វល័ក្ខ - La Reine Media

កម្ពុជាផ្ដើមមាន Concept Store ដូចបណ្ដាប្រទេសក្នុងតំបន់អាស៊ីអាគ្នេយ៍ហើយ

ជាលើកដំបូងហើយសម្រាប់កម្ពុជា ដែលមានកន្លែងផ្ដល់នូវបទពិសោធក្នុងការធ្វើតេស្ដសមត្ថភាពកុំព្យូទ័រ ដូចនៅបណ្ដាប្រទេសក្នុងតំបន់អាស៊ីអាគ្នេយ៍ដែលវានឹងផ្ដល់នូវការសម្រេចចិត្តដ៏ល្អមួយដល់អ្នកចង់ទិញកុំព្យូទ័រយួរដៃយកទៅប្រើប្រាស់ក្នុងការងារ ការសិក្សា និងកម្សាន្តជាដើម។

តាមការបញ្ជាក់ពីលោក Phoung Sam Onn ប្រធានផ្នែកលក់ និងទីផ្សារនៃក្រុមហ៊ុន MSI កម្ពុជាបានឱ្យដឹងថា MSI Concept store នឹងជាទីកន្លែងតែមួយគត់ដែលផ្ដល់នូវបទពិសោធនៃបច្ចេកវិទ្យាចុងក្រោយបំផុតនៃគ្រប់ផលិតផលរបស់ MSI ខណៈទីនេះមានដាក់តាំងលក់គ្រប់ម៉ូដែលកុំព្យូទ័រ MSI និងគ្រឿងប្រើប្រាស់ផ្សេងៗទៀតដែលក្រុមហ៊ុននៅប្រទេសក្រៅមាន។ លោកបន្ដថា អ្នកគាំទ្រផលិតផល MSI ទាំងអស់អាចមកទស្សនានៅទីនេះដើម្បីមើល និងធ្វើតេស្ដសាកល្បងកុំព្យូទ័រ ដៃហ្គេម និងគ្រឿងតុបតែងផ្សេងទៀតបាន មុននឹងសម្រេចចិត្តទិញ។

លោកថ្លែងថា៖«ទីនេះជាកន្លែងដំបូងគេក្នុងប្រទេសកម្ពុជា ដែលយើងបង្កើតឡើងដើម្បីឱ្យអ្នកប្រើប្រាស់បានដឹងពីបច្ចេកវិទ្យាដំណាលគ្នានឹងបណ្ដាប្រទេសក្នុងតំបន់អាស៊ីអាគ្នេយ៍ដែរ»។

លោកបន្ដទៀតថា MSI ជាក្រុមហ៊ុនដំបូងគេក្នុងពិភពលោកដែលទទួលបានសិទ្ធិផ្តាច់មុខក្នុងការបំពាក់ Gaming Feature និងផ្គត់ផ្គង់គ្រប់ខ្សែស្រឡាយ Gaming Laptop ចាប់ពីកម្រិតទាបរហូតដល់កម្រិតខ្ពស់ ដើម្បីបំពេញតម្រូវការរបស់អ្នកលេងហ្គេមគ្រប់ប្រភេទ។

ហើយសម្រាប់ថ្ងៃនេះដែរ ក្រុមហ៊ុនក៏បានបញ្ចេញនូវម៉ូដែលថ្មីមានរាងស្អាត សមត្ថភាព GE63/73 Raider ដែលត្រូវបានរចនាយ៉ាងស្រស់ស្អាត ធ្វើពីអាលុយមីញ៉ូម បំពាក់ប្រព័ន្ធ Cooler Boost 5 ចុងក្រោយបង្អស់, Key នីមួយៗមានភ្លើងចម្រុះពណ៌ RGB backlight, 120Hz Gaming Display និង Dynaudio Giant Speaker។ រាល់បច្ចេកវិទ្យាដែលបំពាក់នៅលើ GE63/73 Raider បាននាំមកជាមួយនូវបទពិសោធនៃការលេងហ្គេមយ៉ាងល្អដល់អ្នកចូលចិត្តលេងហ្គេមទៅលើល្បឿនដំណើការលឿន កម្រិតនៃភាពច្បាស់ គុណភាពសំឡេង ការគ្រប់គ្រង និងការភ្ជាប់ជាមួយអ៊ីនធើណេតដោយមិនមានការរអាក់រអួលឡើយ៕

August 19, 2017

ដឹងទេថា វិស័យទេសចរណ៍រកប្រាក់ចូលជាតិបានប៉ុន្មានពាន់លានដុល្លារកាលពីឆ្នាំមុន?

