Author: វល័ក្ខ

ក្លិប​ហង្ស​ក្រហម Liverpool បានបង្ហាញ​ពី​ការប្តេជ្ញាចិត្ត​របស់ខ្លួន​ម្តងទៀត​ដើម្បី​រក្សាទុក Philippe Coutinho តាមរយៈ​ការច្រានចោល​សំណើ​មួយ​ដែលមាន​តម្លៃ​ខ្លួន130លាន​អឺរ៉ូ (ស្មើនឹង153លាន​ដុល្លារ​អាមេរិក) ពី​ក្លិប Barcelona សម្រាប់​ខ្សែបម្រើ​អន្តរជាតិ​ប្រេ​ស៊ី​ល​ដ៏​មាន​ឥទ្ធិពល​រូបនេះ។

ការព្យាយាម​ជា​លើក​ទី3របស់​ក្លិប Barcelona ក្នុងការ​នាំយក Coutinho ពី​កីឡដ្ឋាន Anfield បានផ្តល់​តម្លៃ​ខ្លួន​ជា​គោល90លាន​អឺរ៉ូ និង​ប្រាក់ឧបត្ថម្ភផ្សេងៗចំនួន40លាន​អឺរ៉ូ​ផ្សេងទៀត ពោលគឺ​បង្កើន​តម្លៃ​ខ្លួន5លាន​អឺរ៉ុប និង​ប្រាក់ឧបត្ថម្ភផ្សេង25លាន​អឺរ៉ូ​ទៅលើ​ដំណើការ​កាលពីមុន​រប​ស់​ពួកគេ។ ក្លិប​របស់​អេ​ស្ប៉ា​ញ​មួយ​នេះ បានដាក់​សំណើ​ដេញថ្លៃ​ជា​លើក​ទី3ហើយ​កាលពី​ថ្ងៃ​សុក្រ ក្រោយពី​ទទួលបាន​ការលើកទឹកចិត្ត​ដោយ​ការដាក់​សំណើសុំ​ផ្ទេរ​របស់ Coutinho វ័យ25ឆ្នាំ ទៅកាន់​ប្រធាន​ក្លិប​ផ្នែក​កីឡា​របស់​ក្លិប Liverpool គឺ​លោក Michael Edwards កាលពី​រយៈពេល1សប្តាហ៍​មុន។ ការស្នើសុំ​ផ្ទេរ​របស់ Coutinho បានកើត​ឡើង ក្រោយពី​មានការ​ប្រកាស​មួយ​ពី​ក្រុមហ៊ុន Fenway Sports Group ដែលជា​ម្ចាស់​ក្លិប Liverpool ថា តារា​ឆ្នើម​រូបនេះ​នឹង​បន្ត​នៅ​កីឡដ្ឋាន Anfield និង​មិន​ចាកចេញ​ក្នុងពេល​បើក​ទីផ្សារ​ដោះដូរ​កីឡាករ​ក្នុងពេល​នេះឡើយ។ ប៉ុន្តែ ការព្យាយាម​របស់គេ​ក្នុងការ​បង្ខំ​ឲ្យ​មានការ​ផ្ទេរ ក៏ដូចជា​ការដាក់សំណើ​កាលពីពេលថ្មីៗនេះ​របស់​ក្លិប​មាន​មូលដ្ឋាន​នៅ​កីឡដ្ឋាន Camp Nou មិនបាន​ផ្លាស់ប្តូរ​ជំហរ​របស់​ក្រុមហ៊ុន Fenway Sports Group ក្នុងការ​រក្សាទុក​ខ្សែបម្រើ​អន្តរជាតិ​ប្រេ​ស៊ី​ល​រូបនេះ​ឡើយ។ បើទោះបី Coutinho បានដាក់​សំណើសុំ​ផ្ទេរចេញ និង​ក្រោយពី​ក្លិប Barcelona បានដាក់​សំណើ​ដេញថ្លៃ2លើក​ហើយ​ក៏ដោយ ក៏​ក្លិប Liverpool បាន​ឆ្លើយ​ចំពោះ​សំណើ​កាលពី​ថ្ងៃ​សុក្រ​ជាមួយនឹង​ការច្រានចោលភ្លាមៗមួយ​ផ្សេងទៀត​ដែរ៕

ប្រភពព័ត៌មាន៖ The Guardian

វគ្គបណ្តុះបណ្តាលខ្លីមួយក្រោមកិច្ចសហការរវាងវិទ្យាស្ថានជាតិពហុបច្ចេកទេសកម្ពុជា (NPIC) ជាមួយក្រុមហ៊ុន Samsung អេឡិចត្រូនិកលើជំនាញបច្ចេកទេសកំពុងទទួលបានការចាប់អារម្មណ៍ខ្លាំងពីសំណាក់សិស្សនិស្សិត ខណៈវគ្គបណ្តុះបណ្តាលនេះបានផ្តោតយ៉ាងសំខាន់លើវិស័យអប់រំ និងបច្ចេកវិទ្យាក្នុងប្រទេសកម្ពុជា។

លោក រឿង ថៃ ជាគ្រូបណ្តុះបណ្តាលជំនាញទូរស័ព្ទដៃ និងធ្លាប់ជាសិស្សជំនាន់ទី1ដែលនោះ បានឱ្យដឹងថា វគ្គបណ្តុះបណ្តាលដែលកើតចេញពីការសហការគ្នានេះមានឈ្មោះថា Samsung Tech Institute ដោយគិតមកដល់ពេលនេះមាន4ជំនាន់ហើយ ដែលអនុញ្ញាតឱ្យសិក្ខាកាមចូលរៀនចាប់ពីឆ្នាំ2014មក ផ្ដោតលើជំនាញបច្ចេកទេស ទូរស័ព្ទដៃ ថេប្លេត ម៉ាស៊ីនត្រជាក់ និងគ្រឿងអេឡិចត្រូនិកជាច្រើនទៀតដែល Samsung មានលក់ក្នុងទីផ្សារ។

លោកថា៖ «តាមខ្ញុំសង្កេតមើល និងប្រៀបធៀបវគ្គបណ្តុះបណ្តាលនីមួយៗ ឃើញថាជំនាន់ទី4 នេះមាននិស្សិតចូលរួមច្រើនជាងគេ។ ចំនួននិស្សិតសូមចុះឈ្មោះច្រើនលើសធម្មតា»។

គ្រូបណ្តុះបណ្តាលខាងលើពន្យល់ថា ជំនាន់ទី1 និងជំនាន់ទី4 នេះមានការខុសប្លែកគ្នាច្រើន។ ដោយកាលពីដំបូងទូរស័ព្ទដៃដែលបានឧបត្ថម្ភដោយ Samsung មិនទាន់មានភាពជឿនលឿន និងមានចំនួនតិចនៅឡើយ ប៉ុន្តែសម្រាប់ជំនាន់ទី4 នេះវិញ លោកបានសង្កេតឃើញថា Samsung បានជួយឧបត្ថម្ភទូរស័ព្ទដៃថ្មីៗជាច្រើនគ្រឿងដែលមានបច្ចេកវិទ្យាទំនើបសមស្របទៅនឹងទីផ្សារបច្ចុប្បន្ន ហើយចំនួននិស្សិតចូលរៀនបានកើនឡើងច្រើនទ្វេដង។

