈពេលខ្លី»។

ទោះយ៉ាងណាលោក សុខនីម បញ្ជាក់ថា បច្ចុប្បន្នអ្នកវិនិយោគនៅក្នុងស្រុកចាប់ផ្ដើមយល់កាន់ច្បាស់ពីអត្ថប្រយោជន៍ការអភិវឌ្ឍបែបធម្មជាតិហើយ ដូច្នេះហើយទើបយើងឃើញថា មានគម្រោងធំៗជាច្រើនចាប់ផ្ដើមងាកទៅរកការអភិវឌ្ឍនៅតំបន់ជាប់មាត់បឹង ឬទន្លេវិញម្តង ដូចជាគម្រោងអ័រគីដេវីឡា និងគម្រោងរបស់ក្រុមហ៊ុន OCIC ជាដើម បានចូលទៅដល់ក្នុងតំបន់ជ្រោយចង្វាហើយ ព្រោះអ្នកវិនិយោគទាំងនោះមានទស្សនវិស័យវែងឆ្ងាយក្នុងការវិនិយោគរយៈពេលយូរដោយពួកគាត់ជឿថា ទៅអនាគតគម្រោងក៏ដូចជាអចលនទ្រព្យ នឹងមានការឡើងថ្លៃខ្លាំង។ ជាមួយគ្នានេះលោកសង្កត់ធ្ងន់ថា៖ «កាលពីមុនប្រជាជនយើងរស់នៅឱ្យតែបានៗ មិនប្រកាន់អ្វីច្រើនទេ លុះសេដ្ឋកិច្ចគ្រួសារដើរល្អមានលុយច្រើនហើយ គាត់ចាប់ផ្ដើមគិតពីការរស់នៅប្រកបដោយផាសុកភាព និងភាពស្ងប់សុខដែលចំណុចទាំងនេះវាកើតចេញពីការអភិវឌ្ឍបែបធម្មជាតិនៅជិតមាត់បឹង ឬជិតមាត់ទន្លេនេះឯង»។

លោក ច្រឹក សុខនីម បន្ដថា ទៅអនាគតការអភិវឌ្ឍតាមបែបធម្មជាតិមិនមែនកើតឡើងតែក្នុងតំបន់ជ្រោយចង្វាមួយទេ ពោលគឺតំបន់ណាដែលជាប់ទៅនឹងបឹងទន្លេ នឹងត្រូវមានការអភិវឌ្ឍដូចគ្នាដែលធ្វើឱ្យតម្លៃដីមានការកើនឡើងខ្ពស់កប់ពពកជាក់ជាមិនខាន។ អ្វីដែលធ្វើឱ្យលោកហ៊ានអះអាងបែបនេះ ព្រោះយោងតាមបទពិសោធនៃប្រទេសអភិវឌ្ឍន៍ធំៗមួយចំនួនដូចជា ប្រទេសអាមេរិកដែលលោកបានទៅដល់ជាដើម។ ក្នុងនោះលោកបញ្ជាក់ថា៖ «យើងអាចមើលឃើញនៅក្នុងប្រទេសអភិវឌ្ឍន៍ដូចជា អាមេរិក តម្លៃផ្ទះជាប់ទន្លេ បឹង ព្រៃភ្នំមានតម្លៃថ្លៃណាស់ កន្លែងខ្លះមានតម្លៃដល់ទៅរាប់លានដុល្លារ ព្រោះការរស់នៅក្នុងតំបន់បែបនេះវាធ្វើឱ្យអ្នករស់នៅមានសុខភាពល្អ ទាំងរាងកាយ និងប្រាជ្ញាស្មារតី ពិសេសការរស់នៅតំបន់នេះអាចធ្វើឱ្យអ្នករស់នៅកាត់បន្ថយភាពស្មុគស្មាញពីការងារបានច្រើន»។

ដោយឡែកលោកឧកញ៉ា នួន រិទ្ធី អគ្គនាយកក្រុមហ៊ុន KFA បានទទួលស្គាល់ថា តំបន់អភិវឌ្ឍន៍ជាប់មាត់ទន្លេ ពិសេសតំបន់ជ្រោយចង្វាជាតំបន់ដែលមានសក្ដានុពលខ្លាំងក្នុងការអភិវឌ្ឍទាំងទៅលើគម្រោងលំនៅឋាន និងខុនដូសម្រាប់ពេលបច្ចុប្បន្ន និងទៅអនាគត។