ភ្នំពេញ៖ មិនធម្មតាទេ បើយើងក្រឡេកមើលជ្រុងមួយនៃវិស័យទេសចរណ៍នៅកម្ពុជា ដែលគេឱ្យឈ្មោះថាជាឧស្សាហកម្មគ្មានផ្សែង ឬមានផ្សែងតិចតួចសោះ តែអាចរកចំណូលចូលជាតិបានរាប់ពាន់លានដុល្លារក្នុងមួយឆ្នាំៗនោះ។

ក្រសួងទេសចរណ៍បានបង្ហាញរបាយការណ៍ចុងក្រោយមួយឱ្យដឹងថា ប្រាំមួយខែដើមឆ្នាំ2017 នេះកម្ពុជាទទួលបានទេសចរអន្តរជាតិប្រមាណ2,6លាននាក់ កើនឡើងប្រមាណ12.8% ធៀបនឹងឆ្នាំ2016ក្នុងរយៈពេលដូចគ្នា។ ដោយឈរលើគោលការណ៍នៃការអភិវឌ្ឍទេសចរណ៍ប្រកបដោយនិរន្តរភាព និងការទទួលខុសត្រូវ ទេសចរណ៍កម្ពុជាមានការកើនឡើងជាលំដាប់ពីមួយឆ្នាំទៅមួយឆ្នាំជាក់ស្តែងកាលពីឆ្នាំ2016 កម្ពុជាទទួលបានទេសចរអន្តរជាតិជាង 5លាននាក់ក្នុងកំណើន5% និងនាំចំណូលចូលជាតិបានប្រមាណ3400លានដុល្លារអាមេរិកស្មើនឹង13.5% នៃផលិតផលក្នុងស្រុកសរុប (GDP) និងបានបង្កើតការងារដោយផ្ទាល់ដល់ប្រជាពលរដ្ឋខ្មែរប្រមាណ62ម៉ឺននាក់ ស្មើនឹង13% នៃការងារសរុបនៅក្នុងវិស័យផ្សេងៗទៀត។

ជាចក្ខុវិស័យឆ្នាំ2020 កម្ពុជារំពឹងទទួលបានទេសចរអន្តរជាតិប្រមាណ 7លាននាក់ដែលអាចនឹងនាំចំណូលចូលជាតិបានប្រមាណ5ពាន់លានដុល្លារ និងបង្កើតការងារដោយផ្ទាល់ជិត1លាននាក់ ដូច្នេះយុវជនកម្ពុជានឹងមានឱកាសការងារកាន់តែច្រើនឡើងៗថែមទៀតនៅក្នុងវិស័យទេសចរណ៍នេះ៕

August 19, 2017

អ្នកវិភាគ៖ វិស័យមីក្រូហិរញ្ញវត្ថុឈានដល់របត់ថ្មីមួយ

ភ្នំពេញៈ ស្របពេលការដាក់ចេញបទប្បញ្ញត្តិនានាពីធនាគារជាតិនៃកម្ពុជា កាន់តែមានភាពតានតឹងជាងមុន អ្នកវិភាគកម្ពុជាបានលើកឡើងថា វិស័យមីក្រូហិរញ្ញវត្ថុបានឈានដល់របត់ថ្មីមួយ។

លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនEmerging Market Consulting បានថ្លែងឲ្យដឹងកាលពីម្សិលមិញថា វិស័យមីក្រូហិរញ្ញវត្ថុនៅកម្ពុជាបានឈានដល់របត់ថ្មីមួយដែលអ្នកវិនិយោគក្នុងវិស័យនេះបាននិងកំពុងយកចិត្តទុកដាក់ដើម្បីបន្តឈរជើងនៅលើទីផ្សារឱ្យបានដោយផ្អែកលើមូលដ្ឋានមួយចំនួនដូចជា៖

ទី1/ ការតម្រូវឱ្យដំឡើងដើមទុនចុះបញ្ជីដែលគ្រឹះស្ថានតូចៗមួយចំនួនត្រូវលក់ទៅឲ្យអ្នកវិនិយោគដែលមានលទ្ធភាព ឬច្របាច់បញ្ចូលគ្នាជាមួយគ្រឹះស្ថានដទៃ។ នេះជាសញ្ញាដ៏វិជ្ជមានមួយ ព្រោះសព្វថ្ងៃកម្ពុជាមានគ្រឹះស្ថានមីក្រូហិរញ្ញវត្ថុច្រើនពេករហូតដល់62គ្រឹះស្ថានដែលធ្វើឲ្យខ្វះប្រសិទ្ធភាពក្នុងការផ្តល់សេវា។

ទី2/ សម្ពាធដែលត្រូវបញ្ចុះអត្រាការប្រាក់តាមរយៈការប្រកួតប្រជែងខ្លាំង យុទ្ធសាស្ត្ររួមមាន កាត់បន្ថយថ្លៃដើមប្រតិបត្តិការ បង្កើនការផ្តល់កម្ចីខ្នាតមធ្យម និងខ្នាតធំ។