គិតមកដល់ពេលនេះ មាននិស្សិតកម្ពុជាប្រហែល300នាក់ដែលកំពុងសិក្សានៅវិទ្យាស្ថានជាតិពហុបច្ចេកទេស និងសាលានានា បានទទួលនូវចំណេះជំនាញច្បាស់លាស់ផ្នែកបច្ចេកទេសអេឡិចត្រូនិក បន្ទាប់ពីពួកគេបានបញ្ជាប់វគ្គបណ្តុះបណ្តាលបច្ចេកទេស Samsung Tech Institute ដែលឧបត្ថម្ភដោយក្រុមហ៊ុន Samsung ប្រចាំនៅកម្ពុជា។ ពីមួយជំនាន់ទៅមួយជំនាន់ វគ្គបណ្តុះបណ្តាលនេះ កាន់តែទទួលបានការគាំទ្រ និងការចាប់អារម្មណ៍យ៉ាងខ្លាំងពីនិស្សិតជំនាញបច្ចេកទេស ដោយសារវាបានផ្តោតយ៉ាងសំខាន់លើវិស័យអប់រំ និងបច្ចេកវិទ្យាក្នុងប្រទេសកម្ពុជា ព្រមទាំងជួយឧបត្ថម្ភសម្ភារបរិក្ខារសិក្សាផ្សេងៗដល់និស្សិតដើម្បីប្រើប្រាស់ក្នុងពេលកំពុងសិក្សាទៀតផង។

លោក ជា ចាន់ណា ជានិស្សិតឆ្នាំទី2 ផ្នែកបរិក្ខារម៉ាស៊ីនត្រជាក់ដែលកំពុងរៀនក្នុងវគ្គបណ្តុះបណ្តាលនេះបានឱ្យដឹងថា អ្វីដែលធ្វើឱ្យលោកចាប់អារម្មណ៍ចូលរៀន ក៏ព្រោះថា នៅទីនេះសម្បូរទៅដោយផលិតផលថ្មីៗដែលមានបច្ចេកវិទ្យាខ្ពស់ ដូចជាទូទឹកកក ម៉ាស៊ីនបោកគក់ និងម៉ាស៊ីនត្រជាក់ដាក់ឱ្យអនុវត្តផ្ទាល់។ ក្នុងនោះកញ្ញា ចន ចន្ត្រា ដែលជានិស្សិតផ្នែកអេទ្បិចត្រូនិក Samsung Smart TV បានបង្ហាញចំណាប់អារម្មណ៍ថា មូលហេតុដែលកញ្ញាចាប់យកផ្នែកអេទ្បិចត្រូនិកនេះ ក៏ព្រោះតែកញ្ញាចូលចិត្តផលិតផល Samsung ហើយកញ្ញាក៏ចង់យល់ដឹងបន្ថែមអំពី Smart TV ផងដែរ។

សម្រាប់វគ្គបណ្តុះបណ្តាល Samsung Tech Institute គឺជាវគ្គបណ្តុះបណ្តាលបច្ចេកវិទ្យាដំបូងគេបង្អស់ក្នុងប្រទេសកម្ពុជាក្រោមការឧបត្ថម្ភ និងរៀបចំឡើងដោយក្រុមហ៊ុន Samsung និងវិទ្យាស្ថានជាតិបច្ចេកទេស។ គោលបំណងសំខាន់នៃកម្មវិធីនេះ គឺធ្វើឡើងដើម្បីលើកកម្ពស់គុណភាពធនធានមនុស្សលើផ្នែកបច្ចេកទេស ដើម្បីឱ្យប្រាកដថា គ្រប់និស្សិតដែលបានឆ្លងកាត់វគ្គបណ្តុះបណ្តាលនេះនឹងអាចទទួលបានចំណេះដឹងពិតប្រាកដ ដើម្បីទទួលបានការងារល្អដើម្បីផ្គត់ផ្គង់គ្រួសារ និងជួយដល់ការអភិវឌ្ឍសង្គមស្របពេលដែលប្រទេសកម្ពុជាបាននិងកំពុងធ្វើកំណែទម្រង់វិស័យអប់រំ ឯកឧត្តមបណ្ឌិត ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡាក៏បានជំរុញ និងលើកទឹកចិត្តឱ្យនិស្សិតកម្ពុជាចាប់យកជំនាញសំខាន់ៗដែលមានដូចជា វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដែលសុទ្ធសឹងជាជំនាញដែលជំរុញឱ្យការស្ថាបនា និងការអភិវឌ្ឍរបស់ប្រទេសកម្ពុជាឱ្យកាន់តែមានការរីកចម្រើនឡើងទាំងអស់៕

ភ្នំពេញ៖ ថ្លែង​ក្នុង​សិក្ខាសាលា​ពិគ្រោះ​យោបល់​រវាង​អ្នក​ផលិត និង​អ្នកផ្គត់ផ្គង់​ផលិតផល​ខ្មែរ ជាមួយ​អ្នកប្រើប្រាស់ និង​អ្នក​ចែកចាយ​បន្ត​ដែល​បាន​ប្រារព្ធ​ធ្វើ​រួមគ្នា​រវាង​ក្រសួងពាណិជ្ជកម្ម ក្រសួង​ឧស្សាហកម្ម និង​សិប្បកម្ម ក្រសួងកសិកម្ម រុក្ខាប្រមាញ់ និង​នេសាទ និង​ក្រសួងទេសចរណ៍ ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួង​ឧស្សាហកម្ម និង​សិប្ប​កម្មបាន​មានប្រសាសន៍ថា ដើម្បីឱ្យ​ផលិតផល​របស់​ខ្មែរ​ទទួលបាន​ការគាំទ្រ​នៅលើ​ទីផ្សារ​ជាតិ និង​អន្តរជាតិ​នោះ​គឺ​ត្រូវ​ពង្រឹងៈ

1.គុណភាព
2.ការ​វេច​ខ្ចប់​ប្រកបដោយ​សោភ័ណភាព
3.មាន​ស្តង់ដារ
និង 4.កត្តា​តម្លៃ​សមរម្យ។

ឯកឧត្តម​ទេសរដ្ឋមន្ត្រី​បាន​លើកឡើងថា បច្ចុប្បន្ន​និន្នាការ​នៃ​ការរីកចម្រើន​នៃ​សេដ្ឋកិច្ច​សកលលោក​កំពុងមាន​ភាព​ប្រកួតប្រជែង​ដ៏​ស្រួចស្រាល់ ហើយ​ក្នុង​សហគមន៍​សេដ្ឋកិច្ច​អាស៊ាន​ដែលមាន​ប្រទេស​ក្នុង​អាស៊ាន10ជា​សមាជិក​វិញ ការប្រកួត​ក្នុង​តំបន់​មួយ​នេះ​ក៏មាន​លក្ខណៈ​ស្រួចស្រាល់​ខ្លាំង​ណាស់ដែរ ដោយសារ​វា​មាន​លំហូរ​ដោយ​សេរី​នូវ​ទំនិញ សេវា​មូលធន និង​កម្លាំង​ពលកម្ម​ជាដើម ដូច្នេះ​សហគ្រាស​ក៏ដូចជា​ឧស្សាហកម្ម​ក្នុងស្រុក​ត្រូវតែ​ង្រឹ​ង និង​កែច្នៃ​ចង្វាក់​ផលិត​របស់ខ្លួន​ធ្វើយ៉ាងណា​ឱ្យ​ផលិតផល​ឬ​ទំនិញ​របស់​យើង​ផលិត​ចេញមក​មាន«1.គុណភាព 2.ការ​វេច​ខ្ចប់​ប្រកបដោយ​សោភ័ណភាព 3.មាន​ស្តង់ដារ និង4.តម្លៃ​សមរម្យ​ផងដែរ»។

