វល័ក្ខ - La Reine Media

ប្រទេសកម្ពុជា ជាទីផ្សារសក្តានុពលសម្រាប់ក្រុមហ៊ុនល្បីៗ

ឧស្សាហកម្មកែសម្ផស្ស គឺជាឧស្សាហកម្មដែលមានសក្តានុពលបំផុតនៅតាមបណ្ដាប្រទេសជាច្រើននៅជុំវិញពិភពលោក ជាពិសេសនៅក្នុងប្រទេសកម្ពុជា ក៏មានការកើនឡើងនៃប្រាក់ចំណូល និងការយកចិត្តទុកដាក់លើការថែរក្សាសម្ផស្ស រហូតបានជំរុញឱ្យមានការកើនឡើងផងដែរនូវតម្រូវការផលិតផលសម្ផស្ស និងគ្រឿងសំអាងនៅក្នុងប៉ុន្មានឆ្នាំថ្មីៗនេះ។ ការនាំចូលនៃគ្រឿងសំអាងបានកើនឡើង បួនដងក្នុងចន្លោះឆ្នាំ 2010 និង 2014 ។

ក្នុងគោលបំណងដើម្បីបំពេញតម្រូវការនេះ Beauty Connect Expo Cambodia ពិព័រណ៍ និងសន្និសីទអន្តរជាតិ ប្រចាំឆ្នាំស្តីពីគ្រឿងសំអាងថែរក្សាសម្ផស្ស និងសក់ ដែលត្រូវបានបង្កើតនៅឆ្នាំ 2016។ ជាផ្នែកមួយនៃការតាំងពិព័រណ៍ ពាណិជ្ជកម្មគ្រឿងសំអាងឈានមុខគេនៅក្នុងប្រទេសកម្ពុជា Beauty Connect Expo Cambodia 2016 បានទាក់ទាញ អ្នកតាំងពិព័រណ៍ប្រមាណ 55 ក្រុមហ៊ុនមកពី 10 ប្រទេសរួមមាន ប្រទេសកូរ៉េ, ម៉ាឡេស៊ី, សិង្ហបុរី, ជប៉ុន, បារាំង, តៃវ៉ាន់ ថៃ និងហុងកុង ដើម្បីបង្ហាញផលិតផលរបស់ខ្លួន។ ដោយមានវត្តមានរបស់អ្នកតាំងពិព័រណ៍អន្ដរជាតិ និងសកម្មភាពដ៏អស្ចារ្យ ជាច្រើន Beauty Connect Expo Cambodia 2016 បានប្រមូលផ្តុំអ្នកទស្សនា 2000នាក់មកពីក្រុមហ៊ុន, សមាគម, សាឡន និងសម្អាងការនានានៃប្រទេសកម្ពុជា ។ នៅឆ្នាំនេះកម្មវិធី Beauty Connect Expo Cambodia 2017 នឹងប្រព្រឹត្ត ទៅចាប់ពីថ្ងៃទី 15 ដល់ 17 ខែកញ្ញា ឆ្នាំ 2017 នៅឯមជ្ឈមណ្ឌលសន្និបាតនិងតាំងពិព័រណ៍ កោះពេជ្ររាជធានីភ្នំពេញ។

កម្មវិធី Beauty Connect Expo 2017 នឹងផ្តល់ជូននូវឱកាសជាច្រើនសម្រាប់ពកែសម្ផស្សដើម្បីភ្ជាប់ទំនាក់ទំនង ជាមួយដៃគូដែលមានសក្តានុពលទាំងផលិតផល / សេវាកម្ម, ផ្លាស់ប្តូរបទពិសោធន៍, ស្វែងយល់ពីបច្ចេកវិទ្យាទំនើបៗនៅក្នុង ឧស្សាហកម្មកែសម្ផស្សតាមរយៈកម្មវិធី ជាច្រើនដែលបានរៀបចំឡើងក្នុងអំឡុងពេលបីថ្ងៃនៃការតាំងពិព័រណ៍។

កម្មវិធីទាំង នោះមានដូចជា:

-កម្មវិធីបង្ហាញពីការផាត់មុខ, ធ្វើសក់

-កម្មវិធីសិក្ខាសាលាដែលជាវេទិកាដ៏អស្ចារ្យមួយសម្រាប់អ្នកជំនាញក្នុងវិស័យកែសម្ផស្សដើម្បីចែករំលែកបទពិសោធន៍គ្នា ទៅ វិញទៅមក

-កម្មវិធីផ្គូរផ្គងពាណិជ្ជកម្ម B2B ដែលត្រូវបានរចនាឡើងដើម្បី ភ្ជាប់ទំនាក់ទំនងអ្នកតាំងពិព័រណ៍អន្តរជាតិទៅកាន់ក្រុមហ៊ុន, សមាគម, សាឡន និងសម្អាងការនានានៅក្នុងឧស្សាហកម្មកែសម្ផស្ស។

អ្នកតាំងពិព័រណ៍ភាគច្រើនដែលចូលរួមក្នុងកម្មវិធី Beauty Connect Expo Cambodia 2016 បានផ្តល់ យោបល់ជាវិជ្ជមាន ជាច្រើនសម្រាប់ការតាំងពិព័រណ៍នេះ។ នេះជួយឱ្យយើងបង្កើនការជឿទុកចិត្ត សម្រាប់កម្មវិធី Beauty Connect Expo Cambodia 2017 ។ Beauty Connect Expo Cambodia ដើរតួជាស្ពានពាណិជ្ជកម្មដ៏មានប្រសិទ្ធភាពក្នុងការតភ្ជាប់ឧស្សាហកម្មកែសម្ផស្សអន្តរជាតិ និងឧស្សាហកម្មកែសម្ផស្ស ។ អ្នក រៀបចំកម្មវិធី Beauty Connect Expo Cambodia 2017 តែងតែស្វាគមន៍ចំពោះលោកអ្នកដែលមានចំណាប់អារម្មណ៍ក្នុង ការតាំងពិព័រណ៍នេះ៕

August 15, 2017

ផ្សារទំនើប Parkson Mall នឹងបើកដំណើរការនៅដើមឆ្នាំក្រោយ

ភ្នំពេញៈ នៅទីបំផុតមានដំណឹងល្អមួយទៀតហើយសម្រាប់ប្រជាពលរដ្ឋក្នុងក្រុងភ្នំពេញដោយផ្សារទំនើប Parkson Mall ដែលមានកម្ពស់9ជាន់ និងរៀបចំតាមស្តង់ដាអន្តរជាតិនឹងបើកដំណើរការនៅចុងឆ្នាំនេះ ឬដើមឆ្នាំក្រោយនេះហើយ។