អគ្គនាយកក្រុមហ៊ុន KFA បញ្ជាក់ថា៖ «មូលហេតុតំបន់ជាប់មាត់ទន្លេ ពិសេសតំបន់ជ្រោយចង្វាមានសក្ដានុពលសម្រាប់ការអភិវឌ្ឍ និងការរស់នៅ ព្រោះតំបន់នោះមានហេដ្ឋារចនាសម្ព័ន្ធល្អទៅហើយ វាក៏ជាតំបន់ដែលមានហុងស៊ុយល្អ មានទាំងទន្លេ ខ្យល់អាកាសត្រជាក់ដែលជាអំណោយផលដល់អ្នករស់នៅទីនោះអាចទទួលយកបានការរស់នៅបែបធម្មជាតិ ប្រកបដោយផាសុកភាព និងភាពសប្បាយរីករាយក្នុងសង្គមគ្រួសារ»៕

ភ្នំពេញ៖ លំហូរវិនិយោគផ្ទាល់ពីបរទេស(ថៅកែរោងចក្រ)ទៅក្នុងវិស័យកាត់ដេរបានធ្លាក់ចុះប្រមាណជា30% ក្នុងឆមាសទី1 ឆ្នាំ2017នេះ បើធៀបនឹងការធ្លាក់ចុះក្នុងរយៈពេលដូចគ្នាក្នុងឆ្នាំ2016ដែលមានត្រឹម5%ប៉ុណ្ណោះ។ នេះបើតាមរបាយការណ៍របស់ធនាគារជាតិនៃកម្ពុជាចំពោះវិស័យកាត់ដេរ។

របាយការណ៍បានបង្ហាញថា ការនាំចេញសម្លៀកបំពាក់ពីកម្ពុជាទៅកាន់ទីផ្សារអឺរ៉ុបប្រចាំឆមាសទី1 ឆ្នាំ2017បានធ្លាក់ចុះមកនៅត្រឹម4% ខណៈដែលឆមាសទី1 ឆ្នាំ 2016 កន្លងទៅ ការនាំចេញមានកំណើនដល់ទៅ 9% ឯណោះ។ ក្នុងនោះការនាំចេញទៅកាន់ទីផ្សារអាមេរិកធ្លាក់ចុះប្រមាណជា 2.3% ប៉ុន្តែកំណើនការនាំចេញទៅកាន់ប្រទេសអង់គ្លេស កាណាដា និងជប៉ុន នៅមានភាពល្អប្រសើរជាងមុនបន្តិច។

ការធ្លាក់ចុះនេះបណ្តាលមកពីកត្តាមួយចំនួនដូចជា 1.ការកើនឡើងនៃការប្រកួតប្រជែងនាំសម្លៀកបំពាក់ចេញពីប្រទេសនៅក្នុងតំបន់ ជាពិសេសប្រទេសវៀតណាម មីយ៉ាន់ម៉ា គួបផ្សំនឹងកត្តាខាងក្នុងដូចជាការដំឡើងប្រាក់ឈ្នួលអប្បបរមា(ប្រាក់ឈ្នួលខ្ពស់)ដែលធ្វើឱ្យតម្លៃដើមផលិតកើនឡើងជាដើម និង 2. ការថយចុះនៃភាពទាក់ទាញវិនិយោគក្នុងវិស័យនេះ ដោយសារកម្ពុជានឹងលែងទទួលបានការអនុគ្រោះពន្ធពីសហភាពអឺរ៉ុបក្នុងរយៈពេល3ឆ្នាំជាប់ៗគ្នាខាងមុខ បន្ទាប់ពីប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតទាប។ ក្នុងឆមាសទី1នេះការនាំចេញសម្លៀកបំពាក់មានសមាមាត្រ 67% នៃការនាំចេញក្រោមប្រព័ន្ធអនុគ្រោះ ថយចុះពី 74% និង28%រៀងគ្នា ខណៈដែលសមាមាត្រនាំចេញទៅកាន់ទីផ្សារជប៉ុនមានកំណើនទ្វេដងក្នុងរយៈពេល2ឆ្នាំចុងក្រោយរហូតដល់ 14% នៃការនាំចេញសរុបក្នុងវិស័យនេះ។

