Author: វល័ក្ខ

ភ្នំពេញ៖ នៅក្នុងឆមាសទី1 ឆ្នាំ2017នេះចំនួនទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុ បានកើនឡើង21.8% មានចំនួនជាទឹកប្រាក់126.8ទ្រីលានរៀលដែលគាំទ្រដោយកំណើនមូលនិធិកម្ចីដើមទុនរបស់សាមីគ្រឹះស្ថាន និងប្រាក់បញ្ញើរបស់អតិថិជនដែលនេះបើយោងតាមរបាយការណ៍របស់ធនាគារជាតិកម្ពុជាចេញផ្សាយកាលពីពេលថ្មីៗ។

របាយការណ៍ដែលត្រូវបានចែកផ្សាយនៅក្នុងសន្និបាតបូកសរុបលទ្ធផលការងារឆមាសទី1 និងលើកទិសដៅការងារឆមាសទី2 ឆ្នាំ2017នេះបង្ហាញថា មូលនិធិកម្ចីបានកើនឡើង29.5% ដល់12ទ្រីលានរៀល ក្នុងនោះដើមទុនមានកំណើន26%ដល់23.7ទ្រីលានរៀល ប្រាក់បញ្ញើអតិថិជនបានកើនឡើង23.4%ដល់70.8ទ្រីលានរៀល និងឥណទានបានកើនឡើង20.4% ដល់76.5ទ្រីលានរៀល។ ទន្ទឹមនឹងនេះចំនួនអ្នកដាក់ប្រាក់បញ្ញើកើនដល់ 4.8លាននាក់ ហើយចំនួនអ្នកខ្ចីប្រាក់ពីធនាគារមានចំនួនដល់ទៅ 2.6លាននាក់ឯណោះ។

ដោយសារកំណើននៃការខ្ចីប្រាក់ពីធនាគារ និងគ្រឹះស្ថានមីក្រូហិរញ្ញវត្ថុនេះហើយ បច្ចុប្បន្នស្ថាប័នទាំងនេះបានពង្រីកវិសាលភាពដែនសេវាកម្មតាមរយៈការបង្កើនសាខា និងបណ្តាញប្រតិបត្តិការនៅតាមរាជធានីខេត្ត-ក្រុង ការបង្កើនចំនួនម៉ាស៊ីនដក និងដាក់ប្រាក់ស្វ័យប្រវត្តិ (ATM) និងការផ្តល់សេវាទូទាត់អេឡិចត្រូនិក។ ជាក់ស្តែងសាខា និងបណ្តាញប្រតិបត្តិការ មានចំនួន 2,286 កន្លែង និងម៉ាស៊ីនដកប្រាក់ និងដាក់ប្រាក់ស្វ័យប្រវត្តិកើនដល់ 1,722កន្លែង ម៉ាស៊ីន(17.6%) ហើយសេវាផ្ទេរប្រាក់ទូទាត់សងប្រាក់អេឡិចត្រូនិកត្រូវបានប្រើប្រាស់ទូលំទូលាយ និងងាយស្រួលជាងមុន។

ជាមួយគ្នានេះគ្រឹះស្ថានមីក្រូហិរញ្ញវត្ថុក៏បានរក្សានូវភាពគ្រប់គ្រាន់នៃដើមទុន និងសន្ទនីយភាពយ៉ាងរឹងមាំដែលបង្ហាញតាមរយៈអនុបាតសាធនភាពជាមធ្យមប្រមាណ 23.6% និង22.2% និងអនុបាតសន្ទនីយភាពប្រមាណជា132.1% និង203% រៀងគ្នា។

បន្ថែមពីនេះ គ្រឹះស្ថានបានគ្រប់គ្រងឥណទានយ៉ាងមានប្រសិទ្ធភាព ដោយរក្សាបាននូវអនុបាតឥណទានមិនដំណើរការមានកម្រិតទាប ជាមធ្យមប្រមាណ2.5%សម្រាប់គ្រឹះស្ថានធនាគារ និង2%សម្រាប់គ្រឹះស្ថានមីក្រូហិរញ្ញវត្ថុ។