លោក ROFY OTHSMAN នាយកគ្រប់គ្រងផ្សារទំនើប Parkson Mall នៅទីក្រុងភ្នំពេញបានថ្លែងឲ្យដឹងនៅការិយាល័យរបស់លោកកាលពីម្សិលមិញនេះថា ផ្សារទំនើបនេះបានបើកដំណើរការសាងសង់កាលពីចុងឆ្នាំ2012 ដែលមានគោលដៅមិនត្រឹមតែធ្វើជាកន្លែងកម្សាន្ត និងដើរទិញទំនិញរបស់ប្រជាជនក្នុងស្រុកប៉ុណ្ណោះទេ តែវាជាកន្លែងទាក់ទាញភ្ញៀវទេសចរផងដែរ ពិសេសផ្តល់ឱកាសការងារដល់ប្រជាពលរដ្ឋបានប្រមាណជាជាង4,000នាក់ក្នុងមួយថ្ងៃ ព្រោះអគារផ្សារទំនើបនេះមានទំហំ165,000ម៉ែត្រការ៉េ បូកទាំងសណ្ឋាគារជាង50,000ម៉ែត្រការ៉េ និងមានបន្ទប់ជាង400បន្ទប់ ស្មើនឹង22ម៉ឺនម៉ែត្រការ៉េទៀតផង។

លោកបន្តថា ទេសចរដែលមកកម្ពុជា ពួកគេមិនត្រឹមតែអាចមកកម្សាន្តនិងអាចដើរទិញទំនិញប៉ុណ្ណោះទេ តែផ្សារទំនើបនេះថែមទាំងជាផលិតផលមួយដែលទាក់ទាញភ្ញៀវទេសចរ ហើយរដ្ឋាភិបាលក៏ទទួលបានចំណូលពន្ធច្រើនផងដែរ។

ផ្សារនេះនឹងបើកចាប់ពីម៉ោង9ព្រឹកដល់ម៉ោង10យប់ និងកន្លែងកម្សាន្តបើករហូតដល់ម៉ោង2ទៀបភ្លឺ ដោយសារផ្សារនេះមានរោងភាពយន្តចំនួន9 មានកន្លែងហាត់ប្រាណលេងបូវ៍លីងដល់ទៅ30លេន និងមានសេវាកម្សាន្តជាច្រើនទៀត ពិសេសការរៀបចំតុបតែងធ្វើឡើងតាមស្តង់ដារអន្តរជាតិទាំងអស់។ ផ្សារនេះអាចចតរថយន្តបានប្រមាណ1,500គ្រឿង និងម៉ូតូ3,000គ្រឿង។

លោក ROFY OTHSMAN បានបន្តឲ្យដឹងថា ជាន់ក្រោមនៃផ្សារទំនើបនេះជាSuper Market ជាន់ទី1ជាកន្លែងលក់គ្រឿងក្រអូបទូទៅ ជាន់ទី2ជាកន្លែងលក់គ្រឿងក្រអូបសម្រាប់នារី ជាន់ទី3ជាកន្លែងលក់សម្លៀកបំពាក់ ជាន់ទី4ជាកន្លែងលក់សម្លៀកបំពាក់បុរស និងគ្រឿងប្រើប្រាស់ផ្សេងៗទៀត ជាន់ទី5ជាកន្លែងលក់ម្ហូបអាហារ និងភេសជ្ជៈ ជាន់ទី6ជាកន្លែងលក់គ្រឿងអេឡិចត្រូនិក ជាន់ទី៧ជាកន្លែងលក់សម្ភារព័ត៌មានវិទ្យា មានដូចជាទូរស័ព្ទ ជាដើម ជាន់ទី8ជាកន្លែងលក់គ្រឿងសង្ហារិមផ្សេងៗសម្រាប់លំនៅដ្ឋាន និងជាន់ទី9ជារោងភាពយន្ត និងកន្លែងលេងបូវ៍លីង ជាដើម។

យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុបដែលបានបញ្ចប់កាលពីពេលថ្មីៗនេះបានឲ្យដឹងថា គិតត្រឹមដំណាច់ឆមាសទី1ឆ្នាំនេះ អត្រាប្រើប្រាស់ផ្សារទំនើបបានកើនឡើងចន្លោះពី20ទៅ30ភាគរយក្នុងឆមាសទី1ឆ្នាំនេះ ធៀបរយៈពេលដូចគ្នាកាលពីឆ្នាំមុន និងតម្លៃជួលមានការប្រែប្រួលតិចតួចប៉ុណ្ណោះ ដោយតម្លៃជួលផ្សារកម្រិតAមានតម្លៃចន្លោះ35ទៅ40ដុល្លារ កម្រិតBមានតម្លៃចន្លោះពី25ទៅ30ដុល្លារ និងកម្រិតCមានតម្លៃចន្លោះពី12ទៅ25ដុល្លារក្នុងមួយម៉ែត្រការ៉េ៕

August 15, 2017

ចាន់ណា រ៉ូណាន់ កំពុងធ្វើឱ្យទស្សនិកជនជ្រួលច្របល់

បន្ទាប់ពីមានមហាជនជាច្រើនបង្ហាញពីភាពអន្ទះសាចង់ទស្សនាខ្សែភាពយន្តរឿង «សសរកន្លោង» រហូតមកដល់ពេលនេះលោក ចាន់ណា រ៉ូណាន់ ជាអ្នកដឹកនាំរឿងមិនទាន់អាចឆ្លើយតបទៅអ្នកគាំទ្ររបស់ខ្លួនបាននៅឡើយទេថា តើរឿងនោះនឹងត្រូវដាក់បញ្ចាំងនៅពេលណា?

មានអ្នកគាំទ្រស្នាដៃលោក ចាន់ ណារ៉ូណាន់ ជាច្រើនបានឆាតទៅសួរលោក និងចូល Comment ក្នុងហ្វេសប៊ុក ដើម្បីចង់ដឹងពីកាលបរិច្ឆេទនៃការដាក់បញ្ចាំងរឿង «សសរកន្លោង» ពិតប្រាកដ ខណៈពួកគេមានការជឿជាក់លើស្នាដៃអ្នកដឹកនាំរឿងវ័យក្មេងរូបនេះជាខ្លាំងតាមរយៈការទស្សនារឿង «កំណត់ហេតុនាងនាថ» កន្លងមក។

លោក ចាន់ណា រ៉ូណាន់ បានប្រាប់ឡារ៉ែន Online ថា នៅពេលនេះលោកមិនទាន់អាចកំណត់ពេលវេលានៃការដាក់បញ្ចាំងរឿង «សសរកន្លោង» បាននៅឡើយទេ។ លោកបានដឹងថា មានអ្នកគាំទ្រជាច្រើនកំពុងតែអន្ទះសាចង់ទស្សនារឿងនេះ ដូច្នេះហើយទើបធ្វើឱ្យលោកកាន់តែមានមោទនភាព និងសប្បាយចិត្ដក្នុងការផលិតរឿងនេះយ៉ាងសម្រិតសម្រាំង។