កន្លងមក​កម្ពុជា​ក្នុងនាម​ជា​ប្រទេស​អភិវឌ្ឍន៍​តិចតួច បាន​ខិតខំ​ក្នុង​ការធ្វើសមាហរណកម្ម​របស់ខ្លួន​ក្នុង​តំបន់ និង​ពិភពលោក ដោយ​កម្ពុ​ជាមាន​សក្តានុពល​ខ្លាំង​តាមរយៈ​ការទទួលបាន​ការអនុគ្រោះ​ពាណិជ្ជកម្ម ដែល​អាច​នាំ​ទំនិញ​ទៅ​ក្រៅប្រទេស​ជាច្រើន​ដោយ​មិន​ជាប់ពន្ធ និង​កូតា​នាំចេញ «កត្តា​នេះ​យើង​គ្រាន់តែ​បាន​ឆ្លងកាត់​ដំណាក់កាល​របាំង​ពន្ធ​ប៉ុណ្ណោះ ក្នុងនោះ​ដើម្បី​មាន​ឧត្តមភាព​ប្រកួតប្រជែង យើង​ត្រូវ​ជម្នះ​របាំង​មួយទៀត​ឱ្យបាន​គឺ​របាំង​មិនមែន​ពន្ធគយ​ឬ​ហៅថា របាំង​បច្ចេកទេស ដែល​ទាក់ទង​ជាសំខាន់​ទៅលើ​កត្តា​អនាម័យ​និង​ភូតគ្រាម​អនាម័យ (SPS) និង​បទដ្ឋាន​ស្តង់ដារ​ជាដើម» ។

ការខិតខំ​របស់​ក្រសួង​ឧស្សាហកម្ម និង​សិប្បកម្ម​ក្នុងនាម​ដែល​ឯកឧត្តម​ចម ប្រសិទ្ធ ជា​ប្រធាន​ក្រុមប្រឹក្សា​ស្តង់ដារ​ជាតិ​បាន​ជំរុញឱ្យមាន​ការខិតខំ​យក​ស្តង់ដារ​ម្ហូបអាហារ និង​ស្តង់ដារ​ផលិតផល​អន្តរជាតិ​ក៏ដូចជា​ស្តង់ដារ​អាស៊ាន​មក​ធ្វើជា​ស្តង់ដារ​ជាតិ​បាន​ចំនួន 804 ស្តង់ដារ​រួចហើយ ដើម្បីឱ្យ​ការផលិត​ទំនិញ​នៅ​កម្ពុជា​អាច​នាំចេញ​បាន​ដោយ​មិន​ជាប់​របាំង​បច្ចេកទេស។ ចំណែក​ការបន្លំ​ឈ្មោះ​ប្រទេស​អ្នក​ផលិត​វិញ​បើ​ផលិតករ សិប្បករ​ឬ​ឧស្សាហករ​ចង់​រក្សា​ផលិតផល​របស់ខ្លួន​ថា ពិតជា​ផលិត​នៅ​កម្ពុជា​ពិតប្រាកដ​ត្រូវបំពេញ​លក្ខខណ្ឌ​តម្រូវ​មួយចំនួន​ដូចជា៖ ក្រុមហ៊ុន រោងចក្រ ឬ​សហគ្រាស​ត្រូវ​ចុះបញ្ជី​នៅ​ក្រសួងពាណិជ្ជកម្ម ឬ​ក្រសួង​ឧស្សាហកម្ម និង​សិប្បកម្ម​ដើម្បី​សុំ​វិញ្ញាបនបត្រ​ដំណើរការ និង​បន្ទាប់មក​ត្រូវ​ចុះបញ្ជី​ផលិតផល​នៅ​វិទ្យាស្ថាន​ស្តង់ដារ​កម្ពុជា ឬ​បិទ​ Bar Code ដើម្បី​បញ្ជាក់ថា ផលិតផល​នោះបាន​ផលិត​នៅ​កម្ពុជា​ពិតប្រាកដ​មែន៕

ថ្ងៃនេះ កំពុង​មានរឿង​មិន​ស្រួល​មួយ​កើតឡើង​ចំពោះ​គណនី Facebook មួយចំនួន តាមរយៈ​ការ Share បន្ដ​គ្នា​ដោយ​ស្វ័យប្រវត្តិ​ក្នុង​ឆាត (Chat) ដោយ​គ្រាន់តែ​ចុច​លើ Link នោះ វា​នឹង​លោត​ទៅក្នុង​កម្មវិធី YouTube ជា​វីដេអូ ប៉ុន្តែ​អ្វីដែល​គួរឱ្យខ្លាច​នោះ គឺ​គណនី​របស់​យើង​នឹង​ជួប​បញ្ហា ដូចជា​បាត់​Setting  បាត់​Share កុំព្យូទ័រ​មានដំណើរ​ការមិន​ប្រក្រតី លោតៗ ញាក់ៗជាដើម។

ក្នុងករណីនេះ ប្រសិនបើ​ប្រិយមិត្ត​ឃើញ​សារ Messenger ដែល​សរសេរថា (Watch my private video and don’t show it to anyone ) ដែល​មិត្ត​ភ័ក្តិ​ក្នុង Facebook ផ្ញើមក​ដែលមាន​សណ្ឋាន​ដូច​ក្នុង​រូប សូមកុំ​ចុច​លើ Link នោះ​ឱ្យសោះ ដើម្បី​សុវត្ថិភាព ព្រោះថា យើង​មិនដឹងថា​មេរោគ​នោះ​ចង់បាន​អ្វី​ឱ្យ​ប្រាកដ​នោះទេ។ បើ​មិន​ដូច្នោះ​ទេ វា​នឹង​ផ្ញើ​សារ (ឆ្លង)ចូលទៅ​គ្រប់​មិត្តភក្តិ​របស់​អ្នក​ស្ទើរតែ​ទាំងអស់​តែម្តង៕

ភ្នំពេញ – តារាចម្រៀង និង​តារា​សម្ដែងល្បីៗឈ្មោះ​ប្រចាំ​នៅ​ប្រទេស​កូរ៉េ​នឹង​កាន់តែ​មានឱកាស​បានមក​បង្ហាញ​វត្ដ​មាននៅ​ក្នុងប្រទេស​កម្ពុជា​បន្ថែមទៀត!  នេះ​ជាការ​លើកឡើង​របស់​អ្នកស្រី យូ​លី​ណា ក្នុងឱកាស​នៃ​ពិធី​ការប្រគល់សិទ្ធិ​ពាក់កណ្ដាល​ទៅឱ្យ​ផលិតករ​កូរ៉េ និង​ប្រកាស​ប្ដូ​ឈ្មោះ​ពី​ទូរទស្សន៍ NTV ទៅ​ទូរទស្សន៍​កូរ៉េ UNS TV។

អ្នកស្រី យូ​លី​ណា ត្រូវបាន​គេ​ស្គាល់​ថា ជា​ម្ចាស់​ជំនួញ​ប្រាក់​វាល់​លាន​ជនជាតិ​កូរ៉េ​សញ្ជាតិ​កម្ពុជា និង​ជា​អ្នករៀបចំ​ព្រឹត្តិការណ៍​តន្ត្រី​សប្បុរស​ធ​ម៍​ដោយមាន​តារាចម្រៀង​ឱក សុគន្ធ​កញ្ញា ចូលរួម​នោះ បាន​អះអាងថា តារាល្បីៗលំដាប់​ពិភពលោក​របស់​កូរ៉េ​នឹងត្រូវ​ចូលខ្លួន​មក​បង្ហាញ​វត្ដ​មាន​ដើម្បី​កំដរ​អារម្មណ៍​អ្នកគាំទ្រ​កម្ពុជា​ដែល​និយម​ចូល​ចិ​ត្ដបទ​ចម្រៀង និង​ភាពយន្ដ​កូរ៉េ។