គួរបញ្ជាក់ថា មកទល់បច្ចុប្បន្នកម្ពុជាមានធនាគារពាណិជ្ជចំនួន39 ធនាគារឯកទេស15 គ្រឹះស្ថានមីក្រូហិរញ្ញវត្ថុទទួលប្រាក់បញ្ញើសាធារណជន7 គ្រឹះស្ថានមីក្រូហិរញ្ញវត្ថុ66 ប្រតិបត្តិការឥណទានជនបទ267 ក្រុមហ៊ុនភតិសន្យាហិរញ្ញវត្ថុ12 អ្នកដំណើរការតតិយភាគី13 ក្រុមហ៊ុនក្រេឌីតប្យូរ៉ូកម្ពុជា1 ការិយាល័យតំណាងធនាគារឯកទេស6 និងអាជីវករប្តូរប្រាក់មានចំនួន 2,437 ទីតាំង៕

ភ្នំពេញៈ រដ្ឋមន្រ្តីក្រសួងពាណិជ្ជកម្មបានថ្លែងថា លំហួរទុនវិនិយោគផ្ទាល់ពីបរទេសលើវិស័យសំខាន់ៗចំនួន4 ដែលជាកម្លាំងចលករនៃសេដ្ឋកិច្ចបានជួយ ជំរុញកំណើនសេដ្ឋកិច្ចកម្ពុជា។

មានប្រសាសន៍នៅក្នុងពិធីប្រកាសតែងតាំងប្រធានមន្ទីរពាណិជ្ជកម្មខេត្តក្រចេះថ្មីកាលពីម្សិលមិញ លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជម្មបានលើកឡើងថា ក្រោមការដឹកនាំរបស់ប្រមុខរាជរដ្ឋាភិបាល អ្វីៗដែលជាបញ្ហាប្រឈមត្រូវបានកាត់បន្ថយ និងជម្នះបានជាជំហានៗ។

លំហូរនៃការវិនិយោគពីខាងក្រៅលើវិស័យទេសចរណ៍ ផលិតកម្មកសិកម្ម ឧស្សាហកម្ម រួមទាំងវិស័យវាយនភណ្ឌនៅតែបន្ដទ្រទ្រង់ដល់កំណើនសេដ្ឋកិច្ចកម្ពុជា។

ជាមួយនឹងពិធីតែងតាំងនាពេលនេះ ឯកឧត្តមរដ្ឋមន្រ្តីមានជំនឿថា មន្ត្រីនៅទីនេះសុទ្ធតែមានបទពិសោធការងារយូរឆ្នាំគួបផ្សំនឹងសមត្ថភាពជំនាញខ្លាំងច្បាស់ជានឹងសម្រេចបាននូវលទ្ធផលការងារធំៗថ្មីៗជូនអង្គភាពខេត្ត និងក្រសួង និងទទួលបានការគាំទ្រពីមហាជនខ្លាំងមិនខាន។

ក្រៅពីចំណងសាមគ្គីភាពផ្ទៃក្នុងហើយ ចំណុចសំខាន់មួយទៀតដែលមិនអាចខ្វះបាន គឺត្រូវយកចិត្តទុកដាក់បង្កើនកិច្ចសហការល្អ និងស្អិតល្មួតជាមួយគ្រប់ស្ថាប័ន អង្គភាព និងសមត្ថកិច្ចពាក់ព័ន្ធ និងគោរពតាមការចង្អុលណែនាំរបស់ក្រុមប្រឹក្សាខេត្ដ គណៈអភិបាលខេត្ដ ក៏ដូចជាថ្នាក់ដឹកនាំក្រសួងផងដែរ។

លោក ប៉ែន លីណាត អភិបាលស្តីទីនៃគណៈអភិបាលខេត្តក្រចេះបានជម្រាបពីសកម្មភាព និងលទ្ធផលការងាររបស់ខេត្តក្នុងការរក្សាសន្តិសុខ សុវត្ថិភាព សណ្តាប់ធ្នាប់សាធារណៈ និងផែនការអភិវឌ្ឍន៍របស់ខេត្ត ព្រមទាំងបង្ហាញពីលទ្ធផលបង្កបង្កើនផលរបស់ប្រជាពលរដ្ឋក្នុងខេត្ត និងស្នាដៃអនុវត្តការងារយ៉ាងល្អរបស់អតីតប្រធានមន្ទីរពាណិជ្ជកម្មខេត្តក្រចេះនាពេលកន្លងមកផងដែរ៕