លោកបន្ដថា៖ កន្លងមកខ្ញុំផលិតរឿង «កំណត់ហេតុនាងនាថ» ទទួលបានការគាំទ្រ និងទទួលបានការទុកចិត្ដខ្លាំងពីទស្សនិកជន ដូច្នេះខ្ញុំមិនចង់បន្ធូរដៃក្នុងការផលិតរឿង «សសរកន្លោង» នេះទេព្រោះខ្ញុំមិនចង់ឱ្យទស្សនិកជនទាំងអស់ខាតពេលវេលា និងចំណាយលុយឥតប្រយោជន៍ក្នុងការទិញសំបុត្រចូលទស្សនារឿងនេះឡើយ។ ទាំងនេះហើយជាហេតុដែលខ្ញុំត្រូវការធ្វើវាយ៉ាងសម្រិតសម្រាំង។

រឿង «សសរកន្លោង» ត្រូវចំណាយទុនផលិតក្នុងរង្វង់ទឹកប្រាក់ជាង 7ម៉ឺនដុល្លារ ខណៈរឿង «កំណត់ហេតុនាងនាថ» ប្រើទុនអស់តែ6ម៉ឺនដុល្លារប៉ុណ្ណោះ ហើយឈ្នះបានពានរង្វាន់ប្រចាំឆ្នាំ2016 ចំនួន3រង្វាន់ គឺពានរង្វាន់ភាពយន្ដរកប្រាក់ចំណូលបានច្រើនជាងគេ (30ម៉ឺនដុល្លារ) ពានរង្វាន់ភាពយន្ដទទួលបានអ្នកទស្សនាច្រើនជាងគេ (ប្រកួតជាមួយរឿងបរទេស) និងពានរង្វាន់ខ្សែភាពយន្ដខ្មែរល្អជាងគេប្រចាំឆ្នាំ។

បច្ចុប្បន្នរឿង «សសរកន្លោង» ត្រូវបានរៀបចំបច្ចេកទេសថ្មីទាំងរូបភាព និងការកាត់ប្លង់រួចរាល់អស់ហើយ នៅសល់តែសំឡេងមួយមុខប៉ុណ្ណោះដែលលោកត្រូវសម្រិតសម្រាំង ព្រោះសំឡេងក៏ជាកត្តាទាក់ទាញខ្លាំងណាស់មួយដែរសម្រាប់ប្រភេទរឿងខ្មោចដូចដែលលោកធ្លាប់បានផលិតមក។ទោះជាយ៉ាងណាលោក រ៉ូណាន់ ប្រាប់ថា លោកនឹងប្រឹងប្រែងសម្រុកធ្វើការងារនេះឱ្យហើយរួចរាល់ សម្រាប់ដាក់បញ្ចាំងមុនពិធីបុណ្យភ្ជុំបិណ្ឌប្រពៃណីខ្មែរ៕

August 15, 2017

ផលប្រយោជន៍នៅពីក្រោយការវាយកម្ទេចអគារ «ប៊ុលឌិងស»

ភ្នំពេញ – ត្រឹមរយៈពេលតែជិតមួយខែប៉ុណ្ណោះអគារ «ប៊ុលឌិងស» ត្រូវបានវាយកម្ទេចអស់ស្ទើរតែជិត70% ទៅហើយ ប៉ុន្ដែមនុស្សជាច្រើនដែលធ្វើដំណើរឆ្លងកាត់ទៅមកតាមផ្លូវសុធារសនៅតែមានចម្ងល់ថា តើហេតុអ្វីបានចាំបាច់អភិវឌ្ឍនៅប្លុកនេះ ឬត្រូវវាយកម្ទេចអគារដ៏ចំណាស់មួយនេះ?

ឯកឧត្ដម បេងហុង សុជាតិខេមរ៉ូ អគ្គនាយកនៃអគ្គនាយកដ្ឋានលំនៅឋាន នៃក្រសួងរៀបចំដែនដីនគរូបនីយកម្ម និងសំណង់ បានលើកឡើងថា ការអភិវឌ្ឍនៅប្លុកអគារប៊ុលឌិងសនេះបានហុចផ្លែផ្កាដល់សង្គមជាតិជាច្រើន ពិសេសហុចផលដោយផ្ទាល់ដល់រាជធានីភ្នំពេញតែម្ដង។ ឯកឧត្ដមបន្ដថា ពាក់ព័ន្ធនឹងផលប្រយោជន៍ត្រូវបានបែងចែកជាផលប្រយោជន៍ផ្ទាល់មធ្យម និងផលប្រយោជន៍រយៈពេលវែងដែលគេមើលឃើញថា អាចផ្ដល់ការងារដល់កម្មករសំណង់ចាប់តាំងពីពេលចូលវាយកម្ទេចអគារម្ល៉េះ។

អគ្គនាយកនៃអគ្គនាយកដ្ឋានលំនៅឋាន បន្ថែមថា បន្ទាប់ពីអគារនោះសាងសង់ ឬអភិវឌ្ឍរួចហើយនឹងមានការលក់ដូរ ឬបង្កើតជាមណ្ឌលពាណិជ្ជកម្មនៅទីនោះដែលជាមុខមាត់ និងភាពស្រស់ស្អាតរបស់រាជធានីភ្នំពេញ។ ដោយឡែកសម្រាប់ផ្នែករូបវ័ន្ដ គឺយើងនឹងបានអគារមួយជំនួសឱ្យអគារដែលបង្កគ្រោះថ្នាក់ដល់ប្រជាពលរដ្ឋ ពោលគឺយើងបានធ្វើការវិវឌ្ឍពីអគារដែលមានសភាពចាស់ទ្រុឌទ្រោមជំនួសដោយអគារថ្មីមានលក្ខណៈទំនើបពិសេសអភិវឌ្ឍដោយក្រុមហ៊ុនជប៉ុន ដូច្នេះវាបានផ្ដល់ផលប្រយោជន៍ឱ្យរាជធានីភ្នំពេញ និងព្រះរាជាណាចក្រកម្ពុជាទាំងមូល។

បណ្ឌិត បេងហុង សុជាតិខេមរ៉ូ ប្រាប់ទៀតថា៖ «ផលប្រយោជន៍រយៈពេលវែង គឺជាការបង្ហាញពីទំនុកចិត្ដរបស់អ្នកវិនិយោគជប៉ុនដែលយើងមើលឃើញថា មានការកើតឡើងដោយសារតែព្រះរាជាណាចក្រកម្ពុជាធានាបាននូវសុខសន្ដិភាព»។

អគារប៊ុលឌិងស ត្រូវបានវាយកម្ទេចស្ទើរតែបាន4ផ្នែកក្នុង6ផ្នែកនៃអគារទាំងមូលដែលមានផ្នែក A B C D E F នេះហើយ បច្ចុប្បន្ននៅសល់តែផ្នែក A និងB ប៉ុណ្ណោះដែលមិនទាន់ត្រូវបានវាយកម្ទេចដល់។ រហូតមកទល់ពេលនេះក្រុមហ៊ុនជប៉ុន ARAKAWA នៅមិនទាន់បានដាក់បង្ហាញប្លង់ស្ថាបត្យកម្មរបស់ខ្លួននៅឡើយទេ ដូច្នេះគេនៅមិនទាន់ដឹងថា អគារដែលនឹងត្រូវសាងសង់ឡើងនោះមានលក្ខណៈបែបណា និងមានកម្ពស់ប៉ុន្មានឡើយ?។

