ភ្នំពេញ – បច្ចុប្បន្ននេះសកម្មភាពនៃការទិញ-លក់ដីឡូត៍ កំពុងមានភាពផុលផុសយ៉ាងខ្លាំង ខណៈដែលគម្រោងនីមួយៗសុទ្ធតែបានផ្តល់នូវលក្ខខណ្ឌងាយៗសម្រាប់អតិថិជនដូចជាការកំណត់តម្លៃទាប និងវិធីសាស្រ្តបង់ប្រាក់តាមដំណាក់កាលរយៈពេលវែង ជាដើម។ ទន្ទឹមនឹងលក្ខខណ្ឌងាយស្រួលទាំងអស់នេះ មានអតិថិជនមួយចំនួនហាក់ពុំបានដឹងថា តើការទិញដីឡូត៍គេត្រូវពិនិត្យមើលទៅលើអ្វីខ្លះដើម្បីកុំឱ្យជួបហានិភ័យនោះទេ?
លោក ថាវ លីណា អគ្គនាយកក្រុមហ៊ុន Camblossom Development & Investment Co,ltd ដែលជាក្រុមហ៊ុនអភិវឌ្ឍន៍គំរោងសុរិន្ទភូមិ និងមានដីឡូត៍ពុះលក់នៅតំបន់ភាគខាងត្បូងរាជធានីភ្នំពេញបានលើកឡើងថា បច្ចុប្បន្នកម្ពុជាពុំទាន់មាននីតិវិធីគតិយុត្តណាកំណត់ឱ្យបានជាក់លាក់ស្ដីពីការពុះដីឡូត៍លក់នោះទេ ដូច្នេះប្រជាជន ឬអតិថិជនដែលមានបំណងចង់ទិញដីឡូត៍ត្រូវទាមទារឱ្យមានចំណេះដឹងក្នុងការពិនិត្យឯកសារពាក់ព័ន្ធមួយចំនួន ដើម្បីបញ្ចៀសនូវហានិភ័យផ្សេងៗដែលអាចកើតឡើងជាយថាហេតុ។
អគ្គនាយកក្រុមហ៊ុន សុរិន្ទភូមិ បានបញ្ជាក់ថា មានចំណុចសំខាន់ៗមួយចំនួនដែលគេត្រូវយកចិត្តទុកដាក់ដូចជា ៖
1. តើនរណាជាអ្នកអភិវឌ្ឍន៍ ជាក្រុមហ៊ុន ឬជាបុគ្គល និងកេរ្ដិ៍ឈ្មោះអ្នកអភិវឌ្ឍន៍?
ក្នុងករណីក្រុមហ៊ុន គឺយើងត្រូវពិនិត្យមើលកេរ្ដិ៍ឈ្មោះ ឬឯកសារផ្លូវច្បាប់របស់ក្រុមហ៊ុននោះឱ្យច្បាស់លាស់។ ករណីជាបុគ្គលយើងត្រូវមើលថា តើគាត់មានសិទ្ធិកាន់កាប់ស្របច្បាប់ដែរ ឬទេ? តើគាត់កាន់កាប់ជាប្លង់រឹង ឬប្លង់ទន់? ដីកាន់កាប់មានវិវាទដែរ ឬទេ? ពោលយើងត្រូវមើលពីស្នូលនៃអ្នកអភិវឌ្ឍន៍ឱ្យបានច្បាស់ ព្រោះនេះជាចំណុចសំខាន់បំផុតដែលទាមទារឱ្យអតិថិជនត្រូវសិក្សាឱ្យបានច្បាស់លាស់បំផុត។
2. គម្រោងអភិវឌ្ឍន៍(Master Plan) យើងត្រូវមើលថា តើក្រុមហ៊ុនអភិវឌ្ឍន៍មានMaster Plan គូរដោយសា្ថបត្យករត្រឹមត្រូវដែរ ឬទេ?