បើនិយាយពីការសិក្សាខ្លាំង ឬខ្សោយ មនុស្សមួយចំនួនធំ តែងតែទម្លាក់កំហុសលើស្ថានភាពក្រៅខ្លួននានា ហើយបណ្តោយខ្លួនឱ្យធ្លាក់ទៅក្នុងស្ថានភាពដែលមិនល្អ ព្រោះគេផ្តេកផ្តួលទៅលើឧបសគ្គខាងក្រៅច្រើនជាងការខិតខំប្រឹងប្រែងដោយខ្លួនឯង។ មនុស្សខ្លះបន្ទោសលើខួរក្បាលមិនល្អ មនុស្សខ្លះបន្ទោសលើសុខភាពមិនសូវល្អ មនុស្សខ្លះបន្ទោសលើគ្រូ ហើយខ្លះទៀតបន្ទោសលើបរិស្ថានជុំវិញ តែពួកគេមិនសូវមើលពីស្ថានភាពក្នុងខ្លួនរបស់ពួកគេ ហើយក៏មិនសូវមានទំនុកចិត្តលើខ្លួនឯង។ នេះជាការលើកឡើងរបស់លោក ចេង បូរិទ្ធ អតីតសិស្សពូកែរូបវិទ្យាទូទាំងប្រទេស និងជានិស្សិតដែលទទួលបានអាហារូបករណ៍ទៅសិក្សាផ្នែកគណិតវិទ្យានៅបរទេស។

លោក ចេង បូរិទ្ធ បានលើកឡើងថា៖ «បញ្ហាសំខាន់ដែលរុញច្រានឱ្យមនុស្សជោគជ័យក្នុងការសិក្សាគឺ យើងខ្លួនឯង ប្រសិនបើយើងមានការតាំងចិត្តខ្ពស់ មានភាពរឹងមាំ និងទំនុកចិត្តលើខ្លួនឯង នោះយើងនឹងអាចជម្នះអ្វីគ្រប់យ៉ាង»។

លោក បូរិទ្ធ បានលើកឡើងផងដែរថា ដើម្បីបង្កើនទំនុកចិត្តលើខ្លួនឯង និងបង្កើនសក្តានុពលជីវិតឱ្យកាន់តែមានថាមពលខ្លាំង ទាំងក្នុងជីវិតសិក្សា និងការងារ ចាំបាច់ត្រូវគិតដល់ចំណុចសំខាន់មួយចំនួនដូចជា សុខភាព ការគិត និងស្មារតី។

សុខភាពជារឿងសំខាន់មួយដែលមិនអាចមើលរំលង ព្រោះការតស៊ូក្នុងដំណើរជីវិត ទាមទារឱ្យមានការប្រយុទ្ធរយៈពេលវែង ប្រសិនបើយើងមានសុខភាពល្អ យើងនឹងអាចតស៊ូបានជាមួយនឹងឧបសគ្គលំបាកនានាបានយ៉ាងងាយ តែប្រសិនបើយើងមានសុខភាពមិនល្អ ការគិត និងស្មារតី ក៏មិនល្អទៅតាមនោះដែរ។ សម្រាប់សិស្សពូកែ ដែលពោរពេញទៅដោយការតស៊ូខាងលើ គឺលោកបានជម្នះបញ្ហាប្រឈមច្រើនជាងមនុស្សធម្មតា ព្រោះលោកមានជំងឺស្វិតជើងម្ខាង តែទោះជាយ៉ាងណាលោកមិនបណ្តោយឱ្យឧបសគ្គផ្នែករាងកាយនេះគ្របដណ្តប់លើភាពរឹងមាំរបស់លោកបានឡើយ។

លោកបានបញ្ជាក់ថា សុខភាពមិនសូវល្អពីកំណើតមិនមែនជាបញ្ហាធំទេ តែអ្វីដែលត្រូវគិតគឺការតស៊ូជម្នះវាឱ្យបាន។ ទោះជារាងកាយលោកមិនសូវមាំ ក៏លោកនៅតែឃើញពីភាពវិជ្ជមានសម្រាប់ជីវិត ហើយខិតខំហាត់ប្រាណដើម្បីទទួលបានភាពរឹងមាំផ្នែកសាច់ដុំ ហើយលោកក៏ធ្លាប់បំបែកកំណត់ត្រាខ្លួនឯងដោយជិះកង់រហូតជាង 100គីឡូម៉ែត្រថែមទៀតផង។

