ធនធានមនុស្សជាផ្នែកយ៉ាងមានសក្តានុពលនៅក្នុងសង្គម ដែលអាចធ្វើឱ្យប្រទេសអភិវឌ្ឍបានប្រកបដោយនិរន្តរភាព។ ការកសាងធនធានមនុស្សត្រូវបានគេចាត់ទុកថា ជាចំណុចអាទិភាពសម្រាប់ប្រទេសទាំងឡាយលើពិភពលោកមិនថាប្រទេសអភិវឌ្ឍន៍ ឬប្រទេសកំពុងអភិវឌ្ឍន៍នោះទេ ព្រោះធនធានមនុស្សជាផ្នែកមួយដែលមានឥទ្ធិពលលើគ្រប់វិស័យទាំងអស់។
ពាក់ព័ន្ធនឹងបញ្ហានេះ លោក គង់ វិចិត្រា ស្ថាបនិកស្ថាប័ន V-training and Consultant និង Asia Leading Academy បានលើកឡើងថា ការកសាងធនធានមនុស្សជាចំណុចសំខាន់មួយដែលមនុស្សគ្រប់គ្នាត្រូវយកចិត្តទុកដាក់។ នៅពេលដែលប្រទេសមានធនធានមនុស្សប្រកបដោយគុណភាពច្រើន គ្រប់ចង្វាក់ផលិតកម្មលើវិស័យសេដ្ឋកិច្ចក៏ចាប់ផ្តើមរស់រវើក ហើយអ្នកវិនិយោគបរទេសក៏នឹងសម្លឹងឃើញពីសក្តានុពលនៃប្រទេសនោះ ហើយបណ្តាក់ទុនរកស៊ីកាន់តែច្រើនឡើង។
លោក គង់ វិចិត្រា បាននិយាយថា៖ «តាមពិតទៅ យើងគ្រប់គ្នាគួរតែមានបេសកកម្មមួយសម្រាប់ជីវិតខ្លួនឯងក្នុងការរួមចំណែកកសាងធនធានមនុស្សសម្រាប់សង្គមរបស់យើង។ ការប្រើប្រាស់ចំណេះដឹងដើម្បីជួយបណ្តុះបណ្តាលដល់មនុស្សដទៃក្នុងសង្គមជារឿងល្អបំផុតមួយដែលប្រជាជនខ្មែរគួរធ្វើ តែប្រសិនបើគ្មានលទ្ធភាពបង្រៀនអ្នកដទៃក៏យើងអាចជួយប្រទេសយើងបានដែរតាមរយៈការពង្រឹងសមត្ថភាពខ្លួនឯងឱ្យក្លាយជាធនធានមនុស្សប្រកបដោយគុណតម្លៃសម្រាប់សង្គម»។
សហគ្រិនដែលស្រឡាញ់ការអប់រំរូបនេះបានលើកឡើងផងដែរពីបទពិសោធជីវិតដែលស្រឡាញ់វិស័យអប់រំតាំងពីក្មេង។ លោកបានចាប់ផ្តើមធ្វើការងាររបស់លោកដំបូងជាបុគ្គលិកដែលធ្វើការងារនៅក្នុងក្រុមហ៊ុនឯកជន បន្ទាប់មកក៏ចាប់ផ្តើមសម្រេចក្តីស្រមៃរបស់ខ្លួនក្នុងការជួយបណ្តុះបណ្តាលជនពិការកម្ពុជាតាមរយៈការបង្កើតអង្គការមូលនិធិអង្គការកុមារពិការ (KPF) មុននឹងបោះជំហានថ្មីមួយទៀតលើវិស័យអប់រំ។
នៅឆ្នាំ 2007 លោក គង់ វិចិត្រា បានប្រឡងជាប់ក្របខ័ណ្ឌជាសាស្ត្រាចារ្យផ្នែកគ្រប់គ្រងអាជីវកម្ម និងភាពជាអ្នកដឹកនាំ ហើយលោកក៏បានឈានជើងកាន់តែលឿនលើការបណ្តុះបណ្តាលធនធានមនុស្ស។
លោក គង់ វិចិត្រា បាននិយាយថា៖ «បច្ចុប្បន្ននេះ កម្ពុជាត្រូវការធនធានមនុស្សផ្នែកសហគ្រិនភាពយ៉ាងខ្លាំង ហេតុនេះខ្ញុំនាមជាអ្នកស្រឡាញ់ការអប់រំ ខ្ញុំយល់ឃើញថា សហគ្រិនភាពជាជំនាញមួយដែលប្រជាជនខ្មែរគួរចេះឱ្យបានទូលំទូលាយ»។
ដោយយល់ឃើញថា សង្គមត្រូវការជំនាញសហគ្រិនភាព និងអ្នកអភិវឌ្ឍន៍សមត្ថភាពរបស់មនុស្ស លោក គង់ វិចិត្រា បានសម្រេចចិត្តប្រើចំណេះដឹង និងបទពិសោធជាង 10 ឆ្នាំរបស់លោកក្នុងវិស័យគ្រប់គ្រង និងការអភិវឌ្ឍធនធានមនុស្សដើម្បីមកធ្វើការបណ្តុះបណ្តាលដល់យុវជនកម្ពុជា។ លោកបានបោះជំហានថ្មីមួយសម្រាប់ជីវិត តាមរយៈការបង្កើតមជ្ឈមណ្ឌលបណ្តុះបណ្តាល និងប្រឹក្សាយោបល់ ដល់អង្គការក្រៅរដ្ឋាភិបាល ក្រុមហ៊ុនឯកជន និងយុវជននានានៅកម្ពុជា ស្របពេលដែលលោកនៅឈរជាឆ្អឹងខ្នងដ៏រឹងមួយរបស់អង្គការមូលនិធិអង្គការកុមារពិការ ក្នុងនាមជាទីប្រឹក្សា។
លោក គង់ វិចិត្រា លើកឡើងផងដែរថា ក្នុងនាមលោកជាជនពិការម្នាក់ដែររបស់កម្ពុជា លោកនឹងព្យាយាមកសាងសមត្ថភាពឱ្យក្លាយជាសហគ្រិនម្នាក់ដើម្បីជាគំរូ និងផ្តល់ជម្រើសសម្រាប់ជនពិការដទៃផ្សេងទៀតនៅកម្ពុជាឱ្យបានយល់ថា ទោះបីជាគាត់ពិការក៏ដោយ តែគាត់អាចធ្វើការងារបានគ្រប់បែបយ៉ាង មិនថាស្ថាប័នរដ្ឋ អង្គការក្រៅរដ្ឋាភិបាល ឬក្រុមហ៊ុនឯកជននោះទេ។ ក្តីស្រមៃរបស់លោក គឺចង់ឃើញយុវជនទាំងអស់នៅកម្ពុជា ដែលក្នុងនោះមានយុវជនពិការផងនោះ មានលទ្ធភាពគ្រប់គ្រាន់ដើម្បីបង្កើតសហគ្រាស និងធ្វើការងារសំខាន់ៗដើម្បីចូលរួមចំណែកអភិវឌ្ឍសង្គមរបស់យើងប្រកបដោយប្រសិទ្ធភាព៕