តើប្លង់នោះជាប្លង់សម្រាប់សាងសង់ពិតប្រាកដ ឬគ្រាន់តែជាគំនូរ 3D សម្រាប់យកមកដាក់លក់ជូនអតិថិជន? ក្រៅពីនេះយើងត្រូវមើលទៅលើប្លង់វិស្វកម្មថែមទៀត ព្រោះចំណុចទាំងនេះជារឿងសំខាន់ណាស់សម្រាប់ការរស់នៅរបស់អតិថិជនទៅថ្ងៃក្រោយ។ យើងត្រូវមើលថា តើតំបន់នោះមានការអភិវឌ្ឍគិតពីតំបន់បៃតងដែរ ឬទេ? ពាក្យថា អភិវឌ្ឍន៍បៃតងមិនមែនសំដៅតែទៅលើការដាំដើមឈើមួយមុខនោះទេ គឺត្រូវគិតពីប្រព័ន្ធលូ ក្លិន ទឹកស្អុយ និងហេដ្ឋារចនាសម្ព័ន្ធជាដើម។ មូលហេតុយើងត្រូវពិនិត្យលើចំណុចទាំងនេះ ព្រោះវាជាប្រយោជន៍របស់អ្នកប្រើប្រាស់ដើម្បីឱ្យដឹងថាការអភិវឌ្ឍរបស់ក្រុមហ៊ុននឹងត្រូវរៀបចំឱ្យអតិថិជនដែលបានទិញដីរបស់គាត់អាចរស់នៅកន្លែងនោះប្រកបដោយផាសុកភាព និងសុខុមាលភាពទៅថ្ងៃអនាគតដែរ ឬទេ? បន្ទាប់មកអតិថិជនត្រូវចេះទៅធ្វើបច្ចុប្បន្នភាពនៅក្នុងការដ្ឋាន ឬដីកំពុងអភិវឌ្ឍន៍នោះបន្ថែមទៀតដើម្បីឱ្យដឹងថា តើក្រុមហ៊ុន ឬម្ចាស់ដីនោះគាត់បានបំពេញការអភិវឌ្ឍទៅតាមលក្ខខណ្ឌនៅពេលធ្វើកិច្ចសន្យាទិញលក់ដែរ ឬទេ?
3. កិច្ចសន្យាទិញ-លក់
ចំណុចនេះយើងត្រូវពិនិត្យឱ្យបានហ្មត់ចត់ ព្រោះជួនកាលក្រុមហ៊ុនអាចប្រើលក្ខខណ្ឌមួយចងមកលើអតិថិជនខ្លួន ច្រើនជាងចង់ទៅលើក្រុមហ៊ុនខ្លួនឯង។ ឧទាហរណ៍ ដូចជាក្រុមហ៊ុនរបស់ខ្ញុំ នៅពេលធ្វើកិច្ចសន្យាទិញ-លក់ដី ខ្ញុំបានកំណត់ពេលវេលាមួយអាចឱ្យអតិថិជនចូលសាងសង់លំនៅឋានរបស់គាត់បាន ប្រសិនបើខ្ញុំធ្វើមិនបានតាមកិច្ចសន្យា គាត់អាចពិន័យមកក្រុមហ៊ុនបានតាមរយៈការសងត្រឡប់ទៅវិញជាការប្រាក់។ ផ្ទុយទៅវិញអតិថិជនត្រូវបង់លុយឱ្យក្រុមហ៊ុនតាមពេលវេលាដែលបានកំណត់ក្នុងកិច្ចសន្យាដូចគ្នាប្រសិនបើយឺតយ៉ាវខ្ញុំក៏ត្រូវពិន័យលើគាត់វិញដែរ យើងធ្វើបែបនេះដើម្បីទទួលបានភាពស្មើគ្នា។ មានន័យថា បើក្រុមហ៊ុនខ្ញុំធ្វើអ្វីខុសចំពោះអតិថិជន ពួកគាត់មានសិទ្ធិពិន័យ តែបើអតិថិជនធ្វើអ្វីខុសក្រុមហ៊ុនក៏អាចពិន័យគាត់វិញដូចគ្នា។ ដូច្នេះកិច្ចសន្យាទិញ-លក់ ត្រូវធ្វើឡើងដោយតម្លាភាព។