លោក ចេង បូរិទ្ធ បាននិយាយថា៖ «អ្នកចិត្តវិទ្យា បានរកឃើញថា អ្នកហាត់ប្រាណគឺមានភាពឆ្លាតវៃជាអ្នកមិនធ្លាប់ហាត់ប្រាណទៀងទាត់»។

ក្រៅពីការជម្នះបញ្ហាសុខភាព អតីតសិស្សពូកែថ្នាក់ជាតិរូបនេះក៏បានចែករំលែកបទពិសោធស្តីពីវិធីនៃការគិតដើម្បីទទួលបានជ័យជម្នះក្នុងដំណើរជិវិត។ លោកថា ដើម្បីក្លាយជាមនុស្សពូកែ យើងគួរតែចាប់ផ្តើមពីការបើកចិត្តឱ្យបានទូលាយទទួលយកគំនិតថ្មីៗដែលមានប្រយោជន៍ពីគ្រប់មជ្ឈដ្ឋាន តាមរយៈការអាន និងការស្រាវជ្រាវលើគំហើញថ្មីៗរបស់មនុស្ស។ ការអានអាចធ្វើឱ្យមនុស្សខ្សោយក្លាយជាមនុស្សខ្លាំងបាន ព្រោះលោកបានឆ្លងកាត់វាដោយខ្លួនឯងផ្ទាល់។

លោក បូរិទ្ធ មិនមែនជាសិស្សដែលមានមូលដ្ឋានគ្រឹះផ្នែកភាសាខ្ពស់ទេ នៅវិទ្យាល័យ តែពេលនេះលោកអាចចេះភាសាមួយចំនួនយ៉ាងស្ទាត់ជំនាញ ដូចជាភាសាខ្មែរដែលជាភាសាកំណើត ភាសាអង់គ្លេស ភាសាថៃ និងភាសាឡាវថែមទៀតផង។ ចំណេះដឹងភាសាទាំងនេះ កើតចេញពីការអាន ព្រោះការរៀនភាសាទាមទារឱ្យមនុស្សអានឱ្យបានច្រើន។ លោកសាកល្បងពង្រឹងសមត្ថភាពខ្លួនឯងម្តងហើយម្តងទៀតរហូតអាចអានបានយ៉ាងល្អ និងថែមទាំងអាចក្លាយជាអ្នកបកប្រែចំពោះឯកសារសំខាន់ៗមួយចំនួនថែមទៀតផងនាពេលបច្ចុប្បន្ននេះ។ ការអានមិនត្រឹមតែធ្វើឱ្យយើងចេះភាសាបានល្អប៉ុណ្ណោះទេ តែវាកាន់តែសំខាន់ទៅទៀតដើម្បីបើកចំហចិត្តខ្លួនឯង ទៅមើលពិភពខាងក្រៅដែលអ្នកនិពន្ធបានចងក្រងទុក ជាមួយនឹងបទពិសោធជីវិត រួមទាំងគំនិតល្អៗដែលត្រូវបានដកស្រង់ពីប្រវត្តិសាស្រ្ត។

ចំពោះបញ្ហាស្មារតីវិញ លោក ចេង បូរិទ្ធ លើកឡើងថា នៅពេលដែលយើងមានសុខភាពផ្នែកផ្លូវកាយ និងផ្លូវចិត្តល្អ ស្មារតីរបស់យើងក៏មានភាពរឹងមាំទៅតាមនោះដែរ។ ជាគន្លឹះដែលលោកចែករំលែក គឺព្យាយាមបង្កើនភាពចាស់ទុំរបស់ខ្លួនតាមរយៈការគ្រប់គ្រងអារម្មណ៍ឆេវឆាវឱ្យបាន ទប់ភាពសប្បាយជ្រុល ភាពសោកសៅជ្រុល និងបំបាត់អារម្មណ៍ធុញថប់នៅក្នុងចិត្តឱ្យបាន។ ដើម្បីគ្រប់គ្រងលើស្ថានភាពអវិជ្ជមានទាំងអស់នោះបាន ការហាត់ប្រាណ ការមើលភាពយន្តដែលផ្តល់នូវគំនិតល្អៗ ការអានទស្សនទានដែលមានប្រយោជន៍ និងសមាធិសុទ្ធតែជារឿងដែលយើងអាចធ្វើបាន។ ក្រៅពីនេះ យើងគួរស្វែងរកពេលសម្រាកឱ្យបានល្អ រួមទាំងស្វែងរកភាពស្ងប់ស្ងាត់ដើម្បីពិចារណាលើចំណុចដែលត្រូវកែលម្អសម្រាប់ខ្លួនឯង និងធ្វើអ្វីដែលយើងគិតថាសប្បាយចិត្ត ដើម្បីបង្កើនសុភមង្គលសម្រាប់ខ្លួនឯងឱ្យបានច្រើន។ នៅពេលដែលយើងសប្បាយចិត្តហើយ ការសិក្សា និងការងារក៏នឹងអភិវឌ្ឍបានល្អទៅតាមនោះដែរ៕