ទី3/ ការប្រើបច្ចេកវិទ្យាដើម្បីជំរុញប្រសិទ្ធភាពប្រតិបត្តិការ ដូចជាការសងត្រឡប់តាមទូរស័ព្ទដៃទំនើប ជាដើម។

ទី4/ វិស័យនេះត្រូវបន្តអប់រំមហាជនពីចំណេះដឹងហិរញ្ញវត្ថុ ដើម្បីឲ្យអតិថិជនប្រើកម្ចីត្រូវគោលដៅ ព្រោះនិរន្តរភាពជីវភាពរបស់អតិថិជន គឺជានិរន្តរភាពរបស់ស្ថាប័ន និងវិស័យទាំងមូល។

លោក ង៉ែត ជូ បានបន្តថា “វិស័យមីក្រូហិរញ្ញវត្ថុបានរួមចំណែកធ្វើឲ្យពិភពលោកស្គាល់កម្ពុជា ជាមោទនភាពគឺ ធនាគារអេស៊ីលីដា និងធនាគារស្ថាបនាបានឈានជើងចូលទីផ្សារប្រទេសឡាវ និងភូមា”៕

August 19, 2017

CVEA ចុះ MoU ជាមួយក្រុមហ៊ុនអចលនទ្រព្យថៃ

ភ្នំពេញៈ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)បានចុះកិច្ចព្រមព្រៀងសហប្រតិបត្តិការជាមួយសមាគមអចលនទ្រព្យថៃដើម្បីបង្កើនការផ្លាស់ប្តូរព័ត៌មានពីគ្នាទៅវិញទៅមក និងផលប្រយោជន៍ទាំងសងខាង។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាកាលពីថ្ងៃទី18 សីហាកន្លងមកនេះបានចុះកិច្ចព្រមព្រៀងជាមួយសមាគមអចលនទ្រព្យរបស់ប្រទេសថៃក្នុងពេលដែលលោក និងថ្នាក់ដឹកនាំ ព្រមទាំងសមាជិកសមាគមអ្នកវាយតម្លៃអចលនវត្ថុកម្ពុជាបានចូលរួមក្នុងសន្និសីទទាក់ទងនឹងវិស័យអចលនទ្រព្យនៅទីក្រុងបាងកក ប្រទេសថៃ។ ការចុះហត្ថលេខានេះជាផ្នែកមួយនៃកិច្ចសហប្រតិបត្តិការផ្លាស់ប្តូរព័ត៌មាន និងទាក់ទាញការវិនិយោគរវាងប្រទេសទាំងពីរ។

លោក គីម ហ៊ាង ធ្លាប់បានបង្ហាញពីមហិច្ឆតានាំក្រុមហ៊ុនធ្វើការក្នុងវិស័យអចលនទ្រព្យនៅកម្ពុជាឱ្យអាចទៅធ្វើការរកស៊ីបានជាមួយប្រទេសក្នុងតំបន់នាពេលអនាគតតាមរយៈការសហការជាមួយដៃគូ និងសមាគមជាមួយប្រទេសនៅក្នុងតំបន់។

ជាមួយគ្នានេះ ក្នុងអាណត្តិកន្លងមកលោក គីម ហ៊ាង ក៏បានចុះកិច្ចព្រមព្រៀងជាមួយសមាគមធ្វើការទាក់ទងនឹងវិស័យអចលនទ្រព្យជាច្រើនជាមួយប្រទេសក្នុងតំបន់ ពិសេសសមាគមដីធ្លីនៅសហរដ្ឋអាមេរិកដែលមានសមាជិកជាង1លាននាក់។

សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបច្ចុប្បន្នមានសមាជិកជាង100ក្រុមហ៊ុនដែលជាក្រុមហ៊ុនខ្មែរ និងបរទេសដែលបាននិងកំពុងដើរតួនាទីជាភ្នាក់ងារវាយតម្លៃ និងផ្តល់សេវាជួល-ទិញលក់អចលនទ្រព្យនៅកម្ពុជា៕

August 19, 2017

«Business Matching» អាចធ្វើឱ្យទំហំពាណិជ្ជកម្មទេ្វភាគីថៃ-កម្ពុជាជោគជ័យ

ភ្នំពេញ – នៅពេលដែលការតាំងពិព័រណ៍ផលិតផលនៃសហគ្រាសខ្នាតតូច-មធ្យម (SME) ថៃ នៅមជ្ឈមណ្ឌលកោះពេជ្រកំពុងតែបន្ដដំណើរការនៅឡើយ។ កាលថ្ងៃ17 ខែសីហា ឆ្នាំ2017 មានបណ្ដាក្រុមហ៊ុនថៃជាច្រើនបានរៀបចំកម្មវិធី Business Matching ដើម្បីចាប់ដៃគូពាណិជ្ជកម្មជាមួយកម្ពុជា។