អ្នកស្រី​បន្ដថា តាមរយៈ​ការវិនិយោគទុន​រួមគ្នា​ជាច្រើន​លាន​ដុល្លារ​នេះ​បានធ្វើឱ្យ​កិច្ចព្រមព្រៀង​នៃ​ការប្ដូរឈ្មោះ​ទូរទស្សន៍​ NTV មកជា UNS TV និង​ប្រគល់ឱ្យ​អ្នកស្រី​ទទួលខុសត្រូវ​ដើម្បីឱ្យ UNS TV មាន​កម្មវិធី​ប្រកួតប្រជែង​កម្រិត​អន្តរជាតិ​តាមរយៈ​ការចំណាយ​ប្រាក់​យក​តារាល្បីៗរបស់​កូរ៉េ​មក​ច្រៀង​រាំ​នៅ​កម្ពុជា។ អ្នកស្រី​បញ្ជាក់ថា ក្រៅពី​មានការ​អញ្ជើញ​តារា​សិល្បៈ​កូរ៉េ​មកហើយ​នោះ ទូរទស្សន៍​ក៏មាន​គម្រោង​អញ្ជើញ​តារា​សិល្បៈ​លំដាប់​ពិភពលោក​មក​ចូលរួម​ក្នុង​កម្មវិធី​កម្សាន្ដ​នៅ​កម្ពុជា​ផងដែរ។

គួរ​បញ្ជាក់ថា ទូរទស្សន៍​ UNS TVជាការ​វិនិយោគ​រួមគ្នា​រវាង​កម្ពុជា-កូរ៉េ ដូច្នេះ​លោក​បណ្ឌិត សំបូរ សាណូ នៅតែ​ជា​អគ្គនាយក​ប្រចាំ​ស្ថានីយទូរទស្សន៍​មួយ​នេះ​ដដែល។ ទុន​ដែល​ត្រូវ​វិនិយោគ​ជាច្រើន​លាន​ដុល្លារ​នេះ​គឺ​ដើម្បី​សាងសង់​ស្ទូ​ឌី​យោ​ស្ថានីយទូរទស្សន៍​ស្ដង់ដារ​មួយ និង​បំពាក់​ដោយ​ឩ​បក​រណ៍​កម្រិត​ទំនើប​ដើម្បី​បម្រើឱ្យ​ការផលិត​កម្មវិធី​ផ្លូវការ និង​កម្មវិធី​កម្សាន្ដ​នានា។

អ្នកស្រី​បញ្ជាក់ថា មូល​ហេតុដែល​អ្នកស្រី​បោះទុន​វិនិយោគ​នេះ ព្រោះ​វា​ជួយ​ឱ្យ​អ្នកស្រី​ចំណេញ​ពេលវេលា​តិច​ដោយ​គ្រាន់តែ​បន្ត​សាងសង់​ស្ទូ​ឌី​យោ និង​ផលិត​កម្មវិធីបណ្ដើរៗជាការ​ស្រេច។ អ្នកស្រី​ថា ក្នុងពេល​ដ៍​ខ្លី UNS TV នឹង​ផ្សាយ​បន្ត​ផ្ទាល់​នូវ​ព្រឹត្តិការណ៍​តន្ត្រីធំៗដែលមាន​វត្តមាន​កំពូល​តារាល្បីៗមកពី​ប្រទេស​កូរ៉េ និង​តារា​សិល្បៈ​លំដាប់​ពិភពលោក​ផងដែរ ហើយ​វា​ក៏​ជា​ចំណែក​មួយ​ចូលរួម​ជំ​រុញឱ្យ​ពិភពលោក​កាន់តែ​ចាប់អារម្មណ៍​មក​កម្ពុជា​តាមរយៈ​វត្ដ​មាន​របស់​តារាល្បីៗទាំង​នោះដែរ។

លោក សាម៉ន បណ្ឌិត្យ តំណាងឱ្យ UNS TV  ភាគី​ខាង​កម្ពុជា​បាន​អះអាងថា  មូលហេតុ​ឈានដល់​ការធ្វើ​កិច្ចព្រមព្រៀង​ព្រោះ​ក្រៅពី​ការបោះ​ទុនវិនិយោគ​ហើយ អ្នកស្រី  យូ​លី​ណា នឹង​ធ្វើឱ្យ​ទូរទស្សន៍ NTV  ដែល​ប្ដូរ​មកជា UNS TV មាន​កម្មវិធី​កម្សាន្ត​ប្រកួតប្រជែង​ច្រើន ពិសេស​អ្នកស្រី​បានប្រកាស​ទិញ​សិទ្ធិ​ពី​កម្មវិធី​របស់​ប្រទេស​កូរ៉េ​មួយចំនួន​យកមក​ផលិត​នៅ​កម្ពុជា​ទៀតផង៕

ភ្នំពេញៈ មន្ត្រីជាន់ខ្ពស់​ក្រសួង​ឧស្សាហកម្ម និង​សិប្ប​កម្មបាន​ថ្លែងថា រហូតមកទល់​ពេលនេះ​មាន​ម្ចាស់​អាជីវកម្ម ចំនួន500រួចហើយ​ដែល​បានមក​ចុះបញ្ជី​យក​ស្លាក​សញ្ញា​ស្តង់ដារ​ពី​វិទ្យាស្ថាន​ស្តង់ដារ​ជាតិ​កម្ពុជា​ដើម្បី​ទទួលបាន​ការទទួលស្គាល់​ផលិតផល​របស់ខ្លួន និង​ដើម្បី​ជំរុញ​ការនាំចេញ។

លោក ចាន់ បូ​រិន្ទ ប្រធាន​វិទ្យាស្ថាន​ស្តង់ដារ​កម្ពុជា​បាន​ថ្លែង​ឲ្យ​ដឹង​នា​ព្រឹក​ថ្ងៃទី១៨ សីហា​នេះ​ថា ទន្ទឹមនឹង​ការខិតខំ​របស់​ក្រុមប្រឹក្សា​ស្តង់ដារ​ជាតិ ក្នុងការ​ជម្រុញ​បង្កើតជា​ស្តង់ដារ​ជាតិ​តែមួយ ដែល​ចាត់ទុកជា​គ្រឹះ​យ៉ាងសំខាន់​ដល់​ម្ចាស់​សហគ្រាស សិប្បកម្ម និង​ឧស្សាហកម្ម​នោះ មកដល់ពេលនេះ មាន​ម្ចាស់​ក្រុមហ៊ុន​មួយចំនួន​ដែល​ចង់​ពង្រឹង​ពី​គុណភាព​អនាម័យ លើ​ផលិតផល​របស់ខ្លួន ដើម្បី​ឈានទៅរក​ការប្រកួតប្រជែង​នោះ បច្ចុប្បន្ន​មាន​ម្ចាស់​អាជីវកម្ម​ចំនួន៥០០ក្រុមហ៊ុន​រួចមកហើយ ដែល​បានមក​ចុះបញ្ជី​យក​សញ្ញា​ស្តង់ដារ ក្រោម​ភាព​អនុលោម និង​ធ្វើការ​ត្រួតពិនិត្យ​យ៉ាង​ត្រឹមត្រូវ លើ​ការវាយតម្លៃ​ទទួលស្គាល់​ក្រុមហ៊ុន​ទាំងនោះ។