4. ត្រូវចេះធ្វើបច្ចុប្បន្នភាពទៅប្លង់រឹង
អតិថិជនត្រូវចេះតាមដានប្លង់រឹងរៀងរាល់3ខែ ឬ6ខែម្ដង ទំរាំអតិថិជនខ្លួនឯងទទួលបានសិទ្ធិកាន់កាប់ស្របច្បាប់ ឬប្លង់រឹង មានន័យថា យើងត្រូវដឹងថា ដីឡូត៍ដែលយើងទិញវានៅតែមានស្ថិរភាពល្អ ឬទេ? មូលហេតុត្រូវធ្វើបច្ចុប្បន្នភាពព្រោះយើងបារម្ភខ្លាចមានករណីពេលទិញដីនោះវាជាប្លង់រឹងពិតមែន លុះបីខែក្រោយមកម្ចាស់ដី ឬម្ចាស់គម្រោងអភិវឌ្ឍន៍យកប្លង់រឹងនោះទៅដាក់បញ្ចាំនៅក្នុងធនាគារ ដែលអាចធ្វើឱ្យយើងជួបហានិភ័យក្នុងការទទួលបានកម្មសិទ្ធិស្របច្បាប់។ ចំណុចនេះមានក្រុមហ៊ុនខ្លះអាចនឹងធុញទ្រាន់នៅពេលអតិថិជនទៅធ្វើបច្ចុប្បន្នភាពលើប្លង់រឹងនោះ ប៉ុន្ដែបើក្រុមហ៊ុនស្របច្បាប់ដែលរកស៊ី ឬអភិវឌ្ឍន៍ពិតប្រាកដគេកាន់តែសប្បាយចិត្តនៅពេលអតិថិជនធ្វើបែបនេះ ព្រោះវាកាន់តែបង្កើនទំនុកចិត្ដជូនអតិថិជន បើគាត់ជឿលើក្រុមហ៊ុនណាមួយហើយនោះ នៅពេលក្រុមហ៊ុនមានគម្រោងថ្មីពួកគាត់នឹងជួយផ្សព្វផ្សាយបន្ដ ឬអាចទិញបន្ថែមទៀត។ ដោយឡែកសម្រាប់ក្រុមហ៊ុនខ្ញុំ អតិថិជនអាចមកធ្វើបច្ចុប្បន្នភាពគ្រប់ពេល ព្រោះខ្ញុំមានក្រុមអ្នកច្បាប់សម្រាប់រក្សាឯកសារទាំងនោះនៅរង់ចាំធ្វើការងារជាមួយអតិថិជនលើរឿងនេះ។ ការធ្វើបែបនេះវាឆ្លុះបញ្ចាំងពីភាពស្អាតស្អំរបស់ក្រុមហ៊ុនក្នុងនាមជាអ្នកអភិវឌ្ឍន៍ពិតប្រាកដ។ ឧទាហរណ៍ក្រុមហ៊ុនខ្ញុំបានសន្យាថា ក្រោយពេលអតិថិជនប្រគល់លុយគ្រប់ឱ្យក្រុមហ៊ុន យើងនឹងកាត់ប្លង់ឱ្យគាត់ ដូច្នេះយើងនឹងធ្វើទៅតាមកិច្ចសន្យាដោយពុំពន្យារពេលអ្វីឡើយ ព្រោះប្លង់រឹងរបស់យើងពុំបានជាប់បន្ទុកដាក់ធានាបំណុលធនាគារឡើយ។
ជាមួយគ្នានេះដែរ លោក ថាវ លីណា បញ្ជាក់ថា ប្រសិនបើអ្នកប្រកបអាជីវកម្មលើការពុះដីឡូត៍បច្ចុប្បន្ននាំគ្នាអនុវត្ដន៍សកម្មភាពនៃការទិញ-លក់ឱ្យមានតម្លាភាព និងភាពស្អាតសំ្អចំពោះអតិថិជនវាជារឿងល្អបំផុត ព្រោះវានឹងធ្វើឱ្យការទិញលក់កើតមានផុសផុល ជាចំណែកមួយចូលរួមជំរុញកំណើនសេដ្ឋកិច្ចកម្ពុជាផងដែរ៕