ជាមួយការវាយកម្ទេចដើម្បីធ្វើការអភិវឌ្ឍអគារថ្មីនេះ ឯកឧត្ដម បេងហុង សុជាតិខេមរ៉ូ បញ្ជាក់ថា មន្ដ្រីរបស់ក្រសួងក៏កំពុងតែចុះធ្វើការងារជាមួយក្រុមហ៊ុនដែលទទួលបន្ទុកវាយកម្ទេចអគារជាប់ជាប្រចាំ ដើម្បីធានាឱ្យការរក្សាសុវត្ថិភាព មិនរំខានដល់សតិអារម្មណ៍អ្នករស់នៅជិតខាង និងអ្នកធ្វើដំណើរឆ្លងកាត់។ ពិសេសរក្សាឱ្យបាននូវបរិស្ថានល្អ មិនធ្វើឱ្យមានធូលីហុយ ជាដើម៕

August 15, 2017

ត្រីមាសទី2 ចំនួនអ្នកខ្ចីប្រាក់ធ្លាក់ចុះ តែទំហំទឹកប្រាក់កម្ចីកើនឡើង

ភ្នំពេញ៖ យោងតាមរបាយការណ៍ស្តីពីសន្ទស្សន៍ឥណទានរបស់ការិយាល័យឥណទានកម្ពុជា (CBC) ដែលចេញផ្សាយនៅថ្ងៃទី15 ខែកក្កដានេះបានឱ្យដឹងថា ចំនួននៃការស្នើសុំប្រាក់កម្ចីបានធ្លាក់ចុះនៅក្នុងត្រីមាសទី2 ឆ្នាំ2017នេះ ប៉ុន្តែមានទំនោរធ្លាក់ចុះទាបជាងជាងត្រីមាសទី2 ដូចគ្នាក្នុងឆ្នាំ2016។ យ៉ាងណាក៍ដោយ ទោះជាមានការធ្លាក់ចុះនៃការស្នើសុំកម្ចីជារួមដូច្នេះក្តី ក៏ការផ្តល់ប្រាក់កម្ចីនៅតែមាននិន្នាការកើនឡើងរហូតដល់ 4.19% នៃគណនីឥណទានសរុប និង 6.59% ដដែលនៃទំហំទឹកប្រាក់សរុប។

លោក អឿ សុធារ័ត្ន ប្រធាននាយកប្រតិបត្តិរបស់ការិយាល័យឥណទានកម្ពុជា (CBC) មានប្រសាសន៍ថា ទោះជាមានទំនោរធ្លាក់ចុះនៃការស្នើសុំប្រាក់កម្ចីលក្ខណៈបុគ្គលគឺជាលក្ខណៈរដូវកាលក៍ដោយ ក៏យើងសង្កេតឃើញថា ក្នុងត្រីមាសទី2នេះចំនួនគណនីឥណទាននៅតែមានការកើនឡើងប្រមាណជា 4.19% សមាមាត្រនឹងកំណើនទឹកប្រាក់កម្ចី 6.59%។ លោកថា ចំណែកឯប្រាក់កម្ចីមិនដំណើរការលើសពី30ថ្ងៃវិញ ទោះបីជាមានកំណើនតិចតួច និងអាចគ្រប់គ្រងបានក្តី ប៉ុន្តែវាក៍ជាសញ្ញាមួយសម្រាប់ឱ្យគ្រប់ស្ថាប័នហិរញ្ញវត្ថុទាំងអស់គួរចាប់ផ្តើមយកចិត្តទុកដាក់លើគុណភាពឥណទានរបស់ខ្លួនលើផលិតផល3 រួមមាន1.ការស្នើសុំកម្ចីលក្ខណៈបុគ្គល 2.ដំណើរការប្រាក់កម្ចីលក្ខណៈបុគ្គល 3. គុណភាពប្រាក់កម្ចីលក្ខណៈបុគ្គល។

1.អំពីការស្នើសុំប្រាក់កម្ចីលក្ខណៈបុគ្គល៖ នៅត្រីមាសទី2នេះបង្ហាញថា ការស្នើសុំឥណទានបានធ្លាក់ចុះគួឱ្យកត់សម្គាល់រហូត 15% ធៀបនឹងត្រីមាសទី1 កើនឡើង 29% ប៉ុន្តែទំនោរនៃការធ្លាក់ចុះនេះ គឺទាបជាងត្រីមាសដូចគ្នាក្នុងឆ្នាំ2016ដែលធ្លាក់ចុះដល់ 25%។ ការធ្លាក់ចុះនៃការស្នើសុំឥណទាននេះ ដោយសារតែមានការធ្លាក់ចុះនៃការស្នើសុំប័ណ្ណឥណទាន 18% ការស្នើសុំហិរញ្ញវត្ថុផ្ទាល់ខ្លួន 15% និងកម្ចីអចលនទ្រព្យ 8%។ ការស្នើសុំនេះមានការធ្លាក់ចុះស្ទើរគ្រប់តំបន់ លើកលែងតែតំបន់ឆ្នេរសមុទ្រដែលនៅតែមានកំណើនលើការស្នើសុំប័ណ្ណឥណទាន 100% និងការស្នើសុំកម្ចីអចលនទ្រព្យកើនឡើង 3%។

2.អំពីដំណើរការប្រាក់កម្ចីលក្ខណៈបុគ្គល៖ នៅត្រីមាសទី2នេះ កំណើនចំនួនគណនីមានការថមថយបន្តិចដោយមានកំណើនត្រឹម 4.19% ធៀបនឹងត្រីមាសទី1កើនឡើងដល់ 10.87%។ ចំនួនគណនីឥណទានសរុបកើនដល់ជាង785គណនី ដែលក្នុងនោះ 82.42% ជាហរិញ្ញវត្ថុផ្ទាល់ខ្លួន 10.53% ជាកម្ចីអចលនទ្រព្យ និង 7.06% ប័ណ្ណឥណទាន។ ដូចគ្នានេះដែរ កំណើនសមតុល្យប្រាក់កម្ចីសរុប ក៏មានការថមថយមកត្រឹម 6.59% ក្នុងត្រីមាសទី2 ឆ្នាំ2017 ធៀបនឹងត្រីមាសទី1 កើនឡើង 14.97%។ ករណីនេះធ្វើឱ្យសមតុល្យឥណទានកើនឡើងដល់ 3.87% ប៊ីលានដុល្លារដែលក្នុងនោះវានៅតែត្រូវបានបែងចែកស្មើគ្នារវាងហិរញ្ញវត្ថុផ្ទាល់ខ្លួន50.24% ទោះបីជាប័ណ្ណឥណទាននៅតែមានចំណែកមួយដ៍តូចដែលទាបជាង 1% ក្តី។