លោក​បន្តថា នៅក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ​ក្រុមប្រឹក្សា​ស្តង់ដារ​ជាតិ បានអនុម័ត​យក​ស្តង់​ដារ​អន្តរជាតិ និង​ស្តង់ដារ​ក្នុងប្រទេស​អាស៊ាន​ទាំង១០ សរុប​ចំនួន៨៤៨ស្តង់ដារ មកជា​ស្តង់ដារ​ជាតិ​បាន៨០៤ស្តង់ដារ​រួចហើយ ដើម្បី​ជួយ​ជម្រុញ​និង​ជា​ប្រយោជន៍ សម្រាប់​ជួយ​ដល់​ម្ចាស់​ឧស្សាហករ សិប្បកម្ម និង​ដល់​ម្ចាស់​សហគ្រាសផ្សេងៗក្នុងការ​ប្រកួតប្រជែង​នូវ​ផលិតផល​របស់ខ្លួន​ប្រកបដោយ​គុណភាព។

ប្រធាន​វិទ្យាស្ថាន​ស្តង់ដារ​កម្ពុជា​បាន​បន្តថា នៅក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ ក្រុមប្រឹក្សា​ស្តង់ដារ​ជាតិ បាន​បើក​កិច្ចប្រជុំ​ជាច្រើនលើក​ច្រើនសារ ដើម្បី​សម្រេច​អនុម័ត​យក​ស្តង់ដារផ្សេងៗមកជា​ស្តង់ដារ​ជាតិ ក្នុង​គោលបំណង​ជម្រុញ​ដល់​ម្ចាស់​សហគ្រាស សិប្បកម្ម និង​វិស័យ​ឧ​ស្សហកម្ម​នៅ​កម្ពុជា ក្នុងការ​អភិវឌ្ឍន៍​ទៅតាម​ស្តង់ដារ ឲ្យ​មាន​សន្ទុះ​កាន់តែ​ប្រសើរឡើង​ជាង​មុន ដែលជា​ខ្នងបង្អែក​យ៉ាងសំខាន់ សម្រាប់​ព​ន្លឿ​ន​ឧស្សាហកម្ម​របស់ខ្លួន។

គិត​មកដល់ពេលនេះ ក្រុមប្រឹក្សា​ស្តង់ដារ​កម្ពុជា បានអនុម័ត​យក​ស្តង់​ដារ​អន្តរជាតិ​រួមមាន ស្តង់ដារ ម្ហូបអាហារ​មាន​ចំនួន៤០០ស្តង់ដារ ស្តង់ដារ​អគ្គិសនី​អេ​ឡិច​ត្រូ​និ​ច​ជាង១០០ស្តង់ដារ ស្តង់ដារ​ឈើ ស្តង់ដារ​ផលិត​អំពី ឈើ​និង​ផលិត​អំពី​កៅស៊ូ ក្នុងនោះ​ស្តង់ដារ​ជាតិ​រួមមាន ស្តង់ដារ​ត្រីងៀត ផ្អក ប្រហុក ស្តង់ដារ​បង្គា​បង្កក ស្តង់ដារ​អង្ករ ស្តង់ដារ​មួកសុវត្ថិភាព ស្តង់ដារ​យានយន្ត (មាន​ម៉ូតូ និង​រថយន្ត) សរុប​ទាំងអស់​មាន​ចំនួន៨៤៨ស្តង់ដារ ក្នុងនោះ​កម្ពុជា​បានអនុម័ត​បាន​ចំនួន៨០៤ស្តង់ដារ​ជាតិ​រួចមកហើយ ដើម្បី​ជា​តម្រូវការ​ដល់​ម្ចាស់​សហគ្រាស សិប្បកម្ម ឧស្សាហកម្ម៕

ភ្នំពេញ៖ ធនាគារជាតិ​នៃ​កម្ពុជា (NBC) បានចេញ​សេចក្តីប្រកាស​ព័ត៌មាន​បន្ទាន់​មួយ ព្រមាន​ពិន័យ 400លាន​រៀល​ឬ​ស្មើនឹង10ម៉ឺន​ដុល្លារ​ពី​គ្រឹះស្ថាន​មីក្រូហិរញ្ញវត្ថុ​ទាំងឡាយណា ដែល​មិន​អនុវត្តតាម​សេចក្តីណែនាំ​ក្នុងការ​ផ្តល់​កម្ចី​កំណត់​យក​អត្រា​ការប្រាក់ 18% ក្នុង​មួយឆ្នាំ។

សេចក្តីប្រកាស​ព័ត៌មាន​ដែល​ចេញផ្សាយ​នៅ​ព្រឹក​ថ្ងៃទី18 ខែសីហា​នេះ​បាន​បញ្ជាក់ថា​អនុលោម​តាមច្បាប់ និង​បទ​ប្បញ្ញត្តិ​ជា​ធរមាន និង​ក្នុង​គោលដៅ​ពង្រឹង​កិច្ច​គាំពារ​អតិថិជន ធនាគារជាតិ​នៃ​កម្ពុជា​សម្រេច ៖

1.នឹង​ផាកពិន័យ​ជា​ទឹកប្រាក់​ចំនួន 400លាន​រៀល​ចំពោះ​គ្រឹះស្ថាន​មីក្រូហិរញ្ញវត្ថុ​មួយណា​ដែល​មិន​អនុលោម​តាមច្បាប់ និង​បទ​ប្បញ្ញត្តិ ជាពិសេស​ប្រកាស​ស្តីពី​តម្លាភាព​ក្នុង​ការផ្តល់សេវា​ឥណទាន​របស់​គ្រឹះស្ថាន​ធនាគារ និង​មីក្រូហិរញ្ញវត្ថុ។

2.ធនាគារជាតិ​នៃ​កម្ពុជា​បាន​បង្កើត​ប្រព័ន្ធ​ទូរស័ព្ទ​ Hotline ចំនួន 4ខ្សែ​ដើម្បី​រង់ចាំ​ទទួល​ព័ត៌មាន​អំពី​អតិថិជន​ដែលមាន​បញ្ហា​ជាមួយ​គ្រឹះស្ថាន​ធនាគារ និង​ហិរញ្ញវត្ថុ។

3.បន្ត​ពង្រឹង​ការចុះ​ត្រួតពិនិត្យ​ដល់ទី​កន្លែង​ចំពោះ​គ្រឹះស្ថាន​ធនាគារ និង​ហិរញ្ញវត្ថុ​ដែល​ស្ថិតក្រោម​អាណាព្យាបាល​របស់​ធនាគា​រ​ជាតិ​នៃ​កម្ពុជា។

ដើម្បីឱ្យ​ការអនុវត្ត​នេះ​ប្រព្រឹត្ត​ទៅដោយ​តម្លាភាព និង​ផ្តល់​ជា​ប្រយោជន៍​ទៅដល់​អតិថិជន ឬ​ប្រជាពលរដ្ឋ ធនាគារជាតិ​នៃ​កម្ពុជា​នឹង​ចាត់វិធានការ​យ៉ាង​តឹងរ៉ឹង​ដូច​មានចែង​ក្នុង​ជំពូក18, 19 និង20 នៃ​ច្បាប់​ស្តីពី​គ្រឹះស្ថាន​ធនាគារ និង​ហិរញ្ញវត្ថុ​ចំពោះ​គ្រឹះស្ថាន​ធនាគារ និង​ហិរញ្ញវត្ថុ​ណា​ដែល​ប្រព្រឹត្តល្មើស។