ខណៈកម្ពុជាគ្រោងនឹងធ្វើជាម្ចាស់ផ្ទះក្នុងការរៀបចំកម្មវិធីប្រកួតកញ្ញាឯក Miss Global 2017នាខែវិច្ឆិកាខាងមុខនេះ កញ្ញាសូរ្យ អេនណា អតីតបេក្ខភាព Miss Global 2016 បានសម្ដែងនូវមោទនភាព និងការជឿជាក់ចំពោះការជ្រើសរើសបេក្ខនារីតំណាងឱ្យកម្ពុជាដើម្បីចូលរួមប្រកួតប្រជែងជាមួយបេក្ខនារីមកពី80ប្រទេសផ្សេងទៀត។

កញ្ញា សូរ្យ អេនណា បានលើកឡើងថា នាងពិតមានមោទនភាពណាស់ខណៈកម្ពុជាមានឱកាសបានធ្វើជាម្ចាស់ផ្ទះ ព្រោះក្រោយពីនាងបានចូលរួមប្រកួតនៅបរទេសកាលពីឆ្នាំ2016មក នាងយល់ថា កម្មវិធីនេះជាការប្រកួតបវរកញ្ញាលក្ខណៈពិភពលោក និង Professional។ ម្យ៉ាងវាជាឱកាសក្នុងការផ្សព្វផ្សាយពីតំបន់ទេសចរណ៍នៅក្នុងប្រទេសកម្ពុជាទៅកាន់ឆាកអន្ដរជាតិក្រោយពីបេក្ខភាពទាំងអស់មកស្នាក់នៅក្នុងប្រទេសកម្ពុជារយៈពេល18 ថ្ងៃ និងធ្វើសកម្មភាពមនុស្សធម៌ និងសកម្មភាពជាច្រើនទៀត។

តារាសម្ដែងរូបនេះជាបញ្ជាក់ថា ចំពោះការរៀបចំកម្មវិធីនេះនាងជឿថា គណៈកម្មការដែលនឹងត្រូវជ្រើសរើសបេក្ខនារីតំណាងឱ្យប្រទេសកម្ពុជា សម្រាប់ចូលរួមការប្រកួតប្រជែងជាមួយបេក្ខនារីមកពីបរទេសនេះ នឹងធ្វើឡើងដោយភាពយុត្ដិធម៌បំផុត។ នាងសង្កត់ធ្ងន់ថា៖ «បេក្ខនារីដែលត្រូវជ្រើសរើស គឺត្រូវមានសមត្ថភាពខ្ពស់ ចំណេះដឹងច្បាស់ ព្រោះត្រូវឆ្លងកាត់វគ្គជម្រុះ និងឧបសគ្គច្រើន។

ម្យ៉ាងកម្មវិធីនេះវាជាមុខមាត់របស់ប្រទេសជាតិបើគាត់ចេះតែជ្រើសរើសមនុស្សគ្មានចំណេះដឹង វានឹងធ្វើឱ្យប៉ះពាល់ដល់មុខមាត់ប្រទេសជាតិ តែខ្ញុំជឿថា មិនអាចធ្វើអំពើអយុត្ដិធម៌ទៅរួចទេ ខ្ញុំមើលទៅពួកគាត់សុក្រឹតខ្លាំងណាស់»។