3.អំពីគុណភាពប្រាក់កម្ចីលក្ខណៈបុគ្គល៖ ទិដ្ឋភាពទូទៅរបស់ប្រទេសកម្ពុជានៅតែមិនមានការប្រែប្រួលខ្លាំងទាក់ទងទៅនឹងប្រាក់កម្ចីដែលមិនមានដំណើរការ(30ថ្ងៃ)ដែលជាប្រាក់កម្ចី ដែលកូនបំណុលមិនមានលទ្ធភាពទូទាត់តាមថ្ងៃកំណត់ក្នុងអំឡុងពេល30ថ្ងៃនេះ វាបានកើនឡើងតិចតួចដល់1.70% ក្នុងត្រីមាសនេះ ធៀបនឹង1.62% ក្នុងត្រីមាសទី2 ឆ្នាំ2017។

គួរបញ្ជាក់ថា ស្ទើរតែ 80% នៃប្រជាជនកម្ពុជាបន្តប្រើសេវាឥណទានពីគ្រឹះស្ថានហិរញ្ញវត្ថុតែមួយដែលវាបានកាត់បន្ថយហានិភ័យលើការទូទាត់ប្រាក់ដើម។ មិនតែប៉ុណ្នោះ អតិថិជនដែលមានគណនីតែមួយមានចំនួន 70% នៃអតិថិជនសរុប ចំណែកអតិថិជនដែលមានគណនីចាប់ពី2ឡើងទៅមានចំនួនត្រឹមតែ 30% ប៉ុណ្ណោះ៕

August 15, 2017

MFI ផ្តល់ឥណទាន 1ពាន់លានដុល្លារដល់វិស័យកសិកម្ម

ភ្នំពេញៈ គ្រឹះស្ថានមីក្រូហិរញ្ញវត្ថុ (MFI) បានផ្តល់ឥណទានរហូតដល់1ពាន់លានដុល្លារអាមេរិកដល់វិស័យកសិកម្មនៅកម្ពុជា។ នេះបើតាមការបញ្ជាក់ឲ្យដឹងពីមន្ត្រីជាន់ខ្ពស់ធនាគារជាតិនៃកម្ពុជា។

លោកជំទាវ នាវ ច័ន្ទថាណា ទេសាភិបាលរងនៃធនាគារជាតិនៃកម្ពុជាបានថ្លែងឲ្យដឹងក្នុងកិច្ចប្រជុំទាក់ទងនឹងអន្តរាគមន៍របស់រដ្ឋាភិបាលដើម្បីលើកស្ទួយតម្លៃស្រូវកាលពីម្សិលមិញថា ក្រៅពីគ្រឹះស្ថានមីក្រូហិរញ្ញវត្ថុនានានៅកម្ពុជាផ្តល់ឥណទានដល់វិស័យកសិកម្មក្នុងទំហំទឹកប្រាក់1ពាន់លានដុល្លារហើយនោះ ធនាគារអភិវឌ្ឍន៍អាស៊ីក៏បានផ្តល់ឥណទានក្នុងវិស័យនេះក្នុងទំហំទឹកប្រាក់ 1.5ពាន់លានដុល្លារអាមេរិកផងដែរ។

ទាក់ទងនឹងបញ្ហាបំណុលរបស់កសិករដែលសងត្រឡប់យឺតវិញនោះ លោកជំទាវបញ្ជាក់ថា ធនាគារជាតិនៃកម្ពុជាក៏បានបង្កើតជាក្រុមការងារ និងជំរុញបង្កើត hotline ដើម្បីទទួលព័ត៌មានពីសាធារណជនក្នុងការប្រើប្រាស់សេវាហិរញ្ញវត្ថុទាក់ទងនឹងដំណោះស្រាយបញ្ហាបំណុលក្នុងគោលដៅដោះស្រាយបន្ថែមទៀតដើម្បីផ្តល់ការអនុគ្រោះដល់កសិករដែលពុំមានលទ្ធភាពសង និងដោះស្រាយតាមរយៈសកម្មភាពជាក់ស្តែង និងយោគយល់ដោយមិនបង្ខំឲ្យលក់ដីធ្លី ឬផ្ទះសំបែងឡើយ។

ស្ថានភាពវិស័យកសិកម្មកំពុងមានភាពប្រសើរឡើងទាក់ទងនឹងទិន្នផល និងការដាំដុះដែលកាន់តែធ្វើពិពិធកម្មនូវផលិតកម្មស្រូវ និងដំណាំដទៃទៀត។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានថ្លែងថា ទិន្នផលស្រូវឆ្នាំនេះរំពឹងទទួលបានជាង10លានតោន កើនឡើងប្រមា ណ10ភាគរយធៀបរយៈពេលដូចគ្នាកាលពីឆ្នាំមុន ប៉ុន្តែការទទួលបានផលស្រូវក្នុងមួយហិកតានៅតែស្ថិតក្នុងកម្រិតចន្លោះពី3ទៅ4តោនក្នុងមួយហិកតាដដែល។ លោកបន្តថា ដើម្បីដោះស្រាយបញ្ហានេះក្រសួងបាន និងកំពុងដាក់ចេញនូវពូជស្រូវប្រភេទថ្មីមួយដែលមានឈ្មោះខា14 ខា15 និងប្រភេទខា16 ដែលជាពូជស្រូវមានសភាពធន់នឹងជំងឺ ធន់នឹងអាកាសធាតុ និងទទួលបានទិន្នផលច្រើន។

លោកបន្តថា “ជាមួយនឹងកំណើននៃទិន្នផលកសិកម្មនេះ កម្លាំងពលកម្មក្នុងវិស័យនេះបានធ្លាក់ចុះពីជាង80ភាគរយកាលពីទសវត្សរ៍ទី80មកនៅជាង60ភាគរយក្នុងទសវត្សរ៍ទី90 និងថយចុះមកនៅត្រឹម41ភាគរយក្នុងឆ្នាំ2016 ដោយសារការកើនឡើងនូវការប្រើប្រាស់គ្រឿងយន្តក្នុងវិស័យកសិកម្មដែលធ្វើឲ្យវិស័យនេះទទួលបានតម្លៃបន្ថែមកាន់តែច្រើន៕

August 15, 2017

សាន សុម៉ាលី លេងឈុតសិចស៊ី ក្រោយពីសរសេរសារអស់សង្ឃឹមក្នុងជីវិត

ក្រោយពីកញ្ញា សាន សុម៉ាលី បានសម្ដែងអារម្មណ៍ពុំសូវសប្បាយចិត្ដទៅកាន់អ្នកគាំទ្រខ្លួនរួចមក នាងបានធ្វើឱ្យពួកគេមានការភ្ញាក់ផ្អើលយ៉ាងខ្លាំងនៅពេលដែលនាងបង្ហាញរូបភាពស្រីម្នាក់ឈរថតក្នុងបន្ទប់ក្នុងឈុតខោអាវទ្រនាប់។