លោកស្រី ជីរ៉ាណាន់ វង្សមង្គល តំណាងពាណិជ្ជកម្មថៃប្រចាំខេត្ដសៀមរាបបានបញ្ជាក់ថា ការរៀបចំកម្មវិធី «Business Matching» គឺដើម្បីផ្ដល់ឱកាសឱ្យពាណិជ្ជករថៃ និងកម្ពុជា អាចជួបពិភាក្សាគ្នានិងស្វែងយល់ចិត្ដគ្នាមុននឹងឈានទៅដល់ការធ្វើកិច្ចសហប្រតិបត្ដិការរួមគ្នា។ លោកស្រីបន្ដថា៖«ការជួបពិភាក្សាគ្នានេះមិនប្រាកដថា ក្រុមហ៊ុននីមួយៗជួបជជែកគ្នាតែម្ដងហើយបានជោគជ័យនោះទេ។ ក្រុមហ៊ុនខ្លះមក5ដងទើបអាចចាប់ដៃគូសហការគ្នាក៏មាន។ដូច្នេះហើយខ្ញុំតែងតែប្រាប់ទៅក្រុមហ៊ុនទាំងនោះថា ចង់ធ្វើពាណិជ្ជកម្មជោគជ័យត្រូវតែមានភាពអំណត់ តែទោះជាយ៉ាងណាក៏យើងសប្បាយចិត្ដដែរ ព្រោះកិច្ចការដែលយើងធ្វើកន្លងមកតែងតែទទួលបានជោគជ័យតមករហូត»។

ពេលបច្ចុប្បន្នក្រៅក្រុមហ៊ុនធំៗរបស់ថៃ ក៏មាន SME ជាច្រើនដែរដែលមានការចាប់អារម្មណ៍ចំពោះកិច្ចសហការក្នុងការធ្វើពាណិជ្ជកម្មជាមួយកម្ពុជា។ មូលហេតុមកពីមានក្រុមហ៊ុនធំៗជាច្រើនក្រោយពីបានមកធ្វើពាណិជ្ជកម្មនៅកម្ពុជាហើយតែងតែលើកយកពីចំណុចវិជ្ជមានទៅផ្សព្វផ្សាយបន្ដតាមរយៈការគាំទ្រលើគុណភាព។ ដូច្នេះហើយទើបធ្វើឱ្យ SME តាមបណ្ដាខេត្ដនានាដែលមានសក្ដានុពលក្នុងការបង្កើតផលិតផលមានបំណងចាប់ដៃគូពាណិជ្ជករនៅប្រទេសកម្ពុជា។

តំណាងពាណិជ្ជកម្មថៃប្រចាំខេត្ដសៀមរាបបន្តថា ៖ «បច្ចុប្បន្នមិនមែនមានតែខេត្ដ Chanthaburi ទេដែលមានការចាប់អារម្មណ៍ធ្វើពាណិជ្ជកម្មនៅក្នុងប្រទេសកម្ពុជា គឺនៅមានខេត្ដនៅតាមព្រំដែនប្រទេសកម្ពុជា ដូចជាខេត្ដ រ៉ាក់យ៉ង ត្រាត ស៊ីសាកេត ជាដើមពួកគាត់សុទ្ធតែមានបំណងចង់មកចាប់ដៃគូពាណិជ្ជកម្មនៅជាមួយកម្ពុជា»៕

August 19, 2017

ហេតុអ្វីយុវជនគួរបង្កើតអាជីវកម្មថ្មី (Start Up)?

នៅកម្ពុជានាពេលប៉ុន្មានឆ្នាំចុងក្រោយនេះ គ្រប់ស្ថាប័នទាំងផ្នែកអប់រំ ពាណិជ្ជកម្ម និងស្ថាប័នដទៃទៀត ហាក់កំពុងយកចិត្តទុកដាក់ និងជំរុញការបណ្តុះបណ្តាលសហគ្រិនភាពដើម្បីជួយយុវជនឱ្យបង្កើតអាជីវកម្មថ្មី (Start Up) ដើម្បីចូលរួមចំណែកប្រកួតប្រជែងជាមួយប្រទេសដទៃប្រកបដោយភាពស្វាហាប់។

រដ្ឋមន្ត្រីក្រសួង អប់រំ យុវជន និងកីឡា ឯកឧត្តម ហង់ ជួនណារ៉ុន បានលើកឡើងថា បច្ចុប្បន្ននេះ ក្រសួងអប់រំបានព្យាយាមពង្រីកការបណ្តុះបណ្តាលពីជំនាញសហគ្រិនភាពដល់យុវជនកម្ពុជា ដើម្បីធ្វើយ៉ាងណាឱ្យគាត់ចេះបង្កើតអាជីវកម្មដោយខ្លួនឯង ចេះលក់ និងចេះបង្កើតទំនាក់ទំនងជាដើម។ ការដែលយើងធ្វើបែបនេះគឺដើម្បីផ្តល់ឱកាសឱ្យយុវជនបានបញ្ចេញសមត្ថភាព និងបង្កើនចំនួនសហគ្រិននៅក្នុងប្រទេសរបស់យើងឱ្យកាន់តែមានចំនួនច្រើនឡើង។