ជាមួយគ្នានេះដែរ ធនាគារជាតិ​បាន​ក្រើនរំឭក​ទៅដល់​ធនាគារ គ្រឹះស្ថាន​មីក្រូហិរញ្ញវត្ថុ ក្រុមហ៊ុន​ភតិសន្យា​ហិរញ្ញវត្ថុ និង​ប្រតិបត្តិ​ករ​ឥណទាន​ជនបទ​ទាំងអស់​ថា ទាំងអស់​គឺជា​គ្រឹះស្ថាន​ឯកជន​រក​ផលចំណេញ ហើយ​គ្រឹះស្ថាន​ទាំងនោះ​មិនមែនជា​របស់​រដ្ឋ​ទេ ដូច្នេះ​រាល់​ការឃោសនា​បោកប្រាស់​ណាមួយ​ដែលថា នឹងមាន​ការ​លុប​បំណុល​របស់​អតិថិជន​នោះ មិនមែនជា​ការពិត​ទេ ហើយ​ត្រូវ​ទទួលខុសត្រូវ​ចំពោះមុខ​ច្បាប់។

គួរ​បញ្ជាក់ថា ចាប់តាំងពី​ធនាគារជាតិ​តម្រូវឱ្យ​គ្រឹះស្ថាន​មីក្រូហិរញ្ញវត្ថុ​យកការប្រាក់​ខ្ពស់​បំផុត​ត្រឹម18%ក្នុង​មួយឆ្នាំ​មក​គេ​សង្កេតឃើញថា មាន​គ្រឹះស្ថាន​មីក្រូហិរញ្ញវត្ថុ​ខ្លះ​មិនបាន​បញ្ចុះ​អត្រា​ការប្រាក់​របស់ខ្លួន​ទេ​សម្រាប់​អតិថិជន​ចាស់ និង​ថ្មី​របស់ខ្លួន គឺអាច​ថា​គិត 2%ក្នុង 1ខែ​ហើយ​គ្រឹះស្ថាន​មីក្រូហិរញ្ញវត្ថុ​ផ្សេងទៀត​យកការប្រាក់ 18%ក្នុង1ឆ្នាំ ​តាម​ធនាគារជាតិ​តម្រូវ តែ​អតិថិជន​ត្រូវ​បង់​សេវាផ្សេងៗជាច្រើន​ដូចជា​ថ្លៃ​សេវា​រដ្ឋបាល គឺ​អតិថិជន​ត្រូវ​បង់ 0.5%ជា​រៀងរាល់ខែ ដូច្នេះ​សរុប​ទាំង​សេវា​រដ្ឋបាល និង​ការប្រាក់​អតិថិជន​ត្រូវ​បង់អស់ 2%ក្នុង1ខែ​ដដែល ចំណែក​គ្រឹះស្ថាន​មីក្រូហិរញ្ញវត្ថុ​ផ្សេងទៀត​យកការប្រាក់18% ក្នុង1ឆ្នាំ​មែន តែ​អតិថិជន​ត្រូវ​បង់ថ្លៃ​សេវា​រដ្ឋបាលផ្សេងៗ (fee) ទម្លាក់​កម្ចី​ម្តង 3%បើ​ខ្ចី​រយៈពេល 3-6ខែ ឬ 6%បើ​ខ្ចី​រយៈពេល1ឆ្នាំ​ដែល​បើ​សរុប​ទាំង​ការប្រាក់​ផង​គឺ​នៅតែ24% ក្នុង1ឆ្នាំ​ដដែល។

លោក សេន សុភ័ក្ត្រ ជា​អតិថិជន​ដែល​បាន​ខ្ចីប្រាក់​ពី​គ្រឹះស្ថាន​មីក្រូហិរញ្ញវត្ថុ​បាន​និយាយថា កាលពី​អំឡុងពេល​ខ្ចី​ដំបូង​នៅ​ឆ្នាំ2015 លោក​បាន​ខ្ចីប្រាក់​ពី​គ្រឹះស្ថាន​មីក្រូហិរញ្ញវត្ថុ​មួយចំនួន 3,000ដុល្លារ ហើយ​បាន​តម្រូវឱ្យ​បង់​ការប្រាក់1.7%ក្នុង​មួយខែ​ដោយ​មិនមាន​សេវា​រដ្ឋបាល​នោះទេ ប៉ុន្តែ​ក្រោយពី​ធនាគារជាតិ​ប្រកាស​ឱ្យ​ទម្លាក់​អត្រា​ការប្រាក់ 18% ក្នុង​មួយឆ្នាំ​មក ស្រាប់តែ​ខាង​គ្រឹះស្ថាន​មីក្រូ​ហិញ្ញ​វត្ថុ​នោះ​តម្រូវឱ្យ​លោក​បង់​សេវា​រដ្ឋបាលផ្សេងៗ សរុប​ទាំង​អស់លោក​ត្រូវ​ចំណាយ​ដល់​ទៅ40ដុល្លារ​ជាង​ឯណោះ ហើយ​នៅពេល​សួរថា ហេតុអ្វី​បាន​យក​សេវា​រដ្ឋបាល​នេះ ខាង​គ្រឹះស្ថាន​មីក្រូហិរញ្ញវត្ថុ​ប្រាប់ថា ជាគោលការណ៍​ថ្មី៕

ក្លិប Tottenham Hotspur កំពុងតែ​ស្ថិត​យ៉ាង​ប្រកៀក​ក្នុងការ​ចុះហត្ថលេខា​ជាមួយនឹង​កីឡាករ​ជា​លើក​ទី1របស់​ពួកគេ​នៅ​រដូវក្តៅ​នេះ ក្រោយពី​បាន​យល់ព្រម​លើ​ការព្រមព្រៀង​គ្នា​មួយ​ជាមួយនឹង​ក្លិប Ajax ដើម្បី​ទិញ​ខ្សែការពារ Davinson Sanchez ។

ទីបំផុត ក្លិប​មាន​ខ្នាយ​មាស Spurs បានទទួល​ជោគជ័យ​កាលពី​ថ្ងៃ​ព្រហស្បតិ៍ សម្រាប់​ការផ្ទេរ​ខ្សែការពារ​អន្តរជាតិ​កូ​ឡុំ​ប៊ី​រូបនេះ។ ពួកគេ​នឹង​ចំណាយ​ប្រា​ក់លើ​តម្លៃ​ខ្លួន​ជា​គោល28លាន​ផោន (ស្មើនឹង36លាន​ដុល្លារ​អាមេរិក) និង​ប្រាក់ឧបត្ថម្ភផ្សេងៗចំនួន 14លាន​ផោន​ផ្សេងទៀត។ ចំណុច​ដែល​មិនទាន់​ឈានដល់​ការព្រមព្រៀង​គ្នា​មួយ​រវាង​ក្លិប Tottenham និង Ajax គឺ​ពេលវេលា​នៃ​ការទូទាត់​ប្រាក់ ខណៈដែល​ក្លិប Ajax កំពុងតែ​ព្យាយាម​បង្កើនល្បឿន​ទៅលើ​ដំណើរការផ្សេងៗឲ្យ​បាន​លឿន​ជាង​អ្វីដែល​បានគ្រោង​ទុក។