នៅក្នុងគណនីហ្វេសប៊ុកឈ្មោះថា Somaly San Real នាងបានសរសេរសារនៅក្នុងនោះថា៖«ទ្រាំទៅកម្មយើងទេ មិនដឹងធ្វើដើម្បីអ្វី? គ្មាននរណាល្ងង់ដូចខ្ញុំទេ ជីវិតខ្ញុំសែនវេទនាចិត្ដ ជីវិតជាតិនេះឆាចោល មិនដែលមានសេចក្ដីសុខទេ ងាកទៅកន្លែងណាក៏ឈឺចាប់»។

ការត្អូញត្អែររបស់កញ្ញា សាន សុម៉ាលី នៅក្នុងបណ្ដាញសង្គមហ្វេសប៊ុកត្រូវបានមហាជនមានការចាប់អារម្មណ៍ និងចង់ដឹងជាខ្លាំងថា តើមូលហេតុអ្វីបានជានាងសរសេរសារបែបអស់សង្ឃឹមដូច្នេះ។ ទោះយ៉ាងណាគេគ្រាន់តែបានដឹងថា មួយរយៈចុងក្រោយនេះការងារសិល្បៈរបស់នាងមិនសូវជាកាក់កបទេ រីឯរឿងគូជីវិតវិញក៏មិនទាន់ជួបភាពជោគជ័យនៅឡើយដែរ បន្ទាប់ពីជួបរឿងឈឺចាប់ពីរបីលើករួចមក។ ពិសេសជាងនេះទៅទៀត ថែមទាំងលេចឮថា ម្ដាយរបស់នាងក៏កំពុងជំងឺទៀតផងដែលនេះជាកត្តាបន្ថែមបន្ទុកលើនាងមួយកម្រិតទៀតក្នុងនាមជាកូនស្រីនៅក្នុងគ្រួសារ។

បន្ទាប់ពីថ្លែងសារបែបអស់សង្ឃឹមរួចមក ថ្មីៗនេះនាងបានបង្ហោះរូបភាពនៅក្នុងគណនីដដែលដោយមានរូបស្រី្ដម្នាក់ឈរថតក្នុងឈុតខោក្នុងអាវក្នុងដោយបិទបាំងមុខ។ តែទោះជាយ៉ាងណាអ្នកគាំទ្រនាងបានសន្និដ្ឋានថា គឺជារូបរបស់នាងច្បាស់ណាស់ ខណៈពួកគេបាន Comment ចំពោះរូបនោះ តែនាងបានបដិសេធថា មិនមែនជារូបនាងទេ។ អ្វីដែលគេភ្ញាក់ផ្អើលនោះគឺ បើទោះជាប៉ុន្មានឆ្នាំមុននាងជាប់ឈ្មោះជាតារាស្រីសិចស៊ីម្នាក់ក៏ដោយ ក៏នាងពុំដែលលេងខ្លួនសិចស៊ីបែបនេះដែរ។

គេមិនដឹងថា តើការធ្វើបែបនេះ គឺដើម្បីភាពទាក់ទាញឬយ៉ាងណានោះទេ តែគេសង្ឃឹមថា នាងនឹងមិនធ្វើដូចអ្វីដែលបាននាងសរសេរសារក្នុងគណនី Somaly San Real ឡើយ៕

August 15, 2017

ក្រសួងរ៉ែ ប្រកាសផ្តល់អាជ្ញាបណ្ណរករ៉ែលោហៈចំនួន 2កន្លែងថែមទៀត

បន្ទាប់ពីផ្តល់អាជ្ញាបណ្ណដល់ក្រុមហ៊ុនចំនួន 4 ឱ្យរុករ៉ែលោហៈនៅ4ទីតាំងខុសៗគ្នាបានត្រឹមតែជាង1ខែ ក្រសួងរ៉ែ និងថាមពល បានប្រកាសផ្តល់អាជ្ញាបណ្ណថ្មីចំនួនពីរទៀត នៅខេត្តក្រចេះ និងខេត្តស្ទឹងត្រែង។

ក្រសួងរ៉ែ និងថាមពល បានប្រកាសឱ្យក្រុមហ៊ុនរុករករ៉ែ ដែលបានចុះបញ្ជីត្រឹមត្រូវទាំងអស់នៅកម្ពុជាឱ្យមកចូលរួមដាក់ពាក្យដើម្បីទទួលបានសិទ្ធិសម្បទានរ៉ែនៅកម្ពុជា ខណៈក្រសួងនឹងផ្តល់ជូនចំនួនពីរកន្លែងផ្សេងទៀត បន្ទាប់ពីការផ្តល់ទីតាំងចំនួន4សម្រាប់ការរុករករ៉ែលោហៈកាលពីខែមិថុនា ឆ្នាំ2017។

លិខិតជូនដំណឹងរបស់ក្រសួងរ៉ែ និងថាមពលចុះថ្ងៃទី03 ខែសីហា ឆ្នាំ2017 បានទុកពេលឱ្យក្រុមហ៊ុនរ៉ែក្នុង និងក្រៅប្រទេស ដែលបានចុះបញ្ជីត្រឹមត្រូវនៅកម្ពុជា ត្រូវមកដាក់ពាក្យស្នើសុំអាជ្ញាបណ្ណដើម្បីរុករករ៉ែលោហៈ រហូតដល់ថ្ងៃទី30 ខែសីហា ឆ្នាំ2017។

តំបន់ថ្មីទាំងពីរនោះរួមមាន តំបន់ស្ថិតក្នុងឃុំស្វាយជ្រះ និងឃុំឃ្សឹម ស្រុកស្នួល ខេត្តក្រចេះ ដែលមានផ្ទៃដីសម្រាប់រុករករ៉ែទំហំ30.60គីឡូម៉ែត្រការ៉េ និងទី2 តំបន់ឃុំចម្ការលើ ឃុំអូររៃ និងឃុំស្រែឫស្សី ស្រុកថាឡាបរិវាត់ ខេត្តស្ទឹងត្រែង ដែលមានផ្ទៃដីរុករករ៉ែទំហំ114.98គីឡូម៉ែត្រការ៉េ។