ឯកឧត្តម ហង់ ជួនណារ៉ុន បានមានប្រសាសន៍ថា៖ «នៅពេលដែលយើងមានសហគ្រិនច្រើន ពួកគេនឹងអាចស្រូបទាញកម្លាំងពលកម្មនៅក្នុងស្រុក ហើយក៏ជាកម្លាំងមួយដែលអាចប្រកួតប្រជែងទៅអន្តរជាតិផងដែរ»។ ពាក់ព័ន្ធនឹងបញ្ហានេះដែរ ស្ថាបនិកសហគ្រាសសង្គម ផ្ទះតាមក្តីប្រាថ្នា លោក ហាវ គង់ងី បានថ្លែងថា ការបង្កើតអាជីវកម្មថ្មីអាចផ្តល់ឱកាសឱ្យយើងបានជួយដល់មនុស្សជាច្រើនផ្សេងទៀតដែលកំពុងត្រូវការជំនួយពីអាជីវកម្មរបស់យើង។

នៅពេលដែលយើងបានបង្កើតអាជីវកម្មថ្មី យើងអាចច្នៃផលិតផល និងគោលបំណងនៃសេវាកម្មរបស់យើងដើម្បីបម្រើឱ្យផលប្រយោជន៍សង្គម និងអាចជួយមនុស្សជាច្រើនផ្សេងទៀតដែលកំពុងត្រូវការការងារ។

លោក ហាវ គង់ងី បាននិយាយថា៖ «ខ្ញុំចាប់ផ្តើមអាជីវកម្ម ដោយសារខ្ញុំមើលឃើញពីចំណុចខ្វះខាតរបស់សង្គម។ ពីមួយថ្ងៃទៅមួយថ្ងៃប្រជាជនមានការកើនឡើង ហើយផ្ទះជាតម្រូវការចាំបាច់សម្រាប់ពួកគេ ហេតុនេះការបង្កើតអាជីវកម្មផ្ទះតាមក្តីប្រាថ្នានេះ គឺដើម្បីសង់ផ្ទះក្នុងតម្លៃសមរម្យ និងជួយដល់អ្នកដែលមានចំណូលទាបឱ្យសម្រេចក្តីប្រាថ្នារបស់ខ្លួនដោយមានផ្ទះសមរម្យមួយ»។

យុវជនគួរស្វែងរកបញ្ហានានាដែលជាចំណុចខ្វះខាត ឬជាតម្រូវការរបស់មនុស្សដើម្បីបង្កើតអាជីវកម្មសម្រាប់ដោះស្រាយបញ្ហាទាំងអស់នោះ៕

August 19, 2017

ក្រុមហ៊ុនផលិតស្រាបៀរកម្ពុជា (CBL) ប្រគល់រង្វាន់លើកទី3 ជូនដល់អ្នកណែនាំរោងការរបស់ខ្លួន

ភ្នំពេញ៖ នៅរសៀលថ្ងៃសុក្រ ទី18 ខែសីហា ឆ្នាំ 2017 នៅក្រុមហ៊ុនផលិតស្រាបៀរកម្ពុជា (CBL) បានរៀបចំកម្មវិធីប្រគល់រង្វាន់លើកទី3សម្រាប់អ្នកណែនាំរោងការឱ្យជាវស្រាបៀរ Heineken, Tiger, ABC, Anchor, Gold Crown និង Gold Crown Stout សម្រាប់កម្មវិធីអាពាហ៍ពិពាហ៍។ កម្មវិធីនេះមានការអញ្ជើញចូលរួមពីថ្នាក់គ្រប់គ្រងក្រុមហ៊ុន ស្រាបៀរកម្ពុជា (CBL) អ្នកដែលបានឈ្នះរង្វាន់ រួមជាមួយភ្ញៀវកិត្តិយស និងអ្នកសារព័ត៌មានជាច្រើន។

អ្នកណែនាំរោងការចំនួន3នាក់បានឈ្នះរង្វាន់រ៉ឺម៉កកង់3 ដែលមានបិទស្លាកសញ្ញាស្រាបៀរអាន់ឆ័រយ៉ាងស្រស់ស្អាតជាមួយនឹងស្រាបៀរអាន់ឆ័រដបចំនួន 80 កេស ពីកម្មវិធីចាប់រង្វាន់លើកទី3 ដែលបានធ្វើឡើងនៅក្នុងកម្មវិធី Anchor Fun Zone របស់ទូរទស្សន៍ PNN កាលពីថ្ងៃអាទិត្យ ទី 30 ខែកក្កដា ឆ្នាំ 2017 កន្លងមក។