សូរ្យ អេនណា បន្ដថា សូម្បីតែកាលពីពេលជ្រើសរើសនាងជាបេក្ខភាពចេញទៅប្រកួតនៅក្រៅប្រទេសកាលពីឆ្នាំ2016នោះ ក៏ត្រូវបានជ្រើសរើសដោយ National Director មកពីសហរដ្ឋអាមេរិកដែរ ដោយគាត់សំអាងទៅលើចំណេះដឹងទូទៅ និងបទពិសោធធ្លាប់ចេញទៅក្រៅប្រទេសរបស់គាត់។ ទោះយ៉ាងណានាងទទួលស្គាល់ថា សមត្ថភាពរបស់យុវតីកម្ពុជាបច្ចុប្បន្នពិតជាអាចចួលប្រកួតប្រជែងជាមួយបេក្ខភាពមកពីបរទេសបានតាមរយៈរូបសម្ផស្ស និងចំណេះដឹងដែលពួកគេមាន៕

ភ្នំពេញៈ គ្រឹះស្ថានមីក្រូហិរញ្ញវត្ថុ Amanah Ikhtiyar របស់ប្រទេសម៉ាឡេស៊ី នឹងបើកដំណើរការនៅកម្ពុជាក្នុងពេលឆាប់ៗនេះ ដោយផ្តល់មូលនិធិមិនយកការប្រាក់សម្រាប់សាសនិកជនមូស្លីមនៅកម្ពុជា។

តំណាងស្ថាប័នមីក្រូហិរញ្ញវត្ថុ Amanah Ikhtiyar បានលើកឡើងក្នុងជំនួបជាមួយលោកអូស្មាន់ ហាស្សាន់ រដ្ឋមន្រ្តីអមប្រតិភូនាយករដ្ឋមន្រ្តី និងជារដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ថា ទោះបីក្នុងជំហានដំបូងស្ថាប័ននេះចាប់ផ្តើមពីការផ្តល់កម្ចីខ្នាតតូចក្តី តែគ្រឹះស្ថានយើងនឹងវិវឌ្ឍជាបណ្តើរៗដើម្បីទទួលបានបទពិសោធផង និងប្រើពេលវេលាដើម្បីស្វែងរកដៃគូវិនិយោគឱ្យកាន់តែមានទំហំដើមទុនច្រើនឡើងបន្ថែមទៀតផង។

Amanah Ikhtiyar Microfinance ក៏បានចាប់ផ្តើមឱ្យភាគីដៃគូនៅកម្ពុជា គឺអង្គការមូលនិធិអភិវឌ្ឍន៍មូស្លីមកម្ពុជាជ្រើសរើសបុគ្គលិកបម្រុង10រូប ជាជំហានដំបូង ដើម្បីត្រៀមខ្លួនចេញទៅសិក្សាជំនាញមីក្រូហិរញ្ញវត្ថុអ៊ិស្លាមនៅប្រទេសម៉ាឡេស៊ី ដែលគ្រោងនឹងចេញដំណើរនៅខែតុលា ឆ្នាំ2017ខាងមុខនេះ។

លោក អូស្មាន់ ហាស្សាន់ បានមានប្រសាសន៍ថា មីក្រូហិរញ្ញវត្ថុ Amanah Ikhtiyar កំពុងសហការជាមួយអង្គការមូលនិធិអភិវឌ្ឍន៍មូស្លីមកម្ពុជាដែលស្ថាប័នទាំងពីរនេះនឹងចូលរួមក្នុងការទ្រទ្រង់ការផ្តល់ហិរញ្ញប្បទានលក្ខណៈជាទ្រង់ទ្រាយតូចសិន ហើយការផ្តល់ហិរញ្ញប្បទាននេះនឹងផ្អែកទៅលើក្របខ័ណ្ឌសាសនាអ៊ិស្លាមដោយមិនមានយកការប្រាក់ឡើយ គឺគ្រាន់តែបង់ថ្លៃសេវាដំបូងប៉ុណ្ណោះ។ ឯកឧត្តមបានបន្តថា គ្រឹះស្ថានបែបនេះពិតជានឹងដំណើរការល្អប្រសើរជាមិនខាន ព្រោះវាជាផ្នែកមួយនៃការលើកស្ទួយ និងទ្រទ្រង់ដល់សហគ្រិនធុនតូចដែលពុំសូវមានដើមទុន អាចមានគំនិតចាប់ផ្តើមការវិនិយោគរបស់ខ្លួនក្នុងទំហំដើមទុនតូចល្មម ព្រមទាំងមិនមានហានិភ័យខ្ពស់ស្តីពីបញ្ហាសងប្រាក់បំណុលឡើយ ព្រោះកម្ចីមិនត្រូវបានគិតពីការប្រាក់ទេ៕