Sanchez បាន​ប្រាប់​ក្លិប Ajax កាលពី​ថ្ងៃ​ចន្ទ​ថា រូបគេ​ចង់​ចូលរួម​ជាមួយនឹង Spurs បើទោះបី​ក្លិប​នេះ(Ajax )បានផ្តល់​សំណើ​នៃ​ការចុះ​កុងត្រា​ថ្មី​ក្នុង​ទឹកប្រាក់​ដ៏​ច្រើន​ដើម្បី​រក្សាទុក​រូបគេ​ឲ្យ​ស្ថិតក្នុង​ក្លិប​របស់​ហូ​ឡង់​នេះ​ក៏ដោយ។ ខណៈដែល​ការ​ព្រមព្រៀងគ្នា​មួយ​រវាង​ក្លិប​ទាំងពីរ​កំពុងតែ​ស្ថិត​យ៉ាង​ប្រកៀក​នៅ​សប្តាហ៍​នេះ Sanchez បាន​ដកខ្លួន​ចេញពី​ក្រុម​របស់ Ajax ដែល​ត្រូវធ្វើ​ការប្រកួត​ក្របខ័ណ្ឌ Europa League វគ្គ Playoff ជាមួយនឹង​ក្រុម Rosenborg កាលពី​យប់​ថ្ងៃ​ព្រហស្បតិ៍។

Sanchez វ័យ21ឆ្នាំ បាន​ក្លាយជា​គោលដៅ​មួយ​សម្រាប់​ក្លិប Real Madrid និង Barcelona កាលពី​ឆ្នាំមុន ប៉ុន្តែ​រូបគេ​នឹងត្រូវ​លេង​ឲ្យ​ក្លិប Spurs នៅ​រដូវ​កាល​នេះ​ដើម្បី​ធ្វើការ​ប្រជែង​ជាមួយនឹង Jan Vertonghen និង Toby Alderweireld ក្នុង​តំបន់​ការពារ​កណ្តាល៕

ប្រភពពី៖ The Telegraph

ភ្នំពេញ – ដោយថ្មីៗនេះ​នៅ​ទីក្រុង​ភ្នំពេញ​ទទួលបាន​បទពិសោធ​នៃ​ការបាក់​ដី​នៅត្រង់ចំណុច​ការដ្ឋាន​សាងសង់​គម្រោង​ដ៏​ធំ​មួយ​មកពី​ប្រទេស​កូរ៉េ​ឈ្មោះថា ប៊ូ​យ៉ុង ដែល​ស្ទើរតែ​បង្កឱ្យមាន​បញ្ហា​ដល់​វិថី​សហព័ន្ធ​រុស្សី​ប្រសិន​គ្មាន​ការទប់ស្កាត់​ទាន់ពេលវេលា​ទេនោះ។ អភិបាល​រាជធានី​ភ្នំពេញ​បាន​អំពាវនាវ​ដល់​អ្នកវិនិយោគ និង​ក្រុមហ៊ុន​ម៉ៅការ​សាងសង់​ទាំងអស់​ឱ្យ​បង្កើន​ការប្រុងប្រយ័ត្ន​ខ្ពស់ និង​សិក្សា​ឱ្យបាន​ច្បាស់លាស់​ដើម្បី​បញ្ចៀស​នូវ​ហានិភ័យ​ដែល​អាច​នឹង​ប៉ះពាល់​ដល់​ប្រជាពលរដ្ឋ​រស់នៅ​ជុំវិញ​សំណង់​អគារ និង​ម្ចាស់​គម្រោង​ផ្ទាល់។

ឯកឧត្ដម ​ឃួ​ង ស្រេង អភិបាល​រាជធានី បានបញ្ជាក់​ពីបទ​ពិសោធ​ដែល​លោក​ធ្លាប់​ជួបប្រទះ​កន្លងមក​ថា នៅពេល​ខ្ញុំ​នៅ​ជា​អភិបាលរង​តែង​ជួបប្រទះជារឿយៗនូវ​បញ្ហា និង​ទទួលបាន​ពាក្យបណ្ដឹង​ពី​ប្រជាពលរដ្ឋ​រស់នៅ​ជិតខាង​នៃ​ខុន​ដូ និង​សំណង់​អគារខ្ពស់ៗនៅក្នុង​រាជធានី​ភ្នំពេញ។ ពិសេស​ក្នុង​ខណ្ឌ​ទាំង4ក្នុង​ទីក្រុង​គ្រា​ដែល​ពួកគាត់​រស់នៅ​ជិត​នោះ​ជួបនឹង​បញ្ហា​ប៉ះពាល់ និង​ខូចខាត​ដល់​ទ្រព្យ​ស​ម្បិ​ត្ដ​ដោយសារតែ​ក្រុមហ៊ុន​មិនបាន​សិក្សា​ឱ្យបាន​ច្បាស់លាស់​ពី​សណ្ឋាន​ដី ព្រោះ​ភាគច្រើន​ទីតាំងនៅ​ក្នុង​ខ​ណ្ឌ​ទាំង4នោះ​ជា​អតីត​ដី​បឹង​ដែល​ត្រូវបាន​ចាក់​បំពេញ​ដោយ​ដីខ្សាច់។ ឯកឧត្ដម​ឃួ​ង ស្រេង បាន​បញ្ជាក់ថា៖«ខ្ញុំ​សូម​អំពាវនាវ​ដល់​បង​ប្អូន​ប្រជាពលរដ្ឋ និង​ម្ចាស់​គម្រោង​វិនិយោគ​សូម​សិក្សា​ឱ្យបាន​ច្បាស់លាស់​នឹង​បង្កើន​ការប្រុងប្រយ័ត្ន​ឱ្យបាន​ហ្មត់ចត់​មុននឹង​ធ្វើការ​ជីកដី​សាងសង់​សំណង់​របស់ខ្លួន។ ភាគច្រើន​អគារខ្ពស់ៗ ឬ​ខុន​ដូ​ទាំងនោះ​ត្រូវ​ជីកដី​ចុះទៅ​ក្រោម​ធ្វើ​ចំណតរថយន្ត​ក្រោម​ដី ដូច្នេះ​មុននឹង​ធ្វើ​ចំណត​ទាំងនោះ​ត្រូវតែមាន​បច្ចេកទេស​ទប់​ស្កាត់​កុំឱ្យ​មានការ​ហូរ​ច្រោះ​បាក់​ដី ធ្វើយ៉ាងណា​កុំឱ្យ​បង្ក​គ្រោះ​ថា្នក់​ដល់​ប្រជាពលរដ្ឋ​ជិតខាង​ដែល​អាច​នឹង​កើតជា​ទំនាស់ ព្រោះ​នៅពេល​មានទំនាស់​វា​នឹង​ធ្វើឱ្យ​ពួកគាត់​ខាត​ពេលវេលា ខាត​ថវិកា​ព្រោះ​សំណង់​នោះ​នឹងត្រូវ​ផ្អាក​ជា​បណ្តោះអាសន្ន»។

ជាងនេះទៅទៀត​ឯកឧត្ដម​ក៏បាន​សង្កត់ធ្ងន់​ដល់​ក្រុមហ៊ុន​ដែល​ទទួល​ម៉ៅការ​សាងសង់​ត្រូវ​សិក្សា​ពី​សណ្ឋាន​ដី​ឱ្យបាន​ច្បាស់លាស់​ថា នៅក្នុង​រាជធានី​ដី​មួយផ្នែកធំ​ជា​ដី​បូម​ខ្សាច់​ចាក់​បំពេញ​មិនមែនជា​ដីឥដ្ឋ ឬ​ដីគោក​មាន​តាំង​យូរយារ​មក​នោះទេ។