កម្មវិធីប្រគល់រង្វាន់លើកទី3នេះបានរៀបចំឡើងក្នុងគោលបំណងថ្លែងអំណរគុណ និងបង្ហាញពីការយកចិត្តទុកដាក់ខ្ពស់របស់ក្រុមហ៊ុនចំពោះអ្នកដែលបានណែនាំរោងការឱ្យជាវស្រាបៀរ Heineken, Tiger, ABC, Anchor, Gold Crown និង Gold Crown Stout សម្រាប់កម្មវិធីអាពាហ៍ពិពាហ៍។

សូមកុំទាន់អស់សង្ឃឹម លោកអ្នកក៏អាចមានឱកាសឈ្នះរង្វាន់រថយន្តដឹកទំនិញខ្នាតតូចជាមួយស្រាបៀរអាន់ឆ័រដប ចំនួន 150 កេស សម្រាប់អ្នកណែនាំរោងការរូបណាដែលបានណែនាំរោងការច្រើនជាងគេសំរាប់កម្មវិធីបន្ទាប់។ ដើម្បីចូលរួមកម្មវិធីឈ្នះរង្វាន់លើកទឹកចិត្តសម្រាប់អ្នកណែនាំរោងការនេះ ម្ចាស់ហាងលក់ភេសជ្ជៈ អ្នកផ្គត់ផ្គង់ម្ហូប (ចុងភៅ) ដេប៉ូចែកចាយ មិត្តភ័ក្តិ និងអ្នកផ្សេងទៀត គ្រាន់តែណែនាំស្រាបៀររបស់ក្រុមហ៊ុន ដូចជា ស្រាបៀរ Heineken, Tiger, ABC, Anchor និង Gold Crown ក្នុងកម្មវិធីអាពាហ៍ពិពាហ៍ និងធ្វើការចុះឈ្មោះមកកាន់ក្រុមការងារបម្រើសេវាអតិថិជនរបស់ក្រុមហ៊ុន ស្រាបៀរកម្ពុជា (CBL) តាមរយៈលេខទូរស័ព្ទ 011 222 400 / 011 333 500 ជាការស្រេច ៕

August 19, 2017

ម្ចាស់គ្រឹះស្ថានហិរញ្ញវត្ថុលើកឡើងពីប្រព័ន្ធសុវត្ថិភាព ATM

ភ្នំពេញៈ បញ្ហាសុវត្ថិភាពនៅតាមបណ្តាទូ ATM នានាអាចជាកង្វល់មួយរបស់ធនាគារ និងគ្រឹះស្ថានហិរញ្ញវត្ថុដែលមានដាក់សេវាកម្មមួយនេះ ប៉ុន្តែអ្នកជំនាញក្នុងវិស័យនេះអះអាងថា ទូ ATM នីមួយៗមានប្រព័ន្ធសុវត្ថិភាពខ្ពស់ណាស់លើករណីលួចលុយ ប៉ុន្តែការចុចបំផ្ទុះដោយប្រការណាមួយជារឿងដែលគេគិតមិនដល់។

លោក អ៉ីន ចាន់នី នាយកប្រតិបត្តិធនាគារអេស៊ីលីដា ភីអឹលស៊ីបានថ្លែងថា ប្រព័ន្ធសុវត្ថិភាពនៅតាមទូATMនីមួយៗដែលបានដាក់នៅតាមទីសាធារណៈ សុទ្ធតែមានភ្ជាប់បណ្តាញអគ្គិសនី កាមេរ៉ាសុវត្ថិភាព និងភ្ជាប់បណ្តាញមកការិយាល័យកណ្តាល24ម៉ោងដែលមិនអាចឲ្យអ្នកណាម្នាក់លួចលុយបានងាយស្រួលឡើយ។ លោកបន្តថា ករណីបំផ្ទុះ ឬលួចលុយពីទូATM មិនមែនកើតមានតែនៅកម្ពុជាទេ តែក៏មានកើតឡើងនៅតាមបណ្តាប្រទេសនានាដែរ ប៉ុន្តែដើម្បីបង្កើនសុវត្ថិភាពរបស់វា យើងគួរតែចូលរួមការពារទាំងអស់គ្នា។

លោកបន្តថា “ទូ ATM ជាទ្រព្យរបស់ឯកជនមែន តែវាបម្រើផលប្រយោជន៍សាធារណៈដែលគួរតែមានការចូលរួមការពារទាំងអស់គ្នា។ លោកបន្តថា “ទោះជាយ៉ាងណាក៏យើងមានការព្រួយបារម្ភផងដែរទាក់ទងនឹងបញ្ហាសុវត្ថិភាពទូ ATM នៅកម្ពុជាយើង។