វិនិយោគិន​ដ៏​លេច​ធ្លោ​ក្នុង​វិស័យ​ជា​ច្រើន​នៅ​កម្ពុជា​បាន​អះអាង​ថា សេដ្ឋកិច្ច​កម្ពុជា​នឹង​រឹត​តែ​រីក​ចម្រើន ខ្លាំង​បន្ថែម​ទៀត បើ​កម្ពុជា​ទទួល​បាន​វិនិយោគិន​ជប៉ុន​ត្រឹម​តែ​2%​នៃ​ចំនួន​វិនិយោគិន​ជប៉ុន​ ដែល​​​ចូល​ទៅ​វិនិយោគ​ក្នុង​ប្រទេស​ថៃ។

លោកជំទាវ លឹម ឈីវហូ អគ្គនាយិកា​ក្រុមហ៊ុន LCH Investment Group Co,. Ltd ដែល​ជា​ក្រុមហ៊ុន​មាន​ក្រុមហ៊ុន​បុត្រ​សម្ព័ន្ធ​ជា​ច្រើន​ក្នុង​វិស័យ​ជំនួញ​ដូច​ជា អចលន​ទ្រព្យ អប់រំ និង​តំបន់​សេដ្ឋកិច្ច​ពិសេស​នោះ បាន​អះអាង​ពី​ភាព​ច្បាស់លាស់​របស់​វិនិយោគិន​ជប៉ុន​ក្នុង​ការ​បណា្តក់​ទុន​ប្រកប​អាជីវកម្ម​ក្នុង​ប្រទេស​ណា​មួយ​។ លោក​ជំទាវ​ បញ្ជាក់​ថា កម្ពុជា​នឹង​ក្លាយ​ជា​ប្រទេស​មាន​សំណាង ហើយ​អាច​ក្លាយ​ជា​ប្រទេសមាន​សេដ្ឋ​កិច្ច​រីក​ចម្រើន​ខ្លាំង​ទៀត​ផង ​បើ​សិនកម្ពុជា​ទទួល​បាន​វិនិយោគិន​ជប៉ុន​កាន់​តែ​ច្រើន​បន្ថែម​ទៀត ខណៈ​បច្ចុប្បន្ន​វិនិយោគិន​ជប៉ុន ​ដែល​មក​វិនិយោគ​នៅ​កម្ពុជា​នៅ​មាន​ចំនួន​តិច​តួច​បំផុត បើ​ធៀប​ទៅ​នឹង​ការ​ចូល​ទៅ​វិនិយោគ​ក្នុង​ប្រទេស​ថៃ​។

លោកជំទាវ​ មាន​ប្រសាសន៍​ថា ៖“បើ​សិន​ជា​ក្រុមហ៊ុន​ជប៉ុន​តែ​2% នៃ​ក្រុមហ៊ុន​ជប៉ុន​វិនិយោគ​នៅ​ប្រទេស​​ថៃ​ចូល​មក​វិនិយោគ​នៅ​កម្ពុជា ប្រទេស​កម្ពុជា​អាច​ធ្វើ​ជា​អ្នក​មាន ហើយ​ប្រជាជន​ខ្មែរ​នឹង​មាន​ការ​ងារ​​ធ្វើ​ទាំង​អស់​គ្នា”។ រហូត​មក​ដល់​ពេល​នេះ​សម្រាប់​វិនិយោគិន​ខ្មែរ​ទាំង​អស់​ ទំនង​ជា​មាន​តែ​លោក​ជំទាវ​ លឹម ឈីវហូ ម្នាក់​​ប៉ុណ្ណោះ​​​ដែល​បាន​ចាប់​ដៃគូ​ជាមួយ​ក្រុមហ៊ុន​ជប៉ុន​ជាច្រើន ដោយ​សារ​តែ​​ក្រុមហ៊ុន​​ជប៉ុនភាគ​ច្រើន​​បាន​ប្រមូល​ផ្តុំ​គ្នា​នៅ​តំបន់​សេដ្ឋកិច្ច​ពិសេស​ភ្នំពេញ ដែល​គ្រប់​គ្រង​ដោយ​លោក​ជំទាវ​ លឹម ឈីវហូ។ ក្រុមហ៊ុន​សរុប​នៅ​ក្នុង​តំបន់​សេដ្ឋកិច្ច​ពិសេស​ភ្នំពេញ មាន​ចំនួន​84​ក្រុម​ហ៊ុន ក្នុង​នោះ​50​ក្រុមហ៊ុន​ជា​ក្រុមហ៊ុន​របស់​ជប៉ុន។