កាលពីខែមិថុនា ឆ្នាំ2017 ក្រុមហ៊ុនចំនួន4 ដែលទទួលបានអាជ្ញាបណ្ណរុករករ៉ែលោហៈ រួមមាន 1.ក្រុមហ៊ុន Renaissance Minerals (Cambodia) Limited តំបន់ស្វាយជ្រះ ស្ថិតក្នុងឃុំស្វាយជ្រះ ស្រុកស្នួល ខេត្តក្រចេះ និងឃុំចុងផ្លាស់ ស្រុកកែវសីម៉ា ខេត្តមណ្ឌលគិរី លើផ្ទៃដី74.32គីឡូម៉ែត្រការ៉េ 2.ក្រុមហ៊ុន Kiri Resources Co., Ltd តំបន់អូរចុស ឃុំកំពង់ចាម ស្រុកសំបូរ ខេត្តក្រចេះ និងឃុំសុចិត្រ ព្រមទាំងឃុំមានរិទ្ធ ស្រុកសណ្តាន់ ខេត្តកំពង់ធំ ដែលមានទំហំផ្ទៃដីរុករករ៉ែ93.94គីឡូម៉ែត្រការ៉េ 3.ក្រុមហ៊ុន Samnang Angkor Development Co., Ltd តំបន់វាលស្រង៉ាម ឃុំតាកែន ស្រុកឈូក ខេត្តកំពត ដែលមានផ្ទៃដីរុករករ៉ែទំហំ159.50គីឡូម៉ែត្រការ៉េ និង 4.ក្រុមហ៊ុន Sea Resources Pty Ltd តំបន់ព្រែកកាំពីរ ស្ថិតនៅឃុំថ្មី ឃុំចង្ក្រង់ ឃុំសំបុក ស្រុកចិត្របុរី ឃុំស្រែជិះ និង ឃុំក្បាលដំរី ស្រុកសំបូរ ខេត្តក្រចេះ និង ឃុំចុងផ្លាស់ ស្រុកកែវសីម៉ា ខេត្តមណ្ឌលគិរី ដែលមានផ្ទៃដីរុករកសរុប198គីឡូម៉ែត្រការ៉េ។

សេចក្តីជូនដំណឹងរបស់ក្រសួងរ៉ែ និងថាមពល បានបញ្ជាក់ថា“ចំពោះក្រុមហ៊ុនរ៉ែ ដែលបាននិងកំពុងកាន់អាជ្ញាបណ្ណធនធានរ៉ែលើសពីមួយពុំមានសិទ្ធិដាក់ពាក្យសុំអាជ្ញាបណ្ណស្វែងរុករករ៉ែលោហៈនេះទេ។

នាព្រឹកថ្ងៃទី07 ខែសីហា ឆ្នាំ2017 កន្លងមកឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ក៏បានអនុញ្ញាតឱ្យតំណាងក្រុមហ៊ុន Mesco Gold Cambodia Limited ចូលជួបសម្តែងការគួរសម និងរាយការណ៍អំពីវឌ្ឍនភាពការសាងសង់រោងចក្រអាជីវកម្មរ៉ែមាស នៅស្រុកអូរយ៉ាដាវ ខេត្តរតនៈគិរី។

យោងតាមក្រសួងរ៉ែ និងថាមពល មកដល់បច្ចុប្បន្នក្រុមហ៊ុនកំពុងតែអនុវត្តតាមផែនការនៃគម្រោងអាជីវកម្ម ដោយបានបំពេញបែបបទ និងកំពុងដំណើរការនាំចូលសម្ភារបរិក្ខារសាងសង់រោងចក្របន្សុទ្ធមាស តាមរយៈអគ្គនាយកដ្ឋានគយ និងរដ្ឋាករនៃព្រះរាជាណាចក្រកម្ពុជា។ តំណាងក្រុមហ៊ុនក៏បានស្នើគោរពអញ្ជើញឯកឧត្តមរដ្ឋមន្ត្រីទៅធ្វើទស្សនកិច្ចការដ្ឋានរ៉ែ ដែលស្ថិតក្រោមការវិនិយោគរបស់ក្រុមហ៊ុនខ្លួននៅប្រទេសឥណ្ឌា នាពេលវេលាសមស្របខាងមុខ។

ក្រោយការផ្តល់អាជ្ញាបណ្ណ ដល់ក្រុមហ៊ុន Renaissance Mineral (Cambodia) Limited ដែលជាក្រុមហ៊ុនមកពីប្រទេសអូស្ត្រាលី ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ក៏បានជួបលោក Simon Lee Ao ប្រធានក្រុមហ៊ុន និងលោក Morgan Hart នាយកប្រតិបត្តិក្រុមហ៊ុន ដើម្បីឱ្យថ្នាក់ដឹកនាំក្រុមហ៊ុនបានរាយការណ៍ពីវឌ្ឍនភាពនៃគម្រោងរ៉ែមាសនៅតំបន់អូរខ្វាវ និងអូរឈូង ក្នុងខេត្តមណ្ឌលគិរី។

ឯកឧត្តម ស៊ុយ សែម បានជំរុញឱ្យក្រុមហ៊ុនរៀបចំឯកសារទាំងការសិក្សាសមិទ្ធលទ្ធភាព ទាំងឯកសារវាយតម្លៃហេតុប៉ះពាល់បរិស្ថាននិងសង្គម ឱ្យបានឆាប់ ដើម្បីជំរុញការធ្វើអាជីវកម្មរ៉ែមាសនៅតំបន់នោះឱ្យបានលឿនតាមផែនការ៕

August 15, 2017

ក្រសួងពាណិជ្ជកម្មគ្រោងបង្កើតសហព័ន្ធម្រេច ដើម្បីពង្រឹងទីផ្សារ និងការផ្គត់ផ្គង់

ក្រសួងពាណិជ្ជកម្ម គ្រោងនឹងរៀបចំបញ្ចូលផលិតផលម្រេចទៅជាផលិតផលសក្តានុពលមួយរបស់កម្ពុជាសម្រាប់ការនាំចេញ បន្ទាប់ពីមានការដាំដុះយ៉ាងច្រើននៅក្នុងរយៈពេលប៉ុន្មានឆ្នាំចុងក្រោយនេះ ដែលធ្វើឱ្យទិន្នផលម្រេចហក់ឡើងរហូតដល់ប្រមាណ 2ម៉ឺនតោនក្នុង1ឆ្នាំ។

នៅក្នុងសិក្ខាសាលាថ្នាក់ជាតិស្តីពីពាណិជ្ជកម្មម្រេច និងការផ្លាស់ប្តូរបទពិសោធន៍របស់សហគមន៍ម្រេចអន្តរជាតិ ក្នុងការកសាងទំនុកចិត្តឆ្ពោះទៅកាន់និរន្តរភាពនៃផលិតកម្មម្រេច កាលពីថ្ងៃទី11 ខែសីហា ឆ្នាំ2017 នៅទីស្តីការក្រសួងពាណិជ្ជកម្ម ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានអះអាងថា ការដាំដុះម្រេចនៅប្រទេសកម្ពុជា មានសន្ទុះខ្លាំងក្លាក្នុងរយៈពេលប៉ុន្មានឆ្នាំចុងក្រោយនេះ ពោលគឺបន្ទាប់ពីដំណាំម្រេចមានស្ថិរភាពថ្លៃ បើធៀបទៅនឹងផលិតផលផ្សេងៗទៀត។

បច្ចុប្បន្នកម្ពុជា អាចប្រមូលផលម្រេចបានបរិមាណ2ម៉ឺនតោន ខណៈកាលពីអំឡុងទសវត្សរ៍60 មានត្រឹមតែ 2,000តោនប៉ុណ្ណោះ។

ឯកឧត្តមបានថ្លែងថា៖ “ការកើនឡើងខ្ពស់នេះ បានបង្កក្តីលំបាកដល់ការរកទីផ្សារ។ យើងដឹងហើយថា ម្រេចតែមួយក្តាប់ គេអាចប្រើបានស្ទើរមួយភូមិ ដូចនេះការរកទីផ្សារពិតជាពិបាក។