ពាក់ព័ន្ធ​នឹង​ការស្រុត​បាក់​ដី​នេះ ឯកឧត្ដម​អភិបាល​រាជធានី​ភ្នំពេញ​បាន​លើកឡើងថា យើង​នឹងសិក្សា​មើល​នៅពេល​ក្រោយ​ទៅលើ​គម្រោង​អគារ​ប៊ូ​យ៉ុង​នោះ​ថា តើ​បាន​អនុវត្ដ​ទៅតាម​បទដ្ឋាន​ដែល​ក្រសួង​បាន​ដាក់ឱ្យ​អនុវត្ដ​ដែរឬទេ? ប៉ុន្ដែ​បញ្ហា​ចំពោះមុខ រដ្ឋបាល​សាលា​រាជធានី​ភ្នំពេញ​នឹង​ចុះ​ពិនិត្យ​ផ្ទាល់​ដើម្បី​ទប់ស្កាត់​នូវ​ការបាក់​ដី​បន្ដទៀត​ដែល​វា​អាច​នឹង​បង្ក​ឱ្យ​កាន់តែ​ធ្ងន់ធ្ងរ​ឡើង រហូតដល់​អាច​បណ្ដាល​ឱ្យ​បាក់​ដាច់​ដល់​ផ្លូវ​សហព័ន្ធ​រុស្សី​ជា​វិថី​ស្នូល និង​សំខាន់បំផុត​សម្រាប់​ភ្ញៀវ​ជាតិ និង​អន្ដរជាតិ​តែង​ធ្វើដំណើរ​ទៅមក​ជាប្រចាំ។

ឯកឧត្ដម​បន្ដថា៖ «ដោយសារតែ​គិតគូរ​លើ​បញ្ហា​បាក់​ដី​នេះហើយ ទើប​យើងខ្ញុំ​ចុះ​មកដល់​ការដ្ឋាន​ដើម្បីឱ្យ​គាត់​បន្ថែម​គ្រឿងចក្រ និង​បង្កើន​ការចាក់ដី​ទប់​ជើងទេរ ព្រោះ​បើ​យើង​ធ្វើ​កិច្ចការ​នេះ​មិនទាន់​ពេលវេលា​ទេនោះ  បញ្ហា​ធំ​នឹង​អាច​កើតមានឡើង ព្រោះ​ផ្លូវ​នេះ​ជា​ផ្លូវ​ដ៏​សំខាន់ និង​ជា​ផ្លូវ​អន្តរជាតិ​មួយ​សម្រាប់​រាជធានី​ភ្នំពេញ»៕

ការប្រឡង​មធ្យមសិក្សា​នា​ប៉ុន្មាន​ឆ្នាំ​ចុង​ក្រោយនេះ ជា​ព្រឹត្តិការណ៍​មួយ​ដែល​ធ្វើឱ្យ​មនុស្ស​គ្រប់គ្នា​នៅ​កម្ពុជា​យកចិត្តទុកដាក់ និង​ចាប់អារម្មណ៍។ ក្នុងនោះ​ក៏មាន​អភិបាលខេត្ត​ជាច្រើន​ខេត្ត​ចាប់ផ្តើម​រៀបចំ​ពិធី​ផ្តល់​បទពិសោធ និង​លើកទឹកចិត្ត​ឱ្យ​សិស្ស​នៅក្នុង​ខេត្ត​ដែល​លោក​គ្រប់គ្រង​ខិតខំ​ប្រឡង​ឱ្យបាន​ជាប់​និទ្ទេសល្អៗច្រើនជាង​ខេត្ត​ដទៃ​នៅ​កម្ពុជា។

ឯកឧត្តម​បណ្ឌិត ម៉ៅ ភិ​រុណ អភិបាលខេត្ត​កណ្តាល​បានលើកឡើង​នៅក្នុង​កម្មវិធី​សំណេះសំណាល​ជាមួយនឹង​សិស្សានុសិស្ស​ត្រៀមប្រឡង​បាក់​ឌុប​នៅ​ក្រុង​តាខ្មៅ​ថា សិស្សានុសិស្ស​ជា​ផ្នែក​មួយ​យ៉ាងសំខាន់​ក្នុង​របស់​សង្គម ដែល​ពួកគេ​ជា​អ្នក​បន្តវេន និង​ជា​ធនធាន​ដែល​សង្គម​ត្រូវការ​ដើម្បី​ដឹកនាំ​នាវា​សង្គម​នា​ថ្ងៃ​អនាគត​ឱ្យ​ឆ្ពោះទៅរក​វ​ឌ្ឍ​ភាព។ នៅ​ប៉ុន្មាន​ថ្ងៃ​ទៀត​នេះ​សិស្ស​ថ្នាក់​ទី 12 នឹងត្រូវ​ប្រឡង​មធ្យមសិក្សា​ទុតិយភូមិ ហេតុនេះ​សិស្សានុសិស្ស​ត្រូវ​ត្រៀមខ្លួន និង​ខិតខំ​ឱ្យ​អស់ពី​លទ្ធភាព​ដើម្បី​ឆ្លងកាត់​ដំណាក់កាល​ដ៏​មានតម្លៃ​មួយ​នេះ។

ឯកឧត្តម ម៉ៅ ភិ​រុណ បាន​មានប្រសាសន៍ថា៖ «បេក្ខជន​ដែល​ប្រឡង​ប្រកបដោយ​ភាពជោគជ័យ គឺ​អាស្រ័យ​លើ​ការចូលរួម​យ៉ាង​ពី​កត្តាសំខាន់ៗចំនួន4 គឺ កត្តា​គ្រូ កត្តា​សិស្ស កត្តា​សង្គម និង​កត្តា​ប្រព័ន្ធ​អប់រំ»។

ឯកឧត្តម ម៉ៅ ភិ​រុណ បានលើកឡើង​ផងដែរ​ថា កត្តា​សំខាន់​ទាំង4 នេះ​មាន​តួនាទី​សំខាន់​ក្នុងការ​បណ្តុះបណ្តាល​ដល់​យុវជន ដើម្បី​ស្ថាបនា​ប្រទេស​ឱ្យ​រីកចម្រើន​ដូច​បណ្តា​ប្រទេស​នានា​ក្នុង​សកលលោក។ ក្នុងនោះ លោកគ្រូ​អ្នកគ្រូ​ក៏មាន​តួនាទី​សំខាន់​ណាស់​ក្នុងការ​បណ្តុះបណ្តាល​សិស្ស​ឱ្យមាន​សមត្ថភាព​ខ្ពស់ និង​ប្រកបដោយ​ការទទួលខុសត្រូវ​ខ្ពស់។

ចំពោះ​សិស្ស​ខ្លួនឯង​វិញ​ក៏ត្រូវ​ខិតខំ​រៀនសូត្រ និង​រំលឹក​មេរៀន​ឱ្យ​បានល្អ​ដើម្បី​ត្រៀមប្រឡង​យក​សញ្ញាបត្រ​ដែល​នឹង​ចូល​មកដល់​នា​ថ្ងៃទី21 ខែសីហា ឆ្នាំ2017 ដោយ​ប្រកាន់យក​ទិស​ស្លោ​កថា «អ្នកចេះ​គឺជា​ប់» និង​ចងចាំ​ផងដែរ​ថា «ផ្លូវ​ទៅកាន់​ភាពជោគជ័យ​គឺ​គ្មាន​ដានជើង​មនុស្ស​ខ្ជិល​នោះទេ»៕