នៅ​ក្នុង​កិច្ច​ពិភាក្សា​ជា​សាធារណ​ជាមួយ​វាគ្មិន​ល្បីៗ​ក្នុង​វិស័យ​អចលនទ្រព្យ​ នា​ពេល​កន្លងមក លោក​ជំទាវ លឹម ឈីវហូ បាន​ប្រាប់​ពី​មូលហេតុ​ខ្លះ​ដែល​វិនិយោគិន​ជប៉ុន​យល់​ឃើញ និង​មិន​ចូល​មក​វិនិយោគទុន​នៅ​កម្ពុជា។

លោក​ជំទាវ​បញ្ជាក់​ថា​៖“​មូលហេតុ​អ្វី​បាន​ជា​ប្រទេស​កម្ពុជា គេ (ជប៉ុន)​ មក​ជួយ​តែ​ស្ពាន ថ្នល់ តែ​គេ​មិន​មក​វិនិយោគ​? ខ្ញុំ​តែង​ទាម​ទារ​ហើយ​អង្វរ​គេ​ថា ហេតុ​អី​មិន​មក​វិនិយោគ​នៅ​កម្ពុជា ព្រោះ​កម្ពុជា​​មាន​ស្ថិរភាព​នយោបាយ​ល្អ ដី​ក៏​ថោក កម្លាំង​ពលកម្ម​ក៏​ថោក ហើយ​ច្បាស់​លាស់​ទៀត។ គាត់​(ជប៉ុន)​គិត​ថា ប្រទេស​កម្ពុជា ទី1 មាន​អំពើ​ពុក​រលួយ​ច្រើន ទី2 ការ​វិនិយោគ​មិន​ច្បាស់​លាស់ ដូចជា​ការ​រត់​អាជ្ញាប័ណ្ណ អាច​ត្រូវ​ប្រើ​ពេល​រាប់​ឆ្នាំ ការ​ធ្វើ​ការងារ​អ្វីៗ​មិន​ច្បាស់លាស់​ជាដើម”។

លោក​ជំទាវ​បាន​អះអាង​ថា ក្រោយ​ពី​ការ​បញ្ចុះ​បញ្ចូល និង​មាន​ការ​ធានា​ដល់​វិនិយោគិន​ជប៉ុន​ពី​ភាព​ស្អាត​ស្អំ និង​ច្បាស់លាស់ ទើប​ក្រុមហ៊ុន​លោក​ជំទាវ​អាច​ទាក់​ទាញ​ក្រុមហ៊ុន​ជប៉ុន​មួយ​ចំនួន​បាន​មក​ចាប់​ដៃគូ​ដើម្បី​បង្កើត​រោងចក្រ​នៅ​តំបន់​សេដ្ឋកិច្ច​ពិសេស​ភ្នំពេញ។

តំបន់​សេដ្ឋកិច្ច​ពិសេស​ភ្នំពេញ​ ជា​ក្រុមហ៊ុន​ដែល​បាន​ចុះ​បញ្ជី​នៅ​ផ្សារ​មូលបត្រ​កម្ពុជា​​ក្នុង​ខែមេសា​ឆ្នាំ​2016 ហើយ​ជា​ក្រុមហ៊ុន​ឯកជន​ទី2 ដែលបាន​ចុះ​បញ្ជី​នៅ​ផ្សារ​មូលបត្រ។ ដោយសារ​មាន​ក្រុមហ៊ុន​ជប៉ុន​វិនិ​យោគ​ច្រើន​នៅ​តំបន់​សេដ្ឋកិច្ច​ពិសេស ហើយ​ប្រព័ន្ធ​គ្រប់គ្រង​មាន​ភាព​ច្បាស់លាស់ ទើប​ធ្វើ​ឱ្យ​តម្លៃហ៊ុន​របស់​តំបន់​សេដ្ឋកិច្ច​ពិសេស​ភ្នំពេញ មានភាពទាក់​ទាញ​ខ្លាំង៕