នៅចំពោះមុខការលំបាកនេះ និងដើម្បីដោះស្រាយស្ថានភាពប្រឈមនៅពេលខាងមុខ ក្រសួងពាណិជ្ជកម្ម គ្រោងនឹងបង្កើតសមាគមម្រេចឱ្យមាននៅគ្រប់ខេត្តទាំងអស់19 ដែលមានការដាំដុះម្រេច ដើម្បីឈានទៅបង្កើតសហព័ន្ធម្រេចនៅថ្ងៃអនាគត ខណៈបច្ចុប្បន្នមានតែខេត្តចំនួន5ប៉ុណ្ណោះដែលមានសមាគមម្រេច។ ការប្រកបអាជីវកម្មម្រេចត្រូវបានធ្វើឡើងដោយឡែកៗពីគ្នារវាងកសិករម្នាក់ទៅកសិករម្នាក់ទៀត ដែលជាកត្តាពិបាក និងការចំណាយខ្ពស់។

ឯកឧត្តម ម៉ៅ ថូរ៉ា បានអះអាងថា ម្រេចជាផលិតផលសំខាន់មួយក្នុងចំណោមទំនិញទាំង19 មុខរបស់កម្ពុជាដែលជាអាទិភាពសម្រាប់ការនាំចេញ។ ផលិតផលម្រេចប្រមាណ300តោនសម្រាប់បំពេញតម្រូវការទីផ្សារក្នុងស្រុក ហើយទិន្នផលសេសសល់ត្រូវពឹងលើការនាំចេញ ដោយវៀតណាមនាំចូលច្រើនបំផុត ក្រៅពីនោះមានទីផ្សារជប៉ុន កូរ៉េ អាមេរិក និងកាណាដា ជាដើម។

យោងតាមការសិក្សា កសិករលក់ម្រេចភ្លាមៗក្រោយប្រមូលផល ដោយសារគ្មានឃ្លាំងស្តុក និងត្រូវការទុនបង្វិល។ អ្នកដាំដុះម្រេច ត្រូវចំណាយថវិកាប្រមាណពី 2-3ម៉ឺនដុល្លារក្នុងមួយហិកតា សម្រាប់ការដាំដុះម្រេចរហូតដល់ដល់ប្រមូលផល។

នៅខែធ្នូចុងឆ្នាំនេះ ក្រសួងពាណិជ្ជកម្មគ្រោងនឹងរៀបចំវេទិកាម្រេចលើកទី1 ដើម្បីបញ្ជ្រាបព័ត៌មានស្តីពីម្រេចដល់អ្នកដែលកំពុងធ្វើអាជីវកម្ម។ នេះបើតាមការបញ្ជាក់របស់ ឯកឧត្តម ម៉ៅ ថូរ៉ា៕

August 15, 2017

Ronaldo រងពិន័យព្យួរ 5ប្រកួត ក្រោយពីបានរុញខ្នងអាជ្ញាកណ្តាល

ខ្សែប្រយុទ្ធ Cristiano Ronaldo បានរងនូវការពិន័យព្យួរចំនួន5ប្រកួត ដោយសារតែបានរុញខ្នងអាជ្ញាកណ្តាលលោក De Burgos Bengoetxea ក្នុងអំឡុងពេលប្រកួតដែលក្រុម Real Madrid ដណ្តើមបានជ័យជម្នះក្នុងលទ្ធផល 3-1 លើក្រុម Barcelona ក្នុងការប្រកួតពាន Super Cup របស់អេស្ប៉ាញជើងទី1 កាលពីថ្ងៃអាទិត្យ។

ខ្សែប្រយុទ្ធរូបនេះបានរុញខ្នងអាជ្ញាកណ្តាលរូបនោះ ក្រោយពីរូបគេបានទទួលការពិន័យកាតលឿងជាលើកទី2 នៅក្នុងការប្រកួតនោះ។ Ronaldo បានរងពិន័យកាតលឿងលើកទីមួយសម្រាប់ការដោះដាវរបស់គេដើម្បីអបអរការរកគ្រាប់បាល់បញ្ចូលទី និងបានទទួលការពិន័យកាតលឿងមួយទៀតជាលើកទី2 សម្រាប់ការធ្វើពុតជាដួលនៅតំបន់ការពាររបស់ក្រុម Barcelona ក្រោមសម្ពាធរបស់ខ្សែការពារ Samuel Umtiti។ ក្រោមច្បាប់មាត្រាទី96របស់សហព័ន្ធកីឡាបាល់ទាត់អេស្ប៉ាញ កីឡាកររូបណាដែលចាប់ឱប អង្រួន និងរុញអាជ្ញាកណ្តាល អាចនឹងត្រូវរងពិន័យព្យួរពី4 ទៅ12ប្រកួត។ សេចក្តីថ្លែងការណ៍មួយដែលត្រូវបានចេញផ្សាយកាលពីថ្ងៃចន្ទដោយសហព័ន្ធកីឡាបាល់ទាត់អេស្ប៉ាញហៅកាត់ថា RFEF បានឲ្យដឹងថា៖ «ករណីទី1 កីឡាករ Cristiano Ronaldo របស់ក្លិប Real Madrid នឹងត្រូវជាប់ពិន័យព្យួរមួយប្រកួត ក្រោយពីទទួលបានកាតលឿង2 ដោយកាតលឿងទី1សម្រាប់ការដោះអាវរបស់គេក្នុងពេលអបអរការរកគ្រាប់បាល់បានរបស់គេ និងទី2 សម្រាប់ការធ្វើពុតជាដួល។ ក្លិបនេះត្រូវរងពិន័យជាទឹកប្រាក់350អឺរ៉ូ ហើយកីឡាកររូបនេះក៏នឹងត្រូវពិន័យ800អឺរ៉ូ ផងដែរ»។ RFEF បានបន្ថែមទៀតថា៖ «ករណីទី2 Cristiano Ronaldo ត្រូវជាប់ពិន័យព្យួរសម្រាប់ការប្រកួត4លើកផ្សេងទៀតចំពោះការប្រព្រឹត្តល្មើសនឹងវិន័យមាត្រាទី96 ដោយក្លិបត្រូវរងពិន័យជាទឹកប្រាក់1,400អឺរ៉ូ និង3,005អឺរ៉ូសម្រាប់កីឡាករ»៕

https://www.youtube.com/watch?v=mqxx1-EmKSE

នេះជាតារាងការប្រកួតដែលអវត្តមាន Cristiano Ronaldo

Barcelona (h) – Spanish Super Cup – 16 August

Deportivo La Coruna (a) – La Liga – 20 August

Valencia (h) – La Liga – 27 August

Levante (h) – La Liga – 9 September

Real Sociedad (a) La Liga – 17 September

ប្រភពពី៖ Sky Sport

August 15, 2017

Author: វល័ក្ខ