កាលពីពេលថ្មីៗនេះមានករណីយកគ្រាប់បែកដាក់នៅទូ ATM ស្ថិតនៅតាមបណ្តោយមហាវិថីសហព័ន្ធរុស្ស៊ី និងកាលពីសប្តាហ៍មុនមានករណីជនល្មើសបានយកថ្នាំបាញ់ទៅលើកាមេរ៉ាទូ ATM របស់ធនាគារ ABA ស្ថិតនៅក្នុងទីក្រុងកែប ដែលបានបណ្តាលឲ្យផ្ទុះ និងខូចខាតប្រាក់អស់ជាង1ម៉ឺនដុល្លារផងដែរ។

ប្រធានស្តីទីសមាគមធនាគារកម្ពុជាលោក ឆារស៍ វ៉ាន់ បានថ្លែងថា តាមធម្មតាទូATMមានការបំពាក់កាមេរ៉ា និងមានប្រព័ន្ធការពារ 24ម៉ោងរួចទៅហើយនៅតាមធនាគារនីមួយៗ ប៉ុន្តែករណីបំផ្ទុះទូ ATM នេះវាហួសពីសមត្ថភាពកាមេរ៉ាឬ សមត្ថកិច្ចអាចគ្រប់គ្រងបាន ព្រោះករណីនេះធ្លាប់កើតមាននៅប្រទេសម៉ាឡេស៊ី និងប្រទេសថៃរួចមកហើយមុនកើតមាននៅកម្ពុជា។

លោកបន្តថា “យើងតែងតែធ្វើការជាមួយអាជ្ញាធរ ប៉ុន្តែការដាក់គ្រាប់បែកឬគ្រឿងបំផ្ទុះជារឿងលំបាក ព្រោះពេលយើងដើរចេញគេអាចដាក់នៅពេលយើងមិននៅ ហើយយើងក៏មិនអាចដាក់សន្តិសុខឱ្យយាម 24ម៉ោងប្រចាំការនៅតាមទូនីមួយៗបានដែរ”៕

August 19, 2017

លោក Conte ទទួលស្គាល់ថា ក្លិប Chelsea នៅមានការងារច្រើនទៀតដែលត្រូវអភិវឌ្ឍ

លោក Antonio Conte អ្នកចាត់ការទូទៅរបស់ក្លិប Chelsea បានទទួលស្គាល់ថា អាចនឹងមានរយៈពេលជាច្រើនឆ្នាំទៀតមុនពេលក្រុមរបស់លោកមានសមត្ថភាពក្នុងការគ្រប់គ្រងទាំងការប្រកួតក្នុងផ្ទះខ្លួនឯង និងយុទ្ធនាការក្រៅប្រទេស។

បើទោះបីលោក Conte បានឈ្នះពានក្របខ័ណ្ឌ Premier League ក្នុងរដូវកាលជាលើកទី1របស់គាត់ជាមួយនឹង Chelsea ក៏ដោយ ប៉ុន្តែគ្រូបង្វឹកនៃក្រុមតោខៀវរូបនេះបានអះអាងថា ក្រុមម្ចាស់ជើងឯកមួយនេះនៅតែខ្វះនូវមូលដ្ឋានផ្សេងៗដែលត្រូវការជាចាំបាច់ដើម្បីប្រជែងដណ្តើមពានធំៗជារៀងរាល់ឆ្នាំ។

ជាមួយនឹងការស្ថិតក្រោមសម្ពាធក្រោយពីក្រុម Chelsea បានចាប់ផ្តើមទាំងការខកចិត្តនៅរដូវកាលនេះ លោក Conte បានផ្ញើសារដ៏ជាក់លាក់មួយទៅកាន់លោក Roman Abramovich ដែលជាម្ចាស់កម្មសិទ្ធិរបស់ក្លិប Chelsea ខណៈដែលគ្រូបង្វឹករូបនេះបានបង្ហាញពីរបៀបដែលលោក Mauricio Pochettino ត្រូវបានផ្តល់ពេលវេលាឲ្យក្នុងការផ្លាស់ប្តូរក្រុម Tottenham ឲ្យទៅជាគូប្រជែងដណ្តើមពានអស់រយៈពេលជាច្រើនរដូវកាលកន្លងមកនេះ។ លោក Conte ដែលក្រុមរបស់លោកនឹងត្រូវធ្វើដំណើរទៅប្រកួតជាមួយនឹងក្រុម Tottenham នាកីឡដ្ឋាន Wembley កាលពីថ្ងៃអាទិត្យនោះជឿជាក់ថា លោកត្រូវការពេលវេលាដូចគ្នានេះមុនពេលក្រុម Chelsea មានសមត្ថភាពគ្រប់គ្រងទាំងក្នុងក្របខ័ណ្ឌ Premier League និង Champions League។ លោក Conte បានឲ្យដឹងថា៖ «ក្រុម Tottenham បានចាប់ផ្តើមធ្វើការជាមួយនឹងលោក Pochettino កាលពី3ឆ្នាំមុន។ គ្រូបង្វឹករូបនេះមានពេលវេលាគ្រប់គ្រាន់ក្នុងការធ្វើការជាមួយនឹងកីឡាករដដែលៗ និងដើម្បីព្យាយាមបង្កើនស្ថានភាពនេះ»។