គួរកត់សម្គាល់ថា ស្ថិតក្នុងស្ថានភាពដែលសេដ្ឋកិច្ចពិភពលោកកំពុងងើបឡើង ការនាំចេញវិស័យកាត់ដេរនៃប្រទេសជិតខាងបានកើនឡើងខ្ពស់ដូចជា កំណើននៃការនាំចេញសម្លៀកបំពាក់របស់ប្រទេសវៀតណាមកើនឡើងខ្ពស់រហូតដល់ 11.2% ជាពិសេសការនាំចេញទៅកាន់ទីផ្សារសហរដ្ឋអាមេរិកដែលជាទីផ្សារធំជាងគេរបស់វៀតណាម ខណៈដែលការនាំចេញរបស់កម្ពុជាមានកំណើនយឺតជាងមុន ដោយសមាមាត្រនៃការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកបានថយចុះជាបន្តបន្ទាប់ចាប់ពីឆ្នាំ 2011 មក៕

ភ្នំពេញៈ ការផ្តល់ឥណទានរបស់គ្រឹះស្ថានមីក្រូហិរញ្ញវត្ថុនានានៅតែរក្សាបានកំណើនល្អប្រសើរ ជាក់ស្តែងគ្រឹះស្ថានមីក្រូហិរញ្ញវត្ថុអម្រឹតសម្រេចបានកំណើន11ភាគរយក្នុងដំណាច់ឆមាសទី1ឆ្នាំនេះធៀបរយៈពេលដូចគ្នាកាលពីឆ្នាំមុន។

អគ្គនាយកគ្រឹះស្ថានមីក្រូហិរញ្ញវត្ថុអម្រឹត លោក ជា ផល្លារិន បានថ្លែងឲ្យដឹងតាមទូរស័ព្ទនាព្រឹកថ្ងៃទី27 កក្កដានេះថា ស្ថានភាពនៃឥណទានរបស់យើងនៅឆ្នាំនេះនៅតែរក្សាបានកំណើនល្អ ដោយទំហំទឹកប្រាក់បានកើនពី594លានដុល្លារកាលពីដំណាច់ឆ្នាំមុនដល់630លានដុល្លារនៅដំណាច់ត្រីមាសទី2ឆ្នាំនេះ ស្មើនឹងកំណើន11ភាគរយ និងប្រាក់បញ្ញើបានកើនពី283លានដុល្លារកាលពីដំណាច់ឆ្នាំមុនមកដល់330លានដុល្លារនៅដំណាច់ឆមាសទី1ឆ្នាំនេះ។

លោកបន្តថា កម្រិតនៃឥណទានរបស់យើងមិនមានបញ្ហានោះទេទោះបីជាដ្ឋាភិបាលកំណត់ពិដានការប្រាក់ក្តី ប៉ុន្តែយ៉ាងណាក៏ដោយសម្រាប់ស្ថាប័នរបស់លោកមិនប្រឈមមុខនឹងកង្វះទុនសម្រាប់ធ្វើប្រតិបត្តិការនោះទេ។

លោក ជា ផល្លារិន បានបន្តថា “ទោះជាមានបញ្ហាខ្លះក្តី ប៉ុន្តែយើងអាចយកប្រាក់ចំណេញពីផ្នែកផ្សេងទៀតមកប៉ះប៉ូវបាន ហើយយើងកំពុងពង្រឹងបុគ្គលិករបស់យើងឲ្យកាន់តែមានសមត្ថភាពដើម្បីធ្វើឲ្យប្រាកដថា ឥណទានដែលយើងបានបញ្ចេញទៅជាឥណទានមានគុណភាព។ សម្រាប់អម្រឹតមិនមានបញ្ហាទេ ប្រសិនជាស្ថិតក្នុងស្ថានភាពដូចសព្វថ្ងៃនេះ”៕