គ្រូបង្វឹកសញ្ជាតិអ៊ីតាលីរូបនេះបានបន្ថែមទៀតថា៖ «សម្រាប់រាល់គ្រូបង្វឹកទាំងអស់ វាពិតជាសំខាន់ណាស់ក្នុងការមាននិរន្តរភាពនេះ។ នៅពេលដែលអ្នកមកដល់ក្លិបមួយ អ្នកមិនដឹងពីអ្វីដែលអ្នកនឹងរកឃើញឡើយ»។ ការប្រកួតនៅរាត្រីថ្ងៃអាទិត្យនេះ នឹងចាប់ផ្តើមនៅម៉ោង10យប់៕

ការជួបគ្នា3លើកចុងក្រោយរវាងក្រុមទាំងពីរ
23.04.17          Chelsea 4-2 Tottenham
05.01.17          Tottenham 2-0 Chelsea
27.11.16          Chelsea 2-1 Tottenham

ប្រភពពី៖ Sport24

August 19, 2017

ក្រសួងទុកឱសានវាទឱ្យក្រុមហ៊ុនបណ្ដាញទូរស័ព្ទទាំងអស់ត្រឹមថ្ងៃទី1 ខែកញ្ញា

និយតករទូរគមនាគមន៍កម្ពុជាបានកោះអញ្ជើញប្រតិបត្តករទូរស័ព្ទចល័តទាំង 7 រួមមានក្រុមហ៊ុនស្មាត សែលកាត មិត្តហ្វូន CADCOMMS, Seatel, EMAXX និង CooTel មករំឭកឡើងវិញនូវសារាចរណែនាំអន្តរក្រសួងប្រៃសណីយ៍ និងទូរគមនាគមន៍ និងក្រសួងមហាផ្ទៃ និងច្បាប់ស្តីពីទូរគមនាគមន៍ ដោយទុកឱសានវាទត្រឹមថ្ងៃទី1 ខែកញ្ញាត្រូវបញ្ឈប់ឱ្យអស់នូវការលក់ ឬចែកចាយស៊ីមកាតទូរស័ព្ទចល័តដោយមិនយកអត្តសញ្ញាណបណ្ណ ឬឯកសារសម្គាល់អត្តសញ្ញាណពីអ្នកទិញ ឬជួលជាវស៊ីមកាតទូរស័ព្ទចល័ត។

កិច្ចប្រជុំនេះ ដឹកនាំដោយនិយតករទូរគមនាគមន៍កម្ពុជា អគ្គស្នងការនគរបាលជាតិនៃក្រសួងមហាផ្ទៃ និងអគ្គាធិការដ្ឋាននៃក្រសួងប្រៃសណីយ៍ និងទូរគមនាគមន៍ ក្រោមអធិបតីភាពឯ.ឧ ម៉ូវ ចរិយា ប្រធាន ន.ទ.ក។ ការលក់ស៊ឹមកាត់ដោយគ្មានឯកសារទាំងនោះគឺជាបុព្វហេតុនាំឱ្យប៉ះពាល់សណ្តាប់ធ្នាប់សាធារណៈ និង សន្តិសុខជាតិ និងមិនអាចរកមុខជនប្រព្រឹត្តឃើញ។

និយតករទូរគមនាគមន៍កម្ពុជា កំណត់ឱ្យក្រុមហ៊ុនទាំងនោះត្រូវបញ្ឈប់ទាំងស្រុងនូវការបើកឱ្យដំណើរមុនរាល់ស៊ឹមកាតមិនទាន់លក់ឬចែកចាយ (Pre-Active) និងហាមបើកឱ្យដំណើរការនៅពេលអ្នកទិញ ឬអ្នកចែកចាយបន្តមិនមានអត្តសញ្ញាណបណ្ណ ឬឯកសារសម្គាល់អត្តសញ្ញាណត្រឹមត្រូវត្រឹមថ្ងៃទី1 ខែកញ្ញាឆ្នាំ 2017។ ក្រុមហ៊ុនទាំងទូរស័ព្ទទាំងអស់ត្រូវធ្វើលិខិតជាលាយលក្ខណ៍អក្សរធានាថា ខ្លួនពិតជាអនុវត្តបាន100% តាមការកំណត់នេះ។ ចាប់ពីថ្ងៃទី1 ខែកញ្ញាឆ្នាំ 2017 និយតករទូរគមនាគមន៍កម្ពុជានឹងអនុវត្តតាមច្បាប់ដោយមិនយោគយល់ឡើយ៕

August 19, 2017

Author: វល័ក្ខ